ਲੋਕ ਕੁਰਸੀ ਦੇ ਪਿੱਛੇ-ਪਿੱਛੇ, ਬਾਦਲਾ ਤੇਰੇ ਮੂਹਰੇ-ਮੂਹਰੇ ਫਿਰਨ 'ਕੁਰਸੀਆਂ'

ਇਕਬਾਲ ਸਿੰਘ ਸ਼ਾਂਤ

        ਲੰਬੀ : ਸਾਰੀ ਦੁਨੀਆਂ 'ਕੁਰਸੀ' ਦੇ ਪਿੱਛੇ-ਪਿੱਛੇ ਤੁਰੀ ਫਿਰਦੀ ਹੈ। ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਇੱਕ ਅਜਿਹੇ ਸਿਆਸਤਦਾਨ ਹਨ ਜਿਨ੍ਹਾਂ ਦੇ ਮੂਹਰੇ-ਮੂਹਰੇ ਇੱਕ ਨਹੀਂ ਦੋ-ਦੋ ਕੁਰਸੀਆਂ ਤੁਰੀਆਂ ਫਿਰਦੀਆਂ ਹਨ। ਮੁੱਖ ਮੰਤਰੀ ਬਾਦਲ ਮਾਲਵੇ ਦੇ ਜ਼ਿਲ੍ਹਿਆਂ 'ਚ ਜਿੱਥੇ ਵੀ ਜਾਂਦੇ ਹਨ ਉਥੇ ਹੀ ਕੁਰਸੀਆਂ ਵਾਰੀ ਸਿਰ ਉਨ੍ਹਾਂ ਦੇ ਜਾਣ ਤੋਂ ਪਹਿਲਾਂ ਪੁੱਜ ਜਾਂਦੀਆਂ ਹਨ। ਮੀਂਹ, ਹਨ੍ਹੇਰੀ ਜਾਂ ਝੱਖੜ ਤਾਂ ਕੀ ਚੋਣ ਜ਼ਾਬਤੇ ਦਾ ਵੀ ਇਨ੍ਹਾਂ ਦੀ ਡਿਊਟੀ 'ਤੇ ਕੋਈ ਅਸਰ ਨਹੀਂ। 

           ਇਹ ਕੋਈ ਆਮ ਕੁਰਸੀਆਂ ਨਹੀਂ ਬਲਕਿ ਸੂਬੇ ਦੇ ਪ੍ਰਸ਼ਾਸਨਕ ਤੰਤਰ 'ਚ ਆਪਣੇ ਵੱਡੇ ਸਾਈਜ਼ ਅਤੇ ਬਣਤਰ ਕਰਕੇ ਮਸ਼ਹੂਰ ਹਨ। ਜਿਸਦਾ ਡਿਜ਼ਾਈਨ ਮੁੱਖ ਮੰਤਰੀ ਦਾ ਪਸੰਦੀਦਾ ਤੇ ਬੈਠਣ 'ਚ ਅਰਾਮਦੇਹ ਹੋਣ ਕਰਕੇ ਹੋਰਨਾਂ ਜ਼ਿਲ੍ਹਿਆਂ ਦੇ ਪ੍ਰਸ਼ਾਸਨ 'ਚ ਇਨ੍ਹਾਂ ਕੁਰਸੀਆਂ ਪ੍ਰਤੀ ਖਾਸੀ ਖਿੱਚ ਹੈ। ਸਰਕਾਰੀ ਸਫ਼ਾਂ 'ਚ ਵਿਸ਼ੇਸ਼ 'ਰੁਤਬਾ' ਰੱਖਦੀਆਂ ਕੁਰਸੀਆਂ ਨੂੰ ਸੰਗਤ ਦਰਸ਼ਨ ਜਾਂ ਹੋਰਨਾਂ ਸਮਾਗਮਾਂ ਵਿਚ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਬੈਠਣ ਲਈ ਵਰਤਿਆ ਜਾਂਦਾ ਹੈ। ਇਹ ਕੁਰਸੀਆਂ ਲੰਬੀ ਥਾਣੇ ਦੇ ਤਤਕਾਲੀਨ ਥਾਣੇਦਾਰ 'ਚਮੇਲੀ' ਦੇ ਵੇਲੇ ਬਣਵਾਈਆਂ ਗਈਆਂ ਸਨ ਜਿਹੜਿਆਂ ਕਿ ਚਮੇਲੀ ਦੀ 'ਟੌਹਰ' ਵਾਂਗ ਸੂਬੇ ਦੇ ਸਰਕਾਰੀ ਸਫ਼ਾ 'ਚ ਮਸ਼ਹੂਰ ਹੋ ਗਈਆਂ। ਦੋਵੇਂ ਕੁਰਸੀਆਂ ਨੂੰ ਬੜੇ ਅਦਬ-ਅਦਾਬ ਨਾਲ ਲਿਆਉਣ-ਲਿਜਾਣ ਲਈ ਬਕਾਇਦਾ ਪੁਲੀਸ ਅਮਲਾ ਤਾਇਨਾਤ ਹੁੰਦਾ ਹੈ। ਆਮ ਦਿਨਾਂ ਵਿਚ ਲੰਬੀ ਥਾਣੇ ਦੀ ਸ਼ਾਨ ਵਧਾਉਂਦੀਆਂ ਇਨ੍ਹਾਂ ਕੁਰਸੀਆਂ ਹੁਣ ਪਿਛਲੇ ਚਾਰ ਦਿਨਾਂ ਤੋਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਬੀਬੀ ਹਰਸਿਮਰਤ ਕੌਰ ਬਾਦਲ ਦੇ ਹੱਕ ਵਿਚ ਲੰਬੀ ਹਲਕੇ ਦੇ 44 ਪਿੰਡਾਂ ਦੇ ਚੋਣ ਪ੍ਰਚਾਰ ਦੌਰਾਨ ਬਕਾਇਦਾ ਮੁੱਖ ਮੰਤਰੀ ਬਾਦਲ ਦੇ ਅੱਗੇ-ਅੱਗੇ ਫਿਰਦੀਆਂ ਰਹੀਆਂ ਹਨ। ਹੁਣ ਲੋਕਸਭਾ ਚੋਣਾਂ ਦੇ ਆਦਜਸ਼ ਚੋਣ ਜ਼ਾਬਤੇ ਕਰਕੇ ਫਰਕ ਸਿਰਫ਼ ਐਨਾ ਕੁ ਆਇਆ ਇਨ੍ਹਾਂ ਨੂੰ ਲਿਆਉਣ-ਲਿਜਾਣ ਵਾਲੇ ਕਰਮਚਾਰੀਆਂ ਦੀ ਵਰਦੀ 'ਖਾਕੀ' ਤੋਂ 'ਸਾਦਾ' ਹੋ ਗਈ ਅਤੇ ਵਹੀਕਲ ਸਰਕਾਰੀ ਦੀ ਜਗ੍ਹਾ ਪੁਲੀਸ ਵੱਲੋਂ ਵਗਾਰ 'ਤੇ ਲਿਆਂਦਾ ਇੱਕ ਨਿੱਜੀ ਛੋਟਾ ਹਾਥੀ ਬਣ ਗਿਆ ਹੈ। 

           ਬੀਤੀ 13 ਫਰਵਰੀ ਨੂੰ ਪਿੰਡ ਲਾਲਬਾਈ ਵਿਖੇ ਇੱਕ ਸਮਾਗਮ ਦੌਰਾਨ ਖਾਲੀ ਪਈ ਮੁੱਖ ਮੰਤਰੀ ਬਾਦਲ ਵਾਲੀ 'ਕੁਰਸੀ' ਦਾ ਇੱਕ ਆਮ ਬਜ਼ੁਰਗ ਖੂਬ 'ਲੁਤਫ਼' ਮਾਣ ਗਿਆ ਸੀ। ਉਸਨੇ ਸਿਰਫ਼ ਬੈਠਣ ਦਾ ਸੁਖ ਹੀ ਨਹੀਂ ਮਾਣਿਆ ਬਲਕਿ ਉਸ 'ਤੇ ਕੌਫ਼ੀ ਦੀਆਂ ਚੁਸਕੀਆਂ ਵੀ ਲਈਆਂ। 

 98148-26100

ਪੰਚਾਇਤ ਵੋਟਾਂ : ਕਈ ਸਿਆਸੀ ਖੁੰਡਾਂ ਦੀਆਂ ਜੜ੍ਹਾਂ ਨੰਗੀਆਂ ਹੋਈਆਂ

  - ਅਕਾਲੀ ਦਲ ਦੀ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਕਰਮਜੀਤ ਕੌਰ ਸਿੱਖਵਾਲਾ ਸਰਪੰਚੀ ਚੋਣ 'ਚ ਚੌਥੇ ਨੰਬਰ 'ਤੇ ਰਹੀ - 


- ਹਕੂਮਤੀ ਹਲਕੇ 'ਚ ਅਕਾਲੀ ਦਲ ਵੱਖ-ਵੱਖ ਧੜਿਆਂ ਦਾ 81 ਅਤੇ ਕਾਂਗਰਸ ਦਾ 2 ਸਰਪੰਚੀਆਂ 'ਤੇ ਕਬਜ਼ਾ-

ਇਕਬਾਲ ਸਿੰਘ ਸ਼ਾਂਤ

     ਲੰਬੀ, 5 ਜੁਲਾਈ : ਪੰਚਾਇਤ ਵੋਟਾਂ ਦੇ ਤੇਜ਼ ਵਹਾਅ 'ਚ ਹਕੂਮਤੀ ਹਲਕੇ ਲੰਬੀ ਦੇ ਕਈ ਸਿਆਸੀ ਖੁੰਢਾਂ ਦੀਆਂ ਸਿੱਧੇ-ਅਸਿੱਧੇ ਤੌਰ 'ਤੇ ਜੜ੍ਹਾਂ ਨੰਗੀਆਂ ਹੋ ਗਈਆਂ। ਜਿਨ੍ਹਾਂ ਦੇ ਇੱਕ ਇਸ਼ਾਰੇ ਨਾਲ ਪ੍ਰਸ਼ਾਸਨਿਕ ਫਿਜ਼ਾਵਾਂ ਰੁੱਖ ਬਦਲ ਜਾਂਦੀਆਂ ਸਨ, ਪਰ ਵੋਟ ਸ਼ਕਤੀ ਨੇ ਸਾਰਾ ਰੁੱਖ ਵੀ ਬਦਲ ਦਿੱਤਾ। ਵੀ.ਆਈ.ਪੀ. ਹਲਕੇ ਦੇ ਬਹੁਗਿਣਤੀ ਪਿੰਡਾਂ 'ਚ ਜਿੱਥੇ ਤਿੱਖੜ ਮੁਕਾਬਲਿਆਂ 'ਚ ਅਕਾਲੀ ਆਪਣਿਆਂ ਨੂੰ ਹੀ ਵੱਡੀਆਂ ਸ਼ਿਕਸਤਾਂ ਦੇ ਗਏ, ਉਥੇ ਕੁਝ ਥਾਵਾਂ 'ਤੇ ਕਾਂਗਰਸੀ ਉਮੀਦਵਾਰ ਵੀ ਅਕਾਲੀ ਥੰਮਾਂ ਨੂੰ ਢਾਹ ਗਏ। ਹੈਰਾਨੀਜਨਕ ਹੋ ਨਿੱਬੜੇ ਇਹ ਨਤੀਜੇ ਆਮ ਲੋਕਾਂ 'ਚ ਚਰਚਾ ਦਾ ਕੇਂਦਰ ਬਣੇ ਹੋਏ ਹਨ। 
      ਪਿੰਡ ਸਿੱਖਵਾਲਾ ਵਿਖੇ ਲੰਬੀ ਜ਼ੋਨ ਤੋਂ ਅਕਾਲੀ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਕਰਮਜੀਤ ਕੌਰ ਸਿੰਘ ਸਰਪੰਚ ਦੀ ਚੋਣ ਵਿਚ ਚੌਥੇ ਨੰਬਰ 'ਤੇ ਰਹੀ। ਇੱਥੇ ਅਕਾਲੀ ਪੱਖੀ ਉਮੀਦਵਾਰ ਰਣਜੀਤ ਸਿੰਘ ਠੇਕੇਦਾਰ (981 ਵੋਟਾਂ) ਨੇ ਮਨਜਿੰਦਰ ਪਾਲ ਸਿੰਘ ਵਿੱਕੀ (638) ਨੂੰ ਹਰਾਇਆ। ਜਦੋਂਕਿ ਸਾਬਕਾ ਸਰਪੰਚ ਅਜੈ ਪਾਲ ਸਿੰਘ 558 ਲੈ ਕੇ ਤੀਜੇ ਨੰਬਰ ਅਤੇ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਕਰਮਜੀਤ ਕੌਰ 340 ਵੋਟਾਂ ਨਾਲ ਚੌਥੀ ਪੁਜੀਸ਼ਨ 'ਤੇ ਰਹੀ। 
ਇਸੇ ਤਰ੍ਹਾਂ ਮਾਰਕਫੈੱਡ ਦੇ ਡਾਇਰੈਕਟਰ ਅਤੇ ਸੀਨੀਅਰ ਅਕਾਲੀ ਆਗੂ ਨਿਸ਼ਾਨ ਸਿੰਘ ਫਤਿਹਪੁਰ ਮਨੀਆਂ ਵੀ ਆਪਣੇ ਪਿੰਡ 'ਚ ਸਰਪੰਚ ਦੀ ਚੋਣ 'ਚ ਵਿਰੋਧੀ ਅਕਾਲੀ ਧੜੇ ਦੇ ਹੱਥੋਂ ਮਾਤ ਖਾ ਗਏ। ਉਨ੍ਹਾਂ ਦੀ ਧਰਮ ਪਤਨੀ ਸ੍ਰੀਮਤੀ ਕੁਲਜੀਤ ਕੌਰ ਨੂੰ ਦਵਿੰਦਰਪਾਲ ਸਿੰਘ ਪੁੱਤਰ ਨਿਸ਼ਾਨ ਸਿੰਘ ਨੇ 460 ਵੋਟਾਂ ਦੇ ਵੱਡੇ ਫ਼ਰਕ ਨਾਲ ਹਰਾ ਦਿੱਤੀ। ਜ਼ਿਕਰਯੋਗ ਹੈ ਕਿ ਸ੍ਰੀ ਨਿਸ਼ਾਨ ਸਿੰਘ ਧੜੇ ਦਾ ਪਿੰਡ 'ਚ ਸਿਰਫ਼ ਇੱਕ ਪੰਚ ਹੀ ਜਿੱਤ ਸਕਿਆ ਹੈ। 
ਪਿੰਡ ਭੁੱਲਰਵਾਲਾ ਵਿਖੇ ਕਾਂਗਰਸ ਪੱਖੀ ਉਮੀਦਵਾਰ ਜਸਵਿੰਦਰ ਸਿੰਘ ਕਾਕਾ ਨੇ ਅਕਾਲੀ ਸਿਆਸਤ 'ਚ ਵਿਸ਼ੇਸ਼ ਰੁਤਬਾ ਰੱਖਦੇ ਸੀਨੀਅਰ ਆਗੂ ਇਕਬਾਲ ਸਿੰਘ ਭੁੱਲਰਵਾਲਾ ਤੇ ਹਰਤੇਜ ਸਿੰਘ ਭੁੱਲਰ ਧੜੇ ਦੇ ਅਕਾਲੀ ਪੱਖੀ ਉੁਮੀਦਵਾਰ ਨੈਬ ਸਿੰਘ ਨੂੰ 95 ਵੋਟਾਂ ਦੇ ਫ਼ਰਕ ਨਾਲ ਹਰਾ ਦਿੱਤਾ। 
ਇਸਦੇ ਇਲਾਵਾ ਪਿੰਡ ਤਰਮਾਲਾ ਅਤੇ ਢਾਣੀ ਤੇਲਿਆਂਵਾਲੀ ਵਿਖੇ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਪੱਪੀ ਤਰਮਾਲਾ ਦੇ ਪਿੰਡ ਤਰਮਾਲਾ ਅਤੇ ਢਾਣੀ ਤੇਲਿਆਂਵਾਲੀ 'ਚ ਮਰਹੂਮ ਜਥੇਦਾਰ ਇਕਬਾਲ ਸਿੰਘ ਤਰਮਾਲਾ ਦੇ ਲੜਕੇ ਗੋਪੀ ਤਰਮਾਲਾ ਦਾ ਗਰੁੱਪ ਭਾਰੂ ਰਿਹਾ। ਪਿੰਡ ਤਰਮਾਲਾ 'ਚ ਗੋਪੀ ਤਰਮਾਲਾ ਧੜੇ ਦੀ ਸੁਖਜੀਤ ਕੌਰ ਨੇ 203 ਵੋਟਾਂ ਦੇ ਫ਼ਰਕ ਨਾਲ ਪੱਪੀ ਤਰਮਾਲਾ ਧੜੇ ਦੀ ਕੁਲਵਿੰਦਰ ਕੌਰ ਨੂੰ 203 ਵੋਟਾਂ ਦੇ ਫ਼ਰਕ ਨਾਲ ਹਰਾਇਆ। ਜਦੋਂਕਿ ਪਿੰਡ ਢਾਣੀ ਤੇਲਿਆਂਵਾਲੀ 'ਚ ਗੋਪੀ ਤਰਮਾਲਾ ਧੜੇ ਦੀ ਉਮੀਦਵਾਰ ਪਰਮੇਸ਼ਵਰੀ ਦੇਵੀ ਨੇ ਅਕਾਲੀ ਆਗੂ ਪਿੱਪਲ ਸਿੰਘ ਧੜੇ ਦੇ ਬੂਟਾ ਸਿੰਘ ਨੂੰ ਸ਼ਿਕਸਤ ਦਿੱਤੀ। ਪਿੰਡ ਚੱਕ ਮਿੱਡੂ ਸਿੰਘ ਵਾਲਾ ਵਿਖੇ ਸਥਾਪਿਤ ਅਕਾਲੀ ਆਗੂ ਰਮਿੰਦਰਪਾਲ ਸਿੰਘ ਰੰਮੀ ਕੁਲਾਰ ਦਾ ਧੜਾ 11 ਵੋਟਾਂ ਨਾਲ ਪਿੰਡ ਦੇ ਭਾਈਚਾਰੇ ਤੋਂ ਸਰਪੰਚੀ ਦੀ ਚੋਣ 'ਚ ਮਾਤ ਖਾ ਗਿਆ। ਇੱਥੇ ਗੁਰਮੇਲ ਸਿੰਘ ਨੇ ਨਿਰਮਲ ਕੌਰ ਨੂੰ ਹਰਾਇਆ।
ਇਸਤੋਂ ਇਲਾਵਾ ਪਿੰਡ ਭਾਗੂ ਵਿਖੇ ਸਾਬਕਾ ਸਰਪੰਚ ਸਵਰਗੀ ਕੁਲਵੰਤ ਸਿੰਘ ਅਤੇ ਸਾਬਕਾ ਸਰਪੰਚ ਰਣਜੀਤ ਕੌਰ ਦੇ 30 ਸਾਲਾ ਪੁੱਤਰ ਅਤੇ ਨੌਜਵਾਨ ਆਗੂ ਸਤਵਿੰਦਰ ਸਿੰਘ ਨੇ ਸਰਪੰਚੀ ਚੋਣ ਵਿਚ ਆਪਣੇ ਸਕੇ ਤਾਏ ਦੇ ਲੜਕੇ ਕੁਲਵਿੰਦਰ ਸਿੰਘ ਨੂੰ 99 ਵੋਟਾਂ ਹਰਾਇਆ। ਇਸਦੇ ਇਲਾਵਾ ਪਿੰਡ ਖਿਉਵਾਲੀ 'ਚ ਸਰਪੰਚ ਚੋਣ ਵਿਚ ਕਾਂਗਰਸ ਪੱਖੀ ਉਮੀਦਵਾਰ ਰਾਜਾ ਰਾਮ ਨੇ ਅਕਾਲੀ ਦਲ ਪੱਖੀ ਬਲਤੇਜ ਸਿੰਘ ਨੂੰ 315 ਵੋਟਾਂ ਦੇ ਵੱਡੇ ਫ਼ਰਕ ਨਾਲ ਮਾਤ ਦਿੱਤੀ। ਜਦੋਂਕਿ ਛੇਕੜਲੇ ਪਿੰਡ ਵੜਿੰਗਖੇੜਾ ਵਿਖੇ ਅਕਾਲੀ ਸਿਆਸਤ ਦੇ ਬਾਬਾ ਬੋਹੜ ਬਖਤੌਰ ਸਿੰਘ ਦੇ ਪੋਤਰੇ ਕਸ਼ਮੀਰ ਸਿੰਘ ਆਪਣੇ ਵਿਰੋਧੀ ਅਕਾਲੀ ਆਗੂ ਗੁਰਲਾਲ ਸਿੰਘ ਵੜਿੰਗ ਨੂੰ 337 ਵੋਟਾਂ ਨਾਲ ਹਰਾ ਕੇ ਜੇਤੂ ਰਹੇ। ਪਿੰਡ ਵੜਿੰਗਖੇੜਾ 'ਚ ਕਾਂਗਰਸ ਪੱਖੀ ਉਮੀਦਵਾਰ ਦਰਸ਼ਨ ਸਿੰਘ ਭੋਲੂ ਨੂੰ 114 ਅਤੇ ਸਾਬਕਾ ਸਰਪੰਚ ਗੁੱਡੂ ਸਿੰਘ ਨੂੰ ਮਹਿਜ਼ 8 ਵੋਟਾਂ ਨਾਲ ਸਬਰ ਕਰਨਾ ਪਿਆ। ਇਸੇ ਤਰ੍ਹਾਂ ਪਿੰਡ ਕਿੱਲਿਆਂਵਾਲੀ 'ਚ ਅਕਾਲੀ ਆਗੂ ਕੁਲਬੀਰਇੰਦਰ ''ਬੰਟੂ ਭਾਟੀ''-ਸੁਖਪਾਲ ਭਾਟੀ ਧੜੇ ਦੇ 10 ਪੰਚ ਚੁਣੇ ਗਏ ਅਤੇ ਬਲਦਰਸ਼ਨ ਸਿੰਘ ਸਾਬਕਾ ਸਰਪੰਚ ਧੜੇ ਦਾ ਇੱਕੋ ਪੰਚ ਜਿੱਤ ਸਕਿਆ। 
        ਇਸਦੇ ਇਲਾਵਾ ਪਿੰਡ ਸਹਿਣਾਖੇੜਾ 'ਚ ਚਰਚਿਤ ਅਕਾਲੀ ਸਰਪੰਚ ਜਸਵੰਤ ਸਿੰਘ ਧੜੇ ਦਾ ਠਾਣਾ ਸਿੰਘ ਵਿਰੋਧੀ ਧੜੇ ਪੱਪੂ ਮਾਨ-ਬੱਬੂ ਬਰਾੜ ਧੜੇ ਦੇ ਕੁਲਦੀਪ ਸਿੰਘ ਮਾਣਕ ਹੱਥੋਂ 158 ਵੋਟਾਂ ਨਾਲ ਹਾਰ ਗਿਆ। ਜਦੋਂਕਿ ਤੱਪਾ ਖੇੜਾ ਵਿਖੇ ਅਕਾਲੀ ਆਗੂ ਬਿੰਨੀ ਮਾਨ ਦਾ ਧੜਾ ਵੀ ਵਿਰੋਧੀ ਅਕਾਲੀ ਧੜੇ ਹੱਥੋਂ ਮਾਤ ਖਾ ਗਿਆ।  ਇਸਤੋਂ ਇਲਾਵਾ  ਸੀਨੀਅਰ ਅਕਾਲੀ ਆਗੂ ਤੇਜਿੰਦਰ ਸਿੰਘ ਮਿੱਡੂਖੇੜਾ ਦੀ ਸੱਜੀ ਬਾਂਹ ਨੌਜਵਾਨ ਆਗੂ ਜਗਮੀਤ ਸਿੰਘ ਖੁੱਡੀਆਂ ਵੀ ਖੁੱਡੀਆਂ ਮਹਾਂ ਸਿੰਘ 'ਚ ਵਿਰੋਧੀ ਅਕਾਲੀ ਗੋਰਾ ਮਾਨ ਤੋਂ ਸਰਪੰਚੀ ਹਾਰ ਗਏ। ਪਿੰਡ ਖੁੱਡੀਆਂ ਗੁਲਾਬ ਸਿੰਘ 'ਚ ਵਾਰਡ ਨੰਬਰ 1 ਤੋਂ ਕਿਸਮਤ ਅਜਮਾ ਰਹੇ ਜ਼ਿਲ੍ਹਾ ਪ੍ਰੀਸ਼ਦ ਮੈਂਬਰ ਸਾਹਬ ਸਿੰਘ ਖੁੱਡੀਆਂ ਸਿਰਫ਼ 4 ਵੋਟਾਂ ਦੇ ਅੰਤਰ ਨਾਲ ਜਿੱਤ ਦਰਜ ਕਰਕੇ ਪੰਚ ਬਣ ਸਕੇ। ਦੱਸਣਯੋਗ ਹੈ ਕਿ ਲੰਬੀ ਹਲਕੇ ਦੀਆਂ 83 ਪੰਚਾਇਤਾਂ ਦੀਆਂ ਸਰਪੰਚੀਆਂ 'ਤੇ ਅਕਾਲੀ ਦਲ ਦੇ ਵੱਖ-ਵੱਖ ਧੜਿਆਂ ਦਾ ਕਬਜ਼ਾ ਹੋ ਗਿਆ, ਜਦੋਂਕਿ ਵਿਰੋਧੀ ਪਾਰਟੀ ਕਾਂਗਰਸ ਨੂੰ ਸਿਰਫ਼ ਦੋ ਪੰਚਾਇਤ ਭੁੱਲਰਵਾਲਾ ਅਤੇ ਖਿਉਵਾਲੀ ਦੀਆਂ ਸਰਪੰਚੀਆਂ ਹਾਸਲ ਹੋ ਸਕੀਆਂ। 

-----------------------

          ਮੁੱਖ ਮੰਤਰੀ ਬਾਦਲ ਦੀ ਭਤੀਜੀ ਪੰਚੀ ਦੀ ਚੋਣ ਹਾਰੀ 

ਲੰਬੀ : ਸੂਬਾਈ ਸਿਆਸਤ ਦੇ ਸਿਰਮੌਰ ਆਗੂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਭਤੀਜੀ ਬੀਬੀ ਪਰਮਜੀਤ ਕੌਰ ਲੰਬੀ ਹਲਕੇ ਦੇ ਪਿੰਡ ਵੜਿੰਗਖੇੜਾ ਦੇ ਵਾਰਡ 4 ਤੋਂ ਹਾਰ ਗਏ। ਉਨ੍ਹਾਂ ਨੂੰ ਕਾਂਗਰਸ ਪੱਖੀ ਉਮੀਦਵਾਰ ਹਰਵਿੰਦਰ ਕੌਰ ਸਹਾਰਨ ਨੇ 33 ਵੋਟਾਂ ਦੇ ਫ਼ਰਕ ਨਾਲ ਹਰਾਇਆ। ਜੇਤੂ ਉਮੀਦਵਾਰ ਹਰਵਿੰਦਰ ਕੌਰ ਨੂੰ 122 ਅਤੇ ਬੀਬੀ ਪਰਮਜੀਤ ਕੌਰ ਨੂੰ 89 ਵੋਟਾਂ ਮਿਲੀਆਂ। ਇਸਦੇ ਇਲਾਵਾ ਤੀਜੇ ਨੰਬਰ 'ਤੇ ਰਹੀ ਉਮੀਦਵਾਰ ਗੁਰਮੀਤ ਕੌਰ ਨੇ 53 ਵੋਟਾਂ ਪ੍ਰਾਪਤ ਕੀਤੀਆਂ। ਜ਼ਿਰਕਯੋਗ ਹੈ ਕਿ ਬੀਬੀ ਪਰਮਜੀਤ ਕੌਰ ਮੁੱਖ ਮੰਤਰੀ ਬਾਦਲ ਦੇ ਚਚੇਰੇ ਭਰਾ ਹਰਬੰਸ ਸਿੰਘ ਢਿੱਲੋਂ (ਕਾਲਝਰਾਨੀ) ਦੀ ਪੁੱਤਰੀ ਹੈ, ਜੋ ਕਿ ਪਿੰਡ ਵੜਿੰਗਖੇੜਾ ਦੇ ਸਰਮਾਏਦਾਰ ਹਰਦਵਿੰਦਰ ਸਿੰਘ 'ਲਾਲੀ' ਦੀ ਧਰਮਪਤਨੀ ਹਨ।

ਪਿੰਡ ਬਾਦਲ 'ਚ ਬੇਵਿਉਂਤੀਆਂ ਤੇ ਅੰਨ੍ਹੇਵਾਹ ਸਰਕਾਰੀ ਗਰਾਂਟਾਂ - ਵਿਕਾਸ ਦਾ ਮਿਆਰ ਜ਼ੀਰੋ ਲੈਵਲ 'ਤੇ ਪੁੱਜਿਆ

                                     ਪੰਚਾਇਤੀ ਰਾਜ ਵਿਭਾਗ ਦੀ ਕਾਰਜਪ੍ਰਣਾਲੀ ਮੁੜ ਸੁਆਲਾਂ ਦੇ ਘੇਰੇ 'ਚ  
      
 ਵੀ.ਆਈ.ਪੀ. ਦਿੱਖ ਵਾਲੇ ਛੱਪੜ ਦਾ ਨਵਾਂ ਉਸਾਰਿਆ ਰੈਂਪ 3-4 ਮਹੀਨਿਆਂ 'ਚ ਤਿੰਨ ਵਾਰ ਹੇਠਾਂ ਧੱਸਿਆ

                                                            ਇਕਬਾਲ ਸਿੰਘ ਸ਼ਾਂਤ
          ਲੰਬੀ : ਹਕੂਮਤੀ ਪਿੰਡ ਬਾਦਲ 'ਚ ਬੇਵਿਉਂਤੀਆਂ ਤੇ ਅੰਨ੍ਹੇਵਾਹ ਸਰਕਾਰੀ ਗਰਾਂਟਾਂ ਨੇ ਵਿਕਾਸ ਕਾਰਜਾਂ ਦੇ ਮਿਆਰ ਨੂੰ ਜ਼ੀਰੋ ਲੈਵਲ 'ਤੇ ਖੜ੍ਹਾ ਕੀਤਾ ਹੈ। ਪਿੰਡ 'ਚ ਬਠਿੰਡਾ ਰੋਡ 'ਤੇ ਬੱਸ ਸਟਾਪ ਦੇ ਨਾਲ ਬੜੀ ਸੁੰਦਰ ਚਾਰਦੀਵਾਰੀ ਅਤੇ ਰੰਗ-ਰੋਗਨ ਕਰਕੇ ਲਿਸ਼ਕਾਏ ਵੀ.ਆਈ.ਪੀ. ਛੱਪੜ 'ਚ ਪਸ਼ੂਆਂ ਦੀ ਆਵਾਜਾਈ ਲਈ ਨਵਾਂ ਬਣਾਇਆ ਰੈਂਪ ਕੁਝ ਮਹੀਨਿਆਂ 'ਚ ਤਿੰਨ ਵਾਰ ਹੇਠਾਂ ਧੱਸ ਚੁੱਕਿਆ ਹੈ। ਉਕਤ ਕਾਰਗੁਜਾਰੀ ਨੇ ਇੱਕ ਵਾਰ ਫਿਰ ਪੰਚਾਇਤ ਰਾਜ ਵਿਭਾਗ ਦੀ ਸਮੁੱਚੀ ਕਾਰਜ ਪ੍ਰਣਾਲੀ 'ਤੇ ਸੁਆਲਾਂ ਦੇ ਘੇਰੇ ਵਿਚ ਲਿਆ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਇਸਤੋਂ ਪਹਿਲਾਂ ਵੀ ਪਿੰਡ ਮਿਠੜੀ ਬੁੱਧਗਿਰ 'ਚ ਛੱਪੜ ਦੀ ਚਾਰਦੀਵਾਰੀ ਅਤੇ ਨਿਕਾਸੀ ਪਾਈਪ ਸਿਸਟਮ 'ਚ ਘਟੀਆ ਦਰਜੇ ਦੀ ਮਟੀਰੀਅਲ ਅਤੇ ਬੇਵਿਉਂਤਾ ਨਿਰਮਾਣਾ ਕਾਰਜ ਦੀ ਸਰਕਾਰੀ ਤੌਰ 'ਤੇ ਪੁਸ਼ਟੀ ਹੋ ਚੁੱਕੀ ਹੈ। ਜਦੋਂਕਿ ਪਿੰਡ ਬੀਦੋਵਾਲੀ 'ਚ ਪੰਚਾਇਤੀ ਰਾਜ ਵਿਭਾਗ ਵੱਲੋਂ ਪਿੰਡ ਬੀਦੋਵਾਲੀ 'ਚ ਬਣਾਏ ਸਰਕਾਰੀ ਮੈਰਿਜ ਪੈਲੇਸ 'ਚ ਘਟੀਆ ਦਰਜੇ ਦਾ ਨਿਰਮਾਣ ਦਾ ਮਾਮਲਾ ਸੁਰਖੀਆਂ ਵਿਚ ਰਿਹਾ ਸੀ। 
           ਬਾਦਲ ਪਿੰਡ ਦੇ ਲੋਕਾਂ ਨੇ ਉਕਤ ਛੱਪੜ ਨੂੰ ਸੂਬੇ 'ਚ ਹੁਣ ਤੱਕ ਸਭ ਤੋਂ ਸੁੰਦਰ ਦਿਖ ਵਾਲਾ ਛੱਪੜ ਕਰਾਰ ਦਿੰਦਿਆਂ ਆਖਿਆ ਕਿ ਮੁੱਖ ਮੰਤਰੀ ਬਾਦਲ ਵੱਲੋਂ ਪਿੰਡ ਬਾਦਲ ਅਤੇ ਲੰਬੀ ਹਲਕੇ ਦੇ ਵਿਕਾਸ ਲਈ ਦਿੱਤੇ ਜਾ ਰਹੇ ਗਰਾਂਟਾਂ ਦੇ ਗੱਫ਼ਿਆਂ ਦੇ ਵੱਡੇ ਹਿੱਸੇ ਨੂੰ ਸਰਕਾਰੀ ਅਫ਼ਸਰ ਚੁੱਪ-ਗੜੁੱਪ ਛਕ ਜਾਂਦੇ ਹਨ, ਜਿਨ੍ਹਾਂ ਨੂੰ ਪਿੰਡ ਦੀ ਹਕੂਮਤ ਹੋਣ ਦੇ ਬਾਵਜੂਦ ਕੋਈ ਪੁੱਛਣ ਵਾਲਾ ਨਹੀਂ। 

ਪਿੰਡ ਦੇ ਵਾਸੀ ਹਰਮੇਸ਼ ਸਿੰਘ ਅਤੇ ਹੋਰਾਂ ਨੇ ਦੱਸਿਆ ਕਿ ਕੁਝ ਮਹੀਨੇ ਪਹਿਲਾਂ ਹੀ ਲੱਖਾਂ ਰੁਪਏ ਖਰਚ ਕੇ ਬਣਾਇਆ ਉਕਤ ਛੱਪੜ ਦਾ ਰੈਂਪ ਹੁਣ ਤੱਕ ਤਿੰਨ ਵਾਰ ਥਾਂ-ਥਾਂ ਤੋਂ ਬੈਠ ਚੁੱਕਿਆ ਹੈ ਪਰ ਹਕੂਮਤ ਜਾਂ ਪ੍ਰਸ਼ਾਸਨ ਵੱਲੋਂ ਇਸ ਵਾਰੇ ਕਿਸੇ ਅਧਿਕਾਰੀ ਜਾਂ ਠੇਕੇਦਾਰ ਖਿਲਾਫ਼ ਕਾਰਵਾਈ ਦੀ ਜ਼ਰੂਰਤ ਨਹੀਂ ਸਮਝੀ ਗਈ। ਇਸੇ ਤਰ੍ਹਾਂ ਇੱਕ ਹੋਰ ਵਿਅਕਤੀ ਨੇ ਆਖਿਆ ਕਿ ਆਮ ਜਨਤਾ ਦੇ ਹੱਕ-ਹਲਾਲ ਦੇ ਸਰਕਾਰੀ ਫੰਡਾਂ ਨੂੰ ਇੰਝ ਜਾਇਆ ਜਾਣ ਦੇਣ ਕਿੱਥੋਂ ਦੀ ਸਿਆਣਪ ਹੈ। 
          ਇਸ ਸਬੰਧ ਵਿਚ ਛੱਪੜ ਦੇ ਰੈਂਪ ਨੂੰ ਦਰੁੱਸਤ ਕਰਨ ਵਿਚ ਜੁਟੇ ਠੇਕੇਦਾਰ ਦੇ ਅਧੀਨ ਮਿਸਤਰੀ ਕਾਕਾ ਸਿੰਘ ਨੇ ਦੱਸਿਆ ਕਿ ਉਸਨੇ ਦੱਸਿਆ ਕਿ ਅਸੀਂ ਇਹ ਰੈਂਪ ਕਈ ਹਜ਼ਾਰ ਇੱਟਾਂ ਲਾ ਕੇ ਬਣਾਇਆ ਸੀ ਪਰ ਇਹ ਕੁਝ ਮਹੀਨੇ ਪਹਿਲਾਂ ਕਰੀਬ 6-6 ਇੰਚ ਬੈਠ ਗਿਆ ਸੀ। ਜਿਸਨੂੰ ਦਰੁੱਸਤ ਕਰ ਦਿੱਤਾ ਗਿਆ ਸੀ। ਪਤਾ ਨਹੀਂ ਕਿਵੇਂ ਹੁਣ ਫਿਰ ਬੈਠ ਗਿਆ। ਉਸਨੇ ਖਦਸ਼ਾ ਜਾਹਰ ਕੀਤਾ ਕਿ ਸ਼ਾਇਦ ਹੇਠੋਂ ਪਾਣੀ  ਰੈਂਪ ਵਿਚ ਘੁਸ ਜਾਂਦਾ ਹੈ ਜਿਸ ਕਰਕੇ ਇਹ ਦਿੱਕਤ ਪੈਦਾ ਹੁੰਦੀ ਹੈ। 
          ਬੱਸ ਅੱਡੇ 'ਤੇ ਸਵਾਰੀ ਦੀ ਉਡੀਕ 'ਚ ਖੜ੍ਹੇ ਨਛੱਤਰ ਸਿੰਘ ਨਾਂਅ ਦੇ ਵਿਅਕਤੀ ਨੇ ਵੀ.ਆਈ.ਪੀ. ਪਿੰਡ 'ਚ  ਅਜਿਹੇ ਘਟੀਆ ਨਿਰਮਾਣ ਕਾਰਜਾਂ ਲਈ ਹਕੂਮਤ ਦੀ ਢਿੱਲੀ ਕਾਰਜਪ੍ਰਣਾਲੀ ਅਤੇ 'ਮਿਲਵਰਣ' ਵਾਲੇ ਸੁਭਾਅ ਨੂੰ ਕਥਿਤ ਤੌਰ 'ਤੇ ਜੁੰਮੇਵਾਰ ਕਰਾਰ ਦਿੰਦਿਆਂ ਆਖਿਆ ਕਿ ਲੰਬੀ ਹਲਕੇ ਵਿਚ ਘਟੀਆ ਨਿਰਮਾਣ ਕਾਰਜਾਂ ਦੇ ਅਣਗਿਣਤ ਮਾਮਲੇ ਨਸ਼ਰ ਹੋਣ ਦੇ ਬਾਵਜੂਦ ਅੱਜ ਤੱਕ ਕਿਸੇ ਅਧਿਕਾਰੀ ਖਿਲਾਫ਼ ਵਿਭਾਗੀ ਜਾਂ ਸਰਕਾਰੀ ਐਕਸ਼ਨ ਹੋਣ ਦੀ ਖ਼ਬਰ ਨਹੀਂ ਸੁਣਨ ਨੂੰ ਮਿਲੀ, ਬਲਕਿ ਨਿੱਤ ਸੰਗਤ ਦਰਸ਼ਨਾਂ ਜਰੀਏ ਗਰਾਂਟਾਂ ਦੇ ਗੱਫ਼ਿਆਂ ਦੀ ਸੂਚੀ ਲਗਾਤਾਰ ਲੰਮੀ ਹੁੰਦੀ ਹੈ। 

ਇਸ ਸਬੰਧ ਵਿਚ ਪੰਚਾਇਤ ਰਾਜ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਪ੍ਰਵੀਨ ਗਾਂਧੀ ਨੇ ਸੰਪਰਕ ਕਰਨ 'ਤੇ ਉਕਤ ਛੱਪੜ ਦਾ ਰੈਂਪ ਬੈਠਣ ਬਾਰੇ ਜਾਣਕਾਰੀ ਹੋਣੋਂ ਇਨਕਾਰ ਕਰਦਿਆਂ ਆਖਿਆ ਕਿ ਤੁਸੀਂ ਖ਼ਬਰ ਨੂੰ ਨਾ ਛਾਪਿਓ ਸਿਰਫ਼ ਇੱਕ ਲੱਖ ਰੁਪਏ ਦਾ ਕੰਮ ਸੀ ਐਵੇਂ ਹੀ ਮੁੱਖ ਮੰਤਰੀ ਸਾਬ੍ਹ ਦੇ ਪਿੰਡ ਦੀ ਬਦਨਾਮੀ ਹੋਵੇਗੀ।  

ਲੰਬੀ ਹਲਕੇ ਦੇ ਪਿੰਡ ਭੁੱਲਰਵਾਲਾ ਦੇ ਦਲਿਤ ਪਰਿਵਾਰਾਂ ਵੱਲੋਂ ਹਿਜਰਤ ਦੀ ਚਿਤਾਵਨੀ

 ਮੁੱਖ ਮੰਤਰੀ ਵੱਲੋਂ 2-2 ਵਾਰ ਗਰਾਂਟਾਂ ਦੇਣ ਦੇ ਬਾਵਜੂਦ ਦਲਿਤ ਮੁਹੱਲੇ ਦੇ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋ ਸਕੀ

  -ਮੁਹੱਲੇ 'ਚ ਗੰਦੇ ਪਾਣੀ ਦਾ ਛੱਪੜ ਬਣਿਆ-

-ਗੰਦਗੀ ਅਤੇ ਬਦਬੂਦਾਰ ਮਾਹੌਲ 'ਚ ਜਿਉਣ ਲਈ ਮਜ਼ਬੂਰ ਵੀ.ਆਈ. ਪੀ. ਵੋਟਰ- 

  -ਦਲਿਤ ਪਰਿਵਾਰਾਂ ਦੇ ਕਾਫ਼ੀ ਗਿਣਤੀ ਲੋਕ ਮਲੇਰੀਆ ਦੀ ਮਾਰ ਹੇਠ-

                                               ਇਕਬਾਲ ਸਿੰਘ ਸ਼ਾਂਤ

ਲੰਬੀ : 2 ਸਤੰਬਰ : ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਕਈ ਵਾਰ ਲੱਖਾਂ ਰੁਪਏ ਦੀ ਗਰਾਂਟ ਦੇਣ ਦੇ ਬਾਵਜੂਦ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਰਕੇ ਜਿਉਂਦੇ ਜੀਅ ਨਰਕ ਜਿਹੇ ਹਾਲਤਾਂ 'ਚ ਜੀਵਨ ਬਸਰ ਕਰ ਰਹੇ ਖੇਤਰ ਦੇ ਪਿੰਡ ਭੁੱਲਰਵਾਲਾ ਦੇ ਦਲਿਤ ਮੁਹੱਲੇ 'ਚ ਵਸਦੇ ਵੱਡੀ ਗਿਣਤੀ ਦਲਿਤ ਪਰਿਵਾਰਾਂ ਨੇ ਪਿੰਡ ਵਿਚੋਂ ਹਿਜਰਤ ਕਰਨ ਦੀ ਚਿਤਾਵਨੀ ਦਿੱਤੀ ਹੈ। 

         ਦਲਿਤ ਮੁਹੱਲੇ ਵਿਹੜੇ ਦੇ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਰਕੇ ਮੁੱਖ ਸੜਕ 'ਤੇ ਗੰਦਾ ਪਾਣੀ ਛੱਪੜ ਦਾ ਰੂਪ ਧਾਰਦਾ ਜਾ ਰਿਹਾ ਹੈ। ਇਸ ਖੜ੍ਹੇ ਪਾਣੀ ਵਿਚ ਪਨਪ ਰਹੇ ਮੱਛਰਾਂ ਕਰਕੇ ਕਾਫ਼ੀ ਗਿਣਤੀ ਲੋਕ ਮਲੇਰੀਆ ਅਤੇ ਹੋਰ ਗੰਭੀਰ ਬੀਮਾਰੀਆਂ ਨਾਲ ਪੀੜਤ ਹੋ ਚੁੱਕੇ ਹਨ। ਬਦਬੂਦਾਰ ਮਾਹੌਲ ਕਰਕੇ ਲੋਕਾਂ ਦਾ ਖਾਣ-ਪੀਣਾ, ਸੋਣਾ, ਘਰਾਂ 'ਚ ਰਹਿਣ ਦੇ ਇਲਾਵਾ ਸਾਂਹ ਤੱਕ ਲੈਣਾ ਵੀ ਮੁਸ਼ਕਿਲ ਹੋ ਗਿਆ ਹੈ। ਇਸ ਖੜ੍ਹੇ ਪਾਣੀ ਨੇ ਮਕਾਨਾਂ ਨੂੰ ਨੁਕਸਾਨ ਪਹੰਚਾਉਣਾ ਸ਼ੁਰੂ ਕਰ ਦਿੱਤਾ ਹੈ।  

ਪਿੰਡ ਦੇ ਲੋਕਾਂ ਅਨੁਸਾਰ ਸਰਮਾਏਦਾਰਾਂ ਵੱਲੋਂ ਮੁਰੱਬਾਬੰਦੀ ਤੋਂ ਲੈ ਕੇ ਹੁਣ ਤੱਕ ਪਿੰਡ ਦੇ ਬਾਗਾਂ ਵਾਲੇ ਖਾਲ ਨੂੰ ਬੰਦ ਕਰਨ ਕਰਕੇ ਦਲਿਤ ਮੁਹੱਲੇ ਦੇ ਗੰਦੇ ਅਤੇ ਬਰਸਾਤੀ ਪਾਣੀ ਦੀ ਨਿਕਾਸ ਪੂਰੀ ਤਰ੍ਹਾਂ ਬੰਦ ਹੋ ਗਈ ਹੈ। ਜਦੋਂਕਿ ਸਰਮਾਏਦਾਰਾਂ ਵੱਲੋਂ ਆਪਣੇ ਮੁਹੱਲੇ ਦੇ ਪਾਣੀ ਦਾ ਨਿਕਾਸ ਪਾਈਪਾਂ ਰਾਹੀ ਪਿੰਡ ਤੋਂ ਬਾਹਰਲੇ ਸਮੇ ਨਾਲੇ ਵਿੱਚ ਕਰ ਦਿੱਤਾ ਗਿਆ ਹੈ।

          ਪਿੰਡ ਵਾਸੀਆਂ ਅਨੁਸਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਵਿਧਾਨਸਭਾ ਚੋਣਾਂ ਤੋਂ ਪਹਿਲਾਂ ਦਲਿਤ ਮੁਹੱਲੇ ਦੇ ਬੋਹੜ ਤੋਂ ਲੈ ਕੇ ਛੱਪੜ ਤੱਕ ਕਰੀਬ ਸਾਢੇ ਤਿੰਨ ਲੱਖ ਰੁਪਏ ਦੀ ਗਰਾਂਟ ਦਿੱਤੀ ਗਈ ਸੀ ਪਰ ਉਸਦਾ ਬਾਅਦ ਕੋਈ ਖੋਜ-ਖੁਰਾ ਹੀ ਨਹੀਂ ਲੱਭਿਆ ਅਤੇ  ਉਹ ਗਰਾਂਟ ਗੰਦੇ ਪਾਣੀ ਦੇ ਹੇਠਾਂ ਦੱਬੀ ਗਈ। ਇਸਦੇ ਉਪਰੰਤ ਮੁੱਖ ਮੰਤਰੀ ਨੇ 5 ਲੱਖ ਰੁਪਏ ਦੀ ਗਰਾਂਟ  ਪੰਚਾਇਤੀ ਰਾਜ ਵਿਭਾਗ ਨੂੰ ਗੰਦੇ ਅਤੇ ਬਰਸਾਤੀ ਪਾਣੀ ਨਿਕਾਸੀ ਦੇ ਹੱਲ ਲਈ ਦਿੱਤੇ ਗਏ ਸਨ। ਹਾਕਮਾਂ ਵੱਲੋਂ ਦੋ-ਦੋ ਵਾਰ ਗਰਾਂਟ ਦੇਣ ਦੇ ਬਾਵਜੂਦ ਲੋਕਾਂ ਦੀ ਮੁਸ਼ਕਿਲਾਂ ਦਾ ਹੱਲ ਨਾ ਹੋਣਾ ਸਮੁੱਚੇ ਸਰਕਾਰੀ ਤੰਤਰ ਦੀ ਨਿਕੰਮੀ ਅਤੇ ਲਾਪਰਵਾਹ ਕਾਰਗੁਜਾਰੀਆਂ ਦੀ ਪੋਲ੍ਹ ਖੋਲਣ ਲਈ ਕਾਫ਼ੀ ਹੈ। 

ਪ੍ਰਸ਼ਾਸਨਿਕ ਲਾਪਰਵਾਹੀ ਦੇ ਸ਼ਿਕਾਰ ਪਿੰਡ ਭੁੱਲਰਵਾਲਾ ਦੇ ਭਾਰੀ ਗਿਣਤੀ ਦਲਿਤ ਲੋਕਾਂ ਕੌਰ ਸਿੰਘ, ਤੇਜਾ ਸਿੰਘ, ਬੂਟਾ ਸਿੰਘ, ਰਾਜ ਸਿੰਘ, ਗੁਰਾਂ ਸਿੰਘ, ਰਾਜਾ ਸਿੰਘ, ਇਕਬਾਲ ਸਿੰਘ ਅਤੇ ਜੱਸਾ ਸਿੰਘ, ਸੁਖਮੰਦਰ ਸਿੰਘ, ਜਸਕਰਨ ਸਿੰਘ, ਗੁਰਨੇਕ ਸਿੰਘ ਅਤੇ ਸੁਭਾਸ਼ ਸਿੰਘ ਸਮੇਤ ਦਰਜਨਾਂ ਹੋਰ ਵਿਅਕਤੀਆਂ ਨੇ ਦੱਸਿਆ ਕਿ ਦਹਾਕਿਆਂ ਤੋਂ ਚੱਲਦੇ ਬਾਗਾਂ ਵਾਲੇ ਖਾਲ ਨੂੰ ਬੰਦ ਕਰਵਾ ਕੇ ਮੁਹੱਲਾ ਵਾਸੀਆਂ ਦਾ ਜਿਉਣਾ ਦੂਭਰ ਕਰ ਕਰ ਗਿਆ ਹੈ। ਉਨ੍ਹਾਂ ਕਿਹਾ ਕਿ  ਨਿਕਾਸ ਬੰਦ ਹੋਣ ਨਾਲ ਘਰਾਂ ਦਾ ਗੰਦਾ ਪਾਣੀ ਅਤੇ ਬਰਸਾਤੀ ਪਾਣੀ ਗਲੀਆਂ ਵਿੱਚ ਰੁਕ ਗਿਆ ਹੈ। ਗੰਦੇ ਪਾਣੀ ਦੇ ਰੁਕਣ ਨਾਲ ਲੋਕ ਮਲੇਰੀਆ ਅਤੇ ਹੋਰ ਬਿਮਾਰੀਆਂ ਦੀ ਲਪੇਟ ਵਿਚ ਆ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਗੰਦੇ ਪਾਣੀ ਦਾ ਨਿਕਾਸੀ ਨਾ ਹੋਣ ਕਰਕੇ ਖੜ੍ਹੇ ਪਾਣੀ ਵਿਚੋਂ ਬਦਬੂ ਅਤੇ ਮੱਛਰ ਪਨਪ ਰਹੇ ਹਨ। ਬਦਬੂ ਕਰਕੇ ਉਨ੍ਹਾਂ ਨੂੰ ਆਪਣੇ ਘਰਾਂ ਵਿਚ ਰਹਿਣਾ ਮੁਸ਼ਕਿਲ ਹੋ ਗਿਆ ਹੈ। ਰਾਜਾ ਸਿੰਘ ਨਾਂ ਦੇ ਇੱਕ ਵਿਅਕਤੀ ਨੇ ਕਿਹਾ ਕਿ ਢਿੱਡ ਭਰਨ ਨੂੰ ਰੋਟੀ ਖਾਣੀ ਪੈਂਦੀ ਹੈ ਪਰ ਇੱਥੇ ਮਾਰਦੀ ਬਦਬੂ ਨੇ ਜਿਉਂਦੇ ਜੀਅ ਨਰਕ ਵਿਖਾ ਦਿੱਤਾ ਹੈ। ਉਸਨੇ ਕਿਹਾ ਕਿ ਖ਼ਬਰਾਂ ਵਿਚ ਵੀ.ਆਈ. ਪੀ ਵੋਟਰਾਂ ਦਾ ਰੁਤਬਾ ਰੱਖਣ ਦੀ ਜ਼ਮੀਨੀ ਹਕੀਕਤ ਇਸ ਵੀ.ਆਈ.ਪੀ. 'ਖਿਤਾਬ' ਤੋਂ ਕੋਹਾਂ ਦੂਰ ਹੈ। 

             ਕੌਰ ਸਿੰਘ ਨਾਂ ਦੇ ਬਜ਼ੁਰਗ ਨੇ ਦੱਸਿਆ ਕਿ ਮੁੱਖ ਮੰਤਰੀ ਵੱਲੋਂ ਦਲਿਤ ਮੁਹੱਲੇ ਦੇ ਪਾਣੀ ਦਾ ਨਿਕਾਸ ਲਈ ਕਈ ਗਰਾਂਟਾਂ ਜਾਰੀ ਕੀਤੀਆਂ ਗਈਆਂ ਹਨ ਪਰ ਅੱਜ ਤੱਕ ਉਨ੍ਹਾਂ ਗਰਾਂਟਾਂ ਵਿੱਚੋਂ ਇੱਕ ਪੈਸਾ ਵੀ ਇਸ ਕੰਮ 'ਤੇ ਖਰਚ ਨਹੀਂ ਹੋਇਆ। ਉਨ੍ਹਾਂ ਆਖਿਆ ਜ਼ਮੀਨੀ ਹਕੀਕਤ ਇਹ ਹੈ ਕਿ ਉਨ੍ਹਾਂ ਦੇ ਮੁਹੱਲੇ ਵਿਚ ਲੋਕ ਨਵੀਂ ਰਿਸ਼ਤੇਦਾਰੀ ਪਾਉਣਾ ਤਾਂ ਦੂਰ ਪੁਰਾਣੇ ਰਿਸ਼ਤੇਦਾਰ ਮਿਲਣ ਆਉਣੋਂ ਕਤਰਾਉਂਦੇ ਹਨ। 

           ਜਸਵੀਰ ਕੌਰ, ਚਰਨੋ ਕੌਰ ਅਤੇ ਦਲਬੀਰ ਕੌਰ ਨੇ ਵੀ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਰਕੇ ਗੰਦਗੀ ਯੁਕਤ ਮਾਹੌਲ ਤੋਂ ਖਹਿੜਾ ਛੁਡਵਾਉਣ ਦੇ ਰੌਂਅ ਵਿਚ ਆਖਿਆ ਕਿ ਸਭ ਤੋਂ ਜ਼ਿਆਦਾ ਮੰਦੀ ਹਾਲਤ ਮੁਹੱਲੇ ਦੀਆਂ ਔਰਤਾਂ ਦੀ ਹੈ ਜਿਨ੍ਹਾਂ ਵਿਚੋਂ ਜ਼ਿਆਦਾਤਰ ਨੇ ਘਰ ਵਿਚ ਰਹਿਣਾ ਹੁੰਦਾ ਹੈ। ਮੁਹੱਲੇ ਦੇ ਸਾਹਮਣੇ 'ਚ ਵਸਦੇ ਕਿਸਾਨ ਪਰਿਵਾਰ ਦੀ ਔਰਤ ਦਲਬੀਰ ਕੌਰ ਨੇ ਆਖਿਆ ਕਿ ਗੰਦੇ ਪਾਣੀ ਵੱਲੋਂ  ਉਨ੍ਹਾਂ ਦਾ ਬੂਹਾ ਪੂਰੀ ਤਰ੍ਹਾਂ ਮੱਲਣ ਕਰਕੇ ਉਹ ਘਰ ਵਿਚ ਆਉਣਾ-ਜਾਣਾ ਵੀ ਵੱਡੀ ਸਮੱਸਿਆ ਬਣਿਆ ਹੋਇਆ ਹੈ। ਜਦੋਂਕਿ ਨੀਂਹਾਂ 'ਚ ਵੜਨ ਕਰਕੇ ਮਕਾਨ ਦੀਆਂ ਕੰਧਾਂ ਥਾਂ-ਥਾਂ ਤੋਂ ਪਾੜ ਚੁੱਕੀਆਂ ਹਨ। ਅਜਿਹੇ ਵਿਚ ਉਨ੍ਹਾਂ ਨੂੰ ਇੱਥੇ ਆਪਾ ਭਵਿੱਖ ਸੁਰੱਖਿਅਤ ਨਹੀਂ ਜਾਪਦਾ। 

              ਇਸ ਮੌਕੇ ਲੋਕਾਂ ਨੇ ਪਿੰਡ ਦੇ ਅਕਾਲੀ ਸਰਪੰਚ ਇਕਬਾਲ ਸਿੰਘ 'ਤੇ ਖੁੱਲ੍ਹੇਆਮ ਦਲਿਤ ਮੁਹੱਲੇ ਦੀ ਸਾਰ ਨਾ ਲੈਣ ਦੇ ਦੋਸ਼ ਲਾਉਂਦਿਆਂ ਆਖਿਆ ਕਿ ਸਰਪੰਚ ਨੇ ਜਮੀਂਦਾਰਾਂ ਦੇ ਘਰਾਂ ਦੇ ਨਿਕਾਸੀ ਦਾ ਪ੍ਰਬੰਧ ਕਰਵਾ ਦਿੱਤਾ ਪਰ ਉਨ੍ਹਾਂ ਨਾਲ ਵਿਤਕਰੇਬਾਜ਼ੀ ਕਰਕੇ ਗੰਦੇ ਪਾਣੀ ਦੀ ਨਿਕਾਸੀ ਦਾ ਹੱਲ ਨਹੀਂ ਕਢਵਾਇਆ ਜਾ ਰਿਹਾ ਹੈ। 

            ਮੁਹੱਲਾ ਵਾਸੀਆਂ ਨੇ ਇਕਸੁਰ ਵਿਚ ਆਖਿਆ ਕਿ ਮੁੱਖ ਮੰਤਰੀ ਸੀ ਬਾਦਲ ਦੇ ਹੱਥੀਂ ਦਿੱਤੀ ਗਰਾਂਟ ਉਨ੍ਹਾਂ ਤੱਕ ਨਾ ਪਹੁੰਚਣ ਲੱਗਣ ਕਰਕੇ ਉਨ੍ਹਾਂ ਦਾ ਸਮੁੱਚੇ ਤਾਣੇ-ਬਾਣੇ ਤੋਂ ਵਿਸ਼ਵਾਸ ਉੱਠ ਗਿਆ ਹੈ। ਅਜਿਹੇ ਵਿਚ ਉਨ੍ਹਾਂ ਕੋਲ ਪਿੰਡ ਭੁੱਲਰਵਾਲਾ ਤੋਂ ਹਿਜਰਤ ਕਰਕੇ ਹਰਿਆਣਾ ਜਾਂ ਰਾਜਸਥਾਨ ਜਾਣ ਤੋਂ ਇਲਾਵਾ ਕੋਈ ਚਾਰਾ ਨਹੀਂ।   

               ਮੁਹੱਲਾ ਵਾਸੀਆਂ ਨੇ ਮੁੱਖ ਮੰਤਰੀ ਵੱਲੋਂ ਦਿੱਤੀਆਂ ਗਰਾਂਟਾਂ ਦੀਆਂ ਵਿਜੀਲੈਂਸ ਪੜਤਾਲ ਦੀ ਮੰਗ ਕਰਦਿਆਂ ਕਿਹਾ ਚਿਤਾਵਨੀ ਦਿੱਤੀ ਕਿ ਜੇਕਰ ਇੱਕ ਹਫ਼ਤੇ ਦੇ ਅੰਦਰ-ਅੰਦਰ ਮੁਹੱਲੇ ਦੇ ਬਰਸਾਤੀ ਅਤੇ ਗੰਦੇ ਪਾਣੀ ਦੇ ਨਿਕਾਸ ਦੀ ਸਮੱਸਿਆ ਦਾ ਹੱਲ ਨਾ ਕੱਢਿਆ ਗਿਆ ਤਾਂ ਉਹ ਹਿਜਰਤ ਜਿਹਾ ਫੈਸਲਾਕੁੰਨ ਕਦਮ ਚੁੱਕਣ ਨੂੰ ਮਜ਼ਬੂਰ ਹੋਣਗੇ। 

             ਇਸ ਸਬੰਧ ਵਿਚ ਪੰਚਾਇਤੀ ਰਾਜ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਗਾਂਧੀ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਨਿਕਾਸੀ ਲਈ ਸਹੀ ਥਾਂ ਨਾ ਮਿਲਣ ਕਰਕੇ ਗਰਾਂਟ ਡਿਪਟੀ ਕਮਿਸ਼ਨਰ ਸ੍ਰੀ ਮੁਕਤਸਰ ਸਾਹਿਬ ਨੂੰ ਵਾਪਸ ਭੇਜ ਦਿੱਤੀ ਗਈ ਹੈ। 

                              ਭਾਰਤ ਸਰਕਾਰ ਦੇ ਮਨੁੱਖੀ ਅਧਿਕਾਰ ਕਮਿਸ਼ਨ ਨੂੰ ਲਾਈ ਗੁਹਾਰ

    ਪਿੰਡ ਭੁੱਲਰਵਾਲਾ ਦੇ ਦਲਿਤਾਂ ਨੇ ਗਰਾਟਾਂ ਜਾਰੀ ਹੋਣ ਦੇ ਬਾਵਜੂਦ ਗੰਦੇ ਪਾਣੀ ਦੀ ਨਿਕਾਸੀ ਨਾ ਹੋਣ ਕਰਕੇ ਇਨਸਾਫ਼ ਲਈ ਭਾਰਤ ਸਰਕਾਰ ਦੇ ਮਨੁੱਖੀ ਅਧਿਕਾਰ ਕਮਿਸ਼ਨ, ਪੰਜਾਬ ਅਨੂਸੂਚਿਤ ਜਾਤੀ-ਜਨਜਾਤੀ ਕਮਿਸ਼ਨ ਪੰਜਾਬ ਅਤੇ ਡਿਪਟੀ ਕਮਿਸ਼ਨਰ ਸ੍ਰੀ ਮੁਕਤਸਰ ਸਾਹਿਬ ਨੂੰ ਜ਼ਮੀਨੀ ਹਾਲਾਤਾਂ ਦੀਆਂ ਫੋਟੋਆਂ ਸਮੇਤ ਪੱਤਰ ਲਿਖ ਕੇ ਸਮੱਸਿਆ ਦੇ ਹੱਲ ਦੀ ਮੰਗ ਕੀਤੀ ਹੋਈ ਹੈ ਜਿਨ੍ਹਾਂ 'ਤੇ ਅਜੇ ਤੱਕ ਕਾਰਵਾਈ ਹੋਣ ਦੇ ਨਿਸ਼ਾਨ ਨਹੀਂ ਮਿਲੇ। 

                                      ਵੋਟਾਂ ਤੋਂ ਪਹਿਲੇ ਦੇ ਰੋਸ ਪ੍ਰਗਟਾਵੇ ਦੀ ਮਿਲ ਰਹੀ ਸਜ਼ਾ! 

ਮੰਨਿਆ ਜਾ ਰਿਹਾ ਹੈ ਕਿ ਪਿੰਡ ਭੁੱਲਰਵਾਲਾ ਦੇ ਦਲਿਤ ਮੁੱਖ ਮੰਤਰੀ ਮੂਹਰੇ ਵਿਕਾਸ ਦੀ ਹਕੀਕਤ ਬਿਆਨ ਕਰਨ ਦੀ ਕੋਸ਼ਿਸ਼ ਦੀ ਸਜ਼ਾ ਭੁਗਤ ਰਹੇ ਹਨ। ਬੀਤੀ 4 ਜਨਵਰੀ 2012 ਨੂੰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਪਿੰਡ 'ਚ ਚੋਣ ਜਲਸੇ ਦੌਰਾਨ ਪਿੰਡ ਦੇ ਅਸਲ ਦੀ ਵਿਕਾਸ ਦਾ ਸ਼ੀਸ਼ਾ ਵਿਖਾਉਣ ਪੁੱਜੇ ਕੁਝ ਦਲਿਤ ਨੌਜਵਾਨਾਂ ਨੂੰ ਪੁਲਿਸ ਅਤੇ ਪਿੰਡ ਦੇ ਅਕਾਲੀ ਵਰਕਰਾਂ ਨੇ ਧੱਕੇਲ ਕੇ ਪਾਸੇ ਕਰ ਦਿੱਤਾ। ਜਿਸਦੇ ਉਪਰੰਤ ਪਿੰਡ ਦੇ ਦਲਿਤਾਂ ਨੇ ਮੀਡੀਆ ਸਾਹਮਣੇ ਮੁਦੇ ਨੂੰ ਲੈ ਕੇ ਖੁੱਲ੍ਹ ਕੇ ਆਪਣੀ ਭੜਾਸ ਕੱਢੀ ਸੀ। ਲੋਕਾਂ ਅਨੁਸਾਰ ਹੁਣ ਉਹ ਕਥਿਤ ਤੌਰ 'ਤੇ 'ਫੰਡਖਾਊ ਲਫਟੈਣ' ਦਲਿਤਾਂ ਮੁਹੱਲੇ ਦੇ ਗੰਦੇ ਪਾਣੀ ਦੀ ਨਿਕਾਸੀ ਵਿਚ ਅੜਿੱਕਾ ਹਨ। 

98148-26100

93178-26100

ਇਸ ਖ਼ਬਰ ਨਾਲ ਸਬੰਧਤ ਪੁਰਾਣੀ ਰਿਪੋਰਟ ਪੜ੍ਹਨ ਲਈ ਹੇਠਲੇ ਲਿੰਕ 'ਤੇ ਕਲਿੱਕ ਕਰੋ।

http://bulandsoch.blogspot.in/2012/01/blog-post.html

ਚੋਣਾਂ ਦੀ ਗਿਣਤੀ ਦੇ ਡੇਢ ਦਿਨ ਪਹਿਲਾਂ ਤੱਕ ਖਾਮੋਸ਼ ਹੈ ਪਿੰਡ ਬਾਦਲ

                             -ਬਾਦਲ ਪਿੰਡ ਦੇ ਹਲਵਾਈ ਬਿਨਾਂ ਆਰਡਰ ਤੋਂ ਬਣਾਉਣ ਲੱਗੇ ਲੱਡੂ-
      ਪਿੰਡ ਦੇ ਬਜ਼ੁਰਗਾਂ ਦੇ ਕਥਨ : ਕਿਹਦੇ ਲਈ ਕੁਝ ਕਹੀਏ, ਜਿੱਤਣਾ ਵੀ ਪਿੰਡ ਬਾਦਲ ਨੇ ਹੈ ਤੇ ਹਾਰਨਾ ਵੀ
                                                            ਇਕਬਾਲ ਸਿੰਘ ਸ਼ਾਂਤ

        ਕਈ ਦਹਾਕਿਆਂ ਤੋਂ ਸੂਬੇ ਦੀ ਸਿਆਸਤ 'ਤੇ ਆਪਣੀ ਗਹਿਰੀ ਛਾਪ ਰੱਖਦੀ ਪਿੰਡ ਬਾਦਲ ਦੀ ਸਰਜਮੀਂ ਆਪਣੇ ਤਿੰਨ ਬਾਦਲ ਪੁੱਤਾਂ ਪਾਸ਼, ਦਾਸ ਅਤੇ ਮਹੇਸ਼ਇੰਦਰ ਵਿਚਕਾਰ ਹੋਈ ਚੋਣ ਜੰਗ ਦੇ ਨਤੀਜਿਆਂ ਦੇ ਡੇਢ ਦਿਨ ਪਹਿਲਾਂ ਤੱਕ ਵੀ ਬਿਲਕੁੱਲ ਖਾਮੋਸ਼ ਹੈ, ਕਿਉਂਕਿ ਚੋਣਾਂ ਦੇ ਨਤੀਜਿਆਂ ਉਪਰੰਤ ਜਿੱਤੇਗਾ ਵੀ ਪਿੰਡ ਬਾਦਲ ਅਤੇ ਹਾਰੇਗਾ ਵੀ ਪਿੰਡ ਬਾਦਲ। ਅਜਿਹੇ ਵਿਚ ਨਤੀਜੇ ਆਉਣ 'ਤੇ ਜਿੱਤ ਅਤੇ ਹਾਰ ਨੂੰ ਇੱਕੋ ਸਮੇਂ ਸਾਹਮਣੇ ਵੇਖ ਇੱਥੋਂ ਦੇ ਆਮ ਬਾਸ਼ਿੰਦੇ ਵੀ ਖੁੱਲ੍ਹ ਕੇ ਕੁਝ ਕਹਿਣੋਂ ਗੁਰੇਜ਼ ਕਰ ਰਹੇ ਹਨ। ਹਰ ਹਾਲਤ ਵਿਚ ਲੰਬੀ ਹਲਕੇ ਤੋਂ ਜਿੱਤ ਬਾਦਲ ਪਿੰਡ ਦੀ ਹੀ ਹੋਣ ਕਰਕੇ ਇੱਥੋਂ ਦੇ ਹਲਵਾਈਆਂ ਵੱਲੋਂ ਆਪਣੀਆਂ ਦੁਕਾਨਾਂ 'ਤੇ ਵੱਡੀ ਗਿਣਤੀ ਲੱਡੂ ਬਣਾਉਣ ਦਾ ਕਾਰਜ ਆਰੰਭ ਕਰ ਦਿੱਤਾ ਗਿਆ ਹੈ। ਹਾਲਾਂਕਿ ਅਜੇ ਤੱਕ ਉਨ੍ਹਾਂ ਨੂੰ ਕਿਸੇ ਵੀ ਧਿਰ ਵੱਲੋਂ ਅਗਾਊਂ ਆਰਡਰ ਨਹੀਂ ਮਿਲਿਆ।

               ਪਰਸੋਂ 6 ਮਾਰਚ ਨੂੰ ਆਉਣ ਵਾਲੇ ਚੋਣ ਨਤੀਜਿਆਂ ਵਿਚ ਪਾਸ, ਦਾਸ ਅਤੇ ਮਹੇਸ਼ਇੰਦਰ ਦੇ ਧੜੇ ਆਪੋ-ਆਪਣੀ ਜਿੱਤ ਨੂੰ ਲੈ ਕੇ ਕਾਫ਼ੀ ਆਸਵੰਦ ਹਨ, ਪਰ ਉਥੇ ਸਰੀਕਾਂ ਹੱਥੋਂ ਹਾਰ ਦਾ ਡਰ ਵੀ ਕਿਸੇ ਕੋਨੇ ਵਿਚੋਂ ਝਲਕਾਰੇ ਮਾਰ ਰਿਹਾ ਹੈ। ਸ਼ਾਇਦ ਇਸੇ ਕਰਕੇ ਅਕਾਲੀ-ਭਾਜਪਾ ਗੱਠਜੋੜ ਦੇ ਉਮੀਦਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਪਿੰਡ ਬਾਦਲ ਵਿਖੇ ਰਿਹਾਇਸ਼ 'ਤੇ ਬੀਤੀ 1 ਮਾਰਚ ਤੋਂ ਸ੍ਰੀ ਗੁਰੂ ਗ੍ਰੰਥ ਸਾਹਿਬ ਦੇ ਸੰਪਟ ਪਾਠ ਚੱਲ ਰਹੇ ਹਨ। ਜਿਸ ਦਾ ਭੋਗ ਵੋਟਾਂ ਦੀ ਗਿਣਤੀ ਵਾਲੇ ਦਿਨ 6 ਮਾਰਚ ਨੂੰ ਪੈਣਾ ਹੈ। ਜਿਸ ਦੀ ਸੇਵਾ ਨਾਨਕਸਰ ਟਕਸਾਲ (ਜਗਰਾਓਂ) ਦੇ ਗ੍ਰੰਥੀ ਸਿੰਘਾਂ ਵੱਲੋਂ ਨਿਭਾਈ ਜਾ ਰਹੀ ਹੈ। ਦੱਸਣਯੋਗ ਹੈ ਕਿ ਮੁੱਖ ਮੰਤਰੀ ਬਾਦਲ ਦੀ ਸੰਸਦ ਮੈਂਬਰ ਨੂੰਹ ਬੀਬੀ ਹਰਸਿਮਰਤ ਕੌਰ ਬਾਦਲ ਸੰਪਟ ਪਾਠ ਦੇ ਪ੍ਰਕਾਸ਼ ਵਾਲੇ ਦਿਨ ਤੋਂ ਪਿੰਡ ਬਾਦਲ ਵਿਖੇ ਰਿਹਾਇਸ਼ 'ਤੇ ਹਨ।

              ਵਿਧਾਨਸਭਾ ਚੋਣਾਂ ਦੇ ਨਤੀਜੇ ਆਉਣ 'ਚ ਮਹਿਜ਼ ਡੇਢ ਕੁ ਦਿਨ ਬਾਕੀ ਰਹਿਣ ਕਰਕੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅੱਜ ਸਵੇਰੇ 11 ਵਜੇ ਪਿੰਡ ਬਾਦਲ ਵਿਖੇ ਪੁੱਜ ਗਏ। ਜਦੋਂਕਿ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਅੱਜ ਦੇਰ ਬਾਦਲ ਪਿੰਡ ਪੁੱਜ ਰਹੇ ਹਨ। ਇਸਤੋਂ ਇਲਾਵਾ ਦੂਜੇ ਪਾਸੇ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਮਹੇਸ਼ਇੰਦਰ ਸਿੰਘ ਬਾਦਲ ਰੋਜ਼ਾਨਾ ਵਾਂਗ ਆਪਣੀ ਜੱਦੀ ਰਿਹਾਇਸ਼ 'ਤੇ ਵਰਕਰਾਂ ਨੂੰ ਮਿਲ ਰਹੇ ਹਨ। ਪੀ.ਪੀ.ਪੀ. ਦੇ ਉਮੀਦਵਾਰ ਗੁਰਦਾਸ ਸਿੰਘ ਬਾਦਲ ਹੁਰਾਂ ਦੀ ਦਿਨ ਚਰਿਆ ਵੀ ਆਮ ਵਾਂਗ ਹੀ ਹੈ।

                  ਪਿੰਡ ਬੱਸ ਅੱਡੇ ਕੋਲ ਖੜ੍ਹੇ ਖੁੰਡ ਚਰਚਾ ਕਰ ਰਹੇ ਬਜ਼ੁਰਗਾਂ ਨੇ ਚੋਣ ਨਤੀਜਿਆਂ ਬਾਰੇ ਪੁੱਛਣ 'ਤੇ ਚੁੱਪੀ ਵੱਟਦਿਆਂ ਪਹਿਲਾਂ ਤਾਂ ਕੁਝ ਕਹਿਣ ਤੋਂ ਇਨਕਾਰ ਕਰ ਦਿੱਤਾ ਪਰ ਬਾਅਦ ਵਿਚ ਪੁੱਛਣ 'ਤੇ ਗੁਰਦੇਵ ਸਿੰਘ ਨਾਂਅ ਦੇ ਇੱਕ ਬਜ਼ੁਰਗ ਨੇ ਕਿਹਾ ਕਿ ਤਿਕੋਣਾ ਮੁਕਾਬਲਾ ਹੈ ਕੁਝ ਕਿਹਾ ਨਹੀਂ ਜਾ ਸਕਦਾ ਹੈ। ਸਾਡੇ ਲਈ ਤਿੰਨੋ ਇੱਕੋ ਜਿਹੇ ਹਨ। ਉਥੇ ਹੀ ਕੋਲ ਖੜ੍ਹੇ ਇੱਕ ਹੋਰ ਬਜ਼ੁਰਗ ਨੇ ਕਿਹਾ ਕਿ ਅਸਲ ਮੁਕਾਬਲਾ ਤਾਂ ਦੋ ਭਰਾਵਾਂ ਵਿਚਕਾਰ ਹੈ। ਉਨ੍ਹਾਂ ਕਿਹਾ ਕਿ ਅਸੀਂ ਕਿਹਦੇ ਲਈ ਕੁਝ ਕਹੀਏ, ਜਿੱਤਣਾ ਵੀ ਪਿੰਡ ਬਾਦਲ ਨੇ ਹੈ ਤੇ ਹਾਰਨਾ ਵੀ ਇਸੇ ਪਿੰਡ ਦੀ ਕਿਸਮਤ ਵਿਚ ਹੈ।

              ਉਥੋਂ ਮਹਿਜ਼ ਸੌ ਕੁ ਫੁੱਟ ਦੂਰੀ 'ਤੇ ਸਥਿਤ ਹਲਵਾਈ ਦੀਆਂ ਦੁਕਾਨਾਂ 'ਤੇ ਵੱਟੇ ਜਾ ਰਹੇ ਲੱਡੂਆਂ ਅਤੇ ਬਣਾਈ ਜਾ ਲੱਡੂਆਂ ਲਈ ਬੂੰਦੀ ਬਾਰੇ ਪੁੱਛੇ ਜਾਣ 'ਤੇ ਹਲਵਾਈਆਂ ਨੇ ਪੁੱਛੇ ਜਾਣ 'ਤੇ ਜਿੱਤ ਹਾਰ ਦੇ ਮਸਲੇ ਤੋਂ ਖੁਦ ਨੂੰ ਦੂਰ ਕਰਦਿਆਂ ਕਿਹਾ ਕਿ ਵਿਆਹਾਂ ਦਾ ਸੀਜਨ ਹੈ ਇਸ ਲਈ ਬਣਾ ਰਹੇ ਹਾਂ। ਜਦੋਂ ਦੁਕਾਨ ਵਿਚ ਬੇਸਨ ਨਾਲ ਭਰੀਆਂ ਬੋਰੀਆਂ ਬਾਰੇ ਪੁੱਛੇ ਜਾਣ 'ਤੇ ਹਲਵਾਈ ਨੇ ਕਿਹਾ ਤੁਹਾਡੀ ਖ਼ਬਰ ਰਹਿ ਜਾਣੀ ਹੈ ਅਤੇ ਸਾਡੇ ਕੁਝ ਵੱਟਿਆ ਨਹੀਂ ਜਾਣਾ।

               ਬਾਅਦ ਕੁਝ ਮਿੰਟਾਂ ਦੀ ਗੱਲਬਾਤ ਦੌਰਾਨ ਹਲਵਾਈਆਂ ਨੇ ਮੰਨਦਿਆਂ ਕਿਹਾ ਕਿ ਉਨ੍ਹਾਂ ਕੋਲ ਅਜੇ ਤੱਕ ਲੱਡੂਆਂ ਬਣਾਉਣ ਦਾ ਆਰਡਰ ਕਿਸੇ ਧਿਰ ਵੱਲੋਂ ਨਹੀਂ ਆਇਆ ਪਰ ਚੋਣ ਨਤੀਜਿਆਂ ਨੂੰ ਲੈ ਕੇ 13-14 ਕੁਇੰਟਲ ਬੇਸਨ ਮੰਗਵਾਇਆ ਗਿਆ ਹੈ। ਜਦੋਂ ਕਿ ਉਸਦੇ ਗੁਆਂਢੀ ਹਲਵਾਈ ਨੇ ਕਿਹਾ ਕਿ ਵੱਡੀ ਗਿਣਤੀ ਲੱਡੂ ਤਾਂ ਲੰਬੀ ਕਸਬੇ ਵਿਚ ਬਣ ਰਹੇ ਹਨ। ਇਸੇ ਦੌਰਾਨ ਸੜਕ ਤੋਂ ਲੰਘ ਰਹੇ ਇੱਕ ਦਲਿਤ ਬਜ਼ੁਰਗ ਨੂੰ ਜਦੋਂ ਚੋਣ ਨਤੀਜਿਆਂ ਬਾਰੇ ਪੁੱਛਿਆ ਗਿਆ ਤਾਂ ਉਸਨੇ ਤਲਖੀ ਭਰੇ ਲਹਿਜੇ ਵਿਚ ਕਿਹਾ ਕਿ 5 ਵਰ੍ਹਿਆਂ 'ਚ ਤਾਂ ਕੁਝ ਮਿਲਿਆ ਹੁਣ ਸਾਨੂੰ ਕੀ ਮਿਲ ਜਾਣਾ ਐ।

ਲੰਬੀ 'ਚ ਅਕਾਲੀ ਦਲ (ਬ) ਦੇ 31 ਹਜ਼ਾਰ ਝੰਡਿਆਂ ਨਾਲ ਭਰੀ ਗੱਡੀ ਚੋਣ ਕਮਿਸ਼ਨ ਦੀ ਟੀਮ ਅੜਿੱਕੇ ਚੜ੍ਹੀ

-ਝੰਡਿਆਂ 'ਤੇ ਤੱਕੜੀ ਦੇ ਨਿਸ਼ਾਨ ਤੋਂ ਇਲਾਵਾ ਵੱਡੇ ਬਾਦਲ, ਸੁਖਬੀਰ  ਤੇ ਹਰਸਿਮਰਤ ਕੌਰ ਦੀਆਂ ਛਪੀਆਂ ਸਨ ਤਸਵੀਰਾਂ-
                                                        ਇਕਬਾਲ ਸਿੰਘ ਸ਼ਾਂਤ
               ਲੰਬੀ : ਐਤਕੀਂ ਚੋਣ ਜ਼ਾਬਤੇ ਦੀ ਸਖ਼ਤੀ ਖੂਬ ਰੰਗ ਵਿਖਾ ਰਹੀ ਹੈ ਤੇ ਚੋਣ ਕਮਿਸ਼ਨ ਦੇ ਲੰਮੇ ਹੱਥਾਂ ਤੋਂ ਪੰਜਾਬ ਦਾ ਵੀ.ਆਈ.ਪੀ. ਹਲਕਾ ਲੰਬੀ ਵੀ ਵਾਂਝਾ ਨਹੀਂ ਰਿਹਾ।
              ਅੱਜ ਚੋਣ ਕਮਿਸ਼ਨ ਦੀ ਇੱਕ ਵੀਡੀਓਗਰਾਫ਼ੀ ਟੀਮ ਨੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਹਲਕੇ ਲੰਬੀ ਵਿਖੇ ਅਕਾਲੀ ਦਲ (ਬ) ਵਾਲੇ ਝੰਡਿਆਂ ਨਾਲ ਭਰਿਆ ਇੱਕ ਪਿਕਅਪ ਡਾਲਾ ਕਾਬੂ ਕੀਤਾ। ਬਰਾਮਦ ਕੀਤੇ ਝੰਡਿਆ ਦੀ ਗਿਣਤੀ ਲਗਭਗ 31 ਹਜ਼ਾਰ ਦੱਸੀ ਜਾਂਦੀ ਹੈ। ਜਿਨ੍ਹਾਂ 'ਤੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ, ਸ. ਸੁਖਬੀਰ ਸਿੰਘ ਬਾਦਲ ਅਤੇ ਬੀਬੀ ਹਰਸਿਮਰਤ ਕੌਰ ਬਾਦਲ ਦੀਆਂ ਤਸਵੀਰਾਂ ਤੋਂ ਇਲਾਵਾ ਸ਼੍ਰੋਮਣੀ ਅਕਾਲੀ ਦਲ (ਬ) ਦਾ ਚੋਣ ਨਿਸ਼ਾਨ 'ਤੱਕੜੀ' ਵੀ ਛਪਿਆ ਹੋਇਆ ਸੀ। ਜਿਨ੍ਹਾਂ ਦੀ ਕੀਮਤ ਲੱਖਾਂ ਰੁਪਏ ਮੰਨੀ ਜਾ ਰਹੀ ਹੈ।
          ਇਹ ਝੰਡਿਆਂ ਨਾਲ ਭਰਿਆ ਡਾਲਾ ਚੋਣ ਕਮਿਸ਼ਨ ਦੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਅਗਵਾਈ ਵਾਲੀ ਇੱਕ ਵੀਡੀਓਗਰਾਫ਼ੀ ਟੀਮ ਦੇ ਉਸ ਵੇਲੇ ਅੜਿੱਕੇ ਚੜ੍ਹ ਗਿਆ, ਜਦੋਂ ਉਸਦਾ ਡਰਾਈਵਰ ਅਤੇ ਝੰਡਿਆ ਦਾ ਸਪਲਾਇਰ ਉਕਤ ਖੇਪ ਨੂੰ ਕਿਧਰੇ ਲਾਹੁਣ ਦੀ ਤਿਆਰੀ ਵਿਚ ਸਨ। ਇਸੇ ਦੌਰਾਨ ਫਲਾਇੰਕ ਸਕੂਐਡ ਟੀਮ ਦੇ ਮੁਖੀ ਗੁਰਮੀਤ ਸਿੰਘ ਨਾਇਬ ਤਹਿਸੀਲਦਾਰ ਅਤੇ ਲੰਬੀ ਥਾਣੇ ਦੇ ਸਬ ਇੰਸਪੈਕਟਰ ਬੰਤਾ ਸਿੰਘ ਨੇ ਪੁਲਿਸ ਸਮੇਤ ਪੁੱਜੇ ਪਿਕਅਪ ਡਾਲਾ ਨੰਬਰ ਪੀ.ਬੀ.11 ਏ.ਆਰ/9502 ਨੂੰ ਕਬਜ਼ੇ ਲੈ ਕੇ ਲੰਬੀ ਥਾਣੇ ਵਿਚ ਲੈ ਗਏ।
         
              ਜਿੱਥੇ ਪੁੱਛ-ਗਿੱਛ ਦੌਰਾਨ ਝੰਡਿਆਂ ਨੂੰ ਕਾਬੂ ਕੀਤੇ ਵਿਅਕਤੀਆਂ ਦੀ ਸ਼ਨਾਖ਼ਤ ਯਸ਼ਪਾਲ ਵਾਸੀ ਪਟਿਆਲਾ, ਸੋਨੂੰ ਕੁਮਾਰ ਵਾਸੀ ਸ਼ੇਖਪੁਰਾ ਵਜੋਂ ਹੋਈ। ਇਸੇ ਦੌਰਾਨ ਵਿਧਾਨਸਭਾ ਹਲਕਾ ਲੰਬੀ ਦੇ ਰਿਟਰਨਿੰਗ ਅਫਸਰ ਸ੍ਰੀ  ਸੰਦੀਪ ਰਿਸ਼ੀ ਵੀ ਮੌਕੇ 'ਤੇ ਪਹੁੰਚ ਗਏ। ਜਿਨ੍ਹਾਂ ਨੇ ਉਕਤ ਮਾਮਲੇ ਬਾਰੇ ਲੰਬੀ ਦੇ ਥਾਣਾ ਮੁਖੀ, ਫਲਾਇੰਗ ਸਕੂਐਡ ਦੇ ਮੁਖੀ ਗੁਰਮੀਤ ਸਿੰਘ ਵੀਡੀਓਗਰਾਫ਼ੀ ਟੀਮ ਦੇ ਮੁਖੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਤੋਂ ਸਮੁੱਚੇ ਮਾਮਲੇ ਦੀ ਜਾਣਕਾਰੀ ਲਈ।
               
                  ਲੰਬੀ ਥਾਣੇ ਵਿਚ ਝੰਡਿਆਂ ਦੇ ਸਪਲਾਇਰ ਸ੍ਰੀ ਯਸ਼ਪਾਲ ਨੇ ਦੱਸਿਆ ਕਿ ਉਹ ਕੁਝ ਸਮਾਂ ਪਹਿਲਾਂ ਤੱਕ ਪੋਲੀਥੀਨ ਦੇ ਲਿਫਾਫਿਆਂ ਦਾ ਕਾਰੋਬਾਰ ਕਰਦਾ ਸੀ। ਪਰ ਸਰਕਾਰ ਵੱਲੋਂ ਪੋਲੀਥੀਨ ਦੇ ਕਾਰੋਬਾਰ 'ਤੇ ਨੱਥ ਪਾਉਣ ਉਪਰੰਤ ਉਹ ਰੋਜੀ-ਰੋਟੀ ਚਲਾਉਣ ਲਈ ਚੋਣ ਸਮੱਗਰੀ ਦੇ ਕਿੱਤੇ ਨਾਲ ਜੁੜਿਆ ਸੀ ਪਰ ਅੱਜ ਪੁਲਿਸ ਵੱਲੋਂ ਚੋਣ ਸਮੱਗਰੀ ਦੇ ਨਾਲ ਫੜਣ ਨਾਲ ਜਿੱਥੇ ਉਸਦੇ ਰੁਜ਼ਗਾਰ 'ਤੇ ਪ੍ਰਸ਼ਨ ਚਿੰਨ੍ਹ ਲੱਗ ਗਿਆ ਹੈ, ਉਥੇ ਪੁਲਿਸ ਵੱਲੋਂ ਜ਼ਬਤ ਕੀਤੇ ਇਨ੍ਹਾਂ ਝੰਡਿਆਂ 'ਤੇ ਆਈ ਲਾਗਤ ਅਤੇ ਕਾਰੀਗਰਾਂ ਦੀ ਮਜ਼ਦੂਰੀ ਦੀ ਉਸਦੇ ਸਿਰ ਪਵੇਗੀ। ਉਸ ਅਨੁਸਾਰ ਪਿਕਅਪ ਡਾਲੇ ਵਿਚ ਵੱਖ-ਵੱਖ ਸਾਇਜ਼ਾਂ ਅਨੁਸਾਰ 40 ਤੋਂ 50 ਹਜ਼ਾਰ ਝੰਡੇ ਦੇ ਕਰੀਬ ਲੱਦੇ ਹੋਏ ਹਨ।
           ਜਦੋਂ ਉਸਨੂੰ ਪੁੱਛਿਆ ਗਿਆ ਕਿ ਹਜ਼ਾਰਾਂ ਦੀ ਗਿਣਤੀ ਵਿਚ ਲੰਬੀ ਵਿਖੇ ਕਿਸਨੂੰ ਸਪਲਾਈ ਕਰਨ ਜਾ ਰਿਹਾ ਸੀ ਤਾਂ ਯਸ਼ਪਾਲ ਕੋਈ ਪੁਖ਼ਤਾ ਜਵਾਬ ਨਾ ਦੇ ਸਕਿਆ ਅਤੇ ਉਸਨੇ ਸਿਰਫ਼ ਇੰਨਾ ਕਿਹਾ ਹੀ ਕਿਹਾ ਕਿ ਉਹਦੇ ਕੋਲ ਕਿਸੇ ਦਾ ਆਰਡਰ ਨਹੀਂ ਸੀ। ਉਹ ਤਾਂ ਖੁੱਲ੍ਹੇ ਤੌਰ 'ਤੇ ਝੰਡੇ ਵੇਚਣ ਲਈ ਆਇਆ ਸੀ।

          ਲੰਬੀ ਥਾਣੇ ਵਿਖੇ ਰਿਟਰਨਿੰਗ ਅਫਸਰ ਸ੍ਰੀ ਸੰਦੀਪ ਰਿਸ਼ੀ ਨੇ ਦੱਸਿਆ ਕਿ ਇਨ੍ਹਾਂ ਝੰਡਿਆਂ ਨੂੰ ਜ਼ਬਤ ਕਰਕੇ ਲੰਬੀ ਪੁਲਿਸ ਨੂੰ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

               ਇਸੇ ਦੌਰਾਨ ਲੰਬੀ ਥਾਣਾ ਦੇ ਮੁਖੀ ਗੁਰਪ੍ਰੀਤ ਸਿੰਘ ਬੈਂਸ ਨੇ ਦੱਸਿਆ ਕਿ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਸ਼ਿਕਾਇਤ 'ਤੇ ਝੰਡੇ ਅਤੇ ਗੱਡੀ ਨੂੰ ਕਬਜ਼ੇ ਵਿਚ ਲੈ ਕੇ ਯਸ਼ਪਾਲ ਪੁੱਤਰ ਮਦਨ ਗੋਪਾਲ ਵਾਸੀ ਅਰਬਨ ਸਟੇਟ, ਪਟਿਆਲਾ, ਸੋਨੂੰ ਕੁਮਾਰ ਪੁੱਤਰ ਰਾਜਿੰਦਰ ਸਿੰੰਘ ਵਾਸੀ ਸ਼ੇਖਪੁਰਾ (ਪਟਿਆਲਾ) ਖਿਲਾਫ਼ ਧਾਰਾ 127-ਏ ਰਿਪਰੈਜੈਂਟੇਸ਼ਨ ਆਫ਼ ਪੀਪਲ ਐਕਟ 1951 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
ਸਬ ਇੰਸਪੈਕਟਰ ਬੰਤਾ ਸਿੰਘ ਦੇ ਅਨੁਸਾਰ ਪਿਕਅਪ ਡਾਲੇ ਵਿਚ ਗਿਣਤੀ ਦੌਰਾਨ 62 ਗੱਟੇ ਬਰਾਮਦ ਕੀਤੇ ਗਏ, ਜਿਨ੍ਹਾਂ ਵਿਚ ਪ੍ਰਤੀ ਗੱਟੇ ਵਿਚ 500 ਦੇ ਹਿਸਾਬ ਨਾਲ 31 ਹਜ਼ਾਰ ਝੰਡੇ ਸਨ।
         
             ਲੰਬੀ ਹਲਕੇ ਵਿਚ ਸ਼੍ਰ੍ਰੋਮਣੀ ਅਕਾਲੀ (ਬ) ਦੇ ਝੰਡਿਆਂ ਨਾਲ ਭਰੀ ਗੱਡੀ ਫੜੇ ਜਾਣ ਦੀ ਖੂਬ ਚਰਚਾ ਹੈ। ਜਿੱਥੇ ਆਮ ਜਨਤਾ ਇਸ ਕਾਰਵਾਈ ਨੂੰ ਚੋਣ ਕਮਿਸ਼ਨ ਦੀ ਸਖ਼ਤੀ ਦਾ ਸਿੱਟਾ ਦੱਸ ਰਹੀ ਹੈ, ਉਥੇ ਅਕਾਲੀ ਦਲ ਨੇ ਇਸ ਮਾਮਲੇ 'ਤੇ ਚੁੱਪੀ ਧਾਰੀ ਹੋਈ ਹੈ।

ਮੁੱਖ ਮੰਤਰੀ ਬਾਦਲ ਦੇ ਚੋਣ ਜਲਸੇ ਬਰਾਬਰ ਰੋਸ ਜਲਸਾ

ਹੁਣ ਪ੍ਰਕਾਸ਼ ਸਿੰਘ ਬਾਦਲ ਸਾਹਮਣੇ ਆ ਰਹੀਆਂ ਨੇ ਅਕਾਲੀ ਝੰਡਾਬਰਦਾਰਾਂ ਦੀਆਂ ਬੇਨਿਯਮੀਆਂ ਤੇ ਵਿਤਕਰੇਬਾਜ਼ੀਆਂ

                                                               - ਇਕਬਾਲ ਸਿੰਘ ਸ਼ਾਂਤ -
            ਲੰਬੀ : ਪਿਛਲੇ 5 ਸਾਲਾਂ ਵਿਚ ਅਕਾਲੀ-ਭਾਜਪਾ ਗੱਠਜੋੜ ਸਰਕਾਰ ਦੌਰਾਨ ਹਲਕੇ ਲੰਬੀ ਵਿਚ ਅਕਾਲੀ ਦਲ ਦੇ ਝੰਡਾਬਰਦਾਰਾਂ ਵੱਲੋਂ ਕੀਤੀਆਂ ਬੇਨਿਯਮੀਆਂ ਤੇ ਵਿਤਕਰੇਬਾਜ਼ੀ ਭਰੀਆਂ ਕਾਰਗੁਜਾਰੀ ਹੁਣ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਸਾਹਮਣੇ ਆ ਰਹੀਆਂ ਹਨ।
         
              ਅੱਜ ਹਲਕੇ ਦੇ ਪਿੰਡ ਮਿਠੜੀ ਬੁੱਧਗਿਰ ਵਿਖੇ ਮੁਆਵਜੇ ਦੀ ਬਾਂਦਰਵੰਡ ਅਤੇ ਹੋਰ ਸਮੱਸਿਆਵਾਂ ਵਿਚ ਪਿੰਡ ਦੇ ਬਹੁਗਿਣਤੀ ਆਬਾਦੀ ਦੀ ਅਣਦੇਖੀ ਦੇ ਖਿਲਾਫ਼ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਜਲਸੇ ਸਮੇਂ ਪਿੰਡ ਦੇ  ਦੂਸਰੇ ਹਿੱਸੇ ਵਿਚ ਸੈਂਕੜੇ ਕਿਸਾਨਾਂ ਅਤੇ ਮਜ਼ਦੂਰਾਂ ਮਰਦ-ਔਰਤਾਂ ਵੱਲੋਂ ਵਿਸ਼ਾਲ ਮੁਜਾਹਰਾ ਕਰਕੇ ਆਪਣਾ ਰੋਸ ਪ੍ਰਗਟਾਇਆ ਗਿਆ।

             ਪਿੰਡ ਵਿਚ ਮੁੱਖ ਮੰਤਰੀ ਦੇ ਚੋਣ ਜਲਸੇ ਦੇ ਬਰਾਬਰ ਵਿਤਕਰੇਬਾਜ਼ੀ ਅਤੇ ਅਣਦੇਖੀ ਤੋਂ ਰੋਹ ਵਿਚ ਆਏ ਲੋਕਾਂ ਵੱਲੋਂ ਜਲਸਾ ਕਰਨ ਦੀਸੂਚਨਾ ਮਿਲਣ 'ਤੇ ਵੱਡੀ ਗਿਣਤੀ ਵਿਚ ਪੁਲਿਸ ਅਮਲਾ ਮੌਕੇ 'ਤੇ ਪਹੁੰਚ ਗਿਆ ਅਤੇ ਉਨ੍ਹਾਂ ਦੀ  ਘੇਰੇਬੰਦੀ ਕਰ ਲਈ।

                ਇਸੇ ਦੌਰਾਨ ਪਿੰਡ ਦੇ ਕਿਸਾਨ ਦਲਜੀਤ ਸਿੰਘ, ਬਲਤੇਜ ਸਿੰਘ, ਤਰਸੇਮ ਸਿੰਘ, ਬੁੱਧ ਸਿੰਘ ਉਰਫ਼ ਨੀਲਾ ਰੰਗੜ ਅਤੇ ਜਗਜੀਤ ਸਿੰਘ ਨੇ ਜਲਸੇ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਅਕਾਲੀ ਸਰਕਾਰ ਦੌਰਾਨ ਹਾਕਮਾਂ ਵੱਲੋਂ ਪਿੰਡ ਦੇ ਅਜਿਹੇ ਇੱਕਾ-ਦੁੱਕਾ ਸਰਮਾਏਦਾਰਾਂ ਨੂੰ ਚੌਧਰ ਸਾਂਭ ਦਿੱਤੀ ਜਾਂਦੀ ਹੈ। ਜਿਨ੍ਹਾਂ ਵੱਲੋਂ ਆਪਣੇ ਜਗੀਰਦਾਰਾਨਾ ਰਵੱਈਏ ਨਾਲ ਪਿੰਡ ਦੀ ਆਮ ਜਨਤਾ ਨੂੰ ਜਾਨਵਰਾਂ ਤੋਂ ਬਦਤਰ ਸਮਝਿਆ ਜਾਂਦਾ ਹੈ। ਉਨ੍ਹਾਂ ਸੂਬਾ ਸਰਕਰ ਵੱਲੋਂ ਭੇਜੀਆਂ ਕਰੋੜਾਂ ਦੀਆਂ ਗਰਾਟਾਂ ਵਿਚ ਕਥਿਤ ਤੌਰ 'ਤੇ ਵੱਡੀ ਘਪਲੇਬਾਜ਼ੀ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਪਿੰਡ ਦੀ ਜਨਤਾ ਵਿਚ ਸਰਕਾਰੀ ਗਰਾਂਟਾਂ ਦੇ ਸੁਚੱਜੇ ਢੰਗ ਨਾਲ ਨਹੀਂ ਲੱਗਣ ਕਰਕੇ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ।
       
            ਬੁਲਾਰਿਆਂ ਨੇ ਕਿਹਾ ਕਿ ਅਕਾਲੀ ਸਰਕਾਰ ਨੇ ਮੌਕਾਪ੍ਰਸਤ ਲੋਕਾਂ ਨੂੰ ਪਿੰਡਾਂ ਦੇ ਇੰਚਾਰਜ਼ ਥਾਪ ਕੇ ਆਮ ਜਨਤਾ ਦੇ ਗਲੇ ਘੁੱਟਣ ਜਿਹੀ ਕਾਰਗੁਜਾਰੀਆਂ ਨੂੰ ਅੰਜਾਮ ਦਿੱਤਾ ਗਿਆ। ਉਨ੍ਹਾਂ ਪਿਛਲੇ ਪੰਜ ਵਰ੍ਹਿਆਂ ਦੌਰਾਨ ਆਮ ਜਨਤਾ ਦੀ ਜਾਇਜ਼ ਸਮੱਸਿਆਵਾਂ ਅਤੇ ਮੰਗਾਂ ਅੱਖੋਂ ਪਰੋਖੇ ਕੀਤਾ ਗਿਆ, ਜਦੋਂਕਿ ਅਖੌਤੀ ਇੰਚਾਰਜ਼ਾਂ ਦੇ ਹਰੇਕ ਗੈਰਵਾਜਬ ਹੁਕਮ ਅਤੇ ਧੱਕੇਸ਼ਾਹੀਆਂ ਨੂੰ ਲੋਕਹਿੱਤਾਂ 'ਤੇ ਭਾਰੂ ਰਹੇ।

              ਇਸ ਮੌਕੇ ਮੀਂਹਾਂ ਦੇ ਪ੍ਰਭਾਵਿਤਾਂ ਨਾਲ ਹੋਈ ਵਿਤਕਰੇਬਾਜ਼ੀ 'ਤੇ ਬੋਲਦਿਆਂ ਬੁਲਾਰਿਆਂ ਨੇ ਕਿਹਾ ਕਿ ਪਿੰਡ ਦੇ ਸਰਮਾਏਦਾਰਾਂ ਵੱਲੋਂ ਪਟਵਾਰੀ ਦੀ ਕਥਿਤ ਮਿਲੀਭੁਗਤ ਨਾਲ ਚਹੇਤਿਆਂ ਅਤੇ ਕੁਨਬੇ ਦਾ ਢਿੱਡ ਭਰਨ ਲਈ ਗੈਰ ਪ੍ਰਭਾਵਿਤਾਂ ਨੂੰ ਮੁਆਵਜ਼ਾ ਸੂਚੀ ਵਿਚ ਸ਼ਾਮਲ ਕਰ ਦਿੱਤਾ ਗਿਆ। ਜਦੋਂਕਿ ਸੈਂਕੜੇ ਪ੍ਰਭਾਵਿਤ ਕਿਸਾਨ-ਮਜ਼ਦੂਰ ਵੱਡੀ ਮਾਰ  ਹੇਠ ਆਉਣ ਦੇ ਬਾਵਜੂਦ ਅਣਗੌਲਿਏ ਕੀਤੇ ਗਏ। ਦਲਜੀਤ ਸਿੰਘ, ਬਲਤੇਜ ਸਿੰਘ ਅਤੇ ਤਰਸਮੇ ਸਿੰਘ ਨੇ ਦੋਸ਼ ਲਾਇਆ ਕਿ ਪਿੰਡ ਵਿਚ ਵਾਰ-ਵਾਰ ਮੰਗ ਕਰਨ ਦੇ ਬਾਵਜੂਦ ਵਾਟਰ ਵਰਕਸ ਦੀ ਪਾਈਪ ਪਾਈਪ ਨਹੀਂ ਪਾਈ ਗਈ, ਖਾਲਿਆਂ ਦੀ ਪੁਲੀਆਂ ਅਤੇ ਨੱਕਿਆਂ ਨਾ ਬਣਾਉਣ ਤੋਂ ਇਲਾਵਾ ਲੋੜਵੰਦਾਂ ਨੂੰ ਪਖਾਨਿਆਂ ਅਤੇ ਬੀ.ਪੀ.ਐਲ. ਕਾਰਡਾਂ ਤੋਂ ਵਾਂਝਾ ਰੱਖਿਆ ਗਿਆ।
     

         ਪਿੰਡ ਮਿਠੜੀ ਵਿਖੇ ਅਕਾਲੀ ਦਲ ਦੇ ਚੋਣ ਜਲਸੇ ਤੋਂ ਵੱਡਾ ਇਕੱਠ ਰੋਹ ਭਰਪੂਰ ਜਲਸੇ ਵਿਚ ਹੋਣ ਦੀ ਸੂਚਨਾ ਮਿਲਣ 'ਤੇ ਜ਼ਿਲ੍ਹਾ ਵਿਕਾਸ ਕਮੇਟੀ ਦੇ ਚੇਅਰਮੈਨ ਹਰਮੀਤ ਸਿੰਘ ਭੀਟੀਵਾਲਾ ਜਲਸੇ ਵਿਚ ਪੁੱਜਿਆ ਅਤੇ ਲੋਕਾਂ ਦੇ ਰੋਹ ਭਰੇ ਵਿਚਾਰ ਸੁਣੇ।
ਇਸਦੇ ਉਪਰੰਤ ਪਿੰਡ ਦੇ ਅਕਾਲੀ ਆਗੂ ਦੀਆਂ ਊਣਤਾਈਆਂ ਭਰੀਆਂ ਕਾਰਗੁਜਾਰੀਆਂ ਤੋਂ ਤਪੇ ਲੋਕਾਂ ਨੂੰ ਠਾਰ੍ਹਣ ਲਈ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਖੁਦ ਜਲਸੇ ਵਿਚ ਪੁੱਜੇ ਅਤੇ ਲੋਕਾਂ ਦੀਆਂ ਰੋਹ ਭਾਵਨਾਵਾਂ ਅਤੇ ਸਮੁੱਚੀਆਂ ਦੁੱਖ ਤਕਲੀਫ਼ਾਂ ਨੂੰ ਸੁਣਿਆ। ਮੁੱਖ ਮੰਤਰੀ ਨੇ ਪ੍ਰਭਾਵਿਤਾਂ ਨੂੰ ਪੁਰਾਣੇ ਗਿਲੇ ਸ਼ਿਕਵੇ ਅਤੇ ਹੱਡ ਬੀਤੀਆਂ ਨੂੰ ਭੁਲਾ ਕੇ ਉਨ੍ਹਾਂ ਨੂੰ ਵੱੱਡੇ ਫ਼ਰਕ ਨਾਲ ਜਿਤਾਉਣ ਦੀ ਅਪੀਲ ਕੀਤੀ।
       
             ਇੱਥੇ ਜ਼ਿਕਰਯੋਗ ਹੈ ਕਿ ਲੰਬੀ ਹਲਕੇ ਦੇ ਦਰਜਨਾਂ ਪਿੰਡਾਂ ਵਿਚ ਮੀਂਹਾਂ ਤੋਂ ਪ੍ਰਭਾਵਿਤ ਸੈਂਕੜੇ ਪਰਿਵਾਰਾਂ ਦੇ ਨਾਂਅ ਮੁਆਵਜਾ ਸੂਚੀਆਂ ਵਿਚ ਨਾ ਹੋਣ ਕਰਕੇ ਪ੍ਰਭਾਵਿਤ ਕਿਸਾਨਾਂ ਅਤੇ ਮਜ਼ਦੂਰਾਂ ਵਿਚ ਕਾਫ਼ੀ ਰੋਸ ਪਾਇਆ ਜਾ ਰਿਹਾ ਹੈ।

ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਖੌਫ਼ ਅਕਾਲੀਆਂ ਦੇ ਮਨ 'ਤੇ ਛਾਇਆ ਰਿਹਾ

                                                                  ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਕੱਲ੍ਹ ਪਿੰਡ ਕੰਦੂਖੇੜਾ ਵਿਖੇ ਮੁੱਖ ਮੰਤਰੀ ਦਾ ਚੋਣ ਜਲਸਾ ਕਮਿਊਨਿਟੀ ਸੈਂਟਰ ਦੇ ਰਕਬੇ ਵਿਚ ਹੋਣ ਸਬੰਧ ਰਿਪੋਰਟਾਂ ਨਸ਼ਰ ਹੋਣ ਦਾ ਖੌਫ਼ ਪ੍ਰਸ਼ਾਸਨਕ ਤੰਤਰ ਅਤੇ ਅਕਾਲੀ ਵਰਕਰਾਂ ਵਿਚ ਕਾਫ਼ੀ ਹੱਦ ਤੱਕ ਵੇਖਣ ਨੂੰ ਮਿਲਿਆ। ਅੱਜ ਮੁੱਖ ਮੰਤਰੀ ਵੱਲੋਂ ਪਿੰਡ ਲਾਲਬਾਈ ਵਿਖੇ ਆਰ.ਓ. ਦੇ ਨਾਲ ਖਹਿੰਦੀ ਪੰਚਾਇਤੀ ਜ਼ਮੀਨ 'ਤੇ ਕੀਤੇ ਜਾ ਰਹੇ ਚੋਣ ਜਲਸੇ ਦੀਆਂ ਤਸਵੀਰਾਂ ਖਿੱਚਣ 'ਤੇ ਜਿੱਥੇ ਉੱਪ ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਅਵਤਾਰ ਵਣਵਾਲਾ ਅਤੇ ਮਾਰਕਫੈੱਡ ਦੇ ਨਿਦੇਸ਼ਕ ਅਤੇ ਸੀਨੀਅਰ ਅਕਾਲੀ ਆਗੂ ਤੇਜਿੰਦਰ ਸਿੰਘ ਮਿੱਡੂਖੇੜਾ ਹੁਰੇ ਪੱਤਰਕਾਰਾਂ ਤੋਂ ਮਿੱਤਰਪੁਣੇ ਅਤੇ ਚੰਗੇਰੇ ਸੰਬੰਧਾਂ ਦੀ ਦੁਹਾਈ ਦੇ ਕੇ ਵਿਚ ਕੈਮਰੇ ਮੁਹਰੇ ਖੜ੍ਹੇ ਹੋ ਕੇ ਫੋਟੋਗਰਾਫ਼ੀ ਨਾ ਕਰਨ ਦੀ ਅਪੀਲ ਕਰਦੇ ਰਹੇ। ਜਦੋਂਕਿ ਇਸ ਦੌਰਾਨ ਅਕਾਲੀ ਵਰਕਰ ਵਜੋਂ ਵਿਚਰਦੇ ਜਾਪਦੇ ਮੁੱਖ ਮੰਤਰੀ ਦੇ ਸੁਰੱਖਿਆ ਅਮਲੇ ਦੇ ਕੁਝ ਕਰਮਚਾਰੀ ਵੀ ਟੇਢੀਆਂ ਅੱਖਾਂ ਨਾਲ ਪ੍ਰਭਾਵ ਪਾਉਣ ਦੀ ਕੋਸ਼ਿਸ਼ ਕਰਦੇ ਮਹਿਸੂਸ ਕੀਤੇ ਗਏ।
ਇਸੇ ਤਰ੍ਹਾਂ ਹਲਕੇ ਦੇ ਪਿੰਡ ਥਰਾਜਵਾਲਾ ਵਿਖੇ ਵੀ ਖੇਡ ਸਟੇਡੀਅਮ 'ਚ ਹੋ ਰਹੇ ਜਲਸੇ ਦੀਆਂ ਫੋਟੋਆਂ ਖਿੱਚਣ 'ਤੇ ਉਥੇ ਮੌਜੂਦ ਆਯੋਜਕਾਂ ਵਿਚ ਸਹਿਮ ਜਿਹਾ ਦੌੜ ਗਿਆ ਤੇ ਉਨ੍ਹਾਂ ਵੱਲੋਂ ਤੁਰੰਤ ਸਟੇਡੀਅਮ ਵਿਚ ਬਣੇ ਜਿੰਮ ਦੇ ਕਮਰੇ ਦੀ ਕੰਧ 'ਤੇ ਲਿਖੇ ਨਾਂਅ ਜਿੰਮ ਖਾਨਾ ਪਿੰਡ ਥਰਾਜਵਾਲਾ 'ਤੇ ਕਰਮਚਾਰੀਆਂ ਨੂੰ ਪੌੜੀ ਲਾ ਕੇ ਇੱਕ ਗੰਦੀ ਜਿਹੀ ਪੱਲੀ ਨਾਲ ਢਕਵਾ ਕੇ ਲੁਕੋਣ ਦੀ ਕੋਸ਼ਿਸ਼ ਸ਼ੁਰੂ ਕਰ ਦਿੱਤੀ। ਇਸੇ ਦੌਰਾਨ ਚੋਣ ਕਮਿਸ਼ਨ ਵੱਲੋਂ ਨਿਯੁਕਤ ਸ੍ਰੀ ਅਮਰਜੀਤ ਸਿੰਘ ਸਿੱਧੂ  ਦੀ ਅਗਵਾਈ ਵਾਲੀ ਟੀਮ ਵੱਲੋਂ ਮੌਕੇ 'ਤੇ ਪਹੁੰਚ ਕੇ ਪੰਡਾਲ ਵਗੈਰਾ ਦੀ ਨਿਯਮਾਂ ਅਨੁਸਾਰ ਵੀਡੀਓਗਰਾਫ਼ੀ ਕਰਵਾਈ ਗਈ।



ਮੁੱਖ ਮੰਤਰੀ ਦੇ ਅਹੁਦੇ ਲਈ ਕਾਂਗਰਸੀਆਂ ਵਿਚਕਾਰ ਘਸਮਾਨ ਮੱਚਿਆ ਹੋਇਐ : ਬਾਦਲ  
                                                          ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਕਾਂਗਰਸ ਆਗੂਆਂ ਵਿਚਕਾਰ ਮੁੱਖ ਮੰਤਰੀ ਦੇ ਅਹੁਦੇ ਨੂੰ ਲੈ ਕੇ ਘਸਮਾਨ ਮੱਚਿਆ ਹੋਇਆ ਹੈ। ਕੈਪਟਨ ਅਮਰਿੰਦਰ, ਬੀਬੀ ਭੱਠਲ, ਪ੍ਰਤਾਪ ਬਾਜਵਾ ਸਮੇਤ ਕਈ ਹੋਰ ਮੁੱਖ ਮੰਤਰੀ ਦੇ ਅਹੁਦੇ ਲਈ ਹੁਣੇ ਤੋਂ ਤਰਲੋਮੱਛੀ ਹੋਈ ਫਿਰਦੇ ਨੇ, ਜਦੋਂਕਿ ਕਾਂਗਰਸ ਅਜੇ ਤੱਕ ਆਪਣੀਆਂ ਟਿਕਟਾਂ ਦਾ ਐਲਾਨ ਨਹੀਂ ਕਰ ਸਕੀ।
ਉਹ ਅੱਜ ਲੰਬੀ ਹਲਕੇ ਦੇ ਪਿੰਡਾਂ ਲੰਬੀ, ਬੀਦੋਵਾਲੀ, ਲਾਲਬਾਈ, ਥਰਾਜਵਾਲਾ ਸਮੇਤ ਵੱਖ-ਵੱਖ ਪਿੰਡਾਂ ਵਿਚ ਚੋਣ ਜਲਸਿਆਂ ਨੂੰ ਸੰਬੋਧਨ ਕਰ ਰਹੇ ਸਨ।
ਉਨ੍ਹਾਂ ਕਾਂਗਰਸ ਨੂੰ ਦੇਸ਼ ਦੀ ਆਰਥਿਕ ਅਤੇ ਸਮਾਜਿਕ ਤਬਾਹੀ ਲਈ ਜੁੰਮੇਵਾਰ ਕਰਾਰ ਦਿੰਦਿਆਂ ਕਿਹਾ ਕਿ ਕਾਂਗਰਸ ਨੇ ਭਾਰਤ ਨੂੰ ਦੁਨੀਆਂ ਦੇ ਸਭ ਵੱਧ ਗਰੀਬੀ, ਬੇਰੁਜ਼ਗਾਰੀ ਅਤੇ ਭ੍ਰਿਸ਼ਟ ਮੁਲਕਾਂ ਦੀ ਮੁਹਰਲੀ ਕਤਾਰ ਵਿਚ ਲਿਆ ਖੜ੍ਹਾ ਕੀਤਾ ਹੈ। ਉਨ੍ਹਾਂ ਕਾਂਗਰਸ ਦੇ 50 ਸਾਲਾਂ ਦੇ ਰਾਜ ਦੀ ਤੁਲਣਾ ਪੰਜਾਬ ਦੀ ਅਕਾਲੀ ਭਾਜਪਾ ਸਰਕਾਰ ਦੇ 5 ਸਾਲਾਂ ਨਾਲ ਕਰਦਿਆਂ ਆਖਿਆ ਕਿ ਕੇਂਦਰ ਦੇ ਬੇਰੱਖੇ ਰਵੱਈਏ ਦੇ ਬਾਵਜੂਦ ਅਕਾਲੀ-ਭਾਜਪਾ ਸਰਕਾਰ ਨੇ ਸੂਬੇ ਵਿਚ ਵਿਕਾਸ ਨੂੰ ਨਵੀਂ ਦਿਸ਼ਾ ਦਿੱਤੀ।
ਸ੍ਰੀ ਬਾਦਲ ਨੇ ਕਾਂਗਰਸੀ ਸਰਕਾਰਾਂ ਨੂੰ ਵਿਖਾਵੇ ਦੀਆਂ ਸਰਕਾਰਾਂ ਕਰਾਰ ਦਿੰਦਿਆਂ ਕਿਹਾ ਕਿ ਇਨ੍ਹਾਂ ਦੀਆਂ ਸਰਕਾਰਾਂ ਦਾ ਲੋਕ ਹਿੱਤਾਂ ਦੂਰ-ਦੂਰ ਤੱਕ ਕੋਈ ਵਾਸਤਾ ਨਹੀਂ ਹੁੰਦਾ।
ਉਨ੍ਹਾਂ ਪਿੰਡ ਲਾਲਬਾਈ ਵਿਖੇ ਚੋਣ ਜਲਸੇ ਦੌਰਾਨ ਪੀ. ਪੀ. ਪੀ. ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਬਾਦਲ 'ਤੇ ਤਿੱਖੇ ਹਮਲੇ ਕਰਦਿਆਂ ਲੋਕਾਂ ਨੂੰ ਉਸਦੀ ਪਾਰਟੀ ਤੋਂ ਪਾਸਾ ਵੱਟਣ ਦੀ ਅਪੀਲ ਕੀਤੀ।
 ਇਸਤੋਂ ਪਹਿਲਾਂ ਪਿੰਡ ਬੀਦੋਵਾਲੀ ਵਿਖੇ ਚੋਣ ਜਲਸੇ ਵਿਚ ਕਾਫ਼ੀ ਗਿਣਤੀ ਵਿਚ ਕੁਰਸੀਆਂ ਖਾਲੀ ਪਈਆਂ ਸਨ। ਜਿੱਥੇ ਮੁੱਖ ਮੰਤਰੀ ਨੇ ਆਪਣੇ ਭਾਸ਼ਨ ਵਿਚ ਅਕਾਲੀ ਸਰਕਾਰ ਦੌਰਾਨ ਰਹੀਆਂ ਕਮੀਆਂ ਨੂੰ ਦਰਬਦਰ ਕਰਕੇ ਮੁੜ ਤੋਂ ਲੰਬੀ ਹਲਕੇ ਵਿਚ ਸੱਤਾ ਦਾ ਪਾਵਰ ਗਰਿੱਡ ਲਿਆਉਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਬਿਜਲੀ ਦੇ ਟਰਾਂਸਫਾਰਮਰ (ਐਮ.ਐਲ.ਏ.) ਨਾਲ ਕੋਈ ਵਿਕਾਸ ਨਹੀਂ ਹੋ ਸਕਦਾ, ਜਦੋਂਕਿ ਮੁੱਖ ਮੰਤਰੀ ਦੀ ਕੁਰਸੀ ਪਾਵਰ ਗਰਿੱਡ ਦਾ ਆਪਣਾ ਰੁਤਬਾ ਹੈ। ਪਿੰਡ ਬੀਦੋਵਾਲੀ ਵਿਖੇ ਮੁੱਖ ਮੰਤਰੀ ਦੇ ਚੋਣ ਜਲਸੇ ਵਿਚ ਕਾਫ਼ੀ ਗਿਣਤੀ ਖਾਲੀ ਪਈਆਂ ਕੁਰਸੀਆਂ ਵੀ ਚਰਚਾ ਦਾ ਵਿਸ਼ਾ ਬਣੀਆਂ ਰਹੀਆਂ। ਚੋਣ ਜਲਸੇ ਵਿਚ ਪੱਤਰਕਾਰਾਂ ਵੱਲੋਂ ਤਸਵੀਰਾਂ ਖਿੱਚਣ 'ਤੇ ਅਕਾਲੀ ਵਰਕਰ ਖਾਲੀ ਕੁਰਸੀਆਂ ਭਰਨ ਦੀ ਕੋਸ਼ਿਸ਼ ਦੇ ਤਹਿਤ ਮਹਿਜ਼ ਤਿੰਨ-ਚਾਰ ਵਿਅਕਤੀਆਂ ਨੂੰ ਬਿਠਾਉਣ ਵਿਚ ਸਫ਼ਲ ਹੋਏ।
ਇਸ ਮੌਕੇ ਮੁੱਖ ਮੰਤਰੀ ਦੇ ਪੰਜਾਬ ਪਬਲਿਕ ਸਰਵਿਸ ਕਮਿਸ਼ਨ ਦੇ ਸਾਬਕਾ ਮੈਂਬਰ ਅਤੇ ਅਕਾਲੀ ਆਗੂ ਸ੍ਰੀ ਪਰਮਜੀਤ ਸਿੰਘ 'ਲਾਲੀ ਬਾਦਲ', ਲਾਲੀ ਕਾਲਝਰਾਨੀ ਅਤੇ ਗੁਰਮੇਹਰ ਸਿੰਘ ਬਾਦਲ, ਤੇਜਿੰਦਰ ਸਿੰਘ ਮਿੱਡਖੇੜਾ, ਅਵਤਾਰ ਸਿੰਘ ਵਣਵਾਲਾ, ਐਸ.ਓ.ਆਈ. ਦੇ ਜ਼ਿਲ੍ਹਾ ਪ੍ਰਧਾਨ ਅਕਾਸ਼ਦੀਪ ਮਿੱਡੂਖੇੜਾ, ਭੁਪਿੰਦਰ ਸਿੰਘ ਮਿੱਡੂਖੇੜਾ, ਰਣਯੋਧ ਲੰਬੀ ਸਮੇਤ ਵੱਖ-ਵੱਖ ਆਗੂ ਅਤੇ ਵਰਕਰ ਵੀ ਮੌਜੂਦ ਸਨ।

ਮਹੇਸ਼ਇੰਦਰ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਚੋਣ ਪ੍ਰਚਾਰ ਦਾ ਆਗਾਜ਼

                                         ਐਤਕੀਂ ਲੰਬੀ 'ਚ ਭਿੜਨਗੇ ਤਿੰਨ ਬਾਦਲ
                                                                 ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਦੁਨੀਆਂ ਭਰ ਦੇ ਪੰਜਾਬੀਆਂ ਦੀ ਦਿਲਚਸਪੀ ਦਾ ਕੇਂਦਰ ਬਣੇ ਲੰਬੀ ਵਿਧਾਨਸਭਾ ਹਲਕੇ ਵਿਚ ਅੱਜ ਅੱਜ ਤਿੰਨ ਬਾਦਲਾਂ ਵਿਚਾਲੇ ਤਿਕੋਣੀ ਸਿਆਸੀ ਜੰਗ ਦਾ ਬਿਗੁਜ ਵੱਜ ਗਿਆ। ਕਾਂਗਰਸ ਪਾਰਟੀ ਦੀ ਹਾਈਕਮਾਂਡ ਵੱਲੋਂ ਹਰੀ ਝੰਡੀ ਮਿਲਣ ਉਪਰੰਤ ਪਾਰਟੀ ਦੇ ਉਮੀਦਵਾਰ ਵਜੋਂ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਅੱਜ ਆਪਣੇ ਜੱਦੀ ਪਿੰਡ ਬਾਦਲ ਤੋਂ ਆਪਣੀ ਚੋਣ ਮੁਹਿੰਮ ਦਾ ਆਗਾਜ਼ ਕਰ ਦਿੱਤਾ।

          ਸ੍ਰੀ ਮਹੇਸ਼ਇੰਦਰ ਸਿੰੰਘ ਬਾਦਲ ਨੇ ਸਵੇਰੇ ਪਿੰਡ ਬਾਦਲ ਦੇ ਗੁਰਦੁਆਰਾ ਵਿਖੇ ਅਰਦਾਸ ਕਰਨ ਉਪਰੰਤ ਮੰਦਰ, ਪ੍ਰਾਚੀਨ ਸਮਾਧ ਅਤੇ ਮਸੀਤ 'ਤੇ ਨਤਮਸਤਕ ਹੋਣ ਤੋਂ ਉਪਰੰਤ ਬਕਾਇਦਾ ਪਿੰਡ ਦੇ ਘਰ ਘਰ ਜਾ ਕੇ ਵੋਟਾਂ ਮੰਗੀਆਂ ਅਤੇ ਪਿੰਡ  ਵਾਸੀਆਂ ਤੋਂ ਸਹਿਯੋਗ ਦੀ ਅਪੀਲ ਕੀਤੀ।
    
         ਚੋਣ ਮੁਹਿੰਮ ਦੇ ਆਗਾਜ਼ ਬਾਰੇ ਸੂਚਨਾ ਮਿਲਦੇ ਹੀ ਹਲਕੇ ਦੇ ਪਿੰਡਾਂ ਸੈਂਕੜੇ ਲੋਕ ਆਪ ਮੁਹਾਰੇ ਬਾਦਲ ਪੁੱਜ ਗਏ। ਜਿਨ੍ਹਾਂ ਨੇ ਤਿੰਨ ਵੱਖ-ਵੱਖ ਕਾਫ਼ਲਿਆਂ ਦੇ ਰੂਪ ਵਿੱਚ ਘਰ ਘਰ ਜਾ ਕੇ ਵੋਟਾਂ ਮੰਗੀਆਂ। ਇਸ ਮੌਕੇ ਸ੍ਰ: ਮਹੇਸ਼ਇੰਦਰ ਬਾਦਲ  ਇਲਾਵਾ ਕਾਫ਼ਲਿਆਂ ਦੀ ਅਗਵਾਈ ਸਾਬਕਾ ਟਰਾਂਸਪੋਰਟ ਮੰਤਰੀ ਸ੍ਰ: ਹਰਦੀਪਇੰਦਰ ਸਿੰਘ ਬਾਦਲ, ਪੰਜਾਬ ਕਾਂਗਰਸ ਦੇ ਸੀਨੀਅਰ  ਗੁਰਮੀਤ ਸਿੰਘ ਖੁੱਡੀਆਂ, ਰਣਧੀਰ ਸਿੰਘ ਧੀਰਾ ਅਤੇ ਬਾਦਲ ਪਿੰਡ ਦੇ ਸਾਬਕਾ ਸਰਪੰਚ ਸੰਜਮ ਸਿੰਘ ਢਿੱਲੋ, ਸਰਬਜੀਤ ਸਿੰਘ ਬਾਦਲ ਕਰ ਰਹੇ ਸਨ। ਚੋਣ ਮੁਹਿੰਮ ਦੇ ਆਗਾਜ਼ ਮੌਕੇ ਵੱਡੀ ਗਿਣਤੀ ਵਿਚ ਕਾਂਗਰਸ ਵਰਕਰ, ਆਗੂ ਅਤੇ ਪਾਰਟੀ ਵਰਕਰਾਂ ਸਮੇਤ ਹਲਕੇ ਦੇ ਸਮੂਹ ਪਿੰਡਾਂ ਦੇ ਸਾਬਕਾ ਕਾਂਗਰਸੀ ਪੰਚ-ਸਰਪੰਚ ਪਹੁੰਚੇ ਹੋਏ ਸਨ।
     
    ਸਾਲ 2007 ਦੀਆਂ ਵਿਧਾਨਸਭਾ ਚੋਣਾਂ ਵਿਚ ਆਪਣੇ ਚਚੇਰੇ ਭਰਾ ਅਕਾਲੀ ਉਮੀਦਵਾਰ ਵਜੋਂ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨਾਲ ਸਖ਼ਤ ਮੁਕਾਬਲੇ ਵਿਚ ਉਨ੍ਹਾਂ ਦੇ ਜਿੱਤ ਦੇ ਫ਼ਰਕ ਨੂੰ ਮਹਿਜ਼ 9200 ਵੋਟਾਂ 'ਤੇ ਲਿਆ ਸਮੇਟਿਆ ਸੀ, ਪਰ ਐਤਕੀਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ 65 ਸਿਆਸੀ ਜੀਵਨ ਦੌਰਾਨ ਉਨ੍ਹਾਂ ਦੇ ਚੋਣ ਪ੍ਰਚਾਰ ਦੀ ਕਮਾਂਡ ਨੂੰ ਚਾਣਕਿਆ ਵਜੋਂ ਸੰਭਾਲਣ ਵਾਲੇ ਉਨ੍ਹਾਂ ਦੇ ਛੋਟੇ ਭਰਾ ਦਾਸ ਖੁਦ ਵੀ ਵਿਰੋਧੀ ਉਮੀਦਵਾਰ ਵਜੋਂ ਮੁੱਖ ਮੰਤਰੀ ਦੇ ਸਾਹਮਣੇ ਲੰਬੀ ਤੋਂ ਸਾਂਝੇ ਮੋਰਚੇ ਦੇ ਉਮੀਦਵਾਰ ਵਜੋਂ ਚੋਣ ਪਿੜ ਵਿਚ ਡਟੇ ਹੋਏ ਹਨ। ਸਿਆਸੀ ਮਾਹਰ ਗੁਰਦਾਸ ਸਿੰਘ ਬਾਦਲ ਦੇ ਲੰਬੀ ਹਲਕੇ ਤੋਂ ਚੋਣ ਮੈਦਾਨ ਵਿੱਚ ਆਉਣ ਨੂੰ ਬਹੁਤ ਜਿਆਦਾ ਅਹਿਮੀਅਤ ਦੇ ਰਹੇ ਹਨ, ਕਿਉਂਕਿ ਪਿਛਲੇ ਕਈ ਦਹਾਕਿਆਂ ਤੋਂ ਵੋਟਰਾਂ ਨਾਲ ਨਾ ਸਿਰਫ ਉਨ੍ਹਾਂ ਨਾਲ ਸਿੱਧਾ ਵਾਹ ਵਾਸਤਾ ਹੈ, ਬਲਕਿ ਉਹ ਆਪਣੇ ਵੱਡੇ ਭਰਾ ਵਾਂਗ ਚੋਣ ਸਿਆਸਤ ਦੀਆਂ ਬਰੀਕੀਆਂ ਦੇ ਮਾਹਰ ਹਨ। ਅਜਿਹੇ ਵਿਚ ਮਹੇਸ਼ਇੰਦਰ ਸਿੰਘ ਦੇ ਚੋਣ ਪਿੜ ਵਿਚ ਆਉਣ ਨਾਲ ਬਦਲੇ ਸਿਆਸੀ ਸਮੀਕਰਨਾਂ ਵਿਚ ਅਕਾਲੀ ਦਲ ਲਈ ਰਾਹ ਪਹਿਲਾਂ ਨਾਲੋਂ ਕਾਫ਼ੀ ਔਖੀ ਬਣ ਗਈ ਹੈ।
    
          ਪਿੰਡ ਬਾਦਲ ਵਿਚ ਚੋਣ ਪ੍ਰਚਾਰ ਦੌਰਾਨ ਸ੍ਰ: ਮਹੇਸਇੰਦਰ ਬਾਦਲ ਨੇ ਕਿਹਾ ਕਿ ਅਕਾਲੀ ਸਰਕਾਰ ਦੇ ਅੰਨ੍ਹੇਵਾਰ ਜ਼ਬਰ-ਜੁਲਮ ਕਰਕੇ ਪਿਛਲੇ ਪੰਜ ਸਾਲਾਂ ਦੇ ਕਾਰਜਕਾਲ ਦੌਰਾਨ ਉਨ੍ਹਾਂ ਦੇ ਕਿਸੇ ਵਰਕਰ ਦਾ ਟੁੱਟਣਾ ਤਾਂ ਦੂਰ ਉਲਟਾ ਅਕਾਲੀ ਦਲ ਨਾਲ ਜੁੜੇ ਉਹ ਵਰਕਰ ਵੀ ਉਨ੍ਹਾਂ ਨਾਲ ਆ ਮਿਲੇ ਹਨ, ਜੋ ਸੱਭਿਅਕ ਸਿਆਸਤ ਵਿੱਚ ਵਿਸ਼ਵਾਸ ਰੱਖਦੇ ਹਨ। ਉਨ੍ਹਾਂ ਕਿਹਾ ਕਿ ਤਿੰਨੇ ਭਰਾਵਾਂ ਵਿਚਕਾਰ ਤਿਕੋਣੇ ਮੁਕਾਬਲੇ ਦੇ ਮੱਦੇਨਜ਼ਰ ਸਾਂਝੇ ਮੋਰਚੇ ਦੇ ਉਮੀਦਵਾਰ ਸ. ਗੁਰਦਾਸ ਸਿੰੰਘ ਬਾਦਲ ਜਿੰਨੀਆਂ ਵੀ ਵੋਟਾਂ ਹਾਸਲ ਕਰਨਗੇ, ਉਸਦਾ ਵੱਡਾ ਹਿੱਸਾ ਅਕਾਲੀ ਦਲ ਦੇ ਵੋਟ ਬੈਂਕ ਨੂੰ ਖੋਰਾ ਲਾਵੇਗਾ। ਨਿਸ਼ਚੈ ਹੀ ਜਿਸਦਾ ਫਾਇਦਾ ਉਨ੍ਹਾਂ (ਮਹੇਸ਼ਇੰਦਰ ਸਿੰਘ) ਨੂੰ ਹੋਵੇਗਾ।
      
          ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਾਂਗਰਸ ਦੀ ਲਿਸਟ ਜਾਰੀ ਹੋਣ ਤੋਂ ਪਹਿਲਾਂ ਹੀ ਚੋਣ ਮੁਹਿੰਮ ਸ਼ੁਰੂ ਕਰਨ ਬਾਰੇ ਇੱਕ ਸੁਆਲ ਦੇ ਜਵਾਬ ਵਿਚ ਕਿਹਾ ਕਿ ਉਂਝ ਤਾਂ ਉਨ੍ਹਾਂ ਦੀ ਮੁਹਿੰਮ ਪਿਛਲੇ ਦਸ ਸਾਲਾਂ ਤੋਂ ਹੀ ਚੱਲ ਰਹੀ ਹੈ, ਪਰ ਕਾਂਗਸ ਹਾਈਕਮਾਂਡ ਤੋਂ ਹਰੀ ਝੰਡੀ ਮਿਲਣ ਉਪਰੰਤ ਹੀ ਉਹ ਵੋਟਰਾਂ ਨਾਲ ਸੰਪਰਕ ਸਥਾਪਤ ਕਰ ਰਹੇ ਹਨ।ਬੀਤੇ ਜ਼ਿਲ੍ਹਾ ਪ੍ਰੀਸ਼ਦ/ਬਲਾਕ ਸੰਮਤੀ ਚੋਣਾਂ ਵਾਂਗ ਇਨ੍ਹਾਂ ਚੋਣਾਂ ਦੌਰਾਨ ਸੱਤਾ ਪੱਖ ਵੱਲੋਂ ਲੰਬੀ ਹਲਕੇ ਵਿਚ ਹੋਣ ਵਾਲੀ ਸੰਭਾਵਿਤ ਗੁੰਡਾਗਰਦੀ ਬਾਰੇ ਪੁੱਛਣ 'ਤੇ ਸ੍ਰੀ ਬਾਦਲ ਨੇ ਕਿਹਾ ਕਿ ਚੋਣ ਕਮਿਸ਼ਨ ਦੀ ਮੁਸਤੈਦੀ ਦਾ ਹਵਾਲਾ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਚੋਣ ਕਮਿਸ਼ਨ ਦੀ ਸਖ਼ਤੀ ਸਦਕਾ ਅਜਿਹਾ ਹੋਣਾ ਤਾਂ ਨਹੀਂ ਚਾਹੀਦਾ, ਜੇਕਰ ਹਾਲਾਤਾਂ ਨੇ ਮੰਗ ਕੀਤੀ ਤਾਂ ਉਨ੍ਹਾਂ ਦੇ ਵਰਕਰ ਪੂਰੀ ਤਰ੍ਹਾਂ ਤਿਆਰ ਹਨ।
        
        ਅਕਾਲੀ ਦਲ ਦੇ ਉਮੀਦਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਨਸ਼ਰ ਰਿਪੋਰਟਾਂ ਬਾਰੇ ਪੁੱਛੇ ਸੁਆਲ 'ਤੇ ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਉਣ 'ਤੇ  ਚੋਣ ਕਮਿਸ਼ਨ ਨੂੰ ਤੁਰੰਤ ਸ਼ਿਕਾਇਤ ਕੀਤੀ ਜਾਵੇਗੀ।

           ਇਸੇ ਦੌਰਾਨ ਪਿੰਡ ਬਾਦਲ ਵਿਖੇ ਸ: ਦੀਪਇੰਦਰ ਸਿੰਘ ਬਾਦਲ ਦੇ ਗ੍ਰਹਿ ਵਿਖੇ ਵਰਕਰਾਂ ਦੇ ਠਾਠਾਂ ਮਾਰਦੇ ਵਿਸ਼ਾਲ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਵਰਕਰਾਂ ਨੂੰ ਲੰਬੀ ਹਲਕੇ ਵਿਚ ਚੋਣ ਪ੍ਰਚਾਰ ਤਨਦੇਹੀ ਨਾਲ ਚੋਣ ਪ੍ਰਚਾਰ ਵਿਚ ਜੁਟ ਜਾਣ ਦਾ ਸੱਦਾ ਦਿੱਤਾ। ਇਸ ਮੌਕੇ ਪਿੰਡ ਖੁੱਡੀਆਂ ਮਹਾਂ ਸਿੰਘ ਦੇ ਇੱਕ ਮੈਂਬਰ ਪੰਚਾਇਤ ਸਮੇਤ ਪੰਜ ਅਕਾਲੀ ਵਰਕਰਾਂ ਨੇ ਕਾਂਗਰਸ ਵਿਚ ਸ਼ਾਮਲ ਹੋਣ ਦਾ ਐਲਾਨ ਕੀਤਾ।

ਚੋਣ ਕਮਿਸ਼ਨ ਦੀ ਰੋਕ ਦੇ ਬਾਵਜੂਦ ਸਾਇਕਲਾਂ ਦਾ ਭਰਿਆ ਕੈਂਟਰ ਪੁੱਜਿਆ ਲੰਬੀ ਦੇ ਸਰਕਾਰੀ ਸਕੂਲ

ਕੈਂਟਰ ਚਾਲਕ ਦੇ ਕਥਨ :  ਅਬੁੱਲਖੁਰਾਣਾ, ਦੋਦਾ ਅਤੇ ਮੁਕਤਸਰ ਦੇ ਸਕੂਲ ਵਿਚ ਵੀ ਸਾਇਕਲ ਵੀ ਪੁੱਜੇ

                                                               -ਇਕਬਾਲ ਸਿੰਘ ਸ਼ਾਂਤ-
ਲੰਬੀ, 30 ਦਸੰਬਰ-ਚੋਣ ਕਮਿਸ਼ਨ ਵੱਲੋਂ ਪੰਜਾਬ ਵਿਧਾਨਸਭਾ ਚੋਣਾਂ ਦੀ ਚੋਣ ਪ੍ਰਕਿਰਿਆ ਦੌਰਾਨ ਸਾਇਕਲਾਂ ਦੀ ਵੰਡ 'ਤੇ ਪਾਬੰਦੀ ਲਾਉਣ ਦੇ ਬਾਵਜੂਦ ਵਿਦਿਆਰਥਣਾਂ ਨੂੰ ਵੰਡਣ ਲਈ ਸਰਕਾਰੀ ਸਕੂਲਾਂ ਵਿਚ ਸਾਇਕਲਾਂ ਦਾ ਪੁੱਜਣਾ ਲਗਾਤਾਰ ਜਾਰੀ ਹੈ।

ਅਜਿਹਾ ਇੱਕ ਮਾਮਲਾ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਰਵਾਇਤੀ ਹਲਕੇ ਦੇ ਪਿੰਡ ਲੰਬੀ ਵਿਖੇ ਸਾਹਮਣੇ ਆਇਆ ਹੈ। ਜਿੱਥੋਂ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਖੇ ਅੱਜ ਸਵੇਰੇ ਲਗਭਗ 11 ਵਜੇ ਐਟਲਸ ਕੰਪਨੀ ਦੇ ਸਾਇਕਲਾਂ ਨਾਲ ਭਰਿਆ ਇੱਕ ਕੈਂਟਰ ਨੰਬਰ ਆਰ.ਜੇ.13 ਜੀ. ਏ./2840 ਪੁੱਜਿਆ। ਜਿਸ ਵਿਚ ਸੰਤਰੀ ਰੰਗ ਦੇ 71 ਲੇਡੀਜ਼ ਸਾਇਕਲ ਲੱਦੇ ਹੋਏ ਸਨ, ਜਿਨ੍ਹਾਂ ਦਾ ਰੰਗ ਸੱਤਾ ਪੱਖ ਦੇ ਝੰਡੇ ਦੇ ਰੰਗ ਨਾਲ ਮੇਲਾ ਖਾਂਦਾ ਸੀ।
ਹਾਲਾਂਕਿ ਚੋਣ ਜ਼ਾਬਤੇ ਤੋਂ ਪਹਿਲਾਂ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਸੂਬੇ ਦੀਆਂ ਵਿਦਿਆਰਥਣਾਂ ਨੂੰ ਵੰਡੇ ਜਾ ਰਹੇ ਸਾਇਕਲਾਂ ਵਾਂਗ ਇਨ੍ਹਾਂ ਸਾਇਕਲਾਂ 'ਤੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਫੋਟੋ ਨਹੀਂ ਲੱਗੀ ਹੋਈ ਸੀ।
ਬੱਤਰਾ ਟੈਂਪੂ ਟਰਾਂਸਪੋਰਟ ਯੂਨੀਅਨ ਲੁਧਿਆਣਾ ਦੀ ਬਿਲਟੀ ਅਤੇ ਐਟਲਸ ਸਾਇਕਲ (ਹਰਿਆਣਾ) ਲਿਮ: ਲੁਧਿਆਣਾ ਵੱਲੋਂ ਬਿੱਲ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ (ਈ.ਈ.) ਸਰਬ ਸਿੱਖਿਆ ਅਭਿਆਨ ਮੁਕਤਸਰ (ਪੰਜਾਬ) ਦੇ ਨਾਂ ਦਰਸਾਇਆ ਗਿਆ ਹੈ। ਜਿਸਦਾ ਸੇਲ ਬਿੱਲ ਨੰਬਰ  ਡੀ1/11/12/000857, ਡੀ ਕੋਡ 159836 , ਬਿੱਲ ਮਿਤੀ 29-12-2012 ਦਰਸਾਇਆ ਗਿਆ ਹੈ। ਬਿੱਲ ਵਿਚ ਪ੍ਰਤੀ ਸਾਇਕਲ ਦੀ ਕੀਮਤ 2486.25 ਰੁਪਏ ਦੱਸੀ ਗਈ ਹੈ। ਜਿਸਦੇ ਹਿਸਾਬ ਨਾਲ ਕੁੱਲ 71 ਸਾਇਕਲਾਂ ਦੀ ਕੁੱਲ ਕੀਮਤ 1,76, 523.75 ਰੁਪਏ ਹੈ। ਇਨ੍ਹਾਂ ਕਾਗਜ਼ਾਂ ਦੇ ਨਾਲ ਸਾਇਕਲ ਪ੍ਰਾਪਤੀ ਬਾਰੇ ਰਸੀਦ ਵੀ ਭੇਜੀ ਗਈ ਹੈ। ਇਨ੍ਹਾਂ ਸਾਇਕਲਾਂ ਨੂੰ ਸਕੂਲ ਵਿਚ ਇਕ ਪਾਸੇ 'ਤੇ ਸੈਮੀਨਾਰ ਹਾਲ ਵਜੋਂ ਵਰਤੇ ਜਾਂਦੇ ਕਮਰੇ ਵਿਚ ਰਖਵਾਇਆ ਜਾ ਰਿਹਾ ਸੀ।
ਲੁਧਿਆਣਾ ਤੋਂ ਸਾਇਕਲਾਂ ਨਾਲ ਭਰਿਆ ਕੈਂਟਰ ਲੈ ਕੇ ਪੁੱਜੇ ਡਰਾਈਵਰ ਸੰਦੀਪ, ਹੰਸ ਰਾਜ, ਗੁਰਪ੍ਰੀਤ ਅਤੇ ਹਰਪ੍ਰੀਤ ਨੇ ਦੱਸਿਆ ਕਿ ਉਨ੍ਹਾਂ ਦੇ ਨਾਲ ਲੁਧਿਆਣਾ ਤੋਂ ਹੋਰ ਕਈ ਕੈਂਟਰ ਵੀ ਲੰਬੀ ਹਲਕੇ ਦੇ ਪਿੰਡ ਅਬੁੱਲਖੁਰਾਣਾ, ਦੋਦਾ ਅਤੇ ਮੁਕਤਸਰ ਲਈ ਰਵਾਨਾ ਹੋਏ ਸਨ। ਉਸਨੇ ਦੱਸਿਆ ਉਨ੍ਹਾਂ ਨੂੰ ਚੋਣ ਜ਼ਾਬਤੇ ਵਗੈਰਾ ਬਾਰੇ ਨਹੀਂ ਪਤਾ, ਉਹ ਤਾਂ ਸਿਰਫ਼ ਆਪਣੀ ਡਿਊਟੀ ਅਨੁਸਾਰ ਸਕੂਲ ਵਿਚ ਸਾਇਕਲ ਵਿਚ ਛੱਡਣ ਲਈ ਆਏ ਹਨ।
ਇਸੇ ਦੌਰਾਨ ਮੌਕੇ 'ਤੇ ਪੁੱਜੇ ਇੱਕ ਪਿੰਡ ਦੇ ਵਿਅਕਤੀ ਨੇ ਪੱਤਰਕਾਰਾਂ ਨੂੰ ਫੋਟੋਆਂ ਖਿੱਚਦੇ ਪੁੱਛਿਆ ਕਿ ਇਨ੍ਹਾਂ ਸਾਇਕਲਾਂ 'ਤੇ ਕਿਹੜਾ ਬਾਦਲ ਸਾਬ੍ਹ ਦੀ ਫੋਟੋ ਲੱਗੀ ਹੈ ਜਿਹੜਾ ਤੁਸੀਂ ਫੋਟੋ ਖਿੱਚ ਰਹੋ।
              ਚੋਣ ਜ਼ਾਬਤਾ ਲੱਗਣ ਦੇ ਬਾਵਜੂਦ ਮੁੱਖ ਮੰਤਰੀ ਦੇ ਹਲਕੇ ਵਿਚ ਇੰਝ ਖੁੱਲ੍ਹੇਆਮ ਸਾਇਕਲਾਂ ਦਾ ਭਰਿਆ ਕੈਂਟਰ ਪੁੱਜਣ ਅਤੇ ਬੀਤੇ ਕੱਲ੍ਹ ਪਿੰਡ ਚਨੂੰ ਵਿਖੇ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਸ਼ਿਕਾਇਤ ਦੀ ਪੜਤਾਲ ਕਰਨ ਪੁੱਜੇ ਸਰਕਾਰੀ ਅਮਲੇ ਨਾਲ ਖਿੱਚ-ਧੂਹ ਕਰਨ ਦੀ ਘਟਨਾ ਨੇ ਇਸ ਵਕਾਰੀ ਵਿਧਾਨਸਭਾ ਹਲਕੇ ਵਿਚ 30 ਜਨਵਰੀ ਤੱਕ ਦੀ ਚੋਣ ਪ੍ਰਕਿਰਿਆ ਦੌਰਾਨ ਚੋਣ ਜ਼ਾਬਤੇ ਦੀ ਉਲੰਘਣਾ ਅਤੇ ਧੱਕੇਸ਼ਾਹੀਆਂ ਦੇ ਵਾਪਰਨ ਵਾਲੇ ਹਾਲਾਤਾਂ ਬਾਰੇ ਅਗਾਊਂ ਤੌਰ 'ਤੇ ਸੰਕੇਤ ਹਨ।
ਇੱਥੇ ਜ਼ਿਕਰਯੋਗ ਹੈ ਕਿ ਜਿਸ ਦੌਰਾਨ ਲੰਬੀ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਚ ਸਾਇਕਲ ਉਤਾਰੇ ਜਾ ਰਹੇ ਸਨ, ਉਸ ਦੌਰਾਨ ਲਗਭਗ 5 ਕਿਲੋਸਮੀਟਰ ਦੀ ਦੂਰੀ 'ਤੇ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਵੀ ਆਪਣੀ ਚੋਣ ਮੁਹਿੰਮ ਦੇ ਆਗਾਜ਼ ਕਰਕੇ ਅੱਜ ਪਿੰਡ ਬਾਦਲ ਵਿਖੇ ਮੌਜੂਦ ਸਨ ਅਤੇ ਪਿੰਡ ਬਾਦਲ ਵਿਖੇ ਆਪਣੀ ਰਿਹਾਇਸ਼ 'ਤੇ ਪਾਰਟੀ ਵਰਕਰਾਂ ਦੀ ਮੀਟਿੰਗ ਨੂੰ ਸੰਬੋਧਨ ਕਰ ਰਹੇ ਸਨ।
              ਚੋਣ ਪ੍ਰਕਿਰਿਆ ਦੌਰਾਨ ਚੋਣ ਅਮਲੇ ਵਜੋਂ ਵਿਚਰ ਰਹੇ ਸਮੁੱਚੇ ਤੰਤਰ ਦੇ ਸੱਤਾ ਧਿਰ ਦੇ ਦਬਾਅ ਜਾਂ ਪ੍ਰਭਾਵ ਹੇਠ ਹੋਣ ਦਾ ਇਸ ਗੱਲ ਤੋਂ ਸਹਿਜੇ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਪਿਛਲੇ ਕੁਝ ਦਿਨਾਂ ਤੋਂ ਚੋਣ ਕਮਿਸ਼ਨ ਦੀ ਹਦਾਇਤਾਂ 'ਤੇ ਲੰਬੀ ਹਲਕੇ ਦੇ ਕਿੱਲਿਆਂਵਾਲੀ ਕਸਬੇ ਦੇ ਬਾਹਰਲੇ ਪਾਸੇ ਅਬੋਹਰ ਤਿੰਨ ਕੋਣੀ 'ਤੇ ਨਾਕਾ ਲਾ ਕੇ ਪੰਜਾਬ ਵਿਚ ਦਾਖਲ ਹੋਣ ਵਾਲੇ ਸਾਰੇ ਵਹੀਕਲਾਂ ਦੀ ਵੀਡੀਓਗਰਾਫ਼ੀ ਰਾਹੀਂ ਜਾਂਚ-ਪੜਤਾਲ ਕੀਤੀ ਜਾਂਦੀ ਸੀ, ਜੋ ਕਿ ਕੱਲ੍ਹ ਸ਼ਾਮ ਤੱਕ ਜਾਰੀ ਸੀ। ਪਰੰਤੂ ਅੱਜ ਮੁੱਖ ਮੰਤਰੀ ਦੇ ਫੇਰੀ ਮੌਕੇ ਉਕਤ ਤਿੰਨ ਕੋਣੀ 'ਤੇ ਪੁਲਿਸ ਪਾਰਟੀ ਮੌਜੂਦ ਨਹੀਂ ਸੀ। ਇਹ ਵੀ ਸੋਚਣ ਦਾ ਵਿਸ਼ਾ ਹੈ ਕਿ ਨਿਰਪੱਖ ਅਤੇ ਸਪੱਸ਼ਟ ਚੋਣ ਪ੍ਰਕਿਰਿਆ ਨੂੰ ਲਾਗੂ ਕਰਨ ਸਬੰਧੀ ਚੋਣ ਕਮਿਸ਼ਨ ਦੀਆਂ ਕੋਸ਼ਿਸ਼ਾਂ ਨੂੰ ਢਾਹ ਲਾਉਣ ਵਿਚ ਉਸੇ ਦੇ ਸਿਪਹਸਲਾਰ ਵੱਡੀ ਭੂਮਿਕਾ ਨਿਭਾਉਂਦੇ ਨਜ਼ਰ ਆ ਰਹੇ ਹਨ। ਜਦੋਂਕਿ ਚੋਣਾਂ ਦੇ ਅਮਲ ਦੇ ਸਾਰੇ ਮੁੱਖ ਦੌਰ ਅਜੇ ਤੱਕ ਸ਼ੁਰੂ ਹੋਣੇ ਬਾਕੀ ਹਨ।
ਇਸ ਸਬੰਧ ਵਿਚ ਜਦੋਂ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ (ਈ. ਈ.) ਸਰਬ ਸਿੱਖਿਆ ਅਭਿਆਨ ਮੁਕਤਸਰ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਦਾ ਮੋਬਾਇਲ ਬੰਦ ਆ ਰਿਹਾ ਸੀ। ਸਕੂਲ ਦੇ ਪਿੰ੍ਰਸੀਪਲ ਗੁਰਿੰਦਰ ਕੌਰ ਨੇ ਸੰਪਰਕ ਕਰਨ 'ਤੇ ਦੱਸਿਆ ਕਿ ਉਹ ਸਕੂਲ ਵਿਚ ਛੁੱਟੀਆਂ ਹੋਣ ਕਰਕੇ ਲੁਧਿਆਣੇ ਦੇ ਅਪੋਲੋ ਹਸਪਤਾਲ ਵਿਚ ਦਾਖਲ ਆਪਣੀ ਬੀਮਾਰ ਸੱਸ ਦੀ ਦੇਖਭਾਲ ਵਿਚ ਜੁਟੇ ਹੋਏ ਸਨ ਅਤੇ ਸਕੂਲ ਵਿਚ ਸਾਇਕਲਾਂ ਦੇ ਆਉਣ ਬਾਰੇ ਕੁਝ ਨਹੀਂ ਪਤਾ।
             ਇਸੇ ਦੌਰਾਨ ਸੰਪਰਕ ਕਰਨ 'ਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸ੍ਰੀ ਅਰਸ਼ਦੀਪ ਸਿੰਘ ਥਿੰਦ ਨੇ ਕਿਹਾ ਕਿ ਕਿਸੇ ਵੀ ਸੂਰਤ ਵਿਚ ਚੋਣ ਜ਼ਾਬਤੇ ਦੀ ਉਲੰਘਣਾ ਨਹੀਂ ਹੋਣ ਦਿੱਤੀ ਜਾਵੇਗੀ।

ਕੈਂਸਰ ਰਾਹਤ ਫੰਡ ਸਿਰਫ਼ ਸਰਕਾਰੀ ਤਕਰੀਰਾਂ 'ਚ ਸਿਆਸੀ ਫਿਜ਼ਾ ਦਾ ਸ਼ਿੰਗਾਰ

                  -ਬਹੁਗਿਣਤੀ ਕੈਂਸਰ ਪੀੜਤ ਮਰੀਜ ਮਾਲੀ ਮੱਦਦ ਤੋਂ ਵਾਂਝੇ-
                                                       ਇਕਬਾਲ ਸਿੰਘ ਸ਼ਾਂਤ
           ਲੰਬੀ-ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਦੇ ਮਰੀਜਾਂ ਲਈ 20 ਕਰੋੜ ਰੁਪਏ ਨਾਲ ਕਾਇਮ ਕੀਤਾ ਗਿਆ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਸਿਰਫ਼ ਸਰਕਾਰੀ ਸਟੇਜਾਂ ਤੋਂ ਤਕਰੀਰਾਂ ਰਾਹੀਂ ਸੂਬੇ ਦੀ ਸਿਆਸੀ ਫਿਜ਼ਾ ਦਾ ਸ਼ਿੰਗਾਰ ਬਣ ਰਿਹਾ ਹੈ, ਪਰ ਸੂਬੇ ਦੇ ਬਹੁਗਿਣਤੀ ਕੈਂਸਰ ਪੀੜਤ ਮਰੀਜ ਅੱਜ ਵੀ ਮਾਲੀ ਮੱਦਦ ਤੋਂ ਵਾਂਝੇ ਹਨ।
           ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਬੜੀ ਸੁਹਿਰਦਤਾ ਨਾਲ ਆਰੰਭੀ ਗਈ ਇਹ ਸਕੀਮ ਦਾ ਕੌੜਾ ਸੱਚ ਹੈ ਕਿ ਕੈਂਸਰ ਦੀ ਬੀਮਾਰੀ ਕਰਕੇ ਤਿੱਲ-ਤਿੱਲ ਮੌਤ ਵੱਲ ਵਧ ਰਹੇ ਮਰੀਜ ਪੰਜਾਬ ਸਰਕਾਰ ਅਤੇ ਕੈਂਸਰ ਦੇ ਹਸਪਤਾਲਾਂ ਦੀ ਲਾਲਫੀਤਾਸ਼ਾਹੀ ਦਾ ਸ਼ਿਕਾਰ ਹੋ ਰਹੇ ਹਨ। ਕਿਉਂਕਿ ਜਿੱਥੇ ਕੈਂਸਰ ਦੇ ਬੀਕਾਨੇਰ ਜਿਹੇ ਨਾਮੀ ਹਸਪਤਾਲਾਂ ਦੇ ਡਾਕਟਰ ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਮਰੀਜਾਂ ਲਈ ਜਾਰੀ ਫਾਰਮ ਨੂੰ ਮਨਜੂਰ ਨਹੀਂ ਕਰਦੇ, ਦੂਜੇ ਪਾਸੇ ਪੰਜਾਬ ਸਰਕਾਰ ਦਾ ਸੁਸਤ ਅਤੇ ਨਲਾਇਕ ਢਾਂਚਾ ਉਨ੍ਹਾਂ ਡਾਕਟਰਾਂ ਵੱਲੋਂ ਆਪਣੇ ਫਾਰਮਾਂ 'ਤੇ ਬਣਾਏ ਇਲਾਜ ਅੰਦਾਜ਼ਾ ਰਾਸ਼ੀ (ਐਸਟੀਮੇਟ) ਨੂੰ ਮੰਨਣ  ਨੂੰ ਤਿਆਰ ਨਹੀਂ।
              ਜਿਸਦਾ ਪ੍ਰਤੱਖ ਨਜ਼ਾਰਾ ਅੱਜ ਮੁੱਖ ਮੰਤਰੀ ਦੇ ਜੱਦੀ ਪਿੰਡ ਬਾਦਲ ਵਿਖੇ ਕੈਂਸਰ ਦੀ ਬੀਮਾਰੀ ਨੂੰ ਮੁੱਢਲੇ ਪੜਾਅ 'ਤੇ ਪਹਿਚਾਣਨ ਦੇ ਉਦੇਸ਼ ਨਾਲ 28 ਅਕਤੂਬਰ ਨੂੰ ਲਾਏ ਕੈਂਪ ਵਿਚ ਵੇਖਣ ਨੂੰ ਮਿਲਿਆ। ਜਿੱਥੇ ਸੂਬੇ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਕੈਂਸਰ ਦੇ ਮਰੀਜ ਇਲਾਜ ਨਾਲੋਂ ਜ਼ਿਆਦਾ ਸਰਕਾਰੀ ਮਾਲੀ ਮੱਦਦ ਦੇ ਫਾਰਮ ਜਮ੍ਹਾ ਕਰਵਾਉਣ ਲਈ ਇਸ ਉਮੀਦ ਨਾਲ ਪੁੱਜੇ ਹੋਏ ਸਨ ਕਿ ਸ਼ਾਇਦ ਪਿੰਡ ਬਾਦਲ ਦੀ ਜੂਹ ਵਿਚ ਉਨ੍ਹਾਂ ਦੀ ਸੁਣਵਾਈ ਹੋ ਜਾਵੇ।
            ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਖੇ ਕੱਲ੍ਹ ਐਤਵਾਰ ਨੂੰ ਕੈਂਸਰ ਕੈਂਪ ਲੱਗਣ ਬਾਰੇ ਵੱਡੇ-ਵੱਡੇ ਅਖ਼ਬਾਰੀ ਇਸ਼ਤਿਹਾਰ ਪੜ੍ਹ ਕੇ ਪਹੁੰਚੇ ਕੈਂਸਰ ਦੇ ਮਾਰੇ ਲੋਕਾਂ ਦੀ ਅੱਖਾਂ ਵਿਚ ਜਿੱਥੇ ਸਰਕਾਰ ਪ੍ਰਤੀ ਰੋਸਾ ਸਪੱਸ਼ਟ ਝਲਕ ਰਿਹਾ ਸੀ, ਉਥੇ ਖੁੱਲ੍ਹੇ ਸ਼ਬਦਾਂ ਵਿਚ ਇਸ ਕੈਂਸਰ ਚੈੱਕਅਪ ਕੈਂਪ ਅਤੇ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਨੂੰ ਮਹਿਜ਼ ਸਿਆਸੀ ਛਲਾਵਾ ਕਰਾਰ ਦਿੱਤਾ।
ਗਿੱਦੜਬਾਹਾ ਸਰਵਾਇਕਲ ਕੈਂਸਰ ਨਾਲ ਪੀੜਤ ਪਤਨੀ ਕਾਂਤਾ ਰਾਣੀ ਨੂੰ ਵਿਖਾਉਣ ਲਈ ਕੈਂਪ ਵਿਚ ਪਵਨ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪਤਨੀ ਨੂੰ ਕੈਂਸਰ ਹੋਣ 13 ਅਪਰੈਲ ਨੂੰ ਖੁਲਾਸਾ ਹੋਇਆ ਸੀ। ਮੌਜੂਦਾ ਸਮੇਂ 'ਚ ਪੀ.ਜੀ.ਆਈ. ਚੰਡੀਗੜ੍ਹ ਤੋਂ ਉਸ ਦੀ ਪਤਨੀ ਦਾ ਇਲਾਜ ਚੱਲ ਰਿਹਾ ਹੈ, ਜੋ ਕਿ ਬਹੁਤ ਮਹਿੰਗਾ ਹੈ। ਉਨ੍ਹਾਂ ਕਿਹਾ ਕਿ ਲਗਪਗ ਚਾਰ ਮਹੀਨੇ ਉਨ੍ਹਾਂ ਨੇ ਮੁੱਖ ਮੰਤਰੀ ਸ੍ਰੀ ਬਾਦਲ ਦੇ ਗਿੱਦੜਬਾਹਾ ਵਿਖੇ ਸੰਗਤ ਦਰਸ਼ਨ ਦੌਰਾਨ ਮੁੱਖ ਮੰਤਰੀ ਬਾਦਲ ਦੇ ਸਨਮੁੱਖ ਪੇਸ਼ ਹੋਣ ਉਪਰੰਤ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਪੀ.ਜੀ.ਆਈ. ਤੋਂ ਐਸਟੀਮੇਟ ਬਣਵਾ ਕੇ ਲਿਆਉਣ ਲਈ ਕਿਹਾ ਪਰ ਉਥੋਂ ਦੇ ਡਾਕਟਰ ਐਸਟੀਮੇਟ ਬਣਾਉਣ ਤੋਂ ਇਨਕਾਰੀ ਹਨ। ਉਨ੍ਹਾਂ ਦੱਸਿਆ ਕਿ ਉਹ ਹੁਣ ਤੱਕ ਇਲਾਜ 'ਤੇ 4-5 ਲੱਖ ਰੁਪਏ ਖਰਚ ਕਰ ਚੁੱਕਾ ਹੈ ਪਰ ਬਹੁਕਰੋੜੀ ਕੈਂਸਰ ਫੰਡ ਵਿਚੋਂ ਮੱਦਦ ਦੇ ਨਾਂਅ 'ਤੇ ਦਫ਼ਤਰਾਂ ਦੇ ਧੱਕਿਆਂ ਅਤੇ ਸਮੇਂ ਦੀ ਬਰਬਾਦੀ ਤੋਂ ਇਲਾਵਾ ਕੁਝ ਪੱਲੇ ਨਹੀਂ ਪਿਆ।
           ਕੁਝ ਅਜਿਹਾ ਹੀ ਹਾਲ ਗਿੱਦੜਬਾਹਾ ਵਿਖੇ ਸੁਨਿਆਰੇ ਦੇ ਕੰਮ ਨਾਲ ਜੁੜੇ ਬਲਵਿੰਦਰ ਸਿੰਘ ਦੀ ਪਤਨੀ ਹਰਪ੍ਰੀਤ ਕੌਰ ਵੀ ਬੱਚੇਦਾਨੀ ਦੇ ਕੈਂਸਰ ਨਾਲ ਪੀੜਤ ਹਨ। ਉਸਨੇ ਦੱਸਿਆ ਕਿ ਪੀ.ਜੀ.ਆਈ. ਚੰਡੀਗੜ੍ਹ ਦੇ ਡਾਕਟਰਾਂ ਵੱਲੋਂ ਐਸਟੀਮੇਟ ਨਾ ਲਿਖ ਕੇ ਦੇਣ ਕਰਕੇ ਉਸਨੇ ਸਰਕਾਰੀ ਮੱਦਦ ਤੋਂ ਪਹਿਲਿਆਂ ਹੀ ਤੌਬਾ ਕਰ ਲਈ ਅਤੇ ਹੁਣ ਆਪਣੇ ਪੱਲਿਓਂ ਜਾਂ ਰਿਸ਼ਤੇਦਾਰਾਂ ਦੀ ਮੱਦਦ ਨਾਲ 20-20 ਹਜ਼ਾਰ ਰੁਪਏ ਦੇ ਕੀਮੋ ਦੇ ਟੀਕੇ ਲਗਵਾ ਕੇ ਪਤਨੀ ਦਾ ਇਲਾਜ ਕਰ ਵਾ ਰਿਹਾ। ਇਸੇ ਤਰ੍ਹਾਂ ਮਾਨਸਾ ਜ਼ਿਲ੍ਹੇ ਦੇ ਪਿੰਡ ਧਰਮਪੁਰਾ ਦਾ ਖੇਤ ਮਜ਼ਦੂਰ ਬੁੱਧ ਰਾਮ, ਜੋ ਕਿ ਗਲੇ ਦੇ ਕੈਂਸਰ ਤੋਂ ਪੀੜਤ ਹਨ। ਉਸਦੀ ਪਤਨੀ ਨੇ ਜਗਮੇਘ ਕੌਰ ਨੇ ਦੱਸਿਆ ਕਿ ਉਸਦੇ ਘਰਵਾਲੇ ਦਾ ਬੀਕਾਨੇਰ ਤੋਂ ਇਲਾਜ ਚੱਲ ਰਿਹਾ ਹੈ। ਪਰ ਡਾਕਟਰ ਵੱਲੋਂ 70 ਹਜ਼ਾਰ ਰੁਪਏ ਦੇ ਐਸਟੀਮੇਟ ਦੇਣ ਦੇ ਬਾਵਜੂਦ ਥਾਂ-ਥਾਂ ਧੱਕੇ ਖਾਣ ਉਪਰੰਤ ਵੀ ਉਨ੍ਹਾਂ ਨੂੰ ਕੈਂਸਰ ਮਰੀਜਾਂ ਵਾਲੀ ਮੱਦਦ ਨਹੀਂ ਮਿਲ ਸਕੀ। ਉਸਨੇ ਦੱਸਿਆ ਗੁਜਾਰਾ ਤਾਂ ਪਹਿਲਾਂ ਹੀ ਔਖਾ ਸੀ ਤੇ ਹੁਣ ਬੀਮਾਰੀ ਨੇ ਜਿਉਂਦੀ ਜੀਅ ਮਾਰ ਘੱਤਿਆ ਹੈ।
              ਇਸੇ ਤਰ੍ਹਾਂ ਕੈਂਪ ਵਿਚ ਪਹੁੰਚੇ ਲੰਬੀ ਹਲਕੇ ਦੇ ਪਿੰਡ ਮਾਨ ਦੇ ਕਿਸਾਨ ਹਰਕੇਸ਼ ਸਿੰਘ ਨੇ ਦੱਸਿਆ ਕਿ ਉਸਦੀ ਪਤਨੀ ਨੂੰ ਪੰਜ ਸਾਲ ਪਹਿਲਾਂ ਛਾਤੀ ਦਾ ਕੈਂਸਰ ਹੋਇਆ ਸੀ ਤੇ ਛਾਤੀ ਕਟਵਾ ਦਿੱਤੀ ਪਰ ਹੁਣ ਕੈਂਸਰ ਨੇ ਮੁੜ ਪੈਰ ਪਸਾਰ ਕੇ ਉਸਦੀ ਪਤਨੀ ਦੇ ਫੇਫੜਿਆਂ ਅਤੇ ਲੀਡਰ 'ਤੇ ਹਮਲਾ ਬੋਲ ਦਿੱਤਾ ਹੈ। ਜ਼ਿੰਦਗੀ ਦੀਆਂ ਡੂੰਘੀਆਂ ਉਦਾਸੀਆਂ ਵਿਚੋਂ ਲੰਘ ਰਹੇ ਹਰਕੇਸ਼ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਫਾਈਲ ਭਰਨ ਦੇ ਬਾਵਜੂਦ ਕੋਈ ਕੈਂਸਰ ਰਾਹਤ ਮੱਦਦ ਹਾਸਲ ਹੋ ਸਕੀ।
             ਇੱਕ ਮਰੀਜ ਨਾਲ ਪੁੱਜੇ ਮਹਿੰਦਰ ਸਿੰਘ ਨਾਂ ਦੇ ਵਿਅਕਤੀ ਨੇ ਦੱਸਿਆ ਕਿ ਕੈਂਸਰ ਰਾਹਤ ਫੰਡ ਤਾਂ ਵਿਧਾਨਸਭਾ ਚੋਣਾਂ ਵਿਚ ਸਰਕਾਰ ਵੱਲੋਂ ਆਪਣੀ ਕੁਰਸੀ ਨੂੰ ਦੁਹਰਾਉਣ ਲਈ ਪ੍ਰਚਾਰਿਆ ਜਾ ਰਿਹਾ ਜਦਕਿ ਅਸਲ ਵਿਚ ਇਹ ਵੀ ਫੋਕਾ ਸਿਆਸੀ ਨਾਅਰਾ ਬਣ ਕੇ ਰਹਿ ਗਿਆ ਹੈ। ਜਦੋਂ ਕਿ ਕੁਝ ਮਹੀਨੇ ਪਹਿਲਾਂ ਇਹ ਕੈਂਸਰ ਮਰੀਜਾਂ ਲਈ ਜ਼ਿੰਦਗੀ ਦੀ ਚਮਕ ਬਣ ਕੇ ਬਹੁੜਿਆ ਸੀ। ਇਸੇ ਤਰ੍ਹਾਂ ਬੱਚੇਦਾਨੀ ਦੇ ਕੈਂਸਰ ਨਾਲ ਪੀੜਤ ਬਰਨਾਲਾ ਜ਼ਿਲ੍ਹੇ ਦੇ ਪਿੰਡ ਕੱਟੂ ਦੀ ਜਸਪਾਲ ਕੌਰ ਦੇ ਧੀ ਪਰਮਜੀਤ ਕੌਰ ਨੇ ਦੱਸਿਆ ਕਿ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਦੀ ਮੱਦਦ ਵੀ ਉਨ੍ਹਾਂ ਦੀ ਮਾਂ ਲਈ ਬੇਮਾਇਨੇ ਸਾਬਤ ਹੋ ਰਹੀ ਹੈ। ਬੀਕਾਨੇਰ 'ਚ ਡਾਕਟਰ ਐਸਟੀਮੇਟ ਲਿਖ ਕੇ ਨਹੀਂ ਦਿੰਦੇ ਤੇ ਇਥੋਂ ਦੇ ਹਾਕਮਾਂ ਕੋਲ ਗਰੀਬਾਂ ਦੀ ਸੁਣਨ ਲਈ ਸ਼ਾਇਦ ਸਮਾਂ ਨਹੀਂ।
           ਪੱਤਰਕਾਰਾਂ ਵੱਲੋਂ ਮੁੱਖ ਮੰਤਰੀ ਕੋਲ ਮਾਮਲਾ ਉਠਾਇਆ ਗਿਆ ਅਤੇ ਉਨ੍ਹਾਂ ਰਵਾਇਤੀ ਸੁਭਾਅ ਵਿਚ ਅਧਿਕਾਰੀਆਂ ਨੂੰ ਤੁਰੰਤ ਕਾਰਵਾਈ ਦੇ ਨਿਰਦੇਸ਼ ਦਿੱਤੇ ਪਰ ਵਿਧਾਨਸਭਾ ਚੋਣਾਂ ਕਰਕੇ ਹੋਰ ਵਿਉਂਤਬੰਦੀਆਂ ਕੈਂਸਰ ਪੀੜਤਾਂ ਦਾ ਦੁੱਖ ਦਰਦ ਅਜੇ ਘਟਦਾ ਨਜ਼ਰ ਨਹੀਂ ਆ ਰਿਹਾ। ਮੁਕਸਤਰ ਦੇ ਸਿਵਲ ਸਰਜਨ ਡ: ਗੁਰਦੀਪ ਸਿੰਘ ਭੁੱਲਰ ਨੇ ਦੱਸਿਆ ਕਿ ਅੱਜ 75 ਕੈਂਸਰ ਮਰੀਜਾਂ ਦੇ ਫਾਰਮ ਭਰਵਾਏ ਗਏ ਹਨ। ਜਿਨ੍ਹਾਂ 'ਤੇ ਕਾਰਵਾਈ ਕਰਕੇ ਅਗਾਮੀ ਕਾਰਵਾਈ ਲਈ ਮੁੱਖ ਮੰਤਰੀ ਦਫ਼ਤਰ ਭੇਜਿਆ ਜਾਵੇਗਾ।

              
                 ਕੈਂਸਰ ਚੈੱਕਅਪ ਕੈਂਪ 'ਚ ਮਰੀਜ ਇੱਧਰ-ਉੱਟਕਦੇ ਰਹੇ
-ਡੇਢ ਵਜੇ ਪੰਡਾਲ ਖਾਲੀ ਕਰਕੇ ਚੱਲਦੇ ਬਣੇ ਬਹੁਤੇ ਡਾਕਟਰ
-ਮਰੀਜਾਂ ਨੂੰ ਅਲਟਰਾਸਾਉਂਡ ਲਈ ਮਲੋਟ-ਬਠਿੰਡਾ ਜਾਣਾ ਪਿਆ
ਲੰਬੀ-ਮੁੱਖ ਮੰਤਰੀ ਦੇ ਪਿੰਡ ਬਾਦਲ 'ਚ 28 ਅਕਤੂਬਰ ਨੂੰ  ਲੱਗੇ ਕੈਂਸਰ ਚੈੱਕਅਪ ਕੈਂਪ ਵਿਚ ਮਰੀਜ ਪ੍ਰਸ਼ਾਸਨਿਕ ਪ੍ਰਬੰਧਾਂ ਦੀ ਘਾਟ ਕਰਕੇ ਇੱਧਰ-ਉੱਧਰ ਭਟਕਦੇ ਰਹੇ। ਜਦੋਂ ਕਿ ਦੁਪਿਹਰ 3 ਵਜੇ ਤੱਕ ਚੱਲਣ ਵਾਲੇ ਕੈਂਪ 'ਚ ਕੈਂਸਰ ਮਰੀਜਾਂ ਵਾਲੇ ਪੰਡਾਲ ਵਿਚੋਂ ਵਧੇਰੇ ਡਾਕਟਰ  ਡੇਢ ਵਜੇ ਹੀ ਆਪਣਾ ਬੋਰੀਆ ਬਿਸਤਰਾ ਚੁੱਕ ਕੇ ਲੈ ਗਏ।
ਸਰਕਾਰ ਵੱਲੋਂ ਖੂਬ ਪ੍ਰਚਾਰੇ ਗਏ ਇਸ ਕੈਂਪ ਵਿਚ ਜਿੱਥੇ 939 ਮਰੀਜ ਪੁੱਜੇ ਪਰ ਕੈਂਸਰ ਦੇ ਮਰੀਜਾਂ ਦਾ ਦੋਸ਼ ਸੀ ਕਿ ਮੁੱਖ ਮੰਤਰੀ ਦੇ ਪਿੰਡ ਵੀ ਲਇਆ ਇਹ ਕੈਂਪ ਇੱਕ ਸਧਾਰਨ ਕੈਂਪ ਸਾਬਤ ਹੋਇਆ, ਜਿੱਥੇ ਸਰਕਾਰ ਵੱਲੋਂ ਅਲਟਰਾਸਾਊਂਡ ਦੀ ਸਹੂਲਤ ਵੀ ਮੁਹੱਈਆ ਨਹੀਂ ਕਰਵਾਈ ਗਈ ਤੇ ਕੈਂਸਰ ਦੇ ਕਾਫ਼ੀ ਮਰੀਜ ਡਾਕਟਰਾਂ ਦੇ ਕਹਿਣ ਅਨੁਸਾਰ ਅਲਟਰਾ ਸਾਊਂਡ ਲਈ ਮਲੋਟ ਜਾਂ ਬਠਿੰਡਾ ਜਾਂਦੇ ਵੇਖੇ ਗਏ।
ਸੁਖਜੀਤ ਕੌਰ ਵਾਸੀ ਮਲੋਟ ਨੇ ਦੱਸਿਆ ਕਿ ਬੱਚੇਦਾਨੀ ਵਿਚ ਕੈਂਸਰ ਹੈ। ਉਸਨੇ ਦੱਸਿਆ ਕਿ ਬੱਚੇਦਾਨੀ ਤਾਂ ਕਢਵਾ ਦਿੱਤੀ ਪਰ ਹੁਣ ਲੱਤਾਂ-ਬਾਹਾਂ ਵਿਚ ਬਹੁਤ ਦਰਦ ਹੁੰਦਾ ਹੈ ਅਤੇ ਢੂਈ ਦੁਖਦੀ ਹੈ। ਉਨ੍ਹਾਂ ਕੈਂਪ ਵਿਚ ਬੜੀ ਆਸ ਨਾਲ ਆਏ ਸਨ ਅਤੇ ਪਰ ਇੱਥੋਂ ਡਾਕਟਰਾਂ ਨੇ ਅਲਟਰਾ ਸਾਊਂਡ ਬਾਰੇ ਕਹਿ ਕੇ ਮੁਸ਼ਕਿਲਾਂ ਨੂੰ ਹੋਰ ਵਧਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਜਦੋਂ ਬਾਦਲ ਦੇ ਸਿਵਲ ਹਸਪਤਾਲ ਅਲਟਰਾਸਾਊਂਡ ਕਰਵਾਉਣ ਗਏ ਤਾਂ ਉਥੋਂ ਅਲਟਰਾਸਾਊਂਡ 'ਤੇ ਕੋਈ ਕਰਮਚਾਰੀ ਗਾਇਬ ਸੀ। ਇਸੇ ਤਰ੍ਹਾਂ ਬਾਅਦ ਦੁਪਿਹਰ ਲਗਭਗ ਡੇਢ ਵਜੇ ਮੁੜ ਤੋਂ ਕੈਂਪ ਪੁੱਜੇ ਪੱਤਰਕਾਰਾਂ ਨੇ ਵੇਖਿਆ ਤਾਂ ਕੈਂਸਰ ਮਰੀਜਾਂ ਵਾਲੇ ਪੰਡਾਲ ਨੰਬਰ 8 ਵਿਚੋਂ ਡਾਕਟਰ ਗਾਇਬ ਸਨ। ਜਦੋਂ ਕਿ ਮਰੀਜ ਖਾਲੀ ਪੰਡਾਲ ਵੇਖ-ਵੇਖ ਕੇ ਵਾਪਸ ਮੁੜ ਰਹੇ ਸਨ। ਪੱਰਤਾਕਾਰਾਂ ਨੂੰ ਫੋਟੋਆਂ ਖਿੱਚਦੇ ਵੇਖ ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਨੇ ਇੱਕ ਹੋਰ ਡਾਕਟਰ ਨੂੰ ਪੰਡਾਲ 'ਚ ਬਿਠਾਇਆ।
ਮੁਕਤਸਰ ਤੋਂ ਆਏ ਕੈਂਸਰ ਦੇ ਮਰੀਜ ਦੇ ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਉਹ ਇੱਥੇ ਚੰਗੇ ਇਲਾਜ ਲਈ ਆਏ ਸਨ ਪਰ ਡਾਕਟਰਾਂ ਨੇ ਪਰਚੀ 'ਤੇ ਲਿਖ ਕੇ ਮੁਕਤਸਰ ਆ ਕੇ ਵਿਖਾਉਣ ਦਾ ਫੁਰਮਾਨ ਸੁਣਾ ਦਿੱਤਾ।
ਇਸੇ ਤਰ੍ਹਾਂ ਪਿੰਡ ਕੱਖਾਂਵਾਲੀ ਦੀਆਂ ਤਿੰਨ ਔਰਤਾਂ ਜਗਦੀਪ ਕੌਰ, ਹਰਬੰਸ ਕੌਰ ਅਤੇ ਅਮਨਦੀਪ ਕੌਰ ਨੇ ਕੈਂਪ ਵਿਖ ਖੱਜਲ ਖੁਆਰੀ ਦੇ ਦੋਸ਼ ਲਾਏ। ਇਸ ਕੈਂਪ ਵਿਚ ਭਾਵੇਂ 939 ਮਰੀਜਾਂ ਦੀ ਜਾਂਚ ਦਾ ਅੰਕੜਾ ਵਿਖਾਇਆ ਗਿਆ ਹੈ  ਪਰ ਮਰੀਜਾਂ ਨਾਲੋਂ ਜ਼ਿਆਦਾ ਨਰਸਾਂ ਅਤੇ ਫਾਰਮਾਸਿਸਟਾਂ ਦੀ ਭੀੜ ਵੱਧ ਵਿਖਾਈ ਗਈ ਸੀ।
ਇਸ ਪੂਰੇ ਕੈਂਪ ਦੌਰਾਨ ਰੋਕੋ ਕੈਂਸਰ ਦੀ ਟੀਮ ਡਾ: ਧਰਮਿੰਦਰ ਸਿੰਘ ਢਿੱਲੋਂ ਦੀ ਅਗਵਾਈ ਹੇਠ ਬੜੀ ਤਨਦੇਹੀ ਨਾਲ ਮਰੀਜਾਂ ਦੀ ਜਾਂਚ ਵਿਚ ਲੱਗੀ ਰਹੀ। ਜਿਨ੍ਹਾਂ ਵੱਲੋਂ 31 ਮਰੀਜਾਂ ਦੀ ਮੈਮੋਗ੍ਰਾਫ਼ੀ ਕੀਤੀ ਗਈ। ਜਦੋਂਕਿ ਕੈਂਸਰ ਦੇ 12 ਮਰੀਜਾਂ ਦੀ ਸ਼ਨਾਖਤ ਕੀਤੀ ਗਈ ਜਿਨ੍ਹਾਂ ਵਿਚੋਂ 6 ਨੂੰ ਤੁਰੰਤ ਇਲਾਜ ਦੀ ਜ਼ਰੂਰਤ ਹੈ।
ਇਸ ਬਾਰੇ ਸੰਪਰਕ ਕਰਨ 'ਤੇ ਮੁਕਤਸਰ ਦੇ ਸਿਵਲ ਡਾ: ਗੁਰਦੀਪ ਸਿੰੰਘ ਭੁੱਲਰ ਅਨੁਸਾਰ ਕੈਂਪ ਦੇ ਸਮੇਂਂ ਤਿੰਨ ਵਜੇ ਤੱਕ ਡਾਕਟਰ ਡਿਉਟੀ 'ਤੇ ਤਾਇਨਾਤ ਰਹੇ । ਉਨ੍ਹਾਂ ਦੱਸਿਆ ਕਿ ਵੱਖ-ਵੱਖ ਬੀਮਾਰੀਆਂ ਦੇ 939 ਮਰੀਜਾਂ ਨੇ ਜਾਂਚ ਕਰਵਾਈ। ਉਨ੍ਹਾਂ ਦਾਅਵਾ ਕੀਤਾ ਕਿ ਕੈਂਪ ਬੇਹੱਦ ਸਫ਼ਲ ਰਿਹਾ ਅਤੇ 31 ਮਰੀਜਾਂ ਦੀ ਮੈਮੋਗ੍ਰਾਫ਼ੀ ਅਤੇ ਕੈਂਪ 57 ਮਰੀਜਾਂ ਦੀ ਪੈਪ ਸਮੀਅਰ ਕੀਤੀ ਗਈ।



ਅਵਾਮ ਨੂੰ ਬੀਮਾਰੀ ਤੋਂ ਬਚਾਉਣ ਲਈ ਹਰ ਮਨੁੱਖ ਦੀ ਲਾਮਜੀ ਸਿਹਤ ਜਾਂਚ ਤੇ ਸਿਹਤ ਬੀਮਾ ਸਮੇ ਦੀ ਜ਼ਰੂਰਤ : ਬਾਦਲ
ਲੰਬੀ-ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਅਜੋਕੇ ਮਾਹੌਲ ਵਿਚ ਬੀਮਾਰੀਆਂ ਦੇ ਵਧਦੇ ਜਾਲ ਬਾਰੇ ਪੰਜਾਬ ਦੇ ਅਵਾਮ ਨੂੰ ਸਿਹਤ ਪੱਖੋਂ ਸੁਚੇਤ ਕਰਨ ਅਤੇ ਬਚਾਉਣ ਲਈ ਹਰ ਮਨੁੱਖ ਦੀ ਸਮੇਂ-ਸਮੇਂ 'ਤੇ ਲਾਜਮੀ ਡਾਕਟਰੀ ਜਾਂਚ ਅਤੇ ਸਿਹਤ ਬੀਮਾ ਸਮੇਂ ਦੀ ਜ਼ਰੂਰਤ ਹੈ। ਜਿਸ ਲਈ ਪੰਜਾਬ ਸਰਕਾਰ ਵੱਲੋਂ ਇਸ ਬਾਰੇ ਪੂਰੀ ਘੋਖ ਉਪਰੰਤ ਕਿਸੇ ਠੋਸ ਨੀਤੀ ਨੂੰ ਅਮਲੀਜਾਮਾ ਪਹਿਨਾਉਣ ਦੀ ਤਜਵੀਜ਼ ਹੈ।
        ਉਹ ਆਪਣੇ ਜੱਦੀ ਪਿੰਡ ਬਾਦਲ ਵਿਖੇ ਕੈਂਸਰ ਦੀ ਮੁੱਢਲੀ ਜਾਂਚ ਅਤੇ ਜਾਗਰੂਕਤਾ ਸਬੰਧੀ ਰਾਜ ਪੱਧਰੀ ਮੁਹਿੰਮ ਤਹਿਤ ਲੱਗੇ ਕੈਂਪ ਦਾ ਉਦਘਾਟਨ ਕਰਨ ਉਪਰੰਤ ਇੱਕ ਸਮਾਗਮ ਨੂੰ ਸੰਬੋਧਨ ਕਰ ਰਹੇ ਸਨ।
          ਉਨ੍ਹਾਂ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਵਿਸ਼ਵ ਵਿਆਪੀ ਹੈ ਅਤੇ ਇਸਦੇ ਫੈਲਣ ਦੇ ਅਸਲ ਕਾਰਨਾਂ ਸਬੰਧੀ ਹਾਲੇ ਵੀ ਖੋਜ ਜਾਰੀ ਹੈ। ਪਰ ਪੰਜਾਬ ਸਰਕਾਰ ਦੇਸ਼ ਦੀ ਪਹਿਲੀ ਰਾਜ ਸਰਕਾਰ ਹੈ ਜਿਸ ਨੇ ਕੈਂਸਰ ਦੀ ਨਾਮੁਰਾਦ ਬੀਮਾਰੀ ਦੇ ਸ਼ਿਕਾਰ ਮਰੀਜਾਂ ਦੀ ਮਾਲੀ ਮਦਦ ਲਈ ਲਈ ਰਾਜ ਵਿਚ 20 ਕਰੋੜ ਰੁਪਏ ਦਾ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ  ਸਥਾਪਿਤ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅਗਲੇ ਵਰ੍ਹੇ ਇਸ ਰਾਹਤ ਫੰਡ ਨੂੰ ਵਧਾ ਕੇ 100 ਕਰੋੜ ਰੁਪਏ ਕੀਤਾ ਜਾਵੇਗਾ। ਉਨ੍ਹਾਂ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਆਪਣੀ ਸਿਹਤ ਪ੍ਰਤੀ ਜਾਗਰੁਕ ਹੋਣ ਅਤੇ ਸਾਲ ਵਿਚ ਘੱਟੋ ਘੱਟ ਇਕ ਵਾਰ ਆਪਣਾ ਮੈਡੀਕਲ ਚੈਕਅੱਪ ਕਰਵਾਉਣ ਦੀ ਕੋਸ਼ਿਸ ਕਰਿਆ ਕਰਨ। ਉਨ੍ਹਾਂ ਮੌਜੂਦ ਸਿਹਤ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੂੰ ਸਿਹਤ ਬੀਮਾ ਅਤੇ ਸਿਹਤ ਦੀ ਲਾਜਮੀ ਜਾਂਚ ਬਾਰੇ ਠੋਸ ਨੀਤੀ ਬਾਰੇ ਘੋਖ ਕਰਨ ਦੇ ਨਿਰਦੇਸ਼ ਵੀ ਦਿੱਤੇ।
          ਕੈਂਸਰ ਦੀ ਬੀਮਾਰੀ ਹੱਥੋਂ ਆਪਣੇ ਪਿਤਾ ਸ: ਰਘੁਰਾਜ ਸਿੰਘ ਬਾਦਲ, ਪਤਨੀ ਬੀਬੀ ਸੁਰਿੰਦਰ ਕੌਰ ਬਾਦਲ ਅਤੇ ਚਾਚਾ ਸ: ਗੁਰਰਾਜ ਸਿੰਘ ਨੂੰ ਗੁਆ ਚੁੱਕੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਬੜੀ ਸੁਹਿਰਦਤਾ ਨਾਲ ਕਿਹਾ ਕਿ ਇਹ ਨਾਮੁਰਾਦ ਬੀਮਾਰੀ ਦੇ ਕਹਿਰ ਤੋਂ ਮੇਰਾ ਪਰਿਵਾਰ ਵਾਂਝਾ ਨਹੀਂ ਰਿਹਾ ਹੈ ਅਤੇ ਭਾਵੇਂ ਅਜੇ ਤੱਕ ਕੈਂਸਰ ਦੀ ਬੀਮਾਰੀ ਦੇ ਅਸਲ ਕਾਰਨ ਦੀ ਸੂਹ ਨਹੀਂ ਲਾਈ ਜਾ ਸਕੀ ਹੈ, ਪਰ ਪੰਜਾਬ ਸਰਕਾਰ ਸੂਬੇ ਦੇ ਅਵਾਮ ਨੂੰ ਕੈਂਸਰ ਦੀ ਭਿਅੰਕਰ ਬੀਮਾਰੀ ਤੋਂ ਬਚਾਉਣ ਲਈ ਵਚਨਬੱਧ ਹੈ। ਜਿਸਦੇ ਤਹਿਤ ਸੂਬੇ ਵਿਚ ਅਗਲੇ ਤਿੰਨ ਮਹੀਨਿਆਂ ਵਿਚ ਪੰਜਾਬ ਭਰ ਵਿਚ ਅਜਿਹੇ 300 ਕੈਂਪ ਲਗਾਏ ਜਾਣਗੇ। ਜ਼ਿਨ੍ਹਾਂ ਵਿਚ ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਦੀ ਰੋਕਥਾਮ ਲਈ ਚੁੱਕੇ ਗਏ ਕਦਮਾਂ ਸੰਬੰਧੀ ਲੋਕਾਂ ਵਿਚ ਜਾਗਰੁਕਤਾ ਪੈਦਾ ਕਰਨ ਅਤੇ ਮੌਕੇ 'ਤੇ ਹੀ ਕੈਂਸਰ ਦੀ ਮੁੱਢਲੀ ਜਾਂਚ ਦੇ ਟੈਸਟ ਮੁਫ਼ਤ ਕੀਤੇ ਜਾਣਗੇ। ਜ਼ਿਨ੍ਹਾਂ ਵਿਚ ਮੈਮੋਗ੍ਰਾਫੀ ਅਤੇ ਪੈਪ ਸਮੀਅਰ ਟੈਸਟ ਦੀ ਸੁਵਿਧਾ ਸ਼ਾਮਿਲ ਹੈ। ਮੁੱਖ ਮੰਤਰੀ ਨੇ ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ ਰੋਕੋ ਕੈਂਸਰ ਵੱਲੋਂ ਕੈਂਸਰ ਵਿਰੁੱਧ ਵਿੱਢੀ ਮੁਹਿੰਮ ਦੀ ਖੁੱਲ੍ਹਦਿਲੀ ਨਾਲ ਸ਼ਲਾਘਾ ਕੀਤੀ।
             ਸ੍ਰੀ ਬਾਦਲ ਨੇ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਦੇ ਇਲਾਜ ਲਈ ਪੰਜਾਬ ਵਿਚ ਮੁਹਾਲੀ ਅਤੇ ਬਠਿੰਡਾ ਵਿਚ ਦੋ ਨਵੇਂ ਮਲਟੀ ਸਪੈਸਲਟੀ ਹਸਪਤਾਲ ਸਥਾਪਿਤ ਕੀਤੇ ਗਏ ਹਨ। ਇਸਤੋਂ ਬਿਨ੍ਹਾਂ ਤਿੰਨਾਂ ਮੈਡੀਕਲ ਕਾਲਜਾਂ ਫਰੀਦਕੋਟ, ਸ੍ਰੀ ਅਮ੍ਰਿਤਸਰ ਸਾਹਿਬ ਅਤੇ ਪਟਿਆਲਾ ਵਿਚ ਵੀ ਇਸ ਦੇ ਇਲਾਜ ਲਈ ਸੁਵਿਧਾ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਦਾ ਪਹਿਲੀ ਸਟੇਜ 'ਤੇ ਹੀ ਪਤਾ ਲੱਗ ਜਾਵੇ ਤਾਂ ਇਲਾਜ ਸੰਭਵ ਹੈ ਇਸ ਲਈ ਸਰਕਾਰ ਨੇ ਮੁੱਢਲੀ ਸਟੇਜ 'ਤੇ ਹੀ ਕੈਂਸਰ ਦੀ ਬਿਮਾਰੀ ਦਾ ਪਤਾ ਲਗਾਉਣ ਅਤੇ ਕੈਂਸਰ ਦੇ ਮਰੀਜਾਂ ਦੀ ਪੰਜਾਬ ਵਿਚ ਅਸਲ ਗਿਣਤੀ ਦਾ ਪਤਾ ਲਗਾਉਣ ਲਈ ਇਹ ਮੁਹਿੰਮ ਸ਼ੁਰੂ ਕੀਤੀ ਹੈ।
ਇਸ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ: ਬਾਦਲ ਨੇ ਕਿਹਾ ਕਿ ਕਾਂਗਰਸ ਦੀਆਂ ਗਲਤ ਨੀਤੀਆਂ ਕਾਰਨ ਸਾਡੇ ਮੁਲਕ ਵਿਚ ਕੇਂਦਰ ਸਰਕਾਰ ਕੋਲ ਹੀ ਸਾਰੀਆਂ ਵਿੱਤੀ ਸ਼ਕਤੀਆਂ ਹਨ ਅਤੇ ਰਾਜ ਸਰਕਾਰਾਂ ਕੋਲ ਆਮਦਨ ਦੇ ਬਹੁਤ ਘੱਟ ਵਸੀਲੇ ਹਨ। ਜਿਸ ਕਾਰਨ ਰਾਜ ਸਰਕਾਰਾਂ ਚਾਹ ਕੇ ਵੀ ਸਿਹਤ ਆਦਿ ਵਰਗੀਆਂ ਜਰੂਰੀ ਸੇਵਾਵਾਂ  ਉਪਲਬੱਧ ਕਰਵਾਉਣ ਲਈ ਸੀਮਤ ਸਾਧਨ ਹੀ ਖਰਚ ਕਰ ਸਕਦੀਆਂ ਹਨ। ਪਰ ਫਿਰ ਵੀ ਪੰਜਾਬ ਸਰਕਾਰ ਬੇਹਤਰ ਸਿਹਤ ਸਹੁਲਤਾਂ ਲੋਕਾਂ ਨੂੰ ਉਪਲਬੱਧ ਕਰਵਾਉਣ ਲਈ ਵਚਨਬੱਧ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਭੇਜੇ ਜਾਂਦੇ ਪ੍ਰੋਜੈਕਟਾਂ ਪ੍ਰਤੀ ਵੀ ਕੇਂਦਰ ਸਰਕਾਰ  ਦਾ ਰਵਈਆਂ ਨਾਂਹ ਪੱਖੀ ਹੀ ਹੁੰਦਾ ਹੈ।
          ਇਸ ਮੌਕੇ ਡਾ. ਐਸ. ਐਸ. ਗਿੱਲ ਉਪ ਕੁਲਪਤੀ ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਜ਼ ਫਰੀਦਕੋਟ ਨੇ ਆਪਣੇ ਵਿਚਾਰ ਪ੍ਰਗਟ ਕਰਦਿਆਂ ਕਿਹਾ ਕਿ ਫਰੀਦਕੋਟ ਯੂਨੀਵਰਸਿਟੀ ਵਿਖੇ ਕੈਂਸਰ ਦੇ ਮਰੀਜਾਂ ਦੇ ਇਲਾਜ ਲਈ ਵਿਸੇਸ਼ ਸੈਲ ਸਥਾਪਿਤ ਕੀਤਾ ਗਿਆ ਹੈ ਜਿੱਥੇ ਮਰੀਜਾਂ ਨੂੰ ਮੁਫ਼ਤ ਟੈਸਟ ਅਤੇ ਮੁਫ਼ਤ ਇਲਾਜ ਮੁਹਈਆ ਕਰਵਾਇਆ ਜਾ ਰਿਹਾ ਹੈ।
ਇਸ ਮੌਕੇ ਡਾ: ਜੇ.ਪੀ. ਸਿੰਘ ਡਾਇਰੈਕਟਰ ਸਿਹਤ ਸੇਵਾਵਾਂ ਪੰਜਾਬ ਨੇ ਕਿਹਾ ਕਿ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਵਿਚ ਵੀ ਕੈਂਸਰ ਰਾਹਤ ਫੰਡ ਵਿਚੋਂ ਸਹਾਇਤਾ ਲੈਣ ਲਈ ਮਰੀਜ਼ ਅਰਜੀ ਸਿਵਲ ਸਰਜਨ ਦਫ਼ਤਰ ਵਿਚ ਦੇ ਸਕਦੇ ਹਨ। ਉਨ੍ਹਾਂ ਦੱਸਿਆ ਕਿ ਅੱਜ ਦੇ ਇਸ ਮੁੱਢਲੀ ਜਾਂਚ ਕੈਂਪ  ਵਿਚ 1 ਹਜ਼ਾਰ ਤੋਂ ਵਧੇਰੇ ਮਰੀਜਾਂ ਦੀ ਰਜਿਸਟਰੇਸ਼ਨ ਹੋਈ ਹੈ।
              ਇਸ ਮੌਕੇ ਰੋਕੋ ਕੈਂਸਰ ਦੇ ਪੰਜਾਬ ਇੰਚਾਰਜ਼ ਧਰਮਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਲਈ ਬਣਾਈ ਮੋਬਾਇਲ ਕੈਂਸਰ ਰੋਕੋ ਵੈਨ ਵੱਲੋਂ 365 ਮਰੀਜਾਂ ਦੇ ਛਾਤੀ ਦੇ ਕੈਂਸਰ ਦੀ ਜਾਂਚ ਕੀਤੀ ਗਈ। ਜਿਨ੍ਹਾਂ ਵਿਚੋਂ 31 ਦੀ ਮੈਮੇਗਰਾਫ਼ੀ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ 12 ਮਰੀਜ ਸ਼ੱਕੀ ਪਾਏ ਗਏ।
            ਹੋਰਨਾਂ ਤੋਂ ਇਲਾਵਾ ਡਿਪਟੀ ਕਮਿਸ਼ਨਰ ਅਰਸ਼ਦੀਪ ਸਿੰਘ ਥਿੰਦ, ਮਾਰਕਫੱੈਡ ਦੇ ਨਿਰਦੇਸ਼ਕ ਚੇਅਰਮੈਨ ਤੇਜਿੰਦਰ ਸਿੰਘ ਮਿੱਡੂਖੇੜਾ, ਜ਼ਿਲਾ ਵਿਕਾਸ ਬੋਰਡ ਦੇ ਚੇਅਰਮੈਨ ਹਰਮੀਤ ਸਿੰਘ ਭੀਟੀਵਾਲਾ, ਬਲਕਰਨ ਸਿੰਘ ਬੱਲਾ ਨਿੱਜੀ ਸਕੱਤਰ ਮੁੱਖ ਮੰਤਰੀ, ਰੋਕੋ ਕੈਂਸਰ ਦੇ ਪੰਜਾਬ ਇੰਚਾਰਜ਼ ਧਰਮਿੰਦਰ ਸਿੰਘ ਦਿਓਲ, ਗੁਰਦੀਪ ਸਿੰਘ ਭੁੱਲਰ ਸਿਵਲ ਸਰਜਨ, ਬਲਬੀਰ ਸਿੰਘ ਐਸ. ਡੀ. ਐਮ. ਮਲੋਟ ਅਤੇ ਰਾਕੇਸ਼ ਢੀਂਗੜਾ, ਡਾ: ਰੀਟਾ ਗੁਪਤਾ ਵੀ ਮੌਜੂਦ ਸਨ।