ਕਮਲਪ੍ਰੀਤ ਕੌਰ 'ਬੱਲ' ਨੇ ਵਿਖਾਇਆ ਟੋਕੀਓ ਓਲੰਪਿਕ 'ਚ ਲੰਬੀ ਹਲਕੇ ਦਾ 'ਬਲ'

* ਸਾਬਕਾ ਮੁੱਖ ਮੰਤਰੀ ਬਾਦਲ ਨੇ ਬੱਲ ਦੇ ਪ੍ਰਦਰਸ਼ਨ ਨੂੰ ਟੀ.ਵੀ ’ਤੇ ਵੇਖਿਆ, 

 * ਪ੍ਰਾਪਤੀ ’ਤੇ ਓ.ਐਸ.ਡੀ. ਰਾਹੀਂ ਪਰਿਵਾਰ ਨੂੰ ਵਧਾਈ ਭੇਜ ਫੋਨ 'ਤੇ ਕੀਤੀ ਪਿਤਾ ਨਾਲ ਗੱਲ

* ਮੇਰੀ ਪੁੱਤਰੀ ਓਲੰਪਿਕ ’ਚੋਂ ਤਮਗਾ ਜ਼ਰੂਰ ਜਿੱਤ ਕੇ ਲਿਆਏਗੀ: ਪਿਤਾ ਕੁਲਦੀਪ ਸਿੰਘ

* ਕਬਰਵਾਲਾ ਅਤੇ ਲੰਬੀ ਹਲਕੇ ’ਚ ਖੁਸ਼ੀ ਦਾ ਮਾਹੌਲ

ਇਕਬਾਲ ਸਿੰਘ ਸ਼ਾਂਤ/ਬੁਲੰਦ ਸੋਚ ਬਿਊਰੋ

ਲੰਬੀ/ਟੋਕੀਓ: ਲੰਬੀ ਹਲਕੇ ਦੇ ਪਿੰਡ ਕਬਰਵਾਲਾ ਦੀ ਖਿਡਾਰੀ ਕਮਲਪ੍ਰੀਤ ਕੌਰ ਬੱਲ ਨੇ ਟੋਕੀਓ ਓਲੰਪਿਕ ’ਚ ਡਿਸਕਸ ਥਰੋਅ ’ਚ ਫਾਈਨਲ ਵਿੱਚ ਪ੍ਰਵੇਸ਼ ਕਰਕੇ ਆਪਣੇ ਵਜੂਦ ਨੂੰ ਦਰਸਾ ਦਿੱਤਾ। ਉਸਦਾ ਥਰੋਅ 64 ਮੀਟਰ ਰਿਹਾ। ਹੁਣ ਤੱਕ ਡਿਸਕਸ ਥਰੋਅ ’ਚ ਵੱਖ-ਵੱਖ ਰਿਕਾਰਡ ਤੋੜਣ ਲਈ ਜਾਣੀ ਜਾਂਦੀ ਕਮਲਪ੍ਰੀਤ ਇੱਕ ਹੋਰ ਰਿਕਾਰਡ ਤੋੜਕੇ ਓਲੰਪਿਕ ’ਚ ਭਾਰਤ ਵੱਲੋਂ ਸਭ ਤੋਂ ਵੱਧ ਸਕੋਰ ਕਰਨ ਵਾਲੀ ਖਿਡਾਰੀ ਬਣ ਗਈ ਹੈ। ਉਹ ਪਹਿਲਾਂ ਹੀ ਡਿਸਕਸ ਥਰੋਅ ’ਚ 65 ਮੀਟਰ ਸਕੋਰ ਕਰਨ ਵਾਲੀ ਭਾਰਤੀ ਮਹਿਲਾ ਐਥਲੀਟ ਵੀ ਹੈ। ਓਲੰਪਿਕ ’ਚ ਫਾਈਨਲ ’ਚ ਪੁੱਜਣ ’ਤੇ ਸਮੁੱਚੇ ਦੇਸ਼ ਸਮੇਤ ਲੰਬੀ ਹਲਕੇ ਅਤੇ ਉਸਦੇ ਪਰਿਵਾਰ ਨੂੰ ਉਸਦੇ ਵਧਦੇ ਕਦਮਾਂ ਤੋਂ ਹੋਰ ਵੱਡੀਆਂ ਉਮੀਦਾਂ ਲੱਗ ਗਈਆਂ ਹਨ। 

ਪਿਤਾ ਦੀ ਜ਼ਮੀਨ ਚੌਗੁਣੀ ਕਰਨ ਦੀ ਲਗਨ ਨੇ ਕਮਲਪ੍ਰੀਤ ਹੱਥੋਂ ਚਾਰ-ਚਾਰ ਰਿਕਾਰਡ ਤੁੜਵਾ ਦਿੱਤੇ

 ਸਾਬਕਾ ਮੁੱਖ ਮੰਤਰੀ ਨੇ ਵਾਚਿਆ ਕਮਲਪ੍ਰੀਤ ਦਾ ਖੇਡ ਪ੍ਰਦਰਸ਼ਨ: ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਕਮਲਪ੍ਰੀਤ ਕੌਰ ਬੱਲ ਦੇ ਖੇਡ ਪ੍ਰਦਰਸ਼ਨ ਨੂੰ ਪਿੰਡ ਬਾਦਲ ਰਿਹਾਇਸ਼ ਤੋਂ ਟੈਲੀਵਿਜ਼ਨ ਰਾਹੀਂ ਵੇਖਿਆ। ਉਸਦੀ ਪ੍ਰਾਪਤੀ ’ਤੇ ਖੁਸ਼ੀ ਜਾਹਰ ਕਰਦੇ ਸ੍ਰੀ ਬਾਦਲ ਨੇ ਹੱਲਾਸ਼ੇਰੀ ਭਰੀ ਆਸ ਪ੍ਰਗਟਾਈ ਕਿ ਕਮਲਪ੍ਰੀਤ ਕੌਰ ਬੱਲ ਓਲੰਪਿਕ ਵਿੱਚੋਂ ਤਮਗਾ ਜਿੱਤ ਕੇ ਭਾਰਤ ਅਤੇ ਲੰਬੀ ਹਲਕੇ ਦਾ ਮਾਣ ਅਤੇ ਸ਼ਾਨ ਵਧਾਏਗੀ। ਉਨਾਂ ਸਭਨਾਂ ਨੂੰ ਕਮਲਪੀ੍ਰਤ ਕੌਰ ਦੀ ਜਿੱਤ ਲਈ ਅਰਦਾਸ ਕਰਨ ਲਈ ਪ੍ਰੇਰਿਆ। ਫਾਈਨਲ ’ਚ ਪੁੱਜਣ ’ਤੇ ਸ੍ਰੀ ਬਾਦਲ ਨੇ ਓ.ਐਸ.ਡੀ ਗੁਰਚਰਨ ਸਿੰਘ ਅਤੇ ਅਕਾਲੀ ਆਗੂ ਪਰਮਿੰਦਰ ਸਿੰਘ ਕੋਲਿਆਂਵਾਲੀ ਖਿਡਾਰੀ ਕਮਲਪ੍ਰੀਤ ਕੌਰ ਦੇ ਪਰਿਵਾਰ ਨੂੰ ਵਧਾਈ ਦੇਣ ਲਈ ਕਬਰਵਾਲਾ ਭੇਜਿਆ ਅਤੇ ਖੁਦ ਕਮਲਪ੍ਰੀਤ ਦੇ ਪਿਤਾ ਕੁਲਦੀਪ ਸਿੰਘ ਨਾਲ ਮੋਬਾਇਲ ’ਤੇ ਗੱਲ ਕਰਕੇ ਉਨਾਂ ਨੂੰ ਵਧਾਈ ਦਿੱਤੀ। ਕਲਮਪ੍ਰੀਤ ਕੌਰ ਦੇ ਪਿਤਾ ਕੁਲਦੀਪ ਸਿੰਘ ਨੇ ਖੁਸ਼ੀ ਜਾਹਰ ਕਰਦੇ ਆਖਿਆ ਕਿ ਉਸਨੂੰ ਯਕੀਨ ਹੈ ਕਿ ਉਸਦੀ ਮਾਣਮੱਤੀ ਧੀ ਓਲੰਪਿਕ ਵਿੱਚੋਂ ਤਮਗਾ ਜ਼ਰੂਰ ਜਿੱਤ ਕੇ ਲਿਆਏਗੀ। ਕਮਲਪ੍ਰੀਤ ਕੌਰ ਗਰੁੱਪ-ਬੀ ਦੇ ਕੁਆਲੀਫਿਕੇਸ਼ਨ ਰਾਊਂਡ ਵਿੱਚ ਦੂਸਰੇ ਸਥਾਨ ’ਤੇ ਹੈ। ਹੁਣ ਕਮਲਪ੍ਰੀਤ ਕੌਰ 2 ਅਗਸਤ ਨੂੰ ਫਾਈਨਲ ਵਿਚ ਭਾਰਤ ਵੱਲੋਂ ਦਾਅਵੇਦਾਰੀ ਪੇਸ਼ ਕਰੇਗੀ।

ਸੌਖਾ ਨਹੀਂ ਰਿਹਾ ਕਮਲਪ੍ਰੀਤ ਕੌਰ ਦਾ ਸਫ਼ਰ: ਕਰੀਬ 9 ਸਾਲਾਂ ’ਚ ਡਿਸਕਸ ਥਰੋਅ ’ਚ ਸਿਖ਼ਰਲੇ ਪੜਾਅ ’ਤੇ ਪੁੱਜਣ ਵਾਲੀ ਕਮਲਪ੍ਰੀਤ ਬੱਲ ਦਾ ਖੇਡ ਸਫ਼ਰ ਸੌਖਾ ਨਹੀਂ ਰਿਹਾ। 2017 ’ਚ ਖੇਡ ਦੌਰਾਨ ਲੱਗੀ ਸੱਟ ਦੇ ਲਗਾਤਾਰ ਦਰਦ ਨੇ ਉਸਨੂੰ ਲਗਪਗ ਹਰਾ ਦਿੱਤਾ ਸੀ। ਤਿੱਖੇ ਦਰਦ ਨੇ ਉਸਦੀ ਖੇਡ ਛੱਡਣ ਦੇ ਆਸਾਰ ਬਣਾ ਦਿੱਤੇ ਸਨ। ਉਹ ਆਖਦੀ ਹੈ ਕਿ ਉਸਨੂੰ ਪਿਤਾ ਕੁਲਦੀਪ ਸਿੰਘ ਬੱਲ ਵੱਲੋਂ ਲੋਕਾਂ ਦੀਆਂ ਜ਼ਮੀਨਾਂ ਠੇਕੇ ’ਤੇ ਵਾਹ ਕੇ ਜੱਦੀ ਸੱਤ ਏਕੜ ਜ਼ਮੀਨ ਨੂੰ 28 ਏਕੜ ਬਣਾਉਣ ਦਾ ਮਿਹਨਤੀ ਅਤੇ ਔਖਾ ਸਫ਼ਰ ਯਾਦ ਆਇਆ ਅਤੇ ਉਸਦੇ ਪਿੱਠ ਦਰਦ ਨੂੰ ਤਾਕਤ ਬਣਾ ਲਿਆ। 

39 ਮੀਟਰ ਸਕੋਰ ਵਿੱਢਿਆ ਸੀ ਜਿੱਤਾਂ ਦਾ ਸਫ਼ਰ: ਪਿਤਾ ਦੀ ਉਸਾਰੂ ਮਿਹਨਤ ਦੀ ਪ੍ਰੇਰਨਾ ਬਣਾਉਣ ਸਦਕਾ ਕਮਲਪ੍ਰੀਤ ਬੱਲ ਨੇ ਜਿੱਤਾਂ ਦੀ ਲੜੀ 2014 ’ਚ ਜੂਨੀਅਰ ਨੈਸ਼ਨਲ ਡਿਸਕਸ ਥਰੋਅ 39 ਮੀਟਰ ਸਕੋਰ ਨਾਲ ਸੋਨ ਤਮਗੇ ਤੋਂ ਵਿੱਢੀ। ਉਸੇ ਸਾਲ ਸਕੂਲ ਗੇਮਜ਼ 42 ਮੀਟਰ ਸਕੋਰ ਨਾਲ ਸੋਨ ਤਮਗਾ ਅਤੇ 2016 ’ਚ ਓਪਨ ਨੈਸ਼ਨਲ ’ਚ ਸੋਨ ਤਮਗਾ ਫੁੰਡਿਆ। ਸੀਨੀਅਰ ਨੈਸ਼ਨਲ ਫੈਡਰੇਸ਼ਨ ਮੁਕਾਬਲਿਆਂ ’ਚ ਸਾਲ 2018, 2019 ਤੇ 2021 ਵਿੱਚ ਲਗਾਤਾਰ ਸੋਨ ਤਮਗੇ ਜਿੱਤ ਕੇ ਖੁਦ ਨੂੰ ਸਾਬਤ ਕੀਤਾ। 

ਰਿਕਾਰਡ ਤੋੜਨਾ ਦਾ ਤਾਂ ਜਿਵੇਂ ਸ਼ੌਂਕ ਹੀ ਲੱਗ ਗਿਆ: ਲਗਾਤਾਰ ਜਿੱਤਾਂ ਨੂੰ ਹੱਥਾਂ ਦੀ ਕਰਾਮਾਤ ਬਣਾਉਣ ਵਾਲੀ ਕਮਲਪ੍ਰੀਤ ਬੱਲ ਨੂੰ ਰਿਕਾਰਡ ਤੋੜਨ ਦਾ ਜਿਵੇਂ ਸੁਭਾਅ ਹੀ ਪੈ ਗਿਆ। ਉਸਨੇ 2016 ’ਚ ਰਾਜਸਥਾਨ ਦੀ ਪਰਮਿਲਾ ਦਾ ਜੂਨੀਅਰ ਖੇਡਾਂ ’ਚ ਰਿਕਾਰਡ ਤੋੜਿਆ। 2107 ’ਚ ਉਸਨੇ ਹਰਵੰਤ ਕੌਰ ਵੱਲੋਂ ਸਾਲ 2001 ਵਿੱਚ ਕਾਇਮ ਕੀਤਾ ਕਰੀਬ 53 ਮੀਟਰ ਦਾ ਰਿਕਾਰਡ 55.11 ਮੀਟਰ ਸਕੋਰ ਨਾਲ ਤੋੜ ਸੁੱਟਿਆ। ਫਿਰ ਉਸਨੇ ਆਲ ਇੰਡੀਆ ਇੰਟਰ ਰੇਲਵੇ ਖੇਡਾਂ ’ਚ ਲਖਨਊ ਵਿਖੇ ਕਿ੍ਰਸ਼ਨਾ ਪੂਨੀਆ ਦਾ ਮੀਟ ਰਿਕਾਰਡ ਵੀ ਤੋੜ ਦਿੱਤਾ।  ਇਸ ਲੜੀ ਨੂੰ ਉਸਨੇ ਓਲੰਪਿਕ ’ਚ ਵੀ ਜਾਰੀ ਰੱਖਿਆ।  M. No. 93178-26100

   

ਹਕੂਮਤੀ ਜੜਾਂ ਤੋਂ ਮਿੱਟੀ ਪੁੱਟੇ ਜਾਣ ਦੇ ਰੋਸੇ ਵਿੱਚ ਘਪਲਿਆਂ ਦੀਆਂ ਫਾਈਲਾਂ ਤੋਂ ਮਿੱਟੀ ਝੜ੍ਹਨੀ ਸ਼ੁਰੂ!

* ਮੁਆਫ਼ੀ ਮੰਗਣ ਅਤੇ ਨਾ ਮੰਗਣ ਦੀ ਜਿੱਦਬਾਜ਼ੀ ਨੇ ਉਲਝਾਈ ਤਾਣੀ 

* ਬੋਲੀ ਬਦਲ ਗਏ ਸਿਆਸੀ ਤੋਤਿਆਂ ਨੂੰ ‘ਹਰੀ ਮਿਰਚ’ ਖੁਆਉਣ ਨੂੰ ਤਿਆਰੀ 

* ਦੁਬਾਰਾ ਚੋਣ ਜਿਤਣ ਲਈ ਮੁੱਖ ਮੰਤਰੀ ਨੂੰ ਵੀ ਬਦਲੇ ਜਾਣ ਦੀ ਮਹਿਸੂਸ ਹੋ ਰਹੀ ਜ਼ਰੂਰਤ 

ਇਕਬਾਲ ਸਿੰਘ ਸ਼ਾਂਤ/ਬੁਲੰਦ ਸੋਚ ਬਿਊਰੋ

ਲੰਬੀ/ਚੰਡੀਗੜ੍ਹ: ਨਵਜੋਤ ਸਿੰਘ ਸਿੱਧੂ ਦੀ ਪ੍ਰਧਾਨਗੀ ਨਾਲ ਪੰਜਾਬ ’ਚ ‘ਸੂਬਾ ਸਰਕਾਰ’ ਅਤੇ ‘ਜਥੇਬੰਦਕ ਸਰਕਾਰ’ ਦੇ ਸਿੱਧਮ-ਸਿੱਧੇ ਦੋ ਫਰੰਟ ਖੁੱਲਣ ਨਾਲ ਕਈ ਸੱਤਾਪੱਖੀ ਮੰਤਰੀਆਂ/ਵਿਧਾਇਕਾਂ ਦੀਆਂ ਪਰਤਾਂ ਮੁੜ ਉੱਧੜਨ ਦਾ ਮੁੱਢ ਬੱਝਿਆ ਗਿਆ ਹੈ। 

ਸੂਤਰਾਂ ਮੁਤਾਬਕ ਸਿੱਧੂ ਮਾਮਲੇ ’ਚ ਅਮਰਿੰਦਰ ਸਿੰਘ ਦੀਆਂ ਦੋ ਦਹਾਕਿਆਂ ਤੋਂ ਸਥਾਪਤ ਜੜਾਂ ਦੀ ਮਿੱਟੀ ਪੁੱਟੇ ਜਾਣ ਮਗਰੋਂ ਮੁੱਖ ਮੰਤਰੀ ਦਰਬਾਰ ’ਚ ਵੱਟੇ ਖਾਤੇ ਪਈਆਂ ਕਥਿਤ ਵਿਵਾਦਤ ਮਾਮਲਿਆਂ/ਘਪਲਿਆਂ ਦੀਆਂ ਲਾਲ-ਨੀਲੀਆਂ ਫਾਈਲਾਂ ਤੋਂ ਮਿੱਟੀ ਝੜਨੀ ਸ਼ੁਰੂ ਹੋ ਗਈ ਹੈ। ਕੈਪਟਨ ਅਮਰਿੰਦਰ ਸਿੰਘ ਟਵੀਟਾਂ ਲਈ ਸਿੱਧੂ ਵੱਲੋਂ ਮੁਆਫ਼ੀ ਮੰਗਵਾਉਣ ’ਤੇ ਬਜਿੱਦ ਹਨ। ਮੰਤਰੀ ਬ੍ਰਹਮ ਮਹਿੰਦਰਾ, ਕੈਪਟਨ ਦੀ ਹਮਾਇਤ ’ਚ ਆ ਡਟੇ ਹਨ। ਦੂਜੇ ਪਾਸੇ ਤਾਲਮੇਲ ਫੇਰੀ ’ਤੇ ਨਿੱਕਲੇ ਨਵਨਿਯੁਕਤ ਪ੍ਰਧਾਨ ਨਵਜੋਤ ਸਿੱਧੂ ਦੇ ਹਮਾਇਤੀ ਵਿਧਾਇਕ ਮਦਨ ਲਾਲ ਜਲਾਲਪੁਰ, ਸੰਗਤ ਸਿੰਘ ਗਿਲਜ਼ੀਆਂ, ਪਰਗਟ ਸਿੰਘ ਤੇ ਜੋਗਿੰਦਰਪਾਲ ਨੇ ਕਿਹਾ ਕਿ ਸਿੱਧੂ ਨੂੰ ਮਾਫੀ ਮੰਗਣ ਦੀ ਕੋਈ ਲੋੜ ਨਹੀਂ। ਉਨ੍ਹਾਂ ਕਿਹਾ ਕਿ ਕੈਪਟਨ ਨੂੰ ਹੁਣ ਇਹ ਗੱਲਾਂ ਭੁੱਲ ਜਾਣੀਆਂ ਚਾਹੀਦੀਆਂ ਹਨ। ਕੁਝ ਵਿਧਾਇਕਾਂ ਨੇ ਤਾਂ ਇੱਥੋਂ ਤੱਕ ਕਹਿ ਦਿੱਤਾ ਕਿ ਕੈਪਟਨ ਨੂੰ ਪੰਜਾਬ ਤੋਂ ਮਾਫੀ ਮੰਗਣੀ ਚਾਹੀਦੀ ਹੈ। ਸਿੱਧੂ ਨਾਲ ਮੌਜੂਦਾ ਸਮੇਂ ’ਚ 62 ਕਾਂਗਰਸੀ ਵਿਧਾਇਕ ਡਟ ਗਏ ਹਨ। ਜ਼ਿਕਰਯੋਗ ਹੈ ਕਿ ਨਵਜੋਤ ਸਿੱਧੂ ਨੂੰ ਮਾਝਾ ਬੈਲਟ ਦੇ ਕਾਂਗਰਸ ਵਜ਼ੀਰਾਂ ਦੀ ‘ਰੱਬ’ ਵਰਗੀ ਹਮਾਇਤ ਹੈ। ਜਿਹੜੀ ਕਿ ਅਮਰਿੰਦਰ ਸਿੰਘ ਨੂੰ ਸਭ ਤੋਂ ਵੱਧ ਚੁੱਭ ਰਹੀ ਹੈ। 

ਇਸ ਵਜੂਦੀ ਵਿਵਾਦ ’ਚ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਜਿੱਦੀ ਲਹਿਜ਼ੇ ਨੂੰ ਸਿਆਸੀ ਜੀਵਨ ’ਚ ਪਹਿਲੀ ਵਾਰ ਕਈ ਸਿਖ਼ਰਲੇ ਸਿਆਸੀ ‘ਬੈਕ ਫਾਇਰਾਂ’ ਦਾ ਸ਼ਿਕਾਰ ਬਣਨਾ ਪਿਆ ਹੈ। ਉੱਪਰੋਂ ਹਾਈਕਮਾਨ ਵੱਲੋਂ ਨਵਜੋਤ ਸਿੱਧੂ ਨੂੰ ਫ੍ਰੀ ਹੈਂਡ ਸਮਰਥਨ ਮਿਲਣ ਨਾਲ ‘ਮਹਾਰਾਜੇ’ ਦੇ ਦਿਲੋ-ਦਿਮਾਗ ’ਤੇ ਇਹ ਖਫ਼ਾਗਿਰੀ ਵੱਡਾ ਵਜ਼ਨ ਪਾਈ ਖੜੀ ਹੈ। ਜਿਸਦੀ ਖੁਰਾਕ ਪੂਰਤੀ ਅਤੇ ਬੋਲੀ ਬਦਲ ਗਏ ਸਿਆਸੀ ਤੋਤਿਆਂ ਨੂੰ ‘ਸਬਕ’ ਵਾਲੀਆਂ ਹਰੀਆਂ ਮਿਰਚਾਂ ਖੁਆਉਣ ਦੀ ਤਿਆਰੀ ਸ਼ੁਰੂ ਗਈ ਹੈ। ਜਿਸਦੇ ਨਤੀਜੇ ਛੇਤੀ ਸਾਹਮਣੇ ਆਉਣ ਦੀ ਉਮੀਦ ਹੈ। ਸੂਤਰਾਂ ਦਾ ਕਹਿਣਾ ਹੈ ਕਿ ਫਾਈਲਾਂ ’ਚ ਦੱਬੇ ਵੱਖ-ਵੱਖ ਮਾਮਲੇ ਨੋਟਿਸਾਂ ਦੇ ਰੂਪ ਵਿੱਚ ਸਾਹਮਣੇ ਆ ਸਕਦੇ ਹਨ। ਜਿਨਾਂ ਬਾਰੇ ਪਿਛਲੇ ਸਮੇਂ ’ਚ ਵਿਰੋਧੀ ਧਿਰ ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਨੇ ਵੱਖ-ਵੱਖ ਘਪਲਿਆਂ ਨੂੰ ਉਭਾਰ ਕੇ ਧਰਨੇ-ਮੁਜਾਹਰੇ ਕੀਤੇ ਸਨ। ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਪੜਤਾਲ ਵਿੱਢਣ ਦੀ ਬਜਾਇ ਕੋਈ ਕਾਰਵਾਈ ਨਹੀਂ ਕੀਤੀ ਗਈ। 

ਸੂਤਰਾਂ ਮੁਤਾਬਕ ਕੈਪਟਨ ਅਮਰਿੰਦਰ ਸਿੰਘ ਨੂੰ ਕਾਂਗਰਸ ਵਿੱਚ ਉਸਦੀ ਸਿਆਸੀ ਜ਼ਮੀਨ ਦੇ ਸੁੰਘੜਵੇਂ ਦਾਇਰੇ ਦਾ ਬਖੂਬੀ ਅੰਦਾਜ਼ਾ ਹੋ ਚੁੱਕਿਆ ਹੈੈ। ਹੁਣ ਆਪਣੇ ਪੈਰ ਖਿਸਕਦੇ ਵੇਖ ਸੱਤਾ ’ਚ ਸਹਿਯੋਗੀ ਰਹੇ ਮੰਤਰੀ/ਵਿਧਾਇਕਾਂ ਨੂੰ ਸਿੱਧੂ ਦੇ ‘ਇਮਾਨਦਾਰ ਮੋਢਿਆਂ’ ਦੀ ਸਾਖ਼ ’ਤੇ ਬੈਠਣ ਯੋਗ ਨਾ ਛੱਡਣ ਲਈ ਪੁਰਾਣੇ ਸਾਂਭੇ ਹੋਏ ਪੜਤਾਲੀਏ ਤੀਰ ਛੱਡਣ ਦੀ ਤਿਆਰੀ ਵਿੱਚ ਹਨ, ਤਾਂ ਜੋ ਦੋ ਦਹਾਕੇ ਪੁਰਾਣਾ ਏਕਾਧਿਕਾਰ ਖੁੱਸਣ ਮਗਰੋਂ ਕੁਰਸੀ ਖੋਹੇ ਜਾਣ ’ਤੇ 2022 ਵਿਧਾਨਸਭਾ ਚੋਣਾਂ ਸਮੇਂ ਕਾਂਗਰਸ ਹਾਈਕਮਾਂਡ ਦੇ ਹੱਥ ਪੱਲੇ ਕਈ ਮੁਸ਼ਕ ਮਾਰਦੇ ਕਈ ਮਰੇ ਸੱਪ ਹੀ ਰਹਿ ਜਾਣ। ਉਚਪੱਧਰੀ ਸੂਤਰਾਂ ਮੁਤਾਬਿਕ ਆਗਾਮੀ ਦਿਨਾਂ ’ਚ ‘ਹਮ ਨਾ ਚੰਗੇ ਤੋਂ, ਤੁਮ ਵੀ ਹੋ ਜਾਓ ਨੰਗੇ’ ਵਾਲੀ ਰਾਹ ’ਤੇ ਕਈਆਂ ਦੀ ਸਿਆਸੀ ਅਤੇ ਦਸਤਾਵੇਜ਼ੀ ਖਲਿਆਰ ਪੈ ਸਕਦੀ ਹੈ। ਅਮਰਿੰਦਰ ਸਿੰਘ ’ਤੇ ਲੰਮੇ ਸਮੇਂ ਤੋਂ ਭਾਜਪਾ ਦੇ ਕਥਿਤ ਡੰਡੇ ਵਿੱਚ ਕਾਂਗਰਸੀ ਝੰਡੇ ਵਾਲੀ ਸਰਕਾਰ ਚਲਾਉਣ ਦੇ ਦੋਸ਼ ਲੱਗਦੇ ਰਹੇ ਹਨ। ਸੂਤਰਾਂ ਦਾ ਕਹਿਣਾ ਹੈ ਕਿ ਜੇਕਰ ਫਾਈਲਾਂ ਵਾਲੇ ਮੰਤਰੀ/ਵਿਧਾਇਕ ਮਹਾਰਾਜੇ ਦੀ ਸਿਆਸੀ ਸੇਜ਼ ’ਤੇ ਵਾਪਸੀ ਲਈ ਖੁੱਲਮ-ਖੁੱਲਾ ਰਾਜੀ ਨਾ ਹੁੰਦਾ ਤਾਂ ਬਾਹਰੋਂ ਨਵਜੋਤ ਸਿੰਘ ਸਿੱਧੂ ਨਾਲ ਰਹਿ ਕੇ ਉਸਦੀ ਸਿਆਸੀ ਮੁਹਿੰਮ ਨੂੰ ਖੋਖਲਾ ਕਰਨ ਲਈ ਅੰਦਰੂਨੀ ਤੌਰ ’ਤੇ ਰਾਜੀਨਾਮਿਆਂ ’ਤੇ ਸਹਿਮਤੀ ਬਣ ਸਕਦੀ ਹੈ। 

ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਸਿਆਸੀ ਮੱਥੇ ’ਤੇ ਕਲੰਕ

ਸਿਆਸੀ ਮਾਹਰਾਂ ਦਾ ਕਹਿਣਾ ਹੈ ਕਿ ਅਮਰਿੰਦਰ ਸਿੰਘ ਦੀ ਸਾਢੇ ਚਾਰ ਸਾਲਾਂ ’ਚ ਕਾਰਗੁਜਾਰੀ ਇਤਨੀ ਮੰਦਹਾਲ ਰਹੀ ਕਿ ਸਿਰਫ਼ ਨਵਜੋਤ ਸਿੱਧੂ ਦੀ ਪ੍ਰਧਾਨਗੀ ਨਾਲ ਹੀ ਸੱਤਾ ਦੀ ਦੂਸਰੀ ਪਾਰੀ ਕਾਂਗਰਸ ਦੇ ਹੱਥ ਆਉਣ ਦੀ ਉਮੀਦ ਨਹੀਂ, ਬਲਕਿ ਮੁੱਖ ਮੰਤਰੀ ਨੂੰ ਤੁਰੰਤ ਬਦਲੇ ਜਾਣ ਦੀ ਜ਼ਰੂਰਤ ਹੈ। ਆਮ ਕਾਂਗਰਸੀ ਵਰਕਰਾਂ ਅਤੇ ਕਾਡਰ ਵੱਲੋਂ ਵੀ ਅਮਰਿੰਦਰ ਸਿੰਘ ਨੂੰ ਤੁਰੰਤ ਸੱਤਾ ਤੋਂ ਬਾਹਰ ਕਰਨ ਦੀ ਮੰਗ ਲਗਾਤਾਰ ਸੋਸ਼ਲ ਮੀਡੀਆ ’ਤੇ ਉੱਠ ਰਹੀ ਹੈ। 

ਨਵਜੋਤ ਸਿਧੂ ਨੂੰ ਮੌਕਾਪ੍ਰਸਤਾਂ ਅਤੇ ਭ੍ਰਿਸ਼ਟ ਆਗੂਆਂ ਤੋਂ ਬਚਣ ਦੀ ਲੋੜ:  ਜਨਤਾ ਵਿੱਚੋਂ ਨਵਜੋਤ ਸਿੱਧੂ ਲਈ ਸਬਕ ਨਿੱਕਲ ਕੇ ਆ ਰਹੇ ਹਨ। ਆਮ ਲੋਕਾਂ ਦਾ ਕਹਿਣਾ ਕਿ ਨਵਜੋਤ ਸਿੱਧੂ ਦੇ ਮੋਢਿਆਂ ’ਤੇ ਚੜੇ ਵਿਖਾਈ ਦੇ ਰਹੇ ਚਿਹਰੇ ਵੀ ਉਸਦੇ (ਸਿੱਧੂ) ਅਕਸ ਵਾਂਗ ਸਾਫ਼ ਸੁਥਰੇ ਨਹੀਂ ਹਨ। ਕਈ ਤਾਂ ਕਥਿਤ ਨਜਾਇਜ਼ ਰੇਤਾ-ਬਜਰੀ, ਜਾਅਲੀ ਸ਼ਰਾਬ ਅਤੇ ਹੋਰਨਾਂ ਕਾਰਨਾਮਿਆਂ ਦੇ ਕਥਿਤ ਵੱਡੇ ਜਨਕ-ਤਾਰੇ ਹਨ। ਮੱਲੋ-ਮੱਲੀ ਮੋਢਿਆਂ ’ਤੇ ਬੈਠ ਕੇ ਨਵੇਂ ਸਿਰਿਓਂ ਪੰਜਾਬ ਲੁੱਟਣ ਨੂੰ ਫ਼ਿਰਦੇ ਜਨਕ-ਤਾਰਿਆਂ ਕਾਰਨ ਨਵਜੋਤ ਸਿੰਘ ਸਿੱਧੂ ਦੀ ਸਾਫ਼ਗੋਈ ਵਾਲੀ ਸੂਰਤ ਦੀ ਭਵਿੱਖੀ ਸੀਰਤ ਵਿੱਚ ਅੰਤਰ ਆਉਣ ਦਾ ਵੱਡਾ ਖਦਸ਼ਾ ਹੈ। ਆਮ ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਉਹੀ ਭ੍ਰਿਸ਼ਟ ਅਤੇ ਮਾਲੈਦਾਰ ਚਿਹਰੇ ਹੀ ਫਿਰ ਮੂਹਰੇ ਆਉਣੇ ਹਨ ਤਾਂ ਜਥੇਬੰਦਕ ਬਦਲਾਅ ਦੇ ਕੀ ਮਾਇਨੇ ਹੋਏ । 

‘ਸੂਬਾ ਸਰਕਾਰ’ ਅਤੇ ‘ਜਥੇਬੰਦਕ ਸਰਕਾਰ’ 'ਚ ਟਕਰਾਅ ਹੋਰ ਵਧਣ ਦੇ ਆਸਾਰ: ਆਗਾਮੀ ਦਿਨਾਂ ਵਿੱਚ ਪੰਜਾਬ ਕਾਂਗਰਸ ਦੀ ‘ਸੂਬਾ ਸਰਕਾਰ’ ਅਤੇ ‘ਜਥੇਬੰਦਕ ਸਰਕਾਰ’ ਵਿੱਚ ਟਕਰਾਅ ਅਤੇ ਜਿੱਦਬਾਜ਼ੀਆਂ ਵਧਣ ਦੇ ਆਸਾਰ ਹਨ। ਸਿਆਸੀ ਗੇਮ ਤਹਿਤ ਸਿਆਸੀ ਸਮੀਕਰਨ ਅਜਿਹੇ ਕਰ ਦਿੱਤੇ ਗਏ ਹਨ ਕਿ ਸੂਬੇ ਵਿੱਚ ਸੱਤਾ ਪੱਖ ਦੇ ਨਾਲ ਵਿਰੋਧੀ ਧਿਰ ਵੀ ਕਾਂਗਰਸ ਵਿੱਚੋਂ ਹੀ ਖੜੀ ਕਰ ਦਿੱਤੀ ਗਈ ਹੈ, ਤਾਂ ਜੋ ਸੂਬੇ ਦੇ ਵੋਟਰਾਂ ਦੇ ਦਿਲੋ-ਦਿਮਾਗ ’ਤੇ ਕਾਂਗਰਸੀ ਹੀ ਛਾਈ ਰਹੇ। ਭਾਵੇਂ ਪੱਖ ਦੀ, ਵਿਰੋਧੀ ਪੱਖ ਦੀ। ਇਸ ਸਿਆਸੀ ਖੇਡ ਨਾਲ ਦੂਜੀਆਂ ਪਾਰਟੀਆਂ ਨੂੰ ਵਗੈਰ ਕੋਈ ਵੱਡੀ ਜ਼ੋਰ-ਅਜਮਾਇਸ਼ ਦੇ ਹਾਸ਼ੀਏ ’ਤੇ ਲਿਆ ਕੇ ਸੌਖਿਆਂ ਸੱਤਾ ਦੀ ਦੂਸਰੀ ਪਾਰੀ ਖੇਡੀ ਜਾ ਸਕੇ। 

     ਸਮੁੱਚੀ ਕਾਂਗਰਸੀ ਖੇਡ ਦਾ ਅੰਜਾਮ ਭਾਵੇਂ ਕੁਝ ਵੀ ਹੋਵੇ। ਇਹ ਸਪੱਸ਼ਟ ਹੈ ਕਿ ਅਮਰਿੰਦਰ ਸਿੰਘ ਦੇ ਏਕਾਧਿਕਾਰ ਵਾਲੀ ਸਿਆਸਤ ਦੇ ਦਿਨ ਪੰਜਾਬ ਵਿੱਚੋਂ ਬੀਤ ਚੁੱਕੇ ਹਨ। ਇਹ ਵੀ ਨਹੀਂ ਭੁੱਲਿਆ ਜਾ ਸਕਦਾ ਆਲ ਇੰਡੀਆ ਕਾਂਗਰਸ ਨੂੰ ਦੇਸ਼ ਵਿੱਚ ਮੁੜ ਉੱਭਰਨ ਲਈ ਵਲਵਲਿਆਂ ਵਾਲੀ ਧਰਤੀ ਪੰਜਾਬ ਦਾ ਜਲੌਅ ਭਰਿਆ ਸਿਆਸੀ ਮੈਦਾਨ ਵੱਡਾ ਜਰੀਆ ਹੈ। ਇਸ ਘਟਨਾਕ੍ਰਮ ਵਿੱਚ ਵਿਰੋਧੀ ਧਿਰਾਂ ਵੱਲੋਂ ਕਮਜ਼ੋਰ ਆਗੂ ਵਜੋਂ ਪ੍ਰਚਾਰੇ ਗਏ ਕਾਂਗਰਸ ਦੇ ਕੌਮੀ ਆਗੂ ਰਾਹੁਲ ਗਾਂਧੀ ਨੇ ਖੁਦ ਨੂੰ ਬੜੀ ਸ਼ਿਦੱਤ ਨਾਲ ਸਾਬਤ ਕੀਤਾ ਹੈ। M. No. 93178-26100

ਗੈਰ-ਟਕਸਾਲੀ ਕਾਂਗਰਸੀ ਮੁੱਖ ਮੰਤਰੀ ਅਤੇ ਵਿੱਤ ਮੰਤਰੀ ਦਾ ਨਹੀਂ ਕਾਂਗਰਸੀ ਜੜਾਂ ਨਾਲ ਜੁੜਾਅ!

ਨਸ਼ਿਆਂ ਦੀਆਂ ਪੁੜੀਆਂ ਨਾਲ ਵਿਕਦੀ ਫਿਰਦੀ ਮਹਾਰਾਜੇ ਦੀ ਗੁਟਕੇ ਵਾਲੀ ਸਹੁੰ

ਖਾਕੀ ਦੀਆਂ 'ਨਸ਼ੀਲੀਆਂ' ਹਕੀਕਤਾਂ: ਚਿੱਟਾ ਦੇ ‘ਰਜਿਸਟਰਡ’ ਤਸਕਰਾਂ ਦੇ ਗਾਹਕਾਂ ’ਚ ਸ਼ੁਮਾਰ ਪੁਲਿਸ ਮੁਲਾਜਮ

* ਐਸ.ਟੀ.ਐਫ਼ ਦੇ ਐਸ.ਪੀ ਨੂੰ ਲੋਕਾਂ ਨੇ ਸੁਣਾਈਆਂ ਕੌੜੀਆਂ ਹਕੀਕਤਾਂ 

* ਮਾਂ ਨੇ ਪੁੱਤ ਦੀ ਮੌਤ ਦਾ ਇਨਸਾਫ਼ ਮੰਗਿਆ

* ਨਸ਼ਿਆਂ ਦੇ ਦਾਗ ਕਾਰਨ ਬਾਰਾੜ ਨਹੀਂ ਢੁੱਕਦੀ

* ਤੱਪਾ ਖੇੜਾ ਵਿਚ ਸਾਲ ਅੰਦਰ ਦੋ ਦਰਜਨ ਤਲਾਕ ਹੋ ਚੁੱਕੇ

ਇਕਬਾਲ ਸਿੰਘ ਸ਼ਾਂਤ/ਬੁਲੰਦ ਸੋਚ ਬਿਉਰੋ

ਲੰਬੀ/ਚੰਡੀਗੜ੍ਹ: 13 ਸਾਲਾ ਲੜਕੇ ਦੀ ਚਿੱਟਾ ਓਵਰਡੋਜ਼ ਮੌਤ ਮਾਮਲੇ ਨਾਲ ਤੱਪਾਖੇੜਾ ਵਿਖੇ ਸਮੁੱਚੇ ਘਟਨਾਕ੍ਰ੍ਰਮ ਦੌਰਾਨ ਅਵਾਮ ਰਾਹੀਂ ਉੱਧੜੀਆਂ ਨਸ਼ੀਲੀ ਹਕੀਕਤਾਂ ਵਿੱਚੋਂ ਖਾਕੀ ਦਾ ‘ਨਸ਼ੇੜੀ’ ਚਿਹਰਾ ਵੀ ਨੰਗਾ ਹੋਇਆ ਹੈ। ਇੱਥੇ ਚਿੱਟੇ ਦੇ ਕਰੀਬ ਅੱਧੀ ਦਰਜਨ ‘ਰਜਿਸਟਰਡ’ ਤਸਕਰਾਂ ਦੇ ਗਾਹਕਾਂ ਵਿੱਚ ਪੰਜਾਬ ਪੁਲਿਸ ਦੇ ਕਾਫ਼ੀ ਮੁਲਾਜਮ ਸ਼ਾਮਲ ਹਨ। ਹੁਣ ਇੱਕ ਵਿਧਵਾ ਦੇ ਅਣਭੋਲ ਪੁੱਤਰ ਦੀ ਲੋਥ ਬਿਨ੍ਹਾਂ ਪੋਸਟਮਾਰਟਮ ਉੱਠਣ ਮਗਰੋਂ ਪੁਲਿਸ-ਐਸ.ਟੀ.ਐਫ਼ ਦੀ ਤੱਤੀ-ਤੱਤੀ ਸਖ਼ਤੀ ਅਤੇ ਪੇਂਡੂ ਭਾਈਚਾਰੇ ਦੇ ਨਵੇਂ ਨਕੋਰ ਸਮਾਜਿਕ-ਸਰੋਕਾਰੀ ਉਪਰਾਲੇ ਵਕਤੀ ਤਰਦੱਦਾਂ ਦੇ ਗੋਤੇ ਮਾਰ ਰਹੇ ਹਨ। ਪੀੜਤ ਵਿਧਵਾ ਮਾਂ ਅਤੇ ਪਰਿਵਾਰ ਦਾ ਦੁੱਖ ਉਬਾਲੇ ਮਾਰ ਰਿਹਾ ਹੈ। ਲੰਬੀ ਪੁਲਿਸ ਨੇ ਤੱਪਾਖੇੜਾ ਦੇ ਪ੍ਰਮੁੱਖ ਚਿੱਟਾ ਤਸਕਰ ਸਿਮਰਜੀਤ ਅਤੇ ਸਾਥੀ ਅਜੈਹਰਬੀਰ ਵਾਸੀ ਦਿਓਣਖੇੜਾ ਨੂੰ ਅੱਠ ਗਰਾਮ ਹੈਰੋਇਨ ਸਮੇਤ ਗਿ੍ਰਫ਼ਤਾਰ ਕੀਤਾ ਹੈ। ਪੁਲਿਸ ਨੇ ਤੱਪਾਖੇੜਾ ਦੇ ਰਾਹਾਂ ’ਤੇ ਨਾਕੇ ਲਗਾ ਕੇ ਰਾਹਗੀਰਾਂ ਦੀ ਪੜਤਾਲ ਮੁਹਿੰਮ ਵਿੱਢੀ ਹੋਈ ਹੈ। ਦੂਜੇ ਪਾਸੇ ਸਰਗਰਮ ਹੋਈ ਐਸ.ਟੀ.ਐਫ਼ ਬਠਿੰਡਾ ਦੇ ਐਸ.ਪੀ ਦਵਿੰਦਰ ਸਿੰਘ ਬਰਾੜ ਨੇ ਅੱਜ ਪਿੰਡ ਵਾਸੀਆਂ ਨਾਲ ਮੀਟਿੰਗ ਕੀਤੀ। ਕਾਫ਼ੀ ਗਿਣਤੀ ਪਿੰਡ ਵਾਸੀ ਤੇ ਸਿਆਸੀ ਧਿਰਾਂ ਦੇ ਆਗੂ ਮੌਜੂਦ ਸਨ। ਐਸ.ਪੀ. ਦੇ ਸਨਮੁੱਖ ਮਿ੍ਰਤਕ ਲੜਕੇ ਲਖਵਿੰਦਰ ਦੀ ਮਾਂ ਪਰਮਜੀਤ ਕੌਰ ਨੇ ਤਸਕਰ ਧਿਰ ਨਾਲ ਰਾਜੀਨਾਮੇ ਦੀਆਂ ਅਫ਼ਵਾਹਾਂ ਨੂੰ

ਨਕਾਰਦੇ ਦਾਅਵਾ ਕੀਤਾ ਕਿ ਉਸਦਾ ਨਾਬਾਲਗ ਪੁੱਤਰ ਨਸ਼ਾ ਨਹੀਂ ਕਰਦਾ ਸੀ। ਉਸਨੂੰ ਜ਼ਬਰਦਸਤੀ ਮਨੀ ਸਿੰਘ ਅਤੇ ਗਿੰਦੂ ਉਸਦੇ ਲੜਕੇ ਨੂੰ ਬੁਲਾ ਕੇ ਲੈ ਗਏ ਸਨ। ਪਰਮਜੀਤ ਕੌਰ ਨੇ ਉਕਤ ਮਾਮਲੇ ਤਹਿਤ ਚਰਚਾ ’ਚ ਆਏ ਇੱਕ ਏ.ਐਸ.ਆਈ ਨੂੰ ਕਲੀਨ ਚਿੱਟ ਦੇਣ ਦੀ ਕੋਸ਼ਿਸ਼ ਕੀਤੀ ਅਤੇ ਪੁੱਤਰ ਦੀ ਮੌਤ ਦਾ ਇਨਸਾਫ਼ ਮੰਗਿਆ। ਐਸ.ਪੀ ਵੱਲੋਂ ਮਿ੍ਰਤਕ ਲੜਕੇ ਦਾ ਪੋਸਟਮਾਰਟਮ ਨਾ ਕਰਵਾਉਣ ਨੂੰ ਵੱਡੀ ਖਾਮੀ ਕਰਾਰ ਦਿੱਤਾ। ਮਿ੍ਰਤਕ ਦਾ ਨਾਨਾ ਮਹੰਤ ਰਾਮ ਵੀ ਕਾਫ਼ੀ ਭਖਾਹਟ ਵਿੱਚ ਸੀ। ਪਿੰਡ ਵਾਸੀਆਂ ਨੇ ਖੁੱਲ੍ਹੇ ਸ਼ਬਦਾਂ ਵਿੱਚ ਐਸ.ਟੀ.ਐਫ਼. ਦੇ ਐਸ.ਪੀ ਨੂੰ ਨਸ਼ਾ ਤਸਕਰਾਂ ਦੇ ਨਾਂਅ ਲਿਖਵਾਉਂਦੇ ਆਖਿਆ ਕਿ ਚਿੱਟਾ ਨਸ਼ੇ ਨੇ ਪਿੰਡ ਤਬਾਹ ਕਰ ਦਿੱਤਾ ਹੈ। ਨਸ਼ਾ ਤਸਕਰਾਂ ਨੂੰ ਨਸ਼ੇੜੀ ਪੁਲਿਸ ਮੁਲਾਜਮਾਂ ਦਾ ਹੌਂਸਲਾ ਹਾਸਲ ਹੈ। ਕਾਰਵਾਈ ਹੋਣ ’ਤੇ ਪਹਿਲਾਂ ਸੂਚਨਾ ਮਿਲ ਜਾਂਦੀ ਹੈ। ਨਸ਼ਿਆਂ ਕਾਰਨ ਨੌਜਵਾਨਾਂ ਦਾ ਜੁੱਸਾ ਮੁੱਕ ਰਿਹਾ ਹੈ। ਤੱਪਾਖੇੜਾ ’ਚ ਕੋਈ ਆਪਣੀ ਲੜਕੀ ਵਿਆਹੁਣ ਨੂੰ ਤਿਆਰ ਨਹੀਂ। ਇੱਥੇ ਇੱਕ ਸਾਲ ’ਚ ਕਰੀਬ ਦੋ ਦਰਜਨ ਵਿਆਹ ਟੁੱਟ ਚੁੱਕੇ ਹਨ। ਨਸ਼ਿਆਂ ਦੇ ਦਾਗ ਕਾਰਨ ਵਿਹੜੇ ਸਮੇਤ ਪਿੰਡ ’ਚ ਨੌਜਵਾਨਾਂ ਦੀ ਬਰਾੜ ਚੜ੍ਹਨੀ ਔਖੀ ਹੋ ਗਈ ਹੈ। ਉਨ੍ਹਾਂ ਕਿਹਾ ਕਿ 14 ਜੂਨ ਨੂੰ ਅਕਾਲੀ ਆਗੂ ਨੀਟੂ ਤੱਪਾਖੇੜਾ ਦੇ ਘਰ 38 ਲੱਖ ਰੁਪਏ ਦੀ ਚੋਰੀ ਉਪਰੰਤ ਪੜਤਾਲ ਮੌਕੇ ਕਾਫ਼ੀ ਪੁਲਿਸ ਮੁਲਾਜਮਾਂ ਨੇ ਇੱਕ ਪ੍ਰਮੁੱਖ ਚਿੱਟਾ

ਤਸਕਰ ਦੇ ਘਰ ਡੇਰਾ ਲਗਾ ਕੇ ਰੋਟੀਆਂ ਖਾਦੀਆਂ ਅਤੇ ਚਾਹ-ਪਾਣੀ ਪੀਤਾ ਸੀ। ਨਸ਼ਾ ਕਰਨ ਨਿੱਤ ਪੁੱਜਦੇ ਇਟਿਓਜ਼ ਕਾਰ ਵਾਲਾ ‘ਖਾਕੀ’ ਮੁਲਾਜਮ ਅਤੇ ਬਠਿੰਡਾ ਦੀ ਦਸ ਨੰਬਰੀ ਇੰਡੋਵਰ ਗੱਡੀ ਖੂਬ ਚਰਚਾ ’ਚ ਹੈ। ਮੀਟਿੰਗ ’ਚ ਉੱਠੇ ਵੇਰਵਿਆਂ ਮੁਤਾਰਕ ਪਿੰਡ ’ਚ ਦਰਜਨ ਭਰ ਨਾਜਾਇਜ਼ ਅਸਲਾ ਹੈ। ਪਿੰਡ ਵਾਸੀਆਂ ਦੇ ਬਿਆਨਾਂ ਮੁਤਾਬਕ ਤੱਪਾਖੇੜਾ ਤੋਂ ਚੈਨ ਸਨੇਚਿੰਗ ਗਿਰੋਹ ਸੰਚਾਲਤ ਹੋਣ ਦੇ ਇਲਾਵਾ ਚੋਰੀਸ਼ੁਦਾ ਮੋਟਰ ਸਾਇਕਲਾਂ ਵੀ ਪੁਰਜਾ-ਪੁਰਜਾ ਹੋ ਕੇ ਬਾਹਰ ਵਿਕਦਾ ਹੈ। ਪਿੰਡ ਵਾਸੀ ਨਸ਼ਿਆਂ ਖਿਲਾਫ਼ ਸਾਂਝੀ ਕਮੇਟੀ ਬਣਾਉਣ ਦੀ ਰਾਹ ਪਏ ਹੋਏ ਹਨ। ਇਸ ਬਾਰੇ ਸਵੇਰੇ ਇੱਕ ਮੀਟਿੰਗ ਵੀ ਹੋਈ ਸੀ। ਐਸ.ਟੀ.ਐਫ਼ ਦੇ ਐਸ.ਪੀ ਦਵਿੰਦਰ ਸਿੰਘ ਬਰਾੜ ਨੇ ਕਿਹਾ ਕਿ ਹਰ ਪੱਧਰ ’ਤੇ ਨਕੇਲ ਕਸ ਕੇ ਤੱਪਾਖੇੜਾ ਅਤੇ ਹੋਰਨਾਂ ਪਿੰਡਾਂ ਨੂੰ ਨਸ਼ਾ ਮੁਕਤ ਕੀਤਾ ਜਾਵੇਗਾ। ਉਨ੍ਹਾਂ ਜਨਤਾ ਤੋਂ ਢੁੱਕਵੇਂ ਸਹਿਯੋਗ ਦੀ ਅਪੀਲ ਕੀਤੀ। ਲੰਬੀ ਥਾਣੇ ਦੇ ਮੁਖੀ ਚੰਦਰਸ਼ੇਖਰ ਨੇ ਕਿਹਾ ਕਿ ਹਿਰਾਸਤ ਵਿੱਚ ਲਏ ਮਨੀ ਅਤੇ ਗਿੰਦੂ ਬਾਰੇ ਪੜਤਾਲ ਚੱਲ  ਰਹੀ ਹੈ। ਸਿਮਰਜੀਤ ਅਤੇ ਉਸਦੇ ਸਾਥੀ ਅਜੈਹਰਬੀਰ ਨੂੰ ਅੱਠ ਗਰਾਮ ਹੈਰੋਇਨ ਸਮੇਤ ਗਿ੍ਰਫ਼ਤਾਰੀ ਦੀ ਪੁਸ਼ਟੀ ਕੀਤੀ। M. No. 93178-26100

ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਸਿਆਸੀ ਮੱਥੇ ’ਤੇ ਕਲੰਕ

ਇਕਬਾਲ ਸਿੰਘ ਸ਼ਾਂਤ/ਬੁਲੰਦ ਸੋਚ ਬਿਊਰੋ

ਲੰਬੀ/ਚੰਡੀਗੜ੍ਹ: ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ‘ਨਸ਼ਾ ਮੁਕਤ’ ਪੰਜਾਬ ’ਚ ਸਿਆਸੀ ਅਤੇ ਪ੍ਰਸ਼ਾਸਨਿਕ ਮਾੜੇਪਨ ਕਾਰਨ ਨੌਜਵਾਨੀ ਦੇ ਬਾਅਦ ਨਸ਼ਿਆਂ ਦੇ ਕੋਹੜ ਨੇ ਹੱਸਦੇ-ਖੇਡਦੇ ਬਚਪਨ ਨੂੰ ਵੀ ਵਾਢਾ ਲਗਾ ਲਿਆ ਹੈ। ਮੌਜੂਦਾ ਮੁੱਖ ਮੰਤਰੀ ਦੇ ਚੋਣ ਹਲਕੇ ਲੰਬੀ ਵਿਖੇ ਨਸ਼ਿਆਂ ਦੀ ਰਾਜਧਾਨੀ ਅਖਵਾਉਂਦੇ ਤੱਪਾਖੇੜਾ ’ਚ 13 ਸਾਲਾ ਲੜਕਾ ਲਖਵਿੰਦਰ ਸਿੰਘ ਚਿੱਟਾ ਨਸ਼ੇ ਦਾ ਟੀਕਾ ਲਗਾਉਣ ਕਰਕੇ ਮੌਤ ਦਾ ਸ਼ਿਕਾਰ ਹੋ ਗਿਆ। 

ਵੱਡ ਉਮਰੇ ਨਸ਼ੇੜੀਆਂ ਦੀ ਸੰਗਤ ਨੇ ਗਰਕਿਆ ਲਖਵਿੰਦਰ

ਲਖਵਿੰਦਰ ਪਿਛਲੇ ਕਰੀਬ ਦੋ ਸਾਲਾਂ ਤੋਂ ਨਸ਼ਾ ਕਰਨ ਵਾਲੇ ਉਸਤੋਂ ਵੱਡੀ ਉਮਰ ਦੇ ਨੌਜਵਾਨਾਂ ਦੇ ਸੰਪਰਕ ਵਿੱਚ ਸੀ। ਨਸ਼ੇ ਦੀ ਓਵਰ ਡੋਜ਼ ਕਰਨ ਹਾਲਤ ਵਿਗੜਨ ’ਤੇ ਲਖਵਿੰਦਰ ਨੂੰ ਉਸਦੇ ਨਸ਼ੇੜੀ ਸਾਥੀ ਘਰ ਦੇ ਬੂਹੇ ’ਤੇ ਗਲੀ ’ਚ ਸੁੱਟ ਕੇ ਤੁਰਦੇ ਬਣੇ। ਜਦ ਤੱਕ ਗਲੀ ਵਾਲਿਆਂ ਨੇ ਉਸਨੂੰ ਸੰਭਾਲਿਆ ਤਾਂ ਲਖਵਿੰਦਰ ਦੇ ਪ੍ਰਾਣ-ਪਖੇਰੂ ਹੋ ਚੁੱੱਕੇ ਹਨ ਅਤੇ ਉਸਦੀ ਟੀਕਾ ਲੱਗਣ ਕਰਕੇ ਬਾਂਹ ਦੀ ਨਾਢ ਫੁੱਲੀ ਹੋਈ ਸੀ ਅਤੇ ਲਹੂ ਰਿਸ ਰਿਹਾ ਸੀ। ਪੰਜਾਬ ਦੇ ਸਿਆਸੀ, ਪ੍ਰਸ਼ਾਸਨਿਕ ਅਤੇ ਸਮਾਜਿਕ ਤੰਤਰ ਦੀ ਸਿਤਮਜਰੀਫ਼ੀ ਹੈ ਕਿ ਸੱਤਵੀਂ ਜਮਾਤ ਦਾ ਪਿਉ ਬਾਹਰਾ ਨਾਬਾਲਗ ਅਤੇ ਨਾਸਮਝ ਲਖਵਿੰਦਰ ਪਿੰਡ ਦੇ ਨਸ਼ੇੜੀਆਂ ਦੇ ਅੜਿੱਕੇ ਚੜ ਗਿਆ ਅਤੇ ਵਿਧਵਾ ਮਾਂ ਦੀਆਂ ਦੁਸ਼ਵਾਰੀਆਂ ਨੂੰ ਮੁੜ ਤੋਂ ਹਨੇਰੀ ਭਵਿੱਖ ਦੇ ਰਾਹ ਪਾ ਗਿਆ। ਇਹ ਘਟਨਾ ਸਿੱਧੇ ਤੌਰ ’ਤੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਸਿਆਸੀ ਮੱਥੇ ’ਤੇ ਵੱਡਾ ਕਲੰਕ ਹੈ। 

ਸ਼ਮਸ਼ਾਨ ਘਾਟ ਸਜਦੀਆਂ ਮਹਿਫ਼ਿਲਾਂ, ਬਾਪ ਸੱਤ ਪਹਿਲਾਂ ਮੁੱਕ ਗਿਆ ਸੀ

ਜਾਣਕਾਰੀ ਅਨੁਸਾਰ ਲਖਵਿੰਦਰ ਦੇ ਪਿਤਾ ਰਣਜੀਤ ਸਿੰਘ ਦੀ ਕਰੀਬ ਸੱਤ ਸਾਲ ਪਹਿਲਾਂ ਮੌਤ ਹੋ ਚੁੱਕੀ ਹੈ ਅਤੇ ਮਾਂ, ਵੱਡੀ ਭੈਣ ਅਤੇ ਛੋਟੇ ਭਰਾ ਨਾਲ ਨਾਨਕੇ ਪਿੰਡ ਤੱਪਾਖੇੜਾ ’ਚ ਰਹਿੰਦਾ ਹੈ। ਪਿੰਡ ਵਾਸੀਆਂ ਅਨੁਸਾਰ ਸਕੂਲ ਦੇ ਨੇੜੇ ਸ਼ਮਸ਼ਾਨ ਘਾਟ ’ਚ ਨਸ਼ੇੜੀਆਂ ਦੀਆਂ ਮਹਿਫ਼ਿਲਾਂ ਸਜਦੀਆਂ ਹਨ। ਉਸਦੀ ਵਿਧਵਾ ਮਾਂ ਪਰਮਜੀਤ ਕੌਰ ਦਿਹਾੜੀ ਮਜ਼ਦੂਰ ਕਰਕੇ ਬੱਚਿਆਂ ਨੂੰ ਪਾਲਦੀ ਹੈ। 

ਲੰਬੀ ਦੇ ਪਿੰਡ-ਪਿੰਡ ’ਚੱਟਾ ਨਸ਼ੇ ਦਾ ਕੋਹੜ

ਉਂਝ ਤਾਂ ਲੰਬੀ ਹਲਕੇ ਦੇ ਪਿੰਡ-ਪਿੰਡ ’ਚ ਚਿੱਟਾ ਨਸ਼ੇ ਦਾ ਕੋਹੜ ਫੈਲ ਚੁੱਕਿਆ ਹੈ। ਲੰਬੀ ਹਲਕੇ ਵਿੱਚ ਬੀਤੇ ਹਫ਼ਤੇ ’ਚ ਪਿੰਡ ਕਿੱਲਿਆਂਵਾਲੀ ਅਤੇ ਵੜਿੰਗਖੇੜਾ ਵਿਖੇ ਵੀ  ਚਿੱਟੇ ਨਸ਼ੇ ਦੇ ਕਾਰਨ ਦੋ ਮੌਤ ਹੋਈਆਂ ਹਨ। ਤੱਪਾਖੇੜਾ ਵਿੱਚ ਤਾਂ ਖੁੱਲੇਆਮ ਚਿੱਟਾ ਨਸ਼ਾ ਖੁੱਲੇਆਮ ਵਿਕਦਾ ਹੈ। ਇੱਥੇ ਬਹੁਤੇ ਘਰਾਂ ’ਚ ਸ਼ਰੇਆਮ ਚਿੱਟਾ ਨਸ਼ੇ ਦੀਆਂ ਦੀ ਵਿਕਰੀ ਹੁੰਦੀ ਹੈ ਅਤੇ ਨਜਾਇਜ਼ ਸ਼ਰਾਬ ਕੱਢੀ ਜਾਂਦੀ ਹੈ। 

ਦਸ-ਦਸ ਸਾਲਾ ਲੜਕੇ ਚਿੱਟਾ ਨਸ਼ੇ ਦੇ ਆਦੀ 

ਪਿੰਡ ਵਾਸੀਆਂ ਅਨੁਸਾਰ ਸਿਰਫ਼ ਲਖਵਿੰਦਰ ਹੀ ਨਹੀਂ, ਗਰੀਬ ਘਰਾਂ ਦੇ ਦਸ-ਦਸ ਸਾਲਾਂ ਦੇ ਲੜਕੇ ਖੇਡਣ ਕੁੱਦਣ ਅਤੇ ਪੜਨ ਦੀ ਉਮਰ ’ਚ ਚਿੱਟਾ ਨਸ਼ੇ ਦੇ ਆਦੀ ਹੋ ਚੁੱਕੇ ਹਨ ਜਾਂ ਨਸ਼ਾ ਵਿਕਰੀ ਏਜੰਟ ਬਣਾ ਦਿੱਤੇ ਹਨ। ਜਿਨਾਂ ਹੱਥੀਂ ਸਸਤੇ ਰੇਟਾਂ ’ਤੇ ਸੌ-ਦੋ ਸੌ ਰੁਪਏ ਟੀਕਾ ਵੇਚਿਆ ਜਾਂਦਾ ਹੈ। ਦੂਰੋਂ-ਦੂਰੋਂ ਅਮੀਰ ਘਰਾਂ ਦੇ ਕਾਕੇ ਇਨਾਂ ਤੋਂ ਪੰਜ-ਸੱਤ ਸੌ ਰੁਪਏ ਪ੍ਰਤੀ ਡੋਜ਼ ਖਰੀਦਣ ਆਉਂਦੇ ਹਨ। ਪਿੰਡ ਦੇ ਕਾਫ਼ੀ ਗਿਣਤੀ ਨੌਜਵਾਨ ਵੀ ਨਸ਼ੇ ਦੀ ਮਾਰ ਹੇਠ ਹਨ। ਦੋ ਘਰ ਚਿੱਟਾ ਨਸ਼ਾ ਵੇਚਣ ਲਈ ਬੇਹੱਦ ਬਦਨਾਮ ਦੱਸੇ ਜਾਂਦੇ ਹਨ। ਜਿਨਾਂ ਆਲੇ-ਦੁਆਲੇ ਪੁਲਿਸ ਤੋਂ ਅਗਾਊਂ ਬਚਾਅ ਖਾਤਰ ਸੀ.ਸੀ.ਟੀ.ਵੀ. ਕੈਮਰੇ ਵੀ ਲੱਗੇ ਹੋਏ ਹਨ। 

ਨਸ਼ੇ ਖੁੱਲੇਆਮ ਵਿਕਦੇ, ਪੁਲਿਸ ਦੇ ਕਾਨੂੰਨੀ ‘ਹੱਥ’ ਖਾਲੀ, ਜੇਬਾਂ....

ਬੀਤੇ ਹਫ਼ਤੇ ਉਕਤ ਨਸ਼ਾ ਤਸਕਰ ਦੇ ਘਰ ਨਸ਼ੇ ਦੀ ਓਵਰਡੋਜ਼ ਕਾਰਨ ਪਿੰਡ ਅਬੁੱਲਖੁਰਾਣਾ ਦਾ ਇੱਕ ਨੌਜਵਾਨ ਨਸ਼ਾ ਤਸਕਰ ਦੇ ਘਰ ਬੇਹੋਸ਼ ਹੋ ਗਿਆ ਸੀ। ਮਾਪਿਆਂ ਨੂੰ ਉਸਨੂੰ ਜੀਪ ਲੱਦ ਕੇ ਘਰ ਲਿਜਾਣਾ ਪਿਆ ਸੀ। ਕੱਲ ਦੇਰ ਸ਼ਾਮ 13 ਸਾਲਾ ਲੜਕੇ ਦੀ ਮੌਤ ਨੇ ਆਮ ਲੋਕਾਂ ਦੇ ਰੌਂਗਟੇ ਖੜੇ ਕਰ ਦਿੱਤੇ ਹਨ। ਪੁਲਿਸ ਨੂੰ ਨਸ਼ੇ ਦੇ ਸੌਦਾਗਰਾਂ ਦੀ ਸਮੁੱਚੀ ਜਾਣਕਾਰੀ ਹੈ ਪਰ ਉਹ ਵੀ ਨਸ਼ਾ ਤਸਕਰਾਂ ਮੂਹਰੇ ਬੇਵੱਸ ਹੈ। ਜਨਤਾ ਅਨੁਸਾਰ ਪੁਲਿਸ ਤਸਕਰਾਂ ਨਾਲ ਮਿਲੀ ਹੋਈ ਹੈ, ਪਰ ਇਹ ਸਮਾਜਿਕ ਦੁਖਾਂਤ ਅਤੇ ਸਰਕਾਰੀ ਘੋਖ ਦਾ ਵਿਸ਼ਾ ਹੈ। ਪੁਲਿਸ ਅਨੁਸਾਰ ਘਟਨਾ ਤੋਂ ਪਹਿਲਾਂ ਕੱਲ ਤੜਕੇ ਪਿੰਡ ਘੇਰ ’ਤੇ ਛਾਪੇ ਮਾਰੇ ਗਏ ਸਨ। ਨਜਾਇਜ਼ ਸ਼ਰਾਬ ਦੇ ਇਲਾਵਾ ਕੁਝ ਬਰਾਮਦ ਨਹੀਂ ਹੋਇਆ। ਸਭ ਤੋਂ ਵੱਡਾ ਦੁਖਾਂਤ ਹੈ ਕਿ ਸਾਰਾ ਪਿੰਡ ਚੀਖ ਚੀਖ ਕੇ ਤੱਪਾਖੇੜਾ ’ਚ ਨਸ਼ਾ ਵਿਕਣ ਦੀ ਦੁਹਾਈ ਦਿੰਦਾ ਹੈ ਪਰ ਮੁੱਠੀ ਭਰ ਨਸ਼ਾ ਤਸਕਰਾਂ ਦੇ ਗੈਂਗਾਂ ਅਤੇ ਖ਼ਤਰਨਾਕ ਇਰਾਦਿਆਂ ਮੂਹਰੇ ਡਟਣ ਲਈ ਕੋਈ ਤਿਆਰ ਨਹੀਂ। ਜੇਕਰ ਪੁਲਿਸ ਅਤੇ ਪਿੰਡ ਵਾਸੀ ਇੱਛਾਸ਼ਕਤੀ ਵਿਖਾਉਣ ਤਾਂ ਨਸ਼ਾ ਤਸਕਰੀ ਨੂੰ 24 ਘੰਟਿਆਂ ’ਚ ਨੇਸਤੋ-ਨਾਬੂਤ ਕੀਤਾ ਜਾ ਸਕਦਾ ਹੈ। ਸਭ ਤੋਂ ਵੱਡੀ ਖਾਮੀ ਹੈ ਕਿ ਮਿ੍ਰਤਕ ਲਖਵਿੰਦਰ ਸਿੰਘ ਦਾ ਵਗੈਰ ਪੋਸਟਮਾਰਟਮ ਦੇ ਅੰਤਮ ਸਸਕਾਰ ਕਰ ਦਿੱਤਾ ਗਿਆ। 

ਅੰਨੇਵਾਹ ਨਸ਼ਾ ਵਿਕਦਾ: ਸਰਪੰਚ

ਸਰਪੰਚ ਸੁਖਮੰਦਰ ਸਿੰਘ ਨੇ ਕਿਹਾ ਕਿ ਤੱਪਾਖੇੜਾ ’ਚ ਅੰਨੇਵਾਹ ਨਸ਼ਾ ਵਿਕਦਾ ਹੈ। ਪੁਲਿਸ ਆਖਦੀ ਕਿ ਨਸ਼ਾ ਸਮੇਤ ਬੰਦਾ ਫੜਾਓ। ਪਿੰਡ ਲਈ ਨਸ਼ੇ ਵੱਡੀ ਤ੍ਰਾਸਦੀ ਹਨ ਅਤੇ ਪਿੰਡ ਬਰਬਾਦੀ ਦੀ ਰਾਹ ’ਤੇ ਹੈ। ਅਸੀਂ ਕੀ ਕਰਦੇ ਸਕਦੇ ਹਾਂ। 

 ਲੜਕੇ ਦੀ ਮੌਤ ਬਾਰੇ ਪੁਲਿਸ ਨੂੰ ਸੂਚਨਾ ਨਹੀਂ

ਲੰਬੀ ਥਾਣਾ ਦੇ ਮੁਖੀ ਚੰਦਰਸ਼ੇਖਰ ਨੇ ਕਿਹਾ ਕਿ ਕੱਲ ਹੀ ਤੱਪਾਖੇੜਾ ’ਚ 80-90 ਮੁਲਾਜਮਾਂ ਨਾਲ ਬਹੁਤ ਘਰਾਂ ’ਚ ਛਾਪਾ ਮਾਰਿਆ ਸੀ। 13 ਸਾਲਾ ਲੜਕੇ ਦੀ ਮੌਤ ਬਾਰੇ ਪੁਲਿਸ ਨੂੰ ਕੋਈ ਸੂਚਨਾ ਨਹੀਂ ਮਿਲੀ। ਜ਼ਿਕਰਯੋਗ ਹੈ ਕਿ ਲੋਕਾਂ ਦਾ ਪੁਲਿਸ ਤੋਂ ਵਿਸ਼ਵਾਸ ਉੱਝ ਗਿਆ ਹੈ ਕਿ ਕਿਸੇ ਨੇ ਇਸ ਵੱਡੀ ਘਟਨਾ ਬਾਰੇ ਦੱਸਣਾ ਜ਼ਰੂਰੀ ਨਹੀਂ ਸਮਝਿਆ ਜਾਂ ਪੁਲਿਸ ਦੀਆਂ ਸੁੱਤੀਆਂ ਅੱਖਾਂ ਨੂੰ ਵਿਖਾਈ ਦੇਣਾ ਬੰਦ ਹੋ ਗਿਆ ਹੈ।    

ਡੀ.ਜੀ.ਪੀ/ਐਸ.ਐਸ.ਪੀ. ਮੋਬਾਇਲ ਫੋਨ ਸੁਣਨ ਨੂੰ ਮੁਨਕਰ

ਜ਼ਿਲਾ ਸ੍ਰੀ ਮੁਕਤਸਰ ਸਾਹਿਬ ਦੇ ਮਹਿਲਾ  ਐਸ.ਐਸ.ਪੀ. ਡੀ. ਸੂਡਰਵਿੱਲੀ ਨੇ ਰਵਾਇਤੀ ਸੁਭਾਅ ਮੁਤਾਬਕ ਅੱਜ ਵੀ ਗੰਭੀਰ ਮਸਲੇ ’ਤੇ ਫੋਨ ਕਾਲ ਰਸੀਵ ਨਹੀਂ ਕੀਤੀ। ਉਹ ਪਹਿਲਾਂ ਵੀ ਆਮ ਲੋਕਾਂ ਦੇ ਫੋਨ ਕਾਲ ਰਸੀਵ ਨਹੀਂ ਕਰਦੇ। ਆਮ ਲੋਕਾਂ ਦਾ ਕਹਿਣਾ ਹੈ ਕਿ ਅਜਿਹੇ ਪ੍ਰਸ਼ਾਸਨਿਕ ਅਧਿਕਾਰੀਆਂ ਨੂੰ ਜਨਤਕ ਫਰਜ਼ਾਂ ਵਾਲੇ ਅਹੁਦਿਆਂ ਤੋਂ ਲਾਂਭੇ ਕਰ ਦੇਣਾ ਚਾਹੀਦਾ ਹੈ। ਡੀ.ਜੀ.ਪੀ. ਦਿਨਕਰ ਗੁਪਤਾ ਨੇ ਵੀ ਮੋਬਾਇਲ ਕਾਲ ਨਹੀਂ ਰਸੀਵ ਕੀਤੀ। 

ਅਮਰਿੰਦਰ ਸਿੰਘ ਤੋਂ ਵੱਡਾ ਸੁਆਲ

ਸੂਬੇ ਦੇ ਦਰਦਰਨਾਕ ਅਤੇ ਨਿੱਘਰ ਚੁੱਕੇ ਮਾੜੇ ਹਾਲਾਤ ਅਮਰਿੰਦਰ ਸਿੰਘ ਤੋਂ ਸਿਆਸੀ ਹਿੱਤਾਂ ਵਾਲੀ ਧਾਰਮਿਕ ਸਹੁੰਆਂ ਬਾਰੇ ਚੀਕ-ਚੀਕ ਕੇ ਜਵਾਬ ਮੰਗ ਰਹੇ ਹਨ ਕਿ ਮੁੱਖ ਮੰਤਰੀ ਲਈ ‘ਸੀਤਾਫ਼ਲ’ ਜ਼ਰੂਰੀ ਹਨ ਜਾਂ ਪੰਜਾਬ ਦੀ ਨੌਜਵਾਨੀ ਅਤੇ ਬਚਪਨ ਦੀ ਸੁੱਖ-ਸਾਂਦ ਅਤੇ ਚੜਦੀ ਕਲਾ। ਪਿਛਲੇ ਸਾਢੇ ਚਾਰ ਸਾਲਾਂ ’ਚ ਪੰਜਾਬ ਵਿੱਚ ਨਸ਼ਾ ਮੁੱਕਣਾ ਤਾਂ ਕੀ ਛੋਟੇ-ਛੋਟੇ ਜੁਆਕਾਂ ਦੇ ਬਚਪਨ ਵਿੱਚ ਨਸ਼ਾ ਵੜ ਗਿਆ ਹੈ। ਆਰਥਿਕ ਮੰਦਹਾਲੀ ’ਚ ਬਹੁਗਿਣਤੀ ਮਾਪੇ ਰੁਜ਼ਗਾਰ ਦੀ ਗੁੰਝਲ ’ਚ ਫਸ ਗਏ ਅਤੇ ਨਵੀਂ ਪਨੀਰੀ। ਮਾਪਿਆਂ ਦੇ ਲਗਾਤਾਰ ਧਿਆਨ ਨਾ ਦੇਣ ਕਰਕੇ ਨੌਜਵਾਨ ਬਦਮਾਸ਼ੀ ਅਤੇ ਨਸ਼ਿਆਂ ਦੀ ਭੇਟ ਚੜ ਕੇ ਅਜੋਕੇ ਦੌਰ ਦੇ ‘ਨਸ਼ੇੜੀ ਅਤੇ ਨਪੁੰਸਕ ਯੋਧੋ’ ਸਾਬਤ ਹੋ ਰਹੇ ਹਨ। ਅਜਿਹਾ ਹੇਠਲੇ ਦਰਜੇ ਦਾ ਸਿਸਟਮ ਅਮਰਿੰਦਰ ਸਿੰਘ ਨੂੰ ਪਲਾਂ ’ਚ ਮੁੱਖ ਮੰਤਰੀ ਦੀ ਕੁਰਸੀ ਤੋਂ ਲਾਂਭੇ ਕਰਨ ਦੀ ਸ਼ਾਹਦੀ ਭਰਦਾ ਹੈ। M. No. 93178-26100

   

किसानों के सिर एक ओर हथौड़ा: इफ़को ने डीएपी की कीमत 12 सौ से बढ़ा कर की 19 सौ रुपए

* करीब डेढ़ गुना वृद्धि करके कीमतों को आसमान पर चढाया

* कीमतों में इजाफा किसान हितों पर सरेआम डाका: झंडा सिंह जेठूके

इकबाल सिंह शांत/बुलंद सोच ब्यूरो

डबवाली/नई दिल्ली: खेती कानूनों के ख़िलाफ़ दिल्ली की हदों पर डटे बैठे लाखों किसानों पर केंद्र सरकार नित्य-प्रति गुस्से पर गुस्सा निकाल रही है। कृषि जगत पर आज नया आर्थिक हथौड़ा मारते केंद्र सरकार के अर्ध सरकारी संस्था इफ़के ने डी.ए.पी खाद की कीमतों में करीब डेढ़ गुना से ज्यादा इजाफा कर दिया है। अब नये रेट लागू होने से इफ़को की डी.ए.पी खाद प्रति 50 किलो बैग 1900 रुपए में मुहैया होगी, यह बैग पहले 1200 रुपए में मिलता था। इफ़को के मार्केटिंग डायरैक्टर योगेंद्र कुमार के हस्ताक्षर के तहत पत्र नंबर ऐमकेसीयो/एमएस /2021 -22 कल 7 अप्रैल 2021 को जारी हुआ है। जिसमे बढ़ी हुई नयी दरें 1अप्रैल 2021 से ही लागू कर दीं गई हैं। पंजाब की सहकारी सभाओं में इफ़को की डी.ए.पी. 25 प्रतिशत स्पलाई होती है। कृषि के साथ जुड़े सूत्रों अनुसार कुछ फर्टिलाइजर कंपनियों ने फरवरी महीनो में डी.ए.पी. की नयी दरों 13 -14 सौ रुपए एम.आर.पी पर माल मार्केट भेज दिया था, परंतु अब इफ़को ने कीमतों के वृद्धि में सारी हदें पार कर दी हैं।

इफ़को सूत्र बढ़ी कीमतों को अंतरराष्ट्रीय बाज़ार में कच्चे माल कि कीमतों में वृद्धि को जुम्मेवार बता रहे हैं। इफ़को की बढ़ी दरों में खाद के दूसरे उत्पाद ऐन.पी.के 10 -26 -26 के 50 किलो बैग का नया रेट 1775 रुपए, ऐन.पी.के 12 -32 -16 का रेट 1800 रुपए, ऐन.पी 20 -20 -0-13 का रेट 1350 रुपए और ऐन.पी.के 15 -15 -15 का नया रेट 1500 तय किया गया है। 

उल्लेखनीय है कि किसानों पर डी.ए.पी. दरों पर वृद्धि की अकेली मार नहीं पड़ी है। सरकार ने नरमे के बीटी बीजों की कीमत भी प्रति पैक्ट 767 रुपये कर दी है। पिछले बरस इसकी कीमत 730 रुपए थी। इस वृद्धि के साथ बीटी बीजों कि कीमत में 37 रुपए का इजाफा हो गया है। ऐसे हालात खेती सेक्टर की नींव हिलाने के लिये सरकारी साजिशों को स्पष्ट कर रहें हैं। पत्र में किसानों को डी.ए.पी पर सब्सिडी बारे भी कोई ज़िक्र नहीं है। इस बड़ी वृद्धि से किसानों में हाहाकार मचने के आसार हैं। किसान संगठनों ने विरोध भरी प्रतिक्रियायें दर्ज करवाई हैं। 

इफ़को के ज़िला चीफ़ मैनेजर हरमेल सिंह सिद्धू ने बढ़ी दरों की पुष्टि करते कहा कि इफ्को प्रबंधन द्वरा पत्र जारी हुआ है। जिससे अब डी.ए.पी. की कीमत 19 सौ रुपए प्रति 50 किलो थैला हो गई है।

भारतीय किसान यूनियन (एकता) उगाराहां के वरिष्ठ उपाध्यक्ष झंडा सिंह जेठूके ने डी.ए.पी में भारी वृद्धि को किसानों हितों पर सरेआम डाका बताते कहा कि सरकार लुटेरों के साथ मिल गई है। उन्होंने कहा कि किसानों का मनोबल गिराने की यह सरकारी साजिशें कभी कामयाब नहीं होंगी, बल्कि इससे किसान संघर्ष ओर मज़बूत हो रहा है। मोबाईल 93178-26100

ਪਿਤਾ ਦੀ ਜ਼ਮੀਨ ਚੌਗੁਣੀ ਕਰਨ ਦੀ ਲਗਨ ਨੇ ਕਮਲਪ੍ਰੀਤ ਹੱਥੋਂ ਚਾਰ-ਚਾਰ ਰਿਕਾਰਡ ਤੁੜਵਾ ਦਿੱਤੇ

* ਕਬਰਵਾਲਾ ਦੀ ਕਮਲਪ੍ਰੀਤ ਦਾ ਰਿਕਾਰੜੁ ਤੋੜੂ ਸੁਭਾਅ ਬਣਿਆ ਓਲੰਪਿਕ ਦਾ ਗੇਟਵੇਅ

* ਹਰ ਮੁਕਾਬਲੇ ਨੂੰ ਸੋਨ ਤਮਗੇ ਅਤੇ ਰਿਕਾਰਡ ਤੋੜ ਦੇ ਬਣਾਇਆ ਇਤਿਹਾਸਕ 

* ਸਾਬਕਾ ਸੀ.ਐਮ. ਬਾਦਲ ਨੇ ਅੱਜ ਫੋਨ ’ਤੇ ਗੱਲ ਕਰਕੇ ਦਿੱਤੀ ਸ਼ਾਬਾਸ਼ 

ਇਕਬਾਲ ਸਿੰਘ ਸ਼ਾਂਤ

ਲੰਬੀ:  ਕਿਸਾਨ ਪਿਤਾ ਵੱਲੋਂ ਜੱਦੀ ਜ਼ਮੀਨ ਨੂੰ ਚੌਗੁਣਾ ਬਣਾਉਣ ਦੇ ਕਦਮਾਂ ’ਤੇ ਪੈਰ ਧਰਦੇ ਐਥਲੀਟ ਕਮਲਪ੍ਰੀਤ ਕੌਰ ਬੱਲ ਨੇ 4-4 ਰਿਕਾਰਡ ਤੋੜ ਕੇ ਲੰਬੀ ਹਲਕੇ ਦੇ ਸੇਮ ਪੀੜਤ ਪਿੰਡ ਕਬਰਵਾਲਾ ਲਈ ਓਲੰਪਿਕ ਦਾ ਬੂਹਾ ਖੋਲ ਦਿੱਤਾ। ਉਸਨੇ ਤਿਨ ਦਿਨ ਪਹਿਲਾਂ ਕਿ੍ਰਸ਼ਨਾ ਪੂਨੀਆ ਦਾ 64.76 (ਸਾਲ 2012) ਨੈਸ਼ਨਲ ਰਿਕਾਰਡ ਤੋੜ ਕੇ ਸਿੱਧਾ ਓਲੰਪਿਕ ’ਚ ਪ੍ਰਵੇਸ਼ ਪਾਇਆ ਹੈ। ਹੁਣ ਉਹ ਡਿਸਕਸ ਥਰੋਅ ’ਚ 65 ਮੀਟਰ ਸਕੋਰ ਪਾਰ ਕਰਨ ਵਾਲੀ ਪਹਿਲੀ ਭਾਰਤੀ ਔਰਤ ਐਥਲੇਟਿਕ ਹੈ। ਓਲੰਪਿਕ ਦਾ ਡਿਸਕਸ ਥਰੋਅ ’ਚ ਕੁਆਲੀਫਾਇੰਗ ਸਕੋਰ 63.50 ਮੀਟਰ ਹੈ। ਉਸਨੇ ਹੁਣ ਤੱਕ ਤਿੰਨ ਮੀਟ ਤੇ ਇੱਕ ਨੈਸ਼ਨਲ ਰਿਕਾਰਡ ਤੋੜਿਆ ਹੈ। ਕਰੀਬ 9 ਸਾਲਾਂ ’ਚ ਡਿਸਕਸ ਥਰੋਅ ’ਚ ਸਿਖ਼ਰਲੇ ਪੜਾਅ ’ਤੇ ਪੁੱਜਣ ਵਾਲੀ ਕਮਲਪ੍ਰੀਤ ਬੱਲ ਦਾ ਖੇਡ ਸਫ਼ਰ ਸੌਖਾ ਨਹੀਂ ਰਿਹਾ। 2017 ’ਚ ਖੇਡ ਦੌਰਾਨ ਲੱਗੀ ਸੱਟ ਦੇ ਲਗਾਤਾਰ ਦਰਦ ਨੇ ਉਸਨੂੰ ਲਗਪਗ ਹਰਾ ਦਿੱਤਾ ਸੀ। ਤਿੱਖੇ ਦਰਦ ਨੇ ਉਸਦੀ ਖੇਡ ਛੱਡਣ ਦੇ ਆਸਾਰ ਬਣਾ ਦਿੱਤੇ ਸਨ। ਉਹ ਆਖਦੀ ਹੈ ਕਿ ਉਸਨੂੰ ਪਿਤਾ ਕੁਲਦੀਪ ਸਿੰਘ ਬੱਲ ਵੱਲੋਂ ਲੋਕਾਂ ਦੀਆਂ ਜ਼ਮੀਨਾਂ ਠੇਕੇ ’ਤੇ ਵਾਹ ਕੇ ਜੱਦੀ ਸੱਤ ਏਕੜ ਜ਼ਮੀਨ ਨੂੰ 28 ਏਕੜ ਬਣਾਉਣ ਦਾ ਮਿਹਨਤੀ ਅਤੇ ਔਖਾ ਸਫ਼ਰ ਯਾਦ ਆਇਆ ਅਤੇ ਉਸਦੇ ਪਿੱਠ ਦਰਦ ਨੂੰ ਤਾਕਤ ਬਣਾ ਲਿਆ। ਪਿਤਾ ਦੀ ਉਸਾਰੂ ਮਿਹਨਤ ਦੀ ਪ੍ਰੇਰਨਾ ਬਣਾਉਣ ਸਦਕਾ ਕਮਲਪ੍ਰੀਤ ਬੱਲ ਨੇ ਜਿੱਤਾਂ ਦੀ ਲੜੀ 2014 ’ਚ ਜੂਨੀਅਰ ਨੈਸ਼ਨਲ ਡਿਸਕਸ ਥਰੋਅ 39 ਮੀਟਰ ਸਕੋਰ ਨਾਲ ਸੋਨ ਤਮਗੇ ਤੋਂ ਵਿੱਢੀ। ਉਸੇ ਸਾਲ ਸਕੂਲ ਗੇਮਜ਼ 42 ਮੀਟਰ ਸਕੋਰ ਨਾਲ ਸੋਨ ਤਮਗਾ ਅਤੇ 2016 ’ਚ ਓਪਨ ਨੈਸ਼ਨਲ ’ਚ ਸੋਨ ਤਮਗਾ ਫੁੰਡਿਆ। ਸੀਨੀਅਰ ਨੈਸ਼ਨਲ ਫੈਡਰੇਸ਼ਨ ਮੁਕਾਬਲਿਆਂ ’ਚ ਸਾਲ 2018, 2019 ਤੇ 2021 ਵਿੱਚ ਲਗਾਤਾਰ ਸੋਨ ਤਮਗੇ ਜਿੱਤ ਕੇ ਖੁਦ ਨੂੰ ਸਾਬਤ ਕੀਤਾ। ਲਗਾਤਾਰ ਜਿੱਤਾਂ ਨੂੰ ਹੱਥਾਂ ਦੀ ਕਰਾਮਾਤ ਬਣਾਉਣ ਵਾਲੀ ਕਮਲਪ੍ਰੀਤ ਬੱਲ ਨੂੰ ਰਿਕਾਰਡ ਤੋੜਨ ਦਾ ਜਿਵੇਂ ਸੁਭਾਅ ਹੀ ਪੈ ਗਿਆ। ਉਸਨੇ 2016 ’ਚ ਰਾਜਸਥਾਨ ਦੀ ਪਰਮਿਲਾ ਦਾ ਜੂਨੀਅਰ ਖੇਡਾਂ ’ਚ ਰਿਕਾਰਡ ਤੋੜਿਆ। 2107 ’ਚ ਉਸਨੇ ਹਰਵੰਤ ਕੌਰ ਵੱਲੋਂ ਸਾਲ 2001 ਵਿੱਚ ਕਾਇਮ ਕੀਤਾ ਕਰੀਬ 53 ਮੀਟਰ ਦਾ ਰਿਕਾਰਡ 55.11 ਮੀਟਰ ਸਕੋਰ ਨਾਲ ਤੋੜ ਸੁੱਟਿਆ। ਫਿਰ ਉਸਨੇ ਆਲ ਇੰਡੀਆ ਇੰਟਰ ਰੇਲਵੇ ਖੇਡਾਂ ’ਚ ਲਖਨਊ ਵਿਖੇ ਕਿ੍ਰਸ਼ਨਾ ਪੂਨੀਆ ਦਾ ਮੀਟ ਰਿਕਾਰਡ ਤੋੜਿਆ। ਉਲੰਪਿਕ ਪੁੱਜਣ ਲਈ 24ਵੇਂ ਨੈਸ਼ਨਲ ਫੈਡਰੇਸ਼ਨ ਕੱਪ ’ਚ ਡਿਸਕਥ ਥਰੋਅ ’ਚ ਕਿ੍ਰਸ਼ਨਾ ਪੂਨੀਆ ਦਾ ਪੁਰਾਣਾ ਰਿਕਾਰਡ ਹੀ ਉਸਦੇ ਗੇਟਵੇਅ ਬਣਿਆ। ਉਹ ਰੋਜ਼ਾਨਾ ਅੱਠ ਘੰਟੇ ਪ੍ਰੈਕਟਿਸ ਕਰਦੀ ਹੈ ਅਤੇ ਉਸਨੂੰ ਖੁਸ਼ੀ ਹੈ ਕਿ ਹੁਣ ਉਸਦਾ ਪਿੰਡ ਕਬਰਵਾਲਾ ਅਣਗੌਲਿਆ ਨਹੀਂ ਰਿਹਾ। ਲੋਕਾਂ ਨੂੰ 'ਕਬਰਾਂ' ਦੇ ਭੁਲੇਖੇ ਪਾਉਣ ਵਾਲਾ ਸੇਮ ਪੀੜਤ ਪਿੰਡ ਕਬਰਵਾਲਾ ਹੁਣ ਓਲੰਪਿਕ ਖੇਡ ’ਚ ਆਪਣੀ ਪੁਗਤ ਬਣਾ ਗਿਆ ਹੈ। ਉਸਨੂੰ ਯਕੀਨ ਹੈ ਕਿ ਉਹ ਤਮਗਾ ਜਿੱਤ ਕੇ ਦੇਸ਼ ਅਤੇ ਪਿੰਡ ਦਾ ਮਾਣ ਜਰੂਰ ਵਧਾਏਗੀ। ਉਸਨੇ ਕਿਹਾ ਕਿ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੀ ਉਸਦੀ ਪ੍ਰਾਪਤੀ ਤੋਂ ਬੇਹੱਦ ਪ੍ਰਸੰਨ ਹਨ। ਜਿਨਾਂ ਨੇ ਉਸਦੇ ਨਾਲ ਫੋਨ ’ਤੇ ਗੱਲ ਕਰਕੇ ਉਸਦਾ ਹੌਂਸਲਾ ਵਧਾਉਂਦੇ ਓਲੰਪਿਕ ਜਿੱਤਣ ਦੇ ਜਜ਼ਬੇ ਨੂੰ ਬਰਕਰਾਰ ਰੱਖਣ ਲਈ ਕਿਹਾ। ਉਹ ਆਖਦੀ ਕਿ ਸੂਬੇ ਦੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ, ਸੁਖਬੀਰ ਸਿੰਘ ਬਾਦਲ ਅਤੇ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਨੇ ਟਵੀਟ ਕਰਕੇ ਉਸਨੂੰ ਮਾਣ ਬਖਸ਼ਿਆ। ਅੱਜ ਖੇਡ ਮੰਤਰੀ ਰਾਣਾ ਸੋਢੀ ਅਤੇ ਅਕਾਲੀ ਦਲ ਦੇ ਕੌਮੀ ਆਗੂ ਤੇਜਿੰਦਰ ਸਿੰਘ ਮਿੱਡੂਖੇੜਾ ਦਾ ਫੋਨ ਵੀ ਆਇਆ ਸੀ। ਕਮਲਪ੍ਰੀਤ ਕੌਰ ਬੱਲ ਦਾ ਕਹਿਣਾ ਹੈ ਕਿ ਉਸਨੂੰ ਖੇਡਾਂ ’ਚ ਲਗਾਤਾਰਤਾ ਬਣਾਏ ਰੱਖਣ ਲਈ ਸਰਕਾਰੀ ਨੌਕਰੀ ਦੀ ਜ਼ਰੂਰਤ ਹੈ। ਉਸਦੀ ਪਿਤਾ ਦੀ ਮਿਹਨਤ ਦਾ ਸਿੱਟਾ 27 ਏਕੜ ਦੀ ਉਸਦੇ ਪਰਿਵਾਰ ਦੀ ਇਮਾਨਦਾਰੀ ਦਾ ਮਾਣ ਹੈ ਪਰ ਉਹ ਆਪਣੇ ਹੱਥੀਂ ਵਜੂਦ ਸਿਰਜਣ ਦੀ ਭਾਈਵਾਲੀ ਹੈ। ਜਿਸ ਵਿੱਚ ਸਰਕਾਰੀ ‘ਹੌਂਸਲਾ’ (ਨੌਕਰੀ) ਅਤੇ ਕਦਮ ਬੇਹੱਦ ਜ਼ਰੂਰੀ ਹਨ। 

ਗੈਰ-ਟਕਸਾਲੀ ਕਾਂਗਰਸੀ ਮੁੱਖ ਮੰਤਰੀ ਅਤੇ ਵਿੱਤ ਮੰਤਰੀ ਦਾ ਨਹੀਂ ਕਾਂਗਰਸੀ ਜੜਾਂ ਨਾਲ ਜੁੜਾਅ!

* ਸੁਤੰਤਰਤਾ ਸੇਨਾਨੀਆਂ ਦੀ ਪੈਨਸ਼ਨ ਵਧਾ ਕੇ ਵੀ ਗੁਆਂਢੀ ਸੂਬਿਆਂ ਤੋਂ ਤਿੰਨ ਗੁਣਾ ਪਿਛਾਂਹ ਹੈ ਕੈਪਟਨ ਸਰਕਾਰ 

* ਰਾਜਸਥਾਨ ’ਚ 30 ਹਜ਼ਾਰ, ਹਰਿਆਣਾ ’ਚ 25 ਹਜ਼ਾਰ ਅਤੇ ਹਿਮਾਚਲ ’ਚ 15 ਹਜ਼ਾਰ ਰੁਪਏ ਸਨਮਾਨ ਪੈਨਸ਼ਨ

* ਪੌਣੇ ਤਿੰਨ ਸਾਲਾਂ ਤੋਂ ਦੁੱਗਣੀ ਪੈਨਸ਼ਨ ਦੀਆਂ ਸਲਾਹਾਂ ਕਰਦੇ ਪੰਜਾਬ ਦੀਆਂ 19 ਸੌ ਵਾਧੇ ’ਤੇ ਲੱਗੀਆਂ ਬਰੇਕਾਂ

ਇਕਬਾਲ ਸਿੰਘ ਸ਼ਾਂਤ

      ਡੱਬਵਾਲੀ: ਆਜ਼ਾਦੀ ਦੇ ਸੁਫ਼ਨਿਆਂ ਨੂੰ ਸਾਕਾਰ ਕਰਨ ’ਚ 85 ਫ਼ੀਸਦੀ ਰੋਲ ਨਿਭਾਉਣ ਵਾਲੇ ਪੰਜਾਬ ਦੇ ਆਜ਼ਾਦੀ ਘੁਲਾਟੀਆਂ ਦੇ ਪਰਿਵਾਰਾਂ ਲਈ ਸੂਬਾ ਸਰਕਾਰ ਸੁਚੱਜੇ 85 ਕਦਮ ਵੀ ਨਹੀਂ ਪੁੱਟ ਸਕੀ। ਅੱਠ ਸਾਲਾਂ ਬਾਅਦ 1900 ਰੁਪਏ ਪ੍ਰਤੀ ਮਹੀਨਾ ਸੁਤੰਤਰਤਾ ਸੈਨਿਕ ਸਨਮਾਨ ਪੈਨਸ਼ਨ ਵਧਾਉਣ ਬਾਅਦ ਵੀ ਪੰਜਾਬ ਗੁਆਂਢੀ ਸੂਬੇ ਰਾਜਸਥਾਨ, ਹਰਿਆਣਾ ਤੇ ਹਿਮਾਚਲ ਤੋਂ ਕਰੀਬ ਤਿੰਨ ਗੁਣਾ ਪਿੱਛੇ ਹੈ। ਪੰਜਾਬ ’ਚ ਕਰੀਬ 32 ਸੁਤੰਤਰਤਾ ਸੇਨਾਨੀਆਂ ਸਮੇਤ 1060 ਆਸ਼ਰਿਤ ਪਰਿਵਾਰ ਹਨ। ਸਰਕਾਰ ਨੇ ਤਾਜ਼ਾ ‘ਚੋਣ’ ਬੱਜਟ ’ਚ ਸੁਤੰਤਰਤਾ ਸੈਨਿਕ ਸਨਮਾਨ ਪੈਨਸ਼ਨ ਨੂੰ 7500 ਰੁਪਏ ਤੋਂ ਵਧਾ ਕੇ 9400 ਰੁਪਏ ਪ੍ਰਤੀ ਮਹੀਨਾ ਕੀਤਾ ਹੈ। ਇਹ ਵਾਧਾ ਆਜ਼ਾਦੀ ਲਈ ਕੁਰਬਾਨੀਆਂ ਦੇਣ ਪਰਿਵਾਰਾਂ ਲਈ ਮਹਿੰਗਾਈ ਮੁਤਾਬਕ ਉੱਠ ਦੇ ਮੂੰਹ ਵਿੱਚ ਜੀਰੇ ਦੇ ਸਮਾਨ ਹੈ। ਜਿਸਦਾ ਅਗਾਊਂ ਐਲਾਨ ਵੀ ਬੀਤੀ 2 ਜਨਵਰੀ 2021 ਨੂੰ ਕੀਤਾ ਹੋਇਆ ਸੀ। ਸੂਬਾ ਸਰਕਾਰ ਆਜ਼ਾਦੀ ਘੁਲਾਟੀਆਂ ਦੇ ਪਰਿਵਾਰਾਂ ਨੂੰ ਮੁਫ਼ਤ ਬੱਸ ਪਾਸ ਵਗੈਰਾ ਸਹੂਲਤਾਂ ਦਿੱਤੀਆਂ ਹਨ। ਪੰਜਾਬ ’ਚ ਮੌਜੂਦਾ 

         ਗੁਆਂਢੀ ਸੂਬੇ ਰਾਜਸਥਾਨ ’ਚ ਸੁਤੰਤਰਤਾ ਸੇਨਾਨੀ ਸਨਮਾਨ ਪੈਨਸ਼ਨ 30 ਹਜ਼ਾਰ ਪ੍ਰਤੀ ਮਹੀਨਾ ਹੈ, ਉਸ ਚ ਪੰਜ ਹਜ਼ਾਰ ਰੁਪਏ ਡਾਕਟਰੀ ਮੱਦਦ ਸ਼ਾਮਲ ਹੈ। ਹਰਿਆਣਾ ’ਚ ਸੁਤੰਤਰਤਾ ਸੇਨਾਨੀਆਂ/ਆਸ਼ਰਿਤਾਂ ਨੂੰ 25 ਹਜ਼ਾਰ ਰੁਪਏ ਮਹੀਨਾ ਅਤੇ ਹਿਮਾਚਲ ’ਚ 15 ਹਜ਼ਾਰ ਰੁਪਏ ਮਾਸਿਕ ਪੈਨਸ਼ਨ ਹੈ। ਤਿੰਨ ਸੂਬਿਆਂ ’ਚ ਲੂਆਜ਼ਾਦੀ ਯੋਧਿਆਂ ਦੇ ਮਾਣ-ਸਤਿਕਾਰ ਤਹਿਤ ਸਨਮਾਨ ਪੈਨਸ਼ਨ ’ਚ ਵਾਧਾ ਕਾਂਗਰਸ ਸਰਕਾਰਾਂ ਦੇ ਰਾਜ ਸਮੇਂ ਹੋਇਆ ਹੈ। ਕਾਂਗਰਸ ਪਾਰਟੀ ਦਾ ਵਜੂਦ ਆਜ਼ਾਦੀ ਦੀ ਲੜਾਈ ਨਾਲ ਜੁੜਿਆ ਹੋਣ ਕਰਕੇ ਬਹੁਗਿਣਤੀ ਸੁਤੰਤਰਤਾ ਸੇਨਾਨੀ ਪਰਿਵਾਰਾਂ ਦੀ ਪਿੱਠ ਭੂਮੀ ਕਾਂਗਰਸੀ ਹੈ। ਕੈਪਟਨ ਸਰਕਾਰ ਦੇ ਪਿਛਲੇ ਚਾਰ ਸਾਲਾਂ ’ਚ ਸਨਮਾਨ ਪੈਨਸ਼ਨ ਨਾ ਵਧਣ ਦਾ ਮੁੱਖ ਕਾਰਨ ਮੁੱਖ ਮੰਤਰੀ ਅਤੇ ਵਿੱਤ ਮੰਤਰੀ ਦਾ ਟਕਸਾਲੀ ਕਾਂਗਰਸੀ ਨਾ ਹੋਣਾ ਮੰਨਿਆ ਜਾ ਰਿਹਾ ਹੈ। ਦੋਵੇਂ ਆਗੂ ਅਕਾਲੀ ਪਿੱਠ ਭੂਮੀ ਨਾਲ ਸਬੰਧਤ ਹਨ। 

          ਸੁਤੰਤਰਤਾ ਸੇਨਾਨੀ ਵੈਲਫੇਅਰ ਵਿਭਾਗ ਪੰਜਾਬ ਨੇ ਜੁਲਾਈ 2018 ਵਿੱਚ ਸਨਮਾਨ ਪੈਨਸ਼ਨ ਨੂੰ 75 ਸੌ ਰੁਪਏ ਤੋਂ ਦੁੱਗਣਾ ਕਰਨ ਲਈ ਵਿੱਤ ਵਿਭਾਗ ਨੂੰ ਪ੍ਰਸਤਾਵ ਭੇਜਿਆ ਸੀ। ਵਿੱਤ ਵਿਭਾਗ ਪੌਣੇ ਤਿੰਨ ਸਾਲ ਵੀ ਸਿਰਫ਼ 9400 ਰੁਪਏ ਕਰਨ ਦਾ ਹੌਂਸਲਾ ਕਰ ਸਕਿਆ। ਕੈਪਟਨ ਸਰਕਾਰ ਨੇ ਜਨਵਰੀ 2021 ’ਚ ਐਲਾਨੇ ਨਿਗੁਣੇ ਵਾਧੇ ਨੂੰ ਦੁਬਾਰਾ ਤੋਂ ‘ਚੋਣ’ ਬੱਜਟ ’ਚ ਸ਼ਾਮਲ ਕਰਕੇ ਆਜ਼ਾਦੀ ਯੋਧਿਆਂ ਦੇ ਸਨਮਾਨ ਦੇ ਨਾਂਅ ’ਤੇ ਸਿਆਸੀ ਹਿੱਤ ਸਾਧਣ ਦੀ ਕੋਸ਼ਿਸ਼ ਕੀਤੀ ਹੈ। ਜਦੋਂਕਿ ਹੁੱਡਾ ਸਰਕਾਰ ਨੇ ਦਸ ਸਾਲਾ ਰਾਜ ਵਿੱਚ ਦੋ ਵਾਰੀਆਂ ’ਚ ਸਨਮਾਨ ਪੈਨਸ਼ਨ ਨੂੰ 1435 ਰੁਪਏ ਤੋਂ ਵਧਾ ਕੇ 25 ਹਜ਼ਾਰ ਰੁਪਏ ਕਰ ਦਿੱਤਾ ਸੀ। ਅਮਰਿੰਦਰ ਸਿੰਘ ਸਰਕਾਰ ਨੇ 2017 ਦੇ ਚੋਣ ਮਨੋਰਥ ਪੱਤਰ ਵਿੱਚ ਆਜ਼ਾਦੀ ਯੋਧਿਆਂ ਦੇ ਪਰਿਵਾਰਾਂ ਲਈ ਵੱਡੇ-ਵੱਡੇ ਐਲਾਨ ਕੀਤੇ ਸਨ। ਜਿਹੜੇ ਪੂਰੀ ਤਰਾਂ ਵਫ਼ਾ ਨਾ ਹੋ ਸਕੇ। ਸਨਮਾਨ ਪੈਨਸ਼ਨ ਦੇ ਪਾਤਰ ਹੌਲੀ-ਹੌਲੀ ਘਟ ਰਹੇ ਹਨ। ਇਹ ਸਮੁੱਚਾ ਮਾਮਲਾ ਆਜ਼ਾਦੀ ਜੜਾਂ ਅਤੇ ਭਾਵਨਾਵਾਂ ਨਾਲ ਜੁੜਿਆ ਹੋਇਆ ਹੈ। 

             ਜ਼ਿਕਰਯੋਗ ਹੈ ਕਿ ਸੁਤੰਤਰਤਾ ਸੈਨਾਨੀ ਵੈਲਫੇਅਰ ਵਿਭਾਗ ਪੰਜਾਬ ਦੀ ਹਾਲਤ ਵੀ ਬਿਨਾਂ ਹੱਡੀਆਂ ਵਾਲੇ ਢਾਂਚੇ ਵਾਂਗ ਹੈ। ਵਿਭਾਗ ਵਿੱਚ ਸਿਰਫ਼ ਚਾਰ ਸਹਾਇਕ, ਇੱਕ ਕਲਰਕ ਅਤੇ ਇੱਕ ਚਪੜਾਸੀ ਹੈ। ਸੈਕਸ਼ਨ ਅਫਸਰ ਦੀ ਤਾਇਨਾਤੀ ਇਸੇ ਹਫ਼ਤੇ ਹੋਈ ਦੱਸੀ ਜਾਂਦੀ ਹੈ। ਸਰਕਾਰੀ ਸੂਤਰਾਂ ਅਨੁਸਾਰ ਅਮਲੇ ਦੀ ਮੰਗ ਕਰਨ ’ਤੇ ਸੂਬਾ ਹਕੂਮਤ ਵੱਲੋਂ ਜਵਾਬ ਹੁੰਦਾ ਹੈ ਕਿ ਇਸ ਵਿਭਾਗ ਨੂੰ ਮੁਲਾਜਮਾਂ ਦੀ ਕੀ ਜ਼ਰੂਰਤ ਹੈ। 

         ਹੈਰਾਨੀ ਭਰਿਆ ਵਰਤਾਰਾ ਹੈ ਕਿ ਮੁੱਖ ਮੰਤਰੀ ਪੰਜਾਬ ਲਈ ਦਰਜਨ ਭਰ ਓ.ਐਸ.ਡੀ/ਸਿਆਸੀ ਸਲਾਹਕਾਰਾਂ ਦੀ ਮਹਿੰਗੀਆਂ ਤਨਖ਼ਾਹਾਂ/ਭੱਤਿਆਂ ਵਾਲੀ ਫੌਜ਼ ’ਤੇ ਲੱਖਾਂ ਰੁਪਏ ਦੇ ਬੇਫ਼ਿਜੂਲ ਖਰਚੇ ਜਾ ਰਹੇ ਹਨ। ਮੰਤਰੀ-ਵਿਧਾਇਕਾਂ ਦੀ ਤਨਖ਼ਾਹ ਸਰਬਸੰਮਤੀ ਮਤੇ ਨਾਲ ਪਾਸ ਹੋ ਜਾਂਦੀ ਹੈ। ਜਿਨਾਂ ਆਜ਼ਾਦੀ ਯੋਧਿਆਂ ਦੀਆਂ ਕੁਰਬਾਨੀਆਂ ਸਦਕਾ ਸੱਤਾ-ਸੁੱਖ ਲੈ ਰਹੇ ਸਿਆਸਤਦਾਨਾਂ ਕੋਲ ਉਨਾਂ ਯੋਧਿਆਂ ਦੇ ਪਰਿਵਾਰਾਂ ਲਈ ਢੁੱਕਵੀਂ ਸਨਮਾਨ ਪੈਨਸ਼ਨ ਅਤੇ ਵਿਭਾਗ ਨੂੰ ਸੁਚਾਰੂ ਬਣਾਉਣ ਲਈ ਜਿਗਰਾ ਨਹੀਂ ਹੈ। ਦੂਜੇ ਪਾਸੇ ਪੱਖ ਲੈਣ ਖਾਤਰ ਪੰਜਾਬ ਦੇ ਸੁਤੰਤਰਤਾ ਸੇਨਾਨੀ ਭਲਾਈ ਵਿਭਾਗ ਦੇ ਮੰਤਰੀ ਓ.ਪੀ ਸੋਨੀ ਨਾਲ ਕਈ ਵਾਰ ਰਾਬਤਾ ਕੀਤਾ ਗਿਆ ਪਰ ਉਨਾਂ ਕਾਲ ਰਸੀਵ ਨਹੀਂ ਕੀਤੀ ਗਈ। 

ਪਹਿਲਾਂ ਬੇਹੱਦ ਘੱਟ ਪੈਨਸ਼ਨ, ਹੁਣ ਨਿਗੁਣਾ ਵਾਧਾ ਬੇਹੱਦ ਨਿੰਦਣਯੋਗ 

ਫਰੀਡਮ ਫਾਈਟਰ ਉਤਰਾਧਿਕਾਰੀ ਸੰਗਠਨ ਪੰਜਾਬ ਦੇ ਪ੍ਰਧਾਨ ਹਰਿੰਦਰਪਾਲ ਸਿੰਘ ਖਾਲਸਾ ਦਾ ਕਹਿਣਾ ਸੀ ਕਿ ਪੰਜਾਬ ਦੀ ਆਜ਼ਾਦੀ ਸੰਘਰਸ਼ ’ਚ ਸਭ ਤੋਂ ਵੱਧ ਕੁਰਬਾਨੀ ਹੈ। ਸੂਬੇ ’ਚ ਬੇਹੱਦ ਘੱਟ ਪੈਨਸ਼ਨ ਤੇ ਹੁਣ ਨਿਗੁਣਾ ਵਾਧਾ ਸੁਤੰਤਰਤਾ ਸੇਨਾਨੀ ਪਰਿਵਾਰਾਂ ਦੀਆਂ ਭਾਵਨਾਵਾਂ ਨਾਲ ਖਿਲਵਾੜ ਹੈ। ਦੂਜੇ ਸੂਬਿਆਂ ਦੇ ਮੁਕਾਬਲੇ ਤਿੰਨ ਗੁਣਾ ਘੱਟ ਪੈਨਸ਼ਨ ਨਿੰਦਾਯੋਗ ਹੈ। ਉਨਾਂ ਕੇਂਦਰ ਤੋਂ ਸਾਰੇ ਸੂਬਾ ਸਰਕਾਰ ਵੱਲੋਂ ਦਿੱਤੀ ਜਾਂਦੀ ਸਨਮਾਨ ਪੈਨਸ਼ਨ ਨੂੰ ਇਕਸਾਰ ਕਰਨ ਅਤੇ ਆਜ਼ਾਦੀ ਘੁਲਾਟੀਆਂ ਦੀ ਦੂਸਰੀ ਪੀੜੀ ਨੂੰ ਪੈਨਸ਼ਨ ਦੀ ਮੰਗ ਦੁਹਰਾਈ। 

   

ਹਾਈ-ਪੋ੍ਰਫਾਈਲ ਤਿਆਰੀਆਂ: ਸੁਖਬੀਰ ਦੇ ਲੰਬੀ ਅਤੇ ਬਾਦਲ ਦੇ ਗਿੱਦੜਬਾਹਾ ਚੋਣ ਲੜਨ ਦੇ ਸੰਕੇਤ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਪੰਜਾਬ ਵਿੱਚ ਸੂਬਾਈ ਚੋਣਾਂ ਸਮੇਂ ਤੋਂ ਪਹਿਲਾਂ ਹੋਣ ਦੀਆਂ ਸਿਆਸੀ ਕਣਸੋਆਂ ਨੇ ਸਿਆਸੀ ਪੱਤਿਆਂ ਦੀ ਵਿਉਂਤਬੰਦੀ ਸ਼ੁਰੂ ਕਰਵਾ ਦਿੱਤੀ ਹੈ। ਅਕਾਲੀ ਦਲ ਦੀਆਂ ਹਾਈ-ਪੋ੍ਰਫਾਈਲ ਤਿਆਰੀਆਂ ਦੇ ਅੰਦਾਜ਼ ਤੋਂ ਲੰਬੀ ਸੀਟ ਤੋਂ ਇਸ ਵਾਰ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਵੱਲੋਂ ਚੋਣ ਲੜਨ ਦੇ ਸੰਕੇਤ ਮਿਲਦੇ ਹਨ। ਪਾਰਟੀ ਦੀ ਰਣਨੀਤੀ ਤਹਿਤ ਪਿੰਡਾਂ ’ਚ ਹਰੇਕ ਇੱਕ ਸੌ ਵੋਟ ’ਤੇ ਇੱਕ ਇੰਚਾਰਜ਼ ਥਾਪਿਆ ਹੈ। ਸੌ ਵੋਟਾਂ ਵਿੱਚੋਂ ਘਟਣ-ਵਧਣ ਲਈ ਇੰਚਾਰਜ਼ ਜੁੰਮੇਵਾਰ ਹੋਵੇਗਾ। ਜਿੱਤ ਦਾ ਅੰਤਰ ਦੁੱਗਣਾ ਕਰਨ ਲਈ ਹੁਣ ਖੁਦ ਸੁਖਬੀਰ ਸਿੰਘ ਬਾਦਲ ਸਰਗਰਮੀ ਨਾਲ ਜਥੇਬੰਦਕ ਹਾਲਾਤਾਂ ’ਚ ਨਵਾਂ ਸ਼ਕਤੀ ਸੰਚਾਰ ’ਚ ਜੁਟੇ ਹੋਏ ਹਨ। ਉਨਾਂ ਅੱਜ ਬਾਦਲ ਪਿੰਡ ਰਿਹਾਇਸ਼ ’ਤੇ ਹਲਕੇ ਦੇ 22 ਪਿੰਡਾਂ ਦੀਆਂ ਚੋਣ ਬੂਥ ਕਮੇਟੀਆਂ ਨਾਲ ਵੱਖ-ਵੱਖ ਮੀਟਿੰਗਾਂ ਕੀਤੀਆਂ। ਸੁਖਬੀਰ ਸਿੰਘ ਦੇ ਜਲਾਲਾਬਾਦ ਦੀ ਬਜਾਇ ਲੰਬੀ ਤੋਂ ਮੈਦਾਨ ’ਚ ਉੱਤਰਨ ਦੀ ਸੂਰਤ ਵਿੱਚ 93 ਸਾਲਾ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਗਿੱਦੜਬਾਹਾ ਹਲਕੇ ਤੋਂ ਚੋਣ ਲੜਨ ਦੇ ਕਿਆਸ ਲਗਾਏ ਜਾ ਰਹੇ ਹਨ। ਪਿੱਛੇ ਜਿਹੇ ਅਕਾਲੀ ਦਲ ਪ੍ਰਧਾਨ ਨੇ ਵੀ ਅਗਾਮੀ ਸੂਬਾਈ ਚੋਣਾਂ ਪ੍ਰਕਾਸ਼ ਸਿੰਘ ਬਾਦਲ ਦੇ ਅਗਵਾਈ ਲੜਨ ਦੀ ਗੱਲ ਆਖੀ ਸੀ।

ਦੱਸਿਆ ਜਾ ਰਿਹਾ ਕਿ ਗਿੱਦੜਬਾਹਾ ’ਚ ਪ੍ਰਕਾਸ਼ ਸਿੰਘ ਬਾਦਲ ਦੀ ਸੱਤ-ਅੱਠ ਵਾਰ ਦੀ ਵਿਧਾਇਕੀ ਵਾਲਾ ਪ੍ਰਭਾਵ ਅਤੇ ਸਨੇਹ ਫੈਕਟਰ ਚੋਣ ਮਾਹੌਲ ਨੂੰ ਨਵੀਂ ਰੰਗਤ ਦੇ ਸਕਦਾ ਹੈ। ਸੁਖਬੀਰ ਸਿੰਘ ਬਾਦਲ ਦੇ ਲੰਬੀ ਤੋਂ ਚੋਣ ਲੜਨ ਨਾਲ ਉਨਾਂ ਨੂੰ ਸੂਬੇ ’ਚ ਪ੍ਰਚਾਰ ਕਰਨ ਲਈ ਜ਼ਿਆਦਾ ਸਮਾਂ ਮਿਲ ਸਕਦਾ ਹੈ। ਜ਼ਿਕਰਯੋਗ ਹੈ ਕਿ ਪਿਛਲੇ ਸੂਬਾਈ ਚੋਣਾਂ ਮੌਕੇ ਪੰਜਾਬ ਦੇ ਇਤਿਹਾਸ ’ਚ ਸਭ ਤੋਂ ਵਕਾਰੀ ਚੋਣ ’ਚ ਮੌਜੂਦਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੂੰ ਲੰਬੀ ਹਲਕੇ ’ਚ ਪ੍ਰਕਾਸ਼ ਸਿੰਘ ਬਾਦਲ ਮੂਹਰੇ 22770 ਵੋਟਾਂ ਦੇ ਨਾਮੋਸ਼ੀ ਭਰੀ ਹਾਰ ਝੱਲਣੀ ਪਈ ਸੀ। ਪਿਛਲੇ ਚਾਰ ਸਾਲਾਂ ’ਚ ਅਮਰਿੰਦਰ ਸਿੰਘ ਦਾ ਚੋਣ ਹਲਕਾ ਹੋਣ ਦੇ ਬਾਵਜੂਦ ਕਾਂਗਰਸ ਸਰਕਾਰ ਅਤੇ ਹਾਈਕਮਾਂਡ ਦੀ ਲੰਬੀ ਹਲਕੇ ਦੇ ਕਾਂਗਰਸੀ ਕਾਡਰ ਪ੍ਰਤੀ ਸਪੱਸ਼ਟ ਬੇਰੁੱਖੀ ਝਲਕਦੀ ਰਹੀ। ਲੰਬੀ ਹਲਕੇ ’ਚ ਸੀਨੀਅਰ ਕਾਂਗਰਸ ਆਗੂ ਮਹੇਸ਼ਇੰਦਰ ਸਿੰਘ ਬਾਦਲ ਦੀ ਸਿਆਸਤ ਵਿੱਚੋਂ ਚੁੱਪੀ ਕਾਰਨ ਕਾਂਗਰਸੀ ਸੋਚ ਵਾਲੀ ਸੁਚੱਜੀ ਲੀਡਰਸ਼ਿਪ ਦੀ ਥੁੜ ਨੇ ਕਾਂਗਰਸ ਵਰਕਰਾਂ ਦੇ ਮਨ ਬੁਝਾਏ ਹੋਏ ਹਨ। ਜਿਸਦਾ ਸੌ ਫ਼ੀਸਦੀ ਲਾਹਾ ਅਕਾਲੀ ਦਲ ਦੀ ਵਿਉਂਤਬੱਧ ਰਣਨੀਤੀ ਨੂੰ ਮਿਲਣਾ ਯਕੀਨੀ ਜਾਪਦਾ ਹੈ। ਪਿਛਲੇ ਤਿੰਨ ਹਫ਼ਤਿਆਂ ਤੋਂ ਲੰਬੀ ਦੇ ਵਿਧਾਇਕ-ਕਮ-ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੀ ਸਨੇਹੀਆਂ ਅਤੇ ਪਾਰਟੀ ਆਗੂਆਂ ਨਾਲ ਖੁਸ਼ੀ-ਗਮੀ ਦੀਆਂ ਸਾਂਝਾਂ ਨਿਭਾਉਣ ਲਈ ਪਹੁੰਚਣ ਲੱਗੇ ਹਨ। ਸੁਖਬੀਰ ਬਾਦਲ ਬੀਤੇ ਚਾਰ ਮਹੀਨਿਆਂ ’ਚ ਯੂਥ ਅਕਾਲੀ ਦਲ ਹਲਕਾ ਲੰਬੀ ਦੇ ਕਾਡਰ ਨਾਲ ਤਿੰਨ ਮੀਟਿੰਗਾਂ ਕਰ ਚੁੱਕੇ ਹਨ। ਯੂਥ ਅਕਾਲੀ ਦਲ ਦੇ ਪੰਜਾਹ-ਪੰਜਾਹ ਸਰਗਰਮ ਯੂਥ ਵਿੰਗ ਵਰਕਰਾਂ ਦੇ 19 ਜੋਨ ਬਣ ਹਲਕੇ ਭਰ ’ਚ 950 ਕਾਰਕੁੰਨ ਦਾ ਜ਼ਥੇਬੰਦਕ ਜਾਲ ਵਿਛਾ ਦਿੱਤਾ ਹੈ। ਜਦੋਂਕਿ ਵੱਡੀ ਕਾਂਗਰਸ ਦੇ ਨਾਲ ਯੂਥ ਕਾਂਗਰਸ ਵੀ ਲਗਭਗ ’ਚ ਠੰਡੇ ਬਸਤੇ ਪਈ ਹੋਈ ਵਿਖਾਈ ਦਿੰਦੀ ਹੈ। ਸੂਤਰਾਂ ਅਨੁਸਾਰ ਲੰਬੀ ਹਲਕੇ ਤੋਂ ਕਾਂਗਰਸ ਪਾਰਟੀ ਵੱਲੋਂ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਫਰਜੰਦ ਫਤਿਹ ਸਿੰਘ ਬਾਦਲ ਦੇ ਚੋਣ ਮੈਦਾਨ ’ਚ ਉੱਤਰਨ ਦੀ ਤਿਆਰੀ ਜਾਪਦੀ ਹੈ। ਅਕਾਲੀ ਦਲ ਦੇ ਸੂਤਰਾਂ ਅਨੁਸਾਰ ਸੁਖਬੀਰ ਵੱਲੋਂ ਲੰਬੀ ਹਲਕੇ ਦੀਆਂ ਬੂਥ ਕਮੇਟੀਆਂ ਨਾਲ ਮੀਟਿੰਗ ਦਾ ਦੌਰ ਦੋ ਦਿਨ ਹੋਰ ਚੱਲੇਗਾ। ਇਨਾਂ ਮੀਟਿੰਗਾਂ ’ਚ 15 ਤੋਂ 35 ਤੱਕ ਵਰਕਰ ਹੁੰਦੇ ਹਨ। ਇਸ ਮੌਕੇ ਅਕਾਲੀ ਦਲ ਦੇ ਮੁਖੀ ਇਕੱਲੇ-ਇਕੱਲੇ ਵਰਕਰ ਨਾਲ ਫੋਟੋਆਂ ਖਿਚਵਾ ਉਨਾਂ ਦੇ ਜੋਸ਼ ਨੂੰ ਦੁੱਗਣਾ ਕਰ ਰਹੇ ਹਨ। ਜਾਣਕਾਰੀ ਅਨੁਸਾਰ ਇਹ ਫੋਟੋਆਂ ਫਰੇਮ ’ਚ ਜੜਾਅ ਕੇ ਜਥੇਬੰਦਕ ਢਾਂਚੇ ਵੱਲੋਂ ਵਰਕਰਾਂ ਨੂੰ ਗਿਫ਼ਟ ਕੀਤੀਆਂ ਜਾਣਗੀਆਂ । 

Mobile : 93178-26100

ਪੰਜਾਬ ਮੰਤਰੀ ਮੰਡਲ ਵੱਲੋਂ ਨਵੀਂ ਵੈਬ ਚੈਨਲ ਨੀਤੀ ਨੂੰ ਪ੍ਰਵਾਨਗੀ

ਇਕਬਾਲ ਸਿੰਘ ਸ਼ਾਂਤ / ਬੁਲੰਦ ਸੋਚ ਬਿਊਰੋ

ਚੰਡੀਗੜ੍ਹ, 19 ਫਰਵਰੀ : ਪੰਜਾਬ ਮੰਤਰੀ ਮੰਡਲ ਵੱਲੋਂ  ਸੋਸ਼ਲ ਮੀਡੀਆ ਨੂੰ ਸੰਚਾਰ ਦੇ ਬੇਹੱਦ ਤਕੜੇ ਮਾਧਿਅਮ ਵਜੋਂ ਉਭਰਨ ਨੂੰ ਜ਼ੇਰੇ ਗੌਰ ਲੈਂਦੇ ਹੋਏ ਮੰਤਰੀ ਮੰਡਲ ਵੱਲੋਂ ਸੂਚਨਾ ਅਤੇ ਲੋਕ ਸੰਪਰਕ ਵਿਭਾਗ ਦੀ ਨਵੀਂ ਵੈਬ ਚੈਨਲ ਨੀਤੀ ਨੂੰ ਪ੍ਰਵਾਨਗੀ ਦੇ ਦਿੱਤੀ ਗਈ ਤਾਂ ਜੋ ਮੋਹਰੀ ਖਬਰ ਵੈਬ ਚੈਨਲਾਂ ਨੂੰ ਸੂਚੀਬੱਧ ਕੀਤਾ ਜਾ ਸਕੇ ਅਤੇ ਇਨ੍ਹਾਂ ਨੂੰ ਇਸ਼ਤਿਹਾਰ ਜਾਰੀ ਕੀਤੇ ਜਾ ਸਕਣ। 

           ਸੂਚਨਾ ਅਤੇ ਲੋਕ ਸੰਪਰਕ ਵਿਭਾਗ ਵੱਲੋਂ ਪੰਜਾਬ ਸਰਕਾਰ ਦੀਆਂ ਨੀਤੀਆਂ ਅਤੇ ਪ੍ਰਾਪਤੀਆਂ ਦਾ ਪ੍ਰਚਾਰ ਕਰਨ ਵਿੱਚ ਅਹਿਮ ਭੂਮਿਕਾ ਨਿਭਾਈ ਜਾਂਦੀ ਹੈ। ਹਾਲੇ ਤੱਕ ਵਿਭਾਗ ਵੱਲੋਂ ਪ੍ਰਦਰਸ਼ਨੀਆਂ, ਗੀਤ ਤੇ ਨਾਟਕ ਅਤੇ ਸਿਨੇਮਾ ਆਦਿ ਵਰਗੇ ਰਵਾਇਤੀ ਮਾਧਿਅਮਾਂ ਦਾ ਸਹਾਰਾ ਲਿਆ ਜਾਂਦਾ ਸੀ, ਪਰ ਸਮਾਂ ਬੀਤਣ ਦੇ ਨਾਲ ਪ੍ਰਿੰਟ ਰਸਾਲਿਆਂ ਅਤੇ ਇਲੈਕਟ੍ਰਾਨਿਕ ਜਿਵੇਂ ਕਿ ਟੀ.ਵੀ. ਅਤੇ ਰੇਡਿਓ ਦੀ ਮਹੱਤਤਾ ਬਹੁਤ ਵਧ ਗਈ ਹੈ।

             ਸ਼ਹਿਰੀ ਸਥਾਨਕ ਸਰਕਾਰਾਂ ਦੇ ਕੰਮ-ਕਾਜ ਨੂੰ ਹੋਰ ਸੁਚਾਰੂ ਢੰਗ ਨਾਲ ਚਲਾਉਣ ਲਈ ਕੈਪਟਨ ਅਮਰਿੰਦਰ ਸਿੰਘ ਦੀ ਅਗਵਾਈ ਵਾਲੇ ਪੰਜਾਬ ਮੰਤਰੀ ਮੰਡਲ ਵੱਲੋਂ ਸ਼ੁੱਕਰਵਾਰ ਨੂੰ ਸਮੂਹ ਜ਼ਿਲ੍ਹਾ ਮੁੱਖ ਦਫਤਰਾਂ ਵਿਖੇ ਵਧੀਕ ਡਿਪਟੀ ਕਮਿਸ਼ਨਰ (ਸ਼ਹਿਰੀ ਵਿਕਾਸ) ਦੀਆਂ 22 ਅਸਾਮੀਆਂ ਸਿਰਜੇ ਜਾਣ ਨੂੰ ਮਨਜ਼ੂਰੀ ਦੇ ਦਿੱਤੀ ਹੈ ਜੋ ਕਿ ਖੇਤਰੀ ਡਿਪਟੀ ਡਾਇਰੈਕਟਰਾਂ ਦੀ ਥਾਂ ਲੈਣਗੇ।

             ਇਸ ਦੀ ਪ੍ਰਵਾਨਗੀ ਤੋਂ ਬਾਅਦ ਮੌਜੂਦਾ ਸਮੇਂ ਏ.ਡੀ.ਸੀ. (ਵਿਕਾਸ) ਦੀਆਂ ਅਸਾਮੀਆਂ ਦਾ ਨਾਂ ਬਦਲ ਕੇ ਏ.ਡੀ.ਸੀ. (ਪੇਂਡੂ ਵਿਕਾਸ) ਕਰ ਦਿੱਤਾ ਗਿਆ ਹੈ। ਇਨ੍ਹਾਂ ਏ.ਡੀ.ਸੀਜ਼ ਨੂੰ ਪੰਜਾਬ ਮਿਉਂਸਪਲ ਐਕਟ, 1911 ਅਤੇ ਪੰਜਾਬ ਰਿਜ਼ਨਲ ਐਂਡ ਟਾਊਨ ਪਲਾਨਿੰਗ ਐਂਡ ਡਿਵੈਲਪਮੈਂਟ ਐਕਟ, 1995 ਤਹਿਤ ਅਧਿਕਾਰ ਹਾਸਲ ਹੋਣਗੇ।

             ਮੰਤਰੀ ਮੰਡਲ ਵੱਲੋਂ ਮੁੱਖ ਮੰਤਰੀ ਨੂੰ ਏ.ਡੀ.ਸੀ. (ਸ਼ਹਿਰੀ ਵਿਕਾਸ) ਨੂੰ ਸੌਂਪੀਆਂ ਜਾਣ ਵਾਲੀਆਂ ਜ਼ਿੰਮੇਵਾਰੀਆਂ ਬਾਰੇ, ਪੰਜਾਬ ਰਿਜ਼ਨਲ ਐਂਡ ਟਾਊਨ ਪਲਾਨਿੰਗ ਐਂਡ ਡਿਵੈਲਪਮੈਂਟ ਐਕਟ, 1995 ਅਤੇ ਇਸ ਸਬੰਧੀ ਹੋਰ ਸਾਰੇ ਪ੍ਰਸ਼ਾਸਕੀ ਮਸਲਿਆਂ ਬਾਰੇ ਵੀ ਬਿਨਾਂ ਮੰਤਰੀ ਮੰਡਲ ਸਾਹਮਣੇ ਰੱਖਿਆਂ ਕੋਈ ਵੀ ਅੰਤਿਮ ਫੈਸਲਾ ਲੈਣ ਬਾਰੇ ਅਧਿਕਾਰ ਦਿੱਤੇ ਗਏ। ਪਰ, ਵਿੱਤ, ਸਥਾਨਕ ਸਰਕਾਰ ਅਤੇ ਮਕਾਨ ਉਸਾਰੀ ਅਤੇ ਸ਼ਹਿਰੀ ਵਿਕਾਸ ਵਿਭਾਗਾਂ ਨਾਲ ਸਲਾਹ-ਮਸ਼ਵਰਾ ਕਰਨਾ ਹੋਵੇਗਾ।

              ਨਾਨ-ਟੀਚਿੰਗ ਕਲੈਰੀਕਲ ਅਮਲੇ ਦੀ ਤਰੱਕੀ ਦਾ ਰਾਹ ਪੱਧਰਾ: ਸਕੂਲ ਸਿੱਖਿਆ ਵਿਭਾਗ ਦੇ ਕਲੈਰੀਕਲ ਅਮਲੇ ਦੀ ਚਿਰੋਕਣੀ ਮੰਗ ਨੂੰ ਪੂਰਾ ਕਰਦਿਆਂ ਮੰਤਰੀ ਮੰਡਲ ਵੱਲੋਂ ਕਲੈਰੀਕਲ ਅਮਲੇ ਜਿਵੇਂ ਕਿ ਕਲਰਕ, ਜੂਨੀਅਰ ਸਹਾਇਕ, ਸਟੈਨੋ-ਟਾਈਪਿਸਟ ਅਤੇ ਜੂਨੀਅਰ ਸਕੇਲ ਸਟੈਨੋਗ੍ਰਾਫਰ ਜੋ ਕਿ ਮਾਸਟਰ/ਮਿਸਟ੍ਰੈਸ ਦੇ ਕਾਡਰ ਵਿੱਚ ਨਾਨ-ਟੀਚਿੰਗ ਸਟਾਫ ਵਜੋਂ ਕੰਮ ਕਰਦੇ ਹਨ, ਨੂੰ 1 ਫੀਸਦੀ ਤਰੱਕੀ ਕੋਟਾ ਮੁਹੱਈਆ ਕੀਤੇ ਜਾਣ ਲਈ ਲੋੜੀਂਦੇ ਨਿਯਮਾਂ ਵਿੱਚ ਸੋਧ ਨੂੰ ਮਨਜ਼ੂਰੀ ਦੇ ਦਿੱਤੀ ਗਈ। ਇਨ੍ਹਾਂ ਸਟਾਫ ਮੈਂਬਰਾਂ ਨੂੰ ਹੁਣ ਲਾਇਬ੍ਰੇਰੀਅਨ, ਸਹਾਇਕ ਲਾਇਬ੍ਰੇਰੀਅਨ, ਲਾਇਬ੍ਰੇਰੀ ਰੈਸਟੋਰਰ ਅਤੇ ਸੀਨੀਅਰ ਲੈਬਾਰੇਟਰੀ ਅਟੈਂਡੈਂਟ ਦੇ ਬਰਾਬਰ ਤਰੱਕੀਆਂ 'ਚ ਕੋਟਾ ਮਿਲੇਗਾ। ਧਿਆਨਦੇਣ ਯੋਗ ਹੈ ਕਿ ਉਪਰੋਕਤ ਨਿਯਮਾਂ ਵਿੱਚ ਸੋਧ ਕੀਤੀ ਗਈ ਸੀ ਤਾਂ ਜੋ ਨਾਨ-ਟੀਚਿੰਗ ਸਟਾਫ ਜਿਵੇਂ ਕਿ ਲਾਇਬ੍ਰੇਰੀਅਨ, ਸਹਾਇਕ ਲਾਇਬ੍ਰੇਰੀਅਨ, ਲਾਇਬ੍ਰੇਰੀ ਰੈਸਟੋਰਰ ਅਤੇ ਸੀਨੀਅਰ ਲੈਬਾਰੇਟਰੀ ਅਟੈਂਡੈਂਟ ਦੇ ਅਹੁਦੇ 'ਤੇ 19 ਦਸੰਬਰ, 2019 ਨੂੰ ਕੰਮ ਕਰਦੇ ਵਿਅਕਤੀਆਂ ਤੋਂ ਮਾਸਟਰ ਕਾਡਰ ਵਿੱਚ 1 ਫੀਸਦੀ ਤਰੱਕੀ ਕੋਟਾ ਯਕੀਨੀ ਬਣਾਇਆ ਜਾ ਸਕੇ।

            ਸੈਕਸ਼ਨ ਅਫਸਰਾਂ ਦੀ ਵਿਭਾਗੀ ਪ੍ਰੀਖਿਆ ਲਈ ਸਮੇਂ 'ਚ ਛੋਟ ਨੂੰ ਕਾਰਜ-ਬਾਅਦ ਪ੍ਰਵਾਨਗੀ: ਮੰਤਰੀ ਮੰਡਲ ਵੱਲੋਂ ਸੈਕਸ਼ਨ ਅਫਸਰਾਂ ਦੀ ਵਿਭਾਗੀ ਪ੍ਰੀਖਿਆ ਕਰਵਾਉਣ ਲਈ ਨਿਰਧਾਰਤ ਡੇਢ ਸਾਲ ਦੇ ਵਕਫੇ ਵਿੱਚ ਛੋਟ ਦੇਣ ਨੂੰ ਕਾਰਜ-ਬਾਅਦ ਪ੍ਰਵਾਨਗੀ ਦੇ ਦਿੱਤੀ ਗਈ ਹੈ ਅਤੇ ਇਸ ਪ੍ਰੀਖਿਆ ਨੂੰ ਤੀਜੀ ਵਾਰ ਕਰਵਾਉਣ ਲਈ 31 ਦਸੰਬਰ, 2020 ਤੱਕ ਇੱਕ ਵਾਰ ਦੀ ਛੋਟ ਦੀ ਇਜਾਜ਼ਤ ਦਿੱਤੀ ਗਈ ਹੈ। ਜ਼ਿਕਰਯੋਗ ਹੈ ਕਿ ਵਿੱਤ ਵਿਭਾਗ ਵੱਲੋਂ ਸਿੱਧੀ ਭਰਤੀ ਕੋਟੇ ਰਾਹੀਂ ਦਸੰਬਰ, 2018 ਵਿੱਚ ਪੀ.ਪੀ.ਐਸ.ਸੀ ਰਾਹੀਂ 42 ਸੈਕਸ਼ਨ ਅਫਸਰ ਭਰਤੀ ਕੀਤੇ ਗਏ ਸਨ। ਇਨ੍ਹਾਂ ਲਈ ਆਪਣੀ ਨਿਯੁਕਤੀ ਤੋਂ ਡੇਢ ਵਰ੍ਹੇ ਦੇ ਸਮੇਂ ਅੰਦਰ ਤਿੰਨ ਕੋਸ਼ਿਸ਼ਾਂ ਵਿੱਚ ਵਿਭਾਗੀ ਪ੍ਰੀਖਿਆ ਪਾਸ ਕਰਨੀ ਜ਼ਰੂਰੀ ਹੁੰਦੀ ਹੈ।

           ਇਸ ਲਈ ਪਹਿਲੀ ਵਿਭਾਗੀ ਪ੍ਰੀਖਿਆ ਅਗਸਤ, 2019 ਵਿੱਚ ਲਈ ਗਈ ਜਿਸ ਵਿੱਚ ਕੋਈ ਸੈਕਸ਼ਨ ਅਫਸਰ ਪਾਸ ਨਹੀਂ ਹੋਇਆ। ਦੂਜੀ ਵਾਰ ਮਾਰਚ, 2020 ਵਿੱਚ ਲਈ ਗਈ ਪ੍ਰੀਖਿਆ ਵਿੱਚ 41 ਵਿਚੋਂ ਸਿਰਫ 5 ਸੈਕਸ਼ਨ ਅਫਸਰ ਹੀ ਪਾਸ ਹੋਏ ਜਦੋਂ ਕਿ ਇੱਕ ਨੇ ਅਸਤੀਫਾ ਦੇ ਦਿੱਤਾ। ਤੀਸਰੀ ਵਾਰ ਪ੍ਰੀਖਿਆ 31 ਮਈ, 2020 ਨੂੰ ਲਈ ਜਾਣੀ ਸੀ ਪਰ ਕੋਵਿਡ-19 ਕਾਰਨ ਪੰਜਾਬ ਸਰਕਾਰ ਵੱਲੋਂ ਮਾਰਚ 23, 2020 ਤੋਂ ਲੈ ਕੇ ਮਈ 31, 2020 ਤੱਕ ਕਰਫਿਊ/ਲਾਕਡਾਊਨ ਲਾਏ ਜਾਣ ਕਰਕੇ ਇਹ ਪ੍ਰੀਖਿਆ ਦਸੰਬਰ 5-6, 2020 ਨੂੰ ਲਈ ਗਈ ਜਿਸ ਵਿੱਚ 36 ਵਿਚੋਂ 13 ਅਫਸਰ ਪਾਸ ਹੋਏ।

ਇਟਲੀ ’ਚ ਰਹਿੰਦੇ ਪੰਜਾਬੀ ਨੇ ਕਿਸਾਨ ਸੰਘਰਸ਼ ਲਈ ਭੇਜਿਆ ਸਾਊਂਡ ਸਿਸਟਮ

ਲੰਬੀ, 1 ਫਰਵਰੀ (ਇਕਬਾਲ ਸਿੰਘ ਸ਼ਾਂਤ)-ਕਿਸਾਨ ਸੰਘਰਸ਼ ਦੀ ਅਵਾਜ਼ ਬੁਲੰਦ ਰੱਖਣ ਲਈ ਵਿਦੇਸ਼ਾਂ ’ਚ ਵਸਦੇ ਪਰਵਾਸੀ ਪੰਜਾਬੀ ਆਪਣੇ ਵੱਲੋਂ ਕੋਈ ਕਸਰ ਨਹੀਂ ਛੱਡ ਰਹੇ। ਇਟਲੀ ’ਚ ਰਹਿੰਦੇ ਜਸਪ੍ਰੀਤ ਸਿੰਘ ਵਾਸੀ ਗੱਗੜ (ਹਲਕਾ ਲੰਬੀ) ਨੇ ਭਾਕਿਯੂ ਏਕਤਾ ਉਗਰਾਹਾਂ ਦੀ ਬਲਾਕ ਲੰਬੀ ਸ਼ਾਖਾ ਨੂੰ ਸਾਊਂਡ ਸਿਸਟਮ ਲਈ ਮਾਲੀ ਮੱਦਦ ਭੇਜੀ ਹੈ। ਉਸਦੇ ਪਿਤਾ ਗੁਰਜੰਟ ਸਿੰਘ ਗੱਗੜ ਨੇ ਕਿਸਾਨੀ ਦੀ ਆਵਾਜ਼ ਨੂੰ ਹੋਰ ਸੁਚੱਜਿਆਂ ਸਰਕਾਰ ਤੱਕ ਪਹੁੰਚਾਉਣ ਲਈ ਇੱਕ ਉਮਦਾ ਕੰਪਨੀ ਦਾ ਸਾਊਂਡ ਸਿਸਟਮ ਭਾਕਿਯੂ ਦੇ ਬਲਾਕ ਪ੍ਰਧਾਨ ਗੁਰਪਾਸ਼ ਸਿੰਘੇਵਾਲਾ ਅਤੇ ਉੱਘੇ ਆਗੂ ਜਗਸੀਰ ਸਿੰਘ ਗੱਗੜ ਅਤੇ ਤਰਸੇਮ ਮਿਠੜੀ ਨੂੰ ਸੌਂਪਿਆ। ਕਿਸਾਨ ਜਗਸੀਰ ਗੱਗੜ ਨੇ ਜਸਪ੍ਰੀਤ ਸਿੰਘ ਅਤੇ ਪਰਿਵਾਰ ਨੂੰ ਤਹਿਦਿਲੋਂ ਧੰਨਵਾਦ ਕੀਤਾ। ਇਸ ਮੌਕੇ ਬਲਵਿੰਦਰ ਸਿੰਘ ਗੱਗੜ, ਸੁਖਦੇਵ ਸਿੰਘ ਗੱਗੜ ਅਤੇ ਮਲਕੀਤ ਸਿੰਘ ਗੱਗੜ ਅਤੇ ਜਸਪਾਲ ਕੌਰ ਵੀ ਮੌਜੂਦ ਸਨ।

ਖੇਤ ਮਜ਼ਦੂਰਾਂ ਵੱਲੋਂ ਖੇਤੀ ਕਾਨੂੰਨਾਂ ਖਿਲਾਫ਼ 19 ਨੂੰ ਲੰਬੀ 'ਚ ਜ਼ਿਲ੍ਹਾ ਕਾਨਫਰੰਸ ਐਲਾਨ

ਲੰਬੀ, 1 ਫਰਵਰੀ (ਇਕਬਾਲ ਸਿੰਘ ਸ਼ਾਂਤ)-ਖੇਤੀ ਕਾਨੂੰਨਾਂ ਖਿਲਾਫ਼ ਚੱਲ ਰਹੇ ਸੰਘਰਸ਼ ਨੂੰ ਤਕੜਾਈ ਦੇਣ ਲਈ ਵਿਸ਼ਾਲ ਖੇਤ ਮਜ਼ਦੂਰ ਜਨਤਾ ਨੂੰ ਇਸ ਘੋਲ ਦਾ ਹਿੱਸਾ ਬਨਾਉਣ ਲਈ ਪੰਜਾਬ ਖੇਤ ਮਜ਼ਦੂਰ ਯੂਨੀਅਨ ਦੇ ਸੂਬਾਈ ਸੱਦੇ ਤੇ 19 ਫਰਵਰੀ ਨੂੰ ਲੰਬੀ ਵਿਖੇ ਕੀਤੀ ਜਾਣ ਵਾਲੀ ਜ਼ਿਲ੍ਹਾ ਪੱਧਰੀ ਵਿਸ਼ਾਲ ਕਾਨਫਰੰਸ ਦੀਆਂ ਤਿਆਰੀਆਂ ਸਬੰਧੀ ਲੰਬੀ ਬਲਾਕ ਦੇ ਵੱਖ-ਵੱਖ ਪਿੰਡਾਂ 'ਚ ਆਏ ਆਗੂਆਂ ਦੀ ਮੀਟਿੰਗ ਕੀਤੀ ਗਈ। ਮੀਟਿੰਗ ਨੂੰ ਯੂਨੀਅਨ ਦੇ ਸੂਬਾ ਜਨਰਲ ਸਕੱਤਰ ਲਛਮਣ ਸਿੰਘ ਸੇਵੇਵਾਲਾ , ਬਲਾਕ ਪ੍ਰਧਾਨ ਕਾਲਾ ਸਿੰਘ ਤੇ ਗੁਰਮੇਲ ਕੌਰ ਨੇ ਸੰਬੋਧਨ ਕੀਤਾ। ਬੁਲਾਰਿਆਂ ਨੇ ਆਖਿਆ ਕਿ ਖੇਤ ਮਜ਼ਦੂਰ ਕਿਸਾਨ ਲਹਿਰ ਦਾ ਸਭ ਤੋਂ ਜ਼ਿਆਦਾ ਲੁੱਟਿਆ ਪੁੱਟਿਆ ਤੇ ਜੁਝਾਰ ਅੰਗ ਹੈ ਅਤੇ ਖੇਤੀ ਖੇਤਰ 'ਚ ਹੁੰਦੀਂ ਹਰ ਤਬਦੀਲੀ ਉਹਨਾਂ ਦੀ ਜ਼ਿੰਦਗੀ ਨੂੰ ਬੇਹੱਦ ਪ੍ਰਭਾਵਿਤ ਕਰਦੀ ਹੈ ਇਉਂ ਹੀ ਮੋਦੀ ਸਰਕਾਰ ਵਲੋਂ ਲਿਆਂਦੇ ਖੇਤੀ ਕਾਨੂੰਨ ਖੇਤ ਮਜ਼ਦੂਰ ਦੇ ਰੁਜ਼ਗਾਰ ਨੂੰ ਛਾਗਣ,ਜਨਤਕ ਵੰਡ ਪ੍ਰਣਾਲੀ ਦਾ ਭੋਗ ਪਾਉਣ ਅਤੇ ਖੁਰਾਕੀ ਵਸਤਾਂ ਦੀ ਮਹਿੰਗਾਈ ਵਧਾਉਣ ਦਾ ਸਾਧਨ ਬਣਨਗੇ। ਉਹਨਾਂ ਕਿਹਾ ਕਿ ਮੋਦੀ ਸਰਕਾਰ ਵਲੋਂ 26 ਜਨਵਰੀ ਦੀਆਂ ਘਟਨਾਵਾਂ ਬਹਾਨੇ ਕਿਸਾਨੀ ਘੋਲ਼ ਨੂੰ ਫ਼ਿਰਕੂ ਰੰਗਤ ਦੇ ਕੇ ਕਿਸਾਨ ਮੋਰਚਿਆਂ ਉੱਤੇ ਵਿੱਢਿਆ ਫਿਰਕੂ ਫਾਸ਼ੀ ਹੱਲੇ ਦੀ ਨਿੰਦਾ ਕਰਦਿਆਂ ਦਿਨੋ-ਦਿਨ ਵਧ ਰਹੇ ਕਿਸਾਨ ਸੰਘਰਸ਼ ਨੂੰ ਤਾਰਪੀਡੋ ਕਰਨ ਦੀ ਕੋਝੀ ਚਾਲ ਕਰਾਰ ਦਿੱਤਾ । ਉਹਨਾਂ ਕਿਹਾ ਕਿ ਕਾਨਫਰੰਸ ਦੌਰਾਨ ਖੇਤ ਮਜ਼ਦੂਰਾਂ ਨੂੰ ਖੇਤੀ ਕਾਨੂੰਨਾਂ ਤੇ ਜਾਤਪਾਤੀ ਵਿਤਕਰੇ ਤੇ ਜ਼ਬਰ ਦੇ ਖਿਲਾਫ ਡਟਣ ਦਾ ਸੱਦਾ ਦਿੱਤਾ ਜਾਵੇਗਾ। ਉਹਨਾਂ ਕਿਹਾ ਕਿ ਮੋਦੀ ਸਰਕਾਰ ਵੱਲੋਂ ਇੱਕ ਹੱਥ ਸੰਸਾਰੀਕਰਨ, ਉਦਾਰੀਕਰਨ ਤੇ ਨਿੱਜੀਕਰਨ ਦੀਆਂ ਨੀਤੀਆਂ ਨੂੰ ਤੇਜ਼ੀ ਨਾਲ ਲਾਗੂ ਕਰਨ ਲਈ ਕਦਮ ਚੁੱਕੇ ਜਾ ਰਹੇ ਹਨ ਅਤੇ ਦੂਜੇ ਪਾਸੇ ਦੇਸ਼ ਦੇ ਅੰਦਰ ਵੰਡੀਆਂ ਦੀ ਸਿਆਸਤ ਖੇਡਦੇ ਹੋਏ ਦਲਿਤਾਂ ਤੇ ਮੁਸਲਮਾਨਾਂ ਨੂੰ ਵਿਸ਼ੇਸ਼ ਨਿਸ਼ਾਨਾ ਬਣਾਉਣ ਤੋਂ ਅੱਗੇ ਵਧਕੇ ਹੁਣ ਕਿਸਾਨਾਂ 'ਚ ਫਿਰਕੂ ਵੰਡੀਆਂ ਪਾਉਣ ਦੀ ਕੋਝੀ ਚਾਲ ਚੱਲੀ ਜਾ ਰਹੀ ਹੈ । ਉਹਨਾਂ ਦੋਸ਼ ਲਾਇਆ ਕਿ ਭਾਜਪਾ ਦੇ ਸਤਾ 'ਚ ਆਉਣ ਤੋਂ ਬਾਅਦ ਦਲਿਤਾਂ ਉਤੇ ਜਾਤਪਾਤੀ ਅੱਤਿਆਚਾਰਾ 'ਚ ਬੇਸ਼ੁਮਾਰ ਵਾਧਾ ਹੋਇਆ ਹੈ ਅਤੇ ਦਲਿਤਾਂ ਦੇ ਹੱਕ ਵਿੱਚ ਅਵਾਜ਼ ਉਠਾਉਣ ਵਾਲੇ ਬੁੱਧੀਜੀਵੀਆਂ ਨੂੰ ਵੀ ਜੇਲ੍ਹਾਂ ਵਿੱਚ ਡੱਕਿਆ ਜਾ ਰਿਹਾ ਹੈ। ਉਹਨਾਂ ਦੱਸਿਆ ਕਿ ਖੇਤ ਮਜ਼ਦੂਰ ਕਾਨਫਰੰਸਾਂ ਦੌਰਾਨ ਖੇਤੀ ਕਾਨੂੰਨ ਤੇ ਬਿਜਲੀ ਸੋਧ ਬਿੱਲ 2020 ਰੱਦ ਕਰਨ, ਦਲਿਤਾਂ 'ਤੇ ਜ਼ਬਰ ਬੰਦ ਕਰਨ, , ਗਿਰਫ਼ਤਾਰ ਕੀਤੇ ਕਿਸਾਨਾਂ ਨੂੰ ਬਿਨਾਂ ਸ਼ਰਤ ਰਿਹਾਅ ਕਰਨ, ਕਿਸਾਨ ਮੋਰਚਿਆਂ ਉੱਤੇ ਹਮਲੇ ਬੰਦ ਕਰਨ, ਦਲਿਤਾਂ ਦੀ ਸਮਾਜਿਕ ਬਰਾਬਰੀ ਦੀ ਗਰੰਟੀ ਕਰਨ, ਗਿਰਫ਼ਤਾਰ ਕੀਤੇ ਬੁੱਧੀਜੀਵੀਆਂ ਨੂੰ ਰਿਹਾਅ ਕਰਨ,ਖੇਤ ਮਜ਼ਦੂਰਾਂ ਦੇ ਰੁਜ਼ਗਾਰ ਦਾ ਪੱਕਾ ਪ੍ਰਬੰਧ ਕਰਨ, ਸਰਵਜਨਕ ਜਨਤਕ ਵੰਡ ਪ੍ਰਣਾਲੀ ਲਾਗੂ ਕਰਨ, ਖੇਤ ਮਜ਼ਦੂਰਾਂ ਦੇ ਸਮੁੱਚੇ ਕਰਜ਼ੇ ਖ਼ਤਮ ਕਰਨ ਅਤੇ ਤਿੱਖੇ ਜ਼ਮੀਨੀ ਸੁਧਾਰ ਕਾਨੂੰਨ ਲਾਗੂ ਕਰਨ ਵਰਗੇ ਮੁੱਦੇ ਜੋਰ ਨਾਲ ਉਭਾਰੇ ਜਾਣਗੇ। ਇਸ ਮੌਕੇ ਕਾਨਫਰੰਸ ਦੀ ਤਿਆਰੀ ਲਈ ਪਿੰਡਾਂ ਅੰਦਰ ਘਰ ਘਰ ਦੇ ਅੰਦਰ ਜ਼ੋਰਦਾਰ ਮੁਹਿੰਮ ਚਲਾਉਣ ਅਤੇ ਪਿੰਡਾਂ 'ਚ ਮੀਟਿੰਗਾਂ ਰੈਲੀਆਂ ਤੇ ਜਾਗੋ ਮਾਰਚ ਕਰਨ ਦਾ ਵੀ ਫੈਸਲਾ ਲਿਆ ਗਿਆ।

ਮੋਦੀ ਸਰਕਾਰ ਦੇ ਮਾਰੂ ਹੱਲਿਆਂ ਦੀ ਕੁਤਰ-ਤਰਾਸ਼ੀ ਖਾਤਰ ਘੁੰਮਣ ਲੱਗਿਆ ਸੁਖਬੀਰ ਦੀ ਓਰਬਿੱਟ ਦਾ ਪਹੀਆ

- ਤਖ਼ਤ ਦਮਦਮਾ ਸਾਹਿਬ, ਲੰਬੀ ਅਤੇ ਗੋਨਿਆਣਾ ਤੋਂ ਮੁੜ ਸ਼ੁਰੂ ਕੀਤੀ ਮੁਫ਼ਤ ਬੱਸ ਸੇਵਾ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਕਿਸਾਨ ਪ੍ਰਤੀ ਮੋਦੀ ਸਰਕਾਰ ਦੇ ਮਾਰੂ ਹੱਲਿਆਂ ਦੀ ਕੁਤਰ-ਤਰਾਸ਼ੀ ਖਾਤਰ ਸ਼ੋ੍ਰਮਣੀ ਅਕਾਲੀ ਦਲ ਸਿਆਸਤ ਰਹਿਤ ਉਪਰਾਲਿਆਂ ’ਚ ਇਖ਼ਲਾਕੀ ਫਰਜ਼ਾਂ ਦੀ ਰਾਹ ’ਤੇ ਹੈ। ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦੀ ਮਾਲਕੀ ਵਾਲੀ ਓਰਬਿੱਟ ਟਰਾਂਸਪੋਰਟ ਦੀਆਂ ਤਿੰਨ ਬੱਸਾਂ ਦਿੱਲੀ ਦੇ ਕਿਸਾਨੀ ਮੋਰਚੇ ’ਚ ਲਗਾਤਾਰ ਕਿਸਾਨੀ ਯੋਧਿਆਂ ਨੂੰ ਮੋਰਚੇ ’ਤੇ ਲਿਜਾਣ ਲਈ ਮੁੜ ਸੜਕਾਂ ’ਤੇ ਉੱਤਰ ਪਈਆਂ ਹਨ। ਗਣਤੰਤਰ ਦਿਵਸ ਕਾਰਨ 25 ਤੋਂ ਬੱਸ ਸੇਵਾ ਬੰਦ ਸੀ। ਬਠਿੰਡਾ ਲੋਕਸਭਾ ਵਿੱਚੋਂ ਟਿਕਰੀ ਬਾਰਡਰ ਮੋਰਚੇ ਲਈ ਤਿੰਨ ਬੱਸਾਂ ’ਤੇ ਆਧਾਰਤ ਮੁਫ਼ਤ ਸੇਵਾ ਅੱਜ ਤੋਂ ਮੁੜ ਆਰੰਭ ਦਿੱਤੀ ਗਈ ਹੈ। ਇਹ ਬੱਸਾਂ ਲੰਬੀ, ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਤੇ ਗੋਨਿਆਣਾ ਤੋਂ ਚੱਲਦੀਆਂ ਹਨ। ਲੰਬੀ ਬੱਸ ਅੱਡੇ ਤੋਂ ਇਹ ਬੱਸ ਰੋਜ਼ਾਨਾ ਦਿਨ ਸਮੇਂ ਸਾਢੇ 12 ਵਜੇ ਚੱਲਦੀ ਹੈ। ਤਖ਼ਤ ਸ੍ਰੀ ਦਮਦਮਾ ਸਾਹਿਬ ਤੋਂ ਸਵੇਰੇ ਦਸ ਵਜੇ ਵਾਇਆ ਮਾਨਸਾ ਚੌਕ ਤੋਂ ਜਾਂਦੀ ਹੈ। ਤੀਜੀ ਬੱਸ ਗੋਨਿਆਣਾ ਬੱਸ ਅੱਡੇ ਤੋਂ ਸਾਢੇ 9 ਵਜੇ ਚੱਲਦੀ ਹੈ। ਇਹ ਬੱਸਾਂ ਟਿਕਰੀ ਬਾਰਡਰ ਪਕੌੜਾ ਚੌਕ (ਦਿੱਲੀ) ਤੋਂ ਰੋਜ਼ਾਨਾ ਕਰੀਬ ਸਵੇਰੇ 7 ਵਜੇ ਵਾਪਸੀ ਰਵਾਨਾ ਹਨ। ਜ਼ਿਕਰਯੋਗ ਹੈ ਕਿ ਬੀਤੀ 13 ਜਨਵਰੀ ਕੱਖਾਂਵਾਲੀ ਦੇ ਕਿਸਾਨਾਂ ਨੇ ਸੁਖਬੀਰ ਸਿੰਘ ਬਾਦਲ ਵੱਲੋਂ ਸ਼ਹੀਦ ਚਾਨਣ ਸਿੰਘ ਦੇ ਪਰਿਵਾਰ ਨਾਲ ਸੋਗ ਕਰਨ ਮੌਕੇ ਦਿੱਲੀ ਸੰਘਰਸ਼ ਜਾਣ-ਆਉਣ ਦੀ ਸਮੱਸਿਆ ਤੋਂ ਜਾਣੂ ਕਰਵਾਇਆ ਸੀ। ਅਕਾਲੀ ਦਲ ਪ੍ਰਧਾਨ ਨੇ 15 ਜਨਵਰੀ ਤੋਂ ਲੰਬੀ ਬੱਸ ਤੋਂ ਓਰਬਿੱਟ ਬੱਸ ਸੇਵਾ ਸ਼ੁਰੂ ਕਰਵਾਈ ਸੀ। ਬਾਕੀ ਦੋਵੇਂ ਬੱਸ ਬਠਿੰਡਾ ਲੋਕਸਭਾ ਤੋਂ ਸੰਸਦ ਮੈਂਬਰ ਬੀਬੀ ਹਰਸਿਮਰਤ ਕੌਰ ਬਾਦਲ ਨੇ ਕਿਸਾਨਾਂ ਨੂੰ ਦਿੱਲੀ ਮੋਰਚੇ ਅਤੇ ਪਰਿਵਾਰਾਂ ਨਾਲ ਲਗਾਤਾਰ ਜੋੜੇ ਰੱਖਣ ਲਈ ਚਲਵਾਈਆਂ ਹਨ। ਅੱਜ ਲੰਬੀ ਤੋਂ ਤੁਰੀ ਬੱਸ ’ਚ 35 ਜਣੇ ਟਿਕਰੀ ਬਾਰਡਰ ਲਈ ਰਵਾਨਾ ਹੋਏ। ਅਕਾਲੀ ਦਲ ਦੇ ਕੌਮੀ ਮੀਤ ਪ੍ਰਧਾਨ ਤੇਜਿੰਦਰ ਸਿੰਘ ਮਿੱਡੂਖੇੜਾ ਨੇ ਕਿਹਾ ਕਿ ਸਿਆਸਤ ਤੋਂ ਉੱਪਰ ਉੱਠ ਕੇ ਕਿਸਾਨ ਸੰਘਰਸ਼ ਦੀ ਸੇਵਾ ਵਜੋਂ ਇਹ ਬੱਸ ਸੇਵਾ ਹਰੇਕ ਪਾਰਟੀ ਅਤੇ ਹਰੇਕ ਵਰਗ ਦੇ ਲੋਕਾਂ ਲਈ ਚਲਾਈ ਹੈ। ਉਨਾਂ ਸਭ ਵਰਗਾਂ ਨੂੰ ਦੇਸ਼ ਦੇ ਚੰਗੇ ਭਵਿੱਖ ਲਈ ਕਿਸਾਨ ਸੰਘਰਸ਼ ਦਾ ਹਿੱਸਾ ਬਣਨ ਪ੍ਰੇਰਦੇ ਦਿੱਲੀ ਮੋਰਚੇ ’ਚ ਵਧ ਚੜ ਕੇ ਪੁੱਜਣ ਦੀ ਅਪੀਲ ਕੀਤੀ।

ਸਲਾਹਾਂ ਤੇ ਮਿਹਣਿਆਂ ਨਾਲ ਕੀਤਾ ਅਮਰਿੰਦਰ ਦੀ ‘ਗੱਡੀ’ ਦਾ ਸਿਆਸੀ ਚੱਕਾ ਜਾਮ

- ਸੁਖਬੀਰ ਨੇ ਪੰਜਾਬ ਨੂੰ ਮੰਡੀ ਬਣਾਉਣ ਐਲਾਨਣ ਦੀ ਸਲਾਹ

- ਹਰਸਿਮਰਤ ਵੱਲੋਂ ਕੈਪਟਨ ਨੂੰ ਆਰਡੀਨੈਂਸ ਬਾਰੇ ਅਗਾਊਂ ਜਾਂਣਕਾਰੀ ਦੇ ਦੋਸ਼

-  ਸੁਖਬੀਰ ਤੇ ਹਰਸਿਮਰਤ ਦੀ ਟਰੈਕਟਰ ’ਤੇ ਆਮਦ, ਵਾਸਪੀ ਲਗਜ਼ਰੀ ਕਾਰ ’ਤੇ

- ਅਕਾਲੀ ਦਲ ਵੱਲੋਂ ਲੰਬੀ ’ਚ ਕੌਮੀ ਸੜਕ ’ਤੇ ਚੱਕਾ ਜਾਮ

ਇਕਬਾਲ ਸ਼ਾਂਤ

ਲੰਬੀ : ਬਾਦਲ ਪਤੀ-ਪਤਨੀ ਜੋੜੀ ਨੇ ਅੱਜ ਘੇਰਵੀਆਂ ਸਲਾਹਾਂ ਤੇ ਸਿੱੱਝਵੇਂ ਮਿਹਣਿਆਂ ਨਾਲ ਅਮਰਿੰਦਰ ਸਿੰਘ ਦੀ ਸੱਤਾਪੱਖੀ ਗੱਡੀ ਦਾ ਸਿਆਸੀ ਚੱਕਾ ਜਾਮ ਕਰ ਰੱਖਿਆ। ਲੰਬੀ ’ਚ ਚੱਕਾ ਜਾਮ ਦੌਰਾਨ ਸ਼੍ਰੋਮਣੀ ਅਕਾਲੀ ਦਲ (ਬ) ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਖੇਤੀ ਬਿੱਲ ਨੂੰ ਪੰਜਾਬ ’ਚ ਨਾਕਾਬਿਲ ਬਣਾਉਣ ਲਈ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੂੰ ਸੂਬਾ ਸਰਕਾਰੀ ਮੰਡੀ ਐਲਾਨਣ ਕੇ ਆਰਡੀਨੈਂਸ ਜਾਰੀ ਕਰਨ ਦੀ ਸਲਾਹ ਦਿੱਤੀ। ਉਥੇ ਹਰਸਿਮਰਤ ਕੌਰ ਨੇ ਮੁੱਖ ਮੰਤਰੀ ਪੰਜਾਬ ਨੂੰ ਖੇਤੀ ਆਰਡੀਨੈਂਸਾਂ ਬਾਰੇ ਨੂੰ ਅਗਸਤ 2019 ਤੋਂ ਜਾਣਕਾਰੀ ਹੋਣ ਦਾ ਵੱਡਾ ਖੁਲਾਸਾ ਕਰਕੇ ਅਮਰਿੰਦਰ ਸਿੰਘ ਨੂੰ ਜਨਤਕ ਜਵਾਬਦੇਹੀ ’ਚ ਫਸਾ ਦਿੱਤਾ। ਹਰਸਿਮਰਤ ਨੇ ਧਰਨੇ ’ਚ ਕੇਂਦਰ ਸਰਕਾਰ ਵੱਲੋਂ ਪੰਜਾਬ ਸਰਕਾਰ ਨੂੰ ਭੇਜਿਆ ਪੱਤਰ ਵੀ ਵਿਖਾਇਆ। ਜ਼ਿਕਰਯੋਗ ਹੈ ਕਿ ਕੇਂਦਰੀ ਵਜ਼ੀਰੀ ਦੇ ਸਿਆਸੀ ਬੋਝ ਤੋਂ ਫਾਰਗੀ ਮਗਰੋਂ ਦੋਵੇਂ ਆਗੂ ਲਗਾਤਾਰ ਸੂਬਾਈ ਸਿਆਸਤ ਦਾ ਇੱਕਪਾਸੜ ਮਾਹੌਲ ਬਣਾਉਣ ਲਈ ਤਿੱਖੇ ਸੁਰਾਂ ਨਾਲ ਚਹੁੰਪਾਸੇ ‘ਬਾਗੀ’ ਨਿਸ਼ਾਨੇ ਲਗਾ ਰਹੇ ਹਨ। 

ਸੁਖਬੀਰ ਸਿੰਘ ਬਾਦਲ ਅਤੇ ਸਾਬਕਾ ਕੇਂਦਰੀ ਮੰਤਰੀ ਬੀਬੀ ਹਰਸਿਮਰਤ ਕੌਰ ਬਾਦਲ ਅੱਜ ਟਰੈਕਟਰ ’ਤੇ ਸਵਾਰ ਹੋ ਕੇ ਲੰਬੀ ਨੇੜੇ ਚੱਕਾ ਜਾਮ-ਧਰਨੇ ’ਚ ਸ਼ਾਮਿਲ ਹੋਏ। ਦੋਵੇਂ ਆਗੂ ਪਿੰਡ ਬਾਦਲ ਰਿਹਾਇਸ਼ ਤੋਂ ਟਰੈਕਟਰਾਂ ਦੇ ਵੱਡੇ ਕਾਫਲੇ ਦੀ ਸ਼ਕਲ ’ਚ ਧਰਨੇ ਵਿੱਚ ਪੁੱਜੇ। ਜਦੋਂਕਿ ਧਰਨੇ ਤੋਂ ਬਾਅਦ ਦੋਵੇਂ ਆਗੂ ਲਗਜ਼ਰੀ ਗੱਡੀ ’ਤੇ ਵਾਪਸ ਗਏ। ਕਾਫ਼ਲੇ ’ਚ ਸ਼ਾਮਲ 35 ਟਰੈਕਟਰ ਅਕਾਲੀ ਦਲ ਜਸਮੇਲ ਸਿੰਘ ਮਿਠੜੀ ਦੀ ਤਰੱਦਦ ਸਦਕਾ ਮਿਠੜੀ ਪਿਡੋਂ ਆਏ ਸਨ। 

        ਲੰਬੀ ’ਚ ਕੌਮੀ ਸ਼ਾਹ ਰਾਹ ’ਤੇ ਅਕਾਲੀ ਵਰਕਰਾਂ ਦੇ ਵਿਸ਼ਾਲ ਧਰਨੇ ਮੌਕੇ ਸੁਖਬੀਰ ਬਾਦਲ ਨੇ ਕਿਹਾ ਕਿ ਮੁੱਖ ਮੰਤਰੀ ਕੈਬਨਿਟ ਮੀਟਿੰਗ ’ਚ ਸੂਬੇ ਨੂੰ ਬਤੌਰ ਸਰਕਾਰੀ ਮੰਡੀ ਐਲਾਨਣ ਅਤੇ ਬਾਅਦ ’ਚ ਵਿਧਾਨਸਭਾ ਦਾ ਇਜਲਾਸ ਸੱਦ ਕੇ ਆਰਡੀਨੈਂਸ ਲਈ ਬਿੱਲ ਪਾਸ ਕਰਕੇ ਕਾਨੂੰਨ ਬਣਾਇਆ ਜਾਵੇ। ਸੁਖਬੀਰ ਬਾਦਲ ਨੇ ਐਲਾਨ ਕੀਤਾ ਕਿ ਜੇਕਰ ਇਹ ਫੈਸਲਾ ਕਾਂਗਰਸ ਸਰਕਾਰ ਨਹੀਂ ਕਰੇਗੀ ਤਾਂ ਅਕਾਲੀ ਦਲ ਦੀ ਸਰਕਾਰ ਬਣਨ ’ਤੇ ਅਗਾਮੀ ਪੀੜੀਆਂ ਦਾ ਭਵਿੱਖ ਪਹਿਲੇ ਹੱਲੇ ਕੀਤਾ ਜਾਵੇਗਾ। 

ਅਕਾਲੀ ਦਲ ਪ੍ਰਧਾਨ ਨੇ ਕੈਪਟਨ ਵੱਲੋਂ ਕਿਸਾਨਾਂ ਦੀ ਭਲਾਈ ਲਈ ਮਗਰਮੱਛ ਦੇ ਹੰਝੂ ਵਹਾਉਣ ਨੂੰ ਵੀ ਬੇਨਕਾਬ ਕੀਤਾ। ਉਨਾਂ ਕਿਹਾ ਕੈਪਟਨ ਅਮਰਿੰਦਰ ਸਿੰਘ ਨੇ ਕਾਂਗਰਸ ਦੇ ਚੋਣ ਮਨੋਰਥ ਪੱਤਰ ਅਨੁਸਾਰ ਸੂਬੇ ਦੇ ਏ.ਪੀ.ਐਮ.ਸੀ. ਐਕਟ ’ਚ ਸੋਧ ਕੀਤੀ ਤੇ ਨਿੱਜੀ ਮੰਡੀਆਂ, ਕਾਂਟਰੈਕਟ ਫਾਰਮਿੰਗ ਅਤੇ ਈ-ਟਰੇਡਿੰਗ ਸ਼ੁਰੂ ਕਰਵਾਈ। 

ਸਾਬਕਾ ਕੇਂਦਰੀ ਮੰਤਰੀ ਬੀਬੀ ਹਰਸਿਮਰਤ ਕੌਰ ਬਾਦਲ ਨੇ ਕਿਹਾ ਕਿ ਉਨਾਂ ਪੰਜਾਬ ਦੀ ਧੀ ਵਜੋਂ ਆਪਣਾ ਫਰਜ਼ ਨਿਭਾਇਆ ਹੈ। ਉਨਾਂ ਕੈਪਟਨ ’ਤੇ ਕਿਸਾਨਾਂ ਦੀ ਪਿੱਠ ਵਿੱਚ ਛੁਰਾ ਮਾਰਨ ਦੇ ਦੋਸ਼ ਲਗਾਉਂਦੇ ਕਿਹਾ ਕਿ ਅਮਰਿੰਦਰ ਸਿੰਘ ਨੂੰ ਪਿਛਲੇ ਅਗਸਤ ਤੋਂ ਹੀ ਪਤਾ ਸੀ ਕਿ ਅਜਿਹੇ ਆਰਡੀਨੈਂਸ ਆ ਰਹੇ ਹਨ। ਉਨਾਂ ਕਿਹਾ ਕਿ ਇਸਦਾ ਠੋਸ ਸਬੂਤ ਉਹ ਪੱਤਰ ਹੈ ਜੋ ਉਨਾਂ ਦੀ ਸਰਕਾਰ ਨੂੰ ਮਿਲਿਆ ਪਰ ਉਨਾਂ ਨੇ ਕਿਸਾਨਾਂ ਦੇ ਹਿੱਤਾਂ ਦੀ ਰਾਖੀ ਵਾਸਤੇ ਇਸ ਕਦਮ ਦਾ ਵਿਰੋਧ ਕਰਨ ਦੀ ਥਾਂ ਚੁੱਪੀ ਧਾਰੀ ਰੱਖੀ। ਉਨਾਂ ਕਿਹਾ ਕਿ ਦੂਜੇ ਪਾਸੇ ਜਦੋਂ ਮੈਨੂੰ ਮਹਿਸੂਸ ਹੋਇਆ ਕਿ ਕਿਸਾਨਾਂ ਦੇ ਖਦਸ਼ੇ ਦੂਰ ਨਹੀਂ ਕੀਤੇ ਜਾ ਰਹੇ ਤਾਂ ਮੈਂ ਆਪਣੇ ਅਹੁਦੇ ਤੋਂ ਅਸਤੀਫਾ ਦੇ ਦਿੱਤਾ। ਉਨਾਂ ਕਿਹਾ ਕਿ ਜੇਕਰ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੂੰ ਸੱਚਮੁੱਚ ਕਿਸਾਨਾਂ ਦੀ ਚਿੰਤਾ ਹੈ ਤਾਂ ਫਿਰ ਉਨਾਂ ਨੂੰ ਅਹੁਦੇ ਤੋਂ ਅਸਤੀਫਾ ਦੇ ਦੇਣਾ ਚਾਹੀਦਾ ਹੈ।

ਅਕਾਲੀ ਦਲ ਦੇ ਕੌਮੀ ਮੀਤ ਪ੍ਰਧਾਨ ਤੇਜਿੰਦਰ ਮਿੱਡੂਖੇੜਾ ਨੇ ਕਿਹਾ ਕਿ ਕਾਂਗਰਸ ਪੱਚੀ ਵਿਅਕਤੀਆਂ ਨੇ ਮਹਿਣਾ ਅਤੇ ਆਧਨੀਆਂ ’ਚ ਸੜਕਾਂ ’ਤੇ ਨਿਗੁਣੇ ਇਕੱਠੇ ਵਾਲੇ ਧਰਨੇ ਲਗਾ ਕੇ ਅਕਾਲੀ ਵਰਕਰਾਂ ਨੂੰ ਲੰਬੀ ’ਚ ਅਕਾਲੀ ਦਲ ਦੇ ਚੱਕਾ ਜਾਮ ਤੱਕ ਪੁੱਜਣ ਦੀ ਕੋਸ਼ਿਸ਼ ਕੀਤੀ। ਇਸਦੇ ਬਾਵਜੂਦ ਧਰਨੇ ’ਚ ਬੇਮਿਸਾਲ ਇਕੱਠ ਹੋਇਆ। ਇਸ ਮੌਕੇ ਲੰਬੀ ਹਲਕੇ ਵਿਚੋਂ ਵੱਡੀ ਗਿਣਤੀ ਅਕਾਲੀ ਕਾਰਕੁਨ ਸਮੇਤ ਕੌਮੀ ਮੀਤ ਪ੍ਰਧਾਨ ਤੇਜਿੰਦਰ ਸਿੰਘ ਮਿੱਡੂਖੇੜਾ, ਸਰਕਲ ਪ੍ਰਧਾਨ ਅਵਤਾਰ ਸਿੰਘ ਬਨਵਾਲਾ, ਗੁਰਬਖਸ਼ੀਸ਼ ਸਿੰਘ ਵਿੱਕੀ, ਪੱਪੀ ਤਰਮਾਲਾ, ਕਾਕਾ ਭਾਈਕੇਰਾ, ਬਲਕਰਨ ਸਿੰਘ ਓ.ਐਸ.ਡੀ, ਜਸਮੇਲ ਸਿੰਘ ਮਿਠੜੀ, ਪਵਿੱਤਰਜੋਤ ਲੁਹਾਰਾ, ਹਰਵੀ ਬਾਦਲ, ਅਕਾਸ਼ਦੀਪ ਮਿੱਡੂਖੇੜਾ, ਰਣਯੌਧ ਸਿੰਘ ਲੰਬੀ, ਕੁਲਵੰਤ ਸਿੰਘ ਘੁਮਿਆਰਾ, ਮਨਜੀਤ ਸਿੰਘ ਲਾਲਬਾਈ, ਗੁਰਮੇਲ ਸਿੰਘ ਭਾਟੀ, ਰਾਜਾ ਸਿੰਘ ਮਾਹੂਆਣਾ, ਹਰਮੇਸ਼ ਸਿੰਘ ਖੁੱਡੀਆਂ ਅਤੇ ਸੁਖਮੰਦਰ ਸਿੰਘ ਭਾਟੀ ਵੀ ਮੌਜੁਦ ਸਨ।