ਸੁਖਬੀਰ ਸਿੰਘ ਬਾਦਲ ਦੀ ਹਾਜ਼ਰੀ 'ਚ ਪਿੰਡ ਬਾਦਲ ਰਿਹਾਇਸ਼ 'ਤੇ ਕੌਮੀ ਅਕਾਲੀ ਆਗੂ ਅਤੇ ਅਕਾਲੀ ਵਰਕਰ ਭਿੜਿਆ

 -ਸਮਰਥਕਾਂ ਵੱਲੋਂ ਗਲਾਮਾਂ ਫੜਣ 'ਤੇ ਚਾਹ ਦਾ ਕੱਪ ਅਕਾਲੀ ਆਗੂ ਦੇ ਮੂੰਹ 'ਤੇ ਮਾਰਿਆ-
                                                       -ਇਕਬਾਲ ਸਿੰਘ ਸ਼ਾਂਤ-
2 ਮਈ ਨੂੰ ਪਿੰਡ ਬਾਦਲ ਵਿਖੇ ਉੱਪ ਮੁੱਖ ਮੰਤਰੀ ਅਤੇ ਗ੍ਰਹਿ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਦੀ ਹਾਜ਼ਰੀ ਵਿਚ ਉਨ੍ਹਾਂ ਦੀ ਰਿਹਾਇਸ਼ 'ਤੇ ਅਮਨ ਕਾਨੂੰਨ ਦੀ ਸਥਿਤੀ ਉਸ ਸਮੇਂ ਵਿਗੜ ਗਈ ਜਦੋਂ ਇੱਕ ਜ਼ਮੀਨੀ ਵਿਵਾਦ ਦੇ ਵਿਵਾਦਤ ਮਾਮਲੇ ਨੂੰ ਲੈ ਕੇ ਯੂਥ ਅਕਾਲੀ ਦਲ ਦੇ ਕੌਮੀ ਪੱਧਰ ਦੇ ਇੱਕ ਆਗੂ ਅਤੇ ਇੱਕ ਕਿਸਾਨ ਵਿਚਕਾਰ ਸਿੱਧਾ ਟਕਰਾਅ ਹੋ ਗਿਆ, ਜੋ ਕਿ ਪਲਾਂ ਵਿਚ ਹੱਥੋਂ-ਪਾਈ ਤੱਕ ਪੁੱਜ ਗਿਆ।
        

       ਇਸ ਦੌਰਾਨ ਉੱਪ ਮੁੱਖ ਮੰਤਰੀ ਦੀ 'ਮਹਿਲਨੁਮਾ' ਰਿਹਾਇਸ਼ ਦੀ ਕੰਟੀਨ ਵਿਚ ਜਿੱਥੇ ਅਕਾਲੀ ਆਗੂ ਦੇ ਸਮਰਥਕਾਂ ਨੇ ਅਕਾਲੀ ਵਰਕਰ ਕੁੜਤੇ ਨੂੰ ਹੱਥ ਪਾ ਲਿਆ। ਜਿਸ 'ਤੇ ਅਕਾਲੀ ਵਰਕਰ ਨੇ ਤੈਸ਼ ਵਿਚ ਆ ਕੇ ਗਰਮਾ-ਗਰਮ ਚਾਹ ਦਾ ਕੱਪ ਹੀ ਉਕਤ ਆਗੂ ਦੇ ਮੂੰਹ 'ਤੇ ਦੇ ਮਾਰਿਆ। 
 ਦੋਸ਼ ਹੈ ਕਿ ਉਪਰੰਤ ਪਿੰਡ ਮਿੱਡੂਖੇੜਾ ਵਿਖੇ ਉਕਤ ਅਕਾਲੀ ਵਰਕਰ ਦੀ ਕਾਰ ਵਿਚ ਟੱਕਰ ਮਾਰ ਕੇ ਸੰਗੀਨਾਂ ਦੇ ਜ਼ੋਰ 'ਤੇ ਉਸਦੀ ਕਾਫ਼ੀ ਖਿੱਚ ਧੂਹ ਵੀ ਕੀਤੀ ਗਈ। ਜਿਸਨੂੰ ਮੌਕੇ 'ਤੇ ਪਹੁੰਚ ਕੇ ਪਿੰਡ ਵਾਲਿਆਂ ਨੇ ਉਸਨੂੰ ਬਚਾਇਆ।
           
          ਇਹ ਘਟਨਾ ਬਾਅਦ ਦੁਪਿਹਰ ਲਗਭਗ 2:15 ਵਜੇ ਉਸ ਵੇਲੇ ਵਾਪਰੀ ਜਦੋਂ ਪਿੰਡ ਮਿੱਡੂਖੇੜਾ ਦਾ ਜਗਰੂਪ ਸਿੰਘ ਪੁੱਤਰ ਕਰਨੈਲ ਸਿੰਘ ਆਪਣੀ ਜ਼ਮੀਨ ਵਿਚੋਂ ਉਸਦੇ ਸਰੀਕਾਂ ਵੱਲੋਂ ਕਥਿਤ ਤੌਰ ਉਤੇ ਕੌਮੀ ਪੱਧਰ ਦੇ ਅਕਾਲੀ ਆਗੂ ਦੀ ਕਥਿਤ ਸ਼ਹਿ 'ਤੇ ਗੰਨਮੈਨਾਂ ਦੀ ਹਮਾਇਤ ਸਕਦਾ ਜ਼ਬਰਦਸਤੀ ਕੰਬਾਈਨ ਨਾਲ ਕਣਕ ਕਟਵਾਉਣ ਦੇ ਦੋਸ਼ ਲਾਉਂਦਾ ਹੋਇਆ ਇਨਸਾਫ਼ ਦੀ ਗੁਹਾਰ ਲੈ ਕੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਦੇ ਦਰਬਾਰ ਵਿਚ ਗਿਆ ਸੀ। ਜਗਰੂਪ ਸਿੰਘ ਨੇ ਦੱਸਿਆ ਕਿ ਜਦੋਂ ਉਹ ਸ: ਬਾਦਲ ਕੋਲ ਆਪਣਾ ਦੁਖੜਾ ਸੁਣਾ ਰਿਹਾ ਸੀ ਤੇ ਉਸਨੇ ਕੋਲ ਹੀ ਖੜ੍ਹੇ ਇੱਕ ਕੌਮੀ ਪੱਧਰ ਦੇ ਅਕਾਲੀ ਆਗੂ 'ਤੇ ਕਣਕ ਵੱਢਣ ਦੇ ਦੋਸ਼ ਲਾਉਂਦਿਆਂ ਇਨਸਾਫ਼ ਦਿਵਾਉਣ ਦੀ ਮੰਗ ਕੀਤੀ ਤਾਂ ਉੱਪਰੋਂ ਉਕਤ ਆਗੂ ਨੇ ਕਥਿਤ ਤੌਰ 'ਤੇ ਉਸਨੂੰ ਉਪ ਮੁੱਖ ਮੰਤਰੀ ਸਾਹਮਣੇ ਹੀ 'ਵੇਖ ਲੈਣ' ਦੀ ਧਮਕੀ ਦਿੱਤੀ। ਇਸੇ ਦੌਰਾਨ ਉਪ ਮੁੱਖ ਮੰਤਰੀ ਨੇ ਖੇਤਰ ਵਿਚ ਸੱਤਾ ਪੱਖ ਦੇ ਝੰਡਾਬਰਦਾਰ ਵਿਚਰਦੇ ਇੱਕ ਖਾਕੀ ਅਧਿਕਾਰੀ ਨੂੰ ਮਾਮਲੇ ਦੀ ਸੱਚਾਈ ਕੱਢ ਕੇ ਵਿਸਥਾਰਤ ਰਿਪੋਰਟ ਪੇਸ਼ ਕਰਨ ਦੇ ਨਿਰਦੇਸ਼ ਦਿੱਤੇ। 
        
         ਜਗਰੂਪ ਸਿੰਘ ਨੇ ਦੱਸਿਆ ਕਿ ਉਪ ਮੁੱਖ ਮੰਤਰੀ ਨੇ ਭਰੋਸਾ ਦਿਵਾਇਆ ਕਿ ਜੇਕਰ ਉਸ ਦੀ ਗੱਲ ਸੱਚਾਈ 'ਚ ਹੋਣ ਦੀ ਸੂਰਤ ਵਿਚ ਉਸਦੀ ਕਣਕ ਦਾ ਇੱਕ-ਇੱਕ ਦਾਣਾ ਦਿਵਾਉਣ ਦਾ ਭਰੋਸਾ ਦਿਵਾਇਆ। ਜਦੋਂ ਉਹ ਸ੍ਰੀ ਸੁਖਬੀਰ ਸਿੰਘ ਬਾਦਲ ਨੂੰ ਗੁਹਾਰ ਲਾਉਣ ਉਪਰੰਤ ਉਪ ਮੁੱਖ ਮੰਤਰੀ ਦੀ ਰਿਹਾਇਸ਼ ਦੀ ਕੰਟੀਨ ਵਿਚ ਕੱਪ ਵਿਚ ਚਾਹ ਪੀ ਰਿਹਾ ਸੀ ਤਾਂ ਅੰਦਰੋਂ ਅਕਾਲੀ ਆਗੂ ਆਪਣੇ ਸਮਰਥਕਾਂ ਨਾਲ ਉਥੇ ਆ ਗਿਆ ਅਤੇ ਉਸਦੇ ਨਾਲ ਖਹਿਬੜਣ ਲੱਗੇ। ਜਗਰੂਪ ਸਿੰਘ ਨੇ ਦੱਸਿਆ ਕਿ ਉਸੇ ਦੇ ਪਿੰਡ ਦੇ ਆਗੂ ਦੇ ਸਮਰਥਕਾਂ ਨੇ ਵੇਖਦੇ ਹੀ ਵੇਖਦੇ ਉਸਦੇ ਗਲਾਮੇ ਵਿਚ ਵਿੱਚ ਹੱਥ ਪਾ ਲਿਆ। ਜਿਸ 'ਤੇ ਉਸ ਦੇ ਹੱਥ 'ਚ ਫੜਿਆ ਗਰਮ-ਗਰਮ ਚਾਹ ਦਾ ਕੱਪ ਛਲਕ ਕੇ ਅਕਾਲੀ ਆਗੂ ਦੇ ਮੂੰਹ 'ਤੇ ਪੈ ਗਿਆ। ਜਗਰੂਪ ਸਿੰਘ ਨੇ ਆਖਿਆ ਕਿ ਉਥੇ ਮਾਹੌਲ ਵਿਗੜਦਾ ਵੇਖ ਉਹ ਉਥੋਂ ਆਪਣੇ ਪਿੰਡ ਮਿੱਡੂਖੇੜਾ ਨੂੰ ਵਾਪਸ ਦੌੜ ਆਇਆ।
        
        ਮਿੱਡੂਖੇੜਾ ਦੇ ਸਾਬਕਾ ਸਰਪੰਚ ਅਤੇ ਬਜ਼ੁਰਗ ਅਕਾਲੀ ਆਗੂ ਸ: ਗੁਰਦਿਆਲ ਸਿੰਘ ਕੁਲਾਰ ਦੀ ਹਾਜ਼ਰੀ ਵਿਚ ਜਗਰੂਪ ਸਿੰਘ ਨੇ ਦੋਸ਼ ਲਾਇਆ ਕਿ ਉਕਤ ਅਕਾਲੀ ਆਗੂ ਅਤੇ ਉਸਦੇ ਗੰਨਮੈਨਾਂ ਨੇ ਕਥਿਤ ਤੌਰ 'ਤੇ ਪਿੰਡ ਮਿੱਡੂਖੇੜਾ ਦੀ ਇੱਕ ਗਲੀ ਵਿਚ ਉਸਦੀ ਮਾਰੂਤੀ ਕਾਰ ਵਿਚ ਇਨੋਵਾ ਗੱਡੀ ਦੀ ਟੱਕਰ ਮਾਰ ਕੇ ਘੇਰ ਲਿਆ ਅਤੇ ਉਸਦੀ ਕਾਫ਼ੀ ਮਾਰ-ਕੁੱਟ ਕੀਤੀ ਅਤੇ ਉਸਦੀ ਕਾਰ ਦਾ ਸ਼ੀਸ਼ਾ ਭੰਨ ਦਿੱਤਾ। ਜਗਰੂਪ ਸਿੰਘ ਨੇ ਦੱਸਿਆ ਕਿ ਗਿਣਤੀ ਵਿਚ ਤਿੰਨ-ਚਾਰ ਗੰਨਮੈਨਾਂ ਨੇ ਉਸ 'ਤੇ ਅਸਾਲਟ ਤਾਣ ਲਈ ਅਤੇ ਉਸਨੂੰ ਮਾਰਨ ਦਾ ਰੌਹਬ ਵੀ ਵਿਖਾਇਆ। ਪਿੰਡ ਦੇ ਇੱਕ ਵਿਅਕਤੀ ਤੇਜਾ ਰਾਮ ਪੁੱਤਰ ਮੰਗਤ ਰਾਮ ਨੇ ਮੌਕੇ 'ਤੇ ਪਹੁੰਚ ਕੇ ਛੁੜਵਾਇਆ।
         ਜਗਰੂਪ ਸਿੰਘ ਨੇ ਉਕਤ ਵਿਵਾਦ ਬਾਰੇ ਦੱਸਦਿਆਂ ਕਿਹਾ ਕਿ ਉਹ ਪਿੰਡ ਮਹਿਣਾ ਵਿਖੇ ਸਥਿਤ ਜੱਦੀ ਜ਼ਮੀਨ ਵਿਚੋਂ ਉਸਨੂੰ ਏਕੜ ਹਿੱਸਾ ਮਿਲਿਆ ਹੋਇਆ ਹੈ ਤੇ ਸੰਨ 1996 ਵਿਚ ਵੰਡ ਤੋਂ ਬਾਅਦ ਲਗਾਤਾਰ ਕਾਸ਼ਤ ਕਰ ਰਿਹਾ ਹੈ ਤੇ ਗਿਰਦਾਵਰੀ ਦੀ ਉਸਦੇ ਨਾਂਅ ਹੈ ਤੇ ਉਸਨੇ ਉਕਤ ਜ਼ਮੀਨ 'ਤੇ ਤਿੰਨ ਲੋਨ ਵੀ ਲਏ ਹਨ। ਜਗਰੂਪ ਵਿਚ ਮੁਤਾਬਕ ਉਸ ਕੋਲ ਅਦਾਲਤੀ ਸਟੇਅ ਵੀ ਹੈ, ਪਰ ਹੁਣ ਉਕਤ ਜ਼ਮੀਨ 'ਤੇ ਉਸ ਵੱਲੋਂ ਬੀਜੀ ਕਣਕ ਨੂੰ ਧੱਕੇ ਨਾਲ ਜ਼ਬਰਦਸਤੀ ਪਿੰਡ ਦੇ ਇੱਕ ਕੌਮੀ ਪੱਧਰ ਦੇ ਅਕਾਲੀ ਆਗੂ ਨੇ ਕਥਿਤ ਤੌਰ 'ਤੇ ਕੰਬਾਇਨ ਅਤੇ ਆਪਣੇ ਗੰਨਮੈਨਾਂ ਉਸਦੇ ਸਰੀਕਾਂ ਨਾਲ ਭੇਜ ਕੇ ਕਣਕ ਕਟਵਾ ਲਈ। ਉਸਨੇ ਮੰਗ ਕੀਤੀ ਕਿ ਉਸਦੀ ਜ਼ਮੀਨ ਵਿਚੋਂ ਕਟਵਾਈ ਕਣਕ ਦੀ ਫਸਲ ਵਾਪਸ ਦਿਵਾਈ ਜਾਵੇ ਤੇ ਦੋਸ਼ੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ।
        ਇਸੇ ਦੌਰਾਨ ਪੱਖ ਜਾਨਣ ਲਈ ਸੰਪਰਕ ਕਰਨ 'ਤੇ ਸ਼੍ਰੋਮਣੀ ਅਕਾਲੀ ਦਲ (ਬ) ਦੇ ਕੌਮੀ ਮੀਤ ਪ੍ਰਧਾਨ ਤੇਜਿੰਦਰ ਸਿੰਘ ਮਿੱਡੂਖੇੜਾ ਨੇ ਉਕਤ ਵਿਅਕਤੀ ਦੇ ਸਮੁੱਚੇ ਦੋਸ਼ਾਂ ਨੂੰ ਬੇਬੁਨਿਆਦ ਕਰਾਰ ਦਿੰਦਿਆਂ ਕਿਹਾ ਕਿ ਜਗਰੂਪ ਸਿੰਘ ਦੇ ਭਰਾਵਾਂ ਦਾ ਘਰੇਲੂ ਵਿਵਾਦ ਹੈ। ਜਿਸ ਵਿਚ ਮੈਨੂੰ ਬੇਵਜ੍ਹਾ ਘਸੀਟਿਆ ਜਾ ਰਿਹਾ ਹੈ।
        ਸੂਬੇ ਦੀ ਹਾਕਮਾਂ ਦੀ ਰਿਹਾਇਸ਼ 'ਤੇ ਵਾਪਰੀ ਇਸ ਘਟਨਾ ਦੀ ਖੇਤਰ ਦੀਆਂ ਅਕਾਲੀ ਸਫ਼ਾ ਸਮੇਤ ਹਰ ਵਰਗ ਵਿਚ ਖੂਬ ਚਰਚਾ ਹੈ। ਉਥੇ ਅਕਾਲੀ ਦਲ ਦੇ ਇੱਕ ਵਿਸ਼ੇਸ਼ ਧੜੇ ਦੇ ਵਿਅਕਤੀਆਂ ਨੇ ਉਕਤ ਮਾਮਲੇ ਨੂੰ ਪੱਤਰਕਾਰਾਂ ਵਿਚ ਫੋਨ ਕਰ-ਕਰਕੇ ਖੂਬ ਪ੍ਰਚਾਰਤ ਕੀਤਾ। ਪਰ ਇਸ ਸਭ ਵਿੱਚ ਭੁੱਲ ਬੈਠੇ ਕਿ ਉਹ ਆਪਣੇ ਵਿਰੋਧੀ ਧੜੇ ਦੇ ਇੱਕ ਆਗੂ ਨਾਲ ਕਿੜ ਕੱਢਣ ਦੇ ਫਿਰਾਕ ਵਿਚ ਆਪਣੀ ਹਾਈਕਮਾਂਡ ਦੀ ਹੇਠੀ ਕਰਵਾ ਰਹੇ ਹਨ। ਜੋ ਕਿ ਪਹਿਲਾਂ ਹੀ ਆਪਣੇ ਸਰੀਕਾਂ ਦੇ ਦਿੱਤੇ ਤਾਜ਼ਾ ਜਖ਼ਮਾਂ 'ਤੇ ਮਲ੍ਹਮ ਲਾਉਂਦੇ ਫਿਰਦੇ ਹਨ।

ਸੇਲਵਰਾਹ 'ਚ ਪੁਲਿਸ ਨੇ ਅੱਤਵਾਦ ਸਮੇਂ ਦਾ ਵਕਤ ਯਾਦ ਕਰਾਇਆ

                                   ਗੁਰਦੁਆਰੇ ਤੋਂ ਕੀਤਾ ਵਾਅਦਾ ਤੋੜ ਕੇ ਘਰਾਂ ਦੇ ਸਮਾਨ ਦੀ ਭੰਨਤੋੜ ਕੀਤੀ
                                    'ਰਾਜ ਨਹੀਂ ਸੇਵਾ' ਕਰਨ ਵਾਲੀ ਬਾਦਲ ਸਰਕਾਰ ਨੂੰ ਚੁਫੇਰਿਉਂ ਫਿਟਕਾਰਾਂ
ਸੇਲਵਰਾਹ (ਬਠਿੰਡਾ) : ਮਨੁੱਖ ਤਾਂ ਕੀ ਇਸ ਪਿੰਡ ਦੇ ਬੇਜੁਬਾਨ ਡੰਗਰ ਤੇ ਨਿਰਜਿੰਦ ਕੰਧਾਂ ਵੀ ਬੁਰ•ੀ ਤਰਾਂ ਸਹਿਮੀਆਂ ਪਈਆਂ ਹਨ, ਕਿਉਂਕਿ ਠੇਕਾ ਖੋਹਲਣ ਦਾ ਵਿਰੋਧ ਕਰ ਰਹੇ ਆਮ ਲੋਕਾਂ ਨੂੰ ਪਸਤ ਹਿੰਮਤ ਕਰਨ ਦੇ ਯਤਨ ਵਜੋਂ ਅੱਤਵਾਦ ਦੇ ਦਿਨਾਂ ਦੀ ਸਰਕਾਰੀ ਦਹਿਸ਼ਤ ਨੂੰ ਦੁਹਰਾਉਦਿਆਂ ਪੁਲਿਸ ਨੇ ਬੱਚਿਆਂ ਤੇ ਔਰਤਾਂ ਸਮੇਤ 250 ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਹੀ ਨਹੀਂ ਲਿਆ, ਬਲਕਿ ਦਾਣਾ ਫੱਕਾ ਖਿਲਾਰਨ ਤੋਂ ਬਿਨ•ਾਂ ਹਰ ਵਸਤ ਨੂੰ ਬੇਰਹਿਮੀ ਨਾਲ ਇਸ ਕਦਰ ਭੰਨਤੋੜ ਦਿੱਤਾ, 'ਰਾਜ ਨਹੀਂ ਸੇਵਾ' ਕਰਨ ਵਾਲੀ ਬਾਦਲ ਸਰਕਾਰ ਨੂੰ ਚੁਫੇਰਿਉਂ ਫਿਟਕਾਰਾਂ ਪੈ ਰਹੀਆਂ ਹਨ।
          
          ਮਾਮਲਾ ਕੁਝ ਇਸ ਤਰ•ਾਂ ਹੈ ਕਿ ਦੋ ਮਹੀਨੇ ਤੋਂ ਵੀ ਵੱਧ ਸਮੇਂ ਤੋਂ ਇੱਥੋਂ ਦੇ ਲੋਕ ਪਿੰਡ ਦੀ ਅਬਾਦੀ ਵਿੱਚ ਸ਼ਰਾਬ ਦਾ ਠੇਕਾ ਖੋਹਲਣ ਦਾ ਵਿਰੋਧ ਕਰਦੇ ਆ ਰਹੇ ਹਨ, ਲੇਕਿਨ ਹਾਕਮ ਧਿਰ ਦੇ ਕੁਝ ਆਗੂਆਂ ਦੇ ਆਰਥਿਕ ਹਿਤਾਂ ਨੂੰ ਮੱਦੇਨਜਰ ਰਖਦਿਆਂ ਸਾਸਨ ਤੇ ਪ੍ਰਸਾਸਨ ਹਰ ਹੀਲੇ ਦਾਰੂ ਦੀਆਂ ਛਬੀਲਾਂ ਲਵਾਉਣ ਲਈ ਪੱਬਾਂ ਭਾਰ ਹੋਇਆ ਫਿਰਦੈ।  30 ਅਪਰੈਲ ਤੇ ਇੱਕ ਮਈ ਦੀ ਦਰਮਿਆਨੀ ਰਾਤ ਨੂੰ ਸਮੁੱਚੇ ਪਿੰਡ ਤੋਂ ਆਕੀ ਹੋਏ ਇੱਕ ਅਣਅਧਿਕਾਰਤ ਸਖ਼ਸ ਨੇ ਜਦ ਗੈਰਕਾਨੂੰਨੀ ਢੰਗ ਤਰੀਕਿਆਂ ਨਾਲ ਦਾਰੂ ਵੇਚਣ ਦਾ ਯਤਨ ਕੀਤਾ ਤਾਂ ਔਰਤਾਂ ਸਮੇਤ ਪਿੰਡ ਦੀ ਬਹੁਗਿਣਤੀ ਨੇ ਉਸਦਾ ਵਿਰੋਧ ਕਰਨਾ ਸੁਰੂ ਕਰ ਦਿੱਤਾ। ਉਸ ਵੱਲੋਂ ਬੁਲਾਈ ਪੁਲਿਸ ਤੇ ਆਮ ਲੋਕਾਂ ਦਰਮਿਆਨ ਟਕਰਾਅ ਹੋ ਗਿਆ, ਜਿਸਦੇ ਚਲਦਿਆਂ ਦੋਵਾਂ ਧਿਰਾਂ ਦੇ ਕੁਝ ਲੋਕ ਜਖਮੀ ਹੋ ਗਏ ਤੇ ਕਿਸੇ ਸਰਾਰਤੀ ਵੱਲੋਂ ਲਾਈ ਅੱਗ ਕਾਰਨ ਪੁਲਿਸ ਦੀ ਗੱਡੀ ਸੜ ਕੇ ਸੁਆਹ ਹੋ ਗਈ।
          ਇੱਕ ਮਈ ਦਾ ਦਿਨ ਤਾਂ ਭਾਵੇਂ ਸਾਂਤੀ ਨਾਲ ਬੀਤ ਗਿਆ, ਲੇਕਿਨ ਹਨੇਰਾ ਹੁੰਦਿਆਂ ਹੀ ਪੁਲਿਸ ਦੀਆਂ ਭਾਰੀ ਭਰਕਮ ਧਾੜਾਂ ਨੇ ਪਿੰਡ ਦੇ ਸਕੂਲ ਨੂੰ ਆਪਣੀ ਛਾਉਣੀ ਵਿੱਚ ਤਬਦੀਲ ਕਰ ਦਿੱਤਾ। ਗੁਰਦੁਆਰਾ ਸਾਹਿਬ ਦੇ ਸਪੀਕਰ ਤੋਂ ਕੀਤੀ ਅਨਾਊਂਸਮੈਂਟ ਰਾਹੀਂ ਪੁਲਿਸ ਨੇ ਇਸ ਵਾਅਦੇ ਨਾਲ ਲੋਕਾਂ ਨੂੰ ਆਪੋ ਆਪਣੇ ਘਰਾਂ ਵਿੱਚ ਰਹਿਣ ਦੀ ਤਾਕੀਦ ਕਰ ਦਿੱਤੀ ਕਿ ਉਹਨਾਂ ਨਾਲ ਕਿਸੇ ਕਿਸਮ ਦੀ ਧੱਕੇਸ਼ਾਹੀ ਜਾਂ ਬੇਇਨਸਾਫੀ ਨਹੀਂ ਹੋਵੇਗੀ। ਠੇਕਾ ਵਿਰੋਧੀ ਅੰਦੋਲਨ ਦੇ ਅਹਿਮ ਸੰਚਾਲਕ ਤਾਂ ਭਾਵੇਂ ਪਹਿਲਾਂ ਹੀ ਰੂਪੋਸ ਹੋ ਚੁੱਕੇ ਸਨ, ਲੇਕਿਨ ਗੁਰੂ ਘਰ ਚੋਂ ਹੋਈ ਮੁਨਾਦੀ ਨੂੰ ਇਲਾਹੀ ਹੁਕਮ ਪ੍ਰਵਾਨ ਕਰਦਿਆਂ ਆਮ ਲੋਕ ਆਪੋ ਆਪਣੇ ਘਰਾਂ ਵਿੱਚ ਹੀ ਰਹੇ।
          
        ਪਿੰਡ ਦੀ ਮੁਕੰਮਲ ਘੇਰਾਬੰਦੀ ਕਰਦਿਆਂ ਮੂੰਹ ਹਨੇਰੇ ਹੀ ਪੁਲਿਸ ਨੇ ਹਰ ਘਰ ਵਿੱਚ ਛਾਪੇ ਮਾਰਨ ਦੀ ਕਾਰਵਾਈ ਸੁਰੂ ਕਰ ਦਿੱਤੀ। ਟੈਲੀਵੀਜਨ ਫਰਿੱਜ ਬਿਜਲੀ ਦੇ ਮੀਟਰ ਇੱਥੋਂ ਤੱਕ ਕਿ ਟੁੱਟਣ ਵਾਲੀ ਜੋ ਵੀ ਵਸਤ ਨਜਰ ਪਈ, ਉਸਨੂੰ ਬੁਰ•ੀ ਤਰਾਂ ਤੋੜਿਆ ਭੰਨਿਆਂ ਹੀ ਨਹੀਂ ਬਲਕਿ ਪੁਲਿਸ ਵਾਲਿਆਂ ਨੇ ਘਰਾਂ ਵਿੱਚ ਪਏ ਦਾਣੇ ਫੱਕੇ ਨੂੰ ਵੀ ਖਿਲਾਰ ਦਿੱਤਾ। ਰੱਸੇ ਸੰਗਲ ਖੋਹਲਦਿਆਂ ਡੰਗਰਾਂ ਨੂੰ ਘਰਾਂ ਚੋਂ ਭਜਾ ਦਿੱਤਾ, ਬਾਬੇਕਿਆਂ ਤੇ ਬਾਬਰ ਕੇ ਬਣ ਕੇ ਚੜ•ਣ ਵਾਲਿਆਂ ਨੇ ਬੱਚਿਆਂ ਤੇ ਔਰਤਾਂ ਸਮੇਤ ਢਾਈ ਸੌ ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਲੈ ਕੇ ਫੂਲ ਭਗਤਾ ਦਿਆਲਪੁਰਾ ਆਦਿ ਥਾਨਿਆਂ ਵਿੱਚ ਡੱਕ ਦਿੱਤਾ। ਸਿਤਮ ਜਰੀਫੀ ਇਹ ਕਿ ਜਦ ਪਿੰਡ ਦੇ ਲੋਕ ਆਪਣੇ ਹਮਵਤਨਾਂ ਲਈ ਲੰਗਰ ਲੈ ਕੇ ਆਏ ਤਾਂ ਥਾਨਾ ਫੂਲ ਦੀ ਪੁਲਿਸ ਨੇ ਪਹਿਲਾਂ ਤਾਂ ਵਰਤਾਉਣ ਤੋਂ ਰੋਕ ਦਿੱਤਾ, ਲੇਕਿਨ ਵਾਰ ਵਾਰ ਕੀਤੇ ਤਰਲਿਆਂ ਤੋਂ ਬਾਅਦ ਹੀ ਇਜਾਜਤ ਦਿੱਤੀ।
        
        ਪਿੰਡ ਦਾ ਮਹੌਲ ਇਸ ਕਦਰ ਗਮਗੀਨ ਤੇ ਦਹਿਸ਼ਤਜਦਾ ਹੋ ਗਿਆ, ਕਿ ਅਖ਼ਬਾਰ ਜਾਂ ਟੀ ਵੀ ਚੈਨਲ ਵਿੱਚ ਨਾ ਆਉਣ ਦੀ ਵਜ•ਾ ਕਾਰਨ ਸੰਗੀਨ ਧਰਾਵਾਂ ਥੱਲੇ ਗਿਰਫਤਾਰੀ ਤੋਂ ਡਰਦਿਆਂ ਮੌਕੇ ਤੇ ਪੁੱਜੀ ਮੀਡੀਆ ਪ੍ਰਤੀਨਿਧਾਂ ਦੀ ਟੀਮ ਸਾਹਮਣੇ ਕਿਸੇ ਨੇ ਜੁਬਾਨ ਖੋਹਲਣੀ ਵੀ ਮੁਨਾਸਿਬ ਨਾ ਸਮਝੀ। ਅਫਸੋਸਨਾਕ ਪਹਿਲੂ ਇਹ ਹੈ ਕਿ ਜਦ ਇੱਕ ਪਿੰਡ ਵਿੱਚ ਅਜਿਹਾ ਤਾਂਡਵ ਨਾਚ ਨੱਚਿਆ ਜਾ ਰਿਹਾ ਸੀ ਤਾਂ ਸੱਭਿਆਚਾਰਕ ਸਰਗਰਮੀਆਂ ਦੇ ਮੋਹਰੀ ਜਸਦੇਵ ਸਿੰਘ ਜੱਸੋਵਾਲ ਜੋ ਸਾਬਕਾ ਵਿਧਾਇਕ ਵੀ ਹਨ ਤੇ ਡੀ ਆਈ ਜੀ ਦੇ ਅਹੁਦੇ ਤੋਂ ਸੇਵਾਮੁਕਤ ਹੋ ਕੇ ਬਣੇ ਸਮਾਜ ਸੁਧਾਰਕ ਸ੍ਰੀ ਹਰਿੰਦਰ ਸਿੰਘ ਚਾਹਲ ਤੋਂ ਇਲਾਵਾ ਕਿਸੇ ਵੀ ਸਿਆਸੀ ਜਾਂ ਜਨਤਕ ਆਗੂ ਨੇ ਲੋਕਾਂ ਦੀ ਸਾਰ ਲੈਣੀ ਮੁਨਾਸਿਬ ਨਾ ਸਮਝੀ।
       
         ਜੱਸੋਵਾਲ ਚਾਹਲ ਜੋੜੀ ਦੀ ਆਮਦ ਤੋਂ ਬਾਅਦ ਨਾਂ ਗੁਪਤ ਰੱਖਣ ਦੀ ਸਰਤ ਤੇ ਬਜੁਰਗ ਅਵਸਥਾ ਵਿੱਚ ਪੁੱਜ ਚੁੱਕੇ ਕੁਝ ਮਰਦਾਂ ਤੇ ਔਰਤਾਂ ਨੇ ਮੂੰਹ ਖੋਹਲਣ ਦੀ ਹਿੰਮਤ ਦਿਖਾਈ।  80ਵਿਆਂ ਨੂੰ ਢੁੱਕ ਚੁੱਕੇ ਇੱਕ ਬਾਬੇ ਬੋਲਣ ਸਮੇਂ ਹੰਝੂਆਂ ਨਾਲ ਜਿਸ ਦੀ ਸਫੈਦ ਦਾਹੜੀ ਭਿੱਜ ਚੁੱਕੀ ਸੀ, ਨੇ ਅੱਤਵਾਦ ਦੇ ਦਿਨਾਂ ਨੂੰ ਯਾਦ ਕਰਦਿਆਂ ਕਿਹਾ ਕਿ ਜਿਵੇਂ ਉਦੋਂ ਕਿਸੇ ਇੱਕ ਅੱਧ ਮੁੰੰਡੇ ਨੂੰ ਫੜਣ ਵਾਸਤੇ ਪੁਲਿਸ ਤੇ ਫੌਜਾਂ ਪਿੰਡਾਂ ਨੂੰ ਘੇਰਿਆ ਕਰਦੀਆਂ ਸਨ, ਉਹਨਾਂ ਨਾਲ ਵੀ ਅੱਜ ਉਸਤੋਂ ਕਿਤੇ ਵੱਧ ਧੱਕੇਸ਼ਾਹੀ ਹੋਈ ਹੈ। ਸਰਕਾਰਾਂ ਵੱਲੋਂ ਨਸ਼ਾ ਬੰਦੀ ਲਈ ਕੀਤੇ ਜਾ ਰਹੇ ਦਾਅਵਿਆਂ ਵੱਲ ਜਦ ਬਾਬੇ ਦਾ ਧਿਆਨ ਦਿਵਾਇਆ ਤਾਂ ਉਸਦਾ ਉੱਤਰ ਸੀ, ਇੱਥੇ ਤਾਂ ਰਾਜ ਭਾਗ ਦੇ ਮਾਲਕ ਹੀ ਡੰਡੇ ਦੇ ਜੋਰ ਨਾਲ ਜਹਿਰੀਲੀ ਦਾਰੂ ਵਿਕਵਾ ਰਹੇ ਹਨ, ਜੋ ਹੁਣ ਤੱਕ ਕਈਆਂ ਦੀ ਜਾਨ ਲੈ ਚੁੱਕੀ ਹੈ।
ਅਮ੍ਰਿਤਧਾਰੀ ਇੱਕ ਬੇਬੇ ਨੇ ਆਪਣੀਆਂ ਜਖ਼ਮੀ ਭਾਵਨਾਵਾਂ ਦਾ ਇਜ਼ਹਾਰ ਕਰਦਿਆਂ ਸੁਆਲ ਕੀਤਾ ਕਿ ਆਪਣੇ ਇਲਾਕੇ ਤੋਂ ਲੈ ਕੇ ਬਾਹਰਲੇ ਸ਼ਹਿਰਾਂ ਤੱਕ ਜਮੀਨਾਂ ਤੇ ਕਬਜੇ ਕਰਕੇ ਵੀ ਜੇ ਸਥਾਨਕ ਆਗੂਆਂ ਦੀ ਤਮਾਂ ਨਹੀਂ ਭਰੀ ਤਾਂ ਉਹ ਜਹਿਰੀਲੀ ਦਾਰੂ ਰਾਹੀਂ ਸਾਡੇ ਬੱਚਿਆਂ ਦੇ ਸਿਵੇ ਜਲਾ ਕੇ ਕਿਲ•ੇ ਨਹੀਂ ਉਸਾਰਨ ਲੱਗੇ। ਕ੍ਰਿਪਾਨ ਵਾਲੇ ਗਾਤਰੇ ਨੂੰ ਹੱਥ ਵਿੱਚ ਲੈਂਦਿਆਂ ਬੇਬੇ ਨੇ ਆਪਣੇ ਵਾਹਿਗੁਰੂ ਨੂੰ ਅਰਜੋਈ ਕੀਤੀ ਕਿ ਜਿਸ ਸਰਕਾਰ ਦੀ ਪੁਲਿਸ ਨੇ ਗੁਰੂ ਘਰ ਦੇ ਸਪੀਕਰ ਰਾਹੀਂ ਕੀਤਾ ਵਾਅਦਾ ਵੀ ਨਹੀਂ ਨਿਭਾਇਆ ਜੇ ਉਸ ਵਿੱਚ ਕੋਈ ਸਕਤੀ ਹੈ ਤਾਂ ਉਸਦਾ ਬੇੜਾ ਜਰੂਰ ਗਰਕ ਕਰ ਦੇਵੇ।
          
          ਪੱਤਰਕਾਰਾਂ ਦੀ ਟੀਮ ਜਦ ਥਾਨਾ ਫੂਲ ਪੁੱਜੀ ਤਾਂ ਉਹਨਾਂ ਦੀ ਸਨਾਖਤ ਤੋਂ ਅਣਜਾਣ ਤਾਕਤ ਦੇ ਨਸ਼ੇ ਵਿੱਚ ਭੂਤਰਿਆ ਇੱਕ ਥਾਨੇਦਾਰ ਆਪਣੇ ਸਾਥੀ ਨੂੰ ਬੜੇ ਫ਼ਖਰ ਨਾਲ ਇਹ ਦੱਸ ਰਿਹਾ ਸੀ, ਕਿ ਪੁਲਿਸ ਦੀ ਹੋਈ ਬੇਇਜਤੀ ਦਾ ਪਿੰਡ ਵਾਸੀਆਂ ਤੋਂ ਬਦਲਾ ਲੈਣ ਲਈ ਉਸਨੇ ਕੋਈ ਕਸਰ ਬਾਕੀ ਨਹੀਂ ਰਹਿਣ ਦਿੱਤੀ। ਅਜਿਹੇ ਵਰਤਾਰੇ ਤੋਂ ਪੋਟਾ ਪੋਟਾ ਦੁਖੀ ਇੱਕ ਸਾਊ ਪੁਲਿਸ ਵਾਲਾ ਇਹ ਕਹਿੰਦਾ ਵੀ ਸੁਣਿਆ ਗਿਆ ਕਿ ਆਪਣੇ ਲੋਕਾਂ ਨਾਲ ਕੀਤੀਆਂ ਜਾਣ ਵਾਲੀਆਂ ਜਿਆਦਤੀਆਂ ਤੋਂ ਬਚਣ ਦਾ ਹੁਣ ਇੱਕੋ ਇੱਕ ਰਾਹ ਰਹਿ ਗਿਆ ਹੈ ਸਵੈਇਛੁਕ ਸੇਵਾ ਮੁਕਤੀ।

        
          ਇੱਕੀਵੀਂ ਸਦੀ ਅਤੇ ਸੂਚਨਾ ਤਕਨੀਕ ਦੇ ਇਸ ਯੁੱਗ ਵਿੱਚ ਹੋ ਰਹੀ ਅਜਿਹੀ ਹਨੇਰਗਰਦੀ ਦਾ ਗੰਭੀਰ ਨੋਟਿਸ ਲੈਂਦਿਆਂ ਪੰਜਾਬ ਮਨੁੱਖੀ ਅਧਿਕਾਰ ਕਮੇਟੀ ਦੇ ਜਨਰਲ ਸਕੱਤਰ ਸ੍ਰੀ ਵੇਦ ਪ੍ਰਕਾਸ ਗੁਪਤਾ ਨੇ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਚੀਫ਼ ਜਸਟਿਸ ਨੂੰ ਅਪੀਲ ਕੀਤੀ ਕਿ ਉਹ ਰਾਮਪੁਰਾ ਫੂਲ ਇਲਾਕੇ ਵਿੱਚ ਹੋ ਰਹੀ ਸਰਕਾਰੀ ਦਹਿਸਤਗਰਦੀ ਦੀ ਆਪਣੇ ਤੌਰ ਤੇ ਪੜਤਾਲ ਕਰਵਾ ਕੇ ਲੋੜੀਂਦੀ ਕਾਰਵਾਈ ਕਰਨ। ਸੀ ਪੀ ਆਈ ਦੇ ਜਿਲ•ਾ ਸਕੱਤਰ ਕਾ: ਜਗਜੀਤ ਜੋਗਾ ਨੇ ਆਮ ਲੋਕਾਂ ਨਾਲ ਹੋਈ ਧੱਕੇਸ਼ਾਹੀ ਦੀ ਸਖਤ ਨਿਖੇਧੀ ਕਰਦਿਆਂ ਦੱਸਿਆ ਕਿ ਹਮਖਿਆਲ ਪਾਰਟੀਆਂ ਨਾਲ ਸਲਾਹ ਮਸਵਰਾ ਕਰਕੇ ਉਹ ਬਣਦੀ ਕਾਰਵਾਈ ਕਰਨਗੇ। ਦਿਹਾਤੀ ਮਜਦੂਰ ਸਭਾ ਦੇ ਪ੍ਰਮੁੱਖ ਆਗੂ ਕਾ: ਮਹੀਂਪਾਲ ਨੇ ਵੀ ਆਮ ਲੋਕਾਂ ਤੇ ਹੋਈ ਧੱਕੇਸ਼ਾਹੀ ਦੀ ਡਾਢੀ ਨਿੰਦਾ ਕੀਤੀ। 
-ਬੀ ਐਸ ਭੁੱਲਰ

ਕਾਂਗਰਸ ਦੀ ਵਿਸਾਖੀ ਕਾਨਫਰੰਸ ਨੇ ਹਾਕਮ ਧਿਰ ਨੂੰ ਚਿੰਤਾ 'ਚ ਡੋਬਿਆ

                     ਰਾਜ ਦੀ ਖੁਫ਼ੀਆ ਏਜੰਸੀ ਨੇ ਮੇਲੇ ਬਾਅਦ ਕੀਤੀ ਜਗਾਹ ਦੇ ਪੈਮਾਇਸ
           ਸੁਖਬੀਰ ਬਾਦਲ ਨੇ ਪਾਰਟੀ ਦੇ ਸੀਨੀਅਰ ਆਗੂਆਂ ਦੀ ਝਾੜ ਝੰਭ ਕੀਤੀ

    ਵਿਸਾਖੀ ਦੇ ਮੇਲੇ ਤੇ ਤਲਵੰਡੀ ਸਾਬੋ ਵਿਖੇ ਹੋਈ ਕਾਂਗਰਸ ਪਾਰਟੀ ਦੀ ਸਿਆਸੀ ਕਾਨਫਰੰਸ ਨੂੰ ਮਿਲੇ ਉਤਸ਼ਾਹਜਨਕ ਹੁੰਗਾਰੇ ਨੇ ਹਾਕਮ ਧਿਰ ਨੂੰ ਇਸ ਕਦਰ ਚਿੰਤਾ ਵਿੱਚ ਡੋਬ ਦਿੱਤਾ ਹੈ, ਕਿ ਅਸਲੀਅਤ ਦਾ ਵਿਸਲੇਸਣ ਕਰਵਾਉਣ ਲਈ ਰਾਜ ਦੀ ਖੁਫ਼ੀਆ ਏਜੰਸੀ ਤੋਂ ਵਿਰੋਧੀ ਧਿਰ ਦੇ ਸਮਾਗਮ ਵਾਲੀ ਥਾਂ ਦੀ ਪੈਮਾਇਸ਼ ਕਰਵਾਉਣ ਤੋਂ ਇਲਾਵਾ ਅਕਾਲੀ ਕਾਨਫਰੰਸ ਨੂੰ ਮਿਲੇ ਮੱਠੇ ਹੁੰਗਾਰੇ ਦੀ ਵਜ•ਾ ਕਾਰਨ ਮਾਲਵੇ ਨਾਲ ਸਬੰਧਤ ਆਪਣੇ ਆਗੂਆਂ ਦੀ ਦਲ ਦੇ ਪ੍ਰਧਾਨ ਸੁਖਬੀਰ ਬਾਦਲ ਵੱਲੋਂ ਕਾਫ਼ੀ ਝਾੜ ਝੰਭ ਕਰਨ ਦੀ ਵੀ ਇਤਲਾਹ ਮਿਲੀ ਹੈ।

ਇਹ ਯਕੀਨੀ ਬਣਾਉਣ ਲਈ ਕਿ ਦਲ ਤੋਂ ਵੱਖ ਹੋਏ ਸਾਬਕਾ ਵਿੱਤ ਮੰਤਰੀ ਮਨਪ੍ਰੀਤ ਬਾਦਲ ਦੀ 27 ਮਾਰਚ ਨੂੰ ਖਟਕੜ ਕਲਾਂ ਵਿਖੇ ਹੋਈ ਵਿਸ਼ਾਲ ਰੈਲੀ ਤੋਂ ਵੀ ਵੱਡਾ ਇਕੱਠ ਜੋੜ ਕੇ ਵਰਕਰਾਂ ਵਿੱਚ ਆਈ ਨਿਰਾਸਤਾ ਨੂੰ ਦੂਰ ਕਰਨ ਤੋਂ ਇਲਾਵਾ ਕਾਂਗਰਸ ਦੀ ਹਾਲਤ ਵੀ ਪਾਣੀ ਤੋਂ ਪਤਲੀ ਹੋ ਜਾਵੇ, ਸ੍ਰੋਮਣੀ ਅਕਾਲੀ ਦਲ ਨੇ ਆਪਣੀ ਹੋਂਦ ਤੋਂ ਲੈ ਕੇ ਹੁਣ ਤੱਕ ਪਹਿਲੀ ਵਾਰ ਭਾਈ ਡੱਲ ਸਿੰਘ ਦੀਵਾਨ ਹਾਲ ਦੀ ਬਜਾਏ ਆਪਣੀ ਕਾਨਫਰੰਸ ਮੇਲੇ ਤੋਂ ਬਾਹਰ ਤਲਵੰਡੀ ਸਾਬੋ ਦੀ ਦਾਣਾ ਮੰਡੀ ਵਿਖੇ ਆਯੋਜਤ ਕਰਨ ਦਾ ਫੈਸਲਾ ਲਿਆ ਸੀ। ਇੱਥੇ ਹੀ ਬੱਸ ਨਹੀਂ ਬਲਕਿ ਆਪਣੇ ਅਸਰ ਰਸੂਖ ਰਾਹੀਂ ਇਹ ਵੀ ਪੁਖਤਾ ਪ੍ਰਬੰਧ ਕਰ ਲਏ ਸਨ, ਕਿ ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਕਿਸੇ ਵੀ ਪਾਰਟੀ ਨੂੰ ਰਾਜਸੀ ਕਾਨਫਰੰਸ ਲਈ ਜਗਾਹ ਅਲਾਟ ਨਾ ਕਰੇ।

ਹਾਕਮ ਧਿਰ ਦੀ ਇਸ ਸਤਰੰਜੀ ਚਾਲ ਨੂੰ ਇੱਕ ਚਣੌਤੀ ਵਜੋਂ ਲੈਂਦਿਆਂ ਕਾਂਗਰਸ ਪਾਰਟੀ ਨੇ ਜਿੱਥੇ ਖੜੀ ਕਣਕ ਵਾਲੀ ਦਸ ਏਕੜ ਜਮੀਨ ਠੇਕੇ ਤੇ ਲੈ ਲਈ, ਉੱਥੇ ਆਪਣੀ ਕਾਨਫਰੰਸ ਦੀ ਸਫ਼ਲਤਾ ਯਕੀਨੀ ਬਣਾਉਣ ਵਾਸਤੇ ਪ੍ਰਦੇਸ ਕਾਂਗਰਸ ਦੇ ਜਨਰਲ ਸਕੱਤਰ ਸ੍ਰੀ ਰਣਇੰਦਰ ਸਿੰਘ ਅਤੇ ਤਲਵੰਡੀ ਸਾਬੋ ਦੇ ਵਿਧਾਇਕ ਸ੍ਰੀ ਜੀਤਮੁਹਿੰਦਰ ਸਿੰਘ ਸਿੱਧੂ ਨੇ ਦਿਨ ਰਾਤ ਇੱਕ ਕਰ ਦਿੱਤਾ। ਹਾਲਾਂਕਿ ਕਾਂਗਰਸ ਦੀ ਰੈਲੀ ਨੂੰ ਅਸਫ਼ਲ ਬਣਾਉਣ ਦੀ ਮਨਸਾ ਨਾਲ ਪੁਲਿਸ ਨੇ ਉੱਥੇ ਜਾਣ ਵਾਲੀਆਂ ਬੱਸਾਂ ਕਾਰਾਂ ਆਦਿ ਦਾ ਨਿਰਧਾਰਤ ਰੂਟ ਤਬਦੀਲ ਕਰਕੇ ਹੋਰ ਦਿਸਾਵਾਂ ਵੱਲ ਮੋੜਣ ਦੀ ਕੋਈ ਕਸਰ ਬਾਕੀ ਨਹੀਂ ਸੀ ਛੱਡੀ, ਬਾਵਜੂਦ ਇਸਦੇ ਭੀੜ ਏਨੀ ਜਿਆਦਾ ਜੁੜ ਗਈ ਕਿ ਉਸਨੇ ਨਾ ਸਿਰਫ ਅਕਾਲੀ ਦਲ ਦੇ ਇਕੱਠ ਤੋਂ ਵੱਡਾ ਰੂਪ ਧਾਰਨ ਕਰ ਲਿਆ, ਬਲਕਿ ਆਪਣਿਆਂ ਤੇ ਵਿਰੋਧੀਆਂ ਨੂੰ ਵੀ ਦੰਗ ਕਰਕੇ ਰੱਖ ਦਿੱਤਾ। ਜਿਸਦਾ ਸਭ ਤੋਂ ਵੱਡਾ ਸਬੂਤ ਇਹ ਹੈ ਕਿ ਬੀਬੀ ਰਜਿੰਦਰ ਕੌਰ ਭੱਠਲ ਤੋਂ ਲੈ ਕੇ ਜਗਮੀਤ ਬਰਾੜ ਤੱਕ ਦੇ ਸੀਨੀਅਰ ਆਗੂਆਂ ਨੇ ਰਣਇੰਦਰ ਤੇ ਜੀਤ ਮੁਹਿੰਦਰ ਜੋੜੀ ਦੀ ਜਥੇਬੰਦਕ ਕੁਸਲਤਾ ਦੀ ਰੱਜ ਕੇ ਤਾਰੀਫ਼ ਕੀਤੀ। ਇੱਥੇ ਇਹ ਜਿਕਰ ਕਰਨਾ ਵੀ ਕੁਥਾਂ ਨਹੀਂ ਹੋਵੇਗਾ ਕਿ ਕਾਂਗਰਸ ਪਾਰਟੀ ਦਾ ਇਕੱਠ ਲੋਕ ਸਭਾ ਹਲਕਾ ਬਠਿੰਡਾ ਤੱਕ ਹੀ ਸੀਮਤ ਸੀ।
ਜਿੱਥੋਂ ਤੱਕ ਹਾਕਮ ਅਕਾਲੀ ਦਲ ਦਾ ਸੁਆਲ ਹੈ ਇਸਦੀ ਕਾਨਫਰੰਸ ਦੀ ਸਫ਼ਲਤਾ ਲਈ ਮੁੱਖ ਜੁਮੇਵਾਰੀ ਦਲ ਦੇ ਪ੍ਰਧਾਨ ਸ੍ਰੀ ਸੁਖਬੀਰ ਸਿੰਘ ਬਾਦਲ ਨੇ ਆਪਣੇ ਹੱਥ ਲੈ ਰੱਖੀ ਸੀ। ਵਿਸਾਖੀ ਤੋਂ ਪਹਿਲਾਂ ਮਾਲਵਾ ਖਿੱਤੇ ਦੇ ਫੇਰੇ ਲਾਉਣ ਤੋਂ ਇਲਾਵਾ ਉਹਨਾਂ ਗੱਡੀਆਂ ਆਦਿ ਦੇ ਵੀ ਪੁਖਤਾ ਪ੍ਰਬੰਧ ਕਰ ਦਿੱਤੇ ਸਨ। ਦਲ ਦੇ ਅੰਦਰਲੇ ਸੂਤਰਾਂ ਅਨੁਸਾਰ ਵੱਧ ਤੋਂ ਵੱਧ ਭੀੜ ਇਕੱਠੀ ਕਰਨ ਲਈ ਮਾਲਵੇ ਤੋਂ ਇਲਾਵਾ ਦੂਜੇ ਖਿੱਤਿਆਂ ਦੇ ਆਗੂਆਂ ਦੀਆਂ ਵੀ ਸੇਵਾਵਾਂ ਲਈਆਂ ਗਈਆਂ ਸਨ। ਹਾਲਾਂਕਿ ਦਲ ਦਾ ਟੀਚਾ ਇੱਕ ਲੱਖ ਦੀ ਰੈਲੀ ਕਰਨ ਦਾ ਸੀ, ਲੇਕਿਨ ਉਤਸ਼ਾਹ ਇਸ ਕਦਰ ਮੱਠਾ ਰਿਹਾ ਕਿ ਕਾਂਗਰਸ ਦੀ ਰੈਲੀ ਦੇ ਮੁਕਾਬਲੇ ਅਕਾਲੀ ਦਲ ਦੀ ਕਾਨਫਰੰਸ ਕਾਫ਼ੀ ਬੌਣੀ ਜਾਪਦੀ ਸੀ। ਇੱਥੇ ਹੀ ਬੱਸ ਨਹੀਂ ਬਲਕਿ ਜਦ ਦਲ ਦੇ ਸ੍ਰਪਰਸਤ ਤੇ ਮੁੱਖ ਮੰਤਰੀ ਸ੍ਰ: ਬਾਦਲ ਸੰਬੋਧਨ ਕਰਨ ਲਈ ਉੱਠੇ ਤਾਂ ਉਹਨਾਂ ਦੇ ਪੰਡਾਲ ਵਿੱਚ ਗਿਣਤੀ ਅੱਧ ਤੱਕ ਹੀ ਰਹਿ ਗਈ ਸੀ।
ਭਾਵੇਂ ਪ੍ਰਦੇਸ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਅਤੇ ਅਕਾਲੀ ਦਲ ਅਮ੍ਰਿਤਸਰ ਦੇ ਪ੍ਰਧਾਨ ਸ੍ਰ: ਸਿਮਰਨਜੀਤ ਸਿੰਘ ਮਾਨ ਦੇ ਸਿਆਸੀ ਵਿਚਾਰਾਂ ਵਿੱਚ ਕਾਫ਼ੀ ਫਰਕ ਹੈ, ਲੇਕਿਨ ਇੱਕ ਗੱਲ ਪੂਰੀ ਤਰ•ਾਂ ਸਪਸ਼ਟ ਹੋ ਗਈ ਕਿ ਇਸ ਵਾਰ ਵਿਸਾਖੀ ਦਾ ਮੇਲਾ ਦੋਵੇਂ ਸਾਢੂ ਲੁੱਟ ਕੇ ਲੈ ਗਏ, ਕਿਉਂਕਿ ਜਿੱਥੇ ਕੈਪਟਨ ਸਭ ਤੋਂ ਵੱਡੀ ਕਾਂਨਫਰੰਸ ਦੇ ਪ੍ਰਮੁੱਖ ਬੁਲਾਰੇ ਸਨ ਉਥੇ ਸ੍ਰ: ਮਾਨ ਆਪਣੇ ਅਹਿਦ ਅਨੁਸਾਰ ਸ੍ਰੀ ਅਕਾਲ ਤਖ਼ਤ ਸਾਹਿਬ ਦੇ ਚਬੂਤਰੇ ਤੇ ਵਿਸਾਖੀ ਦਾ ਸੰਦੇਸ ਦੇ ਕੇ ਸਿੱਖ ਭਾਈਚਾਰੇ ਗਰਮ ਸੁਭਾ ਵਾਲੇ  ਹਿੱਸੇ ਦੀ ਵਾਹ ਵਾਹ ਖੱਟਣ ਵਿੱਚ ਸਫ਼ਲ ਹੋ ਗਏ।

ਦੋਵਾਂ ਪਾਸਿਆਂ ਤੋਂ ਪਈ ਇਸ ਮਾਰ ਨੇ ਅਕਾਲੀ ਦਲ ਬਾਦਲ ਨੂੰ ਡਾਢੀ ਚਿੰਤਾ ਤੇ ਨਿਰਾਸਤਾ ਵਿੱਚ ਡੋਬ ਕੇ ਰੱਖ ਦਿੱਤੈ, ਵੋਟ ਰਾਜਨੀਤੀ ਦੇ ਲਿਹਾਜ ਨਾਲ ਮਾਨ ਦਲ ਦੇ ਮੁਕਾਬਲੇ ਕਿਉਂਕਿ ਕਾਂਗਰਸ ਪਾਰਟੀ ਨੂੰ ਮਿਲਿਆ ਉਤਸ਼ਾਹ ਜਨਕ ਹੁੰਗਾਰਾ ਕਿਤੇ ਵੱਧ ਮਹੱਤਵ ਰਖਦਾ ਹੈ, ਇਸ ਲਈ ਅਸਲੀਅਤ ਕੀ ਹੈ ਇਹ ਜਾਣਨ ਲਈ ਸਰਕਾਰ ਨੇ ਤੱਥਾਂ ਸਮੇਤ ਆਪਣੇ ਖੁਫ਼ੀਆ ਤੰਤਰ ਤੋਂ ਵਿਸਥਾਰ ਪੂਰਵਕ ਰਿਪੋਰਟ ਤਲਬ ਕਰ ਲਈ। ਇਸ ਮਕਸਦ ਵਾਸਤੇ ਖੁਫ਼ੀਆ ਕਰਮਚਾਰੀਆਂ ਨੇ ਸੁਭਾ ਤੋਂ ਲੈ ਕੇ ਕੱਲ ਦੇਰ ਸ਼ਾਮ ਤੱਕ ਕਾਂਗਰਸ ਦੀ ਕਾਨਫਰੰਸ ਵਾਲੀ ਥਾਂ ਦੀ ਕਈ ਵਾਰ ਪੈਮਾਇਸ਼ ਕੀਤੀ ਤਾਂ ਕਿ ਭੀੜ ਦੀ ਗਿਣਤੀ ਦਾ ਹਿਸਾਬ ਕਿਤਾਬ ਲਾਇਆ ਜਾ ਸਕੇ। ਦਲ ਦੇ ਅੰਦਰਲੇ ਸੂਤਰਾਂ ਤੋਂ ਮਿਲੀ ਜਾਣਕਾਰੀ ਅਨੁਸਾਰ ਆਪਣੀ ਕਾਨਫਰੰਸ ਨੂੰ ਮਿਲੇ ਮੱਠੇ ਹੁੰਗਾਰੇ ਤੋਂ ਖ਼ਫਾ ਹੋਏ ਉਪ ਮੁੱਖ ਮੰਤਰੀ ਸ੍ਰ: ਸੁਖਬੀਰ ਸਿੰਘ ਬਾਦਲ ਨੇ ਮਾਲਵੇ ਨਾਲ ਸਬੰਧਤ ਆਪਣੀ ਪਾਰਟੀ ਦੇ ਸੀਨੀਅਰ ਆਗੂਆਂ ਦੀ ਵੀ ਕਾਫ਼ੀ ਝਾੜ ਝੰਭ ਕੀਤੀ।

ਵਿਸਾਖੀ ਮੇਲੇ ਮੌਕੇ ਕਾਂਗਰਸ ਪਾਰਟੀ ਦੀ ਕਾਨਫਰੰਸ ਨੂੰ ਮਿਲੇ ਵਿਆਪਕ ਹੁੰਗਾਰੇ ਨੂੰ ਜੇ ਆ ਰਹੀਆਂ ਵਿਧਾਨ ਸਭਾ ਚੋਣਾਂ ਦੇ ਸੰਦਰਭ ਵਿੱਚ ਦੇਖਿਆ ਪਰਖਿਆ ਜਾਵੇ ਤਾਂ ਇਹ ਅਕਾਲੀ ਦਲ ਲਈ ਸੁਭ ਸੰਕੇਤ ਨਹੀਂ, ਕਿਉਂਕਿ ਮੁੱਖ ਮੰਤਰੀ ਵੱਲੋਂ ਆਪਣੇ ਭਤੀਜੇ ਵਿਰੁੱਧ ਚੱਲ ਰਹੀ ਮੁਹਿੰਮ ਦੀ ਕਮਾਂਡ ਖ਼ੁਦ ਆਪਣੇ ਹੱਥ ਲੈਣ ਦੇ ਬਾਵਜੂਦ ਵੀ ਅਜੇ ਤੱਕ ਮਨਪ੍ਰੀਤ ਬਾਦਲ ਦੀ ਵਧ ਰਹੀ ਕਾਗ ਨੂੰ ਠੱਲ• ਨਹੀਂ ਪੈ ਰਹੀ।

-ਬੀ. ਐਸ. ਭੁੱਲਰ-

ਲੇਖਕ ਉਘੇ ਪੱਤਰਕਾਰ ਹਨ

ਲੰਬੀ 'ਚ ਨੌਜਵਾਨ 'ਤੇ ਅਣਮਨੁੱਖੀ ਤਸ਼ੱਦਦ ਕਰਕੇ ਕੀਤੀ ਸਬ ਇੰਸਪੈਕਟਰ ਅਤੇ ਤਿੰਨ ਪੁਲਿਸ ਮੁਲਾਜਮਾਂ ਨੇ ਚੋਰੀ ਦੀ ਤਫਤੀਸ਼

                                                                    -ਹਾਕਮਾਂ ਦੇ ਹਲਕੇ ਦੀ ਖਾਕੀ ਦੀ ਕਰਤੂਤ-
              -ਮਿਰਚਾਂ ਵਾਲੇ ਪਾਣੀ ਨਾਲ ਭਰੀ ਬਾਲਟੀ 'ਚ ਸਿਰ ਡੁਬੋਇਆ-ਢੂਈ 'ਤੇ ਚੜ੍ਹ ਕੇ ਮਾਰ-ਕੁੱਟ ਦਾ ਦੋਸ਼ -
              

                                                                                         -ਇਕਬਾਲ ਸਿੰਘ ਸ਼ਾਂਤ-
               ਮੁੱਖ ਮੰਤਰੀ ਦੇ ਜੱਦੀ ਹਲਕੇ ਲੰਬੀ ਵਿਖੇ ਇੱਕ ਗੈਸ Âਜੇਂਸੀ 'ਚ ਹੋਈ ਚੋਰੀ ਦੀ ਤਫਤੀਸ਼ ਦੌਰਾਨ ਥਾਣਾ ਲੰਬੀ ਦੇ ਇੱਕ ਸਬ ਇੰਸਪੈਕਟਰ, ਤਿੰਨ ਹੈੱਡ ਕਾਂਸਟੇਬਲਾਂ ਅਤੇ ਗੈਸ Âਜੇਂਸੀ ਮਾਲਕ ਵੱਲੋਂ ਗੈਸ Âਜੇਂਸੀ ਦੇ ਇੱਕ ਕਰਮਚਾਰੀ ਦੀ ਕਥਿਤ ਤੌਰ 'ਤੇ ਮਾਰ-ਕੁੱਟ ਕਰਨ ਤੇ ਉਸਨੂੰ ਬੜ੍ਹੀ ਬੇਰਹਿਮੀ ਨਾਲ ਅਣਮਨੁੱਖੀ ਤਸੀਹੇ ਦੇਣ ਦਾ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ।
             ਇਹ ਹੈਰਾਨਕੁੰਨ ਕਾਰਨਾਮਾ ਵੀ ਸੂਬੇ ਦੇ ਹਾਕਮਾਂ ਦੀ 'ਲਾਡਲੀ' ਲੰਬੀ ਪੁਲਿਸ ਦੇ ਹਿੱਸੇ ਹੀ ਆਉਂਦਾ ਹੈ ਕਿ ਜਿਸਨੇ ਇੱਕ ਚੋਰੀ ਨੂੰ ਕਢਵਾਉਣ ਲਈ 'ਥਰਡ ਡਿਗਰੀ' ਜਿਹੀ ਵਰਤੋਂ ਕਰਦਿਆਂ ਇੱਕ ਬੇਕਸੂਰ ਨੌਜਵਾਨ ਨੂੰ ਨਾ ਸਿਰਫ਼ ਨੰਗਾ ਕਰਕੇ ਮਾਰਿਆ-ਕੁੱਟਿਆ ਗਿਆ, ਬਲਕਿ ਉਸਦੇ ਹੱਥ ਪਿੱਛੇ ਬੰਨ੍ਹ ਕੇ ਉਸਦਾ ਸਿਰ ਮਿਰਚਾ ਮਿਲੇ ਪਾਣੀ ਨਾਲ ਭਰੀ ਬਾਲਟੀ 'ਚ ਡੁਬੋ ਦਿੱਤਾ ਗਿਆ। ਜਦੋਂ ਇੰਨੇ ਨਾਲ ਸਬਰ ਨਹੀਂ ਆਇਆ ਤਾਂ ਦੋ ਪੁਲਿਸ ਮੁਲਾਜਮ ਉਸੇ ਹਾਲਤ 'ਚ ਉਸਦੀ ਢੂਈ 'ਤੇ ਚੜ੍ਹ ਗਏ।
                  ਪਿੰਡ ਲੰਬੀ ਦੇ ਵਸਨੀਕ ਪਰਮਜੀਤ ਸਿੰਘ ਪੁੱਤਰ ਸੋਹਣ ਲਾਲ ਨੇ ਇੱਕ ਬਿਆਨ ਹਲਫੀਆ ਦੇ ਕੇ ਦੋਸ਼ ਲਗਾਇਆ ਕਿ ਉਹ ਪਿਛਲੇ ਦੋ ਸਾਲਾਂ ਤੋਂ ਭਾਰਤ ਪੈਟਰੋਲੀਅਮ ਦੀ ਰਣਜੀਤ ਗੈਸ ਏਜੰਸੀ ਲੰਬੀ 'ਤੇ ਬਤੌਰ ਸੇਵਾਦਾਰ ਕੰਮ ਕਰਦਾ ਸੀ ਤੇ ਦਫ਼ਤਰ ਦੀ ਚਾਬੀ ਵੀ ਉਸ ਕੋਲ ਹੁੰਦੀ ਸੀ ਤੇ ਉਹ ਰੋਜ਼ਾਨਾ ਸਵੇਰੇ 7 ਵਜੇ ਦਫ਼ਤਰ ਖੋਲ੍ਹਦਾ ਸੀ। ਉਸਨੇ ਦੱਸਿਆ ਕਿ ਬੀਤੀ 9 ਅਪਰੈਲ 2011 ਰੋਜ਼ਾਨਾ ਵਾਂਗ ਉਸਨੇ ਦਫ਼ਤਰ ਖੋਲ੍ਹਿਆ ਤੇ ਜਦੋਂ ਅੰਦਰ ਜਾ ਕੇ ਵੇਖਿਆ ਤਾਂ ਦਫ਼ਤਰ ਦਾ ਏ.ਸੀ. ਡਿੱਗਿਆ ਪਿਆ ਸੀ ਤੇ ਕੰਪਿਊਟਰਾਂ ਦੀਆਂ 2 ਐਲ. ਸੀ. ਡੀਜ਼ ਅਤੇ ਦੋ ਗੈਸ ਸਿਲੰਡਰ ਅਤੇ ਹੋਰ ਸਮਾਨ ਗਾਇਬ ਸੀ। ਜਿਸ 'ਤੇ ਉਸਨੇ ਗੈਸ ਏਜੰਸੀ ਦੇ ਮਾਲਕ ਪਵਨਪਾਲ ਕੁਮਾਰ ਨੂੰ ਫੋਨ 'ਤੇ ਸੂਚਨਾ ਦਿੱਤੀ। ਜਿਸਦੇ ਲਗਭਗ ਦੋ ਘੰਟਿਆਂ ਬਾਅਦ ਪਵਨਪਾਲ ਕੁਮਾਰ ਮੌਕੇ 'ਤੇ ਪਹੁੰਚ ਗਿਆ ਤੇ ਉਸਨੇ ਲੰਬੀ ਪੁਲਿਸ ਨੂੰ ਮੌਕੇ 'ਤੇ ਬੁਲਾ ਲਿਆ। ਲੰਬੀ ਥਾਣੇ ਦੇ ਇੱਕ ਐਸ. ਆਈ. ਸਮੇਤ ਪੁਲਿਸ ਟੀਮ ਵਗੈਰਾ ਨੇ ਆਪਣੀ ਤਫਤੀਸ਼ ਆਰੰਭ ਕਰ ਦਿੱਤੀ ਤੇ ਸ਼ਾਮ ਦੇ ਕਰੀਬ 6:30 ਵਜੇ ਗੈਸ ਏਜੰਸੀ ਮਾਲਾਕ ਪਵਨਪਾਲ ਕੁਮਾਰ ਆਪਣੇ ਨਾਲ ਪੁਲਿਸ ਮੁਲਾਜਮਾਂ ਨੂੰ ਸਮੇਤ ਦਫ਼ਤਰ ਪੁੱਜਿਆ ਤੇ ਜ਼ਬਰਦਸਤੀ ਮੈਨੂੰ (ਪਰਮਜੀਤ) ਅਤੇ ਬਾਕੀ ਏਜੰਸੀ ਕਰਮਚਾਰੀਆਂ ਨੂੰ ਆਪਣੇ ਨਾਲ ਲੰਬੀ ਥਾਣੇ 'ਚ ਲੈ ਗਏ, ਜਿਥੇ ਉਕਤ ਸਬ ਇੰਸਪੈਕਟਰ, ਤਿੰਨ ਪੁਲਿਸ ਮੁਲਾਜਮ ਅਤੇ ਏਜੰਸੀ ਮਾਲਕ ਵੱਲੋਂ ਚੋਰੀ ਮਨਾਉਣ ਲਈ ਡਰਾ ਧਮਕਾ ਕੇ ਦਬਾਅ ਪਾਇਆ ਜਾਣ ਲੱਗਿਆ ਤੇ ਉਨ੍ਹਾਂ 'ਤੇ ਚੋਰੀ ਦੇ ਦੋਸ਼ ਲਾਉਂਦੇ ਹੋਏ ਕਹਿਣ ਲੱਗੇ ਕਿ 'ਤੁਸੀਂ ਚੋਰੀ ਕੀਤੀ ਹੈ ਤੇ ਸਮਾਨ ਦੇ ਦਿਓ'। ਪਰਮਜੀਤ ਸਿੰਘ ਨੇ ਕਿਹਾ ਕਿ 'ਅਸੀਂ ਕਿਹਾ ਕਿ ਏਜੰਸੀ ਨਾਲ ਸਾਡਾ ਰੁਜ਼ਗਾਰ ਜੁੜਿਆ ਹੋਇਆ ਤੇ ਅਸੀਂ ਚੋਰੀ ਤਾਂ ਦੂਰ ਦੀ ਗੱਲ ਇਸ ਬਾਰੇ ਸੋਚਣਾ ਵੀ ਪਾਪ ਸਮਝਦੇ ਹਾਂ।'
                 ਪਰਮਜੀਤ ਨੇ ਦੋਸ਼ ਲਗਾਇਆ ਕਿ ਪੁੱਛਗਿੱਛ ਦੌਰਾਨ ਬਾਕੀ ਏਜੰਸੀ ਕਰਮਚਾਰੀਆਂ ਨੂੰ ਤਾਂ ਵਾਪਸ ਭੇਜ ਦਿੱਤਾ ਗਿਆ ਪਰ ਇੱਕ ਸਬ ਇੰਸਪੈਕਟਰ ਤੇ ਹੈੱਡ ਕਾਂਸਟੇਬਲਾਂ ਨੇ ਕਥਿਤ ਤੌਰ 'ਤੇ ਜ਼ਬਰਦਸਤੀ ਉਸਦੇ ਕੱਪੜੇ ਉਤਾਰ ਦਿੱਤੇ ਅਤੇ ਉਸਨੂੰ ਦੇ ਕੁਆਟਰਾਂ ਵਿੱਚ ਲੈ ਗਏੇ ਉਥੇ ਲਿਜਾ ਕੇ ਹੱਥ ਪਿੱਛੇ ਕਰਕੇ ਬੰਨ੍ਹ ਦਿੱਤੇ। ਪਰਮਜੀਤ ਸਿੰਘ ਨੇ ਦੋਸ਼ ਲਾਇਆ ਕਿ ਇਸਦੇ ਉਪਰੰਤ ਉਕਤ ਵਿਅਕਤੀਆਂ ਨੇ ਕਥਿਤ ਤੌਰ 'ਤੇ ਇੱਕ ਬਾਲਟੀ ਵਿੱਚ ਪਾਣੀ ਤੇ ਮਿਰਚਾਂ ਪਾ ਕੇ ਉਸਦਾ ਸਿਰ ਵਿੱਚ ਡੁਬੋ ਦਿੱਤਾ ਅਤੇ ਉਕਤ ਪੁਲਿਸ ਮੁਲਾਜਿਮ ਉਸਦੀ ਢੁਈ ਉੱਤੇ ਚੱੜ੍ਹ ਗਏ। ਪਰਮਜੀਤ ਨੇ ਦੱਸਿਆ ਕਿ ਉਸਦੀਆਂ ਅੱਖਾਂ ਵਿੱਚ ਮਿਰਚਾਂ ਵਾਲਾ ਪਾਣੀ ਪੈਣ ਕਰਕੇ ਉਸਦੀ ਚੀਖਾਂ ਨਿੱਕਲ ਗਈਆਂ। ਜਿਸ 'ਤੇ ਪੁਲਿਸ ਮੁਲਾਜਮਾਂ ਨੇ ਬੜੀ ਬੇਰਹਿਮੀ ਨਾਲ ਪਰਮਜੀਤ ਦੀ ਮਾਰ-ਕੁੱਟ ਕੀਤੀ ਅਤੇ ਧਮਕੀਆਂ ਦਿੱੱਤੀਆਂ ਕਿ ਜੇਕਰ ਉਸਨੇ ਚੋਰੀ ਹੋਇਆ ਸਮਾਨ ਨਾਂ ਦਿੱਤਾ ਤਾਂ ਤੇਰੇ ਚੱਡੇ ਪਾੜ੍ਹ ਦਿਆਂਗੇ ਅਤੇ ਤੇਰੇ ਘੋਟਾ ਵੀ ਲਾਵਾਂਗੇ। ਜਿਸ 'ਤੇ ਪਰਮਜੀਤ ਨੇ ਰੋਂਦੇ ਕੁਰਲਾਉਂਦੇ ਹੋਏ ਖੁਦ ਦੇ ਬੇਕਸੂਰ ਹੋਣ ਦੇ ਲੱਖ ਵਾਸਤੇ ਪਾਏ ਪਰ ਉਹ ਜਾਲਮ ਮਾਹੌਲ ਵਿਚ ਕਿਸੇ ਨੇ ਉਸਦੀ ਸੁਣਵਾਈ ਨਹੀਂ ਕੀਤੀ। ਉਸਨੇ ਦੋਸ਼ ਲਗਾਇਆ ਕਿ ਉਹ ਮਾਰ-ਕੁੱਟ ਦੇ ਨਿਸ਼ਾਨਾਂ ਨੂੰ ਮਿਟਾਉਣ ਖਾਤਰ ਥਾਣੇ ਵਿਚ ਨੁਹਾਇਆ ਵੀ ਗਿਆ।
               ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਇਸਦੇ ਉਪਰੰਤ ਏਜੰਸੀ ਮਾਲਕ ਪਵਨਪਾਲ ਕੁਮਾਰ, ਸਬ ਇੰਸਪੈਕਟਰ ਤੇ ਪੁਲਿਸ ਮੁਲਾਜਮ ਉਸਨੂੰ ਗੈਸ ਏਜੰਸੀ ਦੇ ਗੋਦਾਮ 'ਚ ਲੈ ਗਏ ਅਤੇ ਉੱਥੇ ਧੱਕੇ ਨਾਲ ਉਸਨੂੰ ਸ਼ਰਾਬ ਪਿਆ ਕੇ ਫਿਰ ਮਾਰ-ਕੁੱਟ ਕੀਤੀ ਤੇ ਜ਼ਬਰਦਸਤੀ ਕੀਤੀ ਤੇ ਧਮਕਾਇਆ ਕਿ ਜੇਕਰ ਮਾਰ-ਕੁੱਟ ਬਾਰੇ ਕੋਈ ਗੱਲ ਕੀਤੀ ਤਾਂ ਝੂਠੇ ਕੇਸ ਵਿਚ ਫਸਾ ਦਿਆਂਗੇ। ਪਰਮਜੀਤ ਦੇ ਭਰਾ ਧਨਰਾਜ ਨੇ ਦੱਸਿਆ ਕਿ ਉਸਦੇ ਪਿਤਾ ਸੋਹਣ ਲਾਲ, ਤਾਇਆ ਮੋਤੀ ਰਾਮ ਅਤੇ ਉਹ 3-4 ਹੋਰ ਵਿਅਕਤੀ ਨੂੰ ਨਾਲ ਲੈ ਕੇ ਏਜੰਸੀ ਗੋਦਾਮ ਵਿਚ ਗਏ ਜਿੱਥੇ ਪੁਲਿਸ ਵਾਲਿਆਂ ਨੇ ਪਹਿਲਾਂ ਤਾਂ ਨਾਲ ਪਰਮਜੀਤ ਨੂੰ ਨਾਲ ਭੇਜਣ ਤੋਂ ਇਨਕਾਰ ਕਰ ਦਿੱਤਾ ਪਰ ਬਾਅਦ ਵਿਚ ਕਥਿਤ ਤੌਰ 'ਤੇ ਕੋਰੇ ਕਾਗਜ਼ਾਂ 'ਤੇ ਦਸਤਖ਼ਤ ਕਰਵਾਉਣ ਉਪਰੰਤ ਘਰ ਭੇਜ ਦਿੱਤਾ। ਜਿਸਦੇ ਉਪਰੰਤ ਸਵੇਰੇ ਉਸਨੂੰ ਜਖ਼ਮੀ ਹਾਲਤ ਵਿਚ ਸਰਕਾਰੀ ਹਸਪਤਾਲ ਲੰਬੀ ਵਿਚ ਲਿਜਾਇਆ ਗਿਆ।
                  ਪਰਮਜੀਤ ਸਿੰਘ ਨੇ ਪੱਤਰਕਾਰਾਂ ਦੇ ਸਨਮੁੱਖ ਭਰੀਆਂ ਅੱਖਾਂ ਨਾਲ ਆਪਣੀ ਹੱਡ-ਬੀਤੀ ਗੋਡਿਆਂ 'ਤੇ ਵੱਜੀ ਸੱਟਾਂ ਵਿਖਾਉਂਦੇ ਹੋਏ ਦੱਸਿਆ ਕਿ ਉਸਨੂੰ ਵਗੈਰ ਕਿਸੇ ਸਬੂਤ ਦੇ ਇਸ ਲਈ ਅੰਨ੍ਹੇ ਤਸ਼ੱਦਦ ਦਾ ਸ਼ਿਕਾਰ ਬਣਾਇਆ ਗਿਆ ਕਿ ਉਸਦੇ ਕੋਲ ਦਫ਼ਤਰ ਦੀਆਂ ਚਾਬੀਆਂ ਹੁੰਦੀਆਂ ਸਨ। ਉਸਨੇ ਕਿਹਾ ਕਿ ਜਦੋਂਕਿ ਮੌਕੇ ਦੇ ਹਾਲਾਤਾਂ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਚੋਰੀ ਏ। ਸੀ। ਵਾਲੇ ਰੌਸ਼ਨਦਾਨ ਜਰੀਏ ਕੀਤੀ ਗਈ ਹੈ ।
                  ਉਸਨੇ ਮੰਗ ਕੀਤੀ ਕਿ ਉਸ 'ਤੇ ਕਥਿਤ ਤੌਰ 'ਤੇ ਬੇਵਜ੍ਹਾ ਅੰਨ੍ਹਾ ਤੇ ਅਣਮਨੁੱਖੀ ਤਸ਼ੱਦਦ ਢਾਹੁਣ ਅਤੇ ਸਮਾਜਿਕ ਤੌਰ 'ਤੇ ਜਲੀਲ ਕਰਨ ਵਾਲੇ ਸਬ ਇੰਸਪੈਕਟਰ, ਤਿੰਨ ਪੁਲਿਸ ਮੁਲਾਜਮਾਂ ਤੇ ਗੈਸ ਏਜੰਸੀ ਮਾਲਕ ਖਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ ਤੇ ਉਸਨੂੰ ਇਨਸਾਫ਼ ਦਿਵਾਇਆ। ਇਸੇ ਦੌਰਾਨ ਅੱਜ ਵੱਡੀ ਤਾਦਾਦ ਵਿਚ ਪਿੰਡ ਲੰਬੀ ਦੇ ਦਰਜਨਾਂ ਲੋਕ ਪਰਮਜੀਤ ਸਿੰਘ ਨੂੰ ਜਖ਼ਮੀ ਹਾਲਤ ਵਿਚ ਲੰਬੀ ਥਾਣੇ ਲੈ ਕੇ ਗਏ ਅਤੇ ਕਥਿਤ ਦੋਸ਼ੀ ਅਧਿਕਾਰੀਆਂ ਤੇ ਗੈਸ ਏਜੰਸੀ ਖਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ।
              ਦੂਜੇ ਪਾਸੇ ਐਸ। ਆਈ। ਬੰਤਾ ਸਿੰਘ ਨੇ ਤਸ਼ੱਦਦ ਸਬੰਧੀ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰਦਿਆਂ ਕਿਹਾ ਕਿ ਅਸੀਂ ਸਿਰਫ਼ ਗੈਸ ਏਜੰਸੀ ਦੇ ਕਰਮਚਾਰੀਆਂ ਨੂੰ ਪੁੱਛਗਿੱਛ ਲਈ ਬੁਲਾਇਆ ਸੀ ਤੇ ਅਜਿਹਾ ਕਰਨਾ ਨਾ ਹੀ ਕਾਨੂੰਨਨ ਜਾਇਜ਼ ਹੈ ਤੇ ਨਾ ਅਜਿਹਾ ਕਾਰਾ ਕਰਨ ਵਾਲਾ ਮੇਰਾ ਕਿਰਦਾਰ ਹੈ। ਜਦੋਂਕਿ ਗੈਸ ਏਜੰਸੀ ਦੇ ਮਾਲਕ ਪਵਨਪਾਲ ਕੁਮਾਰ ਨਾਲ ਵਾਰ-ਵਾਰ ਸੰਪਰਕ ਕਰਨ ਦੇ ਬਾਵਜੂਦ ਸੰਪਰਕ ਨਹੀਂ ਬਣ ਸਕਿਆ।
              ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪੁਲੀਸ ਮੁਖੀ ਸ੍ਰੀ ਇੰਦਰਮੋਹਣ ਸਿੰਘ ਨੇ ਸੰਪਰਕ ਕਰਨ 'ਤੇ ਕਿਹਾ ਕਿ ਮਾਮਲੇ ਦੀ ਨਿਰਪੱਖ ਪੜਤਾਲ ਕਰਵਾ ਕੇ ਸੱਚਾਈ ਸਾਹਮਣੇ ਆਉਣ 'ਤੇ ਦੋਸ਼ੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

ਚੌਟਾਲਿਆਂ ਦੀ ਪ੍ਰੇਰਣਾ ਨਾਲ ਅਕਾਲੀ ਬਣੇ ਵਿਅਕਤੀ ਅਕਾਲੀ ਸਰਪੰਚ ਦੇ ਪਤੀ ਦੀ ਧੱਕੇਸ਼ਾਹੀ ਦਾ ਸ਼ਿਕਾਰ

-ਇਕ਼ਬਾਲ ਸਿੰਘ ਸ਼ਾਂਤ-

ਮੁੱਖ ਮੰਤਰੀ ਪੰਜਾਬ ਦੇ ਹਲਕੇ ਲੰਬੀ ਦੇ ਪਿੰਡ ਵੜਿੰਗਖੇੜਾ ਵਿਚ ਸਾਲ 2007 ਦੀਆਂ ਵਿਧਾਨਸਭਾ ਚੋਣਾਂ ਸਮੇਂ ਹਰਿਆਣੇ ਦੇ ਚੌਟਾਲਾ ਪਰਿਵਾਰ ਦੀ ਪ੍ਰੇਰਣਾ ਸਦਕਾ ਕਾਂਗਰਸ ਨੂੰ ਤਿਆਗ ਕੇ ਅਕਾਲੀ ਦਲ 'ਚ ਸ਼ਾਮਲ ਹੋਏ ਵਿਅਕਤੀਆਂ ਨੂੰ ਪਿੰਡ ਦੀ ਮਹਿਲਾ ਅਕਾਲੀ ਸਰਪੰਚ ਦੇ ਅਕਾਲੀ ਆਗੂ ਪਤੀ ਵੱਲੋਂ ਕਥਿਤ ਧੱਕੇਸ਼ਾਹੀ ਦਾ ਸ਼ਿਕਾਰ ਬਣਾਏ ਜਾਣ ਦਾ ਮਾਮਲਾ ਸਾਹਮਣੇ ਆਇਆ ਹੈ। ਰਾਜਸਥਾਨ ਅਤੇ ਹਰਿਆਣਾ ਨਾਲ ਖਹਿੰਦੇ ਪੰਜਾਬ ਦੇ ਸਰਹੱਦੀ ਪਿੰਡ ਵੜਿੰਗਖੇੜਾ ਦੀ 25 ਏਕੜ ਪੰਚਾਇਤੀ ਜ਼ਮੀਨ ਨੂੰ ਕਈ ਵਰਿ•ਆਂ ਤੋਂ ਠੇਕੇ 'ਤੇ ਲੈ ਕੇ ਖੇਤੀ ਕਰ ਰਹੇ 5 ਕਿਸਾਨਾਂ ਧਰਮਪਾਲ, ਰਾਮ ਕਰਨ, ਜੱਗਾ ਸਿੰਘ, ਜਸਵਿੰਦਰ ਸਿੰਘ ਅਤੇ ਗੁਰਲਾਲ ਸਿੰਘ ਨੇ ਦੱਸਿਆ ਕਿ ਪਿਛਲੇ ਸਾਲ 9 ਅਪ੍ਰੈਲ 2010 ਨੂੰ ਸਰਕਾਰੀ ਅਨੂਸਾਰ ਖੁੱਲੀ ਬੋਲੀ ਵਿਚ 5-5 ਏਕੜ ਪੰਚਾਇਤੀ ਜ਼ਮੀਨ 87 ਹਜ਼ਾਰ ਰੁਪਏ ਤੋਂ ਲੈ ਕੇ 1 ਲੱਖ 36 ਹਜ਼ਾਰ ਰੁਪਏ ਤੱਕ ਠੇਕੇ 'ਤੇ ਲਈ ਸੀ। ਸੱਤਾ ਪੱਖ ਅਕਾਲੀ ਦਲ ਨਾਲ ਸਬੰਧਤ ਉਕਤ ਕਿਸਾਨਾਂ ਨੇ ਆਖਿਆ ਕਿ ਪੰਚਾਇਤੀ ਜ਼ਮੀਨ ਨੂੰ ਠੇਕੇ 'ਤੇ ਦੇਣ ਸਮੇਂ ਪੰਚਾਇਤ ਵੱਲੋਂ ਉਕਤ ਰਕਬੇ ਵਿਚ ਨਹਿਰੀ ਪਾਣੀ ਘੱਟ ਲੱਗਦਾ ਹੋਣ ਕਰਕੇ ਨਰਮੇ ਦੀ ਫਸਲ ਤੋਂ ਪੰਚਾਇਤੀ ਜ਼ਮੀਨ ਨੂੰ ਸਰਹਿੰਦ ਫੀਡਰ ਤੋਂ ਲਿਫ਼ਟ ਪੰਪ ਦਾ ਪਾਣੀ ਪਹੁੰਚਦਾ ਕਰਕੇ ਦਿੱਤੇ ਜਾਣ ਦੀ ਗੱਲ ਕੀਤੀ ਗਈ ਸੀ ਪਰ ਨਰਮੇ ਦੀ ਫਸਲ ਪੱਕਣ ਤੱਕ ਸਰਪੰਚ ਦੇ ਅਕਾਲੀ ਆਗੂ ਪਤੀ ਗੁੱਡੂ ਸਿੰਘ, ਜੋ ਕਿ ਖੁਦ ਹੀ ਪੰਚਾਇਤੀ ਕੰਮ ਵਿਚ ਪੂਰੀ ਤਰਾਂ ਦਖਲਅੰਦਾਜ਼ੀ ਰੱਖਦਾ ਹੈ, ਨੇ ਉਕਤ ਮਾਮਲੇ ਬਾਰੇ ਕੋਈ ਠੋਸ ਕਦਮ ਨਹੀਂ ਪੁੱਟਿਆ। ਚੌਧਰੀ ਧਰਮਪਾਲ ਨੇ ਕਿਹਾ ਕਿ ਗੁੱਡੂ ਸਿੰਘ ਵੱਲੋਂ ਇੱਕ ਗਿਣੀ-ਮਿੱਥੀ ਸਾਜਿਸ਼ ਦੇ ਤਹਿਤ ਨਰਮੇ ਦੀ ਫ਼ਸਲ ਮੌਕੇ ਕੱਚੇ ਖਾਲ ਨੂੰ ਕਥਿਤ ਤੌਰ 'ਤੇ ਢੁਆ ਦਿੱਤੇ ਜਾਣ ਕਰਕੇ ਨਰਮੇ ਦੀ ਫ਼ਸਲ ਦਾ ਨੁਕਸਾਨ ਹੋਇਆ ਸੀ। ਕਿਸਾਨ ਰਾਮਕਰਨ ਨੇ ਕਿਹਾ ਕਿ ਲਿਫ਼ਟ ਪੰਪਾਂ ਦਾ ਪਾਣੀ ਨਾ ਮਿਲਣ ਅਤੇ ਜ਼ਮੀਨੀ ਪਾਣੀ ਮਾੜਾ ਹੋਣ ਕਰਕੇ ਉਨਾਂ ਦੀ ਨਰਮੇ ਦੀ ਫ਼ਸਲ ਦਾ ਝਾੜ ਸਿਰਫ਼ 11-12 ਮਨ ਪ੍ਰਤੀ ਏਕੜ ਤੱਕ ਰਹਿ ਗਿਆ। ਚੌਧਰੀ ਧਰਮਪਾਲ ਅਤੇ ਗੁਰਲਾਲ ਸਿੰਘ ਨੇ ਦੱਸਿਆ ਕਿ ਵਾਰ-ਵਾਰ ਮਿੰਨਤਾਂ ਕਰਨ ਦੇ ਉਪੰਰਤ ਪੰਚਾਇਤ ਨੇ ਠੇਕੇ ਦੇ 6 ਮਹੀਨੇ ਲੰਘ ਜਾਣ ਬਾਅਦ 23 ਅਕਤੂਬਰ 2010 ਨੂੰ ਲਿਫ਼ਟ ਪੰਪ ਦੀ ਪਾਈਪਾਂ ਪੁਆ ਦਿੱਤੀਆਂ ਪਰ ਸਾਨੂੰ ਠੇਕੇ ਤੋਂ ਭਜਾਉਣ ਦੀਆਂ ਕੋਝੀਆਂ ਕਾਰਵਾਈਆਂ ਲਗਾਤਾਰ ਜਾਰੀ ਰਹੀਆਂ। ਜਿਸਦੇ ਤਹਿਤ ਅਕਾਲੀ ਆਗੂ ਗੁੱਡੂ ਸਿੰਘ ਨੇ ਇੱਕ ਗਿਣੀ-ਮਿੱਥੀ ਸਾਜਿਸ਼ ਦੇ ਤਹਿਤ ਤਕਰੀਬਨ ਡੇਢ ਮਹੀਨੇ ਪਹਿਲਾਂ ਲਿਫ਼ਟ ਪੰਪ ਦੀਆਂ ਦੋਵੇਂ ਘੜੋਈਆਂ ਢਾਹ ਦਿੱਤੀਆਂ। ਜਿਸ ਦੇ ਨਤੀਜੇ ਵਜੋਂ ਪਾਣੀ ਨਾ ਪਹੁੰਚਣ ਕਰਕੇ ਕਣਕ ਦੀ ਫ਼ਸਲ ਸੁੱਕਣ ਕਿਨਾਰੇ ਪੁੱਜ ਗਈ ਤੇ ਉਨ•ਾਂ ਨੂੰ ਮਹਿੰਗੇ ਭਾਅ ਦਾ ਡੀਜਲ ਖਰਚ ਕੇ ਟਿਊਬਵੱੈਲ ਦੇ ਪਾਣੀ ਰਾਹੀਂ ਆਪਣੀ ਫ਼ਸਲਾਂ ਪਾਲਣੀਆਂ ਪਈਆਂ ਤੇ ਜ਼ਮੀਨੀ ਪਾਣੀ ਮਾੜਾ ਹੋਣ ਕਰਕੇ ਕਣਕ ਦੇ ਝਾੜ 'ਤੇ ਪਿਆ ਹੈ। ਜਦੋਂਕਿ ਪਿੰਡ ਦੇ ਇੱਕ ਹੋਰ ਕਿਸਾਨ ਸਵਰਨ ਸਿੰਘ ਨੇ ਕਿਹਾ ਕਿ ਇਹ ਘੜੋਈਆਂ (ਹਾਉਦੀਆਂ) ਪੰਚਾਇਤ ਨੇ ਬਣਵਾਈਆਂ ਸਨ ਅਤੇ ਪੰਚਾਇਤ ਨੇ ਢੁਆ ਦਿੱਤੀਆਂ। ਚੌਧਰੀ ਧਰਮਪਾਲ ਹੁਰਾਂ ਨੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਹੁਰਾਂ ਵੱਲੋਂ ਸਿਰੋਪਾਓ ਦਿੱਤੇ ਜਾਣ ਦੀ ਫੋਟੋਆਂ ਵਿਖਾਉਂਦਿਆਂ ਕਿਹਾ ਕਿ ਅਸੀਂ ਵੀ ਅਕਾਲੀ ਦਲ ਦੇ ਨਿਸ਼ਠਾਵਾਨ ਵਰਕਰਾਂ ਹਾਂ ਤੇ ਹਰਿਆਣੇ ਦੇ ਸਾਬਕਾ ਮੁੱਖ ਮੰਤਰੀ ਚੌਟਾਲਾ ਪਰਿਵਾਰ ਦੀ ਪ੍ਰੇਰਣਾ ਸਦਕਾ ਕਾਂਗਰਸ ਨਾਲੋਂ ਨਾਤਾ ਤੋੜ ਕੇ ਸੱਤਾ ਪੱਖ ਸ਼੍ਰੋਮਣੀ ਅਕਾਲੀ ਦਲ ਨਾਲ ਜੁੜੇ ਸੀ ਪਰ ਗੁੱਡੂ ਸਿੰਘ ਦੀਆਂ ਕਥਿਤ ਧੱਕੇਸ਼ਾਹੀਆਂ ਕਰਕੇ ਸਾਡਾ ਪਾਰਟੀ ਤੋਂ ਮੋਹ ਭੰਗ ਹੁੰਦਾ ਜਾ ਰਿਹਾ ਹੈ। ਉਨਾਂ ਕਿਹਾ ਕਿ ਅਸੀਂ ਇਹ ਮਾਮਲਾ ਆਪਣੇ ਨਾਨਕੇ ਪਿੰਡ ਵਿਖੇ ਚੌਟਾਲਾ ਪਰਿਵਾਰ ਕੋਲ ਵੀ ਲੈ ਕੇ ਜਾਵਾਂਗੇ। ਇਨ•ਾਂ ਕਿਸਾਨਾਂ ਨੇ ਮੰਗ ਕੀਤੀ ਕਿ ਸਰਕਾਰ ਵੱਲੋਂ ਪੰਚਾਇਤ ਜ਼ਮੀਨ ਵਿਚ ਸਾਨੂੰ ਹੋਏ ਆਰਥਿਕ ਨੁਕਸਾਨ ਦੇ ਮੱਦੇਨਜ਼ਰ ਪਿਛਲਾ ਵਰੇ ਦੇ ਠੇਕੇ ਦੀ ਰਕਮ ਵਿਚ ਹੀ ਇਸ ਸਾਲ ਵੀ ਜ਼ਮੀਨ ਵਾਹੁਣ ਲਈ ਦਿਤੀ ਜਾਵੇ। ਚੌਧਰੀ ਧਰਮਪਾਲ ਨੇ ਕਿਹਾ ਕਿ ਸਰਪੰਚ ਦੇ ਪਤੀ ਦੀਆਂ ਕਥਿਤ ਧੱਕੇਸ਼ਾਹੀਆਂ ਕਰਕੇ ਪਾਣੀ ਸਹੀ ਢੰਗ ਨਾਲ ਨਾ ਲੱਗਣ ਕਰਕੇ ਉਨਾਂ ਨੂੰ ਮੁਨਾਫ਼ੇ ਦੀ ਥਾਂ ਪੱਲਿਓਂ ਨੁਕਸਾਨ ਵੀ ਝੱਲਣਾ ਪਿਆ। ਧਰਮਪਾਲ ਨੇ ਦੱਸਿਆ ਕਿ ਬੀਤੀ 6 ਅਪ੍ਰੈਲ ਨੂੰ ਦੁਬਾਰਾ ਬੋਲੀ ਮੌਕੇ ਵੱਲੋਂ ਘੜੋਈਆਂ (ਹਾਉਦੀਆਂ) ਢਾਹੁਣ ਉਪਰੰਤ ਸਾਡੇ ਵੱਲੋਂ ਪੁੱਛਣ 'ਤੇ ਗੁੱਡੂ ਸਿੰਘ ਨੇ ਕੋਈ ਸੰਤੁਸ਼ਟੀਜਨਕ ਜਵਾਬ ਨਾ ਦਿੰਦਿਆਂ ਕਿਹਾ 'ਪੰਚਾਇਤੀ ਜ਼ਮੀਨ ਤਾਂ 100 ਫ਼ੀਸਦੀ ਵੀਰਾਨੀ ਹੈ ਤੁਸੀਂ ਜ਼ਮੀਨ ਰੱਖਣੀ ਹੈ ਤਾਂ ਰੱਖੋ ਨਹੀਂ ਨਾ ਮੈਂ ਖੁਦ ਜ਼ਮੀਨ ਵਾਹ ਲਵਾਂਗੇ ਮੇਰੇ ਕੋਲ ਆਪਣਾ ਟਰੈਕਟਰ ਵੀ ਹੈਗਾ।' ਦੂਜੇ ਪਾਸੇ ਸਰਪੰਚ ਦੇ ਪਤੀ ਗੁੱਡੂ ਸਿੰਘ ਨੇ ਉਕਤ ਦੋਸ਼ਾਂ ਨੂੰ ਨਕਾਰਦਿਆਂ ਕਿਹਾ ਕਿ ਪੰਚਾਇਤ ਨੇ ਘੜੋਲੀਆਂ ਬਣਵਾਈਆਂ ਸਨ, ਪਰ ਧਰਮਪਾਲ ਵਗੈਰਾ ਖੁਦ ਘੜੋਈਆਂ (ਹਾਉਦੀਆਂ) ਢਾਹ ਕੇ ਦੋਸ਼ ਮੇਰੇ 'ਤੇ ਮੜ ਰਹੇ ਹਨ। ਉਨਾਂ ਕਿਹਾ ਕਿ ਮੇਰੀ ਪੰਚਾਇਤੀ ਜ਼ਮੀਨ ਲੈਣ ਵਿਚ ਕੋਈ ਦਿਲਚਸਪੀ ਨਹੀਂ ਹੈ ਮੈਨੂੰ ਸਿਰਫ਼ ਖੱਜਲ-ਖੁਆਰ ਕਰਨ ਲਈ ਦੂਸ਼ਣਬਾਜ਼ੀ ਕੀਤੀ ਜਾ ਰਹੀ ਹੈ।

ਮੁੱਖ ਮੰਤਰੀ ਬਾਦਲ ਦਾ ਨਿੱਜੀ ਸਕੱਤਰ ਵੀ ਝੱਲ ਰਿਹੈ ਸੇਮ ਦੀ ਮਾਰ

- ਇਕ਼ਬਾਲ ਸਿੰਘ ਸ਼ਾਂਤ -

ਪੰਜਾਬ ਦੇ ਬਹੁਪੱਖੀ ਵਿਕਾਸ ਨੂੰ ਨਵੀਂ ਦਿਸ਼ਾ ਦੇਣ 'ਚ ਰੁੱਝੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਦੇ ਨਿੱਜੀ ਹਲਕੇ ਲੰਬੀ ਵਿਚ ਸੇਮ ਦਾ ਸੰਤਾਪ ਜਿੱਥੇ ਆਮ ਲੋਕਾਂ ਦੇ ਜੀਵਨ ਦਾ ਇੱਕ ਕੌੜਾ ਅੰਗ ਬਣ ਗਿਆ ਹੈ। ਉਥੇ ਸੂਬੇ ਦੀਆਂ ਵਿਕਾਸ ਪੱਖੀ ਦਿਸ਼ਾਵਾਂ ਤੈਅ ਹੋਣ ਦੇ ਆਦਾਨ-ਪ੍ਰਦਾਨ ਵਿਚ ਮੁੱਖ ਮੰਤਰੀ ਨਾਲ ਅਹਿਮ ਭੂਮਿਕਾ ਨਿਭਾਉਣ ਵਾਲਾ ਉਨ੍ਹਾਂ ਦਾ ਇੱਕ ਨਿੱਜੀ ਸਕੱਤਰ ਵੀ ਸੇਮ ਦੀ ਮਾਰ ਨੂੰ ਝੱਲ ਰਿਹਾ ਹੈ। ਜਿਸਦਾ ਲਗਭਗ 8-9 ਏਕੜ ਰਕਬਾ ਸੇਮ ਕਰਕੇ ਬਰਬਾਦ ਹੋ ਚੁੱਕਿਆ ਹੈ।

ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਗੁਰਚਰਨ ਸਿੰਘ ਵਾਸੀ ਡੱਬਵਾਲੀ ਢਾਬ ਜਿਨਾਂ ਦੀ ਪਰਿਵਾਰਕ ਜ਼ਮੀਨ ਪਿੰਡ ਸ਼ਾਮ ਖੇੜਾ ਦੇ ਰਕਬੇ ਵਿਚ ਪੈਂਦੀ ਹੈ। ਪਿਛਲੇ ਕਈ ਸਾਲਾਂ ਤੋਂ ਸੇਮ ਦੀ ਮਾਰ ਹੇਠ ਹੈ। ਇਸ ਗੱਲ ਦਾ ਖੁਲਾਸਾ ਅੱਜ ਉਸ ਵੇਲੇ ਹੋਇਆ ਜਦੋਂ ਪਿੰਡ ਸ਼ਾਮ ਖੇੜਾ ਵਿਖੇ ਪੁੱਜੇ ਪੱਤਰਕਾਰਾਂ ਨੂੰ ਪਿੰਡ ਦੇ ਲੋਕਾਂ ਨੇ ਸੇਮ ਦੀ ਮਾਰ ਆਪਣਾ ਦੁਖੜਾ ਰੋਂਦਿਆਂ ਕਿਹਾ ਪਿੰਡ ਦੀ ਲਗਭਗ 200 ਏਕੜ ਜ਼ਮੀਨ ਸੇਮ ਦੀ ਮਾਰ ਹੇਠ ਆ ਚੁੱਕੀ ਹੈ ਤੇ ਉਨ੍ਹਾਂ ਕੋਲ ਹੋਰ ਆਮਦਨ ਦਾ ਕੋਈ ਸਾਧਨ ਨਹੀਂ। ਭਾਵੇਂ ਮੁੱਖ ਮੰਤਰੀ ਵੱਲੋਂ ਸੱਤਾ ਵਿਚ ਆਉਣ ਦੇ ਬਾਅਦ ਸੇਮ ਦੀ ਸਮੱਸਿਆ ਤੋਂ ਨਿਜਾਤ ਦਿਵਾਉਣ ਲਈ ਹਰ ਸੰਭਵ ਕੋਸ਼ਿਸ਼ਾਂ ਕਰਨ ਦਾ ਐਲਾਨ ਕੀਤਾ ਗਿਆ ਸੀ ਅਤੇ ਸਰਕਾਰ ਵੱਲੋਂ ਕੁਝ ਪਿੰਡਾਂ ਵਿਚ ਜ਼ਮੀਂਦੋਜ਼ ਪਾਈਪਾਂ ਜਿਹੇ ਪ੍ਰਾਜੈਕਟ ਆਰੰਭ ਕਰਨ ਦੇ ਬਾਵਜੂਦ ਸੇਮ 'ਤੇ 10 ਫ਼ੀਸਦੀ ਵੀ ਕਾਬੂ ਨਹੀਂ ਪਾਇਆ ਜਾ ਸਕਿਆ। ਅਜਿਹੇ ਵਿਚ ਮੁੱਖ ਮੰਤਰੀ ਦੇ ਜੱਦੀ ਹਲਕੇ ਵਿਚੋਂ ਸੇਮ ਖ਼ਤਮ ਕਰਨ ਦੀਆਂ ਸਮੁੱਚੀਆਂ ਕੋਸ਼ਿਸ਼ਾਂ ਫੇਲ ਹੁੰਦੀਆਂ ਨਜ਼ਰ ਆ ਰਹੀਆਂ ਹਨ। ਜਦੋਂਕਿ ਅਗਾਮੀ ਵਿਧਾਨਸਭਾ ਚੋਣਾਂ ਵਿਚ ਸਿਰਫ਼ 10-11 ਮਹੀਨਿਆਂ ਦਾ ਸਮਾਂ ਬਾਕੀ ਬਚਿਆ ਹੈ। ਪਿੰਡ ਸ਼ਾਮਖੇੜਾ ਦੇ ਕਿਸਾਨ ਸੁਰਜਨ ਸਿੰਘ, ਰੇਸ਼ਮ ਸਿੰਘ, ਗੱਜਣ ਸਿੰਘ, ਨਿਹਾਲ ਸਿੰਘ, ਸਰਦਾਰਾ ਸਿੰਘ, ਸੁਖਦੇਵ ਸਿੰਘ, ਹਰਜੀਤ ਸਿੰਘ, ਸੁਰਜੀਤ ਸਿੰਘ, ਜੀਤ ਸਿੰਘ ਅਤੇ ਅਮਰ ਸਿੰਘ ਨੇ ਦੱਸਿਆ ਕਿ ਪਿਛਲੇ ਡੇਢ- ਦਹਾਕਿਆਂ ਤੋਂ ਸੇਮ ਕਰਕੇ ਆਰਥਿਕ ਮੰਦਹਾਲੀ ਦੇ ਸ਼ਿਕਾਰ ਹੋ ਚੁੱਕੇ ਹਨ ਤੇ ਉੱਪਰੋਂ ਮਹਿੰਗਾਈ ਨੇ ਲੱਕ ਤੋੜ ਰੱਖਿਆ ਹੈ। ਪਰ ਸਰਕਾਰ ਵੱਲੋਂ ਸੇਮ ਪ੍ਰਭਾਵਿਤ ਕਿਸਾਨਾਂ ਦੀ ਕੋਈ ਸਾਰ ਨਹੀਂ ਲਈ। ਉਨ੍ਹਾਂ ਨੂੰ ਸਿਰਫ਼ ਲਾਰਿਆਂ ਤੋਂ ਸਿਵਾਏ ਕੁਟ ਹਾਸਲ ਨਹੀਂ ਹੋ ਸਕਿਆ।

ਇਸੇ ਦੌਰਾਨ ਪਿੰਡ ਦੇ ਇੱਕ ਕਿਸਾਨ ਨੇ ਸਰਕਾਰ ਨਾਲ ਇਸ ਸਮੱਸਿਆ ਬਾਬਤ ਗੁਹਾਰ ਲਾਉਣ ਸਬੰਧੀ ਪੁੱਛੇ ਜਾਣ 'ਤੇ ਕਿਹਾ ਕਿ ਸਾਡੀ ਤਾਂ ਹਾਕਮਾਂ ਨੂੰ ਵੋਟਾਂ ਵੇਲੇ ਯਾਦ ਆਉਂਦੀ ਹੈ। ਫਿਰ ਅਸੀਂ ਸ਼ਾਇਦ ਐਤਕੀਂ ਕੁਝ ਸੁਣਵਾਈ ਹੋ ਜਾਵੇ ਦੀ ਆਸ 'ਤੇ ਵੋਟਾਂ ਪਾ ਦਿੰਦੇ ਹਾਂ। ਉਨਾਂ ਕਿਹਾ ਕਿ ਅਫਸਰਸ਼ਾਹੀ ਇੰਨੀ ਕੁ ਭਾਰੂ ਹੋ ਨਿੱਬੜੀ ਹੈ ਕਿ ਉਨ੍ਹਾਂ ਵੱਲੋਂ ਮੁੱਖ ਮੰਤਰੀ ਦੇ ਹੁਕਮਾਂ ਦੀ ਕੋਈ ਬਹੁਤੀ ਪਰਵਾਹ ਵੀ ਨਹੀਂ ਕੀਤੀ ਜਾਂਦੀ। ਪਿਛਲੇ ਸਮੇਂ ਦੌਰਾਨ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਹਲਕੇ ਦੇ ਪਿੰਡਾਂ ਵਿਚ ਸੇਮ ਪ੍ਰਭਾਵਿਤ ਕਿਸਾਨਾਂ ਦੀਆਂ ਜ਼ਮੀਨਾਂ ਦੀ ਵਿਸ਼ੇਸ਼ ਗਿਰਦਾਵਰੀ ਕਰਵਾ ਕੇ ਮੁਆਵਜਾ ਦੇਣ ਦੇ ਨਿਰਦੇਸ਼ ਦਿੱਤੇ ਸਨ। ਮੁੱਖ ਮੰਤਰੀ ਦੇ ਦਿਸ਼ਾ ਨਿਰਦੇਸ਼ਾਂ 'ਤੇ ਪ੍ਰਸ਼ਾਸਨ ਨੇ ਵਿਸ਼ੇਸ਼ ਗਿਰਦਾਵਰੀ ਕਰਵਾ ਲਈ ਗਈ ਸੀ ਪਰ ਇੱਕ ਸਾਲ ਤੋਂ ਵੱਧ ਸਮਾਂ ਲੰਘ ਜਾਣ ਉਪਰੰਤ ਕਿਸਾਨਾਂ ਨੂੰ ਮੁਆਵਜਾ ਨਹੀਂ ਨਸੀਬ ਹੋਇਆ।

ਉਕਤ ਬੇਬਾਕ ਜਿਹੇ ਕਿਸਾਨ ਨੇ ਆਖਿਆ ਜਦੋਂ ਮੁੱਖ ਮੰਤਰੀ ਦੀ ਨਿੱਜੀ ਸਕੱਤਰ ਗੁਰਚਰਨ ਸਿੰਘ ਸੇਮ ਦਾ ਹੱਲ ਨਹੀਂ ਕਢਵਾ ਸਕਿਆ ਜਿਹੜਾ 24 ਘੰਟੇ ਮੁੱਖ ਮੰਤਰੀ ਦੇ ਨੇੜੇ ਰਹਿੰਦਾ ਹੈ ਤਾਂ ਸਾਡੀ ਤਾਂ ਬਿਸਾਤ ਹੀ ਕਿਆ ਹੈ। ਉਸਨੇ ਕਿਹਾ ਅਸੀਂ ਜਿਉਂਦੇ ਜੀਅ ਮਰਿਆਂ ਨਾਲ ਭੈੜੇ ਹੋ ਚੁੱਕੇ ਹਾਂ ਤੇ ਤੰਗੀਆਂ ਤੁਰਸੀਆਂ ਨਾਲ ਭਰਪੂਰ ਜ਼ਿੰਦਗੀ ਕਰਕੇ ਖੁਸ਼ਹਾਲੀ ਇੱਕ ਸੁਫ਼ਨਾ ਬਣ ਕੇ ਰਹਿ ਗਈ ਹੈ। ਕਿਸਾਨਾਂ ਨੇ ਕਿਹਾ ਕਿ ਸਰਕਾਰ ਨੇ ਸੇਮ ਨਾਲੇ ਕਢਵਾਏ ਪਰ ਸਹੀ ਲੇਵਲ ਨਾ ਹੋਣ ਕਰਕੇ ਕਰੋੜਾਂ ਖਰਚਣ ਦੇ ਬਾਵਜੂਦ ਸੇਮਨਾਲੇ ਬੇਅਰਥ ਹਨ।

ਮੁੱਖ ਮੰਤਰੀ ਦੇ ਹਲਕੇ ਦੇ ਦਰਜਨਾਂ ਪਿੰਡ ਪੰਜਾਵਾ, ਕੱਖਾਂਵਾਲੀ, ਵਣਵਾਲਾ, ਸ਼ਾਮਖੇੜਾ, ਚਨੂੰ, ਮਾਹੂਆਣਾ, ਤੱਪਾਖੇੜਾ, ਦਿਉਣਖੇੜਾ, ਮਿੱਡੂਖੇੜਾ ਅਤੇ ਫੱਤਾਕੇਰਾ ਸਮੇਤ ਵੱਖ-ਵੱਖ ਪਿੰਡ ਸੇਮ ਤੋਂ ਪ੍ਰਭਾਵਿਤ ਹਨ। ਜਦੋਂਕਿ ਮਾਨਾ, ਬੀਦੋਵਾਲੀ ਨੂੰ ਸੇਮ ਨੇ ਆਪਣੇ ਕਲਾਵੇ ਵਿਚ ਲੈ ਲਿਆ ਹੈ ਜਿੱਥੋਂ ਪਿੰਡ ਬਾਦਲ ਵੀ ਹੁਣ ਕੋਈ ਬਹੁਤਾ ਦੂਰ ਨਹੀਂ।

ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਗੁਰਚਰਨ ਸਿੰਘ ਨੇ ਸੰਪਰਕ ਕਰਨ 'ਤੇ ਕਿਹਾ ਕਿ ਲੰਬੀ ਹਲਕੇ ਸੇਮ ਦੇ ਖਾਤਮੇ ਲਈ ਸਰਕਾਰ ਵੱਲੋਂ ਉਪਰਾਲੇ ਜਾਰੀ ਹਨ। ਜਦੋਂ ਉਨ੍ਹਾਂ ਨੂੰ ਪੁੱਛਿਆ ਗਿਆ ਕਿ ਤੁਹਾਡਾ ਵੀ ਕਾਫ਼ੀ ਰਕਬਾ ਸੇਮ ਦੀ ਮਾਰ ਹੇਠ ਹੈ ਉਨ੍ਹਾਂ ਹੱਸਦਿਆਂ ਕਿਹਾ ਕਿ ਆਹੋ ਜੀ, ਮੇਰੀ ਵੀ ਜ਼ਮੀਨ ਸੇਮ ਹੇਠਾਂ। ਇਹ ਸਭ ਕੁਝ ਮਾਹਣੀਖੇੜਾ ਦੇ ਨਜ਼ਦੀਕ ਡਰੇਨ ਦਾ ਪੱਧਰ Àੱਚਾ ਹੋਣ ਕਰਕੇ ਪਾਣੀ ਦੀ ਨਿਕਾਸੀ ਨਹੀਂ ਹੋ ਰਹੀ। ਇਸ ਬਾਬਤ ਕੋਈ ਉਪਰਾਲਾ ਕੀਤੇ ਜਾਣ ਸਬੰਧੀ ਪੁੱਛੇ ਜਾਣ 'ਤੇ ਗੁਰਚਰਨ ਸਿੰਘ ਨੇ ਕਿਹਾ ਕਿ ਚੀਫ਼ ਨੂੰ ਆਖਿਆ ਹੈ ਉਹ ਪ੍ਰਾਜੈਕਟ ਬਣਾ ਕੇ ਠੀਕ ਕਰਵਾ ਦੇਣਗੇ।

ਇਸ ਪੂਰੇ ਮਾਮਲੇ ਵਿਚ ਸੋਚਣ ਦਾ ਵਿਸ਼ਾ ਹੈ ਕਿ ਜਦੋਂ ਮੁੱਖ ਮੰਤਰੀ ਦੇ ਇੱਕ ਨਿੱਜੀ ਸਕੱਤਰ ਤੱਕ ਦਾ ਰਕਬਾ ਸੇਮ ਦੀ ਮਾਰ ਹੇਠ ਹੋਣਾ ਸਰਕਾਰ ਲਈ ਬੇਹੱਦ ਮੰਦਭਾਗੀ ਗੱਲ ਹੈ। ਜਿਸਦਾ ਸੁਧਾਰ ਹੋਣ ਨਾਲ ਪੂਰੇ ਪਿੰਡ ਦੀ ਲਗਭਗ 200 ਏਕੜ ਜ਼ਮੀਨ ਦੀ ਹਾਲਤ ਸੁਧਰ ਸਕਦੀ ਹੈ। ਇਹ ਵੀ ਕਹਿਣਾ ਕੁਥਾਹ ਨਹੀਂ ਕਿ ਮੁੱਖ ਮੰਤਰੀ ਦੇ ਬੇਹੱਦ ਨੇੜਲੇ ਵਿਅਕਤੀਆਂ ਵਿਚੋਂ ਇੱਕ ਗਿਣੇ ਜਾਂਦੇ ਗੁਰਚਰਨ ਸਿੰਘ ਦੇ ਕਹਿਣ 'ਤੇ ਪਿਛਲੇ ਸਾਲਾਂ ਵਿਚ ਸੇਮ ਨਾਲੇ ਦਾ ਮਹਿਜ ਪੱਧਰ ਨੀਵਾਂ ਕਰਨ ਦਾ ਪ੍ਰਾਜੈਕਟ ਨਹੀਂ ਬਣ ਸਕਿਆ। ਵੇਖਣਾ ਹੁਣ ਇਹ ਹੈ ਕਿ ਇੱਥੇ ਇੱਛਾਸ਼ਕਤੀ ਦੀ ਘਾਟ ਹੈ ਜਾਂ ਕੁਝ ਸੰਵਾਰਨ ਦਾ ਜ਼ਜਬਾ ਨਹੀਂ। 98148-26100/093178-26100

ਬਾਦਲਾਂ ਦੇ ਹਲਕੇ 'ਚ ਪੱਕੇ ਮਕਾਨਾਂ ਦੀ ਉਸਾਰੀ ਤੇ ਮੁਰੰਮਤ ਦੀ ਗਰਾਂਟ ਦੀ ਬਾਂਦਰਵੰਡ

-ਇਕਬਾਲ ਸਿੰਘ ਸ਼ਾਂਤ-

-ਇੱਕੋ ਪਰਿਵਾਰ ਦੇ ਚਾਰ-ਚਾਰ ਜੀਆਂ ਨੂੰ ਦਿੱਤੇ ਗਰਾਟਾਂ ਦੇ ਗੱਫੇ- -ਇੱਕ ਵਿਅਕਤੀ ਨੂੰ ਪੱਕੇ ਮਕਾਨ ਦੀ ਨਵੀਂ ਉਸਾਰੀ ਦੇ ਨਾਲ ਮੁਰੰਮਤ ਦਾ ਚੈੱਕ ਵੀ ਦਿੱਤਾ -

ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਹਲਕੇ ਲੰਬੀ ਦੇ ਪਿੰਡ ਖੁੱਡੀਆਂ ਮਹਾਂ ਸਿੰਘ ਵਿਖੇ (ਬਿਨ੍ਹਾਂ ਬੀ. ਪੀ. ਐਲ.) ਲੋਕਾਂ ਲਈ ਪੱਕੇ ਮਕਾਨਾਂ ਅਤੇ ਮਕਾਨਾਂ ਦੀ ਮੁਰੰਮਤ ਲਈ ਆਈ ਗਰਾਂਟ ਦੀ ਵੱਡੇ ਪੱਧਰ 'ਤੇ ਬਾਂਦਰਵੰਡ ਅਤੇ ਬੇਨਿਯਮੀਆਂ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਸਰਕਾਰ ਵੱਲੋਂ ਸੀ. ਡੀ. 2.32 ਸਕੀਮ ਦੇ ਤਹਿਤ ਪਿੰਡ ਖੁੱਡੀਆਂ ਮਹਾਂ ਸਿੰਘ ਵਿਖੇ 30 ਵਿਅਕਤੀਆਂ ਨੂੰ ਪੱਕੇ ਮਕਾਨਾਂ ਲਈ ਅਤੇ 59 ਜਣਿਆਂ ਨੂੰ ਮਕਾਨਾਂ ਦੀ ਮੁਰੰਮਤ ਲਈ ਗਰਾਂਟ ਭੇਜੀ ਗਈ ਹੈ। ਮੁੱਖ ਮੰਤਰੀ ਦੇ ਸੰਗਤ ਦਰਸ਼ਨ ਦੇ ਤਹਿਤ ਸੀ.ਡੀ.2.32. ਸਕੀਮ ਅਧੀਨ ਜਾਰੀ ਇਸ ਗਰਾਂਟ 'ਚ ਜਿੱਥੇ ਬਹੁਤ ਸਾਰੇ ਅਜਿਹੇ ਵਿਅਕਤੀਆਂ ਨੂੰ ਵੀ ਪੱਕੇ ਮਕਾਨਾਂ ਲਈ ਗਰਾਂਟ ਵਿਚ ਸ਼ਾਮਲ ਕੀਤਾ ਗਿਆ ਹੈ ਜਿਨ੍ਹਾਂ ਕੋਲ ਪਹਿਲਾਂ ਤੋਂ ਪੱਕੇ ਮਕਾਨ ਹਨ, ਉਥੇ ਕਈ ਪਰਿਵਾਰਾਂ ਦੇ ਕਈ-ਕਈ ਮੈਂਬਰਾਂ ਨੂੰ ਦੋਵੇਂ ਸਕੀਮਾਂ ਵਿਚ ਸ਼ਾਮਲ ਕਰਕੇ ਸਿਆਸੀ ਗੱਫੇ ਦਿੱਤੇ ਗਏ ਹਨ। ਜਦੋਂਕਿ ਪਿੰਡ ਦੇ ਬਹੁਤ ਸਾਰੇ ਲੋੜਵੰਦ ਪਰਿਵਾਰਾਂ ਨੂੰ ਕਥਿਤ ਸਿਆਸੀ ਬਦਲਾਖੋਰੀ ਦੇ ਤਹਿਤ ਇਸ ਸਕੀਮ ਤੋਂ ਵਾਂਝਾ ਰੱਖਿਆ ਗਿਆ ਹੈ। ਪਿੰਡ ਖੁੱਡੀਆਂ ਮਹਾਂ ਸਿੰਘ ਦੇ ਵਸਨੀਕ ਅਰਵਿੰਦਰ ਸਿੰਘ ਬੱਬੀ ਖੁੱਡੀਆਂ, ਜਗਸੀਰ ਸਿੰਘ, ਮਲਕੀਤ ਸਿੰਘ, ਬਿੱਟੂ ਸਿੰਘ, ਦਰਸ਼ਨ ਸਿੰਘ ਮੈਂਬਰ ਪੰਚਾਇਤ, ਲਾਲਾ ਸਿੰਘ, ਮੰਦਰ ਸਿੰਘ ਅਤੇ ਮੋਟਾ ਸਿੰਘ ਸਮੇਤ ਦਰਜਨਾਂ ਲੋਕਾਂ ਨੇ ਦੋਸ਼ ਲਗਾਇਆ ਕਿ ਉਨ੍ਹਾਂ ਦੇ ਪਿੰਡ ਵਿਚ ਪੱਕੇ ਮਕਾਨਾਂ ਦੀ ਉਸਾਰੀ ਅਤੇ ਮੁਰੰਮਤ ਲਈ ਆਈ ਗਰਾਂਟ ਦੀ ਵੰਡ ਵਿਚ ਸਿੱਧੇ ਤੌਰ 'ਤੇ ਵਿਤਕਰਾ ਕੀਤਾ ਗਿਆ ਹੈ ਤੇ ਹੁਣੇ ਤੋਂ ਵਿਧਾਨਸਭਾ ਵੋਟਾਂ ਦੀ ਵਿਛਾਈ ਜਾ ਰਹੀ ਬਿਸਾਤ ਵਿਚ ਸਮੁੱਚੇ ਕਾਇਦੇ-ਕਾਨੂੰਨਾਂ ਦੀਆਂ ਧੱਜੀਆਂ ਉਡਾ ਕੇ ਵੋਟਾਂ ਪੱਕੀਆਂ ਕੀਤੀਆਂ ਜਾ ਰਹੀਆਂ ਹਨ। ਉਨ੍ਹਾਂ ਕਿਹਾ ਕਿ ਇੱਥੇ ਸਿਆਸੀ ਹਨ੍ਹੇਰਗਰਦੀ ਦਾ ਨਤੀਜਾ ਹੈ ਕਿ ਸੱਤਾ ਪੱਖ ਨਾਲ ਸਬੰਧਤ ਇੱਕ ਔਰਤ ਪੰਚ ਦੇ ਪਤੀ ਦਾਤਾ ਰਾਮ ਪੁੱਤਰ ਨੰਦੂ ਰਾਮ ਨੂੰ ਪੱਕੇ ਮਕਾਨ ਦੀ ਗਰਾਂਟ ਦਿੱਤੀ ਗਈ ਹੈ। ਜਦਕਿ ਉਸਦੇ ਕੁਆਰੇ ਪੁੱਤਰ ਵਿੱਕੀ ਨੂੰ ਮਕਾਨ ਦੀ ਮੁਰੰਮਤ ਲਈ ਮਾਇਕ ਮੱਦਦ ਦੇ ਕੇ ਸਰਕਾਰਾਂ ਫੰਡਾਂ ਦੀ ਦੁਰਵਰਤੋਂ ਕੀਤੀ ਗਈ ਹੈ। ਜਦੋਂਕਿ ਤਕਰੀਬਨ 20-21 ਸਾਲਾ ਵਿੱਕੀ ਆਪਣੇ ਮਾਤਾ-ਪਿਤਾ ਨਾਲ ਇੱਕੋ ਮਕਾਨ ਵਿਚ ਰਹਿੰਦਾ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰੀ ਫੰਡਾਂ ਦੀ ਦੁਰਵਰਤੋਂ ਦੀ ਹਾਲਤ ਇਹ ਹੈ ਕਿ ਪਿੰਡ ਦੇ ਇੱਕ ਵਸਨੀਕ ਜਤਿੰਦਰ ਸਿੰਘ ਪੁੱਤਰ ਗੁਰਮੇਲ ਸਿੰਘ ਨੂੰ ਜਿੱਥੇ ਨਵੇਂ ਮਕਾਨ ਦੀ ਗਰਾਂਟ 'ਚ ਸ਼ਾਮਲ ਕੀਤਾ ਗਿਆ ਹੈ, ਉਥੇ ਉਸਨੂੰ ਨਾਲ ਦੀ ਨਾਲ ਮਕਾਨ ਦੀ ਮੁਰੰਮਤ ਲਈ ਵੀ 15 ਹਜ਼ਾਰ ਰੁਪਏ ਦੀ ਗਰਾਂਟ ਦਿਵਾ ਦਿੱਤੀ ਗਈ। ਇੱਥੇ ਹੀ ਸਬਰ ਨਹੀਂ ਹੋਇਆ ਉੱਪਰੋਂ ਉਸਦੇ ਪਿਤਾ ਗੁਰਮੇਲ ਸਿੰਘ ਪੁੱਤਰ ਦਾਨਾ ਸਿੰਘ ਨੂੰ ਵੀ ਮਕਾਨ ਦੀ ਮੁਰੰਮਤ ਲਈ 15 ਹਜ਼ਾਰ ਰੁਪਏ ਦਾ ਗੱਫਾ ਦੇ ਦਿੱਤਾ ਗਿਆ। ਜਦੋਂਕਿ ਹਕੀਕੀ ਤੌਰ 'ਤੇ ਇਹ ਪਿਊ-ਪੁੱਤਰ ਇੱਕੋ ਮਕਾਨ ਵਿਚ ਵਸੋਂ ਕਰਦੇ ਹਨ, ਜੋ ਕਿ ਪੱਕਾ ਬਣਿਆ ਹੋਇਆ ਹੈ। ਅਰਵਿੰਦਰ ਸਿੰਘ ਬੱਬੀ ਖੁੱਡੀਆਂ, ਜਗਸੀਰ ਸਿੰਘ ਵਗੈਰਾ ਨੇ ਕਿਹਾ ਕਿ ਲੋੜਵੰਦ ਨੂੰ ਮੱਦਦ ਮੁਹੱਈਆ ਕਰਵਾਉਣ ਦੀ ਬਜਾਏ ਇੱਕ ਗਿਣੀ ਮਿੱਥੀ ਵਿਉਂਤਬੰਦੀ ਦੇ ਤਹਿਤ ਗਰਾਂਟ ਦਾ ਕਾਫ਼ੀ ਹਿੱਸਾ ਨਿਯਮਾਂ ਨੂੰ ਦਰਕਿਨਾਰ ਕਰਕੇ ਪੰਚਾਇਤ ਅਤੇ ਸੱਤਾ ਪੱਖ ਦੇ ਚਹੇਤਿਆਂ ਨੂੰ ਵੰਡਿਆ ਗਿਆ। ਉਨ੍ਹਾਂ ਦੱਸਿਆ ਵੀਰਾ ਸਿੰਘ ਪੁੱਤਰ ਛੋਟਾ ਸਿੰਘ ਨੂੰ ਮਕਾਨ ਦੀ ਮੁਰੰਮਤ ਲਈ ਗਰਾਂਟ ਦਿੱਤੀ ਗਈ ਹੈ, ਉਥੇ ਉਸਦੇ ਪੁੱਤਰ ਗੁਰਪ੍ਰੀਤ ਸਿੰਘ ਨੂੰ ਪੱਕੇ ਮਕਾਨਾਂ ਦੀ ਸੂਚੀ ਵਿਚ ਰੱਖਿਆ ਗਿਆ ਹੈ। ਇਸੇ ਤਰ੍ਹਾਂ ਜਸਵਿੰਦਰ ਸਿੰਘ ਨਾਂਅ ਦੇ ਇੱਕ ਵਿਅਕਤੀ ਦੇ ਕੁਆਰੇ ਪੁੱਤਰ ਸੁਖਪਾਲ ਸਿੰਘ ਨੂੰ ਪੱਕੇ ਮਕਾਨ ਤੇ ਉਸਦੀ ਪਤਨੀ ਅਮਨਦੀਪ ਕੌਰ ਨੂੰ ਮਕਾਨ ਦੀ ਮੁਰੰਮਤ ਲਈ ਗਰਾਂਟ ਦੀ ਸੂਚੀ ਵਿਚ ਸ਼ਾਮਲ ਕੀਤਾ ਗਿਆ। ਜਦਕਿ ਦੂਜੇ ਪਾਸੇ ਅੱਖਾਂ ਦਾਨ ਲੈ ਕੇ ਇਸ ਰੰਗ ਬਿਰੰਗੇ ਜੱਗ ਨੂੰ ਵੇਖਣ ਵਾਲੇ ਮਲਕੀਤ ਸਿੰਘ ਨੇ ਕਿਹਾ ਕਿ ਉਹ ਬੜੀ ਗਰੀਬੀ 'ਚ ਵੇਲਾ ਲੰਘਾ ਰਿਹਾ ਹੈ ਤੇ ਉਸਨੂੰ ਅੱਖਾਂ ਤੋਂ ਕਾਫ਼ੀ ਘੱਟ ਵਿਖਾਈ ਦਿੰਦੀ ਹੈ। ਉਸਦੇ ਮਕਾਨ ਨੂੰ ਮੁਰਮੰਤ ਦੀ ਜ਼ਰੂਰਤ ਹੈ ਪਰ ਪੰਚਾਇਤ ਨੇ ਉਸਦੀ ਕੋਈ ਸਾਰ ਨਹੀਂ ਲਈ। ਇਸੇ ਤਰ੍ਹਾਂ ਬੁਢਾਪੇ ਵਿਚ ਲੋਕਾਂ ਦੇ ਘਰਾਂ ਵਿਚ ਸਾਫ਼-ਸਫ਼ਾਈ ਕਰਕੇ ਧੀ-ਜਵਾਈ ਦੇ ਸਹਾਰੇ ਵੇਲਾ ਲੰਘਾਉਂਦੀ ਬਜ਼ੁਰਗ ਔਰਤ ਅੰਗਰੇਜ਼ ਕੌਰ ਨੇ ਕਿਹਾ ਕਿ ਬੁਢਾਪੇ ਵਿੱਚ ਕੱਚੇ-ਪਿੱਲੇ ਘਰ ਵਿਚ ਗੁਜਾਰਾ ਚਲਾਉਂਦੀ ਹੈ ਪਰ ਉਸ ਵੱਲੋਂ ਵਾਰ-ਵਾਰ ਗੁਹਾਰ ਲਾਉਣ ਦੇ ਬਾਵਜੂਦ ਗਰਾਂਟ ਨਹੀਂ ਦਿੱਤੀ ਗਈ ਜਦੋਂਕਿ ਰੱਜਿਆਂ-ਪੁੱਜਿਆਂ ਦੇ ਢਿੱਡ ਹੋਰ ਭਰ ਦਿੱਤੇ ਗਏ। ਇਸੇ ਤਰ੍ਹਾਂ ਅੰਮ੍ਰਿਤਪਾਲ ਉਰਫ਼ 'ਨਿਕੜਿਆ' ਦੀ ਦਾਸਤਾਨ ਵੀ ਹੋਰਾਂ ਵਾਂਗ ਮੰਦੀ ਹੈ ਤੇ ਉਹ ਵੀ ਇੱਕ ਕਮਰੇ ਦੇ ਮਕਾਨ ਨੂੰ ਪੱਕਾ ਕਰਵਾਉਣ ਲਈ ਸਰਕਾਰੀ ਗਰਾਂਟ ਲਈ ਤੱਕ ਰਿਹਾ ਹੈ। ਪੰਜਾਬ ਲੋਕ ਜਨ ਸ਼ਕਤੀ ਪਾਰਟੀ ਦੀ ਸੂਬਾਈ ਆਗੂ ਛਿੰਦਰ ਕਲਾਂ ਪਤਨੀ ਭਾਗੀਰਥ ਨੇ ਆਖਿਆ ਕਿ ਸਰਕਾਰ ਵੱਲੋਂ ਭੇਜੀ ਉਕਤ ਗਰਾਂਟ ਦੀ ਕਥਿਤ ਤੌਰ 'ਤੇ ਗਲਤ ਵੰਡ ਤੋਂ ਦੁਖੀ ਹੋ ਕੇ ਉਸਨੇ ਪੱਕੇ ਮਕਾਨ ਲਈ ਆਈ ਗਰਾਂਟ ਦਾ ਚੈੱਕ ਪੰਚਾਇਤ ਨੂੰ ਵਾਪਸ ਕਰ ਦਿੱਤਾ। ਜ਼ਿਕਰਯੋਗ ਹੈ ਕਿ ਮੁੱਖ ਮੰਤਰੀ ਕੋਟੇ ਦੀ ਸਕੀਮ ਸੀ. ਡੀ. 2.32 ਤਹਿਤ ਨੂੰ ਪੱਕੇ ਮਕਾਨ ਲਈ 35 ਹਜ਼ਾਰ ਰੁਪਏ ਦੀ ਗਰਾਂਟ ਵਿਚੋਂ ਲਾਭਪਾਤਰੀ (ਨਾਨ ਬੀ.ਪੀ.ਐਲ.) ਨੂੰ ਪਹਿਲੀ ਕਿਸ਼ਤ ਵਜੋਂ 5 ਹਜ਼ਾਰ ਰੁਪਏ ਨਗਦ, 55 ਸੌ ਇੱਟ ਤੇ 20 ਥੈਲੇ ਸੀਮੇਂਟ ਦਿੱਤੀ ਜਾਂਦਾ ਹੈ। ਜਦਕਿ ਬਾਕੀ 4-5 ਹਜ਼ਾਰ ਰੁਪਏ ਦੀ ਰਕਮ ਉਸਾਰੀ ਦੇ ਆਖ਼ਰ ਵਿਚ ਦਿੱਤੀ ਜਾਂਦੀ ਹੈ। ਇਸੇ ਤਰ੍ਹਾਂ ਮਕਾਨ ਦੀ ਮੁਰੰਮਤ ਲਈ ਲਾਭਪਾਤਰੀਆਂ ਨੂੰ ਇੱਕ ਮੁਸ਼ਤ 15 ਹਜ਼ਾਰ ਰੁਪਏ ਦਿੱਤੇ ਜਾਂਦੇ ਹਨ ਪਿੰਡ ਖੁੱਡੀਆਂ ਮਹਾਂ ਸਿੰਘ ਦੇ ਸਾਬਕਾ ਸਰਪੰਚ ਰਛਪਾਲ ਸਿੰਘ ਮਾਨ, ਬੱਬੀ ਖੁੱਡੀਆਂ, ਹਰਪਾਲ ਸਿੰਘ ਚਹਿਲ ਨੇ ਕਿਹਾ ਕਿ ਮੁੱਖ ਮੰਤਰੀ ਦਫ਼ਤਰ ਨਾਲ ਸਬੰਧਤ ਲੋੜਵੰਦਾਂ ਲਈ ਬਣਾਈ ਉਕਤ ਸਕੀਮ ਨੂੰ ਪਿੰਡ ਖੁੱੱਡੀਆਂ ਮਹਾਂ ਸਿੰਘ ਵਿਖੇ ਨਿਯਮਾਂ ਨੂੰ ਛਿੱਕੇ ਟੰਗ ਕੇ ਸਰਕਾਰੀ ਫੰਡਾਂ ਨੂੰ ਬੇਲੋੜੇ ਲੋਕਾਂ ਵਿਚ ਵੰਡਿਆ ਗਿਆ ਹੈ ਜਿਸਦੀ ਉੱਚ ਪੱਧਰ ਜਾਂਚ ਕਰਵਾਈ ਜਾਣੀ ਚਾਹੀਦੀ ਹੈ। ਉਨ੍ਹਾਂ ਕਿਹਾ ਕਿ ਇਹ ਮਸਲਾ ਹਾਈਕੋਰਟ ਤੱਕ ਵੀ ਲਿਜਾਇਆ ਜਾਵੇਗਾ। Ñਲੰਬੀ ਦੇ Ñਬਲਾਕ ਅਤੇ ਪੰਚਾਇਤ ਅਧਿਕਾਰੀ ਸ੍ਰੀ ਨਵਲ ਰਾਮ ਨੇ ਦੱਸਿਆ ਕਿ ਪਿੰਡ ਖੁੱਡੀਆਂ ਮਹਾਂ ਸਿੰਘ ਵਿਖੇ 59 ਪੱਕੇ ਮਕਾਨਾਂ ਅਤੇ 30 ਮਕਾਨਾਂ ਦੀ ਮੁਰੰਮਤ ਲਈ ਚੈੱਕ ਜਾਰੀ ਕੀਤੇ ਗਏ ਸਨ। ਜਿਨ੍ਹਾਂ ਬਾਰੇ ਮੁੱਖ ਮੰਤਰੀ ਦਫ਼ਤਰ ਵਿਚੋਂ ਅਜੇ ਤੱਕ ਮਨਜੂਰੀ ਸਬੰਧੀ ਕੋਈ ਲਿਖਤੀ ਸੂਚਨਾ ਨਾ ਹੋਣ ਕਰਕੇ ਬੈਂਕ ਨੂੰ ਜਾਰੀ ਚੈੱਕਾਂ ਦੀ ਅਦਾਇਗੀ ਨਾ ਕਰਨ ਲਈ ਕਿਹਾ ਗਿਆ ਹੈ। ਉਨ੍ਹਾਂ ਗਰਾਂਟਾਂ ਦੀ ਵੰਡ ਵਿਚ ਪੱਖਪਾਤ ਜਾਂ ਵਿਤਕਰੇਬਾਜ਼ੀ ਬਾਰੇ ਕਿਹਾ ਕਿ ਮੈਨੂੰ ਇਸ ਬਾਰੇ ਕੋਈ ਜਾਣਕਾਰੀ ਨਹੀਂ।
'ਹਨ੍ਹੇਰਗਰਦੀ-ਚੌਪਟ ਰਾਜਾ'

ਇਸ ਪੂਰੇ ਮਾਮਲੇ ਵਿਚ ਹੈਰਾਨੀਜਨਕ ਤੱਥ ਇਹ ਵੀ ਹੈ ਕਿ ਮੁੱਖ ਮੰਤਰੀ ਦਫ਼ਤਰ ਵੱਲੋਂ ਇਸ ਪਿੰਡ ਲਈ ਉਕਤ ਸਕੀਮ ਤਹਿਤ ਪਿਛਲੇ ਦੋ ਦਿਨਾਂ ਤੱਕ ਰਕਮ ਜਾਰੀ ਕਰਨ ਸਬੰਧੀ ਦਿਸ਼ਾ ਨਿਰਦੇਸ਼ ਨਹੀਂ ਭੇਜੇ ਗਏ ਸਨ। ਇਸਦੇ ਬਾਵਜੂਦ ਬਲਾਕ ਅਤੇ ਪੰਚਾਇਤ ਦਫ਼ਤਰ ਲੰਬੀ ਵੱਲੋਂ ਪਿੰਡ ਖੁੱਡੀਆਂ ਮਹਾਂ ਸਿੰਘ ਦੀ ਸੱਤਾ ਦੇ ਬਲਬੂਤੇ 'ਤੇ ਪੰਚਾਇਤ ਨੂੰ ਲਗਭਗ 10 ਲੱਖ ਰੁਪਏ ਦੀ ਗਰਾਂਟਾਂ ਦੇ 30 ਅਤੇ 50 ਚੈੱਕ ਜਾਰੀ ਕਰ ਦਿੱਤੇ ਗਏ। ਜਿਨ੍ਹਾਂ ਬਾਰੇ ਸੋਝੀ ਆਉਣ 'ਤੇ ਸਬੰਧਤ ਬੈਂਕ ਨੂੰ ਚੈੱਕਾਂ ਦੀ ਅਦਾਇਗੀ ਰੋਕਣ ਲਈ ਕਿਹਾ ਗਿਆ। ਦੂਜੇ ਪਾਸੇ ਪਿੰਡ ਦੇ ਲਾਭਪਾਤੀ ਲੋਕ ਚੈੱਕ ਲੈ ਕੇ ਬੈਂਕ ਦੇ ਗੇੜੇ ਮਾਰ ਰਹੇ ਹਨ।

ਬਾਦਲ ਦੇ ਸਾਥੀਆਂ ਨੇ ਹੀ ਉਲਝਾਈ ਤਾਣੀ

-ਬੀ ਐਸ ਭੁੱਲਰ-

ਅੱਧੀ ਸਦੀ ਤੋਂ ਚੱਲੇ ਆ ਰਹੇ ਸਿਆਸਤ ਦੇ ਘੋੜੇ ਦੇ ਸਾਹਸਵਾਰ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨੇ ਕਦੇ ਇਹ ਚਿਤਵਿਆ ਵੀ ਨਹੀਂ ਹੋਵੇਗਾ, ਕਿ ਜੀਵਨ ਦੇ ਅੰਤਿਮ ਪੜਾਅ ਵਿੱਚ ਉਹਨਾਂ ਦੀ ਲੀਡਰਸਿਪ ਨੂੰ ਚਣੌਤੀ ਦੇਣ ਵਾਲੇ ਸਕੇ ਭਤੀਜੇ ਦਾ ਰਾਹ ਵਿਰੋਧੀ ਹੀ ਨਹੀਂ ਬਲਕਿ ਸੀਨੀਅਰ ਬਾਦਲ ਦੇ ਨਜਦੀਕੀ ਸਾਥੀ ਹੀ ਜਾਣੇ ਜਾਂ ਅਣਜਾਣੇ ਪੱਧਰਾ ਕਰਨ ਵਿੱਚ ਯੋਗਦਾਨ ਪਾਉਣਗੇ। ਜੇਕਰ ਰਾਜ ਦੇ ਮੌਜੂਦਾ ਮੁੱਖ ਮੰਤਰੀ ਸ੍ਰ: ਬਾਦਲ ਦੇ ਰਾਜਨੀਤਕ ਜੀਵਨ ਤੇ ਸਰਸਰੀ ਜਿਹੀ ਝਾਤ ਮਾਰੀ ਜਾਵੇ ਤਾਂ ਮੌਕੇ ਬੇਮੌਕੇ ਆਏ ਹਰ ਇਮਤਿਹਾਨ ਚੋਂ ਉਹ ਸਫ਼ਲ ਹੋ ਕੇ ਹੀ ਨਹੀਂ ਨਿਕਲੇ, ਬਲਕਿ ਪਾਰਟੀ ਵਿਚਲੇ ਆਪਣੇ ਹਰ ਵਿਰੋਧੀ ਨੂੰ ਚਾਰੋਂ ਖਾਨੇ ਚਿੱਤ ਕਰਨ ਵਿੱਚ ਵੀ ਕਾਮਯਾਬ ਹੋਏ ਹਨ। ਉਹ ਭਾਵੇਂ ਸਵਰਗੀ ਗੁਰਮੀਤ ਸਿੰਘ ਬਰਾੜ ਹੋਵੇ, ਮਰਹੂਮ ਸੰਤ ਹਰਚੰਦ ਸਿੰਘ ਲੌਂਗੋਵਾਲ, ਜ: ਗੁਰਚਰਨ ਸਿੰਘ ਟੌਹੜਾ ਜਾਂ ਅਕਾਲੀ ਦਲ ਦੇ ਲੋਹ ਪੁਰਸ਼ ਜਾਣੇ ਜਾਂਦੇ ਪ੍ਰਧਾਨ ਜ: ਜਗਦੇਵ ਸਿੰਘ ਤਲਵੰੰਡੀ ਹੋਣ। ਉਹ ਆਪਣੀ ਸਿਆਸੀ ਕਾਬਲੀਅਤ ਦਾ ਲੋਹਾ ਪੰਜਾਬ ਵਿੱਚ ਮਨਵਾਉਣ ਲਈ ਹੀ ਸਫ਼ਲ ਨਹੀਂ ਹੋਏ, ਸਗੋਂ ਦੇਸ਼ ਦੀ ਕੌਮੀ ਲੀਡਰਸਿਪ ਦਰਮਿਆਨ ਵੀ ਉਹਨਾਂ ਦੀ ਹਮੇਸ਼ਾਂ ਹੀ ਸੋਹਣੀ ਪੁੱਛ ਗਿੱਛ ਰਹੀ ਹੈ। ਸਿਆਸੀ ਖੇਤਰ ਵਿੱਚ ਸ੍ਰ: ਬਾਦਲ ਨੂੰ ਠਿੱਬੀ ਲਾਉਣ ਲਈ ਭਾਵੇਂ ਉਹਨਾਂ ਦੇ ਵਿਰੋਧੀਆਂ ਨੇ ਅਤੀਤ ਵਿੱਚ ਅਨੇਕਾਂ ਯਤਨ ਕੀਤੇ, ਬਾਵਜੂਦ ਇਸਦੇ ਉਹ ਹਰ ਸੰਕਟ ਸਮੇਂ ਹੋਰ ਮਜਬੂਤ ਹੋ ਕੇ ਨਿਕਲੇ। ਮਰਹੂਮ ਜੋਤੀ ਬਾਸੂ ਤੋਂ ਬਾਅਦ ਉਹ ਹੀ ਇੱਕੋ ਇੱਕ ਅਜਿਹੇ ਆਗੂ ਵਜੋਂ ਸਥਾਪਤ ਹੋਏ, ਜੋ ਪੰਜਾਬ ਵਰਗੇ ਨਾਜੁਕ ਤੇ ਸਰਹੱਦੀ ਰਾਜ ਦੇ ਚੌਥੀ ਵਾਰ ਮੁੱਖ ਮੰੰਤਰੀ ਬਣੇ। ਅੱਤਵਾਦ ਦੇ ਯੁੱਗ ਵਿੱਚ ਬੇਸੱਕ ਉਹ ਇੱਕ ਵਾਰ ਹਾਸੀਏ ਤੇ ਚਲੇ ਗਏ ਸਨ, ਲੇਕਿਨ 1995 ਦੀ ਗਿੱਦੜਬਾਹਾ ਦੀ ਜਿਮਨੀ ਚੋਣ ਵੇਲੇ ਵਲੈਤ ਪੜ੍ਹੇ ਆਪਣੇ ਭਤੀਜੇ ਮਨਪ੍ਰੀਤ ਬਾਦਲ ਨੂੰ ਵਿਧਾਨ ਸਭਾ ਦਾ ਮੈਂਬਰ ਬਣਵਾ ਕੇ ਉਹਨਾਂ ਆਪਣੇ ਪਰਿਵਾਰ ਲਈ ਖੁੱਸੀ ਹੋਈ ਜਮੀਨ ਮੁੜ ਹਾਸਲ ਕਰ ਲਈ। ਪੰਜਾਬ ਸਿਰ ਚੜ੍ਹੇ ਕੇਂਦਰ ਦੇ ਭਾਰੀ ਭਰਕਮ ਕਰਜ਼ੇ ਨੂੰ ਮੁਆਫ ਕਰਵਾਉਣ ਦੇ ਮੁੱਦੇ ਨੂੰ ਲੈ ਕੇ ਉਹਨਾਂ ਦੇ ਸਕੇ ਭਤੀਜੇ ਤੇ ਰਾਜ ਦੇ ਵਿੱਤ ਮੰਤਰੀ ਸ੍ਰ: ਮਨਪ੍ਰੀਤ ਸਿੰਘ ਬਾਦਲ ਵੱਲੋਂ ਇੱਕ ਅੰਗਰੇਜੀ ਅਖਬਾਰ ਨੂੰ ਦਿੱਤੀ ਇੰਟਰਵਿਊ ਤੋਂ ਅਜਿਹਾ ਵਾਵਰੋਲਾ ਉੱਠਿਆ ਕਿ ਉਪ ਮੁੱਖ ਮੰਤਰੀ ਸ੍ਰ: ਸੁਖਬੀਰ ਸਿੰਘ ਬਾਦਲ ਆਪਣੇ ਜਾਤੀ ਤੇ ਸਿਆਸੀ ਸਰੀਕ ਨਾਲ ਦੋ ਦੋ ਹੱਥ ਕਰਨ ਲਈ ਕਮਰਕਸਾ ਕਰ ਉੱਠੇ ਸਥਿਤੀ ਨੂੰ ਕਾਬੂ ਹੇਠ ਕਰਨ ਲਈ ਭਾਵੇਂ ਸੀਨੀਅਰ ਬਾਦਲ ਨੇ ਮੀਡੀਆ ਦੇ ਨਾਂ ਇੱਕ ਬਿਆਨ ਜਾਰੀ ਕਰਕੇ ਵਿੱਚ ਬਚਾਅ ਦਾ ਯਤਨ ਕੀਤਾ, ਲੇਕਿਨ ਪੁੱਤਰ ਮੋਹ ਦੇ ਚਲਦਿਆਂ ਉਹ ਬਹੁਤਾ ਕਾਰਗਾਰ ਸਾਬਤ ਨਾ ਹੋਇਆ। ਸਿੱਟੇ ਵਜੋਂ ਇਸ ਮਾਮਲੇ ਨੂੰ ਨਿਪਟਾਉਣ ਲਈ ਪਹਿਲੀ ਲਾਈਨ ਦੇ ਅਕਾਲੀ ਆਗੂਆਂ ਤੇ ਅਧਾਰਤ ਇੱਕ ਕਮੇਟੀ ਦਾ ਗਠਨ ਕਰ ਦਿੱਤਾ, ਜਿਸਤੋਂ ਸਿਆਸੀ ਵਿਸਲੇਸ਼ਕਾਂ ਨੂੰ ਇਹ ਉਮੀਦ ਬੱਝੀ ਕਿ ਉਹ ਕੋਈ ਅਜਿਹਾ ਸਰਵ ਪ੍ਰਵਾਨਿਤ ਹੱਲ ਕੱਢ ਲੈਣਗੇ, ਜਿਸ ਨਾਲ ਮਰ ਸੱਪ ਵੀ ਜਾਵੇ ਤੇ ਸੋਟਾ ਵੀ ਨਾ ਟੁੱਟੇ। ਸਿਆਸੀ ਪੰਡਤਾਂ ਨੂੰ ਇਹ ਆਸ ਸੀ ਕਿ ਘੱਟੋ ਘੱਟ ਸਰਵ ਸ੍ਰੀ ਸੁਖਦੇਵ ਸਿੰਘ ਢੀਡਸਾ, ਗੁਰਦੇਵ ਸਿੰਘ ਬਾਦਲ ਅਤੇ ਰਣਜੀਤ ਸਿੰਘ ਬ੍ਰਹਮਪੁਰਾ ਵਰਗੇ ਆਗੂ ਸਾਕਾਰਾਤਮਕ ਭੂਮਿਕਾ ਨਿਭਾਉਣਗੇ, ਪਰੰਤੂ ਉਕਤ ਕਮੇਟੀ ਨੇ ਮਨਪ੍ਰੀਤ ਬਾਦਲ ਨੂੰ ਅਕਾਲੀ ਦਲ ਵਿੱਚੋਂ ਪੱਕੇ ਤੌਰ ਤੇ ਕੱਢਣ ਦੀ ਕਾਰਵਾਈ ਤੇ ਮੋਹਰ ਲਾ ਦਿੱਤੀ। ਅਜਿਹਾ ਕਰਦਿਆਂ ਉਹਨਾਂ ਸਾਬਕਾ ਵਿੱਤ ਮੰਤਰੀ ਦੀ ਬੌਧਿਕ ਅਤੇ ਜਥੇਬੰਦਕ ਯੋਗਤਾ ਨੂੰ ਸਿਰੇ ਤੋਂ ਹੀ ਨਕਾਰ ਦਿੱਤਾ ਸੀ। ਉਪ ਮੁੱਖ ਮੰਤਰੀ ਸ੍ਰ: ਸੁਖਬੀਰ ਸਿੰਘ ਬਾਦਲ ਤੇ ਉਹਨਾਂ ਦੇ ਸਲਾਹਕਾਰਾਂ ਨੇ ਸ਼ਾਇਦ ਉਦੋਂ ਇਹ ਸੋਚਿਆ ਹੋਵੇਗਾ ਕਿ ਇਸ ਕਾਰਵਾਈ ਨਾਲ ਸਾਬਕਾ ਵਿੱਤ ਮੰਤਰੀ ਇਤਿਹਾਸ ਦਾ ਇੱਕ ਅਸਫਲ ਪਾਤਰ ਬਣ ਕੇ ਰਹਿ ਜਾਵੇਗਾ, ਲੇਕਿਨ ਉਦੋਂ ਤੋਂ ਲੈ ਕੇ 27 ਮਾਰਚ ਦੀ ਵਿਸ਼ਾਲ ਖਟਕੜ ਕਲਾਂ ਰੈਲੀ ਆਯੋਜਿਤ ਕਰਨ ਤੱਕ ਮਨਪ੍ਰੀਤ ਬਾਦਲ ਨੇ ਚੈਨ ਨਾਲ ਸੌਣਾ ਵੀ ਮੁਨਾਸਿਬ ਨਾ ਸਮਝਿਆ ਤੇ ਉਸਦਾ ਤਿੱਖਾ ਪ੍ਰਤੀਕਰਮ ਪੀਪਲਜ ਪਾਰਟੀ ਆਫ ਪੰਜਾਬ ਦੇ ਰੂਪ ਵਿੱਚ ਸਾਹਮਣੇ ਆਇਆ। ਹਾਲਾਂਕਿ ਸਹੀਦ ਏ ਆਜਮ ਸ੍ਰ: ਭਗਤ ਸਿੰਘ ਦੀ ਇਨਕਲਾਬੀ ਵਿਚਾਰਧਾਰਾ ਪ੍ਰਤੀ ਮਨਪ੍ਰੀਤ ਬਾਦਲ ਦੀ ਪ੍ਰਤੀਬੱਧਤਾ ਅਜੇ ਤੱਕ ਅਸਪਸਟ ਹੀ ਹੈ, ਲੇਕਿਨ ਜਿਸ ਤਰੀਕੇ ਨਾਲ ਉਸਨੇ ਉਸਦਾ ਨਾਂ ਇਸਤੇਮਾਲ ਕਰਦਿਆਂ ਪੰਜਾਬੀਆਂ ਦੀ ਮਾਨਸਿਕਤਾ ਤੇ ਜਜਬਾਤ ਨੂੰ ਟੁੰਬਿਆ ਹੈ, ਉਸਦਾ ਨਤੀਜਾ ਇਹ ਹੈ ਕਿ ਅੱਜ ਰਾਜ ਦੀ ਹਰ ਹੱਟੀ ਭੱਠੀ ਗਲੀ ਮੁਹੱਲੇ ਤੇ ਕੂਚੇ ਵਿੱਚ ਮਨਪ੍ਰੀਤ ਦੀ ਚਰਚਾ ਇਸ ਕਦਰ ਹੋ ਰਹੀ ਹੈ, ਕਿ ਉਹ ਇੱਕ ਤਕੜੀ ਸਿਆਸੀ ਧਿਰ ਵਜੋਂ ਉਭਰ ਚੁੱਕਾ ਹੈ। ਜਿੱਥੋਂ ਤੱਕ ਆ ਰਹੀਆਂ ਵਿਧਾਨ ਸਭਾ ਦੀਆਂ ਚੋਣਾਂ ਨੂੰ ਪ੍ਰਭਾਵਿਤ ਕਰਨ ਦਾ ਸੁਆਲ ਹੈ, ਇਸਦਾ ਜੁਆਬ ਤਾਂ ਅਜੇ ਭਵਿੱਖ ਦੇ ਗਰਭ ਵਿੱਚ ਹੈ, ਲੇਕਿਨ ਇਹ ਪੂਰੀ ਤਰ੍ਹਾਂ ਸਪਸਟ ਹੋ ਚੁੱਕਾ ਹੈ, ਕਿ ਬਾਦਲ ਪਰਿਵਾਰ ਦਾ ਗੜ੍ਹ ਸਮਝੇ ਜਾਂਦੇ ਮਾਲਵਾ ਖਿੱਤੇ ਵਿੱਚ ਉਹ ਅਕਾਲੀ ਦਲ ਦੇ ਜੱਟ ਸਿੱਖ ਵੋਟ ਬੈਂਕ ਨੂੰ ਵੱਡਾ ਖੋਰਾ ਲਾ ਰਿਹਾ ਹੈ, ਕਿਉਕਿ ਕਾਂਗਰਸ ਦੇ ਰਿਵਾਇਤੀ ਗੜ੍ਹ ਦੁਆਬੇ ਤੋਂ ਬਿਨ੍ਹਾਂ ਸਮੁੱਚੇ ਰਾਜ ਵਿਚਲੇ ਉਸਦੇ ਦਲਿਤ ਅਤੇ ਹਿੰਦੂ ਭਾਈਚਾਰੇ ਦੇ ਵੋਟ ਬੈਂਕ ਨੂੰ ਬਹੁਤਾ ਪ੍ਰਭਾਵਿਤ ਨਹੀਂ ਕਰਦਾ। ਬੇਸੱਕ ਹੈ ਤਾਂ ਇਹ ਵਕਤ ਤੋਂ ਪਹਿਲਾਂ ਦੀ ਗੱਲ ਲੇਕਿਨ ਜਾਪਦਾ ਇਉਂ ਹੈ ਕਿ ਮਨਪ੍ਰੀਤ ਆਪਣੇ ਤਾਏ ਦੀ ਸ੍ਰਪਰਸਤੀ ਵਾਲੇ ਅਕਾਲੀ ਦਲ ਲਈ ਜ: ਗੁਰਚਰਨ ਸਿੰਘ ਟੌਹੜਾ ਦੀ ਅਗਵਾਈ ਵਾਲੇ ਉਸ ਸਰਬ ਹਿੰਦ ਅਕਾਲੀ ਦਲ ਨਾਲੋਂ ਕਿਤੇ ਵੱਧ ਘਾਤਕ ਸਾਬਤ ਹੋਵੇਗਾ, ਜਿਸਦੀ ਮੌਜੂਦਗੀ ਦੀ ਬਦੌਲਤ 2002 ਦੀਆਂ ਚੋਣਾਂ ਦੌਰਾਨ ਅਕਾਲੀ ਭਾਜਪਾ ਗੱਠਜੋੜ ਨੂੰ ਹਾਰ ਦਾ ਮੂੰਹ ਵੇਖਣਾ ਪਿਆ ਸੀ। ਕੋਈ ਹੋਰ ਆਗੂ ਸਮਝੇ ਜਾਂ ਨਾ ਸਮਝੇ ਲੇਕਿਨ ਸੀਨੀਅਰ ਬਾਦਲ ਮਨਪ੍ਰੀਤ ਵੱਲੋਂ ਲਾਈ ਜਾਣ ਵਾਲੀ ਕਾਟ ਤੋਂ ਭਲੀਭਾਂਤ ਜਾਣੂ ਹਨ, ਇਹੀ ਕਾਰਨ ਹੈ ਕਿ ਪੀ ਪੀ ਪੀ ਬਣਨ ਤੋਂ ਅਗਲੇ ਦਿਨ ਬਾਅਦ ਹੀ ਉਹਨਾਂ ਦੁਆਬੇ ਵੱਲ ਆਪਣੇ ਘੋੜੇ ਦਾ ਰੁਖ਼ ਮੋੜ ਲਿਆ। ਅਜਿਹੇ ਦੋਰਾਹੇ ਤੇ ਖੜੇ ਸ੍ਰ: ਬਾਦਲ ਇਹ ਚਿੰਤਨ ਵੀ ਜਰੂਰ ਕਰਦੇ ਹੋਣਗੇ, ਕਿ ਮਨਪ੍ਰੀਤ ਮਾਮਲੇ ਨੂੰ ਸੁਲਝਾਉਣ ਲਈ ਉਹਨਾਂ ਆਪਣੇ ਜਿਹਨਾਂ ਸੀਨੀਅਰ ਸਾਥੀਆਂ ਨੂੰ ਜੁਮੇਵਾਰੀ ਸੌਂਪੀ ਸੀ, ਉਹਨਾਂ ਉਸਨੂੰ ਨਿਭਾਉਣ ਦੀ ਬਜਾਏ ਜਾਣੇ ਜਾਂ ਅਣਜਾਣੇ ਤੰਦ ਹੀ ਨਹੀਂ ਸਮੁੱਚੀ ਤਾਣੀ ਹੀ ਉਲਝਾ ਕੇ ਰੱਖ ਦਿੱਤੀ ਹੈ, ਜਿੰਦਗੀ ਦੇ ਅੰਤਿਮ ਪੜਾਅ ਵਿੱਚ ਜਿਸਨੇ ਬਾਦਲ ਪਰਿਵਾਰ ਨੂੰ ਹੀ ਲੀਰੋ ਲੀਰ ਨਹੀਂ ਕੀਤਾ, ਬਲਕਿ ਵਿਹੜੇ ਵਿੱਚ ਸੇਹ ਦਾ ਅਜਿਹਾ ਤੱਕਲਾ ਗੱਡ ਦਿੱਤਾ ਹੈ, ਜਿਸਦਾ ਸੰਤਾਪ ਸਾਲਾਂ ਨਹੀਂ ਅਗਲੀਆਂ ਪੀੜ੍ਹੀਆਂ ਦਹਾਕਿਆਂ ਤੱਕ ਹੰਢਾਉਣਾ ਪੈ ਸਕਦਾ ਹੈ।

ਸਰਕਾਰ ਨੇ ਫਰਜੀ ਨਿਯੁਕਤੀ ਪੱਤਰ ਦੇ ਕੇ ਇਤਿਹਾਸ ਸਿਰਜਿਆ

-ਬੀ. ਐਸ. ਭੁੱਲਰ-

ਰੰਗ ਨੀਲਾ ਹੋਵੇ ਜਾਂ ਚਿੱਟਾ ਹਕੂਮਤ ਕਰਨ ਵਾਲੀਆਂ ਧਿਰਾਂ ਦਾ ਖਾਸਾ ਚੋਣ ਮੈਨੀਫੈਸਟੋ ਵਿੱਚ ਕੀਤੇ ਵਾਅਦਿਆਂ ਤੋਂ ਭੱਜਣਾ ਤੇ ਹੱਕ ਮੰਗਦੇ ਲੋਕਾਂ ਨੂੰ ਕੁਟਾਪਾ ਚਾੜ੍ਹਣਾ ਤਾਂ ਰਿਹਾ ਹੀ ਹੈ, ਲੇਕਿਨ ਮੌਜੂਦਾ ਬਾਦਲ ਸਰਕਾਰ ਦੇ ਅਹਿਲਕਾਰਾਂ ਨੇ ਅੰਦੋਲਨਕਾਰੀ ਅਧਿਆਪਕਾਂ ਨੂੰ ਫਰਜੀ ਨਿਯੁਕਤੀ ਪੱਤਰ ਜਾਰੀ ਕਰਦਿਆਂ ਨਵਾਂ ਇਤਿਹਾਸ ਹੀ ਨਹੀਂ ਸਿਰਜਿਆ, ਬਲਕਿ ਇੱਕ ਅਜਿਹੇ ਕਥਿਤ ਅਪਰਾਧ ਨੂੰ ਅੰਜਾਮ ਦੇਣ ਦਾ ਨਾਮਨਾ ਵੀ ਖੱਟ ਲਿਐ, ਭਾਰਤੀ ਦੰਡਾਵਲੀ ਦੀਆਂ ਵੱਖ ਵੱਖ ਧਰਾਵਾਂ ਤਹਿਤ ਜਿਸ ਬਦਲੇ ਕੈਦੀ ਦੀ ਸਜਾ ਵੀ ਭੁਗਤਣੀ ਪੈ ਸਕਦੀ ਹੈ। ਮਾਮਲਾ ਕੁਝ ਇਸ ਤਰ੍ਹਾਂ ਹੈ ਕਿ ਸਤੰਬਰ 2009 ਵਿੱਚ ਜਾਰੀ ਕੀਤੇ ਇੱਕ ਇਸਤਿਹਾਰ ਰਾਹੀਂ ਅਧਿਆਪਕਾਂ ਦੀਆਂ ਵੱਖ ਵੱਖ ਕੈਟਾਗਿਰੀਆਂ ਲਈ ਪੰਜਾਬ ਦੇ ਸਿੱਖਿਆ ਵਿਭਾਗ ਨੇ 7654 ਅਸਾਮੀਆਂ ਵਾਸਤੇ ਦਰਖਾਸਤਾਂ ਮੰਗੀਆਂ ਸਨ। ਉਦੋਂ ਤੋਂ ਲੈ ਕੇ ਨਿਯੁਕਤੀਆਂ ਦਾ ਅਮਲ ਇਸ ਕਦਰ ਗਧੀ ਗੇੜ ਵਿੱਚ ਪਿਆ ਹੋਇਆ ਹੈ, ਕਿ ਤਿੰਨ ਵਾਰ ਲਾਈਆਂ ਲਿਸਟਾਂ ਦੇ ਬਾਵਜੂਦ ਬੇਰੁਜਗਾਰ ਅਧਿਆਪਕਾਂ ਦੇ ਪੱਲੇ ਲੱਕੜ ਦੇ ਮੁੰਡੇ ਤੋਂ ਵੱਧ ਕੁਝ ਵੀ ਨਹੀਂ ਪਿਆ। ਬੇਰੁਜਗਾਰ ਉਦੋਂ ਤੋਂ ਹੀ ਜੱਦੋਜਹਿਦ ਕਰ ਰਹੇ ਹਨ, ਲੇਕਿਨ ਉਹਨਾਂ ਦੀ ਫਰਿਆਦ ਵੱਲ ਕਿਸੇ ਨੇ ਵਾਜਬ ਧਿਆਨ ਨਹੀਂ ਦਿੱਤਾ। ਆਖਰ 22 ਮਾਰਚ ਨੂੰ ਚੰਡੀਗੜ੍ਹ ਦੇ ਨਜਦੀਕ ਸਥਿਤ ਕਸਬਾ ਲਾਡਰਾਂ ਦੀ ਪਾਣੀ ਦੀ ਟੈਂਕੀ ਉਪਰ ਚੜ੍ਹ ਕੇ ਜਦ ਅੰਦੋਲਨਕਾਰੀ ਅਧਿਆਪਕਾਂ ਨੇ ਇਹ ਐਲਾਨ ਕਰ ਦਿੱਤਾ ਕਿ ਨਿਯੁਕਤੀ ਪੱਤਰ ਜਾਰੀ ਨਾ ਕਰਨ ਦੀ ਸੂਰਤ ਵਿੱਚ ਜਿਸਮਾਂ ਤੇ ਪੈਟਰੌਲ ਛਿੜਕ ਕੇ ਅੱਜ ਲਾਉਣ ਉਪਰੰਤ ਉਹ ਛਾਲਾਂ ਮਾਰ ਦੇਣਗੇ, ਤਾਂ ਜਿਲ੍ਹਾ ਪ੍ਰਸਾਸਨ ਨੂੰ ਹੱਥਾਂ ਪੈਰਾਂ ਦੀ ਪੈ ਗਈ, ਕਿਉਕਿ ਅਗਲੇ ਦਿਨ ਖਟਕੜ ਕਲਾਂ ਵਿਖੇ ਹੋਣ ਵਾਲੀ ਸਰਕਾਰੀ ਰੈਲੀ ਦੇ ਸੰਦਰਭ ਵਿੱਚ ਰਾਜ ਸਰਕਾਰ ਨੂੰ ਬਹੁਤ ਹੀ ਕਸੂਤੀ ਸਥਿਤੀ ਦਾ ਸਾਹਮਣਾ ਕਰਨਾ ਪੈ ਸਕਦਾ ਸੀ। ਲੋਹੜੇ ਦੀ ਫੁਰਤੀ ਦਿਖਾਉਦਿਆਂ ਜਦ ਪ੍ਰਸਾਸਨਿਕ ਅਧਿਕਾਰੀਆਂ ਨੇ ਚੰਡੀਗੜ੍ਹ ਸਥਿਤ ਵੱਡੇ ਸਾਹਿਬਾਂ ਨੂੰ ਟੱਲੀਆਂ ਖੜਕਾ ਦਿੱਤੀਆਂ, ਤਾਂ ਉਹਨਾਂ ਦੇ ਵੀ ਹੱਥ ਪੈਰ ਫੁੱਲ ਗਏ। ਬੱਸ ਫਿਰ ਕੀ ਸੀ, ਮਾਮਲੇ ਨੂੰ ਨਿਪਟਾਉਣ ਲਈ ਸਿੱਖਿਆ ਵਿਭਾਗ ਦੇ ਅਫ਼ਸਰਾਂ ਨੂੰ ਜੁਮੇਵਾਰੀ ਸੌਂਪ ਦਿੱਤੀ, ਲਾਡਰਾਂ ਪਹੁੰਚਦਿਆਂ ਜਿਹਨਾਂ ਅੰਦੋਲਨਕਾਰੀਆਂ ਨੂੰ ਤਰ੍ਹਾਂ ਤਰ੍ਹਾਂ ਦੇ ਲਾਲੀ ਪੋਪਾਂ ਰਾਹੀਂ ਪ੍ਰਚਾਉਣ ਦਾ ਯਤਨ ਕੀਤਾ, ਲੇਕਿਨ ਸਫ਼ਲ ਨਾ ਹੋ ਸਕੇ। ਇਹ ਅਹਿਸਾਸ ਕਰਦਿਆਂ ਕਿ ਖਟਕੜ ਕਲਾਂ ਦੀ ਸਰਕਾਰੀ ਰੈਲੀ ਦੇ ਸੰਦਰਭ ਵਿੱਚ ਵਿਆਹ ਵਿੱਚ ਬੀ ਦਾ ਲੇਖਾ ਨਾ ਪੈ ਜਾਵੇ, ਉਹਨਾਂ ਇੱਕ ਅਜਿਹੀ ਤਰਕੀਬ ਨੂੰ ਅੰਜਾਮ ਦੇਣ ਦਾ ਤਾਣਾ ਬਾਣਾ ਬੁਣ ਲਿਆ, ਜੋ ਕੌਮਾਂਤਰੀ ਪ੍ਰਸਿੱਧੀ ਪ੍ਰਾਪਤ ਨਟਵਰ ਲਾਲ ਦੀਆਂ ਚਾਲਾਂ ਨੂੰ ਵੀ ਮਾਤ ਪਾ ਗਿਆ। ਦੇਰ ਸਾਮ ਇਹ ਐਲਾਨ ਕਰਦਿਆਂ ਕਿ 7654 ਅਸਾਮੀਆਂ ਦੀ ਨਿਯੁਕਤੀ ਦੀ ਸੂਚੀ ਤਿਆਰ ਹੋ ਚੁੱਕੀ ਹੈ, ਇਸ ਲਈ ਉਹ ਸੰਕੇਤਕ ਤੌਰ ਤੇ ਚਾਰ Àਮੀਦਵਾਰਾਂ ਲਈ ਨਿਯੁਕਤੀ ਪੱਤਰ ਜਾਰੀ ਕਰਨ ਨੂੰ ਤਿਆਰ ਹਨ। ਵਕਤਾਂ ਦੇ ਮਾਰੇ ਵਿਚਾਰੇ ਅਧਿਆਪਕ ਸਰਕਾਰੀ ਅਹਿਲਕਾਰਾਂ ਦੇ ਵਚਨ ਨੂੰ ਸੱਚ ਸਮਝ ਬੇਠੇ ਤੇ ਨਿਯੁਕਤੀ ਪੱਤਰ ਹਾਸਲ ਕਰਨ ਉਪਰੰਤ ਟੈਂਕੀ ਤੋਂ ਨੀਚੇ ਉਤਰਨ ਲਈ ਸਹਿਮਤ ਹੋ ਗਏ। ਮੌਕੇ ਤੇ ਮੌਜੂਦ ਸਿੱਖਿਆ ਵਿਭਾਗ ਦੇ ਡੀ ਪੀ ਆਈ ਸ੍ਰੀ ਸਾਧੂ ਸਿੰਘ ਰੰਧਾਵਾ ਨੇ ਅਡੀਸਨਲ ਸਕੱਤਰ ਸਕੂਲ ਐਜੂਕੇਸਨ ਦੀ ਸਹੀ ਵਾਲੇ ਚਾਰ ਅਜਿਹੇ ਨਿਯੁਕਤੀ ਪੱਤਰ ਅੰਦੋਲਨਕਾਰੀਆਂ ਨੂੰ ਸੌਂਪ ਦਿੱਤੇ, ਜੋ ਪਰਵਿੰਦਰ ਕੌਰ, ਅਸਤਿੰਦਰਪਾਲ, ਸੁਮਨ ਬਾਲਾ ਅਤੇ ਸੁਸਮਾ ਕਾਹਲੋਂ ਦੇ ਨਾਂ ਸਨ। ਨਾਲ ਹੀ ਉਹਨਾਂ ਇਹ ਭਰੋਸਾ ਵੀ ਦਿਵਾ ਦਿੱਤਾ ਕਿ ਬਾਕੀ ਉਮੀਦਵਾਰ ਆਪੋ ਆਪਣੇ ਨਿਯੁਕਤੀ ਪੱਤਰ ਸਿੱਖਿਆ ਵਿਭਾਗ ਤੋਂ ਪ੍ਰਾਪਤ ਕਰ ਸਕਦੇ ਹਨ। ਝਾਂਸੇ ਵਿੱਚ ਆਏ ਬੇਰੁਜਗਾਰ ਅਧਿਆਪਕ ਟੈਂਕੀ ਤੋਂ ਉਤਰ ਕੇ ਘਰੋ ਘਰੀਂ ਚਲੇ ਗਏ, ਤੇ ਖਟਕੜ ਕਲਾਂ ਦੀ ਸਰਕਾਰੀ ਰੈਲੀ ਵੀ ਅਗਲੇ ਦਿਨ ਨਿਰਵਿਘਨ ਨੇਪਰੇ ਚੜ੍ਹ ਗਈ। ਇੱਕ ਜੁਮੇਵਾਰ ਅਧਿਕਾਰੀ ਦੀ ਸਹੀ ਵਾਲੇ ਨਿਯੁਕਤੀ ਪੱਤਰਾਂ ਦੀ 7654 ਬੇਰੁਜਗਾਰ ਅਧਿਆਪਕ ਜਥੇਬੰਦੀ ਨੇ ਜਦ ਤਸਦੀਕ ਕੀਤੀ ਤਾਂ ਉਹ ਇਹ ਦੇਖ ਕੇ ਹੱਕੇ ਬੱਕੇ ਰਹਿ ਗਏ, ਕਿ ਸਿੱਖਿਆ ਵਿਭਾਗ ਦੇ ਡੀ ਪੀ ਆਈ ਨੇ ਜੋ ਦਸਤਾਵੇਜ ਉਹਨਾਂ ਨੂੰ ਦਿੱਤੇ, ਉਹਨਾਂ ਦੀ ਕੀਮਤ ਰੱਦੀ ਦੇ ਕਾਗਜ ਤੋਂ ਵੱਧ ਕੁਝ ਵੀ ਨਹੀਂ, ਕਿਉਂਕਿ ਪਰਵਿੰਦਰ ਕੌਰ, ਅਸਤਿੰਦਰਪਾਲ ਅਤੇ ਸੁਮਨ ਬਾਲਾ ਨਾਂ ਦਾ ਤਾਂ ਕੋਈ ਪ੍ਰਾਰਥੀ ਹੀ ਨਹੀਂ ਹੈ, ਜਦ ਕਿ ਸੁਸਮਾ ਕਾਹਲੋਂ ਨੂੰ ਜੋ ਪੱਤਰ ਦਿੱਤਾ ਗਿਆ ਹੈ, ਉਸ ਉਪਰ ਡਿਸਪੈਚ ਨੰਬਰ ਹੀ ਨਹੀਂ ਲੱਗਿਆ। ਇਸ ਕਾਰਵਾਈ ਨੂੰ ਕੌਮ ਦਾ ਨਿਰਮਾਣ ਸਮਝੇ ਜਾਂਦੇ ਅਧਿਆਪਕਾਂ ਨਾਲ ਇੱਕ ਫਰੇਬ ਕਰਾਰ ਦਿੰਦਿਆਂ ਜਥੇਬੰਦੀ ਦੇ ਆਗੂਆਂ ਨੇ ਦੋਸ਼ ਲਾਇਆ ਕਿ ਅਜਿਹਾ ਕਰਦਿਆਂ ਅਧਿਕਾਰੀਆਂ ਨੇ ਇੱਕ ਗੰਭੀਰ ਅਪਰਾਧ ਨੂੰ ਅੰਜਾਮ ਦਿੱਤਾ ਹੈ, ਇਸ ਲਈ ਉਹਨਾਂ ਵਿਰੁੱਧ ਭਾਰਤੀ ਦੰਡਾਵਲੀ ਦੀ ਧਾਰਾ 420, 467, 468, 471 ਅਤੇ 120 ਬੀ ਆਦਿ ਤਹਿਤ ਮੁਕੱਦਮਾ ਦਰਜ ਕਰਕੇ ਤੁਰੰਤ ਗਿਰਫਤਾਰ ਕੀਤਾ ਜਾਵੇ। ਜਿਕਰਯੋਗ ਹੈ ਕਿ ਅਜਿਹੀਆਂ ਧਰਾਵਾਂ ਅਧੀਨ ਸੱਤ ਸਾਲ ਤੱਕ ਦੀ ਕੈਦ ਹੋ ਸਕਦੀ ਹੈ। ਦੂਜੇ ਪਾਸੇ ਜਥੇਬੰਦੀ ਦੇ ਪ੍ਰਧਾਨ ਗੁਰਬਿੰਦਰ ਸਿੰਘ ਰਤਨ, ਜੀਵਨ ਸਿੰਘ, ਰਾਜਬੀਰ ਕੌਰ ਆਦਿ ਆਗੂਆਂ ਨੇ ਕਿਹਾ ਕਿ ਉਹ ਉਦੋਂ ਤੱਕ ਸਿੱਧੇ ਐਕਸਨ ਰਾਹੀਂ ਸਿੱਖਿਆ ਮੰਤਰੀ ਨੂੰ ਉਹਨਾਂ ਦੇ ਦੌਰਿਆਂ ਦੌਰਾਨ ਵੱਖ ਵੱਖ ਥਾਵਾਂ ਤੇ ਘੇਰਨ ਦਾ ਅਮਲ ਜਾਰੀ ਰੱਖਣਗੇ, ਜਦ ਤੱਕ ਨਿਯੁਕਤੀ ਪੱਤਰ ਜਾਰੀ ਨਹੀਂ ਕੀਤੇ ਜਾਂਦੇ। ਉਹਨਾਂ ਇਹ ਵੀ ਦੋਸ਼ ਲਾਇਆ ਕਿ ਦੇਰੀ ਦਾ ਮੁੱਖ ਕਾਰਨ ਸਿਰਫ ਤੇ ਸਿਰਫ ਦੌਲਤ ਬਟੋਰਨ ਤੱਕ ਹੀ ਸੀਮਤ ਹੈ।

ਸਿਆਸੀ ਮਦਾਰੀ, ਨੀਲੇ ਚਿੱਟੇ ਵਾਰੋ ਵਾਰੀ

ਪੰਜਾਬ ਦੇ ਨੇਤਾ ਲੋਕਾਂ ਨੂੰ ਹੁਣ ਕੌਣ ਸੁਣਦਾ ਹੈ ! ਘਸੇ ਪਿਟੇ ਭਾਸ਼ਨ ਤੇ ਲੱਛੇਦਾਰ ਗੱਲਾਂ। ਇਨ•ਾਂ ਤੋਂ ਲੋਕ ਉਕਤਾ ਗਏ ਹਨ। ਸਿਆਸੀ ਗੱਪਾਂ ਸੁਣ ਸੁਣ ਕੇ ਲੋਕ ਅੱਕੇ ਪਏ ਹਨ। ਵਰਿ•ਆਂ ਪੁਰਾਣੇ ਲਾਰੇ ਤੇ ਇਨ•ਾਂ ਲਾਰਿਆਂ ਤੋਂ ਲੰਮੇ ਵਾਅਦੇ। ਕੌਣ ਯਕੀਨ ਕਰੇ। ਕਰੇ ਵੀ ਕਿਉਂ। ਆਖਰ ਇਹ ਨੇਤਾ ਲੋਕ ਕਦੋਂ ਤੱਕ ਗੋਲ
ਮੋਲ ਗੱਲਾਂ ਨਾਲ ਆਪਣਾ ਸਿਆਸੀ ਮਾਲ ਵੇਚੀ ਜਾਣਗੇ। ਕੋਈ ਵੇਲਾ ਸੀ ਜਦੋਂ ਕਿਰਦਾਰ ਵਾਲੇ ਲੀਡਰ ਲੱਭ ਜਾਂਦੇ ਸਨ। ਹੁਣ ਨਾ ਉਹ ਨੇਤਾ ਰਹੇ ਹਨ ਤੇ ਨਾ ਉਹ ਕਿਰਦਾਰ। ਅੱਜ ਦੇ ਲੀਡਰ, ਉਨ•ਾਂ ਦੇ ਭਾਸ਼ਨ ! ਬੱਸ ਤੌਬਾ ਹੀ ਤੌਬਾ ਹੈ ! ਇਹ ਲੀਡਰ ਲੋਕ ਖੁਦ ਹੀ ਜ਼ਿੰਮੇਵਾਰ ਹਨ। ਲੋਕਾਂ ਦਾ ਕੀ ਕਸੂਰ ਹੈ। ਲੋਕ ਤਾਂ ਲੰਮੇ ਸਮੇਂ ਤੋਂ ਸ਼ਾਂਤ ਚਿੱਤ ਇਨ•ਾਂ ਲੀਡਰਾਂ ਦੇ ਭਾਸ਼ਨ ਸੁਣਦੇ ਰਹੇ ਹਨ। ਹਰ ਗੱਲ ਦੀ ਹੱਦ ਹੁੰਦੀ ਹੈ। ਇਸੇ ਤਰ•ਾਂ ਲੀਡਰਾਂ ਦੇ ਭਾਸ਼ਨਾਂ ਦੀ ਵੀ ਹੱਦ ਹੋ ਗਈ ਹੈ। ਸਿਆਸੀ ਧਿਰ ਕੋਈ ਵੀ ਹੈ, ਉਸ ਦੇ ਟਾਵੇਂ ਲੀਡਰ ਹਨ ਜਿਨ•ਾਂ ਦੇ ਭਾਸ਼ਨਾਂ 'ਚ ਦਮ ਹੁੰਦਾ ਹੈ। ਨਹੀਂ ਤਾਂ ਬਹੁਗਿਣਤੀ ਨੇਤਾ ਲੋਕ ਆਪਣੇ ਭਾਸ਼ਨਾਂ ਸਹਾਰੇ ਆਪਣਾ ਸਮਾਂ ਲੰਘਾ ਜਾਂਦੇ ਹਨ। ਜਨਤਾ ਦੇ ਹੱਥ ਹਮੇਸ਼ਾਂ ਖਾਲੀ ਰਹੇ ਹਨ।
ਗੱਲ ਹੁਣ ਗੁੱਝੀ ਨਹੀਂ ਰਹੀ। ਵੋਟ ਪਾਉਣਾ ਮਜਬੂਰੀ ਹੈ ਪ੍ਰੰਤੂ ਲੋਕਾਂ ਦੀਆਂ ਨਜ਼ਰਾਂ 'ਚ ਤਾਂ ਇਹ ਲੀਡਰ ਕਦੋਂ ਦੇ ਡਿੱਗ ਚੁੱਕੇ ਹਨ। ਪੰਜਾਬ ਦੀ ਮੌਜੂਦਾ ਸਿਆਸਤ ਤਾਂ ਮਦਾਰੀ ਦੇ ਇੱਕ ਤਮਾਸ਼ੇ ਵਰਗੀ ਬਣ ਗਈ ਹੈ। ਹਰ ਸਿਆਸੀ ਧਿਰ ਦਾ ਨੇਤਾ ਹੁਣ ਲੋਕਾਂ ਨੂੰ ਮੰਤਰ ਮੁਗਧ ਕਰਨ ਲਈ ਨਵੇਂ ਨਵੇਂ ਸ਼ਬਦਾਂ ਦੇ ਤੀਰ ਚਲਾਉਂਦਾ ਹੈ। ਸ਼ਬਦਾਂਵਲੀ 'ਚ ਏਨਾ ਨਿਘਾਰ ਆ ਗਿਆ ਹੈ ਕਿ ਵਿਰੋਧੀ ਨੂੰ ਚਿੱਤ ਕਰਨ ਵੇਲੇ ਲੀਡਰ ਇਹ ਵੀ ਭੁੱਲ ਜਾਂਦੇ ਹਨ ਕਿ ਪੰਜਾਬ ਧੀਆਂ ਭੈਣਾਂ ਵਾਲਾ ਹੈ। ਕੈਪਟਨ ਅਮਰਿੰਦਰ ਸਿੰਘ ਆਪਣੀ ਵਿਰੋਧੀ ਨੂੰ ਭਾਸ਼ਨਾਂ ਵਿੱਚ ਕੁੱਤੇ ਬਿੱਲਿਆਂ ਵਾਲਾ ਤੱਕ ਦਾ ਦਰਜਾ ਦਿੰਦੇ ਰਹੇ ਹਨ ਤੇ ਉਧਰ ਅਗਲੇ ਕਿਹੜਾ ਘੱਟ ਗੁਜ਼ਾਰਦੇ ਹਨ। ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਤਾਂ ਆਪਣਾ ਭਾਸ਼ਨ ਸ਼ੁਰੂ ਹੀ ਕੈਪਟਨ ਦੇ ਚਰਿੱਤਰ ਤੋਂ ਕਰਦੇ ਰਹੇ ਹਨ। ਜਦੋਂ ਚੋਣਾਂ ਨੇੜੇ ਹੋਣ ਤਾਂ ਫਿਰ ਇਹ ਨੇਤਾ ਲੋਕ ਭੰਡਾਂ ਨੂੰ ਵੀ ਮਾਤ ਪਾ ਦਿੰਦੇ ਹਨ। ਕੀ ਪੰਜਾਬ ਦੀ ਲੋਕ ਆਪਣੇ ਪ੍ਰਤੀਨਿਧਾਂ ਨੂੰ ਤਮਾਸ਼ੇ ਕਰਨ ਲਈ ਚੁਣਦੇ ਹਨ?
ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਆਪਣੇ ਭਾਸ਼ਨ ਨੂੰ ਹਲਕਾ ਫੁਲਕਾ ਕਰਨ ਵਾਸਤੇ ਕੋਈ ਨਾ ਕੋਈ ਚੁਟਕਲਾ ਛੱਡ ਦਿੰਦੇ ਹਨ। ਚੁਟਕਲੇ ਸੁਣਾ ਸੁਣਾ ਕੇ ਚੌਥੀ ਦਫ਼ਾ ਮੁੱਖ ਮੰਤਰੀ ਬਣ ਗਏ ਹਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਤਾਕਤ ਦੇ ਨਸ਼ੇ 'ਚ ਕਈ ਦਫ਼ਾ ਇਹ ਭੁੱਲ ਜਾਂਦੇ ਹਨ ਕਿ ਪਿਛਲੇ ਦਿਨ ਉਨ•ਾਂ ਨੇ ਕੀ ਬਿਆਨ ਦਿੱਤਾ ਸੀ। ਉਹ ਪਿਛਲੇ ਤਿੰਨ ਸਾਲਾਂ 'ਚ ਕਰੀਬ ਇੱਕ ਦਰਜਨ ਸ਼ਹਿਰਾਂ ਨੂੰ 'ਕੈਲੀਫੋਰਨੀਆ' ਬਣਾਉਣ ਦਾ ਐਲਾਨ ਕਰ ਚੁੱਕੇ ਹਨ। ਇਨ•ਾਂ 'ਚ ਬਠਿੰਡਾ ਵੀ ਸ਼ਾਮਲ ਹੈ। ਇਸ ਤੋਂ ਵੀ ਵੱਧ ਕੇ ਪੰਜਾਬ ਦੇ ਡੇਢ ਦਰਜ਼ਨ ਸ਼ਹਿਰਾਂ ਵਾਰੇ ਇਹ ਆਖ ਚੁੱਕੇ ਹਨ ਕਿ ਉਹ 'ਫਲਾਣੇ' ਸ਼ਹਿਰ ਨੂੰ ਪੰਜਾਬ ਦਾ ਨੰਬਰ ਵਨ ਸ਼ਹਿਰ ਬਣਾਉਣਗੇ। ਲੋਕ ਆਖਦੇ ਹਨ ਕਿ ਸ਼ਹਿਰ ਨੂੰ ਸ਼ਹਿਰ ਹੀ ਬਣਾ ਦਿਓ,ਹੋਰ ਕੁਝ ਨਹੀਂ ਮੰਗਦੇ। ਉਪ ਮੁੱਖ ਮੰਤਰੀ ਭਾਸ਼ਨ ਕਰਦੇ ਵੇਲੇ ਪੰਜਾਬ ਨੂੰ ਬਿਜਲੀ 'ਚ ਸਰਪਲੱਸ ਸੂਬਾ ਬਣਾਏ ਜਾਣ ਦੀ ਗੱਲ ਏਨੀ ਜ਼ੋਰ ਦੀ ਕਰਦੇ ਹਨ ਕਿ ਉਨ•ਾਂ ਦੀਆਂ ਅੱਖਾਂ ਬੰਦ ਹੋ ਜਾਂਦੀਆਂ ਹਨ। ਪੰਡਾਲ 'ਚ ਬੈਠੀ ਜਨਤਾ ਨੂੰ ਲੱਗਦੈ ਹੈ ਕਿ ਜਦੋਂ ਸੁਖਬੀਰ ਜੀ ਹੁਣ ਅੱਖਾਂ ਖੋਲ•ਣਗੇ ਤਾਂ ਪੂਰਾ ਪੰਜਾਬ ਜਗਮਗ ਕਰ ਰਿਹਾ ਹੋਵੇਗਾ।
ਪਿਛਲੀ ਸਰਕਾਰ ਵੇਲੇ ਤਤਕਾਲੀ ਵਿੱਤ ਮੰਤਰੀ ਸੁਰਿੰਦਰ ਸਿੰਗਲਾ ਬਠਿੰਡਾ ਨੂੰ 'ਪੈਰਿਸ' ਬਣਾਉਣ ਦੀ ਗੱਲ ਕਰਦੇ ਸਨ। ਸ਼ੁਕਰ ਹੈ ਕਿ ਬੀਬੀ ਹਰਸਿਮਰਤ ਕੌਰ ਨੇ ਅਜਿਹਾ ਕੋਈ ਐਲਾਨ ਨਹੀਂ ਕੀਤਾ। ਸਿੰਗਲਾ ਜੀ ਤਾਂ ਬਹੁਤਾ ਸਮਾਂ ਇਸੇ ਚੱਕਰ 'ਚ ਲੰਘਾ ਗਏ ਕਿ 'ਰਿਫਾਈਨਰੀ ਕਾਂਗਰਸ ਨੇ ਲਿਆਂਦੀ, ਬਾਦਲਾਂ ਨੇ ਨਹੀਂ।'
ਸੁਰਿੰਦਰ ਸਿੰਗਲਾ ਜਿਨ•ਾਂ ਸਮਾਂ ਤਾਕਤ 'ਚ ਰਹੇ, ਉਹ ਬਾਦਲਾਂ ਖਿਲਾਫ ਬੜੀ ਉੱਚੀ ਬੋਲ ਕੇ ਭੜਾਸ ਕੱਢਦੇ ਰਹੇ। ਜਦੋਂ ਸਰਕਾਰ ਬਦਲੀ ਤਾਂ ਸਿੰਗਲਾ ਦੇ ਮੂੰਹੋਂ ਕਦੇ ਬਾਦਲਾਂ ਖਿਲਾਫ ਕੋਈ ਮਾੜਾ ਲਫਜ਼ ਨਹੀਂ ਸੁਣਿਆ। ਹੁਣ ਲੋਕ ਆਖਦੇ ਹਨ ਕਿ ਸਿੰਗਲਾ ਡਰਨ ਵਾਲੇ ਤਾਂ ਲੱਗਦੇ ਨਹੀਂ ਸਨ।' ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਬਾਦਲ ਪਰਿਵਾਰ ਖਿਲਾਫ ਸੂਈ ਰੱਖ ਰੱਖ ਕੇ ਲੋਕਾਂ 'ਚ ਮਕਬੂਲ ਹੋ ਗਏ ਹਨ। 'ਆਮ ਆਦਮੀ' ਲਈ ਕੀਤਾ ਕੈਪਟਨ ਨੇ ਵੀ ਕੁਝ ਨਹੀਂ। ਬੱਸ ਉਨ•ਾਂ ਨੇ ਇੱਕ ਨਵੇਂ ਤਮਾਸ਼ੇ ਦੀ ਸ਼ੁਰੂਆਤ ਕਰ ਦਿੱਤੀ। ਲੋਕ ਮਸਲੇ ਢੱਠੇ ਖੂਹ 'ਚ ਪੈਣ,ਪੰਜਾਬ ਦੇ ਕੈਪਟਨ ਤੇ ਬਾਦਲ ਪਰਿਵਾਰ ਨੇ ਲੋਕਾਂ ਨੂੰ ਇੱਕ ਨਵਾਂ ਤਮਾਸ਼ਾ ਦਿਖਾਉਣਾ ਸ਼ੁਰੂ ਕਰ ਦਿੱਤਾ। ਕੈਪਟਨ ਨੇ ਬਾਦਲਾਂ ਨੂੰ ਅੰਦਰ ਕਰ ਦਿੱਤਾ ਤੇ ਹੁਣ ਬਾਦਲਾਂ ਨੇ ਕੈਪਟਨ ਦੇ ਕਚਹਿਰੀ ਦੇ ਚੱਕਰ ਲਗਵਾ ਦਿੱਤੇ। ਹੁਣ ਬਾਦਲਾਂ ਖਿਲਾਫ ਭੁਗਤੇ ਗਵਾਹ ਕਚਹਿਰੀ 'ਚ ਮੁਕਰ ਰਹੇ ਹਨ ਤੇ ਦੇਰ ਸਵੇਰ ਕੈਪਟਨ ਖਿਲਾਫ ਖੜੇ ਗਵਾਹ ਵੀ ਬੈਠ ਜਾਣਗੇ। ਇਸ ਤਮਾਸ਼ੇ 'ਚ ਆਮ ਲੋਕਾਂ ਦੇ ਟੈਕਸਾਂ ਤੋਂ ਇਕੱਠੇ ਹੋਏ ਪੈਸਾ ਨੂੰ ਬਰਬਾਦ ਕਿਉਂ ਕੀਤਾ ਗਿਆ। ਵਿਜੀਲੈਂਸ ਕਿਉਂ ਕੁਰੱਪਸ਼ਨ ਕੇਸਾਂ ਦੇ ਨਾਮ ਫੰਡ ਖਰਚਦੀ ਰਹੀ। ਨੇਤਾ ਥੋੜੇ ਸਮਝਣ ਕਿਉਂਕਿ ਲੋਕ 'ਡਰਾਮੇ' ਦੀ ਭਾਸ਼ਾ ਜਾਣਦੇ ਹਨ।
ਜਨਤਾ ਕੋਈ ਮਦਾਰੀ ਦਾ ਜਮੂਰਾ ਨਹੀਂ। ਇਹੋ ਜਨਤਾ ਇੱਕ ਦਿਨ ਲੀਡਰਾਂ ਦੇ ਖੇਡੇ 'ਤੇ ਤਾੜੀ ਨਹੀਂ ਮਾਰੇਗੀ ਬਲਕਿ ਤਮਾਚਾ ਮਾਰੇਗੀ। ਇਨ•ਾਂ ਲੀਡਰਾਂ ਨੇ ਪਿੰਡਾਂ ਦੇ ਪਿੰਡ ਬਿਪਤਾ 'ਚ ਫਸਾ ਦਿੱਤੇ ਹਨ। ਲੰਘੀ ਲੋਕ ਸਭਾ ਚੋਣ 'ਚ ਯੁਵਰਾਜ ਰਣਇੰਦਰ ਸਿੰਘ ਜਿਸ ਪਿੰਡ 'ਚ ਗਏ, ਉਥੇ ਭੋਲੇ ਭਾਲੇ ਵਰਕਰਾਂ ਨੂੰ ਉਤਜਿਤ ਕਰਦੇ ਰਹੇ,' ਤੁਸੀਂ ਪਾਰਟੀ ਦੇ ਯੋਧੇ ਹੋ, ਬਾਦਲਾਂ ਤੋਂ 'ਕੱਲੇ ਕੱਲੇ ਦਾ ਬਦਲਾ ਲਵਾਂਗੇ, ਤੁਸੀਂ ਡਟ ਕੇ ਮੁਕਾਬਲਾ ਕਰੋ।' ਰਣਇੰਦਰ ਆਖਦੇ ਸਨ ਕਿ ਉਹ ਵਰਕਰਾਂ ਖਿਲਾਫ ਜ਼ਿਆਦਤੀ ਨਹੀਂ ਝੱਲਣਗੇ, ਖੁਦ ਧਰਨਿਆਂ 'ਤੇ ਬੈਠਣਗੇ। ਦੂਸਰੀ ਤਰਫ ਇਹੋ ਬੋਲੀ ਸੁਖਬੀਰ ਬਾਦਲ ਬੋਲਦੇ ਰਹੇ। ਚੋਣਾਂ ਖਤਮ ਹੋਈਆ। ਕੈਪਟਨ ਦਾ ਲੜਕਾ ਹੁਣ ਕਿਧਰੋਂ ਲੱਭਿਆ ਨਹੀਂ ਲੱਭਦਾ। ਬਠਿੰਡਾ ਜ਼ਿਲੇ ਦੇ ਪਿੰਡ ਰਾਏਕੇ ਦੇ ਲੋਕ ਇਨ•ਾਂ ਭਾਸ਼ਨਾਂ ਦੀ ਸਿਆਸਤ ਨੂੰ ਸਮਝ ਨਹੀਂ ਸਕੇ ਅਤੇ ਆਪਸ 'ਚ ਭਿੜ ਬੈਠੇ। ਸੈਂਕੜੇ ਕਾਂਗਰਸੀ ਵਰਕਰਾਂ 'ਤੇ ਪਰਚੇ ਦਰਜ ਹੋ ਗਏ। ਕੋਈ ਜੇਲ• ਚਲਾ ਗਿਆ ਤੇ ਕੋਈ ਕਚਹਿਰੀ 'ਚ ਤਰੀਕਾਂ ਭੁਗਤ ਰਿਹੈ। ਪਿੰਡ ਵਾਲਿਆਂ ਦੀ ਉਸੇ ਰਣਇੰਦਰ ਨੇ ਮੁੜ ਬਾਤ ਨਹੀਂ ਪੁੱਛੀ। ਲੀਡਰ ਭੋਲੇ ਭਾਲੇ ਲੋਕਾਂ ਨੂੰ ਆਪਸ 'ਚ ਲੜਾ ਕੇ ਗਾਇਬ ਹੋ ਜਾਂਦੇ ਹਨ ਤੇ ਲੋਕ ਆਪਸ 'ਚ ਲਾਈਨਾਂ ਖਿੱਚ ਲੈਂਦੇ ਹਨ। ਇਹੋ ਹਾਲ ਦੇਰ ਸਵੇਰ ਅਕਾਲੀਆਂ ਨਾਲ ਵੀ ਹੋਏਗਾ। ਨੁਕਸਾਨ ਆਮ ਲੋਕਾਂ ਦਾ ਹੁੰਦਾ ਹੈ। ਪਿੰਡਾਂ ਦੇ ਸਰਪੰਚਾਂ ਦਾ ਹਾਲ ਦੇਖ ਲਵੋਂ। ਇਹ ਲੀਡਰ ਲੋਕ ਪਿੰਡਾਂ ਦੇ ਸਰਪੰਚਾਂ ਨੂੰ 'ਫੌਕੀ ਟੌਹਰ' 'ਚ ਫਸਾ ਕੇ ਏਨਾ ਮੰਤਰ ਮੁਗਧ ਕਰ ਦਿੰਦੇ ਹਨ ਕਿ ਉਨ•ਾਂ ਨੂੰ ਕੁਝ ਪਤਾ ਹੀ ਨਹੀਂ ਲੱਗਦਾ। ਵੋਟਾਂ ਦੀ ਸਿਆਸਤ 'ਚ ਫਿਰ ਜ਼ਮੀਨ ਸਰਪੰਚ ਦੀ ਵਿਕਦੀ ਹੈ, ਕਰਜ਼ਾਈ ਸਰਪੰਚ ਹੁੰਦਾ ਹੈ, ਲੀਡਰ ਕਦੇ ਕਰਜ਼ਾਈ ਨਹੀਂ ਹੁੰਦਾ। ਮਾਲਵੇ ਦੇ ਕਿੰਨੇ ਹੀ ਸਰਪੰਚ ਇਸੇ ਸਿਆਸਤ ਨੇ ਜ਼ਮੀਨਾਂ ਤੋਂ ਵਿਰਵੇ ਕਰ ਦਿੱਤੇ ਹਨ।
ਪੰਜਾਬ 'ਚ ਇੱਕ ਨਵਾਂ ਰਿਵਾਜ ਪੈ ਗਿਆ ਹੈ। ਜਦੋਂ ਕੋਈ ਚੋਣ ਨੇੜੇ ਆਉਂਦੀ ਹੈ ਤਾਂ ਪ੍ਰਮੁੱਖ ਧਿਰਾਂ ਵਲੋਂ ਲੋਕਾਂ ਦੇ ਇਕੱਠ ਕਰਨੇ ਸ਼ੁਰੂ ਕਰ ਦਿੱਤੇ ਜਾਂਦੇ ਹਨ। ਕਾਂਗਰਸ ਵਾਲੇ ਰੈਲੀ ਕਰਦੇ ਹਨ ਤਾਂ ਅਕਾਲੀ ਦਲ ਵਾਲੇ ਰੈਲਾ ਕਰ ਦਿੰਦੇ ਹਨ। ਕੋਈ ਰੈਲੀ ਕਰੇ ਚਾਹੇ ਰੈਲਾ, ਲੋਕਾਂ ਨੂੰ ਕੀ ਫਰਕ ਪੈਣ ਲੱਗਾ ਹੈ। ਘਾਹੀਆਂ ਦੇ ਪੁੱਤਾਂ ਨੇ ਤਾਂ ਘਾਹ ਹੀ ਖੋਤਣਾ ਹੈ। ਕਿਸੇ ਨਾ ਕਿਸੇ ਮਜਬੂਰੀ 'ਚ ਬੱਝੀ ਜਨਤਾ ਤਾਂ ਭੇਡਾਂ ਬੱਕਰੀਆਂ ਵਾਂਗੂ ਟਰੱਕਾਂ ਦੇ ਡਾਲਿਆਂ 'ਤੇ ਬੈਠ ਕੇ ਕਦੇ ਕਿਸੇ ਸਿਆਸੀ ਮਦਾਰੀ ਦਾ ਤਮਾਸ਼ਾ ਦੇਖਣ ਲਈ ਚਾਲੇ ਪਾਉਂਦੀ ਹੈ ਤੇ ਕਦੇ ਕਿਸੇ ਦਾ। ਟਰੱਕਾਂ 'ਤੇ ਲਿਜਾਣ ਵਾਲੇ ਬੱਸ ਸ਼ਾਮ ਵੇਲੇ ਜਨਤਾ ਨੂੰ ਖੁਸ਼ ਕਰਨ ਲਈ ਤੁਪਕਾ ਪਿਲਾ ਦਿੰਦੇ ਹਨ। ਕਈਆਂ ਦੇ ਤਾਂ ਟਰੱਕਾਂ ਨੇ ਪਾਸੇ ਭੰਨੇ ਪਏ ਹਨ। ਰੈਲੀਆਂ 'ਤੇ ਜਾ ਜਾ ਕੇ ਉਹ ਥੱਕ ਚੁੱਕੇ ਹਨ। ਪਹਿਲਾਂ ਵੀ ਘੱਟਾ ਢੋਂਹਦੇ ਸਨ ਤੇ ਹੁਣ ਵੀ। ਖੱਟਣ ਵਾਲੇ ਖੱਟ ਜਾਂਦੇ ਹਨ। ਤਾਹਿਓ ਤਾਂ ਉਨ•ਾਂ ਨੂੰ ਮਦਾਰੀ ਕਿਹਾ ਜਾਂਦੈ ਹੈ। ਸਿਆਸੀ ਮਦਾਰੀ। ਗੱਲ ਭਾਸ਼ਨ ਤੋਂ ਸ਼ੁਰੂ ਕੀਤੀ ਸੀ ਕਿ ਲੀਡਰਾਂ ਦੇ ਭਾਸ਼ਨ ਹੁਣ ਕੋਈ ਨਹੀਂ ਸੁਣਦਾ। ਇਸ ਵਜੋਂ ਲੀਡਰਾਂ ਨੂੰ ਹੁਣ ਆਪਣੇ ਭਾਸ਼ਨ ਸੁਣਾਉਣ ਲਈ ਵੀ ਤਰ•ਾਂ ਤਰ•ਾਂ ਦੇ ਪਾਪੜ ਵੇਲਣੇ ਪੈਂਦੇ ਹਨ। ਗੱਲ ਇੱਥੋਂ ਤੱਕ ਵੱਧ ਗਈ ਹੈ ਕਿ ਲੀਡਰ ਲੋਕਾਂ ਨੂੰ ਆਪਣੇ ਭਾਸ਼ਨ ਸੁਣਾਉਣ ਲਈ ਝੁਮਕਿਆਂ ਵਾਲੀਆਂ ਬੀਬੀਆਂ ਦਾ ਸਹਾਰਾ ਲੈਣਾ ਪੈਂਦਾ ਹੈ।
ਪੰਜਾਬ ਦੇ ਸਿੰਘਾਸਨ 'ਤੇ ਕੋਈ ਵੀ ਸਿਆਸੀ ਧਿਰ ਬੈਠੀ, ਉਸ ਨੇ ਆਪਣੇ ਫੋਕੇ ਭਾਸ਼ਨ ਲੋਕਾਂ ਨੂੰ ਸੁਣਾਉਣ ਲਈ ਸਰਕਾਰੀ ਖਜ਼ਾਨੇ ਨੂੰ ਦੋਹੇਂ ਹੱਥੀਂ ਵਰਤਿਆ। ਪੰਜਾਬ ਸਰਕਾਰ ਦੇ ਵਜ਼ੀਰ ਤੇ ਇੱਥੋਂ ਤੱਕ ਕਿ ਮੁੱਖ ਮੰਤਰੀ ਵੀ ਭਰਵੇਂ ਇਕੱਠ ਕਰਨ ਲਈ ਮਹਿੰਗੇ ਕਲਾਕਾਰਾਂ ਨੂੰ ਗੱਫੇ ਵੰਡਦੇ ਰਹੇ ਹਨ। ਇਨ•ਾਂ ਕਲਾਕਾਰ ਨੂੰ ਸੁਣਨ ਲਈ ਜਦੋਂ ਲੋਕ ਇਕੱਠੇ ਹੋ ਜਾਂਦੇ ਹਨ ਤਾਂ ਨੇਤਾ ਲੋਕ ਆਪਣੀ ਭੜਾਸ ਕੱਢ ਜਾਂਦੇ ਹਨ। ਜਿੱਡੀ ਵੱਡੀ ਰੈਲੀ, ਓਨਾ ਵੱਡਾ ਕਲਾਕਾਰ। ਇਨ•ਾਂ ਕਲਾਕਾਰਾਂ ਨੂੰ ਪੰਜਾਬ ਸਰਕਾਰ ਦੇ ਸਰਕਾਰੀ ਖਜ਼ਾਨੇ ਚੋਂ ਰਾਸ਼ੀ ਦਿੱਤੀ ਜਾਂਦੀ ਹੈ। ਵਿਰੋਧੀ ਧਿਰ ਇੱਧਰੋਂ ਉਧਰੋਂ ਰਾਸ਼ੀ ਦਾ ਇੰਤਜਾਮ ਕਰਦੀ ਹੈ। ਲੋਕ ਭਲਾਈ ਪਾਰਟੀ ਦੇ ਕੌਮੀ ਪ੍ਰਧਾਨ ਅਤੇ ਸਾਬਕਾ ਕੇਂਦਰੀ ਮੰਤਰੀ ਬਲਵੰਤ ਸਿੰਘ ਰਾਮੂਵਾਲੀਆਂ ਨਾਲ ਲੋਕ ਗਾਇਕ ਹਰਭਜਨ ਮਾਨ ਅਤੇ ਗਾਇਕ ਹਰਦੇਵ ਮਾਹੀਨੰਗਲ ਵੀ ਜੁੜੇ ਰਹੇ ਹਨ। ਕਿਹਾ ਇਹ ਵੀ ਜਾਂਦਾ ਹੈ ਕਿ ਰਾਮੂਵਾਲੀਆ ਤਾਂ ਖੁਦ ਹੀ ਮਹਿਫਿਲ ਜਮਾ ਦਿੰਦੇ ਹਨ ਤੇ ਕਲਾਕਾਰਾਂ ਦੀ ਲੋੜ ਹੀ ਨਹੀਂ ਰਹਿੰਦੀ। ਉਸਦੇ ਵਿਰੋਧੀ ਆਖਦੇ ਹਨ ਕਿ ਰਾਮੂਵਾਲੀਏ ਦੇ ਭਾਸ਼ਨ ਨੂੰ ਤਾਂ ਲੋਕੀ ਕਲਾਕਾਰਾਂ ਵਾਂਗੂ ਸੁਣਨ ਜਾਂਦੇ ਹਨ। ਬੱਸ ਇਹੋ ਗੱਲ ਹੈ ਕਿ ਲੋਕ ਸੁਆਦ ਤਾਂ ਰਾਮੂਵਾਲੀਏ ਦੇ ਭਾਸ਼ਨਾਂ ਦਾ ਲੈ ਲੈਂਦੇ ਨੇ ਤੇ ਵੋਟ ਪਾਉਣ ਵੇਲੇ ਅਕਾਲੀਆਂ ਜਾਂ ਕਾਂਗਰਸੀਆਂ ਨੂੰੰ ਭੁਗਤ ਜਾਂਦੇ ਹਨ। ਇੱਕ ਵਾਰੀ ਵਿਸਾਖੀ ਦੇ ਮੇਲੇ 'ਤੇ ਆਪਣੀ ਸਿਆਸੀ ਸਟੇਜ ਤੋਂ ਸਿਮਰਨਜੀਤ ਸੋਘ ਮਾਨ ਨੇ ਆਖ ਦਿੱਤਾ ਸੀ ਕਿ ਜਿਹੜੇ ਲੋਕ ਪੰਥਕ ਵਿਚਾਰਾਂ ਅਤੇ ਸੰਜੀਦਾ ਭਾਸ਼ਨ ਸੁਣਨਾ ਚਾਹੁੰਦੇ ਹਨ,ਉਹ ਬੈਠੇ ਰਹਿਣ। ਜਿਨ•ਾਂ ਨੇ ਮਦਾਰੀ ਦਾ ਖੇਡਾ ਦੇਖਣਾ ਹੈ,ਉਹ ਗੁਆਂਢ ਵਿਚਲੇ ਪੰਡਾਲ 'ਚ ਚਲੇ ਜਾਣ। ਉਸ ਵਿਸਾਖੀ 'ਤੇ ਅਕਾਲੀ ਦਲ (ਅੰਮ੍ਰਿਤਸਰ) ਅਤੇ ਲੋਕ ਭਲਾਈ ਪਾਰਟੀ ਦੀ ਸਟੇਜ ਨਾਲੋਂ ਨਾਲ ਸੀ।
-ਚਰਨਜੀਤ ਭੁੱਲਰ
-ਲੇਖਕ ਉਘੇ ਪੱਤਰਕਾਰ ਤੇ ਬੇਬਾਕ ਕਲਮ ਦੇ ਧਨੀ ਹਨ

ਮੁੱਖ ਮੰਤਰੀ ਬਾਦਲ ਦੇ ਨਿੱਜੀ ਲਾਂਗਰੀ ਵੱਲੋਂ ਨਰੇਗਾ ਦਾ ਜੁਬਾਨੀ ਠੇਕਾ

ਪੰਜਾਬ ਦੇ ਮੁੱਖ ਮੰਤਰੀ ਅਤੇ ਉਪ ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਚ ਬੇਰਜ਼ੁਗਾਰ ਮਜ਼ਦੂਰਾਂ ਲਈ ਕੇਂਦਰ ਦੀ ਵਕਾਰੀ ਸਕੀਮ ਮਹਾਤਮਾ ਗਾਂਧੀ ਰੁਜ਼ਗਾਰ ਗਾਰੰਟੀ ਸਕੀਮ (ਮਨਰੇਗਾ) ਤਹਿਤ ਕੰਮਾਂ ਨੂੰ 'ਮੌਖਿਕ' ਤੌਰ 'ਤੇ ਠੇਕੇ ਉਤੇ ਦਿੱਤੇ ਜਾਣ ਦਾ ਸਨਸਨੀਖੇਜ਼ ਮਾਮਲਾ ਸਾਹਮਣੇ ਆਇਆ ਹੈ। ਨਰੇਗਾ ਨੂੰ ਮੌਖਿਕ ਠੇਕੇ ਵਿਚ ਕਿਸੇ ਲੋੜਵੰਦ ਵਿਅਕਤੀ ਨੂੰ ਆਰਥਿਕ ਮੱਦਦ ਕਰਨ ਖਾਤਰ ਤਬਦੀਲ ਨਹੀਂ ਕੀਤਾ ਗਿਆ ਬਲਕਿ ਸੂਬੇ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ 'ਨਿੱਜੀ ਲਾਂਗਰੀ' ਬਲਜਿੰਦਰ ਨੂੰ ਆਰਥਿਕ ਲਾਹਾ ਪਹੁੰਚਾਉਣ ਲਈ ਕੀਤਾ ਗਿਆ। ਉਕਤ ਕਾਰਜ ਨੂੰ 'ਮੌਖਿਕ ਠੇਕੇ' ਵਿਚ ਨੇਪਰੇ ਚੜ੍ਹਾਉਣ ਵਿਚ ਮੁੱਖ ਮੰਤਰੀ ਚਰਚਿਤ ਰਹੇ ਇੱਕ ਓ. ਐਸ.ਡੀ. ਦੀ ਵੀ ਖਾਸੀ ਭੂਮਿਕਾ ਦੱਸੀ ਜਾ ਰਹੀ ਹੈ। ਨਰੇਗਾ ਕੰਮਾਂ ਨੂੰ ਮੌਖਿਕ ਠੇਕੇ 'ਤੇ ਦਿੱਤੇ ਜਾਣ ਦੀ ਗੱਲ ਉਕਤ ਲਾਂਗਰੀ ਨੇ ਵੀ ਬੜੀ ਬੇਬਾਕੀ ਨਾਲ ਸਪੱਸ਼ਟ ਸ਼ਬਦਾਂ ਵਿਚ ਕਬੂਲੀ ਹੈ।
ਪਿੰਡ ਬਾਦਲ ਵਿਖੇ ਸਾਲ 2008-09 ਦੌਰਾਨ 'ਨਰੇਗਾ' ਤਹਿਤ ਵਾਟਰ ਵਰਕਸਾਂ ਦੇ ਫਿਲਟਰ ਮੀਡੀਆ ਦੀ ਸਫ਼ਾਈ ਦੇ ਮੌਖਿਕ ਠੇਕੇ 'ਚ ਵੱਧ ਤੋਂ ਵੱਧ ਆਰਥਿਕ ਲਾਹਾ ਪਹੁੰਚਾਉਣ ਦੇ ਉਦੇਸ਼ ਨਾਲ ਉਸਦੇ 4 ਨੇੜਲੇ ਰਿਸ਼ਤੇਦਾਰਾਂ, ਜਿਨ੍ਹਾਂ ਦੇ ਨਾਂਅ ਨਰੇਗਾ ਮਜ਼ਦੂਰਾਂ ਵਜੋਂ ਦਰਜ ਹਨ, ਦੀਆਂ ਫਿਲਟਰ ਮੀਡੀਆ ਦੀ ਸਫ਼ਾਈ ਵਿਚ ਕਥਿਤ ਤੌਰ 'ਤੇ ਵਗੈਰ ਕੋਈ ਕੰਮ ਕੀਤੇ ਦਿਹਾੜੀਆਂ ਸਰਕਾਰੀ ਰਿਕਾਰਡ ਦਾ ਢਿੱਡ ਭਰਨ ਖਾਤਰ ਪਾਈਆਂ ਗਈਆਂ ਤੇ ਹਜ਼ਾਰਾਂ ਰੁਪਏ ਸਰਕਾਰ ਤੋਂ ਵਸੂਲੇ ਗਏ।
ਇਹ ਸਾਰਾ ਮਾਮਲਾ ਪਿੰਡ ਬਾਦਲ ਦੇ ਸੂਚਨਾ ਅਧਿਕਾਰ ਕਾਰਕੁੰਨ ਦਲਜੀਤ ਸਿੰਘ ਸੋਮੀ ਪੁੱਤਰ ਸੂਰਜ ਪ੍ਰਕਾਸ਼ ਵੱਲੋਂ ਬਲਾਕ ਅਤੇ ਪੰਚਾਇਤ ਵਿਕਾਸ ਅਧਿਕਾਰੀ ਤੋਂ ਸੂਚਨਾ ਅਧਿਕਾਰੀ ਕਾਨੂੰਨ ਤਹਿਤ ਪ੍ਰਾਪਤ ਵੇਰਵਿਆਂ ਵਿਚ ਵੱਖ-ਵੱਖ ਤਰ੍ਹਾਂ ਦੀਆਂ ਬੇਨਿਨਮੀਆਂ ਸਾਹਮਣੇ ਆਈਆਂ ਹਨ। ਜਿਸ ਦੇ ਤਹਿਤ ਪਿੰਡ ਦੇ ਜ਼ਿਆਦਾਤਰ ਨਰੇਗਾ ਮਜ਼ਦੂਰਾਂ ਦੇ ਜੌਬ ਕਾਰਡਾਂ 'ਤੇ ਇੱਕ ਵੀ ਹਾਜ਼ਰੀ ਨਹੀਂ ਲੱਗੀ ਹੈ ਪਰ ਉਨ੍ਹਾਂ ਨੂੰ ਡਾਕਖਾਨੇ ਰਾਹੀਂ ਕਈ-ਕਈ ਦਿਹਾੜੀਆਂ ਦੀ ਅਦਾਇਗੀ ਕੀਤੀ ਗਈ ਹੈ। ਇੱਕ ਮਜ਼ਦੂਰ ਨੂੰ ਤਾਂ ਲਗਭਗ 3 ਮਹੀਨੇ ਦੀਆਂ ਦਿਹਾੜੀਆਂ ਦੇ ਨਗਦ ਹਜ਼ਾਰਾਂ ਰੁਪਏ ਕਥਿਤ ਤੌਰ 'ਤੇ ਪਿੰਡ ਦੇ ਸਾਬਕਾ ਸਰਪੰਚ ਨੇ ਡਾਕਖਾਨੇ ਵਿਚੋਂ ਕਢਵਾਉਣ ਉਪਰੰਤ ਹੜੱਪ ਲੈਣ ਦਾ ਦੋਸ਼ ਲਗਾਇਆ ਹੈ।
ਮਨਰੇਗਾ ਨੂੰ ਕੰਮਾਂ ਨੂੰ ਮੌਖਿਕ ਠੇਕੇ 'ਤੇ ਦਿੱਤੇ ਜਾਣ ਦਾ ਹੈਰਾਨੀਜਨਕ ਖੁਲਾਸਾ ਉਸ ਵੇਲੇ ਹੋਇਆ ਜਦੋਂ ਦਲਜੀਤ ਸਿੰਘ ਸੋਮੀ ਵੱਲੋਂ ਪ੍ਰਾਪਤ ਸੂਚਨਾ ਦੀ ਆਪਣੇ ਪੱਧਰ 'ਤੇ ਘੋਖ ਦੌਰਾਨ ਮਨਰੇਗਾ ਮਜ਼ਦੂਰ ਬਖਸ਼ੀਸ਼ ਸਿੰਘ ਪੁੱਤਰ ਬਲਵਿੰਦਰ ਸਿੰਘ ਨੂੰ ਪਿੰਡ ਬਾਦਲ ਦੇ ਵਾਟਰ ਵਰਕਸਾਂ ਵਿਚ ਫਿਲਟਰ ਮੀਡੀਆ ਦੀ ਸਫ਼ਾਈ ਦੌਰਾਨ ਉਸ ਨਾਲ ਮੁੱਖ ਮੰਤਰੀ ਦੇ ਨਿੱਜੀ ਲਾਂਗਰੀ ਬਲਜਿੰਦਰ ਸਿੰਘ ਦੇ ਭਰਾ ਭੰਵਰ ਲਾਲ, ਸਾਲਾ ਹੰਸਰਾਜ ਵਾਸੀ ਭਾਗਸਰ ਅਤੇ ਜੀਜੇ ਬਲਰਾਮ ਸਮੇਤ ਨੇੜਲੇ ਰਿਸ਼ਤੇ ਦੇ ਚਾਚਾ ਨੱਥੂ ਰਾਮ ਤੋਂ ਇਲਾਵਾ ਇੱਕ ਔਰਤ ਜਸਵਿੰਦਰ ਕੌਰ ਦੇ ਨਰੇਗਾ ਮਜ਼ਦੂਰ ਵਜੋਂ ਕੰਮ ਕਰਨ ਦਾ ਪਤਾ ਲੱਗਿਆ ਤਾਂ ਉਹ ਹੈਰਾਨ ਰਹਿ ਗਿਆ। ਜਿਸ 'ਤੇ ਬਖਸ਼ੀਸ਼ ਨੇ ਦੱਸਿਆ ਕਿ ਉਕਤ ਵਿਅਕਤੀਆਂ ਦਾ ਦੋਵੇਂ ਵਾਟਰ ਵਰਕਸਾਂ ਦੇ ਫਿਲਟਰ ਮੀਡੀਆ ਦੀ ਸਫ਼ਾਈ ਨਾਲ ਕੋਈ ਸਬੰਧੀ ਨਹੀਂ ਤੇ ਨਾ ਹੀ ਉਨ੍ਹਾਂ ਨੇ ਉਥੇ ਕਦੇ ਵੀ ਕੋਈ ਦਿਹਾੜੀ-ਮਜ਼ਦੂਰੀ ਨਹੀਂ ਕੀਤੀ। ਬਖਸ਼ੀਸ਼ ਸਿੰਘ ਨੇ ਦੱਸਿਆ ਕਿ ਫਿਲਟਰ ਮੀਡੀਆ ਦੀ ਸਫ਼ਾਈ ਲਈ ਲਗਭਗ ਤਿੰਨ ਮਹੀਨਿਆਂ ਤੱਕ ਕੰਮ ਕੀਤਾ ਤੇ ਉਸਦੇ ਨਾਲ ਸਾਬਕਾ ਸਰਪੰਚ ਸੁਖਦੇਵ ਸਿੰਘ ਦੇ ਸਕੇ ਭਰਾ ਬਲਜਿੰਦਰ ਸਿੰਘ ਅਤੇ ਚਚੇਰੇ ਭਰਾ ਚਚੇਰਾ ਬਲਵੰਤ ਸਿੰਘ ਨੇ ਵੀ ਮਜ਼ਦੂਰੀ ਕੀਤੀ ਸੀ। ਜਿਸਦੇ ਏਵਜ਼ ਵਿਚ ਉਸਨੂੰ ਸਰਕਾਰ ਵੱਲੋਂ ਵੱਖ-ਵੱਖ ਕਿਸ਼ਤਾਂ ਵਿਚ 22 ਹਜ਼ਾਰ 800 ਰੁਪਏ ਡਾਕਖਾਨੇ ਰਾਹੀਂ ਦਿੱਤੇ ਗਏ ਸਨ ਪਰ ਸਾਬਕਾ ਸਰਪੰਚ ਸੁਖਦੇਵ ਸਿੰਘ ਨੇ ਡਾਕਖਾਨੇ ਵਿਚੋਂ ਕਢਵਾਉਣ ਬਾਅਦ ਉਹ ਰੁਪਏ ਕੰਮ ਖ਼ਤਮ ਹੋਣ ਉਪਰੰਤ ਹਿਸਾਬ ਕਰਨ ਦੀ ਗੱਲ ਕਰਕੇ ਰੁਪਏ ਲੈ ਲਏ ਜਾਂਦੇ ਸਨ। ਟੁੱਟੇ ਫੁੱਟੇ ਇੱਕ ਕਮਰੇ ਵਾਲੇ ਮਕਾਨ ਵਿਚ ਰਹਿੰਦੇ ਬਖਸ਼ੀਸ਼ ਨੇ ਕਿਹਾ ਆਖਿਆ ਜਿਸ ਵਿਚੋਂ ਸਰਪੰਚ ਨੇ 22, 800 ਰੁਪਏ ਵਿਚੋਂ ਉਸਨੂੰ ਸਿਰਫ਼ 4 ਕੁ ਹਜ਼ਾਰ ਰੁਪਏ ਦਿੱਤੇ ਹਨ। ਵਾਰ-ਵਾਰ ਰੁਪਏ ਮੰਗਣ 'ਤੇ ਸਰਪੰਚ ਕਹਿੰਦਾ ਹੈ ਕਿ ਤੇਰੇ ਜਿੰਨੇ ਵੀ ਪੈਸੇ ਬਣਦੇ ਸਨ ਤੈਨੂੰ ਦੇ ਦਿੱਤੇ ਹਨ।
ਜਦੋਂਕਿ ਸੂਚਨਾ ਅਧਿਕਾਰ ਤਹਿਤ ਪ੍ਰਾਪਤ ਵੇਰਵਿਆਂ ਅਨੁਸਾਰ ਭੰਵਰ ਲਾਲ, ਹੰਸ ਰਾਮ ਤੇ ਬਲਰਾਮ ਨੂੰ 11,576 ਰੁਪਏ ਤੇ ਨੱਥੂ ਰਾਮ ਨੂੰ ਸਿਰਫ਼ 11,500 ਰੁਪਏ ਮਿਲੇ। ਜਦਕਿ ਇੱਕ ਔਰਤ ਜਸਵਿੰਦਰ ਕੌਰ ਨੂੰ 1530 ਰੁਪਏ ਦਿੱਤੇ ਗਏ ਹਨ। ਸੂਚਨਾ ਅਧਿਕਾਰ ਤਹਿਤ ਪ੍ਰਾਪਤ ਵੇਰਵਿਆਂ ਅਨੁਸਾਰ ਪਿੰਡ ਬਾਦਲ ਵਿਚ 302 ਨਰੇਗਾ ਮਜ਼ਦੂਰ ਹਨ। ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਚ ਵਿੱਤ ਵਰ੍ਹੇ 2008-09 ਅਤੇ 2009-2010 ਦੌਰਾਨ ਨਰੇਗਾ ਤਹਿਤ 9 ਕੰਮਾਂ ਲਈ ਲਗਭਗ 6 ਲੱਖ 26 ਹਜ਼ਾਰ 565 ਰੁਪਏ ਸਰਕਾਰ ਵੱਲੋ ਭੇਜੇ ਗਏ।
ਪਿੰਡ ਦੇ ਨੌਜਵਾਨ ਬਲਰਾਜ ਸਿੰਘ ਬਾਜਾ ਨੇ ਦੋਸ਼ ਲਗਾਇਆ ਕਿ ਨਰੇਗਾ ਦਿਹਾੜੀਆਂ 'ਚ ਫੰਡਾਂ ਵਿਚ ਕਥਿਤ ਘਪਲੇਬਾਜ਼ੀ ਨੂੰ ਭੰਵਰ ਲਾਲ, ਹੰਸ ਰਾਮ ਤੇ ਬਲਰਾਮ ਨੂੰ 11576 ਰੁਪਏ ਅਤੇ ਨੱਥੂ ਰਾਮ ਨੂੰ 11500 ਰੁਪਏ ਦਾ ਫ਼ਰਕ ਜਾਹਰ ਕਰਦਾ ਹੈ। ਜਦੋਂਕਿ ਨਰੇਗਾ ਦੀ ਪ੍ਰਤੀ ਦਿਨ ਮਜ਼ਦੂਰੀ 123 ਰੁਪਏ ਹੈ ਤੇ ਨੱਥੂ ਰਾਮ ਦੀ ਮਜ਼ਦੂਰੀ ਵਿਚ ਸਿਰਫ਼ 76 ਰੁਪਏ ਦਾ ਫ਼ਰਕ ਕਿਵੇਂ ਪੈ ਗਿਆ। ਉਨ੍ਹਾਂ ਕਿਹਾ ਕਿ ਭੰਵਰ ਲਾਲ ਲਾਲ ਤਾਂ ਪਿੰਡ ਬਾਦਲ ਦੇ ਬਿਰਧ ਆਸ਼ਰਮ ਵਿਖੇ ਮਾਲੀ ਦੀ ਨੌਕਰੀ 'ਤੇ ਲੱਗਿਆ ਹੋਇਆ ਸੀ।
ਸੂਚਨਾ ਅਧਿਕਾਰ ਕਾਰਕੁੰਨ ਦਲਜੀਤ ਸਿੰਘ ਸੇਮੀ ਨੇ ਦੋਸ਼ ਲਾਇਆ ਕਿ ਮੁੱਖ ਮੰਤਰੀ ਦੇ ਪਿੰਡ ਵਿਚ ਨਰੇਗਾ ਮਜ਼ਦੂਰਾਂ ਨਾਲ ਸਿੱਧੇ ਤੌਰ 'ਤੇ ਵਿਤਕਰਾ ਅਤੇ ਕੇਂਦਰੀ ਫੰਡਾਂ ਵਿਚ ਘਪਲੇਬਾਜ਼ੀ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਸੂਚਨਾ ਅਧਿਕਾਰ ਦੇ ਵੇਰਵਿਆਂ ਵਿਚ ਪੰਚਾਇਤ ਦੇ ਮਤੇ ਦੀ ਕਾਪੀ ਤੋਂ ਖੁਲਾਸਾ ਹੋਇਆ ਹੈ ਕਿ ਪਿੰਡ ਬਾਦਲ ਵਿਚ ਸੈਂਕੜੇ ਨਰੇਗਾ ਮਜ਼ਦੂਰ ਹੋਣ ਦੇ ਬਾਵਜੂਦ ਪਿੰਡ ਮਹਿਣਾ ਅਤੇ ਲੰਬੀ ਦੇ ਨਰੇਗਾ ਮਜ਼ਦੂਰਾਂ ਤੋਂ ਛੱਪੜ ਦੀ ਮਿੱਟੀ ਸਰਕਾਰੀ ਸੀ.ਸੈਕੰ ਸਕੂਲ ਵਿਚ ਪੁਆਉਣ ਦਾ ਕੰਮ ਕੀਤਾ ਵਿਖਾਇਆ ਗਿਆ ਹੈ। ਜਦੋਂਕਿ ਅਸਲੀਅਤ ਵਿਚ ਜੇ.ਸੀ.ਬੀ. ਮਸ਼ੀਨਾਂ ਰਾਹੀਂ ਮਿੱਟੀ ਟਰੈਕਟਰ-ਟਰਾਲੀਆਂ ਰਾਹੀਂ ਸੀਨੀਅਰ ਸੈਕੰਡਰੀ ਸਕੂਲ ਵਿਚ ਪਾਈ ਸੀ ਪਰ 99 ਹਜ਼ਾਰ 797 ਰੁਪਏ ਨਰੇਗਾ ਤਹਿਤ ਲੱਗੇ ਵਿਖਾ ਦਿੱਤੇ ਗਏ ਹਨ। ਉਨ੍ਹਾਂ ਦੋਸ਼ ਲਾਇਆ ਕਿ ਪਿੰਡ ਦੀ ਪੰਚਾਇਤ ਦੇ ਨੁਮਾਇੰਦਿਆਂ ਦੀ ਭ੍ਰਿਸ਼ਟ ਕਾਰਗੁਜਾਰੀ ਦਾ ਇਸੇ ਗੱਲ ਤੋਂ ਖੁਲਾਸਾ ਹੋ ਜਾਂਦਾ ਹੈ ਕਿ ਪਿੰਡ ਦੇ ਬਹੁਤੇ ਨਰੇਗਾ ਮਜ਼ਦੂਰਾਂ ਦੇ ਜੌਬ ਕਾਰਡਾਂ 'ਤੇ ਇੱਕ ਵੀ ਹਾਜ਼ਰੀ ਦਰਜ ਨਹੀਂ ਕੀਤੀ ਗਈ। ਜਦੋਂ ਕਿ ਉਨ੍ਹਾਂ ਨੂੰ ਡਾਕਖਾਨੇ ਰਾਹੀਂ ਰਕਮ ਵੀ ਦਿੱਤੀ ਗਈ।
ਪਿੰਡ ਬਾਦਲ ਦੇ ਵਸਨੀਕ ਕਾਮਰੇਡ ਗੁਰਚਰਨ ਸਿੰਘ, ਕਾਮਰੇਡ ਗੁਰਮੁੱਖ ਸਿੰਘ ਨੇ ਦੋਸ਼ ਲਾਇਆ ਕਿ ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਚ ਕੇਂਦਰ ਸਰਕਾਰ ਦੀ ਨਰੇਗਾ ਸਕੀਮ ਦੀ ਸਿੱਧੇ ਤੌਰ 'ਤੇ ਦੁਰਵਰਤੋਂ ਕੀਤੀ ਜਾ ਰਹੀ ਹੈ। ਉਨ੍ਹਾਂ ਕਿਹਾ ਕਿ ਮੁੱਖ ਮੰਤਰੀ ਦੇ ਲਾਂਗਰੀ ਪਰਿਵਾਰ ਦੇ ਨਿੱਜੀ ਬਲਜਿੰਦਰ ਸਿੰਘ ਦੇ ਰਿਸ਼ਤੇਦਾਰ ਭਾਵੇਂ ਕਾਗਜਾਂ ਵਿਚ ਨਰੇਗਾ ਮਜ਼ਦੂਰ ਹਨ ਤੇ ਪਰ ਕਥਿਤ ਤੌਰ 'ਤੇ ਹਕੀਕੀ ਰੂਪ ਵਿਚ ਨਰੇਗਾ ਕੰਮਾਂ ਨਾਲ ਕੋਈ ਸਬੰਧ ਨਹੀਂ ਹੈ। ਉਨ੍ਹਾਂ ਨੂੰ ਤਾਂ ਸਿਰਫ਼ ਸਰਕਾਰੀ ਦਬਦਬੇ 'ਤੇ ਸਿਰਫ਼ ਆਰਥਿਕ ਲਾਹਾ ਦਿਵਾਉਣ ਦੇ ਮੰਤਵ ਨਾਲ ਨਰੇਗਾ ਮਜ਼ਦੂਰਾਂ ਵਿਚ ਸ਼ਾਮਲ ਕਰਵਾਇਆ ਗਿਆ।
ਹੀਰਾ ਲਾਲ ਪੁੱਤਰ ਜਾਲੂ ਰਾਮ ਨੇ ਦੋਸ਼ ਲਾਇਆ ਕਿ ਉਹਦੇ ਤੇ ਉਸਦੀ ਘਰਵਾਲੀ ਵਿਮਲਾ ਦੇਵੀ ਦੀ ਕੁੱਲ ਸੱਤ ਦਿਹਾੜੀਆਂ ਦੀ ਮਜ਼ਦੂਰੀ ਨਹੀਂ ਮਿਲੀ। ਰੂਪ ਸਿੰਘ ਪੁੱਤਰ ਕੁੰਡਾ ਸਿੰਘ ਨੇ ਦੋਸ਼ ਲਾਇਆ ਕਿ ਉਸਦੀ ਨਰੇਗਾ ਮਜ਼ਦੂਰ ਪਤਨੀ ਜਸਵੀਰ ਕੌਰ ਨੂੰ ਕਈ ਦਿਨਾਂ ਦੀ ਦਿਹਾੜੀ ਨਹੀਂ ਦਿੱਤੀ ਗਈ।
ਜ਼ਿਕਰਯੋਗ ਹੈ ਕਿ ਪਿਛਲੀ ਅਕਾਲੀ ਸਰਕਾਰ ਦੌਰਾਨ ਮੁੱਖ ਮੰਤਰੀ ਬਾਦਲ ਪਰਿਵਾਰ ਦੇ ਪੁਰਾਣੇ ਲਾਂਗਰੀ ਰਾਮ ਸਿੰਘ ਰਾਮੂ ਦਾ ਬਹੁਤ ਬੋਲਬਾਲਾ ਸੀ। ਕਿਹਾ ਜਾਂਦਾ ਹੈ ਕਿ ਲਾਂਗਰੀ ਬਲਜਿੰਦਰ ਲਗਭਗ ਦੋ ਦਹਾਕੇ ਪਹਿਲਾਂ ਬਾਦਲ ਪਰਿਵਾਰ ਦੀ ਰਸੋਈ ਵਿਚ ਸੇਵਕ ਵਜੋਂ ਆਇਆ ਸੀ ਤੇ ਆਪਣੇ ਤੇਜ ਦਿਮਾਗ ਸਦਕਾ ਮੁੱਖ ਲਾਂਗਰੀ ਬਣ ਗਿਆ। ਹੁਣ ਮੌਜੂਦਾ ਸਰਕਾਰ ਦੌਰਾਨ ਲਾਂਗਰੀ ਬਲਜਿੰਦਰ ਦਾ ਅਫਸਰਸ਼ਾਹੀ ਅਤੇ ਸਿਆਸੀ ਆਗੂਆਂ ਵਿਚ ਕਾਫ਼ੀ ਪ੍ਰਭਾਵ ਹੈ। ਬਿਜਲੀ ਬੋਰਡ ਸਮੇਤ ਹੋਰ ਕਿਸੇ ਵਿਭਾਗ ਦਾ ਅਧਿਕਾਰੀ ਉਸਦੇ ਕਹੇ ਨੂੰ ਮਾਲਕਾਂ ਦਾ ਕਿਹਾ ਮੰਨਦਾ ਹੈ।
ਉਨ੍ਹਾਂ ਮੰਗ ਕੀਤੀ ਕਿ ਕੇਂਦਰ ਸਰਕਾਰ ਵੱਲੋਂ ਪਿੰਡ ਬਾਦਲ ਵਿਚ ਨਰੇਗਾ ਦੇ ਕੰਮਾਂ ਵਿਚ ਹੋਈਆਂ ਘਪਲੇਬਾਜ਼ੀ ਦੀ ਸੀ. ਬੀ. ਆਈ. ਤੋਂ ਜਾਂਚ-ਪੜਤਾਲ ਕਰਵਾਈ ਜਾਵੇ ਤਾਂ ਜੋ ਸੱਚ ਸਾਹਮਣੇ ਆ ਸਕੇ।
ਇਸੇ ਦੌਰਾਨ ਪਿੰਡ ਬਾਦਲ ਦੇ ਸਾਬਕਾ ਸਰਪੰਚ ਸੁਖਦੇਵ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਦਾ ਉਕਤ ਨਰੇਗਾ ਕਾਰਜਾਂ ਨਾਲ ਕੋਈ ਲੈਣਾ-ਦੇਣਾ ਨਹੀਂ ਹੈ ਤੇ ਉਕਤ ਕਾਰਜ ਬੀ. ਡੀ. ਪੀ. ਓ.ਦਫ਼ਤਰ ਵੱਲੋਂ ਲਾਂਗਰੀ ਬਲਜਿੰਦਰ ਸਿੰਘ ਨੂੰ ਠੇਕੇ 'ਤੇ ਦਿੱਤੇ ਗਏ ਸਨ। ਜਦੋਂ ਉਸ ਨੂੰ ਪੁੱਛਿਆ ਗਿਆ ਇਹ ਕੰਮ ਤਾਂ ਨਰੇਗਾ ਅਧੀਨ ਹਨ ਜਿਨ੍ਹਾਂ ਵਿਚ ਕੋਈ ਠੇਕਾ ਨਹੀਂ ਦਿੱਤਾ ਜਾ ਸਕਦਾ। ਉਨ੍ਹਾਂ ਬਖਸ਼ੀਸ਼ ਦੇ ਰੁਪਇਆ ਬਾਰੇ ਕਿਹਾ ਕਿ ਮੈਂ ਉਸਦੇ ਕੋਈ ਰੁਪਏ ਨਹੀਂ ਦੇਣੇ।

ਸੇਖੋਂ ਸਾਹਬ ਨੇ ਮੈਂਨੂੰ ਦਿਵਾਇਆ ਸੀ ਠੇਕਾ : ਬਲਜਿੰਦਰ ਲਾਂਗਰੀ
ਮੁੱਖ ਮੰਤਰੀ ਬਾਦਲ ਪਰਿਵਾਰ ਦੇ ਨਿੱਜੀ ਲਾਂਗਰੀ ਬਲਜਿੰਦਰ ਨੇ ਸੰਪਰਕ ਕਰਨ 'ਤੇ ਆਪਣੇ 'ਤੇ ਲੱਗੇ ਦੋਸ਼ਾਂ ਦੇ ਬਾਰੇ ਵਿਚ ਬੜੇ ਬੇਖੌਫ਼ ਤੇ ਸਪੱਸ਼ਟ ਸ਼ਬਦਾਂ ਵਿਚ ਕਿਹਾ ਕਿ 'ਹਾਂ ਜੀ ਮੈਂ ਸਾਬਕਾ ਸਰਪੰਚ ਦੇ ਕਹਿਣ 'ਤੇ ਪਿੰਡ ਬਾਦਲ ਦੇ ਵਾਟਰ ਵਰਕਸ ਦੇ ਫਿਲਟਰ ਮੀਡੀਆ ਦੀ ਸਫ਼ਾਈ ਦਾ ਠੇਕਾ ਲਿਆ ਸੀ। ਜੋਕਿ ਓ.ਐਸ. ਡੀ. ਸੇਖੋਂ ਸਾਹਬ ਨੇ ਬੀ.ਡੀ.ਪੀ.ਓ. ਸਾਹਿਬ ਤੋਂ ਉਸਨੂੰ ਦਿਵਾਇਆ ਸੀ ਅਤੇ ਠੇਕੇ ਸਬੰਧੀ ਕੋਈ ਲਿਖਾ-ਪੜ੍ਹੀ ਨਹੀਂ ਹੋਈ ਸੀ। ਬਲਜਿੰਦਰ ਨੇ ਕਿਹਾ ਕਿ ਉਸਨੇ ਲਗਭਗ 4-5 ਹਜ਼ਾਰ ਰੁਪਏ ਪ੍ਰਤੀ ਠੇਕਾ ਲੈ ਕੇ ਅਗਾਂਹ ਠੇਕੇ 'ਤੇ ਦੇ ਦਿੱਤਾ ਸੀ। ਜਿਸ ਵਿਚੋਂ ਉਸਨੂੰ ਕੁਝ ਰੁਪਏ ਬਚੇ ਸਨ। ਉਸਨੇ ਕਿਹਾ ਕਿ ਮੇਰੇ ਰਿਸ਼ਤੇਦਾਰਾਂ ਨੇ ਉਕਤ ਕੰਮਾਂ ਵਿਚ ਮਜ਼ਦੂਬੀ ਕੀਤੀ ਹੈ। ਇੰਨਾ ਜ਼ਰੂਰ ਹੈ ਕਿ ਉਨ੍ਹਾਂ ਨੇ ਹੋਰਨਾਂ ਨਾਲੋਂ ਘੱਟ ਦਿਨ ਕੰਮ ਕੀਤਾ ਹੋਵੇ। ਉਸਨੇ ਕਿਹਾ ਕਿ ਜੇਕਰ ਸੇਖੋਂ ਸਾਬ੍ਹ ਜਾਂ ਕਿਸੇ ਹੋਰ ਨੇ ਥੌੜ੍ਹਾ ਵੀ ਜਾਣੂ ਕਰਵਾਇਆ ਹੁੰਦਾ ਤਾਂ ਉਹ ਇਸ ਪੰਗੇ ਵਿਚ ਨਾ ਪੈਂਦਾ। ਇਸ ਸਬੰਧ ਵਿਚ ਪੱਖ ਜਾਨਣ ਲਈ ਓ.ਐਸ.ਡੀ. ਸੇਖੋਂ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਸੰਪਰਕ ਨਹੀਂ ਬਣ ਸਕਿਆ।
-ਇਕਬਾਲ ਸਿੰਘ ਸ਼ਾਂਤ

ਜਦੋਂ 'ਖਾਕੀ ਵਾਲਿਆਂ' ਨੇ 'ਖਾਕੀ ਵਾਲਿਆਂ' ਨੂੰ ਵੇਚੀਆਂ 'ਰੋਟੀਆਂ'

                                         -ਮਹਿਮਾਨ ਨਵਾਜੀ-             
  ਕਿਸੇ ਨੇ ਸੱਚ ਹੀ ਕਿਹਾ ਹੈ ਕਿ 'ਖਾਕੀ ਵਾਲੇ' ਕਿਸੇ ਦੇ ਮਿੱਤ ਨਹੀਂ ਹੁੰਦੇ। ਕੁਝ ਅਜਿਹਾ ਹੀ ਵਤੀਰਾ ਅੱਜ ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਚ ਵੇਖਣ ਨੂੰ ਮਿਲਿਆ ਜਦੋਂ 3 ਮਾਰਚ 2011 ਦਿਨ ਐਤਵਾਰ ਨੂੰ 17 ਜਥੇਬੰਦੀਆਂ ਦੇ ਧਰਨੇ ਦੇ ਮੱਦੇਨਜ਼ਰ ਵੱਖ-ਵੱਖ ਜ਼ਿਲ੍ਹਿਆਂ ਦੇ ਤਾਇਨਾਤ ਕੀਤੇ ਪੁਲਿਸ ਕਰਮਚਾਰੀਆਂ ਨੂੰ ਇੱਕ ਵਹੀਕਲ 'ਤੇ 'ਖਾਕੀ' ਵਰਦੀਧਾਰੀ ਕਰਮਚਾਰੀ 15-15 ਰੁਪਏ ਵਿਚ ਰੋਟੀ ਦੇ ਪੈਕਟ ਵੇਚਦੇ ਨਜ਼ਰ ਆਏ। ਜਿਨ੍ਹਾਂ ਵਿਚ ਮੂੰਗੀ ਦੀ ਦਾਲ ਅਤੇ ਰੋਟੀਆਂ ਸਨ।

              ਬਾਦਲ ਪਿੰਡ ਦੇ ਇੱਕ ਚੌਰਾਹੇ 'ਤੇ ਤਾਇਨਾਤ ਇੱਕ ਗੁਆਂਢੀ ਜ਼ਿਲ੍ਹੇ ਦੇ ਪੁਲਿਸ ਕਰਮਚਾਰੀਆਂ ਨੇ ਦੱਸਿਆ ਕਿ ਪਹਿਲਾਂ ਤਾਂ ਸਾਨੂੰ ਖੁਸ਼ੀ ਹੋਈ 'ਲੰਬੀ ਥਾਣੇ' ਵਾਲਿਆਂ ਨੇ ਮੇਜ਼ਬਾਨੀ ਕਰਦਿਆਂ ਸਾਡੇ ਲਈ 'ਰੋਟੀ' ਭੇਜੀ ਹੈ ਪਰ ਮੁਹਰੋਂ ਰੋਟੀ ਦੇ ਬਦਲੇ ਕੀਮਤ ਮੰਗੇ ਜਾਣ 'ਤੇ ਉਨ੍ਹਾਂ ਦੇ ਪੈਰਾਂ ਹੇਠੋਂ ਜ਼ਮੀਨ ਖਿਸਕ ਗਈ ਕਿ ਇਹ ਮੁੱਖ ਮੰਤਰੀ ਦੇ ਪਿੰਡ ਵਿਚ ਡਿਊਟੀ 'ਤੇ ਤਾਇਨਾਤ ਨਾਲ ਕਰਮਚਾਰੀਆਂ ਨਾਲ ਕਿਹੋ ਜਿਹਾ ਕੋਝਾ ਮਜ਼ਾਕ ਹੈ। ਇੱਕ ਕਰਮਚਾਰੀ ਨੇ ਕਿਹਾ ਕਿ 18 ਸਾਲਾਂ ਦੀ ਨੌਕਰੀ 'ਚ ਉਸਨੂੰ ਬਹੁਤ ਵਾਰ ਦੂਜੇ ਜ਼ਿਲ੍ਹਿਆਂ ਵਿਚ ਡਿਊਟੀ ਲੱਗੀ ਹੈ ਪਰ ਰੋਟੀਆਂ ਦੇ ਪੈਸੇ ਕਿਸੇ ਨੇ ਨਹੀਂ ਮੰਗੇ। ਜੇਕਰ ਕਿਸੇ ਨੇ ਰੋਟੀ ਖੁਆਈ ਵੀ ਤਾਂ ਬਿਲਕੁੱਲ ਮੁਫ਼ਤ। ਗੱਗੜ ਰੋਡ 'ਤੇ ਸੂਏ ਕੋਲ ਤਾਇਨਾਤ ਕਰਮਚਾਰੀਆਂ ਨੇ ਕਿਹਾ ਕਿ ਸਾਡੇ ਕੋਲ ਵੀ ਖਾਕੀ ਵਰਦੀ ਵਿਚ ਕੁਝ ਜਣੇ ਰੋਟੀ ਵੇਚਣ ਲਈ ਆਏ ਸਨ ਪਰ ਅਸੀਂ 30-30 ਰੁਪਏ ਵਿਚ ਇੱਕ ਢਾਬੇ ਤੋਂ ਮੰਗਵਾ ਕੇ ਵਧੀਆ ਰੋਟੀ ਖਾਦੀ।

              ਇਸ 'ਵੀ. ਆਈ.ਪੀ.' ਹਲਕੇ ਵਿਚ ਪੁਲਿਸ ਵੱਲੋਂ ਪੁਲਿਸ ਤੋਂ ਰੋਟੀ ਦੇ ਪੈਸੇ ਮੰਗੇ ਜਾਣ 'ਤੋਂ ਖਫ਼ਾ ਹੋਏ ਬੈਠੇ ਇੱਕ ਥਾਣੇਦਾਰ ਨੇ ਕਿਹਾ ਜੇਕਰ ਗੁਰਦੁਆਰਿਆਂ ਵਿਚੋਂ 'ਹੋਰਾਂ' ਲਈ ਰੋਟੀਆਂ ਆ ਸਕਦੀਆਂ ਹਨ ਤਾਂ ਫਿਰ ਸਾਡੇ ਲਈ ਕਿਉਂ ਨਹੀਂ। ਇਸੇ ਦੌਰਾਨ ਪਾ ਲੱਗਿਆ ਹੈ ਕਿ ਪਿੰਡ ਖਿਉਵਾਲੀ ਦੇ ਲੋਕਾਂ ਨੇ ਵਾਟਰ ਵਰਕਸ ਕੋਲ ਤਾਇਨਾਤ ਬਠਿੰਡਾ ਜ਼ਿਲ੍ਹੇ ਦੇ ਪੁਲਿਸ ਕਰਮਚਾਰੀਆਂ ਨੂੰ 'ਮੁਫ਼ਤ' ਰੋਟੀਆਂ ਖੁਆ ਕੇ ਇੱਕ ਚੰਗੇ ਮੇਜ਼ਬਾਨ ਦਾ ਸਬੂਤ ਦਿੱਤਾ।

              ਇਸ ਸਬੰਧ ਵਿਚ ਸੰਪਰਕ ਕਰਨ 'ਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਮੁਖੀ ਸ੍ਰੀ ਇੰਦਰਮੋਹਣ ਸਿੰਘ ਨੇ ਕਿਹਾ ਕਿ ਥਾਣਿਆਂ ਅਤੇ ਧਰਨੇ ਵਗੈਰਾ ਲਈ ਦੂਜੇ ਜ਼ਿਲ੍ਹਿਆਂ ਤੋਂ ਆਏ ਪੁਲਿਸ ਕਰਮਚਾਰੀਆਂ ਨੂੰ ਰੋਟੀ ਵਗੈਰਾ ਦੇਣ ਲਈ ਸਰਕਾਰੀ ਤੌਰ 'ਤੇ ਕੋਈ ਫੰਡ ਨਹੀਂ ਹੁੰਦਾ ਤੇ ਨਿੱਤ ਦੇ ਧਰਨਿਆਂ 'ਚ ਸੈਂਕੜਿਆਂ ਵਿਅਕਤੀਆਂ ਦਾ ਇੰਤਜਾਮ ਕੋਈ ਆਸਾਨ ਕੰਮ ਨਹੀਂ। ਉਨ੍ਹਾਂ ਕਿਹਾ ਕਿ ਇਸ ਮਹਿੰਗਾਈ ਦੇ ਯੁੱਗ ਵਿਚ ਡਿਊਟੀ 'ਤੇ ਖੜ੍ਹੇ ਕਰਮਚਾਰੀਆਂ ਨੂੰ ਸਿਰਫ਼ 15 ਰੁਪਏ ਵਿਚ ਖਾਣ ਨੂੰ 'ਰੋਟੀ' ਮਿਲ ਜਾਵੇ ਤਾਂ ਇਸਤੋਂ ਚੰਗੀ ਗੱਲ ਕੀ ਹੋ ਸਕਦੀ ਹੈ।

ਸੱਤਾ ਦੇ ਖਿਡਾਰੀ ਬਸੰਤੀ ਰੰਗ ਨੂੰ ਰਾਜਨੀਤੀ ਲਈ ਇਸਤੇਮਾਲ ਕਰਨ ਲਈ ਯਤਨਸ਼ੀਲ

ਬੀ. ਐਸ.  ਭੁੱਲਰ

ਉਹਨਾਂ ਦੀ ਲਾਮਿਸਾਲ ਕੁਰਬਾਨੀ ਦਾ ਸਿਆਸੀ ਮੁੱਲ ਵੱਟਣ ਵਾਸਤੇ ਫਿਰਕੂ ਸੋਚ ਵਾਲੀਆਂ ਕੁਝ ਧਿਰਾਂ ਨੇ ਪਹਿਲੇ ਪਹਿਲ ਸਹੀਦ ਏ ਆਜ਼ਮ ਭਗਤ ਸਿੰਘ ਦੀ ਧਰਮ ਨਿਰਪੱਖ ਤੇ ਸੁਰਖ ਵਿਚਾਰਧਾਰਾ ਨੂੰ ਹਿੰਦੂ ਤੇ ਸਿੱਖ ਪੁੱਠ ਚੜਾਉਣ ਦੇ ਅਸਫਲ ਯਤਨ ਕੀਤੇ ਸਨ, ਪਰੰਤੂ ਸੱਤਾ ਦੇ ਵਕਤੀ ਖਿਡਾਰੀ ਹੁਣ ਉਹਨਾਂ ਨਾਲ ਜੁੜ ਚੁੱਕੇ  ਬਸੰਤੀ ਰੰਗ ਨੂੰ ਵੀ ਵੋਟ ਰਾਜਨੀਤੀ ਲਈ ਇਸਤੇਮਾਲ ਕਰਨ ਲਈ ਯਤਨਸ਼ੀਲ ਹਨ।

ਸਹੀਦ ਏ ਆਜ਼ਮ ਦੀਆਂ ਲਿਖਤਾਂ ਤੋਂ ਇਹ ਸੱਚ ਪੂਰੀ ਤਰਾਂ ਸਾਬਤ ਹੋ ਚੁੱਕੈ, ਕਿ ਵਿਅਕਤੀਆਂ ਦੀ ਬਜਾਏ ਉਹ ਉਸ ਲੋਟੂ ਰਾਜ ਪ੍ਰਬੰਧ ਨੂੰ ਬਦਲ ਕੇ ਇੱਕ ਅਜਿਹਾ ਨਜਾਮ ਸਥਾਪਤ ਕਰਨਾ ਚਾਹੁੰਦੇ ਸਨ, ਜਿੱਥੇ ਮਨੁੱਖ ਹੱਥੋਂ ਮਨੁੱਖ ਦੀ ਲੁੱਟ ਘਸੁੱਟ ਨਾ ਹੋ ਸਕੇ।  ਇਸ ਤਬਦੀਲੀ ਲਈ ਉਹ ਸਿਰਫ ਤੇ ਸਿਰਫ ਮਾਰਕਸਵਾਦੀ ਲੈਨਿਨਵਾਦੀ ਵਿਚਾਰਧਾਰਾ ਨੂੰ ਹੀ ਇੱਕ ਪੁਖਤਾ ਹਥਿਆਰ ਸਮਝਦੇ ਸਨ। ਜਿਸਦੀ ਪੁਸਟੀ ਜੇਲ ਜੀਵਨ ਦੌਰਾਨ ਲਿਖੀਆਂ ਉਹਨਾਂ ਦੀਆਂ ਰਚਨਾਵਾਂ ਕਰਦੀਆਂ ਹਨ। ਇਹ ਵੀ ਇੱਕ ਕੌੜਾ ਸੱਚ ਹੈ ਕਿ ਅਜਾਦੀ ਮਿਲਣ ਤੋਂ ਬਾਅਦ ਅੱਜ ਤੱਕ ਕੁਝ ਫਿਰਕੂ ਸੋਚ ਦੀਆਂ ਤਾਕਤਾਂ ਉਹਨਾਂ ਦੀ ਲਾਸਾਨੀ ਕੁਰਬਾਨੀ ਦਾ ਸਿਆਸੀ ਮੁੱਲ ਵੱਟਣ ਵਾਸਤੇ ਸਹੀਦ ਏ ਆਜ਼ਮ ਦੀ ਧਰਮ ਨਿਰਪੱਖ ਤੇ ਸੁਰਖ ਵਿਚਾਰਧਾਰਾ ਨੂੰ ਅਲੱਗ ਅਲੱਗ ਤੌਰ ਤੇ ਹਿੰਦੂ ਤੇ ਸਿੱਖ ਪੁੱਠ ਚੜਾਉਣ ਲਈ ਯਤਨਸ਼ੀਲ ਹਨ, ਪਰੰਤੂ ਇਸ ਮਕਸਦ ਵਿੱਚ ਉਹਨਾਂ ਨੂੰ ਸਫ਼ਲਤਾ ਹਾਸਲ ਨਹੀਂ ਹੋ ਰਹੀ।
28 ਫਰਵਰੀ ਤੋਂ 6 ਮਾਰਚ ਤੱਕ ਰਾਜ ਦੇ ਵੱਖ ਵੱਖ ਸ਼ਹਿਰਾਂ ਵਿੱਚ ਪੰਜਾਬ ਸਰਕਾਰ ਦੀ ਸ੍ਰਪਰਸਤੀ ਹੇਠ ਖੇਡ ਟੂਰਨਾਮੈਂਟ ਆਯੋਜਿਤ ਕਰਵਾਏ ਜਾ ਰਹੇ ਹਨ, ਜਿਹਨਾਂ ਸਬੰਧੀ ਕਿਸੇ ਨੂੰ ਵੀ ਕਿਸੇ ਕਿਸਮ ਦਾ ਕਿੰਤੂ ਪਰੰਤੂ ਨਾ ਹੈ ਅਤੇ ਨਾ ਹੋਣਾ ਚਾਹੀਦਾ ਹੈ। ਪਰੰਤੂ ਇਹ ਵੀ ਇੱਕ ਦਿਲਚਸਪ ਪਹਿਲੂ ਹੈ ਕਿ ਟੀ ਵੀ ਚੈਨਲਾਂ ਅਤੇ ਵੱਖ ਵੱਖ ਅਖ਼ਬਾਰਾਂ ਵਿੱਚ ਜੋ ਇਸਤਿਹਾਰ ਪ੍ਰਕਾਸਿਤ ਕਰਵਾਏ ਜਾ ਰਹੇ ਹਨ, ਉਹਨਾਂ ਰਾਹੀਂ ਸਹੀਦ ਏ ਆਜ਼ਮ ਜਿਹਨਾਂ ਨੂੰ ਇਹ ਟੂਰਨਾਮੈਂਟ ਸਮਰਪਿਤ ਕੀਤੇ ਗਏ ਹਨ, ਨੂੰ ਬਿਲਕੁਲ ਹੀ ਸਫੈਦ ਲਿਬਾਸ ਵਿੱਚ ਦਿਖਾਇਆ ਜਾ ਰਿਹਾ ਹੈ।  ਇਹ ਵੀ ਇੱਕ ਸੱਚਾਈ ਹੈ ਕਿ ਬਸੰਤੀ ਰੰਗ ਨਾਲ ਸਹੀਦ ਏ ਆਜ਼ਮ ਦਾ ਭਾਵੇਂ ਕੋਈ ਵਾਹ ਵਾਸਤਾ ਨਹੀਂ, ਫਿਰ ਵੀ ਇਹ ਉਹਨਾਂ ਦੇ ਨਾਂ ਨਾਲ ਜੁੜ ਚੁੱਕਾ ਹੈ।
ਸਹੀਦ ਏ ਆਜ਼ਮ ਦੇ 100ਵੇਂ ਜਨਮ ਦਿਨ ਨੂੰ ਇਨਕਲਾਬੀ ਧਿਰਾਂ ਨੇ ਇਸ ਜਜ਼ਬੇ ਤੇ ਉਤਸਾਹ ਨਾਲ ਮਨਾਇਆ ਸੀ, ਕਿ ਸਮੁੱਚਾ ਰਾਜ ਵਿੱਚ ਉਹਨਾਂ ਦੀ ਵਿਚਾਰਧਾਰਾ ਦੇ ਗੀਤ ਗੂੰਜਣ ਲੱਗ ਪਏ ਸਨ, ਉਦੋਂ ਪੰਜਾਬ ਸਰਕਾਰ ਨੂੰ ਵੀ ਇਹ ਜਨਮ ਦਿਨ ਮਨਾਉਣ ਲਈ ਮਜਬੂਰ ਹੋਣਾ ਪਿਆ ਸੀ। ਇਹ ਵੱਖਰੀ ਗੱਲ ਹੈ ਕਿ ਉਹਨਾਂ ਦੀ ਵਿਚਾਰਧਾਰਾ ਦੇ ਪ੍ਰਚਾਰ ਪ੍ਰਸਾਰ ਦੇ ਉਲਟ ਸਰਕਾਰੀ ਖਜ਼ਾਨੇ ਚੋਂ ਕਢਵਾਈ ਰਾਸ਼ੀ ਦਾ ਵੱਡਾ ਹਿੱਸਾ ਫਜੂਲ ਖਰਚਿਆਂ ਵਿੱਚ ਹੀ ਵਹਾ ਦਿੱਤਾ ਸੀ। ਪਰ ਇਹ ਵੀ ਇੱਕ ਹਕੀਕਤ ਹੈ ਕਿ ਹਾਕਮ ਧਿਰ ਤੇ ਰਾਜ ਸਰਕਾਰ ਦੀ ਉਦੋਂ ਬਸੰਤੀ ਰੰਗ ਦੀ ਐਨੀ ਦੀਵਾਨੀ ਹੋ ਗਈ ਸੀ, ਕਿ ਸਰਕਾਰੀ ਕਰਮਚਾਰੀਆਂ ਤੋਂ ਲੈ ਕੇ ਜਥੇਦਾਰਾਂ ਦੇ ਸਿਰਾਂ ਉਪਰ ਵੀ ਬਸੰਤੀ ਦਸਤਾਰਾਂ ਸਜਾਉਣ ਦਾ ਹੁਕਮ ਜਾਰੀ ਕਰ ਦਿੱਤਾ।
ਸਹੀਦ ਏ ਆਜ਼ਮ ਦੇ 100ਵੇਂ ਜਨਮ ਦਿਨ ਨੂੰ ਗੁਜਰਿਆਂ ਅਜੇ ਬਹੁਤਾ ਵਕਤ ਨਹੀਂ ਬੀਤਿਆ, ਕਿ ਉਸੇ ਰਾਜ ਸਰਕਾਰ ਨੂੰ ਬਸੰਤੀ ਦੀ ਬਜਾਏ ਹੁਣ ਇਹ ਫੁਰਨਾ ਫੁਰ ਗਿਆ, ਕਿ ਬਸੰਤੀ ਦੇ ਬਜਾਏ ਸਹੀਦ ਏ ਆਜ਼ਮ ਨੂੰ ਚਿੱਟੇ ਲਿਬਾਸ ਵਿੱਚ ਦਿਖਾਉਣਾ ਜਿਆਦਾ ਲਾਹੇਵੰਦ ਰਹੇਗਾ। ਕਾਰਨ ਸਪਸ਼ਟ ਹੈ ਕਿ ਹੁਣ ਕਿਉਂਕਿ ਉਪ ਮੁੱਖ ਮੰਤਰੀ ਸ੍ਰ: ਸੁਖਬੀਰ ਸਿੰਘ ਬਾਦਲ ਦੇ ਜਾਤੀ ਤੇ ਸਿਆਸੀ ਸਰੀਕ ਸ੍ਰ: ਮਨਪ੍ਰੀਤ ਬਾਦਲ ਨੇ ਬਸੰਤੀ ਰੰਗ ਅਪਨਾ ਲਿਆ ਹੈ ਇਸ ਲਈ ਨੌਜਵਾਨ ਪੀੜੀ ਨੂੰ ਉਸਤੋਂ ਲਾਂਭੇ

ਕਰਨ ਲਈ ਇਹ ਪੈਂਤੜਾ ਕਿਸੇ ਹੱਦ ਤੱਕ ਸਹਾਈ ਹੋ ਸਕਦਾ ਹੈ।
ਕੁਲ ਮਿਲਾ ਕੇ ਕਿੱਸਾ ਕੁੱਤਾ ਇਹ ਕਿ ਭਗਤ ਸਿੰਘ ਦੀ ਵਿਚਾਰਧਾਰਾ ਨਾਲ ਨਾ ਤਾਂ ਦੂਰ ਦਾ ਸਬੰਧ ਮਨਪ੍ਰੀਤ ਬਾਦਲ ਦਾ ਹੈ ਅਤੇ ਨਾ ਹੀ ਸੁਖਬੀਰ ਦਾ।  ਯਤਨ ਦੋਵਾਂ ਸਰੀਕਾਂ ਦਾ ਇਹੋ ਹੀ ਹੈ ਕਿ ਆਪਣੇ ਸਿਆਸੀ ਹਿਤ ਸਾਧਣ ਵਾਸਤੇ ਲੋਕਾਂ ਨੂੰ ਭਰਮਾਉਣ ਲਈ ਸਹੀਦ ਏ ਆਜ਼ਮ ਨੂੰ ਵੀ ਵੋਟ ਰਾਜਨੀਤੀ ਲਈ ਇਸਤੇਮਾਲ ਕੀਤਾ ਜਾ ਸਕੇ।
-ਬੀ.ਐਸ. ਭੁੱਲਰ

ਲੇਖਕ ਉਘੇ ਪੱਤਰਕਾਰ ਹਨ।