24 March 2017

ਸਿਆਸੀ ਭਲਵਾਨਾਂ ਦੇ ਪਿੰਡ ਬਾਦਲ ’ਚ ਸੁਰਾਂ ਦੇ ਜਾਦੂਗਰਾਂ ਦਾ ਵਾਸਾ

* ਕਲੀਆਂ ਦੇ ਬਾਦਸ਼ਾਹ ਦੇ ਭਾਣਜੇ ਦਾ ਪੁੱਤ ‘ਖੁਦਾ ਬਖ਼ਸ਼’ ਇੰਡੀਅਨ ਆਈਡਲ ਸ਼ੋਅ ਦੇ ਫਾਈਨਲ ’ਚ
* ਖੁਦਾ ਬਖ਼ਸ਼ ਦੀ ਭੈਣ ਅਫਸਾਨਾ ਕਲਰਜ਼ ਟੀ.ਵੀ ਦੇ ਰਾਇਜਿੰਗ ਸਟਾਰ ਸ਼ੋਅ ’ਚ ਟੌਪ 14 ’ਚ
* ਸ਼ੋਅ ਦੀ ਸ਼ੂਟਿੰਗ ਲਈ ਪਿੰਡ ਬਾਦਲ ਪੁੱਜਣ ’ਤੇ ਲੋਕਾਂ ਨੇ ਮੋਢਿਆਂ ’ਤੇ ਚੁੱਕਿਆ


ਇਕਬਾਲ ਸਿੰਘ ਸ਼ਾਂਤ
         ਲੰਬੀ: ਸਿਆਸੀ ਭਲਵਾਨਾਂ ਦੀ ਜਰਖ਼ੇਜ਼ ਧਰਤੀ ਪਿੰਡ ਬਾਦਲ ’ਤੇ ਸੁਰਾਂ ਦੇ ਜਾਦੂਗਰਾਂ ਦਾ ਵੀ ਵਾਸਾ ਹੈ। ਇੱਥੋਂ ਦੇ ਗਰੀਬ ਪਰਿਵਾਰ ਦਾ ਨੌਜਵਾਨ ਖੁਦਾ ਬਖ਼ਸ਼ ਸੋਨੀ ਟੀ.ਵੀ ਦੇ ਗਾਇਕੀ ਮੁਕਾਬਲਿਆਂ ਦੇ ਇੰਡੀਅਨ ਆਈਡਲ ਸ਼ੋਅ ਦੇ ਫਾਈਨਲ ’ਚ ਪੁੱਜ
ਗਿਆ ਹੈ। ਉਸਦੀ ਭੈਣ ਅਫਸਾਨਾ ਕਲਰਜ਼ ਟੀ.ਵੀ ਦੇ ਰਾਇਜਿੰਗ ਸਟਾਰ ਸ਼ੋਅ ’ਚ ਟੌਪ 14 ’ਚ ਪੁੱਜ ਚੁੱਕੀ ਹੈ। ਟੀ.ਵੀ. ਸ਼ੋਅ ਨਾਲ ਕਰੋੜਾਂ ਦਰਸ਼ਕਾਂ ਦੀ ਖਿੱਚ ਦਾ ਕੇਂਦਰ ਬਣਿਆਂ ਖੁਦਾ ਬਖ਼ਸ਼, ਕਲੀਆਂ ਦੇ ਬਾਦਸ਼ਾਹ ਕੁਲਦੀਪ ਮਾਣਕ ਦੇ ਸਕੇ ਭਾਣਜੇ ਗਾਇਕ ਸੀਰਾ ਖ਼ਾਨ ਦਾ ਫਰਜੰਦ ਹੈ। ਸੀਰਾ ਖ਼ਾਨ ਦੀ ਮਾਂ ਰਸੀਦਾ ਬੇਗਮ ਕੁਲਦੀਪ ਮਾਣਕ ਦੀ ਸਕੀ ਭੈਣ ਹੈ। ਗਾਇਕੀ ਰਾਹੀਂ ਛੋਟੀ ਉਮਰੇ ਮਕਬੂਲੀਅਤ ਦੀ ਵੱਡੀ ਦਾਤ ਹਾਸਲ ਕਰਨ ਵਾਲਾ ਖੁਦਾ ਬਖ਼ਸ਼ ਖੇਤਰ ਦਾ ਪਹਿਲਾ ਗਾਇਕ ਹੈ।
           ਉਸਦੇ ਪਿਤਾ ਮਰਹੂਮ ਗਾਇਕ ਸੀਰਾ ਖ਼ਾਨ ਨੇ 2003 ਤੱਕ ਆਪਣੀ ਪਤਨੀ ਆਸ਼ਾ ਬੇਗਮ ਨਾਲ ਦੋਗਾਣਿਆਂ ’ਚ ਕਾਫ਼ੀ ਮਕਬੂਲੀਅਤ ਖੱਟੀ ਸੀ। ਇਸ ਦੋਗਾਣਾ ਜੋੜੀ ਨੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਜਲਸਿਆਂ ਵਿੱਚ ਖੂਬ ਗਾਇਆ। 21 ਸਾਲਾ ਖੁਦਾ ਬਖ਼ਸ਼ ਦੀ ਮਾਂ ਆਸ਼ਾ ਖ਼ਾਨ ਨੇ ਇੱਕ ਪੁੱਤਰ ਤੇ 5 ਧੀਆਂ ਨੂੰ ਬਾਦਲ
ਖ਼ਾਨਦਾਨ ਦੇ ਘਰਾਂ ਵਿੱਚ ਘਰੇਲੂ ਕੰਮਕਾਜ਼ ਕਰਕੇ ਪਰਵਾਣ ਚੜ੍ਹਾਇਆ। ਬੱਚਿਆਂ ਦੇ ਪਾਲਣ-ਪੋਸ਼ਣ ਲਈ ਆਸ਼ਾ ਬੇਗਮ ਨੇ ਗੁਰਦੁਆਰੇ ’ਚ ਰੋਟੀਆਂ ਵੀ ਪਕਾਈਆਂ। 3 ਧੀਆਂ ਰਜੀਆ ਸੁਲਤਾਨ, ਰਫ਼ਤਾਰ ਤੇ ਅਫਸਾਨਾ ਗਾਇਕੀ ਨੂੰ ਕਿੱਤੇ ਪੱਖੋਂ ਅਪਣਾ ਚੁੱਕੀਆਂ ਹਨ। ਰਫ਼ਤਾਰ ਕੌਰ ਦਾ ਗੋਇਲ ਮਿਊਜਿਕ ਕੰਪਨੀ ਵੱਲੋਂ ਕੈਸਿਟ ਆ ਚੁੱਕੀ ਹੈ। ਅਫਸਾਨਾ ਖ਼ਾਨ 2013 ’ਚ ਵੋਇਸ ਆਫ਼ ਪੰਜਾਬ ਮੁਕਾਬਲੇ ਵਿੱਚ ਟੋਪ-5 ਵਿੱਚ ਰਹਿ ਚੁੱਕੀ ਹੈ। ਖੁਦਾ ਬਖ਼ਸ਼ ਫਾਈਨਲ ਮੁਕਾਬਲੇ ’ਚ ਪੁੱਜਣ ਮਗਰੋਂ ਕੱਲ੍ਹ ਰਾਤ ਪਿੰਡ ਬਾਦਲ ਪੁੱਜਿਆ। ਸ਼ੋਅ ਦਾ ਫਾਈਨਲ 2 ਅਪਰੈਲ ਨੂੰ ਹੋਣਾ ਹੈ। ਕੱਲ੍ਹ ਰਾਤ 9 ਵਜੇ ਖੁਦਾ ਬਖ਼ਸ਼ ਨੂੰ ਬਠਿੰਡਾ ਤੋਂ ਕਾਰਾਂ ਦੇ ਕਾਫ਼ਲੇ ਵਿੱਚ ਢੋਲ ਢਮੱਕੇ ਨਾਲ ਪਿੰਡ ਲਿਆਂਦਾ ਗਿਆ।
ਦਿਲ ਖਿੱਚਵੀਂ ਆਵਾਜ਼ ਰਾਹੀਂ ਮਕਬੂਲ ਹੋਏ ਖੁਦਾ ਬਖ਼ਸ਼ ਨੂੰ ਕੱਲ੍ਹ ਰਾਤ ਪਿੰਡ ਵਾਸੀ ਮੋਢਿਆਂ ’ਤੇ ਚੁੱਕੀ ਫਿਰਦੇ ਰਹੇ ਅਤੇ ਪਿੰਡ ’ਚ ਮੇਲੇ ਦਾ ਮਾਹੌਲ ਬਣਿਆ ਹੋਇਆ ਹੈ। ਅੱਜ ਪਿੰਡ ਦੇ ਦਸਮੇਸ਼ ਵਿੱਦਿਅਕ ਅਦਾਰੇ ’ਚ ਉਸਦਾ ਸਨਮਾਨ ਵੀ ਕੀਤਾ ਗਿਆ। ਸੈਲਫ਼ੀਆਂ ਦੇ ਸ਼ੌਕੀਨਾਂ ਨੇ ਫੋਟੋਆਂ ਖਿਚਵਾ ਕੇ ਫੇਸਬੁੱਕ ’ਤੇ ਅਪਲੋਡ ਕਰਨ ਦੀ ਧੁੱਕੀ ਕੱਢੀ ਹੋਈ ਹੈ। ਫਾਈਨਲ ਮੁਕਾਬਲੇ ਲਈ ਖੁਦਾ ਬਖ਼ਸ਼ ਦੀ ਬਾਦਲ ’ਚ ਵੱਖ-ਵੱਖ ਲੋਕੇਸ਼ਨਾਂ ’ਤੇ ਸ਼ੂਟਿੰਗ ਹੋਈ। ਖੁਦਾ ਬਖਸ਼ ਦਾ ਕਹਿਣਾ ਹੈ ਕਿ ਉਸ ਦੇ ਮਰਹੂਮ ਪਿਤਾ ਗਾਇਕ ਸੀਰਾ ਖਾਨ ਦਾ ਸੁਫ਼ਨਾ ਸੀ ਕਿ ਖੁਦਾ ਬਖ਼ਸ਼ ਮੁੰਬਈ ਜਾ ਕੇ ਗਾਇਕੀ ਦੇ ਖੇਤਰ ਵਿੱਚ ਨਾਮ ਕਮਾਵੇ, ਉਹ ਸੁਪਨਾ ਅੱਜ ਪੂਰਾ ਹੋ ਰਿਹਾ ਹੈ। ਖੁਦਾ ਬਖ਼ਸ਼ ਗਾਇਕੀ ਉਨ੍ਹਾਂ ਦੇ ਪਰਿਵਾਰ ਦੇ ਖੂਨ ਵਿੱਚ
ਹੀ ਹੈ। ਉਨ੍ਹਾਂ ਦੇ ਪਿਤਾ ਗਾਇਕ ਸਨ, ਉਹ ਵੀ ਗਾਇਕ ਹੈ ਅਤੇ ਭੈਣਾਂ ਵੀ ਗਾਇਕ ਹਨ। ਪਰ ਗਰੀਬੀ ਦੇ ਚੱਲਦੇ ਕਦੇ ਇਸ ਖੇਤਰ ਵਿੱਚ ਅੱਗੇ ਵਧਣ ਦਾ ਮੌਕਾ ਨਾ ਮਿਲ ਸਕਿਆ ਸੀ। ਆਪਣੀ ਜਿੱਤ ਪੂਰੀ ਤਰ੍ਹਾ ਆਸਵੰਦ ਖੁਦਾ ਬਖ਼ਸ਼ ਅਨੁਸਾਰ ਉਹ ਆਪਣੀ ਮਾਤਾ ਦੀ ਮਿਹਨਤ ਸਦਕਾ ਇਸ ਮੁਕਾਮ ’ਤੇ ਪੁੱਜਿਆ ਹੈ। ਆਸ਼ਾ ਖ਼ਾਨ ਨੇ ਕਿਹਾ ਕਿ ਕੁਦਰਤ ਨੇ ਉਨ੍ਹਾਂ
ਦੀ ਸੁਣ ਲਈ ਹੈ ਖੁਦਾ ਬਖ਼ਸ਼ ਅਤੇ ਅਫਸਾਨਾ ਪਿੰਡ ਬਾਦਲ ਅਤੇ ਪੂਰੇ ਪੰਜਾਬ ਦਾ ਨਾਂਅ ਅਵਾਜ਼ ਦੀ ਦੁਨੀਆਂ ’ਚ ਰੌਸ਼ਨ ਕਰਨਗੇ।

    ਫਾਈਨਲ ’ਚ ਭਿੜਨਗੇ ਖੁਦਾ ਬਖ਼ਸ਼ ਨਾਲ ਰੋਹਿਤ ਤੇ ਏਲਵੀ

ਇੰਡੀਅਨ ਆਈਡਲ ਸ਼ੋਅ ਵਿੱਚ ਮਾਲਵਿਕਾ ਸੁੰਦਰ ਦੇ ਮੁਕਾਬਲੇ ਤੋਂ ਬਾਹਰ ਹੋਣ ਮਗਰੋਂ ਪਿੰਡ ਬਾਦਲ ਦਾ ਖੁਦਾ ਬਖਸ਼, ਵਿਸ਼ਾਖਾਪਟਨਮ ਦਾ ਏਲਵੀ ਰੇਵੰਤ ਅਤੇ ਹੈਦਰਾਬਾਦ ਦਾ ਪੀ.ਵੀ.ਐਨ.ਐਸ ਰੋਹਿਤ ਹੁਣ ਟੌਪ ਥ੍ਰੀ ਵਿੱਚ ਬਾਕੀ ਹਨ। ਇਨ੍ਹਾਂ ਤਿੰਨਾ ਵਿਚਕਾਰ ਇੰਡੀਅਨ ਆਇਡਲ ਬਣਨ ਲਈ ਫ਼ਸਵਾਂ ਮੁਕਾਬਲਾ ਹੋਵੇਗਾ। ਤਿੰਨੇ ਪ੍ਰਤੀਭਾਗੀਆਂ ਵਿਚੋਂ ਖੁਦਾ ਬਖ਼ਸ਼ ਉਮਰ ’ਚ ਛੋਟਾ ਹੈ। ਫਾਈਨਲ ਮੁਕਾਬਲਾ 2 ਅਪਰੈਲ ਨੂੰ ਹੋਣਾ ਹੈ। 

                                           

ਕਾਂਗਰਸੀਆਂ ਨੂੰ ਰੜਕ ਰਹੇ ਬਾਦਲਾਂ ਦੇ ਜ਼ਿਲ੍ਹੇ ’ਚ ਖਾਕੀ ਸਫ਼ਾਂ ’ਚੋਂ ਅਕਾਲੀਆਂ ਦੇ ਪੀਲੇ ਬਾਣੇ ਵਾਲੇ ਝਲਕਾਰੇ

- ਜ਼ਿਲ੍ਹੇ ਸ੍ਰੀ ਮੁਕਤਸਰ ਸਾਹਿਬ ’ਚ ਪੁਲੀਸ ’ਚ ਫੇਰਬਦਲ ਦੀ ਤਿਆਰੀ!
- ਥਾਣੇ ਚੌਕੀਆਂ ’ਚ ਕਾਂਗਰਸੀਆਂ ਨੂੰ ਸਰਕਾਰ ਵਾਲੀ ‘ਫਿਲਿੰਗ’ ਨਹੀਂ ਮਿਲਣ ਲੱਗੀ
- ਬਾਦਲ ਦੀ ਸੁਰੱਖਿਆ ਛਤਰੀ ਦੀ ਓਟ ’ਚ ਹੁੰਦਾ ਭਾਰੀ ਗਿਣਤੀ ਅਮਲਾ ਤਾਇਨਾਤ

ਇਕਬਾਲ ਸਿੰਘ ਸ਼ਾਂਤ
        ਲੰਬੀ: ਬਾਦਲਾਂ ਦੇ ਜ਼ਿਲ੍ਹੇ ਵਿੱਚ ਖਾਕੀ ਸਫ਼ਾਂ ਵਿਚੋਂ ਅਕਾਲੀਆਂ ਦੇ ਪੀਲੇ ਬਾਣੇ ਵਾਲੇ ਝਲਕਾਰੇ ਕਾਂਗਰਸੀਆਂ ਨੂੰ ਰੜਕ ਰਹੇ ਹਨ। ਜਿਸ ਕਰਕੇ ਸੱਤਾ ਪ੍ਰਾਪਤੀ ਦੇ ਹਫ਼ਤੇ ਬਾਅਦ ਵੀ ਕਾਂਗਰਸੀਆਂ ਨੂੰ ਥਾਣੇ ਚੌਕੀਆਂ ਵਿੱਚ ਸਰਕਾਰ ਵਾਲੀ ਪੂਰੀ ‘ਫਿਲਿੰਗ’ ਨਹੀਂ ਮਿਲ ਰਹੀ। ਸੂਤਰਾਂ ਅਨੁਸਾਰ ਅਕਾਲੀਆਂ ਦੀ ਸਰਕਾਰੇ-ਦਰਬਾਰੇ ਬੁੱਕਤ ਘਟਾਉਣ ਲਈ ਜ਼ਿਲ੍ਹੇ ਅੰਦਰ ਪੁਲੀਸ ਤੰਤਰ ਵਿੱਚ ਵੱਡਾ ਫੇਰ-ਬਦਲ ਹੋਣ ਦੀਆਂ ਤਿਆਰੀਆਂ ਹਨ। ਜਿਸ ਤਹਿਤ ਥਾਣਾ ਮੁਖੀਆਂ ਅਤੇ ਚੌਕੀ ਇੰਚਾਰਜ਼ਾਂ ਦੀ ਫ਼ੇਰਬਦਲ ਕੀਤੀ ਜਾਣੀ ਹੈ। ਜ਼ਿਕਰਯੋਗ ਹੈ ਕਿ ਦਸ ਸਾਲਾਂ ’ਚ ਅਜਿਹਾ ਮਾਹੌਲ ਸੀ ਕਿ ਥਾਣਾ ਮੁਖੀ ਅਤੇ ਚੌਂਕੀ ਇੰਚਾਰਜ਼ਾਂ ਨੂੰ ਥਾਣੇ-ਚੌਕੀਆਂ ਦੇ ਬੂਹੇ
ਚੜ੍ਹਨ ਤੋਂ ਪਹਿਲਾਂ ਅਕਾਲੀ ਜਥੇਦਾਰਾਂ ਦੀ ਹਾਜ਼ਰੀ ਭਰਨੀ ਪੈਂਦੀ ਸੀ। ਜਿਸ ਨਾਲ ਜਨਤਕ ਤੌਰ ’ਤੇ ਪੁਲੀਸ ਦੀ ਦਿੱਖ ਪੀਲੇ ਬਾਣੇ ’ਚ ਰੰਗੀ ਮਹਿਸੂਸ ਹੋਣ ਲੱਗੀ ਸੀ। ਜ਼ਿਲ੍ਹਾ ਸ੍ਰੀ ਮੁਕਤਸਰ ਦੇ ਲਗਭਗ ਥਾਣਿਆਂ ਚੌਕੀ ਵਿੱਚ ਅਕਾਲੀ ਸਰਕਾਰ ਸਮੇਂ ਦੇ ਅਫ਼ਸਰ ਅਤੇ ਅਮਲਾ ਤਾਇਨਾਤ ਹਨ। ਜਿਨ੍ਹਾਂ ਦੀ ਅਕਾਲੀ ਤੋਂ ਅੱਖ ਸ਼ਰਮ ਅਤੇ ਸਾਂਝਾਂ ਕਿਸੇ ਤੋਂ ਲੁਕੀਆਂ ਨਹੀਂ। ਬਹੁਗਿਣਤੀ ਥਾਣੇਦਾਰਾਂ ਅਤੇ ਇੰਚਾਰਜ਼ਾਂ ਦੀਆਂ ਅਕਾਲੀਆਂ ਪ੍ਰਤੀ ‘ਵਫ਼ਾਦਾਰੀਆਂ’ ਤਾਂ ਜੱਗਜਾਹਰ ਹਨ। ਸੂਤਰਾਂ ਅਨੁਸਾਰ ਖਾਕੀ ਸਿਸਟਮ ਨੂੰ ਅਗਲੇ ਦਿਨਾਂ ਵਿੱਚ ਗਰਾਂਟਾਂ ਅਤੇ ਹੋਰ ਕਾਰਜਾਂ ਦੀਆਂ ਪੜਤਾਲ ਸਮੇਂ ਸੂਚਨਾਵਾਂ ਅਗਾਊਂ ਤੌਰ ’ਤੇ ਲੀਕ ਹੋਣ ਦਾ ਖਦਸ਼ਾ ਹੈ। ਅਜਿਹੇ ਵਿੱਚ ਅਧਿਕਾਰੀ ਪੱਧਰ ’ਤੇ ਇਸ ਫੇਰਬਦਲ ਦੀ ਲੋੜ ਮਹਿਸੂਸ ਕੀਤੀ ਜਾ ਰਹੀ ਹੈ। ਥਾਣੇਦਾਰ ਅਤੇ ਚੌਕੀ ਇੰਚਾਰਜ਼ਾਂ ਉਪਰੰਤ ਹੇਠਲੇ ਸਟਾਫ਼ ਦੀ ਵਾਰੀ ਆਉਣੀ ਹੈ। ਸੂਤਰ ਆਖਦੇ ਹਨ ਕਿ ਲੰਬੀ ਹਲਕੇ ’ਚ ਬਾਦਲਾਂ ਦੇ ਨੇੜਲੇ ਅਖਵਾਉਂਦੇ ਪੁਲੀਸ ਅਤੇ ਸਿਵਲ ਪ੍ਰਸ਼ਾਸਨ ਦੇ ਵੱਖ-ਵੱਖ ਵਿਭਾਗਾਂ ਦੇ ਅਧਿਕਾਰੀਆਂ ਨੂੰ ਆਪਣੀਆਂ ਨਿਯੁਕਤੀਆਂ ਦੂਰ-ਦੁਰਾਡੇ ਹੋਣ ਦਾ ਖਦਸ਼ਾ ਹੈ। ਜਿਨ੍ਹਾਂ ਵਿਚੋਂ ਕਈਆਂ ਨੇ ਕਾਂਗਰਸੀਆਂ ਦੇ ਬੂਹਿਆਂ ’ਤੇ ਆਨ੍ਹੇ-ਬਹਾਨੇ ਗੇੜੀਆਂ ਸ਼ੁਰੂ ਕਰ ਦਿੱਤੀਆਂ ਹਨ। ਜਦੋਂ ਕਿ ਕਈ ਆਪਣੀਆਂ ਵਫ਼ਾਦਾਰੀਆਂ ਨੂੰ ਕਾਇਮ ਰੱਖਣ ਦੇ ਰੌਂਅ ਵਿੱਚ ਹਨ ਪਰ ਸਮੇਂ ਦੀ ਬਦਲੀ ਫਿਜ਼ਾ ਮੁਤਾਬਕ ਚਿਹਰਿਆਂ ਦੇ ਭਾਵ ਲੁਕੋਣ ਦੀ ਕੋਸ਼ਿਸ਼ ਕਰ ਰਹੇ ਹਨ। 
     ਲੰਬੀ ਹਲਕੇ ਵਿੱਚ ਪੁਲੀਸ ਸਮੇਤ ਸਾਰੇ ਵਿਭਾਗਾਂ ਵਿੱਚਲੇ 70 ਫ਼ੀਸਦੀ ਅਮਲੇ ਦੀ ਅਕਾਲੀ ਪੱਖੀ ਕਾਰਜਪ੍ਰਣਾਲੀ ਸਦਕਾ ਅਕਾਲੀ ਜਥੇਦਾਰਾਂ ਦੀ ਆਪਹੁਦਰੀਆਂ ਅਤੇ ਮਨਆਈਆਂ ਵਿੱਚ ਵਾਧਾ ਹੋ ਸਕਿਆ ਸੀ। ਜਿਨ੍ਹਾਂ ਦੀਆਂ ਕਣਸੋਆਂ ਸਦਕਾ ਜਥੇਦਾਰ ਸਿਸਟਮ ਦੀ ਘੁੰਡੀਆਂ ਨੂੰ ਵਾਚ ਕੇ ਆਪਣੀ ਅਮੀਰਤ ਦੇ ਝੰਡੇ ਗੱਡ ਸਕੇ। 
     ਸੂਤਰਾਂ ਅਨੁਸਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਲੰਬੀ ਹਲਕੇ ’ਚ ਧੰਨਵਾਦੀ ਦੌਰੇ ਹੱਦੋਂ-ਵੱਧ ਟਰੈਫ਼ਿਕ ਅਮਲੇ ਦੀ ਓਟ ਹੇਠ ਸਰਕਾਰ ਵਾਲੀ ‘ਫਿਲਿੰਗ’ ਦਿੱਤੇ ਜਾਣ ਕਣਸੋਆਂ ਸਰਕਾਰ ਕੋਲ ਪੁੱਜੀਆਂ ਹਨ। ਅੱਜ ਵੀ ਧੰਨਵਾਦੀ ਦੌਰੇ ਮੌਕੇ ਮੰਡੀ ਕਿੱਲਿਆਂਵਾਲੀ ’ਚ ਰੱਦ ਹੋਏ ਧੰਨਵਾਦੀ ਜਲਸੇ ਵਾਲੀਆਂ ਜਗ੍ਹਾ ’ਤੇ ਟਰੈਫ਼ਿਕ ਅਮਲੇ ਕਰੀਬ 3-4 ਦਰਜਨ ਮਰਦ-ਅੌਰਤ ਪੁਲੀਸ ਮੁਲਾਜਮ ਤਾਇਨਾਤ ਸਨ। ਉਂਝ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਕੇਂਦਰ ਸਰਕਾਰ ਵੱਲੋਂ ਜੈੱਡ ਪਲੱਸ ਸੁਰੱਖਿਆ ਮਿਲੀ ਹੋਈ ਹੈ। ਸੂਬੇ ’ਚ ਸਾਬਕਾ ਅਕਾਲੀ ਮੰਤਰੀਆਂ ਦੀ ਸੁਰੱਖਿਆ ਕਟੌਤੀ ਕੀਤੀ ਗਈ ਹੈ। ਇਸਦੇ ਬਾਵਜੂਦ ਸਾਬਕਾ ਮੁੱਖ ਮੰਤਰੀ ਨੂੰ ਸੁਰੱਖਿਆ ਦੀ ਓਟ ਹੇਠ ਵੀ.ਆਈ.ਪੀ ਟ੍ਰੀਟਮੈਂਟ ਬਾਰੇ ਆਮ ਜਨਤਾ ਵਿੱਚ ਚਰਚਾ ਹੈ।
ਜ਼ਿਕਰਯੋਗ ਹੈ ਕਿ ਪਿਛਲੇ ਦਸ ਵਰ੍ਹਿਆਂ ਦਾ ਥਕੇਵੇਂ ਭਰੀਆਂ ਲੰਮੀਆਂ ਤਾਇਨਾਤੀਆ ਤੋਂ ਹੰਭਿਆ ਕਾਂਸਟੇਬਲ ਅਤੇ ਹੈੱਡ ਕਾਂਸਟੇਬਲ ਪੱਧਰ ਦਾ ਪੁਲੀਸ ਅਮਲਾ ਬਾਦਲਾਂ ਦੇ ਰਾਹਾਂ ਦੀਆਂ ਅੰਨ੍ਹੇਵਾਹ ਡਿਊਟੀ ਕਰ-ਕਰ ਕੇ ਖਿਝਿਆ ਪਿਆ ਹੈ। ਜਿਨ੍ਹਾਂ ਨੂੰ ਸਵੇਰੇ 11 ਵਜੇ ਦੇ ਪ੍ਰੋਗਰਾਮ ਲਈ ਤੜਕੇ 4 ਵਜੇ ਉਠਾ ਕੇ ਸੜਕਾਂ ਕੰਢੇ ਖੜ੍ਹਾ ਕਰ ਦਿੱਤਾ ਜਾਂਦਾ ਸੀ। ਹੁਣ ਤਾਂ ਸੜਕਾਂ ਕੰਢੇ ਪੁਲੀਸ ਕਰਮਚਾਰੀ ਵੀ ਪੱਤਰਕਾਰਾਂ ਨੂੰ ਪੁੱਛਦੇ ਹਨ ‘‘ਬਾਈ ਜੀ, ਨਵਾਂ ਸੂਰਜ ਆ ਗਿਆ ਪਰ ਸਾਡੀ ਚੰਦਰੀ ਨਵੀਂ ਸਵੇਰ ਨਾ ਆਈ ।’’ 98148-26100 / 93178-26100








16 March 2017

ਅਮਰਿੰਦਰ ਸਿੰਘ ਨੇ ਮੁੱਖ ਮੰਤਰੀ ਦਫਤਰ ਦਾ ਚਾਰਜ ਸੰਭਾਲਿਆ-ਕੈਬਨਿਟ ਦੀ ਪਹਿਲੀ ਮੀਟਿੰਗ ਸ਼ਨੀਵਾਰ ਨੂੰ

* ਸ਼ਨੀਵਾਰ ਨੂੰ ਕੈਬਨਿਟ ਦੀ ਪਹਿਲੀ ਮੀਟਿੰਗ ’ਚ ਕਈ ਮਹੱਤਵਪੂਰਨ ਫੈਸਲੇ ਲਵੇਗੀ ਸਰਕਾਰ
* ਪਹਿਲ ਵਾਲਾ ਏਜੰਡਾ : ਕਰਜਾ ਮੁਆਫੀ, ਸਨਅਤਾਂ ਦੀ ਮੁੜ ਬਿਹਤਰੀ ਅਤੇ ਰੁਜ਼ਗਾਰ 
                                                    
                                      ਬੁਲੰਦ ਸੋਚ ਬਿਊਰੋ 
ਚੰਡੀਗੜ੍ਹ: ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਕਈ ਧਰਮਾਂ ਦੀਆਂ ਪ੍ਰਾਰਥਨਾਵਾਂ ਵਿਚਾਲੇ ਵੀਰਵਾਰ ਨੂੰ ਇਥੇ ਪੰਜਾਬ ਸਕਤਰੇਤ ’ਚ ਆਪਣੇ ਨਵੇਂ ਦਫਤਰ ਦਾ ਚਾਰਜ ਸੰਭਾਲ ਲਿਆ। ਇਸ ਦੌਰਾਨ ਜਿਵੇਂ ਹੀ ਉਹ ਆਪਣੇ ਨਵੇਂ ਗਠਿਤ ਮੰਤਰੀ ਮੰਡਲ ਦੇ ਕਈ ਸਾਥੀਆਂ, ਵਿਧਾਇਕਾਂ ਤੇ ਨਜ਼ਦੀਕੀ ਸਹਿਯੋਗੀਆਂ ਦੇ ਦਲ ਨਾਲ ਪੰਜਾਬ ਦੇ 26ਵੇਂ ਮੁੱਖ ਮੰਤਰੀ
ਦੇ ਦਫਤਰ ਦੀ ਦੂਜੀ ਮੰਜਿਲ ’ਤੇ ਪਹੁੰਚੇ, ਸ੍ਰੀਮਦ ਭਗਵਦ ਗੀਤਾ, ਸ੍ਰੀ ਗੁਰੂ ਗ੍ਰੰਥ ਸਾਹਿਬ, ਕੁਰਾਨ ਤੇ ਬਾਈਬਲ ਦੇ ਪਵਿੱਤਰ ਭਜਨ ਗੂੰਜਣ ਲੱਗੇ। ਕੈਪਟਨ ਅਮਰਿੰਦਰ ਦੂਜੀ ਵਾਰ ਪੰਜਾਬ ਦੇ ਮੁੱਖ ਮੰਤਰੀ ਦਾ ਗੌਰਵਮਈ ਦਫਤਰ ਸੰਭਾਲਣਗੇ। ਇਸ ਤੋਂ ਪਹਿਲਾਂ ਉਨ੍ਹਾਂ ਨੇ 2002 ਤੋਂ 2007 ਵਿਚਾਲੇ ਬਤੌਰ ਮੁੱਖ ਮੰਤਰੀ ਆਪਣੇ ਪਿਛਲੇ ਕਾਰਜਕਾਲ ਦੌਰਾਨ ਇਸ ਦਫਤਰ ਸੰਭਾਲਿਆ ਸੀ। ਇਸ ਲੜੀ ਹੇਠ, ਹਾਲੇ ’ਚ ਸੰਪੂਰਨ ਹੋਈਆਂ ਵਿਧਾਨ ਸਭਾ ਚੋਣਾਂ ’ਚ ਵੱਡੀ ਜਿੱਤ ਦਰਜ ਕਰਨ ਤੋਂ ਬਾਅਦ ਪੰਜਾਬ ਦੀ ਨਵੀਂ ਕਾਂਗਰਸ ਸਰਕਾਰ ਦੀ ਜ਼ਿੰਮੇਵਾਰੀ ਸੰਭਾਲਣ ਲਈ ਜਿਵੇਂ ਹੀ ਕੈਪਟਨ ਅਮਰਿੰਦਰ ਨੇ ਸਕਤਰੇਤ ’ਚ ਕਦਮ ਰੱਖਿਆ, ਮੰਨੋ ਜਿਵੇਂ ਤਿਊਹਾਰ ਜਿਹਾ ਮਹੌਲ ਬਣ ਗਿਆ। ਇਸ ਤੋਂ ਪਹਿਲਾਂ, ਸਵੇਰੇ ਕੈਪਟਨ ਅਮਰਿੰਦਰ ਨੇ ਮੰਤਰੀ ਮੰਡਲ ਦੇ 9 ਮੈਂਬਰਾਂ ਨਾਲ ਪੰਜਾਬ ਭਵਨ ’ਚ ਕਈ ਪਤਵੰਤੇ ਵਿਅਕਤੀਆਂ ਦੀ ਮੌਜ਼ੂਦਗੀ ’ਚ ਅਹੁਦੇ ਦੀ ਸਹੁੰ ਚੁੱਕੀ ਸੀ, ਜਿਨ੍ਹਾਂ ਪਤਵੰਤਿਆਂ ’ਚ ਏ.ਆਈ.ਸੀ.ਸੀ ਮੀਤ ਪ੍ਰਧਾਨ ਰਾਹੁਲ ਗਾਂਧੀ ਤੇ ਸਾਬਕਾ ਪ੍ਰਧਾਨ ਮੰਤਰੀ ਡਾ. ਮਨਮੋਹਨ ਸਿੰਘ ਵੀ ਸਨ। 
       ਅਹੁਦਾ ਸੰਭਾਲਣ ਤੋਂ ਤੁਰੰਤ ਬਾਅਦ, ਕੈਪਟਨ ਅਮਰਿੰਦਰ ਨੇ ਸਪੱਸ਼ਟ ਕੀਤਾ ਸੀ ਕਿ ਉਹ ਸਾਰਿਆਂ ਚੋਣ ਵਾਅਦਿਆਂ ਨੂੰ ਪੂਰਾ ਕਰਨ ਪ੍ਰਤੀ ਵਚਨਬੱਧ ਹਨ ਅਤੇ ਇਸ ਦਿਸ਼ਾ ’ਚ, ਉਨ੍ਹਾਂ ਦੀ ਸਰਕਾਰ ਸ਼ਨੀਵਾਰ (18 ਮਾਰਚ) ਨੂੰ ਤੈਅ ਆਪਣੀ ਕੈਬਨਿਟ ਦੀ ਪਹਿਲੀ ਮੀਟਿੰਗ ’ਚ ਕਈ ਮਹੱਤਵਪੂਰਨ ਫੈਸਲੇ ਲਵੇਗੀ। ਉਨ੍ਹਾਂ ਨੇ ਚਾਰ ਹਫਤਿਆਂ ਅੰਦਰ ਸੂਬੇ ਤੋਂ ਨਸ਼ੇ ਦੀ ਸਮੱਸਿਆ ਦਾ ਖਾਤਮਾ ਕਰਨ ਲਈ ਵਿਸ਼ੇਸ਼ ਜਾਂਚ ਦਲ ਦਾ ਗਠਨ ਕਰਨ ਸਬੰਧੀ ਆਪਣਾ ਵਾਅਦਾ ਵੀ ਦੁਹਰਾਇਆ, ਜਿਹੜਾ ਵਚਨ ਕਾਂਗਰਸ ਦੇ ਚੋਣ ਮਨੋਰਥ ਪੱਤਰ ’ਚ ਦਿੱਤਾ ਗਿਆ ਹੈ। ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਸਰਕਾਰ ਦੇ ਏਜੰਡੇ ਦੇ ਮੁੱਖ ਪ੍ਰੋਗਰਾਮਾਂ ’ਚ ਕਿਸਾਨਾਂ ਦੀ ਕਰਜਾ ਮੁਆਫੀ, ਉਦਯੋਗਾਂ ਨੂੰ ਮੁੜ ਪੈਰਾਂ ’ਤੇ ਖੜ੍ਹਾ ਕਰਨਾ ਤੇ ਰੋਜ਼ਗਾਰ ਪੈਦਾ ਕਰਨਾ ਵੀ ਸ਼ਾਮਿਲ ਹਨ, ਜਿਨ੍ਹਾਂ ’ਤੇ ਪਹਿਲ ਦੇ ਅਧਾਰ ’ਤੇ ਕੰਮ ਕੀਤਾ ਜਾਵੇਗਾ। ਇਸ ਮੌਕੇ ਮੁੱਖ ਮੰਤਰੀ ਨਾਲ ਹੋਰਨਾਂ ਤੋਂ ਇਲਾਵਾ, ਸੂਬੇ ਦੇ ਕੈਬਨਿਟ ਮੰਤਰੀਆਂ ’ਚ ਬ੍ਰਹਮ ਮੋਹਿੰਦਰਾ ਤੇ ਤ੍ਰਿਪਤ ਰਜਿੰਦਰ ਸਿੰਘ ਬਾਜਵਾ, ਰਾਜ ਮੰਤਰੀ ਰਜੀਆ ਸੁਲਤਾਨਾ, ਵਿਧਾਇਕਾਂ ’ਚ ਗੁਰਮੀਤ ਸਿੰਘ ਰਾਣਾ ਸੋਢੀ, ਰਾਜ ਕੁਮਾਰ ਵੇਰਕਾ, ਪਰਮਿੰਦਰ ਸਿੰਘ ਪਿੰਕੀ, ਵਿਜੈ ਇੰਦਰ ਸਿੰਗਲਾ, ਅਮਰਿੰਦਰ ਸਿੰਘ ਰਾਜਾ ਵੜਿੰਗ, ਸੁਖਭਿੰਦਰ ਸਿੰਘ ਸੁਖਸਰਕਾਰੀਆ ਤੇ ਗੁਰਕੀਰਤ ਕੋਟਲੀ, ਸੁਖਪਾਲ ਸਿੰਘ ਭੁੱਲਰ ਤੇ ਪੰਜਾਬ ਦੇ ਸਾਬਕਾ ਮੰਤਰੀ ਮੋਹਿੰਦਰ ਸਿੰਘ ਕੇਪੀ, ਸਾਬਕਾ ਵਿਧਾਇਕਾਂ ’ਚ ਕੇਵਲ ਸਿੰਘ ਢਿਲੋਂ ਤੇ ਰਣਜੀਤ ਸਿੰਘ ਛੱਜਲਵੰਡੀ ਸਮੇਤ ਨਵੇਂ ਮੁੱਖ ਸਕੱਤਰ ਕਰਨ ਅਵਤਾਰ ਸਿੰਘ ਤੇ ਡਾਇਰੈਕਟਰ ਜਨਰਲ ਆਫ ਪੁਲਿਸ ਸੁਰੇਸ਼ ਅਰੋੜਾ ਵੀ ਸਨ। 

ਬਾਬਾ ਬੋਹੜ ਲੈਣ ਲੱਗਿਆ ਕੈਪਟਨ ਨਾਲ ਪੰਗੇ

* ਅਮਰਿੰਦਰ ਦੇ ਸਹੁੰ ਚੁੱਕਣ ਤੋਂ ਪਹਿਲਾਂ ਹੀ ਕੇਂਦਰ ਦਾ ਵਿਖਾਇਆ 'ਰੌਹਬ'
* ਬਾਦਲ ਵੱਲੋਂ ਛੇਤੀ ਪਾਣੀਆਂ ਦੀ ਵੱਡੀ ਲੜਾਈ ਵਿੱਢਣ ਦੇ ਸਕੇਤ
* ਬੋਲੇ ਕੁਬੋਲ: ਅਖੇ ਖੁਦ ਰੋਜ਼ ਸ਼ਰਾਬ ਛਕਣ ਵਾਲਾ ਹੋਰਾਂ ਦਾ ਨਸ਼ਾ ਕਿਵੇਂ ਛੁਡਾਊ

                                                         ਇਕਬਾਲ ਸਿੰਘ ਸ਼ਾਂਤ
ਲੱਬੀ: ਮੁੱਖ ਮੰਤਰੀ ਦੇ ਅਹੁਦੇ ਤੋਂ ਵਿਧਾਇਕੀ ਤੱਕ ਸੀਮਤ ਹੋਏ ਪ੍ਰਕਾਸ਼ ਸਿੰਘ ਬਾਦਲ ਦੇ ਕਾਂਗਰਸ ਦੀ ਇਤਿਹਾਸਕ ਜਿੱਤ ਗਲਿਓਂ ਹੇਠੋਂ ਨਹੀਂ ਉੱਤਰਦੀ ਜਾਪਦੀ। ਬਾਬਾ ਬੋਹੜ ਨਵੇਂ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਸਹੁੰ ਚੁੱਕਣ ਤੋਂ ਪਹਿਲਾਂ ਹੀ ਵਿਰੋਧੀ ਸੁਰਾਂ ਵਾਲੀ ਰਾਜਨੀਤੀ 'ਤੇ ਉੱਤਰ ਆਏ ਹਨ। ਉਨ੍ਹਾਂ ਛੇਤੀ ਹੀ ਪੰਜਾਬ ਦੇ ਪਾਣੀਆਂ ਲਈ ਵੱਡੀ ਲੜਾਈ ਵਿੱਢਣ ਦੇ ਸੰਕੇਤ ਵੀ ਦਿੱਤੇ ਹਨ। ਅੱਜ ਲੰਬੀ ਹਲਕੇ 'ਚ ਵੱਡੀ ਜਿੱਤ ਲਈ ਪ੍ਰਕਾਸ਼ ਸਿੰਘ ਬਾਦਲ ਧੰਨਵਾਦੀ ਦੌਰੇ ਤਹਿਤ ਵਰਕਰਾਂ ਦੇ ਮੁਖਾਤਬ ਹੋਏ। ਸਿਆਸੀ ਮਾਹਰਾਂ ਅਨੁਸਾਰ ਸਾਬਕਾ ਮੁੱਖ ਮੰਤਰੀ ਦੇ ਤਿੱਖੇ ਤੇਵਰ ਸਿਆਸੀ ਰਣਨੀਤੀ ਤਹਿਤ ਅਮਰਿੰਦਰ ਸਰਕਾਰ ਦਾ
ਧਿਆਨ ਸ਼ੁਰੂਆਤੀ ਦੌਰ 'ਚ ਹੀ ਵਿਕਾਸ ਤੋਂ ਹਟਾ ਕੇ ਪਾਣੀਆਂ ਦੇ ਲੜਾਈ 'ਚ ਉਲਝਾਉਣ ਵਾਲੇ ਹਨ। ਤਾਂ ਜੋ ਸਰਕਾਰ ਕਾਰਗੁਜਾਰੀ ਪੱਖੋਂ ਅਕਾਲੀ ਦਲ ਤੋਂ ਬਿਹਤਰ ਨਾ ਸਾਬਤ ਹੋ ਸਕੇ। ਕੁਝ ਬਾਦਲ ਨੇ ਨਵੇਂ ਸੁਰਾਂ ਨੂੰ ਕਰਾਰੀ ਹਾਰ ਉਪਰੰਤ ਅਕਾਲੀ ਦਲ ਅੰਦਰੋਂ ਪ੍ਰਧਾਨਗੀ ਤਬਦੀਲੀ ਬਾਰੇ ਉੱਠਣ ਵਾਲੇ ਸੁਰਾਂ ਦੀ ਦਿਸ਼ਾ ਬਦਲਣ ਅਤੇ ਵਰਕਰਾਂ ਦੇ ਜੋਸ਼ ਨੂੰ ਬਣਾਏ ਰੱਖਣ ਦੀ ਕੋਸ਼ਿਸ਼ ਵੀ ਦੱਸ ਰਹੇ ਹਨ। ਉਂਝ ਚੋਣ ਨਤੀਜਿਆਂ ਉਪਰੰਤ ਬਾਦਲ ਨੇ ਪੰਜਾਬ ਦੇ ਹਿੱਤਾਂ ਲਈ ਅਮਰਿੰਦਰ ਸਿੰਘ ਨੂੰ ਸਾਰਥਿਕ ਸਹਿਯੋਗ ਦਾ ਐਲਾਨ ਕੀਤਾ ਸੀ। ਪਰ ਅੱਜ ਚਾਰ ਦਿਨਾਂ ਉਪਰੰਤ ਬਾਦਲ ਦੇ ਸ਼ਬਦਾਂ ਤੋਂ ਅਕਾਲੀ ਦਲ ਦਾ ਸਰਕਾਰੀ ਪ੍ਰਤੀ ਨਜ਼ਰੀਆ ਅਤੇ ਰਣਨੀਤੀ ਝਲਕਣ ਲੱਗੀ ਹੈ।

          ਉਨ੍ਹਾਂ ਅੱਜ ਪਿੰਡ ਬਾਦਲ ਤੋਂ ਧੰਨਵਾਦੀ ਦੌਰੇ ਦਾ ਆਗਾਜ਼ ਕਰਦਿਆਂ ਧੌਲਾ, ਚੰਨੂ, ਲਾਲਬਾਈ, ਲੰਬੀ, ਗੱਗੜ ਸਮੇਤ 13 ਪਿੰਡਾਂ ਦੇ ਗੁਰਦੁਆਰਿਆਂ ਆਦਿ 'ਚ ਧੰਨਵਾਦੀ ਜਲਸਿਆਂ ਕੀਤੇ। ਇਸ ਮੌਕੇ ਉਨ੍ਹਾਂ ਅਕਾਲੀ ਸਰਕਾਰ ਨੂੰ 'ਚੰਗੀ ਸਬਜ਼ੀ' ਅਤੇ ਕਾਂਗਰਸ ਸਰਕਾਰ ਨੂੰ 'ਚਟਣੀ' ਕਰਾਰ ਦਿੱਤਾ ਅਤੇ ਕਿਹਾ ਕਿ ਤੁਸੀਂ ਪੰਜ ਸਾਲ ਲੰਘਾ ਲਓ ਫਿਰ 25 ਸਾਲ ਆਪਣਾ ਹੀ ਰਾਜ ਰਹਿਣਾ ਹੈ। ਸਾਬਕਾ ਮੁੱਖ ਮੰਤਰੀ ਅੱਜ ਪੂਰੀ ਤਿਆਰੀ ਨਾਲ ਲੋਕ ਕਚਿਹਰੀ 'ਚ ਨਿੱਤਰਦਿਆਂ ਕਾਂਗਰਸ ਸਰਕਾਰ ਦਾ ਵਜ਼ਨ ਹੌਲਾ ਕਰਨ ਦੀ ਮਨਸ਼ਾ ਆਖਿਆ ਕਿ ਭਾਵੇਂ ਅਮਰਿੰਦਰ ਸਿੰਘ ਸਰਕਾਰ ਕੋਲ ਸੀਟਾਂ ਪੱਖੋਂ ਬਹੁਮਤ ਹੈ ਪਰ ਉਸਨੂੰ ਸਿਰਫ਼ 38.5 ਫ਼ੀਸਦੀ ਲੋਕਾਂ ਨੇ ਹੀ ਪਸੰਦ ਕੀਤਾ ਹੈ। ਪੰਜਾਬ 'ਚ 57-58 ਫ਼ੀਸਦੀ ਲੋਕ ਕਾਂਗਰਸ ਖਿਲਾਫ਼ ਭੁਗਤੇ ਹਨ। ਸ੍ਰੀ ਬਾਦਲ ਨੇ ਅਮਰਿੰਦਰ ਸਰਕਾਰ ਪ੍ਰਤੀ ਦਬਾਅ ਵਾਲਾ ਲਹਿਜ਼ਾ ਵਰਤਦਿਆਂ ਕਿਹਾ ਕਿ ਕੇਂਦਰ ਵਿੱਚ ਸਾਡੀ ਭਾਈਵਾਲੀ ਵਾਲੀ ਨਰਿੰਦਰ ਮੋਦੀ ਸਰਕਾਰ ਹੈ, ਹਰਸਿਮਰਤ ਕੌਰ ਕੇਂਦਰੀ ਵਜਾਰਤ 'ਚ ਮੰਤਰੀ ਐ, ਅਸੀਂ ਹਰ ਪੱਖੋਂ ਕਾਂਗਰਸ ਨਾਲੋਂ ਤਕੜੇ ਹਾਂ। ਉਨ੍ਹਾਂ ਪੰਜਾਬ ਦੀ ਸਮੁੱਚੀ ਅਫਸਰਸ਼ਾਹੀ ਨਾਲ ਨੇੜਤਾ ਨੂੰ ਦਰਸਾਉਂਦਿਆਂ ਕਿਹਾ ਕਿ ਮੈਂ ਬੀਤੇ 20 ਸਾਲਾਂ 'ਚੋਂ 15 ਸਾਲ ਮੁੱਖ ਮੰਤਰੀ ਰਿਹਾ ਹਾਂ, ਅਫਸਰ ਅਮਰਿੰਦਰ ਸਿੰਘ ਨਾਲੋਂ ਮੇਰੀ ਵੱਧ ਗੱਲ ਮੰਨਦੇ ਹਨ। ਕਾਂਗਰਸ ਤਾਂ ਅਖ਼ਬਾਰਾਂ 'ਚ ਖ਼ਬਰਾਂ ਲਗਵਾਉਣ ਵਾਲੀ ਪਾਰਟੀ ਹੈ ਜਿਸਦਾ ਜ਼ਮੀਨ ਜੁੜੇ ਕਾਰਜਾਂ ਨਾਲ ਕੋਈ ਲੈਣਾ-ਦੇਣਾ ਨਹੀਂ। ਬਾਕੀ ਅਮਰਿੰਦਰ ਨੇ ਕਿਧਰੇ ਆਉਣਾ ਨਹੀਂ ਜਾਣਾ ਨਹੀਂ। ਮੈਂ 24 ਘੰਟੇ ਤੁਰਿਆ ਫਿਰਦਾ ਸਾਂ। ਉਨ੍ਹਾਂ ਨਿੱਜੀ ਨਿਖੇਧੀ ਵਾਲੀ ਸਿਆਸਤ ਦਾ ਵਿਰੋਧ ਕਰਦਿਆਂ ਕਿਹਾ ਕਿ ਅਮਰਿੰਦਰ ਸਿੰਘ ਤਾਂ ਖੁਦ ਰੋਜ਼ਾਨਾ ਸ਼ਰਾਬ ਪੀਂਦੇ ਹਨ ਅਤੇ ਉਹ ਹੋਰਾਂ ਦਾ ਨਸ਼ਾ ਕਿਵੇਂ ਛੁਡਵਾ ਦੇਣਗੇ। ਆਮ ਆਦਮੀ ਵਾਲਾ ਭਗਵੰਤ ਮਾਨ ਤਾਂ ਆਖਦੇ ਰੋਜ਼ਾਨਾ ਦੋ ਬੋਤਲਾਂ ਪੀ ਜਾਂਦਾ ਹੈ ਜਿਸਦੀ ਸ਼ਰਾਬ ਦੀ ਆਦਤ ਦੇ ਚਰਚੇ ਤਾਂ ਸੰਸਦ ਵਿੱਚ ਹੁੰਦੇ ਹਨ। 
           ਉਨ੍ਹਾਂ ਵਰਕਰਾਂ ਨੂੰ ਪਾਣੀਆਂ ਦੀ ਵੱਡੀ ਲੜਾਈ ਲਈ ਕਸਰਕੱਸੇ ਕਰਨ ਦਾ ਸੱਦਾ ਦਿੰਦਿਆਂ ਕਿਹਾ ਕਿ ਕਾਂਗਰਸ ਪੰਜਾਬ ਦਾ ਨੁਕਸਾਨ ਕਰਨ ਵਾਲੀ ਪਾਰਟੀ ਹੈ ਅਤੇ ਅਕਾਲੀ ਦਲ ਨੇ ਪੰਜਾਬ ਦੀ ਲੜਾਈ ਲੜੀ ਹੈ। ਪੱਤਰਕਾਰਾਂ ਵੱਲੋਂ 2-3 ਮਹੀਨੇ 'ਚ ਪਾਣੀਆਂ ਦੀ ਵੱਡੀ ਲੜਾਈ ਆਉਣ ਦਾ ਕਾਰਨ ਪੁੱਛਣ 'ਤੇ ਸਾਬਕਾ ਮੁੱਖ ਮੰਤਰੀ ਨੂੰ ਕਿਹਾ ਕਿ ਇਹ ਪੰਜਾਬ ਦਾ ਵੱਡਾ ਮਸਲਾ ਹੈ ਅਤੇ ਸੂਬੇ ਦਾ ਭਵਿੱਖ ਜੁੜਿਆ ਹੈ। ਜਦੋਂ ਸੁਪਰੀਮ ਕੋਰਟ ਵੱਲੋਂ ਨਹਿਰ ਉਸਾਰੀ ਦੇ ਨਿਰਦੇਸ਼ਾਂ ਵੱਲ ਬਾਦਲ ਦਾ ਧਿਆਨ ਦਿਵਾਇਆ ਤਾਂ ਬਾਦਲ ਨੇ ਕਿਹਾ ਕਿ ''ਅਸੀਂ ਤਾਂ ਡਟਾਂਗੇ ਜੀ।'' 
ਸਾਬਕਾ ਮੁੱਖ ਮੰਤਰੀ ਨੇ ਬਣਨ ਵਾਲੀ ਕਾਂਗਰਸ ਸਰਕਾਰ 'ਤੇ ਅਗਾਊਂ ਹਮਲਾ ਕਰਦਿਆਂ ਕਿਹਾ ਕਿ ਆਉਂਦੇ ਸਾਰ ਅਮਰਿੰਦਰ ਸਿੰਘ ਪੰਜਾਬ ਦਾ ਖਜ਼ਾਨਾ ਖਾਲੀ ਹੋਣ ਦਾ ਬਹਾਨਾ ਲਾਉਣਗੇ। ਉਨ੍ਹਾਂ ਕਿਹਾ ਕਿ ਸਰਕਾਰਾਂ ਹਰ ਸਾਲ ਟੈਕਸਾਂ ਅਤੇ ਹੋਰ ਵਸੀਲਿਆਂ ਤੋਂ ਆਮਦਨ ਹੁੰਦੀ ਹੈ ਜਿਸ ਨਾਲ ਸਰਕਾਰ ਦੇ ਵਿਕਾਸ ਅਤੇ ਖਰਚੇ ਚੱਲਦੇ ਹਨ। ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਤੁਹਾਡੀ ਸਰਕਾਰ ਖਜ਼ਾਨੇ ਵਿੱਚ ਕਿੰਨਾ ਫੰਡ ਛੱਡ ਕੇ ਗਈ ਹੈ ਤਾਂ ਇਹ ਕੋਈ ਢੁੱਕਵਾਂ ਜਵਾਬ ਨਹੀਂ ਦੇ ਸਕੇ। ਅਕਾਲੀ ਸਰਕਾਰ ਵੱਲੋਂ ਜਾਇਦਾਦਾਂ ਵੇਚ ਕੇ ਪ੍ਰਾਜੈਕਟਾਂ 'ਤੇ ਲਾਉਣ ਬਾਰੇ ਸੁਆਲ ਦੇ ਜਵਾਬ 'ਚ ਬਾਦਲ ਨੇ ਕਿਹਾ ਕਿ ਪੰਜਾਬ ਨੂੰ ਚਲਾਉਣ ਦਾ ਤਜ਼ੁਰਬਾ ਸਿਰਫ਼ ਸਾਡੇ ਕੋਲ ਹੈ, ਇਹ ਤਾਂ ਵਿਕਾਸ 'ਚ ਖੜੋਤ ਪਾਉਣ ਨੂੰ ਆਏ ਹਨ। 


  ''ਕਾਕਾ, ਮੈਂ ਤਾਂ ਤੇਰੇ ਘਰੇ ਰਾਤ ਕੱਟਣ ਨੂੰ ਤਿਆਰ ਹਾਂ''
ਚੰਨੂ 'ਚ  ਨੌਜਵਾਨ ਲਖਵਿੰਦਰ ਸਿੰਘ ਨੇ ਵਿਧਾਇਕ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਰੋਕ 'ਤੇ ਆਖਿਆ ਕਿ ਮੈਂ ਤੁਹਾਨੂੰ ਪਿੰਡ ਦੇ ਗਰੀਬਾਂ ਨੂੰ ਧੱਕੇਸ਼ਾਹੀਆਂ ਅਤੇ ਚੈੱਕ ਦੀ ਬਾਂਦਰਵੰਡ ਬਾਰੇ ਸਰਕਾਰ ਸਮੇਂ ਗੁਹਾਰ ਲਾਉਣ ਦੀ ਕੋਸ਼ਿਸ਼ਾਂ ਕੀਤੀਆਂ। ਹਰ ਵਾਰ ਉਸਨੂੰ ਪਿਛਾਂਹ ਧੱਕਿਆ ਜਾਂਦਾ ਰਿਹਾ। ਜਿਸ 'ਤੇ ਬਾਦਲ ਹੁਰਾਂ ਨੇ ''ਕਾਕਾ, ਹੁਣ ਤਾਂ ਮੈਂ ਤਾਂ ਤੇਰੇ ਘਰੇ ਰਾਤ ਕੱਟਣ ਨੂੰ ਤਿਆਰ ਹਾਂ। ਮੈਂ ਕਦੇ ਕਿਸੇ ਨੂੰ ਮਿਲਣੋਂ ਨਾਂਹ ਨਹੀਂ ਕੀਤੀ।'' ਬਾਅਦ 'ਚ ਲਖਵਿੰਦਰ ਨੇ ਕਿਹਾ ਕਿ ਇੱਕ ਵਾਰ ਤਾਂ ਉਸਦੀ ਅਵਾਜ਼ ਦਬਵਾਉਣ ਉਸਨੂੰ ਵੱਡੀ ਗੱਡੀ ਤਾੜ ਦਿੱਤਾ ਗਿਆ। ਮਲਟੀਪਰਪਜ਼ ਹੈਲਥਵਰਕਰ ਦੀ ਡਿਪਲੋਮਾ ਧਾਰਕ ਲਖਵਿੰਦਰ ਦਾ ਕਹਿਣਾ ਸੀ ਕਿ ਬਾਦਲ ਵੱਲੋਂ ਨੌਕਰੀ ਨਾ ਦੇਣ ਕਰਕੇ ਉਹ ਅਜੇ ਤੱਕ ਵਿਆਹਿਆ ਨਹੀਂ ਜਾ ਸਕਿਆ। 

08 March 2017

ਚੋਣ ਲਾਟਰੀ : ਸਿਆਸੀ ਆਲ੍ਹਣਿਆਂ ’ਚ ਪਰਤਣ ਲੱਗੇ ਚੋਣ ਪਰਿੰਦੇ

  ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਪੰਜਾਬ ਚੋਣ ਲਾਟਰੀ ਦੇ ਨਤੀਜੇ ਦੀ ‘ਸੱਜਰੀ ਸਵੇਰ’ ਚੜ੍ਹਦੀ ਵੇਖ ਚੋਣ ਪਰਿੰਦੇ ਆਪਣੇ ਸਿਆਸੀ ਆਲ੍ਹਣਿਆਂ ’ਚ ਪੁੱਜਣ ਲੱਗੇ ਹਨ। ਸਿਆਸਤ ਦੇ ਸ਼ਾਹ ਅਸਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੀ ਕੱਲ੍ਹ ਆਪਣੇ ਜੱਦੀ ਪਿੰਡ ਬਾਦਲ ਵਾਪਸ ਆ ਗਏ। ਉਹ ਆਪਣੇ ਸਿਆਸੀ ਕਿਲ੍ਹੇ ਪਿੰਡ ਬਾਦਲ ਤੋਂ ਚੋਣ ਨਤੀਜਿਆਂ ’ਤੇ ਨਜ਼ਰਾਂ ਰੱਖਣਗੇ।
ਜਾਣਕਾਰਾਂ ਅਨੁਸਾਰ ਸ੍ਰੀ ਬਾਦਲ ਹਰੇਕ ਚੋਣ ਨਤੀਜੇ ਸਮੇਂ ਪਿੰਡ ਬਾਦਲ ਵਿੱਚ ਰਹਿਣ ਨੂੰ ‘ਲੱਕੀ’ ਮੰਨਦੇ ਹਨ। ਉਨ੍ਹਾਂ ਅਮਰੀਕਾ ’ਚ ਸਿਹਤ ਜਾਂਚ ਮਗਰੋਂ ਪਿੰਡ ਬਾਲਾਸਰ ਫਾਰਮ ਹਾਊਸ ’ਚ ਛੁੱਟੀਆਂ ਬਿਤਾਈਆਂ। ਮੁੱਖ ਮੰਤਰੀ ਬਾਦਲ ਦੇ ਜੀਵਨ ਦੀ ਬੇਹੱਦ ਫਸਵੀਂ 11ਵੀਂ ਸੂਬਾਈ ਚੋਣ ਦਾ ਨਤੀਜਾ 11 ਮਾਰਚ ਦੇ ਸੂਰਜ ਦੀ ਟਿੱਕੀ ਨਾਲ ਜੁੜਿਆ ਹੈ। ਜਿਉਂ-ਜਿਉਂ ਨਤੀਜੇ ਦਾ ਸਮਾਂ ਘਟ ਰਿਹਾ ਹੈ ਉਮੀਦਵਾਰਾਂ ਅਤੇ ਸਮਰਥਕਾਂ ਦੇ ਕਲੇਜੇ ਪਾਟਣ ਨੂੰ ਹੋ ਰਹੇ ਹਨ। ਲੰਬੀ ਸੀਟ ’ਤੇ ਪੰਜਾਬ ਸਮੇਤ ਸਮੁੱਚੀ ਦੁਨੀਆਂ ਦੀਆਂ ਨਜ਼ਰਾਂ ਲੱਗੀਆਂ ਹਨ। ਜੀਵਨ ਸਿਖ਼ਰ ’ਤੇ ਐਤਕੀਂ ਦਾ ਚੋਣ ਪ੍ਰਚਾਰ ਵੱਡੇ ਬਾਦਲ ਲਈ ਅਕਾਲੀ ਜਥੇਦਾਰਾਂ ਦੀਆਂ ਮਾੜੀਆਂ ਕਰਤੂਤਾਂ ਕਰਕੇ ਕਾਫ਼ੀ ਨਾਮੋਸ਼ੀ ਭਰਿਆ ਰਿਹਾ। ਉਂਝ ਵੱਡੇ ਬਾਦਲ ਨੇ ਆਪਣੇ ਜੀਵਨ ’ਚ ਕਦੇ ਵਿਧਾਨਸਭਾ ਚੋਣ ਨਹੀਂ ਹਾਰੀ। ਇਸ ਸਾਬਕਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਅਤੇ ਜਰਨੈਲ ਸਿੰਘ ਨਾਲ ਤਿਕੋਨੇ ਸਿਆਸੀ ਭੇੜ ’ਚ ਜਿੱਤ-ਹਾਰ ਦਾ ਫ਼ਰਕ ਉਂਗਲਾਂ ’ਤੇ ਗਿਣਨ ਵਾਂਗ ਬਣਿਆ ਪਿਆ ਹੈ। ਬਾਦਲ ਦੀ ਰਵਾਇਤੀ ਚੁੱਪੀ ਵਿਰੋਧੀਆਂ ਦੇ ਸੀਨੇ ਦੀ ਕੁਲਝਣ ਨੂੰ ਵਧਾ ਰਹੀ ਹੈ ਅਤੇ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਨਤੀਜੇ ਨੇ ਵਿਰੋਧੀਆਂ ਦੇ ਮੂੰਹ 11 ਮਾਰਚ ਤੱਕ ਸਿਉਂ ਜਿਹੇ ਦਿੱਤੇ ਹਨ। ਸਿਆਸੀ ਮਾਹਰ ਦਿੱਲੀ ਅਤੇ ਪੰਜਾਬ ਦੇ ਸਿਆਸੀ ਮਾਹੌਲ ’ਚ ਜ਼ਮੀਨ ਅਸਮਾਨ ਦਾ ਅੰਤਰ ਮੰਨਦੇ ਹਨ। 
ਪਿੰਡ ਬਾਦਲ ਪਰਤਣ ਮਗਰੋਂ ਪ੍ਰਕਾਸ਼ ਸਿੰਘ ਬਾਦਲ ਨੇ ਅੱਜ ਕੁਝ ਵਰਕਰਾਂ ਨਾਲ ਮੁਲਾਕਾਤ ਕੀਤੀ। ਪਿੰਡ ਬਾਦਲ ’ਚ ਇੱਕ-ਦੋ ਪਰਿਵਾਰਾਂ ਵਿੱਚ ਮੌਤਾਂ ਕਰਕੇ ਦੁੱਖ ਪ੍ਰਗਟ ਕਰਨ ਲਈ ਗਏ। ਇਸ ਦੌਰਾਨ ਦੋ-ਤਿੰਨ ਅਕਾਲੀ ਉਮੀਦਵਾਰ ਵੀ ਮੁੱਖ ਮੰਤਰੀ ਬਾਦਲ ਨਾਲ ਮੁਲਾਕਾਤ ਲਈ ਪੁੱਜੇ। 
ਲੰਬੀ ਸੀਟ ਤੋਂ ਮੁੱਖ ਮੰਤਰੀ ਨੂੰ ਉਨ੍ਹਾਂ ਦੇ ਗੜ੍ਹ ਵਿੱਚ ਵੰਗਾਰਨ ਵਾਲੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਲੜਕੇ ਰਣਇੰਦਰ ਸਿੰਘ ਵੀ 9 ਮਾਰਚ ਨੂੰ ਸ਼ਾਮ ਪਿੰਡ ਬਾਦਲ ਪੁੱਜ ਰਹੇ ਹਨ, ਜੋ ਕਿ ਲੰਬੀ ਹਲਕੇ ’ਚ ਅਮਰਿੰਦਰ ਸਿੰਘ ਦੀ ਚੋਣ ਮੁਹਿੰਮ ਦੇ ਮੁੱਖ ਸਿਪਹਸਾਲਾਰ ਸਨ। ਜਿਨ੍ਹਾਂ ਮਹੇਸ਼ਇੰਦਰ-ਖੁੱਡੀਆਂ ਧੜੇ ਦੇ ਸਹਿਯੋਗ ਨਾਲ ਚੋਣ ਮੁਹਿੰਮ ਨੂੰ ਸਿਖ਼ਰ ’ਤੇ ਪਹੁੰਚਾਇਆ। ਕਾਂਗਰਸੀ ਸੂਤਰਾਂ ਅਨੁਸਾਰ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਰਨੈਲ ਸਿੰਘ ਵੀ ਦਿੱਲੀ ਵਿਖੇ ਪਰਿਵਾਰਕ ਰੁਝੇਂਵਿਆਂ ਅਤੇ ਸਿਆਸੀ-ਸਮਾਜਿਕ ਸਰਗਰਮੀਆਂ ਨਿਪਟਾ ਕੇ 10 ਮਾਰਚ ਨੂੰ ਲੰਬੀ ਹਲਕੇ ’ਚ ਚੋਣ ਨਤੀਜੇ ਲਈ ਪੁੱਜ ਜਾਣਗੇ। ਉਂਝ ਜਰਨੈਲ ਸਿੰਘ ਵੋਟਾਂ ਉਪਰੰਤ ਕਈ ਦਿਨ ਬਾਅਦ ਤੱਕ ਵਰਕਰਾਂ ਨਾਲ ਮੁਲਾਕਾਤ ਕਰਕੇ ਪ੍ਰਚਾਰ ’ਚ ਪਾਏ ਯੋਗਦਾਨ ਲਈ ਹੌਂਸਲਾ ਅਫਜਾਈ ਕਰਦੇ ਰਹੇ ਹਨ। ਅਕਾਲੀ ਦਲ (ਅ) ਦੇ ਅੰਮ੍ਰਿਤਸਰ ਦੇ ਉਮੀਦਵਾਰ ਬਲਜਿੰਦਰ ਸਿੰਘ ਮੋਰਜੰਡ ਵੀ ਆਪਣੇ ਜੱਦੀ ਸੂਬੇ ਰਾਜਸਥਾਨ ਦੌਰੇ ਮਗਰੋਂ ਐਤਵਾਰ ਨੂੰ ਲੰਬੀ ਹਲਕੇ ’ਚ ਪਰਤ ਆਏ ਹਨ। ਉੱਧਰ ਚੋਣ ਪ੍ਰਸ਼ਾਸਨ ਨੇ ਲੰਬੀ ਹਲਕੇ ਦੇ ਵੋਟਾਂ ਦੀ ਗਿਣਤੀ ਲਈ ਮਿਮਿਟ ਮਲੋਟ ਵਿੱੱਚ ਵੱਡੇ ਪੱਧਰ ’ਤੇ ਤਿਆਰੀਆਂ ਵਿੱਢੀਆਂ ਹੋਈਆਂ ਹਨ। ਅੱਜ ਪੰਜਾਬ ਦੇ ਮੁੱਖ ਚੋਣ ਕਮਿਸ਼ਨਰ ਵੀ.ਕੇ ਸਿੰਘ ਨੇ ਚੋਣ ਪ੍ਰਬੰਧਾਂ ਦਾ ਜਾਇਜ਼ਾ ਲਿਆ ਹੈ। 

‘ਰਾਮ ਦੀ ਸਾਰ ਲੈਣ ਪੁੱਜਿਆ ਲਛਮਣ’
ਪੁੱਤਰਾਂ ਦੇ ਸਹੇੜੇ ਦੁਫੇੜੇ ਬਾਅਦ ਵੀ ‘ਰਾਮ-ਲਛਮਣ’ ਅਖਵਾਉਂਦੇ ਪਾਸ਼ ਅਤੇ ਦਾਸ ਕਦੇਂ-ਕਦਾਈਂ ਦੁੱਖ-ਸੁੱਖ ਸਾਂਝੇ ਕਰ ਹੀ ਲੈਂਦੇ ਹਨ। ਗੁਰਦਾਸ ਸਿੰਘ ਬਾਦਲ (ਦਾਸ) ਆਪਣੇ ਵੱਡੇ ਭਰਾ ਪ੍ਰਕਾਸ਼ ਸਿੰਘ ਬਾਦਲ (ਪਾਸ਼) ਦੇ ਅਮਰੀਕਾ ਤੋਂ ਸਿਹਤ ਜਾਂਚ ਉਪਰੰਤ
ਬਾਦਲ ਪਿੰਡ ਪੁੱਜਣ ’ਤੇ ਅੱਜ ਸੁੱਖ-ਸਾਂਦ ਪੁੱਛਣ ਲਈ ਗਏ। ਸਵੇਰੇ ਸਵਾ 10 ਵਜੇ ਬਾਦਲਾਂ ਦੀ ਰਿਹਾਇਸ਼ ’ਤੇ ਦਾਸ ਨੇ ਪਾਸ਼ ਨਾਲ 10-12 ਮਿੰਟ ਸਾਂਝੇ ਕੀਤੇ। ਪਤਾ ਲੱਗਿਆ ਹੈ ਕਿ ਦੋਵੇਂ ਭਰਾ ਧੱੁਪੇ ਲਾੱਨ ’ਚ ਇਕੱਲੇ ਬੈਠੇ ਰਹੇ। ਇਸ ਮੌਕੇ ਸੁਖਬੀਰ ਸਿੰਘ ਬਾਦਲ ਵੀ ਰਿਹਾਇਸ਼ ’ਤੇ ਮੌਜੂਦ ਸਨ ਪਰ ਉਹ ਆਪਣੇ ਚਾਚੇ ਨੂੰ ਮਿਲਣ ਲਈ ਖਾਤਰ ਬਾਹਰ ਆਉਣ ਨੂੰ ਤਰਜੀਹ ਨਹੀਂ ਦਿੱਤੀ। ਸੂਤਰ ਅਨੁਸਾਰ ਉਦੋਂ ਅੰਦਰ ਕੋਠੀ ’ਚ ਸੁੱਤੇ ਹੋਏ ਹਨ। ਜ਼ਿਕਰਯੋਗ ਹੈ ਕਿ ਗੁਰਦਾਸ ਬਾਦਲ ਹਮੇਸ਼ਾਂ ਆਪਣੇ ਭਰਾ ਨਾਲ ਦੁਫੇੜ ਪੈਣ ਲਈ ਭਤੀਜੇ ਸੁਖਬੀਰ ਸਿੰਘ ਬਾਦਲ ਨੂੰ ਜੁੰਮੇਵਾਰ ਦੱਸਦੇ ਰਹੇ ਹਨ। ਗੁਰਦਾਸ ਸਿੰਘ ਬਾਦਲ ਦੇ ਨਜ਼ਦੀਕੀਆਂ ਅਨੁਸਾਰ ਦਾਸ ਜੀ ਭਰਾ ਵਜੋਂ ਬਾਦਲ ਸਾਬ੍ਹ ਦੀ ਸਿਹਤਯਾਬੀ ਪੁੱਛਣ ਲਈ ਗਏ ਸਨ।

07 March 2017

ਬਾਦਲਾਂ ਦੀ 'ਮੁਫ਼ਤ-ਮੁਫ਼ਤ-ਮੁਫ਼ਤ' ਖੇਡ ਨੇ ਵਿਗਾੜੀਆਂ ਆਦਤਾਂ

*  ਸਰਕਾਰੀ ਪਾਣੀ ਨੂੰ ‘ਪ੍ਰਾਹੁਣਿਆਂ’ ਵਾਂਗ ਵਰਤਣ ਵਾਲੇ ‘ਮੁਫ਼ਤਖ਼ੋਰਾਂ’ ਨੇ ਜਲ ਸਪਲਾਈ ਦੀ ਲੱਸੀ ਕੱਢੀ
*  ਦੋ ਤੋਂ ਸਵਾ 3 ਰੁਪਏ ਰੋਜ਼ਾਨਾ ਬਚਾਉਣ ਵਾਲੇ ਲੋਕ ਹੁਣ ਖਰੀਦੇ ਰਹੇ 3-3 ਸੌ ਰੁਪਏ ਪਾਣੀ ਦੇ ਟੈਂਕ
*  ਵੀ.ਆਈ.ਪੀ. ਹਲਕੇ ’ਚ ਜਲ ਸਪਲਾਈ ਦੇ ਡਿਫਾਲਟਰਾਂ ਅਤੇ ਨਜਾਇਜ਼ ਕੁਨੈਕਸ਼ਨਾਂ ਦੀ 80 ਤੋਂ 90 ਫ਼ੀਸਦੀ

                                                                ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਸਰਕਾਰੀ ਪਾਣੀ ਨੂੰ ‘ਪ੍ਰਾਹੁਣਿਆਂ’ ਵਾਂਗ ਵਰਤਣ ਵਾਲੇ ‘ਮੁਫ਼ਤਖ਼ੋਰ’ ਖਪਤਕਾਰਾਂ ਨੇ ਸਮੁੱਚੇ ਪੇਂਡੂ ਜਲ ਸਪਲਾਈ ਢਾਂਚੇ ਦੀ ਲੱਸੀ ਕੱਢ ਕੇ ਰੱਖ ਦਿੱਤੀ। ਪਿੰਡਾਂ ਵਿੱਚ ਵਾਟਰ ਵਰਕਸਾਂ ਦੇ ਬਿਜਲੀ ਕੁਨੈਕਸ਼ਨ ਕੱਟੇ ਜਾਣ ਮਗਰੋਂ ਲੋਕ ਸੌ ਤੋਂ ਡੇਢ ਸੌ ਗੁਣਾ ਖਰਚ ਕੇ ਤਿੰਨ-ਤਿੰਨ ਸੌ ਰੁਪਏ ’ਚ ਪ੍ਰਤੀ ਟੈਂਕ ਪਾਣੀ ਖਰੀਦ ਰਹੇ ਹਨ ਅਤੇ ਕਈ ਰਜਵਾਹਿਆਂ ਤੋਂ ਪਾਣੀ ਲਿਆ ਰਹੇ ਹਨ। ਦੂਜੇ ਪਾਸੇ ਘਰੇ ਟੂਟੀ ਰਾਹੀਂ ਆਉਂਦੇ ਪੇਂਡੂ ਜਲ ਸਪਲਾਈ ਦਾ ਬਿੱਲ ਸਿਰਫ਼ 2 ਤੋਂ ਸਵਾ ਤਿੰਨ ਰੁਪਏ ਰੋਜ਼ਾਨਾ ਪੈਂਦਾ ਹੈ। ਬਹੁ-ਗਿਣਤੀ
ਲੋਕਾਂ ਨੇ ਅਕਾਲੀ ਸਰਕਾਰ ਦੇ ਮੁਫ਼ਤ ਬਿਜਲੀ-ਪਾਣੀ ਦੇ ਸੁਆਦ ’ਚ ਜਲ ਸਪਲਾਈ ਦੇ ਪਾਣੀ ਨੂੰ ਮੁਫ਼ਤ ਦਾ ਮਾਲ ਸਮਝ ਲਿਆ। ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦਾ ਘਰੇਲੂ ਜਲ ਸਪਲਾਈ ਦਾ ਪ੍ਰਤੀ ਮਹੀਨਾ ਬਿੱਲ 60 ਰੁਪਏ ਮਹੀਨਾ ਹੈ ਅਤੇ ਪੰਚਾਇਤਾਂ ਦੇ ਅਧੀਨ ਵਾਟਰ ਵਰਕਸਾਂ ਵਿੱਚ ਸੌ ਰੁਪਏ ਪਤੀ ਮਹੀਨਾ ਬਿੱਲ ਹੈ। ਲੰਬੀ ਹਲਕੇ ਵਿੱਚ ਕਰੀਬ ਤਿੰਨ ਦਰਜਨ ਵਾਟਰ ਵਰਕਸਾਂ ਦੇ ਬਿਜਲੀ ਕੁਨੈਕਸ਼ਨ ਕੱਟੇ ਹੋਏ ਹਨ। ਦਿਨੋਂ ਦਿਨ ਮੌਸਮ ’ਚ ਗਰਮੀ ਵਧਣ ਕਰਕੇ ਪਾਣੀਆਂ ਲੋੜਾਂ ਵਧ ਰਹੀਆਂ ਹਨ। ਅਜਿਹੇ ਵਿੱਚ ਪਾਣੀ ਦੀ ਥੁੜ ’ਚ ਘਰੇਲੂ ਜ਼ਰੂਰਤਾਂ ਵਿੱਚ ਦਿੱਕਤਾਂ ਵਧ ਰਹੀਆਂ ਹਨ। ਕਾਫ਼ੀ ਗਿਣਤੀ ਲੋਕ ਪਾਣੀ ਦੇ ਬਿੱਲ ਭਰਨ ਦੀ ਪੈਰਵੀ ਵੀ ਕਰਦੇ ਹਨ। ਜਦੋਂ ਕਿ ਆਮ ਲੋਕਾਂ ਦਾ ਪੰਚਾਇਤਾਂ ਅਤੇ ਵਿਭਾਗ ’ਤੇ ਬਿੱਲ ਉਗਰਾਹੀ ਨਾ ਕਰਨ ਦਾ ਗੁੱਸਾ ਵੀ ਨਿੱਕਲ ਰਿਹਾ ਹੈ। ਲੰਬੀ ਹਲਕੇ ’ਚ ਵੋਟਾਂ ਨੇੜੇ ਹੋਣ ਕਰਕੇ ਪੰਚਾਇਤਾਂ ਅਤੇ ਵਿਭਾਗ ਨੇ ਕਾਫ਼ੀ ਸਮੇਂ ਪਾਣੀ ਬਿੱਲ ਉਗਰਾਹੁਣ ਤੋਂ ਪਾਸਾ ਵੱਟੀ ਰੱਖਿਆ। ਮੁਫ਼ਤਖ਼ੋਰੀ ਦੇ ਸ਼ੌਂਕੀਨ ਬਣੇ ਹਲਕੇ ਦੇ ਵੀ.ਆਈ.ਪੀ. ਵੋਟਰ ਕੀਮਤੀ ਜਲ ਸਪਲਾਈ ਦੀ ਖੁੱਲੇ੍ਹਆਮ ਦੁਰਵਰਤੋਂ ਦੇ ਆਦੀ ਬਣੇ ਗਏ।
ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਲੰਬੀ ਸਬਡਿਵੀਜਨ ਦੇ 24 ਪਿੰਡਾਂ ਵਿਚੋਂ 10 ਵਾਟਰ ਵਰਕਸਾਂ ਦਾ ਚਾਰਜ਼ ਵਿਭਾਗ ਕੋਲ ਹੈ। 14 ਪਿੰਡਾਂ ਦੀ ਜਲ ਸਪਲਾਈ ਪੰਚਾਇਤਾਂ ਕੋਲ ਹਨ। ਵਿਭਾਗ ਹੇਠਲੇ ਤਿੰਨ ਵਾਟਰ ਵਰਕਸ ਲੰਬੀ, ਸ਼ੇਰਾਂਵਾਲੀ, ਧੌਲਾ-ਕਿੰਗਰਾ ਦੇ ਕੁਨੈਕਸ਼ਨ ਕੱਟੇ ਹੋਏ ਹਨ। ਵਿਭਾਗੀ ਸੂਤਰਾਂ ਦਾ ਕਹਿਣਾ ਹੈ ਕਿ ਵਿਭਾਗ ਅਧੀਨ 10 ਪਿੰਡਾਂ ’ਚ ਲਗਪਗ 28 ਸੌ ਕੁਨੈਕਸ਼ਨ ਹਨ। ਜਿਨ੍ਹਾਂ ਤੋਂ ਲਗਪਗ 77 ਲੱਖ ਰੁਪਏ ਦੇ ਬਿੱਲਾਂ ਦੀ ਉਗਰਾਹੀ ਬਾਕੀ ਹੈ। ਸੂਤਰਾਂ ਅਨੁਸਾਰ ਹਰ ਪਿੰਡ ’ਚ ਸੈਂਕੜੇ ਕੁਨੈਕਸ਼ਨ ਨਜਾਇਜ਼ ਹਨ ਅਤੇ ਵਿਭਾਗ ਜਾਂ ਪੰਚਾਇਤਾਂ ਦੀ ਉਨ੍ਹਾਂ ਵੱਲ ਤੱਕਣ ਦੀ ਜੁਰੱਅਤ ਨਹੀਂ। ਲੰਬੀ ਦੀ ਅੌਰਤ ਅਕਾਲੀ ਸਰਪੰਚ ਦੇ ਪਤੀ ਸੁਖਵੰਤ ਸਿੰਘ ਅਨੁਸਾਰ ਲੰਬੀ ’ਚ ਲਗਪਗ 3 ਸੌ ਨਜਾਇਜ਼ ਕੁਨੈਕਸ਼ਨ ਹਨ ਅਤੇ 90 ਫ਼ੀਸਦੀ ਜਾਇਜ਼ ਕੁਨੈਕਸ਼ਨ ਧਾਰਕਾਂ ਵਿੱਚ ਪਾਣੀ ਬਿੱਲਾਂ ਦੇ ਡਿਫਾਲਟਰ ਹਨ। ਇਹ ਪਤਾ ਲੱਗਿਆ ਹੈ ਕਿ ਇੱਕ-ਇੱਕ ਘਰ ਨੇ ਦੋ-ਦੋ ਤਿੰਨ ਕੁਨੇਕਸ਼ਨ ਨਜਾਇਜ਼ ਲਗਵਾਏ ਹੋਏ ਹਨ। ਅਜਿਹੇ ਹਾਲਾਤ ਲੰਬੀ ਹਲਕੇ ਦੇ ਲਗਪਗ ਹਰੇਕ ਪਿੰਡ ਵਿੱਚ ਬਣੇ ਹੋਏ ਹਨ। ਹਲਕੇ ਤੋਂ ਸਭ ਤੋਂ ਵੱਡੇ ਕਸਬੇ ਰੂਪੀ ਪਿੰਡ ਮੰਡੀ ਕਿੱਲਿਆਂਵਾਲੀ ’ਚ ਕਰੀਬ 982 ਜਾਇਜ਼ ਕੁਨੈਕਸ਼ਨ ਅਤੇ ਇੱਕ 17-18 ਸੌ ਕੁਨੈਕਸ਼ਨ ਨਜਾਇਜ਼ ਹਨ। ਕੁਨੈਕਸ਼ਨ ਧਾਰਕਾਂ ਵੱਲ ਵਿਭਾਗ ਦੇ 33 ਲੱਖ ਰੁਪਏ ਪਾਣੀ ਬਿੱਲ ਬਕਾਇਆ ਹਨ। ਜਦੋਂ ਕਿ 56 ਲੱਖ ਰੁਪਏ ਦਾ ਬਿਜਲੀ ਬਿੱਲ ਬਕਾਇਆ ਹੋਣ ਕਰਕੇ ਕੁਨੈਕਸ਼ਨ ਕੱਟ ਦਿੱਤਾ ਗਿਆ ਹੈ। ਮੰਡੀ ਕਿੱਲਿਆਂਵਾਲੀ ਵਾਟਰ ਵਰਕਸ ਦਾ ਪ੍ਰਤੀ ਮਹੀਨੇ ਬਿਜਲੀ ਬਿੱਲ ਕਰੀਬ 1.80 ਲੱਖ ਆਉਂਦਾ ਹੈ। ਪਾਣੀ ਬਿੱਲਾਂ ਦੀ ਉਗਰਾਹੀ ਸਿਰਫ਼ 30-35 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਹੈ। ਕਸਬੇ ’ਚ
ਕੁਨੈਕਸ਼ਨ ਧਾਰਕ ਆਂਢ-ਗੁਆਂਢ ’ਚ ’ਚ ਨਜਾਇਜ਼ ਕੁਨੈਕਸ਼ਨ ਵੇਖ ਪਾਣੀ ਬਿੱਲ ਭਰਨ ਤੋਂ ਮੁਨਕਰ ਹਨ। ਵਿਭਾਗ ਅਕਾਲੀ ਦਲ ਦੇ ਆਗੂਆਂ ਦੀ ਧੱਕੜਪੁਨੇ ਮੂਹਰੇ ਦਸ ਸਾਲ ਤੱਕ ਪੂੱਛਾਂ ਦੱਬ ਕੇ ਵੇਲਾ ਲੰਘਾਉਂਦਾ ਆ ਰਿਹਾ ਹੈ। ਇਸ ਸਬਡਿਵੀਜਨ ’ਚ ਮੰਡੀ ਕਿੱਲਿਆਂਵਾਲੀ, ਭੀਟੀਵਾਲਾ, ਵੜਿੰਗਖੇੜਾ, ਫਤੂਹੀਵਾਲਾ, ਸਿੰਘੇਵਾਲਾ, ਢਾਣੀ ਸਿੰਘੇਵਾਲਾ, ਢਾਣੀ ਤੇਲਿਆਂਵਾਲੀ ਵਗੈਰਾ ਦੇ ਕੁਨੈਕਸ਼ਨ ਕੱਟੇ ਹੋਏ ਹਨ। ਬਿੱਲ ਉਗਰਾਹੀ ਪੱਖੋਂ ਜਲ ਸਪਲਾਈ ਸਿਸਟਮ ਦੇ ਫੇਲ੍ਹ ਹੋਣ ਦਾ ਕਾਰਨ ਪੰਚਾਇਤ ਉੱਪਰ ਵਿਭਾਗ ਦਾ ਡੰਡਾ ਨਾ ਹੋਣਾ ਵੀ ਮੰਨਿਆ ਜਾ ਰਿਹਾ ਹੈ। ਹੈਰਾਨੀ ਭਰਿਆ ਤੱਥ ਹੈ ਵਿਭਾਗ ਕੋਲ ਪੰਚਾਇਤਾਂ ਅਧੀਨ ਵਾਟਰ ਵਰਕਸਾਂ ਦੇ ਜਾਇਜ਼-ਨਜਾਇਜ਼ ਪਾਣੀ ਕੁਨੈਕਸ਼ਨਾਂ ਦੀ ਗਿਣਤੀ, ਡਿਫਾਲਟਰਾਂ ਵਗੈਰਾ ਦੇ ਅੰਕੜੇ ਪੱਖੋਂ ਪੂਰੀ ਤਰ੍ਹਾਂ ਖਾਲੀ ਹਨ। 21 ਪਿੰਡਾਂ ਦੀ ਜਲ ਸਪਲਾਈ ਪੰਚਾਇਤਾਂ ਅਧੀਨ ਹੈ। ਮੰਡੀ ਕਿੱਲਿਆਂਵਾਲੀ ’ਚ ਕੁਝ ਲੋਕਾਂ ਨੇ ਨਜਾਇਜ਼ ਕੁਨੈਕਸ਼ਨਾਂ ਖਿਲਾਫ਼ ਮੁਹਿੰਮ ਵਿੱਢੀ ਸੀ ਪਰ ਸੱਤਾਪੱਖੀ ਦਬਾਅ ਮੂਹਰੇ ਗੱਲ ਉਥੇ ਹੀ ਦਬ ਗਈ। ਪਿੰਡ ਲੁਹਾਰਾ ਦੀ ਅੌਰਤ ਅਮਨਦੀਪ ਕੌਰ ਨੇ ਪਾਣੀ ਦੀ ਸਹੂਲਤ ਬਰਕਰਾਰ ਰੱਖਣ ਲਈ ਬਿੱਲ ਭਰਨ ਦੀ ਵਕਾਲਤ ਕੀਤੀ ਅਤੇ 5-6 ਮਹੀਨੇ ਤੋਂ ਕੋਈ ਬਿੱਲ ਲੈਣ ਨਹੀਂ ਆਇਆ। ਸਾਨੂੰ ਸੌ ਰੁਪਏ ਪ੍ਰਤੀ ਮਹੀਨਾ ਪਾਣੀ ਬਿੱਲ ਦੇਣਾ ਸੌਖਾ ਹੈ ਇਹ ਕੋਈ ਵੱਡੀ ਰਕਮ ਨਹੀਂ। ਕਿਸਾਨ ਅਮਨਦੀਪ ਸਿੰਘ ਨੇ ਕਿਹਾ ਕਿ ਸਵਾ 3 ਰੁਪਏ ਰੋਜ਼ਾਨਾ ਨਹਿਰੀ ਪਾਣੀ ਘਰ ਬੈਠਿਆਂ ਮਿਲਣਾ ਤਾਂ ਸਵਰਗ ਜਿਹੀ ਸਹੂਲਤ ਹੈ ਪਰ ਲੋਕ ਅਣਗਹਿਲੀ ਅਤੇ ਥੋੜ੍ਹੇ ਲਾਲਚ ਕਰਕੇ ਇਸ ਸਹੂਲਤ ਦਾ ਘਾਣ ਕਰ ਰਹੇ ਹਨ। ਸੁਰਿੰਦਰ ਕੌਰ ਨਾਮਕ ਬਜ਼ੁਰਗ ਅੌਰਤ ਨੇ ਕਿਹਾ ਕਿ ਵੱਡੇ ਵੱਡੇ ਬੰਦੇ ਬਿਜਲੀ ਦੇ ਬਿੱਲ ਨਹੀਂ ਭਰਦੇ ਅਤੇ ਅਕਾਲੀ ਸਰਕਾਰ ਨੇ ਲੋਕਾਂ ਨੂੰ ਬਿਜਲੀ ਮੁਫ਼ਤ, ਪਾਣੀ ਮੁਫ਼ਤ, ਆਹ ਮੁਫ਼ਤ, ਓਹ ਮੁਫ਼ਤ ਦਾ ਸੁਭਾਅ ਪਾ ਕੇ ਸਾਰਾ ਪੰਗਾ ਪਾਇਆ ਹੈ। ਹੁਣ ਲੋਕ ਭੁਗਤਣਗੇ ਜਦੋਂ ਇਕੱਠਾ ਬਿੱਲ ਭਰਨਾ ਪਿਆ। ਸਰਕਾਰ ਲੋਕਾਂ ਵੱਲੋਂ ਪੀਤੇ ਪਾਣੀ ਦਾ ਬਿੱਲ ਕਦੋਂ ਤੱਕ ਭਰੂ।
ਵਾਟਰ ਵਰਕਸ ਨੂੰ ਜਾਂਦੀ ਪਾਈਪ ਦੀ ਹੋਦੀ ਵਿਚੋਂ ਪਾਣੀ ਭਰਦੇ ਨੌਜਵਾਨਾਂ ਨੇ ਐਵੇਂ ਮੁਫ਼ਤ ਮੁਫ਼ਤ ਵਾਲਾ ਪੰਗਾ ਪਾ ਰੱਖਿਐ ਸਵੇਰ ਤੋਂ ਸਾਇਕਲ ’ਤੇ ਪਾਣੀ ਢੋਹ-ਢੋਹ ਕੇ ਕਮਲੇ ਹੋ ਗਏ। ਕਾਮਰੇਡ ਸੁਖਪਾਲ ਸਿੰਘ ਲੰਬੀ ਨੇ ਕਿਹਾ ਕਿ ਮੁਫ਼ਤਖ਼ੋਰੀ ਦਾ ਆਦਤ ਪਹਿਲਾਂ ਪਹਿਲਾਂ ਚੰਗੀ ਲੱਗਦੀ ਸੀ ਪਰ ਹੁਣ ਇਹ ਭੱਠਾ ਬਿਠਾਉਣ ਲੱਗੀ ਹੈ। ਲੋਕ ਸਰਕਾਰਾਂ ਦੀ ਮਿੱਠੀਆਂ ਗੋਲੀਆਂ ਦੇ ਅੜਿੱਕੇ ਚੜ੍ਹ ਕੇ ਬੁਨਿਆਦੀ ਸਹੁੂਲਤਾਂ ਦਾ ਘਾਣ ਕਰ ਰਹੇ ਹਨ। ਲੰਬੀ ਅਤੇ ਮੰਡੀ ਕਿੱਲਿਆਂਵਾਲੀ ਸਬਡਿਵੀਵਨ ਦੇ ਐਸ.ਡੀ.ਓ. ਸੁਰਿੰਦਰ ਕੁਮਾਰ ਨੇ ਕਿਹਾ ਕਿ ਬਿਜਲੀ ਬਿੱਲਾਂ ਦੀ ਕਿਸ਼ਤਾਂ ਵਗੈਰਾ ਭਰ ਕੇ ਜਨਤਾ ਨੂੰ ਪਾਣੀ ਸੰਕਤ ਤੋਂ ਬਚਾਉਣ ਲਈ ਵਾਟਰ ਵਰਕਸਾਂ ਦੇ ਕੁਨੈਕਸ਼ਨ ਚਾਲੂ ਕਰਵਾਏ ਜਾਣਗੇ। ਉਨ੍ਹਾਂ ਕਿਹਾ ਕਿ ਪਾਣੀ ਬਿੱਲ ਉਗਰਾਹੀ ਦੀ ਮੁਹਿੰਮ ਵਿੱਢ ਕੇ ਜਲ ਸਪਲਾਈ ਸਕੀਮ ਨੂੰ ਆਰਥਿਕ ਪੱਖੋਂ ਮੁੜ ਲੀਹ ’ਤੇ ਲਿਆਂਦਾ ਜਾਵੇਗਾ। ਜਿਸ ਵਿੱਚ ਜਨਤਾ ਦੇ ਸਹਿਯੋਗ ਦੀ ਜ਼ਰੂਰਤ ਹੋਵੇਗੀ। 

90 ਫ਼ੀਸਦੀ ਉਗਰਾਹੀ ਨਾਲ ਖਿਉਵਾਲੀ ਅੱਵਲ
ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਖਾਤੇ ਖਿਉਵਾਲੀ ਇਕਲੌਤਾ ਅੱਵਲ ਪਿੰਡ ਹੈ। ਜਿੱਥੋਂ ਦੇ 90 ਫ਼ੀਸਦੀ ਕੁਨੈਕਸ਼ਨ ਧਾਰ ਬਿੱਲ ਭਰਨ ਨੂੰ ਤਰਜੀਹ ਦਿੰਦੇ ਹਨ। ਦੂਜੇ ਹਲਕੇ ਦੇ ਹੋਰਨਾਂ ਪਿੰਡਾਂ ’ਚ 80-90 ਫ਼ੀਸਦੀ ਡਿਫ਼ਾਲਟਰ ਅਤੇ ਨਜਾਇਜ਼ ਕੁਨੇੈਕਸ਼ਨ ਹਨ।

ਡੱਬਵਾਲੀ ਦਾ ਸਰਕਾਰੀ ਕਾਲਜ ਬਣਿਆ ਰਾਸ਼ਟਰੀ ਸਵੈਸੇਵਕ ਸੰਘ ਗਤੀਵਿਧੀਆਂ ਦਾ ਕੇਂਦਰ

- ਵਿਵੇਕਾਨੰਦ ਵਿਚਾਰ ਮੰਚ ਜਰੀਏ ਵਿਦਿਆਰਥੀਆਂ ਦਾ ਹੋ ਰਿਹਾ ਭਗਵਾਕਰਨ
- ਵਿਚਾਰ ਮੰਚ ਦੇ ਮੈਂਬਰਾਂ ਨੂੰ ਸਰਕਾਰੀ ਖਰਚੇ ’ਤੇ ਜੈਪੂਰ ਟੂਰ, ਬਾਕੀਆਂ ਨੂੰ ਦੁਤਕਾਰ
- ਪਿੰ੍ਰੰਸੀਪਲ ਦੀ ਕਾਰਜਪ੍ਰਣਾਲੀ ਵਿਵਾਦਾਂ ’ਚ : ਲੈਚਕਰਾਰਾਂ/ ਵਿਦਿਆਰਥੀਆਂ ਨੇ ਲਗਾਏ ਗੰਭੀਰ ਦੋਸ਼
- ਡੱਬਵਾਲੀ ਦੀ ਐਸ.ਡੀ.ਐਮ. ਕੋਲ ਪੜਤਾਲ

ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ-ਡਾ. ਬੀ.ਆਰ ਅੰਬਦੇਕਰ ਸਰਕਾਰੀ ਕਾਲਜ (ਪਿੰਡ ਡੱਬਵਾਲੀ) ਦੇ ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਕਾਲਜ ਨੂੰ ਰਾਸ਼ਟਰੀ ਸਵੈਸੇਵਕ ਸੰਘ (ਆਰ.ਐਸ.ਐਸ) ਦੀਆਂ ਗਤੀਵਿਧੀਆਂ ਦਾ ਕੇਂਦਰ ਬਣਾਉਣ ਲਈ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਕਾਰਜਕਾਰੀ ਪ੍ਰਿੰਸੀਪਲ ਵੱਲੋਂ ਗਠਿਤ ਵਿਵੇਕਾਨੰਦ ਵਿਚਾਰ ਮੰਚ ਸਦਕਾ ਵਿਦਿਆਰਥੀਆਂ ਨੂੰ ‘ਹਿੰਦੂ’ ਅਤੇ ‘ਗੈਰ-ਹਿੰਦੂ’ ਵਿੱਚ ਵੰਡੇ ਗਏ ਹਨ। ਵਿਵੇਕਾਨੰਦ ਵਿਚਾਰ ਮੰਚ ਦਾ ਮੈਂਬਰ ਬਣਨ ਨੂੰ ‘ਚੰਗੇ ਵਿਦਿਆਰਥੀ’ ਦਾ ਰੁਤਬਾ ਮਿਲਦਾ ਹੈ ਅਤੇ ਮੰਚ ਤੋਂ ਦੂਰੀ
ਰੱਖਣ ਵਾਲੇ ਵਿਦਿਆਰਥੀਆਂ-ਵਿਦਿਆਰਥਣਾਂ ਨੂੰ ਕਾਰਜ: ਪ੍ਰਿੰਸੀਪਲ ਦੀ ਕਥਿਤ ਨਾ-ਸਹਿਨਯੋਗ ਮੰਦੀ ਸ਼ਬਦਾਵਲੀ ਅਤੇ ਹੇਠਲੇ ਦਰਜੇ ਦੇ ਵਿਵਹਾਰ ਦਾ ਸ਼ਿਕਾਰ ਹੋਣਾ ਪੈਂਦਾ ਹੈ। ਰਾਕੇਸ਼ ਵਧਵਾ ਦੀ ਕਾਰਜਪ੍ਰਣਾਲੀ ਤੋਂ ਤੰਗ ਸੈਂਕੜੇ ਵਿਦਿਆਰਥੀ ਅੱਜ ਟਰੈਕਟਰ ਟਰਾਲੀਆਂ ’ਤੇ ਭਰ ਕੇ ਐਸ.ਡੀ.ਐਮ. ਡੱਵਬਾਲੀ ਸੰਗੀਤਾ ਤੇਤਰਵਾਲ ਕੋਲ ਪੁੱਜ ਗਏ ਅਤੇ ਲਿਖਤੀ ਸ਼ਿਕਾਇਤ ਸੌਂਪੀ। ਇਸਤੋਂ ਪਹਿਲਾਂ ਕਾਲਜ ’ਚ ਕਾਫ਼ੀ ਹੰਗਾਮਾ ਹੋਇਆ। ਹਾਲਾਂਕਿ ਕਾਲਜ ’ਚ ਵਿਚਾਰ ਮੰਚ ਦੇ ਕੁਝ ਵਿਦਿਆਰਥੀ ਰਾਕੇਸ਼ ਵਧਵਾ ਦੀ ਹਮਾਇਤ ’ਤੇ ਡਟੇ ਵਿਖਾਈ ਦਿੱਤੇ। ਕਾਲਜ ਦੇ ਪੱਕੇ ਲੈਕਚਰਾਰਾਂ ਨੇ ਪਹਿਲਾਂ ਹੀ ਕਾਰਜਕਾਰੀ ਪ੍ਰਿੰਸੀਪਲ ’ਤੇ ਗੰਭੀਰ ਦੋਸ਼ਾਂ ਵਾਲੀ ਸ਼ਿਕਾਇਤ ਸਰਕਾਰ ਨੂੰ ਭੇਜੀ ਹੋਈ ਹੈ। ਜਿਸਦੀ ਪੜਤਾਲ ਐਸ.ਡੀ.ਐਮ ਕੋਲ ਹੈ। ਬੀਤੇ ਦਿਨ੍ਹੀਂ ਲੈਕਚਰਾਰਾਂ ਨੇ ਪੜਤਾਲ ਤਹਿਤ ਆਪਣੇ ਬਿਆਨ ਦਰਜ ਕਰਵਾਏ ਸਨ। ਅੱਜ ਬਾਅਦ ਦੁਪਿਹਰ ਕਾਰਜਕਾਰੀ ਪ੍ਰਿੰਸੀਪਲ ਆਪਣਾ ਪੱਖ ਰੱਖਣ ਲਈ ਐਸ.ਡੀ.ਐਮ ਦਫਤਰ ਪਹੁੰਚੇ। ਅੱਜ ਅਹਿਤਿਆਤ ਵਜੋਂ ਕਾਲਜ ਕੈਂਪਸ ’ਚ ਪੁਲਿਸ ਤਾਇਨਾਤ ਰਹੀ। ਕਾਰਜਕਾਰੀ ਪ੍ਰਿੰਸੀਪਲ ਨੇ ਵਿਦਿਆਰਥੀਆਂ ਨੂੰ ਐਸ.ਡੀ.ਐਮ ਕੋਲ ਜਾਣੋਂ ਰੋਕਣ ਲਈ ਮੁੱਖ ਗੇਟ ਨੂੰ ਜਿੰਦਰਾ ਵੀ ਲਗਵਾ ਦਿੱਤਾ।
ਕਾਲਜ ਕੈਂਪਸ ਦੀ ਇਮਾਰਤ ਦੇ ਮੱਥੇ ਤੋਂ ਆਰ.ਐਸ.ਐਸ ਦੇ ਝਲਕਾਰੇ ਵੱਜਦੇ ਹਨ। ਜਿੱਥੇ ਆਰ.ਐਸ.ਐਸ ਦੇ ਬਾਨੀ ਮਾਧਵ ਸ਼ਿਵਰਾਓ ਗੋਵਲਕਰ ਦੀ ਤਸਵੀਰ ਅਤੇ ਧਰਮ ਲਈ ਜਿਉਣ ਅਤੇ ਸਮਾਜ ਲਈ ਜਿਉਣ.. ਪ੍ਰੇਰਦਾ ਜਿਹਾ ਭਾਵਨਾਤਮਿਕ ਸ਼ਬਦਾਂ ਵਾਲਾ ਵੱਡਾ ਹੋਰਡਿੰਗ ਲਗਾਇਆ ਹੋਇਆ ਹੈ। 
ਜ਼ਿਕਰਯੋਗ ਹੈ ਕਿ ਰਾਕੇਸ਼ ਵਧਵਾ ਦਾ ਪਰਿਵਾਰ ਮੁੱਢ ਤੋਂ ਭਾਜਪਾ ਅਤੇ ਆਰ.ਐਸ.ਐਸ ਨਾਲ ਜੁੜਿਆ ਹੋਇਆ ਹੈ। ਉਹ ਖੁਦ ਆਰ.ਐਸ.ਐਸ ਦੀ ਕਾਲਜ ਵਿਦਿਆਰਥੀ ਸ਼ਾਖਾ ਦੇ ਮੁਖੀ ਹਨ ਅਤੇ ਪਰਿਵਾਰ ਦੇ ਹੋਰ ਮੈਂਬਰ ਵੀ ਆਰ.ਐਸ.ਐਸ ਨਾਲ ਸਿੱਧੇ ਤੌਰ ’ਤੇ ਜੁੜੇ ਹੋਏ ਹਨ। ਉੁਨ੍ਹਾਂ ਦਾ ਛੋਟਾ ਭਰਾ ਵਿਜੈ ਵਧਵਾ ਜ਼ਿਲ੍ਹਾ ਸਿਰਸਾ ਭਾਜਪਾ ਦਾ ਮਹਾਂ ਮੰਤਰੀ ਹੈ।
ਵਿਦਿਆਰਥੀਆਂ ਨੇ ਸ਼ਿਕਾਇਤ ਵਿੱਚ ਦੋਸ਼ ਲਗਾਇਆ ਕਿ ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਦਾ ਰਵੱਈਆ ਵਿਦਿਆਰਥਣਾਂ ਪ੍ਰਤੀ ਬੇਹੱਦ ਮਾੜਾ, ਅਵਿਵਹਾਰਕ ਅਤੇ ਪੱਖਪਾਤੀ ਹੈ। ਪ੍ਰਿੰਸੀਪਲ ਵਿਦਿਆਰਥੀਆਂ ਵਿੱਚ ਵਿਚਾਰਧਾਰਾ ਦੇ ਆਧਾਰ ਵੰਡੀਆ ਪਾ ਦਿੱਤੀਆਂ ਹਨ। ਕਾਲਜ ’ਚ ਵਿਦਿਆਰਥੀਆਂ ਲਈ ਬੁੱਧਵਾਰ ਅਤੇ ਸ਼ਨੀਵਾਰ ਨੂੰ ਬੇਵਜ੍ਹਾ ਡਰੈੱੈਸ ਕੋਡ ਲਾਗੂ ਕੀਤਾ ਹੋਇਆ ਹੈ। ਵਿਦਿਆਰਥੀਆ ਨੇ ਡਰੱੈਸ ਨਾ ਪਾਉਣ ’ਤੇ ਉਨ੍ਹਾਂ ਨੂੰ ਪੇਪਰ ਵਿੱਚੋਂ ਉਠਾ ਦਿੱਤਾ ਜਾਂਦਾ ਹੈ। ਕਾਲਜ ਕੈਂਪਸ ਵਿੱਚ ਮੋਬਾਇਲ ਚਲਾਉਣ ’ਤੇ 5 ਸੌ ਰੁਪਏ ਜੁਰਮਾਨ ਜਾਂ ਆਰ.ਐਸ.ਐਸ. ਸ਼ਾਖਾ ’ਚ ਜਾਣ ਲਈ ਆਖਿਆ ਜਾਂਦਾ ਹੈ। ਵਿਦਿਆਰਥੀਆਂ ਨੇ ਕਿਹਾ ਕਿ ਸਰਕਾਰੀ ਖਰਚ ’ਤੇ ਜੈਪੁਰ ਟੂਰ ’ਤੇ ਲਿਜਾਏ ਗਏ 44 ਵਿਦਿਆਰਥੀਆਂ ਵਿਚੋਂ 40 ਵਿਵੇਕਾਨੰਦ ਵਿਚਾਰ ਮੰਚ ਦੇ ਮੈਂਬਰ ਹਨ। ਉਨ੍ਹਾਂ ਕਿਹਾ ਕਿ ਵਿਚਾਰ ਮੰਚ ਦੇ ਮੈਂਬਰਾਂ ਨੂੰ ਹਰ ਸਹੂਲਤ ਦਿੱਤੀ ਜਾਂਦੀ ਹੈ ਅਤੇ  ਦੂਜਿਆਂ ਨੂੰ ਦੁਤਕਾਰਿਆ ਅਤੇ ਮੰਦੀ ਭਾਸ਼ਾ ਤੱਕ ਬੋਲੀ ਜਾਂਦੀ ਹੈ। ਵਿਦਿਆਰਥੀਆਂ ਨੇ ਕਿਹਾ ਕਿ ਉਕਤ ਪ੍ਰਿੰਸੀਪਲ ਵਿਚਾਰ ਮੰਚ ਦਾ ਮੈਂਬਰ ਨਾ ਬਣਨ ਵਾਲੀਆਂ ਵਿਦਿਆਰਥਣਾਂ ਨੂੰ ਕਥਿਤ ਤੌਰ ’ਤੇ ਘੋੜੀ ਅਤੇ ਗਧੀ ਤੱਕ ਸੰਬੋਧਨ ਕਰਕੇ ਜਲੀਲ ਕਰਦੇ ਹਨ। ਸ਼ਿਕਾਇਤ ਵਿੱਚ ਆਖਿਆ ਕਿ ਰਾਕੇਸ਼ ਵਧਵਾ ਭੁਗੋਲ ਵਿਸ਼ੇ ਦੇ ਲੈਕਚਰਾਰ ਹਨ। ਉਨ੍ਹਾਂ ਕੋਲ ਪ੍ਰਿੰਸੀਪਲ ਦਾ ਅਡੀਸ਼ਨਲ ਚਾਰਜ ਹੈ। ਉਹ ਭੂਗੋਲ ਵਿਸ਼ੇ ਦੀ ਜਮਾਤ ਵਿੱਚ ਵਿਦਿਆਰਥੀਆਂ ਨੂੰ ਪੜਾਉਣ ਨਹੀਂ ਆਉਂਦੇ ਹਨ। ਜਿਸ ਕਾਰਨ ਉਨ੍ਹਾਂ ਦੀਆਂ ਕਲਾਸਾਂ ਪ੍ਰਭਾਵਿਤ ਹੋ ਰਹੀਆਂ ਹਨ। ਸਿੱਖ ਵਿਦਿਆਰਥੀਆਂ ਨੇ ਕਿਹਾ ਕਿ ਕਾਲਜ ਹਿੰਦੂ ਧਰਮ ਦਾ ਹਰ ਦਿਨ ਤਿਉਹਾਰ ਮਨਾਇਆ ਜਾਂਦਾ ਹੈ ਪਰ ਸਿੱਖ ਧਰਮ ਦੀ ਕਦੇ ਗੱਲ ਵੀ ਨਹੀਂ ਕੀਤੀ ਜਾਂਦੀ ਹੈ। 
ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਦੀਆਂ ਮਨਮਾਨੀਆਂ ਅਤੇ ਤਾਨਾਸ਼ਾਹੀ ਖਿਲਾਫ ਕਾਲਜ ਦੇ ਪੱਕੇ ਲੈਕਚਰਾਰਾਂ ਨੇ ਉੱਚ ਸਿੱਖਿਆ ਵਿਭਾਗ ਦੇ ਨਿਦੇਸ਼ਕ ਕੋਲ ਸ਼ਿਕਾਇਤ ਭੇਜੀ ਹੋਈ ਹੈ। ਜਿਸ ਪ੍ਰਿੰਸੀਪਲ ’ਤੇ ਵਿਦਿਆਰਥੀਆਂ ਦੇ ਸਾਹਮਣੇ ਲੈਕਚਰਾਰਾਂ ਨੂੰ ਜਮਾਤਾਂ ਵਿੱੱਚ ਜਲੀਲ ਕਰਨਾ, ਲੈਕਚਰਾਰਾਂ ਨੂੰ ਧਮਕਾਉਣਾ, ਟੀਚਰ ਸਟਾਫ ਨੂੰ ਆਪਣੇ ਘਰੇਲੂ ਕੰਮ ਲਈ ਇਸਤੇਮਾਲ ਕਰਨਾ, ਪੂਰੇ ਸਟਾਫ ਦੀ ਚੁਗਲੀ ਕਰਨਾ, ਕਾਲਜ ’ਚ ਲਗਾਈ ਗਈ ਸਬਜ਼ੀ ਨੂੰ ਆਪਣੇ ਘਰ ਲੈ ਜਾਣਾ ਜਿਹੇ ਗੰਭੀਰ ਦੋਸ਼ ਲਗਾਏ ਸਨ।


ਅਸੀਂ ਪ੍ਰੈਸ਼ਰ ਨਹੀਂ ਪਾਉਂਦੇ ਪ੍ਰੇਰਿਤ ਕਰਦੇ ਹਾਂ
ਦੂਜੇ ਪਾਸੇ ਕਾਲਜ ਦੇ ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਨੇ ਸਮੁੱਚੇ ਦੋਸ਼ ਬੇਬੁਨਿਆਦ ਕਰਾਰ ਦਿੰਦਿਆਂ ਉਹ ਖੁਦ ਆਰ.ਐਸ.ਐਸ ਦੀ ਕਾਲਜ ਵਿਦਿਆਰਥੀ ਸ਼ਾਖ਼ਾ ਦੇ ਪ੍ਰਮੁੱਖ ਹਨ। ਵਿਚਾਰ ਮੰਚ ਰਾਹੀਂ ਵਿਦਿਆਰਥੀਆਂ ’ਚ ਦੇਸ਼ ਭਗਤੀ ਦੀ ਭਾਵਨਾ ਪੈਦਾ ਕਰਨਾ ਚਾਹੁੰਦੇ ਹਨ। ਲੈਕਚਰਰ ਵਿਦਿਆਰਥੀਆਂ ਨੂੰ ਭੜਕਾ ਕੇ ਮਾਹੌਲ ਖ਼ਰਾਬ ਕਰ ਰਹੇ ਹਨ। ਵਧਵਾ ਨੇ ਕਿਹਾ ਕਿ ਅਸੀਂ ਆਰ.ਐਸ.ਐਸ ਨਾਲ ਜੁੜਨ ਲਈ ਵਿਦਿਆਰਥੀਆਂ ’ਤੇ ਪ੍ਰੈਸ਼ਰ ਨਹੀਂ ਪਾਉਂਦੇ ਸਿਰਫ਼ ਪ੍ਰੇਰਿਤ ਕਰਦੇ ਹਾਂ। ਉਂਝ ਤੁਸੀਂ ਕਦੇ ਸ਼ਾਖਾ ਵਿੱਚ ਆ ਕੇ ਦੇਖੋ ਕਿੰਨਾ ਵਧੀਆ ਮਾਹੌਲ ਹੁੰਦਾ ਐ ਉੱਥੇ। 

ਮਨਮਰਜ਼ੀ ਦੀ ਵਿਚਾਰਧਾਰਾ ਲਾਗੂ ਕਰਨਾ ਗਲਤ
ਡੱਬਵਾਲੀ ਦੀ ਐਸ.ਡੀ.ਐਮ. ਸੰਗੀਤਾ ਤੇਤਰਵਾਲ ਨੇ ਕਿਹਾ ਕਿ ਕਿਸੇ ਵੀ ਸਰਕਾਰੀ ਅਦਾਰੇ ਵਿੱਚ ਕਿਸੇ ਸੰਗਠਨ ਜਾਂ ਆਪਣੀ ਮਨਮਰਜ਼ੀ ਦੀ ਵਿਚਾਰਧਾਰਾ ਲਾਗੂ ਕਰਨਾ ਗਲਤ ਹੈ। ਪ੍ਰਿੰਸੀਪਲ ਦੇ ਖਿਲਾਫ ਅੱਜ ਵਿਦਿਆਰਥੀਆਂ ਨੇ ਸ਼ਿਕਾਇਤ ਦਿੱਤੀ ਹੈ। ਪ੍ਰਿੰਸੀਪਲ ਦੇ ਬਿਆਨ ਲਏ ਗਏ ਹਨ।



24 January 2017

ਬਾਦਲਾਂ ਦਾ ਸਰਕਾਰੀ ਫੰਡ ਨਾਲ ਸੇਵਾ-ਪੁੰਨ: ਲਾਂਗਰੀ ਦੇ ਭਰਾ ਨੂੰ ਦਾਨ ਕੀਤਾ ਸੇਵਾ ਕੇਂਦਰ

* ਸੇਵਾ ਕੇਂਦਰ ਭੇਜਿਆ ਪੰਚਾਇਤ ਘਰ ’ਚ
* ਪੰਚਾਇਤ ਲਈ 15.5 ਲੱਖ ਰੁਪਏ ਨਾਲ ਨਵੇਂ ਹਾਲ ਦੀ ਉਸਾਰੀ 
* ਸਰਕਾਰੀ ਖਜ਼ਾਨੇ ਨੂੰ ਡੇਢ ਗੁਣਾ ਵੱਡੀ ਚਪੇੜ

                                                  ਇਕਬਾਲ ਸਿੰਘ ਸ਼ਾਂਤ
ਲੰਬੀ : ਪੰਜਾਬ ਦੀ ‘ਸੇਵਾ’ ’ਚ ਜੁਟਿਆ ਮੁੱਖ ਮੰਤਰੀ ਬਾਦਲ ਪਰਿਵਾਰ ਸੂਬੇ ਦੇ ਸਰਕਾਰੀ ਖਜ਼ਾਨੇ ਅਤੇ ਜਾਇਦਾਦਾਂ ਨੂੰ ਨਿੱਜੀ ਜਗੀਰ ਸਮਝਦਾ ਹੈ। ਇਸ ਰਾਜਸੀ ਪਰਿਵਾਰ ਨੇ ਆਪਣੀ ਹੈੱਡ ਲਾਂਗਰੀ ‘ਸ਼ੈਫ਼’ ਬੀਬੀ ਸੀਤੋ ਦੇ ਭਰਾ ਭਿੰਦਰ ਖ਼ਾਨ ਨੂੰ ਪਿੰਡ ਬਾਦਲ ’ਚ ਆਪਣੀ ਰਿਹਾਇਸ਼ ਨਾਲ ਸਰਕਾਰੀ ਫੰਡਾਂ ਨਾਲ ਬਣਿਆ ਨਵਾਂ ਨਕੋਰ ‘ਸੇਵਾ ਕੇਂਦਰ’ ਹੀ ਦਾਨ ਕਰ ਦਿੱਤਾ। ਬਾਦਲਾਂ
ਦੀ ਰਹਿਮਤ ਸਦਕਾ ਹੁਣ ਭਿੰਦਰ ਖ਼ਾਨ ਪਰਿਵਾਰ ਸਮੇਤ ‘ਸੇਵਾ ਕੇਂਦਰ ਵਿਲਾ’ ’ਚ ਵਸ ਰਿਹਾ ਹੈ। ਭਿੰਦਰ ਖ਼ਾਨ ਬਾਦਲ ਕਾਲਜ ’ਚ ਬਤੌਰ ਮਾਲੀ ਨੌਕਰੀ ਕਰਦਾ ਹੈ। ਦੱਸਣਯੋਗ ਹੈ ਕਿ ਬਾਦਲ ਪਰਿਵਾਰ ਬੀਬੀ ਸੀਤੋ ਪਰਿਵਾਰ ’ਤੇ ਖੂਬ ਮਿਹਰਬਾਨ ਦੱਸਿਆ ਜਾਂਦਾ ਹੈ। ਦਾਨ ਕੀਤੇ ਸੇਵਾ ਕੇਂਦਰ ਦੀ ਉਸਾਰੀ ’ਤੇ ਕਰੀਬ 9.5 ਲੱਖ ਰੁਪਏ ਖਰਚ ਆਏ ਸੀ। ਸੇਵਾ ਕੇਂਦਰ ਨੂੰ ਪੰਚਾਇਤ ਘਰ ਬਾਦਲ ’ਚ ਤਬਦੀਲ ਕਰ ਦਿੱਤਾ ਗਿਆ। ਹੁਣ ਗਰਾਮ ਪੰਚਾਇਤ ਲਈ ਕਰੀਬ 15.5 ਲੱਖ ਰੁਪਏ ਦੀ ਲਾਗਤ ਨਾਲ ਪੰਚਾਇਤ ਘਰ ਦੀ ਪਹਿਲੀ ਮੰਜਲ ’ਤੇ ਹਾਲ ਦੀ ਉਸਾਰੀ ਕੀਤੀ ਜਾ ਰਹੀ ਹੈ। ਇਸ ਮਾਮਲੇ ’ਚ ਦੋ-ਦੋ ਵਾਰ ਇਮਾਰਤ ਉਸਾਰੀ ’ਚ ਸਰਕਾਰੀ ਖਜ਼ਾਨੇ ਨੂੰ ਡੇਢ ਗੁਣਾ ਵੱਧ ਚਪੇੜ ਵੱਜੀ ਹੈ। ਦੇਸ਼ ਦੇ ਅਮੀਰ-ਤਰੀਨ ਸਿਆਸੀ ਪਰਿਵਾਰ ਨਾਲ ਸਾਂਝੀ ਕੰਧ ਹੋਣ ਕਰਕੇ ‘ਸੇਵਾ ਕੇਂਦਰ’ ਵਾਲੇ ਸਰਕਾਰੀ ਪਸ਼ੂ ਹਸਪਤਾਲ ਦੀ ਮਾਲਕੀ ਵਾਲੇ ਦੋ ਮਰਲੇ ਟੁਕੜੇ ਦੀ ਕੀਮਤ ਲੱਖਾਂ ਵਿੱਚ ਹੈ। ਪ੍ਰਸ਼ਾਸਨਕ ਸੂਤਰਾਂ ਅਨੁਸਾਰ ਸੇਵਾ ਕੇਂਦਰ ਨੂੰ ਸੁਰੱਖਿਆ ਕਾਰਨਾਂ ਕਰਕੇ ਬਾਦਲਾਂ ਦੀ ਰਿਹਾਇਸ਼ ਤੋਂ ਦੂਰ ਭੇਜਿਆ ਗਿਆ। ਸੋਚਣ ਦਾ ਵਿਸ਼ਾ ਹੈ ਕਿ ਪ੍ਰਸ਼ਾਸਨ ਨੂੰ 9.5 ਲੱਖ ਖਰਚ ਕਰਨ ਮਗਰੋਂ ਬਾਦਲਾਂ ਦੀ ਸੁਰੱਖਿਆ ਚੇਤੇ ਆਈ। ਸੇਵਾ ਕੇਂਦਰ ਨੂੰ ਪੰਚਾਇਤ ਘਰ ਵਿੱਚ ਤਬਦੀਲ ਕੀਤੇ ਜਾਣ ਨਾਲ ਪੰਚਾਇਤ ਘਰ ਦੀ ਸੁੰਦਰਤਾ ਵਿਗੜ ਗਈ ਹੈ ਇਸਦੀ ਇੱਕ ਦੁਕਾਨ ’ਚ ਪਹਿਲਾਂ ਗ੍ਰਾਮ ਸੁਵਿਧਾ ਕੇਂਦਰ ਚੱਲ ਰਿਹਾ ਹੈ। ਹੁਣ ਸੇਵਾ ਕੇਂਦਰ ਨੂੰ ਲਿਆਉਣ ਕਰਕੇ ਪਿੰਡ ਵਾਸੀਆਂ ’ਚ ਡੂੰਘਾ ਰੋਸ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਪ੍ਰਸ਼ਾਸਨ ਬਾਦਲਾਂ ਦੀ ਸੁਰੱਖਿਆ ਪ੍ਰਤੀ ਇੰਨਾ ਫ਼ਿਕਰਮੰਦ ਹੈ ਤਾਂ ਬਾਦਲਾਂ ਦੀ ਰਿਹਾਇਸ਼ ਮੂਹਰੋਂ ਲੰਘਦੇ ਬਠਿੰਡਾ-ਖਿਉਵਾਲੀ ਨੈਸ਼ਨਲ ਹਾਈਵੇ ਦਾ ਵੀ ਰਾਹ ਬਦਲ ਕੇ ਪਾਸਿਓਂ ਕੱਢ ਦਿਤਾ ਜਾਵੇ। ‘ਸੇਵਾ ਕੇਂਦਰ ਵਿਲਾ’ ’ਚ ਵਸਦੇ ਭਿੰਦਰ
ਖ਼ਾਨ ਦੀ ਪਤਨੀ ਕਿਰਨਾ ਨੇ ਦੱਸਿਆ ਕਿ ‘‘ਇਹ ਮਕਾਨ ਉਸਦੀ ਨਨਾਣ ਬੀਬੀ ਸੀਤੋ ਨੇ ‘ਕਾਕਾ ਜੀ’ ਨੂੰ ਆਖ ਕੇ ਦਿਵਾਇਆ ਹੈ। ਉਸਨੇ ਕਿਹਾ ਕਿ ਘਰ ਦਾ ਫਰਸ਼, ਦਰਵਾਜ਼ਾ ਅਤੇ ਬਿਜਲੀ ਫਿਟਿੰਗ ਦਾ ਕੰਮ ਉਨ੍ਹਾਂ ਖੁਦ ਕਰਵਾਇਆ ਹੈ। ਬਾਅਦ ਵਿੱਚ ਬਾਦਲ ਪਰਿਵਾਰ ਦੀ ਹੈੱਡ ਲਾਂਗਰੀ ਬੀਬੀ ਸੀਤੋ ਨੇ ਇਸ ਪੱਤਰਕਾਰ ਨਾਲ ਰਾਬਤਾ ਕਰਕੇ ਦੱਸਿਆ ਕਿ ਉਸਦੇ ਭਰਾ ਭਿੰਦਰ ਖ਼ਾਨ ਦੀ ਐਕਸੀਡੈਂਟ ’ਚ ਲੱਤ ’ਤੇ ਸੱਟ ਵੱਜੀ ਹੋਈ ਹੈ। ਉਸਨੇ ‘ਕਾਕਾ ਸੁਖਬੀਰ’ ਅਤੇ ‘ਸਾਬ੍ਹ’ (ਪ੍ਰਕਾਸ਼ ਸਿੰਘ ਬਾਦਲ) ਨੂੰ ਆਖ ਕੇ ਰਹਿਣ ਲਈ ਸੇਵਾ ਕੇਂਦਰ ਦਿਵਾਇਆ ਹੈ। ਬੀਬੀ ਸੀਤੋ ਅਨੁਸਾਰ ਉਸਨੂੰ ਇਲਾਜ ਲਈ ਕਰੀਬ 50 ਹਜ਼ਾਰ ਰੁਪਏ ਦੀ ਮੱਦਦ ਦਿਵਾਈ ਅਤੇ ਭਿੰਦਰ ਖ਼ਾਨ ਦੀਆਂ ਬੱਚੀਆਂ ਦੀ ਫੀਸ ਵੀ ਸਾਬ੍ਹ ਭਰਦੇ ਹਨ। 


ਕੋਈ ਅਜਿਹਾ ਨਹੀਂ ਕਰ ਸਕਦਾ : ਡੀ.ਸੀ.
ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸੁਮਿਤ ਜਾਰੰਗਲ ਨੇ ਕਿਹਾ ਕਿ ਸੁਵਿਧਾ ਕੇਂਦਰ ਦੀ ਇਮਾਰਤ ਨੂੰ ਦਾਨ ਦੇਣ ਜਾਂ ਰਹਿਣ ਲਈ ਦੇਣ ਬਾਰੇ ਮਾਮਲਾ ਉਨ੍ਹਾਂ ਦੀ ਜਾਣਕਾਰੀ ਵਿੱਚ ਨਹੀਂ ਹੈ ਪਰ ਫਿਰ ਵੀ ਕੋਈ ਅਜਿਹਾ ਨਹੀਂ ਕਰ ਸਕਦਾ। 

23 January 2017

ਹਲਕਾ ਲੰਬੀ : ਦੋ ਮੁੱਖ ਮੰਤਰੀਆਂ ਦਾ ਵਕਾਰ, ਫੈਸਲਾ ਜਰਨੈਲ ਦੀਆਂ ਵੋਟਾਂ ’ਤੇ

*   ਚੋਣ ਮੁਹਾਜ਼ ਲੋਕ ਮੁੱਦਿਆਂ ਨਾਲੋਂ ਵੱਧ ਅਕਾਲੀ ਇੰਚਾਰਜ਼ ਆਗੂਆਂ ਦੀਆਂ ਆਪਹੁਦਰੀਆਂ ’ਤੇ ਕੇਂਦਰਿਤ
*   ਅਮਰਿੰਦਰ ਅਤੇ ਜਰਨੈਲ ਦੀ ਆਮਦ ਨਾਲ ਵੋਟਰਾਂ ਨੂੰ ਵਿਖਣ ਲੱਗਿਆ ਨਵਾਂ ‘ਆਪਸ਼ਨ’
*    ਕੈਪਟਨ ਦੀ ਆਮਦ ਨੇ ਕਾਂਗਰਸੀ ਆਗੂਆਂ ਵਿੱਚ ਭਰਿਆ ਨਵਾਂ ਜੋਸ਼
*    ਦਲਿਤ ਤੇ ਗ਼ਰੀਬ ਵਰਗ ਤੋਂ ‘ਆਪ’ ਨੂੰ ਮਿਲ ਰਿਹਾ ਹੈ ਭਰਵਾਂ ਹੁੰਗਾਰਾ


                                                              ਇਕਬਾਲ ਸਿੰਘ ਸ਼ਾਂਤ
      ਲੰਬੀ : ਰਵਾਇਤੀ ਵਿਰੋਧੀ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸਾਬਕਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਆਹਮੋ-ਸਾਹਮਣੇ ਚੋਣ ਲੜਨ ਕਰਕੇ ਲੰਬੀ ਹਲਕੇ ਦੀ ਚੋਣ ਬੇਹੱਦ ਦਿਲਚਸਪ ਬਣ ਗਈ ਹੈ। ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਰਨੈਲ ਸਿੰਘ ਦੀ ਮੌਜੂਦਗੀ ਤਿਕੋਣੇ ਮੁਕਾਬਲੇ ਨੂੰ ‘ਤਿੱਖਾ ਤੜਕਾ’ ਲੱਗਾ ਰਹੀ ਹੈ। ਮਾਝਾ ਅਤੇ ਮਾਲਵਾ ਬੈਲਟ ਦੇ ਵੋਟਰਾਂ ’ਤੇ ਆਧਾਰਤ ਲੰਬੀ ਹਲਕੇ ’ਤੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਸਿਆਸੀ ਕਬਜ਼ਾ ਪਿਛਲੀਆਂ ਚਾਰ ਵਿਧਾਨਸਭਾ ਚੋਣਾਂ ਤੋਂ
ਲਗਾਤਾਰ ਚੱਲਿਆ ਆ ਰਿਹਾ ਹੈ। ਉਹ ਹਰ ਵਾਰ ਫਸਵੇਂ ਮੁਕਾਬਲੇ ਵਿੱਚ ਆਖ਼ਰ ’ਤੇ ਹਰ ਵਾਰ ਵਧਵੇਂ ਫ਼ਰਕ ਨਾਲ ਜਿੱਤਦੇ ਆਏ ਹਨ। 2002 ਤੋਂ ਉਨ੍ਹਾਂ ਦੇ ਚਚੇਰੇ ਭਰਾ ਮਹੇਸ਼ਇੰਦਰ ਸਿੰਘ ਆਜ਼ਾਦ ਅਤੇ 2007 ਅਤੇ 2012 ’ਚ ਕਾਂਗਰਸ ਵੱਲੋਂ ਲਗਾਤਾਰ ਤਕੜੀ ਟੱਕਰ ਦਿੱਤੀ। 2012 ਵਿੱਚ ਲੰਬੀ ਹਲਕੇ ’ਚ ਤਿੰਨ ਬਾਦਲਾਂ ਪ੍ਰਕਾਸ਼ ਸਿੰਘ ਬਾਦਲ, ਉਨ੍ਹਾਂ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ (ਆਜ਼ਾਦ) ਅਤੇ ਮਹੇਸ਼ਇੰਦਰ ਸਿੰਘ ਬਾਦਲ (ਕਾਂਗਰਸ) ਨਾਲ ਗਹਿਗੱਚ ਅਤੇ ਰੌਚਿਕ ਮੁਕਾਬਲ ਹੋਇਆ ਸੀ। ਜਿਸ ਵਿੱਚ ਵੱਡੇ ਬਾਦਲ ਨੇ 24739 ਵੋਟਾਂ ਨਾਲ ਜਿੱਤ ਦਰਜ ਕੀਤੀ ਸੀ। ਮਹੇਸ਼ਇੰਦਰ ਸਿੰਘ ਬਾਦਲ ਨੂੰ 43260 ਵੋਟਾਂ ਮਿਲੀਆਂ ਅਤੇ ਗੁਰਦਾਸ ਬਾਦਲ ਸਿਰਫ਼ 5352 ਵੋਟਾਂ ਨਾਲ ਜਮਾਨਤ ਵੀ ਗੁਆ ਬੈਠੇ ਸਨ। ਪ੍ਰਕਾਸ਼ ਸਿੰਘ ਬਾਦਲ ਨੇ ਆਪਣੀ ਹਰ ਚੋਣ ਵਿੱੱਚ ਜਿੱਤ ਦਾ ਫ਼ਰਕ ਵਧਾਇਆ ਹੈ ਪਰ 2007 ’ਚ ਮਹੇਸ਼ਇੰਦਰ ਸਿੰਘ ਜਿੱਤ-ਹਾਰ ਦਾ ਫ਼ਰਕ ਘਟਾ ਕੇ 9187 ਵੋਟਾਂ ਤੱਕ ਲੈ ਗਏ ਸਨ। 71 ਪਿੰਡਾਂ ਅਤੇ 83 ਗਰਾਮ ਪੰਚਾਇਤਾਂ ’ਤੇ ਆਧਾਰਤ ਹਲਕੇ ’ਚ ਲੰਬੀ ਹਲਕੇ ਵਿੱਚ ਕੁੱਲ੍ਹ 155556 ਵੋਟਰ ਹਨ। ਜਿਨ੍ਹਾਂ ਪੁਰਸ਼  ਵੋਟਰ 81652 ਅਤੇ 73904 ਅੌਰਤ ਵੋਟਰ ਹਨ।
        ਇਸ ਵਾਰ ਲੰਬੀ ਦੀ ਸਿਆਸੀ ਜੰਗ ’ਚ ਨਵਾਂ ਮੁਕਾਬਲਾ ਅਤੇ ਨਵਾਂ ਮਾਹੌਲ ਹੋਣ ਕਰਕੇ ਹਾਲਾਤ ਕਾਫ਼ੀ ਜੁਦਾ ਬਣੇ ਹੋਏ ਹਨ। ਸਿਰਫ਼ ਮੁੱਖ ਮੰਤਰੀ ਚੁਣਨ ਲਈ ਵੋਟ ਪਾਉਣ ਦੇ ਆਦੀ ਲੰਬੀ ਦੇ ਵੀ.ਆਈ.ਪੀ. ਵੋਟਰ ਇਸ ਵਾਰ ਕੈਪਟਨ ਅਮਰਿੰਦਰ ਸਿੰਘ ਅਤੇ ਜਰਨੈਲ ਸਿੰਘ ਨੂੰ ਨਵੇਂ ਵਿਕਲਪ (ਬਦਲ) ਵਜੋਂ ਲੈ ਰਹੇ ਹਨ। ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਹਲਕੇ ਅੰਦਰ ਸਿਆਸੀ ਕੰਮਕਾਜ ਸੁਚੱਜਾ ਚਲਾਉਣ ਲਈ ਕਈ-ਕਈ ਪਿੰਡ ’ਤੇ ਆਧਾਰਤ ਇੰਚਾਰਜ਼ ਆਗੂ ਲਗਾਏ ਸਨ। ਹੁਣ ਇਹ ਵਿਉਂਤਬੰਦੀ ਅਕਾਲੀ ਦਲ ਦੀਆਂ ਜੜ੍ਹਾਂ ’ਚ ਬੈਠਣ ਲੱਗੀ ਹੈ। ਹਲਕੇ ਦੀ ਜਨਤਾ ਅਕਾਲੀ ਇੰਚਾਰਜ਼ਾਂ ਤੇ ਜਥੇਦਾਰਾਂ ਦੀਆਂ ਧੱਕੇਸ਼ਾਹੀਆਂ, ਗਰਾਂਟਾਂ/ਸਕੀਮਾਂ ’ਚ ਕਥਿਤ ਘਪਲੇਬਾਜ਼ੀ, ਬਾਂਦਰ-ਵੰਡ ਅਤੇ ਸਿਸਟਮ ’ਤੇ ਅਜਾਰੇਦਾਰੀ ਤੋਂ ਬਹੁਤ ਅੌਖੀ ਹੋ ਚੁੱਕੀ ਹੈ। ਅਕਾਲੀ ਇੰਚਾਰਜਾਂ ਜਰੀਏ ਪੈਦਾ ਧੜੇਬੰਦੀਆਂ ਅਤੇ ਆਪਹੁਦਰੀਆਂ ਖਿਲਾਫ਼ ਲੋਕ ਰੋਹ ਮੁੱਖ ਮੰਤਰੀ ਪ੍ਰਕਾਸ਼ ਸਿੰੰਘ ਦੇ ਚੋਣ ਜਲਸਿਆਂ ਵਿੱਚ ਵੇਖਣ ਨੂੰ ਮਿਲ ਰਿਹਾ ਹੈ। ਬਹੁਤ ਸਾਰੇ ਨਿਰਾਸ਼ ਟਕਸਾਲੀ ਅਕਾਲੀ ਘਰ ਬੈਠ ਗਏ ਜਾਂ ਦੂਜੀਆਂ ਪਾਰਟੀਆ ਦਾ ਪੱਲਾ ਫੜ ਰਹੇ ਹਨ। 
ਹਾਲਾਂਕਿ ਆਮ ਜਨਤਾ ਪ੍ਰਕਾਸ਼ ਸਿੰਘ ਬਾਦਲ ਦੇ ਖਿਲਾਫ਼ ਨਹੀਂ, ਪਰ ਅਕਾਲੀ ਇੰਚਾਰਜ਼ਾਂ ਦੀਆਂ ਮੰਦੀਆਂ ਕਾਰਗੁਜਾਰੀਆਂ ਬਾਰੇ ਉਨ੍ਹਾਂ ਦੀ ਚੁੱਪੀ ਬਾਰੇ ਅਕਾਲੀ ਵੋਟਰਾਂ ਵਿੱਚ ਵੱਡੀ ਨਾਰਾਜਗੀ ਵੇਖਣ ਨੂੰ ਮਿਲ ਰਹੀ ਹੈ। ਹਲਕੇ ਦੀ ਸਰਾਵਾਂ ਜੈਲ (ਮਾਝਾ ਬੈਲਟ) ’ਚ ਅਕਾਲੀ ਦਲ ਦੇ ਜ਼ਿਲ੍ਹਾ ਪ੍ਰਧਾਨ ਜਥੇਦਾਰ ਦਿਆਲ ਸਿੰਘ ਕੋਲਿਆਂਵਾਲੀ, ਕਾਂਗਰਸ ਅਤੇ ਆਪ ਲਈ ਵੱਡਾ ਮੁੱਦਾ ਬਣੇ ਹੋਏ ਹਨ। ਇਸ ਵਾਰ ਲੰਬੀ ਹਲਕੇ ਦੀ ਸਮੁੱਚੀ ਸਿਆਸਤ ਲੋਕ ਮੁੱਦਿਆਂ ਨਾਲੋਂ ਵੱਧ ਅਕਾਲੀ ਇੰਚਾਰਜ਼ ਆਗੂਆਂ ਦੀਆਂ ਆਪਹੁਦਰੀਆਂ ’ਤੇ ਕੇਂਦਰਿਤ ਹੈ। ਜਿਸ ਨਾਲ ਸਿਆਸਤ ਦੇ ਸ਼ਾਹ-ਅਸਵਾਰ ਪ੍ਰਕਾਸ਼ ਸਿੰਘ ਬਾਦਲ ਲਈ ਮੁਸ਼ਕਿਲਾਂ ਕਾਫ਼ੀ ਵਧ ਗਈਆਂ ਹਨ ਅਤੇ ਆਪਣੇ ਰਵਾਇਤੀ ਗੜ੍ਹ ’ਚ ਘਿਰੇ ਜਾਪਦੇ ਹਨ। 
ਹਾਲਾਂਕਿ ਲੰਬੀ ਹਲਕੇ ਨੂੰ ਸੈਂਕੜੇ ਕਰੋੜ ਰੁਪਏ ਖਰਚ ਕੇ ਸੇਮ ਮੁਕਤ ਕਰਨ ਦਾ ਉਪਰਾਲਾ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਦੇ ਸਿਰ ਜਾਂਦਾ ਹੈ। ਅਕਾਲੀ ਸਰਕਾਰ ਹਲਕੇ ਦੀ ਨੁਹਾਰ ਬਦਲਣ ਲਈ ਕਰੀਬ ਸਵਾ ਸੌ ਕਰੋੜ ਰੁਪਏ ਦੀ ਲਾਗਤ ਨਾਲ ਸੀਮਿੰਟਡ ਗਲੀਆਂ-ਨਾਲੀਆਂ ਦੇ ਇਲਾਵਾ ਸੋਲਰ ਸਟਰੀਟ ਲਾਈਟਾਂ, ਬੈਠਣ ਲਈ ਬੈਂਚ, ਲਿੰਕ ਸੜਕਾਂ ਅਤੇ ਪਖਾਨਿਆਂ ਨੂੰ ਬਹੁਪੱਖੀ ਵਿਕਾਸ ਵਜੋਂ ਪ੍ਰਚਾਰ ਰਹੀ ਹੈ। ਉਂਝ ਮਕਾਨ ਮੁਰੰਮਤ ਦੀ ਓਟ ਵਿੱਚ ਨਾਰਾਜ਼ਗੀ ਮੁਕਾਉਣ ਲਈ ਮਕਾਨ ਮੁਰੰਮਤ 15-15 ਹਜ਼ਾਰ ਰੁਪਏ ਦੇ ਚੈੱਕਾਂ ਵਜੋਂ ਵੰਡੇ 45 ਕਰੋੜ ’ਚ ਬਾਂਦਰਵੰਡ ਅਤੇ ਪਖਾਨਿਆਂ ਦੇ ਨਿਰਮਾਣ ’ਚ ਘਪਲੇਬਾਜ਼ੀ ਨੇ ਲੋਕਾਂ ਵਿੱਚ ਸੱਤਾ ਪੱਖ ਦੀ ਜਵਾਬਦੇਹੀ ਖੜ੍ਹੀ ਕਰ ਦਿੱਤੀ ਹੈ। 90 ਸਾਲਾ ਪ੍ਰਕਾਸ਼ ਸਿੰਘ ਬਾਦਲ ਨੇ ਚੋਣ ਪ੍ਰਚਾਰ ’ਚ ਲੰਬੀ ਹਲਕੇ ਦੀ ਗੈਰਤ ਅਤੇ ਅਣਖ਼ ਦੱਸ ਕੇ ‘ਆਪਣੇ’ ਅਤੇ ‘ਵਿਗਾਨੇ’ ਦਾ ਮੁੱਦਾ ਭਖਾਇਆ ਹੋਇਆ ਹੈ। 
         ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਲੰਬੀ ਦੇ ਕੁਰੂਕਸ਼ੇਤਰ ਵਿੱਚ ਆਉਣ ਨਾਲ ਬਾਦਲਾਂ ਦੇ ਹਲਕੇ ਵਿੱਚ ਕਾਂਗਰਸੀ ਧੜੇਬੰਦੀ ਦੀ ਸਮੱਸਿਆ ਨੂੰ ਇੱਕ ਵਾਰ ‘ਵਿਰਾਮ’ ਲੱਗ ਗਿਆ ਹੈ। ਮਹੇਸ਼ਇੰਦਰ-ਖੁੱਡੀਆਂ, ਗੁਰਦਾਸ ਬਾਦਲ ਅਤੇ ਅਬੁੱਲਖੁਰਾਣਾ ਧੜਿਆਂ ਦਾ ਸਾਂਝਾ ਪ੍ਰਚਾਰ ਕੈਪਟਨ ਅਮਰਿੰਦਰ ਸਿੰਘ ਲਈ ‘ਰਾਮਬਾਣ’ ਸਾਬਤ ਹੋ ਸਕਦਾ ਹੈ। ਮਹਾਰਾਜੇ ਵੱਲੋਂ ਬਾਦਲ ਨੂੰ ਵੰਗਾਰਨ ਕਰਕੇ ਡੇਢ ਦਹਾਕੇ ਤੋਂ ਰਵਾਇਤੀ ਅਕਾਲੀ ਗੜ੍ਹ ’ਚ ਆਰ-ਪਾਰ ਦੀ ਸਿਆਸੀ ਲੜਾਈ ਲੜਦੇ ਆ ਰਹੇ ਕਾਂਗਰਸੀਆਂ ਅੰਦਰ ਨਵਾਂ ਜੋਸ਼ ਵਿਖਾਈ ਦੇ ਰਿਹਾ ਹੈ। ਕੈਪਟਨ ਦੀ ਆਮਦ ਕਰਕੇ ਮੱਧ ਵਰਗੀ ਜੱਟ ਸਿੱਖ ਭਾਈਚਾਰਾ ਅਤੇ ਅਣਗੌਲੇ ਟਕਸਾਲੀ ਅਕਾਲੀ ਪਰਿਵਾਰ ਅਤੇ ਦਲਿਤ ਭਾਈਚਾਰਾ ਕਾਂਗਰਸ ਨਾਲ ਜੁੜਨ ਲੱਗਿਆ ਹੈ। 
       ਪੰਜਾਬ ’ਚ ਨਵੀਂ ਉੱਭਰ ਕੇ ਆਈ ਤੀਜੀ ਧਿਰ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਰਨੈਲ ਸਿੰਘ ਨੂੰ ਹਲਕੇ ਵਿੱਚ ਦਲਿਤ ਅਤੇ ਗਰੀਬ ਵਰਗ ਵੱਲੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਹਲਕੇ ਦਾ ਗਰੀਬ ਵਰਗ ਅਕਾਲੀ ਸਰਕਾਰ ਦੀ ਆਟਾ-ਦਾਲ ਸਕੀਮ, ਮੁਫ਼ਤ ਬਿਜਲੀ ਬਿੱਲਾਂ ਅਤੇ ਮਕਾਨ ਮੁਰੰਮਤ ਦੇ ਚੈੱਕਾਂ ਜਿਹੀਆਂ ਸਹੂਲਤਾਂ ਨੂੰ ਦਰਕਿਨਾਰ ਕਰਕੇ ਸਮਾਜਿਕ ਉਠਾਣ ਦੀ ਤਾਂਘ ਵਿੱਚ ‘ਆਪ-ਮੁਹਾਰੇ’ ਆਪ ਨਾਲ ਜੁੜਦਾ ਵਿਖਾਈ ਦੇ ਰਿਹਾ ਹੈ। ਜਰਨੈਲ ਸਿੰਘ ਅਕਾਲੀ ਦਲ ਨੂੰ 60-65 ਫ਼ੀਸਦੀ ਅਤੇ ਕਾਂਗਰਸ ਨੂੰ 15-16 ਫ਼ੀਸਦੀ ਤੱਕ ਨੁਕਸਾਨ ਪਹੁੰਚਾਉਂਦੇ ਵਿਖਾਈ ਦੇ ਰਹੇ ਹਨ। ‘ਆਪ’ ਲੰਬੀ ’ਚ ਸਾਢੇ 14 ਹਜ਼ਾਰ ਪਰਿਵਾਰਾਂ ਦੇ ਆਪਣੇ ਨਾਲ ਪੱਕੇ ਤੌਰ ’ਤੇ ਜੁੜੇ ਹੋਣ ਦਾ ਦਾਅਵਾ ਕਰਦੀ ਹੈ। ਆਪ ਨੂੰ ਵੱੱਧ ਵੋਟਾਂ ਮਿਲਣ ਦੇ ਹਾਲਾਤਾਂ ’ਚ ਕਾਂਗਰਸ ਨੂੰ ਫਾਇਦਾ ਹੋਣ ਦੇ ਆਸਾਰ ਹਨ। ਸੂਹੀਆ ਰਿਪੋਰਟਾਂ ਅਨੁਸਾਰ ਮੌਜੂਦਾ ਸਮੀਰਕਨਾਂ ’ਚ ਵੀ.ਆਈ.ਪੀ ਹਲਕੇ ’ਚ ਕਾਂਗਰਸ ਅਤੇ ਝਾੜੂ ਵਿਚਕਾਰ ਆਹਮੋ-ਸਾਹਮਣੇ ਦਾ ਮੁਕਾਬਲਾ ਵੀ ਹੋ ਸਕਦਾ ਹੈ। ਦੂਜੇ ਪਾਸੇ ਪ੍ਰਕਾਸ਼ ਸਿੰਘ ਬਾਦਲ 20 ਹਜ਼ਾਰ ਵੋਟਾਂ ਦੇ ਫ਼ਰਕ ਨਾਲ ਜਿੱਤ ਦਾ ਦਾਅਵਾ ਕਰ ਰਹੇ ਹਨ। ਸਿਆਸੀ ਜੀਵਨ ’ਚ ਹਮੇਸ਼ਾਂ ਜੇਤੂ ਰਹੇ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਨੂੰ ਉਨ੍ਹਾਂ ਦੇ ਰਵਾਇਤੀ ਹਲਕੇ ਲੰਬੀ ਨੂੰ ਢਾਹੁਣਾ ਕਿਸੇ ‘ਕ੍ਰਿਸ਼ਮੇ’ ਤੋਂ ਘੱਟ ਨਹੀਂ ਹੋਵੇਗਾ। ਜੇਕਰ ਸ੍ਰੀ ਬਾਦਲ ਨੂੰ ਜੀਵਨ ਦੇ ਸਿਖ਼ਰਲੇ ਦੌਰ ’ਚ 11ਵੀਂ ਵਿਧਾਨਸਭਾ ਚੋਣ ’ਚ ਊਚ-ਨੀਚ ਝੱਲਣੀ ਪੈਂਦੀ ਹੈ ਤਾਂ ਉਸਦੇ ਲਈ ਪਿੰਡਾਂ ਦੇ ਅਕਾਲੀ ਇੰਚਾਰਜ਼ ਆਗੂਆਂ ਦੀਆਂ ਮਾੜੀਆਂ ਕਾਰਗੁਜਾਰੀਆਂ ਅਤੇ ਵੱਡੇ ਬਾਦਲ ਦੀ ਸ਼ਹਿ ਭਰੀ ਚੁੱਪੀ ਪੂਰੀ ਤਰ੍ਹਾਂ ਜੁੰਮੇਵਾਰ ਹੋਵੇਗੀ। ਪੰਜਾਬ ਦੀ ਸਿਆਸਤ ਵਿੱਚ ਦੋ ਸਿਆਸੀ ਸ਼ਾਹ ਅਸਵਾਰਾਂ ਦੇ ਸਿਆਸੀ ਭਵਿੱਖ ਦੀ ਨਵੀਂ ਇਬਾਰਤ ਲਿਖਣ ਜਾ ਰਹੇ ਲੰਬੀ ਹਲਕੇ ਦੇ ਚੋਣ ਨਤੀਜਿਆਂ ਵਿੱਚ ਆਪ ਉਮੀਦਵਾਰ ਜਰਨੈਲ ਸਿੰਘ ਦਾ ਅਹਿਮ ਰੋਲ ਹੋਵੇਗਾ। ਇਸ ਵਕਾਰੀ ਹਲਕੇ ਤੋਂ ਅਕਾਲੀ ਦਲ ਅੰਮ੍ਰਿਤਸਰ ਦੇ ਉਮੀਦਵਾਰ ਬਲਜਿੰਦਰ ਸਿੰਘ ਮੋਰਜੰਡ ਸਮੇਤ 6 ਉਮੀਦਵਾਰ ਚੋਣ ਮੈਦਾਨ ਵਿੱਚ ਹਨ। 98148-26100 / 93178-26100 

13 January 2017

1.39 ਅਰਬ ਦੇ ਵਾਰਸ ਕੋਲ ਸਿਰਫ਼ 37 ਹਜ਼ਾਰ ਦੀ ਜਾਇਦਾਦ

- ਪਿਊ ਨਾਲੋਂ ਸਾਢੇ ਛੇ ਗੁਣਾ ਤੇ ਪਤਨੀ ਹਰਸਿਮਰਤ ਤੋਂ ਸਾਢੇ ਤਿੰਨ ਗੁਣਾ ਅਮੀਰ ਸੁਖਬੀਰ
- ਪੋਤੇ ਅਨੰਤਵੀਰ ਨਾਲੋਂ ਦਾਦਾ ਬਾਦਲ ਅਮੀਰ, ਜੇਬ ’ਚ ਸਾਢੇ 52 ਹਜ਼ਾਰ ਰੁਪਏ
- ਨੰਨ੍ਹੀ ਛਾਂ ਦੀ ਧੀ ਗੁਰਲੀਨ ਕੌਰ ਕੋਲ ਨਹੀਂ ਚੱਲ-ਅਚੱਲ ਜਾਇਦਾਦ  

                                               ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਪੰਜਾਬ ਦੇ ਰਾਜਭਾਗ ’ਤੇ 10 ਸਾਲਾਂ ਤੋਂ ਕਾਬਜ਼ ਮੁੱਖ ਮੰਤਰੀ ਬਾਦਲ ਪਰਿਵਾਰ ਵਿੱਚ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਸਭ ਤੋਂ ਅਮੀਰ ਹਨ। ਉਨ੍ਹਾਂ ਕੋਲ ਆਪਣੇ ਪਿਤਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲੋਂ ਸਾਢੇ ਛੇ ਗੁਣਾ ਅਤੇ ਪਤਨੀ ਕੇਂਦਰ ਮੰਤਰੀ ਹਰਸਿਮਰਤ ਕੌਰ ਬਾਦਲ ਨਾਲੋਂ ਸਵਾ ਤਿੰਨ ਗੁਣਾ ਵੱਧ ਚੱਲ-ਅਚੱਲ ਜਾਇਦਾਦ ਹੈ। ਹੈਰਾਨੀ ਭਰਿਆ ਤੱਥ ਹੈ ਕਿ
ਲਗਪਗ 1 ਅਰਬ 39 ਕਰੋੜ ਰੁਪਏ ਦੀ ਜਾਇਦਾਦ ਵਾਲੇ ਦੇਸ਼ ਦੇ ਅਮੀਰ ਰਾਜਸੀ ਪਰਿਵਾਰਾਂ ’ਚ ਸ਼ੁਮਾਰ ਬਾਦਲ ਪਰਿਵਾਰ ਦਾ ਨੌਨਿਹਾਲ ਅਨੰਤਵੀਰ ਸਿੰਘ ਸਿਰਫ਼ 37 ਹਜ਼ਾਰ 372 ਰੁਪਏ ਦੀ ਚੱਲ ਜਾਇਦਾਦ ਦਾ ਮਾਲਕ ਹੈ। ਜਦੋਂਕਿ ਧੀਆਂ ਦੇ ਹੱਕਾਂ ਦੀ ਮੁਦਈ ‘ਨੰਨ੍ਹੀ ਛਾਂ’ ਹਰਸਿਮਰਤ ਕੌਰ ਦੀ ਸਪੁੱਤਰੀ ਗੁਰਲੀਨ ਕੌਰ ਦੇ ਕੋਲ ਚੱਲ-ਅਚੱਲ ਜਾਇਦਾਦ ਵਜੋਂ ਕੁਝ ਨਹੀਂ ਹੈ। 
           ਇਹ ਖੁਲਾਸੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਨ੍ਹਾਂ ਦੀ ਨੂੰਹ ਹਰਸਿਮਰਤ ਕੌਰ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਦਾਖਲ ਕੀਤੇ ਨਾਮਜ਼ਦਗੀ ਕਾਗਜ਼ਾਂ ’ਚ ਜਾਇਦਾਦ ਦੇ ਵੇਰਵਿਆਂ ਤੋਂ ਹੋਏ ਹਨ। ਜਿਨ੍ਹਾਂ ਮੁਤਾਬਕ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ 14 ਕਰੋੜ 67 ਲੱਖ 19 ਹਜ਼ਾਰ 536 ਰੁਪਏ ਦੀ ਚੱਲ-ਅਚਲ ਜਇਦਾਦ ਦੇ ਮਾਲਕ ਹਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਕੋਲ 95 ਕਰੋੜ 84 ਲੱਖ 49 ਹਜ਼ਾਰ 113 ਰੁਪਏ ਦੀ ਚੱਲ-ਅਚੱਲ ਦੀ ਜਾਇਦਾਦ ਹੈ। ਜਿਸ ਵਿਚੋਂ ਉਨ੍ਹਾਂ ਦੀ ਚੱਲ ਜਾਇਦਾਦ 19 ਕਰੋੜ 25 ਲੱਖ 98 ਹਜ਼ਾਰ 875 ਰੁਪਏ ਹੈ। ਜਦੋਂ ਕਿ ਉਨ੍ਹਾਂ ਦੀ ਪਤਨੀ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਦੀ ਚੱਲ-ਅਚੱਲ ਜਾਇਦਾਦ 29 ਕਰੋੜ 68 ਲੱਖ 9 ਹਜ਼ਾਰ 457 ਰੁਪਏ ਦੀ ਹੈ।
       ਹਜ਼ਾਰਾਂ ਕਰੋੜ ਰੁਪਏ ਦੇ ਕਰਜ਼ਾਈ ਸੂਬੇ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਦੇ ਬਾਦਲ ਸਿਰ ਕੋਈ ਕਰਜ਼ਾ ਨਹੀਂ ਹੈ। ਸਗੋਂ ਉਨ੍ਹਾਂ 3.42 ਲੱਖ ਰੁਪਏ ਕਰਜ਼ਾ ਅਗਾਂਹ ਦਿੱਤਾ ਹੋਇਆ ਹੈ। ਜਦੋਂ ਕਿ ਉਨ੍ਹਾਂ ਦੇ ਐਮ.ਬੀ.ਏ. ਸਪੁੱਤਰ ਸੁਖਬੀਰ ਸਿੰਘ ਬਾਦਲ ਦੇ ਸਿਰ ਲਗਭਗ 39.70 ਕਰੋੜ ਰੁਪਏ ਦਾ ਕਰਜ਼ਾ ਹੈ ਅਤੇ ਹਰਸਿਮਰਤ ਦੇ ਸਿਰ 5 ਲੱਖ ਰੁਪਏ ਦੀ ਬੈਂਕਾਂ ਵਗੈਰਾ ਦੀ ਦੇਣਦਾਰੀ ਹੈ। ਇਸਦੇ ਸੁਖਬੀਰ ਸਿੰਘ ਬਾਦਲ ਦੇ ਸਿਰ 11,35,479 ਦੀ ਸਰਕਾਰੀ ਦੇਣਦਾਰੀਆਂ ਵੀ ਹਨ। 
         ਉਮਰ ਦੇ ਲਿਹਾਜ਼ ਨਾਲ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਆਪਣੇ ਕੋਲ ਨਗਦ ਰਕਮ ਘੱਟ ਰੱਖਣ ਲੱਗੇ ਹਨ। ਮੌਜੂਦਾ ਸਮੇਂ ’ਚ ਸਾਢੇ 52 ਹਜ਼ਾਰ ਰੁਪਏ ਹਨ ਜਦੋਂ ਕਿ ਪੰਜ ਸਾਲ ਪਹਿਲਾਂ ਉਨ੍ਹਾਂ ਕੋਲ ਸਾਢੇ 4 ਲੱਖ ਰੁਪਏ ਨਗਦ ਸਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਕੋਲ 25 ਹਜ਼ਾਰ ਰੁਪਏ ਅਤੇ ਬਾਦਲ ਪਰਿਵਾਰ ਦੀ ਨੂੰਹ ਹਰਸਿਮਰਤ ਕੌਰ ਦੇ ਬਟੂਏ ’ਚ ਸਿਰਫ਼ 5 ਹਜ਼ਾਰ ਰੁਪਏ ਨਗਦ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਉਹ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੱਦੇ ’ਤੇ ਕੈਸ਼ਲੈਸ ਜੀਵਨ ਨੂੰ ਤਰਜੀਹ ਦੇ ਰਹੇ ਹਨ। ਜਦੋਂ ਕਿ ਬੈਂਕਾਂ ’ਚ ਜਮ੍ਹਾ ਰਕਮ ਪੱਖੋਂ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਆਪਣੇ ਪਿਤਾ ਅਤੇ ਪਤਨੀ ਤੋਂ ਕਈ ਗੁਣਾ ਅਮੀਰ ਹਨ। ਸੁਖਬੀਰ ਦੇ ਬੈਂਕ ’ਚ ਲਗਪਗ 65.27 ਲੱਖ ਰੁਪਏ ਜਮ੍ਹਾ ਹਨ। ਪਿਛਲੇ ਵਿਧਾਨਸਭਾ ਚੋਣਾਂ ਸਮੇਂ ਦੇ ਮੁਕਾਬਲੇ ਵੱਡੇ ਬਾਦਲ ਦੇ ਬੈਂਕ ਖਾਤਿਆਂ ਦਾ ਵਜ਼ਨ ਵਧ ਕੇ 34 ਲੱਖ ਰੁਪਏ ਹੋ ਗਿਆ ਹੈ ਜੋ ਪਹਿਲਾਂ ਸਿਰਫ਼ 7.17 ਲੱਖ ਰੁਪਏ ਸੀ। ਹਰਸਿਮਰਤ ਕੌਰ ਦੇ 12.66 ਲੱਖ ਰੁਪਏ ਬੈਂਕ ਖਾਤਿਆਂ ’ਚ ਜਮ੍ਹਾ ਹਨ।
         ਪਿਛਲੇ 10 ਸਾਲਾਂ ’ਚ ਪੰਜਾਬ ਸਰਕਾਰ ਦੇ ਖਾਤਿਓਂ ਹਵਾਈ ਅਤੇ ਸੜਕੀ ਆਵਾਜਾਈ ’ਤੇ ਸੈਂਕੜੇ ਕਰੋੜ ਰੁਪਏ ਦੇ ਝੂਟੇ ਲੈ ਚੁੱਕੇ ਬਾਦਲ ਸਿਰਫ਼ ਖੇਤੀਬਾੜੀ ਦੇ ਕੰਮਕਾਜ਼ ਲਈ ਟੈਫ਼ੇ ਟਰੈਕਟਰ ਅਤੇ ਸੁਖਬੀਰ ਬਾਦਲ ਕੋਲ ਸਾਢੇ 5ਲੱਖ ਰੁਪਏ ਦੀ ਕੀਮਤ ਨਿਊ ਹਾਲੈਂਡ ਅਤੇ ਮੈਸੀ ਟਰੈਕਟਰ ਹੈ। ਜਦੋਂ ਕਿ ਹਰਸਿਮਰਤ ਕੌਰ ਬਾਦਲ ਕੋਲ ਵਹੀਕਲ ਦੇ ਨਾਂਅ ’ਤੇ ਸਵਾਰੀ ਨਹੀਂ ਹੈ।  ਪਾਰਲੀਮੈਂਟ ’ਚ ਅਮੀਰ ਅੌਰਤ ਸੰਸਦ ਮੈਂਬਰ ਵਿੱਚ ਸ਼ੁਮਾਰ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਕੋਲ 6 ਕਰੋੜ 2 ਲੱਖ 40 ਹਜ਼ਾਰ 8 ਸੌ ਰੁਪਏ ਦੇ ਸੋਨੇ-ਚਾਂਦੀ ਅਤੇ ਹੀਰੇ ਜਵਾਹਰਤ ਦੇ ਗਹਿਣੇ ਹਨ। ਜਦੋਂ ਕਿ ਉਨ੍ਹਾਂ ਦੇ ਪਤੀ ਸੁਖਬੀਰ ਸਿੰਘ ਬਾਦਲ ਕੋਲ 9 ਲੱਖ ਰੁਪਏ ਦਾ ਸੋਨਾ-ਚਾਂਦੀ ਹੈ। ਦੂਜੇ ਪਾਸੇ ਹੱਥ ਵਿੱਚ ਨਗ ਵਾਲੀ ਚਾਂਦੀ ਅੰਗੂਠੀ ਪਹਿਨੇ ਰੱਖਣ ਵਾਲੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੀ ਸੋਨੇ-ਚਾਂਦੀ ਪ੍ਰਤੀ ਮੋਹ ਰੱਖਦੇ ਹਨ ਉਨ੍ਹਾਂ ਕੋਲ 3.42 ਲੱਖ ਰੁਪਏ ਦਾ ਸੋਨਾ ਚਾਂਦੀ ਹੈ।
            ਸੁਖਬੀਰ ਅਤੇ ਹਰਸਿਮਰਤ ਕੋਲ ਕ੍ਰਮਵਾਰ ਲਗਪਗ 14.29 ਲੱਖ ਅਤੇ 12.87 ਲੱਖ ਰੁਪਏ ਸ਼ੇਅਰ ਬਾਂਡਸ ਅਤੇ ਮੂਚੂਅਲ ਫੰਡ ਹਨ। ਜਦੋਂ ਕਿ ਮੁੱਖ ਮੰਤਰੀ ਸ਼ੇਅਰਾਂ ਤੋਂ ਮੂਚੂਅਲ ਫੰਡਾਂ ਦੀ ਖੇਡ ਦੀ ਦੂਰ ਹੀ ਹਨ। ਜਾਇਦਾਦ ਅਸਾਸਿਆਂ ਦੀ ਸੂਚੀ ਅਨੁਸਾਰ ਪੰਜ ਵਾਰ ਮੁੱਖ ਮੰਤਰੀ ਦਾ ਸੁੱਖ ਭੋਗ ਕੇ ਮਿਸਾਲ ਕਾਇਮ ਕਰ ਚੁੱਕੇ ਪ੍ਰਕਾਸ਼ ਸਿੰਘ ਬਾਦਲ ਦੇ ਕੋਲ ਪਿੰਡ ਬਾਦਲ ’ਚ 2 ਕਰੋੜ ਰੁਪਏ ਦੀ 240 ਕਨਾਲ ਵਾਹੀਯੋਗ ਜ਼ਮੀਨ, ਚੱਕ-14 (ਸਾਦੁਲਸ਼ਹਿਰ) 1.891 ਹੈਕਟੇਅਰ ਜ਼ਮੀਨ, ਹਰਿਆਣਾ ਦੇ ਬਾਲਾਸਰ ’ਚ 266 ਕਨਾਲ 16 ਮਰਲੇ ਤੋਂ ਇਲਾਵਾ ਰਾਣੀਆਂ (ਸਿਰਸਾ) ਵਿਖੇ 26 ਕਨਾਲ 17 ਮਰਲੇ ਜ਼ਮੀਨ ਹੈ। ਵਾਹੀਯਸੋਗ ਸਮੁੱਚੀ ਜ਼ਮੀਨ ਦੀ ਕੀਮਤ ਸਾਢੇ 8 ਕਰੋੜ ਰੁਪਏ ਬਣਦੀ ਹੈ। ਇਸਦੇ ਗੈਰਵਾਹੀਯੋਗ ਜਾਇਦਾਦ ਪੱਖੋਂ ਮੁੱਖ ਮੰਤਰੀ ਬਾਦਲ ਕੋਲ ਮੰਡੀ ਕਿੱਲਿਆਂਵਾਲੀ ਵਿਖੇ 32 ਸੌ ਵਰਗ ਫੁੱਟ ਦਾ ਬਿਲਡਿੰਗ ਹੈ ਜਿਸਦੀ ਕੀਮਤ 27.82 ਹਜ਼ਾਰ ਰੁਪਏ ਹੈ। ਇਸਦੇ ਇਲਾਵਾ ਹਰਸਿਮਰਤ ਕੌਰ ਬਾਦਲ ਕੋਲ ਪਿੰਡ ਬਾਲਾਸਰ ’ਚ 5.59 ਲੱਖ ਰੁਪਏ ਦੀ 255 ਕਨਾਲ 12 ਮਰਲਾ
ਵਾਹੀਯੋਗ ਹੈ। ਜਦੋਂ ਉਨ੍ਹਾਂ ਦੇ ਪਤੀ ਸੁਖਬੀਰ ਸਿੰਘ ਬਾਦਲ ਪਿੰਡ ਬਾਦਲ ’ਚ 63 ਕਨਾਲ 5 ਮਰਲੇ ਜ਼ਮੀਨ ਹੈ। ਇਸੇ ਤਰ੍ਹਾਂ ਚੱਕ-14 (ਸਾਦੁਲਸ਼ਹਿਰ) ’ਚ 9.845 ਹੈਕਟੇਅਰ ਜ਼ਮੀਨ ਹੈ। ਜਦੋਂਕਿ ਰਾਣੀਆ ਸਿਰਸਾ ’ਚ 29 ਕਨਾਲ 11 ਮਰਲਾ ਜ਼ਮੀਨ, ਪਿੰਡ ਬਾਦਲ ’ਚ 63 ਕਨਾਲ 9 ਮਰਲੇ ਵਾਹੀਯੋਗ ਜ਼ਮੀਨ ਹੈ। ਜਦੋਂਕਿ ਗੈਰ ਵਾਹੀਯੋਗ ਰਕਬੇ ਜ਼ਿਲ੍ਹਾ ਮੁਕਤਸਰ ਦੇ ਪਿੰਡ ਰੁਪਾਣਾ ’ਚ ਲਗਪਗ20 ਲੱਖ ਰੁਪਏ ਦੀ 9 ਕਨਾਲ 10 ਜ਼ਮੀਨ ਹੈ। ਕਮਰਸ਼ੀਅਲ ਬਿਲਡਿੰਗ ਵਜੋਂ ਪਿੰਡ ਬਾਦਲ ’ਚ 24 ਵਰਗ ਫੁੱਟ ਦੀ ਪੰਜਾਬ ਐਂਡ ਸਿੰੰਧ ਬੈਂਕ ਨੂੰ ਕਿਰਾਏ ਦਿੱਤੀ ਹੋਈ ਇਮਾਰਤ ਹੈ। ਜਿਸਦੇ ਉੱਪਰ ਅਕਾਲੀ ਦਲ ਦਾ ਹਲਕਾ ਦਫ਼ਤਰ ਵੀ ਸਥਿਤ ਹੈ। ਪਿੰਡ ਬਾਦਲ ’ਚ ਇੱਕ ਪਟਰੋਲ ਪੰਪ, ਚੰਡੀਗੜ੍ਹ ਸੈਕਟਰ 9 ’ਚ ਐਸ.ਸੀ.ਓ. 54-55 ’ਚ 20 ਫ਼ੀਸਦੀ ਹਿੱਸਾ ਹੈ। ਲੁਧਿਆਣਾ ’ਚ ਮਿਨਰਵਾ ਕੰਪਲੈਕਸ ’ਚ 300 ਵਰਗ ਫੁੱਟ ਦੀ ਦੁਕਾਨ ਹੈ। ਇਸਦੇ ਇਲਾਵਾ ਕਰੀਬ 2.63 ਕੀਮਤ ਵਾਲਾ ਜਲੰਧਰ ਦੇ 135-185 ਰਣਜੀਤ ਨਗਰ ’ਚ 30 ਮਰਲੇ ਦਾ ਕਰਮਸ਼ੀਅਲ ਪਲਾਟ ਵਗੈਰਾ ਹੈ। ਲੁਧਿਆਣੇ ਦੇ ਸ਼ੇਰਪੁਰ ਕਲਾਂ ’ਚ 422.84 ਸਕੂਐਰ ਵਰਗ ਯਾਰਡ ਹੈ। ਜਿਨ੍ਹਾਂ ਦਾ ਕੁੱਲ ਕੀਮਤ 9.37 ਕਰੋੜ ਰੁਪਏ ਬਣਦੀ ਹੈ। ਰਿਹਾਇਸ਼ੀ ਜਾਇਦਾਦ ਵਜੋਂ ਚੰਡੀਗੜ੍ਹ ਸੈਕਟਰ 9-ਸੀ ’ਚ ਕੋਠੀ ਨੰਬਰ 256 460 ਕਰੋੜ ਰੁਪਏ ਦੀ ਮਾਲਕੀ ਵੀ ਸੁਖਬੀਰ ਕੋਲ ਹੈ।

                                    ਕਾਗਜ਼ਾਂ ’ਚ ਹਰਕੀਰਤ ਦਾ ਜ਼ਿਕਰ ਨਹੀਂ
ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਵੱਲੋਂ ਦਾਖਲ ਨਾਮਜ਼ਦਗੀ ਕਾਗਜ਼ਾਂ ’ਚ ਆਪਣੀ ਧੀ ਹਰਕੀਰਤ ਕੌਰ ਬਾਦਲ ਦਾ ਕਿਧਰੇ ਵੀ ਜ਼ਿਕਰ ਨਹੀਂ ਕੀਤਾ ਗਿਆ। ਜਦੋਂ ਕਿ ਸਪੁੱਤਰ ਅਨੰਤਬੀਰ ਅਤੇ ਧੀ ਗੁਰਲੀਨ ਕੌਰ ਦਾ ਬਕਾਇਦਾ ਜ਼ਿਕਰ ਹੈ। ਇਹ ਗੱਲ ਦਿਨ ਭਰ ਚਰਚਾ ਦਾ ਵਿਸ਼ਾ ਰਹੀ। ਇਸ ਬਾਰੇ ਬੀਬੀ ਬਾਦਲ ਦੇ ਪੀ.ਏ. ਅਨਮੋਲ ਪ੍ਰੀਤ ਸਿੰਘ ਤੋਂ ਜਾਣਨ ਦੀ ਕੋਸ਼ਿਸ਼ ਕੀਤੀ ਪਰ ਉਨ੍ਹਾਂ ਵੀ ਅਗਿਆਨਤਾ ਜਾਹਰ ਕੀਤੀ। ਇੱਕ ਅਕਾਲੀ ਆਗੂ ਨੇ ਆਖਿਆ ਕਿ ਸ਼ਾਇਦ ਵੱਡੀ ਬੇਟੀ ਦਾ ਨਾਂਅ ਬਾਲਗ ਹੋਣ ਕਰਕੇ ਨਾਂਅ ਸ਼ਾਮਲ ਨਹੀਂ ਕੀਤਾ ਹੋਣਾ।  98148-26100 / 93178-26100

27 December 2016

ਰਾਜਸਥਾਨ ਨੇ ਪੰਜਾਬੀਆਂ ਦੀਆਂ ਜੜ੍ਹਾਂ ਸੁਕਾਈਆਂ

ਰਾਜਸਥਾਨ ’ਚ ਸਿੱਖ ਆਬਾਦੀ 10 ਲੱਖ; ਸਰਕਾਰੀ ਕਾਲਜਾਂ ’ਚ ਪੰਜਾਬੀ ਲੈਕਚਰਰ ਦੀ ਆਸਾਮੀ ਇੱਕ ਵੀ ਨਹੀਂ
- ਸਰਕਾਰੀ ਸਕੂਲਾਂ ’ਚ ਵੀ ਅਧਿਆਪਕਾਂ ਦੀ ਥੁੜ; ਪੰਜਾਬੀ ਵਿਸ਼ੇ ਦੇ ਵਿਦਿਆਰਥੀ ਸੰਸਕ੍ਰਿਤ ਪੜ੍ਹਨ ਨੂੰ ਮਜ਼ਬੂਰ
- ਪੰਜਾਬੀ ਅਧਿਆਪਕਾਂ ਲਈ ਟੈਸਟ ਨਾ ਹੋਣ ਕਰਕੇ ਪ੍ਰੀਖਿਆਰਥੀਆਂ ਵੱਲੋਂ 26 ਨੂੰ ਹੜਤਾਲ ਦੀ ਚਿਤਾਵਨੀ 

                                                                ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ: ਪੰਜਾਬ ਦੇ ਪਾਣੀਆਂ ਸਹਾਰੇ ਆਪਣੀਆਂ ਜੜ੍ਹਾਂ ਨੂੰ ਹਰਾ ਕਰਨ ਵਾਲੇ ਗੁਆਂਢੀ ਸੂਬੇ ਰਾਜਸਥਾਨ ਨੇ ਪੰਜਾਬੀ ਭਾਸ਼ਾ ਦੀਆਂ ਜੜ੍ਹਾਂ ਸੁਕਾ ਰੱਖੀਆਂ ਹਨ। ਰਾਜਸਥਾਨ ਦੇ ਕਿਸੇ ਸਰਕਾਰੀ ਕਾਲਜ ਵਿੱਚ ਪੰਜਾਬੀ ਵਿਸ਼ੇ ਦਾ ਕੋਈ ਲੈਕਚਰਾਰ ਨਹੀਂ ਹੈ। ਹੁਣ ਸਿਰਫ਼ ਇੱਕ ਕਾਲਜ ਵਿੱਚ ਪੰਜਾਬੀ ਲੈਕਚਰਾਰ ਦਾ ਅਸਾਮੀ ਮਨਜੂਰ ਹੋਈ ਹੈ। ਜਦੋਂ ਕਿ ਲਗਪਗ ਸਾਢੇ 6 ਕਰੋੜ ਆਬਾਦੀ
ਵਾਲੇ ਸਮੁੱਚੇ ਰਾਜਸਥਾਨ ’ਚ 10 ਲੱਖ ਸਿੱਖ ਵਸੋਂ ਹੈ। ਜਦੋਂ ਕਿ ਪੰਜਾਬੀਆਂ ਦੀ ਗਿਣਤੀ ਢਾਈ-ਤਿੰਨ ਗੁਣਾ ਹੈ। ਇਹ ਹੈਰਾਨੀਜਨਕ ਖੁਲਾਸਾ ਸੂਚਨਾ ਅਧਿਕਾਰ ਜਾਣਕਾਰੀ ਰਾਹੀਂ ਹੋਇਆ ਹੈ। ਪੰਜਾਬੀ ਭਾਸ਼ਾ ਪ੍ਰਚਾਰ ਸਭਾ ਦੇ ਕਨਵੀਨਰ ਬਲਜਿੰਦਰ ਸਿੰਘ ਮੋਰਜੰਡ ਵੱਲੋਂ ਮੰਗੀ ਸੂਚਨਾ ਦੇ ਜਵਾਬ ਵਿੱਚ ਕਾਲਜ ਸਿੱਖਿਆ ਰਾਜਸਥਾਨ ਦੇ ਸੰਯੁਕਤ ਨਿਦੇਸ਼ਕ (ਐਚ.ਆਰ.ਡੀ) ਨੇ ਦੱਸਿਆ ਕਿ ਮੌਜੂਦਾ ਸਮੇਂ ਵਿੱਚ ਵਿਭਾਗ ਦੇ ਅਧੀਨ ਕਿਸੇ ਕਾਲਜ ਵਿੱਚ ਪੰਜਾਬੀ ਵਿਸ਼ੇ ਦੀ ਅਸਾਮੀ ਮਨਜੂਰ ਨਹੀਂ ਪਰ ਹੁਣ ਇੱਕ ਕਾਲਜ ’ਚ ਅਸਾਮੀ ਮਨਜੂਰ ਹੋਈ ਹੈ। ਜਿਸ ਦੀ ਚੋਣ ਸਬੰਧੀ ਵੀ ਰਾਜਸਥਾਨ ਲੋਕ ਸੇਵਾ ਕਮਿਸ਼ਨ ਨੂੰ ਪੱਤਰ ਭੇਜਿਆ ਜਾਣਾ ਹੈ। ਇੱਕ ਹੋਰ ਸੂਚਨਾ ਤਹਿਤ ਸਿਰਫ਼ ਗੰਗਾਨਗਰ ਜ਼ਿਲ੍ਹੇ ਦੇ ਸਰਕਾਰੀ ਕਾਲਜਾਂ ਵਿੱਚ ਪੰਜਾਬੀ ਵਿਸ਼ੇ ਦੇ 432 ਵਿਦਿਆਰਥੀ ਹਨ। ਕਾਲਜ ਸਿੱਖਿਆ ਦੇ ਸੰਯੁਕਤ ਨਿਦੇਸ਼ਕ (ਪੀ.ਐਂਡ ਸੀ) ਵੱਲੋਂ ਜਾਰੀ ਅੰਕੜੇ ਅਨੁਸਾਰ ਵਿੱਦਿਅਕ ਸ਼ੈਸ਼ਨ 2016-17 ’ਚ ਡਾ. ਭੀਮ ਰਾਓ ਅੰਬੇਦਕਰ ਸਰਕਾਰੀ ਕਾਲਜ ਸ੍ਰੀ ਗੰਗਾਨਗਰ ’ਚ ਪੰਜਾਬੀ ਵਿਸ਼ੇ ਦੇ 257 ਵਿਦਿਆਰਥੀ ਹਨ। ਸਰਕਾਰੀ ਕਾਲਜ ਕਰਣਪੁਰ ’ਚ 95 ਅਤੇ ਸਰਕਾਰੀ ਗਰਲਜ ਕਾਲਜ ਸਾਦੁਲਸ਼ਹਿਰ ’ਚ 80 ਵਿਦਿਆਰਥਣਾਂ ਹਨ। ਜ਼ਮੀਨੀ ਹਕੀਕਤ ਹੈ ਕਿ ਪੰਜਾਬੀ ਵਿਸ਼ੇ ਦਾ ਲੈਕਚਰਾਰ ਨਾ ਹੋਣ ਕਰਕੇ ਪੰਜਾਬੀ ਵਿਸ਼ੇ ਦੇ ਵਿਦਿਆਰਥੀਆਂ ਦੀ ਪੜ੍ਹਾਈ ਰੱਬ ਆਸਰੇ ਹੈ। ਅੰਕੜੇ ਦੱਸਦੇ ਹਨ ਕਿ ਸੂਬੇ ’ਚ ਪੰਜਾਬੀ ਵਿਸ਼ੇ ਲਈ ਕੋਈ ਪ੍ਰੋਫੈਸਰ ਭਰਤੀ ਨਹੀਂ ਕੀਤਾ। ਉਨ੍ਹਾਂ ਕਿਹਾ ਕਿ ਸਮੁੱਚੇ ਰਾਜਸਥਾਨ ਵਿੱਚ ਲਗਭਗ 30 ਕਾਲਜ ਅਜਿਹੇ ਹਨ ਜਿੰਨਾ ਵਿੱਚ ਪੰਜਾਬੀ ਵਿਸ਼ੇ ’ਚ ਬੀ.ਏ ਅਤੇ ਐਮ.ਏ ਦੀ ਪੜ੍ਹਾਈ ਕਰ ਰਹੇ ਰਹੇ ਹਨ। ਰਾਜਸਥਾਨ ਸਰਕਾਰ ਦੇ ਪੰਜਾਬੀ ਪ੍ਰਤੀ ਮਾਰੂ ਰਵੱਈਏ ਖਿਲਾਫ਼ ਰਾਜਸਥਾਨੀ ਸਿੱਖਾਂ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। 
ਦੁਖਾਂਤ ਹੈ ਕਿ ਰਾਜਸਥਾਨ ਦੇ ਬੇਆਬਾਦ ਟਿੱਬਿਆਂ ਨੂੰ ਆਪਣੇ ਖੂਨ ਪਸੀਨੇ ਨਾਲ ਖੁਸ਼ਹਾਲ ਬਣਾਉਣ ਵਾਲੇ ਸਿੱਖਾਂ ਦੀ ਭਾਸ਼ਾਈ ਹੋਂਦ ਨੂੰ ਬਰਕਰਾਰ ਰੱਖਣ ਲਈ ਰਾਜਸਥਾਨ ਸਰਕਾਰ ਨੇ ਕਦੇ ਕੋਈ ਉਪਰਾਲਾ ਨਹੀਂ ਕੀਤਾ। ਸੂਬੇ ਦੇ ਲਗਪਗ ਡੇਢ ਦਰਜਨ ਜ਼ਿਲ੍ਹਿਆਂ ਜੈਪੁਰ, ਬੀਕਾਨੇਰ, ਕੋਟਾ, ਭਰਤਪੁਰ, ਚੁਰੂ ਅਤੇ ਬੂੰਦੀ ਸਮੇਤ ਹੋਰਨਾਂ ਜ਼ਿਲ੍ਹਿਆਂ ਵਿੱਚ 40-40, 50-50 ਹਜ਼ਾਰ ਦੇ ਕਰੀਬ ਸਿੱਖ ਵਸਦੇ ਹਨ। ਇਸਦੇ ਇਲਾਵਾ ਪੰਜਾਬ ਦੇ ਨਾਲ ਖਹਿੰਦੇ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਜ਼ਿਲ੍ਹਿਆਂ ਵਿੱਚ ਸਭ ਤੋਂ ਵੱਧ ਸਿੱਖ ਵਸਦੇ ਹੈ। ਰਾਜਸਥਾਨ ’ਚ ਉੱਚ ਸਿੱਖਿਆ ਦੇ ਨਾਲ-ਨਾਲ ਸਕੂਲੀ ਸਿੱਖਿਆ ਵਿੱਚ ਵੀ ਪੰਜਾਬੀ ਭਾਸ਼ਾ ਦੀ ਹਾਲਤ ਕੁਝ ਜ਼ਿਆਦਾ ਵਧੀਆ ਨਹੀਂ ਹੈ। ਰਾਜਸਥਾਨ ’ਚ ਸਿੱਖ ਵਸੋਂ ’ਚ ਮੋਹਰੀ ਮੰਨੇ ਜਾਂਦੇ ਜ਼ਿਲ੍ਹਾ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਦੇ ਕ੍ਰਮਵਾਰ 147 ਅਤੇ 87 ਸਰਕਾਰੀ ਸਕੂਲਾਂ ’ਚ ਪੰਜਾਬੀ ਵਿਸ਼ੇ ਦੇ ਅਧਿਆਪਕਾਂ ਦੀ ਜ਼ਰੂਰਤ ਹੈ। 
               ਨਿਯਮਾਂ ਮੁਤਾਬਕ 20 ਵਿਦਿਆਰਥੀ ਹੋਣ ’ਤੇ ਸਬੰਧਤ ਵਿਸ਼ੇ ਦਾ ਅਧਿਆਪਕ ਹੋਣਾ ਲਾਜਮੀ ਹੈ ਪਰ ਪੰਜਾਬੀ ਵਿਦਿਆਰਥੀਆਂ ਦੀ ਲੋੜੀਂਦੀ ਸਮੱਰਥਾ ਦੇ ਬਾਅਦ ਵੀ ਸੰਸਕ੍ਰਿਤ ਵਿਸ਼ੇ ਦੇ ਅਧਿਆਪਕ ਪੰਜਾਬੀ ਵਿਦਿਆਰਥੀਆਂ ’ਤੇ ਥੋਪੇ ਜਾ ਰਹੇ ਹਨ ਅਤੇ ਸਰਕਾਰ ਵੱਲੋਂ ਸਕੂਲਾਂ ’ਚ ਵਿਦਿਆਰਥੀਆਂ ਦੀ ਗਿਣਤੀ ਮੁਤਾਬਕ ਪੰਜਾਬੀ ਵਿਸ਼ੇ ਦੀਆਂ ਕਿਤਾਬਾਂ ਦੀ ਸਪਲਾਈ ਵੀ ਸਿਰਫ਼ 3-4 ਫ਼ੀਸਦੀ ਹੀ ਭੇਜੀ ਜਾ ਰਹੀ ਹੈ। ਪੰਜਾਬੀ ਭਾਸ਼ਾ ਦੀ ਬਦਕਿਸਮਤੀ ਹੈ ਕਿ ਜੋਧਪੁਰ ਹਾਈਕੋਰਟ ਵੱਲੋਂ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਜ਼ਿਲ੍ਹਿਆਂ ’ਚ ਸਰਕਾਰੀ ਸਕੂਲਾਂ ਵਿੱਚ ਪੰਜਾਬੀ ਅਧਿਆਪਕਾਂ ਦੀ ਨਿਯੁਕਤੀ ਸਬੰਧੀ ਟੈਸਟ ਨਵੇਂ ਸਿਰਿਓਂ ਕਰਵਾਉਣ ਦੇ ਹੁਕਮਾਂ ਦੇ 8-9 ਮਹੀਨੇ ਬਾਅਦ ਅੱਜ ਟੈਸਟ ਨਹੀਂ ਹੋ ਸਕਿਆ। ਪੰਜਾਬੀ ਭਾਸ਼ਾ ਪ੍ਰਚਾਰ ਸਭਾ ਦੇ ਕਨਵੀਨਰ ਪ੍ਰੋ. ਬਲਜਿੰਦਰ ਸਿੰਘ ਮੋਰਜੰਡ ਦਾ ਕਹਿਣਾ ਹੈ ਕਿ ਅਦਾਲਤੀ ਫੈਸਲੇ ਨੂੰ ਜ਼ਿਲ੍ਹਾ ਪ੍ਰੀਸ਼ਦ ਵੱਲੋਂ ਲਾਗੂ ਨਾ ਕਰਨ ਖਿਲਾਫ਼ ਟੈਸਟ ਦੇ ਪ੍ਰੀਖਿਆਰਥੀਆਂ ਨੇ 26 ਦਸੰਬਰ ਤੋਂ ਹੜਤਾਲ ਕਰਨ ਦੀ ਚਿਤਾਵਨੀ ਦਿੱਤੀ ਹੈ। 
              ਦੁਨੀਆਂ ਭਰ ਦੇ ਸਿੱਖਾਂ ਅਤੇ ਪੰਜਾਬੀ ਭਾਸ਼ਾ ਦੇ ਮੁਦਈ ਅਖਵਾਉਂਦੀ ਪੰਜਾਬ ਦੀ ਅਕਾਲੀ-ਭਾਜਪਾ ਸਰਕਾਰ ਵੀ ਪੰਜਾਬੀ ਭਾਸ਼ਾ ਦੀ  ਤਰਜਮਾਨੀ ਲਈ ਦੋਹਰਾ ਵਤੀਰਾ ਰੱਖਦੀ ਹੈ। ਦਿੱਲੀ ’ਚ ਪੰਜਾਬੀ ਭਾਸ਼ਾ ਦੇ ਵਿਕਾਸ ਲਈ ਅਕਾਲੀ ਦਲ ਨੇ ਖੂਬ ਰੌਲਾ ਪਾਇਆ ਪਰ ਰਾਜਸਥਾਨ ’ਚ ਭਾਈਵਾਲ ਭਾਜਪਾ ਦੀ ਸਰਕਾਰ ਹੋਣ ਕਰਕੇ ਪੰਜਾਬੀ ਭਾਸ਼ਾ ਦੀ ਗੁਆਚੀ ਹੋਂਦ ਨੂੰ ਜਾਣ-ਬੁੱਝ ਕੇ ਅੱਖੋਂ-ਪਰੋਖੇ ਕੀਤਾ ਜਾ ਰਿਹਾ ਹੈ। ਪੰਜਾਬੀ ਭਾਸ਼ਾ ਪ੍ਰਚਾਰ ਸਭਾ ਦੇ ਕਨਵੀਨਰ ਪ੍ਰੋ. ਬਲਜਿੰਦਰ ਸਿੰਘ ਮੋਰਜੰਡ ਦਾ ਕਹਿਣਾ ਸੀ ਕਿ ਰਾਜਸਥਾਨ ਵਿੱਚ ਸਕੂਲਾਂ-ਕਾਲਜਾਂ ਵਿੱਚ ਜ਼ਮੀਨੀ ਪੱੱਧਰ ’ਤੇ ਪੰਜਾਬੀ ਭਾਸ਼ਾ ਨੂੰ ਨੇਸਤੋ-ਨਾਬੂਦ ਕਰਨ ਜਿਹੇ ਹਾਲਾਤ  ਭਾਜਪਾ ਸਰਕਾਰ ਦੀ ਸੰਘਵਾਦੀ ਨੀਤੀ ਦਾ ਹਿੱਸਾ ਹਨ।
   
ਰਾਜਸਥਾਨ ਘੱਟ ਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਜਸਬੀਰ ਸਿੰਘ ਨੇ ਕਿਹਾ ਕਿ ਅਦਾਲਤੀ ਫੈਸਲੇ ਮਗਰੋਂ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਜ਼ਿਲ੍ਹਿਆਂ ਦੇ ਸਰਕਾਰੀ ਸਕੂਲਾਂ ’ਚ ਪੰਜਾਬੀ ਵਿਸ਼ੇ ਦੇ ਅਧਿਆਪਕਾਂ ਦੀ ਨਿਯੁਕਤੀ ਸਬੰਧੀ ਟੈਸਟ ਛੇਤੀ ਕਰਵਾਉਣ ਲਈ ਚਾਰਾਜੋਈ ਕੀਤੀ ਜਾ ਰਹੀ ਹੈ। ਰਾਜਸਥਾਨ ਦੇ ਸਰਕਾਰੀ ਕਾਲਜਾਂ ’ਚ ਇੱਕ ਵੀ ਪੰਜਾਬੀ ਲੈਕਚਰਰ ਦੀ ਅਸਾਮੀ ਨਾ ਹੋਣ ਬਾਰੇ ਅਗਿਆਨਤਾ ਜਾਹਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਬੜਾ ਗੰਭੀਰ ਮਸਲਾ ਹੈ ਅਤੇ ਇਸਨੂੰ ਸਰਕਾਰ ਦੇ ਧਿਆਨ ’ਚ ਲਿਆ ਕੇ ਅਸਾਮੀਆਂ ਸਥਾਪਿਤ ਕਰਵਾਈਆਂ ਜਾਣਗੀਆਂ। 
 
      ਸ਼ੋ੍ਰਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅੰਮ੍ਰਿਤਸਰ ਦੇ ਪ੍ਰਧਾਨ ਪ੍ਰੋ. ਕ੍ਰਿਪਾਲ ਸਿੰਘ ਬਡੰੂਗਰ ਨੇ ਕਿਹਾ ਕਿ ਮੈਨੂੰ ਰਾਜਸਥਾਨ ਦੇ ਕਾਲਜਾਂ ’ਚ ਪੰਜਾਬੀ ਵਿਸ਼ੇ ਦੀ ਅਣਹੋਂਦ ਬਾਰੇ ਜਾਣਕਾਰੀ ਨਹੀਂ ਸੀ ਅਤੇ ਉਹ ਕੱਲ੍ਹ ਹੀ ਰਾਜਸਥਾਨ ਦੇ ਮੁੱਖ ਮੰਤਰੀ ਨੂੰ ਪੱਤਰ ਲਿਖ ਕੇ ਕਾਲਜਾਂ ’ਚ ਪੰਜਾਬੀ ਵਿਸ਼ੇ ਦੀਆਂ ਅਸਾਮੀਆਂ ਸਥਾਪਿਤ ਕਰਨ ਦੀ ਮੰਗ ਕਰਨਗੇ। ਪੰਜਾਬੀ ਭਾਸ਼ਾ ਨਾਲ ਵਿਤਕਰੇ ਸਬੰਧੀ ਰਾਜਸਥਾਨ ਦੇ ਉੱਚ ਸਿੱਖਿਆ ਮੰਤਰੀ ਕਿਰਨ ਮਹੇਸ਼ਵਰੀ ਅਤੇ ਸਿੱਖਿਆ ਮੰਤਰੀ ਵਾਸੂਦੇਵ ਦੇਵਨਾਨੀ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਕਈ ਵਾਰ ਫੋਨ ਕਰਨ ’ਤੇ ਦੋਵੇਂ ਮੰਤਰੀਆਂ ਨਾਲ ਸੰਪਰਕ ਨਹੀਂ ਬਣ ਸਕਿਆ। ਪੰਜਾਬੀ ਭਾਸ਼ਾ ਦੀ ਗੱਲ ਸੁਣਨ ’ਤੇ ਵਾਸੂਦੇਵ ਦੇਵਨਾਨੀ ਦੇ ਪੀ.ਏ. ਤਾਂ ਮੰਤਰੀ ਬਹੁਤ ਬਿਜ਼ੀ ਹਨ ਆਖ ਕੇ ਫੋਨ ਕੱਟ ਗਏ। 98148-26100 / 93178-26100

10 December 2016

ਮੁੱਖ ਮੰਤਰੀ ਬਾਦਲ ਨੇ 77352 ਵੋਟਾਂ ਪੱਕੀਆਂ ਕਰਨ ਨੂੰ ਖੇਡੀ 42 ਕਰੋੜੀ ਖੇਡ

- ਮੁੱਖ ਮੰਤਰੀ ਬਾਦਲ ਨੇ ਆਪਣਾ  ਮਹਿਲ’ ਪੁਖ਼ਤਾ ਰੱਖਣ ਲਈ ਗਰੀਬਾਂ ਦੇ ‘ਕੱਚੇ ਮਕਾਨਾਂ’ ਦਾ ਸਹਾਰਾ ਲਿਆ 
- ਸੇਮ ਦੀ ਓਟ ’ਚ ਅਖ਼ਤਿਆਰੀ ਕੋਟੇ ’ਚੋਂ 25784 ਪਰਿਵਾਰਾਂ ਨੂੰ ਮਕਾਨ ਮੁਰੰਮਤ ਲਈ 15-15 ਹਜ਼ਾਰ ਰੁਪਏ 
- 498 ਪਰਿਵਾਰਾਂ ਨੂੰ ਨਵੇਂ ਮਕਾਨ ਬਣਾਉਣ ਲਈ 60-60 ਹਜ਼ਾਰ ਦੀ ਸੌਗਾਤ

                                                               ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਆਪਣੇ ਜੱਦੀ ਹਲਕੇ ਲੰਬੀ ਵਿੱਚ ਹੋਣ ਵਾਲੇ ਤਿਕੋਣੇ ਮੁਕਾਬਲੇ ’ਚ ਆਪਣਾ ਸਿਆਸੀ ਮਹਿਲ ਪੁਖ਼ਤਾ ਰੱਖਣ ਲਈ ਗਰੀਬਾਂ ਦੇ ਕੱਚੇ ਮਕਾਨਾਂ ਦਾ ਸਹਾਰਾ ਲੈ ਰਹੇ ਹਨ। ਮੁੱਖ ਮੰਤਰੀ ਦੇ ਅਖ਼ਤਿਆਰੀ ਕੋਟੇ ਦੀਆਂ ਛੋਟੀਆਂ ਬੱਚਤਾਂ ਵਾਲੇ ਫੰਡ ਵਿਚੋਂ ਸੇਮ ਪ੍ਰਭਾਵਿਤ ਖੇਤਰ ਦੀ ਓਟ ਵਿੱਚ ਕੱਚੇ ਮਕਾਨਾਂ ਦੀ ਮੁਰੰਮਤ ਅਤੇ ਨਵੇਂ ਮਕਾਨਾਂ ਲਈ
ਲਗਪਗ 42 ਕਰੋੜ ਰੁਪਏ ਦੀ ਰਕਮ ਵੰਡੀ ਗਈ ਹੈ। ਜਿਸ ਵਿੱਚ 25784 ਪਰਿਵਾਰਾਂ ਨੂੰ ਪ੍ਰਤੀ ਮਕਾਨ ਮੁਰੰਮਤ ਲਈ 15 ਹਜ਼ਾਰ ਰੁਪਏ ਦੀ ਰਕਮ ਦਿੱਤੀ ਗਈ ਹੈ। ਜਦੋਂ ਕਿ ਲਗਪਗ 498 ਪਰਿਵਾਰਾਂ ਨੂੰ ਨਵੇਂ ਮਕਾਨ ਬਣਾਉਣ ਖਾਤਰ 60 ਹਜ਼ਾਰ ਰੁਪਏ ਦੇ ਚੈੱਕ ਜਾਰੀ ਕੀਤੇ ਗਏ। ਅੰਨ੍ਹੇ ਦੀਆਂ ਰਿਊੜੀਆਂ ਵਾਂਗ ਬੇਜ਼ਮੀਨੇ ਅਤੇ ਬੇਘਰੇ ਲੋਕਾਂ ਨੂੰ ਵਿੱਤੀ ਮੱਦਦ ਦੇ ਨਾਂਅ ਉੱਪਰ ਸਰਕਾਰੀ ਫੰਡ ਵੰਡਣ ਦਾ ਸਿਲਸਿਲਾ ਵੱਡੇ ਪੱਧਰ ’ਤੇ ਜਾਰੀ ਹੈ। ਜਿਸਦੇ ਚੋਣ ਜ਼ਾਬਤਾ ਲੱਗਣ ਤੱਕ ਜਾਰੀ ਰਹਿਣ ਤੱਕ ਉਮੀਦ ਹੈ। ਸਰਕਾਰੀ ਅਮਲਾ ਦਿਨ-ਰਾਤ ਗਰਾਂਟ ਦੇ ਚੈੱਕ ਬਣਾਉਣ ਤੇ ਸੂਚੀਆਂ ਦੇ ਵਿਸਥਾਰ ਵਿੱਚ ਰੁੱਝਿਆ ਹੋਇਆ ਹੈ।
          ਮੁੱਖ ਮੰਤਰੀ ਦੇ ਸਿਆਸੀ ਵਿਰੋਧੀ ਮਕਾਨਾਂ ਦੀ ਮੁਰੰਮਤ ਵਜੋਂ ਖਰਚੇ 42 ਕਰੋੜ ਰੁਪਏ ਨੂੰ ਸਰਕਾਰੀ ਫੰਡਾਂ ਨਾਲ ਵੋਟਾਂ ਦੀ ਕਥਿਤ ਅਗਾਊਂ ਖਰੀਦ ਦੱਸ ਰਹੇ ਹਨ। ਜਦੋਂ ਕਿ ਸੱਤਾ ਪੱਖ ਅਕਾਲੀ ਦਲ ਇਸਨੂੰ ਮਾੜੀ ਹਾਲਤ ਮਕਾਨ ’ਚ ਵੇਲਾ ਲੰਘਾ ਰਹੇ ਲੋਕਾਂ ਦੀ ਇਖ਼ਲਾਕੀ ਮੱਦਦ ਦੱਸ ਰਿਹਾ ਹੈ। ਜੇਕਰ ਵਿਰੋਧੀਆਂ ਦੀ ਮੰਨੀਏ ਤਾਂ ਅਕਾਲੀ ਦਲ ਨੇ ਹਲਕੇ ’ਚ ਲੋਕਮਨਾਂ ਦੇ ਵਿਰੋਧ ਨੂੰ ਮੱਠਾ ਪਾਉਣ ਲਈ ਸੱਤਾ ਪੱਖ ਘਰ-ਘਰ ਇਸ ਸਕੀਮ ਰਾਹੀਂ ਅਕਾਲੀ ਦਲ ਨੇ ਕਰੀਬ 77352 ਵੋਟਾਂ ਨੂੰ ਸਰਕਾਰੀ ਫੰਡ ਨਾਲ ਆਪਣੇ ਕਬਜ਼ੇ ਵਿੱਚ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। 
           ਇਸ ਸਕੀਮ ਨੂੰ ਮੁਰੰਮਤ ਅਤੇ ਨਵੇਂ ਮਕਾਨਾਂ ਦੇ ਲਾਭਪਾਤਰੀਆਂ ਦੀ ਸੂਚੀ ਨੋਡਲ ਅਫਸਰਾਂ ਤੋਂ ਪੜਤਾਲ ਉਪਰੰਤ ਬਣਾਉਣ ਦਾ ਦਾਅਵਾ ਕੀਤਾ ਗਿਆ ਹੈ। ਇਸਦੇ ਬਾਵਜੂਦ ਇੱਕ ਮਕਾਨ ਵਿੱਚ ਰਹਿੰਦੇ ਤਿੰਨ-ਤਿੰਨ ਪਰਿਵਾਰਾਂ ਨੂੰ ਵੀ ਮਕਾਨ ਮੁਰੰਮਤ ਲਈ 15-15 ਹਜ਼ਾਰ ਰੁਪਏ ਦੇ 3-3 ਚੈੱਕ ਵੰਡ ਦਿੱਤੇ ਗਏ। ਕਣਸੋਆਂ ਹਨ ਕਿ ਬੇਘਰਿਆਂ ਲਈ ਸਕੀਮ ’ਚ ਕਈ ਵੱਡੇ ਘਰ ਵਾਲੇ ਵੀ ਹੱਥ ਧੋ ਗਏ ਹਨ। ਬਹੁਤ ਸਾਰੇ ਹਕੀਕੀ ਲੋੜਵੰਦ ਇਸ ਮੱਦਦ ਤੋਂ ਵਾਂਝੇ ਫ਼ਿਰਦੇ ਹਨ। ਜਿਸ ਕਾਰਨ ਬਹੁਤੇ ਲੋਕਾਂ ਵਿੱਚ ਰੋਸ ਵੀ ਪਨਪ ਰਿਹਾ ਹੈ। ਪਤਾ ਲੱਗਿਆ ਹੈ ਕਿ ਵੋਟਾਂ ਤੱਕ ਦੀ ਸਾਂਝ ਸਬੰਧੀ ਪੱਕੀ ਗੱਲਬਾਤ ਹੋਣ ਮਗਰੋਂ ਹੀ ਸੂਚੀ ਵਿੱਚ ਨਾਂਅ ਪਾਏ ਜਾਂਦੇ ਹਨ। 
            ਮਕਾਨ ਮੁਰੰਮਤ ਦੀ ਸੂਚੀ ਵਿੱਚ ਸਭ ਤੋਂ ਵੱਧ 850 ਲਾਭਪਾਤਰੀ ਪਿੰਡ ਮਹਿਣਾ, ਮੰਡੀ ਕਿੱਲਿਆਂਵਾਲੀ ’ਚ 785, ਪਿੰਡ ਕਿੱਲਿਆਂਵਾਲੀ ’ਚ 722, ਭੀਟੀਵਾਲਾ ’ਚ 617, ਵੜਿੰਗਖੇੜਾ ’ਚ 527, ਸਿੱਖਵਾਲਾ 430, ਮਿੱਡੂਖੇੜਾ ’ਚ 448, ਪਿੰਡ ਲੰਬੀ ’ਚ 536, ਤਰਮਾਲਾ ’ਚ 431, ਚੰਨੂ ’ਚ 338, ਡੱਬਵਾਲੀ ਮਲਕੋ ਕੀ ’ਚ 454, ਵਣਵਾਲਾ ਅੰਨੂ ’ਚ 498, ਪਿੰਡ ਬਾਦਲ ’ਚ 113 ਅਤੇ ਸੰਸਦ ਆਦਰਸ਼ ਗਰਾਮ ਮਾਨ ’ਚ 300, ਭੁੱਲਰਵਾਲਾ ’ਚ 568, ਕੱਖਾਂਵਾਲੀ ’ਚ 203, ਢਾਣੀ ਤੇਲਿਆਂਵਾਲੀ ’ਚ 109, ਮਿਠੜੀ ਬੁੱਧਗਿਰ ’ਚ 202, ਮਾਹੂਆਣਾ ’ਚ 294,  ਸਿੰਘੇਵਾਲਾ ’ਚ 554, ਫਤੂਹੀਵਾਲਾ ’ਚ 398, ਫੁੱਲੂਖੇੜਾ ’ਚ 339, ਫੱਤਾਕੇਰਾ ’ਚ 232, ਖੁੱਡੀਆਂ ਗੁਲਾਬ ਸਿੰਘ ’ਚ 368, ਖੁੱਡੀਆਂ ਮਹਾਂ ਸਿੰਘ ’ਚ 279, ਪੰਜਾਵਾ ’ਚ 357, ਰਸੂਲਪੁਰ ਕੇਰਾ ’ਚ 375 ਅਤੇ ਆਧਨੀਆਂ ’ਚ 279, ਮਾਹਣੀਖੇੜਾ ’ਚ 150, ਰੋੜਾਂਵਾਲੀ ’ਚ 275, ਕੰਦੂਖੇੜਾ ’ਚ 247, ਭਾਈ ਕਾ ਕੇਰਾ ’ਚ 670, ਅਰਨੀਵਾਲਾ ਵਜੀਰਾ ’ਚ 131, ਘੁਮਿਆਰਾ ’ਚ 75, ਢਾਣੀ ਸਿੰਘੇਵਾਲਾ ’ਚ 39, ਧੌਲਾ ’ਚ 50 ਪਰਿਵਾਰ ਸ਼ਾਮਲ ਹਨ। ਸੂਚੀ ਅਨੁਸਾਰ ਸੇਮ ਪ੍ਰਭਾਵਿਤ ਪਿੰਡ ਫਤਿਹਪੁਰ ਮਨੀਆਂ ’ਚ ਕਿਸੇ ਵੀ ਗਰੀਬ ਦੇ ਮਕਾਨ ਨੂੰ ਮੁਰੰਮਤ ਦੀ ਲੋੜ ਨਹੀਂ ਅਤੇ ਨਾ ਹੀ ਕਿਸੇ ਦਾ ਮਕਾਨ ਬਣਾਉਣ ਵਾਲਾ ਹੈ। ਇਸੇ ਤਰ੍ਹਾਂ ਨਵੇਂ ਮਕਾਨਾਂ ਦੀ ਸੂਚੀ ’ਚ ਚੰਨੂ ਪੂਰਬੀ ’ਚ 145 ਨਵੇਂ ਮਕਾਨ ਬਣਾਉਣ ਲਈ 60-60 ਹਜ਼ਾਰ ਰੁਪਏ ਦੀ ਗਰਾਂਟ ਜਾਰੀ ਕੀਤੀ ਗਈ ਹੈ। ਉਥੇ ਮੁੱਖ ਮੰਤਰੀ ਦੇ ਪਿੰਡ ਬਾਦਲ ’ਚ 8 ਨਵੇਂ ਮਕਾਨ, ਖਿਉਵਾਲੀ ’ਚ 19,  ਲੰਬੀ ’ਚ 28, ਭੀਟੀਵਾਲਾ ’ਚ 20 ਪਰਿਵਾਰਾਂ ਨੂੰ ਨਵੇਂ ਮਕਾਨਾਂ ਦੀ ਸੌਗਾਤ ਦਿੱਤੀ ਗਈ ਹੈ। ਹਾਲਾਂਕਿ ਭੁੱਲਰਵਾਲਾ, ਰੋੜਾਂਵਾਲੀ, ਸਹਿਣਾਖੇੜਾ, ਵੜਿੰਗਖੇੜਾ, ਘੁਮਿਆਰਾ, ਮਿੱਡੂਖੇੜਾ, ਕੰਦੂਖੇੜਾ, ਪਿੰਡ ਕਿੱਲਿਆਂਵਾਲੀ, ਮਹਿਣਾ, ਚੰਨੂ, ਮਾਹੂਆਣਾ, ਦਿਉਣਖੇੜਾ, ਚੰਨੂ, ਢਾਣੀ ਤੇਲਿਆਂਵਾਲੀ, ਖੇਮਾਖੇੜਾ, ਦੋਵੇਂ ਖੁੱਡੀਆਂ ਸਮੇਤ ਹਾਕੂਵਾਲਾ, ਫੱਤਾਕੇਰਾ, ਭਾਈਕੇਰਾ, ਪੰਜਾਵਾ, ਰਸੂਲਪੁਰ ਕੇਰਾ ’ਚ ਕਿਸੇ ਪਰਿਵਾਰ ਨੂੰ ਨਵਾਂ ਮਕਾਨ ਬਣਾਉਣ ਦੀ ਜ਼ਰੂਰਤ ਨਹੀਂ ਹੈ। 
ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸੁਮਿਤ ਜਾਰੰਗਲ ਨੇ ਕਿਹਾ ਕਿ ਪ੍ਰਸ਼ਾਸਨ ਨੇ ਬਕਾਇਦਾ ਨਿਰਪੱਖ ਸਰਵੇ ਰਾਹੀਂ ਪੂਰੀ ਪਾਰਦਰਸ਼ਿਤਾ ਨਾਲ ਲੋੜਵੰਦ ਪਰਿਵਾਰਾਂ ਦੀ ਹਾਲਤ ਦੇ ਮੱਦੇਨਜ਼ਰ ਮਕਾਨਾਂ ਦੀ ਮੁਰੰਮਤ ਅਤੇ ਨਵੇਂ ਮਕਾਨ ਦੀ ਸੂਚੀ ਤਿਆਰ ਕੀਤੀ ਹੈ। ਜਿਸ ਵਿੱਚ ਊਣਤਾਈ ਦੀ ਕੋਈ ਗੁੰਜਾਇਸ਼ ਨਹੀਂ। 
ਸੱਤਾ ਪੱਖ ਅਕਾਲੀ ਦਲ ਦੇ ਕੌਮੀ ਜਥੇਬੰਦਕ ਸਕੱਤਰ ਤੇਜਿੰਦਰ ਸਿੰਘ ਮਿੱਡੂਖੇੜਾ ਦਾ ਕਹਿਣਾ ਸੀ ਕਿ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਮਾੜੀ ਹਾਲਤ ਮਕਾਨਾਂ ’ਚ ਵਸਦੇ ਲੋੜਵੰਦ ਪਰਿਵਾਰਾਂ ਨੂੰ ਮਜ਼ਬੂਤ ਛੱਤ ਦੇਣ ਦੇ ਇਰਾਦੇ ਨਾਲ ਮੁਰੰਮਤ ਅਤੇ ਨਵੇਂ ਮਕਾਨ ਲਈ ਫੰਡ ਦੇ ਕੇ ਇਖ਼ਲਾਕੀ ਫਰਜ਼ ਨਿਭਾਇਆ ਹੈ। 
  ਦੂਜੇ ਪਾਸੇ ਜ਼ਿਲ੍ਹਾ ਕਾਂਗਰਸ ਦੇ ਪ੍ਰਧਾਨ ਅਤੇ ਲੰਬੀ ਤੋਂ ਕਾਂਗਰਸ ਦੇ ਸੰਭਾਵੀ ਉਮੀਦਵਾਰ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਚੋਣਾਂ ਤੋਂ ਐਨ ਪਹਿਲਾਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਲੋੜਵੰਦ ਪਰਿਵਾਰਾਂ ਦੀ ਮੱਦਦ ਦੇ ਨਾਂਅ ’ਤੇ ਆਪਣੇ ਅਖ਼ਤਿਆਰੀ ਕੋਟੇ ਦੀ ਦੁਰਵਰਤੋਂ ਕਰ ਰਹੇ ਹਨ। ਖੁੱਡੀਆਂ ਨੇ ਕਿਹਾ ਕਿ ਲੰਬੀ ਹਲਕੇ ’ਚ ਸਰਕਾਰ ਦੇ 40-42 ਕਰੋੜ ਖਰਚ ਕੇ ਅਕਾਲੀ ਦਲ ਵੋਟਾਂ ਦੀ ਅਗਾਊਂ ਖਰੀਦ ਕਰ ਰਿਹਾ ਹੈ।   98148-26100 / 93178-26100
   
 

16 October 2016

‘ਕਸਾਈਪੁਣੇ’ ਵਾਲੀ ਕਰਤੂਤ ਦਾ ਮਾਲਕ ਸਰਕਾਰੀ ਕਮਿਊਨਿਟੀ ਸਿਹਤ ਕੇਂਦਰ ਲੰਬੀ

* ਪੁਲਸੀਆ ਡਾਂਗਾਂ ਦੇ ਭੁੱਜੇ ਜਖ਼ਮੀ 4 ਸੁਵਿਧਾ ਕਾਮਿਆਂ ਦੇ ਬਿਨ੍ਹਾਂ ਫੀਸ ਐਕਸਰੇ ਅਤੇ ਟੈਸਟਾਂ ਤੋਂ ਕੋਰੀ ਨਾਂਹ
* ਜਖ਼ਮੀਆਂ ਦੇ ਸਿਰਾਂ ਤੇ ਛਾਤੀ ’ਤੇ ਹਨ ਸੱਟਾਂ 
* ਸੁਵਿਧਾ ਕਰਮਚਾਰੀਆਂ ਨੂੰ ਨਹੀਂ ਦਿੱਤੀ ਢੁੱਕਵੀਂ ਸਿਹਤ ਸੇਵਾ

                                                   ਇਕਬਾਲ ਸਿੰਘ ਸ਼ਾਂਤ
      ਲੰਬੀ: ਡਾਕਟਰੀ ਪੇਸ਼ੇ ਦੀਆਂ ਕਦਰਾਂ-ਕੀਮਤਾਂ ਨੂੰ ਦਰਕਿਨਾਰ ਕਰਕੇ  ਲੰਬੀ ਦਾ ਸਰਕਾਰੀ ਕਮਿਊਨਿਟੀ ਸਿਹਤ ਕੇਂਦਰ ‘ਕਸਾਈਪੁਣੇ’ ’ਤੇ ਉੱਤਰ ਆਇਆ ਹੈ। ਕੱਲ੍ਹ ਪੁਲਸੀਆ ਡਾਂਗਾਂ ਦਾ ਭੋਜਣ ਬਣੇ ਸੁਵਿਧਾ ਕਰਮਚਾਰੀਆਂ ਦੇ ਭੁੱਜੇ ਪਿੰਡੇ ’ਤੇ ਮੱਲ੍ਹਮ ਲਾਉਣ ਦੀ ਜਗ੍ਹਾ ਸਿਹਤ ਕੇਂਦਰ ਦੇ ਅਮਲੇ ਨੇ ਬਿਨ੍ਹਾਂ ਸਰਕਾਰੀ ਫੀਸ ਦੇ ਐਕਸਰੇ ਅਤੇ ਟੈਸਟ ਕਰਨ ਤੋਂ ਕੋਰੀ ਨਾਂਹ ਕਰ ਦਿੱਤੀ। ਕੱਲ੍ਹ ਰਾਤ ਤੋਂ ਜ਼ੇਰੇ ਇਲਾਜ 4 ਗੰਭੀਰ ਜਖ਼ਮੀ ਸੁਵਿਧਾ ਕਰਮਚਾਰੀਆਂ ਨੂੰ ਕੋਈ ਢੁੱਕਵੀਂ ਸਿਹਤ ਸੇਵਾ ਨਹੀਂ ਦਿੱਤੀ ਗਈ। ਸੁਵਿਧਾ ਕਾਮਿਆਂ ਦੇ ਬਟੂਏ ਬਾਦਲ ਪਿੰਡ ’ਚ ਲਾਠੀਚਾਰਜ਼ ਦੌਰਾਨ ਭੱਜ-ਦੌੜ ’ਚ ਡਿੱਗ ਪਏ ਸਨ। ਬਲਵਿੰਦਰ ਸਿੰਘ ਮੋਗਾ ਦੇ ਸਿਰ ਅਤੇ ਲੱਤਾਂ ’ਤੇ ਗੰਭੀਰ ਜਖ਼ਮ ਹਨ। ਇਸੇ ਤਰ੍ਹਾਂ ਜਸਪ੍ਰੀਤ ਸਿੰਘ ਮੋਗਾ ਦੀ ਛਾਤੀ, ਬਾਂਹ ਅਤੇ ਪਿੱਠ ’ਤੇ ਕਾਫ਼ੀ ਸੱਟਾਂ ਹਨ। ਸੁਖਮੰਦਰ ਮੋਗਾ ਅਤੇ ਰਾਕੇਸ਼ ਮੁਕਤਸਰ ਦੇ ਵੀ ਸਰੀਰਾਂ ’ਤੇ ਕਾਫ਼ੀ ਸੱਟਾਂ ਲੱਗੀਆਂ ਹੋਈਆਂ ਹਨ। ਜਿਨ੍ਹਾਂ ਦੇ ਇਲਾਜ ਲਈ ਐਕਸਰੇ ਦੀ ਜ਼ਰੂਰਤ ਹੈ। 
ਜਸਪ੍ਰੀਤ ਸਿੰਘ ਮੋਗਾ ਨੇ ਦੱਸਿਆ ਕਿ ਕੱਲ੍ਹ ਲਾਠੀਚਾਰਜ਼ ਮਗਰੋਂ ਉਹ 108 ਐੈਂਬੂਲੈਂਯ ਨੂੰ ਖੁਦ ਬੁਲਾ ਕੇ ਸਿਹਤ ਕੇਂਦਰ ਲੰਬੀ ’ਚ ਇਲਾਜ ਖਾਤਰ ਪੁੱਜੇ ਸਨ। ਰਾਤ ਸਮੇਂ ਜਖ਼ਮੀਆਂ ਨੂੰ ਤਕਲੀਫ਼ ਹੋਣ ’ਤੇ ਡਾਕਟਰਾਂ ਨੇ ਆਖਿਆ ਕਿ ਤੁਸੀਂ ਹਸਪਤਾਲ ’ਚ ਦਾਖਲ ਨਹੀਂ ਹੋ ਇਸ ਲਈ ਉਹ ਕੁਝ ਨਹੀਂ ਕਰ ਸਕਦੇ। ਜਸਪ੍ਰੀਤ ਸਿੰਘ, ਬਲਵਿੰਦਰ ਸਿੰਘ, ਸੁਖਮੰਦਰ ਸਿੰਘ ਮੋਗਾ ਨੇ ਕਿਹਾ ਕਿ ਡਾਕਟਰਾਂ ਨੇ ਕੱਲ੍ਹ ਸਿਰਫ਼ ਇੱਕ-ਇੱਕ ਦਰਦਨਿਵਾਰਕ ਟੀਕਾ ਲਾਉਣ ਉਪਰੰਤ ਉਨ੍ਹਾਂ ਦੇ ਜਖ਼ਮਾਂ ’ਤੇ ਪੱਟੀਆਂ ਵੀ ਨਹੀਂ ਕੀਤੀਆਂ। ਜਸਪ੍ਰੀਤ ਸਿੰਘ ਮੋਗਾ ਨੇ ਕਿਹਾ ਕਿ ਜਦੋਂ ਸਿਰ ’ਤੇ ਵੱਜੀਆਂ ਡਾਂਗਾਂ ਬਾਰੇ ਐਕਸਰੇ ਕਰਨ ਲਈ ਆਖਿਆ ਤਾਂ ਹਸਪਤਾਲ ਦਾ ਅਮਲਾ ਉਨ੍ਹਾਂ ਤੋਂ ਐਕਸਰੇ ਦੀ ਫੀਸ ਮੰਗਣ ਲੱਗ ਪਿਆ। ਉਸਨੇ ਕਿਹਾ ਕਿ ਲਾਠੀਚਾਰਜ਼ ਵਿੱਚ ਉਨ੍ਹਾਂ ਦੇ ਬਟੂਏ ਡਿੱਗ ਪਏ ਸਨ ਅਤੇ ਹੁਣ ਉਨ੍ਹਾਂ ਦੀ ਜੇਬ ’ਚ ਕੋਈ ਪੈਸਾ ਨਹੀਂ। ਉਨ੍ਹਾਂ ਕਿਹਾ ਕਿ ਡਾਕਟਰਾਂ ਨੇ ਉਨ੍ਹਾਂ ਤੋਂ ਖਾਲੀ ਕਾਗਜ਼ਾਂ ’ਤੇ ਦਸਤਖ਼ਤ ਕਰਵਾਉਣ ਦੀ ਕੋਸ਼ਿਸ਼ ਵੀ ਕੀਤੀ। ਉਨ੍ਹਾਂ ਕਿਹਾ ਬਾਦਲਾਂ ਦੇ ਜੱਦੀ ਹਲਕੇ ਦੇ ਡਾਕਟਰਾਂ ਵਿੱਚ ਵੀ ਕੋਈ ਇਨਸਾਨੀਅਤ ਨਾਂਅ ਦੀ ਕੋਈ ਚੀਜ਼ ਨਹੀਂ। ਜ਼ਖ਼ਮੀਆਂ ਦੇ ਸਿਰ, ਛਾਤੀ ’ਤੇ ਡਾਂਗਾਂ ਦੇ ਜਖ਼ਮਾਂ ਕਰਕੇ ਤੇਜ਼ ਦਰਦ ਹੈ ਪਰ ਹਸਪਤਾਲ ਦੇ ਅਮਲੇ ਨੇ ਬਿਨ੍ਹਾਂ ਫੀਸ ਤੋਂ ਐਕਸਰੇ ਕਰਨੋਂ ਨਾਂਹ ਕਰ ਦਿੱਤੀ ਅਤੇ ਅੱਜ ਸਾਢੇ 10 ਵਜੇ ਦੋ-ਦੋ ਗੋਲੀਆਂ ਦੇ ਕੇ ਬੁੱਤਾ ਸਾਰ ਦਿੱਤਾ ਗਿਆ।
ਜਸਪ੍ਰੀਤ ਨੇ ਕਿਹਾ ਕਿ ਸਿਹਤ ਕੇਂਦਰ ਲੰਬੀ ’ਚ ਇਲਾਜ ਨਾ ਹੋਣ ਕਜਕੇ ਕੁਝ ਸੁਵਿਧਾ ਕਰਮਚਾਰੀ ਤਾਂ ਆਪਣੇ ਇਲਾਜ ਲਈ ਨਿੱਜੀ ਹਸਪਤਾਲ ਦਾ ਰੁੱਖ ਕਰ ਗਏ। ਯੂਨੀਅਨ ਦੀ ਲੀਡਰਸ਼ਿਪ ਨੇ ਕਿਹਾ ਕਿ ਸਿਹਤ ਕੇਂਦਰ ਲੰਬੀ ’ਚ ਦਾਖਲ 4 ਸੁਵਿਧਾ ਕਰਮਚਾਰੀਆਂ ਦੀ ਡਾਕਟਰਾਂ ਵੱਲੋਂ ਕੋਈ ਵੀ ਦੇਖ-ਰੇਖ ਨਹੀਂ ਕੀਤੀ ਜਾ ਰਹੀ। ਉਹ ਮੁਲਾਜ਼ਮ ਦਰਦ ਨਾਲ ਕੁਰਲਾ ਰਹੇ ਹਨ ਪਰ ਉਨ੍ਹਾਂ ਦੀਆਂ ਡਾਕਟਰ ਵੀ ਆਪਣਾ ਫਰਜ਼ ਭੁੱਲ ਕੇ ਪੰਜਾਬ ਸਰਕਾਰ ਦੀ ਤਾਨਾਸ਼ਾਹੀ ਰਾਜ ਦੇ ਸ਼ਿਕਾਰ ਹੋ ਗਏ ਹਨ। ਯੂਨੀਅਨ ਆਗੂਆਂ ਅਨੁਸਾਰ ਲਾਠੀਚਾਰਜ਼ ਉਪਰੰਤ ਪ੍ਰਵੀਨ ਕੁਮਾਰ ਅਤੇ ਅਭਿਸ਼ੇਕ ਅਰੋੜਾ ਵਗੈਰਾ ਲਾਪਤਾ ਹਨ। ਉਨ੍ਹਾਂ ਦੋਸ਼ ਲਗਾਇਆ ਕਿ ਪੁਲਿਸ ਪ੍ਰਸ਼ਾਸ਼ਨ ਸੁਵਿਧਾ ਮੁਲਾਜ਼ਮਾਂ ’ਤੇ ਦਬਾਅ ਬਣਾਉਣ ਲਈ ਉਨ੍ਹਾਂ ਨੂੰ ਧੱਕੇ ਨਾਲ ਚੁੱਕ ਕੇ ਅਣਪਛਾਤੀ ਜਗਾ ’ਤੇ ਲੈ ਕੇ ਜਾ ਰਹੀ ਹੈ। ਜਨਰਲ ਸਕੱਤਰ ਸੱਤਪਾਲ ਸਿੰਘ ਨੇ ਕਿਹਾ ਕਿ ਸੁਵਿਧਾ ਕਰਮੀਆਂ ਵਿੱਚ ਪੰਜਾਬ ਸਰਕਾਰ ਇਸ ਵਤੀਰੇ ਕਾਰਣ ਸੁਵਿਧਾ ਮੁਲਾਜ਼ਮਾਂ ਵਿੱਚ ਰੋਸ਼ ਵਧਦਾ ਜਾ ਰਿਹਾ ਹੈ। ਸੁਵਿਧਾ ਮੁਲਾਜ਼ਮ ਇਨ੍ਹਾਂ ਡਾਗਾਂ ਸੋਟਿਆਂ ਦੀ ਕੋਈ ਪ੍ਰਵਾਹ ਨਹੀਂ ਕਰਨਗੇ ਅਤੇ ਆਪਣੀਆਂ ਹੱਕੀ ਅਤੇ ਜਾਇਜ਼ ਮੰਗਾਂ ਦੇ ਸਬੰਧ ਵਿੱਚ ਸੰਘਰਸ਼ ਜਾਰੀ ਰਖੱਣਗੇ। ਇਹ ਧਰਨਾ ਹੁਣ ਲੰਬੀ ਹਲਕੇ ਦੇ ਅਧੀਨ ਪੈਂਦੇ ਪਿੰਡ ਰਾਏ ਕਲਾ ਵਿਖੇ ਜਾਰੀ ਰੱਖਿਆ ਜਾਵੇਗਾ।
ਜ਼ਿਕਰਯੋਗ ਹੈ ਕਿ ਸੂਤਰਾਂ ਅਨੁਸਾਰ ਪੁਲੀਸ ਨੇ ਕੱਲ੍ਹ 95 ਅੌਰਤ ਸੁਵਿਧਾਂ ਕਰਮਚਾਰੀਆਂ ਨੂੰ ਛੱਡ ਦਿੱਤਾ ਸੀ। ਕੱਲ੍ਹ ਲਾਠੀਚਾਰਜ਼ ਉਪਰੰਤ ਪੁਰਸ਼ ਅਤੇ ਅੌਰਤ ਸੁਵਿਧਾ ਕਰਮਚਾਰੀਆਂ ਦੀ ਭਾਲ ’ਚ ਵੱਡੀ ਗਿਣਤੀ ਪਰੇਸ਼ਾਨ ਮਾਪੇ ਇੱਧਰ-ਉੱਧਰ ਭਟਕਦੇ ਰਹੇ।

ਪੜਤਾਲ ਕਰਵਾ ਕੇ ਕਾਰਵਾਈ ਕਰਾਂਗੇ : ਜਿਆਣੀ
ਸਿਹਤ ਕੇਂਦਰ ਲੰਬੀ ’ਚ ਜਖ਼ਮੀ ਸੁਵਿਧਾ ਕਾਮਿਆਂ ਦੇ ਇਲਾਜ ਵਿੱਚ ਊਣਤਾਈ ਬਾਰੇ ਸਿਹਤ ਮੰਤਰੀ ਸੁਰਜੀਤ ਜਿਆਣੀ ਨੇ ਕਿਹਾ ਕਿ ਸੁਵਿਧਾ ਕਰਮਚਾਰੀ ਝੂਠ ਬੋਲਦੇ ਹਨ, ਪੰਜਾਬ ਦੇ ਸਰਕਾਰੀ ਹਸਪਤਾਲਾਂ ਦੀ ਸੇਵਾਵਾਂ ਸਭ ਤੋਂ ਵਧੀਆ ਹਨ। ਫਿਰ ਵੀ ਉਹ ਸ਼ਿਕਾਇਤ ਆਉਣ ’ਤੇ ਪੜਤਾਲ ਕਰਵਾ ਕੇ ਕਾਰਵਾਈ ਕਰਾਂਗੇ। ਇਸੇ ਦੌਰਾਨ ਐਸ.ਐਮ.ਓ. ਡਾ. ਰੀਟਾ ਗੁਪਤਾ ਨੇ ਕਿਹਾ ਕਿ ਸਿਰਫ਼ ਐਕਸੀਡੈਂਟ ਕੇਸ ’ਚ ਐਕਸਰੇ ਦੀ ਫੀਸ ਨਹੀਂ ਲਈ ਜਾਂਦੀ ਪਰ ਐਮ.ਐਲ.ਸੀ. ਮਾਮਲਿਆਂ ’ਚ ਐਕਸਰੇ ਫੀਸ ਲਈ ਜਾਂਦੀ ਹੈ। ਉਨ੍ਹਾਂ ਇਲਾਜ ’ਚ ਅਣਗਹਿਲੀ ਦੇ ਦੋਸ਼ਾਂ ਨੂੰ ਖਾਰਜ ਕੀਤਾ। 98148-26100 / 93178-26100