'ਡੈਪੋਗਿਰੀ' ਤੋਂ ਮਹਾਰਾਜੇ ਦੇ ਡੈਪੋਜ਼ ਦਾ ਹੋਣ ਲੱਗਿਆ ਮੋਹ ਭੰਗ

* ਹਾਕੂਵਾਲਾ ’ਚ ਤਿੰਨ ਨਸ਼ਾ ਤਸਕਰਾਂ ਨੂੰ ਫੜਨ ਵਾਲੇ ਡੈਪੋਜ਼ ਹੋਣਗੇ ਡੈਪੋ ਮੁਹਿੰਮ ਤੋਂ ਲਾਂਭੇ
* ਡੈਪੋ ਦੀ ਸੂਚਨਾ ਪੁਲਿਸ ਲਈ ਕੋਈ ਤਵੱਜੋ ਨਹੀਂ ਰੱਖਦੀ 
* ਡੈਪੋ ਨੇ ਮੁਹਿੰਮ ਨੂੰ ਮਹਿਜ਼ ਲਿਫ਼ਾਫ਼ੇਬਾਜ਼ੀ ਦੱਸਿਆ 
* ਸੂਬੇ ਨੂੰ ਨਸ਼ਾਮੁਕਤ ਕਰਨ ਲਈ ਸਰਕਾਰ ਵਚਨਬੱਧ : ਖੁੱਡੀਆਂ

                                                     ਇਕਬਾਲ ਸਿੰਘ ਸ਼ਾਂਤ

   ਲੰਬੀ: ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਨੌਜਵਾਨਾਂ ਦੇ ਸ਼ਕਤੀਕਰਨ ਤਹਿਤ ਬਣਾਏ ਡੈਪੋ (ਡਰੱਗ ਐਬਿਊਜ਼ ਪ੍ਰੀਵੈਨਸ਼ਨ ਅਫਸਰ) ਪੁਲਿਸ ਲਈ ਕੋਈ ਤਵੱਜੋ ਨਹੀਂ ਰੱਖਦੇ। ਜਿਸ ਕਰਕੇ ਉਨ੍ਹਾਂ ਦਾ ਮੋਹ ਇੱਕ ਹਫ਼ਤੇ ਅੰਦਰ ਹੀ ਕੈਪਟਨ ਦੀ ਵਕਾਰੀ ਮੁਹਿੰਮ ਤੋਂ ਭੰਗ ਹੋਣ ਲੱਗਿਆ ਹੈ। ਮਹਾਰਾਜੇ ਦੀ ਡੈਪੋ ਮੁਹਿੰਮ ਸਿਰਫ਼ 23 ਮਾਰਚ ਦੇ

ਕੌਮੀ ਸ਼ਹੀਦਾਂ ਨੂੰ ਸਿਰਫ਼ ਇੱਕ ਹਫ਼ਤੇ ਅੰਦਰ ਕਾਗਜ਼ੀ ਸ਼ਰਧਾਂਜਲੀ ਜਾਪਣ ਲੱਗੀ ਹੈ। ਪਿੰਡ ਹਾਕੂਵਾਲਾ ਦੇ ਡੈਪੋ ਮਨਜੀਤ ਸਿੰਘ ਨੇ ਹੋਰਨਾਂ ਨੌਜਵਾਨਾਂ ਸਮੇਤ ਡੈਪੋਗਿਰੀ ਤੋਂ ਲਾਂਭੇ ਹੋਣ ਦਾ ਐਲਾਨ ਕੀਤਾ ਹੈ। ਉਹ ਹਾਕੂਵਾਲਾ ਵਿਖੇ ਮੈਡੀਕਲ ਨਸ਼ਾ ਵਿਕਣ ਬਾਰੇ ਡੈਪੋ ਦੀਆਂ ਸ਼ਿਕਾਇਤਾਂ ਨੂੰ ਕਿੱਲਿਆਂਵਾਲੀ ਪੁਲਿਸ ਵੱਲੋਂ ਅਣਸੁਣਿਆ ਕਰਨ ਤੋਂ ਖਫ਼ਾ ਹੈ। ਜਿਸ ਮਗਰੋਂ ਬੀਤੇ ਕੱਲ੍ਹ ਉਥੋਂ ਦੇ ਦਰਜਨਾਂ ਲੋਕਾਂ ਨੇ ਮੋਰਚਾ ਲਗਾ ਕੇ ਤਿੰਨ ਨਸ਼ਾ ਤਸਕਰ ਕਾਬੂ ਕੀਤੇ। ਜ਼ਿਕਰਯੋਗ ਹੈ ਕਿ ਪੰਜਾਬ ’ਚ ਸਾਢੇ ਚਾਰ ਲੱਖ ਡੈਪੋ ਬਣਾਏ ਗਏ ਹਨ। ਡਰੱਗ ਐਬਿਊਜ਼ ਪ੍ਰੀਵੈਨਸ਼ਨ ਅਫਸਰਾਂ (ਡੈਪੋ) ਦੀਆਂ ਨਸ਼ਿਆਂ ਬਾਰੇ ਸੂਚਨਾਵਾਂ ਨੂੰ ਪੁਲਿਸ ਵੱਲੋਂ ਰੱਤੀ ਭਰ ਸੁਣਵਾਈ ਤਹਿਤ ਨਹੀਂ ਮੰਨਿਆ ਜਾ ਰਿਹਾ।

         ਲੰਬੀ ਥਾਣੇ ਅਧੀਨ ਪਿੰਡਾਂ ਵਿੱਚ 2040 ਡੈਪੋ ਬਣਾਏ ਜਾਣ ਦੀ ਪੁਸ਼ਟੀ ਕੀਤੀ ਹੈ। ਜਿਨ੍ਹਾਂ ਵਿੱਚੋਂ ਹਾਕੂਵਾਲਾ ’ਚੋਂ

80-90 ਦੇ ਕਰੀਬ ਡੈਪੋ ਬਣਾਏ ਦੱਸੇ ਜਾਂਦੇ ਹਨ। ਸੂਤਰਾਂ ਅਨੁਸਾਰ ਖਾਕੀ ਸੂਤਰਾਂ ਅਨੁਸਾਰ ਪੁਲਿਸ ਤੰਤਰ ਨੇ ਮਹਾਰਾਜੇ ਮੂਹਰੇ ਨੰਬਰ ਬਣਾਉਣ ਲਈ 23 ਮਾਰਚ ਨੂੰ ਸ਼ਰਧਾਂਜਲੀ ਸਮਾਗਮ ਦੇ ਮੱਦੇਨਜ਼ਰ ਕਾਹਲੀ ’ਚ ਡੈਪੋ ਬਣਾ ਖਾਨਾਪੂਰਤੀ ਕਰ ਦਿੱਤੀ। ਆਖਿਆ ਜਾ ਰਿਹਾ ਹੈ ਕਿ ਪੜਤਾਲ ਕਰਨ ’ਤੇ ਕੁਝ ਫ਼ੀਸਦੀ ਨਸ਼ਿਆਂ ਦੇ ਕਾਰੋਬਾਰ ਨਾਲ ਸਿੱਧੇ-ਅਸਿੱਧੇ ਜੁੜੇ ਵਿਅਕਤੀਆਂ ਦੇ ਨਾਂਅ ਵੀ ਡੈਪੋ ਸੂਚੀ ’ਚ ਆ ਸਕਦੇ ਹਨ। ਹਾਕੂਵਾਲਾ ਦੇ ਡੈਪੋ-ਕਮ-ਕਾਂਗਰਸ ਆਗੂ ਮਨਜੀਤ ਸਿੰਘ ਨੇ ਕਿਹਾ ਕਿ ਉਸ ਜਰੀਏ ਕਿੱਲਿਆਂਵਾਲੀ ਪੁਲਿਸ ਨੇ 25-26 ਨੌਜਵਾਨਾਂ ਦੇ ਡੈਪੋ ਫਾਰਮ ਭਰਵਾਏ ਸਨ। ਜਦੋਂ ਕਿ ਸਾਰੇ ਪਿੰਡ ’ਚ ਕਰੀਬ 80-90 ਡੈਪੋ ਹਨ। ਨਸ਼ਿਆਂ ਖਿਲਾਫ਼ ਸ਼ਿਕਾਇਤ ’ਤੇ ਪੁਲਿਸ ਨੇ ਸੁਣਵਾਈ ਤੱਕ ਨਹੀਂ ਕੀਤੀ। ਜਿਸਤੋਂ ਪੁਲਿਸ ਦੀ ਨਸ਼ਿਆਂ ਖਿਲਾਫ਼ ਮਨਸ਼ਾ ਜਾਹਰ ਹੁੰਦੀ ਹੈ। ਮਨਜੀਤ ਸਿੰਘ ਹਾਕੂਵਾਲਾ ਨੇ ਆਖਿਆ ਕਿ ਪੁਲਿਸ ਵੱਲੋਂ ਸੁਣਵਾਈ ਨਾ ਹੋਣ ਕਰਕੇ ਉਸਦਾ ਸਰਕਾਰ ਦੀ ਡੈਪੋ ਮੁਹਿੰਮ ਤੋਂ ਵਿਸ਼ਵਾਸ ਉੱਠ ਗਿਆ ਹੈ। ਉਹ ਡੈਪੋ ਬਣ ਕੇ ਜਲਾਲਤ ਮਹਿਸੂਸ ਕਰ ਰਿਹਾ ਹੈ। ਉਸਨੈ ਕਿਹਾ ਕਿ ਉਹ ਪਿੰਡ ਦੇ ਡੈਪੋ ਨੌਜਵਾਨ ਸਮੇਤ ਇਕੱਠੇ ਹੋ ਕੇ ਇਸ ਜ਼ਮੀਨੀ ਹਕੀਕਤ ਤੋਂ ਕੋਹਾਂ ਦੂਰ ਝੂਠੀ ਮੁਹਿੰਮ ਤੋਂ ਲਾਂਭੇ ਹੋਣ ਦਾ ਐਲਾਨ ਕਰਨਗੇ। ਖੇਤਰ ਦੇ ਹੋਰਨਾਂ ਡੈਪੋਜ਼ ਨੇ ਨਾਂਅ ਨਾ ਲਿਖਣ ਦੀ ਸ਼ਰਤ ’ਤੇ ਆਖਿਆ ਕਿ ਸਫ਼ੈਦਪੋਸ਼ਾਂ ਵਗੈਰਾ ਦੇ ਆਖਣ ’ਤੇ ਉਨ੍ਹਾਂ ਡੈਪੋ ਫਾਰਮ ਭਰ ਦਿੱਤੇ। ਸੂਬਾ ਸਰਕਾਰ ਵੀ ਜਨਤਾ ਨੂੰ ਡੈਪੋ ਵਾਲਾ ਤਗਮਾ ਲਗਾ ਕੇ ਗੁੰਮਰਾਹ ਕਰ

ਰਹੀ ਹੈ। ਜੇਕਰ ਪੁਲਿਸ ਆਮ ਵਿਅਕਤੀ ਦੀ ਸੁਣਵਾਈ ਕਰੇ ਤਾਂ ਹਰ ਸਮਾਜ ਦੀ ਹਰੇਕ ਜਾਗਰੂਕ ਇਨਸਾਨ ਡੈਪੋ ਦੀ ਭੂਮਿਕਾ ਵਿੱਚ ਹੈ। ਦੂਜੇ ਪਾਸੇ ਬਠਿੰਡਾ ਜੋਨ ਦੇ ਆਈ.ਜੀ ਐਮ.ਐਸ ਛੀਨਾ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ’ਤੇ ਉਨ੍ਹਾਂ ਦਾ ਮੋਬਾਇਲ ’ਤੇ ਕਾਲ ਰਸੀਵ ਨਹੀਂ ਹੋਈ। ਇਸ ਬਾਰੇ ਜ਼ਿਲ੍ਹਾ ਕਾਂਗਰਸ ਸ੍ਰੀ ਮੁਕਤਸਰ ਸਾਹਿਬ ਦੇ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆ ਨੇ ਆਖਿਆ ਕਿ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਡੈਪੋ ਮੁਹਿੰਮ ਜਨਤਕ ਸਹਿਯੋਗ ਨਾਲ ਪੰਜਾਬ ਨੂੰ ਹਕੀਕੀ ਤੌਰ ’ਤੇ ਨਸ਼ਾ ਮੁਕਤ ਕਰਨ ਲਈ ਉਲੀਕੀ ਹੈ। ਜੇਕਰ ਕੋਈ ਪੁਲਿਸ ਅਫਸਰ ਇਸ ਮੁਹਿੰਮ ’ਚ ਅੜਿੱਕਾ ਬਣੇਗਾ ਤਾਂ ਉਨ੍ਹਾਂ ’ਤੇ ਸਰਕਾਰ ਸ਼ਿਕੰਜਾ ਕਸੇਗੀ। ਖੁੱਡੀਆਂ ਨੇ ਕਿਹਾ ਕਿ ਸਰਕਾਰ ਨਸ਼ਾਮੁਕਤ ਪੰਜਾਬ ਦੀ ਸਿਰਜਣਾ ਲਈ ਵਚਨਬੱਧ ਹੈ । 

ਵਕਤ

ਇਕਬਾਲ ਸਿੰਘ ਸ਼ਾਂਤ / ਕਵਿਤਾ

ਕੁਝ ਕੱਟਦੇ ਵਕਤ ਨੂੰ, ਕੁਝ ਲੜਦੇ ਵਕਤ ਨੂੰ
ਕਈ ਹੰਢਾਉਂਦੇ ਵਕਤ ਦੀਆਂ ਖੇਡਾਂ ਨੂੰ ।
ਵਕਤ ਹਮੇਸ਼ਾ ਚੱਲਦਾ ਆਪਣੀ ਚਾਲੇ,
ਕਦਰ ਕਰੇਂਦੇ ਜੋ ਪੈਣ ਨਾ ਕਾਹਲੇ ।

ਕਈਆਂ ਲਈ ਵਕਤ ਬਣ ਜਾਏ ਮੁਸ਼ਕਿਲ,
ਆਪਣੇ ਦਮ ‘ਤੇ ਕਈ ਮਾਣਨ ਇਸ ਨੂੰ ਹਰ ਪਲ ।
ਵਕਤ ਦੇ ਨਾਲ ਵਹਿ ਕੇ ਚੱਲਦੇ ਜੋ,
ਮੰਜ਼ਿਲ ਨੂੰ ਸਹਿਜੇ ਹੀ ਪਾ ਲੈਂਦੇ ਉਹ ।

ਵਗਣ ਕਈ ਅਣਖੀਲੇ ਉਲਟ ਹਵਾਵਾਂ ਦੇ,
ਕੁਝ ਵਹਿਣ ਉਲਟ ਦਰਿਆਵਾਂ ਦੇ ।
ਮਸ਼ਾਲਾਂ ਚੁੱਕਦੇ ਕਈ ਚਾਨਣ ਲਈ,
ਕੁਝ ਖੁਦ ਹੀ ‘ਚਾਨਣ’ ਹੋ ਜਾਂਦੇ ।

ਇਹ ਚਾਨਣ ਹੀ ਦੇਊ ਮਾਤ ਹਨੇਰੇ ਨੂੰ,
ਵਕਤ ਆਉਣ ‘ਤੇ ਰੁਸ਼ਨਾਊ ਹਰ ਬਨੇਰੇ ਨੂੰ ।
ਇਹ ਆਸ ਹੀ ਨਹੀਂ, ਵਿਸ਼ਵਾਸ ਹੈ ਉਚੇਰਾ,
ਵਕਤ ਆਉਣਾ ਉਹ ਵੀ ਚਾਹੇ ਦੂਰ ਅਜੇ ਸਵੇਰਾ ।
                 - *- * - * -

ਮਹਾਰਾਜੇ ਦੇ 43605 ਵੋਟਰਾਂ ਦੀ ਹਾਲਤ ਬਿਨ੍ਹਾਂ ਛੱਤ ਵਾਲੇ ਮਕਾਨ ਵਰਗੀ

* ਕੈਪਟਨ ਅਤੇ ਮਨਪ੍ਰੀਤ ਨੇ ਮੁੱਢੋਂ ਵਿਸਾਰਿਆ ਲੰਬੀ ਹਲਕਾ 

* ਬੱਜਟ ਵਿੱਚ ਫੁੱਟੀ ਕੌਡੀ ਦੇਣ ਦਾ ਜਿਗਰਾ ਨਾ ਕੱਢ ਸਕੇ ਸਟੇਜਾਂ ’ਤੇ ਫੋਕੀਆਂ ਟਾਹਰਾਂ ਮਾਰਨ ਵਾਲੇ 

* ਚੋਣਾਂ ਮਗਰੋਂ ਮਹਾਰਾਜੇ ਅਤੇ ਯੁਵਰਾਜ ਨੇ ਨਹੀਂ ਕੀਤਾ ਲੰਬੀ ਵੱਲ ਮੂੰਹ, ਕਾਂਗਰਸ ਵਰਕਰ ਮੂੰਹ ਵੇਖਣ ਨੂੰ ਤਰਸੇ  

                                                       ਇਕਬਾਲ ਸਿੰਘ ਸ਼ਾਂਤ 

       ਲੰਬੀ: ਸੂਬੇ ਦੇ ਬੱਜਟ ਵਿੱਚ ਮਹਾਰਾਜੇ ਦੀ ਵੱਡੇ ਦਿਲ ਵਾਲੀ ਦਿਲਦਾਰੀ ਲੰਬੀ ਹਲਕੇ ਲਈ ਤੰਗਦਿਲ ਸਾਬਤ ਹੋਈ। ਮੱੁਖ ਮੰਤਰੀ ਅਮਰਿੰਦਰ ਸਿੰਘ ਅਤੇ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਦੀ ਗੋਝੀ ਵਿਚੋਂ ਲੰਬੀ ਹਲਕੇ ਲਈ ਫੁੱਟੀ ਕੌਡੀ ਵੀ ਨਹੀਂ ਨਿੱਕਲੀ। ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਲੰਬੀ ਹਲਕੇ ਤੋਂ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ

ਖਿਲਾਫ਼ ਚੋਣ ਲੜ ਚੁੱਕੇ ਹਨ। ਲੰਬੀ ਤੋਂ ਹਾਰ ਦੇ ਬਾਵਜੂਦ ਅਮਰਿੰਦਰ ਸਿੰਘ ਨੂੰ ਕਰੀਬ 43605 ਵੋਟਾਂ ਪਈਆਂ ਸਨ। ਸਰਕਾਰ ਬਣਨ ਦੇ ਇੱਕ ਸਾਲ ਬਾਅਦ ਤੱਕ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਲੰਬੀ ਹਲਕੇ ਨੂੰ ਪੂਰੀ ਤਰ੍ਹਾਂ ਵਿਸਾਰ ਰੱਖਿਆ ਹੈ।

      ਕੈਪਟਨ ਦੇ ਵਾਅਦਿਆਂ ਮੁਤਾਬਕ ਲੰਬੀ ਵਿੱਚ ਨਾ ਪ੍ਰਸ਼ਾਸਨ ਸੁਚੱਜਾ ਸਾਬਤ ਹੋ ਸਕਿਆ ਅਤੇ ਨਾ ਵਿਕਾਸ ਦੀ ਕੋਈ ਲਹਿਰ ਛਿੜ ਸਕੀ। ਪੁਲਿਸ ਦੀ ਸ਼ਹਿ ’ਤੇ ਨਸ਼ੇ ਗਲੀ-ਗਲੀ ਵਿਕ ਰਹੇ ਹਨ। ਚੋਣਾਂ ਸਮੇਂ ਚੋਣ ਜਲਸਿਆਂ ’ਚ ਅਮਰਿੰਦਰ ਸਿੰਘ ਨੇ ਲੰਬੀ ਹਲਕੇ ਨੂੰ ਬਹੁਪੱਖੀ ਵਿਕਾਸ ਅਤੇ ਸੁਚੱਜੇ ਸ਼ਾਸਨ ਦੇ ਸੁਫ਼ਨੇ ਵਿਖਾਏ ਸਨ। ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਵੀ ਲੰਬੀ ਹਲਕੇ ਦੇ ਬਾਸ਼ਿੰਦੇ ਹਨ ਅਤੇ ਉਨ੍ਹਾਂ ਦਾ ਘਰ ਵੀ ਪਿੰਡ ਬਾਦਲ ’ਚ ਹੈ। ਉਹ ਬਠਿੰਡਾ ਲੋਕਸਭਾ ਤੋਂ ਚੋਣ ਲੜ ਚੁੱਕੇ ਮੌਜੂਦਾ ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ ਵੀ ਸਿੰਙਾਂ ਨੂੰ ਹੱਥ ਪੈਣ ’ਤੇ ਲੰਬੀ ਹਲਕੇ ਨਾਲ ਇਨਸਾਫ਼ ਦੇ ਵਾਅਦਿਆਂ ਨੂੰ ਬੱਜਟ ਵਿੱਚ ਵਫ਼ਾਂ ਨਹੀਂ ਕਰ ਸਕੇ।

ਲੰਬੀ ਹਲਕੇ ਦੇ ਅਮਰਿੰਦਰ ਸਿੰਘ ਦੇ 43605 ਵੋਟਰਾਂ ’ਚ ਖੁੱਲ੍ਹੇਆਮ ਨਰਾਜਗੀ ਹੈ ਕਿ ਸੱਤਾ ’ਤੇ ਕਾਬਜ਼ ਹੋਣ ਉਪਰੰਤ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਜਾਂ ਉਨ੍ਹਾਂ ਦੇ ਸਪੱੁਤਰ ਰਣਇੰਦਰ ਸਿੰਘ ਨੇ ਲੰਬੀ ਹਲਕੇ ’ਚ ਇੱਕ ਪੈਰ ਪਾਉਣਾ ਵੀ ਜ਼ਰੂਰੀ ਨਹੀਂ ਸਮਝਿਆ। ਲੰਬੀ ਹਲਕੇ ’ਚ ਕਾਂਗਰਸੀ ਸਫ਼ਾਂ ਦੀ ਹਾਲਤ ਬਿਨ੍ਹਾਂ ਛੱਤ ਵਾਲੇ ਮਕਾਨ ਵਾਲੀ ਬਣੀ ਹੋਈ ਹੈ। ਪਿਛਲੇ ਦਿਨ੍ਹੀਂ ਯੁਵਰਾਜ ਰਣਇੰਦਰ ਸਿੰਘ ਗੁਆਂਢੀ ਹਲਕੇ ਗਿੱਦੜਬਾਹਾ ’ਚ ਫੇਰੀ ਪਾ ਕੇ ਪੁੱੱਠੇ ਪਰਤ ਗਏ। 

      ਜ਼ਮੀਨੀ ਹਕੀਕਤ ਹੈ ਕਿ ਲੰਬੀ ਹਲਕੇ ਦੀਆਂ 60 ਫ਼ੀਸਦੀ ਕਾਂਗਰਸੀ ਸਫ਼ਾਂ ਨੂੰ ਅਕਾਲੀ ਦਲ ਚੰਗਾ ਲੱਗਣ ਲੱਗ ਪਿਆ ਹੈ। ਬੀਤੇ ਦਿਨ੍ਹੀਂ ਖੁਦ ਵਿੱਤ ਮੰਤਰੀ ਖੁਦ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਕੋਲ ਲੰਬੀ ’ਚ ਅਗਾਮੀ ਚੋਣਾਂ ’ਚ ਅਕਾਲੀ ਦਲ ਦੀ ਲੀਡ 70 ਹਜ਼ਾਰ ਨੂੰ ਲੰਘਣ ਦੀ ਗੱਲ ਆਖ ਚੁੱਕੇ ਹਨ। ਜ਼ਿਲ੍ਹੇ ਦੀ ਸੁਮੱਚੀ ਅਫਸਰਸ਼ਾਹੀ ਹੁਣ ਵੀ ਬਾਦਲਾਂ ਦੇ ਕਹਿਣੇ ਹੇਠ ਹੈ ਅਤੇ ਪੁਲਿਸ ਅਮਲਾ ਬੇਲਗਾਮੀ ਅਤੇ ਸੈਟਿੰਗਾਂ ਹੇਠ ਚੱਲ ਰਿਹਾ ਹੈ। 

    ਮੌਜੂਦਾ ਮੁੱਖ ਮੰਤਰੀ ਅਤੇ ਵਿੱਤ ਮੰਤਰੀ ਨਾਲ ਜੁੜੇ ਹੋਣ ਕਰਕੇ ਬੱਜਟ ਤੋਂ ਲੰਬੀ ਹਲਕੇ ਨੂੰ ਕਾਫ਼ੀ ਆਸਾਂ ਉਮੀਦਾਂ ਸਨ। ਲੰਬੀ ਹਲਕੇ ਵਿੱਚ ਬੇਰੁਜ਼ਗਾਰੀ ਦੀ ਸਮੱਸਿਆ ਕਾਫ਼ੀ ਗੰਭੀਰ ਹੈ। ਜਿਸ ਨਾਲ ਨਜਿੱਠਣ ਲਈ ਵੱਡੀ ਸਨਅਤ ਸਥਾਪਿਤ ਕਰਨ ਦੀ ਜ਼ਰੂਰਤ ਹੈ। ਆਮ ਲੋਕਾਂ ਦਾ ਕਹਿਣਾ ਹੈ ਕਿ ਅਕਾਲੀ ਸਰਕਾਰ ਸਮੇਂ ਹਲਕੇ ਦਾ ਕਾਫ਼ੀ ਪੇਂਡੂ ਵਿਕਾਸ ਹੋਇਆ। ਲੋਕਾਂ ਦਾ ਜੀਵਨ ਪੱਧਰ ਮੁਫ਼ਤ ਆਟਾ-ਦਾਲ ਅਤੇ 15-20 ਹਜ਼ਾਰ ਦੀਆਂ ਗਰਾਟਾਂ ਤੋਂ ਉੱਪਰ ਨਹੀਂ ਉੱਠ ਸਕਿਆ। ਬੇਰੁਜ਼ਗਾਰੀ ਨੂੰ ਨੱਥ ਪਾਉਣ ਰੁਜ਼ਗਾਰ ਦੇ ਸੁਚੱਜੇ ਮੌਕੇ ਪੈਦਾ ਨਹੀਂ ਹੋ ਸਕੇ। ਹਲਕੇ ਵਿੱਚ ਸਿਹਤ ਸੇਵਾਵਾਂ ਕਾਫ਼ੀ ਮੰਦੀ ਹਾਲਤ ਵਿੱਚ ਹਨ। ਕਸਬਾ ਲੰਬੀ ਅਜੇ ਤੱਕ ਬੱਸ ਅੱਡਾ ਅਤੇ ਦਾਣਾ ਮੰਡੀ ਦੀ ਬੁਨਿਆਦੀ ਸਹੂਲਤ ਤੋਂ ਵਾਂਝਾ ਹੈ। ਪੇਂਡੂ ਹਲਕੇ ਵਿੱਚ ਫਾਇਰ ਬ੍ਰਿਗੇਡ ਸਹੂਲਤ ਵੀ ਨਹੀਂ ਹੈ। ਫਸਲਾਂ ਨੂੰ ਅੱਗ ਲੱਗਣ ਸਮੇਂ ਮਲੋਟ ਅਤੇ ਗਿੱਦੜਬਾਹਾ ਤੋਂ ਸੇਵਾਵਾਂ ਲੈਣੀਆਂ ਪੈਂਦੀਆਂ ਹਨ। ਲੰਬੀ ਦੇ ਸਰਕਾਰੀ ਕਮਿਊਨਿਟੀ ਸਿਹਤ ਕੇਂਦਰ ’ਚ 32 ਲੱਖ ਰੁਪਏ ਨਾਲ ਬਣਿਆ ਪੋਸਟਮਾਰਟਮ ਕੇਂਦਰ ਚਾਰ ਸਾਲ ਬਾਅਦ ਵੀ ਚਾਲੂ ਨਹੀਂ ਹੋ ਸਕਿਆ। ਹਲਕੇ ਦੇ ਬਹੁਗਿਣਤੀ ਪਿੰਡਾਂ ਵਿੱਚ ਛੱਪੜਾਂ ਦੇ ਪਾਣੀ ਦੀ ਨਿਕਾਸੀ ਦੀ ਗੰਭੀਰ ਸਮੱਸਿਆ ਹੈ। ਪ੍ਰਸ਼ਾਸਨ ਅਤੇ ਪੁਲਿਸ ਤੰਤਰ ਸੈਟਿੰਗਾਂ ਦੀ ਲੰਘ ਰਿਹਾ ਹੈ। ਪੁਲੀਸ ਅਤੇ ਅਫਸਰਸ਼ਾਹੀ ਆਰਥਿਕ ਸੈਟਿੰਗਾਂ ਤਹਿਤ ਪੂਰੀ ਬੇਲਗਾਮ ਹੈ।

ਸਿਆਸੀ ਮਾਹਰਾਂ ਦਾ ਕਹਿਣਾ ਹੈ ਕਿ ਸੂਬਾ ਸਰਕਾਰ ਦੇ ਲਗਾਤਾਰ ਦੂਸਰੇ ਬੱਜਟ ਵਿੱਚ ਲੰਬੀ ਹਲਕੇ ਵਿੱਚ ਕੋਈ ਵਿਸ਼ੇਸ਼ ਤਜਵੀਜ਼ ਨਾ ਰੱਖੇ ਜਾਣ ਨਾਲ ਕਾਂਗਰਸ ਸਰਕਾਰ ਦੀ ਲੰਬੀ ਹਲਕੇ ਪ੍ਰਤੀ ਨੀਤੀ ਸਪੱਸ਼ਟ ਹੋ ਗਈ ਹੈ। ਅਮਰਿੰਦਰ ਸਰਕਾਰ ਨੇ ਕਿਸੇ ਨਿੱਜੀ ਸਮਝੌਤੇ ਤਹਿਤ ਲੰਬੀ ਹਲਕੇ ਨੂੰ ਬਾਦਲਾਂ ਦੀ ਝੋਲੀ ਪਾ ਦਿੱਤਾ ਹੈ। ਜ਼ਿਲ੍ਹਾ ਕਾਂਗਰਸ ਸ੍ਰੀ ਮੁਕਤਸਰ ਦੇ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਪੰਜਾਬ ਦੇ ਵਿਗੜੇ ਆਰਥਿਕ ਢਾਂਚੇ ਨੂੰ ਪੈਰਾਂ ਸਿਰ ਕਰਨ ਵਿੱਚ ਜੁਟੇ ਹੋਏ ਹਨ। ਲੰਬੀ ਹਲਕੇ ਵੱਲ ਉਨ੍ਹਾਂ ਦਾ ਪੂਰਾ ਧਿਆਨ ਹੈ ਅਤੇ ਜਿਸਦੇ ਬਿਹਤਰ ਨਤੀਜੇ ਅਗਲੇ ਸਮੇਂ ਵਿੱਚ ਵੇਖਣ ਨੂੰ ਮਿਲਣਗੇ। 98148-26100/93178-26100 

ਹਾਲ-ਏ-ਖਾਕੀ : ‘ਤੁਸੀਂ ਚੋਰ ਭਾਲ ਲਓ ਤੇ ਅਸੀਂ ਫੜ ਲਵਾਂਗੇ

* ਚੋਰੀ ਦੀ ਸ਼ਿਕਾਇਤ ਦੇ 9 ਦਿਨਾਂ ਤੱਕ ਕੋਈ ਪੜਤਾਲ ਨੂੰ ਵੀ ਨਹੀਂ ਪੁੱਜਿਆ

* ਪੀੜਤ ਕਾਂਗਰਸੀ ਦੁਕਾਨਦਾਰ ਚੌਕੀ ਕਿੱਲਿਆਂਵਾਲੀ ਦੇ ਗੇੜ ਮਾਰ-ਮਾਰ ਥੱਕੇ

* ਕੌਮੀ ਸ਼ਾਹ ਰਾਹ-9 ’ਤੇ ਦੋ ਦੁਕਾਨਾਂ ਤੋਂ ਚੋਰੀ ਹੋਈਆਂ ਸਨ 13 ਬੈਟਰੀਆਂ

* 9 ਦਿਨਾਂ ਬਾਅਦ ਦੂਜੀ ਵਾਰ ਪੁਲਿਸ ਦਰਖਾਸਤ ਦਿੱਤੀ ਤਾਂ ਵੀ ਕਾਰਵਾਈ ਨਹੀਂ

* ਜ਼ਿਲ੍ਹਾ ਪੁਲਿਸ ਦਾ ਚੌਕੀ ਪ੍ਰਤੀ ਸੌਫ਼ਟ ਕੌਰਨਰ ਜੱਗਜਾਹਰ

                                                      ਇਕਬਾਲ ਸਿੰਘ ਸ਼ਾਂਤ

ਲੰਬੀ-ਜ਼ਿਲ੍ਹਾ ਪੁਲੀਸ ਸ੍ਰੀ ਮੁਕਤਸਰ ਸਾਹਿਬ ਦੇ ਉੱਚ ਅਧਿਕਾਰੀਆਂ ਅਤੇ ਕਾਂਗਰਸੀ ਮੋਰਾਂ ਵੱਲੋਂ ਸਿਰ ’ਤੇ ਚੜ੍ਹਾਇਆ ਮੰਡੀ ਕਿੱਲਿਆਂਵਾਲੀ ਚੌਕੀ ਦਾ ਅਮਲਾ ਨਸ਼ਾ ਸੌਦਾਗਰਾਂ ਦੇ ਬਾਅਦ ਹੁਣ ਚੋਰਾਂ ਦੀ ਹਮਾਇਤ ਵਿੱਚ ਖੜ੍ਹਿਆ ਜਾਪਦਾ ਹੈ। ਬੇਹੱਦ ਮਾੜੀ ਕਾਰਗੁਜਾਰੀ ਕਾਰਨ ਵਿਵਾਦਾਂ ’ਚ ਘਿਰੀ ਚੌਕੀ ਨੂੰ ਪਿਛਲੇ 9 ਦਿਨਾਂ ਤੋਂ ਦੋ ਦੁਕਾਨਾਂ ’ਤੇ ਹੋਈ ਚੋਰੀ ਦੀ

ਵਾਰਦਾਤ ਵਿਖਾਈ ਨਹੀਂ ਦੇ ਰਹੀਆਂ। ਘਟਨਾ ਵਿੱੱਚ ਕੌਮੀ ਸ਼ਾਹ ਰਾਹ-9 ’ਤੇ ਸਥਿਤ ਦੁਕਾਨਾਂ ਬਾਲਾ ਜੀ ਇਲੈਕਟ੍ਰੀਸ਼ਨ ਅਤੇ ਖੁਸ਼ੀ ਬੈਟਰੀ ਸਰਵਿਸ ਤੋਂ 13 ਟਰੈਕਟਰ ਬੈਟਰੀਆਂ ਚੋਰੀ ਹੋਈਆਂ ਸਨ। ਜਿਨ੍ਹਾਂ ਦੀ 35-40 ਹਜ਼ਾਰ ਦੇ ਕਰੀਬ ਹੈ। ਮਾਮਲਾ ਹੈਰਾਨੀਜਨਕ ਹੈ ਕਿ ਦੋਵੇਂ ਪੀੜਤ ਦੁਕਾਨਦਾਰ ਸੱਤਾ ਪੱਖ ਕਾਂਗਰਸ ਪਾਰਟੀ ਦੇ ਵਰਕਰ ਹਨ। ਕਾਰਵਾਈ ਲਈ ਭਟਕਦੇ ਪੀੜਤ ਅੱਜ ਮੁੜ ਨਵੀਂ ਦਰਖਾਸਤ ਲਿਖਵਾ ਕੇ ਚੌਕੀ ਦੇ ਕੇ ਆਏ। ਜ਼ਿਕਰਯੋਗ ਹੈ ਕਿ ਚੌਕੀ ਅਮਲੇ ਦੀ ਮੰਦੀ ਕਾਰਗੁਜਾਰੀ ਦੇ ਬਾਵਜੂਦ ਜ਼ਿਲ੍ਹਾ ਪੁਲਿਸ ਦਾ ਉਸਦੇ ਪ੍ਰਤੀ ‘ਸਾਫ਼ਟ ਕੌਰਨਰ’ ਦਾ ਅੰਦਰਲਾ ਸੱਚ ਆਮ ਜਨਤਾ ਨੂੰ ਸਾਫ਼-ਸਾਫ਼ ਵਿਖਾਈ ਦੇ ਰਿਹਾ ਹੈ। ਲੋਕਾਂ ਵੱਲੋਂ ਨਸ਼ਿਆਂ ’ਤੇ ਨਾ ਕਾਰਵਾਈ ਬਾਰੇ ਚੌਕੀ ਮੁਖੀ ਸਮੇਤ ਸਾਰਾ ਅਮਲਾ ਬਦਲਣ ਦੀ ਮੰਗ ਬਦਲੇ ਪੁਲੀਸ ਤੰਤਰ ਨੇ ਮੁਨਸ਼ੀ ਲਛਮਣ ਸਿੰਘ ਨੂੰ ਤਬਾਦਲੇ ਦੀ ਬਲੀ ਬੇਵਜ੍ਹਾ ਚੜ੍ਹਾ ਦਿੱਤਾ।

ਕਾਂਗਰਸ ਦੀ ਲੋਕਪੱਖੀ ਸਰਕਾਰ ਦੀ ਹੱਦ ਦਰਜੇ ਦੀ ਮਾੜੀ ਕਾਰਜਪ੍ਰਣਾਲੀ ਹੈ ਕਿ ਪੀੜਤ ਦੁਕਾਨਦਾਰ ਲਿਖਤੀ ਸ਼ਿਕਾਇਤ ਦੇ ਕੇ ਕਾਰਵਾਈ ਲਈ ਚੌਕੀ ਦੇ ਦਰਜਨਾਂ ਗੇੜੇ ਮਾਰ ਚੁੱਕੇ ਹਨ। ਚੋਰਾਂ ਨੂੰ ਫੜਨ ਲਈ ਕਾਰਵਾਈ ਤਾਂ ਮਹਿਜ਼ ਕਾਗਜ਼ੀ ਪੜਤਾਲ ਲਈ ਪੁਲੀਸ ਦਾ ਇੱਕ ਮੁਲਾਜਮ ਵੀ ਨਹੀਂ ਪੁੱਜਿਆ। ਜਦੋਂਕਿ ਸੂਬਾ ਸਰਕਾਰ ਦੇ ਹਾਕਮ ਲੋਕਪੱਖੀ ਰਾਜ ਭਾਗ ਦੇ ਦਾਅਵੇ ਕਰਦੇ ਨਹੀਂ ਥੱਕ ਰਹੇ। ਪੀੜਤ ਦੁਕਾਨਦਾਰ ਅਮਰੀਕ ਸਿੰਘ ਸਿੰਘੇਵਾਲਾ ਅਤੇ ਪ੍ਰਗਟ ਸਿੰਘ ਵਾਸੀ ਲੁਹਾਰਾ ਨੇ ਕਿਹਾ ਕਿ ਉਹ ਇਨਸਾਫ਼ ਲਈ

ਚੌਕੀ ਦੇ ਗੇੜੇ ਮਾਰ ਰਹੇ ਹਨ। ਚੌਕੀ ਦਾ ਅਮਲਾ ਗੱਲ ਸੁਣਨ ਦੀ ਬਜਾਇ ਉਨ੍ਹਾਂ ਨੂੰ ਚੌਕੀਦਾਰ ਰੱਖਣ ਦੀਆਂ ਨਸੀਹਤਾਂ ਦੇ ਤੋਰ ਦਿੰਦਾ ਹੈ। ਜੇਕਰ ਪਰਚਾ ਦਰਜ ਕਰਵਾਉਣਾ ਤਾਂ ਲੰਬੀ ਥਾਣੇ ਜਾਓ।ੇ ਪ੍ਰਗਟ ਸਿੰਘ ਨੇ ਆਖਿਆ ਕਿ ਕਾਂਗਰਸ ਵਰਕਰ ਹੋਣ ਦੇ ਬਾਵਜੂਦ ਪੁਲਿਸ ਅਮਲੇ ਨੇ ਉਨ੍ਹਾਂ ਦਾ ਮਜ਼ਾਕ ਬਣਾ ਰੱਖਿਆ ਹੈ। ਉਨ੍ਹਾਂ ਕਿਹਾ ਕਿ ਸਾਨੂੰ ਚੌਕੀ ਦੇ ਮੁਲਾਜਮ ਆਖਦੇ ਹਨ ਕਿ ਤੁਸੀਂ ਚੋਰ ਭਾਲ ਲਓ ਅਤੇ ਅਸੀਂ ਉਸਨੂੰ ਫੜ ਲਵਾਂਗੇ। ਪ੍ਰਗਟ ਸਿੰਘ ਅਤੇ ਅਮਰੀਕ ਸਿੰਘ ਨੇ ਕਿਹਾ ਕਿ ਵਿਧਾਨਸਭਾ ਚੋਣਾਂ ਸਮੇਂ ਸਟੇਜਾਂ ’ਤੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਲੰਬੀ ਹਲਕੇ ’ਚ ਕਾਂਗਰਸੀਆਂ ਦੇ ਟੌਹਰ ਦੇ ਸੁਫ਼ਨੇ ਵਿਖਾਏ ਸਨ ਪਰ ਇੱਥੇ ਤਾਂ ਚੋਰੀ ਮਾਮਲੇ ਵਿੱਚ ਇਨਸਾਫ਼ ਨਹੀਂ ਮਿਲ ਰਿਹਾ।

ਦੂਜੇ ਪਾਸੇ ਪੁਲੀਸ ਦਾ ਪੱਖ ਜਾਣਨ ਸਮੇਂ ਮੋਬਾਇਲ ’ਤੇ ਪੀੜਤਾਂ ਦੀ ਗੱਲ ਕਰਵਾਏ ਜਾਣ ’ਤੇ ਮਲੋਟ ਦੇ ਐਸ.ਪੀ ਇਕਬਾਲ ਸਿੰਘ ਵੀ ਹੈਰਾਨੀ ਦੇ ਰੌਂਅ ਵਿੱਚ ਆ ਗਏ। ਐਸ.ਪੀ ਨੇ ਕਿਹਾ ਕਿ ਸਵੇਰੇ 9 ਵਜੇ ਏ.ਐਸ.ਆਈ. ਪ੍ਰਿਤਪਾਲ ਸਿੰਘ ਪੜਤਾਲ ਲਈ ਮੌਕੇ ’ਤੇ ਪੁੱਜਣਗੇ। 

ਨਸ਼ਿਆਂ ਦੀਆਂ ਪੁੜੀਆਂ ਨਾਲ ਵਿਕਦੀ ਫਿਰਦੀ ਮਹਾਰਾਜੇ ਦੀ ਗੁਟਕੇ ਵਾਲੀ ਸਹੁੰ

* ਨਸ਼ਾ ਤਸਕਰਾਂ ਦੀ ਪਿੱਠ ਪੂਰਦਾ ਆਉਂਦਾ ਜ਼ਿਲਂਾ ਸ੍ਰੀ ਮੁਕਤਸਰ ਸਾਹਿਬ ’ਚ ਬੇਲਗਾਮ ਖਾਕੀ ਤੰਤਰ 

* ‘ਸੈਟਿੰਗ ਕਲਚਰ’ ਕਾਰਨ ਨਸ਼ਾ ਤਸਕਰੀ, ਜੂਏ-ਸੱਟੇ ਅਤੇ ਜਿਸਮ ਫਰੋਸ਼ੀ ਨੂੰ ਖੁੱਲਂੀਆਂ ਛੂਟਾਂ

* ਦੋ ਮਹੀਨੇ ਪਹਿਲਾਂ ਲੋਕਾਂ ਵੱਲੋਂ ਨਸ਼ਾ ਵਿਕਰੀ ਬਾਰੇ ਜਨਤਕ ਖੁਲਾਸੇ ’ਤੇ ਵੀ ਪੁਲਿਸ ਨੇ ਕਾਰਵਾਈ ਨਹੀਂ ਕੀਤੀ

                                                              ਇਕਬਾਲ ਸਿੰਘ ਸ਼ਾਂਤ

ਡੱਬਵਾਲੀ: ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਨਸ਼ਿਆਂ ਬਾਰੇ ਗੁਟਕੇ ਵਾਲੀ ਸਹੁੰ ਲੰਬੀ ਹਲਕੇ ਦੇ ਪਿੰਡਾਂ ਵਿੱਚ ਨਸ਼ਿਆਂ ਦੀਆਂ ਪੁੜੀਆਂ ਨਾਲ 

ਵਿਕਦੀ ਫਿਰਦੀ ਹੈ। ਕਾਂਗਰਸ ਸਰਕਾਰ ਦੇ ਇੱਕ ਵਰ੍ਹੇ ’ਚ ਨਸ਼ੇ ਮੁੱਕਣ ਦੀ ਬਜਾਇ ਬਾਦਲਾਂ ਦੇ ਜੱਦੀ ਹਲਕੇ ਲੰਬੀ ’ਚ ਡੂੰਘੀਆਂ ਜੜ੍ਹਾਂ ਫੈਲਾ ਚੁੱਕੇ ਹਨ।ਹਲਕੇ ਵਿੱਚ ਸਰਹੱਦੀ ਪਿੰਡ ਕਿੱਲਿਆਂਵਾਲੀ ਮੈਡੀਕਲ ਨਸ਼ਿਆਂ ਅਤੇ ਕੱਖਾਂਵਾਲੀ ਨੂੰ ਹੈਰੋਇਨ ਅਤੇ ਸਮੈਕ ਦੇ ਵੱਡੇ ਗੜ੍ਹ ਬਣ ਚੁੱਕੇ ਹਨ। ਜਿੱਥੋਂ ਆਲੇ-ਦੁਆਲੇ ਖੇਤਰ ’ਚ ਵੱਡੇ ਪੱਧਰ ’ਤੇ ਨਸ਼ਾ ਸਪਲਾਈ ਹੁੰਦਾ ਹੈ। ਹਾਲਾਂਕਿ ਮੰਡੀ ਕਿੱਲਿਆਂਵਾਲੀ, ਫੱਤਾਕੇਰਾ, ਗੱਗੜ, ਮਿਠੜੀ ਬੁੱਧਗਿਰ ਅਤੇ ਬਾਦਲ ਵੀ ਵਗੈਰਾ ਨਸ਼ਾ ਵਿਕਰੀ ’ਚ ਮੋਹਰੀ ਦੱਸੇ ਜਾਂਦੇ ਹਨ। ਸਰਾਵਾਂ ਜੈਲ ਦੇ ਪਿੰਡਾਂ ’ਚ ਨਸ਼ੇ ਵਿਕਣ ਦੀਆਂ ਰਿਪੋਰਟਾਂ ਹਨ। ਨਸ਼ਾ ਸੌਦਾਗਰ ਦੇ ਕੱਚੇ ਮਕਾਨ ਅਤੇ ਕਿਰਾਏ ਦੇ ਘਰਾਂ ਤੋਂ ਕੋਠੀਆਂ-ਬੰਗਲਿਆਂ ’ਚ ਤਬਦੀਲ ਹੋ ਰਹੇ ਹਨ। ਸਭ ਕੁਝ ਤੋਂ ਜਾਣਕਾਰ ਖਾਕੀ ਦੀਆਂ ਅੱਖਾਂ ਬੰਦ ਹਨ। ਖੇਤਰ ’ਚ ਨਸ਼ਾ ਸੌਦਾਗਰਾਂ ਬਾਰੇ ਪੰਜਾਬ ਸਰਕਾਰ ਕੋਲ ਪੱੁੱਜੀਆਂ ਸ਼ਿਕਾਇਤਾਂ ਵੀ ਪੜਤਾਲ ਤਹਿਤ ਸਥਾਨਕ ਪੁਲੀਸ ਦੀਆਂ ਫਾਈਲਾਂ ਹੇਠਾਂ ਦੱਬੀਆਂ ਗਈਆਂ। ਪਿੰਡ ਕਿੱਲਿਆਂਵਾਲੀ ਵਿਚਲੇ ਮੈਡੀਕਲ ਨਸ਼ੇ ਦੇ ਕਾਰੋਬਾਰ ਦਾ ਮੁਖੀ ਇੱਕ ਮੈਡੀਕਲ ਪ੍ਰੈਕਟੀਸ਼ਨਰ ਦੱਸਿਆ ਜਾਂਦਾ ਹੈ। ਜਿਸ ਦੀਆਂ ਖਾਕੀ ਨਾਲ ਲਿਹਾਜ਼ ਸੱਥਾਂ ’ਤੇ ਚਰਚਾ ਵਿੱਚ ਹੈ। 
ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਅੰਦਰ ਬੇਲਗਾਮੀ ਦੇ ਆਲਮ ਹੇਠ ਖਾਕੀ ਤੰਤਰ ਕਥਿਤ ਤੌਰ ’ਤੇ ਨਸ਼ਾ ਤਸਕਰਾਂ ਦੀ ਪਿੱਠ ਪੂਰਦਾ ਨਜ਼ਰ ਆ ਰਿਹਾ ਹੈ। ਨਸ਼ਿਆਂ ਦੇ ਫੈਲਾਅ ਪਿੱਛੇ ਥਾਣੇ-ਚੌਕੀਆਂ ’ਚ ਨਿਯੁਕਤੀ ਲਈ ਪੁਲਿਸ-ਕਮ-ਸਿਆਸੀ ਗੱਠਜੋੜ ਹੇਠ ਪਨਪਦਾ ਕਥਿਤ ਜ਼ਿਲ੍ਹੇ ਅੰੰਦਰ ‘ਸੈਟਿੰਗ ਕਲਚਰ’ ਪ੍ਰਚੱਲਤ ਹੈ। ਇੱਕ ਸਰਹੱਦੀ ਚੌਕੀ ਦੀ ਮੌਜੂਦਾ ਸਮੇਂ ’ਚ ਉਤਾਂਹ ਸੈਟਿੰਗ 85 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਦੀ ਚਰਚਾ ਹੈ। ਅੱਜ-ਕੱਲ੍ਹ ਪੁਲੀਸ ਚੈੱਕ ਪੋਸਟ ਆਧਨੀਆਂ ਨੇੜਲੇ ਪਿੰਡ ਵਿਖੇ ਯੁਵਰਾਜ ਦੇ ਦਰਬਾਰੀ ਦਾ ‘ਦਰਬਾਰ’ ਵੀ ਕਾਫ਼ੀ ਮਸ਼ਹੂਰ ਹੈ। ਜਿਸਦੀ ਪੁਲੀਸ ਸਮੇਤ ਲਗਪਗ ਹਰੇਕ ਵਿਭਾਗ ’ਚ ਅਦਲਾ-ਬਦਲੀ ’ਚ ਸਿੱਧੀ ਦਖ਼ਲਅੰਦਾਜ਼ੀ ਕਾਫ਼ੀ ਮਸ਼ਹੂਰ ਹੈ। ਬੀਤੀ 6 ਜਨਵਰੀ ਨੂੰ ਨਗਰ ਕੀਰਤਨ ਵਿਵਾਦ ਤਹਿਤ ਕਿੱਲਿਆਂਵਾਲੀ ਵਾਸੀਆਂ ਨੇ

ਡੀ.ਐਸ.ਪੀ ਮਲੋਟ ਦੇ ਸਨਮੁੱਖ ਪਿੰਡ ’ਚ ਨਸ਼ਿਆਂ ਦੀ ਖੁੱਲ੍ਹੇਆਮ ਵਿਕਰੀ ’ਚ ਪੁਲਿਸ ਮਿਲੀਭੁਗਤ ਦੇ ਦੋਸ਼ ਲਗਾਏ ਸਨ। ਖਾਕੀ ਤੰਤਰ ਨੇ ਦੋਸ਼ਾਂ ਨੂੰ ਗੰਭੀਰਤਾ ਨਾਲ ਲੈਣ ਦੀ ਬਜਾਇ ਚਾਰ-ਪੰਜ ਹੋਮਗਾਰਡ ਜਵਾਨ ਬਦਲ ਕੇ ਕਾਗਜ਼ਾਂ ਦਾ ਢਿੱਡ ਭਰ ਦਿੱਤਾ। ਡੰਕੇ ਦੀ ਚੋਟ ’ਤੇ ਇਸੇ ਦਰਬਾਰ ਦੀ ‘ਪੌਧ’ ਅਖਵਾਉਂਦੇ ਕਿੱਲਿਆਂਵਾਲੀ ਚੌਕੀ ਮੁਖੀ ਨੂੰ ਅੱਜ ਤੱਕ ਛੇੜਿਆ ਤੱਕ ਨਹੀਂ ਗਿਆ। ਇਸਤੋਂ ਪਹਿਲੇ ਚੌਕੀ ਇੰਚਾਰਜ਼ ਦਾ ਤਬਾਦਲਾ ਜ਼ਿਲ੍ਹਾ ਪੁਲਿਸ ਵੱਲੋਂ ਨਸ਼ਿਆਂ ਬਾਰੇ ਸਿਰਫ਼ ਅਨਜਾਣ ਮੋਬਾਇਲ ਕਾਲ ਨੂੰ ਆਧਾਰ ਬਣਾ ਕਰ ਦਿੱਤਾ ਸੀ। ਹਲਕੇ ਦੀ ਸਥਾਪਿਤ ਕਾਂਗਰਸ ਲੀਡਰਸ਼ਿਪ ਉਕਤ ਦਰਬਾਰ ਦੀਆਂ ਕਾਰਗੁਜਾਰੀਆਂ ’ਤੇ ਕਾਫ਼ੀ ਅੌਖੀ ਹੈ। ਆਮ ਲੋਕਾਂ ਦਾ ਕਹਿਣਾ ਹੈ ਕਿ ਸੈਟਿੰਗ ਕਲਚਰ ਦੇ ਮਹੀਨਾਵਾਰ ਬੋਝ ਵਧਣ ਕਰਕੇ ਮੰਡੀ ਕਿੱਲਿਆਂਵਾਲੀ ਖੇਤਰ ’ਚ ਨਸ਼ਾ ਤਸਕਰੀ, ਜੂਏ-ਸੱਟੇ ਅਤੇ ਜਿਸਮ ਫਰੋਸ਼ੀ ਦੇ ਧੰਦੇ ਨੂੰ ਖੁੱਲ੍ਹੀਆਂ ਛੂਟਾਂ ਮਿਲੀਆਂ ਹੋਈਆਂ ਹਨ। ਸੂਹੀਆ ਵਿਭਾਗ ਨੇ ਕਈ ਵਾਰ ਸੂਬਾ ਹਕੂਮਤ ਨੂੰ ਲੰਬੀ ਹਲਕੇ ਬਾਰੇ ਰਿਪੋਰਟਾਂ ਸਰਕਾਰ ਨੂੰ ਭੇਜੀਆਂ ਗਈਆਂ ਪਰ ਮੋਤੀਆਂ ਵਾਲੀ ਸਰਕਾਰ ਨੂੰ ਪੰਜਾਬ ਨਾਲੋਂ ਪਾਕਿਸਤਾਨ ਦੀ ਵੱਧ ਫ਼ਿਕਰ ਹੈ। 
ਮੌਜੂਦਾ ਹਾਲਾਤਾਂ ਵਿੱਚ ਕੈਪਟਨ ਅਮਰਿੰਦਰ ਸਿੰਘ ਦੀ ਕਾਂਗਰਸ ਦੀ ਨਸ਼ਿਆਂ ਖਿਲਾਫ਼ ਮੁਹਿੰਮ ਜ਼ਮੀਨੀ ਪੱਧਰ ’ਤੇ ਖਾਕੀ ਤੰਤਰ ਦੀ ਜੇਬਾਂ ਭਰਨ ਦਾ ਜਰੀਆ ਬਣੀ ਹੋਈ ਹੈ। ਜਨਤਾ ਨਸ਼ਾਖੋਰੀ ਦੇ ਵਧਦੇ ਪ੍ਰਭਾਵ ਕਾਰਨ ਬੇਹੱਦ ਖੌਫ਼ ’ਚ ਹੈ ਅਤੇ ਨਸ਼ੇਬਾਜ਼ਾਂ ਨੂੰ ਖਾਕੀ-ਸ਼ਹਿ ਹੋਣ ਕਾਰਨ ਜਨਤਾ ਵਿਰੋਧ ਜਤਾਉਣ ਤੋਂ ਡਰਦੀ ਹੈ। ਲੋਕਾਂ ਨੂੰ ਸਾਬਕਾ ਅਕਾਲੀ ਸਰਕਾਰ ਸਮੇਂ ਵਿਗੜਿਆ ਅਖਵਾਉਂਦਾ ਤੰਤਰ ਵੀ ਮੌਜੂਦਾ ਹਾਲਾਤਾਂ ਤੋਂ ਚੰਗਾ ਲੱਗਣ ਲੱਗਿਆ ਹੈ। ਮੰਡੀ ਕਿੱਲਿਆਂਵਾਲੀ ’ਚ ਸਿੰਥੈਅਿਕ ਨਸ਼ੇ ਚਿੱਟੇ ਦੀ ਲੱਤ ’ਚ ਘਿਰ ਕੇ ਕਈ ਰੱਜੇ-ਪੁੱਜੇ ਘਰਾਂ ਆਪਣੇ ਨਸ਼ੇ ਵੇਚਣ ਦੀ ਰਾਹ ਪੈ ਰਹੇ ਹਨ। ਫੱਤਾਕੇਰਾ ਦੇ ਇੱਕ ਬਜ਼ੁਰਗ ਅਨੁਸਾਰ ਪਿਛਲੇ ਛੇ ਮਹੀਨੇ ਤੋਂ ਉਨ੍ਹਾਂ ਦਾ ਪਿੰਡ ਨਸ਼ਿਆਂ ਦਾ ਗੜ੍ਹ ਬਣ ਗਿਆ। ਨਸ਼ਾ ਘਰ-ਘਰ ਸਪਲਾਈ ਹੋ ਰਿਹਾ ਹੈ। ਬਜ਼ੁਰਗ ਨੇ ਦੱਸਿਆ ਕਿ ਕਈ ਅੌਰਤਾਂ ਵੀ ਮੈਡੀਕਲ ਨਸ਼ਾ ਕਰਨ ਲੱਗੀਆਂ ਹਨ। ਬਜ਼ੁਰਗ ਨੇ ਆਖਿਆ ਕਿ ਪੁਲੀਸ ਚੌਕੀ ’ਚ ਸ਼ਿਕਾਇਤ ਕੀਤੀ ਤਾਂ ਪੁਲਿਸ ਨਸ਼ੇ ਵਿਕਣ ਦੀ ਗੱਲ ਝੂਠ ਦੱਸ ਕੇ ਟਾਲਾ ਵੱਟ ਗਈ। ਫੱਤਾਕੇਰਾ ਦੇ ਇੱਕ ਹੋਰ ਕਿਸਾਨ ਨੇ ਦੱਸਿਆ ਕਿ ਨਸ਼ਿਆਂ ਖਿਲਾਫ਼ ਕਾਰਵਾਈ ਲਈ ਉਹ ਤਿੰਨ ਹਫ਼ਤੇ ਤੱਕ ਵਿਸ਼ੇਸ਼ ਟਾਸਕ ਫੋਰਸ ਦੇ ਸੰਪਰਕ ਵਿੱਚ ਰਹੇ। ਤਸਕਰਾਂ ਦੀ ਸਫ਼ਲ ਰੈਕੀ ਅਤੇ ਨਸ਼ੇ ਤੱਕ ਖਰੀਦ ਕੇ ਲਿਆ ਦੇਣ ਬਾਅਦ ਐਸ.ਟੀ.ਐਫ਼ ਨੇ ਕਾਰਵਾਈ ਨਹੀਂ ਕੀਤੀ। ਹੁਣ ਨਸ਼ਿਆਂ ਦੇ ਖਾਤਮੇ ਦੀ ਉਮੀਦ ਰੱਬ ਦੇ ਆਸਰੇ ਹੈ। ਗੱਗੜ ਵਿਖੇ 4-5 ਅੌਰਤਾਂ ਨਸ਼ਿਆਂ ਦੀ ਸਪਲਾਇਰ ਹਨ। ਮਿਠੜੀ ਬੁੱਧਗਿਰ ’ਚ ਮੈਡੀਕਲ ਨਸ਼ਾ ਵਿਕ ਰਿਹਾ ਹੈ। ਆਮ ਆਦਮੀ ਪਾਰਟੀ ਆਗੂ ਨੇ ਆਖਿਆ ਕਿ ਸਿੰਘੇਵਾਲਾ ਨੇੜੇ ਨਸ਼ੇ ਸਮੇਤ ਫੜੇ ਨੌਜਵਾਨ ਨੂੰ ਐਸ.ਟੀ.ਐਫ਼ ਨੇ ਦਸ ਹਜ਼ਾਰ ਰੁਪਏ ਲੈ ਕੇ ਛੱਡ ਦਿੱਤਾ। ਕੈਪਟਨ ਦੀ ਨਸ਼ਿਆਂ ਖਿਲਾਫ਼ ਸਹੁੰ ਦੀ ਪੋਲ ਖੋਲ੍ਹ ਦਿੱਤੀ ਹੈ। ਪਿੰਡ ਕਿੱਲਿਆਂਵਾਲੀ ਦੇ ਕਿਸਾਨ ਕੁਲਦੀਪ ਸਿੰਘ ਬਿੱਲਾ, ਕੁਲਬੀਰ ਸਿੰਘ, ਹਰਜਿੰਦਰ ਸਿੰਘ, ਰਣਧੀਰ ਸਿੰਘ, ਚਰਨਜੀਤ ਸਿੰਘ, ਅਮਰਪਾਲ ਸਿੰਘ, ਰਾਜਿੰਦਰ ਸਿੰਘ, ਕੁਲਦੀਪ ਸਿੰਘ, ਗੁਰਮੀਤ ਸਿੰਘ ਨੇ ਆਖਿਆ ਕਿ ਡੀ.ਐਸ.ਪੀ ਭੁਪਿੰਦਰ ਸਿੰਘ ਦੇ ਸਨਮੁੱਖ ਪਿੰਡ ’ਚ ਪੁਲੀਸ ਮਿਲੀਭੁਗਤ ਨਾਲ ਨਸ਼ੇ ਵਿਕਣ ਦਾ ਖੁਲਾਸਾ ਕੀਤਾ ਗਿਆ ਸੀ। ਕੁਲਦੀਪ ਸਿੰਘ ‘ਬਿੱਲਾ’ ਅਨੁਸਾਰ ਪਿੰਡ ਨੇ ਚੌਕੀ ਮੁੱਖੀ ਸਮੇਤ ਸਾਰਾ ਸਟਾਫ਼ ਬਦਲਣ ਦੀ ਮੰਗ ਕੀਤੀ ਸੀ ਪਰ ਦਦਰਬਾਰ’ ਦੇ ਹੁਕਮਾਂ ਕਾਰਨ ਜ਼ਿਲ੍ਹਾ ਪੁਲੀਸ ਨੇ ਸਿਰਫ਼ ਚਾਰ ਹੋਮਗਾਰਡ ਮੁਲਾਜਮ ਬਦਲ ਕੇ ਬੁੱਤਾ ਸਾਰ ਦਿੱਤਾ, ਜਦੋਂਕਿ ਅਸਲ ਜੜ੍ਹਾਂ ਨੂੰ ਛੇੜਿਆ ਤੱਕ ਨਹੀਂ ਗਿਆ। ਉਨ੍ਹਾਂ ਆਖਿਆ ਕਿ ਕਿੱਲਿਆਂਵਾਲੀ ਪੁਲਿਸ ਨੂੰ ਖੇਤਰ ਦੇ ਪਤਵੰਤੇ ਵਿਅਕਤੀਆਂ ਦੇ ਨਾਂਅ ਨਹੀਂ ਪਤਾ, ਪਰ ਨਸ਼ੇ ਦੇ ਸਾਰੇ ਸੌਦਾਗਰਾਂ ਦੀ ਸੂਚੀ ਦਿਲ ’ਤੇ ਛਪੀ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਡੀ.ਐਸ.ਪੀ ਨੇ ਪਿੰਡ ਗੋਦ ਲੈ ਨਸ਼ਾਮੁਕਤ ਕਰਨ ਦੀ ਗੱਲ ਆਖੀ ਪਰ ਅੱਜ ਤੱਕ ਨਸ਼ਿਆਂ ਖਿਲਾਫ਼ ਕੋਈ ਕਾਰਵਾਈ ਨਹੀਂ ਕੀਤੀ ਗਈ, ਸਗੋਂ ਨਸ਼ਿਆਂ ਦਾ ਫੈਲਾਅ ਹੋਰ ਵਧ ਗਿਆ।

  ਸਖ਼ਤ ਕਾਰਵਾਈ ਕਰਕੇ ਮਾਹੌਲ ਨੂੰ ਸੁਧਾਰਾਂਗੇ

ਪੁਲਿਸ ’ਚ ਸੈਟਿੰਗ ਕਲਚਰ ਅਤੇ ਨਸ਼ਿਆਂ ਬਾਰੇ ਪੁਲੀਸ ਰੇਂਜ ਬਠਿੰਡਾ ਦੇ ਆਈ.ਜੀ ਸ੍ਰੀ ਐਮ.ਐਸ ਛੀਨਾ ਨੇ ਆਖਿਆ ਕਿ ਮਾਮਲਾ ਹੁਣ ਧਿਆਨ ਵਿੱਚ ਆਇਆ ਹੈ। ਸਖ਼ਤ ਕਾਰਵਾਈ ਕਰਕੇ ਮਾਹੌਲ ਨੂੰ ਸੁਧਾਰਿਆ ਜਾਵੇਗਾ। ਜ਼ਿਲਂਾ ਸ੍ਰੀ ਮੁਕਤਸਰ ਦੇ ਹਾਲਾਤਾਂ ਬਾਰੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਮੀਡੀਆ ਸਲਾਹਕਾਰ ਰਵੀਨ ਠੁਕਰਾਲ ਦਾ ਕਹਿਣਾ ਸੀ ਕਿ ਸਰਕਾਰ ਵੱਲੋਂ ਸਭ ਕੁਝ ਦਰੁੱਸਤ ਕਰਨ ਲਈ ਕਾਰਵਾਈ ਕੀਤੀ ਜਾਵੇਗੀ। 

 ਜਨਤਾ ਖੁੱਲਂ ਕੇ ਐਸ.ਟੀ.ਐਫ਼. ਨੂੰ ਸਾਥ ਦੇਵੇ

ਐਸ.ਟੀ.ਐਫ਼ ਦੇ ਏ.ਡੀ.ਜੀ.ਪੀ ਹਰਪ੍ਰੀਤ ਸਿੰਘ ਸਿੱਧੂ ਨੇ ਨਸ਼ਿਆਂ ਖਿਲਾਫ਼ ਜਨਤਾ ਖੁੱਲਂ ਕੇ ਸਾਹਮਣੇ ਆਵੇ ਅਤੇ ਪੰਜਾਬ ਨੂੰ ਨਸ਼ਾਮੁਕਤ ਕਰਨ ਲਈ ਐਸ.ਟੀ.ਐਫ਼. ਨੂੰ ਪੂਰਾ ਸਾਥ ਦੇਵੇ। 

ਚੌਧਰੀਆਂ ਬਿਨ੍ਹਾਂ ਸਿਰੇ ਨਹੀਂ ਚੜ੍ਹਨੀ ਸਰਦਾਰਾਂ ਦੀ ਰਾਸ਼ਟਰੀ ਪਾਰਟੀ ਵਾਲੀ ਰੀਝ

                                                        ਇਕਬਾਲ ਸਿੰਘ ਸ਼ਾਂਤ 
ਡੱਬਵਾਲੀ : ਅਕਾਲੀ ਦਲ (ਬਾਦਲ) ਨੂੰ ਰਾਸ਼ਟਰੀ ਬਣਨ ਲਈ ਹਰਿਆਣੇ ਵਿੱਚ ਆਪਣੀ ਸਿਆਸਤ ਦੀ ਪਰਵਾਜ਼ ਚੌਟਾਲਿਆਂ ਦੇ ਸਹਾਰੇ ਵਗੈਰ ਅਸਮਾਨੀਂ ਚੜ੍ਹਦੀ ਨਹੀਂ ਵਿਖਦੀ। ਪਾਰਟੀ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਵੱਲੋਂ ਹਰਿਆਣਵੀ ਮੈਦਾਨ ’ਚ ਤੱਕੜੀ ਚੋਣ ਨਿਸ਼ਾਨ ’ਤੇ ਸਿਆਸੀ ਜ਼ੋਰ-ਅਜਮਾਇਸ਼ ਦੇ ਐਲਾਨ ਉਸਨੂੰ ਇਨੈਲੋ ਦੀ ਸਿਆਸੀ ਜ਼ਮੀਨ ਹੰਢਿਆ-ਵਰਤਿਆ

ਬ੍ਰਹਮ-ਅਸਤਰ ਜਾਪ ਰਿਹਾ ਹੈ। ਦੇਸ਼ ਵਿੱਚ ਇਸ ਸਮੇਂ ਕਾਂਗਰਸ, ਭਾਜਪਾ, ਸੀ.ਪੀ.ਆਈ. (ਐਮ.), ਸੀ.ਪੀ.ਆਈ, ਬਹੂਜਨ ਸਮਾਜ ਪਾਰਟੀ, ਤ੍ਰਿਣਮੂਲ ਕਾਂਗਰਸ ਅਤੇ ਨੈਸ਼ਨਲਿਸਟ ਕਾਂਗਰਸ ਪਾਰਟੀ ਆਦਿ ਨੈਸ਼ਨਲ ਪਾਰਟੀਆਂ ਦੀ ਸੂਚੀ ਵਿੱਚ ਦਰਜ ਹਨ। ਜਦੋਂਕਿ ਦੇਸ਼ ਖੇਤਰੀਆਂ ਪਾਰਟੀਆਂ ਦੀ ਸੂਚੀ ਵਿੱਚ ਅਕਾਲੀ ਦਲ, ਇਨੈਲੋ, ਆਮ ਆਦਮੀ ਪਾਰਟੀ ਸਮੇਤ ਤਕਰੀਬਨ 50 ਪਾਰਟੀਆਂ ਹਨ। 
     ਬੀਤੇ ਕੱਲ੍ਹ ਅਕਾਲੀ ਦਲ ਦੇ ਸਰਪ੍ਰਸਤ ਅਤੇ ਸਾਬਕਾ ਮੁੱਖ ਪ੍ਰਕਾਸ਼ ਸਿੰਘ ਬਾਦਲ ਨੇ ਤੇਜਾਖੇੜਾ ਫਾਰਮ ਹਾਊਸ ’ਤੇ ਇਨੈਲੋ ਸੁਪਰੀਮੋ ਚੌਧਰੀ ਓਮ ਪ੍ਰਕਾਸ਼ ਚੌਟਾਲਾ ਨਾਲ ਮੁਲਾਕਾਤ ਕੀਤੀ। ਇਸ ਮੌਕੇ ਹਰਿਆਣਾ ਵਿਧਾਨਸਭਾ ਵਿੱਚ ਵਿਰੋਧੀ ਧਿਰ ਦੇ ਆਗੂ ਅਭੈ ਸਿੰਘ ਚੌਟਾਲਾ ਵੀ ਮੌਜੂਦ ਸਨ। ਪਾਣੀਆਂ ਦੇ ਮਸਲੇ ’ਤੇ ਦੋਵੇਂ ਪਾਰਟੀਆਂ ’ਚ ਵਿਚਾਰਕ ਦੂਰੀਆਂ ਵਿਖ ਰਹੀਆਂ ਹਨ ਪਰ ਚੌਟਾਲੇ ਅਤੇ ਬਾਦਲ ਪਰਿਵਾਰ ਪੱਖੋਂ ਬੇਹੱਦ ਨੇੜੇ ਹਨ। ਜੱਗਜਾਹਰ ਹੈ ਕਿ ਅਕਾਲੀ ਦਲ ਰਾਸ਼ਟਰੀ ਪਾਰਟੀਆਂ ਵਾਲੀ ਸੂਚੀ ’ਚ ਆਉਣ ਲਈ ਹਰਿਆਣੇ ’ਚ ਆਪਣੇ ਰਵਾਇਤੀ ਭਾਈਵਾਲ ਨਾਲ ਇਨੈਲੋ ਨਾਲ ਮੁੜ ਸਿਆਸੀ ਸਾਂਝ ਦੀ ਫਿਰਾਕ ਵਿੱਚ ਹੈ।

ਅਕਾਲੀ ਦਲ ਨੂੰ ਰਾਸ਼ਟਰੀ ਪਾਰਟੀ ਦਰਜੇ ਵਾਲੀ ਰੀਝ ਸੁਖਬੀਰ ਸਿੰਘ ਬਾਦਲ ਦੇ ਮਨ ਵਿੱਚ ਕਾਫ਼ੀ ਪੁਰਾਣੀ ਦੱਸੀ ਜਾਂਦੀ ਹੈ। ਹੁਣ ਵਿਹਲਾ ਸਮਾਂ ਹੋਣ ਕਰਕੇ ਉਹ ਇਸ ਕਾਰਜ ਨੇਪਰੇ ਚਾੜ੍ਹਨਾ ਚਾਹੁੰਦੇ ਹਨ। ਦੂਜੇ ਪਾਸੇ ਹਰਿਆਣੇ ਵਿੱਚ ਸੱਤਾ ਵਾਪਸੀ ਸੰਘਰਸ਼ਸ਼ੀਲ ਇੰਡੀਅਨ ਨੈਲਸ਼ਨ ਲੋਕਦਲ ਦਾ ਪਾਣੀਆਂ ਦੇ ਵਿਵਾਦ ਤਹਿਤ ਅਕਾਲੀ ਦਲ ਨਾਲੋਂ ਆਪਣੀ ਸਿਆਸੀ ਦੂਰੀ ਦਰਸਾਉਣਾ ਸਿਆਸੀ ਮਜ਼ਬੂਰੀ ਹੈ। ਕਣਸੋਆਂ ਹਨ ਹੈ ਕਿ ਇਸ ਮੁਲਾਕਾਤ ਮੌਕੇ ਲੋਕਸਭਾ ਚੋਣਾਂ ਅਤੇ ਅਕਾਲੀ ਦਲ ਦੀ ਹਰਿਆਣੇ ਵਿੱਚ ਸਿਆਸੀ ਸਰਗਰਮੀਆਂ ’ਤੇ ਚਰਚਾ ਹੋਈ ਹੈ। ਹਾਲਾਂਕਿ ਪਰਿਵਾਰਕ ਸੂਤਰਾਂ ਨੇ ਬਾਦਲ-ਚੌਟਾਲਾ ਮਿਲਣੀ ਨੂੰ ਆਮ ਪਰਿਵਾਰਕ ਮੁਲਾਕਾਤ ਦੱਸਿਆ। ਇਸ  ਮੌਕੇ ਦੇਸ਼ ਵਿੱਚ ਕਿਰਸਾਨੀ ਦੀ ਮਾੜੀ ਹਾਲਤ ਤੋਂ ਲੈ ਕੇ ਨੀਰਵ ਮੋਦੀ ਵਾਲੇ ਪੀ.ਐਨ.ਬੀ ਘਪਲੇ ਬਾਰੇ ਵੀ ਚਰਚਾ ਕੀਤੀ ਗਈ। ਦੇਸ਼ ਦੀ ਸਿਆਸਤ ’ਚ ਵਿਸ਼ੇਸ਼ ਮੁਕਾਮ ਰੱਖਦੇ ਦੋਵੇਂ ਸਿਆਸੀ ਧੁਰੰਧਰ

ਲਗਪਗ ਸਵਾ ਘੰਟੇ ਤੱਕ ਇਕੱਠ ਰਹੇ। ਦੱਸਣਯੋਗ ਹੈ ਕਿ ਕਾਲਾਂਵਾਲੀ (ਰਾਖਵੇਂ) ਹਲਕੇ ਤੋਂ ਅਕਾਲੀ ਦਲ ਦੀ ਟਿਕਟ ’ਤੇ ਬਲਕੌਰ ਸਿੰਘ (ਇਨੈਲੋ ਆਗੂ) ਵੀ ਇਨੈਲੋ ਦੇ ਵੋਟ ਬੈਂਕ ਸਹਾਰੇ ਵਿਧਾਇਕ ਚੁਣੇ ਗਏ। ਇਸਦੇ ਇਲਾਵਾ ਸ਼ੋ੍ਰਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਚੋਣਾਂ ਵਿੱਚ ਡੱਬਵਾਲੀ ਹਲਕੇ ਤੋਂ ਇਨੈਲੋ ਵਰਕਰ ਜਗਸੀਰ ਸਿੰਘ ਮਾਂਗੇਆਣਾ ਅਕਾਲੀ ਦਲ ਦੀ ਟਿਕਟ ’ਤੇ ਮੈਂਬਰ ਚੁਣੇ ਗਏ ਸਨ। ਹਰਿਆਣੇ ਦੀ ਵੱਖਰੀ ਗੁਰਦੁਆਰਾ ਕਮੇਟੀ ਖਿਲਾਫ਼ ਸੁਪਰੀਮ ਕੋਰਟ ਵਿੱਚ ਕੇਸ ਲਿਜਾਣ ਕਰਕੇ ਅਕਾਲੀ ਦਲ ਖਿਲਾਫ਼ ਹਰਿਆਣਵੀ ਸਿੱਖਾਂ ਵਿੱਚ ਜ਼ਮੀਨੀ ਪੱਧਰ ’ਤੇ ਕਾਫ਼ੀ ਰੋਸ ਹੈ। ਅਕਾਲੀ ਦਲ ਨੂੰ ਪਤਾ ਹੈ ਕਿ ਇਸ ਰੋਸੇ ਨੂੰ ਇਨੈਲੋ ਦੇ ਵੋਟ ਬੈਂਕ ਸਹਾਰੇ ਨਜਿੱਠਿਆ ਜਾ ਸਕਦਾ ਹੈ।