ਪੰਜਾਬ 'ਚ ਕੁੜੱਤਣ ਅਤੇ ਖਿੱਚੋਤਾਣ ਦੀ ਸਿਆਸਤ ਨੂੰ ਠੱਲ੍ਹ ਪੈਣ ਦੇ ਆਸਾਰ

                                                                   -ਇਕਬਾਲ ਸਿੰਘ ਸ਼ਾਂਤ-
ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੀ ਕੱਲ੍ਹ ਪਿੰਡ ਬਾਦਲ ਦੀ ਫੇਰੀ ਨਾਲ ਸੂਬੇ ਵਿਚੋਂ ਕੁੜੱਤਣ ਅਤੇ ਆਪਸੀ ਖਿੱਚੋਤਾਣ ਦੀ ਸਿਆਸਤ ਨੂੰ ਕੁੱਝ ਠੱਲ੍ਹ ਪੈਣ ਦੇ ਆਸਾਰ ਬਣੇ ਹਨ।

               ਅਜਿਹਾ ਮਾਹੌਲ ਅੱਜ ਉਸ ਵੇਲੇ ਵੇਖਣ ਨੂੰ ਮਿਲਿਆ ਜਦੋਂ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਅਤੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਆਪਣੇ ਮੁੱਖ ਸਿਆਸੀ ਵਿਰੋਧੀ ਅਤੇ ਸੂਬੇ ਦੇ ਮੌਜੂਦਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ  ਦੀ ਪਤਨੀ ਸੁਰਿੰਦਰ ਕੌਰ ਬਾਦਲ ਦੇ ਸਵਰਗਵਾਸ 'ਤੇ ਦੁੱਖ ਦਾ ਇਜਹਾਰ ਕਰਨ ਲਈ ਆਪਣੀ ਪਤਨੀ ਪਰਨੀਤ ਕੌਰ ਅਤੇ ਹੋਰਨਾਂ ਕਾਂਗਰਸ ਆਗੂਆਂ ਨਾਲ ਪਿੰਡ ਬਾਦਲ ਵਿਖੇ ਪਹੁੰਚੇ। ਜਦੋਂਕਿ ਇਸਤੋਂ ਪਹਿਲਾਂ ਪਿਛਲੇ ਇੱਕ ਦਹਾਕੇ ਤੋਂ ਦੋਵੇਂ ਸਿਆਸੀ ਪਰਿਵਾਰਾਂ ਵਿਚ ਤਿੱਖੀ ਸਿਆਸੀ ਖਿੱਚੋਤਾਣ ਚੱਲੀ ਆ ਰਹੀ ਹੈ ਤੇ ਮਾਮਲਾ ਦੋਵੇਂ ਧਿਰਾਂ ਵਿਚਕਾਰ ਮਾਣਹਾਨੀ ਦੇ ਮੁਕੱਦਮਿਆ ਤੱਕ ਜਾ ਪੁੱਜਿਆ ਸੀ। ਇਸਤੋਂ ਪਹਿਲਾਂ ਕੈਪਟਨ ਅਮਰਿੰਦਰ ਸਿੰਘ ਦੀ ਸਰਕਾਰ ਦੌਰਾਨ ਜਿੱਥੇ ਬਾਦਲ ਪਰਿਵਾਰ 'ਤੇ ਭ੍ਰਿਸ਼ਟਾਚਾਰ ਦੇ ਕੇਸ ਦਰਜ ਹੋਏ ਸਨ, ਉਥੇ ਅਕਾਲੀ ਸਰਕਾਰ ਦੌਰਾਨ ਸਿਟੀ ਸੈਂਟਰ  ਘੁਟਾਲੇ ਦੇ ਮਾਮਲਾ  ਅਦਾਲਤ ਦੇ ਵਿਚਾਰਧੀਨ ਹੈ। ਅਜਿਹੇ ਵਿਚ ਜਿਥੇ ਦੋਹਾਂ ਪਰਿਵਾਰਾਂ ਵਿਚ ਸਿਆਸੀ ਸਟੇਜ਼ਾਂ ਤੋਂ ਇੱਕ ਦੂਸਰੇ ਨੂੰ ਲਾਹਣਤਾਂ ਅਤੇ ਤਿੱਖੀ ਦੂਸ਼ਣਬਾਜ਼ੀ ਦਾ ਸਿਲਸਿਲਾ ਲਗਾਤਾਰ ਚੱਲਿਆ ਆ ਰਿਹਾ ਹੈ ਅਤੇ ਦੋਵੇਂ ਧਿਰਾਂ ਇੱਕ ਦੂਸਰੇ ਨੂੰ ਸਿਆਸੀ ਤੌਰ 'ਤੇ ਉਲਝਾਉਣ ਵਿਚ ਕਸਰ ਬਾਕੀ ਨਹੀਂ ਛੱਡੀ ਜਾਂਦੀ।

             ਪੰਜਾਬ ਦੀ ਸਿਆਸੀ ਫਿਜ਼ਾ ਮੁੱਖ ਤੌਰ 'ਤੇ ਸ. ਪ੍ਰਕਾਸ਼ ਸਿੰਘ ਬਾਦਲ ਅਤੇ ਕੈਪਟਨ ਅਮਰਿੰਦਰ ਸਿੰਘ ਤੋਂ ਵਧੇਰੇ ਪ੍ਰਭਾਵਿਤ ਹੋਣ ਕਰਕੇ ਸੂਬੇ ਦੇ ਸਿਆਸੀ ਤਾਣੇ-ਬਾਣੇ 'ਤੇ ਵੀ ਕੁੜੱਤਣੀ ਰਵੱਈਆ ਭਾਰੂ ਹੋਇਆ। ਜਿਸ ਕਰਕੇ ਸੂਬੇ 'ਚੋਂ ਸੱਤਾ ਪੱਖ ਅਤੇ ਵਿਰੋਧੀ ਧਿਰ ਵਿਚਕਾਰ ਸਿਹਤਮੰਦ ਸਿਆਸਤੀ ਢਾਂਚਾ ਨੂੰ ਕਾਫ਼ੀ ਢਾਹ ਲੱਗੀ।
             ਮੰਨਿਆ ਜਾ ਰਿਹਾ ਹੈ ਕਿ ਅੱਜ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਗ੍ਰਹਿ ਵਿਖੇ ਸੋਗ ਪ੍ਰਗਟ ਕਰਨ ਜਾਣ ਦੀ ਪਹਿਲਕਦਮੀ ਨਾਲ ਹਜ਼ਾਰਾਂ ਕਰੋੜਾਂ ਰੁਪਏ ਦੇ ਕਰਜ਼ੇ ਦੀ ਮਾਰ ਹੇਠ ਸੂਬੇ ਵਿਚ ਜਿੱਥੇ ਇੱਕ ਸਿਹਤਮੰਦ ਸਿਆਸੀ ਢਾਂਚਾ ਮਜ਼ਬੂਤ ਹੋਵੇਗਾ, ਉਥੇ ਪੰਜਾਬ ਦੇ ਮਸਲਿਆਂ ਬਾਰੇ ਮਿਲ ਬੈਠ ਕੇ ਹੱਲ ਕੱਢਣ ਲਈ ਇੱਕ ਨਵਾਂ ਰਾਹ ਤਿਆਰ ਹੋਵੇਗਾ। ਇਸਦੇ ਇਲਾਵਾ ਆਪਸੀ ਦੂਸ਼ਣਬਾਜ਼ੀ ਅਤੇ ਖਿੱਚੋਤਾਣ ਦੇ ਵਰਤਾਰੇ ਨੂੰ ਠੱਲ੍ਹ ਪਵੇਗੀ।
           ਅੱਜ ਦੁੱਖ ਦੀ ਘੜੀ ਵਿਚ ਕੈਪਟਨ ਅਮਰਿੰਦਰ ਸਿੰਘ ਅਤੇ ਸ. ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਵਿਚਕਾਰ ਸਿਆਸੀ ਕੁੜੱਤਣ ਨੇ ਸਿਰਫ਼ ਬਦਲਵਾਂ ਰਾਹ ਅਖ਼ਤਿਆਰ ਨਹੀਂ ਕੀਤਾ ਬਲਕਿ ਫਰੀਦਕੋਟ ਲੋਕਸਭਾ ਹਲਕੇ ਤੋਂ ਮਰਹੂਮ ਸਾਂਸਦ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ, ਜਿਨ੍ਹਾਂ ਦੀ ਮੌਤ ਦੇ ਬਾਅਦ ਤੋਂ ਹੀ ਖੁੱਡੀਆਂ ਪਰਿਵਾਰ ਦੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਨਾਲ ਮੱਤਭੇਦ ਜੱਗਜਾਹਰ ਹਨ, ਦੇ ਵੱਡੇ ਸਪੁੱਤਰ ਅਤੇ ਸੀਨੀਅਰ ਕਾਂਗਰਸ ਆਗੂ ਸ. ਗੁਰਮੀਤ ਸਿੰਘ ਖੁੱਡੀਆਂ ਵੀ ਸਾਰੇ ਮੱਤਭੇਦ ਕੁਝ ਭੁਲਾ ਕੇ ਸ. ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸ. ਸੁਖਬੀਰ ਸਿੰਘ ਬਾਦਲ ਨਾਲ ਬੀਬੀ ਸੁਰਿੰਦਰ ਕੌਰ ਬਾਦਲ ਦੀ ਮੌਤ ਦਾ ਦੁੱਖ ਸਾਂਝਾ ਕਰਨ ਲਈ ਉਚੇਚੇ ਤੌਰ 'ਤੇ ਪੁੱਜੇ। ਜਿਨ੍ਹਾਂ ਨੂੰ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਮੋਢੇ 'ਤੇ ਹੱਥ ਰੱਖ ਕੇ ਦੋ ਵਾਰ ਇਹ ਸ਼ਬਦ ਦੁਹਰਾਏ ਕਿ ''ਕਾਕਾ ਤੂੰ ਬਹੁਤ ਚੰਗਾ ਕੀਤਾ ਜਿਹੜਾ ਅੱਜ ਤੂੰ ਆਇਆ।''
          ਕੱਲ੍ਹ ਤੱਕ ਇੱਕ ਦੂਸਰੇ ਤੋਂ ਅੱਖਾਂ ਪਾਸੇ ਕਰਕੇ ਲੰਘ ਜਾਣ ਵਾਲੇ ਕਾਂਗਰਸ ਅਤੇ ਅਕਾਲੀ ਦਲ ਦੇ ਆਗੂ ਵੀ ਪਿੰਡ ਬਾਦਲ 'ਚ ਇੱਕ ਦੂਸਰੇ ਨੂੰ ਹੱਥ ਜੋੜ ਦੁਆ ਸਲਾਮ ਕਰਦੇ ਵੇਖੇ ਗਏ।
         ਇੱਥੇ ਇਹ ਗੱਲ ਵੀ ਕੁਥਾਂਹ ਨਹੀਂ ਹੋਵੇਗੀ ਕਿ ਇਸ ਦੁੱਖ ਦੀ ਘੜੀ ਤੋਂ ਬਾਅਦ ਭਾਵੇਂ ਅਗਾਮੀ ਦਿਨਾਂ ਵਿਚ ਸਿਆਸਤ ਮੁੜ ਤੋਂ ਭਾਰੂ ਹੋਵੇਗੀ ਪਰ ਉਦੋਂ ਅੱਖਾਂ ਵਿਚ ਪਹਿਲੀ ਤਲਖੀ ਨਹੀਂ ਹੋਵੇਗੀ।

ਕਾਂਗਰਸ ਸਰਕਾਰ ਵੇਲੇ ਦਾ ਖੌਫ਼ ਦਾ ਅਕਾਲੀਆਂ ਨੇ ਜਾ ਨੇਪਰੇ ਚਾੜ੍ਹਿਆ

                                                             ਗੈਰੋਂ ਮੇਂ ਕਹਾਂ ਦਮ ਥਾਂ....            
   

ਮਨਪ੍ਰੀਤ ਬਾਦਲ ਦਾ ਨੇੜਲਾ ਆਗੂ ਵਿਜੀਲੈਂਸ ਵੱਲੋਂ ਗ੍ਰਿਫ਼ਤਾਰ

            -ਕੰਧ ਟੱਪ ਕੇ ਸਤਿੰਦਰਜੀਤ ਮੰਟਾ ਨੂੰ ਗ੍ਰਿਫ਼ਤਾਰੀ ਨੂੰ ਅੰਜਾਮ ਦਿੱਤਾ-
                                                                -ਇਕਬਾਲ ਸਿੰਘ ਸ਼ਾਂਤ-
''ਗੈਰੋਂ ਮੇਂ ਕਹਾਂ ਦਮ ਥਾਂ, ਮੇਰੀ ਕਿਸ਼ਤੀ ਹੀ ਵਹਾਂ ਡੂਬੀ ਜਹਾਂ ਪਾਣੀ ਕਮ ਥਾਂ।'' ਕੁਝ ਅਜਿਹਾ ਹੀ ਹੋਇਆ ਪਿਛਲੇ ਸਵਾ ਕੁ ਦਹਾਕੇ ਤੋਂ ਅਕਾਲੀ ਦਲ (ਬ) ਵਿਚ ਵਿਚਰਦੇ ਰਹੇ ਹਾਈ-ਪ੍ਰੋਫਾਈਲ ਆਗੂ ਵਜੋਂ ਸਥਾਪਿਤ ਹੋਏ ਪਿੰਡ ਰੋੜਾਂਵਾਲੀ ਦੇ ਜੰਮਪਲ ਸ: ਸਤਿਦਰਜੀਤ ਸਿੰਘ ਮੰਟਾ ਨਾਲ, ਜੋ ਕਿ ਪਿਛਲੀ ਕੈਪਟਨ ਸਰਕਾਰ ਦੌਰਾਨ ਵੋਚ-ਵੋਚ ਕੇ ਪੈਰ ਧਰਦੇ ਰਹੇ ਕਿ  ਕਿਧਰੇ ਕੈਪਟਨ ਹੁਰਾਂ ਦੀਆਂ ਤਿੱਖੀਆਂ ਨਜ਼ਰਾਂ ਦੇ ਅੜਿੱਕੇ ਨਾ ਚੜ੍ਹ ਜਾਣ ਪਰ ਪਿਛਲੇ ਮਹੀਨਿਆਂ ਦੌਰਾਨ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸ. ਗੁਰਦਾਸ ਸਿੰਘ ਬਾਦਲ ਦੇ ਪਰਿਵਾਰ ਵਿਚਕਾਰ ਆਈ ਤਰੇੜ ਉਪਰੰਤ ਪੀ.ਪੀ.ਪੀ. ਦਾ ਮੁੱਖ ਹਿੱਸਾ ਜਾ ਬਣੇ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਬੀਤੀ ਰਾਤ ਲਗਭਗ 10 ਵਜੇ ਪੰਜਾਬ ਵਿਜੀਲੈਂਸ ਬਿਊਰੋ ਦੀ ਇੱਕ ਉੱਚ ਪੱਧਰੀ ਟੀਮ ਨੇ ਪਿੰਡ ਰੋੜਾਂਵਾਲੀ (ਹਲਕਾ ਲੰਬੀ) ਵਿਚੋਂ ਉਨ੍ਹਾਂ ਦੇ ਘਰ ਵਿਚੋਂ ਗ੍ਰਿਫ਼ਤਾਰ ਕਰ ਲਿਆ ਗਿਆ।
              ਦੂਜੇ ਪਾਸੇ ਵਿਜੀਲੈਂਸ ਨੇ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਵੱਡਾ ਭ੍ਰਿਸ਼ਟਾਚਾਰੀ ਦੱਸਿਆ ਹੈ। ਵਿਜੀਲੈਂਸ ਬਿਊਰੋ ਦੇ ਸੁਤਰਾਂ ਨੇ ਕਿਹਾ ਕਿ ਉਕਤ ਵਿਅਕਤੀ ਨੇ ਜੱਟ ਹੋਣ ਦੇ ਬਾਵਜੂਦ ਹਰੀਜਨ ਖਾਤੇ ਵਿਚੋਂ ਤਿੰਨ ਪੈਟਰੋਲ ਪੰਪ ਲਏ ਸਨ।
ਇਸ ਤੋਂ ਇਲਾਵਾ ਮੰਟਾ ਦੀ ਰੇਤ ਅਤੇ ਸ਼ਰਾਬ ਦੇ ਠੇਕਿਆਂ 'ਚ ਵੀ ਹਿੱਸੇਦਾਰੀ ਸੀ। ਵਿਜੀਲੈਂਸ ਬਿਊਰੋ ਦੇ ਸੂਤਰਾਂ ਨੇ ਦੱਸਿਆ ਕਿ ਮੰਟਾ ਦੇ ਨਾਂ ਕਈ ਬੇ-ਨਾਮੀ ਜਾਇਦਾਦਾਂ ਵੀ ਹਨ ਤੇ ਵਿਜੀਲੈਂਸ ਵੱਲੋਂ ਉਸ ਦੇ ਪਿਤਾ ਦੀ ਭਾਲ ਕੀਤੀ ਜਾ ਰਹੀ ਹੈ। ਹਾਲਾਂਕਿ ਮਨਪ੍ਰੀਤ ਬਾਦਲ ਦੇ ਪਿਤਾ ਅਤੇ ਪ੍ਰਕਾਸ਼ ਸਿੰਘ ਬਾਦਲ ਦੇ ਭਰਾ ਗੁਰਦਾਸ ਬਾਦਲ ਨੇ ਇਸ ਘਟਨਾਕ੍ਰਮ ਨੂੰ ਸਿਆਸੀ ਸਾਜ਼ਿਸ਼ ਕਰਾਰ ਦਿੱਤਾ ਹੈ। ਉਨ੍ਹਾਂ ਕਿਹਾ ਕਿ ਵਿਜੀਲੈਂਸ ਦੀ ਇਸ ਕਾਰਵਾਈ ਨਾਲ ਸਪੱਸ਼ਟ ਹੋ ਗਿਆ ਹੈ ਕਿ ਇਸ ਵੱਲੋਂ ਪਹਿਲਾਂ ਵੀ ਕਈ ਵਾਰ ਬੇਗੁਨਾਹ ਲੋਕਾਂ ਵਿਰੁੱਧ ਸਿਆਸੀ ਰੰਜ਼ਿਸ਼ ਤਹਿਤ ਮਾਮਲੇ ਦਰਜ ਕੀਤੇ ਜਾਂਦੇ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸਤਿੰਦਰਜੀਤ ਸਿੰਘ ਮੰਟਾ ਜੋ ਕਿ ਹੁਣ ਮਨਪ੍ਰੀਤ ਦਾ ਹਮਾਇਤੀ ਬਣ ਗਿਆ ਹੈ, ਨੇ ਕਿਸੇ ਵੇਲੇ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਜਿਤਾਉਣ 'ਚ ਵੱਡੀ ਭੂਮਿਕਾ ਨਿਭਾਈ ਸੀ।

             ਦੱਸਿਆ ਜਾਂਦਾ ਹੈ ਕਿ ਵਿਜੀਲੈਂਸ ਟੀਮ ਨੇ ਸਤਿੰਦਰਜੀਤ ਸਿੰਘ ਮੰਟਾ ਦੇ ਘਰ ਵਿਚ ਕਾਰਵਾਈ ਕਰਨ ਸਮੇਂ ਪਹਿਲਾਂ ਘਰ ਦੀ ਬਿਜਲੀ ਦਾ ਕੁਨੈਕਸ਼ਨ ਕਟਵਾ ਦਿੱਤਾ ਗਿਆ ਤੇ ਦੀਵਾਰ ਲੰਘ ਕੇ ਟੀਮ 'ਚ ਸ਼ਾਮਲ ਕਰਮਚਾਰੀ ਸਤਿੰਦਰਜੀਤ ਸਿੰਘ ਮੰਟਾ ਦੀ ਰਿਹਾਇਸ਼ ਵਿਚ ਸ਼ਾਮਲ ਹੋਏ।

ਮੌਕੇ ਦੇ ਪ੍ਰਤੱਖਦਰਸ਼ੀ ਅਤੇ ਪਿਛਲੇ 6 ਦਿਨਾਂ ਤੋਂ ਸਤਿੰਦਰਜੀਤ ਸਿੰਘ ਮੰਟਾ ਦੇ ਗ੍ਰਹਿ ਵਿਖੇ ਸੰਪਟ ਅਖੰਡ ਪਾਠ ਕਰ ਰਹੇ ਸ੍ਰੀ ਨਾਨਕਸਰ ਕਲੇਰਾਂ ਦੇ 10 ਮੈਂਬਰੀ ਪਾਠੀ ਸਿੰਘਾਂ ਦੇ ਜਥੇ ਦੇ ਮੁਖੀ ਭਾਈ ਸਤਨਾਮ ਸਿੰਘ ਨੇ ਬੀਤੀ ਰਾਤ ਨੂੰ ਸ੍ਰੀ ਮੰਟਾ ਦੇ ਘਰ ਵਾਪਰੇ ਘਟਨਾਕ੍ਰਮ ਦੀ ਪਲ-ਪਲ ਦੀ ਸੂਚਨਾ ਦਿੰਦਿਆਂ ਵਿਜੀਲੈਂਸ ਟੀਮ ਦੇ ਮੈਂਬਰਾਂ 'ਤੇ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੀ ਹਾਜਰੀ 'ਚ’ਜੁੱਤਿਆਂ ਸਮੇਤ ਲੰਘਣ ਦਾ ਦੋਸ਼ ਲਾਉਂਦਿਆਂ ਦੱਸਿਆ ਕਿ ਲਗਭਗ 10 ਕੁ ਵਜੇ ਜਦੋਂ ਉਹ ਅਖੰਡ ਪਾਠ ਕਰਦੇ ਸਮੇਂ ਵਾਰੀ ਤੋਂ ਉੱਠ ਕੇ ਆਪਣੇ ਕਮਰੇ ਵਿਚ ਪਰਤੇ ਰਹੇ ਸਨ ਤਾਂ ਉਸੇ ਦੌਰਾਨ ਅਚਨਚੇਤ ਘਰ ਦੀ ਬਿਜਲੀ ਚਲੀ ਗਈ। ਉਸੇ ਦੌਰਾਨ 4-5 ਜਣੇ ਦੀਵਾਰਾਂ ਲੰਘ ਕੇ ਘਰ ਦੇ ਅੰਦਰ ਆ ਘੁਸੇ ਅਤੇ ਮੁੱਖ ਦਰਵਾਜ਼ਾ ਖੋਲ੍ਹ ਦਿੱਤਾ। ਉਨ੍ਹਾਂ ਆਖਿਆ ਫਿਰ 100-150 ਖਾਕੀ ਤੇ ਸਾਦੀ ਵਰਦੀ 'ਚ ਕਰਮਚਾਰੀਆਂ ਨੇ ਘਰ ਦੇ ਅੰਦਰ ਅਤੇ ਬਾਹਰ ਘੇਰਾ ਪਾ ਲਿਆ ਲਿਆ। ਜਿਨ੍ਹਾਂ ਦੀ ਅਗਵਾਈ ਕਈ ਸੀਨੀਅਰ ਵਿਜੀਲੈਂਸ ਅਤੇ ਪੁਲਿਸ ਅਧਿਕਾਰੀ ਵੀ ਮੌਜੂਦ ਸਨ।
                ਭਾਈ ਸਤਨਾਮ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਦੇ ਕਮਰੇ ਵਿਚ ਪੁੱਜ ਕੇ ਪੁਲਿਸ ਕਰਮਚਾਰੀਆਂ ਨੇ ਉਨ੍ਹਾਂ ਨਾਲ ਅਤੇ ਹੋਰਨਾਂ ਪਾਠੀ ਸਿੰਘਾਂ ਨਾਲ ਬਦਤਮੀਜੀ ਵੀ ਕੀਤੀ ਅਤੇ ਅਪਸ਼ਬਦ ਵੀ ਬੋਲੇ ਤੇ ਸਤਿੰਦਰਜੀਤ ਸਿੰਘ ਮੰਟਾ ਬਾਰੇ ਪੁੱਛ-ਗਿੱਛ ਕਰਨ ਲੱਗੇ। ਭਾਈ ਸਤਨਾਮ ਸਿੰਘ ਨੇ ਦੱਸਿਆ ਕਿ ਜਦੋਂ ਅਸੀਂ ਆਪਣੀ ਪਛਾਣ ਦੱਸੀ ਤਾਂ ਪੁਲਿਸ ਵਾਲਿਆਂ ਨੇ ਸਾਨੂੰ ਸਭ ਨੂੰ ਥਾਈਂ ਖੜ੍ਹੇ ਰਹਿਣ ਦੀ ਤਾਕੀਦ ਕੀਤੀ ਤੇ ਦਨਦਨਾਉਂਦੇ ਕੋਠੀ ਦੇ ਅੰਦਰਲੇ ਹਿੱਸੇ ਵਿਚ ਚਲੇ ਗਏ। ਉਨ੍ਹਾਂ ਕਿਹਾ ਕਿ ਕੋਠੀ ਦੇ ਬਰਾਮਦੇ ਸਾਹਮਣੇ ਬਣੇ ਇੱਕ ਕਮਰੇ 'ਚ ਸੰਪਟ ਅਖੰਡ ਪਾਠ ਚੱਲ ਰਿਹਾ ਸੀ ਅਤੇ ਰਾਗੀ ਸਿੰਘ ਕੀਰਤਨ  ਕਰ ਰਹੇ ਸਨ। ਗੁਰੂ ਗ੍ਰੰਥ ਸਾਬ੍ਹ ਦੇ ਪਾਠ ਚੱਲਦੇ ਹੋਣ ਕਰਕੇ ਕਥਿਤ ਤੌਰ 'ਤੇ ਜੁੱਤਿਆਂ ਸਮੇਤ ਅਗਾਂਹ ਜਾਣੋਂ ਰੋਕਣ ਦੇ ਬਾਵਜੂਦ ਟੀਮ ਦੇ ਅਧਿਕਾਰੀ ਅਤੇ ਕਰਮਚਾਰੀ ਜੁੱਤਿਆਂ ਸਮੇਤ ਤੁਰੇ ਫਿਰਦੇ ਰਹੇ। ਉਨ੍ਹਾਂ ਦੋਸ਼ ਲਗਾਇਆ ਕਿ ਟੀਮ ਦੇ ਅਧਿਕਾਰੀਆਂ ਨੇ ਇੱਕ ਪਾਠੀ ਸਿੰਘ ਦਾ ਫੋਨ ਖੋਹ ਲਿਆ ਅਤੇ ਜਦੋਂ ਸ੍ਰੀ ਮੰਟਾ ਦੇ ਘਰ ਵਿਚ ਆਈ ਇੱਕ ਰਿਸ਼ਤੇਦਾਰ ਬੀਬੀ ਉਨ੍ਹਾਂ ਨੂੰ ਰੋਕਣ ਲੱਗੀ ਤਾਂ ਉਸ ਦਾ ਮੋਬਾਇਲ ਫੋਨ ਸੁੱਟ ਕੇ ਤੋੜ ਦਿੱਤਾ।
ਭਾਈ ਸਤਨਾਮ ਸਿੰਘ ਨੇ ਕਿਹਾ ਕਿ ਉਸ ਸਮੇਂ ਸਤਿੰਦਰਜੀਤ ਸਿੰਘ ਮੰਟਾ ਪਾਠ ਤੋਂ ਉੱਠ ਕੇ ਚੁਬਾਰੇ ਵਿਚ ਜਾ ਕੇ ਸੁੱਤੇ ਹੀ ਸਨ ਤਾਂ ਉਕਤ ਟੀਮ ਨੇ ਉਨ੍ਹਾਂ ਨੂੰ ਫੜ ਲਿਆ ਤੇ ਉਸੇ ਦੌਰਾਨ ਅਸੀਂ ਵੇਖਿਆ ਕਿ ਉਹ ਸਤਿੰਦਰਜੀਤ ਮੰਟਾ ਨੂੰ ਘਸੀਟਦੇ ਲਿਜਾ ਰਹੇ ਸਨ। ਉਨ੍ਹਾਂ ਦੱਸਿਆ ਕਿ ਲਗਭਵਗ ਅੱਧੇ ਘੰਟੇ ਤੱਕ ਚੱਲੀ ਕਾਰਵਾਈ ਉਪਰੰਤ ਵਿਜੀਲੈਂਸ ਟੀਮ ਸ੍ਰੀ ਮੰਟਾ ਦੇ ਨਾਲ-ਨਾਲ ਇੱਕ ਇਨੋਵਾ ਗੱਡੀ ਵੀ ਨਾਲ ਲੈ ਗਈ।
                 ਉਸੇ ਦੌਰਾਨ ਮੌਕੇ 'ਤੇ ਮੌਜੂਦ ਹੋਰਨਾਂ ਪਾਠੀ ਸਿੰਘਾਂ ਨੇ ਦੱਸਿਆ ਟੀਮ ਦੇ ਮੈਂਬਰਾਂ ਨੇ ਘਰ ਦੇ ਕਮਰੇ, ਗੁਸਲਖਾਨਿਆਂ ਅਤੇ ਕੋਨੇ ਦੀ ਤਲਾਸ਼ੀ ਲਈ ਤੇ ਵਿਜੀਲੈਂਸ ਟੀਮ ਦੇ ਕੰਮ ਕਰਨ ਦੇ ਢੰਗ ਤੋਂ ਇੰਝ ਜਾਪਦਾ ਸੀ ਕਿ ਜਿਵੇਂ ਉਨ੍ਹਾਂ ਨੂੰ ਹਰ ਦੇ ਚੱਪੇ-ਚੱਪੇ ਬਾਰੇ ਪਹਿਲਾਂ ਤੋਂ ਗਿਆਨ ਹੋਵੇ। ਉਨ੍ਹਾਂ ਦੱਸਿਆ ਕਿ ਸ੍ਰੀ ਮੰਟਾ ਦੀ ਮਾਤਾ ਨੇ ਅਧਿਕਾਰੀਆਂ ਨੂੰ ਪੁੱਛਿਆ ਕਿ ਤੁਸੀਂ ਕਿਹੜੀ ਧਾਰਾ ਤੇ ਕਿਸ ਜੁਰਮ ਤਹਿਤ ਫੜ ਕੇ ਲਿਜਾ ਰਹੇ ਹੋ ਤਾਂ ਟੀਮ ਦੇ ਅਧਿਕਾਰੀਆਂ ਵੱਲੋਂ ਮਿਲਿਆ ਕਿ ''ਵੱਡੇ ਘਰਾਂ ਨਾਲ ਪੰਗੇ ਲੈਂਦੇ ਹੋ ਤੇ ਸਾਡੇ ਤੋਂ ਕਸੂਰ ਪੁੱਛਦੇ ਹੋ।'' ਪੱਤਰਕਾਰਾਂ ਦੇ ਪੁੱਜਣ 'ਤੇ ਪਿੰਡ ਰੋੜਾਂਵਾਲੀ ਵਿਚ ਇੱਕ ਵੱਡੇ ਰਕਬੇ 'ਚ ਬਣੇ ਇੱਕ ਆਲੀਸ਼ਾਨ ਘਰ ਵਿਚ 10-11 ਪਾਠੀ ਸਿੰਘਾਂ ਅਤੇ ਪਿੰਡ ਦੇ ਦੋ ਵਿਅਕਤੀਆਂ ਤੋਂ ਇਲਾਵਾ ਘਰ 'ਚ ਮੰਟਾ ਪਰਿਵਾਰ ਦਾ ਕੋਈ ਮੈਂਬਰ ਮੌਜੂਦ ਨਹੀਂ ਸੀ। ਜਦੋਂ ਪਿੰਡ ਦੇ ਦੋ ਵਿਅਕਤੀਆਂ ਦੇ ਵਿਅਕਤੀਆਂ ਨੂੰ ਪੁੱਛਿਆ ਗਿਆ ਕਿ ਤੁਹਾਨੂੰ ਹਾਕਮਾਂ ਦਾ ਕੋਈ ਡਰ-ਖੌਫ਼ ਨਹੀਂ ਲੱਗਦਾ ਤਾਂ ਉਨ੍ਹਾਂ ਕਿਹਾ ਕਿ ਹਰ ਬੰਦੇ ਨੂੰ ਕਿਸੇ ਨਾ ਕਿਸੇ ਨਾਲ ਖੜ੍ਹਣਾ ਪੈਂਦਾ ਹੈ ਤੇ ਅਸੀਂ ਪੀ.ਪੀ.ਪੀ. ਨਾਲ ਖੜ੍ਹੇ ਹਾਂ।
                ਅੱਜ ਤੜਕੇ ਤੱਕ ਸਤਿੰਦਰਜੀਤ ਸਿੰਘ ਮੰਟਾਂ ਨੂੰ ਵਿਜੀਲੈਂਸ ਵੱਲੋਂ ਗ੍ਰਿਫ਼ਤਾਰ ਕਰਨ ਦੀ ਖ਼ਬਰ ਜੰਗਲ ਦੀ ਅੱਗ ਵਾਂਗ ਫੈਲ ਗਈ ਅਤੇ ਪੂਰਾ ਦਿਨ ਸੂਬੇ ਦੇ ਸਿਆਸੀ ਅਤੇ ਸਮਾਜਿਕ ਗਲਿਆਰਿਆਂ ਵਿਚ ਸ੍ਰੀ ਮੰਟਾ ਦੀ ਗ੍ਰਿਫ਼ਤਾਰੀ ਦਾ ਮਾਮਲਾ ਛਾਇਆ ਰਿਹਾ।
               ਜ਼ਿਕਰਯੋਗ ਹੈ ਕਿ ਮੁੱਖ ਮੰਤਰੀ ਸ. ਗੁਰਦਾਸ ਸਿੰਘ ਬਾਦਲ ਹੁਰਾਂ ਦੀ ਸੱਜੀ ਬਾਂਹ ਅਤੇ ਪੁੱਤਰਾਂ ਵਾਂਗ ਵਿਚਰਦੇ ਸ. ਸਤਿੰਦਰਜੀਤ ਸਿੰਘ ਮੰਟਾ ਦਾ ਅਕਾਲੀ ਦਲ ਛੱਡਣ ਤੋਂ ਪਹਿਲਾਂ ਵੀ ਸਰਕਾਰ 'ਚ ਅਜਿਹਾ ਰੁਤਬਾ ਸੀ ਕਿ ਉਹ ਹਮੇਸ਼ਾਂ ਕਈ-ਕਈ ਸਰਕਾਰੀ ਗੰਨਮੈਨ ਦੇ ਸੁਰੱਖਿਆ ਘੇਰੇ ਵਿਚ ਹੁੰਦੇ ਸਨ ਤੇ ਉਨ੍ਹਾਂ ਦੇ ਕਹੇ ਨੂੰ ਮੋੜਣ ਦੀ ਵੱਡੇ-ਵੱਡੇ ਅਧਿਕਾਰੀਆਂ  ਦੀ ਹਿੰਮਤ ਨਹੀਂ ਸੀ। ਕੈਪਟਨ ਸਰਕਾਰ ਦੌਰਾਨ ਸਤਿੰਦਰਜੀਤ ਸਿੰਘ ਮੰਟਾ ਦੇ ਜ਼ਿਲ੍ਹਾ ਪ੍ਰਧਾਨਗੀ ਤੋਂ ਬਦਲਣ ਤੋਂ ਬਾਅਦ ਦਾਸ ਦੀ ਕ੍ਰਿਪਾ ਦ੍ਰਿਸ਼ਟੀ ਕਰਕੇ ਜ਼ਿਲ੍ਹਾ ਸ਼ਿਕਾਇਤ ਨਿਵਾਰਨ ਅਤੇ ਜ਼ਿਲ੍ਹਾ ਯੋਜਨਾ ਬੋਰਡ 'ਚ ਵਿਰੋਧੀ ਧਿਰ ਦੇ ਨੇਤਾ ਸ: ਬਾਦਲ ਵਜੋਂ ਨਿਯੁਕਤੀ ਕੀਤੀ ਗਈ ਸੀ। ਪਿਛਲੇ ਡੇਢ ਕੁ ਦਹਾਕੇ 'ਚ ਵੱਡੇ ਪੱਧਰ 'ਤੇ ਆਰਥਿਕ ਅਤੇ ਸਮਾਜਿਕ ਤਰੱਕੀ ਕਰਨ ਵਾਲੇ ਸਤਿੰਦਰਜੀਤ ਸਿੰਘ ਮੰਟਾ ਫਿਰੋਜ਼ਪੁਰ ਜ਼ਿਲ੍ਹੇ ਆਦਿ ਦੇ ਰੇਤੇ ਦੇ ਠੇਕਿਆਂ ਨੂੰ ਲੈ ਕੇ ਵੀ ਚਰਚਾ ਵਿਚ ਬਣੇ ਰਹੇ ਸਨ।
               ਇਸ ਬਾਰੇ 'ਚ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪੁਲਿਸ ਮੁਖੀ ਸ੍ਰੀ ਇੰਦਰਮੋਹਣ ਸਿੰਘ ਨੇ ਸੰਪਰਕ ਕਰਨ 'ਤੇ ਕਿਹਾ ਕਿ ਵਿਜੀਲੈਂਸ ਬਿਊਰੋ ਦੀ ਮੁਹਾਲੀ ਟੀਮ ਨੇ ਕਿਸੇ ਕੇਸ ਦੇ ਸਿਲਸਿਲੇ 'ਚ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਗ੍ਰਿਫ਼ਤਾਰ ਕੀਤਾ ਹੈ ਅਤੇ ਉਨ੍ਹਾਂ ਨੂੰ ਇਸ ਬਾਰੇ ਹੋਰ ਕੋਈ ਜਾਣਕਾਰੀ ਨਹੀਂ।

ਸਤਿੰਦਰਜੀਤ ਮੰਟਾ ਦੀ ਗ੍ਰਿਫ਼ਤਾਰੀ ਲਈ ਮੁੱਖ ਮੰਤਰੀ ਬਾਦਲ ਜੁੰਮੇਵਾਰ : ਗੁਰਦਾਸ ਸਿੰਘ ਬਾਦਲ
ਪੰਜਾਬ ਦੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਛੋਟੇ ਭਰਾ ਅਤੇ ਪੀ. ਪੀ. ਪੀ. ਦੇ ਮੁੱਖ ਆਗੂ ਮਨਪ੍ਰੀਤ ਸਿੰਘ ਬਾਦਲ ਦੇ ਪਿਤਾ ਸ. ਗੁਰਦਾਸ ਸਿੰਘ ਬਾਦਲ ਸਾਬਕਾ ਸਾਂਸਦ ਨੇ 20-21 ਮਈ ਦੀ ਵਿਚਕਾਰਲੀ ਰਾਤ ਨੂੰ ਪੰਜਾਬ ਵਿਜੀਲੈਂਸ ਬਿਊਰੋ ਦੀ ਇੱਕ ਟੀਮ ਵੱਲੋਂ ਪੰਜਾਬ ਪੀਪਲਜ ਪਾਰਟੀ ਆਫ ਪੰਜਾਬ ਦੇ ਸੀਨੀਅਰ ਆਗੂ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਨੇੜਲੇ ਪਿੰਡ ਰੋੜਾਂਵਾਲੀ ਵਿਖੇ ਘਰ ਵਿਚੋਂ ਗ੍ਰਿਫ਼ਤਾਰੀ ਕਰਨ ਲਈ ਆਪਣੇ ਵੱਡੇ ਭਰਾ ਅਤੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੂੰ ਸਿੱਧੇ ਤੌਰ 'ਤੇ ਜੁੰਮੇਵਾਰ ਕਰਾਰ ਦਿੰਦਿਆਂ ਕਿਹਾ ਕਿ ਬੇਗੁਨਾਹ ਤੇ ਇੱਕ ਸ਼ਰੀਫ ਆਗੂ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਕੇਸ ਵਿਚ ਉਲਝਾਉਣ ਪਿੱਛੇ ਪੀ.ਪੀ.ਪੀ. ਦੀ ਦਿਨੋਂ-ਦਿਨ ਵਧਦੀ ਹੋਂਦ ਤੋਂ ਬੌਖਲਾਹਟ ਸਪੱਸ਼ਟ ਜਾਹਰ ਹੁੰਦੀ ਹੈ।
               ਉਨ੍ਹਾਂ ਅੱਜ ਪਿੰਡ ਬਾਦਲ ਵਿਖੇ ਮਨਪ੍ਰੀਤ ਸਿੰਘ ਬਾਦਲ ਦੀ ਰਿਹਾਇਸ਼ 'ਤੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਕਿਹਾ ਕਿ ਪੀ.ਪੀ.ਪੀ. ਦੀ ਪਹਿਲੀ ਛੱਤੇਆਣਾ ਪਿੰਡ ਦੀ ਸਫਲ ਰੈਲੀ ਅਤੇ ਮੁਕਤਸਰ ਮਾਘੀ ਮੇਲਾ ਕਾਨਫਰੰਸ ਨੂੰ ਮਿਲੀ ਭਾਰੀ ਸਫਲਤਾ ਦੇ ਬਾਅਦ ਤੋਂ ਸਾਡੀ ਪਾਰਟੀ ਦੇ ਚਰਨਜੀਤ ਸਿੰਘ, ਜਗਤਾਰ ਸਿੰਘ ਅਤੇ ਸ. ਅਮਰਜੀਤ ਸਿੰਘ ਮੱਲਣ ਜਿਹੇ ਆਗੂਆਂ ਨੂੰ ਝੂਠੇ ਕੇਸਾਂ ਵਿਚ ਫਸਾਉਣ ਦਾ ਸਿਲਸਿਲਾ ਲਗਾਤਾਰ ਜਾਰੀ ਹੈ ਅਤੇ ਜਿਸ ਢੰਗ ਨਾਲ ਕੱਲ੍ਹ ਰਾਤ ਲਗਭਗ 11 ਵਜੇ ਵਿਜੀਲੈਂਸ ਟੀਮ ਵੱਲੋਂ ਸਤਿੰਦਰਜੀਤ ਸਿੰਘ ਮੰਟਾ ਦੇ ਘਰ ਨੂੰ ਘੇਰਾ ਪਾ ਕੇ ਕੰਧਾਂ ਤੋਂ ਟੱਪ ਕੇ ਘਰ 'ਚ ਘੁਸ ਕੇ ਉਸਨੂੰ ਸੁੱਤੇ ਪਏ ਹਾਲਤ ਵਿਚ ਗ੍ਰਿਫ਼ਤਾਰ ਕਰਕੇ ਲੈ ਗਏ। ਉਨ੍ਹਾਂ ਕਿਹਾ ਕਿ ਵਿਜੀਲੈਂਸ ਦੀ ਉਕਤ ਕਾਰਵਾਈ ਨੇ ਸਰਕਾਰ ਦੇ ਲੋਕਤਾਂਤਰਿਕ ਢੰਗ ਨਾਲ ਕੰਮ ਕਰਨ ਦੀ ਪੋਲ ਖੋਲ੍ਹ ਕੇ ਰੱਖ ਦਿੱਤੀ ਹੈ। ਉਨ੍ਹਾਂ ਕਿਹਾ ਕਿ ਜੇਕਰ ਸਰਕਾਰ ਨੂੰ ਕਿਸੇ ਮਾਮਲੇ 'ਚ ਕੋਈ ਸ਼ੱਕ ਸੀ ਤਾਂ ਉਸਨੂੰ ਕੰਧਾ ਟੱਪ ਕੇ ਫੜਣ ਦੀ ਕੀ ਲੋੜ ਸੀ ਉਸਨੇ ਤਾਂ ਖੁਦ ਹੀ ਪੇਸ਼ ਹੋ ਜਾਣਾ ਸੀ। ਸਾਬਕਾ ਸਾਂਸਦ ਨੇ ਕਿਹਾ ਕਿ ਸਰਕਾਰ ਦੇ ਇਸ਼ਾਰੇ 'ਤੇ ਮੰਟਾ ਖਿਲਾਫ ਚੰਲ ਰਹੀਆਂ ਕਾਰਗੁਜਾਰੀਆਂ ਬਾਰੇ ਮੰਟਾ ਨੇ ਪਹਿਲਾਂ ਹੀ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਵਿਚ ਇੱਕ ਦਰਖਾਸਤ ਲਾਈ ਹੋਈ ਹੈ।
ਸ੍ਰੀ ਬਾਦਲ ਨੇ ਕਿਹਾ ਬੀਤੇ ਵਿਧਾਨਸਭਾ ਚੋਣਾਂ ਵਿਚ ਲੰਬੀ ਹਲਕੇ ਤੋਂ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀ ਜਿੱਤ ਵਿਚ ਸਤਿੰਦਰਜੀਤ ਸਿੰਘ ਮੰਟਾ ਦਾ ਮੁੱਖ ਰੋਲ ਰਿਹਾ ਹੈ ਤੇ ਅਕਾਲੀ ਦਲ ਦੀ ਜਿੱਤ ਵੀ ਮੰਟਾ ਦੇ ਪ੍ਰਭਾਵ ਵਾਲੇ ਪਿੰਡਾਂ ਵਿਚੋਂ ਵੋਟਾਂ ਵਧਣ ਕਰਕੇ ਸੰਭਵ ਹੋ ਸਕੀ। ਉਨ੍ਹਾਂ ਆਪਣੇ ਵੱਡੇ ਭਰਾ ਪਾਸ਼ ਹੁਰਾਂ ਨੂੰ ਮੌਜੂਦਾ ਹਾਲਾਤਾਂ ਵਿਚ ਬੇਵੱਸ ਕਰਾਰ ਦਿੰਦਿਆਂ ਕਿਹਾ ਕਿ ਸਤਿੰਦਰਜੀਤ ਮੰਟਾ ਖਿਲਾਫ਼ ਵਿਜੀਲੈਂਸ ਬਿਊਰੋ ਵੱਲੋਂ ਪਿਛਲੇ ਦਿਨ੍ਹਾਂ ਤੋਂ ਜਾਰੀ ਕਾਰਵਾਈਆਂ ਬਾਰੇ ਉਨ੍ਹਾਂ ਮੁੱਖ ਮੰਤਰੀ ਸ: ਬਾਦਲ ਨੂੰ ਕਿਹਾ ਕਿ ਸੀ  ਕਿ ਮੰਟਾ ਅਕਾਲੀ ਦਲ ਦਾ ਵਫ਼ਾਦਾਰ ਵਰਕਰ ਰਿਹਾ ਹੈ ਤੇ ਅਜਿਹੇ ਵਿਅਕਤੀ ਖਿਲਾਫ਼ ਸਿਆਸੀ ਬਦਲਾਖੋਰੀ ਤਹਿਤ ਕਾਰਵਾਈ ਦੀ ਕੋਈ ਤੁੱਕ ਨਹੀਂ ਬਣਦੀ। ਉਨ੍ਹਾਂ ਆਖਿਆ ਕਿ ਪਾਸ਼ ਹੁਰਾਂ ਨੇ ਭਰੋਸਾ ਦਿਵਾਇਆ ਸੀ ਕਿ ਓੜਾ ਹੀ ਕਾਰਵਾਈ ਨਹੀਂ ਹੋਵੇਗੀ ਪਰ ਕੱਲ੍ਹ ਦੀ ਵਿਜੀਲੈਂਸ ਕਾਰਵਾਈ ਨੇ ਮੁੱਖ ਮੰਤਰੀ ਦੀ ਬੇਵੱਸੀ ਜਾਹਰ ਕਰ ਦਿੱਤੀ ਹੈ।
           ਜਿੱਥੇ ਸ੍ਰੀਮਤੀ ਸੁਰਿੰਦਰ ਕੌਰ ਬਾਦਲ ਪੀ.ਜੀ.ਆਈ. ਚੰਡੀਗੜ੍ਹ ਵਿਚ ਜ਼ਿੰਦਗੀ-ਮੌਤ ਦੀ ਲੜਾਈ ਲੜ ਰਹੇ ਹਨ, ਉਥੇ ਅਜਿਹੀਆਂ ਕਾਰਵਾਈ ਸ਼ੋਭਾ ਨਹੀਂ ਦਿੰਦੀਆਂ। ਉਨ੍ਹਾਂ ਕਿਹਾ ਕਿ ਹੁਣ ਮੈਨੂੰ ਪਤਾ ਲੱਗਦਾ ਹੈ ਕਿ ਪਹਿਲਾਂ ਵੀ ਬਾਹਰਲੇ ਹਲਕਿਆਂ ਵਿਚ ਝੂਠੇ ਪਰਚੇ ਦਰਜ ਕੀਤੇ ਜਾਂਦੇ ਸਨ ਪਰ ਮੈਂ ਮੰਨਦਾ ਨਹੀਂ ਸੀ ਕਿ ਬਾਦਲ ਜਿਹੇ ਵਧੀਆ ਮੁੱਖ ਮੰਤਰੀ ਦੇ ਰਾਜ ਵਿਚ ਅਜਿਹਾ ਨਹੀਂ ਹੋ ਸਕਦਾ ਪਰ ਕੱਲ੍ਹ ਰਾਤ ਦੀ ਕਾਰਵਾਈ ਨੇ ਉਨ੍ਹਾਂ ਗੱਲਾਂ ਨੂੰ ਸੱਚ ਸਾਬਤ ਕਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਲੋਕ ਵੋਟਾਂ ਪਿਆਰ ਅਤੇ ਸਤਿਕਾਰ ਨਾਲ ਪਾਉਂਦੇ ਹਨ ਤੇ ਜਿਹੜੀਆਂ ਪਾਰਟੀਆਂ ਝੂਠੇ ਮਾਮਲੇ ਦਰਜ ਕਰਕੇ ਦਬਾਉਣ ਦੀ ਰਾਹ ਤੁਰਦੀਆਂ ਹਨ ਉਹ ਆਪਣਾ ਵਜੂਦ ਗੁਆਉਂਦੀ ਚਾਹੁੰਦੀਆਂ ਹਨ।
              ਸ੍ਰੀ ਮੰਟਾ ਖਿਲਾਫ ਮਾਮਲਾ ਦਰਜ ਹੋਣ ਉਪਰੰਤ ਪੀ.ਪੀ.ਪੀ. ਦਾ ਅਗਾਮੀ ਸਟੈਂਡ ਪੁੱਛੇ ਜਾਣ ਬਾਰੇ ਸ. ਗੁਰਦਾਸ ਸਿੰਘ ਬਾਦਲ ਨੇ ਕਿਹਾ ਕਿ ਪੰਜਾਬ ਵਿਜੀਲੈਂਸ ਟੀਮ (ਮੁਹਾਲੀ) ਵੱਲੋਂ ਕੀਤੀ ਗਈ ਇਸ ਗੁੱਪ-ਚੁੱਪ ਕਾਰਵਾਈ ਦੇ ਵਿਰੋਧ ਵਿਚ ਲੰਬੀ ਥਾਣੇ ਜਾਂ ਹੋਰ ਸਰਕਾਰੀ ਦਫ਼ਤਰਾਂ ਮੁਹਰੇ ਧਰਨੇ ਮੁਜਾਹਰੇ ਕਰਨ ਦਾ ਤੁੱਕ ਨਹੀਂ ਬਣਦਾ। ਇਸ ਲਈ ਦਰਜ ਕੀਤੇ ਝੂਠੇ ਮਾਮਲੇ ਦੇ ਵਿਰੋਧ ਵਿਚ ਕਾਨੂੰਨੀ ਚਾਰਾਜੋਈ ਕੀਤੀ ਜਾਵੇਗੀ। ਇਸ ਮੌਕੇ ਨਛੱਤਰ ਸਿੰਘ ਕਰਾਈਵਾਲਾ, ਨਿਰਮਲ ਸਿੰਘ ਵਣਵਾਲਾ, ਜਿੰਮੀ ਮਹਿਣਾ ਅਤੇ ਗੁਰਚਰਨ ਸਿੰਘ ਮੈਂਬਰ ਮਿਠੜੀ ਬੁੱਧਗਿਰ ਸਮੇਤ ਹੋਰ ਸੈਂਕੜੇ ਵਰਕਰ ਵੀ ਮੌਜੂਦ ਸਨ।

    ਮੰਟਾ ਨੂੰ ਲੰਬੀ ਤੋਂ ਚੋਣ ਲੜਾਉਣ ਦੀ ਸਿਫਾਰਸ਼ ਕਰਨਗੇ ਗੁਰਦਾਸ ਬਾਦਲ

ਪਰੱਪਕ ਸਿਆਸੀ ਆਗੂ ਸ. ਗੁਰਦਾਸ ਸਿੰਘ ਬਾਦਲ ਨੇ ਵਿਜੀਲੈਂਸ ਬਿਊਰੋ ਵੱਲੋਂ ਗ੍ਰਿਫ਼ਤਾਰ ਕੀਤੇ ਗਏ ਪੀ.ਪੀ.ਪੀ. ਦੇ ਸੀਨੀਅਰ ਆਗੂ  ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਲੰਬੀ ਵਿਧਾਨਸਭਾ ਹਲਕੇ ਤੋਂ ਚੋਣ ਲੜਾਉਣ ਦਾ ਇਸ਼ਾਰਾ ਦਿੰਦਿਆਂ ਕਿਹਾ ਕਿ ਉਹ ਮੰਟਾ ਦੀਆਂ ਪਾਰਟੀ ਪ੍ਰਤੀ ਵਫ਼ਾਦਾਰੀ ਅਤੇ ਬੇਦਾਗ ਸ਼ਖਸੀਅਤ ਕਰਕੇ ਉਸਨੂੰ ਪੀ.ਪੀ.ਪੀ. ਵੱਲੋਂ ਲੰਬੀ ਹਲਕੇ ਤੋਂ ਚੋਣ ਲੜਾਉਣ ਦੀ ਸਿਫਾਰਸ਼ ਕਰਨਗੇ। ਇੱਥੇ ਜ਼ਿਕਰਯੋਗ ਹੈ ਕਿ ਪੀ.ਪੀ.ਪੀ ਦੇ ਮੁੱਖ ਆਗੂ ਸ. ਮਨਪ੍ਰੀਤ ਸਿੰਘ ਬਾਦਲ ਵੱਲੋਂ ਆਪਣੇ ਪਿਤਾ ਸ. ਗੁਰਦਾਸ ਸਿੰਘ ਬਾਦਲ ਨੂੰ ਲੰਬੀ ਹਲਕੇ ਤੋਂ ਚੋਣ ਲੜਾਉਣ ਦਾ ਐਲਾਨ ਕੀਤਾ ਹੋਇਆ ਹੈ। ਜਿਸ ਬਾਰੇ ਪਿਛਲੇ ਕਾਫੀ ਸਮੇਂ ਤੋਂ ਵੱਖ-ਵੱਖ ਕਣਸੋਆਂ ਸਮੇਂ-ਸਮੇਂ 'ਤੇ ਸੁਣਨ ਨੂੰ ਮਿਲਦੀਆਂ ਰਹੀਆਂ ਸਨ। ਪਰ ਸ੍ਰੀ ਗੁਰਦਾਸ ਸਿੰਘ ਬਾਦਲ ਨੇ ਅੱਜ ਸਤਿੰਦਰਜੀਤ ਮੰਟਾ ਨੂੰ ਚੋਣ ਲੜਾਉਣ ਦੀ ਸਿਫਾਰਸ਼ ਕਰਨ ਬਾਰੇ ਕਹਿ ਕੇ ਆਪਣੀ ਭਵਿੱਖੀ ਰਣਨੀਤੀ ਨੂੰ ਉਜਾਗਰ ਕੀਤਾ ਹੈ।

ਪਟਵਾਰਖਾਨੇ 'ਚ ਚੱਲ ਰਿਹੈ ਸ਼ਰਾਬ ਦਾ ਠੇਕਾ

                 -ਕਿਰਾਏ ਵਜੋਂ ਗੁਰਦੁਆਰੇ ਨੂੰ ਦਾਨ ਦੇਣਾ ਹੋਇਆ ਤੈਅ-
                                                     -ਇਕਬਾਲ ਸਿੰਘ ਸ਼ਾਂਤ-
              ਪਿਛਲੇ ਦਿਨ੍ਹਾਂ ਦੌਰਾਨ ਬਠਿੰਡਾ ਜ਼ਿਲ੍ਹੇ ਦੇ ਪਿੰਡ ਸੇਲਬਰਾਹ 'ਚ ਨਿੱਜੀ ਥਾਂ 'ਤੇ ਸ਼ਰਾਬ ਦਾ ਠੇਕੇ ਖੋਲ੍ਹਣ ਦੇ ਵਿਰੋਧ ਕਰਕੇ ਆਮ ਜਨਤਾ ਅਤੇ ਪੁਲਿਸ-ਪ੍ਰਸ਼ਾਸਨ ਵਿਚਕਾਰ ਤਣਾਅ ਬਾਅਦ ਪੂਰਾ ਪੰਜਾਬ ਭਖਿਆ ਹੋਇਆ ਹੈ, ਪਰ ਮੁੱਖ ਮੰਤਰੀ ਦੇ ਜੱਦੀ ਹਲਕੇ 'ਚ ਸੱਤਾ ਪੱਖ ਦੇ ਝੰਡਾਬਰਦਾਰ ਅਖਵਾਉਂਦੇ ਸ਼ਰਾਬ ਠੇਕੇਦਾਰਾਂ ਦੇ ਹੌਂਸਲੇ ਇੰਨੇ ਬੁਲੰਦ ਹਨ ਕਿ ਉਹ ਸਰਕਾਰੀ ਵਿਭਾਗਾਂ ਦੀਆਂ ਖਾਲੀ ਪਈਆਂ ਇਮਾਰਤਾਂ 'ਚ ਸ਼ਰਾਬ ਦੇ ਠੇਕੇ ਖੋਲ੍ਹਣ ਤੋਂ ਗੁਰੇਜ਼ ਨਹੀਂ ਕਰਦੇ। ਹਲਕੇ ਦੇ ਛੇਕੜਲੇ ਪਿੰਡ ਕਿੱਲਿਆਂਵਾਲੀ ਵਿਖੇ ਸ਼ਰਾਬ ਦੇ ਠੇਕੇਦਾਰ ਵੱਲੋਂ ਕੇਂਦਰੀ ਪਟਵਾਰਖਾਨੇ ਕਿੱਲਿਆਂਵਾਲੀ ਦੀ ਖਾਲੀ ਪਈ ਇਮਾਰਤ 'ਚ ਧੜੱਲੇ ਨਾਲ ਸ਼ਰਾਬ ਦਾ ਠੇਕਾ ਚੱਲ ਰਿਹਾ ਹੈ।

ਪਿੰਡ ਕਿੱਲਿਆਂਵਾਲੀ ਦੇ ਕੇਂਦਰੀ ਪਟਵਾਰਖਾਨੇ ਦੇ ਬਾਹਰੀ ਦ੍ਰਿਸ਼।

                 ਦੱਸਣਯੋਗ ਕਿ ਪਿੰਡ ਕਿੱਲਿਆਂਵਾਲੀ ਵਿਖੇ ਗੁਰਦੁਆਰੇ ਦੇ ਨਜ਼ਦੀਕ ਇੱਕੋ ਚਾਰਦੀਵਾਰੀ ਵਾਲੇ ਰਕਬੇ ਵਿਚ ਆਂਗਣਵਾੜੀ ਕੇਂਦਰ, ਸਰਕਾਰੀ ਡਿਸਪੈਂਸਰੀ ਅਤੇ ਕੇਂਦਰੀ ਪਟਵਾਰਖਾਨਾ ਬਣਿਆ ਹੋਇਆ ਹੈ। ਕੇਂਦਰੀ ਪਟਵਾਰਖਾਨੇ ਦੀ ਇਮਾਰਤ ਨਿਰਮਾਣ ਦੇ ਬਾਅਦ ਤੋਂ ਹੀ ਲਗਭਗ ਬੇਆਬਾਦ ਹੀ ਰਹੀ ਹੈ ਤੇ ਉਸਨੂੰ ਸ਼ਾਇਦ ਕਦੇ ਪਟਵਾਰੀਆਂ ਦੇ ਚਰਨ ਪੈਣੇ ਨਸੀਬ ਨਹੀਂ ਹੋਏ ਪਰ ਹੁਣ ਸ਼ਰਾਬ ਦੇ ਠੇਕੇ ਵਾਲਿਆਂ ਦੀ ਨਿਗਾਹ ਚੜ੍ਹੇ ਪਟਵਾਰਖਾਨੇ ਦੇ ਮੁਹਰੇ ਨਿੱਤ ਸ਼ਰਾਬੀਆਂ ਦੀ ਮਹਿਫ਼ਿਲ ਲੱਗਦੀ ਹੈ ਅਤੇ ਫਰਦਾਂ ਤੇ ਇੰਤਕਾਲਾਂ ਦੀ ਥਾਂ ਕਦੇ ਦੇਸੀ ਦੇ ਅੱਧੀਏ-ਪਊਏ ਅਤੇ ਕਦੇ ਅੰਗਰੇਜ਼ੀ ਦੀਆਂ ਬੋਤਲਾਂ ਮਿਲਦੀਆਂ ਹਨ। ਭਾਵੇਂਕਿ ਪਟਵਾਰਖਾਨੇ ਦੀ ਹਾਲਤ ਕਾਫ਼ੀ ਖਸਤਾ ਹੋ ਚੁੱਕੀ ਹੈ ਅਤੇ ਇੱਕ-ਦੋ ਬੇਮਕਾਨੇ ਦਲਿਤ ਪਰਿਵਾਰ ਆਪਣੇ ਵੇਲਾ ਲੰਘਾ ਰਹੇ ਹਨ। ਪਟਵਾਰਖਾਨੇ ਦੀ ਇਮਾਰਤ ਦੇ ਮੁਹਰਲੇ ਕਮਰੇ ਵਿਚ ਚੱਲੇ ਰਹੇ ਦੇਸੀ ਸ਼ਰਾਬ ਠੇਕੇ ਤੋਂ ਮਹਿਜ਼ 30-40 ਮੀਟਰ ਦੀ ਦੂਰੀ 'ਤੇ ਇੱਕ ਆਂਗਣਵਾੜੀ ਕੇਂਦਰ ਚੱਲ ਰਿਹਾ ਹੈ ਤੇ ਲਗਭਗ ਇੰਨੀ ਕੁ ਦੂਰੀ 'ਤੇ ਸਰਕਾਰੀ ਸਿਹਤ ਕੇਂਦਰ ਸਥਿਤ ਹੈ। ਜਿੱਥੇ ਨਿੱਤ ਦਰਜਨਾਂ ਬੱਚੇ ਪੜ੍ਹਣ ਅਤੇ ਮਰੀਜ ਇਨਾਜ ਖਾਤਰ ਆਉਂਦੇ ਹਨ।
                   ਆਬਕਾਰੀ ਅਤੇ ਕਰ ਵਿਭਾਗ ਦੇ ਅਧਿਕਾਰੀਆਂ ਅਨੁਸਾਰ ਗ੍ਰਾਮ ਪੰਚਾਇਤ ਆਪਣੀ ਜ਼ਮੀਨ ਜਾਂ ਇਮਾਰਤ ਵਿਚ ਲੋਕਾਂ ਦੀ ਸਹਿਮਤੀ ਨਾਲ ਸ਼ਰਾਬ ਦੇ ਠੇਕੇ ਨੂੰ ਕਿਰਾਏ ਉਤੇ ਦੇ ਸਕਦੀ ਹੈ। ਜਦਕਿ ਕਿਸੇ ਸਰਕਾਰੀ ਵਿਭਾਗ ਦੀ ਇਮਾਰਤ 'ਚ ਸ਼ਰਾਬ ਦਾ ਠੇਕਾ ਕਾਨੂੰਨੀ ਪੱਖੋਂ ਤੋਂ ਪੂਰੀ ਤਰ੍ਹਾਂ ਗੈਰਵਾਜ਼ਬ ਹੈ। ਹਮੇਸ਼ਾਂ ਪੰਜੇ ਉੱਂਗਲਾਂ ਘਿਉ ਵਿਚ ਅਤੇ ਸਿਰ ਕੜ੍ਹਾਈ 'ਚ ਰੱਖਣ ਵਾਲੇ ਖੇਤਰ ਦੇ ਮਾਲ ਵਿਭਾਗ ਦੇ ਅਧਿਕਾਰੀ ਵੀ ਕੇਂਦਰੀ ਪਟਵਾਰਖਾਨੇ 'ਚ ਸ਼ਰਾਬ ਦਾ ਠੇਕਾ ਚੱਲਣ ਤੋਂ ਅਨਜਾਣ ਬਣੇ ਹੋਏ ਹਨ। ਜਦਕਿ ਪੂਰੇ ਮਾਮਲੇ ਵਿਚ ਆਬਕਾਰੀ ਅਤੇ ਕਰ ਵਿਭਾਗ ਮੁਕਤਸਰ ਦੇ ਅਧਿਕਾਰੀਆਂ ਦੀ ਕਥਿਤ ਮਿਲੀਭੁਗਤ ਵੀ ਸਾਫ਼ ਤੌਰ 'ਤੇ ਵਿਖਾਈ ਦਿੰਦੀ ਹੈ। ਜਾਣਕਾਰੀ ਅਨੁਸਾਰ ਵਿਭਾਗ ਵੱਲੋਂ ਠੇਕਾ ਖੋਲ੍ਹਣ ਸਮੇਂ ਠੇਕੇਦਾਰ ਤੋਂ ਠੇਕੇ ਦੀ ਜਗ੍ਹਾ ਸਬੰਧੀ ਇੱਕ ਨਕਸ਼ਾ ਲਿਆ ਜਾਂਦਾ ਹੈ। ਜੇਕਰ ਇਸ ਠੇਕੇ ਦੇ ਸੰਚਾਲਕਾਂ ਵੱਲੋਂ ਪਟਵਾਰਖਾਨੇ ਦਾ ਨਕਸ਼ਾ ਦਾਖਲ ਕਰਵਾਇਆ ਗਿਆ ਹੈ ਤਾਂ ਉਸਨੂੰ ਪੋਸ ਕਿਵੇਂ ਕੀਤਾ ਗਿਆ। ਜੇਕਰ ਵਿਭਾਗ ਨੂੰ ਨਕਸ਼ਾ ਕਿਸੇ ਹੋਰ ਜਗ੍ਹਾ ਦਾ ਦਿੱਤਾ ਹੈ ਤਾਂ ਇੱਥੇ ਠੇਕਾ ਕਿਹੜੇ ਨਿਯਮਾਂ ਤਹਿਤ ਚੱਲ ਰਿਹਾ ਹੈ। ਇਹ ਠੇਕਾ ਮੁਕਤਸਰ ਉਪਮੰਡਲ ਦੇ ਪਿੰਡ ਭੂੰਦੜ ਦੇ ਜਥੇਦਾਰ ਚਰਨਜੀਤ ਸਿੰਘ ਦੇ ਨਾਂ ਦੱਸਿਆ ਜਾਂਦਾ ਹੈ।

ਕਿੱਲਿਆਂਵਾਲੀ ਦੇ ਕੇਂਦਰੀ ਪਟਵਾਰਖਾਨੇ 'ਚ ਚੱਲਦੇ ਸ਼ਰਾਬ ਦੇ ਠੇਕੇ ਦਾ ਅੰਦਰੂਨੀ ਦ੍ਰਿਸ਼।

               ਪਟਵਾਰਖਾਨੇ 'ਚ ਠੇਕਾ ਖੁੱਲ੍ਹਣ ਦੀ ਕਹਾਣੀ ਵੀ ਅਜੀਬ ਹੈ। ਜਿਸਦੀ ਹੋਂਦ ਵਿਚ ਧਰਮ ਦੇ ਠੇਕੇਦਾਰਾਂ ਦਾ ਖੂਬ ਹੱਥ ਦੱਸਿਆ ਜਾਂਦਾ ਹੈ। ਜਿਸਦੀ ਪੁਸ਼ਟੀ ਮੋਬਾਇਲ ਰਾਹੀਂ ਸੰਪਰਕ ਕਰਨ 'ਤੇ ਖੁਦ ਨੂੰ ਸਬੰਧਤ ਜਥੇਦਾਰ ਠੇਕੇਦਾਰ ਦਾ ਭਰਾ ਦੱਸਦੇ ਦੀਪਕ ਨਾਂ ਦੇ ਵਿਅਕਤੀ ਨੇ ਦੱਸਿਆ ਕਿ ਪਿੰਡ 'ਚ ਠੇਕੇ ਲਈ ਥਾਂ ਨਾ ਮਿਲਣ 'ਤੇ ਉਹ ਪਿੰਡ ਦੇ ਗੁਰਦੁਆਰੇ ਗਏ ਜਿੱਥੇ ਪਿੰਡ ਦੇ ਮੋਹਤਬਰ ਵਿਅਕਤੀਆਂ ਨੇ ਨੇੜੇ ਹੀ ਵਿਹਲੇ ਪਟਵਾਰਖਾਨੇ 'ਚ ਠੇਕਾ ਖੋਲ੍ਹਣ ਦੀ ਗੱਲ ਕਰਦਿਆਂ ਦਿੰਦਿਆਂ ਕਿਰਾਏ ਵਜੋਂ ਬਣਦੀ ਰਕਮ ਗੁਰਦੁਆਰੇ ਨੂੰ ਦਾਨ ਵਜੋਂ ਦੇਣ ਦੀ ਸਲਾਹ ਦਿੱਤੀ। ਜਿਸਦੇ ਉਪਰੰਤ ਉਨ੍ਹਾਂ ਨੇ ਪਟਵਾਰਖਾਨੇ 'ਚ ਠੇਕਾ ਖੋਲ੍ਹ ਲਿਆ। ਉਨ੍ਹਾਂ ਮੰਨਿਆ ਕਿ ਇਸ ਸਰਕਾਰੇ-ਦਰਬਾਰੇ ਜਾਂ ਪੰਚਾਇਤ ਨਾਲ ਕੋਈ ਲਿਖਾ ਪੜ੍ਹੀ ਨਹੀਂ ਹੋਈ ਅਤੇ ਸਭ ਕੁਝ ਭਾਈਚਾਰੇ ਨਾਲ ਹੀ ਹੋਇਆ।
             ਦੂਜੇ ਪਾਸੇ ਆਬਕਾਰੀ ਅਤੇ ਕਰ ਵਿਭਾਗ ਦੇ ਅਧਿਕਾਰੀ ਵੀ ਪੱਖ ਪੁੱਛਣ 'ਤੇ ਮਾਮਲੇ ਬਾਰੇ ਪਹਿਲਾਂ ਟਾਲ-ਮਟੋਲ ਵੱਟਦੇ ਰਹੇ ਤੇ ਫਿਰ ਮੁਕਤਸਰ ਦਫ਼ਤਰ ਆ ਕੇ ਗੱਲ ਕਰਦੇ ਇੰਨਾ ਕਹਿ ਕੇ ਖਹਿੜਾ ਛੂਡਵਾ ਜੇਕਰ ਕਿਧਰੇ ਗਲਤੀ ਹੋਈ ਹੈ ਤਾਂ ਜਾਂਚ ਕਰਵਾ ਲਵਾਂਗੇ।

-ਕੀ ਫੈਸਲਾ ਅਕਾਲੀਆਂ ਦਾ, ਐਲਾਨ ਦਿੱਲੀ ਦਾ!-

ਜਗੀਰਦਾਰ ਸਿਆਸਤਦਾਨਾਂ ਦੇ ਜ਼ਿਲ੍ਹੇ ਸ੍ਰੀ ਮੁਕਤਸਰ ਸਾਹਿਬ 'ਚ ਕੀ ਨਵਾਂ ਜ਼ਿਲ੍ਹਾ ਪ੍ਰਧਾਨ ਕਾਂਗਰਸੀ ਦੀ ਬੇੜੀ ਲਾ ਸਕੇਗਾ ਵੰਨੇ ?  

                                                          -ਇਕਬਾਲ ਸਿੰਘ ਸ਼ਾਂਤ-

ਨਵੀਂ ਦਿੱਲੀ ਸਥਿਤ ਕਾਂਗਰਸ ਪਾਰਟੀ ਦੀ ਹਾਈਕਮਾਂਡ ਵੱਲੋਂ ਪੰਜਾਬ ਪ੍ਰਦੇਸ਼ ਕਾਂਗਰਸ ਕਮੇਟੀ ਦੇ ਨਵੀਂ ਅਹੁਦੇਦਾਰਾਂ ਦੀ ਸੂਚੀ ਵਿਚ ਸਿੱਖ ਪ੍ਰਭਾਵ ਅਤੇ ਜਗੀਰਦਾਰ ਸਿਆਸਤਦਾਨਾਂ ਦਾ ਗੜ੍ਹ ਮੰਨੇ ਜਾਂਦੇ ਜ਼ਿਲ੍ਹੇ ਸ੍ਰੀ ਮੁਕਤਸਰ ਸਾਹਿਬ ਵਿਚ ਇੱਕ ਵਪਾਰੀ ਤੇ ਸਾਊ ਕਿਸਮ ਦੇ ਆਗੂ ਸ੍ਰੀ ਗੁਰਦਾਸ ਗਿਰਧਰ ਨੂੰ ਜ਼ਿਲ੍ਹਾ ਪ੍ਰਧਾਨ ਥਾਪ ਕੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਜੱਦੀ ਜ਼ਿਲ੍ਹੇ ਵਿਚ ਅਕਾਲੀ ਦਲ ਲਈ ਅਗਾਮੀ ਵਿਧਾਨਸਭਾ ਚੋਣਾਂ ਦਾ ਅਸਿੱਧੇ ਰੂਪ ਵਿਚ ਰਾਹ ਸੁਖਾਲਾ ਕਰ ਦਿੱਤਾ ਹੈ।

              ਹਮੇਸ਼ਾਂ ਤੋਂ ਵੱਡੇ-ਵੱਡੇ ਜਗੀਰਦਾਰ ਜੱਟ ਸਿੱਖ ਆਗੂਆਂ ਦੀ ਸਿਆਸਤ ਦੇ ਪ੍ਰਭਾਵ ਹੇਠ ਰਹੇ ਇਸ ਜ਼ਿਲ੍ਹੇ ਵਿਚ ਜਿੱਥੇ ਮੁਕਤਸਰ, ਮਲੋਟ ਅਤੇ ਗਿੱਦੜਬਾਹਾ ਸ਼ਹਿਰੀ ਇਲਾਕੇ ਹੋਣ ਦੇ ਬਾਵਜੂਦ ਸਿੱਖ ਵਸੋਂ ਅਤੇ ਸਿੱਖੀ 'ਤੇ ਆਧਾਰਤ ਸਿਆਸਤ ਦਾ ਦਬਦਬਾ ਰਿਹਾ ਹੈ। ਜਿਸ ਵਿੱਚ ਜਿਥੇ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਸਵ. ਸ. ਹਰਚਰਨ ਸਿੰਘ ਬਰਾੜ, ਸਿਆਸਤ ਦੇ ਬਾਬਾ ਬੋਹੜ ਸ. ਤੇਜਾ ਸਿੰਘ ਬਾਦਲ, ਮੌਜੂਦਾ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਅਤੇ ਦਰਵੇਸ਼ ਸਿਆਸਤਦਾਨ ਮਰਹੂਮ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ, ਸਾਬਕਾ ਸਾਂਸਦ ਸ. ਜਗਮੀਤ ਸਿੰਘ ਬਰਾੜ, ਭਾਈ ਸ਼ਮਿੰਦਰ ਸਿੰਘ ਅਤੇ  ਸਾਬਕਾ ਵਿਧਾਇਕ ਸ. ਦਰਸ਼ਨ ਸਿੰਘ ਮਰਾੜ੍ਹ ਆਦਿ ਆਗੂ ਆਪੋ-ਆਪਣੇ ਸਮੇਂ ਅਤੇ ਪੈਠ ਅਨੁਸਾਰ ਸਿੱਖ ਪਿੱਠ ਭੂਮੀ ਵਾਲੇ ਮੁਕਤਸਰ ਜ਼ਿਲ੍ਹੇ ਦੀ ਸਿਆਸਤ 'ਤੇ ਭਾਰੂ ਰਹੇ ਹਨ।

             ਇਹ ਵੀ ਕਹਿਣਾ ਕੁਥਾਂਹ ਨਹੀਂ ਕਿ ਪੰਜਾਬ ਦੇ ਸਰਹੱਦੀ ਜ਼ਿਲ੍ਹੇ ਮੁਕਤਸਰ ਨੇ ਪੰਜਾਬ ਦੀ ਸਿਆਸਤ 'ਤੇ ਰਾਜ ਕੀਤਾ ਹੈ, ਜੋ ਕਿ ਅੱਜ ਵੀ ਜਾਰੀ ਹੈ। ਇਸ ਜ਼ਿਲ੍ਹੇ ਵਿੱਚ ਭਾਵੇਂ ਕਿ ਹਿੰਦੂ ਵੋਟਰਾਂ ਦੀ ਗਿਣਤੀ ਕਾਫ਼ੀ ਹੈ ਪਰ ਫਿਰ ਵੀ ਉਹ ਐਨੀ ਨਹੀਂ ਕਿ ਸਿੱਖ ਵੋਟਾਂ ਨੂੰ ਕਿਸੇ ਪੱਖੋਂ ਪ੍ਰਭਾਵਿਤ ਕਰ ਸਕੇ। ਜ਼ਿਲ੍ਹੇ ਵਿਚ ਬਾਕੀ ਹੋਰਨਾਂ ਪਾਰਟੀਆਂ ਹੀ ਨਹੀਂ ਬਲਕਿ ਧਰਮ ਨਿਰਪੱਖ ਪਾਰਟੀ ਵਜੋਂ ਜਾਣੀ ਜਾਂਦੀ ਕਾਂਗਰਸ ਪਾਰਟੀ ਦੇ ਸੰਦਰਭ ਵਿੱਚ ਇਤਿਹਾਸ ਗਵਾਹ ਹੈ ਕਿ ਪਿਛਲੇ ਕਾਫ਼ੀ ਸਮੇਂ ਤੋਂ ਕਾਂਗਰਸ ਪਾਰਟੀ ਦੇ ਜ਼ਿਲ੍ਹਾ ਪ੍ਰਧਾਨ ਦੇ ਮੁੱਖ ਅਹੁਦੇ 'ਤੇ ਸਿੱਖ ਆਗੂ ਹੀ ਬਿਰਾਜਮਾਨ ਹੁੰਦੇ ਰਹੇ ਹਨ। ਜਿਸ ਦੇ ਕਰਕੇ ਸਿੱਖ ਬਹੁਗਿਣਤੀ ਵਾਲੇ ਇਸ ਜ਼ਿਲ੍ਹੇ ਵਿੱਚ ਕਾਂਗਰਸ ਦਾ ਸਿੱਖ ਵੋਟ ਬੈਂਕ ਭਾਵੇਂ ਅਕਾਲੀ ਦਲ 'ਤੇ ਭਾਰੂ ਨਹੀਂ ਪੈ ਸਕਿਆ ਪਰ ਟਾਕਰਾ ਕਰਨ ਦੇ ਕਾਬਲ ਜ਼ਰੂਰ ਰਿਹਾ।
               ਸਿਆਸੀ ਹਲਕਿਆਂ ਦਾ ਇਹ ਵੀ ਕਹਿਣਾ ਹੈ ਕਿ ਸੈਂਕੜੇ ਏਕੜ ਜ਼ਮੀਨਾਂ ਅਤੇ ਕਰੋੜਾਂ-ਅਰਬਾਂ ਨਾਮੇ ਵਾਲੇ ਸਰਮਾਏਦਾਰ ਆਗੂਆਂ ਦੀ ਸਿਆਸੀ ਧਰਤੀ (ਜ਼ਿਲ੍ਹਾ ਮੁਕਤਸਰ) 'ਤੇ ਜਿੱਥੇ ਸਿਆਸਤ ਦਾ ਇੱਕ ਦਾਅ ਖੇਡਣ ਸਮੇਂ ਕਰੋੜਾਂ ਰੁਪਏ ਤੱਕ ਦੀ ਭੋਰਾ ਪਰਵਾਹ ਨਹੀਂ ਕੀਤੀ ਜਾਂਦੀ, ਉਥੇ ਇੱਕ ਆਮ ਸਧਾਰਨ ਤੇ ਵਪਾਰੀ ਆਗੂ ਵੱਲੋਂ ਜ਼ਿਲ੍ਹੇ 'ਚ ਵੱਡੇ ਪੱਧਰ 'ਤੇ ਧੜੇਬੰਦੀ ਦਾ ਸ਼ਿਕਾਰ ਕਾਂਗਰਸ ਪਾਰਟੀ ਨੂੰ ਉਭਾਰ ਕੇ ਅਕਾਲੀ ਦਲ ਬਾਦਲ ਅਤੇ ਪੀ.ਪੀ.ਪੀ. ਨਾਲ ਆਹਮੋ-ਸਾਹਮਣੇ ਦੀ ਲੜਾਈ 'ਚ ਕਾਂਗਰਸ ਦੀ ਕਿਸ਼ਤੀ ਪਾਰ ਲੰਘਾ ਸਕਣਾ ਅਸੰਭਵ ਮੰਨਿਆ ਜਾ ਰਿਹਾ ਹੈ। ਉਥੇ ਸ੍ਰੀ ਗਿਰਧਰ ਦੇ ਆੜ੍ਹਤ ਦੇ ਕਾਰੋਬਾਰ  ਨਾਲ ਜੁੜੇ ਹੋਣ ਕਰਕੇ ਸਧਾਰਨ ਜੱਟ ਸਿੱਖ ਭਾਈਚਾਰਾ ਵੀ ਕਾਂਗਰਸ ਨਾਲ ਜੁੜਣ ਤੋਂ ਗੁਰੇਜ ਕਰੇਗਾ।

              ਪਾਰਟੀ ਹਾਈਕਮਾਂਡ ਵੱਲੋਂ ਮੁਕਤਸਰ ਜ਼ਿਲ੍ਹੇ ਦੇ ਤਿੰਨ ਵਿਧਾਨਸਭਾ ਹਲਕੇ ਮੁਕਤਸਰ, ਗਿੱਦੜਬਾਹਾ ਅਤੇ ਮਲੋਟ ਦੇ ਫਿਰੋਜ਼ਪੁਰ ਲੋਕਸਭਾ ਹਲਕੇ ਦੇ ਅਧੀਨ ਆਉਣ ਕਰਕੇ ਦੇ ਇਸ  ਲੋਕਸਭਾ ਹਲਕੇ ਤੋਂ ਦੋ ਵਾਰ ਕਿਸਮਤ ਆਜਮਾ ਚੁੱਕੇ ਕਾਂਗਰਸ ਦੇ ਹਾਈ-ਪ੍ਰੋਫਾਈਲ ਆਗੂ ਅਤੇ ਕੁੱਲ ਹਿੰਦ ਕਾਂਗਰਸ ਦੇ ਸਥਾਈ ਮੈਂਬਰ ਸ. ਜਗਮੀਤ ਸਿੰਘ ਬਰਾੜ ਦੀ ਸਿਫਾਰਸ਼ 'ਤੇ ਮੁਕਤਸਰ ਜ਼ਿਲ੍ਹੇ ਦੇ ਕਾਂਗਰੋਸ ਪ੍ਰਧਾਨ ਦੀ ਨਿਯੁਕਤੀ ਕੀਤੀ ਹੈ।

                   ਪ੍ਰੰਤੂ ਇਸ ਸਭ ਵਿਚਾਲੇ ਕਾਂਗਰਸ ਹਾਈਕਮਾਂਡ ਸ਼ਾਇਦ ਇਹ ਭੁੱਲ ਬੈਠੀ ਕਿ ਮੁਕਤਸਰ ਜ਼ਿਲ੍ਹੇ 'ਚ ਪੰਜਾਬ ਦੇ ਮੌਜੂਦਾ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦਾ ਜੱਦੀ ਵਿਧਾਨਸਭਾ ਹਲਕਾ ਲੰਬੀ ਵੀ ਆਉਂਦਾ ਹੈ। ਜਿੱਥੋਂ ਸਿਰਫ਼ ਮੁਕਤਸਰ ਜ਼ਿਲ੍ਹੇ ਦੀ ਸਿਆਸਤ ਨਹੀਂ ਬਲਕਿ ਸਮੁੱਚੇ ਪੰਜਾਬ ਦੀ ਅਕਾਲੀ ਸਿਆਸਤ ਚੱਲਦੀ ਹੈ ਅਤੇ ਲੰਬੀ ਹਲਕੇ ਦੇ ਚੋਣ ਸਿਆਸੀ ਦ੍ਰਿਸ਼ ਸਮੁੱਚੇ ਜ਼ਿਲ੍ਹੇ ਦੀ ਸਿਆਸੀ ਧੁਰੀ ਤੈਅ ਕਰਦਾ ਹੈ। ਅਜਿਹੇ 'ਚ ਬਾਬਾ ਬੋਹੜ ਸੀਨੀਅਰ ਬਾਦਲ ਅਤੇ ਸਿਰੇ ਦੇ ਮੁਹਿੰਮਬਾਜ ਸੁਖਬੀਰ ਬਾਦਲ ਦੇ ਸਾਹਮਣੇ ਸ੍ਰੀ ਗੁਰਦਾਸ ਗਿਰਧਰ ਜਿਹੇ ਸਾਊ ਅਤੇ ਆਰਥਿਕ ਪੱਖੋਂ ਆਮ ਸਧਾਰਨ ਵਿਅਕਤੀ ਦੇ ਜ਼ਿਆਦਾ ਪ੍ਰਭਾਵਸ਼ਾਲੀ ਸਾਬਤ ਹੋਣ ਬਾਰੇ ਸ਼ੰਕੇ ਪ੍ਰਗਟਾਏ ਜਾ ਰਹੇ ਹਨ। ਜਦਕਿ ਦੂਜੇ ਪਾਸੇ ਸਿਆਸੀ ਮਾਹਰਾਂ ਦੀ ਰਾਏ ਅਨੁਸਾਰ ਮੁਕਤਸਰ ਜ਼ਿਲ੍ਹੇ ਵਿਚ ਅਜਿਹਾ ਗਤੀਸ਼ੀਲ ਅਤੇ ਧੱਕੜ ਆਗੂ ਜ਼ਿਲ੍ਹਾ ਪ੍ਰਧਾਨ ਦੇ ਅਹੁਦੇ 'ਤੇ ਨਿਯੁਕਤ ਕੀਤਾ ਜਾਣਾ ਚਾਹੀਦਾ ਸੀ, ਜੋ ਕਿ ਕੈਪਟਨ ਅਮਰਿੰਦਰ ਸਿੰਘ ਦੀ ਤਰਜ਼ 'ਤੇ ਸੂਬੇ ਦੇ ਮੌਜੂਦਾ ਹਾਕਮਾਂ ਨੂੰ ਉਨ੍ਹਾਂ ਨੂੰ ਗ੍ਰਹਿ ਜ਼ਿਲ੍ਹੇ 'ਚ ਕਰਾਰੀ ਟੱਕਰ ਦੇ ਕੇ ਸੂਬੇ 'ਤੇ 25 ਵਰ੍ਹਿਆਂ ਤੱਕ ਰਾਜ ਕਰਨ ਦੇ ਸੁਫ਼ਨਿਆਂ ਨੂੰ ਨੇਸ ਤੋਂ ਨਾਬੂਤ ਕਰ ਸਕੇ।

         ਪਾਰਟੀ ਦੇ ਇੱਕ ਆਗੂ ਨੇ ਨਾਂਅ ਨਾਂ ਛਾਪਣ ਦੀ ਸ਼ਰਤ 'ਤੇ ਆਖਿਆ ਕਿ ਇਉਂ ਲਗਦੈ ਜਿਵੇਂ ਕਾਂਗਰਸ ਪਾਰਟੀ ਦੇ ਜਿਲ੍ਹਾ ਪ੍ਰਧਾਨ ਦਾ ਫੈਸਲਾ ਸੁਖਬੀਰ ਬਾਦਲ ਨੇ ਕੀਤੈ ਤੇ ਇਸਦਾ ਐਲਾਨ ਆਲ ਇੰਡੀਆ ਕਾਂਗਰਸ ਕਮੇਟੀ ਹੈਡਕੁਆਟਰ ਤੋਂ ਹੋਇਆ ਹੈ।

                  ਇਸੇ ਦੌਰਾਨ ਸੰਪਰਕ ਕਰਨ 'ਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਨਵਨਿਯੁਕਤ ਜ਼ਿਲ੍ਹਾ ਕਾਂਗਰਸ ਪ੍ਰਧਾਨ ਸ੍ਰੀ ਗੁਰਦਾਸ ਗਿਰਧਰ  ਨੇ ਖੁਦ ਨੂੰ ਇੱਕ ਟਕਸਾਲੀ ਕਾਂਗਰਸੀ ਕਰਾਰ ਦਿੰਦਿਆਂ ਕਿਹਾ ਕਿ ਉਹ ਆਜਾਦੀ ਘੁਲਾਟੀਏ ਸ੍ਰੀ ਬਿਹਾਰੀ ਲਾਲ ਦੇ ਪੁੱਤਰ ਹਨ ਤੇ ਉਨ੍ਹਾਂ ਦੀ ਜ਼ਿਲ੍ਹੇ ਦੇ ਪੇਂਡੂ ਅਤੇ ਸ਼ਹਿਰੀ ਖੇਤਰ ਵਿਚ ਪੂਰੀ ਪੈਠ ਹੈ। ਸਿੱਖ ਸਿਆਸਤ ਭਾਰੂ ਜ਼ਿਲ੍ਹੇ 'ਚ ਹਿੰਦੂ ਵਰਗ ਨਾਲ ਸਬੰਧਤ ਹੋਣ ਬਾਵਜੂਦ ਖੁਦ ਨੂੰ ਪ੍ਰਭਾਵਸ਼ਾਲੀ ਪ੍ਰਧਾਨ ਵਜੋਂ ਸਾਬਤ ਕਰਨ ਬਾਰੇ ਉਨ੍ਹਾਂ ਕਿਹਾ ਕਿ ਕਾਂਗਰਸ ਇੱਕ ਧਰਮ ਨਿਰਪੱਖ ਪਾਰਟੀ ਹੈ ਜਿੱਥੇ ਧਰਮ ਤੇ ਜਾਤ-ਪਾਤ ਤੋਂ ਪਹਿਲਾਂ ਸਮਾਜਕ ਵਰਤਾਰਾ ਹੈ।

ਵਿਸ਼ਵ ਸਿਹਤ ਸੰਗਠਨ ਵੀ ਪੰਜਾਬ ਦੇ ਕੈਂਸਰ ਪ੍ਰਤੀ ਬੇਹੱਦ ਗੰਭੀਰ

                                    -ਰੋਕੋ ਕੈਂਸਰ ਨੂੰ ਅੰਕੜੇ ਇਕੱਠੇ ਕਰਨ ਸਬੰਧੀ ਦਿੱਤੇ ਦਿਸ਼ਾ ਨਿਰਦੇਸ਼-
                                                                -ਇਕਬਾਲ ਸਿੰਘ ਸ਼ਾਂਤ-
ਭਾਵੇਂ ਪੰਜਾਬ ਦੇ ਸੈਂਕੜੇ ਲੋਕਾਂ ਵੱਲੋਂ ਕੈਂਸਰ ਕਰਕੇ ਜਾਨਾਂ ਗੁਆਉਣ ਦੇ ਬਾਅਦ ਰਾਜ ਸਰਕਾਰ ਅਜੇ ਤੱਕ ਕੈਂਸਰ ਫੰਡ ਗਠਿਤ ਕਰਨ ਦਾ ਐਲਾਨ ਹੀ ਕਰ ਸਕੀ ਹੈ, ਜਦਕਿ ਦੂਜੇ ਪਾਸੇ ਹਜ਼ਾਰਾਂ ਕੋਹਾਂ ਦੂਰ ਸਥਿਤ ਵਿਸ਼ਵ ਸਿਹਤ ਸੰਗਠਨ (ਸੰਯੁਕਤ ਰਾਸ਼ਟਰ) ਨੇ ਪੰਜਾਬ ਵਿਚ ਕੈਂਸਰ ਦੇ ਲਗਾਤਾਰ ਪਸਾਰੇ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ 'ਰੋਕੋ ਕੈਂਸਰ' ਰਾਹੀਂ ਪੁਖਤਾ ਅੰਕੜੇ ਇਕੱਠੇ ਕਰਵਾ ਕੇ ਠੋਸ ਕਦਮ ਚੁੱਕਣ ਲਈ ਕਮਰ ਵੀ ਕਸ ਲਈ ਹੈ।

Kulwant Dhaliwal

                ਰੋਕੋ ਕੈਂਸਰ ਦੇ ਅੰਤਰਰਾਸ਼ਟਰੀ ਰਾਜਦੂਤ ਅਤੇ ਗਲੋਬਲ ਸਮਾਜ ਸੇਵੀ ਕੁਲਵੰਤ ਧਾਲੀਵਾਲ ਨੇ ਇੰਗਲੈਂਡ ਤੋਂ ਟੈਲੀਫੋਨ 'ਤੇ ਗੱਲਬਾਤ ਕਰਦਿਆਂ ਕਿਹਾ ਕਿ ਭਾਵੇਂ ਕਿ ਰੋਕੋ ਕੈਂਸਰ ਵੱਲੋਂ ਪੰਜਾਬ ਸਮੇਤ ਵੱਖ-ਵੱਖ ਖੇਤਰਾਂ ਵਿਚ ਛਾਤੀ ਦੇ ਕੈਂਸਰ ਸਬੰਧੀ ਮੈਡੀਕਲ ਜਾਂਚ ਕੈਂਪ ਲਾਏ ਜਾ ਰਹੇ ਸਨ, ਪਰ ਵਿਸ਼ਵ ਸਿਹਤ ਸੰਗਠਨ (ਸੰਯੁਕਤ ਰਾਸ਼ਟਰ) ਦੇ ਦਿਸ਼ਾ ਨਿਰਦੇਸ਼ਾਂ ਉਪਰੰਤ ਰੋਕੋ ਕੈਂਸਰ ਨੇ ਸੂਬੇ ਦੇ ਵੱਖ-ਵੱਖ ਪਿੰਡਾਂ, ਕਸਬਿਆਂ ਅਤੇ ਸ਼ਹਿਰਾਂ ਵਿਚ ਛਾਤੀ ਦੇ ਕੈਂਸਰ ਨਾਲ ਔਰਤਾਂ ਦੀ ਸ਼ਨਾਖ਼ਤ ਲਈ ਮੈਡੀਕਲ ਕੈਂਪ ਲਾਉਣ ਦਾ ਨਿਰਣਾ ਲਿਆ ਹੈ। ਸ੍ਰੀ ਧਾਲੀਵਾਲ ਨੇ ਦੱਸਿਆ ਕਿ ਸ਼ੁਰੂਆਤੀ ਦੌਰ ਵਿਚ 18 ਮਈ ਤੋਂ 28 ਮਈ ਤੱਕ ਪਿੰਡ ਬੜੁੰਦੀ (ਸੰਗਰੂਰ), ਦੀਨਾ ਸਾਹਿਬ, ਪਿੰਡ ਦਾਤਾ (ਮੋਗਾ), ਪਿੰਡ ਮਹਿਲ (ਧਰਮਕੋਟ), ਸ਼ਾਮ ਚੁਰਾਸੀ (ਹੁਸ਼ਿਆਰਪੁਰ) ਪਿੰਡ ਅਮਰਗੜ• (ਨਜ਼ਦੀਕ ਗੋਨਿਆਣਾ), ਪਿੰਡ ਚਕਰ (ਲੁਧਿਆਣਾ) ਅਤੇ ਬੁਰਜ (ਲੁਧਿਆਣਾ) 'ਚ ਕੈਂਪ ਲਾਏ ਜਾਣਗੇ। ਉਨ•ਾਂ ਕਿਹਾ ਕਿ ਸਭ ਤੋਂ ਵੱਧ ਕੈਂਸਰ ਪ੍ਰਭਾਵਿਤ ਜ਼ਿਲ•ਾ ਬਠਿੰਡਾ ਜ਼ਿਲ•ਾ 'ਚ 21 ਮਈ ਦਿਨ ਐਤਵਾਰ ਨੂੰ ਪਿੰਡ ਚਾਉਕੇ ਵਿਖੇ ਇੱਕ ਵਿਸ਼ਾਲ ਕੈਂਪ ਲਾਇਆ ਜਾ ਰਿਹਾ ਹੈ। ਜਿਸ ਵਿੱਚ ਸੈਂਕੜਿਆਂ ਔਰਤਾਂ ਦੀ ਮੁਫ਼ਤ ਮੈਡੀਕਲ ਜਾਂਚ ਕੀਤੀ ਜਾਵੇਗੀ। ਸ੍ਰੀ ਧਾਲੀਵਾਲ ਨੇ ਕਿਹਾ ਕਿ ਇਨ•ਾਂ ਕੈਂਪਾਂ ਵਿਚ ਉਹ ਖੁਦ ਉਚੇਚੇ ਤੌਰ 'ਤੇ ਮੌਜੂਦ ਰਹਿਣਗੇ।
                ਰੋਕੋ ਕੈਂਸਰ ਦੇ ਅੰਤਰਰਾਸ਼ਟਰੀ ਰਾਜਦੂਤ ਨੇ ਕਿਹਾ ਕਿ ਅੰਕੜਿਆਂ ਦੱਸਦੇ ਹਨ ਪੰਜਾਬ 'ਚ ਛਾਤੀ ਦੇ ਕੈਂਸਰ ਨਾਲ 80 ਫ਼ੀਸਦੀ ਮੌਤਾਂ ਹੋ ਰਹੀਆਂ ਹਨ। ਅਜਿਹੇ ਵਿਚ ਔਰਤਾਂ ਨੂੰ ਛਾਤੀ ਕੈਂਸਰ ਤੋਂ ਬਚਾਅ ਪ੍ਰਤੀ ਵਧੇਰੇ ਜਾਗਰੂਕ ਕਰਨ ਤੋਂ ਇਲਾਵਾ ਸਮਾਂ ਰਹਿੰਦੇ ਮਰੀਜਾਂ ਦੀ ਪਛਾਣ ਕਰਨਾ ਵੀ ਅੱਜ ਮੁੱਢਲੀ ਜ਼ਰੂਰਤ ਹੈ।
               ਸ੍ਰੀ ਧਾਲੀਵਾਲ ਨੇ ਕਿਹਾ ਕਿ ਵਿਸ਼ਵ ਸਿਹਤ ਸੰਗਠਨ ਨੇ ਪੰਜਾਬ 'ਚ ਵੱਖ-ਵੱਖ ਕਿਸਮ ਕੈਂਸਰ ਦੇ ਪਸਾਰੇ ਨੂੰ ਬੜੀ ਗੰਭੀਰਤ ਨਾਲ ਲਿਆ ਹੈ ਤੇ 'ਰੋਕੋ ਕੈਂਸਰ' ਦੇ ਦਿਸ਼ਾ ਨਿਰਦੇਸ਼ ਜਾਰੀ ਕੀਤੇ ਹਨ ਕਿ ਪੰਜਾਬ ਵਿਚੋਂ ਕੈਂਸਰ ਦੇ ਪੁਖਤਾ ਅੰਕੜੇ ਆਪਣੇ ਪੱਧਰ 'ਤੇ ਇਕੱਠੇ ਕਰਕੇ ਉਸ ਤੱਕ ਪਹੁੰਚਾਏ ਜਾਣ ਤਾਂ ਜੋ ਪੀੜਤਾਂ ਦੀ ਮੱਦਦ ਲਈ ਕੋਈ ਠੋਸ ਕਦਮ ਚੁੱਕਿਆ ਜਾ ਸਕੇ।
                 ਸ੍ਰੀ ਧਾਲੀਵਾਲ ਨੇ ਪੰਜਾਬ ਵਾਸੀਆਂ ਨੂੰ ਕੈਂਸਰ ਮੁਕਤ ਪੰਜਾਬ ਸਿਰਜਣ ਲਈ ਫਸਲਾਂ ਵਿਚ ਖਾਦਾਂ ਦੀ ਘੱਟ ਵਰਤੋਂ ਕਰਨ ਦੀ ਅਪੀਲ ਕਰਦਿਆਂ ਕਿਹਾ ਕਿ ਮਾਹਰਾਂ ਅਨੁਸਾਰ ਅੱਜ ਖਾਦਾਂ ਦੇ ਪ੍ਰਭਾਵ ਹੇਠ ਜ਼ਮੀਨਾਂ 'ਤੇ ਨੰਗੇ ਪੈਰ ਚੱਲਣਾ ਵੀ ਕਿਸੇ ਖ਼ਤਰੇ ਤੋਂ ਖਾਲੀ ਨਹੀਂ।

ਹਾਈਕੋਰਟ ਦਾ ਵਕੀਲ ਵੀ ਝੱਲ ਰਿਹੈ ਲੰਬੀ ਪੁਲਿਸ ਦੀਆਂ ਵਧੀਕੀਆਂ

                 -6 ਦਿਨਾਂ ਤੋਂ ਲੰਬੀ ਥਾਣੇ ਮੁਹਰੇ ਧਰਨਾ ਲਾ ਕੇ ਮੰਗ ਰਿਹੈ ਇਨਸਾਫ਼-  
                                                                 -ਇਕਬਾਲ ਸਿੰਘ ਸ਼ਾਂਤ-
       ਹਾਕਮਾਂ ਦੇ ਹਲਕੇ ਲੰਬੀ ਵਿਚ ਖਾਕੀ ਦਾ ਜ਼ਬਰ ਇਸ ਕਦਰ ਭਾਰੂ ਹੈ ਕਿ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਦਾ ਇੱਕ ਵਕੀਲ ਵੀ ਲੰਬੀ ਪੁਲਿਸ ਦੀਆਂ ਧੱਕੇਸ਼ਾਹੀਆਂ ਦੀ ਮਾਰ ਝੱਲਣ ਨੂੰ ਮਜ਼ਬੂਰ ਹੈ। ਘਰੇਲੂ ਜ਼ਮੀਨੀ ਵਿਵਾਦ ਨੂੰ ਲੈ ਕੇ ਪਿਛਲੇ 6 ਦਿਨਾਂ ਤੋਂ ਲੰਬੀ ਥਾਣਾ ਮੁਹਰੇ ਧਰਨੇ 'ਤੇ ਬੈਠੇ ਵਕੀਲ ਭੁਪਿੰਦਰਪਾਲ ਸਿੰਘ ਢਿੱਲੋਂ ਦੀ ਸਰਕਾਰ ਜਾਂ ਪੁਲਿਸ ਪ੍ਰਸ਼ਾਸਨ ਵੱਲੋਂ ਕੋਈ ਸੁਣਵਾਈ ਨਹੀਂ ਕੀਤੀ ਗਈ।
              ਅਕਾਲੀ ਦਲ 1920 ਦੇ ਕਾਰਜਕਾਰਨੀ ਮੈਂਬਰ ਸ: ਭੁਪਿੰਦਰ ਸਿੰਘ ਢਿੱਲੋਂ ਪੁੱਤਰ ਹਰਬੰਸ ਸਿੰਘ ਵਾਸੀ ਪਿੰਡ ਫਤੂਹੀਵਾਲਾ ਨੇ ਧਰਨੇ ਦੌਰਾਨ ਆਪਣੀ ਹੱਡਬੀਤੀ ਸੁਣਾਉਂਦਿਆਂ ਕਿਹਾ ਕਿ ਉਨ੍ਹਾਂ ਦੇ ਜੱਦੀ ਪਿੰਡ ਫਤੂਹੀਵਾਲਾ ਬਲਾਕ ਲੰਬੀ ਵਿਖੇ ਉਨ੍ਹਾਂ ਦਾ ਆਪਣੇ ਸਕੇ ਭਰਾ ਅਮਰੀਕਪਾਲ ਸਿੰਘ ਨਾਲ 2-10-2005 ਨੂੰ ਜੁਬਾਨੀ ਤਬਾਦਲਾ ਹੋਇਆ ਸੀ ਅਤੇ ਉਸ ਮੁਤਾਬਕ ਕਬਜ਼ੇ ਤਬਦੀਲ ਹੋ ਗਏ ਸਨ ਤੇ ਇਸ ਬਾਰੇ ਲਿਖਤ  ਮਿਤੀ 11-12-2005 ਨੂੰ ਹੋਈ ਸੀ। ਜਿਸਨੂੰ ਮਾਣਯੋਗ ਹਾਈਕੋਰਟ ਨੇ ਸਿਵਲ ਰਵੀਜ਼ਨ ਨੰਬਰ 2793/2007 ਦੇ ਹੁਕਮ ਮਿਤੀ 25-8-2009 ਨੇ ਦਰੁੱਸਤ ਮੰਨਿਆ ਹੈ।
ਸ੍ਰੀ ਢਿੱਲੋਂ ਨੇ ਦੱਸਿਆ ਕਿ ਉਹ ਉਦੋਂ ਤੋਂ ਉਕਤ ਜ਼ਮੀਨ 'ਤੇ ਲਗਾਤਾਰ ਬਤੌਰ ਮਾਲਕ ਕਾਬਜ਼ ਹਨ। ਉਨ੍ਹਾਂ ਕਿਹਾ ਕਿ ਅਮਰੀਕਪਾਲ ਸਿੰਘ ਨੇ ਉਨ੍ਹਾਂ ਨੂੰ ਕਥਿਤ ਤੌਰ 'ਤੇ ਨੁਕਸਾਨ ਪਹੁੰਚਾਉਣ ਲਈ ਸੰਨ 2006 ਵਿਚ ਉਨ੍ਹਾਂ 'ਤੇ ਖੋਹ ਦਾ  ਝੂਠਾ ਮੁਕੱਦਮਾ ਦਰਜ ਕਰਵਾਇਆ ਸੀ। ਜੋ ਕਿ ਚਾਰ ਵਰ੍ਹਿਆਂ ਦੀ ਖੱਜਲ ਖੁਆਰੀ ਤੋਂ ਬਾਅਦ ਪੰਜਾਬ ਦੇ ਪੁਲਿਸ ਮੁਖੀ ਦੀ ਹੁਕਮਾਂ 'ਤੇ ਖਾਰਜ ਹੋਇਆ। ਸ੍ਰੀ ਢਿੱਲੋਂ ਨੇ ਕਿਹਾ ਕਿ ਕਿ ਬਾਅਦ ਵਿਚ ਪਤਾ ਲੱਗਾ ਕਿ ਮੁਕੱਦਮੇ 'ਚ ਮੁੱਖ ਗਵਾਹ ਚਾਰ ਔਰਤਾਂ ਦਾ ਇਸ ਧਰਤੀ 'ਤੇ ਕੋਈ ਵਜੂਦ ਹੀ ਨਹੀਂ ਹੈ।
             ਉਨ੍ਹਾਂ ਦੱਸਿਆ ਕਿ ਪੁਲਿਸ ਜ਼ਬਰ ਜੁਲਮ ਦਾ ਸਿਲਸਿਲਾ ਲਗਾਤਾਰ ਜਾਰੀ ਰਿਹਾ ਤੇ ਸਾਲ 2006-07 ਵਿਚ  ਫਿਰ ਲੰਬੀ ਪੁਲਿਸ ਨੇ ਉਸ ਵੱਲੋਂ ਇਸ ਜ਼ਮੀਨ ਵਿਚ ਬੀਜੀ ਹੋਈ ਹਾੜੀ ਦੀ ਫਸਲ ਕਥਿਤ ਤੌਰ 'ਤੇ ਜ਼ਬਰਨ ਅਮਰੀਕਪਾਲ ਸਿੰਘ ਨੂੰ ਕਟਵਾ ਦਿੱਤੀ।
         ਸ੍ਰੀ ਢਿੱਲੋਂ ਨੇ ਦੋਸ਼ ਲਾਇਆ ਕਿ ਉਨ੍ਹਾਂ ਦੇ ਭਰਾ ਅਮਰੀਕਪਾਲ ਸਿੰਘ ਨੇ ਸਿਟਰਸ ਕੌਂਸਲ ਪੰਜਾਬ ਨਾਲ ਕਥਿਤ ਤੌਰ 'ਤੇ ਜਾਅਲੀ ਤੱਥਾਂ ਦੇ ਆਧਾਰ 'ਤੇ ਫਰਜ਼ੀ ਇਕਰਾਰਨਾਮਾ ਕਰਕੇ ਉਕਤ ਜ਼ਮੀਨ 12 ਵਰ੍ਹਿਆਂ ਲਈ ਪੱਟੇ ਦੇਣਦਾ ਝੂਠਾ ਕੀਤਾ।  ਉਨ੍ਹਾਂ ਦੱਸਿਆ ਕਿ ਉਨ੍ਹਾਂ ਵੱਲੋਂ ਅਪੀਲ ਕਰਨ 'ਤੇ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਨੇ ਸਿਵਲ ਰਵੀਜ਼ਨ ਨੰਬਰ 2793/2007 ਵਿਚ ਦਿੱਤੇ ਮਿਤੀ 25-8-2009 ਦੇ ਹੁਕਮਾਂ ਰਾਹੀਂ ਇਸ ਲਿਖਤ ਤਬਾਦਲੇ ਨੂੰ ਸਹੀ ਮੰਨਿਆ ਅਤੇ ਇਹ ਵੀ ਲਿਖਿਆ ਕਿ ਦਾਅਵਾ ਦਾਇਰ ਹੋਣ ਤੋਂ ਬਾਅਦ ਕਾਗਜਾਤ ਮਾਲ ਦੇ ਇੰਦਰਾਜ ਬੇਮਾਇਨੇ ਹਨ।
          ਘਰੇਲੂ ਵਿਵਾਦ ਦੇ ਤਹਿਤ ਪੁਲਿਸ ਧੱਕੇਸ਼ਾਹੀ ਦਾ ਸੰਤਾਪ ਭੋਗ ਰਹੇ ਭੁਪਿੰਦਰ ਪਾਲ ਸਿੰਘ ਢਿੱਲੋਂ ਨੇ ਕਿਹਾ ਕਿ ਲੰਬੀ ਪੁਲਿਸ ਦੀ ਕਥਿਤ ਧੱਕੇਸ਼ਾਹੀਆਂ ਲਗਾਤਾਰ ਜਾਰੀ ਹਨ ਤੇ ਪੁਲਿਸ ਮੁਖੀ ਪੰਜਾਬ ਦੇ ਹੁਕਮ ਨੰਬਰੀ ਸੀ-331 ਮਿਤੀ 11-4-2011 ਦੀ ਘੋਰ ਉਲੰਘਣਾ ਕਰਦਿਆਂ ਲੰਬੀ ਪੁਲਿਸ ਦੇ ਮੁਖੀ ਹਰਿੰਦਰ ਸਿੰਘ ਚਮੇਲੀ ਦੀ ਕਥਿਤ ਸ਼ਹਿ 'ਤੇ ਮੌਜੂਦਾ ਹਾੜੀ ਦੀ ਫਸਲ ਵੀ ਕਿੱਲਿਆਂਵਾਲੀ ਪੁਲਿਸ ਚੌਕੀ ਦੇ ਇੰਚਾਰਜ਼ ਅਜੀਤ ਸਿੰਘ ਨੇ ਮਿਤੀ 30 ਅਪ੍ਰੈਲ 2011 ਨੂੰ ਕਥਿਤ ਤੌਰ 'ਤੇ ਮੌਕੇ 'ਤੇ ਜਾ ਕੇ ਸੰਤੋਖ ਸਿੰਘ ਵਗੈਰਾ ਨੂੰ ਚੁਕਵਾ ਦਿੱਤੀ। ਸ੍ਰੀ ਢਿੱਲੋਂ ਨੇ ਦੋਸ਼ ਲਗਾਇਆ ਕਿ ਉਕਤ ਫਸਲ ਚੁਕਵਾਉਣ ਸਬੰਧੀ ਲਿਖਤੀ ਹੁਕਮ ਮੰਗਣ 'ਤੇ ਚੌਕੀ ਮੁਖੀ ਅਜੀਤ ਸਿੰਘ ਨੇ ਇਸਤੋਂ ਇਨਕਾਰ ਕਰ ਦਿੱਤਾ।
              ਉਨ੍ਹਾਂ ਕਿਹਾ ਕਿ ਇਹ ਸਭ ਕੁਝ ਹਰਿੰਦਰ ਸਿੰਘ ਚਮੇਲੀ ਥਾਣਾ ਮੁਖੀ ਚਮੇਲੀ ਲੰਬੀ ਦੀਆਂ ਹਦਾਇਤਾਂ 'ਤੇ ਹੋ ਰਿਹਾ ਹੈ। ਕਿਉਂਕਿ ਉਸਦੀ ਅਮਰੀਕਪਾਲ ਸਿੰਘ ਨਾਲ ਨਜ਼ਦੀਕੀ ਰਿਸ਼ਤੇਦਾਰੀ ਹੈ ਅਤੇ ਉਸਦਾ ਪੁਲਿਸ ਦੇ ਉੱਚ ਅਧਿਕਾਰੀ ਤੱਕ ਸਿੱਕਾ ਚੱਲਦਾ ਹੈ। ਉਨ੍ਹਾਂ ਕਿਹਾ ਕਿ ਭਾਵੇਂਕਿ ਜ਼ਿਲ੍ਹਾ ਪੁਲਿਸ ਮੁਖੀ ਵੱਲੋਂ ਬਰੀਕੀ ਨਾਲ ਛਾਣਬੀਣ ਕਰਨ ਦੇ ਦਾਅਵੇ ਕੀਤੇ ਜਾ ਰਹੇ ਪਰ ਉਨ੍ਹਾਂ ਨੂੰ ਇਸ ਬਾਰੇ ਪੁਲਿਸ ਵੱਲੋਂ ਅੱਜ ਤੱਕ ਕਦੇ ਵੀ ਨਹੀਂ ਪੁੱਛਿਆ। ਸ੍ਰੀ ਢਿੱਲੋਂ ਨੇ ਕਿਹਾ ਕਿ ਪੁਲਿਸ ਵੱਲੋਂ ਨਿਆਂ ਨਾ ਮਿਲਣ ਕਰਕੇ ਹੁਣ ਅਦਾਲਤੀ ਕਾਰਵਾਈ ਲਈ ਮਜ਼ਬੂਰ ਹੋਣਾ ਪੈ ਰਿਹਾ ਹੈ। ਇਸ ਸਬੰਧ ਵਿਚ ਦੂਜੀ ਧਿਰ ਅਮਰੀਕਪਾਲ ਸਿੰਘ ਹੁਰਾਂ ਨਾਲ ਵਾਰ-ਵਾਰ ਸੰਪਰਕ ਕਰਨ 'ਤੇ ਉਨ੍ਹਾਂ ਵੱਲੋਂ ਮੋਬਾਇਲ ਨੰਬਰ 098140-56781 ਤੋਂ ਕਾਲ ਰਸੀਵ ਨਹੀਂ ਕੀਤੀ ਗਈ।
              ਸ੍ਰੀ ਮੁਕਤਸਰ ਸਾਹਿਬ ਦੇ ਜ਼ਿਲ੍ਹਾ ਪੁਲਿਸ ਮੁਖੀ ਸ੍ਰੀ ਇੰਦਰਮੋਹਣ ਸਿੰਘ ਨੇ ਸੰਪਰਕ ਕਰਨ 'ਤੇ ਕਿਹਾ ਕਿ ਇਹ ਘਰੇਲੂ ਵਿਵਾਦ ਹੈ ਤੇ ਇਸ ਬਾਰੇ ਮਾਮਲਾ ਅਦਾਲਤ ਦੇ ਵਿਚਾਰਧੀਨ ਹੈ। ਅਜਿਹੇ ਵਿਚ ਥਾਣੇ ਮੁਹਰੇ ਧਰਨਾ ਦੇਣ ਦਾ ਤੁੱਕ ਨਹੀਂ ਬਣਦਾ।

ਸੁਖਬੀਰ ਸਿੰਘ ਬਾਦਲ ਦੀ ਹਾਜ਼ਰੀ 'ਚ ਪਿੰਡ ਬਾਦਲ ਰਿਹਾਇਸ਼ 'ਤੇ ਕੌਮੀ ਅਕਾਲੀ ਆਗੂ ਅਤੇ ਅਕਾਲੀ ਵਰਕਰ ਭਿੜਿਆ

 -ਸਮਰਥਕਾਂ ਵੱਲੋਂ ਗਲਾਮਾਂ ਫੜਣ 'ਤੇ ਚਾਹ ਦਾ ਕੱਪ ਅਕਾਲੀ ਆਗੂ ਦੇ ਮੂੰਹ 'ਤੇ ਮਾਰਿਆ-
                                                       -ਇਕਬਾਲ ਸਿੰਘ ਸ਼ਾਂਤ-
2 ਮਈ ਨੂੰ ਪਿੰਡ ਬਾਦਲ ਵਿਖੇ ਉੱਪ ਮੁੱਖ ਮੰਤਰੀ ਅਤੇ ਗ੍ਰਹਿ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਦੀ ਹਾਜ਼ਰੀ ਵਿਚ ਉਨ੍ਹਾਂ ਦੀ ਰਿਹਾਇਸ਼ 'ਤੇ ਅਮਨ ਕਾਨੂੰਨ ਦੀ ਸਥਿਤੀ ਉਸ ਸਮੇਂ ਵਿਗੜ ਗਈ ਜਦੋਂ ਇੱਕ ਜ਼ਮੀਨੀ ਵਿਵਾਦ ਦੇ ਵਿਵਾਦਤ ਮਾਮਲੇ ਨੂੰ ਲੈ ਕੇ ਯੂਥ ਅਕਾਲੀ ਦਲ ਦੇ ਕੌਮੀ ਪੱਧਰ ਦੇ ਇੱਕ ਆਗੂ ਅਤੇ ਇੱਕ ਕਿਸਾਨ ਵਿਚਕਾਰ ਸਿੱਧਾ ਟਕਰਾਅ ਹੋ ਗਿਆ, ਜੋ ਕਿ ਪਲਾਂ ਵਿਚ ਹੱਥੋਂ-ਪਾਈ ਤੱਕ ਪੁੱਜ ਗਿਆ।
        

       ਇਸ ਦੌਰਾਨ ਉੱਪ ਮੁੱਖ ਮੰਤਰੀ ਦੀ 'ਮਹਿਲਨੁਮਾ' ਰਿਹਾਇਸ਼ ਦੀ ਕੰਟੀਨ ਵਿਚ ਜਿੱਥੇ ਅਕਾਲੀ ਆਗੂ ਦੇ ਸਮਰਥਕਾਂ ਨੇ ਅਕਾਲੀ ਵਰਕਰ ਕੁੜਤੇ ਨੂੰ ਹੱਥ ਪਾ ਲਿਆ। ਜਿਸ 'ਤੇ ਅਕਾਲੀ ਵਰਕਰ ਨੇ ਤੈਸ਼ ਵਿਚ ਆ ਕੇ ਗਰਮਾ-ਗਰਮ ਚਾਹ ਦਾ ਕੱਪ ਹੀ ਉਕਤ ਆਗੂ ਦੇ ਮੂੰਹ 'ਤੇ ਦੇ ਮਾਰਿਆ। 
 ਦੋਸ਼ ਹੈ ਕਿ ਉਪਰੰਤ ਪਿੰਡ ਮਿੱਡੂਖੇੜਾ ਵਿਖੇ ਉਕਤ ਅਕਾਲੀ ਵਰਕਰ ਦੀ ਕਾਰ ਵਿਚ ਟੱਕਰ ਮਾਰ ਕੇ ਸੰਗੀਨਾਂ ਦੇ ਜ਼ੋਰ 'ਤੇ ਉਸਦੀ ਕਾਫ਼ੀ ਖਿੱਚ ਧੂਹ ਵੀ ਕੀਤੀ ਗਈ। ਜਿਸਨੂੰ ਮੌਕੇ 'ਤੇ ਪਹੁੰਚ ਕੇ ਪਿੰਡ ਵਾਲਿਆਂ ਨੇ ਉਸਨੂੰ ਬਚਾਇਆ।
           
          ਇਹ ਘਟਨਾ ਬਾਅਦ ਦੁਪਿਹਰ ਲਗਭਗ 2:15 ਵਜੇ ਉਸ ਵੇਲੇ ਵਾਪਰੀ ਜਦੋਂ ਪਿੰਡ ਮਿੱਡੂਖੇੜਾ ਦਾ ਜਗਰੂਪ ਸਿੰਘ ਪੁੱਤਰ ਕਰਨੈਲ ਸਿੰਘ ਆਪਣੀ ਜ਼ਮੀਨ ਵਿਚੋਂ ਉਸਦੇ ਸਰੀਕਾਂ ਵੱਲੋਂ ਕਥਿਤ ਤੌਰ ਉਤੇ ਕੌਮੀ ਪੱਧਰ ਦੇ ਅਕਾਲੀ ਆਗੂ ਦੀ ਕਥਿਤ ਸ਼ਹਿ 'ਤੇ ਗੰਨਮੈਨਾਂ ਦੀ ਹਮਾਇਤ ਸਕਦਾ ਜ਼ਬਰਦਸਤੀ ਕੰਬਾਈਨ ਨਾਲ ਕਣਕ ਕਟਵਾਉਣ ਦੇ ਦੋਸ਼ ਲਾਉਂਦਾ ਹੋਇਆ ਇਨਸਾਫ਼ ਦੀ ਗੁਹਾਰ ਲੈ ਕੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਦੇ ਦਰਬਾਰ ਵਿਚ ਗਿਆ ਸੀ। ਜਗਰੂਪ ਸਿੰਘ ਨੇ ਦੱਸਿਆ ਕਿ ਜਦੋਂ ਉਹ ਸ: ਬਾਦਲ ਕੋਲ ਆਪਣਾ ਦੁਖੜਾ ਸੁਣਾ ਰਿਹਾ ਸੀ ਤੇ ਉਸਨੇ ਕੋਲ ਹੀ ਖੜ੍ਹੇ ਇੱਕ ਕੌਮੀ ਪੱਧਰ ਦੇ ਅਕਾਲੀ ਆਗੂ 'ਤੇ ਕਣਕ ਵੱਢਣ ਦੇ ਦੋਸ਼ ਲਾਉਂਦਿਆਂ ਇਨਸਾਫ਼ ਦਿਵਾਉਣ ਦੀ ਮੰਗ ਕੀਤੀ ਤਾਂ ਉੱਪਰੋਂ ਉਕਤ ਆਗੂ ਨੇ ਕਥਿਤ ਤੌਰ 'ਤੇ ਉਸਨੂੰ ਉਪ ਮੁੱਖ ਮੰਤਰੀ ਸਾਹਮਣੇ ਹੀ 'ਵੇਖ ਲੈਣ' ਦੀ ਧਮਕੀ ਦਿੱਤੀ। ਇਸੇ ਦੌਰਾਨ ਉਪ ਮੁੱਖ ਮੰਤਰੀ ਨੇ ਖੇਤਰ ਵਿਚ ਸੱਤਾ ਪੱਖ ਦੇ ਝੰਡਾਬਰਦਾਰ ਵਿਚਰਦੇ ਇੱਕ ਖਾਕੀ ਅਧਿਕਾਰੀ ਨੂੰ ਮਾਮਲੇ ਦੀ ਸੱਚਾਈ ਕੱਢ ਕੇ ਵਿਸਥਾਰਤ ਰਿਪੋਰਟ ਪੇਸ਼ ਕਰਨ ਦੇ ਨਿਰਦੇਸ਼ ਦਿੱਤੇ। 
        
         ਜਗਰੂਪ ਸਿੰਘ ਨੇ ਦੱਸਿਆ ਕਿ ਉਪ ਮੁੱਖ ਮੰਤਰੀ ਨੇ ਭਰੋਸਾ ਦਿਵਾਇਆ ਕਿ ਜੇਕਰ ਉਸ ਦੀ ਗੱਲ ਸੱਚਾਈ 'ਚ ਹੋਣ ਦੀ ਸੂਰਤ ਵਿਚ ਉਸਦੀ ਕਣਕ ਦਾ ਇੱਕ-ਇੱਕ ਦਾਣਾ ਦਿਵਾਉਣ ਦਾ ਭਰੋਸਾ ਦਿਵਾਇਆ। ਜਦੋਂ ਉਹ ਸ੍ਰੀ ਸੁਖਬੀਰ ਸਿੰਘ ਬਾਦਲ ਨੂੰ ਗੁਹਾਰ ਲਾਉਣ ਉਪਰੰਤ ਉਪ ਮੁੱਖ ਮੰਤਰੀ ਦੀ ਰਿਹਾਇਸ਼ ਦੀ ਕੰਟੀਨ ਵਿਚ ਕੱਪ ਵਿਚ ਚਾਹ ਪੀ ਰਿਹਾ ਸੀ ਤਾਂ ਅੰਦਰੋਂ ਅਕਾਲੀ ਆਗੂ ਆਪਣੇ ਸਮਰਥਕਾਂ ਨਾਲ ਉਥੇ ਆ ਗਿਆ ਅਤੇ ਉਸਦੇ ਨਾਲ ਖਹਿਬੜਣ ਲੱਗੇ। ਜਗਰੂਪ ਸਿੰਘ ਨੇ ਦੱਸਿਆ ਕਿ ਉਸੇ ਦੇ ਪਿੰਡ ਦੇ ਆਗੂ ਦੇ ਸਮਰਥਕਾਂ ਨੇ ਵੇਖਦੇ ਹੀ ਵੇਖਦੇ ਉਸਦੇ ਗਲਾਮੇ ਵਿਚ ਵਿੱਚ ਹੱਥ ਪਾ ਲਿਆ। ਜਿਸ 'ਤੇ ਉਸ ਦੇ ਹੱਥ 'ਚ ਫੜਿਆ ਗਰਮ-ਗਰਮ ਚਾਹ ਦਾ ਕੱਪ ਛਲਕ ਕੇ ਅਕਾਲੀ ਆਗੂ ਦੇ ਮੂੰਹ 'ਤੇ ਪੈ ਗਿਆ। ਜਗਰੂਪ ਸਿੰਘ ਨੇ ਆਖਿਆ ਕਿ ਉਥੇ ਮਾਹੌਲ ਵਿਗੜਦਾ ਵੇਖ ਉਹ ਉਥੋਂ ਆਪਣੇ ਪਿੰਡ ਮਿੱਡੂਖੇੜਾ ਨੂੰ ਵਾਪਸ ਦੌੜ ਆਇਆ।
        
        ਮਿੱਡੂਖੇੜਾ ਦੇ ਸਾਬਕਾ ਸਰਪੰਚ ਅਤੇ ਬਜ਼ੁਰਗ ਅਕਾਲੀ ਆਗੂ ਸ: ਗੁਰਦਿਆਲ ਸਿੰਘ ਕੁਲਾਰ ਦੀ ਹਾਜ਼ਰੀ ਵਿਚ ਜਗਰੂਪ ਸਿੰਘ ਨੇ ਦੋਸ਼ ਲਾਇਆ ਕਿ ਉਕਤ ਅਕਾਲੀ ਆਗੂ ਅਤੇ ਉਸਦੇ ਗੰਨਮੈਨਾਂ ਨੇ ਕਥਿਤ ਤੌਰ 'ਤੇ ਪਿੰਡ ਮਿੱਡੂਖੇੜਾ ਦੀ ਇੱਕ ਗਲੀ ਵਿਚ ਉਸਦੀ ਮਾਰੂਤੀ ਕਾਰ ਵਿਚ ਇਨੋਵਾ ਗੱਡੀ ਦੀ ਟੱਕਰ ਮਾਰ ਕੇ ਘੇਰ ਲਿਆ ਅਤੇ ਉਸਦੀ ਕਾਫ਼ੀ ਮਾਰ-ਕੁੱਟ ਕੀਤੀ ਅਤੇ ਉਸਦੀ ਕਾਰ ਦਾ ਸ਼ੀਸ਼ਾ ਭੰਨ ਦਿੱਤਾ। ਜਗਰੂਪ ਸਿੰਘ ਨੇ ਦੱਸਿਆ ਕਿ ਗਿਣਤੀ ਵਿਚ ਤਿੰਨ-ਚਾਰ ਗੰਨਮੈਨਾਂ ਨੇ ਉਸ 'ਤੇ ਅਸਾਲਟ ਤਾਣ ਲਈ ਅਤੇ ਉਸਨੂੰ ਮਾਰਨ ਦਾ ਰੌਹਬ ਵੀ ਵਿਖਾਇਆ। ਪਿੰਡ ਦੇ ਇੱਕ ਵਿਅਕਤੀ ਤੇਜਾ ਰਾਮ ਪੁੱਤਰ ਮੰਗਤ ਰਾਮ ਨੇ ਮੌਕੇ 'ਤੇ ਪਹੁੰਚ ਕੇ ਛੁੜਵਾਇਆ।
         ਜਗਰੂਪ ਸਿੰਘ ਨੇ ਉਕਤ ਵਿਵਾਦ ਬਾਰੇ ਦੱਸਦਿਆਂ ਕਿਹਾ ਕਿ ਉਹ ਪਿੰਡ ਮਹਿਣਾ ਵਿਖੇ ਸਥਿਤ ਜੱਦੀ ਜ਼ਮੀਨ ਵਿਚੋਂ ਉਸਨੂੰ ਏਕੜ ਹਿੱਸਾ ਮਿਲਿਆ ਹੋਇਆ ਹੈ ਤੇ ਸੰਨ 1996 ਵਿਚ ਵੰਡ ਤੋਂ ਬਾਅਦ ਲਗਾਤਾਰ ਕਾਸ਼ਤ ਕਰ ਰਿਹਾ ਹੈ ਤੇ ਗਿਰਦਾਵਰੀ ਦੀ ਉਸਦੇ ਨਾਂਅ ਹੈ ਤੇ ਉਸਨੇ ਉਕਤ ਜ਼ਮੀਨ 'ਤੇ ਤਿੰਨ ਲੋਨ ਵੀ ਲਏ ਹਨ। ਜਗਰੂਪ ਵਿਚ ਮੁਤਾਬਕ ਉਸ ਕੋਲ ਅਦਾਲਤੀ ਸਟੇਅ ਵੀ ਹੈ, ਪਰ ਹੁਣ ਉਕਤ ਜ਼ਮੀਨ 'ਤੇ ਉਸ ਵੱਲੋਂ ਬੀਜੀ ਕਣਕ ਨੂੰ ਧੱਕੇ ਨਾਲ ਜ਼ਬਰਦਸਤੀ ਪਿੰਡ ਦੇ ਇੱਕ ਕੌਮੀ ਪੱਧਰ ਦੇ ਅਕਾਲੀ ਆਗੂ ਨੇ ਕਥਿਤ ਤੌਰ 'ਤੇ ਕੰਬਾਇਨ ਅਤੇ ਆਪਣੇ ਗੰਨਮੈਨਾਂ ਉਸਦੇ ਸਰੀਕਾਂ ਨਾਲ ਭੇਜ ਕੇ ਕਣਕ ਕਟਵਾ ਲਈ। ਉਸਨੇ ਮੰਗ ਕੀਤੀ ਕਿ ਉਸਦੀ ਜ਼ਮੀਨ ਵਿਚੋਂ ਕਟਵਾਈ ਕਣਕ ਦੀ ਫਸਲ ਵਾਪਸ ਦਿਵਾਈ ਜਾਵੇ ਤੇ ਦੋਸ਼ੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਜਾਵੇ।
        ਇਸੇ ਦੌਰਾਨ ਪੱਖ ਜਾਨਣ ਲਈ ਸੰਪਰਕ ਕਰਨ 'ਤੇ ਸ਼੍ਰੋਮਣੀ ਅਕਾਲੀ ਦਲ (ਬ) ਦੇ ਕੌਮੀ ਮੀਤ ਪ੍ਰਧਾਨ ਤੇਜਿੰਦਰ ਸਿੰਘ ਮਿੱਡੂਖੇੜਾ ਨੇ ਉਕਤ ਵਿਅਕਤੀ ਦੇ ਸਮੁੱਚੇ ਦੋਸ਼ਾਂ ਨੂੰ ਬੇਬੁਨਿਆਦ ਕਰਾਰ ਦਿੰਦਿਆਂ ਕਿਹਾ ਕਿ ਜਗਰੂਪ ਸਿੰਘ ਦੇ ਭਰਾਵਾਂ ਦਾ ਘਰੇਲੂ ਵਿਵਾਦ ਹੈ। ਜਿਸ ਵਿਚ ਮੈਨੂੰ ਬੇਵਜ੍ਹਾ ਘਸੀਟਿਆ ਜਾ ਰਿਹਾ ਹੈ।
        ਸੂਬੇ ਦੀ ਹਾਕਮਾਂ ਦੀ ਰਿਹਾਇਸ਼ 'ਤੇ ਵਾਪਰੀ ਇਸ ਘਟਨਾ ਦੀ ਖੇਤਰ ਦੀਆਂ ਅਕਾਲੀ ਸਫ਼ਾ ਸਮੇਤ ਹਰ ਵਰਗ ਵਿਚ ਖੂਬ ਚਰਚਾ ਹੈ। ਉਥੇ ਅਕਾਲੀ ਦਲ ਦੇ ਇੱਕ ਵਿਸ਼ੇਸ਼ ਧੜੇ ਦੇ ਵਿਅਕਤੀਆਂ ਨੇ ਉਕਤ ਮਾਮਲੇ ਨੂੰ ਪੱਤਰਕਾਰਾਂ ਵਿਚ ਫੋਨ ਕਰ-ਕਰਕੇ ਖੂਬ ਪ੍ਰਚਾਰਤ ਕੀਤਾ। ਪਰ ਇਸ ਸਭ ਵਿੱਚ ਭੁੱਲ ਬੈਠੇ ਕਿ ਉਹ ਆਪਣੇ ਵਿਰੋਧੀ ਧੜੇ ਦੇ ਇੱਕ ਆਗੂ ਨਾਲ ਕਿੜ ਕੱਢਣ ਦੇ ਫਿਰਾਕ ਵਿਚ ਆਪਣੀ ਹਾਈਕਮਾਂਡ ਦੀ ਹੇਠੀ ਕਰਵਾ ਰਹੇ ਹਨ। ਜੋ ਕਿ ਪਹਿਲਾਂ ਹੀ ਆਪਣੇ ਸਰੀਕਾਂ ਦੇ ਦਿੱਤੇ ਤਾਜ਼ਾ ਜਖ਼ਮਾਂ 'ਤੇ ਮਲ੍ਹਮ ਲਾਉਂਦੇ ਫਿਰਦੇ ਹਨ।

ਸੇਲਵਰਾਹ 'ਚ ਪੁਲਿਸ ਨੇ ਅੱਤਵਾਦ ਸਮੇਂ ਦਾ ਵਕਤ ਯਾਦ ਕਰਾਇਆ

                                   ਗੁਰਦੁਆਰੇ ਤੋਂ ਕੀਤਾ ਵਾਅਦਾ ਤੋੜ ਕੇ ਘਰਾਂ ਦੇ ਸਮਾਨ ਦੀ ਭੰਨਤੋੜ ਕੀਤੀ
                                    'ਰਾਜ ਨਹੀਂ ਸੇਵਾ' ਕਰਨ ਵਾਲੀ ਬਾਦਲ ਸਰਕਾਰ ਨੂੰ ਚੁਫੇਰਿਉਂ ਫਿਟਕਾਰਾਂ
ਸੇਲਵਰਾਹ (ਬਠਿੰਡਾ) : ਮਨੁੱਖ ਤਾਂ ਕੀ ਇਸ ਪਿੰਡ ਦੇ ਬੇਜੁਬਾਨ ਡੰਗਰ ਤੇ ਨਿਰਜਿੰਦ ਕੰਧਾਂ ਵੀ ਬੁਰ•ੀ ਤਰਾਂ ਸਹਿਮੀਆਂ ਪਈਆਂ ਹਨ, ਕਿਉਂਕਿ ਠੇਕਾ ਖੋਹਲਣ ਦਾ ਵਿਰੋਧ ਕਰ ਰਹੇ ਆਮ ਲੋਕਾਂ ਨੂੰ ਪਸਤ ਹਿੰਮਤ ਕਰਨ ਦੇ ਯਤਨ ਵਜੋਂ ਅੱਤਵਾਦ ਦੇ ਦਿਨਾਂ ਦੀ ਸਰਕਾਰੀ ਦਹਿਸ਼ਤ ਨੂੰ ਦੁਹਰਾਉਦਿਆਂ ਪੁਲਿਸ ਨੇ ਬੱਚਿਆਂ ਤੇ ਔਰਤਾਂ ਸਮੇਤ 250 ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਹੀ ਨਹੀਂ ਲਿਆ, ਬਲਕਿ ਦਾਣਾ ਫੱਕਾ ਖਿਲਾਰਨ ਤੋਂ ਬਿਨ•ਾਂ ਹਰ ਵਸਤ ਨੂੰ ਬੇਰਹਿਮੀ ਨਾਲ ਇਸ ਕਦਰ ਭੰਨਤੋੜ ਦਿੱਤਾ, 'ਰਾਜ ਨਹੀਂ ਸੇਵਾ' ਕਰਨ ਵਾਲੀ ਬਾਦਲ ਸਰਕਾਰ ਨੂੰ ਚੁਫੇਰਿਉਂ ਫਿਟਕਾਰਾਂ ਪੈ ਰਹੀਆਂ ਹਨ।
          
          ਮਾਮਲਾ ਕੁਝ ਇਸ ਤਰ•ਾਂ ਹੈ ਕਿ ਦੋ ਮਹੀਨੇ ਤੋਂ ਵੀ ਵੱਧ ਸਮੇਂ ਤੋਂ ਇੱਥੋਂ ਦੇ ਲੋਕ ਪਿੰਡ ਦੀ ਅਬਾਦੀ ਵਿੱਚ ਸ਼ਰਾਬ ਦਾ ਠੇਕਾ ਖੋਹਲਣ ਦਾ ਵਿਰੋਧ ਕਰਦੇ ਆ ਰਹੇ ਹਨ, ਲੇਕਿਨ ਹਾਕਮ ਧਿਰ ਦੇ ਕੁਝ ਆਗੂਆਂ ਦੇ ਆਰਥਿਕ ਹਿਤਾਂ ਨੂੰ ਮੱਦੇਨਜਰ ਰਖਦਿਆਂ ਸਾਸਨ ਤੇ ਪ੍ਰਸਾਸਨ ਹਰ ਹੀਲੇ ਦਾਰੂ ਦੀਆਂ ਛਬੀਲਾਂ ਲਵਾਉਣ ਲਈ ਪੱਬਾਂ ਭਾਰ ਹੋਇਆ ਫਿਰਦੈ।  30 ਅਪਰੈਲ ਤੇ ਇੱਕ ਮਈ ਦੀ ਦਰਮਿਆਨੀ ਰਾਤ ਨੂੰ ਸਮੁੱਚੇ ਪਿੰਡ ਤੋਂ ਆਕੀ ਹੋਏ ਇੱਕ ਅਣਅਧਿਕਾਰਤ ਸਖ਼ਸ ਨੇ ਜਦ ਗੈਰਕਾਨੂੰਨੀ ਢੰਗ ਤਰੀਕਿਆਂ ਨਾਲ ਦਾਰੂ ਵੇਚਣ ਦਾ ਯਤਨ ਕੀਤਾ ਤਾਂ ਔਰਤਾਂ ਸਮੇਤ ਪਿੰਡ ਦੀ ਬਹੁਗਿਣਤੀ ਨੇ ਉਸਦਾ ਵਿਰੋਧ ਕਰਨਾ ਸੁਰੂ ਕਰ ਦਿੱਤਾ। ਉਸ ਵੱਲੋਂ ਬੁਲਾਈ ਪੁਲਿਸ ਤੇ ਆਮ ਲੋਕਾਂ ਦਰਮਿਆਨ ਟਕਰਾਅ ਹੋ ਗਿਆ, ਜਿਸਦੇ ਚਲਦਿਆਂ ਦੋਵਾਂ ਧਿਰਾਂ ਦੇ ਕੁਝ ਲੋਕ ਜਖਮੀ ਹੋ ਗਏ ਤੇ ਕਿਸੇ ਸਰਾਰਤੀ ਵੱਲੋਂ ਲਾਈ ਅੱਗ ਕਾਰਨ ਪੁਲਿਸ ਦੀ ਗੱਡੀ ਸੜ ਕੇ ਸੁਆਹ ਹੋ ਗਈ।
          ਇੱਕ ਮਈ ਦਾ ਦਿਨ ਤਾਂ ਭਾਵੇਂ ਸਾਂਤੀ ਨਾਲ ਬੀਤ ਗਿਆ, ਲੇਕਿਨ ਹਨੇਰਾ ਹੁੰਦਿਆਂ ਹੀ ਪੁਲਿਸ ਦੀਆਂ ਭਾਰੀ ਭਰਕਮ ਧਾੜਾਂ ਨੇ ਪਿੰਡ ਦੇ ਸਕੂਲ ਨੂੰ ਆਪਣੀ ਛਾਉਣੀ ਵਿੱਚ ਤਬਦੀਲ ਕਰ ਦਿੱਤਾ। ਗੁਰਦੁਆਰਾ ਸਾਹਿਬ ਦੇ ਸਪੀਕਰ ਤੋਂ ਕੀਤੀ ਅਨਾਊਂਸਮੈਂਟ ਰਾਹੀਂ ਪੁਲਿਸ ਨੇ ਇਸ ਵਾਅਦੇ ਨਾਲ ਲੋਕਾਂ ਨੂੰ ਆਪੋ ਆਪਣੇ ਘਰਾਂ ਵਿੱਚ ਰਹਿਣ ਦੀ ਤਾਕੀਦ ਕਰ ਦਿੱਤੀ ਕਿ ਉਹਨਾਂ ਨਾਲ ਕਿਸੇ ਕਿਸਮ ਦੀ ਧੱਕੇਸ਼ਾਹੀ ਜਾਂ ਬੇਇਨਸਾਫੀ ਨਹੀਂ ਹੋਵੇਗੀ। ਠੇਕਾ ਵਿਰੋਧੀ ਅੰਦੋਲਨ ਦੇ ਅਹਿਮ ਸੰਚਾਲਕ ਤਾਂ ਭਾਵੇਂ ਪਹਿਲਾਂ ਹੀ ਰੂਪੋਸ ਹੋ ਚੁੱਕੇ ਸਨ, ਲੇਕਿਨ ਗੁਰੂ ਘਰ ਚੋਂ ਹੋਈ ਮੁਨਾਦੀ ਨੂੰ ਇਲਾਹੀ ਹੁਕਮ ਪ੍ਰਵਾਨ ਕਰਦਿਆਂ ਆਮ ਲੋਕ ਆਪੋ ਆਪਣੇ ਘਰਾਂ ਵਿੱਚ ਹੀ ਰਹੇ।
          
        ਪਿੰਡ ਦੀ ਮੁਕੰਮਲ ਘੇਰਾਬੰਦੀ ਕਰਦਿਆਂ ਮੂੰਹ ਹਨੇਰੇ ਹੀ ਪੁਲਿਸ ਨੇ ਹਰ ਘਰ ਵਿੱਚ ਛਾਪੇ ਮਾਰਨ ਦੀ ਕਾਰਵਾਈ ਸੁਰੂ ਕਰ ਦਿੱਤੀ। ਟੈਲੀਵੀਜਨ ਫਰਿੱਜ ਬਿਜਲੀ ਦੇ ਮੀਟਰ ਇੱਥੋਂ ਤੱਕ ਕਿ ਟੁੱਟਣ ਵਾਲੀ ਜੋ ਵੀ ਵਸਤ ਨਜਰ ਪਈ, ਉਸਨੂੰ ਬੁਰ•ੀ ਤਰਾਂ ਤੋੜਿਆ ਭੰਨਿਆਂ ਹੀ ਨਹੀਂ ਬਲਕਿ ਪੁਲਿਸ ਵਾਲਿਆਂ ਨੇ ਘਰਾਂ ਵਿੱਚ ਪਏ ਦਾਣੇ ਫੱਕੇ ਨੂੰ ਵੀ ਖਿਲਾਰ ਦਿੱਤਾ। ਰੱਸੇ ਸੰਗਲ ਖੋਹਲਦਿਆਂ ਡੰਗਰਾਂ ਨੂੰ ਘਰਾਂ ਚੋਂ ਭਜਾ ਦਿੱਤਾ, ਬਾਬੇਕਿਆਂ ਤੇ ਬਾਬਰ ਕੇ ਬਣ ਕੇ ਚੜ•ਣ ਵਾਲਿਆਂ ਨੇ ਬੱਚਿਆਂ ਤੇ ਔਰਤਾਂ ਸਮੇਤ ਢਾਈ ਸੌ ਤੋਂ ਵੀ ਵੱਧ ਵਿਅਕਤੀਆਂ ਨੂੰ ਹਿਰਾਸਤ ਵਿੱਚ ਲੈ ਕੇ ਫੂਲ ਭਗਤਾ ਦਿਆਲਪੁਰਾ ਆਦਿ ਥਾਨਿਆਂ ਵਿੱਚ ਡੱਕ ਦਿੱਤਾ। ਸਿਤਮ ਜਰੀਫੀ ਇਹ ਕਿ ਜਦ ਪਿੰਡ ਦੇ ਲੋਕ ਆਪਣੇ ਹਮਵਤਨਾਂ ਲਈ ਲੰਗਰ ਲੈ ਕੇ ਆਏ ਤਾਂ ਥਾਨਾ ਫੂਲ ਦੀ ਪੁਲਿਸ ਨੇ ਪਹਿਲਾਂ ਤਾਂ ਵਰਤਾਉਣ ਤੋਂ ਰੋਕ ਦਿੱਤਾ, ਲੇਕਿਨ ਵਾਰ ਵਾਰ ਕੀਤੇ ਤਰਲਿਆਂ ਤੋਂ ਬਾਅਦ ਹੀ ਇਜਾਜਤ ਦਿੱਤੀ।
        
        ਪਿੰਡ ਦਾ ਮਹੌਲ ਇਸ ਕਦਰ ਗਮਗੀਨ ਤੇ ਦਹਿਸ਼ਤਜਦਾ ਹੋ ਗਿਆ, ਕਿ ਅਖ਼ਬਾਰ ਜਾਂ ਟੀ ਵੀ ਚੈਨਲ ਵਿੱਚ ਨਾ ਆਉਣ ਦੀ ਵਜ•ਾ ਕਾਰਨ ਸੰਗੀਨ ਧਰਾਵਾਂ ਥੱਲੇ ਗਿਰਫਤਾਰੀ ਤੋਂ ਡਰਦਿਆਂ ਮੌਕੇ ਤੇ ਪੁੱਜੀ ਮੀਡੀਆ ਪ੍ਰਤੀਨਿਧਾਂ ਦੀ ਟੀਮ ਸਾਹਮਣੇ ਕਿਸੇ ਨੇ ਜੁਬਾਨ ਖੋਹਲਣੀ ਵੀ ਮੁਨਾਸਿਬ ਨਾ ਸਮਝੀ। ਅਫਸੋਸਨਾਕ ਪਹਿਲੂ ਇਹ ਹੈ ਕਿ ਜਦ ਇੱਕ ਪਿੰਡ ਵਿੱਚ ਅਜਿਹਾ ਤਾਂਡਵ ਨਾਚ ਨੱਚਿਆ ਜਾ ਰਿਹਾ ਸੀ ਤਾਂ ਸੱਭਿਆਚਾਰਕ ਸਰਗਰਮੀਆਂ ਦੇ ਮੋਹਰੀ ਜਸਦੇਵ ਸਿੰਘ ਜੱਸੋਵਾਲ ਜੋ ਸਾਬਕਾ ਵਿਧਾਇਕ ਵੀ ਹਨ ਤੇ ਡੀ ਆਈ ਜੀ ਦੇ ਅਹੁਦੇ ਤੋਂ ਸੇਵਾਮੁਕਤ ਹੋ ਕੇ ਬਣੇ ਸਮਾਜ ਸੁਧਾਰਕ ਸ੍ਰੀ ਹਰਿੰਦਰ ਸਿੰਘ ਚਾਹਲ ਤੋਂ ਇਲਾਵਾ ਕਿਸੇ ਵੀ ਸਿਆਸੀ ਜਾਂ ਜਨਤਕ ਆਗੂ ਨੇ ਲੋਕਾਂ ਦੀ ਸਾਰ ਲੈਣੀ ਮੁਨਾਸਿਬ ਨਾ ਸਮਝੀ।
       
         ਜੱਸੋਵਾਲ ਚਾਹਲ ਜੋੜੀ ਦੀ ਆਮਦ ਤੋਂ ਬਾਅਦ ਨਾਂ ਗੁਪਤ ਰੱਖਣ ਦੀ ਸਰਤ ਤੇ ਬਜੁਰਗ ਅਵਸਥਾ ਵਿੱਚ ਪੁੱਜ ਚੁੱਕੇ ਕੁਝ ਮਰਦਾਂ ਤੇ ਔਰਤਾਂ ਨੇ ਮੂੰਹ ਖੋਹਲਣ ਦੀ ਹਿੰਮਤ ਦਿਖਾਈ।  80ਵਿਆਂ ਨੂੰ ਢੁੱਕ ਚੁੱਕੇ ਇੱਕ ਬਾਬੇ ਬੋਲਣ ਸਮੇਂ ਹੰਝੂਆਂ ਨਾਲ ਜਿਸ ਦੀ ਸਫੈਦ ਦਾਹੜੀ ਭਿੱਜ ਚੁੱਕੀ ਸੀ, ਨੇ ਅੱਤਵਾਦ ਦੇ ਦਿਨਾਂ ਨੂੰ ਯਾਦ ਕਰਦਿਆਂ ਕਿਹਾ ਕਿ ਜਿਵੇਂ ਉਦੋਂ ਕਿਸੇ ਇੱਕ ਅੱਧ ਮੁੰੰਡੇ ਨੂੰ ਫੜਣ ਵਾਸਤੇ ਪੁਲਿਸ ਤੇ ਫੌਜਾਂ ਪਿੰਡਾਂ ਨੂੰ ਘੇਰਿਆ ਕਰਦੀਆਂ ਸਨ, ਉਹਨਾਂ ਨਾਲ ਵੀ ਅੱਜ ਉਸਤੋਂ ਕਿਤੇ ਵੱਧ ਧੱਕੇਸ਼ਾਹੀ ਹੋਈ ਹੈ। ਸਰਕਾਰਾਂ ਵੱਲੋਂ ਨਸ਼ਾ ਬੰਦੀ ਲਈ ਕੀਤੇ ਜਾ ਰਹੇ ਦਾਅਵਿਆਂ ਵੱਲ ਜਦ ਬਾਬੇ ਦਾ ਧਿਆਨ ਦਿਵਾਇਆ ਤਾਂ ਉਸਦਾ ਉੱਤਰ ਸੀ, ਇੱਥੇ ਤਾਂ ਰਾਜ ਭਾਗ ਦੇ ਮਾਲਕ ਹੀ ਡੰਡੇ ਦੇ ਜੋਰ ਨਾਲ ਜਹਿਰੀਲੀ ਦਾਰੂ ਵਿਕਵਾ ਰਹੇ ਹਨ, ਜੋ ਹੁਣ ਤੱਕ ਕਈਆਂ ਦੀ ਜਾਨ ਲੈ ਚੁੱਕੀ ਹੈ।
ਅਮ੍ਰਿਤਧਾਰੀ ਇੱਕ ਬੇਬੇ ਨੇ ਆਪਣੀਆਂ ਜਖ਼ਮੀ ਭਾਵਨਾਵਾਂ ਦਾ ਇਜ਼ਹਾਰ ਕਰਦਿਆਂ ਸੁਆਲ ਕੀਤਾ ਕਿ ਆਪਣੇ ਇਲਾਕੇ ਤੋਂ ਲੈ ਕੇ ਬਾਹਰਲੇ ਸ਼ਹਿਰਾਂ ਤੱਕ ਜਮੀਨਾਂ ਤੇ ਕਬਜੇ ਕਰਕੇ ਵੀ ਜੇ ਸਥਾਨਕ ਆਗੂਆਂ ਦੀ ਤਮਾਂ ਨਹੀਂ ਭਰੀ ਤਾਂ ਉਹ ਜਹਿਰੀਲੀ ਦਾਰੂ ਰਾਹੀਂ ਸਾਡੇ ਬੱਚਿਆਂ ਦੇ ਸਿਵੇ ਜਲਾ ਕੇ ਕਿਲ•ੇ ਨਹੀਂ ਉਸਾਰਨ ਲੱਗੇ। ਕ੍ਰਿਪਾਨ ਵਾਲੇ ਗਾਤਰੇ ਨੂੰ ਹੱਥ ਵਿੱਚ ਲੈਂਦਿਆਂ ਬੇਬੇ ਨੇ ਆਪਣੇ ਵਾਹਿਗੁਰੂ ਨੂੰ ਅਰਜੋਈ ਕੀਤੀ ਕਿ ਜਿਸ ਸਰਕਾਰ ਦੀ ਪੁਲਿਸ ਨੇ ਗੁਰੂ ਘਰ ਦੇ ਸਪੀਕਰ ਰਾਹੀਂ ਕੀਤਾ ਵਾਅਦਾ ਵੀ ਨਹੀਂ ਨਿਭਾਇਆ ਜੇ ਉਸ ਵਿੱਚ ਕੋਈ ਸਕਤੀ ਹੈ ਤਾਂ ਉਸਦਾ ਬੇੜਾ ਜਰੂਰ ਗਰਕ ਕਰ ਦੇਵੇ।
          
          ਪੱਤਰਕਾਰਾਂ ਦੀ ਟੀਮ ਜਦ ਥਾਨਾ ਫੂਲ ਪੁੱਜੀ ਤਾਂ ਉਹਨਾਂ ਦੀ ਸਨਾਖਤ ਤੋਂ ਅਣਜਾਣ ਤਾਕਤ ਦੇ ਨਸ਼ੇ ਵਿੱਚ ਭੂਤਰਿਆ ਇੱਕ ਥਾਨੇਦਾਰ ਆਪਣੇ ਸਾਥੀ ਨੂੰ ਬੜੇ ਫ਼ਖਰ ਨਾਲ ਇਹ ਦੱਸ ਰਿਹਾ ਸੀ, ਕਿ ਪੁਲਿਸ ਦੀ ਹੋਈ ਬੇਇਜਤੀ ਦਾ ਪਿੰਡ ਵਾਸੀਆਂ ਤੋਂ ਬਦਲਾ ਲੈਣ ਲਈ ਉਸਨੇ ਕੋਈ ਕਸਰ ਬਾਕੀ ਨਹੀਂ ਰਹਿਣ ਦਿੱਤੀ। ਅਜਿਹੇ ਵਰਤਾਰੇ ਤੋਂ ਪੋਟਾ ਪੋਟਾ ਦੁਖੀ ਇੱਕ ਸਾਊ ਪੁਲਿਸ ਵਾਲਾ ਇਹ ਕਹਿੰਦਾ ਵੀ ਸੁਣਿਆ ਗਿਆ ਕਿ ਆਪਣੇ ਲੋਕਾਂ ਨਾਲ ਕੀਤੀਆਂ ਜਾਣ ਵਾਲੀਆਂ ਜਿਆਦਤੀਆਂ ਤੋਂ ਬਚਣ ਦਾ ਹੁਣ ਇੱਕੋ ਇੱਕ ਰਾਹ ਰਹਿ ਗਿਆ ਹੈ ਸਵੈਇਛੁਕ ਸੇਵਾ ਮੁਕਤੀ।

        
          ਇੱਕੀਵੀਂ ਸਦੀ ਅਤੇ ਸੂਚਨਾ ਤਕਨੀਕ ਦੇ ਇਸ ਯੁੱਗ ਵਿੱਚ ਹੋ ਰਹੀ ਅਜਿਹੀ ਹਨੇਰਗਰਦੀ ਦਾ ਗੰਭੀਰ ਨੋਟਿਸ ਲੈਂਦਿਆਂ ਪੰਜਾਬ ਮਨੁੱਖੀ ਅਧਿਕਾਰ ਕਮੇਟੀ ਦੇ ਜਨਰਲ ਸਕੱਤਰ ਸ੍ਰੀ ਵੇਦ ਪ੍ਰਕਾਸ ਗੁਪਤਾ ਨੇ ਪੰਜਾਬ ਤੇ ਹਰਿਆਣਾ ਹਾਈਕੋਰਟ ਦੇ ਚੀਫ਼ ਜਸਟਿਸ ਨੂੰ ਅਪੀਲ ਕੀਤੀ ਕਿ ਉਹ ਰਾਮਪੁਰਾ ਫੂਲ ਇਲਾਕੇ ਵਿੱਚ ਹੋ ਰਹੀ ਸਰਕਾਰੀ ਦਹਿਸਤਗਰਦੀ ਦੀ ਆਪਣੇ ਤੌਰ ਤੇ ਪੜਤਾਲ ਕਰਵਾ ਕੇ ਲੋੜੀਂਦੀ ਕਾਰਵਾਈ ਕਰਨ। ਸੀ ਪੀ ਆਈ ਦੇ ਜਿਲ•ਾ ਸਕੱਤਰ ਕਾ: ਜਗਜੀਤ ਜੋਗਾ ਨੇ ਆਮ ਲੋਕਾਂ ਨਾਲ ਹੋਈ ਧੱਕੇਸ਼ਾਹੀ ਦੀ ਸਖਤ ਨਿਖੇਧੀ ਕਰਦਿਆਂ ਦੱਸਿਆ ਕਿ ਹਮਖਿਆਲ ਪਾਰਟੀਆਂ ਨਾਲ ਸਲਾਹ ਮਸਵਰਾ ਕਰਕੇ ਉਹ ਬਣਦੀ ਕਾਰਵਾਈ ਕਰਨਗੇ। ਦਿਹਾਤੀ ਮਜਦੂਰ ਸਭਾ ਦੇ ਪ੍ਰਮੁੱਖ ਆਗੂ ਕਾ: ਮਹੀਂਪਾਲ ਨੇ ਵੀ ਆਮ ਲੋਕਾਂ ਤੇ ਹੋਈ ਧੱਕੇਸ਼ਾਹੀ ਦੀ ਡਾਢੀ ਨਿੰਦਾ ਕੀਤੀ। 
-ਬੀ ਐਸ ਭੁੱਲਰ