ਲੰਬੀ ਹਲਕੇ 'ਚ 3 ਦਿਨ ਗਰਾਟਾਂ ਦੇ 'ਬਾਦਲ' ਵਰ੍ਹਨਗੇ

     -ਇੰਦਰ ਦੇਵਤਾ ਵੱਲੋਂ ਪਹਿਲਾਂ ਵਰ੍ਹਾਏ 20 ਲੱਖੀ ਮੀਂਹ ਤੋਂ ਪਿੰਡ ਕੁੱਤਿਆਂਵਾਲੀ ਦੇ ਲੋਕ ਨਾਖੁਸ਼-                                              

                                 ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਦੇਸ਼ 'ਚ ਸਭ ਤੋਂ ਵੱਧ ਮੀਂਹਾਂ ਲਈ ਮਸ਼ਹੂਰ ਚਿਰਾਪੂੰਜੀ ਦੇ ਪੰਜਾਬ 'ਚ ਸਭ ਤੋਂ ਵੱਧ ਗਰਾਂਟਾਂ ਦੇ ਗੱਫ਼ਿਆਂ ਦੇ ਮੀਂਹ ਵਰ੍ਹਨ ਲਈ ਪ੍ਰਸਿੱਧ ਉਸਦੇ ਹਮਰੁਤਬਾ ਹਕੂਮਤੀ ਹਲਕੇ ਲੰਬੀ ਵਿਚ ਕੱਲ੍ਹ ਤੋਂ ਤਿੰਨਾਂ ਦਿਨਾਂ ਲਗਾਤਾਰ ਇਹ ਬਰਸਾਤ ਹੋਣ ਜਾ ਰਹੀ ਹੈ। ਜਿਸ  ਲਈ ਇੰਦਰ ਦੇਵਤਾ ਵੱਲੋਂ ਹਲਕੇ ਦੇ 28 ਪਿੰਡਾਂ ਦੀ ਸ਼ਨਾਖ਼ਤ ਕਰ ਲਈ ਹੈ ਤਾਂ ਜੋ ਉਨ੍ਹਾਂ ਵਿਚ ਗਰਾਂਟਾਂ ਰੂਪੀ ਮੀਂਹ ਵਰ੍ਹਾ ਕੇ ਉਨ੍ਹਾਂ ਨੂੰ ਹਰਿਆਵਲ (ਵਿਕਾਸ) ਦੀ ਮੁੱਖ ਧਾਰਾ 'ਚ ਮਜ਼ਬੂਤੀ ਨਾਲ ਜੋੜਿਆ ਜਾ ਸਕੇ। 
        ਹਕੂਮਤ ਦੇ ਬੁਲਾਰੇ ਅਨੁਸਾਰ ਪਹਿਲੇ ਦਿਨ 8 ਪਿੰਡਾਂ ਵਿਚ ਸੰਗਤ ਦਰਸ਼ਨ ਦੇ ਬੈਨਰ ਹੇਠ ਇਹ ਬਰਸਾਤ ਕੀਤੀ ਜਾਵੇਗੀ। ਇਸ ਮੀਂਹ ਨੂੰ ਇੰਦਰ ਦੇਵਤਾ ਦੀ ਭੁਮਿਕਾ 'ਚ (ਮੁੱਖ ਮੰਤਰੀ) ਖੁਦ ਉਚੇਚੇ ਤੌਰ 'ਤੇ ਆਪਣੀ ਨਿਗਰਾਨੀ ਵਰ੍ਹਾਉਣਗੇ। ਪਤਾ ਲੱਗਿਆ ਹੈ ਕਿ ਇਹ ਮੀਂਹ ਦੀ ਤਿਆਰੀਆਂ ਲਈ ਹਕੂਮਤ ਦਾ ਜ਼ਿਲ੍ਹਾ ਤੰਤਰ ਪਿਛਲੇ ਕਾਫ਼ੀ ਦਿਨਾਂ ਤੋਂ ਸਰਗਰਮ ਸੀ।   
        ਮੀਂਹ ਵਰ੍ਹਾਉਣ ਲਈ ਕੱਲ੍ਹ 27 ਫਰਵਰੀ ਨੂੰ 9 ਵਜੇ ਦਾ ਸਮਾਂ ਮਿੱਥਿਆ ਗਿਆ ਹੈ। ਜਿਸਦੀ ਸ਼ੁਰੂਆਤ ਪਿੰਡ ਖੇਮਾਖੇੜਾ ਤੋਂ ਹੋਵੇਗੀ। ਪਤਾ ਲੱਗਿਆ ਹੈ ਕਿ ਉਕਤ ਮੀਂਹ ਲਈ ਅਧਿਕਾਰੀ ਅਤੇ ਠੇਕੇਦਾਰ ਤਬਕਾ ਕਾਫ਼ੀ ਉਤਸਾਹ ਵਿਚ ਹੈ ਕਿਉਂਕਿ ਇਸ ਮੀਂਹ ਨਾਲ ਭਾਵੇਂ ਸਬੰਧਤ ਪਿੰਡਾਂ ਦੇ ਲੋਕਾਂ ਭਾਵੇਂ ਬਹੁਤਾ ਫਾਇਦਾ ਨਾ ਹੋਵੇ ਪਰ ਇਨ੍ਹਾਂ ਦੇ ਘਰਾਂ ਵਿਚ ਵਿਚ ਆਰਥਿਕ ਹਰਿਆਵਲ ਲਈ ਇਹ ਮੀਂਹ ਕਾਫ਼ੀ ਕਿਫ਼ਾਇਤੀ ਸਾਬਤ ਹੋਣ ਦੀ ਉਮੀਦ ਹੈ। ਇਸਦੇ ਬਾਅਦ ਪਿੰਡ ਫੁੱਲੂ ਖੇੜਾ, ਅਰਨੀਵਾਲਾ ਵਜੀਰਾ, ਕੁੱਤਿਆਂ ਵਾਲੀ, ਤਰਮਾਲਾ, ਰੋੜਾਂਵਾਲੀ, ਫਤੂਹੀ ਖੇੜਾ ਅਤੇ ਸਿੱਖਵਾਲਾ ਦੀ ਵਾਰੀ ਆਵੇਗੀ। 
ਸੰਗਤ ਰੂਪੀ ਮੀਂਹ 'ਚ ਪਿੰਡ ਕੁੱਤਿਆਂਵਾਲੀ 'ਚ ਵਾਟਰ ਵਰਕਸ ਲਈ 20 ਲੱਖ ਰੁਪਏ ਦੀ ਗਰਾਂਟਾਂ ਦਾ ਮੀਂਹ ਪੁਆ  ਚੁੱਕੇ ਲੋਕ ਇਹ ਮੀਂਹ ਤੋਂ ਕਾਫ਼ੀ ਔਖੇ ਹਨ ਉਨ੍ਹਾਂ ਕਹਿਣਾ ਹੈ ਕਿ ਸੇਮ ਦੀ ਬਹੁਤਾਤ ਕਰਕੇ ਬਰਬਾਦ ਹੋ ਚੁੱਕੇ ਵਾਟਰ ਵਰਕਸ  ਦੀ ਮੁੜ ਉਸਾਰੀ ਲਈ 20 ਲੱਖ ਰੁਪਏ ਦੇਣ ਦੇ ਬਾਵਜੂਦ ਉਨ੍ਹਾਂ ਦੀ ਸਮੱਸਿਆ ਜਿਉਂ ਦੀ ਤਿਉਂ ਹੈ। ਉਨ੍ਹਾਂ ਦਾ ਦੋਸ਼ ਹੈ ਕਿ ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਅਮਲੇ ਦੀ ਕਥਿਤ ਮਿਲੀਭੁਗਤੀ ਸਦਕਾ ਠੇਕੇਦਾਰ ਨੇ ਹੇਠਲੇ ਦਰਜੇ ਦਾ ਕੰਮ ਕਰਕੇ ਇੰਦਰ ਦੇਵਤਾ ਵੱਲੋਂ ਖੁਦ ਵਰ੍ਹਾਏ ਮੀਂਹ ਦੀ ਤੌਹੀਨ ਕੀਤੀ ਹੈ। ਪਿੰਡ ਦੇ ਬੱਸ ਸਟਾਪ 'ਤੇ ਤਾਸ਼ ਖੇਡਦੇ ਬਜ਼ੁਰਗਾਂ ਨੇ ਦੱਸਿਆ ਕਿ ''ਕੀ ਦੱਸੀਏ ਤੁਹਾਨੂੰ, ਉਹ ਆਉਂਦਾ ਹੈ ਤੇ ਸਾਡੇ ਲਈ ਮੀਂਹ ਵਰ੍ਹਾ ਜਾਂਦੈ, ਪਰ ਮੀਂਹ ਦਾ ਸਾਰਾ ਪਾਣੀ ਠੇਕੇਦਾਰ ਅਤੇ ਅਫਸਰ ਪੀ ਜਾਂਦੇ ਹਨ। ਉਨ੍ਹਾਂ ਆਖਿਆ ਕਿ 20 ਲੱਖ ਰੁਪਏ ਵੀ ਉਨ੍ਹਾਂ ਦਾ 85 ਸਾਲਾ ਇੰਦਰਦੇਵਤਾ ਦੇ ਗਿਆ ਸੀ ਪਰ ਜੁਗਾੜੂ  ਤੌਰ 'ਤੇ ਵਾਟਰ ਵਰਕਸ ਦੀ ਜਮੀਂਦੋਜ਼ ਗੋਲੀ ਟੈਂਕੀ ਬਣਾ ਕੇ ਬੁੱਤਾ ਸਾਰ ਦਿੱਤਾ। ਪਿੰਡ ਦੇ ਲੋਕ ਵਾਟਰ ਵਰਕਸ ਜਰੀਏ ਸੇਮ ਵਾਲਾ ਗੰਦਾ ਪਾਣੀ ਪੀਣ ਨੂੰ ਮਜ਼ਬੂਰ ਹਨ, ਪਰ ਕੋਈ ਸੁਣਨ ਵਾਲਾ ਨਹੀਂ। ਇੱਕ ਤਾਸ਼ ਦਾ ਪੱਤਾ ਸੁੱਟਦੇ ਇੱਕ ਬਜ਼ੁਰਗ ਨੇ ਆਖਿਆ ਕਿ ਕੱਲ੍ਹ ਫਿਰ ਮੀਂਹ ਆਉਣੈ ਤੇ ਇੰਦਰ ਦੇਵਤਾ ਕੀ ਦੇ ਕੇ ਜਾਊ, ਹੁਣ ਤਾਂ ਡਰ ਲੱਗਣ ਪਿਐ ਗਰਾਟਾਂ ਦੇ ਮੀਂਹ ਤੋਂ। ਜਦੋਂ ਉਸਤੋਂ ਡਰ ਦਾ ਕਾਰਨ ਪੁੱਛਿਆ ਤਾਂ ਉਸਨੇ ਆਖਿਆ ਕਿ ਲੱਖਾਂ ਰੁਪਏ ਦੀਆਂ ਗਰਾਂਟਾਂ ਉਨ੍ਹਾਂ ਦੇ ਪਿੰਡ ਦੇ ਖਾਤੇ ਪੈ ਜਾਂਦੀਆਂ ਹਨ ਅਤੇ ਮੀਂਹ ਦਾ ਪਾਣੀ (ਰੁਪਏ) ਮਸੰਦ ਬਣੇ ਠੇਕੇਦਾਰ ਅਤੇ ਅਫ਼ਸਰ ਝੋਲੀਆਂ 'ਚ ਭਰ ਕੇ ਲੈ ਜਾਂਦੇ ਹਨ। ਦੱਸਣਯੋਗ ਹੈ ਕਿ ਇਸ ਪਿੰਡ ਵਿਚ ਜ਼ਮੀਨ ਹੇਠਲੇ ਪਾਣੀ ਦਾ ਪੱਧਰ ਮਹਿਜ਼ ਇੱਕ-ਦੋ ਫੁੱਟ 'ਤੇ ਹੈ। ਪਿੰਡ ਕੁੱਤਿਆਂਵਾਲੀ ਦੇ ਲੋਕਾਂ ਨੇ ਵਾਟਰ ਵਰਕਸ ਦੇ ਜਮੀਂਦੋਜ਼ ਸਟੋਰੇਜ਼ ਟੈਂਕ (ਸੰਪ) ਦੀ ਉਸਾਰੀ 'ਚ ਘਪਲੇਬਾਜ਼ੀ ਦ ਦੋਸ਼ ਮੜ੍ਹਦਿਆਂ ਹਕੂਮਤ ਤੋਂ ਪੜਤਾਲ ਕੀਤੀ ਹੈ। ਲੋਕਾਂ ਦੀ ਮੰਗ ਹੈ ਕਿ ਵਿਕਾਸ ਕਾਰਜਾਂ ਲਈ ਗਰਾਂਟਾਂ ਦਾ ਮੀਂਹ ਸਿਆਸੀ ਹਿੱਤਾਂ ਨੂੰ ਮੁੱਖ ਰੱਖਣ ਦੀ ਬਜਾਏ ਸਮੱਸਿਆਵਾਂ ਦੇ ਪੱਕੇ ਅਤੇ ਪੁਖਤਾ ਹੱਲ ਲਈ ਵਰ੍ਹਾਇਆ ਜਾਵੇ। 
ਇਸਦੇ ਇਲਾਵਾ 28 ਫਰਵਰੀ ਨੂੰ ਮਾਹਣੀ ਖੇੜਾ, ਸ਼ਾਮ ਖੇੜਾ, ਕਬਰਵਾਲਾ, ਕਰਮਗੜ੍ਹ ਅਤੇ ਢਾਣੀ ਨੱਥਾ ਸਿੰਘ, ਭਗਵਾਨ ਪੁਰਾ, ਆਲਮਵਾਲਾ, ਰੱਤਾ ਖੇੜਾ ਵੱਡਾ, ਰੱਤਾ ਖੇੜਾ ਛੋਟਾ ਅਤੇ ਬੋਦੀਵਾਲਾ ਤੋਂ ਇਲਾਵਾ 1 ਮਾਰਚ ਨੂੰ ਪਿੰਡ ਲੰਬੀ 'ਚ ਸਵੇਰੇ 9 ਵਜੇ, ਪੰਜਾਵਾ, ਕੱਖਾਂਵਾਲੀ, ਹਾਕੂਵਾਲਾ, ਫੱਤਾਕੇਰਾ, ਭੁੱਲਰਵਾਲਾ, ਕੰਦੂ ਖੇੜਾ, ਢਾਣੀ ਤੇਲੀਆਂ ਵਾਲੀ ਅਤੇ ਭੀਟੀਵਾਲਾ 'ਚ ਗਰਾਂਟਾਂ ਦੀ ਬਰਸਾਤ ਹੋਵੇਗੀ। 

ਚੋਣਾਂ ਦੀ ਗਿਣਤੀ ਦੇ ਡੇਢ ਦਿਨ ਪਹਿਲਾਂ ਤੱਕ ਖਾਮੋਸ਼ ਹੈ ਪਿੰਡ ਬਾਦਲ

                             -ਬਾਦਲ ਪਿੰਡ ਦੇ ਹਲਵਾਈ ਬਿਨਾਂ ਆਰਡਰ ਤੋਂ ਬਣਾਉਣ ਲੱਗੇ ਲੱਡੂ-
      ਪਿੰਡ ਦੇ ਬਜ਼ੁਰਗਾਂ ਦੇ ਕਥਨ : ਕਿਹਦੇ ਲਈ ਕੁਝ ਕਹੀਏ, ਜਿੱਤਣਾ ਵੀ ਪਿੰਡ ਬਾਦਲ ਨੇ ਹੈ ਤੇ ਹਾਰਨਾ ਵੀ
                                                            ਇਕਬਾਲ ਸਿੰਘ ਸ਼ਾਂਤ

        ਕਈ ਦਹਾਕਿਆਂ ਤੋਂ ਸੂਬੇ ਦੀ ਸਿਆਸਤ 'ਤੇ ਆਪਣੀ ਗਹਿਰੀ ਛਾਪ ਰੱਖਦੀ ਪਿੰਡ ਬਾਦਲ ਦੀ ਸਰਜਮੀਂ ਆਪਣੇ ਤਿੰਨ ਬਾਦਲ ਪੁੱਤਾਂ ਪਾਸ਼, ਦਾਸ ਅਤੇ ਮਹੇਸ਼ਇੰਦਰ ਵਿਚਕਾਰ ਹੋਈ ਚੋਣ ਜੰਗ ਦੇ ਨਤੀਜਿਆਂ ਦੇ ਡੇਢ ਦਿਨ ਪਹਿਲਾਂ ਤੱਕ ਵੀ ਬਿਲਕੁੱਲ ਖਾਮੋਸ਼ ਹੈ, ਕਿਉਂਕਿ ਚੋਣਾਂ ਦੇ ਨਤੀਜਿਆਂ ਉਪਰੰਤ ਜਿੱਤੇਗਾ ਵੀ ਪਿੰਡ ਬਾਦਲ ਅਤੇ ਹਾਰੇਗਾ ਵੀ ਪਿੰਡ ਬਾਦਲ। ਅਜਿਹੇ ਵਿਚ ਨਤੀਜੇ ਆਉਣ 'ਤੇ ਜਿੱਤ ਅਤੇ ਹਾਰ ਨੂੰ ਇੱਕੋ ਸਮੇਂ ਸਾਹਮਣੇ ਵੇਖ ਇੱਥੋਂ ਦੇ ਆਮ ਬਾਸ਼ਿੰਦੇ ਵੀ ਖੁੱਲ੍ਹ ਕੇ ਕੁਝ ਕਹਿਣੋਂ ਗੁਰੇਜ਼ ਕਰ ਰਹੇ ਹਨ। ਹਰ ਹਾਲਤ ਵਿਚ ਲੰਬੀ ਹਲਕੇ ਤੋਂ ਜਿੱਤ ਬਾਦਲ ਪਿੰਡ ਦੀ ਹੀ ਹੋਣ ਕਰਕੇ ਇੱਥੋਂ ਦੇ ਹਲਵਾਈਆਂ ਵੱਲੋਂ ਆਪਣੀਆਂ ਦੁਕਾਨਾਂ 'ਤੇ ਵੱਡੀ ਗਿਣਤੀ ਲੱਡੂ ਬਣਾਉਣ ਦਾ ਕਾਰਜ ਆਰੰਭ ਕਰ ਦਿੱਤਾ ਗਿਆ ਹੈ। ਹਾਲਾਂਕਿ ਅਜੇ ਤੱਕ ਉਨ੍ਹਾਂ ਨੂੰ ਕਿਸੇ ਵੀ ਧਿਰ ਵੱਲੋਂ ਅਗਾਊਂ ਆਰਡਰ ਨਹੀਂ ਮਿਲਿਆ।

               ਪਰਸੋਂ 6 ਮਾਰਚ ਨੂੰ ਆਉਣ ਵਾਲੇ ਚੋਣ ਨਤੀਜਿਆਂ ਵਿਚ ਪਾਸ, ਦਾਸ ਅਤੇ ਮਹੇਸ਼ਇੰਦਰ ਦੇ ਧੜੇ ਆਪੋ-ਆਪਣੀ ਜਿੱਤ ਨੂੰ ਲੈ ਕੇ ਕਾਫ਼ੀ ਆਸਵੰਦ ਹਨ, ਪਰ ਉਥੇ ਸਰੀਕਾਂ ਹੱਥੋਂ ਹਾਰ ਦਾ ਡਰ ਵੀ ਕਿਸੇ ਕੋਨੇ ਵਿਚੋਂ ਝਲਕਾਰੇ ਮਾਰ ਰਿਹਾ ਹੈ। ਸ਼ਾਇਦ ਇਸੇ ਕਰਕੇ ਅਕਾਲੀ-ਭਾਜਪਾ ਗੱਠਜੋੜ ਦੇ ਉਮੀਦਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਪਿੰਡ ਬਾਦਲ ਵਿਖੇ ਰਿਹਾਇਸ਼ 'ਤੇ ਬੀਤੀ 1 ਮਾਰਚ ਤੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸੰਪਟ ਪਾਠ ਚੱਲ ਰਹੇ ਹਨ। ਜਿਸ ਦਾ ਭੋਗ ਵੋਟਾਂ ਦੀ ਗਿਣਤੀ ਵਾਲੇ ਦਿਨ 6 ਮਾਰਚ ਨੂੰ ਪੈਣਾ ਹੈ। ਜਿਸ ਦੀ ਸੇਵਾ ਨਾਨਕਸਰ ਟਕਸਾਲ (ਜਗਰਾਓਂ) ਦੇ ਗ੍ਰੰਥੀ ਸਿੰਘਾਂ ਵੱਲੋਂ ਨਿਭਾਈ ਜਾ ਰਹੀ ਹੈ। ਦੱਸਣਯੋਗ ਹੈ ਕਿ ਮੁੱਖ ਮੰਤਰੀ ਬਾਦਲ ਦੀ ਸੰਸਦ ਮੈਂਬਰ ਨੂੰਹ ਬੀਬੀ ਹਰਸਿਮਰਤ ਕੌਰ ਬਾਦਲ ਸੰਪਟ ਪਾਠ ਦੇ ਪ੍ਰਕਾਸ਼ ਵਾਲੇ ਦਿਨ ਤੋਂ ਪਿੰਡ ਬਾਦਲ ਵਿਖੇ ਰਿਹਾਇਸ਼ 'ਤੇ ਹਨ।

              ਵਿਧਾਨਸਭਾ ਚੋਣਾਂ ਦੇ ਨਤੀਜੇ ਆਉਣ 'ਚ ਮਹਿਜ਼ ਡੇਢ ਕੁ ਦਿਨ ਬਾਕੀ ਰਹਿਣ ਕਰਕੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅੱਜ ਸਵੇਰੇ 11 ਵਜੇ ਪਿੰਡ ਬਾਦਲ ਵਿਖੇ ਪੁੱਜ ਗਏ। ਜਦੋਂਕਿ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਅੱਜ ਦੇਰ ਬਾਦਲ ਪਿੰਡ ਪੁੱਜ ਰਹੇ ਹਨ। ਇਸਤੋਂ ਇਲਾਵਾ ਦੂਜੇ ਪਾਸੇ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਮਹੇਸ਼ਇੰਦਰ ਸਿੰਘ ਬਾਦਲ ਰੋਜ਼ਾਨਾ ਵਾਂਗ ਆਪਣੀ ਜੱਦੀ ਰਿਹਾਇਸ਼ 'ਤੇ ਵਰਕਰਾਂ ਨੂੰ ਮਿਲ ਰਹੇ ਹਨ। ਪੀ.ਪੀ.ਪੀ. ਦੇ ਉਮੀਦਵਾਰ ਗੁਰਦਾਸ ਸਿੰਘ ਬਾਦਲ ਹੁਰਾਂ ਦੀ ਦਿਨ ਚਰਿਆ ਵੀ ਆਮ ਵਾਂਗ ਹੀ ਹੈ।

                  ਪਿੰਡ ਬੱਸ ਅੱਡੇ ਕੋਲ ਖੜ੍ਹੇ ਖੁੰਡ ਚਰਚਾ ਕਰ ਰਹੇ ਬਜ਼ੁਰਗਾਂ ਨੇ ਚੋਣ ਨਤੀਜਿਆਂ ਬਾਰੇ ਪੁੱਛਣ 'ਤੇ ਚੁੱਪੀ ਵੱਟਦਿਆਂ ਪਹਿਲਾਂ ਤਾਂ ਕੁਝ ਕਹਿਣ ਤੋਂ ਇਨਕਾਰ ਕਰ ਦਿੱਤਾ ਪਰ ਬਾਅਦ ਵਿਚ ਪੁੱਛਣ 'ਤੇ ਗੁਰਦੇਵ ਸਿੰਘ ਨਾਂਅ ਦੇ ਇੱਕ ਬਜ਼ੁਰਗ ਨੇ ਕਿਹਾ ਕਿ ਤਿਕੋਣਾ ਮੁਕਾਬਲਾ ਹੈ ਕੁਝ ਕਿਹਾ ਨਹੀਂ ਜਾ ਸਕਦਾ ਹੈ। ਸਾਡੇ ਲਈ ਤਿੰਨੋ ਇੱਕੋ ਜਿਹੇ ਹਨ। ਉਥੇ ਹੀ ਕੋਲ ਖੜ੍ਹੇ ਇੱਕ ਹੋਰ ਬਜ਼ੁਰਗ ਨੇ ਕਿਹਾ ਕਿ ਅਸਲ ਮੁਕਾਬਲਾ ਤਾਂ ਦੋ ਭਰਾਵਾਂ ਵਿਚਕਾਰ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਕਿਹਦੇ ਲਈ ਕੁਝ ਕਹੀਏ, ਜਿੱਤਣਾ ਵੀ ਪਿੰਡ ਬਾਦਲ ਨੇ ਹੈ ਤੇ ਹਾਰਨਾ ਵੀ ਇਸੇ ਪਿੰਡ ਦੀ ਕਿਸਮਤ ਵਿਚ ਹੈ।

              ਉਥੋਂ ਮਹਿਜ਼ ਸੌ ਕੁ ਫੁੱਟ ਦੂਰੀ 'ਤੇ ਸਥਿਤ ਹਲਵਾਈ ਦੀਆਂ ਦੁਕਾਨਾਂ 'ਤੇ ਵੱਟੇ ਜਾ ਰਹੇ ਲੱਡੂਆਂ ਅਤੇ ਬਣਾਈ ਜਾ ਲੱਡੂਆਂ ਲਈ ਬੂੰਦੀ ਬਾਰੇ ਪੁੱਛੇ ਜਾਣ 'ਤੇ ਹਲਵਾਈਆਂ ਨੇ ਪੁੱਛੇ ਜਾਣ 'ਤੇ ਜਿੱਤ ਹਾਰ ਦੇ ਮਸਲੇ ਤੋਂ ਖੁਦ ਨੂੰ ਦੂਰ ਕਰਦਿਆਂ ਕਿਹਾ ਕਿ ਵਿਆਹਾਂ ਦਾ ਸੀਜਨ ਹੈ ਇਸ ਲਈ ਬਣਾ ਰਹੇ ਹਾਂ। ਜਦੋਂ ਦੁਕਾਨ ਵਿਚ ਬੇਸਨ ਨਾਲ ਭਰੀਆਂ ਬੋਰੀਆਂ ਬਾਰੇ ਪੁੱਛੇ ਜਾਣ 'ਤੇ ਹਲਵਾਈ ਨੇ ਕਿਹਾ ਤੁਹਾਡੀ ਖ਼ਬਰ ਰਹਿ ਜਾਣੀ ਹੈ ਅਤੇ ਸਾਡੇ ਕੁਝ ਵੱਟਿਆ ਨਹੀਂ ਜਾਣਾ।

               ਬਾਅਦ ਕੁਝ ਮਿੰਟਾਂ ਦੀ ਗੱਲਬਾਤ ਦੌਰਾਨ ਹਲਵਾਈਆਂ ਨੇ ਮੰਨਦਿਆਂ ਕਿਹਾ ਕਿ ਉਨ੍ਹਾਂ ਕੋਲ ਅਜੇ ਤੱਕ ਲੱਡੂਆਂ ਬਣਾਉਣ ਦਾ ਆਰਡਰ ਕਿਸੇ ਧਿਰ ਵੱਲੋਂ ਨਹੀਂ ਆਇਆ ਪਰ ਚੋਣ ਨਤੀਜਿਆਂ ਨੂੰ ਲੈ ਕੇ 13-14 ਕੁਇੰਟਲ ਬੇਸਨ ਮੰਗਵਾਇਆ ਗਿਆ ਹੈ। ਜਦੋਂ ਕਿ ਉਸਦੇ ਗੁਆਂਢੀ ਹਲਵਾਈ ਨੇ ਕਿਹਾ ਕਿ ਵੱਡੀ ਗਿਣਤੀ ਲੱਡੂ ਤਾਂ ਲੰਬੀ ਕਸਬੇ ਵਿਚ ਬਣ ਰਹੇ ਹਨ। ਇਸੇ ਦੌਰਾਨ ਸੜਕ ਤੋਂ ਲੰਘ ਰਹੇ ਇੱਕ ਦਲਿਤ ਬਜ਼ੁਰਗ ਨੂੰ ਜਦੋਂ ਚੋਣ ਨਤੀਜਿਆਂ ਬਾਰੇ ਪੁੱਛਿਆ ਗਿਆ ਤਾਂ ਉਸਨੇ ਤਲਖੀ ਭਰੇ ਲਹਿਜੇ ਵਿਚ ਕਿਹਾ ਕਿ 5 ਵਰ੍ਹਿਆਂ 'ਚ ਤਾਂ ਕੁਝ ਮਿਲਿਆ ਹੁਣ ਸਾਨੂੰ ਕੀ ਮਿਲ ਜਾਣਾ ਐ।

ਲੰਬੀ 'ਚ ਅਕਾਲੀ ਦਲ (ਬ) ਦੇ 31 ਹਜ਼ਾਰ ਝੰਡਿਆਂ ਨਾਲ ਭਰੀ ਗੱਡੀ ਚੋਣ ਕਮਿਸ਼ਨ ਦੀ ਟੀਮ ਅੜਿੱਕੇ ਚੜ੍ਹੀ

-ਝੰਡਿਆਂ 'ਤੇ ਤੱਕੜੀ ਦੇ ਨਿਸ਼ਾਨ ਤੋਂ ਇਲਾਵਾ ਵੱਡੇ ਬਾਦਲ, ਸੁਖਬੀਰ  ਤੇ ਹਰਸਿਮਰਤ ਕੌਰ ਦੀਆਂ ਛਪੀਆਂ ਸਨ ਤਸਵੀਰਾਂ-
                                                        ਇਕਬਾਲ ਸਿੰਘ ਸ਼ਾਂਤ
               ਲੰਬੀ : ਐਤਕੀਂ ਚੋਣ ਜ਼ਾਬਤੇ ਦੀ ਸਖ਼ਤੀ ਖੂਬ ਰੰਗ ਵਿਖਾ ਰਹੀ ਹੈ ਤੇ ਚੋਣ ਕਮਿਸ਼ਨ ਦੇ ਲੰਮੇ ਹੱਥਾਂ ਤੋਂ ਪੰਜਾਬ ਦਾ ਵੀ.ਆਈ.ਪੀ. ਹਲਕਾ ਲੰਬੀ ਵੀ ਵਾਂਝਾ ਨਹੀਂ ਰਿਹਾ।
              ਅੱਜ ਚੋਣ ਕਮਿਸ਼ਨ ਦੀ ਇੱਕ ਵੀਡੀਓਗਰਾਫ਼ੀ ਟੀਮ ਨੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਹਲਕੇ ਲੰਬੀ ਵਿਖੇ ਅਕਾਲੀ ਦਲ (ਬ) ਵਾਲੇ ਝੰਡਿਆਂ ਨਾਲ ਭਰਿਆ ਇੱਕ ਪਿਕਅਪ ਡਾਲਾ ਕਾਬੂ ਕੀਤਾ। ਬਰਾਮਦ ਕੀਤੇ ਝੰਡਿਆ ਦੀ ਗਿਣਤੀ ਲਗਭਗ 31 ਹਜ਼ਾਰ ਦੱਸੀ ਜਾਂਦੀ ਹੈ। ਜਿਨ੍ਹਾਂ 'ਤੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ, ਸ. ਸੁਖਬੀਰ ਸਿੰਘ ਬਾਦਲ ਅਤੇ ਬੀਬੀ ਹਰਸਿਮਰਤ ਕੌਰ ਬਾਦਲ ਦੀਆਂ ਤਸਵੀਰਾਂ ਤੋਂ ਇਲਾਵਾ ਸ਼੍ਰੋਮਣੀ ਅਕਾਲੀ ਦਲ (ਬ) ਦਾ ਚੋਣ ਨਿਸ਼ਾਨ 'ਤੱਕੜੀ' ਵੀ ਛਪਿਆ ਹੋਇਆ ਸੀ। ਜਿਨ੍ਹਾਂ ਦੀ ਕੀਮਤ ਲੱਖਾਂ ਰੁਪਏ ਮੰਨੀ ਜਾ ਰਹੀ ਹੈ।
          ਇਹ ਝੰਡਿਆਂ ਨਾਲ ਭਰਿਆ ਡਾਲਾ ਚੋਣ ਕਮਿਸ਼ਨ ਦੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਅਗਵਾਈ ਵਾਲੀ ਇੱਕ ਵੀਡੀਓਗਰਾਫ਼ੀ ਟੀਮ ਦੇ ਉਸ ਵੇਲੇ ਅੜਿੱਕੇ ਚੜ੍ਹ ਗਿਆ, ਜਦੋਂ ਉਸਦਾ ਡਰਾਈਵਰ ਅਤੇ ਝੰਡਿਆ ਦਾ ਸਪਲਾਇਰ ਉਕਤ ਖੇਪ ਨੂੰ ਕਿਧਰੇ ਲਾਹੁਣ ਦੀ ਤਿਆਰੀ ਵਿਚ ਸਨ। ਇਸੇ ਦੌਰਾਨ ਫਲਾਇੰਕ ਸਕੂਐਡ ਟੀਮ ਦੇ ਮੁਖੀ ਗੁਰਮੀਤ ਸਿੰਘ ਨਾਇਬ ਤਹਿਸੀਲਦਾਰ ਅਤੇ ਲੰਬੀ ਥਾਣੇ ਦੇ ਸਬ ਇੰਸਪੈਕਟਰ ਬੰਤਾ ਸਿੰਘ ਨੇ ਪੁਲਿਸ ਸਮੇਤ ਪੁੱਜੇ ਪਿਕਅਪ ਡਾਲਾ ਨੰਬਰ ਪੀ.ਬੀ.11 ਏ.ਆਰ/9502 ਨੂੰ ਕਬਜ਼ੇ ਲੈ ਕੇ ਲੰਬੀ ਥਾਣੇ ਵਿਚ ਲੈ ਗਏ।
         
              ਜਿੱਥੇ ਪੁੱਛ-ਗਿੱਛ ਦੌਰਾਨ ਝੰਡਿਆਂ ਨੂੰ ਕਾਬੂ ਕੀਤੇ ਵਿਅਕਤੀਆਂ ਦੀ ਸ਼ਨਾਖ਼ਤ ਯਸ਼ਪਾਲ ਵਾਸੀ ਪਟਿਆਲਾ, ਸੋਨੂੰ ਕੁਮਾਰ ਵਾਸੀ ਸ਼ੇਖਪੁਰਾ ਵਜੋਂ ਹੋਈ। ਇਸੇ ਦੌਰਾਨ ਵਿਧਾਨਸਭਾ ਹਲਕਾ ਲੰਬੀ ਦੇ ਰਿਟਰਨਿੰਗ ਅਫਸਰ ਸ੍ਰੀ  ਸੰਦੀਪ ਰਿਸ਼ੀ ਵੀ ਮੌਕੇ 'ਤੇ ਪਹੁੰਚ ਗਏ। ਜਿਨ੍ਹਾਂ ਨੇ ਉਕਤ ਮਾਮਲੇ ਬਾਰੇ ਲੰਬੀ ਦੇ ਥਾਣਾ ਮੁਖੀ, ਫਲਾਇੰਗ ਸਕੂਐਡ ਦੇ ਮੁਖੀ ਗੁਰਮੀਤ ਸਿੰਘ ਵੀਡੀਓਗਰਾਫ਼ੀ ਟੀਮ ਦੇ ਮੁਖੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਤੋਂ ਸਮੁੱਚੇ ਮਾਮਲੇ ਦੀ ਜਾਣਕਾਰੀ ਲਈ।
               
                  ਲੰਬੀ ਥਾਣੇ ਵਿਚ ਝੰਡਿਆਂ ਦੇ ਸਪਲਾਇਰ ਸ੍ਰੀ ਯਸ਼ਪਾਲ ਨੇ ਦੱਸਿਆ ਕਿ ਉਹ ਕੁਝ ਸਮਾਂ ਪਹਿਲਾਂ ਤੱਕ ਪੋਲੀਥੀਨ ਦੇ ਲਿਫਾਫਿਆਂ ਦਾ ਕਾਰੋਬਾਰ ਕਰਦਾ ਸੀ। ਪਰ ਸਰਕਾਰ ਵੱਲੋਂ ਪੋਲੀਥੀਨ ਦੇ ਕਾਰੋਬਾਰ 'ਤੇ ਨੱਥ ਪਾਉਣ ਉਪਰੰਤ ਉਹ ਰੋਜੀ-ਰੋਟੀ ਚਲਾਉਣ ਲਈ ਚੋਣ ਸਮੱਗਰੀ ਦੇ ਕਿੱਤੇ ਨਾਲ ਜੁੜਿਆ ਸੀ ਪਰ ਅੱਜ ਪੁਲਿਸ ਵੱਲੋਂ ਚੋਣ ਸਮੱਗਰੀ ਦੇ ਨਾਲ ਫੜਣ ਨਾਲ ਜਿੱਥੇ ਉਸਦੇ ਰੁਜ਼ਗਾਰ 'ਤੇ ਪ੍ਰਸ਼ਨ ਚਿੰਨ੍ਹ ਲੱਗ ਗਿਆ ਹੈ, ਉਥੇ ਪੁਲਿਸ ਵੱਲੋਂ ਜ਼ਬਤ ਕੀਤੇ ਇਨ੍ਹਾਂ ਝੰਡਿਆਂ 'ਤੇ ਆਈ ਲਾਗਤ ਅਤੇ ਕਾਰੀਗਰਾਂ ਦੀ ਮਜ਼ਦੂਰੀ ਦੀ ਉਸਦੇ ਸਿਰ ਪਵੇਗੀ। ਉਸ ਅਨੁਸਾਰ ਪਿਕਅਪ ਡਾਲੇ ਵਿਚ ਵੱਖ-ਵੱਖ ਸਾਇਜ਼ਾਂ ਅਨੁਸਾਰ 40 ਤੋਂ 50 ਹਜ਼ਾਰ ਝੰਡੇ ਦੇ ਕਰੀਬ ਲੱਦੇ ਹੋਏ ਹਨ।
           ਜਦੋਂ ਉਸਨੂੰ ਪੁੱਛਿਆ ਗਿਆ ਕਿ ਹਜ਼ਾਰਾਂ ਦੀ ਗਿਣਤੀ ਵਿਚ ਲੰਬੀ ਵਿਖੇ ਕਿਸਨੂੰ ਸਪਲਾਈ ਕਰਨ ਜਾ ਰਿਹਾ ਸੀ ਤਾਂ ਯਸ਼ਪਾਲ ਕੋਈ ਪੁਖ਼ਤਾ ਜਵਾਬ ਨਾ ਦੇ ਸਕਿਆ ਅਤੇ ਉਸਨੇ ਸਿਰਫ਼ ਇੰਨਾ ਕਿਹਾ ਹੀ ਕਿਹਾ ਕਿ ਉਹਦੇ ਕੋਲ ਕਿਸੇ ਦਾ ਆਰਡਰ ਨਹੀਂ ਸੀ। ਉਹ ਤਾਂ ਖੁੱਲ੍ਹੇ ਤੌਰ 'ਤੇ ਝੰਡੇ ਵੇਚਣ ਲਈ ਆਇਆ ਸੀ।

          ਲੰਬੀ ਥਾਣੇ ਵਿਖੇ ਰਿਟਰਨਿੰਗ ਅਫਸਰ ਸ੍ਰੀ ਸੰਦੀਪ ਰਿਸ਼ੀ ਨੇ ਦੱਸਿਆ ਕਿ ਇਨ੍ਹਾਂ ਝੰਡਿਆਂ ਨੂੰ ਜ਼ਬਤ ਕਰਕੇ ਲੰਬੀ ਪੁਲਿਸ ਨੂੰ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

               ਇਸੇ ਦੌਰਾਨ ਲੰਬੀ ਥਾਣਾ ਦੇ ਮੁਖੀ ਗੁਰਪ੍ਰੀਤ ਸਿੰਘ ਬੈਂਸ ਨੇ ਦੱਸਿਆ ਕਿ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਸ਼ਿਕਾਇਤ 'ਤੇ ਝੰਡੇ ਅਤੇ ਗੱਡੀ ਨੂੰ ਕਬਜ਼ੇ ਵਿਚ ਲੈ ਕੇ ਯਸ਼ਪਾਲ ਪੁੱਤਰ ਮਦਨ ਗੋਪਾਲ ਵਾਸੀ ਅਰਬਨ ਸਟੇਟ, ਪਟਿਆਲਾ, ਸੋਨੂੰ ਕੁਮਾਰ ਪੁੱਤਰ ਰਾਜਿੰਦਰ ਸਿੰੰਘ ਵਾਸੀ ਸ਼ੇਖਪੁਰਾ (ਪਟਿਆਲਾ) ਖਿਲਾਫ਼ ਧਾਰਾ 127-ਏ ਰਿਪਰੈਜੈਂਟੇਸ਼ਨ ਆਫ਼ ਪੀਪਲ ਐਕਟ 1951 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
ਸਬ ਇੰਸਪੈਕਟਰ ਬੰਤਾ ਸਿੰਘ ਦੇ ਅਨੁਸਾਰ ਪਿਕਅਪ ਡਾਲੇ ਵਿਚ ਗਿਣਤੀ ਦੌਰਾਨ 62 ਗੱਟੇ ਬਰਾਮਦ ਕੀਤੇ ਗਏ, ਜਿਨ੍ਹਾਂ ਵਿਚ ਪ੍ਰਤੀ ਗੱਟੇ ਵਿਚ 500 ਦੇ ਹਿਸਾਬ ਨਾਲ 31 ਹਜ਼ਾਰ ਝੰਡੇ ਸਨ।
         
             ਲੰਬੀ ਹਲਕੇ ਵਿਚ ਸ਼੍ਰ੍ਰੋਮਣੀ ਅਕਾਲੀ (ਬ) ਦੇ ਝੰਡਿਆਂ ਨਾਲ ਭਰੀ ਗੱਡੀ ਫੜੇ ਜਾਣ ਦੀ ਖੂਬ ਚਰਚਾ ਹੈ। ਜਿੱਥੇ ਆਮ ਜਨਤਾ ਇਸ ਕਾਰਵਾਈ ਨੂੰ ਚੋਣ ਕਮਿਸ਼ਨ ਦੀ ਸਖ਼ਤੀ ਦਾ ਸਿੱਟਾ ਦੱਸ ਰਹੀ ਹੈ, ਉਥੇ ਅਕਾਲੀ ਦਲ ਨੇ ਇਸ ਮਾਮਲੇ 'ਤੇ ਚੁੱਪੀ ਧਾਰੀ ਹੋਈ ਹੈ।

ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਖੌਫ਼ ਅਕਾਲੀਆਂ ਦੇ ਮਨ 'ਤੇ ਛਾਇਆ ਰਿਹਾ

                                                                  ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਕੱਲ੍ਹ ਪਿੰਡ ਕੰਦੂਖੇੜਾ ਵਿਖੇ ਮੁੱਖ ਮੰਤਰੀ ਦਾ ਚੋਣ ਜਲਸਾ ਕਮਿਊਨਿਟੀ ਸੈਂਟਰ ਦੇ ਰਕਬੇ ਵਿਚ ਹੋਣ ਸਬੰਧ ਰਿਪੋਰਟਾਂ ਨਸ਼ਰ ਹੋਣ ਦਾ ਖੌਫ਼ ਪ੍ਰਸ਼ਾਸਨਕ ਤੰਤਰ ਅਤੇ ਅਕਾਲੀ ਵਰਕਰਾਂ ਵਿਚ ਕਾਫ਼ੀ ਹੱਦ ਤੱਕ ਵੇਖਣ ਨੂੰ ਮਿਲਿਆ। ਅੱਜ ਮੁੱਖ ਮੰਤਰੀ ਵੱਲੋਂ ਪਿੰਡ ਲਾਲਬਾਈ ਵਿਖੇ ਆਰ.ਓ. ਦੇ ਨਾਲ ਖਹਿੰਦੀ ਪੰਚਾਇਤੀ ਜ਼ਮੀਨ 'ਤੇ ਕੀਤੇ ਜਾ ਰਹੇ ਚੋਣ ਜਲਸੇ ਦੀਆਂ ਤਸਵੀਰਾਂ ਖਿੱਚਣ 'ਤੇ ਜਿੱਥੇ ਉੱਪ ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਅਵਤਾਰ ਵਣਵਾਲਾ ਅਤੇ ਮਾਰਕਫੈੱਡ ਦੇ ਨਿਦੇਸ਼ਕ ਅਤੇ ਸੀਨੀਅਰ ਅਕਾਲੀ ਆਗੂ ਤੇਜਿੰਦਰ ਸਿੰਘ ਮਿੱਡੂਖੇੜਾ ਹੁਰੇ ਪੱਤਰਕਾਰਾਂ ਤੋਂ ਮਿੱਤਰਪੁਣੇ ਅਤੇ ਚੰਗੇਰੇ ਸੰਬੰਧਾਂ ਦੀ ਦੁਹਾਈ ਦੇ ਕੇ ਵਿਚ ਕੈਮਰੇ ਮੁਹਰੇ ਖੜ੍ਹੇ ਹੋ ਕੇ ਫੋਟੋਗਰਾਫ਼ੀ ਨਾ ਕਰਨ ਦੀ ਅਪੀਲ ਕਰਦੇ ਰਹੇ। ਜਦੋਂਕਿ ਇਸ ਦੌਰਾਨ ਅਕਾਲੀ ਵਰਕਰ ਵਜੋਂ ਵਿਚਰਦੇ ਜਾਪਦੇ ਮੁੱਖ ਮੰਤਰੀ ਦੇ ਸੁਰੱਖਿਆ ਅਮਲੇ ਦੇ ਕੁਝ ਕਰਮਚਾਰੀ ਵੀ ਟੇਢੀਆਂ ਅੱਖਾਂ ਨਾਲ ਪ੍ਰਭਾਵ ਪਾਉਣ ਦੀ ਕੋਸ਼ਿਸ਼ ਕਰਦੇ ਮਹਿਸੂਸ ਕੀਤੇ ਗਏ।
ਇਸੇ ਤਰ੍ਹਾਂ ਹਲਕੇ ਦੇ ਪਿੰਡ ਥਰਾਜਵਾਲਾ ਵਿਖੇ ਵੀ ਖੇਡ ਸਟੇਡੀਅਮ 'ਚ ਹੋ ਰਹੇ ਜਲਸੇ ਦੀਆਂ ਫੋਟੋਆਂ ਖਿੱਚਣ 'ਤੇ ਉਥੇ ਮੌਜੂਦ ਆਯੋਜਕਾਂ ਵਿਚ ਸਹਿਮ ਜਿਹਾ ਦੌੜ ਗਿਆ ਤੇ ਉਨ੍ਹਾਂ ਵੱਲੋਂ ਤੁਰੰਤ ਸਟੇਡੀਅਮ ਵਿਚ ਬਣੇ ਜਿੰਮ ਦੇ ਕਮਰੇ ਦੀ ਕੰਧ 'ਤੇ ਲਿਖੇ ਨਾਂਅ ਜਿੰਮ ਖਾਨਾ ਪਿੰਡ ਥਰਾਜਵਾਲਾ 'ਤੇ ਕਰਮਚਾਰੀਆਂ ਨੂੰ ਪੌੜੀ ਲਾ ਕੇ ਇੱਕ ਗੰਦੀ ਜਿਹੀ ਪੱਲੀ ਨਾਲ ਢਕਵਾ ਕੇ ਲੁਕੋਣ ਦੀ ਕੋਸ਼ਿਸ਼ ਸ਼ੁਰੂ ਕਰ ਦਿੱਤੀ। ਇਸੇ ਦੌਰਾਨ ਚੋਣ ਕਮਿਸ਼ਨ ਵੱਲੋਂ ਨਿਯੁਕਤ ਸ੍ਰੀ ਅਮਰਜੀਤ ਸਿੰਘ ਸਿੱਧੂ  ਦੀ ਅਗਵਾਈ ਵਾਲੀ ਟੀਮ ਵੱਲੋਂ ਮੌਕੇ 'ਤੇ ਪਹੁੰਚ ਕੇ ਪੰਡਾਲ ਵਗੈਰਾ ਦੀ ਨਿਯਮਾਂ ਅਨੁਸਾਰ ਵੀਡੀਓਗਰਾਫ਼ੀ ਕਰਵਾਈ ਗਈ।



ਮੁੱਖ ਮੰਤਰੀ ਦੇ ਅਹੁਦੇ ਲਈ ਕਾਂਗਰਸੀਆਂ ਵਿਚਕਾਰ ਘਸਮਾਨ ਮੱਚਿਆ ਹੋਇਐ : ਬਾਦਲ  
                                                          ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਕਾਂਗਰਸ ਆਗੂਆਂ ਵਿਚਕਾਰ ਮੁੱਖ ਮੰਤਰੀ ਦੇ ਅਹੁਦੇ ਨੂੰ ਲੈ ਕੇ ਘਸਮਾਨ ਮੱਚਿਆ ਹੋਇਆ ਹੈ। ਕੈਪਟਨ ਅਮਰਿੰਦਰ, ਬੀਬੀ ਭੱਠਲ, ਪ੍ਰਤਾਪ ਬਾਜਵਾ ਸਮੇਤ ਕਈ ਹੋਰ ਮੁੱਖ ਮੰਤਰੀ ਦੇ ਅਹੁਦੇ ਲਈ ਹੁਣੇ ਤੋਂ ਤਰਲੋਮੱਛੀ ਹੋਈ ਫਿਰਦੇ ਨੇ, ਜਦੋਂਕਿ ਕਾਂਗਰਸ ਅਜੇ ਤੱਕ ਆਪਣੀਆਂ ਟਿਕਟਾਂ ਦਾ ਐਲਾਨ ਨਹੀਂ ਕਰ ਸਕੀ।
ਉਹ ਅੱਜ ਲੰਬੀ ਹਲਕੇ ਦੇ ਪਿੰਡਾਂ ਲੰਬੀ, ਬੀਦੋਵਾਲੀ, ਲਾਲਬਾਈ, ਥਰਾਜਵਾਲਾ ਸਮੇਤ ਵੱਖ-ਵੱਖ ਪਿੰਡਾਂ ਵਿਚ ਚੋਣ ਜਲਸਿਆਂ ਨੂੰ ਸੰਬੋਧਨ ਕਰ ਰਹੇ ਸਨ।
ਉਨ੍ਹਾਂ ਕਾਂਗਰਸ ਨੂੰ ਦੇਸ਼ ਦੀ ਆਰਥਿਕ ਅਤੇ ਸਮਾਜਿਕ ਤਬਾਹੀ ਲਈ ਜੁੰਮੇਵਾਰ ਕਰਾਰ ਦਿੰਦਿਆਂ ਕਿਹਾ ਕਿ ਕਾਂਗਰਸ ਨੇ ਭਾਰਤ ਨੂੰ ਦੁਨੀਆਂ ਦੇ ਸਭ ਵੱਧ ਗਰੀਬੀ, ਬੇਰੁਜ਼ਗਾਰੀ ਅਤੇ ਭ੍ਰਿਸ਼ਟ ਮੁਲਕਾਂ ਦੀ ਮੁਹਰਲੀ ਕਤਾਰ ਵਿਚ ਲਿਆ ਖੜ੍ਹਾ ਕੀਤਾ ਹੈ। ਉਨ੍ਹਾਂ ਕਾਂਗਰਸ ਦੇ 50 ਸਾਲਾਂ ਦੇ ਰਾਜ ਦੀ ਤੁਲਣਾ ਪੰਜਾਬ ਦੀ ਅਕਾਲੀ ਭਾਜਪਾ ਸਰਕਾਰ ਦੇ 5 ਸਾਲਾਂ ਨਾਲ ਕਰਦਿਆਂ ਆਖਿਆ ਕਿ ਕੇਂਦਰ ਦੇ ਬੇਰੱਖੇ ਰਵੱਈਏ ਦੇ ਬਾਵਜੂਦ ਅਕਾਲੀ-ਭਾਜਪਾ ਸਰਕਾਰ ਨੇ ਸੂਬੇ ਵਿਚ ਵਿਕਾਸ ਨੂੰ ਨਵੀਂ ਦਿਸ਼ਾ ਦਿੱਤੀ।
ਸ੍ਰੀ ਬਾਦਲ ਨੇ ਕਾਂਗਰਸੀ ਸਰਕਾਰਾਂ ਨੂੰ ਵਿਖਾਵੇ ਦੀਆਂ ਸਰਕਾਰਾਂ ਕਰਾਰ ਦਿੰਦਿਆਂ ਕਿਹਾ ਕਿ ਇਨ੍ਹਾਂ ਦੀਆਂ ਸਰਕਾਰਾਂ ਦਾ ਲੋਕ ਹਿੱਤਾਂ ਦੂਰ-ਦੂਰ ਤੱਕ ਕੋਈ ਵਾਸਤਾ ਨਹੀਂ ਹੁੰਦਾ।
ਉਨ੍ਹਾਂ ਪਿੰਡ ਲਾਲਬਾਈ ਵਿਖੇ ਚੋਣ ਜਲਸੇ ਦੌਰਾਨ ਪੀ. ਪੀ. ਪੀ. ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਬਾਦਲ 'ਤੇ ਤਿੱਖੇ ਹਮਲੇ ਕਰਦਿਆਂ ਲੋਕਾਂ ਨੂੰ ਉਸਦੀ ਪਾਰਟੀ ਤੋਂ ਪਾਸਾ ਵੱਟਣ ਦੀ ਅਪੀਲ ਕੀਤੀ।
 ਇਸਤੋਂ ਪਹਿਲਾਂ ਪਿੰਡ ਬੀਦੋਵਾਲੀ ਵਿਖੇ ਚੋਣ ਜਲਸੇ ਵਿਚ ਕਾਫ਼ੀ ਗਿਣਤੀ ਵਿਚ ਕੁਰਸੀਆਂ ਖਾਲੀ ਪਈਆਂ ਸਨ। ਜਿੱਥੇ ਮੁੱਖ ਮੰਤਰੀ ਨੇ ਆਪਣੇ ਭਾਸ਼ਨ ਵਿਚ ਅਕਾਲੀ ਸਰਕਾਰ ਦੌਰਾਨ ਰਹੀਆਂ ਕਮੀਆਂ ਨੂੰ ਦਰਬਦਰ ਕਰਕੇ ਮੁੜ ਤੋਂ ਲੰਬੀ ਹਲਕੇ ਵਿਚ ਸੱਤਾ ਦਾ ਪਾਵਰ ਗਰਿੱਡ ਲਿਆਉਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਬਿਜਲੀ ਦੇ ਟਰਾਂਸਫਾਰਮਰ (ਐਮ.ਐਲ.ਏ.) ਨਾਲ ਕੋਈ ਵਿਕਾਸ ਨਹੀਂ ਹੋ ਸਕਦਾ, ਜਦੋਂਕਿ ਮੁੱਖ ਮੰਤਰੀ ਦੀ ਕੁਰਸੀ ਪਾਵਰ ਗਰਿੱਡ ਦਾ ਆਪਣਾ ਰੁਤਬਾ ਹੈ। ਪਿੰਡ ਬੀਦੋਵਾਲੀ ਵਿਖੇ ਮੁੱਖ ਮੰਤਰੀ ਦੇ ਚੋਣ ਜਲਸੇ ਵਿਚ ਕਾਫ਼ੀ ਗਿਣਤੀ ਖਾਲੀ ਪਈਆਂ ਕੁਰਸੀਆਂ ਵੀ ਚਰਚਾ ਦਾ ਵਿਸ਼ਾ ਬਣੀਆਂ ਰਹੀਆਂ। ਚੋਣ ਜਲਸੇ ਵਿਚ ਪੱਤਰਕਾਰਾਂ ਵੱਲੋਂ ਤਸਵੀਰਾਂ ਖਿੱਚਣ 'ਤੇ ਅਕਾਲੀ ਵਰਕਰ ਖਾਲੀ ਕੁਰਸੀਆਂ ਭਰਨ ਦੀ ਕੋਸ਼ਿਸ਼ ਦੇ ਤਹਿਤ ਮਹਿਜ਼ ਤਿੰਨ-ਚਾਰ ਵਿਅਕਤੀਆਂ ਨੂੰ ਬਿਠਾਉਣ ਵਿਚ ਸਫ਼ਲ ਹੋਏ।
ਇਸ ਮੌਕੇ ਮੁੱਖ ਮੰਤਰੀ ਦੇ ਪੰਜਾਬ ਪਬਲਿਕ ਸਰਵਿਸ ਕਮਿਸ਼ਨ ਦੇ ਸਾਬਕਾ ਮੈਂਬਰ ਅਤੇ ਅਕਾਲੀ ਆਗੂ ਸ੍ਰੀ ਪਰਮਜੀਤ ਸਿੰਘ 'ਲਾਲੀ ਬਾਦਲ', ਲਾਲੀ ਕਾਲਝਰਾਨੀ ਅਤੇ ਗੁਰਮੇਹਰ ਸਿੰਘ ਬਾਦਲ, ਤੇਜਿੰਦਰ ਸਿੰਘ ਮਿੱਡਖੇੜਾ, ਅਵਤਾਰ ਸਿੰਘ ਵਣਵਾਲਾ, ਐਸ.ਓ.ਆਈ. ਦੇ ਜ਼ਿਲ੍ਹਾ ਪ੍ਰਧਾਨ ਅਕਾਸ਼ਦੀਪ ਮਿੱਡੂਖੇੜਾ, ਭੁਪਿੰਦਰ ਸਿੰਘ ਮਿੱਡੂਖੇੜਾ, ਰਣਯੋਧ ਲੰਬੀ ਸਮੇਤ ਵੱਖ-ਵੱਖ ਆਗੂ ਅਤੇ ਵਰਕਰ ਵੀ ਮੌਜੂਦ ਸਨ।

ਮਹੇਸ਼ਇੰਦਰ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਚੋਣ ਪ੍ਰਚਾਰ ਦਾ ਆਗਾਜ਼

                                         ਐਤਕੀਂ ਲੰਬੀ 'ਚ ਭਿੜਨਗੇ ਤਿੰਨ ਬਾਦਲ
                                                                 ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਦੁਨੀਆਂ ਭਰ ਦੇ ਪੰਜਾਬੀਆਂ ਦੀ ਦਿਲਚਸਪੀ ਦਾ ਕੇਂਦਰ ਬਣੇ ਲੰਬੀ ਵਿਧਾਨਸਭਾ ਹਲਕੇ ਵਿਚ ਅੱਜ ਅੱਜ ਤਿੰਨ ਬਾਦਲਾਂ ਵਿਚਾਲੇ ਤਿਕੋਣੀ ਸਿਆਸੀ ਜੰਗ ਦਾ ਬਿਗੁਜ ਵੱਜ ਗਿਆ। ਕਾਂਗਰਸ ਪਾਰਟੀ ਦੀ ਹਾਈਕਮਾਂਡ ਵੱਲੋਂ ਹਰੀ ਝੰਡੀ ਮਿਲਣ ਉਪਰੰਤ ਪਾਰਟੀ ਦੇ ਉਮੀਦਵਾਰ ਵਜੋਂ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਅੱਜ ਆਪਣੇ ਜੱਦੀ ਪਿੰਡ ਬਾਦਲ ਤੋਂ ਆਪਣੀ ਚੋਣ ਮੁਹਿੰਮ ਦਾ ਆਗਾਜ਼ ਕਰ ਦਿੱਤਾ।

          ਸ੍ਰੀ ਮਹੇਸ਼ਇੰਦਰ ਸਿੰੰਘ ਬਾਦਲ ਨੇ ਸਵੇਰੇ ਪਿੰਡ ਬਾਦਲ ਦੇ ਗੁਰਦੁਆਰਾ ਵਿਖੇ ਅਰਦਾਸ ਕਰਨ ਉਪਰੰਤ ਮੰਦਰ, ਪ੍ਰਾਚੀਨ ਸਮਾਧ ਅਤੇ ਮਸੀਤ 'ਤੇ ਨਤਮਸਤਕ ਹੋਣ ਤੋਂ ਉਪਰੰਤ ਬਕਾਇਦਾ ਪਿੰਡ ਦੇ ਘਰ ਘਰ ਜਾ ਕੇ ਵੋਟਾਂ ਮੰਗੀਆਂ ਅਤੇ ਪਿੰਡ  ਵਾਸੀਆਂ ਤੋਂ ਸਹਿਯੋਗ ਦੀ ਅਪੀਲ ਕੀਤੀ।
    
         ਚੋਣ ਮੁਹਿੰਮ ਦੇ ਆਗਾਜ਼ ਬਾਰੇ ਸੂਚਨਾ ਮਿਲਦੇ ਹੀ ਹਲਕੇ ਦੇ ਪਿੰਡਾਂ ਸੈਂਕੜੇ ਲੋਕ ਆਪ ਮੁਹਾਰੇ ਬਾਦਲ ਪੁੱਜ ਗਏ। ਜਿਨ੍ਹਾਂ ਨੇ ਤਿੰਨ ਵੱਖ-ਵੱਖ ਕਾਫ਼ਲਿਆਂ ਦੇ ਰੂਪ ਵਿੱਚ ਘਰ ਘਰ ਜਾ ਕੇ ਵੋਟਾਂ ਮੰਗੀਆਂ। ਇਸ ਮੌਕੇ ਸ੍ਰ: ਮਹੇਸ਼ਇੰਦਰ ਬਾਦਲ  ਇਲਾਵਾ ਕਾਫ਼ਲਿਆਂ ਦੀ ਅਗਵਾਈ ਸਾਬਕਾ ਟਰਾਂਸਪੋਰਟ ਮੰਤਰੀ ਸ੍ਰ: ਹਰਦੀਪਇੰਦਰ ਸਿੰਘ ਬਾਦਲ, ਪੰਜਾਬ ਕਾਂਗਰਸ ਦੇ ਸੀਨੀਅਰ  ਗੁਰਮੀਤ ਸਿੰਘ ਖੁੱਡੀਆਂ, ਰਣਧੀਰ ਸਿੰਘ ਧੀਰਾ ਅਤੇ ਬਾਦਲ ਪਿੰਡ ਦੇ ਸਾਬਕਾ ਸਰਪੰਚ ਸੰਜਮ ਸਿੰਘ ਢਿੱਲੋ, ਸਰਬਜੀਤ ਸਿੰਘ ਬਾਦਲ ਕਰ ਰਹੇ ਸਨ। ਚੋਣ ਮੁਹਿੰਮ ਦੇ ਆਗਾਜ਼ ਮੌਕੇ ਵੱਡੀ ਗਿਣਤੀ ਵਿਚ ਕਾਂਗਰਸ ਵਰਕਰ, ਆਗੂ ਅਤੇ ਪਾਰਟੀ ਵਰਕਰਾਂ ਸਮੇਤ ਹਲਕੇ ਦੇ ਸਮੂਹ ਪਿੰਡਾਂ ਦੇ ਸਾਬਕਾ ਕਾਂਗਰਸੀ ਪੰਚ-ਸਰਪੰਚ ਪਹੁੰਚੇ ਹੋਏ ਸਨ।
     
    ਸਾਲ 2007 ਦੀਆਂ ਵਿਧਾਨਸਭਾ ਚੋਣਾਂ ਵਿਚ ਆਪਣੇ ਚਚੇਰੇ ਭਰਾ ਅਕਾਲੀ ਉਮੀਦਵਾਰ ਵਜੋਂ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨਾਲ ਸਖ਼ਤ ਮੁਕਾਬਲੇ ਵਿਚ ਉਨ੍ਹਾਂ ਦੇ ਜਿੱਤ ਦੇ ਫ਼ਰਕ ਨੂੰ ਮਹਿਜ਼ 9200 ਵੋਟਾਂ 'ਤੇ ਲਿਆ ਸਮੇਟਿਆ ਸੀ, ਪਰ ਐਤਕੀਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ 65 ਸਿਆਸੀ ਜੀਵਨ ਦੌਰਾਨ ਉਨ੍ਹਾਂ ਦੇ ਚੋਣ ਪ੍ਰਚਾਰ ਦੀ ਕਮਾਂਡ ਨੂੰ ਚਾਣਕਿਆ ਵਜੋਂ ਸੰਭਾਲਣ ਵਾਲੇ ਉਨ੍ਹਾਂ ਦੇ ਛੋਟੇ ਭਰਾ ਦਾਸ ਖੁਦ ਵੀ ਵਿਰੋਧੀ ਉਮੀਦਵਾਰ ਵਜੋਂ ਮੁੱਖ ਮੰਤਰੀ ਦੇ ਸਾਹਮਣੇ ਲੰਬੀ ਤੋਂ ਸਾਂਝੇ ਮੋਰਚੇ ਦੇ ਉਮੀਦਵਾਰ ਵਜੋਂ ਚੋਣ ਪਿੜ ਵਿਚ ਡਟੇ ਹੋਏ ਹਨ। ਸਿਆਸੀ ਮਾਹਰ ਗੁਰਦਾਸ ਸਿੰਘ ਬਾਦਲ ਦੇ ਲੰਬੀ ਹਲਕੇ ਤੋਂ ਚੋਣ ਮੈਦਾਨ ਵਿੱਚ ਆਉਣ ਨੂੰ ਬਹੁਤ ਜਿਆਦਾ ਅਹਿਮੀਅਤ ਦੇ ਰਹੇ ਹਨ, ਕਿਉਂਕਿ ਪਿਛਲੇ ਕਈ ਦਹਾਕਿਆਂ ਤੋਂ ਵੋਟਰਾਂ ਨਾਲ ਨਾ ਸਿਰਫ ਉਨ੍ਹਾਂ ਨਾਲ ਸਿੱਧਾ ਵਾਹ ਵਾਸਤਾ ਹੈ, ਬਲਕਿ ਉਹ ਆਪਣੇ ਵੱਡੇ ਭਰਾ ਵਾਂਗ ਚੋਣ ਸਿਆਸਤ ਦੀਆਂ ਬਰੀਕੀਆਂ ਦੇ ਮਾਹਰ ਹਨ। ਅਜਿਹੇ ਵਿਚ ਮਹੇਸ਼ਇੰਦਰ ਸਿੰਘ ਦੇ ਚੋਣ ਪਿੜ ਵਿਚ ਆਉਣ ਨਾਲ ਬਦਲੇ ਸਿਆਸੀ ਸਮੀਕਰਨਾਂ ਵਿਚ ਅਕਾਲੀ ਦਲ ਲਈ ਰਾਹ ਪਹਿਲਾਂ ਨਾਲੋਂ ਕਾਫ਼ੀ ਔਖੀ ਬਣ ਗਈ ਹੈ।
    
          ਪਿੰਡ ਬਾਦਲ ਵਿਚ ਚੋਣ ਪ੍ਰਚਾਰ ਦੌਰਾਨ ਸ੍ਰ: ਮਹੇਸਇੰਦਰ ਬਾਦਲ ਨੇ ਕਿਹਾ ਕਿ ਅਕਾਲੀ ਸਰਕਾਰ ਦੇ ਅੰਨ੍ਹੇਵਾਰ ਜ਼ਬਰ-ਜੁਲਮ ਕਰਕੇ ਪਿਛਲੇ ਪੰਜ ਸਾਲਾਂ ਦੇ ਕਾਰਜਕਾਲ ਦੌਰਾਨ ਉਨ੍ਹਾਂ ਦੇ ਕਿਸੇ ਵਰਕਰ ਦਾ ਟੁੱਟਣਾ ਤਾਂ ਦੂਰ ਉਲਟਾ ਅਕਾਲੀ ਦਲ ਨਾਲ ਜੁੜੇ ਉਹ ਵਰਕਰ ਵੀ ਉਨ੍ਹਾਂ ਨਾਲ ਆ ਮਿਲੇ ਹਨ, ਜੋ ਸੱਭਿਅਕ ਸਿਆਸਤ ਵਿੱਚ ਵਿਸ਼ਵਾਸ ਰੱਖਦੇ ਹਨ। ਉਨ੍ਹਾਂ ਕਿਹਾ ਕਿ ਤਿੰਨੇ ਭਰਾਵਾਂ ਵਿਚਕਾਰ ਤਿਕੋਣੇ ਮੁਕਾਬਲੇ ਦੇ ਮੱਦੇਨਜ਼ਰ ਸਾਂਝੇ ਮੋਰਚੇ ਦੇ ਉਮੀਦਵਾਰ ਸ. ਗੁਰਦਾਸ ਸਿੰੰਘ ਬਾਦਲ ਜਿੰਨੀਆਂ ਵੀ ਵੋਟਾਂ ਹਾਸਲ ਕਰਨਗੇ, ਉਸਦਾ ਵੱਡਾ ਹਿੱਸਾ ਅਕਾਲੀ ਦਲ ਦੇ ਵੋਟ ਬੈਂਕ ਨੂੰ ਖੋਰਾ ਲਾਵੇਗਾ। ਨਿਸ਼ਚੈ ਹੀ ਜਿਸਦਾ ਫਾਇਦਾ ਉਨ੍ਹਾਂ (ਮਹੇਸ਼ਇੰਦਰ ਸਿੰਘ) ਨੂੰ ਹੋਵੇਗਾ।
      
          ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਾਂਗਰਸ ਦੀ ਲਿਸਟ ਜਾਰੀ ਹੋਣ ਤੋਂ ਪਹਿਲਾਂ ਹੀ ਚੋਣ ਮੁਹਿੰਮ ਸ਼ੁਰੂ ਕਰਨ ਬਾਰੇ ਇੱਕ ਸੁਆਲ ਦੇ ਜਵਾਬ ਵਿਚ ਕਿਹਾ ਕਿ ਉਂਝ ਤਾਂ ਉਨ੍ਹਾਂ ਦੀ ਮੁਹਿੰਮ ਪਿਛਲੇ ਦਸ ਸਾਲਾਂ ਤੋਂ ਹੀ ਚੱਲ ਰਹੀ ਹੈ, ਪਰ ਕਾਂਗਸ ਹਾਈਕਮਾਂਡ ਤੋਂ ਹਰੀ ਝੰਡੀ ਮਿਲਣ ਉਪਰੰਤ ਹੀ ਉਹ ਵੋਟਰਾਂ ਨਾਲ ਸੰਪਰਕ ਸਥਾਪਤ ਕਰ ਰਹੇ ਹਨ।ਬੀਤੇ ਜ਼ਿਲ੍ਹਾ ਪ੍ਰੀਸ਼ਦ/ਬਲਾਕ ਸੰਮਤੀ ਚੋਣਾਂ ਵਾਂਗ ਇਨ੍ਹਾਂ ਚੋਣਾਂ ਦੌਰਾਨ ਸੱਤਾ ਪੱਖ ਵੱਲੋਂ ਲੰਬੀ ਹਲਕੇ ਵਿਚ ਹੋਣ ਵਾਲੀ ਸੰਭਾਵਿਤ ਗੁੰਡਾਗਰਦੀ ਬਾਰੇ ਪੁੱਛਣ 'ਤੇ ਸ੍ਰੀ ਬਾਦਲ ਨੇ ਕਿਹਾ ਕਿ ਚੋਣ ਕਮਿਸ਼ਨ ਦੀ ਮੁਸਤੈਦੀ ਦਾ ਹਵਾਲਾ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਚੋਣ ਕਮਿਸ਼ਨ ਦੀ ਸਖ਼ਤੀ ਸਦਕਾ ਅਜਿਹਾ ਹੋਣਾ ਤਾਂ ਨਹੀਂ ਚਾਹੀਦਾ, ਜੇਕਰ ਹਾਲਾਤਾਂ ਨੇ ਮੰਗ ਕੀਤੀ ਤਾਂ ਉਨ੍ਹਾਂ ਦੇ ਵਰਕਰ ਪੂਰੀ ਤਰ੍ਹਾਂ ਤਿਆਰ ਹਨ।
        
        ਅਕਾਲੀ ਦਲ ਦੇ ਉਮੀਦਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਨਸ਼ਰ ਰਿਪੋਰਟਾਂ ਬਾਰੇ ਪੁੱਛੇ ਸੁਆਲ 'ਤੇ ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਉਣ 'ਤੇ  ਚੋਣ ਕਮਿਸ਼ਨ ਨੂੰ ਤੁਰੰਤ ਸ਼ਿਕਾਇਤ ਕੀਤੀ ਜਾਵੇਗੀ।

           ਇਸੇ ਦੌਰਾਨ ਪਿੰਡ ਬਾਦਲ ਵਿਖੇ ਸ: ਦੀਪਇੰਦਰ ਸਿੰਘ ਬਾਦਲ ਦੇ ਗ੍ਰਹਿ ਵਿਖੇ ਵਰਕਰਾਂ ਦੇ ਠਾਠਾਂ ਮਾਰਦੇ ਵਿਸ਼ਾਲ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਵਰਕਰਾਂ ਨੂੰ ਲੰਬੀ ਹਲਕੇ ਵਿਚ ਚੋਣ ਪ੍ਰਚਾਰ ਤਨਦੇਹੀ ਨਾਲ ਚੋਣ ਪ੍ਰਚਾਰ ਵਿਚ ਜੁਟ ਜਾਣ ਦਾ ਸੱਦਾ ਦਿੱਤਾ। ਇਸ ਮੌਕੇ ਪਿੰਡ ਖੁੱਡੀਆਂ ਮਹਾਂ ਸਿੰਘ ਦੇ ਇੱਕ ਮੈਂਬਰ ਪੰਚਾਇਤ ਸਮੇਤ ਪੰਜ ਅਕਾਲੀ ਵਰਕਰਾਂ ਨੇ ਕਾਂਗਰਸ ਵਿਚ ਸ਼ਾਮਲ ਹੋਣ ਦਾ ਐਲਾਨ ਕੀਤਾ।

ਮੁੱਖ ਮੰਤਰੀ ਬਾਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਇਆ

                     -ਪਿੰਡ ਕੰਦੂਖੇੜਾ ਦੇ ਕਮਿਊਨਿਟੀ ਸੈਂਟਰ ਦੇ ਰਕਬੇ 'ਚ ਚੋਣ ਜਲਸੇ ਨੂੰ ਸੰਬੋਧਨ ਕੀਤਾ -
   -ਪ੍ਰਸ਼ਾਸਨਕ ਤੰਤਰ ਨੇ ਬਾਅਦ 'ਚ 5 ਸੌ ਰੁਪਏ ਦੀ ਕਟਵਾ ਕੇ ਭਰਿਆ ਕਾਗਜਾਂ ਦਾ ਢਿੱਡ : ਗੁਰਮੀਤ ਖੁੱਡੀਆਂ-
                                                                  ਇਕਬਾਲ ਸਿੰਘ ਸ਼ਾਂਤ
ਲੰਬੀ, 4 ਜਨਵਰੀ : ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਅੱਜ ਲੰਬੀ ਹਲਕੇ ਦੇ ਪਿੰਡਾਂ ਵਿਚ ਚੋਣ ਪ੍ਰਚਾਰ ਮਹਿੰਮ ਦੌਰਾਨ ਕਥਿਤ ਤੌਰ 'ਤੇ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਇਆ ਹੈ।

          ਲੰਬੀ ਵਿਧਾਨਸਭਾ ਹਲਕੇ ਤੋਂ ਅਕਾਲੀ-ਭਾਜਪਾ ਗੱਠਜੋੜ ਦੇ ਉਮੀਦਵਾਰ ਪੰਜਾਬ ਦੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਅੱਜ ਹਲਕੇ ਦੇ ਪਿੰਡ ਕੰਦੂਖੇੜਾ ਵਿਖੇ ਇੱਕ ਕਮਿਊਨਿਟੀ ਕੇਂਦਰ ਦੇ ਰਕਬੇ ਵਿਚ ਇੱਕ ਚੋਣ ਜਲਸੇ ਨੂੰ ਸੰਬੋਧਨ ਕੀਤਾ ਗਿਆ। ਇਸੇ ਰਕਬੇ ਵਿਚ ਸਿਹਤ ਵਿਭਾਗ ਦੀ ਡਿਸਪੈਂਸਰੀ ਵੀ ਸਥਿਤ ਹੈ।


               ਇਸ ਜਗ੍ਹਾ 'ਤੇ ਅਕਾਲੀ ਦਲ ਦੇ ਚੋਣ ਜਲਸੇ ਲਈ ਸਵੇਰੇ ਤੋਂ ਚੱਲ ਰਹੀਆਂ ਸਨ, ਜਿਸਦੇ ਤਹਿਤ ਟੈਂਟ, ਸੋਫੇ ਅਤੇ ਸੈਂਕੜੇ ਕੁਰਸੀਆਂ ਲਾ ਕੇ ਕਾਫ਼ੀ ਸ਼ਨਦਾਰ ਤਿਆਰੀਆਂ ਕੀਤੀਆਂ ਗਈਆਂ। ਇਸਦੇ ਬਾਵਜੂਦ ਮੌਜੂਦਾ ਸਮੇਂ 'ਚ ਚੋਣ ਅਮਲੇ ਵਜੋਂ ਵਿਚਰ ਪ੍ਰਸ਼ਾਸਨਕ ਤਾਣਾ-ਬਾਣਾ ਸੁੱਤਾ ਪਿਆ ਸੀ।

                ਇਸ ਸਬੰਧੀ ਚੋਣ ਕਮਿਸ਼ਨ ਦੀ ਵੀਡੀਓਗਰਾਫ਼ੀ ਲਈ ਇੱਕ ਟੀਮ ਦੇ ਮੁਖੀ ਅਮਰਜੀਤ ਸਿੱਧੂ ਨੇ ਦੱਸਿਆ ਕਿ ਪਿੰਡ ਕੰਦੂਖੇੜਾ ਵਿਖੇ ਚੋਣ ਜਲਸੇ ਦੀ ਵੀਡੀਓਗਰਾਫ਼ੀ ਕਰਵਾ ਲਈ ਗਈ ਹੈ। ਜਿਸਨੂੰ ਚੋਣ ਜ਼ਾਬਤੇ ਦੀ ਉਲੰਘਣਾ ਹੋਣ ਜਾਂ ਨਾਂ ਹੋਣ ਬਾਰੇ ਪੁਸ਼ਟੀ ਲਈ ਉੱਚ ਅਧਿਕਾਰੀਆਂ ਨੂੰ ਵਿਖਾਇਆ ਜਾਵੇਗਾ,

                ਇਸ ਸਬੰਧ ਵਿਚ ਜਦੋਂ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਉਹ ਤਾਂ ਲੋਕਾਂ ਦੀ ਜ਼ਮੀਨ 'ਤੇ ਲੋਕਾਂ ਲਈ ਬੋਲ ਰਹੇ ਸਨ। ਹੁਣ ਤੁਸੀਂ ਦੱਸੋ ਕਿ ਮੈਂ ਲੋਕਾਂ ਨੂੰ ਹਵਾ ਵਿਚੋਂ ਸੰਬੋਧਨ ਕਰਾਂ?
ਇਸੇ ਦੌਰਾਨ ਲੰਬੀ ਦੇ ਆਰ. ਓ. ਸ੍ਰੀ ਸੰਦੀਪ ਰਿਸ਼ੀ ਨੇ ਦੱਸਿਆ ਕਿ ਅਕਾਲੀ ਦਲ ਵੱਲੋਂ ਪਿੰਡ ਕੰਦੂਖੇੜਾ ਵਿਖੇ ਚੋਣ ਜਲਸੇ ਲਈ 5 ਸੌ ਰੁਪਏ ਦੀ ਪਰਚੀ ਕਟਵਾਈ ਗਈ ਹੈ।

              ਜਦੋਂਕਿ ਦੂਜੇ ਪਾਸੇ ਪੰਜਾਬ ਕਾਂਗਰਸ ਦੇ ਸੀਨਅਰ ਆਗੂ ਗੁਰਮੀਤ ਸਿੰਘ ਖੁੱਡੀਆਂ ਨੇ ਦੋਸ਼ ਲਾਇਆ ਕਿ ਲੰਬੀ ਹਲਕੇ ਵਿਚ ਸਮੁੱਚਾ ਪ੍ਰਸ਼ਾਸਨਕ ਤੰਤਰ ਅਕਾਲੀ ਦਲ ਦੀ ਕਠਪੁਤਲੀ ਵਜੋਂ ਵਿਚਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪਿੰਡ ਕੰਦੂਖੇੜਾ ਵਿਖੇ ਕਮਿਊਨਿਸਟ ਸੈਂਟਰ ਦੇ ਰਕਬੇ ਵਿਚ ਅਕਾਲੀ ਦਲ ਦੇ ਚੋਣ ਜਲਸੇ ਦੀ ਪਰਚੀ ਵੀ ਮੀਡੀਆ ਵੱਲੋਂ ਮਾਮਲਾ ਉਛਾਲਣ ਦੇ ਉਪਰੰਤ ਕਾਗਜ਼ਾਂ ਦਾ ਢਿੱਡ ਭਰਨ ਲਈ ਬਾਅਦ ਵਿਚ ਕੱਟੀ ਗਈ ਹੈ।
       
         ਉਨ੍ਹਾਂ ਮੰਗ ਕੀਤੀ ਕਿ ਅਜਿਹੇ ਮਾਮਲੇ ਵਿਚ ਚੋਣ ਕਮਿਸ਼ਨ ਵੱਲੋਂ ਸਖ਼ਤੀ ਕਰਕੇ ਸਰਕਾਰੀ/ਪੰਚਾਇਤੀ ਜ਼ਮੀਨਾਂ  ਨੂੰ ਚੋਣ ਜਲਸਿਆਂ ਲਈ ਵਰਤਣ ਦੇ ਮਾਮਲੇ ਵਿਚ ਫੀਸ ਦੀ ਪਰਚੀ ਕੱਟਣ ਸਮੇਂ ਉਸ 'ਤੇ ਸਮਾਂ ਦਰਸਾਇਆ ਜਾਣਾ ਚਾਹੀਦਾ ਹੈ ਤੇ ਉਸਦੀ ਫੈਕਸ ਵੀ ਤੁਰੰਤ ਪੰਜਾਬ ਦੇ ਮੁੱਖ ਚੋਣ ਦਫ਼ਤਰ ਨੂੰ ਭੇਜੀ ਜਾਣ ਲਾਜਮੀ ਕੀਤੀ ਜਾਵੇ ਤਾਂ ਜੋ ਚੋਣ ਜ਼ਾਬਤੇ ਦਾ ਮਜ਼ਾਕ ਨਾ ਬਣ ਸਕੇ।


ਫੋਟੋ ਫਾਈਲ : ਡੱਬਵਾਲੀ04ਜਨਵਰੀ-07.ਜੇ.ਪੀ.ਜੀ.
ਪਿੰਡ ਕੰਦੂਖੇੜਾ ਵਿਖੇ ਕਮਿਊਨਿਟੀ ਸੈਂਟਰ ਦੇ ਰਕਬੇ ਵਿਚੋਂ ਆਉਂਦੇ ਸਿਹਤ ਵਿਭਾਗ ਦੀ ਡਿਸਪੈਂਸਰੀ ਕੋਲੋਂ ਲੰਘਦਾ ਮੁੱਖ ਮੰਤਰੀ ਦੇ ਵਾਹਨਾਂ ਦਾ ਕਾਫ਼ਲਾ। ਤਸਵੀਰ : ਇਕਬਾਲ ਸਿੰਘ ਸ਼ਾਂਤ

...'ਤੇ ਹੁਣ ਬਣ ਜਾਵੇਗਾ 'ਪਾਸ਼' ਦਾ 'ਮੰਟਾ'

ਇਕਬਾਲ ਸਿੰਘ ਸ਼ਾਂਤ

ਲੰਬੀ : ਤਾ-ਉਮਰ ਰਲ-ਮਿਲ ਕੇ ਸੂਬੇ ਦੇ ਸਿਆਸੀ ਥੰਮਾਂ 'ਤੇ ਪਰਚੰਮ ਲਹਿਰਾਉਂਦੇ ਰਹੇ ਬਾਦਲ ਭਰਾਵਾਂ 'ਪਾਸ਼' ਅਤੇ 'ਦਾਸ' ਵਿਚਕਾਰ ਵਖਰੇਵੇਂ ਉਪਰੰਤ ਹੁਣ ਦੋਵੇਂ ਧਿਰਾਂ ਵੱਲੋਂ ਇੱਕ-ਦੂਸਰੇ ਨੂੰ ਸਿਆਸੀ ਪਿੜ ਵਿਚ ਪਛਾੜਨ ਲਈ ਹਰ ਹੀਲਾ ਵਰਤਿਆ ਜਾ ਰਿਹਾ ਹੈ। ਚੋਣਾਂ ਦੀ ਅਸਲ ਮਹਾਂਭਾਰਤ ਦੇ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਸਿਆਸੀ ਚੱਕਰਵਿਊ ਤਹਿਤ ਵਿਚ ਇੱਕ-ਦੂਸਰੇ ਦੇ ਸਿਆਸੀ ਕਿਲ੍ਹਿਆਂ ਅਤੇ ਸਿਪਹਸਲਾਰਾਂ 'ਚ ਸੰਨ੍ਹ ਲਾ ਕੇ ਆਪਣੇ ਲਈ ਮਜ਼ਬੂਤ ਸਿਆਸੀ ਕਿਲ੍ਹੇਬੰਦੀ ਦੀਆਂ ਲਗਾਤਾਰ ਕੋਸ਼ਿਸ਼ਾਂ ਜਾਰੀ ਹਨ।
ਹਾਸਲ ਕਣਸੋਆਂ ਅਨੁਸਾਰ ਸੰਨ 2002 ਦੀ ਅਕਾਲੀ ਸਰਕਾਰ ਤੋਂ ਲੈ ਕੇ ਮਨਪ੍ਰੀਤ ਸਿੰਘ ਬਾਦਲ ਦੀ ਅਗਵਾਈ ਵਾਲੀ ਪੀ.ਪੀ.ਪੀ. ਦੇ ਗਠਨ ਤੱਕ ਮੁੱਖ ਮੰਤਰੀ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਦੀ ਸੱਜੀ ਬਾਂਹ ਵਜੋਂ ਵਿਚਰਦੇ ਰਹੇ ਹਾਈ-ਪ੍ਰੋਫਾਈਲ ਨੌਜਵਾਨ ਆਗੂ ਸਤਿੰਦਰਜੀਤ ਸਿੰਘ 'ਮੰਟਾ ਰੋੜਾਂਵਾਲੀ' ਦੇ 3 ਦਸੰਬਰ ਨੂੰ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਲੰਬੀ ਹਲਕੇ ਦੇ ਦੌਰੇ ਦੌਰਾਨ ਅਕਾਲੀ ਦਲ ਵਿਚ ਸ਼ਾਮਲ ਹੋਣ ਦੇ ਆਸਾਰ ਹਨ।
ਦੱਸਣਯੋਗ ਹੈ ਕਿ ਪੀ.ਪੀ.ਪੀ. ਦੇ ਗਠਨ ਉਪਰੰਤ ਲੰਬੀ ਹਲਕੇ ਵਿਚ ਬੜੀ ਸਰਗਰਮੀ ਵਿਚ ਪੀ.ਪੀ.ਪੀ. ਦੀਆਂ ਸਰਗਰਮੀਆਂ ਵਿਚ ਹਿੱਸਾ ਲੈ ਰਹੇ ਸ੍ਰੀ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਪੰਜਾਬ ਵਿਜੀਲੈਂਸ ਬਿਊਰੋ ਵੱਲੋਂ ਭ੍ਰਿਸ਼ਟਾਚਾਰ ਦੇ ਮਾਮਲੇ 20-21 ਮਈ ਦੀ ਦਰਮਿਆਨੀ ਰਾਤ ਨੂੰ ਉਸਦੇ ਘਰੋਂ ਪਿੰਡ ਰੋੜਾਂਵਾਲੀ ਤੋਂ ਗ੍ਰਿਫ਼ਤਾਰ ਕਰ ਲਿਆ ਗਿਆ ਸੀ।
ਜਿਸਦੇ ਉਪਰੰਤ ਉਕਤ ਮਾਮਲੇ 'ਚ ਅਦਾਲਤ ਵਿਚੋਂ ਜਮਾਨਤ ਮਿਲਣ ਬਾਅਦ ਸ੍ਰੀ ਮੰਟਾ ਸਿਆਸੀ ਤੌਰ 'ਤੇ ਰੂਪੋਸ਼ ਜਿਹੇ ਵਿਚਰ ਰਹੇ ਸਨ। ਹਾਲਾਂਕਿ ਸ੍ਰੀ ਮੰਟਾ ਨੂੰ ਗੁਰਦਾਸ ਸਿੰਘ ਬਾਦਲ ਦਾ ਵਫ਼ਾਦਾਰ ਅਤੇ ਨਿਸ਼ਠਾਵਾਨ ਸ਼ਾਗਿਰਦ ਮੰਨਿਆ ਜਾਂਦਾ ਰਿਹਾ ਹੈ। ਦੱਸਣਯੋਗ ਹੈ ਕਿ ਸ੍ਰੀ ਮੰਟਾ ਦੀ ਗ੍ਰਿਫ਼ਤਾਰੀ ਉਪਰੰਤ ਸ: ਗੁਰਦਾਸ ਸਿੰਘ ਬਾਦਲ ਨੇ ਉਸਦੀ ਵਫ਼ਾਦਾਰੀ ਦੇ ਬਦਲੇ ਉਸਨੂੰ ਪੀ.ਪੀ.ਪੀ. ਵੱਲੋਂ ਲੰਬੀ ਹਲਕੇ ਤੋਂ ਲੜਾਉਣ ਲਈ ਪਾਰਟੀ ਨੂੰ ਸਿਫਾਰਸ਼ ਕਰਨ ਦਾ ਐਲਾਨ ਵੀ ਕੀਤਾ ਸੀ।
ਪਰੰਤੂ ਹੁਣ ਸਤਿੰਦਰਜੀਤ ਮੰਟਾ ਦੇ ਦੁਬਾਰਾ ਤੋਂ ਅਕਾਲੀ ਦਲ ਵਿਚ ਆਉਣ ਦੀਆਂ ਕਣਸੋਆਂ ਨੇ ਤਰ੍ਹਾਂ-ਤਰ੍ਹਾਂ ਦੀਆਂ ਚਰਚਾਵਾਂ ਨੂੰ ਬਲ ਮਿਲਿਆ ਹੈ।
             ਜੱਗਜਾਹਰ ਹੈ ਕਿ ਮੁੱਖ ਮੰਤਰੀ ਦੇ ਛੋਟੇ ਭਰਾ ਸ: ਗੁਰਦਾਸ ਸਿੰਘ ਬਾਦਲ ਨੂੰ ਪੀ.ਪੀ.ਪੀ. ਵੱਲੋਂ ਲੰਬੀ ਹਲਕੇ ਤੋਂ ਉਮੀਦਵਾਰ ਐਲਾਨਿਆ ਹੋਇਆ ਹੈ, ਉਥੇ ਪਿਛਲੇ ਵਿਧਾਨਸਭਾ ਚੋਣਾਂ ਵਿਚ ਮੁੱਖ ਮੰਤਰੀ ਸ੍ਰੀ ਬਾਦਲ ਨੂੰ ਤਕੜੀ ਟੱਕਰ ਦੇ ਚੁੱਕੇ ਸ: ਮਹੇਸ਼ਇੰਦਰ ਸਿੰਘ ਬਾਦਲ ਨੂੰ ਕਾਂਗਰਸ ਵੱਲੋਂ ਮੁੜ ਤੋਂ ਉਮੀਦਵਾਰ ਐਲਾਨੇ ਜਾਣ ਦੀ ਮਜ਼ਬੂਤ ਸੰਭਾਵਨਾ ਹੈ। ਅਜਿਹੇ ਅਕਾਲੀ  ਦਲ (ਬ) ਵੱਲੋਂ ਲੰਬੀ ਅਤੇ ਗਿੱਦੜਬਾਹਾ ਹਲਕੇ ਵਿਚ ਆਪਣੀ ਸਥਿਤੀ ਨੂੰ ਮਜ਼ਬੂਤ ਕਰਨ ਦੇ ਮੰਤਵ ਨਾਲ ਸਿਆਸੀ ਸਰੀਕਾਂ ਦੇ ਪ੍ਰਮੁੱਖ ਝੰਡਾਬਰਦਾਰਾਂ ਦੀਆਂ ਵਫ਼ਾਦਾਰੀਆਂ ਤਬਦੀਲ ਕਰਵਾਈਆਂ ਨੂੰ ਅੰਜਾਮ ਦਿੱਤਾ ਜਾ ਰਿਹਾ ਹੈ। ਇਸਤੋਂ ਪਹਿਲਾਂ ਵੀ ਸਾਬਕਾ ਵਿੱਤ ਮੰਤਰੀ ਸ: ਮਨਪ੍ਰੀਤ ਸਿੰਘ ਬਾਦਲ ਦੇ ਓ. ਐਸ. ਡੀ. ਸ: ਚਰਨਜੀਤ ਸਿੰਘ ਬਰਾੜ ਵੀ ਪੀ. ਪੀ. ਪੀ. ਨੂੰ ਅਲਵਿਦਾ ਕਹਿ ਕੇ ਅਕਾਲੀ ਦਲ ਵਿਚ ਸ਼ਾਮਲ ਹੋ ਚੁੱਕੇ ਹਨ।
            ਇਸ ਸਬੰਧ ਵਿਚ ਫੋਨ ਉਤੇ ਸੰਪਰਕ ਕਰਨ 'ਤੇ ਸ: ਸਤਿੰਦਰਜੀਤ ਸਿੰਘ ਮੰਟਾ ਨੇ ਕਿਹਾ ਕਿ ਜਦੋਂ ਵੀ ਅਜਿਹਾ ਕੁਝ ਹੋਵੇਗਾ ਤਾਂ ਤੁਹਾਨੂੰ ਮੈਂ ਖੁਦ ਫੋਨ ਕਰਕੇ ਦੱਸਾਂਗਾ। ਬਾਕੀ ਤੁਸੀਂ ਖੁਦ ਸੀ. ਐਮ. ਸਾਬ੍ਹ ਨੂੰ ਪੁੱਛ ਲਵੋ।

ਅਡਵਾਨੀ ਨੂੰ ਸਿਰੋਪਾ ਨਾ ਦੇਣਾ ਚੰਗੀ ਸੁਰੂਆਤ

                                                                 -ਬੀ ਐਸ ਭੁੱਲਰ-
ਭਾਜਪਾ ਦੇ ਸੀਨੀਅਰ ਨੇਤਾ ਸ੍ਰੀ ਲਾਲ ਕ੍ਰਿਸਨ ਅਡਵਾਨੀ ਦੇ ਪੰਜਾਬ ਦੌਰੇ ਨਾਲ ਸਿਰੋਪੇ ਦੇ ਨਾਂ ਹੇਠ ਕੀਤੀ ਜਾ ਰਹੀ ਸਿਆਸਤ ਨੂੰ ਠੱਲ੍ਹ ਪਾਉਣ ਦੀ ਸੁਰੂਆਤ ਹੋ ਗਈ ਹੈ। ਗੁਰਦੁਆਰਿਆਂ ਦਾ ਪ੍ਰਬੰਧ ਚਲਾਉਣ ਵਾਲੀ ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਸੱਤ੍ਹਾਧਾਰੀ ਸ੍ਰੋਮਣੀ ਅਕਾਲੀ ਦਲ ਦਾ ਹੀ ਕਬਜਾ ਰਿਹਾ ਹੈ। ਇਸ ਲਈ ਇਸ ਦਲ ਦੇ ਵਿਰੋਧੀ ਨੇਤਾਵਾਂ ਨੂੰ ਸ੍ਰੀ ਦਰਬਾਰ ਸਾਹਿਬ ਅਮ੍ਰਿਤਸਰ 'ਚ ਸਿਰੋਪਾ ਨਾ ਦੇਣ ਲਈ ਕਦੇ ਦਾੜੀ ਕੱਟੀ ਹੋਈ, ਕਦੇ ਦਾੜੀ ਰੰਗੀ ਹੋਈ ਅਤੇ ਕਦੇ ਕਿਸੇ ਮਾਮਲੇ ਦਾ ਦੋਸੀ ਹੋਣ ਦਾ ਬਹਾਨਾ ਬਣਾ ਕੇ ਪਾਸਾ ਵੱਟਿਆ ਜਾਂਦਾ ਰਿਹਾ ਹੈ।

       ਦੂਜੇ ਪਾਸੇ ਸੱਤ੍ਹਧਾਰੀ ਸ੍ਰੋਮਣੀ ਅਕਾਲੀ ਦਲ ਨਾਲ ਸਬੰਧਤ ਵਿਅਕਤੀ ਭਾਵੇ ਮੁਕੱਦਮਿਆਂ ਦਾ ਸਾਹਮਣਾ ਕਰ ਰਿਹਾ ਹੋਵੇ ਤੇ ਭਾਵੇਂ ਬਲਾਤਕਾਰੀ ਹੋਵੇ ਉਸਨੂੰ ਸ੍ਰੋਮਣੀ ਕਮੇਟੀ ਵਿੱਚ ਅਹੁਦੇ ਮੈਂਬਰੀਆਂ ਵੀ ਮਿਲਦੀਆਂ ਰਹੀਆਂ ਹਨ ਅਤੇ ਅਜਿਹੇ ਅਨਸਰਾਂ ਨੂੰ ਸਿਰੋਪੇ ਬਖਸਿਸ ਕਰਕੇ ਮਾਣ ਸਨਮਾਣ ਵੀ ਦਿੱਤਾ ਜਾਂਦਾ ਰਿਹਾ ਹੈ।

       ਸ੍ਰੀ ਅਡਵਾਨੀ ਦਾ ਦਰਬਾਰ ਸਾਹਿਬ ਵਿਖੇ ਨਤਮਸਤਕ ਹੋਣ ਦਾ ਪ੍ਰੋਗਰਾਮ ਉਲੀਕਿਆ ਗਿਆ ਤਾਂ ਸ੍ਰੋਮਣੀ ਅਕਾਲੀ ਦਲ ਅਮ੍ਰਿਤਸਰ ਦੇ ਪ੍ਰਧਾਨ ਸ੍ਰ: ਸਿਮਰਨਜੀਤ ਸਿੰਘ ਮਾਨ ਨੇ ਐਲਾਨ ਕਰ ਦਿੱਤਾ ਕਿ ਅਡਵਾਨੀ ਦੇ ਦਰਬਾਰ ਸਾਹਿਬ ਵਿਖੇ ਮੱਥਾ ਟੇਕਣ ਵਿੱਚ ਕੋਈ ਵਿਘਨ ਨਹੀਂ ਪਾਇਆ ਜਾਵੇਗਾ ਕਿਉਕਿ ਗੁਰੂ ਸਾਹਿਬਾਨਾਂ ਨੇ ਦਰਬਾਰ ਸਾਹਿਬ ਦੇ ਚਾਰ ਦਰਵਾਜੇ ਬਣਾ ਕੇ ਹਰ ਇੱਕ ਇਨਸਾਨ ਨੂੰ ਨਤਮਸਤਕ ਹੋਣ ਦੀ ਪ੍ਰਵਾਨਗੀ ਦਿੱਤੀ ਹੋਈ ਹੈ। ਪਰੰਤੂ ਦਰਬਾਰ ਸਾਹਿਬ ਵਿਖੇ ਸਿਰੋਪਾ ਬਖਸਿਸ ਕਰਕੇ ਉਸਦਾ ਮਾਣ ਸਨਮਾਨ ਨਹੀਂ ਕਰਨ ਦਿੱਤਾ ਜਾਵੇਗਾ।

       ਸ੍ਰ: ਮਾਨ ਦਾ ਤਰਕ ਸੀ ਕਿ ਸ੍ਰੀ ਅਡਵਾਨੀ ਨੇ ਆਪਣੀ ਪੁਸਤਕ ਮਾਈ ਕੰਟਰੀ ਮਾਈ ਲਾਈਫ਼ ਵਿੱਚ ਸਪਸ਼ਟ ਕੀਤਾ ਹੈ ਕਿ ਦਰਬਾਰ ਸਾਹਿਬ ਵਿਖੇ ਕੀਤੇ ਨੀਲਾ ਤਾਰਾ ਸਾਕਾ ਲਈ ਉਸਨੇ ਹੀ ਉਸ ਸਮੇਂ ਦੀ ਪ੍ਰਧਾਨ ਮੰਤਰੀ ਸ੍ਰੀਮਤੀ ਇੰਦਰਾ ਗਾਂਧੀ ਨੂੰ ਸਲਾਹ ਦੇ ਕੇ ਦਬਾਅ ਪਾਇਆ ਸੀ। ਇੱਥੇ ਹੀ ਬੱਸ ਨਹੀਂ ਬਾਬਰੀ ਮਸਜਿਦ ਢਾਹ ਦੇਣ, ਗੁਜਰਾਤ ਵਿੱਚ ਮੁਸਲਮਾਨਾਂ ਦੇ ਕੀਤੇ ਕਤਲੇਆਮ ਅਤੇ ਦੇਸ ਦੇ ਵੱਖ ਵੱਖ ਭਾਗਾਂ ਵਿੱਚ ਈਸਾਈਆਂ ਤੇ ਨਨਜ ਉਪਰ ਹਮਲੇ ਕਰਵਾਉਣ ਦੀਆਂ ਘਟਨਾਵਾਂ 'ਚ ਅਡਵਾਨੀ ਦਾ ਨਾਂ ਬੋਲਦਾ ਰਿਹਾ ਹੈ। ਉਹਨਾਂ ਕਿਹਾ ਘੱਟ ਗਿਣਤੀਆਂ ਤੇ ਹਮਲੇ ਕਰਨ ਦੇ ਅਜਿਹੇ ਦੋਸ਼ੀ ਨੂੰ ਸਿਰੋਪਾ ਬਖਸਿਸ ਨਹੀਂ ਕਰਨ ਦੇਵਾਂਗੇ।

       ਭਾਜਪਾ ਆਗੂ ਦਰਬਾਰ ਸਾਹਿਬ ਵਿਖੇ ਪਹੁੰਚੇ ਤੇ ਉਹਨਾਂ ਮੱਥਾ ਟੇਕਿਆ, ਜਿਸਤੇ ਕੋਈ ਇਤਰਾਜ ਨਹੀਂ ਕੀਤਾ ਗਿਆ। ਜਦ ਉਸਨੂੰ ਸਿਰੋਪਾ ਬਖਸਿਸ ਕਰਨ ਲਈ ਮੈਨੇਜਰ ਤੇ ਗੰ੍ਰਥੀ ਅੱਗੇ ਵਧੇ ਤਾਂ ਅਕਾਲੀ ਦਲ ਅਮ੍ਰਿਤਸਰ ਵੱਲੋਂ ਉੱਥੇ ਤਾਇਨਾਤ ਇੱਕ ਨੌਜਵਾਨ ਸ੍ਰੋਮਣੀ ਕਮੇਟੀ ਮੈਂਬਰ ਨੇ ਪੂਰੇ ਜੋਸ ਨਾਲ ਇਹ ਕਹਿੰਦਿਆਂ ਇਤਰਾਜ ਕੀਤਾ ਕਿ ਅਡਵਾਨੀ ਘੱਟ ਗਿਣਤੀਆਂ ਦਾ ਕਾਤਲ ਹੈ ਇਸਨੂੰ ਸਿਰੋਪਾ ਨਹੀਂ ਦੇਣ ਦੇਵਾਂਗੇ। ਇਹ ਸੁਣਦਿਆਂ ਦਰਬਾਰ ਸਾਹਿਬ ਦੇ ਅੰਦਰ ਕਿਸੇ ਰੌਲੇ ਰੱਪੇ ਦੇ ਖਤਰੇ ਨੂੰ ਭਾਂਪਦਿਆਂ ਸਿਰੋਪਾ ਦੇਣ ਵਾਲੀਆਂ ਸਖ਼ਸੀਅਤਾਂ ਪਿੱਛੇ ਹਟ ਗਈਆਂ ਅਤੇ ਅਡਵਾਨੀ ਦੇ ਹੋਸ ਉੱਡ ਗਏ ਤੇ ਉਹ ਸੁੰਨ ਜਿਹੇ ਹੋ ਗਏੇ।

       ਅਮ੍ਰਿਤਸਰ ਤੋਂ ਮੈਂਬਰ ਪਾਰਲੀਮੈਂਟ ਸ੍ਰੀ ਨਵਜੋਤ ਸਿੰਘ ਸਿੱਧੂ ਨੇ ਮੌਕਾ ਸੰਭਾਲਣ ਦੀ ਕੋਸਿਸ਼ ਕੀਤੀ ਤਾਂ ਗੁੱਸੇ 'ਚ ਲਾਲ ਪੀਲੇ ਹੋਏ ਉਸ ਕਮੇਟੀ ਮੈਂਬਰ ਨੇ ਉਸਨੂੰ ਜੌਕਰ ਕਰਾਰ ਦਿੰਦਿਆਂ ਕਿਹਾ ਪਿੱਛ ਹਟ ਜਾ ਓਏ ਤਾਂ ਸ੍ਰੀ ਸਿੱਧੂ ਵੀ ਬੇਵੱਸ ਹੋ ਗਏ। ਅਖੀਰ ਸ੍ਰੀ ਅਡਵਾਨੀ ਨੂੰ ਪਾਣੀ ਧਾਣੀ ਪਿਲਾ ਕੇ ਹੌਸਲਾ ਦਿੰਦੇ ਹੋਏ ਉਸਦੇ ਸਾਥੀ ਤੇ ਸੁਰੱਖਿਆ ਕਰਮਚਾਰੀ ਉਸਨੂੰ ਬਾਹਰ ਲੈ ਗਏ।

       ਬਾਦਲ ਦਲ ਦੇ ਕੁਝ ਨੇਤਾਵਾਂ ਨੇ ਤਾਂ ਭਾਵੇਂ ਸ੍ਰੀ ਅਡਵਾਨੀ ਦੀ ਆਓ ਭਗਤ ਲਈ ਸਾਰਾ ਜੋਰ ਤਾਣ ਲਾਇਆ, ਪਰੰਤੂ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨੇ ਸਾਇਦ ਇਹ ਸਮਝਦੇ ਹੋਏ ਕਿ ਪੰਜਾਬੀਆਂ ਖਾਸਕਰ ਸਿੱਖਾਂ ਦੇ ਦਿਲਾਂ ਵਿੱਚ ਅਡਵਾਨੀ ਪ੍ਰਤੀ ਨਫ਼ਰਤ ਹੈ, ਕੁਝ ਦੂਰੀ ਹੀ ਬਣਾ ਕੇ ਰੱਖੀ। ਉਹਨਾਂ ਨਾ ਅਡਵਾਨੀ ਨਾਲ ਬਹੁਤੀਆਂ ਸਟੇਜਾਂ ਸਾਂਝੀਆਂ ਕੀਤੀਆਂ ਅਤੇ ਨਾ ਹੀ ਉਹਨਾਂ ਨਾਲ ਯਾਤਰਾ ਕੀਤੀ, ਬੱਸ ਇੱਕ ਦੋ ਥਾਵਾਂ ਤੇ ਮਿਲ ਕੇ ਬੁੱਤਾ ਸਾਰ ਦਿੱਤਾ। ਬਾਅਦ ਵਿੱਚ ਅਕਾਲੀ ਦਲ ਭਾਜਪਾ ਵਿੱਚ ਤਰੇੜ ਪੈ ਜਾਣ ਦੇ ਡਰ ਕਾਰਨ ਏਨਾ ਜਰੂਰ ਕਹਿ ਦਿੱਤਾ ਕਿ ਸ੍ਰੀ ਅਡਵਾਨੀ ਨੂੰ ਸਿਰੋਪਾ ਤਾਂ ਦੇ ਹੀ ਦੇਣਾ ਚਾਹੀਦਾ ਸੀ।

       ਗੱਲ ਅਡਵਾਨੀ ਨੂੰ ਸਿਰੋਪਾ ਦੇਣ ਜਾਂ ਨਾ ਦੇਣ ਦੀ ਨਹੀਂ, ਅਸਲ ਵਿੱਚ ਇਹ ਇੱਕ ਚੰਗੀ ਸੁਰੂਆਤ ਹੋਈ ਹੈ ਅਤੇ ਇਸਨੂੰ ਜਾਰੀ ਰਖਦਿਆਂ ਅੱਗੇ ਲਈ ਸਿਰੋਪਾ ਬਖਸਿਸ ਕਰਨ ਤੋਂ ਪਹਿਲਾਂ ਸਨਮਾਨ ਹਾਸਲ ਕਰਨ ਵਾਲੇ ਵਿਅਕਤੀ ਬਾਰੇ ਜਾਣਕਾਰੀ ਹਾਸਲ ਕੀਤੀ ਜਾਵੇ ਤਾਂ ਇਸਦੇ ਚੰਗੇ ਨਤੀਜੇ ਨਿਕਲ ਸਕਦੇ ਹਨ। ਜੋ ਵਿਅਕਤੀ ਇਸ ਪਵਿੱਤਰ ਸਥਾਨ ਤੇ ਸਨਮਾਨ ਲੈਣ ਦੇ ਹੱਕਦਾਰ ਨਹੀਂ ਉਹ ਕਿਸੇ ਵੀ ਪਾਰਟੀ ਜਾਂ ਸੰਸਥਾ ਨਾਲ ਜੁੜਿਆ ਹੋਵੇ ਤਾਂ ਉਸਤੋਂ ਕਿਨਾਰਾ ਕਰ ਲੈਣਾ ਚਾਹੀਦਾ ਹੈ।

       ਕੇਂਦਰ ਵਿੱਚ ਆਪਣੀ ਸੋਟੀ ਧਰਾ ਪਾਰਟੀ ਸਮਝਦਿਆਂ ਮੁੱਖ ਮੰਤਰੀ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨੇ ਆਪਣੀ ਪਾਰਟੀ ਦੇ ਨੇਤਾਵਾਂ ਨੂੰ ਸ੍ਰੀ ਅਡਵਾਨੀ ਦੀ ਆਓ ਭਗਤ ਲਈ ਭੇਜ ਦਿੱਤਾ ਅਤੇ ਉਹਨਾਂ ਉਸਦੇ ਸੁਆਗਤ ਵਿੱਚ ਕੋਈ ਕਸਰ ਬਾਕੀ ਨਹੀਂ ਛੱਡੀ, ਪਰੰਤੂ ਸ੍ਰ: ਬਾਦਲ ਨੇ ਪੰਜਾਬ ਵਿੱਚ ਸ੍ਰੀ ਅਡਵਾਨੀ ਨਾਲ ਨਾ ਯਾਤਰਾ ਕੀਤੀ ਅਤੇ ਨਾ ਹੀ ਬਹੁਤੀਆਂ ਸਟੇਜਾਂ ਸਾਂਝੀਆਂ ਕੀਤੀਆਂ, ਸਾਇਦ ਉਹਨਾਂ ਪੰਜਾਬ ਦੇ ਲੋਕਾਂ ਦੀ ਸ੍ਰੀ ਅਡਵਾਨੀ ਪ੍ਰਤੀ ਨਰਾਜਗੀ ਕਾਰਨ ਹੀ ਪਾਸਾ ਜਿਹਾ ਵੱਟੀ ਰੱਖਿਆ।

ਕੈਂਸਰ ਰਾਹਤ ਫੰਡ ਸਿਰਫ਼ ਸਰਕਾਰੀ ਤਕਰੀਰਾਂ 'ਚ ਸਿਆਸੀ ਫਿਜ਼ਾ ਦਾ ਸ਼ਿੰਗਾਰ

                  -ਬਹੁਗਿਣਤੀ ਕੈਂਸਰ ਪੀੜਤ ਮਰੀਜ ਮਾਲੀ ਮੱਦਦ ਤੋਂ ਵਾਂਝੇ-
                                                       ਇਕਬਾਲ ਸਿੰਘ ਸ਼ਾਂਤ
           ਲੰਬੀ-ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਦੇ ਮਰੀਜਾਂ ਲਈ 20 ਕਰੋੜ ਰੁਪਏ ਨਾਲ ਕਾਇਮ ਕੀਤਾ ਗਿਆ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਸਿਰਫ਼ ਸਰਕਾਰੀ ਸਟੇਜਾਂ ਤੋਂ ਤਕਰੀਰਾਂ ਰਾਹੀਂ ਸੂਬੇ ਦੀ ਸਿਆਸੀ ਫਿਜ਼ਾ ਦਾ ਸ਼ਿੰਗਾਰ ਬਣ ਰਿਹਾ ਹੈ, ਪਰ ਸੂਬੇ ਦੇ ਬਹੁਗਿਣਤੀ ਕੈਂਸਰ ਪੀੜਤ ਮਰੀਜ ਅੱਜ ਵੀ ਮਾਲੀ ਮੱਦਦ ਤੋਂ ਵਾਂਝੇ ਹਨ।
           ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਬੜੀ ਸੁਹਿਰਦਤਾ ਨਾਲ ਆਰੰਭੀ ਗਈ ਇਹ ਸਕੀਮ ਦਾ ਕੌੜਾ ਸੱਚ ਹੈ ਕਿ ਕੈਂਸਰ ਦੀ ਬੀਮਾਰੀ ਕਰਕੇ ਤਿੱਲ-ਤਿੱਲ ਮੌਤ ਵੱਲ ਵਧ ਰਹੇ ਮਰੀਜ ਪੰਜਾਬ ਸਰਕਾਰ ਅਤੇ ਕੈਂਸਰ ਦੇ ਹਸਪਤਾਲਾਂ ਦੀ ਲਾਲਫੀਤਾਸ਼ਾਹੀ ਦਾ ਸ਼ਿਕਾਰ ਹੋ ਰਹੇ ਹਨ। ਕਿਉਂਕਿ ਜਿੱਥੇ ਕੈਂਸਰ ਦੇ ਬੀਕਾਨੇਰ ਜਿਹੇ ਨਾਮੀ ਹਸਪਤਾਲਾਂ ਦੇ ਡਾਕਟਰ ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਮਰੀਜਾਂ ਲਈ ਜਾਰੀ ਫਾਰਮ ਨੂੰ ਮਨਜੂਰ ਨਹੀਂ ਕਰਦੇ, ਦੂਜੇ ਪਾਸੇ ਪੰਜਾਬ ਸਰਕਾਰ ਦਾ ਸੁਸਤ ਅਤੇ ਨਲਾਇਕ ਢਾਂਚਾ ਉਨ੍ਹਾਂ ਡਾਕਟਰਾਂ ਵੱਲੋਂ ਆਪਣੇ ਫਾਰਮਾਂ 'ਤੇ ਬਣਾਏ ਇਲਾਜ ਅੰਦਾਜ਼ਾ ਰਾਸ਼ੀ (ਐਸਟੀਮੇਟ) ਨੂੰ ਮੰਨਣ  ਨੂੰ ਤਿਆਰ ਨਹੀਂ।
              ਜਿਸਦਾ ਪ੍ਰਤੱਖ ਨਜ਼ਾਰਾ ਅੱਜ ਮੁੱਖ ਮੰਤਰੀ ਦੇ ਜੱਦੀ ਪਿੰਡ ਬਾਦਲ ਵਿਖੇ ਕੈਂਸਰ ਦੀ ਬੀਮਾਰੀ ਨੂੰ ਮੁੱਢਲੇ ਪੜਾਅ 'ਤੇ ਪਹਿਚਾਣਨ ਦੇ ਉਦੇਸ਼ ਨਾਲ 28 ਅਕਤੂਬਰ ਨੂੰ ਲਾਏ ਕੈਂਪ ਵਿਚ ਵੇਖਣ ਨੂੰ ਮਿਲਿਆ। ਜਿੱਥੇ ਸੂਬੇ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਕੈਂਸਰ ਦੇ ਮਰੀਜ ਇਲਾਜ ਨਾਲੋਂ ਜ਼ਿਆਦਾ ਸਰਕਾਰੀ ਮਾਲੀ ਮੱਦਦ ਦੇ ਫਾਰਮ ਜਮ੍ਹਾ ਕਰਵਾਉਣ ਲਈ ਇਸ ਉਮੀਦ ਨਾਲ ਪੁੱਜੇ ਹੋਏ ਸਨ ਕਿ ਸ਼ਾਇਦ ਪਿੰਡ ਬਾਦਲ ਦੀ ਜੂਹ ਵਿਚ ਉਨ੍ਹਾਂ ਦੀ ਸੁਣਵਾਈ ਹੋ ਜਾਵੇ।
            ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਖੇ ਕੱਲ੍ਹ ਐਤਵਾਰ ਨੂੰ ਕੈਂਸਰ ਕੈਂਪ ਲੱਗਣ ਬਾਰੇ ਵੱਡੇ-ਵੱਡੇ ਅਖ਼ਬਾਰੀ ਇਸ਼ਤਿਹਾਰ ਪੜ੍ਹ ਕੇ ਪਹੁੰਚੇ ਕੈਂਸਰ ਦੇ ਮਾਰੇ ਲੋਕਾਂ ਦੀ ਅੱਖਾਂ ਵਿਚ ਜਿੱਥੇ ਸਰਕਾਰ ਪ੍ਰਤੀ ਰੋਸਾ ਸਪੱਸ਼ਟ ਝਲਕ ਰਿਹਾ ਸੀ, ਉਥੇ ਖੁੱਲ੍ਹੇ ਸ਼ਬਦਾਂ ਵਿਚ ਇਸ ਕੈਂਸਰ ਚੈੱਕਅਪ ਕੈਂਪ ਅਤੇ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਨੂੰ ਮਹਿਜ਼ ਸਿਆਸੀ ਛਲਾਵਾ ਕਰਾਰ ਦਿੱਤਾ।
ਗਿੱਦੜਬਾਹਾ ਸਰਵਾਇਕਲ ਕੈਂਸਰ ਨਾਲ ਪੀੜਤ ਪਤਨੀ ਕਾਂਤਾ ਰਾਣੀ ਨੂੰ ਵਿਖਾਉਣ ਲਈ ਕੈਂਪ ਵਿਚ ਪਵਨ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪਤਨੀ ਨੂੰ ਕੈਂਸਰ ਹੋਣ 13 ਅਪਰੈਲ ਨੂੰ ਖੁਲਾਸਾ ਹੋਇਆ ਸੀ। ਮੌਜੂਦਾ ਸਮੇਂ 'ਚ ਪੀ.ਜੀ.ਆਈ. ਚੰਡੀਗੜ੍ਹ ਤੋਂ ਉਸ ਦੀ ਪਤਨੀ ਦਾ ਇਲਾਜ ਚੱਲ ਰਿਹਾ ਹੈ, ਜੋ ਕਿ ਬਹੁਤ ਮਹਿੰਗਾ ਹੈ। ਉਨ੍ਹਾਂ ਕਿਹਾ ਕਿ ਲਗਪਗ ਚਾਰ ਮਹੀਨੇ ਉਨ੍ਹਾਂ ਨੇ ਮੁੱਖ ਮੰਤਰੀ ਸ੍ਰੀ ਬਾਦਲ ਦੇ ਗਿੱਦੜਬਾਹਾ ਵਿਖੇ ਸੰਗਤ ਦਰਸ਼ਨ ਦੌਰਾਨ ਮੁੱਖ ਮੰਤਰੀ ਬਾਦਲ ਦੇ ਸਨਮੁੱਖ ਪੇਸ਼ ਹੋਣ ਉਪਰੰਤ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਪੀ.ਜੀ.ਆਈ. ਤੋਂ ਐਸਟੀਮੇਟ ਬਣਵਾ ਕੇ ਲਿਆਉਣ ਲਈ ਕਿਹਾ ਪਰ ਉਥੋਂ ਦੇ ਡਾਕਟਰ ਐਸਟੀਮੇਟ ਬਣਾਉਣ ਤੋਂ ਇਨਕਾਰੀ ਹਨ। ਉਨ੍ਹਾਂ ਦੱਸਿਆ ਕਿ ਉਹ ਹੁਣ ਤੱਕ ਇਲਾਜ 'ਤੇ 4-5 ਲੱਖ ਰੁਪਏ ਖਰਚ ਕਰ ਚੁੱਕਾ ਹੈ ਪਰ ਬਹੁਕਰੋੜੀ ਕੈਂਸਰ ਫੰਡ ਵਿਚੋਂ ਮੱਦਦ ਦੇ ਨਾਂਅ 'ਤੇ ਦਫ਼ਤਰਾਂ ਦੇ ਧੱਕਿਆਂ ਅਤੇ ਸਮੇਂ ਦੀ ਬਰਬਾਦੀ ਤੋਂ ਇਲਾਵਾ ਕੁਝ ਪੱਲੇ ਨਹੀਂ ਪਿਆ।
           ਕੁਝ ਅਜਿਹਾ ਹੀ ਹਾਲ ਗਿੱਦੜਬਾਹਾ ਵਿਖੇ ਸੁਨਿਆਰੇ ਦੇ ਕੰਮ ਨਾਲ ਜੁੜੇ ਬਲਵਿੰਦਰ ਸਿੰਘ ਦੀ ਪਤਨੀ ਹਰਪ੍ਰੀਤ ਕੌਰ ਵੀ ਬੱਚੇਦਾਨੀ ਦੇ ਕੈਂਸਰ ਨਾਲ ਪੀੜਤ ਹਨ। ਉਸਨੇ ਦੱਸਿਆ ਕਿ ਪੀ.ਜੀ.ਆਈ. ਚੰਡੀਗੜ੍ਹ ਦੇ ਡਾਕਟਰਾਂ ਵੱਲੋਂ ਐਸਟੀਮੇਟ ਨਾ ਲਿਖ ਕੇ ਦੇਣ ਕਰਕੇ ਉਸਨੇ ਸਰਕਾਰੀ ਮੱਦਦ ਤੋਂ ਪਹਿਲਿਆਂ ਹੀ ਤੌਬਾ ਕਰ ਲਈ ਅਤੇ ਹੁਣ ਆਪਣੇ ਪੱਲਿਓਂ ਜਾਂ ਰਿਸ਼ਤੇਦਾਰਾਂ ਦੀ ਮੱਦਦ ਨਾਲ 20-20 ਹਜ਼ਾਰ ਰੁਪਏ ਦੇ ਕੀਮੋ ਦੇ ਟੀਕੇ ਲਗਵਾ ਕੇ ਪਤਨੀ ਦਾ ਇਲਾਜ ਕਰ ਵਾ ਰਿਹਾ। ਇਸੇ ਤਰ੍ਹਾਂ ਮਾਨਸਾ ਜ਼ਿਲ੍ਹੇ ਦੇ ਪਿੰਡ ਧਰਮਪੁਰਾ ਦਾ ਖੇਤ ਮਜ਼ਦੂਰ ਬੁੱਧ ਰਾਮ, ਜੋ ਕਿ ਗਲੇ ਦੇ ਕੈਂਸਰ ਤੋਂ ਪੀੜਤ ਹਨ। ਉਸਦੀ ਪਤਨੀ ਨੇ ਜਗਮੇਘ ਕੌਰ ਨੇ ਦੱਸਿਆ ਕਿ ਉਸਦੇ ਘਰਵਾਲੇ ਦਾ ਬੀਕਾਨੇਰ ਤੋਂ ਇਲਾਜ ਚੱਲ ਰਿਹਾ ਹੈ। ਪਰ ਡਾਕਟਰ ਵੱਲੋਂ 70 ਹਜ਼ਾਰ ਰੁਪਏ ਦੇ ਐਸਟੀਮੇਟ ਦੇਣ ਦੇ ਬਾਵਜੂਦ ਥਾਂ-ਥਾਂ ਧੱਕੇ ਖਾਣ ਉਪਰੰਤ ਵੀ ਉਨ੍ਹਾਂ ਨੂੰ ਕੈਂਸਰ ਮਰੀਜਾਂ ਵਾਲੀ ਮੱਦਦ ਨਹੀਂ ਮਿਲ ਸਕੀ। ਉਸਨੇ ਦੱਸਿਆ ਗੁਜਾਰਾ ਤਾਂ ਪਹਿਲਾਂ ਹੀ ਔਖਾ ਸੀ ਤੇ ਹੁਣ ਬੀਮਾਰੀ ਨੇ ਜਿਉਂਦੀ ਜੀਅ ਮਾਰ ਘੱਤਿਆ ਹੈ।
              ਇਸੇ ਤਰ੍ਹਾਂ ਕੈਂਪ ਵਿਚ ਪਹੁੰਚੇ ਲੰਬੀ ਹਲਕੇ ਦੇ ਪਿੰਡ ਮਾਨ ਦੇ ਕਿਸਾਨ ਹਰਕੇਸ਼ ਸਿੰਘ ਨੇ ਦੱਸਿਆ ਕਿ ਉਸਦੀ ਪਤਨੀ ਨੂੰ ਪੰਜ ਸਾਲ ਪਹਿਲਾਂ ਛਾਤੀ ਦਾ ਕੈਂਸਰ ਹੋਇਆ ਸੀ ਤੇ ਛਾਤੀ ਕਟਵਾ ਦਿੱਤੀ ਪਰ ਹੁਣ ਕੈਂਸਰ ਨੇ ਮੁੜ ਪੈਰ ਪਸਾਰ ਕੇ ਉਸਦੀ ਪਤਨੀ ਦੇ ਫੇਫੜਿਆਂ ਅਤੇ ਲੀਡਰ 'ਤੇ ਹਮਲਾ ਬੋਲ ਦਿੱਤਾ ਹੈ। ਜ਼ਿੰਦਗੀ ਦੀਆਂ ਡੂੰਘੀਆਂ ਉਦਾਸੀਆਂ ਵਿਚੋਂ ਲੰਘ ਰਹੇ ਹਰਕੇਸ਼ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਫਾਈਲ ਭਰਨ ਦੇ ਬਾਵਜੂਦ ਕੋਈ ਕੈਂਸਰ ਰਾਹਤ ਮੱਦਦ ਹਾਸਲ ਹੋ ਸਕੀ।
             ਇੱਕ ਮਰੀਜ ਨਾਲ ਪੁੱਜੇ ਮਹਿੰਦਰ ਸਿੰਘ ਨਾਂ ਦੇ ਵਿਅਕਤੀ ਨੇ ਦੱਸਿਆ ਕਿ ਕੈਂਸਰ ਰਾਹਤ ਫੰਡ ਤਾਂ ਵਿਧਾਨਸਭਾ ਚੋਣਾਂ ਵਿਚ ਸਰਕਾਰ ਵੱਲੋਂ ਆਪਣੀ ਕੁਰਸੀ ਨੂੰ ਦੁਹਰਾਉਣ ਲਈ ਪ੍ਰਚਾਰਿਆ ਜਾ ਰਿਹਾ ਜਦਕਿ ਅਸਲ ਵਿਚ ਇਹ ਵੀ ਫੋਕਾ ਸਿਆਸੀ ਨਾਅਰਾ ਬਣ ਕੇ ਰਹਿ ਗਿਆ ਹੈ। ਜਦੋਂ ਕਿ ਕੁਝ ਮਹੀਨੇ ਪਹਿਲਾਂ ਇਹ ਕੈਂਸਰ ਮਰੀਜਾਂ ਲਈ ਜ਼ਿੰਦਗੀ ਦੀ ਚਮਕ ਬਣ ਕੇ ਬਹੁੜਿਆ ਸੀ। ਇਸੇ ਤਰ੍ਹਾਂ ਬੱਚੇਦਾਨੀ ਦੇ ਕੈਂਸਰ ਨਾਲ ਪੀੜਤ ਬਰਨਾਲਾ ਜ਼ਿਲ੍ਹੇ ਦੇ ਪਿੰਡ ਕੱਟੂ ਦੀ ਜਸਪਾਲ ਕੌਰ ਦੇ ਧੀ ਪਰਮਜੀਤ ਕੌਰ ਨੇ ਦੱਸਿਆ ਕਿ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਦੀ ਮੱਦਦ ਵੀ ਉਨ੍ਹਾਂ ਦੀ ਮਾਂ ਲਈ ਬੇਮਾਇਨੇ ਸਾਬਤ ਹੋ ਰਹੀ ਹੈ। ਬੀਕਾਨੇਰ 'ਚ ਡਾਕਟਰ ਐਸਟੀਮੇਟ ਲਿਖ ਕੇ ਨਹੀਂ ਦਿੰਦੇ ਤੇ ਇਥੋਂ ਦੇ ਹਾਕਮਾਂ ਕੋਲ ਗਰੀਬਾਂ ਦੀ ਸੁਣਨ ਲਈ ਸ਼ਾਇਦ ਸਮਾਂ ਨਹੀਂ।
           ਪੱਤਰਕਾਰਾਂ ਵੱਲੋਂ ਮੁੱਖ ਮੰਤਰੀ ਕੋਲ ਮਾਮਲਾ ਉਠਾਇਆ ਗਿਆ ਅਤੇ ਉਨ੍ਹਾਂ ਰਵਾਇਤੀ ਸੁਭਾਅ ਵਿਚ ਅਧਿਕਾਰੀਆਂ ਨੂੰ ਤੁਰੰਤ ਕਾਰਵਾਈ ਦੇ ਨਿਰਦੇਸ਼ ਦਿੱਤੇ ਪਰ ਵਿਧਾਨਸਭਾ ਚੋਣਾਂ ਕਰਕੇ ਹੋਰ ਵਿਉਂਤਬੰਦੀਆਂ ਕੈਂਸਰ ਪੀੜਤਾਂ ਦਾ ਦੁੱਖ ਦਰਦ ਅਜੇ ਘਟਦਾ ਨਜ਼ਰ ਨਹੀਂ ਆ ਰਿਹਾ। ਮੁਕਸਤਰ ਦੇ ਸਿਵਲ ਸਰਜਨ ਡ: ਗੁਰਦੀਪ ਸਿੰਘ ਭੁੱਲਰ ਨੇ ਦੱਸਿਆ ਕਿ ਅੱਜ 75 ਕੈਂਸਰ ਮਰੀਜਾਂ ਦੇ ਫਾਰਮ ਭਰਵਾਏ ਗਏ ਹਨ। ਜਿਨ੍ਹਾਂ 'ਤੇ ਕਾਰਵਾਈ ਕਰਕੇ ਅਗਾਮੀ ਕਾਰਵਾਈ ਲਈ ਮੁੱਖ ਮੰਤਰੀ ਦਫ਼ਤਰ ਭੇਜਿਆ ਜਾਵੇਗਾ।

              
                 ਕੈਂਸਰ ਚੈੱਕਅਪ ਕੈਂਪ 'ਚ ਮਰੀਜ ਇੱਧਰ-ਉੱਟਕਦੇ ਰਹੇ
-ਡੇਢ ਵਜੇ ਪੰਡਾਲ ਖਾਲੀ ਕਰਕੇ ਚੱਲਦੇ ਬਣੇ ਬਹੁਤੇ ਡਾਕਟਰ
-ਮਰੀਜਾਂ ਨੂੰ ਅਲਟਰਾਸਾਉਂਡ ਲਈ ਮਲੋਟ-ਬਠਿੰਡਾ ਜਾਣਾ ਪਿਆ
ਲੰਬੀ-ਮੁੱਖ ਮੰਤਰੀ ਦੇ ਪਿੰਡ ਬਾਦਲ 'ਚ 28 ਅਕਤੂਬਰ ਨੂੰ  ਲੱਗੇ ਕੈਂਸਰ ਚੈੱਕਅਪ ਕੈਂਪ ਵਿਚ ਮਰੀਜ ਪ੍ਰਸ਼ਾਸਨਿਕ ਪ੍ਰਬੰਧਾਂ ਦੀ ਘਾਟ ਕਰਕੇ ਇੱਧਰ-ਉੱਧਰ ਭਟਕਦੇ ਰਹੇ। ਜਦੋਂ ਕਿ ਦੁਪਿਹਰ 3 ਵਜੇ ਤੱਕ ਚੱਲਣ ਵਾਲੇ ਕੈਂਪ 'ਚ ਕੈਂਸਰ ਮਰੀਜਾਂ ਵਾਲੇ ਪੰਡਾਲ ਵਿਚੋਂ ਵਧੇਰੇ ਡਾਕਟਰ  ਡੇਢ ਵਜੇ ਹੀ ਆਪਣਾ ਬੋਰੀਆ ਬਿਸਤਰਾ ਚੁੱਕ ਕੇ ਲੈ ਗਏ।
ਸਰਕਾਰ ਵੱਲੋਂ ਖੂਬ ਪ੍ਰਚਾਰੇ ਗਏ ਇਸ ਕੈਂਪ ਵਿਚ ਜਿੱਥੇ 939 ਮਰੀਜ ਪੁੱਜੇ ਪਰ ਕੈਂਸਰ ਦੇ ਮਰੀਜਾਂ ਦਾ ਦੋਸ਼ ਸੀ ਕਿ ਮੁੱਖ ਮੰਤਰੀ ਦੇ ਪਿੰਡ ਵੀ ਲਇਆ ਇਹ ਕੈਂਪ ਇੱਕ ਸਧਾਰਨ ਕੈਂਪ ਸਾਬਤ ਹੋਇਆ, ਜਿੱਥੇ ਸਰਕਾਰ ਵੱਲੋਂ ਅਲਟਰਾਸਾਊਂਡ ਦੀ ਸਹੂਲਤ ਵੀ ਮੁਹੱਈਆ ਨਹੀਂ ਕਰਵਾਈ ਗਈ ਤੇ ਕੈਂਸਰ ਦੇ ਕਾਫ਼ੀ ਮਰੀਜ ਡਾਕਟਰਾਂ ਦੇ ਕਹਿਣ ਅਨੁਸਾਰ ਅਲਟਰਾ ਸਾਊਂਡ ਲਈ ਮਲੋਟ ਜਾਂ ਬਠਿੰਡਾ ਜਾਂਦੇ ਵੇਖੇ ਗਏ।
ਸੁਖਜੀਤ ਕੌਰ ਵਾਸੀ ਮਲੋਟ ਨੇ ਦੱਸਿਆ ਕਿ ਬੱਚੇਦਾਨੀ ਵਿਚ ਕੈਂਸਰ ਹੈ। ਉਸਨੇ ਦੱਸਿਆ ਕਿ ਬੱਚੇਦਾਨੀ ਤਾਂ ਕਢਵਾ ਦਿੱਤੀ ਪਰ ਹੁਣ ਲੱਤਾਂ-ਬਾਹਾਂ ਵਿਚ ਬਹੁਤ ਦਰਦ ਹੁੰਦਾ ਹੈ ਅਤੇ ਢੂਈ ਦੁਖਦੀ ਹੈ। ਉਨ੍ਹਾਂ ਕੈਂਪ ਵਿਚ ਬੜੀ ਆਸ ਨਾਲ ਆਏ ਸਨ ਅਤੇ ਪਰ ਇੱਥੋਂ ਡਾਕਟਰਾਂ ਨੇ ਅਲਟਰਾ ਸਾਊਂਡ ਬਾਰੇ ਕਹਿ ਕੇ ਮੁਸ਼ਕਿਲਾਂ ਨੂੰ ਹੋਰ ਵਧਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਜਦੋਂ ਬਾਦਲ ਦੇ ਸਿਵਲ ਹਸਪਤਾਲ ਅਲਟਰਾਸਾਊਂਡ ਕਰਵਾਉਣ ਗਏ ਤਾਂ ਉਥੋਂ ਅਲਟਰਾਸਾਊਂਡ 'ਤੇ ਕੋਈ ਕਰਮਚਾਰੀ ਗਾਇਬ ਸੀ। ਇਸੇ ਤਰ੍ਹਾਂ ਬਾਅਦ ਦੁਪਿਹਰ ਲਗਭਗ ਡੇਢ ਵਜੇ ਮੁੜ ਤੋਂ ਕੈਂਪ ਪੁੱਜੇ ਪੱਤਰਕਾਰਾਂ ਨੇ ਵੇਖਿਆ ਤਾਂ ਕੈਂਸਰ ਮਰੀਜਾਂ ਵਾਲੇ ਪੰਡਾਲ ਨੰਬਰ 8 ਵਿਚੋਂ ਡਾਕਟਰ ਗਾਇਬ ਸਨ। ਜਦੋਂ ਕਿ ਮਰੀਜ ਖਾਲੀ ਪੰਡਾਲ ਵੇਖ-ਵੇਖ ਕੇ ਵਾਪਸ ਮੁੜ ਰਹੇ ਸਨ। ਪੱਰਤਾਕਾਰਾਂ ਨੂੰ ਫੋਟੋਆਂ ਖਿੱਚਦੇ ਵੇਖ ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਨੇ ਇੱਕ ਹੋਰ ਡਾਕਟਰ ਨੂੰ ਪੰਡਾਲ 'ਚ ਬਿਠਾਇਆ।
ਮੁਕਤਸਰ ਤੋਂ ਆਏ ਕੈਂਸਰ ਦੇ ਮਰੀਜ ਦੇ ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਉਹ ਇੱਥੇ ਚੰਗੇ ਇਲਾਜ ਲਈ ਆਏ ਸਨ ਪਰ ਡਾਕਟਰਾਂ ਨੇ ਪਰਚੀ 'ਤੇ ਲਿਖ ਕੇ ਮੁਕਤਸਰ ਆ ਕੇ ਵਿਖਾਉਣ ਦਾ ਫੁਰਮਾਨ ਸੁਣਾ ਦਿੱਤਾ।
ਇਸੇ ਤਰ੍ਹਾਂ ਪਿੰਡ ਕੱਖਾਂਵਾਲੀ ਦੀਆਂ ਤਿੰਨ ਔਰਤਾਂ ਜਗਦੀਪ ਕੌਰ, ਹਰਬੰਸ ਕੌਰ ਅਤੇ ਅਮਨਦੀਪ ਕੌਰ ਨੇ ਕੈਂਪ ਵਿਖ ਖੱਜਲ ਖੁਆਰੀ ਦੇ ਦੋਸ਼ ਲਾਏ। ਇਸ ਕੈਂਪ ਵਿਚ ਭਾਵੇਂ 939 ਮਰੀਜਾਂ ਦੀ ਜਾਂਚ ਦਾ ਅੰਕੜਾ ਵਿਖਾਇਆ ਗਿਆ ਹੈ  ਪਰ ਮਰੀਜਾਂ ਨਾਲੋਂ ਜ਼ਿਆਦਾ ਨਰਸਾਂ ਅਤੇ ਫਾਰਮਾਸਿਸਟਾਂ ਦੀ ਭੀੜ ਵੱਧ ਵਿਖਾਈ ਗਈ ਸੀ।
ਇਸ ਪੂਰੇ ਕੈਂਪ ਦੌਰਾਨ ਰੋਕੋ ਕੈਂਸਰ ਦੀ ਟੀਮ ਡਾ: ਧਰਮਿੰਦਰ ਸਿੰਘ ਢਿੱਲੋਂ ਦੀ ਅਗਵਾਈ ਹੇਠ ਬੜੀ ਤਨਦੇਹੀ ਨਾਲ ਮਰੀਜਾਂ ਦੀ ਜਾਂਚ ਵਿਚ ਲੱਗੀ ਰਹੀ। ਜਿਨ੍ਹਾਂ ਵੱਲੋਂ 31 ਮਰੀਜਾਂ ਦੀ ਮੈਮੋਗ੍ਰਾਫ਼ੀ ਕੀਤੀ ਗਈ। ਜਦੋਂਕਿ ਕੈਂਸਰ ਦੇ 12 ਮਰੀਜਾਂ ਦੀ ਸ਼ਨਾਖਤ ਕੀਤੀ ਗਈ ਜਿਨ੍ਹਾਂ ਵਿਚੋਂ 6 ਨੂੰ ਤੁਰੰਤ ਇਲਾਜ ਦੀ ਜ਼ਰੂਰਤ ਹੈ।
ਇਸ ਬਾਰੇ ਸੰਪਰਕ ਕਰਨ 'ਤੇ ਮੁਕਤਸਰ ਦੇ ਸਿਵਲ ਡਾ: ਗੁਰਦੀਪ ਸਿੰੰਘ ਭੁੱਲਰ ਅਨੁਸਾਰ ਕੈਂਪ ਦੇ ਸਮੇਂਂ ਤਿੰਨ ਵਜੇ ਤੱਕ ਡਾਕਟਰ ਡਿਉਟੀ 'ਤੇ ਤਾਇਨਾਤ ਰਹੇ । ਉਨ੍ਹਾਂ ਦੱਸਿਆ ਕਿ ਵੱਖ-ਵੱਖ ਬੀਮਾਰੀਆਂ ਦੇ 939 ਮਰੀਜਾਂ ਨੇ ਜਾਂਚ ਕਰਵਾਈ। ਉਨ੍ਹਾਂ ਦਾਅਵਾ ਕੀਤਾ ਕਿ ਕੈਂਪ ਬੇਹੱਦ ਸਫ਼ਲ ਰਿਹਾ ਅਤੇ 31 ਮਰੀਜਾਂ ਦੀ ਮੈਮੋਗ੍ਰਾਫ਼ੀ ਅਤੇ ਕੈਂਪ 57 ਮਰੀਜਾਂ ਦੀ ਪੈਪ ਸਮੀਅਰ ਕੀਤੀ ਗਈ।



ਅਵਾਮ ਨੂੰ ਬੀਮਾਰੀ ਤੋਂ ਬਚਾਉਣ ਲਈ ਹਰ ਮਨੁੱਖ ਦੀ ਲਾਮਜੀ ਸਿਹਤ ਜਾਂਚ ਤੇ ਸਿਹਤ ਬੀਮਾ ਸਮੇ ਦੀ ਜ਼ਰੂਰਤ : ਬਾਦਲ
ਲੰਬੀ-ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਅਜੋਕੇ ਮਾਹੌਲ ਵਿਚ ਬੀਮਾਰੀਆਂ ਦੇ ਵਧਦੇ ਜਾਲ ਬਾਰੇ ਪੰਜਾਬ ਦੇ ਅਵਾਮ ਨੂੰ ਸਿਹਤ ਪੱਖੋਂ ਸੁਚੇਤ ਕਰਨ ਅਤੇ ਬਚਾਉਣ ਲਈ ਹਰ ਮਨੁੱਖ ਦੀ ਸਮੇਂ-ਸਮੇਂ 'ਤੇ ਲਾਜਮੀ ਡਾਕਟਰੀ ਜਾਂਚ ਅਤੇ ਸਿਹਤ ਬੀਮਾ ਸਮੇਂ ਦੀ ਜ਼ਰੂਰਤ ਹੈ। ਜਿਸ ਲਈ ਪੰਜਾਬ ਸਰਕਾਰ ਵੱਲੋਂ ਇਸ ਬਾਰੇ ਪੂਰੀ ਘੋਖ ਉਪਰੰਤ ਕਿਸੇ ਠੋਸ ਨੀਤੀ ਨੂੰ ਅਮਲੀਜਾਮਾ ਪਹਿਨਾਉਣ ਦੀ ਤਜਵੀਜ਼ ਹੈ।
        ਉਹ ਆਪਣੇ ਜੱਦੀ ਪਿੰਡ ਬਾਦਲ ਵਿਖੇ ਕੈਂਸਰ ਦੀ ਮੁੱਢਲੀ ਜਾਂਚ ਅਤੇ ਜਾਗਰੂਕਤਾ ਸਬੰਧੀ ਰਾਜ ਪੱਧਰੀ ਮੁਹਿੰਮ ਤਹਿਤ ਲੱਗੇ ਕੈਂਪ ਦਾ ਉਦਘਾਟਨ ਕਰਨ ਉਪਰੰਤ ਇੱਕ ਸਮਾਗਮ ਨੂੰ ਸੰਬੋਧਨ ਕਰ ਰਹੇ ਸਨ।
          ਉਨ੍ਹਾਂ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਵਿਸ਼ਵ ਵਿਆਪੀ ਹੈ ਅਤੇ ਇਸਦੇ ਫੈਲਣ ਦੇ ਅਸਲ ਕਾਰਨਾਂ ਸਬੰਧੀ ਹਾਲੇ ਵੀ ਖੋਜ ਜਾਰੀ ਹੈ। ਪਰ ਪੰਜਾਬ ਸਰਕਾਰ ਦੇਸ਼ ਦੀ ਪਹਿਲੀ ਰਾਜ ਸਰਕਾਰ ਹੈ ਜਿਸ ਨੇ ਕੈਂਸਰ ਦੀ ਨਾਮੁਰਾਦ ਬੀਮਾਰੀ ਦੇ ਸ਼ਿਕਾਰ ਮਰੀਜਾਂ ਦੀ ਮਾਲੀ ਮਦਦ ਲਈ ਲਈ ਰਾਜ ਵਿਚ 20 ਕਰੋੜ ਰੁਪਏ ਦਾ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ  ਸਥਾਪਿਤ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅਗਲੇ ਵਰ੍ਹੇ ਇਸ ਰਾਹਤ ਫੰਡ ਨੂੰ ਵਧਾ ਕੇ 100 ਕਰੋੜ ਰੁਪਏ ਕੀਤਾ ਜਾਵੇਗਾ। ਉਨ੍ਹਾਂ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਆਪਣੀ ਸਿਹਤ ਪ੍ਰਤੀ ਜਾਗਰੁਕ ਹੋਣ ਅਤੇ ਸਾਲ ਵਿਚ ਘੱਟੋ ਘੱਟ ਇਕ ਵਾਰ ਆਪਣਾ ਮੈਡੀਕਲ ਚੈਕਅੱਪ ਕਰਵਾਉਣ ਦੀ ਕੋਸ਼ਿਸ ਕਰਿਆ ਕਰਨ। ਉਨ੍ਹਾਂ ਮੌਜੂਦ ਸਿਹਤ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੂੰ ਸਿਹਤ ਬੀਮਾ ਅਤੇ ਸਿਹਤ ਦੀ ਲਾਜਮੀ ਜਾਂਚ ਬਾਰੇ ਠੋਸ ਨੀਤੀ ਬਾਰੇ ਘੋਖ ਕਰਨ ਦੇ ਨਿਰਦੇਸ਼ ਵੀ ਦਿੱਤੇ।
          ਕੈਂਸਰ ਦੀ ਬੀਮਾਰੀ ਹੱਥੋਂ ਆਪਣੇ ਪਿਤਾ ਸ: ਰਘੁਰਾਜ ਸਿੰਘ ਬਾਦਲ, ਪਤਨੀ ਬੀਬੀ ਸੁਰਿੰਦਰ ਕੌਰ ਬਾਦਲ ਅਤੇ ਚਾਚਾ ਸ: ਗੁਰਰਾਜ ਸਿੰਘ ਨੂੰ ਗੁਆ ਚੁੱਕੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਬੜੀ ਸੁਹਿਰਦਤਾ ਨਾਲ ਕਿਹਾ ਕਿ ਇਹ ਨਾਮੁਰਾਦ ਬੀਮਾਰੀ ਦੇ ਕਹਿਰ ਤੋਂ ਮੇਰਾ ਪਰਿਵਾਰ ਵਾਂਝਾ ਨਹੀਂ ਰਿਹਾ ਹੈ ਅਤੇ ਭਾਵੇਂ ਅਜੇ ਤੱਕ ਕੈਂਸਰ ਦੀ ਬੀਮਾਰੀ ਦੇ ਅਸਲ ਕਾਰਨ ਦੀ ਸੂਹ ਨਹੀਂ ਲਾਈ ਜਾ ਸਕੀ ਹੈ, ਪਰ ਪੰਜਾਬ ਸਰਕਾਰ ਸੂਬੇ ਦੇ ਅਵਾਮ ਨੂੰ ਕੈਂਸਰ ਦੀ ਭਿਅੰਕਰ ਬੀਮਾਰੀ ਤੋਂ ਬਚਾਉਣ ਲਈ ਵਚਨਬੱਧ ਹੈ। ਜਿਸਦੇ ਤਹਿਤ ਸੂਬੇ ਵਿਚ ਅਗਲੇ ਤਿੰਨ ਮਹੀਨਿਆਂ ਵਿਚ ਪੰਜਾਬ ਭਰ ਵਿਚ ਅਜਿਹੇ 300 ਕੈਂਪ ਲਗਾਏ ਜਾਣਗੇ। ਜ਼ਿਨ੍ਹਾਂ ਵਿਚ ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਦੀ ਰੋਕਥਾਮ ਲਈ ਚੁੱਕੇ ਗਏ ਕਦਮਾਂ ਸੰਬੰਧੀ ਲੋਕਾਂ ਵਿਚ ਜਾਗਰੁਕਤਾ ਪੈਦਾ ਕਰਨ ਅਤੇ ਮੌਕੇ 'ਤੇ ਹੀ ਕੈਂਸਰ ਦੀ ਮੁੱਢਲੀ ਜਾਂਚ ਦੇ ਟੈਸਟ ਮੁਫ਼ਤ ਕੀਤੇ ਜਾਣਗੇ। ਜ਼ਿਨ੍ਹਾਂ ਵਿਚ ਮੈਮੋਗ੍ਰਾਫੀ ਅਤੇ ਪੈਪ ਸਮੀਅਰ ਟੈਸਟ ਦੀ ਸੁਵਿਧਾ ਸ਼ਾਮਿਲ ਹੈ। ਮੁੱਖ ਮੰਤਰੀ ਨੇ ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ ਰੋਕੋ ਕੈਂਸਰ ਵੱਲੋਂ ਕੈਂਸਰ ਵਿਰੁੱਧ ਵਿੱਢੀ ਮੁਹਿੰਮ ਦੀ ਖੁੱਲ੍ਹਦਿਲੀ ਨਾਲ ਸ਼ਲਾਘਾ ਕੀਤੀ।
             ਸ੍ਰੀ ਬਾਦਲ ਨੇ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਦੇ ਇਲਾਜ ਲਈ ਪੰਜਾਬ ਵਿਚ ਮੁਹਾਲੀ ਅਤੇ ਬਠਿੰਡਾ ਵਿਚ ਦੋ ਨਵੇਂ ਮਲਟੀ ਸਪੈਸਲਟੀ ਹਸਪਤਾਲ ਸਥਾਪਿਤ ਕੀਤੇ ਗਏ ਹਨ। ਇਸਤੋਂ ਬਿਨ੍ਹਾਂ ਤਿੰਨਾਂ ਮੈਡੀਕਲ ਕਾਲਜਾਂ ਫਰੀਦਕੋਟ, ਸ੍ਰੀ ਅਮ੍ਰਿਤਸਰ ਸਾਹਿਬ ਅਤੇ ਪਟਿਆਲਾ ਵਿਚ ਵੀ ਇਸ ਦੇ ਇਲਾਜ ਲਈ ਸੁਵਿਧਾ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਦਾ ਪਹਿਲੀ ਸਟੇਜ 'ਤੇ ਹੀ ਪਤਾ ਲੱਗ ਜਾਵੇ ਤਾਂ ਇਲਾਜ ਸੰਭਵ ਹੈ ਇਸ ਲਈ ਸਰਕਾਰ ਨੇ ਮੁੱਢਲੀ ਸਟੇਜ 'ਤੇ ਹੀ ਕੈਂਸਰ ਦੀ ਬਿਮਾਰੀ ਦਾ ਪਤਾ ਲਗਾਉਣ ਅਤੇ ਕੈਂਸਰ ਦੇ ਮਰੀਜਾਂ ਦੀ ਪੰਜਾਬ ਵਿਚ ਅਸਲ ਗਿਣਤੀ ਦਾ ਪਤਾ ਲਗਾਉਣ ਲਈ ਇਹ ਮੁਹਿੰਮ ਸ਼ੁਰੂ ਕੀਤੀ ਹੈ।
ਇਸ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ: ਬਾਦਲ ਨੇ ਕਿਹਾ ਕਿ ਕਾਂਗਰਸ ਦੀਆਂ ਗਲਤ ਨੀਤੀਆਂ ਕਾਰਨ ਸਾਡੇ ਮੁਲਕ ਵਿਚ ਕੇਂਦਰ ਸਰਕਾਰ ਕੋਲ ਹੀ ਸਾਰੀਆਂ ਵਿੱਤੀ ਸ਼ਕਤੀਆਂ ਹਨ ਅਤੇ ਰਾਜ ਸਰਕਾਰਾਂ ਕੋਲ ਆਮਦਨ ਦੇ ਬਹੁਤ ਘੱਟ ਵਸੀਲੇ ਹਨ। ਜਿਸ ਕਾਰਨ ਰਾਜ ਸਰਕਾਰਾਂ ਚਾਹ ਕੇ ਵੀ ਸਿਹਤ ਆਦਿ ਵਰਗੀਆਂ ਜਰੂਰੀ ਸੇਵਾਵਾਂ  ਉਪਲਬੱਧ ਕਰਵਾਉਣ ਲਈ ਸੀਮਤ ਸਾਧਨ ਹੀ ਖਰਚ ਕਰ ਸਕਦੀਆਂ ਹਨ। ਪਰ ਫਿਰ ਵੀ ਪੰਜਾਬ ਸਰਕਾਰ ਬੇਹਤਰ ਸਿਹਤ ਸਹੁਲਤਾਂ ਲੋਕਾਂ ਨੂੰ ਉਪਲਬੱਧ ਕਰਵਾਉਣ ਲਈ ਵਚਨਬੱਧ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਭੇਜੇ ਜਾਂਦੇ ਪ੍ਰੋਜੈਕਟਾਂ ਪ੍ਰਤੀ ਵੀ ਕੇਂਦਰ ਸਰਕਾਰ  ਦਾ ਰਵਈਆਂ ਨਾਂਹ ਪੱਖੀ ਹੀ ਹੁੰਦਾ ਹੈ।
          ਇਸ ਮੌਕੇ ਡਾ. ਐਸ. ਐਸ. ਗਿੱਲ ਉਪ ਕੁਲਪਤੀ ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਜ਼ ਫਰੀਦਕੋਟ ਨੇ ਆਪਣੇ ਵਿਚਾਰ ਪ੍ਰਗਟ ਕਰਦਿਆਂ ਕਿਹਾ ਕਿ ਫਰੀਦਕੋਟ ਯੂਨੀਵਰਸਿਟੀ ਵਿਖੇ ਕੈਂਸਰ ਦੇ ਮਰੀਜਾਂ ਦੇ ਇਲਾਜ ਲਈ ਵਿਸੇਸ਼ ਸੈਲ ਸਥਾਪਿਤ ਕੀਤਾ ਗਿਆ ਹੈ ਜਿੱਥੇ ਮਰੀਜਾਂ ਨੂੰ ਮੁਫ਼ਤ ਟੈਸਟ ਅਤੇ ਮੁਫ਼ਤ ਇਲਾਜ ਮੁਹਈਆ ਕਰਵਾਇਆ ਜਾ ਰਿਹਾ ਹੈ।
ਇਸ ਮੌਕੇ ਡਾ: ਜੇ.ਪੀ. ਸਿੰਘ ਡਾਇਰੈਕਟਰ ਸਿਹਤ ਸੇਵਾਵਾਂ ਪੰਜਾਬ ਨੇ ਕਿਹਾ ਕਿ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਵਿਚ ਵੀ ਕੈਂਸਰ ਰਾਹਤ ਫੰਡ ਵਿਚੋਂ ਸਹਾਇਤਾ ਲੈਣ ਲਈ ਮਰੀਜ਼ ਅਰਜੀ ਸਿਵਲ ਸਰਜਨ ਦਫ਼ਤਰ ਵਿਚ ਦੇ ਸਕਦੇ ਹਨ। ਉਨ੍ਹਾਂ ਦੱਸਿਆ ਕਿ ਅੱਜ ਦੇ ਇਸ ਮੁੱਢਲੀ ਜਾਂਚ ਕੈਂਪ  ਵਿਚ 1 ਹਜ਼ਾਰ ਤੋਂ ਵਧੇਰੇ ਮਰੀਜਾਂ ਦੀ ਰਜਿਸਟਰੇਸ਼ਨ ਹੋਈ ਹੈ।
              ਇਸ ਮੌਕੇ ਰੋਕੋ ਕੈਂਸਰ ਦੇ ਪੰਜਾਬ ਇੰਚਾਰਜ਼ ਧਰਮਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਲਈ ਬਣਾਈ ਮੋਬਾਇਲ ਕੈਂਸਰ ਰੋਕੋ ਵੈਨ ਵੱਲੋਂ 365 ਮਰੀਜਾਂ ਦੇ ਛਾਤੀ ਦੇ ਕੈਂਸਰ ਦੀ ਜਾਂਚ ਕੀਤੀ ਗਈ। ਜਿਨ੍ਹਾਂ ਵਿਚੋਂ 31 ਦੀ ਮੈਮੇਗਰਾਫ਼ੀ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ 12 ਮਰੀਜ ਸ਼ੱਕੀ ਪਾਏ ਗਏ।
            ਹੋਰਨਾਂ ਤੋਂ ਇਲਾਵਾ ਡਿਪਟੀ ਕਮਿਸ਼ਨਰ ਅਰਸ਼ਦੀਪ ਸਿੰਘ ਥਿੰਦ, ਮਾਰਕਫੱੈਡ ਦੇ ਨਿਰਦੇਸ਼ਕ ਚੇਅਰਮੈਨ ਤੇਜਿੰਦਰ ਸਿੰਘ ਮਿੱਡੂਖੇੜਾ, ਜ਼ਿਲਾ ਵਿਕਾਸ ਬੋਰਡ ਦੇ ਚੇਅਰਮੈਨ ਹਰਮੀਤ ਸਿੰਘ ਭੀਟੀਵਾਲਾ, ਬਲਕਰਨ ਸਿੰਘ ਬੱਲਾ ਨਿੱਜੀ ਸਕੱਤਰ ਮੁੱਖ ਮੰਤਰੀ, ਰੋਕੋ ਕੈਂਸਰ ਦੇ ਪੰਜਾਬ ਇੰਚਾਰਜ਼ ਧਰਮਿੰਦਰ ਸਿੰਘ ਦਿਓਲ, ਗੁਰਦੀਪ ਸਿੰਘ ਭੁੱਲਰ ਸਿਵਲ ਸਰਜਨ, ਬਲਬੀਰ ਸਿੰਘ ਐਸ. ਡੀ. ਐਮ. ਮਲੋਟ ਅਤੇ ਰਾਕੇਸ਼ ਢੀਂਗੜਾ, ਡਾ: ਰੀਟਾ ਗੁਪਤਾ ਵੀ ਮੌਜੂਦ ਸਨ।

ਦੁਨੀਆਂ ਭਰ 'ਚ ਏਡਜ ਨਾਲੋਂ ਵੀ ਚਾਰ ਗੁਣਾ ਵੱਧ ਫੈਲਿਆ ਕੈਂਸਰ

-ਤਾਜੇ ਅੰਕੜਿਆਂ ਅਨੁਸਾਰ ਦੁਨੀਆਂ ਭਰ 'ਚ ਕੈਂਸਰ ਦੀ ਬੀਮਾਰੀ 'ਚ 

20 ਫ਼ੀਸਦੀ ਦਾ ਔਸਤਨ ਵਾਧਾ-

                                          
                                                     ਇਕਬਾਲ ਸਿੰਘ ਸ਼ਾਂਤ
                  ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ 'ਰੋਕੋ ਕੈਂਸਰ' ਦੇ ਗਲੋਬਲ ਰਾਜਦੂਤ ਸ੍ਰੀ ਕੁਲਵੰਤ ਧਾਲੀਵਾਲ ਨੇ ਕਿਹਾ ਕਿ ਅਜੋਕੇ ਤਣਾਅਪੂਰਨ ਮਾਹੌਲ ਨੇ ਮਨੁੱਖਤਾ ਨੂੰ ਸਾਦੇ ਜੀਵਨ ਤੋਂ ਕੋਹਾਂ ਦੂਰ ਲਿਜਾ ਕੇ ਕੈਂਸਰ ਜਿਹੀ ਨਾਮੁਰਾਦ ਬੀਮਾਰੀ ਦੇ ਚੰਗੁਲ ਵਿਚ ਅਜਿਹਾ ਉਲਝਾ ਦਿੱਤਾ ਹੈ ਕਿ ਕੈਂਸਰ ਦੁਨੀਆਂ 'ਚ ਸਭ ਤੋਂ ਭਿਆਨਕ ਤੇ ਨਾਮੁਰਾਦ ਬੀਮਾਰੀ ਮੰਨੇ ਜਾਂਦੀ ਏਡਜ਼ ਨਾਲੋਂ ਵੀ ਚਾਰ ਗੁਣਾ ਜ਼ਿਆਦਾ ਫੈਲ ਚੁੱਕਿਆ ਹੈ।
                ਉਨ੍ਹਾਂ ਅੱਜ ਇਸ ਪ੍ਰਤਿਨਿਧ ਨਾਲ ਫੋਨ 'ਤੇ ਗੱਲਬਾਤ ਕਰਦਿਆਂ ਆਖਿਆ ਕਿ ਤਾਜ਼ਾ ਅੰਕੜਿਆਂ ਅਨੁਸਾਰ ਦੁਨੀਆਂ ਭਰ ਵਿਚ ਕੈਂਸਰ ਦੀ ਬੀਮਾਰੀ ਵਿਚ 20 ਫ਼ੀਸਦੀ ਦਾ ਔਸਤਨ ਵਾਧਾ ਹੋਇਆ ਹੈ, ਜੋ ਕਿ ਮਨੁੱਖਤਾ ਲਈ ਬੇਹੱਦ ਭਿਆਨਕ ਸੰਕੇਤ ਹੈ। ਇਸ ਖ਼ਤਰੇ ਦੀ ਘੰਟੀ ਨੂੰ ਮਹਿਸੂਸ ਕਰਦਿਆਂ ਯੂਰਪੀਅਨ ਮੁਲਕਾਂ ਦੀਆਂ ਸਰਕਾਰਾਂ ਬੇਹੱਦ ਗੰਭੀਰ ਹਨ। ਜਿਸਦੇ ਮੱਦੇਨਜ਼ਰ ਰੋਕੋ ਕੈਂਸਰ ਦੇ ਯਤਨਾਂ ਸਦਕਾ ਕੈਂਸਰ ਦੀ ਰੋਕਥਾਮ ਲਈ ਵਿਸ਼ਵ ਪੱਧਰ 'ਤੇ ਹੱਲ ਕੱਢਣ ਲਈ ਕੱਲ੍ਹ 12 ਅਕਤੂਬਰ ਨੂੰ ਇੰਗਲੈਂਡ ਦੀ ਪਾਰਲੀਮੈਂਟ ਵਿਖੇ 17 ਮੁਲਕਾਂ ਦੀ ਇੱਕ ਮੀਟਿੰਗ ਸੱਦੀ ਗਈ ਹੈ। ਜਿਸ ਵਿਚ 17 ਮੁਲਕਾਂ ਦੇ ਸੰਸਦ ਮੈਂਬਰ ਹਿੱਸਾ ਲੈਣਗੇ।
ਰੋਕੋ ਕੈਂਸਰ ਦੇ ਗਲੋਬਲ ਰਾਜਦੂਤ ਨੇ ਕਿਹਾ ਕਿ ਮੌਜੂਦਾ ਸਮੇਂ ਵਿਚ ਸਮਾਜ ਦੇ ਬਹੁਪੱਖੀ ਵਿਕਾਸ ਦੇ ਨਾਲ-ਨਾਲ ਵਧ ਰਹੇ ਤਣਾਅ ਅਤੇ ਰਸਾਇਣਿਕ ਖਾਦਾਂ ਕਰਕੇ ਹੋਏ ਦੂਸ਼ਿਤ ਹੁੰਦੇ ਪਾਣੀਆਂ ਸਮੇਤ ਵੱਖ-ਵੱਖ ਵਿਸ਼ੇ-ਵਿਕਾਰਾਂ ਕਰਕੇ ਅਜੋਕੇ ਤਰੱਕੀ ਦੇ ਵਸੀਲੇ ਮਨੁੱਖੀ ਸਿਹਤ ਲਈ ਬੇਹੱਦ ਘਾਤਕ ਵੀ ਸਿੱਧ ਹੋ ਰਹੇ ਸਨ।
              ਸ੍ਰੀ ਧਾਲੀਵਾਲ ਨੇ ਕਿਹਾ ਕਿ ਜੇਕਰ ਸਮਾਂ ਰਹਿੰਦਿਆਂ ਅਸੀਂ ਤੜਕ-ਭੜਕ ਅਤੇ ਤਣਾਅ ਭਰੇ ਜੀਵਨ ਤੋਂ ਪਾਸਾ ਵੱਟ ਕੇ ਇਕਜੁਟਤਾ ਨਾਲ ਸਾਦੇ ਜੀਵਨ ਵੱਲ ਮੂੰਹ ਨਾ ਮੋੜਿਆ ਤਾਂ ਅਗਲੇ ਇੱਕ-ਡੇਢ ਦਹਾਕੇ ਵਿਚ ਦੁਨੀਆਂ ਦੇ ਤਕਰੀਬਨ ਹਰੇਕ ਦੂਸਰੇ ਪਰਿਵਾਰ ਨੂੰ ਕੈਂਸਰ ਦਾ ਮਾੜਾ ਪਰਛਾਵਾਂ ਭੋਗਣਾ ਪਵੇਗਾ।
                ਉਨ੍ਹਾਂ ਕਿਹਾ ਕਿ ਜਿੱਥੇ ਪੰਜਾਬ ਦਾ ਮਾਲਵਾ ਖੇਤਰ ਕੈਂਸਰ ਨਾਲ ਜੂਝ ਰਿਹਾ ਹੈ, ਉਥੇ ਦੁਨੀਆਂ ਦੇ ਹੋਰਨਾਂ ਮੁਲਕ ਵੀ ਇਸਦੀ ਮਾਰ ਹੇਠ ਹਨ। ਉਨ੍ਹਾਂ ਕੈਂਸਰ ਦੀ ਬੀਮਾਰੀ ਖਿਲਾਫ਼ ਰੋਕੋ ਕੈਂਸਰ ਦੀਆਂ ਕਾਰਗੁਜਾਰੀਆਂ ਅਤੇ ਨਤੀਜਿਆਂ ਤੋਂ ਪ੍ਰਭਾਵਿਤ ਹੋ ਕੇ ਪੰਜਾਬ ਸਰਕਾਰ ਵੱਲੋਂ ਰੋਕੋ ਕੈਂਸਰ ਦੇ ਸਹਿਯੋਗ ਨਾਲ 28 ਅਕਤੂਬਰ ਤੋਂ ਸੂਬੇ ਵਿਚ ਕੈਂਸਰ ਨੂੰ ਮੁੱਢਲੇ ਪਛਾਣਨ ਦੇ ਉਦੇਸ਼ ਨਾਲ ਆਰੰਭੀ ਮੁਹਿੰਮ ਨੂੰ ਇੱਕ ਚੰਗੀ ਸ਼ੁਰੂਆਤ ਕਰਾਰ ਦਿੰਦਿਆਂ ਕਿਹਾ ਕਿ ਹੁਣ ਜੇਕਰ ਲੋਕ ਗੰਭੀਰਤਾ ਨਾਲ ਇਸ ਮੁਹਿੰਮ ਨੂੰ ਸਾਥ ਦੇਣ ਤਾਂ ਸੂਬੇ ਦੇ ਹਰ ਕੈਂਸਰ ਬਾਰੇ ਸ਼ੱਕੀ ਵਿਅਕਤੀ ਦਾ ਮੁੱਢਲੇ ਪੜਾਅ 'ਤੇ ਚੈਕਅੱਪ ਕਰਵਾ ਕੇ ਪੰਜਾਬ 'ਚ ਵੀ ਵਿਦੇਸ਼ਾਂ ਵਾਂਗ ਕੈਂਸਰ ਨਾਲ ਹੋਣ ਵਾਲੀਆਂ 'ਤੇ ਮੌਤਾਂ ਦੀ ਦਰਾਂ ਵਿਚ ਕਮੀ ਲਿਆਂਦੀ ਜਾ ਸਕਦੀ ਹੈ।
                   ਕੈਂਸਰ ਦੀ ਬੀਮਾਰੀ ਖਿਲਾਫ਼ ਆਪਣੇ ਜੀਵਨ ਸਮਰਪਿਤ ਕਰਨ ਵਾਲੇ ਸ੍ਰੀ ਧਾਲੀਵਾਲ ਨੇ ਦੱਸਿਆ ਕਿ ਰੋਕੋ ਕੈਂਸਰ ਵੱਲੋਂ ਪੰਜਾਬ ਵਿਚ ਕੈਂਸਰ ਚੈੱਕਅਪ ਲਈ ਪਹਿਲਾਂ 5 ਬੱਸਾਂ ਚੱਲ ਰਹੀਆਂ ਸਨ, ਪਰ ਹੁਣ ਗੰਭੀਰ ਹਾਲਾਤਾਂ ਦੇ ਮੱਦੇਨਜ਼ਰ ਇੱਕ ਨਵੀਂ ਬੱਸ ਰੋਕੋ ਕੈਂਸਰ ਦੇ ਭਾਰਤ ਵਿਚ ਨੁਮਾਇੰਦੇ ਸ: ਅਰਵਿੰਦਰ ਸਿੰਘ ਚਾਵਲਾ ਨੂੰ ਸੌਂਪੀ ਗਈ ਹੈ। ਇਥੇ ਜ਼ਿਕਰਯੋਗ ਹੈ ਕਿ 24 ਅਕਤੂਬਰ ਨੂੰ ਪਿੰਗਲਵਾੜਾ (ਅੰਮ੍ਰਿਤਸਰ) ਵਿਖੇ ਇੱਕ ਕੈਂਸਰ ਚੈੱਕਅੱਪ ਕੈਂਪ ਲਾਇਆ ਜਾ ਰਿਹਾ ਹੈ।

ਸੇਲਵਰਾਹ 'ਚ ਪੁਲਿਸ ਨੇ ਅੱਤਵਾਦ ਸਮੇਂ ਦਾ ਵਕਤ ਯਾਦ ਕਰਾਇਆ

                                   ਗੁਰਦੁਆਰੇ ਤੋਂ ਕੀਤਾ ਵਾਅਦਾ ਤੋੜ ਕੇ ਘਰਾਂ ਦੇ ਸਮਾਨ ਦੀ ਭੰਨਤੋੜ ਕੀਤੀ
                                    'ਰਾਜ ਨਹੀਂ ਸੇਵਾ' ਕਰਨ ਵਾਲੀ ਬਾਦਲ ਸਰਕਾਰ ਨੂੰ ਚੁਫੇਰਿਉਂ ਫਿਟਕਾਰਾਂ
ਸੇਲਵਰਾਹ (ਬਠਿੰਡਾ) : ਮਨੁੱਖ ਤਾਂ ਕੀ ਇਸ ਪਿੰਡ ਦੇ ਬੇਜੁਬਾਨ ਡੰਗਰ ਤੇ ਨਿਰਜਿੰਦ ਕੰਧਾਂ ਵੀ ਬੁਰ•ੀ ਤਰਾਂ ਸਹਿਮੀਆਂ ਪਈਆਂ ਹਨ, ਕਿਉਂਕਿ ਠੇਕਾ ਖੋਹਲਣ ਦਾ ਵਿਰੋਧ ਕਰ ਰਹੇ ਆਮ ਲੋਕਾਂ ਨੂੰ ਪਸਤ ਹਿੰਮਤ ਕਰਨ ਦੇ ਯਤਨ ਵਜੋਂ ਅੱਤਵਾਦ ਦੇ ਦਿਨਾਂ ਦੀ ਸਰਕਾਰੀ ਦਹਿਸ਼ਤ ਨੂੰ ਦੁਹਰਾਉਦਿਆਂ ਪੁਲਿਸ ਨੇ ਬੱਚਿਆਂ ਤੇ ਔਰਤਾਂ ਸਮੇਤ 250 ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਹੀ ਨਹੀਂ ਲਿਆ, ਬਲਕਿ ਦਾਣਾ ਫੱਕਾ ਖਿਲਾਰਨ ਤੋਂ ਬਿਨ•ਾਂ ਹਰ ਵਸਤ ਨੂੰ ਬੇਰਹਿਮੀ ਨਾਲ ਇਸ ਕਦਰ ਭੰਨਤੋੜ ਦਿੱਤਾ, 'ਰਾਜ ਨਹੀਂ ਸੇਵਾ' ਕਰਨ ਵਾਲੀ ਬਾਦਲ ਸਰਕਾਰ ਨੂੰ ਚੁਫੇਰਿਉਂ ਫਿਟਕਾਰਾਂ ਪੈ ਰਹੀਆਂ ਹਨ।
          
          ਮਾਮਲਾ ਕੁਝ ਇਸ ਤਰ•ਾਂ ਹੈ ਕਿ ਦੋ ਮਹੀਨੇ ਤੋਂ ਵੀ ਵੱਧ ਸਮੇਂ ਤੋਂ ਇੱਥੋਂ ਦੇ ਲੋਕ ਪਿੰਡ ਦੀ ਅਬਾਦੀ ਵਿੱਚ ਸ਼ਰਾਬ ਦਾ ਠੇਕਾ ਖੋਹਲਣ ਦਾ ਵਿਰੋਧ ਕਰਦੇ ਆ ਰਹੇ ਹਨ, ਲੇਕਿਨ ਹਾਕਮ ਧਿਰ ਦੇ ਕੁਝ ਆਗੂਆਂ ਦੇ ਆਰਥਿਕ ਹਿਤਾਂ ਨੂੰ ਮੱਦੇਨਜਰ ਰਖਦਿਆਂ ਸਾਸਨ ਤੇ ਪ੍ਰਸਾਸਨ ਹਰ ਹੀਲੇ ਦਾਰੂ ਦੀਆਂ ਛਬੀਲਾਂ ਲਵਾਉਣ ਲਈ ਪੱਬਾਂ ਭਾਰ ਹੋਇਆ ਫਿਰਦੈ।  30 ਅਪਰੈਲ ਤੇ ਇੱਕ ਮਈ ਦੀ ਦਰਮਿਆਨੀ ਰਾਤ ਨੂੰ ਸਮੁੱਚੇ ਪਿੰਡ ਤੋਂ ਆਕੀ ਹੋਏ ਇੱਕ ਅਣਅਧਿਕਾਰਤ ਸਖ਼ਸ ਨੇ ਜਦ ਗੈਰਕਾਨੂੰਨੀ ਢੰਗ ਤਰੀਕਿਆਂ ਨਾਲ ਦਾਰੂ ਵੇਚਣ ਦਾ ਯਤਨ ਕੀਤਾ ਤਾਂ ਔਰਤਾਂ ਸਮੇਤ ਪਿੰਡ ਦੀ ਬਹੁਗਿਣਤੀ ਨੇ ਉਸਦਾ ਵਿਰੋਧ ਕਰਨਾ ਸੁਰੂ ਕਰ ਦਿੱਤਾ। ਉਸ ਵੱਲੋਂ ਬੁਲਾਈ ਪੁਲਿਸ ਤੇ ਆਮ ਲੋਕਾਂ ਦਰਮਿਆਨ ਟਕਰਾਅ ਹੋ ਗਿਆ, ਜਿਸਦੇ ਚਲਦਿਆਂ ਦੋਵਾਂ ਧਿਰਾਂ ਦੇ ਕੁਝ ਲੋਕ ਜਖਮੀ ਹੋ ਗਏ ਤੇ ਕਿਸੇ ਸਰਾਰਤੀ ਵੱਲੋਂ ਲਾਈ ਅੱਗ ਕਾਰਨ ਪੁਲਿਸ ਦੀ ਗੱਡੀ ਸੜ ਕੇ ਸੁਆਹ ਹੋ ਗਈ।
          ਇੱਕ ਮਈ ਦਾ ਦਿਨ ਤਾਂ ਭਾਵੇਂ ਸਾਂਤੀ ਨਾਲ ਬੀਤ ਗਿਆ, ਲੇਕਿਨ ਹਨੇਰਾ ਹੁੰਦਿਆਂ ਹੀ ਪੁਲਿਸ ਦੀਆਂ ਭਾਰੀ ਭਰਕਮ ਧਾੜਾਂ ਨੇ ਪਿੰਡ ਦੇ ਸਕੂਲ ਨੂੰ ਆਪਣੀ ਛਾਉਣੀ ਵਿੱਚ ਤਬਦੀਲ ਕਰ ਦਿੱਤਾ। ਗੁਰਦੁਆਰਾ ਸਾਹਿਬ ਦੇ ਸਪੀਕਰ ਤੋਂ ਕੀਤੀ ਅਨਾਊਂਸਮੈਂਟ ਰਾਹੀਂ ਪੁਲਿਸ ਨੇ ਇਸ ਵਾਅਦੇ ਨਾਲ ਲੋਕਾਂ ਨੂੰ ਆਪੋ ਆਪਣੇ ਘਰਾਂ ਵਿੱਚ ਰਹਿਣ ਦੀ ਤਾਕੀਦ ਕਰ ਦਿੱਤੀ ਕਿ ਉਹਨਾਂ ਨਾਲ ਕਿਸੇ ਕਿਸਮ ਦੀ ਧੱਕੇਸ਼ਾਹੀ ਜਾਂ ਬੇਇਨਸਾਫੀ ਨਹੀਂ ਹੋਵੇਗੀ। ਠੇਕਾ ਵਿਰੋਧੀ ਅੰਦੋਲਨ ਦੇ ਅਹਿਮ ਸੰਚਾਲਕ ਤਾਂ ਭਾਵੇਂ ਪਹਿਲਾਂ ਹੀ ਰੂਪੋਸ ਹੋ ਚੁੱਕੇ ਸਨ, ਲੇਕਿਨ ਗੁਰੂ ਘਰ ਚੋਂ ਹੋਈ ਮੁਨਾਦੀ ਨੂੰ ਇਲਾਹੀ ਹੁਕਮ ਪ੍ਰਵਾਨ ਕਰਦਿਆਂ ਆਮ ਲੋਕ ਆਪੋ ਆਪਣੇ ਘਰਾਂ ਵਿੱਚ ਹੀ ਰਹੇ।
          
        ਪਿੰਡ ਦੀ ਮੁਕੰਮਲ ਘੇਰਾਬੰਦੀ ਕਰਦਿਆਂ ਮੂੰਹ ਹਨੇਰੇ ਹੀ ਪੁਲਿਸ ਨੇ ਹਰ ਘਰ ਵਿੱਚ ਛਾਪੇ ਮਾਰਨ ਦੀ ਕਾਰਵਾਈ ਸੁਰੂ ਕਰ ਦਿੱਤੀ। ਟੈਲੀਵੀਜਨ ਫਰਿੱਜ ਬਿਜਲੀ ਦੇ ਮੀਟਰ ਇੱਥੋਂ ਤੱਕ ਕਿ ਟੁੱਟਣ ਵਾਲੀ ਜੋ ਵੀ ਵਸਤ ਨਜਰ ਪਈ, ਉਸਨੂੰ ਬੁਰ•ੀ ਤਰਾਂ ਤੋੜਿਆ ਭੰਨਿਆਂ ਹੀ ਨਹੀਂ ਬਲਕਿ ਪੁਲਿਸ ਵਾਲਿਆਂ ਨੇ ਘਰਾਂ ਵਿੱਚ ਪਏ ਦਾਣੇ ਫੱਕੇ ਨੂੰ ਵੀ ਖਿਲਾਰ ਦਿੱਤਾ। ਰੱਸੇ ਸੰਗਲ ਖੋਹਲਦਿਆਂ ਡੰਗਰਾਂ ਨੂੰ ਘਰਾਂ ਚੋਂ ਭਜਾ ਦਿੱਤਾ, ਬਾਬੇਕਿਆਂ ਤੇ ਬਾਬਰ ਕੇ ਬਣ ਕੇ ਚੜ•ਣ ਵਾਲਿਆਂ ਨੇ ਬੱਚਿਆਂ ਤੇ ਔਰਤਾਂ ਸਮੇਤ ਢਾਈ ਸੌ ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਲੈ ਕੇ ਫੂਲ ਭਗਤਾ ਦਿਆਲਪੁਰਾ ਆਦਿ ਥਾਨਿਆਂ ਵਿੱਚ ਡੱਕ ਦਿੱਤਾ। ਸਿਤਮ ਜਰੀਫੀ ਇਹ ਕਿ ਜਦ ਪਿੰਡ ਦੇ ਲੋਕ ਆਪਣੇ ਹਮਵਤਨਾਂ ਲਈ ਲੰਗਰ ਲੈ ਕੇ ਆਏ ਤਾਂ ਥਾਨਾ ਫੂਲ ਦੀ ਪੁਲਿਸ ਨੇ ਪਹਿਲਾਂ ਤਾਂ ਵਰਤਾਉਣ ਤੋਂ ਰੋਕ ਦਿੱਤਾ, ਲੇਕਿਨ ਵਾਰ ਵਾਰ ਕੀਤੇ ਤਰਲਿਆਂ ਤੋਂ ਬਾਅਦ ਹੀ ਇਜਾਜਤ ਦਿੱਤੀ।
        
        ਪਿੰਡ ਦਾ ਮਹੌਲ ਇਸ ਕਦਰ ਗਮਗੀਨ ਤੇ ਦਹਿਸ਼ਤਜਦਾ ਹੋ ਗਿਆ, ਕਿ ਅਖ਼ਬਾਰ ਜਾਂ ਟੀ ਵੀ ਚੈਨਲ ਵਿੱਚ ਨਾ ਆਉਣ ਦੀ ਵਜ•ਾ ਕਾਰਨ ਸੰਗੀਨ ਧਰਾਵਾਂ ਥੱਲੇ ਗਿਰਫਤਾਰੀ ਤੋਂ ਡਰਦਿਆਂ ਮੌਕੇ ਤੇ ਪੁੱਜੀ ਮੀਡੀਆ ਪ੍ਰਤੀਨਿਧਾਂ ਦੀ ਟੀਮ ਸਾਹਮਣੇ ਕਿਸੇ ਨੇ ਜੁਬਾਨ ਖੋਹਲਣੀ ਵੀ ਮੁਨਾਸਿਬ ਨਾ ਸਮਝੀ। ਅਫਸੋਸਨਾਕ ਪਹਿਲੂ ਇਹ ਹੈ ਕਿ ਜਦ ਇੱਕ ਪਿੰਡ ਵਿੱਚ ਅਜਿਹਾ ਤਾਂਡਵ ਨਾਚ ਨੱਚਿਆ ਜਾ ਰਿਹਾ ਸੀ ਤਾਂ ਸੱਭਿਆਚਾਰਕ ਸਰਗਰਮੀਆਂ ਦੇ ਮੋਹਰੀ ਜਸਦੇਵ ਸਿੰਘ ਜੱਸੋਵਾਲ ਜੋ ਸਾਬਕਾ ਵਿਧਾਇਕ ਵੀ ਹਨ ਤੇ ਡੀ ਆਈ ਜੀ ਦੇ ਅਹੁਦੇ ਤੋਂ ਸੇਵਾਮੁਕਤ ਹੋ ਕੇ ਬਣੇ ਸਮਾਜ ਸੁਧਾਰਕ ਸ੍ਰੀ ਹਰਿੰਦਰ ਸਿੰਘ ਚਾਹਲ ਤੋਂ ਇਲਾਵਾ ਕਿਸੇ ਵੀ ਸਿਆਸੀ ਜਾਂ ਜਨਤਕ ਆਗੂ ਨੇ ਲੋਕਾਂ ਦੀ ਸਾਰ ਲੈਣੀ ਮੁਨਾਸਿਬ ਨਾ ਸਮਝੀ।
       
         ਜੱਸੋਵਾਲ ਚਾਹਲ ਜੋੜੀ ਦੀ ਆਮਦ ਤੋਂ ਬਾਅਦ ਨਾਂ ਗੁਪਤ ਰੱਖਣ ਦੀ ਸਰਤ ਤੇ ਬਜੁਰਗ ਅਵਸਥਾ ਵਿੱਚ ਪੁੱਜ ਚੁੱਕੇ ਕੁਝ ਮਰਦਾਂ ਤੇ ਔਰਤਾਂ ਨੇ ਮੂੰਹ ਖੋਹਲਣ ਦੀ ਹਿੰਮਤ ਦਿਖਾਈ।  80ਵਿਆਂ ਨੂੰ ਢੁੱਕ ਚੁੱਕੇ ਇੱਕ ਬਾਬੇ ਬੋਲਣ ਸਮੇਂ ਹੰਝੂਆਂ ਨਾਲ ਜਿਸ ਦੀ ਸਫੈਦ ਦਾਹੜੀ ਭਿੱਜ ਚੁੱਕੀ ਸੀ, ਨੇ ਅੱਤਵਾਦ ਦੇ ਦਿਨਾਂ ਨੂੰ ਯਾਦ ਕਰਦਿਆਂ ਕਿਹਾ ਕਿ ਜਿਵੇਂ ਉਦੋਂ ਕਿਸੇ ਇੱਕ ਅੱਧ ਮੁੰੰਡੇ ਨੂੰ ਫੜਣ ਵਾਸਤੇ ਪੁਲਿਸ ਤੇ ਫੌਜਾਂ ਪਿੰਡਾਂ ਨੂੰ ਘੇਰਿਆ ਕਰਦੀਆਂ ਸਨ, ਉਹਨਾਂ ਨਾਲ ਵੀ ਅੱਜ ਉਸਤੋਂ ਕਿਤੇ ਵੱਧ ਧੱਕੇਸ਼ਾਹੀ ਹੋਈ ਹੈ। ਸਰਕਾਰਾਂ ਵੱਲੋਂ ਨਸ਼ਾ ਬੰਦੀ ਲਈ ਕੀਤੇ ਜਾ ਰਹੇ ਦਾਅਵਿਆਂ ਵੱਲ ਜਦ ਬਾਬੇ ਦਾ ਧਿਆਨ ਦਿਵਾਇਆ ਤਾਂ ਉਸਦਾ ਉੱਤਰ ਸੀ, ਇੱਥੇ ਤਾਂ ਰਾਜ ਭਾਗ ਦੇ ਮਾਲਕ ਹੀ ਡੰਡੇ ਦੇ ਜੋਰ ਨਾਲ ਜਹਿਰੀਲੀ ਦਾਰੂ ਵਿਕਵਾ ਰਹੇ ਹਨ, ਜੋ ਹੁਣ ਤੱਕ ਕਈਆਂ ਦੀ ਜਾਨ ਲੈ ਚੁੱਕੀ ਹੈ।
ਅਮ੍ਰਿਤਧਾਰੀ ਇੱਕ ਬੇਬੇ ਨੇ ਆਪਣੀਆਂ ਜਖ਼ਮੀ ਭਾਵਨਾਵਾਂ ਦਾ ਇਜ਼ਹਾਰ ਕਰਦਿਆਂ ਸੁਆਲ ਕੀਤਾ ਕਿ ਆਪਣੇ ਇਲਾਕੇ ਤੋਂ ਲੈ ਕੇ ਬਾਹਰਲੇ ਸ਼ਹਿਰਾਂ ਤੱਕ ਜਮੀਨਾਂ ਤੇ ਕਬਜੇ ਕਰਕੇ ਵੀ ਜੇ ਸਥਾਨਕ ਆਗੂਆਂ ਦੀ ਤਮਾਂ ਨਹੀਂ ਭਰੀ ਤਾਂ ਉਹ ਜਹਿਰੀਲੀ ਦਾਰੂ ਰਾਹੀਂ ਸਾਡੇ ਬੱਚਿਆਂ ਦੇ ਸਿਵੇ ਜਲਾ ਕੇ ਕਿਲ•ੇ ਨਹੀਂ ਉਸਾਰਨ ਲੱਗੇ। ਕ੍ਰਿਪਾਨ ਵਾਲੇ ਗਾਤਰੇ ਨੂੰ ਹੱਥ ਵਿੱਚ ਲੈਂਦਿਆਂ ਬੇਬੇ ਨੇ ਆਪਣੇ ਵਾਹਿਗੁਰੂ ਨੂੰ ਅਰਜੋਈ ਕੀਤੀ ਕਿ ਜਿਸ ਸਰਕਾਰ ਦੀ ਪੁਲਿਸ ਨੇ ਗੁਰੂ ਘਰ ਦੇ ਸਪੀਕਰ ਰਾਹੀਂ ਕੀਤਾ ਵਾਅਦਾ ਵੀ ਨਹੀਂ ਨਿਭਾਇਆ ਜੇ ਉਸ ਵਿੱਚ ਕੋਈ ਸਕਤੀ ਹੈ ਤਾਂ ਉਸਦਾ ਬੇੜਾ ਜਰੂਰ ਗਰਕ ਕਰ ਦੇਵੇ।
          
          ਪੱਤਰਕਾਰਾਂ ਦੀ ਟੀਮ ਜਦ ਥਾਨਾ ਫੂਲ ਪੁੱਜੀ ਤਾਂ ਉਹਨਾਂ ਦੀ ਸਨਾਖਤ ਤੋਂ ਅਣਜਾਣ ਤਾਕਤ ਦੇ ਨਸ਼ੇ ਵਿੱਚ ਭੂਤਰਿਆ ਇੱਕ ਥਾਨੇਦਾਰ ਆਪਣੇ ਸਾਥੀ ਨੂੰ ਬੜੇ ਫ਼ਖਰ ਨਾਲ ਇਹ ਦੱਸ ਰਿਹਾ ਸੀ, ਕਿ ਪੁਲਿਸ ਦੀ ਹੋਈ ਬੇਇਜਤੀ ਦਾ ਪਿੰਡ ਵਾਸੀਆਂ ਤੋਂ ਬਦਲਾ ਲੈਣ ਲਈ ਉਸਨੇ ਕੋਈ ਕਸਰ ਬਾਕੀ ਨਹੀਂ ਰਹਿਣ ਦਿੱਤੀ। ਅਜਿਹੇ ਵਰਤਾਰੇ ਤੋਂ ਪੋਟਾ ਪੋਟਾ ਦੁਖੀ ਇੱਕ ਸਾਊ ਪੁਲਿਸ ਵਾਲਾ ਇਹ ਕਹਿੰਦਾ ਵੀ ਸੁਣਿਆ ਗਿਆ ਕਿ ਆਪਣੇ ਲੋਕਾਂ ਨਾਲ ਕੀਤੀਆਂ ਜਾਣ ਵਾਲੀਆਂ ਜਿਆਦਤੀਆਂ ਤੋਂ ਬਚਣ ਦਾ ਹੁਣ ਇੱਕੋ ਇੱਕ ਰਾਹ ਰਹਿ ਗਿਆ ਹੈ ਸਵੈਇਛੁਕ ਸੇਵਾ ਮੁਕਤੀ।

        
          ਇੱਕੀਵੀਂ ਸਦੀ ਅਤੇ ਸੂਚਨਾ ਤਕਨੀਕ ਦੇ ਇਸ ਯੁੱਗ ਵਿੱਚ ਹੋ ਰਹੀ ਅਜਿਹੀ ਹਨੇਰਗਰਦੀ ਦਾ ਗੰਭੀਰ ਨੋਟਿਸ ਲੈਂਦਿਆਂ ਪੰਜਾਬ ਮਨੁੱਖੀ ਅਧਿਕਾਰ ਕਮੇਟੀ ਦੇ ਜਨਰਲ ਸਕੱਤਰ ਸ੍ਰੀ ਵੇਦ ਪ੍ਰਕਾਸ ਗੁਪਤਾ ਨੇ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਚੀਫ਼ ਜਸਟਿਸ ਨੂੰ ਅਪੀਲ ਕੀਤੀ ਕਿ ਉਹ ਰਾਮਪੁਰਾ ਫੂਲ ਇਲਾਕੇ ਵਿੱਚ ਹੋ ਰਹੀ ਸਰਕਾਰੀ ਦਹਿਸਤਗਰਦੀ ਦੀ ਆਪਣੇ ਤੌਰ ਤੇ ਪੜਤਾਲ ਕਰਵਾ ਕੇ ਲੋੜੀਂਦੀ ਕਾਰਵਾਈ ਕਰਨ। ਸੀ ਪੀ ਆਈ ਦੇ ਜਿਲ•ਾ ਸਕੱਤਰ ਕਾ: ਜਗਜੀਤ ਜੋਗਾ ਨੇ ਆਮ ਲੋਕਾਂ ਨਾਲ ਹੋਈ ਧੱਕੇਸ਼ਾਹੀ ਦੀ ਸਖਤ ਨਿਖੇਧੀ ਕਰਦਿਆਂ ਦੱਸਿਆ ਕਿ ਹਮਖਿਆਲ ਪਾਰਟੀਆਂ ਨਾਲ ਸਲਾਹ ਮਸਵਰਾ ਕਰਕੇ ਉਹ ਬਣਦੀ ਕਾਰਵਾਈ ਕਰਨਗੇ। ਦਿਹਾਤੀ ਮਜਦੂਰ ਸਭਾ ਦੇ ਪ੍ਰਮੁੱਖ ਆਗੂ ਕਾ: ਮਹੀਂਪਾਲ ਨੇ ਵੀ ਆਮ ਲੋਕਾਂ ਤੇ ਹੋਈ ਧੱਕੇਸ਼ਾਹੀ ਦੀ ਡਾਢੀ ਨਿੰਦਾ ਕੀਤੀ। 
-ਬੀ ਐਸ ਭੁੱਲਰ

ਲੰਬੀ 'ਚ ਨੌਜਵਾਨ 'ਤੇ ਅਣਮਨੁੱਖੀ ਤਸ਼ੱਦਦ ਕਰਕੇ ਕੀਤੀ ਸਬ ਇੰਸਪੈਕਟਰ ਅਤੇ ਤਿੰਨ ਪੁਲਿਸ ਮੁਲਾਜਮਾਂ ਨੇ ਚੋਰੀ ਦੀ ਤਫਤੀਸ਼

                                                                    -ਹਾਕਮਾਂ ਦੇ ਹਲਕੇ ਦੀ ਖਾਕੀ ਦੀ ਕਰਤੂਤ-
              -ਮਿਰਚਾਂ ਵਾਲੇ ਪਾਣੀ ਨਾਲ ਭਰੀ ਬਾਲਟੀ 'ਚ ਸਿਰ ਡੁਬੋਇਆ-ਢੂਈ 'ਤੇ ਚੜ੍ਹ ਕੇ ਮਾਰ-ਕੁੱਟ ਦਾ ਦੋਸ਼ -
              

                                                                                         -ਇਕਬਾਲ ਸਿੰਘ ਸ਼ਾਂਤ-
               ਮੁੱਖ ਮੰਤਰੀ ਦੇ ਜੱਦੀ ਹਲਕੇ ਲੰਬੀ ਵਿਖੇ ਇੱਕ ਗੈਸ Âਜੇਂਸੀ 'ਚ ਹੋਈ ਚੋਰੀ ਦੀ ਤਫਤੀਸ਼ ਦੌਰਾਨ ਥਾਣਾ ਲੰਬੀ ਦੇ ਇੱਕ ਸਬ ਇੰਸਪੈਕਟਰ, ਤਿੰਨ ਹੈੱਡ ਕਾਂਸਟੇਬਲਾਂ ਅਤੇ ਗੈਸ Âਜੇਂਸੀ ਮਾਲਕ ਵੱਲੋਂ ਗੈਸ Âਜੇਂਸੀ ਦੇ ਇੱਕ ਕਰਮਚਾਰੀ ਦੀ ਕਥਿਤ ਤੌਰ 'ਤੇ ਮਾਰ-ਕੁੱਟ ਕਰਨ ਤੇ ਉਸਨੂੰ ਬੜ੍ਹੀ ਬੇਰਹਿਮੀ ਨਾਲ ਅਣਮਨੁੱਖੀ ਤਸੀਹੇ ਦੇਣ ਦਾ ਹੈਰਾਨੀਜਨਕ ਮਾਮਲਾ ਸਾਹਮਣੇ ਆਇਆ ਹੈ।
             ਇਹ ਹੈਰਾਨਕੁੰਨ ਕਾਰਨਾਮਾ ਵੀ ਸੂਬੇ ਦੇ ਹਾਕਮਾਂ ਦੀ 'ਲਾਡਲੀ' ਲੰਬੀ ਪੁਲਿਸ ਦੇ ਹਿੱਸੇ ਹੀ ਆਉਂਦਾ ਹੈ ਕਿ ਜਿਸਨੇ ਇੱਕ ਚੋਰੀ ਨੂੰ ਕਢਵਾਉਣ ਲਈ 'ਥਰਡ ਡਿਗਰੀ' ਜਿਹੀ ਵਰਤੋਂ ਕਰਦਿਆਂ ਇੱਕ ਬੇਕਸੂਰ ਨੌਜਵਾਨ ਨੂੰ ਨਾ ਸਿਰਫ਼ ਨੰਗਾ ਕਰਕੇ ਮਾਰਿਆ-ਕੁੱਟਿਆ ਗਿਆ, ਬਲਕਿ ਉਸਦੇ ਹੱਥ ਪਿੱਛੇ ਬੰਨ੍ਹ ਕੇ ਉਸਦਾ ਸਿਰ ਮਿਰਚਾ ਮਿਲੇ ਪਾਣੀ ਨਾਲ ਭਰੀ ਬਾਲਟੀ 'ਚ ਡੁਬੋ ਦਿੱਤਾ ਗਿਆ। ਜਦੋਂ ਇੰਨੇ ਨਾਲ ਸਬਰ ਨਹੀਂ ਆਇਆ ਤਾਂ ਦੋ ਪੁਲਿਸ ਮੁਲਾਜਮ ਉਸੇ ਹਾਲਤ 'ਚ ਉਸਦੀ ਢੂਈ 'ਤੇ ਚੜ੍ਹ ਗਏ।
                  ਪਿੰਡ ਲੰਬੀ ਦੇ ਵਸਨੀਕ ਪਰਮਜੀਤ ਸਿੰਘ ਪੁੱਤਰ ਸੋਹਣ ਲਾਲ ਨੇ ਇੱਕ ਬਿਆਨ ਹਲਫੀਆ ਦੇ ਕੇ ਦੋਸ਼ ਲਗਾਇਆ ਕਿ ਉਹ ਪਿਛਲੇ ਦੋ ਸਾਲਾਂ ਤੋਂ ਭਾਰਤ ਪੈਟਰੋਲੀਅਮ ਦੀ ਰਣਜੀਤ ਗੈਸ ਏਜੰਸੀ ਲੰਬੀ 'ਤੇ ਬਤੌਰ ਸੇਵਾਦਾਰ ਕੰਮ ਕਰਦਾ ਸੀ ਤੇ ਦਫ਼ਤਰ ਦੀ ਚਾਬੀ ਵੀ ਉਸ ਕੋਲ ਹੁੰਦੀ ਸੀ ਤੇ ਉਹ ਰੋਜ਼ਾਨਾ ਸਵੇਰੇ 7 ਵਜੇ ਦਫ਼ਤਰ ਖੋਲ੍ਹਦਾ ਸੀ। ਉਸਨੇ ਦੱਸਿਆ ਕਿ ਬੀਤੀ 9 ਅਪਰੈਲ 2011 ਰੋਜ਼ਾਨਾ ਵਾਂਗ ਉਸਨੇ ਦਫ਼ਤਰ ਖੋਲ੍ਹਿਆ ਤੇ ਜਦੋਂ ਅੰਦਰ ਜਾ ਕੇ ਵੇਖਿਆ ਤਾਂ ਦਫ਼ਤਰ ਦਾ ਏ.ਸੀ. ਡਿੱਗਿਆ ਪਿਆ ਸੀ ਤੇ ਕੰਪਿਊਟਰਾਂ ਦੀਆਂ 2 ਐਲ. ਸੀ. ਡੀਜ਼ ਅਤੇ ਦੋ ਗੈਸ ਸਿਲੰਡਰ ਅਤੇ ਹੋਰ ਸਮਾਨ ਗਾਇਬ ਸੀ। ਜਿਸ 'ਤੇ ਉਸਨੇ ਗੈਸ ਏਜੰਸੀ ਦੇ ਮਾਲਕ ਪਵਨਪਾਲ ਕੁਮਾਰ ਨੂੰ ਫੋਨ 'ਤੇ ਸੂਚਨਾ ਦਿੱਤੀ। ਜਿਸਦੇ ਲਗਭਗ ਦੋ ਘੰਟਿਆਂ ਬਾਅਦ ਪਵਨਪਾਲ ਕੁਮਾਰ ਮੌਕੇ 'ਤੇ ਪਹੁੰਚ ਗਿਆ ਤੇ ਉਸਨੇ ਲੰਬੀ ਪੁਲਿਸ ਨੂੰ ਮੌਕੇ 'ਤੇ ਬੁਲਾ ਲਿਆ। ਲੰਬੀ ਥਾਣੇ ਦੇ ਇੱਕ ਐਸ. ਆਈ. ਸਮੇਤ ਪੁਲਿਸ ਟੀਮ ਵਗੈਰਾ ਨੇ ਆਪਣੀ ਤਫਤੀਸ਼ ਆਰੰਭ ਕਰ ਦਿੱਤੀ ਤੇ ਸ਼ਾਮ ਦੇ ਕਰੀਬ 6:30 ਵਜੇ ਗੈਸ ਏਜੰਸੀ ਮਾਲਾਕ ਪਵਨਪਾਲ ਕੁਮਾਰ ਆਪਣੇ ਨਾਲ ਪੁਲਿਸ ਮੁਲਾਜਮਾਂ ਨੂੰ ਸਮੇਤ ਦਫ਼ਤਰ ਪੁੱਜਿਆ ਤੇ ਜ਼ਬਰਦਸਤੀ ਮੈਨੂੰ (ਪਰਮਜੀਤ) ਅਤੇ ਬਾਕੀ ਏਜੰਸੀ ਕਰਮਚਾਰੀਆਂ ਨੂੰ ਆਪਣੇ ਨਾਲ ਲੰਬੀ ਥਾਣੇ 'ਚ ਲੈ ਗਏ, ਜਿਥੇ ਉਕਤ ਸਬ ਇੰਸਪੈਕਟਰ, ਤਿੰਨ ਪੁਲਿਸ ਮੁਲਾਜਮ ਅਤੇ ਏਜੰਸੀ ਮਾਲਕ ਵੱਲੋਂ ਚੋਰੀ ਮਨਾਉਣ ਲਈ ਡਰਾ ਧਮਕਾ ਕੇ ਦਬਾਅ ਪਾਇਆ ਜਾਣ ਲੱਗਿਆ ਤੇ ਉਨ੍ਹਾਂ 'ਤੇ ਚੋਰੀ ਦੇ ਦੋਸ਼ ਲਾਉਂਦੇ ਹੋਏ ਕਹਿਣ ਲੱਗੇ ਕਿ 'ਤੁਸੀਂ ਚੋਰੀ ਕੀਤੀ ਹੈ ਤੇ ਸਮਾਨ ਦੇ ਦਿਓ'। ਪਰਮਜੀਤ ਸਿੰਘ ਨੇ ਕਿਹਾ ਕਿ 'ਅਸੀਂ ਕਿਹਾ ਕਿ ਏਜੰਸੀ ਨਾਲ ਸਾਡਾ ਰੁਜ਼ਗਾਰ ਜੁੜਿਆ ਹੋਇਆ ਤੇ ਅਸੀਂ ਚੋਰੀ ਤਾਂ ਦੂਰ ਦੀ ਗੱਲ ਇਸ ਬਾਰੇ ਸੋਚਣਾ ਵੀ ਪਾਪ ਸਮਝਦੇ ਹਾਂ।'
                 ਪਰਮਜੀਤ ਨੇ ਦੋਸ਼ ਲਗਾਇਆ ਕਿ ਪੁੱਛਗਿੱਛ ਦੌਰਾਨ ਬਾਕੀ ਏਜੰਸੀ ਕਰਮਚਾਰੀਆਂ ਨੂੰ ਤਾਂ ਵਾਪਸ ਭੇਜ ਦਿੱਤਾ ਗਿਆ ਪਰ ਇੱਕ ਸਬ ਇੰਸਪੈਕਟਰ ਤੇ ਹੈੱਡ ਕਾਂਸਟੇਬਲਾਂ ਨੇ ਕਥਿਤ ਤੌਰ 'ਤੇ ਜ਼ਬਰਦਸਤੀ ਉਸਦੇ ਕੱਪੜੇ ਉਤਾਰ ਦਿੱਤੇ ਅਤੇ ਉਸਨੂੰ ਦੇ ਕੁਆਟਰਾਂ ਵਿੱਚ ਲੈ ਗਏੇ ਉਥੇ ਲਿਜਾ ਕੇ ਹੱਥ ਪਿੱਛੇ ਕਰਕੇ ਬੰਨ੍ਹ ਦਿੱਤੇ। ਪਰਮਜੀਤ ਸਿੰਘ ਨੇ ਦੋਸ਼ ਲਾਇਆ ਕਿ ਇਸਦੇ ਉਪਰੰਤ ਉਕਤ ਵਿਅਕਤੀਆਂ ਨੇ ਕਥਿਤ ਤੌਰ 'ਤੇ ਇੱਕ ਬਾਲਟੀ ਵਿੱਚ ਪਾਣੀ ਤੇ ਮਿਰਚਾਂ ਪਾ ਕੇ ਉਸਦਾ ਸਿਰ ਵਿੱਚ ਡੁਬੋ ਦਿੱਤਾ ਅਤੇ ਉਕਤ ਪੁਲਿਸ ਮੁਲਾਜਿਮ ਉਸਦੀ ਢੁਈ ਉੱਤੇ ਚੱੜ੍ਹ ਗਏ। ਪਰਮਜੀਤ ਨੇ ਦੱਸਿਆ ਕਿ ਉਸਦੀਆਂ ਅੱਖਾਂ ਵਿੱਚ ਮਿਰਚਾਂ ਵਾਲਾ ਪਾਣੀ ਪੈਣ ਕਰਕੇ ਉਸਦੀ ਚੀਖਾਂ ਨਿੱਕਲ ਗਈਆਂ। ਜਿਸ 'ਤੇ ਪੁਲਿਸ ਮੁਲਾਜਮਾਂ ਨੇ ਬੜੀ ਬੇਰਹਿਮੀ ਨਾਲ ਪਰਮਜੀਤ ਦੀ ਮਾਰ-ਕੁੱਟ ਕੀਤੀ ਅਤੇ ਧਮਕੀਆਂ ਦਿੱੱਤੀਆਂ ਕਿ ਜੇਕਰ ਉਸਨੇ ਚੋਰੀ ਹੋਇਆ ਸਮਾਨ ਨਾਂ ਦਿੱਤਾ ਤਾਂ ਤੇਰੇ ਚੱਡੇ ਪਾੜ੍ਹ ਦਿਆਂਗੇ ਅਤੇ ਤੇਰੇ ਘੋਟਾ ਵੀ ਲਾਵਾਂਗੇ। ਜਿਸ 'ਤੇ ਪਰਮਜੀਤ ਨੇ ਰੋਂਦੇ ਕੁਰਲਾਉਂਦੇ ਹੋਏ ਖੁਦ ਦੇ ਬੇਕਸੂਰ ਹੋਣ ਦੇ ਲੱਖ ਵਾਸਤੇ ਪਾਏ ਪਰ ਉਹ ਜਾਲਮ ਮਾਹੌਲ ਵਿਚ ਕਿਸੇ ਨੇ ਉਸਦੀ ਸੁਣਵਾਈ ਨਹੀਂ ਕੀਤੀ। ਉਸਨੇ ਦੋਸ਼ ਲਗਾਇਆ ਕਿ ਉਹ ਮਾਰ-ਕੁੱਟ ਦੇ ਨਿਸ਼ਾਨਾਂ ਨੂੰ ਮਿਟਾਉਣ ਖਾਤਰ ਥਾਣੇ ਵਿਚ ਨੁਹਾਇਆ ਵੀ ਗਿਆ।
               ਪਰਮਜੀਤ ਸਿੰਘ ਨੇ ਦੱਸਿਆ ਕਿ ਇਸਦੇ ਉਪਰੰਤ ਏਜੰਸੀ ਮਾਲਕ ਪਵਨਪਾਲ ਕੁਮਾਰ, ਸਬ ਇੰਸਪੈਕਟਰ ਤੇ ਪੁਲਿਸ ਮੁਲਾਜਮ ਉਸਨੂੰ ਗੈਸ ਏਜੰਸੀ ਦੇ ਗੋਦਾਮ 'ਚ ਲੈ ਗਏ ਅਤੇ ਉੱਥੇ ਧੱਕੇ ਨਾਲ ਉਸਨੂੰ ਸ਼ਰਾਬ ਪਿਆ ਕੇ ਫਿਰ ਮਾਰ-ਕੁੱਟ ਕੀਤੀ ਤੇ ਜ਼ਬਰਦਸਤੀ ਕੀਤੀ ਤੇ ਧਮਕਾਇਆ ਕਿ ਜੇਕਰ ਮਾਰ-ਕੁੱਟ ਬਾਰੇ ਕੋਈ ਗੱਲ ਕੀਤੀ ਤਾਂ ਝੂਠੇ ਕੇਸ ਵਿਚ ਫਸਾ ਦਿਆਂਗੇ। ਪਰਮਜੀਤ ਦੇ ਭਰਾ ਧਨਰਾਜ ਨੇ ਦੱਸਿਆ ਕਿ ਉਸਦੇ ਪਿਤਾ ਸੋਹਣ ਲਾਲ, ਤਾਇਆ ਮੋਤੀ ਰਾਮ ਅਤੇ ਉਹ 3-4 ਹੋਰ ਵਿਅਕਤੀ ਨੂੰ ਨਾਲ ਲੈ ਕੇ ਏਜੰਸੀ ਗੋਦਾਮ ਵਿਚ ਗਏ ਜਿੱਥੇ ਪੁਲਿਸ ਵਾਲਿਆਂ ਨੇ ਪਹਿਲਾਂ ਤਾਂ ਨਾਲ ਪਰਮਜੀਤ ਨੂੰ ਨਾਲ ਭੇਜਣ ਤੋਂ ਇਨਕਾਰ ਕਰ ਦਿੱਤਾ ਪਰ ਬਾਅਦ ਵਿਚ ਕਥਿਤ ਤੌਰ 'ਤੇ ਕੋਰੇ ਕਾਗਜ਼ਾਂ 'ਤੇ ਦਸਤਖ਼ਤ ਕਰਵਾਉਣ ਉਪਰੰਤ ਘਰ ਭੇਜ ਦਿੱਤਾ। ਜਿਸਦੇ ਉਪਰੰਤ ਸਵੇਰੇ ਉਸਨੂੰ ਜਖ਼ਮੀ ਹਾਲਤ ਵਿਚ ਸਰਕਾਰੀ ਹਸਪਤਾਲ ਲੰਬੀ ਵਿਚ ਲਿਜਾਇਆ ਗਿਆ।
                  ਪਰਮਜੀਤ ਸਿੰਘ ਨੇ ਪੱਤਰਕਾਰਾਂ ਦੇ ਸਨਮੁੱਖ ਭਰੀਆਂ ਅੱਖਾਂ ਨਾਲ ਆਪਣੀ ਹੱਡ-ਬੀਤੀ ਗੋਡਿਆਂ 'ਤੇ ਵੱਜੀ ਸੱਟਾਂ ਵਿਖਾਉਂਦੇ ਹੋਏ ਦੱਸਿਆ ਕਿ ਉਸਨੂੰ ਵਗੈਰ ਕਿਸੇ ਸਬੂਤ ਦੇ ਇਸ ਲਈ ਅੰਨ੍ਹੇ ਤਸ਼ੱਦਦ ਦਾ ਸ਼ਿਕਾਰ ਬਣਾਇਆ ਗਿਆ ਕਿ ਉਸਦੇ ਕੋਲ ਦਫ਼ਤਰ ਦੀਆਂ ਚਾਬੀਆਂ ਹੁੰਦੀਆਂ ਸਨ। ਉਸਨੇ ਕਿਹਾ ਕਿ ਜਦੋਂਕਿ ਮੌਕੇ ਦੇ ਹਾਲਾਤਾਂ ਤੋਂ ਸਪੱਸ਼ਟ ਹੁੰਦਾ ਹੈ ਕਿ ਚੋਰੀ ਏ। ਸੀ। ਵਾਲੇ ਰੌਸ਼ਨਦਾਨ ਜਰੀਏ ਕੀਤੀ ਗਈ ਹੈ ।
                  ਉਸਨੇ ਮੰਗ ਕੀਤੀ ਕਿ ਉਸ 'ਤੇ ਕਥਿਤ ਤੌਰ 'ਤੇ ਬੇਵਜ੍ਹਾ ਅੰਨ੍ਹਾ ਤੇ ਅਣਮਨੁੱਖੀ ਤਸ਼ੱਦਦ ਢਾਹੁਣ ਅਤੇ ਸਮਾਜਿਕ ਤੌਰ 'ਤੇ ਜਲੀਲ ਕਰਨ ਵਾਲੇ ਸਬ ਇੰਸਪੈਕਟਰ, ਤਿੰਨ ਪੁਲਿਸ ਮੁਲਾਜਮਾਂ ਤੇ ਗੈਸ ਏਜੰਸੀ ਮਾਲਕ ਖਿਲਾਫ਼ ਸਖ਼ਤ ਕਾਨੂੰਨੀ ਕਾਰਵਾਈ ਕੀਤੀ ਜਾਵੇ ਤੇ ਉਸਨੂੰ ਇਨਸਾਫ਼ ਦਿਵਾਇਆ। ਇਸੇ ਦੌਰਾਨ ਅੱਜ ਵੱਡੀ ਤਾਦਾਦ ਵਿਚ ਪਿੰਡ ਲੰਬੀ ਦੇ ਦਰਜਨਾਂ ਲੋਕ ਪਰਮਜੀਤ ਸਿੰਘ ਨੂੰ ਜਖ਼ਮੀ ਹਾਲਤ ਵਿਚ ਲੰਬੀ ਥਾਣੇ ਲੈ ਕੇ ਗਏ ਅਤੇ ਕਥਿਤ ਦੋਸ਼ੀ ਅਧਿਕਾਰੀਆਂ ਤੇ ਗੈਸ ਏਜੰਸੀ ਖਿਲਾਫ਼ ਕਾਰਵਾਈ ਦੀ ਮੰਗ ਕੀਤੀ।
              ਦੂਜੇ ਪਾਸੇ ਐਸ। ਆਈ। ਬੰਤਾ ਸਿੰਘ ਨੇ ਤਸ਼ੱਦਦ ਸਬੰਧੀ ਦੋਸ਼ਾਂ ਨੂੰ ਸਿਰੇ ਤੋਂ ਨਕਾਰਦਿਆਂ ਕਿਹਾ ਕਿ ਅਸੀਂ ਸਿਰਫ਼ ਗੈਸ ਏਜੰਸੀ ਦੇ ਕਰਮਚਾਰੀਆਂ ਨੂੰ ਪੁੱਛਗਿੱਛ ਲਈ ਬੁਲਾਇਆ ਸੀ ਤੇ ਅਜਿਹਾ ਕਰਨਾ ਨਾ ਹੀ ਕਾਨੂੰਨਨ ਜਾਇਜ਼ ਹੈ ਤੇ ਨਾ ਅਜਿਹਾ ਕਾਰਾ ਕਰਨ ਵਾਲਾ ਮੇਰਾ ਕਿਰਦਾਰ ਹੈ। ਜਦੋਂਕਿ ਗੈਸ ਏਜੰਸੀ ਦੇ ਮਾਲਕ ਪਵਨਪਾਲ ਕੁਮਾਰ ਨਾਲ ਵਾਰ-ਵਾਰ ਸੰਪਰਕ ਕਰਨ ਦੇ ਬਾਵਜੂਦ ਸੰਪਰਕ ਨਹੀਂ ਬਣ ਸਕਿਆ।
              ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪੁਲੀਸ ਮੁਖੀ ਸ੍ਰੀ ਇੰਦਰਮੋਹਣ ਸਿੰਘ ਨੇ ਸੰਪਰਕ ਕਰਨ 'ਤੇ ਕਿਹਾ ਕਿ ਮਾਮਲੇ ਦੀ ਨਿਰਪੱਖ ਪੜਤਾਲ ਕਰਵਾ ਕੇ ਸੱਚਾਈ ਸਾਹਮਣੇ ਆਉਣ 'ਤੇ ਦੋਸ਼ੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।