23 December 2018

ਜਦੋਂ ਮਿਕਸ ਹੋ ਗਿਆ ਚਿੱਟਾ ਅਤੇ ਨੀਲਾ ਸਿਆਸੀ ਬਾਣਾ...

*  ਅਕਾਲੀ ਦਲ ਦੀ ਸ਼ਤਰੰਜੀ ਬਿਸਾਤ ’ਚ ਉਲਝ ਕਾਂਗਰਸੀ ਦੇ ਸਾਹਮਣੇ ਡਟੇ ਕਾਂਗਰਸੀ 
* ਕਾਂਗਰਸੀ ਸਰਪੰਚ ਬਣਨ ਲਈ ਉਤਾਵਲੇ, ਅਕਾਲੀ ਦਲ ਦੀ ਨਜ਼ਰ ਪੰਚਾਂ ’ਤੇ 
* ਅਖੌਤੀ ਸਿਆਸੀ ਸਲਾਹਕਾਰ ਅਤੇ ਚਹੇਤਾ ਪੱਤਰੇ ਵਾਚ ਗਏ
                                                    
                                                          ਇਕਬਾਲ ਸਿੰਘ ਸ਼ਾਂਤ 
ਲੰਬੀ: ਬਾਦਲਾਂ ਦੇ ਹਲਕੇ ਲੰਬੀ ਵਿੱਚ ਸਰਪੰਚੀ ਦੀ ਚਾਹਤ ਨੇ ਅਕਾਲੀ ਅਤੇ ਕਾਂਗਰਸੀ ਸਿਆਸਤ ਰਲਗਡ ਕਰ ਦਿੱਤੀ ਹੈ। ਸਰਪੰਚੀਆਂ ਦੇ ਗੇੜ ’ਚ ਸਿਆਸੀ ਵਫ਼ਾਦਾਰੀਆਂ ਦਾ ਅੰਦਾਜ਼  ਬਦਲ ਗਿਆ ਹੈ। ਭਾਈਚਾਰੇ, ਜਾਤਾਂ, ਗੋਤਾਂ ਅਤੇ ਪੱਤੀਆਂ ਦੇ ਆਧਾਰ ਮੂਹਰੇ ‘ਨੀਲੇ’ ਅਤੇ ‘ਚਿੱਟੇ’ ਦਾ ਫ਼ਰਕ ਫ਼ਿੱਕਾ ਪੈ ਗਿਆ ਹੈ। ਸਰਪੰਚੀ ਦੀ ਦੌੜ ’ਚ ਬੇਲਗਾਮ ਹੋਏ ਕਾਂਗਰਸੀਆਂ ਨੇ ਅਕਾਲੀਆਂ ਦੀ ਮੱਦਦ ਨਾਲ ਕਾਂਗਰਸੀਆਂ ਖਿਲਾਫ਼ ਹੀ ਝੰਡੇ ਗੱਡ ਦਿੱਤੇ ਹਨ। ਹਲਕੇ ਦੇ ਬਹੁਤੇ ਪਿੰਡਾਂ ’ਚ ਅਕਾਲੀ ਪਿੱਛੇ ਰਹਿ ਕੇ ਕਾਂਗਰਸੀਆਂ ਜਰੀਏ ਆਪਣੀ ਸਿਆਸੀ ਗੇਮ ਘੁੰਮਾ ਰਹੇ ਹਨ। ਕਾਂਗਰਸੀ ਦਾ ਜ਼ਿਆਦਾ ਧਿਆਨ ਸਿਰਫ਼ ਸਰਪੰਚੀਆਂ
ਵੱਲ ਹੈ। ਜਿਸ ਤਹਿਤ ਕਾਂਗਰਸ ਪੰਚਾਇਤੀ ਚੋਣਾਂ ਤੋਂ ਪਹਿਲਾਂ ਹੀ ਪਿੰਡਾਂ ’ਚ ਦੋ ਧੜਿਆਂ ’ਚ ਵੰਡੀ ਗਈ। ਦੂਜੇ ਪਾਸੇ ਅਕਾਲੀ ਦਲ ਪੰਚਾਇਤੀ ਕੰਮਕਾਜ਼ ’ਤੇ ਕਮਾਂਡ ਬਣਾਉਣ ਲਈ ਸਰਪੰਚਾਂ ਨਾਲੋਂ ਬਹੁਗਿਣਤੀ ਪੰਚ ਉਮੀਦਵਾਰ ਨੂੰ ਜਿਤਾਉਣ ’ਤੇ ਜ਼ੋਰ ਲਗਾ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਲੰਬੀ ਹਲਕੇ ’ਚ ਵਿਰੋਧੀਆਂ ਪਾਰਟੀ ਦੇ ਸਰਪੰਚ ’ਤੇ ਦਾਅ ਖੇਡਣ ਦੀ ਪਿਰਤ ਪੰਜ ਸਾਲ ਪਹਿਲਾਂ ਕਾਂਗਰਸੀਆਂ ਨੇ ਸ਼ੁਰੂ ਕੀਤੀ ਸੀ, ਜਿਸਨੂੰ ਐਤਕੀਂ ਅਕਾਲੀਆਂ ਨੇ ਅਪਣਾ ਲਿਆ । ਲੰਬੀ ਹਲਕੇ ’ਚ ਵੜਿੰਗਖੇੜਾ, ਭੀਟੀਵਾਲਾ, ਬਲੋਚਕੇਰਾ, ਆਧਨੀਆਂ, ਭਾਗੂ, ਡੱਬਵਾਲੀ ਰਹੁੜਿਆਂਵਾਲੀ, ਸਹਿਣਾਖੇੜਾ, ਖੁੱਡੀਆਂ ਗੁਲਾਬ ਸਿੰਘ, ਖੁੱਡੀਆਂ ਮਹਾਂ ਸਿੰਘ, ਭਗਵਾਨਪੁਰਾ, ਤੱਪਾਖੇੜਾ ਅਤੇ ਖੇਮਾਖੇੜਾ ਆਦਿ ’ਚ ਸਰਪੰਚੀ ਚੋਣ ਵਿੱਚ ਕਾਂਗਰਸੀਆਂ ਹੀ ਕਾਂਗਰਸੀਆਂ ਖਿਲਾਫ਼ ਖੜ੍ਹੇ ਹੋਏ ਹਨ। ਕਾਂਗਰਸ ਲੀਡਰਸ਼ਿਪ ਪਿੰਡਾਂ ’ਚ ਕਾਂਗਰਸੀਆਂ ਦੇ ਟਾਕਰੇ ਰੋਕਣ ’ਚ ਬੇਵੱਸ ਸਾਬਤ ਹੋਈ। ਇਸ ਨਾਲ ਬਾਦਲਾਂ ਦੇ ਸਿਆਸੀ ਗੜ੍ਹ ’ਚ ਕਾਂਗਰਸ ਸਫ਼ਾਂ ਦੀ ਗੈਰ ਵਿਉਂਤਬੱਧ ਨੀਤੀ ਉਜਾਗਰ ਹੋਈ ਹੈ। ਜਦੋਂਕਿ ਅਕਾਲੀ ਦਲ ਨੇ ਇੱਕ-ਇੱਕ ਪੰਚ ’ਤੇ ਵੀ ਬਾਜ਼ ਅੱਖਾਂ ਨਾਲ ਨੀਤੀ ਤੈਅ ਕੀਤੀ। ਪੰਚਾਇਤੀ ਚੋਣਾਂ ਦੇ ਮੌਜੂਦਾ ਹਾਲਾਤਾਂ ਤਹਿਤ ਅਗਾਮੀ ਲੋਕਸਭਾ ਚੋਣਾਂ ’ਚ ਲੰਬੀ ’ਚ ਕਾਂਗਰਸ ਜੜ੍ਹਾਂ ਨੂੰ ਵੱਡਾ ਖੋਰਾ ਲੱਗਣ ਦੇ ਆਸਾਰ ਹਨ। ਪਿੰਡ ਬਲੋਚਕੇਰਾ ’ਚ ਕਾਂਗਰਸ ਆਗੂ ਸੁਖਬੀਰ ਸਿੰਘ ਬਲੋਚਕੇਰਾ ਅਤੇ ਕਾਂਗਰਸ ਆਗੂ ਸੰਤੋਖ ਸਿੰਘ ਭੁੱਲਰ ਵਕੀਲ ਦੀਆਂ ਪਤਨੀਆਂ ਚੋਣ ਆਹਮੋ-ਸਾਹਮਣੇ ਹਨ। ਅਰਨੀਵਾਲਾ ਵਜੀਰਾਂ ਵਿੱਚ ਤਾਂ ਤਿੰਨ ਕਾਂਗਰਸੀ ਸਰਪੰਚ ਉਮੀਦਵਾਰ ਖੜ੍ਹੇ ਹੋਏ ਹਨ। ਇੱਕ ਪਿੰਡ ’ਚ ਤਾਂ ਅਕਾਲੀਆਂ ਨੇ ਸੀਨੀਅਰ ਕਾਂਗਰਸੀ ਆਗੂ ਦੇ ਸੀਰੀ ਨੂੰ ਹੀ ਸਰਪੰਚ ਖੜ੍ਹਾ ਕਰ ਦਿੱਤਾ ਸੀ। 
ਮੰਡੀ ਕਿੱਲਿਆਂਵਾਲੀ ’ਚ ਕਾਂਗਰਸ ਪਾਰਟੀ ਨੂੰ ਸਰਪੰਚੀ ਉਮੀਦਵਾਰ ਦੀ ਭਾਲ ’ਚ ਵੱਡੀ ਮਸ਼ੱਕਤ ਕਰਨੀ ਪਈ। ਕਸਬੇ ਦੀਆਂ ਸਮੁੱਚੀਆਂ ਯੂਨੀਅਨਾਂ ’ਤੇ ਕਾਬਜ਼ ਪੇਂਡੂ ਕਾਂਗਰਸੀਆਂ ਦੀਆਂ ਕਾਰਗੁਜਾਰੀ ਤੇ ਲੀਡਰਸ਼ਿਪ ਦੀ ਅਣਦੇਖੀ ਕਾਰਨ ਨਾਰਾਜ਼ ਟਕਸਾਲੀ ਕਾਂਗਰਸੀ ਆਗੂ ਅਤੇ ਅਹੁਦੇਦਾਰ ਸਰਪੰਚੀ ਲੜਨ ਤੋਂ ਪਾਸਾ ਵੱਟ ਗਏ। ਇੱਕ ਅਖੌਤੀ ਸਿਆਸੀ ਸਲਾਹਕਾਰ ਆਪਣੇ ਇੱਕ ਚਹੇਤੇ ਨੂੰ ਸਾਲ ਭਰ ਤੋਂ ਸਰਪੰਚ ਬਣਾਉਣ ਦੇ ਦਮਗੱਜੇ ਭਰਦਾ ਰਿਹਾ ਪਰ ਹੁਣ ਸਲਾਹਕਾਰ ਅਤੇ ਚਹੇਤਾ ਦੋਵੇਂ ਪੱਤਰੇ ਵਾਚ ਗਏ। ਕਈ ਪਿੰਡਾਂ ’ਚ ਅਕਾਲੀ ਦਲ ਅਤੇ ਕਾਂਗਰਸ ਦੇ ਉਮੀਦਵਾਰ ਵੀ ਆਹਮੋ-ਸਾਹਮਣੇ ਹਨ ਪਰ ਉਨ੍ਹਾਂ ’ਚ ਕਾਂਗਰਸੀ ਸਫ਼ਾ ਆਪਣੇ ਵਿਰੋਧੀ ਕਾਂਗਰਸੀ ਨੂੰ ਠਿੱਬੀ ਲਗਾਉਣ ਲਈ ਅਕਾਲੀਆਂ ਨਾਲ ਮੂੰਹ ਜੋੜੀ ਬੈਠੀਆਂ ਹਨ। ਵੜਿੰਗਖੇੜਾ ’ਚ ਸਾਬਕਾ ਕਾਂਗਰਸ ਸਰਪੰਚ ਦਰਸ਼ਨ ਸਿੰਘ ਦੀ ਪਤਨੀ ਅਤੇ ਕਾਂਗਰਸ ਆਗੂ ਧਰਮ ਸਿੰਘ ਦੀ ਨੂੰਹ ਆਹਮੋ-ਸਾਹਮਣੇ ਹਨ। ਹਾਕੂਵਾਲਾ ਵਿਖੇ ਕਾਂਗਰਸ ਆਗੂ ਜਥੇਦਾਰ ਬਚਿੱਤਰ ਸਿੰਘ ਅਤੇ ਕਾਂਗਰਸ ਆਗੂ ਗੁਰਦੀਪ ਸਿੰਘ ਦੀਆਂ ਪਤਨੀਆਂ ਆਹਮੋ-ਸਾਹਮਣੇ ਹਨ। ਇੱਕ ਸੀਨੀਅਰ ਅਕਾਲੀ ਲੀਡਰ ਨੇ ਅਕਾਲੀ ਸਰਪੰਚੀ ਉਮੀਦਵਾਰੀਆਂ ਬਾਰੇ ਪੁੱਛੇ ਜਾਣ ’ਤੇ ਦੋ-ਤਿੰਨ ਪਿੰਡਾਂ ਦੇ ਕਾਂਗਰਸੀ ਉਮੀਦਵਾਰਾਂ ਨੂੰ ਅਕਾਲੀ ਉਮੀਦਵਾਰਾਂ ਵਜੋਂ ਗਿਣਵਾਇਆ। ਦੂਜੇ ਪਾਸੇ ਕਾਂਗਰਸੀਆਂ ਦੇ ਆਹਮੋ-ਸਾਹਮਣੇ ਡਟਣ ਬਾਰੇ ਜ਼ਿਲ੍ਹਾ ਕਾਂਗਰਸ ਕਮੇਟੀ ਮੁਕਤਸਰ ਸਾਹਿਬ ਦੇ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਕਾਂਗਰਸੀ ਵਰਕਰਾਂ ਵਿੱਚ ਉਤਸ਼ਾਹ ਹੀ ਇਤਨਾ ਹੈ ਕਿ ਉਹ ਹੁੰਮ-ਹੁੰਮਾ ਚੋਣਾਂ ਵਿੱਚ ਡਟ ਗਏ ਗਏ ਹਨ। 

                                  ਰਲੇਵੇਂ ਵਾਲੀ ਸਰਬਸੰਮਤੀ ਫੇਲ੍ਹ
ਲੰਬੀ ਹਲਕੇ ਦੇ ਅਤਿ ਸੰਵੇਦਨਸ਼ੀਲ ਪਿੰਡ ਭੀਟੀਵਾਲੀ ਦੀ ਸਰਪੰਚੀ ਵਿੱਚ ਸਰਬਸੰਮਤੀ ਕਾਂਗਰਸੀਆਂ ਦੇ ਆਪਸੀ ਦਵੇਸ਼ ਕਾਰਨ ਸਿਆਸੀ ਟਾਕਰੇ ਵਿੱਚ ਬਦਲ ਗਈ। ਲੰਬੀ ਹਲਕੇ ’ਚ ਅਤਿ ਸੰਵੇਦਲਨਸ਼ੀਲ ਪਿੰਡ ਭੀਟੀਵਾਲਾ ’ਚ ਅਕਾਲੀ ਦਲ ਵੱਲੋਂ ਬਲਾਕ ਸੰਮਤੀ ਮੈਂਬਰ ਜਗਤਾਰ ਸਿੰਘ ਅਤੇ ਕਾਂਗਰਸ ਦੇ ਕੁਲਵੰਤ ਸਿੰਘ ਅਤੇ ਪਵਨਦੀਪ ਸਿੰਘ ਮੈਦਾਨ ਵਿੱਚ ਉੱਤਰੇ ਸਨ। ਨਾਮਜ਼ਗੀ ਕੇਂਦਰ ਖਿਉਵਾਲੀ ’ਚ ਕਾਂਗਰਸ ਆਗੂ ਪਵਨਦੀਪ ਸਿੰਘ ਨੂੰ ਪਹਿਲਾਂ ਸਰਪੰਚ ਬਣਾ ਕੇ ਬਾਅਦ ’ਚ ਅਕਾਲੀ ਆਗੂ ਜਗਤਾਰ ਸਿੰਘ ਨਾਲ ਢਾਈ-ਢਾਈ ਸਾਲ ਦੀ ਸਰਬਸੰਮਤੀ ਬਣ ਗਈ ਸੀ। ਉਸੇ ਦੌਰਾਨ ਸਰਬਸੰਮਤੀ ਦੀ ਗੇਮ ’ਚੋਂ ਲਾਂਭੇ ਕੀਤੇ ਤੀਜੇ ਉਮੀਦਵਾਰ ਕੁਲਵੰਤ ਸਿੰਘ ਨੇ ਉਕਤ ਸਰਬਸੰਮਤੀ ਨੂੰ ਦੋਵੇਂ ਉਮੀਦਵਾਰਾਂ ਦੀ ਪਹਿਲਾਂ ਤੋਂ ਮਿਲੀਭੁਗਤ ਦੱਸਦਿਆਂ ਚੋਣ ਮੈਦਾਨ ’ਚ ਡਟੇ ਰਹਿਣ ਦਾ ਐਲਾਨ ਕਰ ਦਿੱਤਾ। ਪਵਨਦੀਪ ਨੂੰ ਜਗਤਾਰ ਧੜੇ ਦੀ ਹਮਾਇਤ ਦੱਸੀ ਜਾਂਦੀ ਹੈ। ਜਗਤਾਰ ਸਿੰਘ ਨੇ ਪਵਨਦੀਪ ਸਿੰਘ ਦੀ ਹਮਾਇਤ ’ਚ ਕਾਗਜ਼ ਵਾਪਸ ਲੈ ਲਏ। ਪਤਾ ਲੱਗਿਆ ਹੈ ਕਿ ਪਿੰਡ ਵਾਸੀਆਂ ਨੂੰ ਉਕਤ ਸਰਬਸੰਮਤੀ ਦਾ ਪਹਿਲਾਂ ਤੋਂ ਖਦਸ਼ਾ ਸੀ। ਇਸੇ ਕਰਕੇ ਕੁਲਵੰਤ ਸਿੰਘ ਮੈਦਾਨ ’ਚ ਉਤਰਿਆ ਸੀ। ਸਹਾਇਕ ਰਿਟਰਨਿੰਗ ਅਫਸਰ ਜੱਸਾ ਸਿੰਘ ਨੇ ਕਿਹਾ ਕਿ ਭੀਟੀਵਾਲਾ ’ਚ ਪਵਨਦੀਪ ਸਿੰਘ ਅਤੇ ਕੁਲਵੰਤ ਸਿੰਘ ਚੋਣ ਮੈਦਾਨ ਵਿੱਚ ਹਨ। 


16 December 2018

ਟਾਕੀਆਂ ਸਿਉਣ ਲਈ ਕਿੰਨੂਆਂ ’ਚੋਂ ਕੱਢੇ ਰਹੇ ‘ਰਸ’

                                                    ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ/ਲੰਬੀ: ਪੰਜਾਬ ਦੀ ਆਰਥਿਕ ਤੌਰ ’ਤੇ ਬਦਹਾਲ ਪੰਜਾਬ ਸਰਕਾਰ ਕਿਸਾਨੀ ਦੇ ਸਹਿ-ਧੰਦਿਆਂ ਦੀਆਂ ਘੁੰਡੀਆਂ ਭਾਲ ਕੇ ਖਜ਼ਾਨੇ ਦੀਆਂ ਟਾਕੀਆਂ ਸਿਉਣ ’ਚ ਜੁਟ ਗਈ ਹੈ। ਪੰਜਾਬ ਮੰਡੀ ਬੋਰਡ ਨੇ ਖੇਤੀਬਾੜੀ ਦੇ ਸਫ਼ਲ ਸਹਿ-ਧੰਦੇ ਕਿੰਨੂਆਂ ਦੇ ਸੈਂਕੜੇ ਕਰੋੜ ਦੇ ਦਰਾਮਦੀ ਕਾਰੋਬਾਰ ’ਤੇ ਸ਼ਿਕੰਜਾ ਕਸ ਦਿੱਤਾ ਹੈ। ਪੰਜਾਬ ’ਚੋਂ ਦਿੱਲੀ ਵਗੈਰਾ ਨੂੰ ਜਾਂਦੇ ਕਿੰਨੂਆਂ ਤੋਂ ਮਾਲੀਆ ਵਸੂਲਣ ਲਈ ਘੇਰਾ ਪਾ ਲਿਆ ਗਿਆ ਹੈ। ਜ਼ਿਲ੍ਹਾ ਮੰਡੀ ਅਫਸਰ ਮਨਿੰਦਰਜੀਤ ਸਿੰਘ ਬੇਦੀ ਅਤੇ ਮਾਰਕੀਟ
ਕਮੇਟੀ ਮਲੋਟ ਦੇ ਸਕੱਤਰ ਗੁਰਪ੍ਰੀਤ ਸਿੰਘ ਸਿੱਧੂ ਵੱਲੋਂ ਨਾਕੇ ਲਗਾ ਕੇ ਕਿੰਨੂਆਂ ਦੇ ਲੱਦੇ ਵਹੀਕਲਾਂ ਤੋਂ ਚਾਰ ਫ਼ੀਸਦੀ ਟੈਕਸ ਲਿਆ ਜਾ ਰਿਹਾ ਹੈ। ਬੋਰਡ ਵੱਲੋਂ ਮਾਰਕੀਟ ਕਮੇਟੀਆਂ ਨੂੰ ਬਾਗਾਂ ’ਚ ਜਿਣਸ ਦੀ ਰੋਜ਼ਾਨਾ ਅਚਨਚੇਤ ਪੜਤਾਲ ਕਰਕੇ ਅਣਅਧਿਕਾਰਤ ਵਿਕਰੀ ’ਤੇ ਰੋਕ ਲਗਾਉਣ ਦੀ ਤਾਕੀਦ ਕੀਤੀ ਹੈ। ਚਾਰ ਫ਼ੀਸਦੀ ਟੈਕਸ ਵਿੱਚ ਦੋ ਫ਼ੀਸਦ ਮਾਰਕੀਟ ਫੀਸ ਅਤੇ ਦੋ ਫ਼ੀਸਦ ਪੇਂਡੂ ਵਿਕਾਸ ਫੰਡ ਸ਼ਾਮਲ ਹੈ। ਪੰਜਾਬ ਮੰਡੀ ਬੋਰਡ ਵੱਲੋਂ ਨਾਕੇਬੰਦੀ ਤਹਿਤ ਟੈਕਸ ਵਸੂਲਣ ਨਾਲ ਬਾਗਵਾਨ ਕਿਸਾਨਾਂ ਵਿੱਚ ਰੋਸ ਫੈਲ ਰਿਹਾ ਹੈ। ਉਹ ਇਹ ਫੈਸਲੇ ਨੂੰ ਕੈਪਟਨ ਸਰਕਾਰ ਦਾ ਕਿਸਾਨ ਵਿਰੋਧੀ ਰਵੱਈਆ ਗਰਦਾਨ ਕੇ ਉਨ੍ਹਾਂ ਦੀਆਂ ਜੇਬਾਂ ’ਚ ਹੱਥ ਪਾਉਣ ਤੁੱਲ ਦੱਸ ਰਹੇ ਹਨ। ਖੇਤੀਬਾੜੀ/ਬਾਗਵਾਨੀ ਵਿਭਾਗ ਖੁਦ ਮੁੱਖ ਮੰਤਰੀ ਅਮਰਿੰਦਰ ਹੁਰਾਂ ਦੇ ਕੋਲ ਹੈ। 
ਦੂਜੇ ਪਾਸ ਮੰਡੀ ਬੋਰਡ ਦਾ ਕਹਿਣਾ ਹੈ ਕਿ ਠੇਕੇਦਾਰਾਂ ਵੱਲੋਂ ਸਿੱਧੇ ਤੌਰ ’ਤੇ ਕਿੰਨੂਆਂ ਦੇ ਬਾਗ ਠੇਕੇ ’ਤੇ ਲੈਣ ਉਪਰੰਤ ਪੰਜਾਬ ਦੀ ਸਰਕਾਰੀ ਮੰਡੀ ਨੂੰ ਬਾਈਪਾਸ ਕਰਕੇ ਪੰਜਾਬ ਤੋਂ ਬਾਹਰ ਭੇਜ ਦਿੱਤਾ ਜਾਂਦਾ ਹੈ। ਜਿਸ ਨਾਲ ਪੰਜਾਬ ਸਰਕਾਰ ਨੂੰ ਕਰੋੜਾਂ ਰੁਪਏ ਦੀ ਮਾਰਕੀਟ ਫੀਸ ਦਾ ਖੋਰਾ ਲੱਗਦਾ ਹੈ। ਬੋਰਡ ਅਨੁਸਾਰ ਬਹੁਗਿਣਤੀ ਬਾਗ ਠੇਕੇਦਾਰ ਨੂੰ ਠੇਕੇ ’ਤੇ ਦਿੱਤੇ ਹੋਏ ਹਨ। 
ਪੰਜਾਬ ਮੰਡੀ ਬੋਰਡ ਨੇ ਕਿੰਨੂਆਂ ਦੀ ਫ਼ਸਲ ਦੇ ਬਾਗਾਂ ਵਿੱਚ ਹੋ ਰਹੇ ਸੌਦਿਆਂ ਲਈ ਸਰਹੱਦੀ ਖੇਤਰਾਂ ਦੀਆਂ ਪੰਜ ਮਾਰਕੀਟ ਕਮੇਟੀਆਂ ਹੁਸ਼ਿਆਰਪੁਰ, ਅਬੋਹਰ, ਮਲੋਟ, ਬਠਿੰਡਾ ਅਤੇ ਪਠਾਨਕੋਟ ਦੀ ਸ਼ਨਾਖ਼ਤ ਕੀਤੀ ਹੈ। ਬਾਗਵਾਨੀ ਵਿਭਾਗ ਦੇ ਅੰਕੜਿਆਂ ਮੁਤਾਬਕ ਪੰਜਾਬ ’ਚ ਕਿੰਨੂਆਂ ਦਾ ਸਲਾਨਾ ਕਾਰੋਬਾਰ ਅਰਬਾਂ ਰੁਪਏ ਦਾ ਹੈ। ਬਾਗਾਂ ਦੇ ਗੜ੍ਹ ਅਖਵਾਉਂਦੇ ਅਬੋਹਰ ਖੇਤਰ ਵਿੱੱਚ 30588 ਹੈਕਟੇਅਰ ਰਕਬਾ ਕਿੰਨੂਆਂ ਦੀ ਬਾਗਵਾਨੀ ਅਧੀਨ ਹੈ। ਜਿਸ ਵਿੱਚੋਂ ਬੀਤੇ ਵਿੱਤ ਵਰ੍ਹੇ ’ਚ 715453 ਮੀਟ੍ਰਿਕ ਟਨ ਕਿੰਨੂਆਂ ਦੀ ਪੈਦਾਵਾਰ ਹੋਈ। ਜਦੋਂਕਿ ਲੰਬੀ ਖੇਤਰ ਵਿੱਚ 3163 ਹੈਕਟੇਅਰ ਕਰਬੇ ’ਚੋਂ ਕਿੰਨੂਆਂ ਦੀ ਪੈਦਾਵਾਰ 77 ਹਜ਼ਾਰ ਮੀਟ੍ਰਿਕ ਟਨ ਰਹੀ। ਨਾਕੇਬੰਦੀ ਦੌਰਾਨ ਕਿੰਨੂਆਂ ਦੀ ਵੱਖ-ਵੱਖ ਗਰੇਡਿੰਗ ਨੂੰ ਆਧਾਰ ਬਣਾ ਕੇ ਅੌਸਤਨ ਛੇ-ਸੱਤ ਰੁਪਏ ਪ੍ਰਤੀ ਕਿੱਲੋ ਕੀਮਤ ’ਤੇ ਚਾਰ ਫ਼ੀਸਦੀ ਟੈਕਸ ਵਸੂਲਿਆ ਜਾ ਰਿਹਾ ਹੈ।
         ਵਪਾਕਰ ਜਾਣਕਾਰਾਂ ਮੁਤਾਬਕ ਕਿੰਨੂਆਂ ਦੀ 50 ਫ਼ੀਸਦੀ ਫ਼ਸਲ ਪੰਜਾਬ ਦੀਆਂ ਮੰਡੀਆਂ ਵਿਕਦੀ ਹੈ। ਜਿੱਥੋਂ ਮੰਡੀ ਬੋਰਡ ਨੂੰ ਸੁੱਤੇ ਸਾਹ ਚਾਰ ਫ਼ੀਸਦੀ ਟੈਕਸ ਮਿਲ ਜਾਂਦਾ ਹੈ। ਜਦੋਂਕਿ ਬਾਕੀ ਦੀ ਪੰਜਾਹ ਫ਼ੀਸਦੀ ਬਾਹਰੀ ਸੂਬਿਆਂ ਨੂੰ ਜਾਂਦੀ ਹੈ। ਮੀਟ੍ਰਿਕ ਟਨਾਂ ਵਾਲੇ ਬਾਗਵਾਨੀ ਅੰਕੜਿਆਂ ਨੂੰ ਰੁਪਇਆਂ ’ਚ ਤਬਦੀਲ ਕਰਕੇ ਸਿਰਫ਼ ਸੱਤ ਰੁਪਏ ਪ੍ਰਤੀ ਕਿੱਲੋ ਨਾਲ ਗੁਣਾ ਕੀਤਾ ਜਾਵੇ ਤਾਂ ਸਿਰਫ਼ ਅਬੋਹਰ ਅਤੇ ਅਬੋਹਰ ’ਚ ਕਿੰਨੂ ਦੀਆਂ ਫ਼ਸਲ 6 ਸਾਢੇ ਅਰਬ ਰੁਪਏ ਨੂੰ ਪੁੱਜ ਜਾਂਦੀ ਹੈ। ਮੰਡੀ ਬੋਰਡ ਬਾਹਰੀ ਸੂਬਿਆਂ ਨੂੰ ਜਾਂਦੀ 50 ਫ਼ੀਸਦੀ ਫ਼ਸਲ ’ਤੇ ਚਾਰ ਫ਼ੀਸਦੀ ਟੈਕਸ ਮੁਤਾਬਕ ਕਰੀਬ 12 ਕਰੋੜ ਟੈਕਸ ਉਗਰਾਹੁਣਾ ਚਾਹੁੰਦਾ ਹੈ। ਉੱਚ ਪੱਧਰੀ ਸੂਤਰਾਂ ਦਾ ਕਹਿਣਾ ਹੈ ਕਿ ਕਿੰਨੂਆਂ ਦੇ ਕਾਰੋਬਾਰ ਨਾਲ ਜੁੜੇ ਮਹਿਕਮਾ ਮਾਲੀਆ ’ਚ ਬੈਠੇ ਕੁਝ ਖਾਸ ਵਿਅਕਤੀਆਂ ਨੇ ਬਾਹਰ ਜਾ ਰਹੇ ਕਿੰਨੂਆਂ ਵਿੱਚੋਂ ਟੈਕਸ ਵਾਲਾ ਜੂਸ ਕੱਢਣ ਦੀ ਜੁਗਤ ਕੱਢੀ ਹੈ। ਪੰਜਾਬ ਮੰਡੀ ਬੋਰਡ ਨੇ ਦਾਣਾ ਮੰਡੀਆਂ ’ਚ ਫ਼ਸਲ ਖਰੀਦ ਮੁਕੰਮਲ ਹੋਣ ਮਗਰੋਂ ਅਮਲੇ ਨੂੰ ਕਿੰਨੂਆਂ ’ਚੋਂ ਟੈਕਸ ਵਾਲਾ ਜੂਸ ਕੱਢਣ ’ਤੇ ਲਾ ਦਿੱਤਾ ਹੈ। 
         ਬਾਗਵਾਨ ਕਿਸਾਨ ਗੁਰਪ੍ਰੀਤ ਸਿੰਘ ਸਿੱਧੂ ਨੇ ਆਖਿਆ ਕਿ ਸੂਬੇ ’ਚ ਕਿੰਨੂ ਕਾਸ਼ਤ ਨੂੰ ਫੈਲਾਅ ਲਈ ਕੋਈ ਵਿਸ਼ੇਸ਼ ਮੰਡੀ/ਬਾਜ਼ਾਰ ਨਹੀਂ ਅਤੇ ਫ਼ਸਲ ਵਿਕਵਾਉਣ ਲਈ ਠੋਸ ਨੀਤੀ ਹੈ। ਬਾਹਰੀ ਸੂਬਿਆਂ ’ਚ ਖੁਦ ਵੇਚਣ ਜਾਂਦੇ ਕਿਸਾਨਾਂ ਤੋਂ ਵੀ ਜ਼ਬਰਦਸਤੀ ਟੈਕਸ ਉਗਰਾਹਿਆ ਜਾ ਰਿਹਾ ਹੈ। ਆਪਣੇ ਪੱਧਰ ’ਤੇ ਕਿੰਨੇ ਵੇਚਣ ਜਾ ਰਹੇ ਕਿਸਾਨ ਨੂੰ ਪਹਿਲਾਂ 30 ਕਿਲੋਮੀਟਰ ਦੂਰ ਮਾਰਕੀਟ ਕਮੇਟੀ ਨੂੰ ਦੱਸਣਾ ਪਵੇਗਾ, ਫਿਰ ਮੁਲਾਜਮ ਮੌਕੇ ’ਤੇ ਪੁੱਜ ਪੜਤਾਲ ਕਰਨਗੇ, ਉਸ ਮਗਰੋਂ ਫ਼ਸਲ ਟੈਕਸ ਮੁਕਤ ਹੋ ਸਕੇਗੀ। ਉਨ੍ਹਾਂ ਪ੍ਰਕਿਰਿਆ ਖੱਜਲ ਖੁਆਰੀ ਭਰੀ ਹੈ। 
ਬਾਗਵਾਨ ਕਿਸਾਨ ਗੁਰਦਾਸ ਸਿੰਘ ਨੇ ਆਖਿਆ ਕਿ ਸਰਕਾਰੀ ਨਿਯਮ ਹੈ ਕਿ ਕਿਸਾਨ ਆਪਣੀ ਫ਼ਸਲ ਦੇਸ਼ ’ਚ ਕਿਧਰੇ ਵੀ ਵੇਚ ਸਕਦਾ ਹੈ ਤਾਂ ਕਿੰਨੂਆਂ ਕਾਸ਼ਤਕਾਰਾਂ ’ਤੇ ‘ਜਜੀਆ’ ਟੈਕਸ ਲਗਾ ਕੇ ਸਰਕਾਰ ਸਰਾਸਰ ਧੱਕਾ ਕਰ ਰਹੀ ਹੈ। ਬਾਗਵਾਨ ਮਹਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਬਾਗ ਠੇਕੇਦਾਰਾਂ ਤੋਂ ਵਸੂਲਿਆ ਟੈਕਸ ਵਿੱਚ ਆਖ਼ਰ ’ਤੇ ਬਾਗਵਾਨ ਕਿਸਾਨ ਦੇ ਸਿਰ ਹੀ ਪੈਣਾ ਹੈ। 
ਦੂਜੇ ਪਾਸੇ ਜ਼ਿਲ੍ਹਾ ਮੰਡੀ ਅਫਸਰ ਮੁਕਤਸਰ ਸਾਹਿਬ ਮਨਿੰਦਰਜੀਤ ਸਿੰਘ ਬੇਦੀ ਆਖਿਆ ਨੇ ਸਰਕਾਰ ਨਿਰਦੇਸ਼ਾਂ ’ਤੇ ਨਾਕੇ ਲਗਾ ਕੇ ਬਾਹਰ ਜਾ ਰਹੀ ਕਿੰਨੂ ਅਤੇ ਹੋਰ ਸਬਜ਼ੀਆਂ ’ਤੇ ਟੈਕਸ ਲਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਖੁਦ ਬਾਗਵਾਨਾਂ ਨੂੰ ਕਿੰਨੂ ਵੇਚਣ ਲਈ ਵੀ ਸਰਕਾਰ ਵੱਲੋਂ ਤੈਅ ਦਸਤਾਵੇਜ਼ੀ ਪ੍ਰਕਿਰਿਆ ਵਿਚੋਂ ਲੰਘਣਾ ਪਵੇਗਾ। 


ਹਰਿਆਣੇ ’ਚ ਬੰਦ ਐ ਫਲਾਂ-ਸਬਜ਼ੀਆਂ ’ਤੇ ਟੈਕਸ
ਕਿੰਨੂਆਂ ਦੇ ਠੇਕੇਦਾਰ ਸਤੀਸ਼ ਕੁਮਾਰ ਨੇ ਆਖਿਆ ਕਿ ਹਰਿਆਣੇ ਵਿੱਚ ਫਲਾਂ ਅਤੇ ਸਬਜ਼ੀਆਂ ’ਤੇ ਮਾਰਕੀਟ ਕਈ ਸਾਲਾਂ ਤੋਂ ਬੰਦ ਕੀਤੀ ਹੋਈ ਹੈ। ਪੰਜਾਬ ਸਰਕਾਰ ਨੂੰ ਉਸੇ ਤਰਜ਼ ’ਤੇ ਟੈਕਸ ਮਾਫ਼ ਕਰਕੇ ਫਲਾਂ ਅਤੇ ਸਬਜ਼ੀ ਦੀ ਖੇਤੀ ਨੂੰ ਉਤਸਾਹਤ ਕਰਨਾ ਚਾਹੀਦਾ ਹੈ। 

15 December 2018

ਸਰਕਾਰੀ ਤੰਤਰ ਦੇ ਹੱਡਾਂ ’ਚ ਰਚਿਆ ਹਕੂਮਤ ਦਾ ਚੜ੍ਹੇ ਦਿਨ ਜਾਗਣ ਵਾਲਾ ਸੁਭਾਅ

* ਬਾਇਓ ਮੀਟ੍ਰਿਕ ਹਾਜ਼ਰੀ ਪ੍ਰਤੀ ਪੰਜਾਬ ਸਰਕਾਰ ਦੇ ਹੱਥ ਖਾਲੀ
* ਦਫ਼ਤਰਾਂ ’ਚ ਅਮਲੇ ਦੀ ਅੌਸਤ ਹਾਜ਼ਰੀ ਸਿਰਫ਼ 55-56 ਫ਼ੀਸਦੀ 
* ਜਨਤਾ ਕੰਮ ਧੰਦਿਆਂ ਲਈ ਗੇੜੇ ਮਾਰ ਕੇ ਹੰਦੀ ਖੱਜਲ ਖੁਆਰ 

ਇਕਬਾਲ ਸਿੰਘ ਸ਼ਾਂਤ
      ਲੰਬੀ: ਹੁਕਮਰਾਨਾਂ ਦਾ ਦਿਨ ਚੜ੍ਹਨ ਮਗਰੋਂ ਜਾਗਣ ਦਾ ਸੁਭਾਅ ਸਰਕਾਰ ਤੰਤਰ ਦੀ ਹੱਡਾਂ ’ਚ ਰਚਣ ਲੱਗਿਆ ਹੈ। ਰੋਜ਼ਾਨਾ ਸਵੇਰੇ 10-11 ਵਜੇ ਦਫ਼ਤਰਾਂ ’ਚ ਪੁੱਜਣਾ ਸਰਕਾਰੀ ਅਮਲੇ ਦੀ ਆਦਤ ਬਣ ਗਈ ਹੈ। ਛੋਟੇ ਕਸਬਿਆਂ ਅਤੇ ਪੇੇਂਡੂ ਖੇਤਰਾਂ ’ਚ ਸਥਿਤ ਦਫ਼ਤਰਾਂ ’ਚ ਸਰਕਾਰੀ ਅਮਲੇ ਦੀ ਅੌਸਤ ਹਾਜ਼ਰੀ ਸਿਰਫ਼ 55-56 ਫ਼ੀਸਦੀ ਤੱਕ ਵੇਖਣ ਨੂੰ ਮਿਲ ਰਹੀ ਹੈ। ਜ਼ਿਲ੍ਹਾ ਪੱਧਰੀ ਅਤੇ ਸਬ ਡਿਵੀਜਨ ਪੱਧਰੀ ਅਧਿਕਾਰੀਆਂ ਵੱਲੋਂ ਲਗਾਤਾਰ ਨਿਗਰਾਨੀ ਦੀ ਥੁੜ ਹੈ। ਪੇਂਡੂ ਅਤੇ
ਕਸਬਾਈ ਦਫ਼ਤਰ ਵੀ ਹਾਜ਼ਰੀ ਪੱਖੋਂ ‘ਲਾਲੇ ਦੀ ਹੱਟੀ’ ਵਾਂਗ ਚੱਲਦੇ ਹਨ। ਉਂਝ ਸਬ ਡਿਵੀਜਨ ਅਤੇ ਜ਼ਿਲ੍ਹਾ ਪੱਧਰ ’ਤੇ ਵੀ ਹਾਲਾਤ ਬਹੁਤੇ ਜੁਦਾ ਨਹੀਂ ਹਨ।
      ਸੂਬੇ ’ਚ ਆਮ ਰਾਜ ਪ੍ਰਬੰਧਾਂ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਲਈ ਗੱਜ-ਬੱਜ ਕੇ ਸੱਤਾ ’ਤੇ ਕਾਬਜ਼ ਹੋਈ ਕਾਂਗਰਸ ਸਰਕਾਰ ਵੀ ਬਹੁਤੀ ਗੰਭੀਰ ਨਹੀਂ ਹੈ। ਡੇਢ ਸਾਲ ਦੇ ਰਾਜਭਾਗ ’ਚ ਸਰਕਾਰ ਦਫ਼ਤਰੀ ਕੰਮਕਾਜ਼ ’ਚ ਤੇਜ਼ੀ ਲਿਆਉਣ ਲਈ ਕੋਈ ਕਦਮ ਨਹੀਂ ਪੁੱਟ ਸਕੀ। ਪੰਜਾਬ ਸਰਕਾਰ ਦੇ ਕਰੀਬ ਪੰਜਾਹ ਵਿਭਾਗ ਹਨ। ਜਿਨ੍ਹਾਂ ਵਿਚੋਂ ਦੋ ਫ਼ੀਸਦੀ ਵਿਭਾਗ ਵੀ ਪੂਰੀ ਤਰ੍ਹਾਂ ਬਾਇਓ ਮੀਟ੍ਰਿਕ ਹਾਜ਼ਰੀ ਨਾਲ ਨਹੀਂ ਜੁੜੇ ਹਨ। ਹਾਲੇ ਤਾਂ ਚੰਡੀਗੜ੍ਹ ਵਿਖੇ ਪੰਜਾਬ ਸਕੱਤਰੇਤ ’ਚ ਬਾਇਓ ਮੀਟ੍ਰਿਕ ਹਾਜ਼ਰੀ ਮਸ਼ੀਨਾਂ ਲਗਾਉਣ ਲਈ ਵੀ ਪ੍ਰਾਜੈਕਟ ਆਮ ਰਾਜ ਪ੍ਰਬੰਧ ਵਿਭਾਗ ਦੀ ਫਾਈਲਾਂ ’ਚ ਦੱਬਿਆ ਪਿਆ ਹੈ ।  
     ਸੂਤਰਾਂ ਅਨੁਸਾਰ ਕਰੀਬ ਸਾਲ ਭਰ ਪਹਿਲਾਂ ਕਈ ਵਿਭਾਗਾਂ ਨੇ ਬਾਇਓ ਮੀਟ੍ਰਿਕ ਹਾਜ਼ਰੀ ਲਈ ਅਮਲੇ ਦੇ ਅੰਗੂਠਿਆਂ ਦੇ ਨਿਸ਼ਾਨ ਲਏ ਸਨ। ਫੰਡਾਂ ਅਤੇ ਇੱਛਾ ਸ਼ਕਤੀ ਦੀ ਘਾਟ ਕਾਰਨ ਉਹ ਨਿਸ਼ਾਨ ਫਾਈਲਾਂ ’ਚ ਪਏ-ਪਏ ਫਿੱਕੇ ਪੈਣ ਲੱਗੇ ਹਨ। ਸੂਤਰਾਂ ਅਨੁਸਾਰ ਸੀਨੀਅਰ ਅਫਸਰਸ਼ਾਹੀ ਵੀ ਸਰਕਾਰੀ ਤੰਤਰ ’ਤੇ ਬਾਇਓ ਮੀਟ੍ਰਿਕ ਹਾਜ਼ਰੀ ਦਾ ਸ਼ਿਕੰਜਾ ਕਸਣ ਦੇ ਡਰੋਂ ਮਾਮਲੇ ਨੂੰ ਜਾਣ-ਬੁੱਝ ਕੇ ਲਮਕਾ ਰਹੀ ਹੈ। ਹੁਣ ਤੱਕ ਪੰਜਾਬ ਮੰਡੀ ਬੋਰਡ ਦੇ ਹੀ ਬਹੁਗਿਣਤੀ ਦਫ਼ਤਰ ਬਾਇਓ ਮੀਟ੍ਰਿਕ ਹਾਜ਼ਰੀ ਅਧੀਨ ਦੱਸੇ ਜਾਂਦੇ ਹਨ। ਸੂਬੇ ’ਚ 19 ਹਜ਼ਾਰ ਸਰਕਾਰੀ ਸਕੂਲ ਹਨ। ਸਿਰਫ਼ ਇੱਕ ਹਜ਼ਾਰ ਸਕੂਲਾਂ ’ਚ ਬਾਇਓ ਮੀਟ੍ਰਿਕ ਮਸ਼ੀਨਾਂ ਲੱਗੀਆਂ ਹਨ। ਜ਼ਿਲ੍ਹਾ ਸਿੱਖਿਆ ਦਫ਼ਤਰਾਂ ਨੂੰ ਵੀ ਪਿੱਛੇ ਜਿਹੇ ਬਾਇਓ ਮੀਟ੍ਰਿਕ ਸਹੂਲਤ ਨਾਲ ਜੁੜੇ ਹਨ। 
      ਹਾਜ਼ਰੀ ਪੱਖੋਂ ਹਾਲਾਤ ਇੰਨੇ ਮਾੜੇ ਹਨ ਕਿ ਸਰਕਾਰੀ ਦਫ਼ਤਰਾਂ ਦਾ ਸਵੇਰੇ 9 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਖੁੱਲ੍ਹਣ ਦਾ ਸਮਾਂ ਹੈ। ਸਰਕਾਰੀ ਪੱਧਰ ’ਤੇ ਪੁੱਛ-ਪ੍ਰਤੀਤ ਨਾ ਹੋਣ ਅਤੇ ਸਿਆਸੀ ਹਾਜ਼ਰੀਆਂ ਵਜਾਉਣ ਦੇ ਸੁਭਾਅ ਕਰਕੇ ਕਾਫ਼ੀ ਗਿਣਤੀ ਅਧਿਕਾਰੀ ਅਤੇ ਕਰਮਚਾਰੀ ਤਾਂ ਮਹਿਜ਼ ਘੰਟਾ-ਦੋ ਘੰਟੇ ਖਾਣਾਪੂਰਤੀ ਲਈ ਦਫ਼ਤਰਾਂ ’ਚ ਗੇੜਾ ਮਾਰਦੇ ਹਨ। ਕਈ ਦਫ਼ਤਰਾਂ ’ਚ ਦੁਪਿਹਰ ਬਾਅਦ ਅਮਲੇ ਜਾਂ ਅਧਿਕਾਰੀ ਪੁੱਜਦੇ ਹਨ ਅਤੇ ਕਈ ਅਧਿਕਾਰੀ ਅਤੇ ਕਰਮਚਾਰੀ ਦੁਪਿਹਰ ਬਾਅਦ ਹੀ ਘਰਾਂ ਨੂੰ ਚਾਲੇ ਪਾ ਜਾਂਦੇ ਹਨ। ਆਮ ਜਨਤਾ ਕੰਮ ਧੰਦਿਆਂ ਲਈ ਦਫ਼ਤਰਾਂ ’ਚ ਗੇੜੇ ਮਾਰਦੀ ਹੈ ਪਰ ਉਥੇ ਕੋਈ ਮਿਲਦਾ ਨਹੀਂ। ਆਮ ਰਾਜ ਪ੍ਰਬੰਧ ਵਿਭਾਗ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਕੋਲ ਹੈ। ਸਮੱੁਚਾ ਪੰਜਾਬ ਜਾਣੂ ਹੈ ਕਿ ਮੌਜੂਦਾ ਮੁੱਖ ਮੰਤਰੀ ਦੇ ਕੋਲ ਸਮੇਂ ਦੀ ਘਾਟ ਰਹਿੰਦੀ ਹੈ। ਹਾਲ ਦੀ ਘੜੀ ਜਨਤਾ ਦੀ ਦਫ਼ਤਰਾਂ ’ਚ ਖੱਜਲ ਖੁਆਰੀ ਮੁਕਾਉਣ ਪ੍ਰਤੀ ਮੋਤੀਆਂ ਵਾਲੀ ਸਰਕਾਰ ਦੇ ਹੱਥ ਹਨ। ਸੂਬਾਈ ਹਕੂਮਤ ਦੇ ਆਲਸੀ ਸੁਭਾਅ ਦਾ ਸਰਕਾਰੀ ਤੰਤਰ ‘ਲਾਟ ਸਾਬ੍ਹ’ ਬਣ ਕੇ ਆਨੰਦ ਮਾਣ ਰਿਹਾ ਹੈ। 
        ਬੀਤੇ ਦਿਨ੍ਹੀਂ ਪੰਜਾਬ ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਸਬ ਡਿਵੀਜਨ ਮੰਡੀ ਕਿੱਲਿਆਂਵਾਲੀ ’ਚ ਲੋਕ ਪਾਣੀ ਦੇ ਬਿੱਲ ਭਰਨ ਨੂੰ ਸਵੇਰੇ 9 ਵਜੇ ਪੁੱਜ ਗਏ, ਪਰ ਅਮਲਾ 11 ਵਜੇ ਤੋਂ ਬਾਅਦ ਪੁੱਜਿਆ। ਪੜਤਾਲ ਕਰਨ ’ਤੇ ਪਤਾ ਲੱਗਿਆ ਕਿ ਰੋਜ਼ਾਨਾ ਅਮਲਾ ਇਸੇ ਸਮੇਂ ਦਫ਼ਤਰ ’ਚ ਚਰਨ ਪਾਉਂਦੇ ਹਨ। ਪਿੱਛੇ ਜਿਹੇ ਸੂਬਾ ਸਰਕਾਰ ਨੇ ਇੱਕ ਪੱਤਰ ਰਾਹੀਂ ਜਨਤਾ ਦੀ ਸਹੂਲਤ ਲਈ ਕਈ ਵਿਭਾਗਾਂ ਦੇ ਅਧਿਕਾਰੀਆਂ ਨੂੰ ਰੋਜ਼ਾਨਾ ਕੁਝ ਤੈਅ ਘੰਟੇ ਦਫ਼ਤਰ ਬੈਠਣ ਦੇ ਨਿਰਦੇਸ਼ ਜਾਰੀ ਕੀਤੇ ਸਨ। ਪਰ ਅਫਸਰਸ਼ਾਹੀ ਦੀ ਕਾਰਜਪ੍ਰਣਾਲੀ ’ਤੇ ਕੋਈ ਅਸਰ ਨਹੀਂ ਵਿਖਿਆ। 
       ਆਮ ਜਨਤਾ ਦਾ ਕਹਿਣਾ ਹੈ ਕਿ ਸਮੁੱਚੇ ਦਫ਼ਤਰਾਂ ਨੂੰ ਬਾਇਓ ਮੀਟ੍ਰਿਕ ਹਾਜ਼ਰੀ ਨਾਲ ਲੈਸ ਕਰਕੇ ਹਾਜ਼ਰੀ ਦਾ ਲਾਈਵ ਵੇਰਵਾ ਸਰਕਾਰੀ ਵੈਬਸਾਈਟ ਨਾਲ ਜੋੜਿਆ ਜਾਵੇ, ਤਾਂ ਜੋ ਸਰਕਾਰੀ ਕੰਮਕਾਜ ’ਚ ਸੌ ਫ਼ੀਸਦੀ ਪਾਰਦਰਸ਼ਿਤਾ ਆ ਸਕੇ ਅਤੇ ਅਮਲੇ ਨੂੰ ਫਰਜ਼ ਨਾਲ ਨੌਕਰੀ ਨਾ ਨਿਭਾਉਣ ’ਤੇ ਕਾਰਵਾਈ ਦਾ ਖੌਫ਼ ਪੈਦਾ ਹੋ ਸਕੇ। 
      ਬਾਇਓ ਮੀਟ੍ਰਿਕ ਹਾਜ਼ਰੀ ਬਾਰੇ ਪੰਜਾਬ ਦੇ ਉੱਚ ਅਧਿਕਾਰੀ ਬੋਲਣ ਨੂੰ ਤਿਆਰ ਨਹੀਂ ਜਾਂ ਫੋਨ ’ਤੇ ਨਹੀਂ ਆਉਣ ਨੂੰ ਤਿਆਰ ਨਹੀਂ। ਮੁੱਖ ਮੰਤਰੀ ਦੇ ਵਿਸ਼ੇਸ਼ ਪ੍ਰਿੰਸੀਪਲ ਸਕੱਤਰ ਗੁਰਕਿਰਤ ੍ਰਿਕਪਾਲ ਸਿੰਘ ਦਾ ਕਹਿਣਾ ਸੀ ਕਿ ਆਮ ਰਾਜ ਪ੍ਰਬੰਧ ਵਿਭਾਗ ਨਾਲ ਸੰਪਰਕ ਕਰੋ। ਆਮ ਰਾਜ ਪ੍ਰਬੰਧ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਜਸਪਾਲ ਸਿੰਘ ਸਾਰਾ ਦਿਨ ਮੀਟਿੰਗ ’ਚ ਰੁੱਝੇ ਰਹੇ। ਅੰਡਰ ਸਕੱਤਰ ਸੰਗਰਾਮ ਸਿੰਘ ਨੇ ਕਿਹਾ ਕਿ ਅਸੀਂ ਤਾਂ ਸਿਰਫ਼ ਚੰਡੀਗੜ੍ਹ ਦੇ ਸਕਤਰੇਤ, ਮਿੰਨੀ ਸਕੱਤਰ ਵਗੈਰਾ ’ਚ ਬਾਇਓ ਮੀਟ੍ਰਿਕ ਹਾਜ਼ਰੀ ਦਾ ਪ੍ਰਾਜੈਕਟ ਤਿਆਰ ਕੀਤਾ ਹੈ।  ਮੁੱਖ ਪ੍ਰਮੱਖ ਸਕੱਤਰ ਸੁਰੇਸ਼ ਨਾਲ ਸੰਪਰਕ ਕਰਨ ’ਤੇ ਉਨ੍ਹਾਂ ਦਾ ਮੋਬਾਇਲ ਨੋ ਰਿਪਲਾਈ ਰਿਹਾ। ਨਿੱਜੀ ਸਕੱਤਰ ਕੁਲਦੀਪ ਸਿੰਘ ਦਾ ਕਹਿਣਾ ਸੀ ਕਿ ਸਾਬ੍ਹ, ਸੀ.ਐਮ. ਸਾਬ੍ਹ ਨਾਲ ਮੀਟਿੰਗ ਲਈ ਦੋ ਘੰਟੇ ਤੋਂ ਗਏ ਹਨ। 

12 December 2018

ਖੇਲੋ ਇੰਡੀਆ ਪ੍ਰਤਿਭਾ: ਦਸਮੇਸ਼ ਕਾਲਜ ਬਾਦਲ ਦੇਸ਼ ਦੀਆਂ ਸੱਤ ਨਿਸ਼ਾਨੇਬਾਜ਼ੀ ਅਕੈਡਮੀਆਂ 'ਚ ਸ਼ੁਮਾਰ


* ਨਿਸ਼ਾਨੇਬਾਜ਼ਾਂ ਸ਼ਵੇਤਾ ਅਤੇ ਪ੍ਰਦੀਪ ਸਿੱਧੂ ਦੇਸ਼ ਦੇ ਪਹਿਲੇ ਦਸ ਨਿਸ਼ਾਨੇਬਾਜ਼ਾਂ ਦੀ ਸੂਚੀ 'ਚ ਸ਼ਾਮਲ
                                                     
ਡੱਬਵਾਲੀ, (ਇਕਬਾਲ ਸਿੰਘ ਸ਼ਾਂਤ) : ਵਿਸ਼ਵ ਪੱਧਰ 'ਤੇ ਨਿਸ਼ਾਨੇਬਾਜ਼ੀ 'ਚ ਪ੍ਰਸਿੱਧ ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਦੇ ਉੱਚ ਮਿਆਰ 'ਤੇ ਕੇਂਦਰੀ ਖੇਡ ਮੰਤਰਾਲੇ ਨੇ ਮੁਹਰ ਵੀ ਲਗਾ ਦਿੱਤੀ ਹੈ। ਭਾਰਤ ਸਰਕਾਰ ਦੀ 'ਖੇਲੋ ਇੰਡੀਆ ਪ੍ਰਤਿਭਾ' ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਨੂੰ ਉੱਤਰ ਭਾਰਤ ਦੀ ਸਰਵੋਤਮ ਇੱਕਲੌਤੀ ਰਿਹਾਇਸ਼ੀ (ਗਰਲਜ਼) ਅਕੈਡਮੀ ਵਜੋਂ ਚੁਣਿਆ ਗਿਆ ਹੈ। 'ਖੇਲੋ ਇੰਡੀਆ ਪ੍ਰਤਿਭਾ' ਦੇਸ਼ ਭਰ 'ਚ ਸੱਤ ਸ਼ੂਟਿੰਗ ਅਕੈਡਮੀਆਂ ਚੁਣੀਆਂ ਗਈਆਂ ਹਨ। ਜਿਨ•ਾਂ 'ਚ ਡਾ. ਕਰਨੀ ਸਿੰਘ ਸ਼ੂਟਿੰਗ ਰੇਂਜ ਨਵੀਂ ਦਿੱਲੀ, ਗੰਨ ਫਾਰ ਗਲੋਰੀ ਸ਼ੂਟਿੰਗ ਅਕੈਡਮੀ ਪੂਨੇ, ਗੰਨ ਫਾਰ ਗਲੋਰੀ ਸ਼ੂਟਿੰਗ ਅਕੈਡਮੀ ਜਬਲਪੁਰ, ਲਕਸ਼ੈ ਸ਼ੂਟਿੰਗ ਕਲੱਬ ਪਨਵੇਲ (ਮੁੰਬਈ) ਗੈਰ-ਰਿਹਾਇਸ਼ੀ ਅਤੇ ਦਸਮੇਸ਼ ਗਰਲਜ਼ ਕਾਲਜ ਬਾਦਲ, ਐਮ.ਪੀ ਸ਼ੂਟਿੰਗ ਅਕੈਡਮੀ ਭੋਪਾਲ ਅਤੇ ਸੈਂਟਰ ਫਾਰ ਸਪੋਰਟਸ ਸਾਇੰਸ ਚੇਨੰਈ ਰਿਹਾਇਸ਼ੀ ਸਹੂਲਤਾਂ ਵਾਲੀਆਂ ਨਾਲ ਲੈਸ ਹਨ। 'ਖੋਲੇ ਇੰਡੀਆ ਪ੍ਰਤਿਭਾ' ਤਹਿਤ ਹੋਰਨਾਂ ਖੇਡਾਂ ਵਾਂਗ ਹਰ ਸਾਲ ਏਅਰ ਪਿਸਟਲ ਅਤੇ ਏਅਰ ਰਾਇਫ਼ਲ ਦੇ ਪਹਿਲੇ ਦਸ ਨਿਸ਼ਾਨੇਬਾਜ਼ਾਂ ਨੂੰ ਹੋਰ ਪ੍ਰਤਿਭਾ ਨਿਖਾਰਨ ਲਈ ਚੁਣਿਆ ਜਾਂਦਾ ਹੈ। ਕੇਂਦਰ ਸਰਕਾਰ ਵੱਲੋਂ ਹਰੇਕ ਚੁਣੇ ਖਿਡਾਰੀ ਦੀ ਸਿਖਲਾਈ, ਖੇਡ ਸਾਜੋ-ਸਾਮਾਨ, ਰਹਿਣ-ਸਹਿਣ ਅਤੇ ਖੁਰਾਕ ਅਤੇ ਪੜ•ਾਈ ਦੇ ਸਮੁੱਚੇ ਖਰਚੇ ਲਈ ਲਗਪਗ 5 ਲੱਖ ਰੁਪਏ ਖਰਚੇ ਦਾ ਬਜਟ ਮਿੱਥਿਆ ਜਾਂਦਾ ਹੈ। ਇੱਕ ਖਿਡਾਰੀ ਵੱਧ ਤੋਂ ਵੱਧ ਅੱਠ ਸਾਲ ਤੱਕ ਖੇਲੋ ਇੰਡੀਆ ਪ੍ਰਤਿਭਾ ਤਹਿਤ ਚੁਣਿਆ ਜਾ ਸਕਦਾ ਹੈ। ਇਸ ਲੜੀ 'ਚ ਲਗਾਤਾਰ ਬਣੇ ਰਹਿਣ ਲਈ ਵਰ•ੇ ਕੌਮੀ ਪੱਧਰ 'ਤੇ ਹਰ ਸਾਲ ਪਹਿਲੇ ਦਸ ਖਿਡਾਰੀਆਂ 'ਚ ਸ਼ੁਮਾਰ ਹੋਣਾ ਲਾਜ਼ਮੀ ਹੈ। ਕੇਂਦਰ ਸਰਕਾਰ ਨੇ ਖੇਲੇ ਇੰਡੀਆ ਪ੍ਰਤਿਭਾ 'ਚ ਨਿਸ਼ਾਨੇਬਾਜ਼ੀ, ਤੀਰਅੰਦਾਜ਼ੀ, ਅਥਲੈਟਿਕਸ, ਬੈਡਮਿੰਟਨ, ਬਾਕਸਿੰਗ,
ਵਾਲਕਟਬਾਲ, ਫੁਟਬਾਲ, ਜਿਮਨਾਸਟਿਕ, ਹਾਕੀ, ਜੂਡੋ, ਕਬੱਡੀ, ਖੋ-ਖੋ, ਤੈਰਾਕੀ, ਵਾਲੀਬਾਲ, ਵੇਟਲਿਫ਼ਟਿੰਗ ਅਤੇ ਕੁਸ਼ਤੀ ਖੇਡਾਂ ਸ਼ਾਮਲ ਹਨ।  ਪੇਂਡੂ ਖੇਤਰ ਦੇ ਵਿੱਦਿਅਕ ਅਦਾਰੇ ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਲਈ ਦੋਹਰੀ ਮਾਣ ਵਾਲੀ ਗੱਲ ਹੈ ਕਿ ਇਸ ਅਦਾਰੇ ਦੀਆਂ ਦੋ ਨਿਸ਼ਾਨੇਬਾਜ (ਏਅਰ ਪਿਸਟਲ) ਸ਼ਵੇਤਾ ਦੇਵੀ ਅਤੇ ਪ੍ਰਦੀਪ ਕੌਰ ਸਿੱਧੂ ਨੇ ਖੇਲੋ ਇੰਡੀਆ ਯੂਥ ਗੇਮਜ਼ 2019 ਲਈ ਪਹਿਲੇ ਦਸ ਖਿਡਾਰੀਆਂ 'ਚ ਚੁਣਿਆ ਗਿਆ ਹੈ। ਪ੍ਰਦੀਪ ਕੌਰ ਸਿੱਧੂ ਤਾਂ 'ਖੇਲੋ ਇੰਡੀਆ 2017-18' ਤਹਿਤ ਚੁਣੀ ਜਾ ਚੁੱਕੀ ਸੀ। ਦੱਸਣਯੋਗ ਹੈ ਕਿ ਦਸਮੇਸ਼ ਵਿੱਦਿਅਕ ਅਦਾਰੇ 'ਚ ਕੌਮਾਂਤਰੀ ਪੱਧਰ ਦੀਆਂ ਸਹੂਲਤਾਂ ਵਾਲੀਆਂ 10 ਮੀਟਰ, 25 ਅਤੇ 50 ਮੀਟਰ ਦੀ ਨਿਸ਼ਾਨੇਬਾਜ਼ੀ ਰੇਂਜਾਂ ਹਨ। ਕਾਲਜ ਪ੍ਰਿੰਸੀਪਲ ਡਾ. ਐਸ.ਐਸ ਸੰਘਾ ਨੇ ਦੱਸਿਆ ਕਿ ਮਿਸ ਸ਼ਵੇਤਾ ਨੇ 62ਵੀਂ ਖੇਲੋ ਇੰਡੀਆ ਪ੍ਰਤਿਭਾ ਨੈਸ਼ਨਲ ਸ਼ੂਟਿੰਗ ਚੈਂਪੀਅਨਸ਼ਿਪ 2018 ਮੁਕਾਬਲੇ 'ਚ 10 ਮੀਟਰ ਏਅਰ
ਪਿਸਟਲ (ਜੂਨੀਅਰ ਵੁਮੈਨ) ਵਿੱਚ ਵਿਅਕਤੀਗਤ ਅਤੇ ਪ੍ਰਦੀਪ ਕੌਰ 10 ਮੀਟਰ ਏਅਰ ਪਿਸਟਲ (ਟੀਮ) ਵਿੱਚੋਂ ਜਿੱਤਣ ਕਰਕੇ ਚੁਣੀਆਂ ਗਈਆਂ ਹਨ। ਡਾ. ਸੰਘਾ ਅਨੁਸਾਰ ਦੋਵੇਂ ਦੀਆਂ ਪਹਿਲਾਂ ਵੀ ਨਿਸ਼ਾਨੇਬਾਜੀ ਖੇਤਰ 'ਚ ਅਹਿਮ ਪ੍ਰਾਪਤੀਆਂ ਹਨ। ਸ਼ਵੇਤਾ ਪਿਛਲੇ 2 ਸਾਲਾਂ ਤੋਂ ਨੈਸ਼ਨਲ ਸਕੁਐਡ ਵੀ ਰਹੀ ਹੈ ਅਤੇ ਅੰਤਰ ਰਾਸ਼ਟਰੀ ਪੱਧਰ 'ਤੇ ਜੂਨੀਅਰ ਵਰਲਡ ਕੱਪ (ਜਰਮਨੀ) ਵੀ ਖੇਡ ਚੁੱੱਕੀ ਹੈ। ਪ੍ਰਦੀਪ ਕੌਰ ਸਿੱਧੂ ਨੇ ਤਾਂ ਪਿਛਲੀਆਂ 'ਖੇਲੋ ਇੰਡੀਆ 2017-18' ਵਿੱਚ ਵੀ ਆਲ ਇੰਡੀਆ ਨਿਸ਼ਾਨੇਬਾਜ਼ੀ ਮੁਕਾਬਲਿਆਂ 'ਚ 9ਵਾਂ ਸਥਾਨ ਹਾਸਿਲ ਕੀਤਾ ਸੀ। ਕਾਲਜ ਪਰਤਣ 'ਤੇ ਕਾਲਜ ਪ੍ਰਿੰਸੀਪਲ, ਕੋਚ ਵੀਰਪਾਲ ਕੌਰ, ਕੋਚ ਰਾਮ ਲਾਲ, ਕੋਚ ਲਖਬੀਰ ਕੌਰ ਅਤੇ ਸਮੂਹ ਸਟਾਫ ਵੱਲੋਂ ਦੋਵੇਂ ਨਿਸ਼ਾਨੇਬਾਜ਼ਾਂ ਦਾ ਭਰਵਾਂ ਸਵਾਗਤ ਕੀਤਾ ਗਿਆ। 

01 December 2018

ਯੁਵਰਾਜ ਰਣਇੰਦਰ ਸਿੰਘ ਇੰਟਰਨੈਸ਼ਨਲ ਸ਼ੂਟਿੰਗ ਸਪੋਰਟਸ ਫ਼ੈਡਰੇਸ਼ਨ ਦੇ ਮੀਤ-ਪ੍ਰਧਾਨ ਚੁਣੇ ਗਏ

* ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਵੱਲੋਂ ਆਪਣੇ ਸਪੁੱਤਰ ਨੂੰ ਵਧਾਈ 
* ਵਕਾਰੀ ਅਹੁਦੇ ’ਤੇ ਪੁੱਜਣ ਵਾਲੇ ਪਹਿਲੇ ਭਾਰਤੀ
* ਐਨ.ਆਰ.ਏ.ਆਈ ਦੇ ਪ੍ਰਧਾਨ ਵਜੋਂ ਭਾਰਤੀ ਨਿਸ਼ਾਨੇਬਾਜ਼ੀ ਨੂੰ ਦੇ ਚੁੱਕੇ ਵਿਲੱਖਣ ਮੁਕਾਮ

                                          ਇਕਬਾਲ ਸਿੰਘ ਸ਼ਾਂਤ/ਬੁਲੰਦ ਸੋਚ ਬਿਊਰੋ 
 ਨਵੀਂ ਦਿੱਲੀ/ਚੰਡੀਗੜ੍ਹ, 1 ਦਸੰਬਰ : ਨੈਸ਼ਨਲ ਰਾਈਫ਼ਲ ਐਸੋਸੀਏਸ਼ਨ ਆਫ਼ ਇੰਡੀਆ (ਐਨ.ਆਰ.ਏ.ਆਈ) ਦੇ ਪ੍ਰਧਾਨ ਅਤੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਸਪੁੱਤਰ ਰਣਇੰਦਰ ਸਿੰਘ ਅੱਜ ਇੰਟਰਨੈਸ਼ਨਲ ਸ਼ੂਟਿੰਗ ਸਪੋਰਟਸ ਫ਼ੈਡਰੇਸ਼ਨ (ਆਈ.ਐਸ.ਐਸ.ਐਫ਼.) ਦੇ ਮੀਤ ਪ੍ਰਧਾਨ ਚੁਣੇ ਗਏ ਹਨ। ਉਹ ਪਹਿਲੇ ਭਾਰਤੀ ਹਨ ਜਿਹੜੇ ਇਸ ਸ਼ਾਨਾਮੱਤੇ ਅਹੁਦੇ ’ਤੇ ਪੁੱਜੇ ਹਨ। ਉਹ ਆਈ.ਐਸ.ਐਸ.ਐਫ਼. ਦੇ ਚਾਰ ਉਪ ਪ੍ਰਧਾਨਾਂ ਵਿੱਚ ਸ਼ਾਮਲ ਹਨ। ਰਣਇੰਦਰ ਸਿੰਘ ਦੀ ਇਸ ਪ੍ਰਾਪਤੀ ’ਤੇ ਉਨ੍ਹਾਂ ਦੇ ਪਿਤਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਵਧਾਈ ਦਿੱਤੀ ਹੈ। 
  ਇਹ ਚੋਣ ਮੁਨਿਚਮ ਵਿਖੇ ਆਈ.ਐਸ.ਐਸ.ਐਫ਼ ਦੀ ਜਨਰਲ ਅਸੈਂਬਲੀ ਦੌਰਾਨ ਹੋਈ। ਰਣਇੰਦਰ ਸਿੰਘ ਨੇ 161 ਵੋਟਾਂ ਹਾਸਲ ਕੀਤੀਆਂ। ਤਿੰਨ ਹੋਰ ਬਣੇ ਉੱਪ ਪ੍ਰਧਾਨਾਂ ਵਿੱਚ ਆਇਰਲੈਂਡ ਦੇ ਕੈਵਿਨ ਕਿਲਟੀ (162 ਵੋਟਾਂ), ਅਮਰੀਕਾ ਦੇ ਰੋਬਰਟ ਮਿਚੇਲ (153 ਵੋਟਾਂ), ਅਤੇ ਚੀਨ ਗਣਰਾਜ ਦੇ ਵਾਂਗ ਯੀਸੂ ਜੋ 146 ਵੋਟਾਂ ਹਾਸਲ ਕਰਕੇ ਮੁੜ ਚੁਣੇ ਗਏ ਹਨ। ਸ਼ੁੱਕਰਵਾਰ ਨੂੰ ਜਨਰਲ ਅਸੈਂਬਲੀ ਵਿੱਚ ਰਣਇੰਦਰ ਸਿੰਘ ਨੂੰ ਆਈ.ਐਸ.ਐਸ.ਐਫ਼. ਦਾ ਡਿਪਲੋਮਾ ਗੋਲਡ ਮੈਡਲ ਪ੍ਰਦਾਨ ਕੀਤਾ ਗਿਆ। ਉਨ੍ਹਾਂ ਨੂੰ ਇਹ ਡਿਪਲੋਮਾ ਅਤੇ ਮੈਡਲ ਸਭ ਤੋਂ ਲੰਮਾ ਸਮਾਂ ਆਈ.ਐਸ.ਐਸ.ਐਫ਼. ਦੇ ਰਹੇ ਪ੍ਰਧਾਨ ਓਲੈਗਰਿਓ ਵਾਜ਼ਕਿਜ਼ ਰਾਣਾ ਨੇ ਦਿੱਤਾ ਜੋ ਇਸ ਅਹੁਦੇ ਤੋਂ ਸੇਵਾ ਮੁਕਤ ਹੋ ਰਹੇ ਹਨ। ਜ਼ਿਕਰਯੋਗ ਕਿ ਰਣਇੰਦਰ ਸਿੰਘ ਸਾਲ 2014 ’ਚ 25 ਵਿੱਚੋਂ 22 ਵੋਟਾਂ ਹਾਸਲ ਕਰਕੇ ਆਈ.ਐਸ.ਐਸ.ਐਫ਼. ਦਾ ਮੈਂਬਰ ਬਣੇ ਸਨ। ਯੁਵਰਾਜ ਰਣਇੰਦਰ ਸਿੰਘ ਪਿਛਲੇ ਸਾਲ ਮੁਹਾਲੀ ਵਿਖੇ ਚਾਰ ਸਾਲ ਵਾਸਤੇ ਐਨ.ਆਰ.ਏ.ਆਈ. ਦਾ ਮੁਖੀ ਵੀ ਚੁਣਿਆ ਗਿਆ ਸੀ। ਰਣਇੰਦਰ ਸਿੰਘ ਦੇ ਕਾਰਜਕਾਲ
ਦੌਰਾਨ ਭਾਰਤੀ ਨਿਸ਼ਾਨੇਬਾਜ਼ੀ ਨੇ ਦੁਨੀਆਂ ਪੱਧਰ ’ਤੇ ਉਤਸਾਹਜਨਕ ਨਾਮਣਾ ਖੱਟਿਆ ਹੈ। ਉਨ੍ਹਾਂ ਦੀ ਕਾਬਲੀਅਤ ਅਤੇ ਦ੍ਰਿੜ ਇਰਾਦੇ ਵਾਲੇ ਉਪਰਾਲਿਆਂ ਸਦਕਾ ਭਾਰਤ ’ਚ ਜ਼ਮੀਨੀ ਪੱੱਧਰ ’ਤੇ ਨਿਸ਼ਾਨੇਬਾਜ਼ੀ ਦੀਆਂ ਜੜ੍ਹਾਂ ਫੈਲ ਰਹੀਆਂ ਹਨ। ਜਿਸ ਸਦਕਾ ਆਮ ਸਾਧਾਰਨ ਪਰਿਵਾਰਾਂ ਦੇ ਨੌਜਵਾਨ ਲੜਕੇ-ਲੜਕੀਆਂ ਨੇ ਵੀ ਨਿਸ਼ਾਨੇਬਾਜ਼ੀ ਨਾਲ ਜੁੜ ਕੇ ਦੇਸ਼ ਅਤੇ ਕੌਮਾਂਤਰੀ ਪੱਧਰ ’ਤੇ ਆਪਣੀ ਪ੍ਰਤਿਭਾ ਦਾ ਲੋਹਾ ਮਨਵਾਇਆ ਹੈ ਅਤੇ ਇਹ ਲੜੀ ਲਗਾਤਾਰ ਜਾਰੀ ਹੈ। 
ਉਨ੍ਹਾਂ ਦੇ ਪਿਤਾ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਰਣਇੰਦਰ ਸਿੰਘ ਨੇ ਇਸ ਅਹੁਦੇ ’ਤੇ ਪਹੁੰਚ ਕੇ ਭਾਰਤ ਦਾ ਨਾਂਅ ਰੌਸ਼ਨ ਕੀਤਾ ਹੈ ।ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਆਪਣੇ ਭਰਾ ਰਣਧੀਰ ਸਿੰਘ ਦੀ ਚੋਣ ’ਤੇ ਵੀ ਵਧਾਈ ਦਿੱਤੀ ਹੈ ਜੋ ਲਗਾਤਾਰ ਪੰਜਵੀਂ ਵਾਰ ਚਾਰ ਸਾਲ ਵਾਸਤੇ ਐਸੋਸਿਏਸ਼ਨ ਆਫ਼ ਨੈਸ਼ਨਲ ਓਲਿੰਪਿਕ ਕਮੇਟੀ ਦੇ ਕਾਰਜਕਾਰੀ ਬੋਰਡ ਦੇ ਮੈਂਬਰ ਚੁਣੇ ਗਏ ਹਨ। ਰਣਧੀਰ ਸਿੰਘ ਸਾਲ 2001 ਤੋਂ 2014 ਤੱਕ ਇੰਡੀਅਨ ਓਲਿੰਪਿਕ ਕਮੇਟੀ ਦੇ ਮੈਂਬਰ ਵੀ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਰਣਇੰਦਰ ਸਿੰਘ ਦੀ ਇਸ ਪ੍ਰਾਪਤੀ ’ਤੇ ਪੰਜਾਬ ਖਾਸਕਰ ਨਿਸ਼ਾਨੇਬਾਜ਼ ਭਾਈਚਾਰੇ ਨੂੰ ਵੱਡਾ ਮਾਣ ਹਾਸਲ ਹੋਇਆ ਹੈ। - 98148-26100 / 93178-26100

23 October 2018

ਉਮਰ ਲੰਘ ਗਈ ਭਟਕਦੇ-ਭਟਕਦੇ

                                                     ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਪਿਛਲੇ ਸਾਢੇ ਗਿਆਰਾਂ ਸਾਲਾਂ ’ਚ ਸਰਕਾਰੀ ਨੌਕਰੀ ਨੂੰ ਉਡੀਕਦੇ-ਉਡੀਕਦੇ ਲਗਪਗ 38 ਹਜ਼ਾਰ ਤੋਂ ਵੱਧ ਪੰਜਾਬੀ ਨੌਜਵਾਨ ਉਮਰ ਦਰਾਜ ਹੋ ਗਏ। ਸਰਕਾਰੀ ਨੌਕਰੀ ਲਈ ਭਟਕਦੇ-ਭਟਕਦੇ ਪੜ੍ਹੇ ਲਿਖੇ ਨੌਜਵਾਨਾਂ ਦਾ ਜਵਾਨੀ ਵਾਲਾ ਜੁੱਸਾ ਬੁਢਾਪੇ ਵਾਲੇ ਰਾਹ ਪੈ ਗਿਆ। ਸਿਫ਼ਾਰਸ਼ਾਂ ਅਤੇ ਟੈਸਟਾਂ ’ਚ ਕਿਸਮਤ ਹੱਥੋਂ ਹਾਰਨ ਵਾਲੇ ਹੱਥਾਂ ਦੀਆਂ ਲਕੀਰਾਂ ਕੱਚੇ-ਪੱਕੇ ਰਜ਼ੁਗਾਰਾਂ ’ਤੇ ਨਿਰਭਰ ਹੋ ਗਈਆਂ। ਪੰਜਾਬ ’ਚ ਸਰਕਾਰੀ ਨੌਕਰੀ ਦੀ ਹੱਦ 37 ਸਾਲ ਹੈ। ਜਦਕਿ ਗੁਆਂਢੀ ਸੂਬੇ ਹਰਿਆਣੇ
’ਚ ਸਰਕਾਰੀ ਨੌਕਰੀ ਲਈ ਉਮਰ ਹੱਦ 42 ਸਾਲ ਤੱਕ ਹੈ। ਪਿਛਲੇ ਸਾਢੇ 11 ਸਾਲਾਂ ’ਚ ਜ਼ਿਲ੍ਹਾ ਜਲੰਧਰ ’ਚ ਸਭ ਤੋਂ ਵੱਧ 5200 ਸੌ ਅਤੇ ਸ਼ਹੀਦ ਭਗਤ ਸਿੰਘ ਨਗਰ (ਨਵਾਂ ਸ਼ਹਿਰ) ’ਚ ਸਭ ਤੋਂ ਘੱਟ 167 ਬੇਰੁਜ਼ਗਾਰ ਨੌਜਵਾਨ ਸਰਕਾਰੀ ਨੌਕਰੀ ਉਡੀਕਦੇ ਹੋਏ 37 ਸਾਲਾਂ ਦੀ ਉਮਰ ਹੱਦ ਪਾਰ ਕਰ ਗਏ। ਸੂਬੇ ’ਚ ਨੌਕਰੀ ਦਾ ਮੁੱਖ ਆਧਾਰ ਅਖਵਾਉਂਦੇ ਰੁਜ਼ਗਾਰ ਜਨਰੇਸ਼ਨ ਵਿਭਾਗ ਕੋਲ ਪਿਛਲੇ ਦਹਾਕੇ ਦੌਰਾਨ ਕਰੀਬ 2.56 ਲੱਖ ਨੌਜਵਾਨ ਮੁੰਡੇ-ਕੁੜੀਆਂ ਹੀ ਰਜਿਸਟਰਡ ਹੋਏ ਹਨ।
ਉਮਰ ਦਰਾਜ ਹੋਏ ਬੇਰੁਜ਼ਗਾਰਾਂ ਦੀਆਂ ਉਮੀਦਾਂ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਵੱਲੋਂ 2016 ਵਿੱਚ ਤਲਵੰਡੀ ਸਾਬੋ ਵਿਖੇ ਵਿਸਾਖੀ ਕਾਨਫਰੰਸ ਮੌਕੇ ਕੀਤੇ ਉਸ ਵਾਅਦੇ ’ਤੇ ਟਿਕੀਆਂ ਹਨ, ਜਿਸ ’ਚ ਉਨ੍ਹਾਂ ਕਾਂਗਰਸ ਸਰਕਾਰ ਬਣਨ ’ਤੇ ਸਰਕਾਰੀ ਨੌਕਰੀ ਦੀ ਉਮਰ ਹੱਦ ਹਰਿਆਣਾ ਪੈਟਰਨ ’ਤੇ ਕਰਨ ਦਾ ਐਲਾਨ ਕੀਤਾ ਸੀ। ਉਮਰ ਦਰਾਜ ਬੇਰੁਜ਼ਗਾਰਾਂ ਸੰਬੰਧੀ ਅੰਕੜੇ ਪੰਜਾਬ ਰੁਜ਼ਗਾਰ ਜਨਰੇਸ਼ਨ ਅਤੇ ਟਰੇਨਿੰਗ ਵਿਭਾਗ ਦੀ ਸੂਚਨਾ ’ਤੇ ਆਧਾਰਤ ਹਨ। ਹਾਲਾਂਕਿ ਕਈ ਜ਼ਿਲ੍ਹੇ ਅੰਕੜਿਆਂ ਪੱਖੋਂ ਪੂਰੇ ਨਾ ਹੋਣ ਕਰਕੇ ਸੂਚੀ ਕਾਫ਼ੀ ਵੱਧ ਹੋਣ ਦੀ ਉਮੀਦ ਹੈ। 
ਪਿਛਲੇ ਦਹਾਕੇ ’ਚ ਅਕਾਲੀ ਸਰਕਾਰ ਸਮੇਂ ਪੰਜਾਬ ’ਚ ਹਜ਼ਾਰਾਂ ਗਿਣਤੀ ਪੜ੍ਹੇ-ਲਿਖੇ ਅਧਿਆਪਕ, ਫੂਡ ਸਪਲਾਈ, ਨਹਿਰੀ ਪਟਵਾਰੀ, ਪੁਲਿਸ ਸਮੇਤ ਹੋਰਨਾਂ ਵਿਭਾਗਾਂ ’ਚ ਕੱਚੀਆਂ-ਪੱਕੀਆਂ ਸਰਕਾਰੀ ਨੌਕਰੀਆਂ ’ਤੇ ਲੱਗਣ ਦੀਆਂ ਰਿਪੋਰਟਾਂ ਹਨ। ਘਰ-ਘਰ ਨੌਕਰੀ ਦੇਣ ਦੇ ਵਾਅਵੇ ਤਹਿਤ ਸੱਤਾ ’ਚ ਕਾਬਜ਼ ਹੋਈ ਕਾਂਗਰਸ ਸਰਕਾਰ ਨੇ ਪਿਛਲੇ 18 ਮਹੀਨਿਆਂ ਦੌਰਾਨ 3,93,320 ਨੌਜਵਾਨਾਂ ਨੂੰ ਨੌਕਰੀਆਂ/ਸਵੈ-ਰੋਜ਼ਗਾਰ ਦੇਣ ਦਾ ਦਾਅਵਾ ਕੀਤਾ ਹੈ। ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਅਨੁਸਾਰ ਪੰਜਾਬ ਵਿੱਚ ਰੋਜ਼ਾਨਾ ਅੱਠ ਸੌ ਨੌਕਰੀਆਂ/ਸਵੈ-ਰੁਜ਼ਗਾਰ ਦਿੱਤਾ ਜਾ ਰਿਹਾ ਹੈ। ਸੂਬੇ ’ਚ ਜ਼ਿਲ੍ਹਾ ਵਾਰ ਅੰਕੜਿਆਂ ’ਚ ਉਮਰ ਦਰਾਜ ਹੋਏ ਬੇਰੁਜ਼ਗਾਰਾਂ ਦੇ ਅੰਕੜਿਆਂ ਮੁਤਾਬਕ ਜ਼ਿਲ੍ਹਾ ਪਠਾਨਕੋਟ ’ਚ 4063, ਜ਼ਿਲ੍ਹਾ ਮੁਹਾਲੀ ’ਚ 4049, ਰੂਪ ਨਗਰ ’ਚ 3679, ਜ਼ਿਲ੍ਹਾ ਲੁਧਿਆਣਾ ’ਚ 3535, ਫਿਰੋਜ਼ਪੁਰ ’ਚ 3195, ਅੰਮ੍ਰਿਤਸਰ ’ਚ ਕਰੀਬ 3000, ਫਰੀਦਕੋਟ ’ਚ 1851, ਹੁਸ਼ਿਆਰਪੁਰ 1822, ਫਤਿਹਗੜ੍ਹ ਸਾਹਿਬ ’ਚ 1560, ਤਰਨਤਾਰਨ ’ਚ ਲਗਪਗ 1543,  ਕਪੂਰਥਲਾ ’ਚ ਕਰੀਬ 1200, ਬਰਨਾਲਾ 1081, ਬਠਿੰਡਾ ’ਚ 1018, ਮਾਨਸਾ ’ਚ 542, ਜ਼ਿਲ੍ਹਾ ਮੋਗਾ ’ਚ 340 ਅਤੇ ਸਾਬਕਾ ਵੀ.ਆਈ.ਪੀ. ਜ਼ਿਲ੍ਹੇ ਸ੍ਰੀ ਮੁਕਤਸਰ ਸਾਹਿਬ ’ਚ 200 ਨੌਜਵਾਨ ਸ਼ਾਮਲ ਹਨ।  
ਪੰਜਾਬ ਦਾ ਦੁਖਾਂਤ ਹੈ ਕਿ ਸਰਕਾਰੀ ਨੌਕਰੀ ਅਤੇ ਰੁਜ਼ਗਾਰ ਦੇ ਸੁਚੱਜੇ ਵਸੀਲੇ ਨਾ ਹੋਣ ਕਾਰਨ ਪੰਜਾਬ ਦਾ ਕਿਰਤੀ ਅਤੇ ਪੜ੍ਹਿਆ-ਲਿਖਿਆ ਜੁੱਸਾ ਲੱਖਾਂ ਨੌਜਵਾਨ ਦੀ ਸ਼ਕਲ ’ਚ ਵਿਦੇਸ਼ਾਂ ਨੂੰ ਉਡਾਰੀ ਮਾਰ ਚੁੱਕਿਆ ਹੈ। ਇਹ ਰੁਝਾਨ ਲਗਾਤਾਰ ਜਾਰੀ ਹੈ। ਸਰਕਾਰੀ ਨੌਕਰੀ ਦੀ ਤਾਂਘ ਵਿੱਚ ਵਰ੍ਹਿਆਂ ਤੱਕ ਧੱਕੇ ਖਾਣ ਵਾਲਾ ਬੀ.ਏ., ਬੀ.ਐੱਡ ਅਤੇ ਐਮ.ਏ ਪਾਸ ਗੁਰਮੇਲ ਸਿੰਘ ਵਾਸੀ ਗੋਬਿੰਦਪੁਰਾ ਨੇ ਪਟਵਾਰੀ ਦੇ ਪੀ.ਏ. ਵਜੋਂ ਕੰਮ ਕਰਕੇ ਵੇਲਾ ਲੰਘਾ ਰਿਹਾ ਹੈ। ਜਦੋਂਕਿ ਸਰਕਾਰੀ ਨੌਕਰੀ ਨਾ ਮਿਲਣ ਕਰਕੇ ਬੀ.ਏ, ਬੀ.ਐੱਡ ਅਤੇ ਡਬਲ ਐਮ.ਏ ਪਾਸ ਕਰਮਜੀਤ ਕੌਰ ਵਾਸੀ ਕੋਠਾ ਗੁਰੂਕਾ ਵੀ ਬਤੌਰ ਨਿੱਜੀ ਅਧਿਆਪਕ ਨਿਗੁਣੀ ਤਨਖ਼ਾਹ ’ਤੇ ਨੌਕਰੀ ਕਰ ਰਹੀ ਹੈ। ਜਮ੍ਹਾ ਦੋ ਪਾਸ ਮਨਪ੍ਰੀਤ ਸਿੰਘ ਪਿੰਡ ਮਲੋਟ ਵੀ ਉਮਰ ਹੱਦ ਲੰਘਣ ਬਾਅਦ ਪ੍ਰਾਈਵੇਟ ਰੁਜ਼ਗਾਰ ਰਾਹੀਂ ਆਪਣਾ ਵੇਲਾ ਲੰਘਾ ਰਿਹਾ ਹੈ। ਪੰਜਾਬ ਵਿੱਚ ਉਮਰ ਦਰਾਜ ਹੋਏ ਬੇਰੁਜ਼ਗਾਰਾਂ ਦਾ ਕਹਿਣਾ ਹੈ ਕਿ ਜੇਕਰ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਸਰਕਾਰ ਹਰਿਆਣਾ ਪੈਟਰਨ ’ਤੇ ਉਮਰ ਹੱਦ ਵਧਾਉਣ ਦਾ ਫੈਸਲਾ ਕਰਦੀ ਹੈ ਤਾਂ ਹਜ਼ਾਰਾਂ ਨੌਜਵਾਨਾਂ ਦੀ ਜ਼ਿੰਦਗੀ ’ਚ ਰੋਜ਼ੀ-ਰੋਟੀ ਵਾਲੀ ਬਹਾਰ ਆ ਸਕਦੀ ਹੈ ਅਤੇ ਉਨ੍ਹਾਂ ਦੇ ਘਰਾਂ ’ਚ ‘ਆਰਥਿਕ ਸੁੱਖ’ ਵਾਲੇ ਚੁੱਲ੍ਹੇ ਵਲ ਸਕਦੇ ਹਨ। 

06 October 2018

ਕਾਂਗਰਸ ਰੈਲੀ ’ਚ ਬੜ੍ਹਕ ’ਤੇ ਨਿਰਭਰ ਹੋਵੇਗਾ ਕਾਂਗਰਸੀ ਆਗੂਆਂ ਦੀ ਸਿਆਸੀ ਮੜ੍ਹਕ ਦਾ ਫੈਸਲਾ

-  ਰੈਲੀ ਲਈ ਭੀੜ ਜੁਟਾਉਣ ਕਾਂਗਰਸੀਆਂ ਵਾਲਿਆਂ ’ਤੇ ਘੁੰਮ ਰਹੀ ਕੈਪਟਨ ਦੀ ਬਾਜ਼ ਅੱਖ
- ਸੂਹੀਆ ਅਤੇ ਸਾਦਾ ਵਰਦੀ ਖਾਕੀ ਕਰਮਚਾਰੀ ਕਰ ਰਹੇ ਗੁਪਤ ਰਿਪੋਰਟਾਂ ਤਿਆਰ


                                                         ਇਕਬਾਲ ਸਿੰਘ ਸ਼ਾਂਤ
ਲੰਬੀ ਹੁਣ ਪੰਜਾਬ ਵਿੱਚ ਸੱਤਾ ਧਿਰ ਕਾਂਗਰਸ ਦੇ ਆਗੂਆਂ ਦੀ ਸਿਆਸੀ ਮੜ੍ਹਕ ਦਾ ਫੈਸਲਾ ਕਾਂਗਰਸ ਰੈਲੀ ’ਚ ਉਨ੍ਹਾਂ ਦੀ ਭੀੜ ਜੁਟਾਊ ਬੜ੍ਹਕ ’ਤੇ ਨਿਰਭਰ ਹੋਵੇਗਾ। ਅਮਰਿੰਦਰ ਸਰਕਾਰ ਨੇ ਬਾਦਲਾਂ ਨਾਲ ਰੈਲੀ ਜੰਗ ’ਚ ਵੱਧ ਯੋਧੇ ਲਿਆਉਣ ਵਾਲੇ ਕਾਂਗਰਸ ਆਗੂਆਂ ਦੀ ਪਛਾਣ ਲਈ ਵੱਡਾ ਜਾਲ ਵਿਛਾਇਆ ਹੋਇਆ ਹੈ। ਅਮਰਿੰਦਰ ਸਰਕਾਰ ਦੀਆਂ ਬਾਜ਼ ਅੱਖਾਂ ਪਿੰਡ-ਪਿੰਡ ਅਤੇ ਸ਼ਹਿਰ-ਕਸਬਿਆਂ ’ਚ ਘੁੰਮ ਰਹੀਆਂ ਹਨ। ਹਲਕਾ ਵਾਈਜ਼, ਸ਼ਹਿਰ, ਕਸਬਾ, ਪਿੰਡ ਅਤੇ ਵਾਰਡ
ਪੱੱਧਰ ’ਤੇ ਰੈਲੀ ਦੀਆਂ ਤਿਆਰੀਆਂ ’ਚ ਜੁਟੇ ਵਿਧਾਇਕਾਂ, ਸਾਬਕਾ ਵਿਧਾਇਕ, ਹਾਰੇ ਉਮੀਦਵਾਰਾਂ ਅਤੇ ਚੌਧਰ ਦੇ ਚਾਹਵਾਨ ਆਗੂਆਂ ਦੀ ਕਾਰਗੁਜਾਰੀ ਦੇ ਪੂਰੇ ਵੇਰਵੇ ਤਿਆਰ ਹੋ ਰਹੇ ਹਨ। ਸੂਤਰਾਂ ਤੋਂ ਪਤਾ ਲੱਗਿਆ ਹੈ ਕਿ ਸੂਬਾ ਸਰਕਾਰ ਨੇ ਸੂਹੀਆ ਅਤੇ ਖਾਕੀ ਤੰਤਰ ਦੇ ਸਾਦਾ ਵਰਦੀ ਕਰਮਚਾਰੀ ਤਾਇਨਾਤ ਕੀਤੇ ਹਨ। ਪਤਾ ਲੱਗਿਆ ਹੈ ਕਿ ਇਹ ਨਜ਼ਰਸ਼ਾਨੀ ਪਿਛਲੇ ਹਫ਼ਤੇ ਤੋਂ ਗੁਪਤ ਢੰਗ ਨਾਲ ਚੱਲ ਰਹੀ ਹੈ। ਜਿਸ ਲਈ ਇੱਕ ਜ਼ਿਲ੍ਹੇ ਦੇ ਮੁਲਾਜਮਾਂ ਨੂੰ ਦੂਜੇ ਜ਼ਿਲ੍ਹਿਆਂ ’ਚ ਲਗਾਇਆ ਗਿਆ ਹੈ। ਤਾਂ ਜੋ ਮੁਲਾਮਜਾਂ ਦੀ ਕਾਂਗਰਸ ਆਗੂਆਂ ਨਾਲ ਨੇੜਤਾ ਗੁਪਤ ਰਿਪੋਰਟ ਨੂੰ ਪ੍ਰਭਾਵਤ ਨਾ ਕਰ ਜਾਵੇ।
          ਉੱਚ ਪੱਧਰੀ ਸੂਤਰਾਂ ਦਾ ਕਹਿਣਾ ਹੈ ਕਿ ਕਾਂਗਰਸ ਦੇ ਵੱਡੀ ਗਿਣਤੀ ਆਗੂ ਸੂਬਾ ਅਤੇ ਕੇਂਦਰੀ ਪੱਧਰ ’ਤੇ ਚੈਅਰਮੈਨੀਆਂ ਅਤੇ ਸਰਕਾਰੀ ਚੌਧਰਾਂ ਲਈ ਵੱਡੇ-ਵੱਡੇ ਹੱਥ-ਪੈਰ ਮਾਰ ਰਹੇ ਹਨ। ਦਹਾਕੇ ਬਾਅਦ ਸੱਤਾ ’ਚ ਪਰਤੀ ਅਮਰਿੰਦਰ ਸਰਕਾਰ ਲਈ ਬਹੁਗਿਣਤੀ ਵਰਕਰਾਂ ਨੂੰ ਸੱਤਾ ਤੰਤਰ ਐਡਜਸਟ ਕਰਨਾ ਵੱਡੀ ਸਮੱਸਿਆ ਬਣਿਆ ਹੋਇਆ ਹੈ।
         ਅਜਿਹੇ ਵਿੱਚ ਮਹਾਰਾਜਾ ਅਮਰਿੰਦਰ ਸਿੰਘ ਦੀ ਅੰਦਰੂਨੀ ਸੁਪਰ ਸਕੇਲ ਟੀਮ ਨੇ ਚੌਧਰ ਦੇ ਚਾਹਵਾਨਾਂ ਵਿੱਚੋਂ ਫੋਕੀਆਂ ਟਾਹਰਾਂ ਵਾਲਿਆਂ ਦੀ ਛਾਂਟੀ ਕਰਨ ਲਈ ਇਹ ਜੁਗਤ ਭਿੜਾਈ ਹੈ। ਹਾਈਕਮਾਂਡ ਨੂੰ ਮਹਿਸੂਸ ਹੋ ਰਿਹਾ ਹੈ ਕਿ ਡਰਾਇੰਗ ਰੂਮ ਰਾਜਨੀਤੀ ਵਾਲੇ ਕਈ ਆਗੂ ਦਰਬਾਰੀ ਹਾਜ਼ਰੀਆਂ ਸਦਕਾ ਹੀ ਲੀਡਰਸ਼ਿਪ ਨੂੰ ਗੁੰਮਰਾਹ ਕਰਕੇ ਚੌਧਰਾਂ ਖੱਟ ਜਾਂਦੇ ਹਨ। ਜਿਸ ਨਾਲ ਪਾਰਟੀ ਕਾਡਰ ਅਤੇ ਜ਼ਮੀਨੀ ਆਗੂਆਂ ਦੇ ਮਨੋਬਲ ਨੂੰ ਠੇਸ ਪੁੱਜਦੀ ਹੈ।
     
  ਪਤਾ ਲੱਗਿਆ ਹੈ ਕਿ ਅਗਾਮੀ ਲੋਕਸਭਾ ਚੋਣਾਂ ’ਚ 13 ਸੀਟਾਂ ਜਿੱਤਣ ਲਈ ਅਮਰਿੰਦਰ ਸਰਕਾਰ ਅਗਲੇ ਕੁਝ ਮਹੀਨਿਆਂ ਵਿੱਚ ਨਵੀਂ ਤਕਨੀਕ ਅਤੇ ਬਿਹਤਰ ਕਾਰਗੁਜਾਰੀ ਨਾਲ ਸਾਹਮਣੇ ਆ ਸਕਦੀ ਹੈ। ਜੇਕਰ ਸੂਤਰਾਂ ਦੀ ਮੰਨੀਏ ਤਾਂ ਮੋਤੀਆਂ ਵਾਲੀ ਸਰਕਾਰ ਦੇ ਸਿਆਸੀ ਵਿਹੜੇ ਕਿੱਲਿਆਂਵਾਲੀ ਰੈਲੀ ’ਚ ਵੱਧ ਭੀੜ ਜੁਟਾਉਣ ਵਾਲੇ ਕਾਂਗਰਸ ਆਗੂਆਂ ਦਾ ਸਿਆਸੀ ਭਵਿੱਖ ਹੀ ਚੜ੍ਹਦੀ ਸਵੇਰ ਵੱਲ ਵਧੇਗਾ।
       ਕੈਪਟਨ ਸਰਕਾਰ ਦੇ ਨਾਲ ਕਾਂਗਰਸ ਤੰਤਰ ਵੱਲੋਂ ਕਾਰਪੋਰੇਟ ਸਟਾਈਲ ਵਿੱਚ ਰੈਲੀ ਸਬੰਧੀ ਅੰਕੜੇ ਜੁਟਾ ਰਿਹਾ ਹੈ। ਜਿਸ ਤਹਿਤ ਰੈਲੀ ’ਚ ਆਉਣ ਵਾਲੀ ਇੱਕ-ਇੱਕ ਬੱਸ ਅਤੇ ਹਰੇਕ ਵਹੀਕਲ ਦੇ ਡਰਾਈਵਰ ਜਾਂ ਉਸ ’ਚ ਆਉਣ ਵਾਲੇ ਕਾਂਗਰਸ ਵਰਕਰਾਂ ਦੇ ਮੋਬਾਇਲ ਨੰਬਰਾਂ ਦੀਆਂ ਸੂਚੀਆਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ। ਜਿਸ ਨਾਲ ਜ਼ਰੂਰਤ ਪੈਣ ਉਸ ਵਹੀਕਲਾਂ ਦੀ ਲੋਕੇਸ਼ਨ ਅਤੇ ਵਹੀਕਲ ’ਚ ਸਵਾਰ ਵਿਅਕਤੀਆਂ ਦੀ ਗਿਣਤੀ ਬਾਰੇ ਪਤਾ ਕੀਤਾ ਜਾ ਸਕੇ। ਕਾਂਗਰਸ ਹਾਈਕਮਾਂਡ ਰੈਲੀ ’ਚ ਪੁੱਜਣ ਵਾਲੇ ਹਰ ਵਿਅਕਤੀ ਦੇ ਪੰਡਾਲ ’ਚ ਪਹੁੰਚਣ ਨੂੰ ਯਕੀਨੀ ਬਣਾਉਣ ’ਚ ਜੁਟੀ ਹੋਈ ਹੈ। ਅਜਿਹੇ ਵਿੱਚ ਹੁਣ ਤੱਕ ਕਰੀਜਦਾਰ ਕੁਰਤੇ ਪਜਾਮੇ ਵਾਲੀ ਸਿਆਸਤ ਦੇ ਧਾਰਨੀ ਆਗੂਆਂ ਲਈ ਸਿਆਸੀ ਰੁਤਬਿਆਂ ਦੇ ਘਰ ਦੂਰ ਹੋ ਸਕਦੇ ਹਨ।

02 October 2018

ਖੁਦਗਰਜ਼ੀ ਅਤੇ ਖੂਨ ਹੀ ਸਫ਼ੈਦ ਨਹੀਂ, ਆਰਥਿਕ ਤੰਗੀ ਤੇ ਇਕਲਾਪਾ ਵੀ ਬਣ ਰਿਹਾ ਬੋਝ

*  ਚੌ: ਦੇਵੀ ਲਾਲ ਟਰੱਸਟ ਦਾ ਬਿਰਧ ਆਸ਼ਰਮ ਬਾਦਲ ਬੇਸਹਾਰਾ ਬਜ਼ੁਰਗਾਂ ਨੂੰ ਦੇ ਰਿਹਾ ਵੀ.ਆਈ.ਪੀ ਆਸਰਾ

                                                                 ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਮਾੜੀਆਂ ਫੈਸ਼ਨਪ੍ਰਸਤ ਸਮਾਜਕ ਅਲਾਮਤਾਂ ਦੇ ਵਲੇਵਿਆਂ ਨੇ ਕਿਸਮਤ ਦੀ ਕਿਤਾਬ ’ਚ ਅਣਗੌਲੇ ਬਦਕਿਸਮਤ ਬੁਢਾਪੇ ਵਿਚੋਂ ਪਰਿਵਾਰਕ ਤੰਦਾਂ ਵਾਲਾ ਸੁੱਖ ਖੋਹ ਲਿਆ ਹੈ। ਬਲਦ ਬਣ ਕੇ ਸਾਰੀ ਘਰ-ਪਰਿਵਾਰ ਦਾ ਭਾਰ ਢੋਹੰਦੇ ਵਾਲੇ ਬਹੁਤੇ ਬੁਜ਼ਰਗਾਂ ਲਈ ਹੁਣ ਬਿਰਧ ਆਸ਼ਰਮਾਂ ਦੀ ਦਹਿਲੀਜ਼ ਆਖ਼ਰੀ ਸਹਾਰਾ ਬਣ ਰਹੀ ਹੈ। ਬੁਢਾਪੇ ਦਾ ਸੰਤਾਪ ਸਿਰਫ਼ ਢਿੱਡੋਂ ਜੰਮੇ ਅਤੇ ਹੱਥੀਂ ਪਾਲੇ-ਪੋਸਿਆਂ ਤੋਂ ਪੀੜਤ ਨਹੀਂ ਹੈ, ਖੁਦਗਰਜ਼ ਅਤੇ ਸਫ਼ੈਦ ਹੋਏ ਖੂਨ ਦੇ ਇਲਾਕੇ ਆਰਥਿਕ ਤੰਗੀ ਅਤੇ ਇਕਲਾਪਾ ਵੀ ਵੱਡੀ ਉਮਰ ’ਤੇ ਬੋਝ ਬਣ ਰਿਹਾ ਹੈ। ਅਜਿਹੇ ਸਮਾਜਕ ਹਾਸ਼ੀਏ ’ਤੇ ਖੜ੍ਹੇ ਪੰਜਾਬ ਦੇ ਬਜ਼ੁਰਗਾਂ ਲਈ ਚੌਧਰੀ ਦੇਵੀ ਮੈਮੋਰੀਅਲ ਟਰੱਸਟ ਦਾ ਬਹੁਪੱਖੀ ਬਿਰਧ ਆਸ਼ਰਮ ਪਿੰਡ ਬਾਦਲ ਰੱਬ ਜਿਹਾ ਸਹਾਰਾ ਬਣ ਕੇ ਉੱਭਰਿਆ ਹੈ। ਮੌਜੂਦਾ ਸਮੇਂ ’ਚ ਇੱਥੇ ਰਹਿੰਦੇ ਕੁੱਲ 9 ਬਜ਼ੁਰਗਾਂ ’ਚ 7 ਪੁਰਸ਼ ਅਤੇ ਦੋ ਅੌਰਤਾਂ ਹਨ। 
      ਉਮਰ ਦੇ 91ਵੇਂ ਪੜਾਅ ’ਚੋਂ ਲੰਘ ਰਹੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਅਜੋਕੇ ਬੁਢਾਪੇ ਦੇ ਦਰਪੇਸ਼ ਦਿੱਕਤਾਂ ਦੇ ਹੱਲ ਲਈ ਇਸ ਬਿਰਧ ਦਾ ਨਿਰਮਾਣ ਕਰਵਾਇਆ ਹੈ। ਜਿੱਥੇ ਜ਼ਿੰਦਗੀ ’ਚ ਬਣੇ ਬੁਰੇ ਹਾਲਾਤਾਂ ਕਰਕੇ ਬੇਅਸਾਰਾ ਹੋਏ ਬਜ਼ੁਰਗਾਂ ਨੂੰ ਸਿਰਫ਼ ਛੱਤ ਦਾ ਆਸਰਾ ਨਹੀਂ, ਬਲਕਿ ਚੰਗਾ ਖਾਣ-ਪਾਣ, ਸੁਚੱਜੀ ਸਾਂਭ-ਸੰਭਾਲ, ਹਰਿਆ-ਭਰਿਆ ਵਾਤਾਵਰਨ ਅਤੇ ਉੱਚ ਪੱਧਰੀ ਸਿਹਤ ਸਹੂਲਤਾਂ ਅਤੇ ਭਜਨ-ਬੰਦਗੀ ਲਈ ਗੁਰਦੁਆਰਾ ਹੈ। ਇੱਕ ਆਵਾਜ਼ ’ਤੇ ਬਜ਼ੁਰਗਾਂ ਦੀ ਜਾਇਜ਼ ਜ਼ਰੂਰਤ ਨੂੰ ਪੂਰਾ ਕਰਨ ਲਈ ਦਰਜਨ ਤੋਂ ਵੱਧ ਸਟਾਫ਼ ਹੈ। ਬਿਰਧ ਆਸ਼ਰਮ ਦਾ ਉਦਘਾਟਨ 18 ਨਵੰਬਰ 2005 ਨੂੰ ਤਤਕਾਲੀ ਉਪ ਰਾਸ਼ਟਰਪਤੀ ਭੈਰੋਂ ਸਿੰਘ ਸ਼ੇਖਾਵਤ ਨੇ ਕੀਤਾ ਸੀ। ਉਦੋਂ ਇੱਥੇ 9 ਬੇਸਹਾਰਾ ਬੱਚਿਆਂ ਸਮੇਤ 27 ਬਜ਼ੁਰਗ ਸਨ। ਜਿਨ੍ਹਾਂ ਵਿੱਚੋਂ ਕੁਝ ਸਵਰਗ ਸਿਧਾਰ ਗਏ ਅਤੇ ਕੁਝ ਨੂੰ ਅੌਲਾਦ ਵਾਪਸ ਲੈ ਗਈ। ਬਿਰਧ ਆਸ਼ਰਮ ’ਚ ਸਟਾਫ਼ ਅਤੇ ਬਜ਼ੁਰਗਾਂ ਲਈ ਕੁੱਲ 28 ਕਮਰੇ ਹਨ। ਜਿਨ੍ਹਾਂ ਕੋਲ ਬੁਢਾਪਾ ਲੰਘਾਉਣ ਲਈ ਇੱਥੇ ਬਿਹਤਰ ਤੋਂ ਬਿਹਤਰੀਨ ਸਹੂਲਤਾਂ ਹਨ। ਸਿਰ ’ਤੇ ਪ੍ਰਕਾਸ਼ ਸਿੰਘ ਬਾਦਲ ਜਿਹੇ ਤਾਕਤਵਰ ਸਿਆਸਤਦਾਨ ਦਾ ਹੱਥ ਹੈ। ਇਸ ਸਭ ਦੇ ਬਾਵਜੂਦ ਇਨ੍ਹਾਂ ਬਜ਼ੁਰਗਾਂ ਨੂੰ ਕਿਸਮਤ ਦੀ ਹੋਣੀ ’ਤੇ ਬਹੁਤ ਵੱਡਾ ਰੋਸਾ ਹੈ। ਪਰ ਕਰਮਾਂ ਦਾ ਕਰਨੀ ਅਤੇ ਕਥਨੀ ਦਾ ਸਰੀਰਕ ਪੱਖੋਂ ਵੇਲਾ ਵਿਹਾਅ ਬਜ਼ੁਰਗ ਬੇਵੱਸ ਹਨ। ਢਿੱਡੋਂ ਜੰਮੇ ਅਤੇ ਹੱਥੀਂ ਪਾਲੇ ਪੁੱੱਤਾਂ-ਧੀਆਂ ਅਤੇ ਭੈਣ ਭਰਾਵਾਂ ਦੀ ਯਾਦ ਪਲ-ਪਲ ਕਲੇਜਾ ਚੀਰ ਕੇ ਲੈ ਜਾਂਦੀ ਹੈ। ਚਿੱਟੀਆਂ ਕੰਧਾਂ ਅਤੇ ਕਾਲੀਆਂ ਨਿਛੋਹ ਰਾਤਾਂ ਵਿੱਚ ਇਕਲਾਪਾ ਦਿਓ ਵਾਂਗ ਖਾਣ ਨੂੰ ਆਉਂਦਾ ਹੈ। ਬਜ਼ੁਰਗਾਂ ਦਾ ਇਕਲਾਪਾ ਦੂਰ ਕਰਨ ਲਈ ਟਰੱਸਟ ਨੇ ਨਾਲ ਖਹਿੰਦੇ ਮਾਤਾ ਜਸਵੰਤ ਕੌਰ ਸਕੂਲ ਦੇ ਬੱਚਿਆਂ ਦੇ ਦੁਪਿਹਰ ਦਾ ਭੋਜਣ ਆਸ਼ਰਮ ਦੀ ਕੰਟੀਨ ਨਾਲ ਜੋੜ ਦਿੱਤਾ। ਜਿਸ ਕਰਕੇ ਸੈਂਕੜੇ ਬੱਚਿਆਂ ਦੀ ਚਹਿਲ-ਪਹਿਲ ਦੇਖ ਬਜ਼ੁਰਗਾਂ ਦਾ ਮਨ ਬਹਿਲ ਜਾਂਦਾ ਹੈ। 
       
  ਜੇਕਰ ਸਹੂਲਤਾਂ ਪੱਖੋਂ ਵੇਖਿਆ ਜਾਵੇ ਤਾਂ ਇਹ ਨੌਜਵਾਨਾਂ ਨੂੰ ਵੀ ਛੇਤੀ ਬਜ਼ੁਰਗ ਹੋਣ ਨੂੰ ਟੁੰਭਦੀਆਂ ਹਨ। ਇਸ ਬਿਰਧ ਆਸ਼ਰਮ ਵਿੱਚ ਪੰਜਾਬੀਅਤ ਲਈ ਆਪਣੇ ਸਿਆਸੀ ਜੀਵਨ ਦਾ ਵੱਡਾ ਹਿੱਸਾ ਲਗਾਉਣ ਵਾਲੇ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਨ੍ਹਾਂ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਲਈ ਵੀ ਬਕਾਇਦਾ ਕਮਰੇ ਬਣਾਏ ਗਏ ਹਨ। ਜਿੱਥੇ ਪ੍ਰਕਾਸ਼ ਸਿੰਘ ਬਾਦਲ ਕਈ ਵਾਰ ਆ ਕੇ ਰੁਕੇ ਹਨ। ਉਹ ਸਿਆਸੀ ਰੁਝੇਂਵਿਆਂ ਵਿਚੋਂ ਸਮਾਂ ਮਿਲਣ ’ਤੇ ਕਦੇ-ਕਦਾਈਂ ਗੇੜਾ ਮਾਰ ਕੇ ਬਜ਼ੁਰਗਾਂ ਨਾਲ ਗੱਲਬਾਤ ਵੀ ਕਰਦੇ ਹਨ। ਸਮਾਜਕ ਪੱਖ ਮਾੜਾ ਇਹ ਵੀ ਸਾਹਮਣੇ ਆਇਆ ਕਿ ਕਈ ਵਾਰ ਲੋਕ ਆਪਣੇ ਬਿਮਾਰ ਮਾਪਿਆਂ ਨੂੰ ਬੇਸਹਾਰਾ ਦੱਸ ਕੇ ਭੇਜ ਦਿੰਦੇ ਹਨ। ਇਲਾਜ ਬਕਾਇਆ ਹੋਣ ਤੱਕ ਉਸਦੀ ਬਾਤ ਨਹੀਂ ਪੁੱਛਦੇ। ਲੱਖਾਂ ਰੁਪਏ ਦਾ ਇਲਾਜ ਹੋਣ ਮਗਰੋਂ ਉਸਨੂੰ ਲੈ ਜਾਂਦੇ ਹਨ। ਪਿੱਛੇ ਜਿਹੇ ਸਿਰਸਾ ਜ਼ਿਲ੍ਹੇ ਦਾ ਇੱਕ ਪਰਿਵਾਰ ਆਪਣੀ ਮਾਤਾ ਦੀ ਐਂਜਿਓਪਲਾਸਟੀ ਹੋਣ ਮਗਰੋਂ ਤੁਰੰਤ ਘਰ ਲੈ ਗਿਆ। ਇੱਥੇ ਰਹਿੰਦੇ ਹਰੇਕ ਬਜ਼ੁਰਗ ਦੀ ਆਪਣੀ ਵੱਖਰੀ ਹੱਡ ਬੀਤੀ ਹੈ।
       ਸ੍ਰੀ ਮੁਕਤਸਰ ਸਾਹਿਬ ਸ਼ਹਿਰ ਨਾਲ ਸਬੰਧਤ 80 ਸਾਲਾ ਬਜ਼ੁਰਗ ਦਰਸ਼ਨਾ ਦੇਵੀ ਕਦੇ ਸਰਦੇ-ਪੁੱਜਦੇ ਪਰਿਵਾਰ ਦੀ ਮਾਲਕਣ ਸੀ। ਉਸਦੇ ਪਤੀ ਦਾ ਸਪੈਲਰ ਅਤੇ ਚੱਕੀ ਦਾ ਕਾਰੋਬਾਰ ਸੀ। ਸਮੇਂ ਨੇ ਅਜਿਹਾ ਚੱਕਰ ਚਲਾਇਆ ਕਿ ਧੀਆਂ ਅਤੇ ਇੱਕ ਪੁੱਤ ਦੀ ਮਾਂ ਨੂੰ ਬਿਰਧ ਆਸ਼ਰਮ ’ਚ ਜ਼ਿੰਦਗੀ ਗੁਜਾਰਨੀ ਪੈ ਰਹੀ। ਉਸਨੇ ਆਖਿਆ ਕਿ ਪੁੱਤਰ ਨਸ਼ਿਆਂ ਦੇ ਕਲਾਵੇ ’ਚ ਫਸ ਗਿਆ। ਕਾਰੋਬਾਰ ਖ਼ਤਮ ਹੋ ਗਿਆ। ਨੂੰਹ ਪੁੱਤਰ ਨੂੰ ਛੱਡ ਕੇ ਚਲੀ ਗਈ। ਹੁਣ ਗਰੀਬੀ ’ਚ ਇਧਰ-ਉੱਧਰ ਭਟਕ ਸਮਾਂ ਗੁਜਾਰ ਰਿਹਾ ਪੁੱਤਰ ਮਹੀਨਾ-ਮੱਸਿਆ ਮਾਂ ਕੋਲ ਆਉਂਦਾ ਰਹਿੰਦਾ ਹੈ। 
        ਜਵਾਨੀ ’ਚ ਵਿਦੇਸ਼ਾਂ ’ਚ ਹੱਡ ਭੰਨਵੀ ਮਿਹਨਤ ਕਰਕੇ ਕਮਾਈ ਕਰਨ ਵਾਲੇ ਤਕਨੀਕੀ ਮਕੈਨਿਕ ਹਰਦੇਵ ਸਿੰਘ ਵਾਸੀ ਜਲੰਧਰ ਕੋਲ ਸਭ ਕੁਝ ਹੈ ਪਰ ਉਹ ਇਕਲਾਪਾ ਦੂਰ ਕਰਨ ਲਈ ਬਿਰਧ ਆਸ਼ਰਮ ਬਾਦਲ ਵਿੱਚ ਆ ਗਿਆ। ਪਤਨੀ ਧੀ ਕੋਲ ਟੋਰਾਂਟੋ ਰਹਿੰਦੀ ਹੈ ਅਤੇ ਲੜਕਾ ਆਸਟ੍ਰੇਲੀਆਂ ’ਚ ਵਸਦਾ ਹਨ। ਉਹ ਆਖਦੇ ਹਨ ਕਿ ਘਰੇ ਇਕੱਲਾਪਨ ਖਾਣ ਨੂੰ ਆਉਂਦਾ ਸੀ। ਪਤਨੀ ਬੱਚਿਆਂ ਨਾਲ ਰਹਿ ਕੇ ਖੁਸ਼ ਹੈ। ਪਿਛਲੇ ਤਿੰਨ ਮਹੀਨੇ ਤੋਂ ਇੱਥੇ ਉਹ ਮਾਨਸਿਕ ਤੌਰ ’ਤੇ ਸੌਖਾ ਮਹਿਸੂਸ ਕਰ ਰਿਹਾ ਹੈ ਅਤੇ ਖੁਦ ਨੂੰ ਵਿਅਸਤ ਰੱਖਦਾ ਹੈ। 
        ਮਾਨਸਾ ਨਾਲ ਸੰਬਧਤ 52 ਸਾਲਾ ਪ੍ਰਵੀਨ ਰਾਣੀ, ਚਾਰ ਭਰਾਵਾਂ ਦੀ ਭੈਣ ਪਿਛਲੇ ਦਹਾਕੇ ਤੋਂ ਬਿਰਧ ਆਰਸ਼ਮ ’ਚ ਜੀਵਨ ਗੁਜਾਰ ਰਹੀ ਹੈ। ਬਿਮਾਰ ਰਹਿਣ ਕਰਕੇ ਉਸਦੀ ਸ਼ਾਦੀ ਨਹੀਂ ਹੋ ਸਕੀ। ਉਹ ਚੰਗੇ ਵਸਦੇ ਰਸਦੇ ਪਰਿਵਾਰ ਨਾਲ ਸਬੰਧਤ ਹੈ। ਪਰ ਪਰਿਵਾਰਕ ਤੰਦਾਂ ਵੱਲੋਂ ਉਸਦਾ ਬੋਝਾ ਨਾ ਝੱਲਣ ਕਰਕੇ ਹੁਣ ਬਿਰਧ ਆਸ਼ਰਮ ਉਸਦਾ ਘਰ-ਪਰਿਵਾਰ ਹੈ ਅਤੇ ਨਾਲ ਰਹਿੰਦੇ ਬਜ਼ੁਰਗ ਉਸਦੇ ਭੈਣ-ਭਰਾ। ਉਂਝ ਪ੍ਰਵੀਣ ਰਾਣੀ ਦੇ ਅਮੀਰ ਭਰਾ ਸਾਲ ਛਿਮਾਹੀ ਕਾਫ਼ੀ ਸਮਾਨ ਅਤੇ ਕੱਪੜੇ ਵਗੈਰਾ ਲੈ ਕੇ ਮਿਲਣ ਆਉਂਦੇ ਹਨ। 
       ਆਜ਼ਾਦੀ ਘੁਲਾਟੀਏ ਦਾ 72 ਸਾਲਾ ਪੁੱਤਰ ਭੁਪਿੰਦਰ ਸਿੰਘ (ਅੰਬਾਲਾ) ਕਦੇ ਮਾਰਕਫੱੈਡ ’ਚ ਕੱਚਾ ਮੁਲਾਜਮ ਹੁੰਦਾ ਸੀ। ਗਰੀਬੀ ਕਰਕੇ ਵਿਆਹ ਨਾ ਹੋਣ ਕਾਰਨ ਵਧਦੀ ਉਮਰੇ ਜ਼ਿੰਦਗੀ ਬੇਜਾਰ ਹੋ ਗਈ। ਅੱਧਰੰਗ ਹੋਣ ਅਤੇ ਅੱਖਾਂ ਦੀ ਰੌਸ਼ਨੀ ਜਾਣ ਨਾਲ ਉਸਦਾ ਬੁਢਾਪਾ ਦਿੱਕਤਾਂ ਦਾ ਸ਼ਿਕਾਰ ਹੋ ਗਿਆ। ਉਸਦਾ ਕਹਿਣਾ ਹੈ ਕਿ ਸਮਾਜ ’ਚ ਸੌ ਫ਼ੀਸਦੀ ਬੱਚੇ ਗਲਤ ਨਹੀਂ ਹੁੰਦੇ। ਕਾਫ਼ੀ ਹੱਦ ਤੱਕ ਬਜ਼ੁਰਗਾਂ ਦਾ ਸੁਭਾਅ ਵੀ ਉਨ੍ਹਾਂ ਦੀ ਬੱਚਿਆਂ ਨਾਲ ਦੂਰੀਆਂ ਦਾ ਕਾਰਨ ਬਣਦਾ ਹੈ। ਪਿੰਡ ਮਾਨ ਦੇ ਜੋਗਿੰਦਰ ਸਿੰਘ ਲਈ ਆਪਣੀ 30 ਏਕੜ ਜ਼ਮੀਨ ਆਪਣੇ ਪੁੱਤ ਅਤੇ ਨੂੰਹ ਦੇ ਨਾਂਅ ਕਰਵਾਉਣੀ ਮਹਿੰਗੀ ਪੈ ਗਈ। ਉਸਨੂੰ ਘਰੋਂ ਕੱਢ ਦਿੱਤਾ ਗਿਆ। ਉਹ ਪੰਜ-ਛੇ ਸਾਲਾਂ ਤੋਂ ਬਿਰਧ ਆਸ਼ਰਮ ’ਚ ਰਹਿੰਦਾ ਹੈ। ਉਸਦੇ ਅਨੁਸਾਰ ਪੁੱਤਾਂ ਨਾਲੋਂ ਧੀਆਂ ਬੁਢਾਪੇ ’ਚ ਮਾਪਿਆਂ ਦਾ ਵੱਧ ਸਹਾਰਾ ਬਣਦੀਆਂ ਹਨ। 
       
ਸੰਗੂਧੌਣ ਦੇ 80 ਸਾਲਾ ਬਿੰਦਰ ਸਿੰਘ ਨੇ ਆਖਿਆ ਕਿ ਉਹ ਆਪਣੀ ਚਾਰ ਕਨਾਲ ਜ਼ਮੀਨ ’ਤੇ ਜ਼ਿੰਦਗੀ ਦੀ ਗੱਡੀ ਰੋੜ੍ਹ ਰਿਹਾ ਸੀ। ਪੁੱਤਰ ਵੀ ਚੰਗੀਗੜ੍ਹ ’ਚ ਮਜ਼ਦੂਰੀ ਕਰਕੇ ਵੇਲਾ ਲੰਘਾਉਂਦਾ ਹੈ। ਬੁਢਾਪੇ ’ਚ ਗੁਜਰ-ਬਸਰ ਅੌਖਾ ਹੋ ਗਿਆ। ਪਤਨੀ ਨੇ ਬਿਰਧ ਆਸ਼ਰਮ ’ਚ ਆਉਣਾ ਚੰਗਾ ਨਾ ਸਮਝਿਆ। ਉਹ ਪਿੰਡ ’ਚ ਮਿਹਨਤ ਕਰਕੇ ਡੰਗ ਟਪਾਉਂਦੀ ਹੈ।
       ਬੀਦੋਵਾਲੀ ਦਾ 71 ਸਾਲਾ ਬਜ਼ੁਰਗ ਕੌਰ ਸਿੰਘ ਦੇ ਜ਼ਿਕਰ ਵਗੈਰ ਇਹ ਲੇਖ ਅਧੂਰਾ ਰਹੇਗਾ। 13 ਸਾਲ ਤੋਂ ਇੱਥੇ ਰਹਿੰਦਾ ਹੈ। ਉਸਦੇ ਘਰ ’ਚ ਪਤਨੀ, ਪੁੱਤਰ-ਨੂੰਹ ਅਤੇ ਪੋਤੇ-ਪੋਤੀਆਂ ਹਨ। ਕੌਰ ਸਿੰਘ ਦਾ ਕਈ ਬਿਮਾਰੀਆਂ ਦੀ ਮਾਰ ਹੇਠਲਾ ਸਰੀਰ ਜਿੱਥੇ ਬਿਰਧ ਆਸ਼ਰਮ ਦੇ ਪ੍ਰਬੰਧਕਾਂ ਨੂੰ ਨਿੱਤ ਭਾਜੜ ਪਾਈ ਰੱਖਦਾ ਹੈ। ਇੱਥੇ ਕੌਰ ਸਿੰਘ ਇਕਲੌਤਾ ਅਜਿਹਾ ਸ਼ਖਸ ਹੈ, ਜੋ ਪਿੰਡ ਬਾਦਲ ਦੇ ਚੱਪੇ-ਚੱਪੇ ਤੋਂ ਵਾਕਫ਼ ਹੈ। ਸਾਰਾ ਪਿੰਡ ਕੌਰ ਸਿੰਘ ਦੇ ਅੰਗਰੇਜ਼ੀ ਬੋਲਣ ਦੇ ਰੌਣਕੀ ਸੁਭਾਅ ਤੋਂ ਜਾਣੂ ਹੈ। ਉਹ ਪਲ ’ਚ ਬਿਮਾਰ ਹੋ ਜਾਂਦਾ ਹੈ ਅਤੇ ਥੋੜ੍ਹੀ ਦੇਰ ਬਾਅਦ ਪਤਾ ਨਹੀ ਸਾਇਕਲ ’ਤੇ ਕਿਹੜੇ ਗਲੀ ਚੌਰਾਹੇ ’ਤੇ ਬਾਦਲ ਪਿੰਡ ਦੀ ਫੇਰੀ ਲਾਉਂਦਾ ਟੱਕਰ ਜਾਵੇ। ਉਸਤੋਂ ਜ਼ਮੀਨ ਲੈ ਕੇ ਘਰੋਂ ਕੱਢਣ ਲਈ ਨੂੰਹ-ਪੁੱਤ ਅਤੇ ਪਤਨੀ ’ਤੇ ਗੁੱਸਾ ਕੱਢਦਾ ਹੈ। ਕੌਰ ਸਿੰਘ ਨੂੰ ਮਿਲਣ ਪੁੱਜੀਆਂ ਉਸ ਦੀਆਂ ਦੋਵੇਂ ਭੈਣਾਂ ਵੀ ਭਰਾ ਦੀ ਹਾਲਤ ’ਤੇ ਹੰਝੂ ਵਹਾ ਰਹੀਆਂ ਸਨ। 
       ਬਿਰਧ ਆਸ਼ਰਮ ਦੇ ਇੰਚਾਰਜ਼ ਪ੍ਰਿੰਸੀਪਲ ਡਾ. ਆਨੰਦ ਪਾਲ ਦਾ ਕਹਿਣਾ ਸੀ ਕਿ ਬਿਰਧ ਆਸ਼ਰਮ ’ਚ ਬਜ਼ੁਰਗਾਂ ਦੀ ਮੁਫ਼ਤ ਸਾਂਭ-ਸੰਭਾਲ ’ਤੇ ਕਰੀਬ ਢਾਈ ਲੱਖ ਰੁਪਏ ਪ੍ਰਤੀ ਮਹੀਨਾ ਖਰਚਾ ਆਉਂਦਾ ਹੈ। ਸਮੁੱਚਾ ਆਰਥਿਕ ਵਹਿਣ ਚੌਧਰੀ ਦੇਵੀ ਲਾਲ ਮੈਮੋਰੀਅਲ ਟਰੱਸਟ ਦੇ ਮੁਖੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਪੱਧਰ ’ਤੇ ਹੁੰਦਾ ਹੈ। ਉਨ੍ਹਾਂ ਕਿਹਾ ਕਿ ਬਿਰਧ ਆਸ਼ਰਮ  ਨੌਂ ਬੱਚਿਆਂ ਦੀ ਪੜ੍ਹਾਈ ਲਿਖਾਈ ਦੀ ਖਰਚਾ ਝੱਲਦਾ ਹੈ, ਜੋ ਕਿ ਪਹਿਲਾਂ ਇੱਥੇ ਰਹਿੰਦੇ ਸਨ। ਉਨ੍ਹਾਂ ਕਿਹਾ ਕਿ ਹਰ ਹਫ਼ਤੇ ਦੋ ਡਾਕਟਰ ਮੁਫ਼ਤ ਸੇਵਾਵਾਂ ਵਜੋਂ ਬਜ਼ੁਰਗਾਂ ਦੀ ਜਾਂਚ ਲਈ ਆਉਂਦੇ ਹਨ। ਜਦੋਂਕਿ ਇੱਕ ਮੈਡੀਕਲ ਪ੍ਰੈਕਟੀਸ਼ਨਰ ਰੋਜ਼ਾਨਾ ਸ਼ਾਮ ਨੂੰ ਜਾਂਚ ਲਈ ਪੁੱਜਦਾ ਹੈ। ਉਨ੍ਹਾਂ ਕਿਹਾ ਕਿ ਬਿਰਧ ਆਸ਼ਰਾਮ ’ਚ ਰਹਿੰਦੇ ਬਜ਼ੁਰਗਾਂ ਦਾ ਇਲਾਜ਼ ਉੱਚ ਪੱਧਰੀ ਹਸਪਤਾਲਾ ’ਚ ਹੁੰਦਾ ਹੈ। 

ਬਿਰਧ ਆਸ਼ਰਮ ਸਮਾਜ ਦੀ ਜ਼ਰੂਰਤ ਨਹੀਂ ਬਲਕਿ ਦੁਖਾਂਤ
ਚੌ: ਦੇਵੀ ਲਾਲ ਟਰੱਸਟ ਦੇ ਮੁਖੀ ਅਤੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਬਿਰਧ ਆਸ਼ਰਮ ਸਮਾਜ ਦੇ ਨਿਘਰਦੇ ਮਾਹੌਲ ਕਾਰਨ ਬਜ਼ੁਰਗਾਂ ਦਾ ਮਾਣ-ਸਤਿਕਾਰ ਬਰਕਰਾਰ ਰੱਖਣ ਲਈ ਬਣਾਇਆ ਗਿਆ ਹੈ। ਉਨ੍ਹਾਂ ਕਿਹਾ ਨਵੀਂ ਪੀੜ੍ਹੀਂ ਨੂੰ ਆਪਣੇ ਬੁਜ਼ਰਗ ਮਾਪਿਆਂ ਦੀ ਸਾਂਭ-ਸੰਭਾਲ ਬੱਚਿਆਂ ਵਾਂਗ ਕਰਨੀ ਚਾਹੀਦੀ ਹੈ। ਮਾਪਿਆਂ ਦੀ ਸਾਂਭ-ਸੰਭਾਲ ਸਭ ਤੋਂ ਵੱਡਾ ਧਰਮ ਅਤੇ ਸੇਵਾ ਹੈ। ਬਿਰਧ ਆਸ਼ਰਮ ਸਮਾਜ ਦੀ ਜ਼ਰੂਰਤ ਨਹੀਂ ਬਲਕਿ ਦੁਖਾਂਤ ਹੈ। 

28 September 2018

ਮਹਾਰਾਜੇ ਦੀ ਸਿਆਸੀ ਬੁੱਕਲ ’ਚੋਂ ਨਹੀਂ ਮਿਲਿਆ ਕਦੇ ਵਫ਼ਾ ਵਾਲਾ ਨਿੱਘ

* ਕਾਗਜ਼ੀ ਸਫ਼ੇ ਵਾਂਗ ਵਰਤ ਕੇ ਲੰਬੀ ਵਾਲਿਆਂ ਨੂੰ ਦੁਰਕਾਰਦਾ ਆ ਰਿਹਾ ਅਮਰਿੰਦਰ 
*  ਲੰਬੀ ਦੇ ਵਰਕਰ ਰੋਸੇ ਵਜੋਂ ਕਿੱਲਿਆਂਵਾਲੀ ਰੈਲੀ ਤੋਂ ਪਾਸਾ ਵੱਟਣ ਦੇ ਰੌਂਅ ’ਚ
* ਕੈਪਟਨ ਖਿਲਾਫ਼ ਜਨਤਕ ਤੌਰ ’ਤੇ ਭੜਾਸ ਕੱਢਣ ਲੱਗੇ ਆਗੂ ਅਤੇ ਵਰਕਰ

                                      ਇਕਬਾਲ ਸਿੰਘ ਸ਼ਾਂਤ
ਲੰਬੀ/ਕਿੱਲਿਆਂਵਾਲੀ: ਬਾਦਲਾਂ ਦੇ ਹਲਕੇ ਲੰਬੀ ਦੇ ਕਾਂਗਰਸੀਆਂ ਨੂੰ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੀ ਸਿਆਸੀ ਬੁੱਕਲ ਵਿੱਚੋਂ ਕਦੇ ਵਫ਼ਾ ਵਾਲਾ ਨਿੱਘ ਨਹੀਂ ਮਿਲ ਸਕਿਆ। ਹਮੇਸ਼ਾਂ ਮਹਾਰਾਜੇ ਦੇ ਸਿਆਸੀ ਮੰਤਵਾਂ ਦੀ ਪੂਰਤੀ ਬਾਅਦ ਲੰਬੀ ਵਾਲਿਆਂ ਨੂੰ ਰੁਸਵਾਈ ਹੀ ਹਾਸਲ ਹੋਈ। ਇਤਿਹਾਸ ਗਵਾਹ ਹੈ ਕਿ ਸਿਆਸੀ ਹਿੱਤਾਂ ਦੀ ਪੂਰਤੀ ਉਪਰੰਤ ਮਹਾਰਾਜੇ ਵੱਲੋਂ ਲੰਬੀ ਦੀਆਂ ਕਾਂਗਰਸੀ ਸਫ਼ਾਂ ਨੂੰ ਵਰਤੇ ਕਾਗਜ਼ੀ ਸਫ਼ੇ ਵਾਂਗ ਲਾਂਭੇ ਕਰ ਦਿੱਤਾ। 
ਸੱਤਾ ਦੀ ਚਾਬੀ ਹੱਥ ਲੱਗਣ ’ਤੇ ਹੁਣ ਮਹਾਰਾਜੇ ਦੀ ਅੱਖਾਂ ’ਚੋਂ ਲੰਬੀ ਦਾ ਨਕਸ਼ਾ ਗਾਇਬ ਹੋ ਗਿਆ ਜਾਪਦਾ ਹੈ। ਮੁੱਖ ਮੰਤਰੀ ਬਣਨ ਬਾਅਦ ਅਮਰਿੰਦਰ ਸਿੰਘ ਨੇ ਲੰਬੀ ’ਚ ਕਦੇ ਗੇੜਾ ਨਹੀਂ ਮਾਰਿਆ। ਸਰਕਾਰੇ-ਦਰਬਾਰੇ ਰੱਤੀ ਭਰ ਸੁਣਵਾਈ ਨਾ ਹੋਣ ’ਤੇ ਇੱਥੋਂ ਦੇ ਕਾਂਗਰਸੀ ਕਾਡਰ ਅਤੇ ਲੀਡਰਸ਼ਿਪ ’ਚ ਅਮਰਿੰਦਰ ਸਿੰਘ ਪ੍ਰਤੀ ਭਾਰੀ ਗੁੱਸਾ ਹੈ। ਸਰਕਾਰ ਵਿੱਚ ਲੰਬੀਅਨਜ਼ ਦੀ ਸਾਰ ਤਾਂ ਦੂਰ, ਉਨ੍ਹਾਂ ਦੀ ਗੱਲ ਸੁਣਨ ਨੂੰ ਕੋਈ ਤਿਆਰ ਨਹੀਂ। ਲੰਬੀ ਦੀ ਕਾਂਗਰਸ ਜੱਥੇਬੰਦਕ ਪੱਧਰ ’ਤੇ ਸ਼ੁਰੂ ਤੋਂ ਅਮਰਿੰਦਰ ਸਿੰਘ ਦੇ ਖਾਤੇ ਪੈਂਦੀ ਹੈ। ਬਾਦਲਾਂ ਨਾਲ ਦਹਾਕੇ ਭਰ ਜੂਝਣ ਵਾਲੇ ਕਾਂਗਰਸੀਆਂ ਦਾ ਮਨ ਅਮਰਿੰਦਰ ਸਿੰਘ ਦੀ ਬੇਰੁੱਖੀ ਨੇ ਫਿੱਕਾ ਪਾ ਦਿੱਤਾ ਅਤੇ ਵਰਕਰ ਉਨ੍ਹਾਂ ਦੀ ਸਿਆਸੀ ਸ਼ੋਸ਼ਣ ਦੀ ਗੱਲ ਆਖਣ ਲੱਗੇ ਹਨ। 
ਮੁੱਖ ਮੰਤਰੀ ਅਮਰਿੰਦਰ ਸਿੰਘ 7 ਅਕਤੂਬਰ ਨੂੰ ਬੇਅਦਬੀ ਮਾਮਲੇ ’ਤੇ ਬਾਦਲਾਂ ਨੂੰ ਮੂੰਹ ਤੋੜ ਜਵਾਬ ਦੇਣ ਲਈ ਕਿੱਲਿਆਂਵਾਲੀ ਰੈਲੀ ਜਰੀਏ ਹਲਕਾ ਲੰਬੀ ’ਚ ਗਰਜਣ ਆ ਰਹੇ ਹਨ। ਕੈਪਟਨ ਦੀ ਬੇਰੁੱਖੀ ਕਾਰਨ ਲੰਬੀ ਦਾ ਕਾਂਗਰਸੀ ਕਾਡਰ ਇਸ ਰੈਲੀ ਤੋਂ ਪਾਸਾ ਵੱਟਣ ਦੇ ਰੌਂਅ ਵਿੱਚ ਹੈ। 
ਮਹਾਰਾਜੇ ਦਾ ਕਾਂਗਰਸ ਦੀ ‘ਲੰਬੀਅਨਜ਼’ ਲਾਬੀ ਨਾਲ ਅਜਿਹਾ ਵਰਤਾਰਾ ਨਵਾਂ ਨਹੀਂ, ਬਲਕਿ 2002 ਤੋਂ ਚੱਲ ਰਿਹਾ ਹੈ। ਇੱਥੋਂ ਦੇ ਕਾਂਗਰਸੀਆਂ ਨੇ ਬਾਦਲਾਂ ਦੇ ਸਿਆਸੀ ਖੌਫ਼ ਨੂੰ ਦਰਕਿਨਾਰ ਕਰਕੇ ਮਹਾਰਾਜੇ ਦੀ ਠੁੱਕ ਬਰਕਰਾਰ ਰੱਖਣ ਲਈ ਹਰ ਵਾਰ ਜ਼ਮੀਨ-ਅਸਮਾਨ ਇੱਕ ਕੀਤਾ। ਵਰਕਰਾਂ ਦਾ ਕਹਿਣਾ ਹੈ ਕਿ 2002 ਵਾਲੀ ਕਾਂਗਰਸ ਸਰਕਾਰ ’ਚ ਬਾਦਲਾਂ ਦੇ ਗੜ੍ਹ ’ਚ ਜੂਝਣ ਵਾਲੇ ਕਾਂਗਰਸੀਆਂ ਨੂੰ ਸਾਢੇ ਚਾਰ ਸਾਲ ਪੁੱਛਿਆ ਤੱਕ ਨਹੀ ਸੀਂ, ਉਦੋਂ ਕਾਂਗਰਸੀ ਆਗੂ ਲੰਬੀ ਥਾਣੇ ਮੂਹਰੇ ਧਰਨਾ ਲਾਉਣ ਨੂੰ ਮਜ਼ਬੂਰ ਹੋ ਗਏ ਸਨ। ਦਸੰਬਰ 2006 ਵਿੱਚ ਵੀ ਅਮਰਿੰਦਰ ਸਿੰਘ ਨੇ ਸਿਆਸੀ ਖਹਿਬਾਜ਼ੀ ’ਚ ਪ੍ਰਕਾਸ਼ ਸਿੰਘ ਬਾਦਲ ਦੇ ਜਨਮ ਦਿਨ ਮੌਕੇ ਪਿੰਡ ਬਾਦਲ ’ਚ ਵਿਸ਼ਾਲ ਰੈਲੀ ਕੀਤੀ। ਜਿਸਦੀ ਸਫ਼ਲਤਾ ’ਚ ਲੰਬੀ ਹਲਕੇ ਦੇ ਕਾਂਗਰਸੀ ਵਰਕਰਾਂ ਦਾ ਅਹਿਮ ਰੋਲ ਰਿਹਾ ਸੀ। ਬੀਤੇ ਵਿਧਾਨਸਭਾ ਚੋਣਾਂ ਵਿੱਚ ਬਾਦਲਾਂ ਦੇ ਚੱਕਰਵਿਊ ਦੇ ਬਾਵਜੂਦ ਲੰਬੀ ’ਚ ਅਮਰਿੰਦਰ ਸਿੰਘ ਨੂੰ 43605 ਵੋਟਾਂ ਮਿਲੀਆਂ। ਉਦੋਂ ਅਮਰਿੰਦਰ ਸਿੰਘ ਨੇ ਸਿਆਸੀ ਸਟੇਜਾਂ ’ਤੇ ਲੰਬੀ ਵਾਲਿਆਂ ਨੂੰ ਵੱਡੇ-ਵੱਡੇ ਖਵਾਬ ਵਿਖਾਏ ਸਨ। ਸੱਤਾ ਬਾਅਦ ਸਾਰੇ ਦਾਅਵੇ ਤੇ ਵਾਅਦੇ ਮਰਿਆ ਸੱਪ ਹੀ ਸਾਬਤ ਹੋਏ। ਮਹਾਰਾਜੇ ਲਈ ਲੰਬੀ ਹਲਕੇ ਸੀਟ ਛੱਡਣ ਵਾਲੀ ਜੁਝਾਰੂ ਕਾਂਗਰਸ ਲੀਡਰਸ਼ਿਪ ਨੂੰ ਚੇਅਰਮੈਨੀਆਂ ਦੇਣਾ ਤਾਂ ਦੂਰ ਪ੍ਰਸ਼ਾਸਨਿਕ ਪੱਧਰ ’ਤੇ ਮਾਣ-ਸਤਿਕਾਰ ਦੇਣ ਦਾ ਜਿਗਰਾ ਵੀ ਨਹੀਂ ਹੋਇਆ। 
ਹੁਣ ਤਾਜ਼ਾ ਘਟਨਾਕ੍ਰਮ ’ਚ ਜ਼ਿਲ੍ਹਾ ਪ੍ਰੀਸ਼ਦ/ਬਲਾਕ ਸੰਮਤੀ ਚੋਣਾਂ ’ਚ ਹਾਈਕਮਾਂਡ ਵੱਲੋਂ ਕਾਂਗਰਸੀ ਉਮੀਦਵਾਰਾਂ ਦੀ ਹਮਾਇਤ ’ਚ ਮਾਹੌਲ ਨਾ ਸਿਰਜਣ ਕਰਕੇ ਰੋਹ ਉੱਬਲ ਰਿਹਾ ਹੈ। ਅਜਿਹੇ ’ਚ ਕਾਂਗਰਸ ਵਰਕਰ ਇੱਕ-ਦੂਜੇ ਨਾਲ ਤਾਲਮੇਲ ਕਰਕੇ ਰੈਲੀ ਪ੍ਰਤੀ ਆਪਣੀਆਂ ਭਾਵਨਾਵਾਂ ਫੈਲਾ ਰਹੇ ਹਨ। ਰੈਲੀ ਤੋਂ ਪਹਿਲਾਂ ਕਾਂਗਰਸ ਵਰਕਰਾਂ ਦਾ ਰੋਹ ਜਨਤਕ ਤੌਰ ’ਤੇ ਨਜ਼ਰ ਆਉਣ ਦੇ ਆਸਾਰ ਹਨ। 
ਟਕਸਾਲੀ ਕਾਂਗਰਸ ਆਗੂ ਵਰਿੰਦਰ ਮਿਠੜੀ ਅਤੇ ਦਰਜਨਾਂ ਵਰਕਰਾਂ ਦਾ ਕਹਿਣਾ ਹੈ ਕਿ ਸਰਕਾਰ ’ਚ ਗੈਰ ਸੁਣਵਾਈ ਤੋਂ ਸਾਰੇ ਵਰਕਰ ਦੁਖੀ ਹਨ। ਉਨ੍ਹਾਂ ਅਨੁਸਾਰ ਟਕਸਾਲੀ ਵਰਕਰਾਂ ਦਾ ਮਨ ਰੈਲੀ ਵਿੱਚ ਜਾਣ ਦਾ ਨਹੀਂ ਹੈ। ਬੀਤੇ ਦਿਨ੍ਹੀਂ ਪੰਜਾਬ ਕਾਂਗਰਸ ਦੇ ਜਨਰਲ ਸਕੱਤਰ ਧੀਰਾ ਖੁੱਡੀਆਂ ਸੋਸ਼ਲ ਮੀਡੀਆ ’ਤੇ ਲੰਬੀ ਦੇ ਕਾਂਗਰਸੀ ਵਰਕਰਾਂ ਦੀ ਸੁਣਵਾਈ ਨਾ ਹੋਣ ਦੀ ਗੱਲ ਕਹਿ ਕੇ ਖੁੱਲ੍ਹੇਆਮ ਆਪਣਾ ਰੋਸ ਪ੍ਰਗਟਾ ਚੁੱਕੇ ਹਨ। 
ਕਾਂਗਰਸ ਵਰਕਰ ਹੁਣ ਅਮਰਿੰਦਰ ਸਿੰਘ ਨੂੰ ਸੁਆਲ ਕਰ ਰਹੇ ਹਨ ਕਿ ਬਾਦਲਾਂ ਨਾਲ ਸਿੱਧਾ ਟਾਕਰਾ ਲੈਣ ਦੇ ਬਾਅਦ ਵੀ ਉਨ੍ਹਾਂ ਨੂੰ ਕਿਹੜੇ ਕਸੂਰ ਸਦਕਾ ਅਣਗੌਲੇ ਕੀਤਾ ਜਾ ਰਿਹਾ ਹੈ, ਜੇਕਰ ਕਾਂਗਰਸੀਆਂ ਦਾ ਬਾਦਲਾਂ ਖਿਲਾਫ਼ ਡਟਣਾ ਗੁਨਾਹ ਹੈ ਤਾਂ ਬਾਦਲਾਂ ਬਾਰੇ ਆਪਣੀ ਹਕੀਕੀ ਨੀਤੀ ਨੂੰ ਅਮਰਿੰਦਰ ਪਾਰਟੀ ਕਾਡਰ ਕੋਲ ਸਪੱਸ਼ਟ ਕਰ ਦੇਣ? 
ਜ਼ਿਲ੍ਹਾ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਵਰਕਰਾਂ ਅਤੇ ਲੀਡਰਸ਼ਿਪ ਦੀ ਪਾਰਟੀ ਪ੍ਰਤੀ ਪੂਰੀ ਨਿਸ਼ਠਾ ਹੈ। ਸਾਰੇ ਗਿਲੇ ਸ਼ਿਕਵੇ ਜਨਤਕ ਪਲੇਟਫਾਰਮਾਂ ’ਤੇ ਨਹੀਂ ਬਲਕਿ ਪਾਰਟੀ ਪਲੇਟਫਾਰਮ ’ਤੇ ਹੱਲ ਹੋਣੇ ਹਨ। ਖੁੱਡੀਆਂ ਅਨੁਸਾਰ ਰੈਲੀ ਦੀਆਂ ਸਫ਼ਲਤਾ ਲਈ ਉਪਰਾਲੇ ਵਿੱਢ ਦਿੱਤੇ ਗਏ ਹਨ। 
ਦੂਜੇ ਪਾਸੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਓ.ਐਸ.ਡੀ ਕੈਪਟਨ ਸੰਦੀਪ ਸੰਧੂ ਨੇ ਕਿਹਾ ਕਿ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ’ਚ ਘੱਟ ਵੋਟਾਂ ਨਾਲ ਹਾਰਨ ਵਾਲੇ ਲੰਬੀ ਦੇ ਵਰਕਰਾਂ ’ਚ ਮੱਦਦ ਨਾ ਮਿਲਣ ਦਾ ਗੁੱਸਾ ਝਲਕ ਰਿਹਾ ਹੈ। ਵਰਕਰਾਂ ਦਾ ਮਾਣ-ਸਤਿਕਾਰ ਹਰ ਪੱਧਰ ’ਤੇ ਹੋਵੇਗਾ ਅਤੇ ਗਿਲੇ ਸ਼ਿਕਵੇ ਦੂਰ ਹੋਣਗੇ। M. No. 98148-26100

18 September 2018

ਬਾਦਲ ਵੱਲੋਂ ਸਿਆਸੀ ਖਾਹਿਸ਼ਾਂ ਲਈ 'ਲੰਬੀ ਵਾਸਤੇ ਤੋਹਫੇ' ਦੀ ਮੰਗ ਤੰਗ ਨਜ਼ਰੀਏ ਦਾ ਪ੍ਰਗਟਾਵਾ : ਅਮਰਿੰਦਰ ਸਿੰਘ

                                                                 ਬੁਲੰਦ ਸੋਚ ਬਿਊਰੋ
ਚੰਡੀਗੜ੍ਹ : ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਲੰਬੀ ਦੇ ਵਿਕਾਸ ਵਾਸਤੇ ਸਾਬਕਾ ਮੁੱਖ ਮੰਤਰੀ ਪਰਕਾਸ਼ ਸਿੰਘ ਬਾਦਲ ਵੱਲੋਂ ਕੀਤੀ ਚੋਣਵੀ ਮੰਗ ਲਈ ਤਿੱਖੀ ਆਲੋਚਨਾ ਕਰਦੇ ਹੋਏ ਕਿਹਾ ਹੈ ਕਿ ਇਹ ਅਕਾਲੀ ਆਗੂ ਦਾ ਜ਼ਾਹਿਰਾ ਤੌਰ 'ਤੇ ਸੂਬੇ ਦੇ ਵਿਕਾਸ ਬਾਰੇ ਤੰਗ ਨਜ਼ਰੀਆ ਹੈ | 
''ਵਾਅਦਾ ਪੂਰਾ ਕਰਨ ਦੀ ਸ਼ਕਲ ਵਿੱਚ ਲੋਕਾਂ ਵਾਸਤੇ ਤੋਹਫੇ ਦੇ ਨਾਲ ਲੰਬੀ ਆਉਣ'' ਬਾਰੇ ਬਾਦਲ ਵੱਲੋਂ ਦਿੱਤੇ ਗਏ ਬਿਆਨ 'ਤੇ ਪ੍ਰਤੀਕਿਰਿਆ ਪ੍ਰਗਟ ਕਰਦੇ ਹੋਏ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਉਹ ਸ਼੍ਰੋਮਣੀ ਅਕਾਲੀ ਦਲ ਦੇ ਇਸ ਬਜੁਰਗ ਆਗੂ ਦੀ ਤਰ੍ਹਾਂ ਸਿਰਫ ਦੇ ਲੰਬੀ ਦੇ ਹੀ ਮੁੱਖ ਮੰਤਰੀ ਨਹੀਂ ਹਨ ਸਗੋਂ ਉਹ ਪੂਰੇ ਪੰਜਾਬ ਦੇ ਮੁੱਖ ਮੰਤਰੀ ਹਨ ਪਰ ਉਨ੍ਹਾਂ ਦਾ ਲੰਬੀ ਦੇ ਲੋਕਾਂ ਦੇ ਪ੍ਰਤੀ ਉਚ ਸਤਿਕਾਰ ਹੈ | 
ਕੁੱਝ ਪੱਤਰਕਾਰਾਂ ਵੱਲੋਂ ਪੁੱਛੇ ਗਏ ਇਕ ਸਵਾਲ ਦੇ ਜਵਾਬ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਬਾਦਲ ਲਗਾਤਾਰ ਲੰਬੀ ਨੂੰ ਹੀ ਸੂਬੇ ਦਾ ਇਕੋ-ਇਕ ਹਲਕਾ ਦੱਸ ਰਿਹਾ ਹੈ ਜੋ ਵਿਕਾਸ ਦਾ ਹੱਕਦਾਰ ਹੈ | ਪਿਛਲੇ 10 ਸਾਲਾਂ ਦੇ ਕੁਸ਼ਾਸ਼ਨ ਤੋਂ ਲੋਕਾਂ ਦਾ ਧਿਆਨ ਲਾਂਬੇ ਕਰਨ ਅਤੇ ਉਨ੍ਹਾਂ ਨੂੰ ਗੁੰਮਰਾਹ ਕਰਨ ਦੀਆਂ ਨਿਰਾਸ਼ਜਨਕ ਅਤੇ ਅਸਫਲ ਕੋਸ਼ਿਸ਼ਾਂ ਕਰਨ ਵਾਸਤੇ ਕੈਪਟਨ ਅਮਰਿੰਦਰ ਸਿੰਘ ਨੇ ਸਾਬਕਾ ਮੁੱਖ ਮੰਤਰੀ ਦੀ ਤਿੱਖੀ ਆਲੋਚਨਾ ਕੀਤੀ | ਉਨ੍ਹਾਂ ਕਿਹਾ ਕਿ ਇਸ ਤੋਂ ਪੂਰੀ ਤਰ੍ਹਾਂ ਸਪਸ਼ਟ ਹੋ ਜਾਂਦਾ ਹੈ ਕਿ ਬਾਦਲ ਸਿਰਫ਼ ਆਪਣੀਆਂ ਸਿਆਸੀ ਖਾਹਿਸ਼ਾਂ ਦੀ ਪੂਰਤੀ ਲਈ ਸਮੁੱਚੇ ਸੂਬੇ ਦੇ ਵਿਕਾਸ ਦੀ ਬਿਨਾਹ 'ਤੇ ਲੰਬੀ ਵਾਸਤੇ ਤੋਹਫੇ ਦੀ ਮੰਗ ਕਰ ਰਿਹਾ ਹੈ | 
ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਬਾਦਲ ਨੇ ਪਿਛਲੇ 18 ਮਹੀਨੇ ਦੌਰਾਨ ਪੰਜਾਬ ਦੇ ਕਿਸੇ ਵੀ ਹੋਰ ਖਿੱਤੇ ਲਈ ਕਦੀ ਵੀ ਤੋਹਫੇ ਦੀ ਮੰਗ ਨਹੀਂ ਕੀਤੀ | ਉਨ੍ਹਾਂ ਕਿਹਾ ਕਿ ਇਸ ਤੋਂ ਸਪਸ਼ਟ ਹੈ ਕਿ ਸਾਬਕਾ ਮੁੱਖ ਮੰਤਰੀ ਨੂੰ ਸੂਬੇ ਦੇ ਲੋਕਾਂ ਦੀ ਰੱਤੀ ਭਰ ਵੀ ਚਿੰਤਾ ਨਹੀਂ ਹੈ | ਉਨ੍ਹਾਂ ਕਿਹਾ ਕਿ ਉਹ ਛੇਤੀਂ ਹੀ ਲੰਬੀ ਦਾ ਦੌਰਾ ਕਰਨਗੇ ਅਤੇ ਇਸ ਇਲਾਕੇ ਦੀਆਂ ਵਿਕਾਸ ਜ਼ਰੂਰਤਾਂ ਨੂੰ ਸੰਬੋਧਤ ਹੋਣਗੇ | ਇਸ ਦੇ ਨਾਲ ਹੀ ਉਨ੍ਹਾਂ ਕਿਹਾ ਕਿ ਉਹ ਸੂਬੇ ਦੇ ਹਰੇਕ ਹਿੱਸੇ ਲਈ ਵਿਕਾਸ ਯੋਜਨਾ ਨੂੰ ਅੰਤਮ ਰੂਪ ਦੇਣ ਅਤੇ ਇਸ ਦੀ ਸ਼ੁਰੂਆਤ ਨੂੰ ਯਕੀਨੀ ਬਨਾਉਣਗੇ | 
ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਵੱਲੋਂ ਚੋਣ ਵਾਅਦੇ ਪੂਰੇ ਕਰਨ ਸਬੰਧੀ ਇਕ ਹੋਰ ਸਵਾਲ ਦੇ ਜਵਾਬ ਵਿੱਚ ਮੁੱਖ ਮੰਤਰੀ ਨੇ ਕਿਹਾ ਕਿ ਉਨ੍ਹਾਂ ਨੇ ਸੱਤਾ ਵਿੱਚ ਆਉਣ ਤੋਂ ਬਾਅਦ ਦੋ ਦਿਨਾਂ ਦੇ ਅੰਦਰ-ਅੰਦਰ ਹੀ ਆਪਣੇ ਮੰਤਰੀ ਮੰਡਲ ਦੁਆਰਾ ਉਨ੍ਹਾਂ 117 ਫੈਸਲਿਆਂ ਨੂੰ ਲਾਗੂ ਕਰਨ ਲਈ ਪ੍ਰਵਾਨਗੀ ਦਿਵਾਈ ਜਿਨ੍ਹਾਂ ਦਾ ਕਾਂਗਰਸ ਦੇ ਚੋਣ ਮੈਨੀਫੈਸਟੋ ਵਿੱਚ ਵਾਅਦਾ ਕੀਤਾ ਗਿਆ ਸੀ | ਉਨ੍ਹਾਂ ਦੱਸਿਆ ਕਿ ਇਨ੍ਹਾਂ ਵਿੱਚੋ 70 ਫੈਸਲੇ ਪੂਰੀ ਤਰ੍ਹਾਂ ਲਾਗੂ ਕਰ ਦਿੱਤੇ ਗਏ ਹਨ ਜਦਕਿ 11 ਨੂੰ ਲਾਗੂ ਕੀਤਾ ਜਾ ਰਿਹਾ ਹੈ | ਉਨ੍ਹਾਂ ਬਾਦਲ ਨੂੰ ਚੁਣੌਤੀ ਦਿੰਦੇ ਹੋਏ ਕਿਹਾ ਕਿ ਉਹ ਖੁਦ ਦੱਸਣ ਕਿ 2012 ਵਿੱਚ ਸੱਤਾ ਵਿੱਚ ਆਉਣ ਵੇਲੇ ਉਸ ਦੀ ਸਰਕਾਰ ਨੇ ਕਿਨੇ ਚੋਣ ਵਾਅਦੇ ਪੂਰੇ ਕੀਤੇ ਸਨ | 
ਆਪਣੀ ਸਰਕਾਰ ਵੱਲੋਂ ਪੂਰੇ ਕੀਤੇ ਗਏ ਕੁੱਝ ਮਹੱਤਵਪੁਰਨ ਚੋਣ ਵਾਅਦਿਆਂ ਬਾਰੇ ਵਿਸਤਿ੍ਤ ਜਾਣਕਾਰੀ ਦਿੰਦੇ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਤਿੰਨ ਲੱਖ ਤੋਂ ਵੱਧ ਕਿਸਾਨਾਂ ਨੂੰ 1735 ਕਰੋੜ ਰੁਪਏ ਦੀ ਕਰਜ਼ਾ ਰਾਹਤ ਮੁਹਈਆ ਕਰਵਾਈ ਗਈ ਹੈ ਅਤੇ 314 ਕਰੋੜ ਰੁਪਏ ਦੀ ਅਗਲੀ ਕਿਸ਼ਤ ਉਨ੍ਹਾਂ ਸੀਮਾਂਤ ਕਿਸਾਨਾਂ ਲਈ ਛੇਤੀ ਹੀ ਜ਼ਾਰੀ ਕਰ ਦਿੱਤੀ ਜਾਵੇਗੀ ਜਿਨ੍ਹਾਂ ਨੇ ਵਪਾਰਕ ਬੈਂਕਾਂ ਤੋਂ ਕਰਜ਼ਾ ਲਿਆ ਹੈ | ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ-ਭਾਜਪਾ ਸਰਕਾਰ ਨੇ ਆਪਣੇ 10 ਸਾਲਾਂ ਦੇ ਸ਼ਾਸ਼ਨ ਦੌਰਾਨ ਕਦੀ ਵੀ ਕਿਸਾਨਾਂ ਨੂੰ ਸਿੱਧੀ ਸਬਸਿਡੀ ਜਾ ਰਾਹਤ ਮੁਹਈਆ ਨਹੀਂ ਕਰਵਾਈ | 
ਮੁੱਖ ਮੰਤਰੀ ਨੇ ਕਿਹਾ ਕਿ ਅਕਾਲੀਆਂ ਦੇ ਸ਼ਾਸਨ ਦੌਰਾਨ 10 ਸਾਲ ਪੰਜਾਬ ਦੇ ਕਿਸਾਨਾਂ ਨੂੰ ਮੰਡੀਆਂ ਵਿੱਚ ਆਪਣੀ ਫਸਲ ਵੇਚਣ ਲਈ ਮੁਸੀਬਤਾਂ ਦਾ ਸਾਹਮਣਾ ਕਰਨਾ ਪਿਆ ਜਦਕਿ ਉਨ੍ਹਾਂ ਦੀ ਸਰਕਾਰ ਨੇ ਖਰੀਦ ਕਾਰਜ਼ਾਂ ਨੂੰ ਬਿਨਾਂ ਕਿਸੇ ਅੜਚਨ ਦੇ ਨੇਪਰੇ ਚਾੜ੍ਹਿਆ | ਇਸ ਦੇ ਨਤੀਜੇ ਵੱਜੋਂ 10 ਲੱਖ ਕਿਸਾਨਾਂ ਵਿੱਚੋਂ ਬਹੁਤੇ ਉਸੇ ਦਿਨ ਹੀ ਆਪਣੀ ਫਸਲ ਵੇਚ ਕੇ ਖੁਸ਼ੀ –ਖੁਸ਼ੀ ਘਰਾਂ ਨੂੰ  ਚਲੇ ਜਾਂਦੇ ਸਨ | 
ਬੁਨਿਆਦੀ ਢਾਂਚੇ ਦੇ ਵਿਕਾਸ ਦਾ ਜ਼ਿਕਰ ਕਰਦੇ ਹੋਏ ਮੁੱਖ ਮੰਤਰੀ ਨੇ ਕਿਹਾ ਕਿ 16 ਹਜ਼ਾਰ ਕਿਲੋਮੀਟਰ ਸੰਪਰਕ ਸੜਕਾਂ ਦੀ ਮੁਰੰਮਤ ਦਾ ਵਿਸ਼ਾਲ ਕਾਰਜ਼ ਉਨ੍ਹਾਂ ਦੇ ਸ਼ਾਸਨ ਦੇ ਪਹਿਲੇ ਵਰ੍ਹੇ ਦੌਰਾਨ ਹੀ 2000 ਕਰੋੜ ਰੁਪਏ ਦੀ ਲਾਗਤ ਨਾਲ ਸ਼ੁਰੂ ਕੀਤਾ ਗਿਆ | ਇਸ ਦੇ ਉਲਟ ਸ਼੍ਰੋਮਣੀ ਅਕਾਲੀ ਦਲ-ਭਾਜਪਾ ਸਰਕਾਰ ਨੇ ਆਪਣੇ 10 ਸਾਲਾਂ ਦੇ ਸ਼ਾਸਨ ਦੌਰਾਨ ਸਿਰਫ 43 ਹਜ਼ਾਰ ਕਿਲੋਮੀਟਰ ਸੜਕਾਂ ਦੀ ਮੁਰੰਮਤ ਕਰਵਾਈ ਅਤੇ ਸਾਰਾ ਪੈਸਾ ਚੋਣਵੇਂ ਖੇਤਰਾਂ ਵਿੱਚ ਲਾਇਆ | ਉਨ੍ਹਾਂ ਕਿਹਾ ਕਿ ਬਾਦਲ ਪਰਿਵਾਰ ਦੀਆਂ ਚੋਣ ਸੰਭਵਾਨਾਵਾਂ ਦੇ ਮੱਦੇਨਜ਼ਰ ਸਰਕਾਰੀ ਫੰਡਾਂ ਨੂੰ ਚੋਣਵੇ ਖੇਤਰਾਂ ਲਈ ਦਿੱਤਾ ਗਿਆ | 
          ਮੁੱਖ ਮੰਤਰੀ ਨੇ ਕਿਹਾ ਕਿ ਪਹਿਲੀ ਵਾਰੀ ਕਿਸੇ ਸਰਕਾਰ ਨੇ ਸੂਬੇ ਵਿੱਚ ਹਰੇਕ ਘਰ ਦੇ ਘੱਟੋ-ਘੱਟ ਇਕ ਵਿਅਕਤੀ ਨੂੰ ਲਾਹੇਵੰਦ ਰੋਜ਼ਗਾਰ ਦੇਣ ਦਾ ਮਿਸ਼ਨ ਸ਼ੁਰੂ ਕੀਤਾ ਹੈ | ਇਸ ਦੇ ਹੇਠ ਹੁਣ ਤੱਕ 2 ਲੱਖ 50 ਹਜ਼ਾਰ ਲੋਕਾਂ ਨੂੰ ਰੋਜ਼ਗਾਰ ਮੁਹਈਆ ਕਰਵਾਇਆ ਜਾ ਚੁੱਕਾ ਹੈ ਅਤੇ ਸਨਅਤੀ ਨਿਵੇਸ਼ ਦੇ ਨਾਲ 95 ਹਜ਼ਾਰ ਹੋਰ ਨੌਕਰੀਆਂ ਪੈਦਾ ਕੀਤੇ ਜਾਣ ਲਈ ਆਧਾਰ ਕਾਇਮ ਕੀਤਾ ਹੈ | ਉਨ੍ਹਾਂ ਨੇ ਵੱਖ-ਵੱਖ ਮੁੱਦਿਆਂ 'ਤੇ ਸੂਬੇ ਦੇ ਲੋਕਾਂ ਨੂੰ ਗੁੰਮਰਾਹ ਕਰਨ ਲਈ ਬਾਦਲ ਦੀ ਤਿੱਖੀ ਆਲੋਚਨਾ ਕੀਤੀ 

'ਮੈਂ ਤਾਂ ਕੀ, ਉਹ ਵੀ ਗੋਲੀ ਚਲਾਉਣ ਬਾਰੇ ਨਹੀਂ ਆਖ ਸਕਦਾ'

* ਜੀਅ ਸਦਕੇ ਅਮਰਿੰਦਰ ਲੰਬੀ ’ਚ ਰੈਲੀ ਕਰੇ, ਸਾਨੂੰ ਕੋਈ ਫ਼ਿਕਰ-ਫ਼ੁਕਰ ਨਹੀਂ: ਬਾਦਲ
* ਜਸਟਿਸ ਰਣਜੀਤ ਸਿੰਘ ਰਿਪੋਰਟ ’ਚ ਮੇਰੇ ਖਿਲਾਫ਼ ਕੋਈ ਇਤਰਾਜ਼ ਨਹੀਂ

                                                          ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਆਖਿਆ ਕਿ ਅਮਰਿੰਦਰ ਸਿੰਘ ਜੀਅ ਸਦਕੇ ਲੰਬੀ ’ਚ ਰੈਲੀ ਕਰੇ। ਸਾਨੂੰ ਕੋਈ ਫ਼ਿਕਰ-ਫ਼ੁਕਰ ਨਹੀਂ। ਅਸੀਂ ਸੌ ਫ਼ੀਸਦੀ ਸੱਚਾਈ ’ਤੇ ਚੱਲ ਰਹੇ ਹਾਂ ਅਤੇ ਜ਼ਿੰਦਗੀ ’ਚ ਵੱਡੀਆਂ ਲੜਾਈਆਂ ਹਨ, ਇਹ ਤਾਂ ਕੋਰੇ ਝੂਠ ਨਾਲ ਲਿੱਬੜੇ ਦੋਸ਼ ਹਨ।  ਉਹ ਅੱਜ ਪਿੰਡ ਬਾਦਲ ਵਿਖੇ ਇਸ ਪ੍ਰਤਿਨਿਧ ਨਾਲ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਵੱਲੋਂ ਲੰਬੀ ’ਚ ਰੈਲੀ ਦੇ ਐਲਾਨ ਉਪਰੰਤ ਪ੍ਰਤੀਕਰਮ ਦੇ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਜਸਟਿਸ ਰਣਜੀਤ ਸਿੰਘ ਦੀ
ਰਿਪੋਰਟ ’ਚ ਉਨ੍ਹਾਂ ਖਿਲਾਫ਼ ਕੋਈ ਇਤਰਾਜ਼ ਨਹੀਂ ਹੈ। ਉਨ੍ਹਾਂ ਆਖਿਆ ਕਿ ਪੂਰੀ ਰਿਪੋਰਟ ਤਾਂ ਅਮਰਿੰਦਰ ਸਿੰਘ ਨੇ ਵੀ ਨਹੀਂ ਪੜ੍ਹੀ ਹੋਣੀ। ਸ਼ਾਇਦ ਮੀਡੀਆ ਦੇ ਵੱਡੇ ਹਿੱਸੇ ਨੇ ਪੂਰੀ ਰਿਪੋਰਟ ਨਹੀਂ ਪੜ੍ਹੀ ਹੋਣੀ। ਸ੍ਰੀ ਬਾਦਲ ਅਨੁਸਾਰ ਉਨ੍ਹਾਂ ਤਾਂ ਦੋ ਵਜੇ ਡੀ.ਜੀ.ਪੀ. ਨੂੰ ਆਖਿਆ ਸੀ ਕਿ ਸਾਰਾ ਕੰਮ ਅਮਨ ਸ਼ਾਂਤੀ ਨਾਲ ਕਰੋ, ਕੋਈ ਗਲਤ ਕੰਮ ਨਾ ਕਰੋ। ਬਾਦਲ ਹੁਰਾਂ ਆਖਿਆ ਕਿ ‘ਭਾਵੇਂ ਮੈਂ ਹੋਵਾਂ, ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਹੋਣ ਜਾਂ ਹੋਰ ਕਿਸੇ ਸੂਬੇ ਦਾ ਮੁੱਖ ਮੰਤਰੀ। ਉਹ ਕਦੇ ਵੀ ਗੋਲੀ ਚਲਾਉਣ ਲਈ ਨਹੀਂ ਆਖ ਸਕਦਾ। ਕੌਣ ਚਾਹੇਗਾ ਕਿ ਉਸਦੀ ਅਗਵਾਈ ਵਾਲੇ ਸੂਬੇ ਦਾ ਅਮਨ ਚੈਨ ਅਤੇ ਮਾਹੌਲ ਵਿਗੜੇ। ਕੋਈ ਵੀ ਕਦੇ ਅਜਿਹਾ ਨਹੀਂ ਚਾਹੁੰਦਾ ਅਤੇ ਨਾ ਅਜਿਹਾ ਆਖ ਸਕਦਾ। ਸ੍ਰੀ ਬਾਦਲ ਨੇ ਆਖਿਆ ਕਿ ਜਿਹੜੀ ਗੋਲੀ ਚੱਲੀ ਉਹ ਬਹਿਬਲ ਕਲਾਂ, ਚਾਰ ਘੰਟੇ ਬਾਅਦ। ਜਿਸਦਾ ਕਿਸੇ ਨੂੰ ਵੀ ਪਹਿਲਾਂ ਪਤਾ ਨਹੀਂ। ਉਥੇ ਸਵੇਰੇ ਲੋਕ ਇਕੱਠੇ ਹੋਏ ਹਨ।
ਉਨ੍ਹਾਂ ਕਿਹਾ ਕਿ ਅਮਰਿੰਦਰ ਸਰਕਾਰ ਗਰਮਪੰਥੀਆਂ ਨਾਲ ਮਿਲ ਕੇ ਪੰਜਾਬ ਨੂੰ ਮਾੜੇ ਹਾਲਾਤਾਂ ਵੱਲ ਲਿਜਾਣ ਦੇ ਰਾਹ ਪਈ ਹੋਈ ਹੈ। ਜਿਸ ਨਾਲ ਪੰਜਾਬ ਨੂੰ ਸਿਵਾਏ ਭਾਈਚਾਰਕ ਤੰਦਾਂ ਟੁੱਟਣ ਅਤੇ ਖ਼ਰਾਬ ਮਾਹੌਲ ਦੇ ਇਲਾਵਾ ਕੁਝ ਨਹੀਂ ਹਾਸਲ ਹੋਣਾ। 
ਉਨ੍ਹਾਂ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਲਗਾਏ ਗੁੰਮਰਾਹਕੁੰਨ ਪ੍ਰਚਾਰ ਦੇ ਦੋਸ਼ਾਂ ਨੂੰ ਸਿਰੇ ਤੋਂ ਖਾਰਜ਼ ਕਰਦਿਆਂ ਕਿਹਾ ਕਿ ਅਸੀਂ ਕਦੇ ਕੋਈ ਗੁੰਮਰਾਹ ਨਹੀਂ ਕੀਤੀ ਅਤੇ ਨਾ ਆਖੀ। ਅਸੀਂ ਸੌ ਫ਼ੀਸਦੀ ਸੱਚਾਈ ’ਤੇ ਹਾਂ ਅਤੇ ਸਾਡੀ ਆਖੀ ਇੱਕ-ਇੱਕ ਗੱਲ ਸੱਚੀ ਹੈ। ਅਮਰਿੰਦਰ ਸਿੰਘ ਦੱਸਣ ਕਿ ਅਸੀਂ ਕਿਹੜੀ ਗੁੰਮਰਾਹਕੁੰਨ ਗੱਲ ਕੀਤੀ। ਐਵੇਂ ਇੱਕ ਗੱਲ ਬਣਾ ਲਈ ਅਤੇ ਦੋਸ਼ ਮੜ੍ਹ ਦਿੱਤੇ। ਸ੍ਰੀ ਬਾਦਲ ਦਾ ਕਹਿਣਾ ਸੀ ਕਿ ‘‘ਹੁਣ ਬੰਬ ਚੱਲਿਆ, ਮੈਂ ਆਖ ਦੇਵਾਂ, ਕੀ ਉਹਨੇ ਆਖਿਆ ਹੋਣਾ, ਭਲਾਂ ਇਹ ਕੀ ਗੱਲ ਹੋਈ।’’ ਸਾਬਕਾ ਮੁੱਖ ਮੰਤਰੀ ਨੇ ਉਨ੍ਹਾਂ (ਬਾਦਲ) ਦੀ ਜ਼ਿੰਦਗੀ ਗੁਰੂ ਸਾਹਿਬਾਨ ਦੇ ਵਚਨਾਂ ’ਤੇ ਹਮੇਸ਼ਾਂ ਅਮਨ ਸ਼ਾਂਤੀ ਨੂੰ ਸਮਰਪਿਤ ਰਹੀ ਹੈ, ਜਿਸ ਵਿੱਚ ਨਫ਼ਰਤ ਦੀ ਕੋਈ ਜਗ੍ਹਾ ਨਹੀਂ। ਉਹ ਅਮਰਿੰਦਰ ਸਿੰਘ ਜਾਂ ਹੋਰਨਾਂ ਦੇ ਨਿੱਜੀ ਤੌਰ ’ਤੇ ਖਿਲਾਫ਼ ਨਹੀਂ, ਬਲਕਿ ਉਨ੍ਹਾਂ ਦੀਆਂ ਨੀਤੀਆਂ ਦੇ ਖਿਲਾਫ਼ ਹਨ। ਸ੍ਰੀ ਬਾਦਲ ਨੇ ਸੁਆਲ ਕੀਤਾ ਕਿ ਜੇਕਰ ਕੈਪਟਨ ਸਰਕਾਰ ਸੱਚੀ ਹੈ ਤਾਂ ਉਸਨੇ ਬੇਅਦਬੀਆਂ ਦੇ ਮਾਮਲੇ ਸਬੰਧੀ ਸੀ.ਬੀ.ਆਈ ਤੋਂ ਪੜਤਾਲ ਵਾਪਸ ਕਿਉਂ ਲਈ। ਇਸ ਤੋਂ ਕੈਪਟਨ ਸਰਕਾਰ ਦੀ ਮੰਦਭਾਵਨਾ ਜਾਹਰ ਹੁੰਦੀ ਹੈ ਕਿ ਉਹ ਸੂਬੇ ਦੇ ਅਫਸਰਾਂ ਤੋਂ ਆਪਣੀ ਮਨਮਰਜ਼ੀ ਵਾਲੀ ਰਿਪੋਰਟ ਲਿਆਉਣਾ ਚਾਹੁੰਦੀ ਹੈ। ਸ੍ਰੀ ਬਾਦਲ ਨੇ ਜਸਟਿਸ ਰਣਜੀਤ ਸਿੰਘ ਦੀ ਭੂਮਿਕਾ ’ਤੇ ਸੁਆਲ ਉਠਾਏ। 
ਇਸ ਮੌਕੇ ਸ੍ਰੀ ਬਾਦਲ ਨੇ ਸਮਾਣਾ ਹਲਕੇ ਦੇ ਪਿੰਡ ਘਿਉਰਾ ਤੋਂ ਉਚੇਚੇ ਤੌਰ ’ਤੇ ਮਿਲਣ ਪੁੱਜੇ ਸੌ ਫ਼ੀਸਦੀ ਅੰਗਹੀਣ ਅਕਾਲੀ ਵਰਕਰ ਗੁਰਜੀਤ ਸਿੰਘ ਨਾਲ ਮੁਲਾਕਾਤ ਕੀਤੀ। 26 ਸਾਲਾ ਗੁਰਜੀਤ ਸਿੰਘ ਨੇ ਆਖਿਆ ਕਿ ਉਸਦੀ ਇੱਛਾ ਸੀ ਕਿ ਉਹ ਸ੍ਰੀ ਬਾਦਲ ਨਾਲ ਮੁਲਾਕਾਤ ਕਰੇ। ਇਸੇ ਕਰਕੇ ਉਹ ਬਾਦਲ ਪਿੰਡ ਪੁੱਜਿਆ ਸੀ। ਸਾਬਕਾ ਮੁੱਖ ਮੰਤਰੀ ਨੇ ਆਪਣੇ ਸਟਾਫ਼ ਨੂੰ ਅਕਾਲੀ ਵਰਕਰ ਗੁਰਜੀਤ ਸਿੰਘ ਨੂੰ ਖਾਣਾ ਅਤੇ ਚਾਹ ਪਾਣੀ ਪਿਲਾ ਕੇ ਆਓ-ਭਗਤ ਕਰਨ ਲਈ ਆਖਿਆ। ਮਾਪਿਆਂ ਪੱਖੋਂ ਅਨਾਥ ਇਹ ਪੋਲੀਓਗ੍ਰਸਤ ਅਕਾਲੀ ਵਰਕਰ ਕਈ ਸਾਲਾਂ ਤੋਂ ਅਕਾਲੀ ਦਲ ਲਈ ਨਿਸ਼ਠਾ ਨਾਲ ਕੰਮ ਕਰ ਰਿਹਾ ਹੈ। 


ਮੀਡੀਆ ਘੋਖ ਦੇ ਸੱਚਾਈ ਲਿਖੇ
ਸ੍ਰੀ ਬਾਦਲ ਨੇ ਆਖਿਆ ਕਿ ਮੀਡੀਆ ਦਾ ਸਮਾਜ ਵਿੱਚ ਅਹਿਮ ਰੋਲ ਹੁੰਦਾ ਹੈ। ਉਸਨੂੰ ਸਮਾਜ ਹਿੱਤ ਅਤੇ ਅਮਨ ਸ਼ਾਂਤੀ ਨਾਲ ਜੁੜੇ ਹਰੇਕ ਮਸਲੇ ’ਤੇ ਕਾਹਲੀ ਦੀ ਬਜਾਇ ਡੂੰਘਾਈ ਨਾਲ ਘੋਖ ਕੇ ਰਿਪੋਰਟਿੰਗ ਕਰਨੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਮੀਡੀਆ ਨੂੰ ਜਸਟਿਸ ਰਣਜੀਤ ਸਿੰਘ ਰਿਪੋਰਟ ਨੂੰ ਪੜ੍ਹ-ਘੋਖ ਕੇ ਸੱਚਾਈ ਲਿਖਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਹੁਣ ਫਰੀਦਕੋਟ ਰੈਲੀ ਬਾਰੇ ਮੀਡੀਆ ’ਚ ਕਈ ਕੁਝ ਬੇਵ੍ਹਜਾ ਲਿਖਿਆ ਜਾ ਰਿਹਾ ਹੈ। ਸ੍ਰੀ ਬਾਦਲ ਦਾ ਕਹਿਣਾ ਸੀ ਕਿ ‘ਕੀ ਕਰ ਸਕਦੇ ਹਾਂ, ਆਖ਼ਰ ਮੀਡੀਆ ਸਭ ਕੁਝ ਦਾ ਮਾਲਕ ਐ।’ 

17 September 2018

ਸਿਆਸੀ ਕੱਦ ਮਾਪਣ 'ਚ ਲੱਗੀ ਕਾਂਗਰਸ ਦੀ ਰਾਹ ਸੌਖੀ ਨਹੀਂ


ਅਮਰਿੰਦਰ ਸਿੰਘ ਦੀ ਲੰਬੀ ਪ੍ਰਤੀ ਬੇਰੁੱਖੀ ਕਾਂਗਰਸੀ ਜੜ੍ਹਾਂ ਨੂੰ ਤੇਲ ਲਗਾ ਰਹੀ
ਉਮੀਦਵਾਰਾਂ ਨਾਲੋਂ ਵੱਧ ਲੱਗ ਰਿਹਾ ਲੀਡਰਾਂ ਦਾ ਜ਼ੋਰ

* ਅਕਾਲੀ ਦਲ ਜੜ•ਾਂ ਦਾ ਫੈਲਾਅ ਕਾਇਮ ਰੱਖਣ ਦੇ ਅਹਿਦ 'ਚ

                                              ਇਕਬਾਲ ਸਿੰਘ ਸ਼ਾਂਤ
       ਲੰਬੀ: ਲੰਬੀ ਹਲਕੇ ’ਤੇ ਆਧਾਰਤ ਚਾਰ ਜ਼ਿਲ੍ਹਾ ਪ੍ਰੀਸ਼ਦ ਜੋਨਾਂ ਅਤੇ ਪੰਚਾਇਤ ਸੰਮਤੀ ਲੰਬੀ ਅਤੇ ਮਲੋਟ ਦੀਆਂ ਲਗਪਗ 35 ਪੰਚਾਇਤ ਸੰਮਤੀ ਜੋਨ ’ਤੇ ਉਮੀਦਵਾਰਾਂ ਨਾਲੋਂ ਵੱਧ ਸਿਆਸੀ ਪਾਰਟੀਆਂ ਦੀ  ਲੀਡਰਸ਼ਿਪ ਦਾ ਜੋਰ ਲੱਗਿਆ ਹੋਇਆ ਹੈ। ਬਾਦਲਾਂ ਦੇ ਸਿਆਸੀ ਗੜ੍ਹ ਲੰਬੀ ਵਿੱਚ ਵਿਧਾਨਸਭਾ ਚੋਣਾਂ ਮਗਰੋਂ ਕਾਂਗਰਸ ਪਾਰਟੀ ਮੁੜ ਆਪਣੀ ਸਿਆਸੀ ਡੂੰਘਾਈ ਮਾਪਣ ’ਚ ਜੁਟੀ ਹੋਈ ਹੈ। ਅਕਾਲੀ ਦਲ (ਬਾਦਲ) ਹਲਕੇ ’ਚ ਆਪਣੀਆਂ ਜੜ੍ਹਾਂ ਦਾ ਫੈਲਾਅ ਕਾਇਮ ਰੱਖਣ ਦੇ ਅਹਿਦ ਵਿੱਚ ਹੈ। ਆਮ ਆਦਮੀ ਸਿਆਸੀ ਜ਼ਸ਼ੀਨ ’ਤੇ ਪੁਗਤ ਬਣਾਏ ਰੱਖਣ ਲਈ ਜੂਝ ਰਹੀ ਹੈ। ਲੰਬੀ ਹਲਕੇ ਦੀ ਸਰਾਵਾਂ ਜੈਲ ਦੇ ਲਗਪਗ 22 ਪਿੰਡ ਮਲੋਟ ਪੰਚਾਇਤ ਸੰਮਤੀ ਨਾਲ ਜੁੜੇ ਹੋਏ ਹਨ। ਬੀਤੇ ਵਿਧਾਨਸਭਾ ਚੋਣਾਂ ਵਿੱਚ
ਕਾਂਗਰਸ ਲੰਬੀ ਹਲਕੇ ਦੇ 168 ਬੂਥਾਂ ਵਿੱਚੋਂ ਸਿਰਫ਼ 18 ਬੂਥਾਂ ’ਤੇ ਬੜ੍ਹਤ ਹਾਸਲ ਕਰ ਸਕੀ ਸੀ। ਲੰਬੀ ਦੇ ਸਿਆਸੀ ਸਿਰਤਾਜ ਪ੍ਰਕਾਸ਼ ਸਿੰੰਘ ਬਾਦਲ ਨੇ ਮੌਜੂਦਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ 22770 ਦੇ ਫ਼ਰਕ ਨਾਲ ਸ਼ਿਕਸਤ ਦਿੱਤੀ ਸੀ। ਹੁਣ ਪੰਚਾਇਤ ਸੰਮਤੀ ਚੋਣਾਂ ’ਚ ਵੱਡੇ ਆਗੂਆਂ ਦੇ ਸਹਾਰੇ ਖੜ੍ਹੇ ਹੋਏ ਉਮੀਦਵਾਰ ਮਾਨਸਿਕ ਤੌਰ ’ਤੇ ਸੌਖ ਵਿੱਚ ਹਨ। ਜਦੋਂਕਿ ਵੱਡੇ ਆਗੂਆਂ ਦੀ ਭੱਜ-ਨੱਠ ਹੱਦੋਂ ਵਧੀ ਪਈ ਹੈ।

         ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਚੋਣ ਹਲਕੇ ਲੰਬੀ ’ਚ ਸਰਕਾਰ ਦੇ ਡੇਢ ਸਾਲ ਬਾਅਦ ਵੀ ਕਾਂਗਰਸ ਦਾ ਸੱਤਾ ਪੱਖ ਵਾਲਾ ਮਿਆਰ ਕਾਇਮ ਨਹੀਂ ਹੋ ਸਕਿਆ। ਜਿਸਦੇ ਕਰਕੇ ਕਾਂਗਰਸੀ ਕਾਡਰ ਦੀ ਆਮ ਜਨਤਾ ਵਿੱਚ ਪੈਠ ਨਹੀਂ ਬਣ ਸਕੀ। ਜਿਸਦਾ ਖਾਮਿਆਜ਼ਾ ਕਾਂਗਰਸ ਨੂੰ ਭੁਗਤਣਾ ਪੈ ਸਕਦਾ ਹੈ। ਕਾਂਗਰਸ ਦੇ ਜਿਲ੍ਹਾ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ, ਸਾਬਕਾ ਟਰਾਂਸਪੋਰਟ ਮੰਤਰੀ ਹਰਦੀਪ ਇੰਦਰ ਸਿੰਘ ਬਾਦਲ ਅਤੇ ਬਲਾਕ ਪ੍ਰਧਾਨ ਗੁਰਬਾਜ ਸਿੰਘ ਬਨਵਾਲਾ ਸਮੁੱਚੇ ਪਿੰਡਾਂ ’ਚ ਚੋਣ ਮੁਹਿੰਮ ਚਲਾ ਕੇ ਵੋਟਰਾਂ ਨੂੰ ਕਾਂਗਰਸ ਉਮੀਦਵਾਰਾਂ ਲਈ ਅਪੀਲਾਂ ਕਰ ਰਹੇ ਹਨ। ਗੁਰਮੀਤ ਸਿੰਘ ਖੁੱਡੀਆਂ ਨੇ ਜਸਟਿਸ ਰਣਜੀਤ ਸਿੰਘ ਰਿਪੋਰਟ ’ਚ ਵੱਡੇ-ਛੋਟੇ ਬਾਦਲ ਦਾ ਨਾਂਅ ਆਉਣ ਕਰਕੇ ਲੋਕ ਅਕਾਲੀ ਦਲ ਤੋਂ ਮੁੱਖ ਮੋੜ ਕੇ ਕਾਂਗਰਸ ਦੇ ਉਮੀਦਵਾਰਾਂ ਨੂੰ ਜਿਤਾਉਣਗੇ। ਲੰਬੀ ਹਲਕੇ ਦੀ ਪੰਚਾਇਤ ਸੰਮਤੀ ’ਤੇ ਕਾਂਗਰਸ ਨੂੰ ਬਹੁਮਤ ਮਿਲੇਗਾ। ਦੂਜੇ ਪਾਸੇ ਅਕਾਲੀ ਦਲ ਬਾਦਲ ਵੱਲੋਂ ਮੇਜਰ ਭੁਪਿੰਦਰ ਸਿੰਘ ਢਿੱਲੋਂ ਅਤੇ ਪਰਮਜੀਤ ਸਿੰਘ ਲਾਲੀ ਬਾਦਲ ਨੇ ਵਿਧਾਨਸਭਾ ਚੋਣਾਂ ਮਗਰੋਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਲੰਬੀ ’ਚ ਪੈਰ ਪਾਉਣ ਨੂੰ ਮੁੱਦਾ ਬਣਾ ਕੇ ਵੋਟਰਾਂ ਨੂੰ ਅਕਾਲੀ ਸਰਕਾਰ ਸਮੇਂ ਦਾ ਵਿਕਾਸ ਚੇਤੇ ਕਰਵਾ ਰਹੇ ਹਨ। ਸਾਬਕਾ ਮੁੱਖ ਮੰਤਰੀ ਦੇ ਸਿਆਸੀ ਸਲਾਹਕਾਰ ਮੇਜਰ ਭੁਪਿੰਦਰ ਸਿੰਘ ਢਿੱਲੋਂ ਦਾ ਕਹਿਣਾ ਸੀ ਕਿ ਅਕਾਲੀ ਦਲ ਲੰਬੀ ਹਲਕੇ ’ਚ ਚਾਰੇ ਜ਼ਿਲ੍ਹਾ ਪ੍ਰੀਸ਼ਦ ਜੋਨਾਂ ’ਚ ਜਿੱਤ ਦਰਜ ਕਰੇਗਾ। ਆਮ ਆਦਮੀ ਪਾਰਟੀ ਨੇ ਬਲਾਕ ਸੰਮਤੀ ਦੀਆਂ ਸੱਤ ਜੋਨ ਅਤੇ ਸੀ.ਪੀ.ਆਈ ਵੀ ਦੋ ਜੋਨਾਂ ਰਾਹੀਂ ਆਪਣੀ ਸਿਆਸੀ ਹਾਜ਼ਰੀ ਲਗਵਾ ਰਹੀ ਹੈ। ਪੰਚਾਇਤ ਸੰਮਤੀ ਦੇ 12 ਜੋਨਾਂ ’ਚ ਅੌਰਤ ਉਮੀਦਵਾਰਾਂ ਦੇ ਚੋਣ ਪ੍ਰਚਾਰ ’ਤੇ ਉਨ੍ਹਾਂ ਦੇ ਮਰਦ ਪਰਿਵਾਰਕ ਮੈਂਬਰ ਜੁਟੇ ਹੋਏ ਹਨ ਅਤੇ ਅੌਰਤ ਉਮੀਦਵਾਰਾਂ ਦੀ ਮੌਜੂਦਗੀ ਸਿਰਫ਼ ਦੀ ਨਾਮਜਦਗੀ ਕਾਗਜ਼ ਦਾਖਲ ਕਰਨ ਤੱਕ ਹੀ ਜਾਪਦੀ ਹੈ। 
          ਲੰਬੀ ਹਲਕੇ ਚੋਣਦ੍ਰਿਸ਼ ਬਾਰੇ ਸਿਆਸੀ ਜਾਣਕਾਰਾਂ ਦਾ ਕਹਿਣਾ ਹੈ ਕਿ ਨਿਰਪੱਖ ਚੋਣਾਂ ਹੋਣ ਦੀ ਸੂਰਤ ’ਚ ਅਕਾਲੀ ਦਲ ਘੱਟੋ-ਘੱਟ 70 ਫ਼ੀਸਦੀ ਬਲਾਕ ਸੰਮਤੀ ਜੋਨ ’ਤੇ ਕਬਜ਼ਾ ਸੰਭਵ ਹੈ, ਜਿਸ ਲਈ ਸਿੱਧੇ ਤੌਰ ’ਤੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਲੰਬੀ ਹਲਕੇ ਪ੍ਰਤੀ ਬੇਰੁੱਖੀ ਜੁੰਮੇਵਾਰ ਹੋਵੇਗੀ। ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਦੇ ਸਾਰੇ ਜੋਨਾਂ ਸਮੁੱਚੇ ਉਮੀਦਵਾਰ ਆਪਣੀਆਂ ਜਿੱਤਾਂ ਲਈ ਦਾਅਵੇ ਅਤੇ ਕੋਸ਼ਿਸ਼ਾਂ ’ਚ ਜੁਟੇ ਹਨ। ਸਮੱੁਚੇ ਪੰਜਾਬ ਦੀਆਂ ਨਜ਼ਰਾਂ ਜ਼ਿਲ੍ਹਾ ਪ੍ਰੀਸ਼ਦ ਦੇ ਕਿੱਲਿਆਂਵਾਲੀ ਜੋਨ ਦੇ ਸਿਆਸੀ ਪਰਿਦ੍ਰਿਸ਼ ’ਤੇ ਟਿਕੀਆਂ ਹਨ ਜਿੱਥੋਂ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਨੇੜਲੇ ਆਗੂ ਅਤੇ ਸਾਬਕਾ ਚੇਅਰਮੈਨ ਤੇਜਿੰਦਰ ਸਿੰਘ ਮਿੱਡੂਖੇੜਾ ਚੋਣ ਮੈਦਾਨ ਵਿੱਚ ਹਨ। ਉਨ੍ਹਾਂ ਦੇ ਸਾਹਮਣੇ ਕਾਂਗਰਸ ਉਮੀਦਵਾਰ ਵਜੋਂ ਰੰਮੀ ਕੁਲਾਰ ਚੋਣ ਪਿੜ ਵਿੱਚ ਹਨ। ਇਸ ਜੋਨ ਤੋਂ ਟਕਸਾਲੀ ਕਾਂਗਰਸੀ ਅਤੇ ਜ਼ਿਲ੍ਹਾ ਕਾਂਗਰਸ ਘੱਟ ਗਿਣਤੀ ਸੈੱਲ ਦੇ ਚੇਅਰਮੈਨ ਅਨਿਲ ਕੁਰੈਸ਼ੀ ਨੇ ਗਲਤ ਟਿਕਟ ਵੰਡ ਖਿਲਾਫ਼ ਆਜ਼ਾਦ ਤੌਰ ’ਤੇ ਝੰਡਾ ਬੁਲੰਦ ਕੀਤਾ ਹੋਇਆ ਹੈ। 

15 September 2018

ਪੰਜਾਬ ਨੂੰ ਪਾਠ ਪੜ੍ਹਾਉਣ ਵਾਲਿਆਂ ਦੇ ਸਜੇਗੀ ਅਨਪੜ੍ਹਾਂ ਦੀ ਕੈਬਨਿਟ

* ਲੰਬੀ ਦੇ ਛੇ ਜੋਨਾਂ ’ਚ ਸਾਰੇ ਉਮੀਦਵਾਰ ਅਨਪੜ੍ਹ 
* ਪੰਜ ਜੋਨਾਂ ’ਚ ਦੂਜੀ ਤੋਂ ਮਿਡਲ ਪਾਸ ਉਮੀਦਵਾਰ 
* ਕੁੱਲ 66 ਉਮੀਦਵਾਰਾਂ ਵਿੱਚੋਂ 19 ਅਨਪੜ੍ਹ  
* ਸਿਰਫ਼ ਚਾਰ ਉਮੀਦਵਾਰ ਬੀ.ਏ ਐਮ.ਏ. ਅਤੇ ਵਕਾਲਤ ਪਾਸ 

                                                     ਇਕਬਾਲ ਸਿੰਘ ਸ਼ਾਂਤ
      ਲੰਬੀ: ਗੰਧਲੇ ਸਮਾਜਿਕ ਮਾਹੌਲ ਵਿੱਚ ਪੜ੍ਹੇ-ਲਿਖੇ ਲੋਕ ਸਿਆਸੀ ਵਾਲੀ ਖੇਡ ਤੋਂ ਤੌਬਾ ਕਰਨ ਲੱਗੇ ਹਨ। ਪਿਛਲੇ 25 ਸਾਲਾਂ ਤੋਂ ਸਾਰੇ ਪੰਜਾਬ ਨੂੰ ਸਿਆਸਤ ਦਾ ਪਾਠ ਪੜ੍ਹਾ ਰਹੇ ਬਾਦਲਮਈ ਲੰਬੀ ਹਲਕੇ ਦੀ ਨਵੀਂ ਚੁਣੇ ਵਾਲੀ ਪੰਚਾਇਤ ਸੰਮਤੀ ਲੰਬੀ ’ਚ ਅਨਪੜਾਂ ਅਤੇ ਘੱਟ ਪੜ੍ਹੇ-ਲਿਖਿਆਂ ਦੀ ਕੈਬਨਿਟ ਇੱਥੋਂ ਦੇ ਪੇਂਡੂ ਵਿਕਾਸ ਦੀ ਇਬਾਰਤ ਲਿਖੇਗੀ। ਪੰਚਾਇਤ ਸੰਮਤੀ ਦੇ
ਸਮੱੁਚੇ ਵੀ.ਆਈ.ਪੀ. ਹਲਕੇ ਦੇ 25 ਜੋਨਾਂ ਵਿੱਚ ਸਿਰਫ਼ ਚਾਰ ਉਮੀਦਾਰ ਹੀ ਗ੍ਰੇਜੂਏਟ, ਐਲ.ਐਲ.ਬੀ, ਐਮ.ਏ (ਐਮ.ਫਿਲ) ਤੱਕ ਪੜ੍ਹੇ ਲਿਖੇ ਹਨ। ਜੋਨ ਭੀਟਵਾਲਾ ਤੋਂ ਬੀ.ਐਲ.ਐਲ.ਬੀ ਪਾਸ 25 ਸਾਲਾ ਕਮਲਜੀਤ ਸਿੰਘ ਕਾਂਗਰਸ ਟਿਕਟ ’ਤੇ ਆਪਣੀ ਕਿਸਮਤ ਆਜਮਾ ਰਿਹਾ ਹੈ। ਜਦੋਂਕਿ ਜੋਨ ਹਾਕੂਵਾਲਾ ਜੋਨ ’ਚ ਪ੍ਰਭਜੋਤ ਕੌਰ ਐਮ.ਏ. ਐਮ.ਫਿਲ ਅਤੇ ਦਵਿੰਦਰ ਕੌਰ ਬੀ.ਏ ਪਾਸ ਹੈ। ਇਸੇ ਤਰ੍ਹਾਂ ਜੋਨ ਮਾਹਣੀਖੇੜਾ ਤੋਂ ਉਮੀਦਵਾਰ ਪਿੱਪਲ ਸਿੰਘ ਵੀ ਬੀ.ਏ. ਪਾਸ ਹੈ। 
      ਕਰੀਬ ਛੇ ਜੋਨਾਂ ਤੋਂ ਸਿੱਧੇ ਤੌਰ ਅਨਪੜ੍ਹ ਉਮੀਦਵਾਰ ਚੁਣ ਕੇ ਆ ਰਹੇ ਹਨ। ਇਨ੍ਹਾਂ ਜੋਨਾਂ ’ਚ ਸਾਰੇ ਉਮੀਦਵਾਰ ਅਨਪੜ੍ਹ ਹਨ। ਪੰਚਾਇਤ ਸੰਮਤੀ ਲੰਬੀ ’ਚ 66 ਉਮੀਦਵਾਰਾਂ ਵਿੱਚੋਂ 19 ਅਨਪੜ੍ਹ ਅਤੇ 15 ਉਮੀਦਵਾਰ ਮੈਟ੍ਰਿਕ ਪਾਸ ਹਨ। ਪੰਜ ਜੋਨਾਂ ’ਚ ਦੂਜੀ ਤੋਂ ਮਿਡਲ ਪਾਸ ਤੱਕ ਪਾਸ ਉਮੀਦਵਾਰ ਚੁਣੇ ਜਾਣਗੇ। ਜਦੋਂਕਿ 25 ਉਮੀਦਵਾਰਾਂ ਦੀ ਵਿੱਦਿਅਕ ਯੋਗਤਾ ਦੂਜੀ ਤੋਂ ਲੈ ਕੇ 8ਵੀਂ ਜਮਾਤ ਹੈ ਅਤੇ ਲਗਪਗ ਚਾਰ ਉਮੀਦਵਾਰ ਜਮ੍ਹਾ ਦੋ ਪਾਸ ਹਨ। ਨੌਂ ਉਮੀਦਵਾਰ ਪ੍ਰਾਇਮਰੀ ਤੱਕ ਪੜ੍ਹੇ ਹਨ। ਹਾਲਾਂਕਿ ਸਰਕਾਰੀ ਤੌਰ ’ਤੇ ਬਲਾਕ ਸੰਮਤੀ ਚੋਣਾਂ ’ਚ ਵਿੱਦਿਅਕ ਯੋਗਤਾ ਦੀ ਸੀਮਾ ਮੁਕਰਰ ਨਹੀਂ ਹੈ। ਇਸਦੇ ਬਾਵਜੂਦ ਸੂਚਨਾ ਤਕਨੀਕ ਦੇ ਯੁੱਗ ਵਿੱਚ ਲੋਕਪ੍ਰਤਿਨਿਧੀਆਂ ਦਾ ਸਮੇਂ ਦੇ ਅਨੂਕੂਲ ਪੜ੍ਹੇ-ਲਿਖੇ ਹੋਣਾ ਬੁਨਿਆਦੀ ਜ਼ਰੂਰਤ ਬਣ ਗਿਆ ਹੈ। 
      ਹੈਰਾਨੀ ਦੀ ਗੱਲ ਹੈ ਕਿ ਵਿਕਾਸ ਪੱਖੋਂ ਪਿਛਲੇ ਦਹਾਕੇ ’ਚ ਸਭ ਵੱਧ ਵਿਕਾਸ ਦੇ ਦੌਰ ’ਚੋਂ ਲੰਘਣ ਵਾਲੇ ਲੰਬੀ ਹਲਕੇ ’ਚ ਲੋਕਪ੍ਰਤਿਨਿਧਿ ਵਜੋਂ ਸਿਆਸੀ ਪਾਰਟੀਆਂ ਨੂੰ ਪੜ੍ਹੇ-ਲਿਖੇ ਉਮੀਦਵਾਰ ਨਹੀਂ ਮਿਲੇ। ਜਦੋਂਕਿ ਲੰਬੀ ਹਲਕੇ ’ਚ ਸਕੂਲਾਂ, ਕਾਲਜਾਂ ਅਤੇ ਹੋਰ ਵਿੱਦਿਅਕ ਅਦਾਰਿਆਂ ਦੀ ਕੋਈ ਥੁੜ ਨਹੀਂ ਅਤੇ ਵੱਡੀ ਗਿਣਤੀ ਪੜ੍ਹੇ-ਲਿਖੇ ਬੇਰੁਜ਼ਗਾਰ ਨੌਜਵਾਨ ਨੌਕਰੀਆਂ ਲਈ ਭਟਕਦੇ ਫਿਰ ਰਹੇ ਹਨ। ਪੰਚਾਇਤ ਸੰਮਤੀ ਲੰਬੀ ਦੇ ਜੋਨ ਘੁਮਿਆਰਾ, ਪੰਜਾਵਾ, ਮਿੱਡੂਖੇੜਾ, ਮਹਿਮੂਦਖੇੜਾ (ਭਾਈ ਕਾ ਕੇਰਾ) ਅਤੇ ਜੋਨ  ਬਨਵਾਲਾ ਅੰਨੂ ਵਿਖੇ ਸਾਰੇ ਉਮੀਦਵਾਰ ਅੱਖਰਾਂ ਤੋਂ ਕੋਰੇ ਹਨ। ਜੋਨ ਮਹਿਣਾ ’ਚ ਦੋ ਉਮੀਦਵਾਰ ਅਨਪੜ੍ਹ ਹਨ ਅਤੇ ਆਪ ਉਮੀਦਵਾਰ ਮਲਕੀਤ ਸਿੰਘ ਸਿਰਫ਼ ਦੂਜੀ ਪਾਸ ਹੈ। ਸਭ ਤੋਂ ਵੱਧ ਉਮਰੇ ਉਮੀਦਵਾਰ ਜੋਨ ਲੰਬੀ ਤੋਂ 72 ਸਾਲਾ ਜੀਤਾ ਸਿੰਘ ਹਨ। ਜਦੋਂਕਿ ਜੋਨ ਤਰਮਾਲਾ ਤੋਂ ਗੁਰਪ੍ਰੀਤ ਸਿੰਘ ਅਤੇ ਜੋਨ ਕੱਖਾਂਵਾਲੀ ਤੋਂ ਮਨਦੀਪ ਕੌਰ ਆਪਣੀ 23 ਸਾਲਾ ਸਦਕਾ ਸਭ ਤੋਂ ਘੱਟ ਉਮਰੇ ਉਮੀਦਵਾਰ ਹਨ। 

08 September 2018

ਡੇਰਾ ਸਿਰਸਾ ਲਈ ਪਲੇਪਾ ਦੇ ਦਿਮਾਗ ’ਚ ਉੱਬਲ ਰਹੇ ਵੱਡੇ ਮਨਸੂਬੇ

*  ਗੁਰਮੀਤ ਰਾਮ ਰਹੀਮ ਨੂੰ ਬਠਿੰਡਾ ਲੋਕਸਭਾ ਤੋਂ ਉਮੀਦਵਾਰ ਬਣਾਉਣ ਲਈ ਸਾਧਿਆ ਸੰਪਰਕ
*  ਚੋਣ ਮਨੋਰਥ ਪੱਤਰ ’ਚ ਰੱਖਿਆ ਜਾਵੇਗਾ ਵੱਖਰੇ ‘ਪ੍ਰੇਮੀ’ ਧਰਮ ਵਜੋਂ ਮਾਨਤਾ ਦਾ ਮੁੱਦਾ
*  ਪੰਚਕੂਲਾ ਘਟਨਾ ’ਚ ਦੇਸ਼ ਧਰੋਹ ਮਾਮਲੇ ’ਚ ਮੁਲਜਮ ਪ੍ਰੇਮੀਆਂ ਨੂੰ ਦਿੱਤੀਆਂ ਜਾਣਗੀਆਂ ਲੋਕਸਭਾ ਟਿਕਟਾਂ

                                                              ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ: ਡੇਰਾ ਮੁਖੀ ਗੁਰਮੀਤ ਰਾਮ ਰਹੀਮ ਸਿੰਘ ਨੂੰ ਸਜ਼ਾ ਉਪਰੰਤ ਮੁਸ਼ਕਿਲਾਂ ’ਚੋਂ ਲੰਘ ਰਹੇ ਡੇਰਾ ਸੱਚਾ ਸੌਦਾ ਸਿਰਸਾ ਨੂੰ ਮੱਝਧਾਰ ’ਚੋਂ ਕੱਢਣ ਲਈ ਪੰਜਾਬ ਲੇਬਰ ਪਾਰਟੀ ਦੇ ਦਿਮਾਗ ’ਚ ਵੱਡੇ ਮਨਸੂਬੇ ਉੱਬਲ ਰਹੇ ਹਨ। ਕੁਝ ਵਰ੍ਹੇ ਪਹਿਲਾਂ ਵਜੂਦ ’ਚ ਆਈ ਪੰਜਾਬ ਲੇਬਰ ਪਾਰਟੀ ਰੋਹਤਕ ਦੀ ਸੁਨਾਰੀਆ ਜੇਲ੍ਹ ’ਚ ਬੰਦ ਗੁਰਮੀਤ ਰਾਮ ਰਹੀਮ ਸਿੰਘ ਨੂੰ ਲੋਕਸਭਾ ਹਲਕਾ ਬਠਿੰਡਾ ਤੋਂ ਆਪਣਾ ਉਮੀਦਵਾਰ ਬਣਾਉਣ ਦੇ ਰੌਂਅ ਵਿੱਚ ਹੈ। ਇਸ ਲਈ ਪਾਰਟੀ ਨੇ ਰਾਮ ਰਹੀਮ ਨਾਲ ਉਸਦੇ ਇੱਕ ਵਕੀਲ ਰਿਸ਼ਤੇਦਾਰ ਰਾਹੀਂ ਸੰਪਰਕ ਸਾਧਿਆ ਹੈ। ਪੰਜਾਬ ਲੇਬਰ ਪਾਰਟੀ ਦੀਆਂ ਇਨ੍ਹਾਂ ਭਾਵਨਾਵਾਂ ਨੂੰ ਬੂਰ ਪੈਣ ਦੇ ਹਾਲਾਤਾਂ ’ਚ ਬਠਿੰਡਾ
ਦੀ ਸਿਆਸੀ ਜ਼ਮੀਨ ਦੇ ਕਈ ਵੱਡੇ-ਵੱਡੇ ਸਿਆਸੀ ਧੁਰੰਧਰਾਂ ਦੇ ਨਾਸੀਂ ਧੂੰਆਂ ਆ ਸਕਦਾ ਹੈ। ਜ਼ਿਕਰਯੋਗ ਹੈ ਕਿ ਪੰਜਾਬ ਲੇਬਰ ਪਾਰਟੀ (ਪਲੇਪਾ) ਦੀ ਨਿਗਾਹ ਪ੍ਰੇਮੀਆਂ ਦੀ ਵਿਸ਼ਾਲ ਵੋਟ ਗਿਦਤੀ ’ਤੇ ਟਿਕੀ ਹੋਈ ਹੈ। ਜੇਕਰ ਇਹ ਪਾਰਟੀ ਡੇਰਾ ਪੈਰੋਕਾਰਾਂ ’ਚ ਜੜ੍ਹਾਂ ਫੈਲਾਉਣ ’ਚ ਸਫ਼ਲ ਹੋ ਜਾਂਦੀ ਹੈ ਤਾਂ ਦੇਸ਼ ਦੇ ਸਿਆਸਤ ਢਾਂਚੇ ’ਚ ਸਿੱਧੇ ਤੌਰ ’ਤੇ ਇੱਕ ਨਵੀਂ ਭਾਵਨਾਤਮਿਕ ਸਿਆਸੀ ਸਫ਼ਬੰਦੀ ਹੋਵੇਗੀ। 
ਪਲੇਪਾ ਦੀਆਂ ਡੇਰਾ ਸਿਰਸਾ ਪ੍ਰਤੀ ਭਾਵਨਾਵਾਂ ਇੰਨੀਆਂ ਡੂੰਘੀਆਂ ਹਨ ਕਿ ਜਿੱਥੇ ਉਸਨੇ ਡੇਰਾ ਮੁਖੀ ਨੂੰ ਹੋਈ ਸਜ਼ਾ ਅਤੇ ਪੰਚਕੂਲਾ ’ਚ ਡੇਰਾ ਪੈਰੋਕਾਰਾਂ ’ਤੇ ਦਰਜ ਦੇਸ਼ ਧਰੋਹ ਦੇ ਪਰਚਿਆਂ ਨੂੰ ਗਲਤ ਦੱਸਿਆ ਹੈ, ਉਥੇ ਪਲੇਪਾ ਡੇਰਾ ਪੈਰੋਕਾਰਾਂ ਲਈ ਵੱਖਰੇ ‘ਪੇ੍ਰੇਮੀ’ ਧਰਮ ਨੂੰ ਸਰਕਾਰੀ ਤੌਰ ’ਤੇ ਮਾਨਤਾ ਲਈ ਚੋਣ ਮਨੋਰਥ ਪੱਤਰ ’ਚ ਸ਼ਾਮਲ ਕਰੇਗੀ। ਪਾਰਟੀ ਦੇ ਏਜੰਡੇ ਵਿੱਚ ਸੱਤ ਸੂਬਿਆਂ ’ਤੇ ਆਧਾਰਤ ਵੱਖਰੇ ‘ਦਲਿਤਸਤਾਨ’ ਦੀ ਮੰਗ ਵੀ ਸ਼ਾਮਲ ਹੈ।
ਪੰਜਾਬ ਲੇਬਰ ਪਾਰਟੀ ਦੇ ਪ੍ਰਧਾਨ ਗੁਰਮੀਤ ਸਿੰਘ ਰੰਗਰੇਟਾ ਬਠਿੰਡਾ ਲੋਕਸਭਾ ਅਤੇ ਲੰਬੀ ਵਿਧਾਨਸਭਾ ਹਲਕੇ ਤੋਂ ਚੋਣ ਲੜ ਚੁੱਕੇ ਹਨ। ਗੁਰਮੀਤ ਸਿੰਘ ਰੰਗਰੇਟਾ ਨੇ ਲੰਬੀ ਵਿਖੇ ਇੱਕ ਵਿਸ਼ੇਸ਼ ਗੱਲਬਾਤ ’ਚ ਆਖਿਆ ਕਿ ਪਾਰਟੀ ਵੱਲੋਂ ਬਠਿੰਡਾ ਤੋਂ ਚੋਣ ਲੜਨ ਸਬੰਧੀ ਡੇਰਾ ਮੁਖੀ ਦੀ ਮਨਜੂਰੀ ਨੂੰ ਉਡੀਕਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਬਠਿੰਡਾ ਲੋਕਸਭਾ ਹਲਕੇ ’ਚ ਪ੍ਰੇਮੀਆਂ ਦੀਆਂ ਬੇਅਥਾਹ ਵੋਟਾਂ ਹਨ। ਡੇਰਾ ਮੁਖੀ ਦੇ ਚੋਣ ਲੜਨ ਨਾਲ ਸਮੁੱਚੇ ਸਮੀਕਰਣ ਬਦਲ ਜਾਣਗੇ। 
ਪਲੇਪਾ ਦੇ ਪ੍ਰਧਾਨ ਨੇ ਆਖਿਆ ਕਿ ਅਗਾਮੀ ਲੋਕਸਭਾ ਚੋਣਾਂ ’ਚ ਉਕਤ ਕੇਸਾਂ ’ਚ ਉਲਝੇ ਦਲਿਤ ਡੇਰਾ ਪੈਰੋਕਾਰਾਂ ਨੂੰ ਪੰਜਾਬ, ਹਰਿਆਣਾ ਅਤੇ ਰਾਜਸਥਾਨ ਵਿੱਚ ਉਮੀਦਵਾਰ ਬਣਾਇਆ ਜਾਵੇਗਾ। ਉਨ੍ਹਾਂ ਕਿਹਾ ਪੰਚਕੂਲਾ ਘਟਨਾ ਮੌਕੇ ਦਲਿਤ ਡੇਰਾ ਪੈਰੋਕਾਰਾਂ ਨੂੰ ਦੇਸ਼ ਧਰੋਹ ਦੇ ਝੂਠੇ ਕੇਸਾਂ ’ਚ ਫਸਾ ਦਿੱਤਾ ਗਿਆ ਸੀ, ਜਦੋਂਕਿ ਸਮੁੱਚੀ ਘਟਨਾ ’ਤੇ ਵੋਟ ਬੈਂਕ ਖਾਤਰ ਸਰਕਾਰੀ ਸ਼ਹਿ ’ਤੇ ਬਾਹਰੀ ਵਿਅਕਤੀਆਂ ਨੇ ਸਾਜਿਸ਼ ਖੇਡੀ ਸੀ।  
ਸਜ਼ਾ ਯਾਫ਼ਤਾ ਗੁਰਮੀਤ ਰਾਮ ਰਹੀਮ ਦੀ ਉਮੀਦਵਾਰੀ ਸਬੰਧੀ ਕਾਨੂੰਨੀ ਅੜਚਨ ਬਾਰੇ ਸੁਆਲ ’ਤੇ ਰੰਗਰੇਟਾ ਨੇ ਆਖਿਆ ਕਿ ਜੇਕਰ ਹੱਤਿਆ ਕੇਸ ਦੇ ਬਾਵਜੂਦ ਨਵਜੋਤ ਸਿੰਘ ਸਿੱਧੂ ਲੋਕਸਭਾ ਚੋਣ ਲੜ ਸਕਦੇ ਹਨ ਤਾਂ ਗੁਰਮੀਤ ਰਾਮ ਰਹੀਮ ਸਿੰਘ ਲਈ ਵੀ ਅਦਾਲਤ ’ਚੋਂ ਸਜ਼ਾ ’ਤੇ ਸਟੇਅ ਲੈ ਕੇ ਕਾਨੂੰਨੀ ਦਿੱਕਤਾਂ ਦੂਰ ਕੀਤੀਆਂ ਜਾਣਗੀਆਂ। ਗੁਰਮੀਤ ਸਿੰਘ ਰੰਗਰੇਟਾ ਨੇ ਆਖਿਆ ਕਿ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੀ ਦਲਿਤ ਸਿੱਖਾਂ ਪ੍ਰਤੀ ਵਿਤਕਰੇ ਭਰੇ ਨੀਤੀ ਅਤੇ ਗੁਰੂਘਰਾਂ ’ਚ ਬਣਦਾ ਮਾਣ ਸਤਿਕਾਰ ਨਾ ਮਿਲਣ ਕਰਕੇ ਮਜਹਬੀ ਸਿੱਖ ਦਲਿਤ ਭਾਈਚਾਰਾ ਡੇਰਾਵਾਦ ਅਤੇ ਇਸਾਈ ਮਿਸ਼ਨਰੀਜ ਨਾਲ ਜੁੜ ਰਿਹਾ ਹੈ। ਉਨ੍ਹਾਂ ਇੰਡੀਅਨ ਪੈਨਲ ਕੋਡ ਨੂੰ ਬ੍ਰਿਟਿਸ਼ ਪੈਨਲ ਕੋਡ ਦੱਸਦੇ ਕਿਹਾ ਕਿ ਡੇਰੇ ਨਾਲ ਜੁੜੇ ਦਲਿਤਾਂ ਦੇ ਮਾਣ ਸਤਿਕਾਰ ਲਈ ਪਲੇਪਾ ਵੱਲੋਂ ‘ਪ੍ਰੇਮੀ’ ਧਰਮ ਨੂੰ ਮਾਨਤਾ ਦਾ ਮੁੱਦਾ ਆਪਣੇ ਚੋਣ ਮਨੋਰਥ ਪੱਤਰ ਵਿੱਚ ਰੱਖਿਆ ਜਾਵੇਗਾ। 

07 September 2018

ਬਾਬਾ ਬੋਹੜ ਦੀ ਸਿਆਸੀ ਗੱਡੀ ਮੁੜ ਤੋਂ ਸਮਾਜਿਕ ਲੀਹਾਂ ’ਤੇ ਪਰਤੀ

* ਸਿਆਸਤ ਦਾ 91 ਸਾਲਾ ਸ਼ਾਹ-ਅਸਵਾਰ ਮੁੜ ਖੇਤਾਂ ਵਿੱਚ ਗੇੜੇ ਮਾਰਨ ਲੱਗਿਆ 
* ਦਸਮੇਸ਼ ਅਦਾਰੇ ’ਚ ਦੋ ਸਮਾਗਮਾਂ ’ਚ ਸ਼ਮੂਲੀਅਤ ਕੀਤੀ 
* ਵਰਕਰਾਂ ਨਾਲ ਮੁਲਾਕਾਤਾਂ ਦਾ ਦੌਰ ਸ਼ੁਰੂ
* ਡਾਕਟਰਾਂ ਨੇ ਬਾਦਲ ਦੀ ਸਿਹਤ ਨੂੰ ਬਿਲਕੁੱਲ ‘ਤੰਦਰੁਸਤ’ ਦੱਸਿਆ

                                                         ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ : ਸਿਹਤ ’ਚ ਸੁਧਾਰ ਆਉਣ ਉਪਰੰਤ ਬਾਬਾ ਬੋਹੜ ਪ੍ਰਕਾਸ਼ ਸਿੰਘ ਬਾਦਲ ਦੀ ਸਿਆਸੀ ਗੱਡੀ ਮੁੜ ਤੋਂ ਸਮਾਜਿਕ ਲੀਹਾਂ ’ਤੇ ਪਰਤ ਆਈ ਹੈ। ਜਨਤਕ ਸਮਾਗਮ ਅਤੇ ਵਰਕਰਾਂ ਨਾਲ ਮੁਲਾਕਾਤਾਂ ਸਾਬਕਾ ਮੁੱਖ ਮੰਤਰੀ ਦੀ ਦਿਨ ਚਰਿਆ ਦਾ ਹਿੱਸਾ ਬਣਨ ਲੱਗੇ ਹਨ। ਵਾਇਰਲ ਬੁਖਾਰ ਦੀ ਤਪਿਸ਼ ਝੱਲਣ ਬਾਅਦ ਸ੍ਰੀ ਬਾਦਲ ਦਾ ਰਵਾਇਤੀ ਠਰੰ੍ਹਮਾ ਹੌਲੀ-ਹੌਲੀ ਮੁੜ 
ਜਲੌਅ ’ਚ ਆਉਣ ਲੱਗਿਆ ਹੈ। ਉਨ੍ਹਾਂ ਦਾ ਬਲੱਡ ਪ੍ਰੈਸ਼ਰ ਨੌਰਮਲ ਹੈ ਅਤੇ ਬੁਖਾਰ ਦੀ ਦਵਾਈ ਵੀ ਬੰਦ ਹੋ ਗਈ ਹੈ। ਉਂਝ ਡਾਕਟਰ ਨੇ ਮੌਜੂਦਾ ਵਾਇਰਲ ਬੁਖਾਰ ਵਾਲੀ ਤਕਲੀਫ਼ ਵਿਚੋਂ ਉਨ੍ਹਾਂ ਨੂੰ ਤੰਦਰੁਸਤ ਕਰਾਰ ਦੇ ਦਿੱਤਾ ਹੈ। ਹਾਲਾਂਕਿ ਡਾਕਟਰ ਅਹਿਤਿਹਾਤ ਵਜੋਂ ਉਨ੍ਹਾਂ ਦੀ ਸਿਹਤ ’ਤੇ ਪੂਰੀ ਨਿਗਾਹ ਰੱਖ ਰਹੇ ਹਨ। ਉਨ੍ਹਾਂ ਦੀ ਕਸਰਤ ਅਤੇ ਗੁਰਬਾਣੀ ਨਿੱਤ ਨੇਮ ਪਾਠ ਦੀ ਲਗਾਤਾਰਤਾ ਬਣੀ ਹੋਈ ਹੈ। ਸਿਆਸਤ ਦਾ 91 ਸਾਲਾ ਸ਼ਾਹ-ਅਸਵਾਰ ਮੁੜ ਖੇਤਾਂ ਵਿੱਚ ਗੇੜੇ ਮਾਰ ਕੇ ਆਪਣੀ ਜੱਦੀ ਪੁਸ਼ਤੀ ਕਿਰਸਾਨੀ ਦੀ ਸਾਰ ਲੈਣ ਲੱਗਿਆ। ਉਨ੍ਹਾਂ ਦੀ ਆਮਦ ਨਾਲ ਪਿੰਡ ਬਾਦਲ ਦੀਆਂ ਫਿਜ਼ਾਵਾਂ ’ਚ ਰੌਣਕ ਵਾਲਾ ਮਾਹੌਲ ਵਿਖਾਈ ਦੇਣ ਲੱਗਿਆ ਹੈ। ਤਿੰਨ ਦਿਨ ਪਹਿਲਾਂ ਚੰਡੀਗੜ੍ਹ ਤੋਂ ਪਿੰਡ ਪੁੱਜੇ ਸ੍ਰੀ ਬਾਦਲ ਦੀ ਮਿਜਾਜਪੁਰਸੀ ਲਈ ਅਕਾਲੀ ਵਰਕਰ ਅਤੇ ਉੁਨ੍ਹਾਂ ਦੇ ਸ਼ਭਚਿੰਤਕ ਪੁੱਜ ਰਹੇ ਹਨ। ਪਿੰਡ ਵਾਸੀ ਅਤੇ ਦੁਕਾਨਦਾਰ ਅਕਾਲੀ ਵਰਕਰਾਂ ਦੀ ਪਰਤ ਰਹੀ ਚਹਿਲ-ਪਹਿਲ ਤੋਂ ਖੁਸ਼ੀ ਦੇ ਰੌਂਅ ਵਿੱਚ ਹਨ। ਜੱਗਜਾਹਰ ਹੈ ਕਿ ਇੱਥੇ ਰੌਣਕ ਘਟਣ ’ਤੇ ਪਿੰਡ ਦੀ ਆਮ ਵਸੋਂ ਵੀ ਖੁਦ ਨੂੰ ਬਿਮਾਰ ਮਹਿਸੂਸ ਕਰਨ ਲੱਗਦੀ ਹੈ। ਬਾਬਾ ਬੋਹੜ ਨੇ ਬਿਮਾਰੀ ਉਪਰੰਤ ਆਪਣੇ ਜਨਤਕ ਦੌਰਿਆਂ ਦਾ ਆਪਣੇ ਹੱਥੀਂ ਲਗਾਏ ਵਿੱਦਿਆ ਦੇ ਬੂਟੇ ਦਸਮੇਸ਼ ਵਿੱਦਿਅਕ ਅਦਾਰੇ ’ਚ ਅਧਿਆਪਕ ਦਿਵਸ ਅਤੇ ਨਵੇਂ ਸ਼ੈਸਨ ਦੇ ਉਦਘਾਟਨੀ ਸਮਾਗਮਾਂ ’ਚ ਹਿੱਸਾ ਲੈ ਕੇ ਕੀਤਾ। ਸ੍ਰੀ ਬਾਦਲ ਲਗਪਗ ਇੱਕ ਘੰਟੇ ਤੱਕ ਦਸਮੇਸ਼ ਅਦਾਰੇ ਵਿੱਚ ਵਿਚਰੇ। ਉਨ੍ਹਾਂ ਕਾਲਜ ਵਿਦਿਆਰਥਣਾਂ ਨਾਲ ਗੱਲਬਾਤ ਕਰਕੇ ਉਨ੍ਹਾਂ ਦੇ ਭਵਿੱਖ ਸਬੰਧੀ ਗੱਲਬਾਤਾਂ ਕਰਕੇ ਸੁਚੱਜੀ ਜ਼ਿੰਦਗੀ ਲਈ ਵਿੱਦਿਆ ਨੂੰ ਸਰਵ ਉੱਤਮ ਸਾਧਨ ਦੱਸਿਆ। ਇਸ ਮੌਕੇ ਸਾਬਕਾ ਮੁੱਖ ਮੰਤਰੀ ਨੇ ਦਸਮੇਸ਼ ਗਰਲਜ ਕਾਲਜ ਵਿਖੇ ਸਮਾਗਮ ’ਚ ਅਧਿਆਪਕ ਦਿਵਸ ਦੀ ਮੁਬਾਰਕਬਾਦ ਦਿੱਤੀ। ਉਨ੍ਹਾਂ ਪ੍ਰਿੰਸੀਪਲ ਡਾ. ਐਸ .ਐਸ ਸੰਘਾ ਅਤੇ ਪਿੰ੍ਰਸੀਪਲ ਵਨੀਤਾ ਦੇ ਨਾਲ ਕੇਕ ਕੱਟਣ ਦੀ ਰਸਮ ਵੀ ਅਦਾ ਕੀਤੀ। ਆਪਣੇ ਸੰਬੋਧਨ ਵਿੱਚ ਸਾਬਕਾ ਮੁੱਖ ਮੰਤਰੀ ਨੇ ਕਿਹਾ ਕਿ ਵਿਦਿਆਰਥੀ ਦੀ ਸ਼ਖ਼ਸੀਅਤ ਉਸਾਰੀ ਵਿਚ ਅਧਿਆਪਕ ਦੀ ਮਹਾਨ ਦੇਣ ਹੁੰਦੀ ਹੈ।।ਪਿੰ੍ਰਸੀਪਲ ਡਾ. ਐਸ.ਐਸ ਸੰਘਾ ਨੇ ਆਖਿਆ ਕਿ ਪ੍ਰਕਾਸ਼ ਸਿੰਘ ਬਾਦਲ ਦਾ ਇਸ ਸੁਭਾਗੇ ਦਿਹਾੜੇ ਨੂੰ ਸਮਰਪਿਤ ਸਮਾਗਮ ਵਿੱਚ ਸ਼ਾਮਿਲ ਹੋਣਾ ਖੁਸ਼ਨਸੀਬੀ ਹੈ। ਅਸੀਂ ਇਸ ਚਾਨਣ ਮੁਨਾਰੇ ਵਰਗੀ ਸ਼ਖ਼ਸੀਅਤ ਤੋਂ ਬਹੁਤ ਕੁੱਝ ਸਿੱਖ ਸਕਦੇ ਹਾਂ। ਸਮਾਗਮ ਵਿੱਚ ਵਿਦਿਆਰਥਣਾਂ ਨੇ ਸੱਭਿਆਚਾਰਕ ਪੇਸ਼ਕਾਰੀਆਂ ਵੀ ਦਿੱਤੀਆਂ। ਬਾਦਲ ਪਰਿਵਾਰ ਦੇ ਨੇੜਲੇ ਸੂਤਰਾਂ ਮੁਤਾਬਕ ਸਿਹਤ ’ਚ ਸੁਧਾਰ ਦੇ ਬਾਵਜੂਦ ਸਾਬਕਾ ਮੁੱਖ ਮੰਤਰੀ ਚੋਣ ਸਰਗਰਮੀਆਂ ਵਾਲੀ ਸਿਆਸਤ ਤੋਂ ਪਾਸੇ ਰਹਿ ਕੇ ਆਰਾਮ ਦੇ ਮੂਡ ਵਿੱਚ ਹਨ। ਪਿੰਡ ਬਾਦਲ ਪੁੱਜਣ ਉਪਰੰਤ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਉਨ੍ਹਾਂ ਨਾਲ ਮੌਜੂਦਾ ਹਾਲਾਤਾਂ ’ਤੇ ਚਰਚਾ ਕੀਤੀ। ਪਿਉ-ਪੁੱਤ ਦੀ ਜੋੜੀ ਨੇ ਮੁਲਾਕਾਤ ਲਈ ਪੁੱਜੇ ਵਰਕਰਾਂ ਨੂੰ ਡਟਵੇਂ ਢੰਗ ਨਾਲ ਚੋਣ ਲੜ੍ਹਨ ਲਈ ਆਖਿਆ। ਸ੍ਰੀ ਬਾਦਲ ਨਾਲ ਤਾਇਨਾਤ ਡਾਟਕਰਾਂ ਦੇ ਟੀਮ ਦੇ ਮੁਖੀ ਡਾਕਟਰ ਡਾ. ਅਨੁਰਾਗ ਵਸ਼ਿਸ਼ਠ ਦਾ ਕਹਿਣਾ ਸੀ ਕਿ ਸਾਬਕਾ ਮੁੱਖ ਮੰਤਰੀ ਦੀ ਸਿਹਤ ਬਿੱਲਕੁੱਲ ਦਰੁੱਸਤ ਤੰਦਰੁਸਤ ਹੈ ਅਤੇ ਬੁਖਾਰ ਸਬੰਧੀ ਦਵਾਈ ਵੀ ਬੰਦ ਕਰ ਦਿੱਤੀ ਗਈ ਹੈ। 98148-26100 / 93178-26100





31 July 2018

ਕਾਂਗਰਸ ਦੀ ਅੱਖ ਲੰਬੀ ਦੇ ਪੰਚਤੰਤਰ ’ਤੇ, ਅਕਾਲੀਆਂ ਦੀਆਂ ਕਾਂਗਰਸੀ ਪੱਤਿਆਂ ’ਤੇ

- ਰਾਖਵੇਂਕਰਨ, ਡੌਪ ਟੈਸਟ ੇ ਮੈਟ੍ਰਿਕ ਪਾਸ ਸ਼ਰਤਾਂ ਬਾਰੇ ਭੰਬਲਭੂਲਾ ਬਰਕਰਾਰ
- ਅਕਾਲੀ ਸਰਪੰਚਾਂ ਵਾਂਗ ਮਲਾਈ ਛਕਣ ਦੀ ਚਾਹਤ ’ਚ ਕਾਂਗਰਸੀ ਸਰਪੰਚੀਆਂ ਲਈ ਉਤਾਵਲੇ
- ਕਾਂਗਰਸ ਵੀ ਅਕਾਲੀ ਦਲ ਵਾਂਗ ਪਿੰਡ ਪੱਧਰੀ ਧੜੇਬੰਦੀ ਦੀ ਸ਼ਿਕਾਰ
                                                
                                                          ਇਕਬਾਲ ਸਿੰਘ ਸ਼ਾਂਤ 
ਲੰਬੀ: ਸਾਬਕਾ ਵੀ.ਆਈ.ਪੀ ਹਲਕੇ ਲੰਬੀ ’ਚ ਐਤਕੀਂ ਜ਼ਿਲ੍ਹਾ ਪ੍ਰੀਸ਼ਦ/ਪੰਚਾਇਤੀ ਚੋਣ ਦ੍ਰਿਸ਼ ਦੀ ਤਾਣੀ ਨੂੰ ਰਾਖਵੇਂਕਰਨ ਅਤੇ ਨਵੀਂ ਨੀਤੀ ਦੀਆਂ ਅਣਖੁੱਲੀਆਂ ਪਰਤਾਂ ਨੇ ਹਾਲ ਦੀ ਘੜੀ ਬਰੇਕਾਂ ਲਾਈਆਂ ਹੋਈਆਂ ਹਨ। ਬਾਦਲਾਂ ਦੀ ਸਿਆਸੀ ਰਾਜਧਾਨੀ ਲੰਬੀ ’ਚ ਡੇਢ ਸਾਲ ਪਹਿਲਾਂ ਤੱਕ ਇੱਕ ਸਿਆਸੀ ਇਸ਼ਾਰੇ ਨਾਲ ਬੇਤਰਤੀਬੇ ਹੱਥਾਂ ’ਤੇ ਵੀ ਚੌਧਰਾਂ ਦੀ ਕਿਸਮਤੀ ਲਕੀਰ ਉਕਰ ਜਾਂਦੀਆਂ ਹਨ। ਇੱਥੇ ਪੰਚਾਇਤੀ ਚੋਣਾਂ ਲਈ ਪਿੰਡਾਂ ਵਿੱਚ ਪਿਛਲੇ ਕਰੀਬ ਛੇ ਮਹੀਨੇ ਤੋਂ ਉਮੀਦਵਾਰੀ ਲਈ ਉੱਛਲ-ਕੁੱਦ ਦਾ ਦੌਰ ਮਘ ਰਿਹਾ ਹੈ। ਸਰਪੰਚ ਉਮੀਦਵਾਰੀ ਲਈ ਰਾਖਵੇਂਕਰਨ, ਡੌਪ ਟੈਸਟ ਅਤੇ
ਮੈਟ੍ਰਿਕ ਪਾਸ ਹੋਣ ਦੀਆਂ ਲਾਜਮੀ ਸ਼ਰਤਾਂ ਦੇ ਭੰਬਲਭੂਲੇ ਕਰਕੇ ਸਮੀਕਰਣਾਂ ਸਵੇਰੇ-ਸ਼ਾਮ ਬਦਲ ਰਹੇ ਹਨ। ਅਕਾਲੀ ਦਲ, ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ’ਚ ਜ਼ਮੀਨੀ ਪੱਧਰ ’ਤੇ ਜ਼ਿਲ੍ਹਾ ਪ੍ਰੀਸ਼ਦ ਅਤੇ ਬਲਾਕ ਸੰਮਤੀ ਚੋਣਾਂ ਲਈ ਅੰਦਰਖਾਤੇ ਹੋਮ ਵਰਕ ਚੱਲ ਰਿਹਾ ਹੈ। ਉਥੇ ਚੋਣ ਲੜਨ ਦੇ ਚਾਹਵਾਨ ਆਪਣੇ ਪ੍ਰਤੀ ਮਾਹੌਲ ਬਣਾਉਣ ਵਿੱਚ ਜੁਟੇ ਹੋਏ ਹਨ। ਦੋ-ਢਾਈ ਮਹੀਨੇ ਪਹਿਲਾਂ ਸੋਸ਼ਲ ਮੀਡੀਆ ’ਤੇ ਸਰਵੇਖਣਾਂ ਰਾਹੀਂ ਜ਼ੋਰ ਅਜਮਾਇਸ਼ ਦਾ ਮੁੱਢਲਾ ਪੜਾਅ ਲੰਘ ਚੁੱਕਿਆ ਹੈ। ਪਤਾ ਲੱਗਿਆ ਹੈ ਕਿ ਉਮੀਦਵਾਰੀ ਦੇ ਕਈ ਚਾਹਵਾਨਾਂ ਨੇ ਮਾਹੌਲ ਬਣਾਉਣ ਅਤੇ ਪਰਖਣ ਲਈ ਸ਼ਰਾਬ-ਕਬਾਬ ਦੇ ਹਫ਼ਤਾਵਾਰੀ ਦੌਰ ਚਲਾ ਰੱਖੇ ਹਨ। ਪੇਂਡੂ ਸੱਥਾਂ ’ਤੇ ਸਰਪੰਚੀ-ਪੰਚੀ ਲਈ ਖੁੰਢ ਚਰਚਾ ’ਚ ਆਪੋ-ਆਪਣਿਆਂ ਲਈ ਪ੍ਰਚਾਰ ਤਾਂ ਹੁੰਦਾ ਹੈ ਪਰ ਗੱਲ ਸਰਕਾਰੀ ਨੀਤੀ ਦੇ ਐਲਾਨ ’ਤੇ ਰੁੱਕ ਜਾਂਦੀ ਹੈ। ਲੰਬੀ ਹਲਕੇ ਵਿੱਚ ਤਕਰੀਬਨ 82 ਪੰਚਾਇਤਾਂ ਹਨ। ਜਿਨ੍ਹਾਂ ’ਚ ਬੀਤੇ ਹਫ਼ਤੇ ਫਾਰਗ ਹੋਈਆਂ ਪੰਚਾਇਤਾਂ ਵਿੱਚੋਂ ਸਿਰਫ਼ ਖਿਉਵਾਲੀ ਤੇ ਭੁੱਲਰਵਾਲਾ ਦੀਆਂ ਦੋ ਪੰਚਾਇਤਾਂ ਕਾਂਗਰਸੀ ਝੰਡੇ ਹੇਠ ਝੂਲੀਆਂ। ਬਾਕੀ ਸਾਰੀਆਂ ਪੰਚਾਇਤਾਂ ਅਕਾਲੀ ਦਲ ਦੇ ਨੀਲੇ ਬਾਣੇ ਹੇਠਾਂ ਸਨ। ਹੁਣ ਲੰਬੀ ਪਿੰਡ ਦੀਆਂ ਦੋ ਪੰਚਾਇਤਾਂ ਨੂੰ ਵਾਪਸ ਇਕੱਠਾ ਕਰ ਦਿੱਤਾ ਗਿਆ ਹੈ।
          ਉਮੀਦਵਾਰੀ ਲਈ ਡੌਪ ਟੈਸਟ ਦੇ ਖਦਸ਼ੇ ਤਹਿਤ ਉਮੀਦਵਾਰੀ ਦੇ ਚਾਹਵਾਨ ਦਾਰੂ ਅਤੇ ਕਾਲੀ ਨਾਗਣੀ ਦਾ ਮੋਹ ਤਿਆਗ ਟੈਸਟ ਸਮੇਂ ਉਸਦੀ ਕਾਟ ਭਾਲਣ ’ਚ ਜੁਟੇ ਹਨ। ਵੀ.ਆਈ.ਪੀ ਹਲਕੇ ਦੇ ‘ਪੰਚਤੰਤਰ’ ’ਤੇ ਸੱਤਾ ਪੱਖ ਕਾਂਗਰਸ ਨੇ ਨਿਗਾਹਾਂ ਟਿਕਾ ਰੱਖੀਆਂ ਹਨ। ਲੰਬੀ ਹਲਕੇ ’ਚ ਬਹੁਗਿਣਤੀ ਕਾਂਗਰਸੀ ਵਰਕਰ ਅਤੇ ਆਗੂ ਸਰਪੰਚੀ/ਸੰਮਤੀ ਚੋਣਾਂ ਸਬੰਧੀ ਮਸ਼ਕਾਂ ਕਸੀ ਬੈਠੇ ਹਨ। ਦੂਜੇ ਪਾਸੇ ਅਕਾਲੀ ਦਲ (ਬ) ਨੇ ਰਵਾਇਤੀ ਅੰਦਾਜ਼ ’ਚ ਹਾਲ ਦੀ ਘੜੀ ਚੁੱਪ ਵੱਟ ਕੇ ਕਾਂਗਰਸੀ ਪੱਤਿਆਂ ’ਤੇ ਬਾਜ਼ ਅੱਖ ਰੱਖੀ ਹੋਈ ਹੈ। 
          ਬਹੁਤੇ ਪਿੰਡਾਂ ’ਚ ਸੱਤਾ ਪੱਖ ਕਾਂਗਰਸ ਵੀ ਅਕਾਲੀ ਦਲ ਵਾਂਗ ਅੰਦਰੂਨੀ ਧੜੇਬੰਦੀ ਦੀ ਸ਼ਿਕਾਰ ਹੈ। ਅਕਾਲੀ ਦਲ ਵਾਂਗ ਵਿਧਾਇਕੀ ਮੜ੍ਹਕ ਵਾਲੀ ਸਰਪੰਚ ਦੀ ਰੀਝ ਕਈ ਕਾਂਗਰਸੀਆਂ ਦੇ ਮਨਾਂ ਵਿੱਚ ਹੈ। ਰਿਪੋਰਟਾਂ ਅਨੁਸਾਰ ਕਈ ਥਾਂ ਅਕਾਲੀ ਕਾਰਕੁੰਨ ਪਿਛਲੇ ਚੋਣਾਂ ਵਾਲੇ ‘ਕਾਂਗਰਸੀ ਫਾਰਮੂਲੇ’ ਤਹਿਤ ਕਿਸੇ ਕਾਂਗਰਸੀ ਨੂੰ ਉਮੀਦਵਾਰ ਐਲਾਨ ਕੇ ਪੰਚਾਇਤ ’ਤੇ ਕਬਜ਼ਾ ਕਰਨ ਦੇ ਰੌਂਅ ਵਿੱਚ ਹਨ। ਪਿਛਲੀਆਂ ਪੰਚਾਇਤੀ ਚੋਣਾਂ ਵਿੱਚ ਕਾਂਗਰਸੀਆਂ ਨੇ ਖੁੱਡੀਆਂ ਮਹਾ ਸਿੰਘ ’ਚ ਇਸੇ ਫਾਰਮੂਲੇ ਨਾਲ ਆਪਣੀ ਚੌਧਰ ਕਾਇਮ ਕੀਤੀ ਸੀ। ਇਸ ਫਾਰਮੂਲੇ ਤਹਿਤ ਕਾਫ਼ੀ ਪਿੰਡਾਂ ਅੰਦਰ ਅਕਾਲੀ-ਕਾਂਗਰਸੀ ਜੁੰਡਲੀਆਂ ਦੇ ਸਿਰ ਜੁੜੇ ਵਿਖਾਈ ਦਿੰਦੇ ਹਨ। ਇੱਕ ਸਤਾਪੱਖੀ ਮੌਕਾਪ੍ਰਸਤ ਜੁੰਡਲੀ ਵੀ ਖੁਦ ਲਈ ਨਵੀਂ ਸਿਆਸੀ ਜ਼ਮੀਨ ਬਣਾਉਣ ਖਾਤਰ ਪੁਰਾਣਿਆਂ ਦੀ ਓਟ ਹੇਠ ਪਿੰਡਾਂ ’ਚ ਵਰਕਰਾਂ ਨੂੰ ਸਰਪੰਚੀ ਦੇ ਖਵਾਬ ਵਿਖਾ ਰਹੀ ਹੈ। ਕਾਂਗਰਸੀ ਸੂਤਰਾਂ ਅਨੁਸਾਰ ਲੰਬੀ ਹਲਕੇ ’ਚ ਜ਼ਿਲ੍ਹਾ ਪ੍ਰੀਸ਼ਦ, ਬਲਾਕ ਸੰਮਤੀ ਅਤੇ ਪੰਚਾਇਤੀ ਚੋਣਾਂ ਲਈ ਉਮੀਦਵਾਰਾਂ ਦਾ ਐਲਾਨ ਸਿਰਫ਼ ਸੀਨੀਅਰ ਆਗੂ ਮਹੇਸ਼ਇੰਦਰ ਸਿੰਘ ਬਾਦਲ ਅਤੇ ਜ਼ਿਲ੍ਹਾ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਦੇ ਪੱਧਰ ’ਤੇ ਹੀ ਹੋਣਾ ਹੈ।
ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ‘ਦੁੱਖ-ਸੁੱਖ’ ਦੌਰਿਆਂ ਨਾਲ ਅਕਾਲੀ ਸਫ਼ਾਂ ਹਲਕੇ ’ਚ ਪਹਿਲਾਂ ਤੋਂ ਪੰਚਾਇਤੀ ਚੋਣਾਂ ਲਈ ਸਰਗਰਮ ਹਨ। ਦੂਜੇ ਪਾਸੇ ਬਾਬਾ ਬੋਹੜ ਦੇ ਮੁਕਾਬਲੇ ਸੱਤਾ ਪੱਖ ਕਾਂਗਰਸ ਜਨਤਕ ਰਾਬਤੇ ਵਿੱਚ ਬੇਹੱਦ ਪਿਛਾਂਹ ਹੈ। ਕਰੀਬ 22 ਹਜ਼ਾਰ ਵੋਟਾਂ ਲੈ ਕੇ ਵਿਧਾਨਸਭਾ ਚੋਣਾਂ ’ਚ ਕੈਪਟਨ ਅਮਰਿੰਦਰ ਸਿੰਘ ਦੀ ਹਾਰ ਦਾ ਕਾਰਨ ਬਣਨ ਵਾਲੀ ‘ਆਪ’ ਦੀ ਭੂਮਿਕਾ ਪੰਚਾਇਤੀ ਚੋਣਾਂ ’ਚ ਕਾਫ਼ੀ ਮਾਇਨੇ ਰੱਖੇਗੀ। 
          ਪਿੰਡਾਂ ’ਚ ਕਈ ਨਵੇਂ ਖਿਡਾਰੀ ਧੜੇ ਕਾਇਮ ਕਰਨ ’ਚ ਜੁਟੇ ਹਨ ਤਾਂ ਕਈ ਦੂਜਿਆਂ ਦੀ ਖੇਡ ਵਿਗਾੜਨ ਲਈ ਵੀ ਸਰਗਰਮ ਹਨ। ਅੱਜ ਕੱਲ੍ਹ ਪੇਂਡੂ ਮਾਹੌਲ ’ਚ ਆਪਣੇ ਚਿਹਰਿਆਂ ਅਤੇ ਜੀਭਾਂ ’ਤੇ ਵਕਤੀ ਮਿਠਾਸ ਵਾਲੇ ਵਿਅਕਤੀਆਂ ਨੂੰ ਸਰਪੰਚੀ ਅਤੇ ਪੰਚੀ ਦੇ ਚਾਹਵਾਨਾਂ ਵਜੋਂ ਵੇਖਿਆ ਜਾ ਰਿਹਾ ਹੈ। ਪਿਛਲੇ ਦਸ ਸਾਲਾਂ ਵਿੱਚ ਸਿਆਸੀ ਦਬਦਬੇ ਨਾਲ ਹਲਕੇ ’ਚ ਪੰਚਤੰਤਰ ਦੀ ਚੌਧਰ ਅਕਾਲੀਆਂ ਹੱਥ ਹੀ ਰਹੀ। 
           ਬਹੁਤੇ ਅਕਾਲੀ ਸਰਪੰਚਾਂ ਨੇ ਪੂਰੇ ਦਹਾਕੇ ’ਚ ਸਿਆਸੀ ਅਤੇ ਆਰਥਿਕ ਬੁੱਲ੍ਹਿਆਂ ਨੂੰ ਰੱਜਵੇਂ ਅਤੇ ਮਨਚਾਹੇ ਢੰਗ ਨਾਲ ਮਾਣਿਆ। ਕਈ ਪਿੰਡਾਂ ’ਚ ਕਈ ਅਕਾਲੀ ਜਰਨੈਲ ਬਿਨ੍ਹਾਂ ਸਰਪੰਚੀ ਦੇ ਪੰਚਾਇਤ ਦਾ ਰਾਜਕਾਜ਼ ਭੋਗਦੇ ਰਹੇ ਅਤੇ ਚੁਣੇ ਸਰਪੰਚ ਸਿਰਫ਼ ਰਬੜ ਦੀ ਮੁਹਰ ਬਣ ਕੇ ਰਹਿ ਗਏ। ਹਾਲਾਂਕਿ ਵੋਟ ਜੰਗ ’ਚ ਸੱਤਾ ਪੱਖ ਹੋਣ ਦੇ ਬਾਦਲਾਂ ਦੇ ਹਲਕੇ ’ਚ ਕਾਂਗਰਸੀਆਂ ਦੀ ਦਾਲ ਗਲਣੀ ਅੌਖੀ ਜਾਪਦੀ ਹੈ ਪਰ ਆਮ ਆਦਮੀ ਪਾਰਟੀ ਦੀ ਮੌਜੂਦਗੀ ਅਤੇ ਪਿੰਡ ਪੱਧਰ ਦੇ ਸਮੀਕਰਣ ਅਤੇ ਰਾਖਵੇਂਕਰਨ ਦੀ ਸੂਚੀ ਜਿੱਤ-ਹਾਰ ਦਾ ਮਾਹੌਲ ਤੈਅ ਕਰਨਗੇ। ਜ਼ਿਲ੍ਹਾ ਕਾਂਗਰਸ ਦੇ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਅਕਾਲੀਆਂ ਦੀ ਬੁਰਛਾਗਰਦੀ ਤੋਂ ਦੁਖੀ ਲੋਕ ਕਾਂਗਰਸੀ ਪੰਚਾਇਤੀ ਚੁਣਨ ਲਈ ਕਾਹਲੇ ਹਨ ਅਤੇ ਕਾਂਗਰਸ ਵਰਕਰ ਚੋਣਾਂ ਲਈ ਪੂਰੀ ਤਰ੍ਹਾਂ ਤਿਆਰ ਹਨ, ਪਰ ਬੱਸ ਸਰਕਾਰੀ ਨੀਤੀ ਨਸ਼ਰ ਹੋਣ ਦੀ ਉਡੀਕ ਹੈ। ਅਕਾਲੀ ਦਲ ਦੇ ਸੀਨੀਅਰ ਆਗੂ ਤੇਜਿੰਦਰ ਸਿੰਘ ਮਿੱਡੂਖੇੜਾ ਦਾ ਕਹਿਣਾ ਸੀ ਕਿ ਲੰਬੀ ਹਲਕੇ ’ਚ ਅਕਾਲੀ ਦਲ ਦਾ ਕੋਈ ਮੁਕਾਬਲੇਬਾਜ਼ ਨਹੀਂ ਹੈ। ਜੇਕਰ ਨਿਰਪੱਖ ਚੋਣਾਂ ਹੋਈਆਂ ਤਾਂ ਅਕਾਲੀ ਦਲ ‘ਕਲੀਨ ਸਵੀਪ’ ਕਰੇਗਾ। ਕਾਂਗਰਸ ਸਰਕਾਰ ਦੀ ਮਾੜੀਆਂ ਨੀਤੀਆਂ ਕਰਕੇ ਚਹੁੰਪਾਸੇ ਮਾਹੌਲ ਵੀ ਅਕਾਲੀ ਪੱਖੀ ਹੈ। ਆਪ ਦੇ ਹਲਕਾ ਇੰਚਾਰਜ਼ ਜਸਵਿੰਦਰ ਸਿੰਘ ਫਤੂਹੀਵਾਲਾ ਨੇ ਆਖਿਆ ਕਿ ਆਪ ਕਈ ਪਿੰਡਾਂ ’ਚ ਚੋਣ ਲੜੇਗੀ। ਇਸ ਬਾਰੇ ਪਿੰਡਾਂ ’ਚ ਮੀਟਿੰਗਾਂ ਦਾ ਦੌਰ ਜਾਰੀ ਹੈ।  
98148-26100/93178-26100


20 June 2018

ਪੁਰਾਣਿਆਂ ਲਈ ਜਾਰੀ ਕਰੋੜਾਂ ਰੁਪਏ ਦਾ 'ਸੁੱਖ' ਮਾਣਨਗੇ ਪੰਚਤੰਤਰ ਦੇ ਨਵੇਂ ਝੰਡੇਬਰਦਾਰ

* ਸਰਪੰਚਾਂ ਦੇ ਮਾਣ ਭੇਟੇ ਦੇ ਸਾਲ 2018-19 ਦੇ 18.75 ਕਰੋੜ ਰੁਪਏ ਜਾਰੀ
* ਸਰਕਾਰ ਨੇ ਪੇਂਡੂ ਸਫ਼ਾਈ ਸੇਵਕਾਂ ਦੇ ਪੌਨੇ 19 ਕਰੋੜ ਰੁਪਏ ਦੇ ਮਾਣ ਭੇਟ ਪ੍ਰਤੀ ਚੁੱਪ ਵੱਟੀ
* ਜਾਰੀ ਰਕਮ ’ਚੋਂ ਮੌਜੂਦਾ ਸਰਪੰਚਾਂ ਨੂੰ 4 ਮਹੀਨੇ ਦਾ, ਨਵਿਆਂ ਨੂੰ ਅੱਠ ਮਹੀਨਾ ਦਾ ਮਾਣ ਭੇਟਾ

                                                ਇਕਬਾਲ ਸਿੰਘ ਸ਼ਾਂਤ
       ਲੰਬੀ: ‘ਪੰਚਤੰਤਰ ਦੇ ਝੰਡੇਬਰਦਾਰ’ ਸਰਪੰਚਾਂ ਦੇ ਮਾਣ ਭੇਟੇ ਦੀ ਕਰੀਬ 92 ਕਰੋੜ ਦੀ ‘ਡਿਫ਼ਾਲਟਰ’ ਪੰਜਾਬ ਸਰਕਾਰ ਨੇ ਕਰੀਬ 18.75 ਕਰੋੜ ਰੁਪਏ ਦਾ ਬਜਟ ਅਲਾਟ ਕਰ ਦਿੱਤਾ ਹੈ। ਸਰਕਾਰ ਵੱਲੋਂ ਪਿਛਲੇ ਪੰਜ ਸਾਲਾਂ ਦੌਰਾਨ 21 ਜ਼ਿਲ੍ਹਿਆਂ ’ਚ ਪਹਿਲੀ ਵਾਰ ਦਿੱਤੇ ਜਾ ਰਹੇ ਮਾਣ ਭੇਟੇ ਦਾ ਵਧੇਰੇ ਸੁੱਖ ਨਵੇਂ ਚੁਣੇ ਜਾਣ ਵਾਲੇ ਸਰਪੰਚ ਮਾਣਨਗੇ। ਮੌਜੂਦਾ ਸਰਪੰਚਾਂ ਨੂੰ 12 ਸੌ ਰੁਪਏ ਪ੍ਰਤੀ ਮਹੀਨਾ ਮੁਤਾਬਕ ਅਪ੍ਰੈਲ ਤੋਂ ਜੁਲਾਈ ਤੱਕ ਸਿਰਫ਼ 48 ਸੌ ਰੁਪਏ ਮਿਲਣ ਦੀ ਸੰਭਾਵਨਾ ਹੈ। ਜਦੋਂਕਿ ਨਵੇਂ ਚੁਣੇ ਜਾਣ ਵਾਲੇ ਸਰਪੰਚਾਂ ਨੂੰ ਇਸ ਰਕਮ ਵਿਚੋਂ ਮੌਜੂਦਾ ਵਿੱਤ ਵਰ੍ਹੇ ’ਚ ਕਰੀਬ ਅੱਠ ਮਹੀਨੇ ਦਾ ਮਾਣ ਭੇਟਾ
ਮਿਲੇਗਾ। ਜ਼ਿਕਰਯੋਗ ਹੈ ਕਿ ਸੂਬੇ ਵਿੱਚ ਜੁਲਾਈ-ਅਗਸਤ ਮਹੀਨੇ ’ਚ ਪੰਚਾਇਤੀ ਚੋਣਾਂ ਹੋਣੀਆਂ ਹਨ। ਪਿਛਲੇ ਪੰਜ ਸਾਲਾਂ ਤੋਂ ਮਾਣ ਭੇਟੇ ਦੇ ਪ੍ਰਤੀ ਸਰਪੰਚ 72 ਹਜ਼ਾਰ ਰੁਪਏ ਬਕਾਇਆ ਹਨ। ਮੌਜੂਦਾ ਸਰਪੰਚ ਆਪਣੇ ਪੂਰੇ ਕਾਰਜਕਾਲ ਦੌਰਾਨ ਮਾਣ ਭੇਟੇ ਲਈ ਸਰਕਾਰ-ਦਰਬਾਰੇ ਜੂਝਦੇ ਰਹੇ ਹਨ।
       ਪਿਛੇ ਜਿਹੇ ਮਾਮਲਾ ਮੀਡੀਆ ਵਿੱਚ ਭਖਣ ’ਤੇ ਪੇਂਡੂ ਵਿਕਾਸ ਅਤੇ ਪੰਚਾਇਤ ਮੰਤਰੀ ਤ੍ਰਿਪਤ ਰਾਜਿੰਦਰ ਸਿੰਘ ਬਾਜਵਾ ਨੇ ਸਰਪੰਚਾਂ ਅਤੇ ਸਫ਼ਾਈ ਸੇਵਕਾਂ ਦਾ ਮਾਣ ਭੇਟਾ ਕਿਸ਼ਤਾਂ ’ਚ ਦੇਣ ਦੀ ਗੱਲ ਆਖੀ ਸੀ। ਹੁਣ ਸਰਕਾਰ ਨੇ ਸੂਬੇ ਦੀਆਂ 13028 ਗਰਾਮ ਪੰਚਾਇਤਾਂ ਦੇ ਸਰਪੰਚਾਂ ਦੇ ਮਾਣ ਭੇਟੇ ਵਜੋਂ ਵਿੱਤ ਵਰ੍ਹੇ 2018-19 ਲਈ ਰਕਮ ਭੇਜੀ ਹੈ। ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਦੇ ਸਪੈਸ਼ਲ ਸਕੱਤਰ ਵੱਲੋਂ ਪੱਤਰ ਨੰਬਰ ਡੀ.ਪੀ.ਈ-2/726/2013 ਰਾਹੀਂ 18,75,74,400 ਰੁਪਏ ਰਕਮ ਭੇਜਣ ਸਬੰਧੀ ਜ਼ਿਲ੍ਹਿਆਂ ਨੂੰ ਪੱਤਰ ਜਾਰੀ ਕੀਤਾ ਹੈ। ਪਿਛਲੇ ਵਰ੍ਹੇ ਵੀ ਸੂਬਾ ਸਰਕਾਰ ਨੇ ਸਰਪੰਚਾਂ ਲਈ ਭੇਜਿਆ ਸੀ ਪਰ ਖਜ਼ਾਨਾ ਮੰਤਰੀ ਦੇ ਜ਼ਿਲ੍ਹਾ ਬਠਿੰਡਾ ਨੂੰ ਛੱਡ ਕੇ ਸੂਬੇ ਦੇ ਬਾਕੀ ਜ਼ਿਲ੍ਹਿਆਂ ’ਚ ਸੂਬਾਈ ਖਜ਼ਾਨੇ ਵੱਲੋਂ ਕਲੀਅਰੈਂਸ ਨਾ ਮਿਲਣ ਕਰਕੇ ਸਰਪੰਚਾਂ ਨੂੰ ਰਕਮ ਜਾਰੀ ਨਹੀਂ ਹੋ ਸਕੀ ਸੀ। ਸੂਤਰਾਂ ਅਨੁਸਾਰ ਹੁਣ ਮਾਮਲਾ ਭਖਣ ’ਤੇ ਸੂਬਾ ਸਰਕਾਰ ਨੇ ਵੰਡਣ ਤੋਂ ਰਹਿ ਗਈ ਰਕਮ ਨੂੰ ਵਿੱਤ ਵਰ੍ਹੇ 2018-19 ਦੇ ਰੂਪ ਵਿੱਚ ਨਵਿਆ ਕੇ ਜਾਰੀ ਕਰ ਦਿੱਤਾ। 
        ਦੂਜੇ ਪਾਸੇ 13018 ਪਿੰਡਾਂ ਦੇ ਸਫ਼ਾਈ ਸੇਵਕਾਂ ਦੇ ਬਕਾਏ 18.75 ਰੁਪਏ ਬਾਰੇ ਪੰਜਾਬ ਸਰਕਾਰ ਨੇ ਅਜੇ ਤੱਕ ਦੜ ਵੱਟੀ ਹੋਈ ਹੈ। ਸੂਬੇ ਦੇ ਪਿੰਡਾਂ ਵਿੱਚ ਸਫ਼ਾਈ ਸੇਵਕਾਂ ਨੂੰ ਪ੍ਰਤੀ ਮਹੀਨਾ ਤਿੰਨ ਸੌ ਰੁਪਏ (36 ਸੌ ਰੁਪਏ ਸਲਾਨਾ) ਦਾ ਮਿਹਨਤਾਨਾ ਦਿੱਤੇ ਜਾਣ ਦਾ ਨਿਯਮ ਹੈ। ਸਫ਼ਾਈ ਸੇਵਕਾਂ ਲਈ ਇਹ ਰਕਮ ਵੀ ਪਿਛਲੇ ਪੰਜ ਸਾਲਾਂ ਤੋਂ ਕਦੇ ਜਾਰੀ ਨਹੀਂ ਹੋਈ। ਸਫ਼ਾਈ ਸੇਵਕਾਂ ਦੀ ਨਿਮਾਣੀ ਉਮੀਦ ਵੀ ਸਰਪੰਚਾਂ ਦੇ ਮਾਣੇ ਭੇਟੇ ਲਈ ਬੱਝੀ ਸੀ। ਸੂਬਾ ਸਰਕਾਰ ਨੇ ਸਿਰਫ਼ ਸਰਪੰਚ ਲਈ ਬਜਟ ਅਲਾਟ ਕਰਕੇ ਸਫ਼ਾਈ ਸੇਵਕਾਂ ਦੀ ਆਸਾਂ ਮੁਕਾ ਦਿੱਤੀਆਂ ਹਨ। ਪੰਜ ਸਾਲਾਂ ’ਚ ਤਿੰਨ-ਤਿੰਨ ਸੌ ਰੁਪਇਆ ਰੂਪੀ ਤਿਣਕਾ-ਤਿਣਕਾ ਜੁੜ ਕੇ ਹੁਣ ਪੌਨੇ 19 ਕਰੋੜ ਦੀ ਦੇਣਦਾਰੀ ਵਿੱਚ ਤਬਦੀਲ ਹੋ ਗਿਆ। ਮਜ਼ਦੂਰ ਹਿੱਤਾਂ ਨਾਲ ਜੁੜੀਆਂ ਲੋਕਪੱਖੀ ਜਥੇਬੰਦੀਆਂ ਸਫ਼ਾਈ ਸੇਵਕਾਂ ਨੂੰ ਸਿਰਫ਼ ਤਿੰਨ ਸੌ ਪ੍ਰਤੀ ਮਹੀਨੇ ਉਜਰਤ ਮਾਮਲੇ ਨੂੰ ਕਿਰਤ ਕਾਨੂੰਨ ਦੀ ਉਲੰਘਣਾ ਦੇ ਤਹਿਤ ਅਦਾਲਤੀ ਚਾਰਾਜੋਈ ਦੇ ਰੌਂਅ ਵਿੱਚ ਹਨ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸਫ਼ਾਈ ਸੇਵਕਾਂ ਦੀ ਨਿਯੁਕਤੀ ਘੱਟੋ-ਘੱਟ ਡੀ.ਸੀ ਰੇਟ ਤਹਿਤ ਹੋਣੀ ਚਾਹੀਦੀ ਹੈ। 
         ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਨੇ ਪੱਤਰ ਵਿੱਚ ਡੀ.ਡੀ.ਪੀ.ਓਜ਼ ਨੂੰ ਮਾਣ ਭੇਟਾ ਰਕਮ ਨੂੰ ਕਿਸੇ ਹੋਰ ਪਾਸੇ ਨਾ ਵਰਤਣ ਅਤੇ ਸਰਪੰਚਾਂ ਦੇ ਖਾਤਿਆਂ ’ਚ ਆਨ ਲਾਈਨ ਜਮ੍ਹਾ ਕਰਵਾਉਣ ਦੀ ਤਾਕੀਦ ਕੀਤੀ ਹੈ। 
        ਸਰਪੰਚ ਐਸੋਸੀਏਸ਼ਨ ਲੰਬੀ ਦੇ ਬਲਾਕ ਪ੍ਰਧਾਨ ਸੁਖਚੈਨ ਸਿੰਘ ਕੱਖਾਂਵਾਲੀ ਅਤੇ ਅਵਤਾਰ ਸਿੰਘ ਫਤੂਹੀਵਾਲਾ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦਾ ਕਾਰਜਕਾਲ ਅਗਲੇ ਮਹੀਨਿਆਂ ’ਚ ਸਮਾਪਤ ਹੋ ਰਿਹਾ ਹੈ। ਉਨ੍ਹਾਂ ਦੇ ਮਾਣ ਭੇਟੇ ਦੀ ਚਾਰ ਵਿੱਤ ਵਰ੍ਹਿਆਂ ਦੇਬਕਾਇਆ ਲਗਪਗ 85 ਕਰੋੜ ਰੁਪਏ ਪੰਚਾਇਤਾਂ ਦੀ ਮਿਆਦ ਮੁੱਕਣ ਤੋਂ ਪਹਿਲਾਂ ਜਾਰੀ ਕੀਤੇ ਜਾਣ। ਮਾਣ ਭੇਟ ਸਰਪੰਚਾਂ ਦਾ ਬੁਨਿਆਦੀ ਅਤੇ ਕਾਨੂੰਨੀ ਹੱਕ ਹੈ। 
ਦੂਜੇ ਪਾਸੇ ਸ੍ਰੀ ਮੁਕਤਸਰ ਸਾਹਿਬ ਦੇ ਜ਼ਿਲ੍ਹਾ ਵਿਕਾਸ ਅਤੇ ਪੰਚਾਇਤ ਅਧਿਕਾਰੀ ਅਰੁਣ ਸ਼ਰਮਾ ਨੇ ਆਖਿਆ ਕਿ ਸਰਕਾਰ ਵੱਲੋਂ ਸਰਪੰਚਾਂ ਦੇ ਮਾਣ ਭੇਟੇ ਸਬੰਧੀ ਬਜਟ ਅਲਾਟ ਕੀਤਾ ਗਿਆ ਹੈ। ਜਿਸਨੂੰ ਸਰਕਾਰ ਦੇ ਨਿਰਦੇਸ਼ਾਂ ਮੁਤਾਬਕ ਸਰਪੰਚਾਂ ਵੰਡਿਆ ਜਾਵੇਗਾ। 



05 June 2018

ਸਵਾਮੀਨਾਥਨ ਰਿਪੋਰਟ ਦੀ ਓਟ ’ਚ ਬਣ ਬੈਠੇ ਸਿਸਟਮ ਦੇ ‘ਸਵਾਮੀ’

* ਗੁਰੂਘਰਾਂ ਤੋਂ ਹੋਕੇ ਦਿਵਾ ਕੇ ਦੋਧੀਆਂ ਅਤੇ ਡੇਅਰੀ ਸੰਚਾਲਕਾਂ ਨੂੰ ਮਾਰੇ ਜਾ ਦਬਕੇ
* ਪੁਲਿਸ ਦੇ ਸਾਹਮਣੇ ਦੋਧੀ ਦਾ ਦੁੱਧ ਕੈਂਪਰਾਂ ’ਚ ਭਰ ਕੇ ਤੁਰਦੇ ਬਣੇ ਹੜਤਾਲ ਦੇ ਝੰਡੇਬਰਦਾਰ
* ਪ੍ਰਸ਼ਾਸਨ ਅਤੇ ਖਾਕੀ ਅਮਲੇ ਦੀ ਚੁੱਪੀ ਤੋਂ ਆਮ ਜਨਤਾ ਨਾਰਾਜ਼

                                                      ਇਕਬਾਲ ਸਿੰਘ ਸ਼ਾਂਤ 
      ਡੱਬਵਾਲੀ: ਸਵਾਮੀਨਾਥਨ ਰਿਪੋਰਟ ਲਾਗੂ ਕਰਵਾਉਣ ਦੀ ਓਟ ਵਿੱਚ ਕਿਸਾਨ ਖੁਦ ਸਮੁੱਚੇ ਕਾਨੂੰਨੀ ਤਾਣੇ-ਬਾਣੇ ਦੇ ‘ਸਵਾਮੀ’ ਬਣ ਬੈਠੇ ਹਨ। ਹੜਤਾਲ ਦੇ ਨਾਂਅ ’ਤੇ ‘ਤੇਰਵਾਂ ਰਤਨ’ ਦੱੁਧ ਅਤੇ ਹੋਰ ਸਮਾਨ ਸੜਕਾਂ ਉੱਪਰ ਡੋਲ੍ਹਿਆ ਅਤੇ ਖੋਹਿਆ ਜਾ ਰਿਹਾ ਹੈ। ਪਿੰਡਾਂ ’ਚ ਗੁਰੂਘਰਾਂ ਦੇ ਸਪੀਕਰ ਹੜਤਾਲੀਏ ਕਿਸਾਨਾਂ ਦੀ ਅਵਾਜ਼ ਬਣੇ ਹੋਏ ਹਨ। ਡੇਅਰੀ ਸੰਚਾਲਕ ਕਿਸਾਨਾਂ ਨੂੰ ਗੁਰੂਘਰਾਂ ਦੇ ਹੋਕਿਆਂ ਰਾਹੀਂ ਦੋਧੀਆਂ ਨੂੰ ਦੁੱਧ ਨਾ ਪਾਉਣ ਦੇ ਦੱਬਕੇ ਵੱਜ ਰਹੇ ਹਨ। ਗ੍ਰੰਥੀ ਸਿੰਘ ਆਪਣੀ
ਨੌਕਰੀ ਅਤੇ ਘਰੇੜ ਤੋਂ ਬਚਣ ਲਈ ਮੋਬਾਇਲ ਫੋਨ ਦੀ ਕਾਲ ਆਉਣ ’ਤੇ ਦਿਨ ’ਚ ਕਈ-ਕਈ ਵਾਰ ਚਿਤਾਵਨੀ ਸੰਦੇਸ਼ ਬੋਲਦੇ ਹਨ। ਅਜਿਹੇ ਸੰਦੇਸ਼ ਬਹੁਗਿਣਤੀ ਪਿੰਡਾਂ ’ਚ ਗੁਰੂਘਰਾਂ ਤੋਂ ਹੋਕੇ ਦੇ ਰੂਪ ਵਿੱਚ ਜਾਰੀ ਹੋ ਰਹੇ ਹਨ। ਕਿਸਾਨਾਂ ਵੱਲੋਂ ਸ਼ਹਿਰਾਂ ਨੂੰ ਜਾਣ ਵਾਲੀਆਂ ਸਬਜ਼ੀਆਂ ਵਗੈਰਾ ਸੁੱਟਣ ਨਾਲ ਹੜਤਾਲ ਅਰਾਜਕਤਾ ਦੇ ਰਾਹ ਪੈ ਗਈ ਹੈ।  ਪ੍ਰਸ਼ਾਸਨ ਅਤੇ ਖਾਕੀ ਅਮਲਾ ਸਹਿਮਤੀ ਭਰੇ ਰੁਝਾਨ ’ਚ ਮੂਕ ਦਰਸ਼ਕ ਬਣ ਕੇ ਹੜਤਾਲੀ ਕਿਸਾਨਾਂ ਦੇ ਹੌਂਸਲੇ ਬੁਲੰਦ ਕਰਦਾ ਵਿਖ ਰਿਹਾ ਹੈ। ਆਮ ਜਨਤਾ ਦਾ ਕਿਸਾਨਾਂ ਦੇ ਸੰਘਰਸ਼ ਦੇ ਧਾੜ੍ਹਵੀ ਰਵੱਈਏ ਤੋਂ ਮੋਹ ਭੰਗ ਹੋ ਚੁੱਕਿਆ ਹੈ ਅਤੇ ਇਹ ਸੰਘਰਸ਼ ਆਪਣੇ ਚੌਥੇ ਦਿਨ ’ਚ ਹੀ ਨਿਖੇਧੀਆਂ ਨਾਲ ਜੁੜ ਗਿਆ ਹੈ। ਕਿਸਾਨ ਸੰਘਰਸ਼ ਆਪਣਾ ਸਵਰੂਪ ਬਦਲ ਕੇ ਮਨਆਈਆਂ ਦੇ ਸ਼ੌਕੀਨ ਲੋਕਾਂ ਦੇ ਹੱਥਾਂ ਵਿੱਚ ਜਾ ਚੁੱਕਿਆ ਹੈ। ਜਾਣਕਾਰੀ ਅਨੁਸਾਰ ਬੀਤੀ ਕੱਲ੍ਹ ਸ਼ਾਮ ਮੰਡੀ ਕਿੱਲਿਆਂਵਾਲੀ ਵਿਖੇ ਟਰੈਕਟਰ-ਟਰਾਲੀ ’ਤੇ ਫਿਰਦੇ ਕਈ ਕਿਸਾਨਾਂ ਨੇ ਨੈਸ਼ਨਲ ਹਾਈਵੇ-9 ’ਤੇ ਸੂਬਾ ਪੱਧਰੀ ਪੁਲਿਸ ਨਾਕੇ ਉੱੱਪਰ ਨਾਕਾ ਲਗਾ ਕੇ ਫਤੂਹੀਵਾਲਾ-ਸਿੰਘੇਵਾਲਾ ਦੇ ਦੋਧੀ ਰਾਕੇਸ਼ ਕੁਮਾਰ ਦਾ ਮੋਟਰ ਸਾਇਕਲ ਰੋਕ ਕੇ ਉਸਦਾ 70 ਕਿੱਲੋ ਦੱੱੁਧ ਜ਼ਬਰਦਸਤੀ ਤਿੰਨ ਕੈਂਪਰਾਂ ਵਿੱਚ ਭਰ ਕੇ ਟਰੈਕਟਰ-ਟਰਾਲੀ ’ਤੇ ਰੱਖ ਲਿਆ। ਬਾਕੀ ਬਚਿਆ ਦੁੱਧ ਨੇੜਲੇ ਇੱਟ ਭੱਠੇ ’ਤੇ ਮਜ਼ਦੂਰਾਂ ਨੂੰ ਪੁਆ ਕੇ ਉਸਨੂੰ ਘਰ ਵਾਪਸ ਭੇਜ ਦਿੱਤਾ। ਰਾਕੇਸ਼ ਕੁਮਾਰ ਨੇ ਆਖਿਆ ਕਿ ਮੌਕੇ ’ਤੇ ਪੁਲਿਸ ਅਮਲਾ ਕਿਸਾਨਾਂ ਨੂੰ ਰੋਕਣ ਦੀ ਬਜਾਇ ਚੁੱਪਚਾਪ ਖੜ੍ਹਾ ਵੇਖਦਾ ਰਿਹਾ। ਉਸ ਵੱਲੋਂ ਬਚਾਅ ਲਈ ਅਪੀਲ ਕਰਨ ’ਤੇ ਪੁਲਿਸ ਕਰਮਚਾਰੀ ਇਹ ਆਖ ਕੇ ਵਾਸਾ ਵੱਟ ਗਏ ‘ਕਿ ਇਹ ਤਾਂ ਸਾਰੇ ਪਾਸੇ ਹੋ ਰਿਹਾ ਹੈ ਅਸੀਂ ਕੀ ਕਰੀਏ।’ ਰਾਕੇਸ਼ ਕੁਮਾਰ ਦਾ ਕਹਿਣਾ ਸੀ ਕਿ ਸਮੁੱਚਾ ਵਰਤਾਰਾ ਨਾਕੇ ’ਤੇ ਲੱਗੇ ਸੀ.ਸੀ.ਟੀ.ਵੀ ਕੈਮਰੇ ਵਿੱਚ ਰਿਕਾਰਡ ਹੋਇਆ ਹੋਣਾ ਪਰ ਸੁਣਵਾਈ ਦੀ ਸੋਚ ਨਹੀਂ ਤਾਂ ਕਾਰਵਾਈ ਦਾ ਅਮਲ ਦੂਰ ਦੀ ਕੌਡੀ ਹੈ। 
         ਅਜੋਕੇ ਮਾਹੌਲ ਪ੍ਰਤੀ ਫ਼ਿਕਰਮੰਦ ਸੂਝਵਾਨ ਲੋਕਾਂ ਦਾ ਕਹਿਣਾ ਹੈ ਕਿ ਜਨਤਾ ਦੇ ਪੈਸੇ ਨਾਲ ਰਖਵਾਲੀ ਲਈ ਤਾਇਨਾਤ ਖਾਕੀ ਅਮਲੇ ਵੱਲੋਂ ਬਣਦੇ ਫਰਜ਼ਾਂ ਤੋਂ ਮੁਨਕਰ ਹੋਣਾ ਦੇਸ਼ ’ਚ ਵਿਗੜਨ ਦੇ ਰਾਹ ਪਏ ਹਾਲਾਤਾਂ ਦਾ ਸੂਚਕ ਹੈ। ਆਮ ਜਨਤਾ ਸਮੁੱਚੇ ਵਰਤਾਰੇ ਨੂੰ ਜੰਗਲ ਰਾਜ ਵਾਂਗ ਮਹਿਸੂਸ ਕਰ ਰਹੀ ਹੈ। 
            ਖੇਤਰ ਦੇ ਇੱਕ ਗੁਰਦੁਆਰੇ ਦੇ ਗ੍ਰੰਥੀ ਨੇ ਆਪਣਾ ਨਾਂਅ ਨਹੀਂ ਛਾਪਣ ਦੀ ਸ਼ਰਤ ’ਤੇ ਆਖਿਆ ਕਿ ਸਾਡਾ ਕਾਰਜ ਤਾਂ ਸੰਗਤਾਂ ਨੂੰ ਗੁਰੂ ਘਰ ਨਾਲ ਜੋੜਨਾ ਅਤੇ ਬਾਣੀ ਦਾ ਸੰਦੇਸ਼ ਉਨ੍ਹਾਂ ਤੱਕ ਪਹੁੰਚਾਉਣਾ ਹੈ ਪਰ ਗੁਰੂਘਰਾਂ ਦੇ ਸਪੀਕਰ ਦੀ ਵਰਤੋਂ ਲੋਕ ਗੁਆਚੇ ਕੱਟੇ-ਵੱਛਿਆਂ ਦੀ ਭਾਲ ਤੋਂ ਲੈ ਕੇ ਹੁਣ ਦੋਧੀਆਂ ਨੂੰ ਡਰਾਉਣ ਤੱਕ ਕਰਨ ਲੱਗੇ ਹਨ। ਗ੍ਰੰਥੀ ਸਿੰਘ ਨੇ ਆਖਿਆ ਕਿ ਕਿਸੇ ਉਨ੍ਹਾਂ ਨੂੰ ਪਿੰਡ ਵਾਸੀ ਵੱਲੋਂ ਇੱਕ ਮੋਬਾਇਲ ਕਾਲ ਕਰਕੇ ਆਖੇ ਸੰਦੇਸ਼ ਨੂੰ ਵੀ ਆਪਣੀ ਨਿਗੁਣੀ ਨੌਕਰੀ ਦੀ ਝੇਪ ’ਚ ਗੁਰਦੁਆਰੇ ਤੋਂ ਹੋਕੇ ਦੇ ਰੂਪ ਵਿੱਚ ਪਿੰਡ ’ਚ ਪ੍ਰਸਾਰਤ ਕਰਨਾ ਪੈਂਦਾ ਹੈ। 
            ਆਮ ਜਨਤਾ ਦਾ ਕਹਿਣਾ ਹੈ ਕਿ ਸਰਕਾਰ ਨੂੰ ਗੁਰਦੁਆਰੇ ਦੇ ਸਪੀਕਰਾਂ ਤੋਂ ਜਾਰੀ ਹੁੰਦੇ ਹੋਕਿਆਂ ਸਬੰਧੀ ਸਖ਼ਤ ਅਤੇ ਸਪੱਸ਼ਟ ਦਿਸ਼ਾ ਨਿਰਦੇਸ਼ਾਂ ਜਾਂ ਨੀਤੀ ਬਣਾਉਣੀ ਚਾਹੀਦੀ ਹੈ। ਜਿਸ ਤਹਿਤ ਪੁਲਿਸ, ਸਰਪੰਚ ਅਤੇ ਚੌਕੀਦਾਰ ਤੋਂ ਹੋਕੇ ਦੀ ਮਨਜੂਰੀ ਨੂੰ ਲਾਜਮੀ ਬਣਾਇਆ ਜਾਵੇ। ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸੁਮਿਤ ਜਾਰੰਗਲ ਨੇ ਆਖਿਆ ਕਿ ਗੁਰੂਘਰਾਂ ਤੋਂ ਹੋਕਿਆਂ ਬਾਰੇ ਸਬੰਧੀ ਇਸ ਸੁਝਾਅ ਨੂੰ ਨਿਰਦੇਸ਼ਾਂ ’ਚ  ਬਦਲਣ ਲਈ ਢੁੱਕਵੇਂ ਕਦਮ ਚੁੱਕੇ ਜਾਣਗੇ। ਅਸੀਂ ਹੋਕੇ ਰੋਕਣ ਲਈ ਤੁਰੰਤ ਕਦਮ ਵੀ ਚੁੱਕ ਰਹੇ ਹਾਂ । -98148-26100 / 93178-26100 




01 May 2018

ਖ਼ਬਰ ਦਾ ਅਸਰ : ਪੰਜਾਬ ਸਰਕਾਰ 108 ਕਰੋੜ ਰੁਪਏ ਦਾ ਮਾਣ-ਭੇਟਾ ਕਿਸ਼ਤਾਂ ’ਚ ਦੇਣ ਲਈ ਰਾਜੀ

* ਪੰਚਾਇਤ ਮੰਤਰੀ ਨੇ ਸਫ਼ਾਈ ਸੇਵਕਾਂ ਦੇ ਬਕਾਏ ਅਤੇ ਜਾਰੀ ਮਾਣ ਭੇਟੇ ਦੀ ਸੂਚੀ ਮੰਗੀ 
                                               ਇਕਬਾਲ ਸਿੰਘ ਸ਼ਾਂਤ 
ਲੰਬੀ: ਸਰਪੰਚਾਂ ਅਤੇ ਸਫ਼ਾਈ ਸੇਵਕਾਂ ਦਾ 108 ਕਰੋੜ ਰੁਪਏ ਦਾ ਮਾਣ ਭੇਟਾਂ ਦੱਬੀ ਬੈਠੀ ਪੰਜਾਬ ਸਰਕਾਰ ਕੁਝ ਹਰਕਤ ਵਿੱਚ ਆਈ ਹੈ। ਅਖ਼ਬਾਰੀ ਰਿਪੋਰਟਾਂ ਵਿੱਚ ਮਾਮਲਾ ਪ੍ਰਮੁੱਖਤਾ ਨਾਲ ਉੱਠਣ ਉਪਰੰਤ ਪੇਂਡੂ ਵਿਕਾਸ ਅਤੇ ਪੰਚਾਇਤ ਮੰਤਰੀ ਤ੍ਰਿਪਤ ਰਾਜਿੰਦਰ ਸਿੰਘ ਬਾਜਵਾ ਨੇ ਸਫ਼ਾਈ ਸੇਵਕਾਂ ਨੂੰ ਜਾਰੀ ਅਤੇ ਬਕਾਇਆ ਮਾਣ-ਭੇਟੇ ਦੇ ਸੂਚੀ ਮੰਗੀ ਲਈ ਹੈ। ਇਸ
ਸਬੰਧੀ ਵੇਰਵੇ 2006 ਤੋਂ 2018 ਤੱਕ ਮੰਗੇ ਗਏ ਹਨ। ਇਸ ਵਕਫ਼ੇ ਵਿੱਚ ਅਕਾਲੀ-ਭਾਜਪਾ ਗੱਠਜੋੜ ਦਾ ਦਸ ਸਾਲਾ ਰਾਜਭਾਗ ਦਾ ਵੇਲਾ ਵੀ ਸ਼ਾਮਲ ਹੈ। ਸਰਪੰਚਾਂ ਅਤੇ ਸਫ਼ਾਈ ਸੇਵਕਾਂ ਦੇ ਮਾਣ ਭੇਟੇ ਦੇ ਸੌ ਕਰੋੜ ਰੁਪਏ ਤੋਂ ਵੱਧ ਬਕਾਏ ਸੰਬੰਧੀ 25 ਅਪ੍ਰੈਲ ਨੂੰ ਮੀਡੀਆ ’ਚ ਰਿਪੋਰਟ ਪ੍ਰਕਾਸ਼ਿਤ ਹੋਈ ਸੀ। ਸੂਬੇ ਦੇ 13028 ਸਰਪੰਚਾਂ ਦੇ ਕਰੀਬ 90-92 ਕਰੋੜ ਰੁਪਏ ਬਕਾਏ ਮਾਣ ਭੇਟੇ ਬਾਰੇ ਪੰਜਾਬ ਸਰਕਾਰ ਨੇ ਅਜੇ ਤੱਕ ਚੁੱਪੀ ਵੱਟੀ ਹੋਈ ਹੈ। ਜਿਸਦਾ ਕਾਰਨ ਸੂਬੇ ਭਰ ਵਿੱਚ ਜ਼ਿਆਦਤਰ ਪੰਚਾਇਤਾਂ ’ਤੇ ਅਕਾਲੀ ਪੱਖੀ ਪੰਚ/ਸਰਪੰਚਾਂ ਦਾ ਕਬਜ਼ਾ ਮੰਨਿਆ ਜਾ ਰਿਹਾ ਹੈ।
            ਪੇਂਡੂ ਵਿਕਾਸ ਅਤੇ ਪੰਚਾਇਤ ਵਿਭਾਗ ਦੇ ਡਿਪਟੀ ਡਾਇਰੈਕਟਰ ਪੰਚਾਇਤ (ਹੈੱਡ) ਨੇ ਵੱਲੋਂ ਜ਼ਿਲ੍ਹਾ ਵਿਕਾਸ ਅਤੇ ਪੰਚਾਇਤ ਅਫਸਰਾਂ ਨੂੰ ਪੱਤਰ ਨੰਬਰ 14/12/2012/ਪੀ-5/1702 ਮਿਤੀ 27/4/2018 ਭੇਜਿਆ ਹੈ। ਜਿਸ ਰਾਹੀਂ ਸਾਰੇ ਪਿੰਡਾਂ ਵਿੱਚ ਰੱਖੇ ਸਫ਼ਾਈ ਸੇਵਕਾਂ ਨੂੰ ਦਿੱਤੇ ਜਾਂਦੇ ਮਾਣ-ਭੇਟੇ ਦੀ 2006-07 ਤੋਂ 2017-18 ਤੱਕ ਜਾਰੀ ਰਕਮ, ਖਰਚ ਰਕਮ ਅਤੇ ਖਜ਼ਾਨੇ ਵਿਚੋਂ ਡਰਾਅ ਨਹੀਂ ਰਕਮ ਦੀ ਰਿਪੋਰਟ 30 ਅਪੈ੍ਰਲ 2018 ਨੂੰ ਬਾਅਦ ਦੁਪਿਹਰ ਤਿੰਨ ਵਜੇ ਤਲਬ ਕੀਤੀ ਹੈ। ਪੰਜਾਬ ਦੇ 13018 ਪਿੰਡਾਂ ’ਚ ਤਿੰਨ ਸੌ ਰੁਪਏ ਪ੍ਰਤੀ ਮਹੀਨੇ ’ਤੇ ਸਫ਼ਾਈ ਸੇਵਕ ਤਾਇਨਾਤ ਹਨ। ਜ਼ਿਨ੍ਹਾਂ ਨੂੰ ਲੰਮੇ ਸਮੇਂ ਤੋਂ ਨਿਗੁਣਾ ਮਾਣ-ਭੇਟਾ ਵੀ ਨਸੀਬ ਨਹੀਂ ਹੋ ਸਕਿਆ। ਇਸਦੇ ਇਲਾਵਾ ਸਰਪੰਚਾਂ ਨੂੰ ਸਰਕਾਰੀ ਖਜ਼ਾਨੇ ਵਿਚੋਂ 12 ਸੌ ਪ੍ਰਤੀ ਮਹੀਨਾ ਮਾਣ ਭੇਟਾ ਦਿੱਤੇ ਜਾਣ ਦਾ ਨਿਯਮ ਹੈ। 
         ਕੈਪਟਨ ਸਰਕਾਰ ਨੇ ਸਰਪੰਚਾਂ ਲਈ ਸਾਲ 2017-18 ਦੇ 18,75, 74,400 ਕਰੋੜ ਜਾਰੀ ਕਰ ਦਿੱਤੇ ਸਨ। ਵਿੱਤ ਮੰਤਰੀ ਮਨਪ੍ਰੀਤ ਬਾਦਲ ਦੇ ਜ਼ਿਲ੍ਹਾ ਬਠਿੰਡਾ ’ਚ ਖਜ਼ਾਨੇ ਦੀਆਂ ਸਾਰੀਆਂ ਅੜਚਣਾਂ ਦੂਰ ਹੋ ਗਈਆਂ ਅਤੇ ਸਰਪੰਚਾਂ ਅਤੇ ਸਫ਼ਾਈ ਸੇਵਕਾਂ ਨੂੰ ਮਾਣ ਭੇਟਾ ਜਾਰੀ ਅਦਾ ਕਰ ਦਿੱਤਾ ਗਿਆ ਸੀ। ਜਦੋਂਕਿ ਪਟਿਆਲਾ ਅਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਸਮੇਤ ਬਹੁਗਿਣਤੀ ਜ਼ਿਲ੍ਹਿਆਂ ਨੂੰ ਖਜ਼ਾਨੇ ਵੱਲੋਂ ਕਲੀਅਰੈਂਸ ਨਾ ਮਿਲਣ ਕਰਕੇ ਜਾਰੀ ਨਹੀਂ ਹੋ ਸਕੀ ਸੀ। 
ਪੇਂਡੂ ਵਿਕਾਸ ਅਤੇ ਪੰਚਾਇਤ ਮੰਤਰੀ ਤ੍ਰਿਪਤ ਰਾਜਿੰਦਰ ਸਿੰਘ ਬਾਜਵਾ ਨੇ ਕਿਹਾ ਕਿ ਇਸ ਬਾਰੇ ਅਸੀਂ ਕੋਸ਼ਿਸ਼ ਕਰ ਰਹੇ ਹਾਂ। ਸਾਡਾ ਸਰਪੰਚਾਂ ਅਤੇ ਸਫ਼ਾਈ ਸੇਵਕਾਂ ਨੂੰ ਮਾਣਭੇਟਾ ਕਿਸ਼ਤਾਂ ’ਚ ਦੇਣ ਦਾ ਮਨ ਬਣ ਗਿਆ ਹੈ। ਜਿਉਂ-ਜਿੳੇੁਂ ਸਾਡੀ ਵਿੱਤੀ ਹਾਲਤ ਚੰਗੀ ਹੋਵੇਗੀ, ਦੇ ਦਿਆਂਗੇ।