ਲੰਬੀ 'ਚ ਅਕਾਲੀ ਦਲ (ਬ) ਦੇ 31 ਹਜ਼ਾਰ ਝੰਡਿਆਂ ਨਾਲ ਭਰੀ ਗੱਡੀ ਚੋਣ ਕਮਿਸ਼ਨ ਦੀ ਟੀਮ ਅੜਿੱਕੇ ਚੜ੍ਹੀ

-ਝੰਡਿਆਂ 'ਤੇ ਤੱਕੜੀ ਦੇ ਨਿਸ਼ਾਨ ਤੋਂ ਇਲਾਵਾ ਵੱਡੇ ਬਾਦਲ, ਸੁਖਬੀਰ  ਤੇ ਹਰਸਿਮਰਤ ਕੌਰ ਦੀਆਂ ਛਪੀਆਂ ਸਨ ਤਸਵੀਰਾਂ-
                                                        ਇਕਬਾਲ ਸਿੰਘ ਸ਼ਾਂਤ
               ਲੰਬੀ : ਐਤਕੀਂ ਚੋਣ ਜ਼ਾਬਤੇ ਦੀ ਸਖ਼ਤੀ ਖੂਬ ਰੰਗ ਵਿਖਾ ਰਹੀ ਹੈ ਤੇ ਚੋਣ ਕਮਿਸ਼ਨ ਦੇ ਲੰਮੇ ਹੱਥਾਂ ਤੋਂ ਪੰਜਾਬ ਦਾ ਵੀ.ਆਈ.ਪੀ. ਹਲਕਾ ਲੰਬੀ ਵੀ ਵਾਂਝਾ ਨਹੀਂ ਰਿਹਾ।
              ਅੱਜ ਚੋਣ ਕਮਿਸ਼ਨ ਦੀ ਇੱਕ ਵੀਡੀਓਗਰਾਫ਼ੀ ਟੀਮ ਨੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਹਲਕੇ ਲੰਬੀ ਵਿਖੇ ਅਕਾਲੀ ਦਲ (ਬ) ਵਾਲੇ ਝੰਡਿਆਂ ਨਾਲ ਭਰਿਆ ਇੱਕ ਪਿਕਅਪ ਡਾਲਾ ਕਾਬੂ ਕੀਤਾ। ਬਰਾਮਦ ਕੀਤੇ ਝੰਡਿਆ ਦੀ ਗਿਣਤੀ ਲਗਭਗ 31 ਹਜ਼ਾਰ ਦੱਸੀ ਜਾਂਦੀ ਹੈ। ਜਿਨ੍ਹਾਂ 'ਤੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ, ਸ. ਸੁਖਬੀਰ ਸਿੰਘ ਬਾਦਲ ਅਤੇ ਬੀਬੀ ਹਰਸਿਮਰਤ ਕੌਰ ਬਾਦਲ ਦੀਆਂ ਤਸਵੀਰਾਂ ਤੋਂ ਇਲਾਵਾ ਸ਼੍ਰੋਮਣੀ ਅਕਾਲੀ ਦਲ (ਬ) ਦਾ ਚੋਣ ਨਿਸ਼ਾਨ 'ਤੱਕੜੀ' ਵੀ ਛਪਿਆ ਹੋਇਆ ਸੀ। ਜਿਨ੍ਹਾਂ ਦੀ ਕੀਮਤ ਲੱਖਾਂ ਰੁਪਏ ਮੰਨੀ ਜਾ ਰਹੀ ਹੈ।
          ਇਹ ਝੰਡਿਆਂ ਨਾਲ ਭਰਿਆ ਡਾਲਾ ਚੋਣ ਕਮਿਸ਼ਨ ਦੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਅਗਵਾਈ ਵਾਲੀ ਇੱਕ ਵੀਡੀਓਗਰਾਫ਼ੀ ਟੀਮ ਦੇ ਉਸ ਵੇਲੇ ਅੜਿੱਕੇ ਚੜ੍ਹ ਗਿਆ, ਜਦੋਂ ਉਸਦਾ ਡਰਾਈਵਰ ਅਤੇ ਝੰਡਿਆ ਦਾ ਸਪਲਾਇਰ ਉਕਤ ਖੇਪ ਨੂੰ ਕਿਧਰੇ ਲਾਹੁਣ ਦੀ ਤਿਆਰੀ ਵਿਚ ਸਨ। ਇਸੇ ਦੌਰਾਨ ਫਲਾਇੰਕ ਸਕੂਐਡ ਟੀਮ ਦੇ ਮੁਖੀ ਗੁਰਮੀਤ ਸਿੰਘ ਨਾਇਬ ਤਹਿਸੀਲਦਾਰ ਅਤੇ ਲੰਬੀ ਥਾਣੇ ਦੇ ਸਬ ਇੰਸਪੈਕਟਰ ਬੰਤਾ ਸਿੰਘ ਨੇ ਪੁਲਿਸ ਸਮੇਤ ਪੁੱਜੇ ਪਿਕਅਪ ਡਾਲਾ ਨੰਬਰ ਪੀ.ਬੀ.11 ਏ.ਆਰ/9502 ਨੂੰ ਕਬਜ਼ੇ ਲੈ ਕੇ ਲੰਬੀ ਥਾਣੇ ਵਿਚ ਲੈ ਗਏ।
         
              ਜਿੱਥੇ ਪੁੱਛ-ਗਿੱਛ ਦੌਰਾਨ ਝੰਡਿਆਂ ਨੂੰ ਕਾਬੂ ਕੀਤੇ ਵਿਅਕਤੀਆਂ ਦੀ ਸ਼ਨਾਖ਼ਤ ਯਸ਼ਪਾਲ ਵਾਸੀ ਪਟਿਆਲਾ, ਸੋਨੂੰ ਕੁਮਾਰ ਵਾਸੀ ਸ਼ੇਖਪੁਰਾ ਵਜੋਂ ਹੋਈ। ਇਸੇ ਦੌਰਾਨ ਵਿਧਾਨਸਭਾ ਹਲਕਾ ਲੰਬੀ ਦੇ ਰਿਟਰਨਿੰਗ ਅਫਸਰ ਸ੍ਰੀ  ਸੰਦੀਪ ਰਿਸ਼ੀ ਵੀ ਮੌਕੇ 'ਤੇ ਪਹੁੰਚ ਗਏ। ਜਿਨ੍ਹਾਂ ਨੇ ਉਕਤ ਮਾਮਲੇ ਬਾਰੇ ਲੰਬੀ ਦੇ ਥਾਣਾ ਮੁਖੀ, ਫਲਾਇੰਗ ਸਕੂਐਡ ਦੇ ਮੁਖੀ ਗੁਰਮੀਤ ਸਿੰਘ ਵੀਡੀਓਗਰਾਫ਼ੀ ਟੀਮ ਦੇ ਮੁਖੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਤੋਂ ਸਮੁੱਚੇ ਮਾਮਲੇ ਦੀ ਜਾਣਕਾਰੀ ਲਈ।
               
                  ਲੰਬੀ ਥਾਣੇ ਵਿਚ ਝੰਡਿਆਂ ਦੇ ਸਪਲਾਇਰ ਸ੍ਰੀ ਯਸ਼ਪਾਲ ਨੇ ਦੱਸਿਆ ਕਿ ਉਹ ਕੁਝ ਸਮਾਂ ਪਹਿਲਾਂ ਤੱਕ ਪੋਲੀਥੀਨ ਦੇ ਲਿਫਾਫਿਆਂ ਦਾ ਕਾਰੋਬਾਰ ਕਰਦਾ ਸੀ। ਪਰ ਸਰਕਾਰ ਵੱਲੋਂ ਪੋਲੀਥੀਨ ਦੇ ਕਾਰੋਬਾਰ 'ਤੇ ਨੱਥ ਪਾਉਣ ਉਪਰੰਤ ਉਹ ਰੋਜੀ-ਰੋਟੀ ਚਲਾਉਣ ਲਈ ਚੋਣ ਸਮੱਗਰੀ ਦੇ ਕਿੱਤੇ ਨਾਲ ਜੁੜਿਆ ਸੀ ਪਰ ਅੱਜ ਪੁਲਿਸ ਵੱਲੋਂ ਚੋਣ ਸਮੱਗਰੀ ਦੇ ਨਾਲ ਫੜਣ ਨਾਲ ਜਿੱਥੇ ਉਸਦੇ ਰੁਜ਼ਗਾਰ 'ਤੇ ਪ੍ਰਸ਼ਨ ਚਿੰਨ੍ਹ ਲੱਗ ਗਿਆ ਹੈ, ਉਥੇ ਪੁਲਿਸ ਵੱਲੋਂ ਜ਼ਬਤ ਕੀਤੇ ਇਨ੍ਹਾਂ ਝੰਡਿਆਂ 'ਤੇ ਆਈ ਲਾਗਤ ਅਤੇ ਕਾਰੀਗਰਾਂ ਦੀ ਮਜ਼ਦੂਰੀ ਦੀ ਉਸਦੇ ਸਿਰ ਪਵੇਗੀ। ਉਸ ਅਨੁਸਾਰ ਪਿਕਅਪ ਡਾਲੇ ਵਿਚ ਵੱਖ-ਵੱਖ ਸਾਇਜ਼ਾਂ ਅਨੁਸਾਰ 40 ਤੋਂ 50 ਹਜ਼ਾਰ ਝੰਡੇ ਦੇ ਕਰੀਬ ਲੱਦੇ ਹੋਏ ਹਨ।
           ਜਦੋਂ ਉਸਨੂੰ ਪੁੱਛਿਆ ਗਿਆ ਕਿ ਹਜ਼ਾਰਾਂ ਦੀ ਗਿਣਤੀ ਵਿਚ ਲੰਬੀ ਵਿਖੇ ਕਿਸਨੂੰ ਸਪਲਾਈ ਕਰਨ ਜਾ ਰਿਹਾ ਸੀ ਤਾਂ ਯਸ਼ਪਾਲ ਕੋਈ ਪੁਖ਼ਤਾ ਜਵਾਬ ਨਾ ਦੇ ਸਕਿਆ ਅਤੇ ਉਸਨੇ ਸਿਰਫ਼ ਇੰਨਾ ਕਿਹਾ ਹੀ ਕਿਹਾ ਕਿ ਉਹਦੇ ਕੋਲ ਕਿਸੇ ਦਾ ਆਰਡਰ ਨਹੀਂ ਸੀ। ਉਹ ਤਾਂ ਖੁੱਲ੍ਹੇ ਤੌਰ 'ਤੇ ਝੰਡੇ ਵੇਚਣ ਲਈ ਆਇਆ ਸੀ।

          ਲੰਬੀ ਥਾਣੇ ਵਿਖੇ ਰਿਟਰਨਿੰਗ ਅਫਸਰ ਸ੍ਰੀ ਸੰਦੀਪ ਰਿਸ਼ੀ ਨੇ ਦੱਸਿਆ ਕਿ ਇਨ੍ਹਾਂ ਝੰਡਿਆਂ ਨੂੰ ਜ਼ਬਤ ਕਰਕੇ ਲੰਬੀ ਪੁਲਿਸ ਨੂੰ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

               ਇਸੇ ਦੌਰਾਨ ਲੰਬੀ ਥਾਣਾ ਦੇ ਮੁਖੀ ਗੁਰਪ੍ਰੀਤ ਸਿੰਘ ਬੈਂਸ ਨੇ ਦੱਸਿਆ ਕਿ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਸ਼ਿਕਾਇਤ 'ਤੇ ਝੰਡੇ ਅਤੇ ਗੱਡੀ ਨੂੰ ਕਬਜ਼ੇ ਵਿਚ ਲੈ ਕੇ ਯਸ਼ਪਾਲ ਪੁੱਤਰ ਮਦਨ ਗੋਪਾਲ ਵਾਸੀ ਅਰਬਨ ਸਟੇਟ, ਪਟਿਆਲਾ, ਸੋਨੂੰ ਕੁਮਾਰ ਪੁੱਤਰ ਰਾਜਿੰਦਰ ਸਿੰੰਘ ਵਾਸੀ ਸ਼ੇਖਪੁਰਾ (ਪਟਿਆਲਾ) ਖਿਲਾਫ਼ ਧਾਰਾ 127-ਏ ਰਿਪਰੈਜੈਂਟੇਸ਼ਨ ਆਫ਼ ਪੀਪਲ ਐਕਟ 1951 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
ਸਬ ਇੰਸਪੈਕਟਰ ਬੰਤਾ ਸਿੰਘ ਦੇ ਅਨੁਸਾਰ ਪਿਕਅਪ ਡਾਲੇ ਵਿਚ ਗਿਣਤੀ ਦੌਰਾਨ 62 ਗੱਟੇ ਬਰਾਮਦ ਕੀਤੇ ਗਏ, ਜਿਨ੍ਹਾਂ ਵਿਚ ਪ੍ਰਤੀ ਗੱਟੇ ਵਿਚ 500 ਦੇ ਹਿਸਾਬ ਨਾਲ 31 ਹਜ਼ਾਰ ਝੰਡੇ ਸਨ।
         
             ਲੰਬੀ ਹਲਕੇ ਵਿਚ ਸ਼੍ਰ੍ਰੋਮਣੀ ਅਕਾਲੀ (ਬ) ਦੇ ਝੰਡਿਆਂ ਨਾਲ ਭਰੀ ਗੱਡੀ ਫੜੇ ਜਾਣ ਦੀ ਖੂਬ ਚਰਚਾ ਹੈ। ਜਿੱਥੇ ਆਮ ਜਨਤਾ ਇਸ ਕਾਰਵਾਈ ਨੂੰ ਚੋਣ ਕਮਿਸ਼ਨ ਦੀ ਸਖ਼ਤੀ ਦਾ ਸਿੱਟਾ ਦੱਸ ਰਹੀ ਹੈ, ਉਥੇ ਅਕਾਲੀ ਦਲ ਨੇ ਇਸ ਮਾਮਲੇ 'ਤੇ ਚੁੱਪੀ ਧਾਰੀ ਹੋਈ ਹੈ।

ਸਾਰੰਗੀ ਸ਼੍ਰੋਮਣੀ ਕਮੇਟੀ ਦੀ, ਰਾਗ ਅਕਾਲੀਆਂ ਦਾ

                                                                  ਚਰਨਜੀਤ ਭੁੱਲਰ
          ਬਠਿੰਡਾ : ਸ਼੍ਰੋਮਣੀ ਅਕਾਲੀ ਦਲ ਦੇ ਚੋਣ ਪ੍ਰਚਾਰ ਦੀ ਸੇਵਾ ਸ਼੍ਰੋਮਣੀ ਕਮੇਟੀ ਦੇ ਢਾਡੀ ਕਰ ਰਹੇ ਹਨ। ਚੋਣ ਜ਼ਾਬਤਾ ਇਸ ਦੀ ਇਜਾਜ਼ਤ ਨਹੀਂ ਦਿੰਦਾ। ਸ਼੍ਰੋਮਣੀ ਕਮੇਟੀ ਦੇ ਢਾਡੀਆਂ ਦੀ ਅਸਲੀ ਡਿਊਟੀ ਧਰਮ ਪ੍ਰਚਾਰ ਦੀ ਹੈ ਪਰ ਉਹ ਅੱਜ ਕੱਲ੍ਹ ਹਲਕਾ ਮੌੜ ਤੋਂ ਅਕਾਲੀ ਉਮੀਦਵਾਰ ਜਨਮੇਜਾ ਸਿੰਘ ਸੇਖੋਂ ਦੀਆਂ ਸਿਆਸੀ ਸਟੇਜਾਂ 'ਤੇ ਰੰਗ ਬੰਨ੍ਹ ਰਹੇ ਹਨ।
              ਚੋਣ ਕਮਿਸ਼ਨ ਪੰਜਾਬ ਦੀ ਸਪੱਸ਼ਟ ਹਦਾਇਤ ਹੈ ਕਿ ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮ ਚੋਣ ਪ੍ਰਚਾਰ ਵਿੱਚ ਸ਼ਮੂਲੀਅਤ ਨਹੀਂ ਕਰ ਸਕਦੇ ਹਨ। ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਅੱਜ ਹਲਕਾ ਮੌੜ ਦੇ ਪਿੰਡਾਂ ਵਿੱਚ ਜਦੋਂ ਚੋਣ ਦੌਰਾ ਕੀਤਾ ਤਾਂ ਸ਼੍ਰੋਮਣੀ ਕਮੇਟੀ ਦੇ ਢਾਡੀਆਂ ਨੇ ਲੋਕਾਂ ਨੂੰ ਬਿਠਾਉਣ ਲਈ ਵਾਰਾਂ ਗਾਈਆਂ।
           ਅੱਜ ਸ਼੍ਰੋਮਣੀ ਕਮੇਟੀ ਦਾ ਢਾਡੀ ਜਥਾ ਪਿੰਡ ਕਰਾੜਵਾਲਾ, ਚਾਉਕੇ, ਮੰਡੀ ਕਲਾਂ, ਬਾਲਿਆਂ ਵਾਲੀ ਅਤੇ ਪਿੰਡ ਘੁੰਮਣ ਕਲਾਂ ਵਿੱਚ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਸਮਾਗਮਾਂ ਵਿੱਚ ਗਿਆ। ਸ੍ਰੋਮਣੀ ਕਮੇਟੀ ਦੇ ਜੁਗਰਾਜ ਸਿੰਘ ਮੌਜੀ ਦਾ ਢਾਡੀ ਜਥਾ ਧਰਮ ਪ੍ਰਚਾਰ ਕਰਨ ਦੀ ਥਾਂ ਅਕਾਲੀ ਉਮੀਦਵਾਰ ਲਈ ਵੋਟਾਂ ਮੰਗ ਰਿਹਾ ਹੈ। ਇਨ੍ਹਾਂ ਵਲੋਂ ਪਹਿਲਾਂ ਸਟੇਜਾਂ ਤੋਂ ਵਾਰਾਂ ਗਾਈਆਂ ਜਾਂਦੀਆਂ ਹਨ ਅਤੇ ਉਸ ਮਗਰੋਂ ਕਾਂਗਰਸ ਨੂੰ ਭਜਾਉਣ ਅਤੇ ਅਕਾਲੀ ਦਲ ਨੂੰ ਲਿਆਉਣ ਦੀ ਗੱਲ ਕੀਤੀ ਜਾਂਦੀ ਹੈ। ਪਿਛਲੇ 15 ਦਿਨ੍ਹਾਂ ਤੋਂ ਇਹ ਜਥਾ ਅਕਾਲੀ ਉਮੀਦਵਾਰ ਦੀ ਸੇਵਾ ਵਿੱਚ ਲੱਗਾ ਹੋਇਆ ਹੈ। ਏਦਾ ਹੀ ਹੋਰਨਾਂ ਥਾਵਾਂ ਤੇ ਵੀ ਸ੍ਰੋਮਣੀ ਕਮੇਟੀ ਦੇ ਢਾਡੀ ਅਕਾਲੀ ਦਲ ਦੀ ਸੇਵਾ ਵਿੱਚ ਜੁੱਟੇ ਹੋਏ ਹਨ। ਪਿਛਲੀਆਂ ਚੋਣਾਂ ਵਿੱਚ ਤਾਂ ਸ੍ਰੋਮਣੀ ਕਮੇਟੀ ਅਕਾਲੀ ਦਲ ਦੀ ਚੋਣ ਮੁਹਿੰਮ ਦੌਰਾਨ ਲੰਗਰ ਦਾ ਪ੍ਰਬੰਧ ਵੀ ਕਰਦੀ ਰਹੀ ਹੈ। ਹੁਣ ਢਾਡੀ ਆਪਣੀ ਡਿਊਟੀ ਛੱਡ ਕੇ ਅਕਾਲੀ ਉਮੀਦਵਾਰ ਦੇ ਗੁਣ ਗਾ ਰਹੇ ਹਨ।
      
               ਸ਼੍ਰੋਮਣੀ ਕਮੇਟੀ ਦੀ ਧਰਮ ਪ੍ਰਚਾਰ ਕਮੇਟੀ ਦੇ ਤਲਵੰਡੀ ਸਾਬੋ ਦਫ਼ਤਰ ਦੇ ਮੈਨੇਜਰ ਭਰਪੂਰ ਸਿੰਘ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਸਾਰੇ ਮੁਲਾਜ਼ਮਾਂ ਨੂੰ ਚੋਣ ਜ਼ਾਬਤਾ ਲੱਗਣ ਸਮੇਂ ਇਹ ਨੋਟ ਕਰਵਾ ਦਿੱਤਾ ਸੀ ਕਿ ਕਿਸੇ ਵੱਲੋਂ ਵੀ ਸਿਆਸੀ ਸਮਾਗਮਾਂ ਵਿੱਚ ਸ਼ਮੂਲੀਅਤ ਨਾ ਕੀਤੀ ਜਾਵੇ। ਉਨ੍ਹਾਂ ਆਖਿਆ ਕਿ ਮੌਜੀ ਦਾ ਜਥਾ ਸ਼੍ਰੋਮਣੀ ਕਮੇਟੀ ਦਾ ਹੈ ਅਤੇ ਇਨ੍ਹਾਂ ਵੱਲੋਂ ਕੋਈ ਛੁੱਟੀ ਵਗੈਰਾ ਵੀ ਨਹੀਂ ਲਈ ਗਈ। ਉਨ੍ਹਾਂ ਆਖਿਆ, ''ਮੈਨੂੰ ਇਹ ਜਾਣਕਾਰੀ ਨਹੀਂ ਹੈ ਕਿ ਇਹ ਢਾਡੀ ਜਥਾ ਅਕਾਲੀ ਦਲ ਦੇ ਪ੍ਰਚਾਰ ਵਿੱਚ ਲੱਗਿਆ ਹੋਇਆ ਹੈ।''
             ਪੀਪਲਜ਼ ਪਾਰਟੀ ਆਫ ਪੰਜਾਬ ਦੇ ਹਲਕਾ ਮੌੜ ਦੇ ਸੀਨੀਅਰ ਆਗੂ ਸੁਖਪਾਲ ਸਿੰਘ ਭੁੱਲਰ ਨੇ ਅੱਜ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਕੀਤੀ ਹੈ ਕਿ ਸ਼੍ਰੋਮਣੀ ਕਮੇਟੀ ਦਾ ਢਾਡੀ ਜਥਾ ਅਕਾਲੀ ਉਮੀਦਵਾਰ ਦੀ ਹਮਾਇਤ ਵਿੱਚ ਚੋਣ ਪ੍ਰਚਾਰ ਕਰ ਰਿਹਾ ਹੈ। ਪਤਾ ਲੱਗਿਆ ਹੈ ਕਿ ਢਾਡੀ ਜਥੇ ਵੱਲੋਂ ਪ੍ਰਚਾਰ ਕਰਨ ਦੇ ਸਬੂਤ ਵੀ ਭੇਜੇ ਗਏ ਹਨ। ਕਾਂਗਰਸ ਨੇ ਵੀ ਇਸ ਦੀ ਸ਼ਿਕਾਇਤ ਕੀਤੀ ਹੈ।
             ਜ਼ਿਲ੍ਹਾ ਚੋਣ ਅਫਸਰ ਸ੍ਰੀ ਕੇ.ਕੇ.ਯਾਦਵ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਇਸ ਤਰ੍ਹਾਂ ਦੀ ਕੋਈ ਜਾਣਕਾਰੀ ਨਹੀਂ ਹੈ ਅਤੇ ਉਹ ਇਸ ਦੀ ਪੜਤਾਲ ਕਰਾਉਣਗੇ। ਸ਼੍ਰੋਮਣੀ ਕਮੇਟੀ ਦੇ ਇਸ ਢਾਡੀ ਜਥੇ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਸੰਪਰਕ ਨਾ ਹੋ ਸਕਿਆ।

ਲੰਬੀ ਹਲਕੇ ਦੇ ਪਿੰਡ ਕੱਖਾਂਵਾਲੀ 'ਚ ਡਰੇਨੇਜ਼ ਵਿਭਾਗ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਇਆ

         ਡਰੇਨੇਜ਼ ਵਿਭਾਗ ਦਾ ਕਾਰਾ : ਖੇਤਾਂ ਦੇ ਪਾਣੀ ਦੀ ਨਿਕਾਸੀ ਲਈ ਸ਼ੁਰੂ ਕਰਵਾਇਆ ਕਮਰੇ ਦਾ ਉਸਾਰੀ ਕਾਰਜ
ਨਿਰਮਾਣ ਕਾਰਜ਼ ਨੂੰ ਗਿੱਦੜਬਾਹਾ ਦੇ ਜਨਰਲ ਆਬਜਰਵਰ ਨਾਲ ਤਾਇਨਾਤ 'ਸੰਪਰਕ ਅਫਸਰ' ਦੀ ਛਤਰਤਾਇਆ ਹਾਸਲ
                                                             ਇਕਬਾਲ ਸਿੰਘ ਸ਼ਾਂਤ
ਲੰਬੀ, 14 ਜਨਵਰੀ : ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਹਲਕੇ ਲੰਬੀ ਦੇ ਪਿੰਡ ਕੱਖਾਂਵਾਲੀ ਵਿਖੇ ਡਰੇਨੇਜ਼ ਵਿਭਾਗ ਦੇ ਅਧਿਕਾਰੀਆਂ ਵੱਲੋਂ ਸੱਤਾ ਪੱਖ ਦੇ ਪ੍ਰਭਾਵ ਹੇਠ ਕਥਿਤ ਤੌਰ 'ਤੇ ਖੁੱਲ•ੇਆਮ ਚੋਣ ਜ਼ਾਬਤੇ ਦੀਆਂ ਧੱਜੀਆਂ ਉਡਾਉਣ ਦਾ ਮਾਮਲਾ ਨਸ਼ਰ ਹੋਇਆ ਹੈ।
             
           ਇਹ ਸਮੁੱਚੀ ਕਾਰਗੁਜਾਰੀ ਕਥਿਤ ਤੌਰ 'ਤੇ ਡਰੇਨੇਜ਼ ਵਿਭਾਗ ਦੇ ਇੱਕ ਅਜਿਹੇ ਉੱਚ ਅਧਿਕਾਰੀ  ਦੀ ਛਤਰ-ਛਾਇਆ ਹੇਠ ਹੋਣ ਦੀ ਸੂਚਨਾ ਹੈ, ਜਿਸਨੂੰ ਚੋਣ ਕਮਿਸ਼ਨ ਵੱਲੋਂ ਨਾਲ ਖਹਿੰਦੇ ਗਿੱਦੜਬਾਹਾ ਹਲਕੇ ਵਿਚ ਨਿਰਪੱਖ ਚੋਣ ਕਰਵਾਉਣ ਲਈ ਭੇਜੇ ਜਨਰਲ ਆਬਜਰਵਰ ਦੇ ਨਾਲ 'ਸੰਪਰਕ ਅਫਸਰ' ਵਜੋਂ ਤਾਇਨਾਤ ਕੀਤਾ ਗਿਆ ਹੈ।
           
            ਡਰੇਨੇਜ਼ ਵਿਭਾਗ ਦੇ ਫਰੀਦਕੋਟ ਐਟ ਗਿੱਦੜਬਾਹਾ ਡਿਵੀਜਨ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਅਤੇ ਐਸ.ਡੀ.ਓ. ਵਰਿਆਮ ਸਿੰਘ ਦੇ ਅਧੀਨ ਪੈਂਦੇ ਸਬ ਡਿਵੀਜਨ ਦੇ ਅਧੀਨ ਪੈਂਦੇ ਸੈਂਕੜੇ ਏਕੜ ਸੇਮ ਪ੍ਰਭਾਵਿਤ ਜ਼ਮੀਨ ਵਾਲੇ ਪਿੰਡ ਕੱਖਾਂਵਾਲੀ ਦੇ ਖੇਤਾਂ ਵਿਚ ਕਾਫ਼ੀ ਪਾਣੀ ਖੜ੍ਹਾ  ਹੈ। ਅੱਜ ਪੰਜਾਵਾ-ਰੋੜਾਂਵਾਲੀ ਲਿੰਕ ਡਰੇਨ ਦੀ ਬੁਰਜੀ ਨੰਬਰ 37700 ਦੇ ਨਜ਼ਦੀਕ ਪੈਂਦੇ ਇਸੇ ਵਾਹੀਯੋਗ ਰਕਬੇ ਵਿਚ ਖੜ੍ਹੇ ਪਾਣੀ ਨੂੰ ਡਰੇਨ ਵਿਚ ਸੁੱਟਣ ਵਾਸਦੇ ਬਿਜਲੀ ਮੋਟਰ ਲਾਉਣ ਇੱਕ ਖੇਤ ਵਿਚ ਕੁਝ ਮਜ਼ਦੂਰ ਵੱਲੋਂ ਕਮਰਾ ਬਣਾਉਣ ਲਈ ਨੀਂਹਾਂ ਦੀ ਪੁਟਾਈ ਸ਼ੁਰੂ ਕੀਤੀ ਜਾ ਰਹੀ ਸੀ। ਜਿਸਦੇ ਨਜ਼ਦੀਕ ਬਰੇਤੀ ਨਾਲ ਲੱਦਿਆ ਇੱਕ ਟਰੈਕਟਰ-ਟਰਾਲੀ ਵੀ ਖੜ੍ਹਾ ਸੀ ਅਤੇ ਦੋ-ਤਿੰਨ ਢੇਰ ਬਜਰੀ ਵੀ ਪਈ ਸੀ। ਜਿਸਨੂੰ ਕੁਝ ਸਮਾਂ ਪਹਿਲਾਂ ਇੱਕ ਟਰੈਕਟਰ ਲਾਹ ਕੇ ਗਿਆ ਸੀ।
          
            ਡਰੇਨੇਜ਼ ਵਿਭਾਗ ਵੱਲੋਂ ਚੋਣ ਜ਼ਾਬਤੇ ਦੀਆਂ ਦਿਨ-ਦਹਾੜੇ ਧੱਜੀਆਂ ਉਡਾਉਣ ਦੀਆਂ ਸੂਚਨਾ ਮਿਲਣ 'ਤੇ ਪੱਤਰਕਾਰਾਂ ਨੇ ਵੇਖਿਆ ਕਿ ਉਥੇ ਬੜੀ ਤੇਜ਼ੀ ਨਾਲ ਤਿੰਨ ਮਜ਼ਦੂਰ ਖੇਤ ਵਿਚ ਖੜ੍ਹੇ ਪਾਣੀ ਨੂੰ ਵੱਟਾਂ ਨਾਲ ਰੋਕ ਕੇ ਇੱਕ ਕਮਰਾ ਉਸਾਰਨ ਲਈ ਉਸਦੀ ਨੀਂਹਾਂ ਲਈ ਖੁਦਾਈ ਕਰ ਰਹੇ ਸਨ, ਉਥੇ ਮੌਕੇ 'ਤੇ ਮੌਜੂਦ ਮੁਨੀਸ਼ ਨਾਂ ਦੇ ਇੱਕ ਵਿਅਕਤੀ ਨੇ ਖੁਦ ਨੂੰ ਬਠਿੰਡਾ ਦੀ ਕਿਸੇ ਕੰਸਟਰਸ਼ਨ ਕੰਪਨੀ ਦਾ ਮੁਨਸ਼ੀ ਦੱਸਦਿਆਂ ਕਿਹਾ ਕਿ ਖੇਤ ਵਿਚ ਖਲੋਤੇ ਇਸ ਪਾਣੀ ਦੀ ਨਿਕਾਸੀ ਲਈ 100 ਫੁੱਟ ਦੇ ਕਰੀਬ ਪਲਾਸਟਿਕ ਪਾਈਪ ਪਾ ਕੇ ਮੋਟਰ ਰਾਹੀਂ ਪਾਣੀ ਨੂੰ ਡਰੇਨ ਵਿਚ ਸੁੱਟਿਆ ਜਾਵੇਗਾ।

            ਜਦੋਂ ਮੁਨੀਸ਼ ਕੁਮਾਰ ਤੋਂ ਉਕਤ ਕੰਮ ਬਾਰੇ ਟੈਂਡਰ ਹੋਣ ਬਾਰੇ ਪੁੱਛਿਆ ਗਿਆ ਤਾਂ ਉਸਨੇ ਪਹਿਲਾਂ ਟਾਲਣ ਦੀ ਕੋਸ਼ਿਸ਼ ਕੀਤੀ ਪਰ ਬਾਅਦ ਵਿਚ ਖਹਿੜਾ ਛੁਡਵਾਉਣ ਦੇ ਰੌਂਅ ਵਿਚ ਕਿਹਾ ਕਿ ਕਾਗਜ਼ ਤਾਂ ਬਠਿੰਡੇ ਪਏ ਹਨ। ਨਾਲ ਹੀ ਬੈਠੇ ਮਿਸਤਰੀ ਜਾਪਦੇ ਇੱਕ ਹੋਰ ਵਿਅਕਤੀ ਨੇ ਉੱਪਰੋਂ ਪੋਚਾ ਮਾਰਨ ਦੇ ਰੌਂਅ ਵਿਚ ਕਿਹਾ ਕਿ ਵੋਟਾਂ ਕਰਕੇ ਹੁਣ ਅਸੀਂ ਨਵਾਂ ਕੰਮ ਨਹੀਂ ਸ਼ੁਰੂ ਕਰ ਸਕਦੇ। ਜਦੋਂ ਉਸਨੂੰ ਪੁੱਛਿਆ ਗਿਆ ਕਿ ਇੱਥੇ ਤਾਂ ਤੁਸੀਂ ਨਵਾਂ ਕੰਮ ਸ਼ੁਰੂ ਕਰ ਰਹੇ ਹਾਂ। ਉਸੇ ਦੌਰਾਨ ਦੋਵੇਂ ਜਣਿਆਂ ਨੇ ਨਹੀਂ ਜੀ, ਤੁਹਾਨੂੰ ਐਵੇਂ ਭੁਲੇਖਾ ਸਾਡਾ ਤਾਂ ਪੁਰਾਣਾ ਕੰਮ ਚੱਲ ਰਿਹਾ ਹੈ।
             
             ਪਿੰਡ ਦੇ ਕਿਸਾਨ ਦਰਸ਼ਨ ਰਾਮ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿੰਡ ਦਾ ਲਗਭਗ 300 ਏਕੜ ਰਕਬਾ ਕਈ ਵਰਿ•ਆਂ ਤੋਂ ਸੇਮ ਦੀ ਮਾਰ ਹੇਠ ਹੈ। ਅੱਜ ਤੱਕ ਸਰਕਾਰ ਵੱਲੋਂ ਸੇਮ ਕੱਢਣ ਲਈ ਲਿੰਕ ਡਰੇਨ ਬਣਾਉਣ ਦੇ ਬਾਅਦ ਗੰਭੀਰਤਾ ਨਾਲ ਅਜਿਹਾ ਕੋਈ ਉਪਰਾਲਾ ਨਹੀਂ ਕੀਤਾ ਗਿਆ ਲੂਤਾਂ ਜੋ ਪਿੰਡ ਦਾ ਸੇਮ ਪ੍ਰਭਾਵਿਤ ਰਕਬਾ ਪੁਨਰ ਸੁਰਜੀਤ ਹੋ ਸਕੇ।
ਇੱਥੇ ਜ਼ਿਕਰਯੋਗ ਹੈ ਕਿ ਡਰੇਨੇਜ਼ ਵਿਭਾਗ ਦੇ ਫਰੀਦਕੋਟ ਐਟ ਗਿੱਦੜਬਾਹਾ ਡਿਵੀਜਨ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਨੂੰ ਚੋਣ ਕਮਿਸ਼ਨ ਵੱਲੋਂ ਹਲਕਾ ਗਿੱਦੜਬਾਹਾ ਲਈ ਜਨਰਲ ਅਬਜਰਵਰ ਵਜੋਂ ਤਾਇਨਾਤ ਕੀਤੇ ਸ੍ਰੀ ਅਰੁਣ ਪਾਂਡਾ (ਆਈ.ਏ.ਐਸ.) ਦੇ ਨਾਲ ਸੰਪਰਕ ਅਫ਼ਸਰ ਵਜੋਂ ਤੈਨਾਤ ਕੀਤਾ ਗਿਆ ਹੈ।
       
               ਜਦੋਂ ਦਰਸ਼ਨ ਰਾਮ ਨੂੰ ਪਿੰਡ ਕੱਖਾਂਵਾਲੀ ਵਿਖੇ ਉਕਤ ਨਿਰਮਾਣ ਕਾਰਜ਼ ਸ਼ੁਰੂ ਹੋਣ ਬਾਰੇ ਪੁੱਛਿਆ ਗਿਆਂ ਤਾਂ ਉਸਨੇ ਉਲਾਂਭੇ ਰੇ ਲਹਿਜ਼ੇ ਵਿਚ ਕਿਹਾ ਕਿ ਵੋਟਾਂ ਕਰਕੇ ਅੱਜ ਪਾਣੀ ਦੀ ਨਿਕਾਸੀ ਲਈ ਪਾਈਪਾਂ-ਪੂਈਪਾਂ ਪਾਉਣ ਲਈ ਆਏ ਹਨ। ਪਹਿਲਾਂ ਤਾਂ ਕਦੇ ਇਨ੍ਹਾਂ ਨੂੰ ਵੇਖਿਆ ਨਹੀਂ ਕਦੇ।
           
             ਇਸੇ ਦੌਰਾਨ ਸਬੰਧਤ ਐਸ.ਡੀ.ਓ. ਵਰਿਆਮ ਸਿੰਘ ਨਾਲ ਸਪੰਰਕ ਕੀਤਾ ਗਿਆ ਤਾਂ ਉਨ੍ਹਾਂ ਨੂੰ ਮੌਕੇ 'ਤੇ ਫੋਟੋਆਂ ਖਿੱਚਣ ਬਾਰੇ ਜਾਣਕਾਰੀ ਮਿਲਣ ਦੀ ਗੱਲ ਕਰਦਿਆਂ ਪਿੰਡ ਕੱਖਾਂਵਾਲੀ ਦੇ ਇੱਕ ਠੇਕੇਦਾਰ 'ਤੇ ਦੋਸ਼ ਮੜ੍ਹਦੇ ਹੋਏ ਕਿਹਾ ਕਿ ਉਸਨੇ ਖੁਦ ਤਾਂ ਟੈਂਡਰ ਲਿਆ ਨਹੀਂ ਅਤੇ ਹੁਣ ਸਾਨੂੰ ਐਵੇਂ ਖ਼ਰਾਬ ਕਰੀ ਜਾਂਦਾ ਹੈ।
             
             ਜਿਸਦੇ ਬਾਅਦ ਡਰੇਨੇਜ਼ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਨੇ ਸੰਪਰਕ ਕਰਨ 'ਤੇ ਸਬੰਧਤ ਐਸ.ਡੀ.ਓ. ਨੂੰ ਕਹਿ ਕੇ ਉਕਤ ਕਾਰਜ ਨੂੰ ਬੰਦ ਕਰਵਾਉਣ ਦੀ ਗੱਲ ਕਰਦਿਆਂ ਇਸ ਖ਼ਬਰ ਨੂੰ ਪ੍ਰਕਾਸ਼ਿਤ ਨਾ ਕਰਨ ਬਾਰੇ ਕਿਹਾ।
            

              ਇਸੇ ਦੌਰਾਨ ਸੀਨੀਅਰ ਕਾਂਗਰਸ ਆਗੂ ਗੁਰਮੀਤ ਸਿੰਘ ਖੁੱਡੀਆਂ ਦੋਸ਼ ਲਾਇਆ ਕਿ ਲੰਬੀ ਹਲਕੇ ਵਿਚ ਸਰਕਾਰੀ ਤੰਤਰ ਅਕਾਲੀ ਦਲ ਦੇ ਪੱਖ ਵਿਚ ਜੁਟਿਆ ਨਜ਼ਰ ਆ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਅਬਜਰਵਰ ਦੇ ਨਾਲ ਸੰਪਰਕ ਅਫਸਰ ਵਜੋਂ ਤਾਇਨਾਤ ਅਧਿਕਾਰੀਆਂ ਦੀ ਨੱਕ ਹੇਠ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਉਣਾ ਆਪਣੇ ਆਪ ਵਿਚ ਇੱਕ ਗੰਭੀਰ ਮਾਮਲਾ ਹੈ। ਉਨ੍ਹਾਂ ਚੋਣ ਕਮਿਸ਼ਨ ਤੋਂ ਇਸ ਮਾਮਲੇ ਦੀ ਦੋਸ਼ੀ ਅਧਿਕਾਰੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ।
ਸੰਪਰਕ ਕਰਨ 'ਤੇ ਲੰਬੀ ਹਲਕੇ ਦੇ ਰਿਟਰਨਿੰਗ ਅਫਸਰ ਸ੍ਰੀ ਸੰਦੀਪ ਰਿਸ਼ੀ ਨੇ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਉਪਰੰਤ ਬਣਦੀ ਕਾਰਵਾਈ ਕਾਰਵਾਈ ਕੀਤੀ ਜਾਵੇਗੀ।

ਪਾਸ਼ ਅਤੇ ਦਾਸ ਨਾਲੋਂ ਘੱਟ ਚੱਲ ਅਤੇ ਅਚੱਲ ਜਾਇਦਾਦ ਦੇ ਮਾਲਕ ਹਨ ਮਹੇਸ਼ਇੰਦਰ

                                                              ਇਕਬਾਲ ਸਿੰਘ ਸ਼ਾਂਤ
                 ਲੰਬੀ : ਲੰਬੀ ਹਲਕੇ ਤੋਂ ਪਾਸ਼ ਨੂੰ ਦੋ ਵਿਧਾਨਸਭਾ ਚੋਣਾਂ ਤੋਂ ਕਰਾਰੀ ਟੱਕਰ ਦਿੰਦੇ ਆ ਰਹੇ ਕਾਂਗਰਸ ਉਮੀਦਵਾਰ ਮਹੇਸ਼ਇੰਦਰ ਸਿੰਘ ਬਾਦਲ ਆਪਣੇ ਦੋਵੇਂ ਚਚੇਰੇ ਭਰਾਵਾਂ ਪਾਸ਼ ਅਤੇ ਦਾਸ ਨਾਲੋਂ ਘੱਟ ਚੱਲ ਅਤੇ ਅਚੱਲ ਜਾਇਦਾਦ ਦੇ ਮਾਲਕ ਹਨ। ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਕੋਲ 6 ਕਰੋੜ 45 ਲੱਖ 30 ਹਜ਼ਾਰ ਦੀ ਚੱਲ ਅਤੇ ਅਚੱਲ ਸੰਪਤੀ ਹੈ। ਜਿਸ ਵਿਚ 6 ਕਰੋੜ 20 ਲੱਖ 50 ਹਜ਼ਾਰ ਦੀ ਅੱਚਲ ਅਤੇ 24 ਲੱਖ 80 ਹਜ਼ਾਰ 185 ਰੁਪਏ ਦੀ ਚੱਲ ਸੰਪਤੀ ਹੈ।
           ਇਸਦੇ ਉਲਟ ਅਕਾਲੀ-ਭਾਜਪਾ ਗੱਠਜੋੜ  ਦੇ ਉਮੀਦਵਾਰ ਪ੍ਰਕਾਸ਼ ਸਿੰਘ ਬਾਦਲ ਦੀ ਕੁੱਲ ਚੱਲ ਅਤੇ ਅਚੱਲ ਸੰਪਤੀ 6 ਕਰੋੜ 75 ਲੱਖ 27, 914 ਰੁਪਏ ਹੈ। ਇਸਦੇ ਲਾਵਾ ਪੀ.ਪੀ.ਪੀ. ਦੀ ਟਿਕਟ 'ਤੇ ਆਪਣੇ  ਭਰਾਵਾਂ ਦੇ ਵਿਰੋਧ ਖੜ੍ਹੇ ਹੋਏ ਗੁਰਦਾਸ ਸਿੰਘ ਬਾਦਲ 19 ਕਰੋੜ 71 ਲੱਖ 45 ਹਜ਼ਾਰ 625 ਰੁਪਏ ਦੀ ਚੱਲ ਅਤੇ ਅਚਲ ਸੰਪਤੀ ਹੈ।

         ਮਹੇਸ਼ਇੰਦਰ ਸਿੰਘ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਬਤੌਰ ਕਾਂਗਰਸ ਉਮੀਦਵਾਰ ਨਾਮਜ਼ਦਗੀ ਕਾਗਜ਼ਾਂ ਨਾਲ ਪੇਸ਼  ਸੰਪਤੀ ਦੇ ਅਸਾਸਿਆਂ ਦੀ ਸੂਚੀ ਅਨੁਸਾਰ ਉਨ੍ਹਾਂ ਦੇ ਕੋਲ ਪਾਸ਼ ਅਤੇ ਦਾਸ ਦੇ ਮੁਕਾਬਲੇ ਨਗਦ ਰਕਮ ਵਜੋਂ ਸਿਰਫ਼ 50 ਹਜ਼ਾਰ ਰੁਪਏ ਹਨ। ਜਦੋਂਕਿ ਪਾਸ਼ ਦੇ ਕੋਲ ਸਾਢੇ 4 ਲੱਖ ਰੁਪਏ ਨਗਦ ਹਨ ਅਤੇ ਦਾਸ ਦੇ ਕੋਲ ਨਿੱਜੀ ਤੌਰ 'ਤੇ ਨਗਦੀ ਵਜੋਂ 3 ਲੱਖ ਰੁਪਏ ਹਨ।
ਪਾਸ਼ ਦੇ ਸਿਆਸੀ ਗੁਰੂ ਸ. ਤੇਜਾ ਸਿੰਘ ਦੇ ਸਪੁੱਤਰ ਮਹੇਸ਼ਇੰਦਰ ਬਾਦਲ ਦੇ ਕੋਲ 8 ਲੱਖ 10 ਹਜ਼ਾਰ ਰੁਪਏ ਦਾ ਸੋਨਾ ਹੈ। ਇਸਦੇ ਉਲਟ ਪਾਸ਼ ਕੋਲ 3 ਲੱਖ 42 ਹਜ਼ਾਰ ਰੁਪਏ ਅਤੇ ਦਾਸ ਦੇ ਕੋਲ 2 ਲੱਖ 85 ਹਜ਼ਾਰ ਰੁਪਏ ਦਾ ਸੋਨਾ ਹੈ।
         
             ਸਾਊ ਸਖਸੀਅਤ ਦੇ ਮਾਲਕ ਵਜੋਂ ਜਾਣੇ ਜਾਂਦੇ ਮਹੇਸ਼ਇੰਦਰ ਬਾਦਲ ਦੇ ਵਹੀਕਲ ਵਜੋਂ ਮਹਿੰਦਰਾ ਦੀ ਇੰਵੇਡਰ ਜੀਪ (2008 ਮਾਡਲ) ਵਿਚ 50 ਫ਼ੀਸਦੀ ਹਿੱਸਾ ਹੈ। ਇਸਦੇ ਇਲਾਵਾ ਉਨ੍ਹਾਂ ਦੇ ਕੋਲ ਮਹਾਰਾਜਾ ਇੰਜੀਨੀਅਰਿੰਗ ਕੰਪਨੀ ਲਿਮ: 8 ਲੱਖ 93 ਹਜ਼ਾਰ 40 ਰੁਪਏ ਦੇ ਸ਼ੇਅਰ ਹਨ।

            ਕਿਸਾਨੀ ਦੇ ਕਿੱਤੇ ਨਾਲ ਜੁੜੇ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਕੋਲ ਆਪਣੇ ਜੱਦੀ ਪਿੰਡ ਬਾਦਲ ਵਿਖੇ 41 ਏਕੜ, ਉਤਰਾਖੰਡ ਸੂਬੇ ਦੇ ਨੈਣੀਤਾਲ ਦੇ ਪਿੰਡ ਖਾਮਰੀਆ ਵਿਖੇ 11.215 ਏਕੜ ਤੋਂ ਇਲਾਵਾ ਰਾਜਸਾਨ ਦੇ ਚੱਕ 5 ਬੀਐਨ.ਡਬਿਨਿਊ (ਜ਼ਿਲ੍ਹਾ ਸ੍ਰੀ ਗੰਗਾਨਗਰ)  ਵਿਖੇ 18 ਏਕੜ ਵਾਹੀਯੋਗ ਜ਼ਮੀਨ ਹੈ। ਇਸਤੋਂ ਇਲਾਵਾ ਉਨ੍ਹਾਂ ਕੋਲ  ਪਟਿਆਲਾ ਦੇ ਬਡੂੰਗਰ ਖੇਤਰ ਵਿਚ 7123.5 ਵਰਗ ਫੁੱਟ ਦੇ ਪਲਾਟ ਵਿਚ 50 ਫ਼ੀਸਦੀ ਹਿੱਸਾ ਹੈ। ਜਿਸਦੀ ਮੌਜੂਦਾ ਕੀਮਤ 11 ਲੱਖ ਰੁਪਏ ਹੈ। ਕਮਰਸ਼ੀਅਲ ਜਾਇਦਾਦ ਵਜੋਂ ਉਨ੍ਹਾਂ ਦੇ ਕੋਲ ਗਿੱਦੜਾਹਾ ਵਿਖੇ ਇੱਕ ਦੁਕਾਨ ਹੈ। ਜਦੋਂਕਿ ਪਿੰਡ ਹੁਸਨਰ ਵਿਖੇ 24 ਕਨਾਲ 18 ਮਰਲੇ ਰਕਬੇ ਵਿਚ ਅਨਾਜ ਸਟੋਰੇਜ਼ ਲਈ ਓਪਨ ਪਲਿੰਥ ਹਨ।
              ਰਿਹਾਇਸ਼ੀ ਜਾਇਦਾਦ ਵਜੋਂ ਉਨ੍ਹਾਂ ਦੇ ਕੋਲ ਪਿੰਡ ਬਾਦਲ ਵਿਖੇ ਲਾਲ ਲਕੀਰ ਦੇ ਅੰਦਰ ਇੱਕ ਮਕਾਨ ਜਿਸਦੀ ਕੀਮਤ 28 ਲੰਖ ਰੁਪਏ ਹੈ ਅਤੇ ਚੰਡੀਗੜ੍ਹ ਦੇ ਸੈਕਟਰ 18 ਵਿਖੇ 2700 ਵਰਗ ਫੁੱਟ ਦੇ 1 ਕਰੋੜ 67 ਲੱਖ ਰੁਪਏ ਦੀ ਕੀਮਤ ਵਾਲੇ ਇੱਕ ਮਕਾਨ ਵਿਚ 2/3 ਹਿੱਸਾ ਹੈ। ਉਨ੍ਹਾਂ ਦੇ ਸਿਰ ਦੋ ਲੱਖ 1413 ਰੁਪਏ ਦੀਆਂ ਸਰਕਾਰੀ ਦੇਣਦਾਰੀਆਂ ਹਨ।
          
               ਜਦੋਂਕਿ ਮਹੇਸ਼ਇੰਦਰ ਬਾਦਲ ਦੀ ਧਰਮ ਪਤਨੀ ਸ੍ਰੀਮਤੀ ਹਰਗੀਤ ਕੌਰ ਦੇ ਕੋਲ ਲਗਭਗ 68 ਲੱਖ 86 ਹਜ਼ਾਰ ਦੀ ਚੱਲ ਅਤੇ ਅਚੱਲ ਸੰਪਤੀ ਹੈ। ਜਦੋਂਕਿ ਉਨ੍ਹਾਂ ਦੇ 13 ਲੱਖ 50 ਹਜ਼ਾਰ ਰੁਪਏ ਦਾ ਸੋਨਾ ਹੈ ਅਤੇ 70 ਹਜ਼ਾਰ ਨਗਦ ਹਨ


       ਮਹੇਸਇੰਦਰ ਬਾਦਲ ਵੱੱਲੋਂ ਲੰਬੀ ਹਲਕੇ ਤੋਂ ਨਾਮਜ਼ਦਗੀ ਕਾਗਜ਼ ਦਾਖਲ
                                         -ਕਵਰਿੰਗ ਉਮੀਦਵਾਰ ਬਣੇ ਗੁਰਮੀਤ ਸਿੰਘ ਖੁੱਡੀਆਂ-

                                                                 ਇਕਬਾਲ ਸਿੰਘ ਸ਼ਾਂਤ

          ਲੰਬੀ  : ਪਿਛਲੇ ਵਿਧਾਨਸਭਾ ਚੋਣਾਂ ਵਿਚ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਤਕੜੀ ਟੱਕਰ ਦੇਣ ਵਾਲੇ ਲੰਬੀ ਹਲਕੇ ਤੋਂ ਕਾਂਗਰਸ ਦੇ ਉਮੀਦਵਾਰ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਆਪਣੇ ਨਾਮਜ਼ਦਗੀ ਕਾਗਜ਼ ਲੰਬੀ ਹਲਕੇ ਦੇ ਰਿਟਰਨਿੰਗ ਅਫਸਰ ਸੰਦੀਪ ਰਿਸ਼ੀ ਦੇ ਕੋਲ ਦਾਖਲ ਕੀਤੇ। ਪੰਜਾਬ ਕਾਂਗਰਸ ਦੇ ਸੀਨੀਅਰ ਆਗੂ ਸ. ਗੁਰਮੀਤ ਸਿੰਘ ਖੁੱਡੀਆਂ ਨੇ ਉਨ੍ਹਾਂ ਦੇ ਕਵਰਿੰਗ ਉਮੀਦਵਾਰ ਵਜੋਂ ਕਾਗਜ਼ ਦਾਖਲ ਕੀਤੇ।
   
          ਕਾਗਜ਼ ਦਾਖਲ ਕਰਨ ਉਪਰੰਤ ਪੱਤਰਕਾਰਾਂ ਦੇ ਸਵਾਲ ਦੇ ਜਵਾਬ ਵਿੱਚ ਸ੍ਰ. ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਦੀ ਸਰਕਾਰ ਬਣਨ ਦੀ ਸੂਰਤ ਵਿੱਚ ਜਿੱਥੇ ਉਨ੍ਹਾਂ ਦੀ ਮੁੱਢਲੀ ਪਹਿਲ ਲੰਬੀ ਹਲਕੇ ਦੇ 47 ਪਿੰਡਾਂ ਨੂੰ ਸੇਮ ਦੇ ਸੰਤਾਪ ਤੋਂ ਨਿਜਾਤ ਦਿਵਾਉਣਾ ਹੋਵੇਗਾ। ਇਸਦੇ ਇਲਾਵਾ ਸੂਬੇ ਵਿੱਚ ਕਾਨੂੰਨ ਦਾ ਰਾਜ ਬਹਾਲ ਕਰਵਾਉਣਾ ਵੀ ਮੁੱਖ ਏਜੰਡਾ ਹੋਵੇਗਾ। ਸ੍ਰੀ ਬਾਦਲ ਨੇ ਰਾਜ ਦੀ ਨਿੱਘਰ ਚੁੱਕੀ ਕਾਨੂੰਨ ਵਿਵਸਥਾ 'ਤੇ ਵਧੇਰੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਇਸ ਵੇਲੇ ਸੂਬੇ ਵਿਚ ਹਰ ਪਾਸੇ ਗੁੰਡਾਰਾਜ ਅਤੇ ਆਮ ਜਨਤਾ ਖੁਦ ਨੂੰ ਮਹਿਫੂਜ਼ ਮਹਿਸੂਸ ਨਹੀਂ ਕਰਦੀ।

            ਲੰਬੀ ਹਲਕੇ ਦੇ ਚੋਣ ਨਤੀਜਿਆਂ ਬਾਰੇ ਪੁੱਛਣ 'ਤੇ ਉਨ੍ਹਾਂ ਉਤਸ਼ਾਹ ਭਰੇ ਲਫ਼ਜ਼ਾਂ ਵਿਚ ਉਨ੍ਹਾਂ ਦਾ ਖੇਤਰ ਆਪਣੇ ਲੋਕਾਂ ਨਾਲ ਦਿਲੀ ਪਿਆਰ ਹੈ ਅਤੇ ਲੋਕਾਂ ਦੇ ਪਿਆਰ ਤੇ ਸਤਿਕਾਰ ਵਿਚ ਤਾਕਤ ਹੁੰਦੀ ਹੈ। ਅਜਿਹੇ ਵਿਚ ਉਹ ਆਪਣੀ ਜਿੱਤ ਪ੍ਰਤੀ ਬਹੁਤ ਆਸਵੰਦ ਹਨ।
          ਉਨ੍ਹਾਂ ਅਕਾਲੀ ਦਲ ਵੱਲੋਂ ਲੰਬੀ ਹਲਕੇ ਵਿਚ ਵੋਟਰਾਂ ਨੂੰ ਭਰਮਾਉਣ ਲਈ ਕੀਤੀਆਂ ਜਾ ਰਹੀਆਂ ਕਾਰਗੁਜ਼ਾਰੀ ਨੂੰ ਲੋਕਤੰਤਰ ਰਵਾਇਤਾਂ ਲਈ ਮੰਦਭਾਗਾ ਕਰਾਰ ਦਿੰਦਿਆਂ ਇਸ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਕਰਨ ਦੀ ਗੱਲ ਕਹੀ। ਉਨ੍ਹਾਂ ਕਿਹਾ ਕਿ ਧੱਕੇਸ਼ਾਹੀ ਅਤੇ ਗੁੰਡਾਗਰਦੀ ਨੂੰ ਕਿਸੇ ਵੀ ਕੀਮਤ 'ਤੇ ਸਹਿਨ ਨਹੀਂ ਕੀਤਾ ਜਾਵੇਗਾ।

               ਇਸ ਮੌਕੇ ਸਾਊ ਸਿਆਸਤਦਾਨ ਅਤੇ ਦਰਵੇਸ਼ ਸਿਆਸਤਦਾਨ ਵਜੋਂ ਜਾਣੇ ਜਾਂਦੇ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਹੋਰਨਾਂ ਉਮੀਦਵਾਰ ਕਵਰਿੰਗ ਉਮੀਦਵਾਰ ਆਪਣੇ ਖੂਨ ਜਾਂ ਪਰਿਵਾਰ ਵਿਚੋਂ ਬਣਾਉਣ ਦੀ ਬਜਾਏ ਦਰਵੇਸ ਸਿਆਸਤਦਾਨ ਮਰਹੂਮ ਮੈਂਬਰ ਪਾਰਲੀਮੈਂਟ ਸ੍ਰ: ਜਗਦੇਵ ਸਿੰਘ ਖੁੱਡੀਆਂ ਦੇ ਸਪੁੱਤਰ ਗੁਰਮੀਤ ਸਿੰਘ ਖੁੱਡੀਆਂ ਨੂੰ ਆਪਣੇ ਕਵਰਿੰਗ ਉਮੀਦਵਾਰ ਵਜੋਂ ਰੱਖ ਕੇ ਇੱਕ ਵਿਲੱਖਣ ਮਿਸਾਲ ਪੇਸ਼ ਕੀਤੀ।
               
              ਇਸ ਮੌਕੇ ਸਾਬਕਾ ਮੰਤਰੀ ਸ੍ਰ: ਹਰਦੀਪ ਇੰਦਰ ਸਿੰਘ ਬਾਦਲ, ਬਾਦਲ ਪਿੰਡ ਦੇ ਸਾਬਕਾ ਸਰਪੰਚ ਸੰਜਮ ਸਿੰਘ ਢਿੱਲੋਂ, ਸੀਨੀਅਰ ਕਾਂਗਰ ਆਗੂ ਰਣਧੀਰ ਸਿੰਘ ਧੀਰਾ ਖੁੱਡੀਆਂ ਅਤੇ ਸਾਬਕਾ ਵਿਧਾਇਕ ਰਘਵੀਰ ਸਿੰਘ, ਮਲਕੀਤ ਸਿੰਘ ਵਕੀਲ, ਬਲਾਕ ਕਾਂਗਰਸ ਦੇ ਜਗਵਿੰਦਰ ਸਿੰਘ ਕਾਲਾ, ਨਵਤੇਜ ਸਿੰਘ, ਟੋਜੀ ਲੰਬੀ, ਜਸਵਿੰਦਰ ਸਿੰਘ ਭਾਗੂ, ਹਰਮੀਤ ਸਿੰਘ ਮਾਨਾ ਅਤੇ ਵੱਖ-ਵੱਖ ਆਗੂ ਮੌਜੂਦ ਸਨ।


                          ਮਹੇਸਇੰਦਰ ਵੱਲੋਂ ਸਰਕਾਰੀ ਸੁਰੱਖਿਆ ਲੈਣ ਤੋਂ ਇਨਕਾਰ
     ਲੰਬੀ ਹਲਕੇ ਤੋਂ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਅੱਜ ਸਰਕਾਰੀ ਸੁਰੱਖਿਆ ਲੈਣ ਤੋਂ ਇਨਕਾਰ ਕਰ ਦਿੱਤਾ। ਅੱਜ  ਵਿਧਾਨ ਸਭਾ ਹਲਕਾ ਲੰਬੀ ਲਈ ਕਾਂਗਰਸ ਦੇ ਉਮੀਦਵਾਰ ਵਜੋਂ ਆਪਣੇ ਨਾਮਜਦਗੀ ਕਾਗਜ਼ ਆਗ਼.ਓ. ਲੰਬੀ ਕੋਲ ਦਾਖਲ ਕਰਨ ਦੇ ਤੁਰੰਤ ਬਾਅਦ ਜਿਵੇਂ ਹੀ ਸ੍ਰ: ਬਾਦਲ ਰਿਟਰਨਿੰਗ ਅਫਸਰ ਦੇ ਦਫ਼ਤਰ ਵਿਚੋਂ ਬਾਹਰ ਆਏ ਤਾਂ ਇੱਕ ਥਾਣੇਦਾਰ ਨੇ ਉਨ੍ਹਾਂ ਨੂੰ ਸੁਰੱਖਿਆ ਕਰਮਚਾਰੀ ਲੈਣ ਦੀ ਪੇਸ਼ਕਸ਼ ਕੀਤੀ। ਜਿਸ 'ਤੇ ਮਹੇਸ਼ਦਇੰਦਰ ਸਿੰਘ ਬਾਦਲ ਨੇ ਬੜੀ ਨਿਮਰਤਾ ਨਾਲ ਸੁਰੱਖਿਆ ਲੈਣ ਤੋਂ ਇਨਕਾਰ ਕਰਦਿਆਂ ਕਿਹਾ ਕਿ ਉਹ ਆਪਣੀ ਹੋਣੀ ਨੂੰ ਆਪਣੇ ਸਮਰਥਕਾਂ ਤੇ ਵੋਟਰਾਂ ਨਾਲੋਂ ਵੱਖ ਨਹੀਂ ਕਰ ਸਕਦੇ।

ਹਜ਼ਾਰਾਂ ਕਰੋੜ ਰੁਪਏ ਦੇ ਕਰਜ਼ੇ ਹੇਠਾਂ ਦੱਬੇ ਸੂਬੇ ਦੇ ਮੁੱਖ ਮੰਤਰੀ ਸਿਰ ਇੱਕ ਰੁਪਇਆ ਵੀ ਕਰਜ਼ਾ ਨਹੀਂ

                                                   -ਪ੍ਰਕਾਸ਼ ਸਿੰਘ ਬਾਦਲ ਦੀ ਸੰਪਤੀ ਦੇ ਵੇਰਵੇ-
                                                               -ਇਕਬਾਲ ਸਿੰਘ ਸ਼ਾਂਤ-
           ਇਹ ਕੋਈ ਝੂਠ ਨਹੀਂ ਕਿ ਹਜ਼ਾਰਾਂ ਕਰੋੜ ਰੁਪਏ ਦੇ ਕਰਜ਼ੇ ਦੇ ਬੋਝ ਹੇਠਾਂ ਦੱਬੇ ਸੂਬੇ ਦੇ ਮੁੱਖ ਮੰਤਰੀ ਦੇ ਸਿਰ ਨਿੱਜੀ ਤੌਰ 'ਤੇ ਇੱਕ ਰੁਪਇਆ ਵੀ ਕਰਜ਼ਾ ਨਹੀਂ, ਬਲਕਿ ਉਹ ਆਰਥਿਕ ਤੌਰ 'ਤੇ ਇੰਨਾ ਮਜ਼ਬੂਤ ਹੈ ਕਿ ਉਸਨੇ ਲਗਭਗ 76 ਲੱਖ ਰੁਪਏ ਆਪਣੇ ਉੱਪ ਮੁੱਖ ਮੰਤਰੀ ਪੁੱਤਰ ਨੂੰ ਕਰਜ਼ੇ ਵਜੋਂ ਦਿੱਤੇ ਹੋਏ ਹਨ।
           
        ਹੋਰ ਤਾਂ ਹੋਰ ਨਿੱਤ ਹੈਲੀਕਾਪਟਰਾਂ ਦੇ ਹਲੂਣੇ ਅਤੇ ਮਹਿੰਗੀਆਂ ਕਾਰਾਂ ਦੇ ਝੂਟੇ ਲੈਣ ਵਾਲੇ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਕੋਲ ਸਫ਼ਰ ਕਰਨ ਲਈ ਆਪਣੇ ਪੁੱਤਰ ਸੁਖਬੀਰ ਵਾਂਗ ਇੱਕ ਨਿੱਜੀ ਕਾਰ ਵੀ ਨਹੀਂ।
          ਉਕਤ ਖੁਲਾਸਾ ਕਿਸੇ ਵਿਰੋਧੀ ਪਾਰਟੀ ਦੇ ਆਗੂ ਵੱਲੋਂ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ 'ਤੇ ਲਾਏ ਦੋਸ਼ਾਂ ਦਾ ਹਿੱਸਾ ਨਹੀਂ ਬਲਕਿ ਖੁਦ ਸ੍ਰੀ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਬਤੌਰ ਅਕਾਲੀ ਦਲ ਦੇ ਉਮੀਦਵਾਰ ਦਾਖਲ ਕੀਤੇ ਨਾਮਜ਼ਦਗੀ ਕਾਗਜ਼ ਦੇ ਨਾਲ ਪੇਸ਼ ਆਮਦਨੀ ਅਤੇ ਚੱਲ-ਅਚੱਲ ਜਾਇਦਾਦ ਦੇ ਅਸਾਸਿਆਂ ਦੀ ਸੂਚੀ ਦਾ ਹਿੱਸਾ ਹਨ।
    
          65 ਸਾਲਾਂ ਦੇ ਸਿਆਸੀ ਜੀਵਨ ਵਿਚ ਕਿਸਾਨਾਂ ਆਗੂ ਵਜੋਂ ਪ੍ਰਵਾਨਤ ਹੋਏ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਕੁੱਲ ਚੱਲ ਅਤੇ ਅਚੱਲ ਸੰਪਤੀ 6 ਕਰੋੜ 75 ਲੱਖ 27, 914 ਰੁਪਏ ਹੈ। ਉਨ੍ਹਾਂ ਨੇ ਆਪਣੇ ਪੁੱਤਰ ਸੁਖਬੀਰ ਸਿੰਘ ਬਾਦਲ ਨੂੰ 76 ਲੱਖ 2 ਹਜ਼ਾਰ 72 ਰੁਪਏ ਦੇ ਕਰਜ਼ਾ ਦਿੱਤਾ ਹੈ। ਹਾਲਾਂਕਿ ਉਨ੍ਹਾਂ ਦਾ ਉਪ ਮੁੱਖ ਮੰਤਰੀ ਪੁੱਤਰ ਆਪਣੇ ਪਿਤਾ ਤੋਂ ਦਸ ਗੁਣਾ ਤੋਂ ਵੀ ਵੱਧ ਅਮੀਰ ਹੈ। ਜਿਸ ਵੱਲੋਂ ਜਲਾਲਾਬਾਦ ਵਿਚ ਆਪਣੀ ਚੱਲ ਤੇ ਅਚੱਲ ਜਾਇਦਾਦ 76 ਕਰੋੜ ਰੁਪਏ ਹੋਣ ਬਾਰੇ ਖੁਲਾਸਾ ਕੀਤਾ ਗਿਆ ਹੈ।
ਉਨ੍ਹਾਂ ਦੇ ਕੋਲ 1 ਕਰੋੜ 21 ਲੱਖ 39 ਹਜ਼ਾਰ 974 ਰੁਪਏ ਦੀ ਚੱਲ ਸੰਪਤੀ ਹੈ। ਜਿਸਦੇ ਤਹਿਤ ਉਨ੍ਹਾਂ ਕੋਲ 3.25 ਲੱਖ ਰੁਪਏ ਦੀ ਕੀਮਤ ਵਾਲਾ ਖੇਤੀਬਾੜੀ ਦੇ ਕਿੱਤੇ ਨਾਲ ਸਬੰਧਤ ਮੁੱਖ ਸਾਧਨ ਮੈਸੀ ਫਰਗੂਸਨ ਟਰੈਕਟਰ ਹੈ ਅਤੇ 25 ਲੱਖ 56 ਹਜ਼ਾਰ 82 ਰਪਏ ਦੀ ਕੀਮਤ ਵਾਲੇ ਖੇਤੀਬਾੜੀ ਔਜਾਰ ਵੀ ਹਨ।
             
           82 ਸਾਲਾ ਪ੍ਰਕਾਸ਼ ਸਿੰਘ ਬਾਦਲ ਕੋਲ 4.50 ਲੱਖ ਰੁਪਏ ਦੀ ਨਗਦੀ ਤੋਂ ਇਲਾਵਾ ਵੱਖ-ਵੱਖ 9 ਬੈਂਕਾਂ ਵਿਚ 7 ਲੱਖ 7 ਹਜ਼ਾਰ 819 ਰੁਪਏ ਜਮ੍ਹਾਂ ਹਨ। ਫਾਲਕਨ ਕੰਪਨੀ ਦੇ 1.47 ਲੱਖ ਰੁਪਏ ਦੇ ਸ਼ੇਅਰ ਸ੍ਰੀ ਬਾਦਲ ਦੇ ਕੋਲ ਹਨ। ਆਮ ਤੌਰ 'ਤੇ ਸਾਦਾ ਜੀਵਨ ਵਤੀਤ ਕਰਨ ਦੇ ਹਾਮੀ ਸ੍ਰੀ ਬਾਦਲ ਵੀ ਸੋਨੇ ਦੇ ਪਿਆਰ ਤੋਂ ਗੁੱਝੇ ਨਹੀਂ ਰਹੇ, ਉਨ੍ਹਾਂ ਕੋਲ 3.42 ਲੱਖ ਰੁਪਏ ਦਾ ਸੋਨਾ ਵੀ ਹੈ।
     
             ਅਸਾਸਿਆਂ ਦੀ ਸੂਚੀ ਵਿਚ ਦਰਜ ਅੰਕੜਿਆਂ ਅਨੁਸਾਰ ਸੂਬੇ ਦੇ ਚਾਰ ਵਾਰ ਮੁੱਖ ਮੰਤਰੀ ਬਣ ਕੇ ਇੱਕ ਮਿਸਾਲ ਕਾਇਮ ਕਰ ਚੁੱਕੇ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਕੋਲ 5 ਕਰੋੜ 53 ਲੱਖ 88 ਹਜ਼ਾਰ ਰੁਪਏ ਦੀ ਅਚੱਲ ਸੰਪਤੀ ਹੈ। ਜਿਸਦੇ ਵਿਚੋਂ 4 ਕਰੋੜ 80 ਲੱਖ 63 ਹਜ਼ਾਰ ਰੁਪਏ ਦੀ ਵਾਹੀਯੋਗ ਜ਼ਮੀਨ ਹੈ। ਜਿਸਦੇ ਤਹਿਤ ਪਿੰਡ ਬਾਦਲ ਵਿਖੇ 241 ਕਨਾਲ ਵਾਹੀਯੋਗ ਜ਼ਮੀਨ, ਚੱਕ-14 (ਰਾਜਸਥਾਨ) 1.891 ਹੈਕਟੇਅਰ ਜ਼ਮੀਨ, ਹਰਿਆਣਾ ਦੇ ਬਾਲਾਸਰ ਵਿਖੇ 266 ਕਨਾਲ 16 ਮਰਲੇ ਤੋਂ ਇਲਾਵਾ ਰਾਣੀਆਂ (ਸਿਰਸਾ) ਵਿਖੇ 26 ਕਨਾਲ 17 ਮਰਲੇ ਜ਼ਮੀਨ ਹੈ।

           ਇਸਦੇ ਇਲਾਵਾ ਉਨ੍ਹਾਂ ਕੋਲ ਪਿੰਡ ਬਾਦਲ ਵਿਖੇ 50 ਲੱਖ ਰੁਪਏ ਦੀ ਕੀਮਤ ਵਾਲਾ ਇੱਕ ਰਿਹਾਇਸ਼ੀ ਮਕਾਨ ਹੈ। ਜਦੋਂਕਿ ਮੰਡੀ ਕਿੱਲਿਆਂਵਾਲੀ ਵਿਖੇ 3200 ਸਕੂਐਰ ਫੁੱਟ ਰਕਬੇ ਵਾਲੀ ਇੱਕ ਕਮਰਸ਼ੀਅਲ ਇਮਾਰਤ ਹੈ। ਜਿਸਦੀ ਕੀਮਤ 23 ਲੱਖ 25 ਹਜ਼ਾਰ ਰੁਪਏ ਦਰਸ਼ਾਈ ਗਈ ਹੈ।

ਮੁੱਖ ਮੰਤਰੀ ਬਾਦਲ ਦੇ ਚੋਣ ਜਲਸੇ ਬਰਾਬਰ ਰੋਸ ਜਲਸਾ

ਹੁਣ ਪ੍ਰਕਾਸ਼ ਸਿੰਘ ਬਾਦਲ ਸਾਹਮਣੇ ਆ ਰਹੀਆਂ ਨੇ ਅਕਾਲੀ ਝੰਡਾਬਰਦਾਰਾਂ ਦੀਆਂ ਬੇਨਿਯਮੀਆਂ ਤੇ ਵਿਤਕਰੇਬਾਜ਼ੀਆਂ

                                                               - ਇਕਬਾਲ ਸਿੰਘ ਸ਼ਾਂਤ -
            ਲੰਬੀ : ਪਿਛਲੇ 5 ਸਾਲਾਂ ਵਿਚ ਅਕਾਲੀ-ਭਾਜਪਾ ਗੱਠਜੋੜ ਸਰਕਾਰ ਦੌਰਾਨ ਹਲਕੇ ਲੰਬੀ ਵਿਚ ਅਕਾਲੀ ਦਲ ਦੇ ਝੰਡਾਬਰਦਾਰਾਂ ਵੱਲੋਂ ਕੀਤੀਆਂ ਬੇਨਿਯਮੀਆਂ ਤੇ ਵਿਤਕਰੇਬਾਜ਼ੀ ਭਰੀਆਂ ਕਾਰਗੁਜਾਰੀ ਹੁਣ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਸਾਹਮਣੇ ਆ ਰਹੀਆਂ ਹਨ।
         
              ਅੱਜ ਹਲਕੇ ਦੇ ਪਿੰਡ ਮਿਠੜੀ ਬੁੱਧਗਿਰ ਵਿਖੇ ਮੁਆਵਜੇ ਦੀ ਬਾਂਦਰਵੰਡ ਅਤੇ ਹੋਰ ਸਮੱਸਿਆਵਾਂ ਵਿਚ ਪਿੰਡ ਦੇ ਬਹੁਗਿਣਤੀ ਆਬਾਦੀ ਦੀ ਅਣਦੇਖੀ ਦੇ ਖਿਲਾਫ਼ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਜਲਸੇ ਸਮੇਂ ਪਿੰਡ ਦੇ  ਦੂਸਰੇ ਹਿੱਸੇ ਵਿਚ ਸੈਂਕੜੇ ਕਿਸਾਨਾਂ ਅਤੇ ਮਜ਼ਦੂਰਾਂ ਮਰਦ-ਔਰਤਾਂ ਵੱਲੋਂ ਵਿਸ਼ਾਲ ਮੁਜਾਹਰਾ ਕਰਕੇ ਆਪਣਾ ਰੋਸ ਪ੍ਰਗਟਾਇਆ ਗਿਆ।

             ਪਿੰਡ ਵਿਚ ਮੁੱਖ ਮੰਤਰੀ ਦੇ ਚੋਣ ਜਲਸੇ ਦੇ ਬਰਾਬਰ ਵਿਤਕਰੇਬਾਜ਼ੀ ਅਤੇ ਅਣਦੇਖੀ ਤੋਂ ਰੋਹ ਵਿਚ ਆਏ ਲੋਕਾਂ ਵੱਲੋਂ ਜਲਸਾ ਕਰਨ ਦੀਸੂਚਨਾ ਮਿਲਣ 'ਤੇ ਵੱਡੀ ਗਿਣਤੀ ਵਿਚ ਪੁਲਿਸ ਅਮਲਾ ਮੌਕੇ 'ਤੇ ਪਹੁੰਚ ਗਿਆ ਅਤੇ ਉਨ੍ਹਾਂ ਦੀ  ਘੇਰੇਬੰਦੀ ਕਰ ਲਈ।

                ਇਸੇ ਦੌਰਾਨ ਪਿੰਡ ਦੇ ਕਿਸਾਨ ਦਲਜੀਤ ਸਿੰਘ, ਬਲਤੇਜ ਸਿੰਘ, ਤਰਸੇਮ ਸਿੰਘ, ਬੁੱਧ ਸਿੰਘ ਉਰਫ਼ ਨੀਲਾ ਰੰਗੜ ਅਤੇ ਜਗਜੀਤ ਸਿੰਘ ਨੇ ਜਲਸੇ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਅਕਾਲੀ ਸਰਕਾਰ ਦੌਰਾਨ ਹਾਕਮਾਂ ਵੱਲੋਂ ਪਿੰਡ ਦੇ ਅਜਿਹੇ ਇੱਕਾ-ਦੁੱਕਾ ਸਰਮਾਏਦਾਰਾਂ ਨੂੰ ਚੌਧਰ ਸਾਂਭ ਦਿੱਤੀ ਜਾਂਦੀ ਹੈ। ਜਿਨ੍ਹਾਂ ਵੱਲੋਂ ਆਪਣੇ ਜਗੀਰਦਾਰਾਨਾ ਰਵੱਈਏ ਨਾਲ ਪਿੰਡ ਦੀ ਆਮ ਜਨਤਾ ਨੂੰ ਜਾਨਵਰਾਂ ਤੋਂ ਬਦਤਰ ਸਮਝਿਆ ਜਾਂਦਾ ਹੈ। ਉਨ੍ਹਾਂ ਸੂਬਾ ਸਰਕਰ ਵੱਲੋਂ ਭੇਜੀਆਂ ਕਰੋੜਾਂ ਦੀਆਂ ਗਰਾਟਾਂ ਵਿਚ ਕਥਿਤ ਤੌਰ 'ਤੇ ਵੱਡੀ ਘਪਲੇਬਾਜ਼ੀ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਪਿੰਡ ਦੀ ਜਨਤਾ ਵਿਚ ਸਰਕਾਰੀ ਗਰਾਂਟਾਂ ਦੇ ਸੁਚੱਜੇ ਢੰਗ ਨਾਲ ਨਹੀਂ ਲੱਗਣ ਕਰਕੇ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ।
       
            ਬੁਲਾਰਿਆਂ ਨੇ ਕਿਹਾ ਕਿ ਅਕਾਲੀ ਸਰਕਾਰ ਨੇ ਮੌਕਾਪ੍ਰਸਤ ਲੋਕਾਂ ਨੂੰ ਪਿੰਡਾਂ ਦੇ ਇੰਚਾਰਜ਼ ਥਾਪ ਕੇ ਆਮ ਜਨਤਾ ਦੇ ਗਲੇ ਘੁੱਟਣ ਜਿਹੀ ਕਾਰਗੁਜਾਰੀਆਂ ਨੂੰ ਅੰਜਾਮ ਦਿੱਤਾ ਗਿਆ। ਉਨ੍ਹਾਂ ਪਿਛਲੇ ਪੰਜ ਵਰ੍ਹਿਆਂ ਦੌਰਾਨ ਆਮ ਜਨਤਾ ਦੀ ਜਾਇਜ਼ ਸਮੱਸਿਆਵਾਂ ਅਤੇ ਮੰਗਾਂ ਅੱਖੋਂ ਪਰੋਖੇ ਕੀਤਾ ਗਿਆ, ਜਦੋਂਕਿ ਅਖੌਤੀ ਇੰਚਾਰਜ਼ਾਂ ਦੇ ਹਰੇਕ ਗੈਰਵਾਜਬ ਹੁਕਮ ਅਤੇ ਧੱਕੇਸ਼ਾਹੀਆਂ ਨੂੰ ਲੋਕਹਿੱਤਾਂ 'ਤੇ ਭਾਰੂ ਰਹੇ।

              ਇਸ ਮੌਕੇ ਮੀਂਹਾਂ ਦੇ ਪ੍ਰਭਾਵਿਤਾਂ ਨਾਲ ਹੋਈ ਵਿਤਕਰੇਬਾਜ਼ੀ 'ਤੇ ਬੋਲਦਿਆਂ ਬੁਲਾਰਿਆਂ ਨੇ ਕਿਹਾ ਕਿ ਪਿੰਡ ਦੇ ਸਰਮਾਏਦਾਰਾਂ ਵੱਲੋਂ ਪਟਵਾਰੀ ਦੀ ਕਥਿਤ ਮਿਲੀਭੁਗਤ ਨਾਲ ਚਹੇਤਿਆਂ ਅਤੇ ਕੁਨਬੇ ਦਾ ਢਿੱਡ ਭਰਨ ਲਈ ਗੈਰ ਪ੍ਰਭਾਵਿਤਾਂ ਨੂੰ ਮੁਆਵਜ਼ਾ ਸੂਚੀ ਵਿਚ ਸ਼ਾਮਲ ਕਰ ਦਿੱਤਾ ਗਿਆ। ਜਦੋਂਕਿ ਸੈਂਕੜੇ ਪ੍ਰਭਾਵਿਤ ਕਿਸਾਨ-ਮਜ਼ਦੂਰ ਵੱਡੀ ਮਾਰ  ਹੇਠ ਆਉਣ ਦੇ ਬਾਵਜੂਦ ਅਣਗੌਲਿਏ ਕੀਤੇ ਗਏ। ਦਲਜੀਤ ਸਿੰਘ, ਬਲਤੇਜ ਸਿੰਘ ਅਤੇ ਤਰਸਮੇ ਸਿੰਘ ਨੇ ਦੋਸ਼ ਲਾਇਆ ਕਿ ਪਿੰਡ ਵਿਚ ਵਾਰ-ਵਾਰ ਮੰਗ ਕਰਨ ਦੇ ਬਾਵਜੂਦ ਵਾਟਰ ਵਰਕਸ ਦੀ ਪਾਈਪ ਪਾਈਪ ਨਹੀਂ ਪਾਈ ਗਈ, ਖਾਲਿਆਂ ਦੀ ਪੁਲੀਆਂ ਅਤੇ ਨੱਕਿਆਂ ਨਾ ਬਣਾਉਣ ਤੋਂ ਇਲਾਵਾ ਲੋੜਵੰਦਾਂ ਨੂੰ ਪਖਾਨਿਆਂ ਅਤੇ ਬੀ.ਪੀ.ਐਲ. ਕਾਰਡਾਂ ਤੋਂ ਵਾਂਝਾ ਰੱਖਿਆ ਗਿਆ।
     

         ਪਿੰਡ ਮਿਠੜੀ ਵਿਖੇ ਅਕਾਲੀ ਦਲ ਦੇ ਚੋਣ ਜਲਸੇ ਤੋਂ ਵੱਡਾ ਇਕੱਠ ਰੋਹ ਭਰਪੂਰ ਜਲਸੇ ਵਿਚ ਹੋਣ ਦੀ ਸੂਚਨਾ ਮਿਲਣ 'ਤੇ ਜ਼ਿਲ੍ਹਾ ਵਿਕਾਸ ਕਮੇਟੀ ਦੇ ਚੇਅਰਮੈਨ ਹਰਮੀਤ ਸਿੰਘ ਭੀਟੀਵਾਲਾ ਜਲਸੇ ਵਿਚ ਪੁੱਜਿਆ ਅਤੇ ਲੋਕਾਂ ਦੇ ਰੋਹ ਭਰੇ ਵਿਚਾਰ ਸੁਣੇ।
ਇਸਦੇ ਉਪਰੰਤ ਪਿੰਡ ਦੇ ਅਕਾਲੀ ਆਗੂ ਦੀਆਂ ਊਣਤਾਈਆਂ ਭਰੀਆਂ ਕਾਰਗੁਜਾਰੀਆਂ ਤੋਂ ਤਪੇ ਲੋਕਾਂ ਨੂੰ ਠਾਰ੍ਹਣ ਲਈ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਖੁਦ ਜਲਸੇ ਵਿਚ ਪੁੱਜੇ ਅਤੇ ਲੋਕਾਂ ਦੀਆਂ ਰੋਹ ਭਾਵਨਾਵਾਂ ਅਤੇ ਸਮੁੱਚੀਆਂ ਦੁੱਖ ਤਕਲੀਫ਼ਾਂ ਨੂੰ ਸੁਣਿਆ। ਮੁੱਖ ਮੰਤਰੀ ਨੇ ਪ੍ਰਭਾਵਿਤਾਂ ਨੂੰ ਪੁਰਾਣੇ ਗਿਲੇ ਸ਼ਿਕਵੇ ਅਤੇ ਹੱਡ ਬੀਤੀਆਂ ਨੂੰ ਭੁਲਾ ਕੇ ਉਨ੍ਹਾਂ ਨੂੰ ਵੱੱਡੇ ਫ਼ਰਕ ਨਾਲ ਜਿਤਾਉਣ ਦੀ ਅਪੀਲ ਕੀਤੀ।
       
             ਇੱਥੇ ਜ਼ਿਕਰਯੋਗ ਹੈ ਕਿ ਲੰਬੀ ਹਲਕੇ ਦੇ ਦਰਜਨਾਂ ਪਿੰਡਾਂ ਵਿਚ ਮੀਂਹਾਂ ਤੋਂ ਪ੍ਰਭਾਵਿਤ ਸੈਂਕੜੇ ਪਰਿਵਾਰਾਂ ਦੇ ਨਾਂਅ ਮੁਆਵਜਾ ਸੂਚੀਆਂ ਵਿਚ ਨਾ ਹੋਣ ਕਰਕੇ ਪ੍ਰਭਾਵਿਤ ਕਿਸਾਨਾਂ ਅਤੇ ਮਜ਼ਦੂਰਾਂ ਵਿਚ ਕਾਫ਼ੀ ਰੋਸ ਪਾਇਆ ਜਾ ਰਿਹਾ ਹੈ।

ਸੰਘਣੇ ਕੋਹਰੇ 'ਤੇ ਭਾਰੂ ਪੈ ਰਿਹੈ ਤਿੰਨੇ ਬਾਦਲ ਭਰਾਵਾਂ ਦਾ ਚੋਣ ਪ੍ਰਚਾਰ

                                 -ਲੋਂਗ ਕੋਟ ਅਤੇ ਦਸਤਾਨੇ ਠੰਡ ਤੋਂ ਬਚਾਅ ਲਈ ਪਾਸ਼ ਦਾ ਵੱਡਾ ਸਹਾਰਾ-
                          -ਦਾਸ ਨੂੰ ਹੁਣ ਬਾਹਵਾ ਕੰਮ ਆ ਰਿਹੈ 'ਪਾਸ਼' ਵੱਲੋਂ ਲਿਆ ਕੇ ਦਿੱਤਾ ਵਿਲਾਇਤੀ ਲੋਂਗ ਕੋਟ-
              - ਠੰਡ ਤੋਂ ਬਚਾਅ ਲਈ ਸਵੈਟਰ ਅਤੇ ਲੋਈ ਦੀ ਬੁੱਕਲ ਨੂੰ ਬਿਹਤਰ ਮੰਨਦੇ ਨੇ ਮਹੇਸ਼ਇੰਦਰ ਬਾਦਲ-
                                                                        -ਇਕਬਾਲ ਸਿੰਘ ਸ਼ਾਂਤ-
ਲੰਬੀ : ਪੰਜਾਬ ਵਿਧਾਨਸਭਾ ਚੋਣਾਂ-2012 ਦੌਰਾਨ ਸਭ ਤੋਂ ਵਕਾਰੀ ਚੋਣ ਦੰਗਲ ਦਾ ਰੁਤਬਾ ਰੱਖਦੇ ਲੰਬੀ ਵਿਧਾਨਸਭਾ ਹਲਕੇ ਵਿਚ ਤਿੰਨ ਬਾਦਲ ਭਰਾਵਾਂ ਵਿਚਕਾਰ ਭਖੇ ਚੋਣ ਦੰਗਲ ਦੀ ਗਰਮਾਹਟ ਅਤਿ ਦੀ ਠੰਡ ਅਤੇ ਸੰਘਣੇ ਕੋਹਰੇ 'ਤੇ ਭਾਰੂ ਪੈ ਰਹੀ ਹੈ। ਜਿੱਥੇ ਅਜਿਹੇ ਕੋਹਰੇ ਭਰੇ ਦਿਨ ਵਿਚ ਆਮ ਤੌਰ 'ਤੇ ਘਰਾਂ ਵਿਚੋਂ ਬਾਹਰ ਨਿਕਲਣ ਤੋਂ ਗੁਰੇਜ਼ ਕੀਤਾ ਜਾਂਦਾ ਹੈ, ਉਥੇ ਆਪਣੀ ਸਿਆਸੀ ਜ਼ਿੰਦਗੀ ਦਾਅ 'ਤੇ ਲੱਗੇ ਹੋਣ ਕਰਕੇ ਤਿੰਨੇਂ ਭਰਾਵਾਂ ਵੱਲੋਂ ਇੱਕ ਦੂਸਰੇ ਨੂੰ ਢਹਿ-ਢੇਰੀ ਕਰਨ ਲਈ ਠੰਡ ਅਤੇ ਸੰਘਣੇ ਕੋਹਰੇ ਦੀ ਪਰਵਾਹ ਨਹੀਂ ਕੀਤੀ ਜਾ ਰਹੀ।
            ਸੰਘਣੇ ਕੋਹਰੇ ਦੇ ਬਾਵਜੂਦ ਅਕਾਲੀ ਦਲ ਦੇ 86 ਸਾਲਾ ਉਮੀਦਵਾਰ ਸ: ਪ੍ਰਕਾਸ਼ ਸਿੰਘ ਬਾਦਲ, ਕਾਂਗਰਸ ਦੇ ਉਮੀਦਵਾਰ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਅਤੇ ਪੀ.ਪੀ.ਪੀ. ਦੇ ਦੇ ਉਮੀਦਵਾਰ ਸ: ਗੁਰਦਾਸ ਸਿੰਘ ਬਾਦਲ ਨੇ ਲੰਬੀ ਹਲਕੇ ਦੇ ਦੂਰ-ਦਰਾਜ ਦੇ ਪਿੰਡਾਂ ਵਿਚ ਵੱਡੇ ਪੱਧਰ 'ਤੇ ਚੋਣ ਮੁਹਿੰਮ ਵਿੱਢੀ ਹੋਈ ਹੈ ਤੇ ਪਿੰਡਾਂ ਵਿਚ ਲਗਾਤਾਰ ਚੋਣ ਜਲਸੇ ਕੀਤੇ ਜਾ ਰਹੇ ਹਨ। ਉਂਝ ਕੋਹਰੇ ਕਰਕੇ ਚੋਣ ਪ੍ਰਚਾਰ ਵਿਚ ਰੁੱਝੇ ਉਮੀਦਵਾਰਾਂ ਦੇ ਕਾਫ਼ਲਿਆਂ ਨੂੰ ਆਵਾਜਾਈ ਵਿਚ ਕਾਫ਼ੀ ਦਿੱਕਤਾਂ ਵੀ ਦਰਪੇਸ਼ ਆ ਰਹੀਆਂ ਹਨ।
               ਭਾਵੇਂ ਤਿੰਨੇ ਉਮੀਦਵਾਰਾਂ ਨਾਲ ਚੱਲ ਰਹੇ ਵਰਕਰਾਂ 'ਚ ਚੋਣ ਪ੍ਰਚਾਰ ਪ੍ਰਤੀ ਕਾਫ਼ੀ ਉਤਸ਼ਾਹ ਪਾਇਆ ਜਾ ਰਿਹਾ ਹੈ ਪਰ ਫਿਰ ਉਨ੍ਹਾਂ ਦੇ ਚਿਹਰਿਆਂ 'ਤੇ ਤਿੱਖੀ ਠੰਡ ਦਾ ਅਸਰ ਕਿਤੇ ਨਾ ਕਿਤੇ ਵਿਖਾਈ ਦਿੰਦਾ ਹੈ। ਇਸਦੇ ਬਾਵਜੂਦ 85 ਸਾਲਾ ਅਕਾਲੀ ਸਿਆਸਤ ਦੇ ਬਾਬਾ ਬੋਹੜ ਪ੍ਰਕਾਸ਼ ਸਿੰਘ ਬਾਦਲ ਆਪਣੇ ਭਰਾਵਾਂ ਦੇ ਚੱਕਰਵਿਊ ਤੋਂ ਬਚਣ ਖਾਤਰ ਠੰਡ ਨੂੰ ਦਰਕਿਨਾਰਰ ਕਰਕੇ ਸਵੇਰੇ ਤੋਂ ਰਾਤ ਤੱਕ ਕਾਂਗਰਸ ਅਤੇ ਪੀ.ਪੀ.ਪੀ. ਨੂੰ ਕੋਸਦੇ ਹੋਏ ਸਿਆਸੀ ਸ਼ਰੀਕਾਂ 'ਤੇ ਅਸਿੱਧੇ ਵਾਰ ਕਰਕੇ ਖੁਦ ਨੂੰ ਗਰਮੀ ਦੇ ਰਹੇ ਹਨ। ਉਹ ਕੁੜਤੇ-ਪਜਾਮੇ ਦੀ ਰਵਾਇਤੀ ਪੌਸ਼ਾਕ ਦੇ ਨਾਲ ਬਿਨ੍ਹਾਂ ਬਾਹਾਂ ਵਾਲੀ ਜਾਕੇਟ ਦੇ ਉੱਪਰੋਂ ਲੋਂਗ ਕੋਟ ਅਤੇ ਹੱਥਾਂ ਵਿਚ ਦਸਤਾਨੇ ਅਤੇ ਪੈਰਾਂ 'ਚ ਗਰਮ ਜ਼ੁਰਾਬਾਂ ਪਹਿਨਣ ਨੂੰ ਤਰਜੀਹ ਦਿੰਦੇ ਹਨ, ਉਥੇ ਮੁੱਖ ਮੰਤਰੀ ਦੇ ਛੋਟੇ ਭਰਾ ਅਤੇ ਪੀ.ਪੀ.ਪੀ. (ਸਾਂਝਾ ਮੋਰਚਾ) ਦੇ ਉਮੀਦਵਾਰ ਸ. ਗੁਰਦਾਸ ਸਿੰਘ ਬਾਦਲ ਵੀ ਸਫ਼ੈਦ ਕੁੜਤੇ -ਪਜਾਮੇ ਅਤੇ ਲੋਂਗ ਕੋਟ ਨੂੰ ਠੰਡ ਤੋਂ ਬਚਾਅ ਲਈ ਵਰਤਦੇ ਹਨ, ਪਰ ਉਹ ਭਾਰੀ ਠੰਡ ਦੇ ਬਾਵਜੂਦ ਦਸਤਾਨੇ ਵਗੈਰਾ ਪਹਿਨਣ ਤੋਂ ਗੁਰੇਜ਼ ਕਰਦੇ ਹਨ। ਉਨ੍ਹਾਂ ਦੇ ਰਵਾਇਤੀ ਅੰਦਾਜ਼ ਦਿੱਤੇ ਭਾਸ਼ਨਾਂ ਵਿਚ ਅਕਾਲੀ ਦਲ 'ਤੇ ਤਿੱਖੇ ਹਮਲੇ ਅਤੇ ਅਕਾਲੀ ਲਫਟੈਨਾਂ ਦੀ ਮੰਦੀਆਂ ਕਾਰਗੁਜਾਰੀਆਂ ਦਾ ਖਾਸਾ ਜ਼ਿਕਰ ਹੁਦਾ ਹੈ ਜਿਹੜਾ ਆਰਥਿਕ ਮੰਦਹਾਲੀ 'ਚ ਖੁੱਭੇ ਲੋਕਾਂ ਨੂੰ ਕਾਫ਼ੀ ਸੁਖਾਵਾਂਪਨ ਅਤੇ  ਗਰਮਾਹਟ ਦੇਣ ਵਾਲਾ ਹੁੰਦਾ ਹੈ।
                 ਇਸ ਸਬੰਧ ਵਿਚ ਜਦੋਂ 82 ਸਾਲਾ ਦਾਸ ਹੁਰਾਂ ਤੋਂ ਚੋਣ ਪ੍ਰਚਾਰ 'ਤੇ ਠੰਡ ਅਤੇ ਕੋਹਰੇ ਦੇ ਅਸਰ ਬਾਰੇ ਪੁੱਛੇ ਜਾਣ 'ਤੇ ਉਨ੍ਹਾਂ ਕਿਹਾ ਕਿ ''ਚੋਣ ਪ੍ਰਚਾਰ ਠੰਡ ਤੋਂ ਬਚਾਅ ਲਈ ਵਿਲਾਇਤੀ ਕੋਟ (ਚੈਸਟਰ) ਨੂੰ ਪਾਉਂਦੇ ਹਨ। ਜਿਹੜਾ ਉਨ੍ਹਾਂ ਨੂੰ ਬਾਦਲ ਸਾਬ੍ਹ (ਪਾਸ਼) ਨੇ ਬਾਹਰੋਂ ਲਿਆ ਕੇ ਦਿੱਤਾ ਸੀ। ਦਾਸ ਹੁਰਾਂ ਨੇ ਹੱਸਦਿਆਂ ਕਿਹਾ ਕਿ ਹੁਣ ਇਹੋ ਵਿਲਾਇਤੀ ਕੋਟ ਵੱਡੇ ਬਾਦਲ ਸਾਬ੍ਹ ਲਈ ਹੀ ਬਾਹਵਾ ਕੰਮ ਆ ਰਿਹੈ।
               ਜਦੋਂਕਿ ਪਾਸ਼ ਅਤੇ ਦਾਸ ਦੇ ਉਲਟ ਕੜਾਕੇ ਦੀ ਠੰਡ ਦੇ ਬਾਵਜੂਦ 52 ਸਾਲਾ ਕਾਂਗਰਸੀ ਉਮੀਦਵਾਰ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਚੋਣ ਪ੍ਰਚਾਰ ਦੌਰਾਨ ਇੱਕ ਸਧਾਰਨ ਕਿਸਾਨ ਵਾਂਗ ਆਪਣੇ ਰੋਜ਼ਾਨਾ ਦੇ ਪਹਿਰਾਵੇ ਕੁੜਤੇ ਪਜਾਮੇ ਅਤੇ ਵਗੈਰ ਜੁਰਾਬਾਂ ਤੋਂ ਦੇਸੀ ਜੁੱਤੀ ਪਹਿਨਦੇ ਹਨ। ਜਦੋਂਕਿ ਉਨ੍ਹਾਂ ਵੱਲੋਂ ਤਿੱਖੀ ਠੰਡ ਤੋਂ ਬਚਾਅ ਲਈ ਸਿਰਫ਼ ਇੱਕ ਸਵੈਟਰ ਅਤੇ ਇੱਕ ਲੋਈ ਦੀ ਬੁੱਕਲ ਨੂੰ ਗਰਮ ਡਰੈੱਸ ਵਜੋਂ ਵਰਤਿਆ ਜਾਂਦਾ ਹੈ। ਜਿਨ੍ਹਾਂ ਦੀ ਸਾਊ ਅਤੇ ਨਿਮਰਤਾ ਭਰੀ ਤਕਰੀਰ ਵਿਚ ਕੈਪਟਨ ਸਰਕਾਰ ਦੇ ਵੱਲੋਂ ਪਾਣੀਆਂ ਨੂੰ ਬਚਾਉਣ ਲਈ ਪਾਸ ਕੀਤੇ ਮਤੇ ਅਤੇ ਸੇਮ ਦੀ ਸਮੱਸਿਆ ਦੇ ਜ਼ਿਕਰ ਤੋਂ ਇਲਾਵਾ ਅਕਾਲੀ ਸਰਕਾਰ ਦੌਰਾਨ ਹੋਈਆਂ ਧੱਕੇਸ਼ਾਹੀਆਂ ਅਤੇ ਸ਼ਗੁਨ ਸਕੀਮ, ਪੈਨਸ਼ਨ ਅਤੇ ਸਰਕਾਰੀ ਫੰਡਾਂ ਵਿਚ ਦਰਵਰਤੋਂ ਜਿਹੇ ਨੁਕਤੇ  ਮੁੱਖ ਵਿਸ਼ਾ ਹੁੰਦੇ ਹਨ।
                 ਕਾਂਗਰਸ ਉਮੀਦਵਾਰ ਵਜੋਂ ਪਿੰਡਾਂ 'ਚ ਚੋਣ ਪ੍ਰਚਾਰ ਦੇ ਪਹਿਲੇ ਹੀ ਦਿਨ ਕੜਾਕੇ ਦੀ ਠੰਡ ਪੈਣ ਬਾਰੇ ਪੁੱਛੇ ਜਾਣ 'ਤੇ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਿਹਾ ਕਿ ਤਿੱਖੀ ਠੰਡ ਅਤੇ ਸੰਘਣੇ ਕੋਹਰੇ ਨੇ ਚੋਣਾਂ ਦੀ ਗਰਮੀ ਨੂੰ ਕਾਫ਼ੀ ਰੌਚਿਕ ਜਿਹਾ ਮਾਹੌਲ ਪ੍ਰਦਾਨ ਕਰ ਦਿੱਤਾ ਹੈ।
                 ਇਸ ਵਕਾਰੀ ਹਲਕੇ ਵਿਚ ਬਾਦਲ ਖਾਨਦਾਨ ਦੇ ਤਿੰਨ ਭਰਾਵਾਂ ਵਿਚਕਾਰ ਮੁਕਾਬਲੇ ਕਰਕੇ ਆਮ ਜਨਤਾ ਨੂੰ ਐਤਕੀਂ ਠੰਡ ਦੇ ਮੌਸਮ ਵਿਚ ਤਿੰਨੇ ਭਰਾਵਾਂ ਵੱਲੋਂ ਸਿੱਧੀਆਂ-ਅਸਿੱਧੀਆਂ ਸਿਆਸੀ ਨੁਕਤਾਚੀਨੀਆਂ ਰਾਹੀਂ ਗਰਮਾਹਟ ਭਰਿਆ ਮਾਹੌਲ ਮਿਲ ਰਿਹਾ ਹੈ।

ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਖੌਫ਼ ਅਕਾਲੀਆਂ ਦੇ ਮਨ 'ਤੇ ਛਾਇਆ ਰਿਹਾ

                                                                  ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਕੱਲ੍ਹ ਪਿੰਡ ਕੰਦੂਖੇੜਾ ਵਿਖੇ ਮੁੱਖ ਮੰਤਰੀ ਦਾ ਚੋਣ ਜਲਸਾ ਕਮਿਊਨਿਟੀ ਸੈਂਟਰ ਦੇ ਰਕਬੇ ਵਿਚ ਹੋਣ ਸਬੰਧ ਰਿਪੋਰਟਾਂ ਨਸ਼ਰ ਹੋਣ ਦਾ ਖੌਫ਼ ਪ੍ਰਸ਼ਾਸਨਕ ਤੰਤਰ ਅਤੇ ਅਕਾਲੀ ਵਰਕਰਾਂ ਵਿਚ ਕਾਫ਼ੀ ਹੱਦ ਤੱਕ ਵੇਖਣ ਨੂੰ ਮਿਲਿਆ। ਅੱਜ ਮੁੱਖ ਮੰਤਰੀ ਵੱਲੋਂ ਪਿੰਡ ਲਾਲਬਾਈ ਵਿਖੇ ਆਰ.ਓ. ਦੇ ਨਾਲ ਖਹਿੰਦੀ ਪੰਚਾਇਤੀ ਜ਼ਮੀਨ 'ਤੇ ਕੀਤੇ ਜਾ ਰਹੇ ਚੋਣ ਜਲਸੇ ਦੀਆਂ ਤਸਵੀਰਾਂ ਖਿੱਚਣ 'ਤੇ ਜਿੱਥੇ ਉੱਪ ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਅਵਤਾਰ ਵਣਵਾਲਾ ਅਤੇ ਮਾਰਕਫੈੱਡ ਦੇ ਨਿਦੇਸ਼ਕ ਅਤੇ ਸੀਨੀਅਰ ਅਕਾਲੀ ਆਗੂ ਤੇਜਿੰਦਰ ਸਿੰਘ ਮਿੱਡੂਖੇੜਾ ਹੁਰੇ ਪੱਤਰਕਾਰਾਂ ਤੋਂ ਮਿੱਤਰਪੁਣੇ ਅਤੇ ਚੰਗੇਰੇ ਸੰਬੰਧਾਂ ਦੀ ਦੁਹਾਈ ਦੇ ਕੇ ਵਿਚ ਕੈਮਰੇ ਮੁਹਰੇ ਖੜ੍ਹੇ ਹੋ ਕੇ ਫੋਟੋਗਰਾਫ਼ੀ ਨਾ ਕਰਨ ਦੀ ਅਪੀਲ ਕਰਦੇ ਰਹੇ। ਜਦੋਂਕਿ ਇਸ ਦੌਰਾਨ ਅਕਾਲੀ ਵਰਕਰ ਵਜੋਂ ਵਿਚਰਦੇ ਜਾਪਦੇ ਮੁੱਖ ਮੰਤਰੀ ਦੇ ਸੁਰੱਖਿਆ ਅਮਲੇ ਦੇ ਕੁਝ ਕਰਮਚਾਰੀ ਵੀ ਟੇਢੀਆਂ ਅੱਖਾਂ ਨਾਲ ਪ੍ਰਭਾਵ ਪਾਉਣ ਦੀ ਕੋਸ਼ਿਸ਼ ਕਰਦੇ ਮਹਿਸੂਸ ਕੀਤੇ ਗਏ।
ਇਸੇ ਤਰ੍ਹਾਂ ਹਲਕੇ ਦੇ ਪਿੰਡ ਥਰਾਜਵਾਲਾ ਵਿਖੇ ਵੀ ਖੇਡ ਸਟੇਡੀਅਮ 'ਚ ਹੋ ਰਹੇ ਜਲਸੇ ਦੀਆਂ ਫੋਟੋਆਂ ਖਿੱਚਣ 'ਤੇ ਉਥੇ ਮੌਜੂਦ ਆਯੋਜਕਾਂ ਵਿਚ ਸਹਿਮ ਜਿਹਾ ਦੌੜ ਗਿਆ ਤੇ ਉਨ੍ਹਾਂ ਵੱਲੋਂ ਤੁਰੰਤ ਸਟੇਡੀਅਮ ਵਿਚ ਬਣੇ ਜਿੰਮ ਦੇ ਕਮਰੇ ਦੀ ਕੰਧ 'ਤੇ ਲਿਖੇ ਨਾਂਅ ਜਿੰਮ ਖਾਨਾ ਪਿੰਡ ਥਰਾਜਵਾਲਾ 'ਤੇ ਕਰਮਚਾਰੀਆਂ ਨੂੰ ਪੌੜੀ ਲਾ ਕੇ ਇੱਕ ਗੰਦੀ ਜਿਹੀ ਪੱਲੀ ਨਾਲ ਢਕਵਾ ਕੇ ਲੁਕੋਣ ਦੀ ਕੋਸ਼ਿਸ਼ ਸ਼ੁਰੂ ਕਰ ਦਿੱਤੀ। ਇਸੇ ਦੌਰਾਨ ਚੋਣ ਕਮਿਸ਼ਨ ਵੱਲੋਂ ਨਿਯੁਕਤ ਸ੍ਰੀ ਅਮਰਜੀਤ ਸਿੰਘ ਸਿੱਧੂ  ਦੀ ਅਗਵਾਈ ਵਾਲੀ ਟੀਮ ਵੱਲੋਂ ਮੌਕੇ 'ਤੇ ਪਹੁੰਚ ਕੇ ਪੰਡਾਲ ਵਗੈਰਾ ਦੀ ਨਿਯਮਾਂ ਅਨੁਸਾਰ ਵੀਡੀਓਗਰਾਫ਼ੀ ਕਰਵਾਈ ਗਈ।



ਮੁੱਖ ਮੰਤਰੀ ਦੇ ਅਹੁਦੇ ਲਈ ਕਾਂਗਰਸੀਆਂ ਵਿਚਕਾਰ ਘਸਮਾਨ ਮੱਚਿਆ ਹੋਇਐ : ਬਾਦਲ  
                                                          ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਕਾਂਗਰਸ ਆਗੂਆਂ ਵਿਚਕਾਰ ਮੁੱਖ ਮੰਤਰੀ ਦੇ ਅਹੁਦੇ ਨੂੰ ਲੈ ਕੇ ਘਸਮਾਨ ਮੱਚਿਆ ਹੋਇਆ ਹੈ। ਕੈਪਟਨ ਅਮਰਿੰਦਰ, ਬੀਬੀ ਭੱਠਲ, ਪ੍ਰਤਾਪ ਬਾਜਵਾ ਸਮੇਤ ਕਈ ਹੋਰ ਮੁੱਖ ਮੰਤਰੀ ਦੇ ਅਹੁਦੇ ਲਈ ਹੁਣੇ ਤੋਂ ਤਰਲੋਮੱਛੀ ਹੋਈ ਫਿਰਦੇ ਨੇ, ਜਦੋਂਕਿ ਕਾਂਗਰਸ ਅਜੇ ਤੱਕ ਆਪਣੀਆਂ ਟਿਕਟਾਂ ਦਾ ਐਲਾਨ ਨਹੀਂ ਕਰ ਸਕੀ।
ਉਹ ਅੱਜ ਲੰਬੀ ਹਲਕੇ ਦੇ ਪਿੰਡਾਂ ਲੰਬੀ, ਬੀਦੋਵਾਲੀ, ਲਾਲਬਾਈ, ਥਰਾਜਵਾਲਾ ਸਮੇਤ ਵੱਖ-ਵੱਖ ਪਿੰਡਾਂ ਵਿਚ ਚੋਣ ਜਲਸਿਆਂ ਨੂੰ ਸੰਬੋਧਨ ਕਰ ਰਹੇ ਸਨ।
ਉਨ੍ਹਾਂ ਕਾਂਗਰਸ ਨੂੰ ਦੇਸ਼ ਦੀ ਆਰਥਿਕ ਅਤੇ ਸਮਾਜਿਕ ਤਬਾਹੀ ਲਈ ਜੁੰਮੇਵਾਰ ਕਰਾਰ ਦਿੰਦਿਆਂ ਕਿਹਾ ਕਿ ਕਾਂਗਰਸ ਨੇ ਭਾਰਤ ਨੂੰ ਦੁਨੀਆਂ ਦੇ ਸਭ ਵੱਧ ਗਰੀਬੀ, ਬੇਰੁਜ਼ਗਾਰੀ ਅਤੇ ਭ੍ਰਿਸ਼ਟ ਮੁਲਕਾਂ ਦੀ ਮੁਹਰਲੀ ਕਤਾਰ ਵਿਚ ਲਿਆ ਖੜ੍ਹਾ ਕੀਤਾ ਹੈ। ਉਨ੍ਹਾਂ ਕਾਂਗਰਸ ਦੇ 50 ਸਾਲਾਂ ਦੇ ਰਾਜ ਦੀ ਤੁਲਣਾ ਪੰਜਾਬ ਦੀ ਅਕਾਲੀ ਭਾਜਪਾ ਸਰਕਾਰ ਦੇ 5 ਸਾਲਾਂ ਨਾਲ ਕਰਦਿਆਂ ਆਖਿਆ ਕਿ ਕੇਂਦਰ ਦੇ ਬੇਰੱਖੇ ਰਵੱਈਏ ਦੇ ਬਾਵਜੂਦ ਅਕਾਲੀ-ਭਾਜਪਾ ਸਰਕਾਰ ਨੇ ਸੂਬੇ ਵਿਚ ਵਿਕਾਸ ਨੂੰ ਨਵੀਂ ਦਿਸ਼ਾ ਦਿੱਤੀ।
ਸ੍ਰੀ ਬਾਦਲ ਨੇ ਕਾਂਗਰਸੀ ਸਰਕਾਰਾਂ ਨੂੰ ਵਿਖਾਵੇ ਦੀਆਂ ਸਰਕਾਰਾਂ ਕਰਾਰ ਦਿੰਦਿਆਂ ਕਿਹਾ ਕਿ ਇਨ੍ਹਾਂ ਦੀਆਂ ਸਰਕਾਰਾਂ ਦਾ ਲੋਕ ਹਿੱਤਾਂ ਦੂਰ-ਦੂਰ ਤੱਕ ਕੋਈ ਵਾਸਤਾ ਨਹੀਂ ਹੁੰਦਾ।
ਉਨ੍ਹਾਂ ਪਿੰਡ ਲਾਲਬਾਈ ਵਿਖੇ ਚੋਣ ਜਲਸੇ ਦੌਰਾਨ ਪੀ. ਪੀ. ਪੀ. ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਬਾਦਲ 'ਤੇ ਤਿੱਖੇ ਹਮਲੇ ਕਰਦਿਆਂ ਲੋਕਾਂ ਨੂੰ ਉਸਦੀ ਪਾਰਟੀ ਤੋਂ ਪਾਸਾ ਵੱਟਣ ਦੀ ਅਪੀਲ ਕੀਤੀ।
 ਇਸਤੋਂ ਪਹਿਲਾਂ ਪਿੰਡ ਬੀਦੋਵਾਲੀ ਵਿਖੇ ਚੋਣ ਜਲਸੇ ਵਿਚ ਕਾਫ਼ੀ ਗਿਣਤੀ ਵਿਚ ਕੁਰਸੀਆਂ ਖਾਲੀ ਪਈਆਂ ਸਨ। ਜਿੱਥੇ ਮੁੱਖ ਮੰਤਰੀ ਨੇ ਆਪਣੇ ਭਾਸ਼ਨ ਵਿਚ ਅਕਾਲੀ ਸਰਕਾਰ ਦੌਰਾਨ ਰਹੀਆਂ ਕਮੀਆਂ ਨੂੰ ਦਰਬਦਰ ਕਰਕੇ ਮੁੜ ਤੋਂ ਲੰਬੀ ਹਲਕੇ ਵਿਚ ਸੱਤਾ ਦਾ ਪਾਵਰ ਗਰਿੱਡ ਲਿਆਉਣ ਦੀ ਅਪੀਲ ਕਰਦਿਆਂ ਕਿਹਾ ਕਿ ਬਿਜਲੀ ਦੇ ਟਰਾਂਸਫਾਰਮਰ (ਐਮ.ਐਲ.ਏ.) ਨਾਲ ਕੋਈ ਵਿਕਾਸ ਨਹੀਂ ਹੋ ਸਕਦਾ, ਜਦੋਂਕਿ ਮੁੱਖ ਮੰਤਰੀ ਦੀ ਕੁਰਸੀ ਪਾਵਰ ਗਰਿੱਡ ਦਾ ਆਪਣਾ ਰੁਤਬਾ ਹੈ। ਪਿੰਡ ਬੀਦੋਵਾਲੀ ਵਿਖੇ ਮੁੱਖ ਮੰਤਰੀ ਦੇ ਚੋਣ ਜਲਸੇ ਵਿਚ ਕਾਫ਼ੀ ਗਿਣਤੀ ਖਾਲੀ ਪਈਆਂ ਕੁਰਸੀਆਂ ਵੀ ਚਰਚਾ ਦਾ ਵਿਸ਼ਾ ਬਣੀਆਂ ਰਹੀਆਂ। ਚੋਣ ਜਲਸੇ ਵਿਚ ਪੱਤਰਕਾਰਾਂ ਵੱਲੋਂ ਤਸਵੀਰਾਂ ਖਿੱਚਣ 'ਤੇ ਅਕਾਲੀ ਵਰਕਰ ਖਾਲੀ ਕੁਰਸੀਆਂ ਭਰਨ ਦੀ ਕੋਸ਼ਿਸ਼ ਦੇ ਤਹਿਤ ਮਹਿਜ਼ ਤਿੰਨ-ਚਾਰ ਵਿਅਕਤੀਆਂ ਨੂੰ ਬਿਠਾਉਣ ਵਿਚ ਸਫ਼ਲ ਹੋਏ।
ਇਸ ਮੌਕੇ ਮੁੱਖ ਮੰਤਰੀ ਦੇ ਪੰਜਾਬ ਪਬਲਿਕ ਸਰਵਿਸ ਕਮਿਸ਼ਨ ਦੇ ਸਾਬਕਾ ਮੈਂਬਰ ਅਤੇ ਅਕਾਲੀ ਆਗੂ ਸ੍ਰੀ ਪਰਮਜੀਤ ਸਿੰਘ 'ਲਾਲੀ ਬਾਦਲ', ਲਾਲੀ ਕਾਲਝਰਾਨੀ ਅਤੇ ਗੁਰਮੇਹਰ ਸਿੰਘ ਬਾਦਲ, ਤੇਜਿੰਦਰ ਸਿੰਘ ਮਿੱਡਖੇੜਾ, ਅਵਤਾਰ ਸਿੰਘ ਵਣਵਾਲਾ, ਐਸ.ਓ.ਆਈ. ਦੇ ਜ਼ਿਲ੍ਹਾ ਪ੍ਰਧਾਨ ਅਕਾਸ਼ਦੀਪ ਮਿੱਡੂਖੇੜਾ, ਭੁਪਿੰਦਰ ਸਿੰਘ ਮਿੱਡੂਖੇੜਾ, ਰਣਯੋਧ ਲੰਬੀ ਸਮੇਤ ਵੱਖ-ਵੱਖ ਆਗੂ ਅਤੇ ਵਰਕਰ ਵੀ ਮੌਜੂਦ ਸਨ।

ਮਹੇਸ਼ਇੰਦਰ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਚੋਣ ਪ੍ਰਚਾਰ ਦਾ ਆਗਾਜ਼

                                         ਐਤਕੀਂ ਲੰਬੀ 'ਚ ਭਿੜਨਗੇ ਤਿੰਨ ਬਾਦਲ
                                                                 ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਦੁਨੀਆਂ ਭਰ ਦੇ ਪੰਜਾਬੀਆਂ ਦੀ ਦਿਲਚਸਪੀ ਦਾ ਕੇਂਦਰ ਬਣੇ ਲੰਬੀ ਵਿਧਾਨਸਭਾ ਹਲਕੇ ਵਿਚ ਅੱਜ ਅੱਜ ਤਿੰਨ ਬਾਦਲਾਂ ਵਿਚਾਲੇ ਤਿਕੋਣੀ ਸਿਆਸੀ ਜੰਗ ਦਾ ਬਿਗੁਜ ਵੱਜ ਗਿਆ। ਕਾਂਗਰਸ ਪਾਰਟੀ ਦੀ ਹਾਈਕਮਾਂਡ ਵੱਲੋਂ ਹਰੀ ਝੰਡੀ ਮਿਲਣ ਉਪਰੰਤ ਪਾਰਟੀ ਦੇ ਉਮੀਦਵਾਰ ਵਜੋਂ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਅੱਜ ਆਪਣੇ ਜੱਦੀ ਪਿੰਡ ਬਾਦਲ ਤੋਂ ਆਪਣੀ ਚੋਣ ਮੁਹਿੰਮ ਦਾ ਆਗਾਜ਼ ਕਰ ਦਿੱਤਾ।

          ਸ੍ਰੀ ਮਹੇਸ਼ਇੰਦਰ ਸਿੰੰਘ ਬਾਦਲ ਨੇ ਸਵੇਰੇ ਪਿੰਡ ਬਾਦਲ ਦੇ ਗੁਰਦੁਆਰਾ ਵਿਖੇ ਅਰਦਾਸ ਕਰਨ ਉਪਰੰਤ ਮੰਦਰ, ਪ੍ਰਾਚੀਨ ਸਮਾਧ ਅਤੇ ਮਸੀਤ 'ਤੇ ਨਤਮਸਤਕ ਹੋਣ ਤੋਂ ਉਪਰੰਤ ਬਕਾਇਦਾ ਪਿੰਡ ਦੇ ਘਰ ਘਰ ਜਾ ਕੇ ਵੋਟਾਂ ਮੰਗੀਆਂ ਅਤੇ ਪਿੰਡ  ਵਾਸੀਆਂ ਤੋਂ ਸਹਿਯੋਗ ਦੀ ਅਪੀਲ ਕੀਤੀ।
    
         ਚੋਣ ਮੁਹਿੰਮ ਦੇ ਆਗਾਜ਼ ਬਾਰੇ ਸੂਚਨਾ ਮਿਲਦੇ ਹੀ ਹਲਕੇ ਦੇ ਪਿੰਡਾਂ ਸੈਂਕੜੇ ਲੋਕ ਆਪ ਮੁਹਾਰੇ ਬਾਦਲ ਪੁੱਜ ਗਏ। ਜਿਨ੍ਹਾਂ ਨੇ ਤਿੰਨ ਵੱਖ-ਵੱਖ ਕਾਫ਼ਲਿਆਂ ਦੇ ਰੂਪ ਵਿੱਚ ਘਰ ਘਰ ਜਾ ਕੇ ਵੋਟਾਂ ਮੰਗੀਆਂ। ਇਸ ਮੌਕੇ ਸ੍ਰ: ਮਹੇਸ਼ਇੰਦਰ ਬਾਦਲ  ਇਲਾਵਾ ਕਾਫ਼ਲਿਆਂ ਦੀ ਅਗਵਾਈ ਸਾਬਕਾ ਟਰਾਂਸਪੋਰਟ ਮੰਤਰੀ ਸ੍ਰ: ਹਰਦੀਪਇੰਦਰ ਸਿੰਘ ਬਾਦਲ, ਪੰਜਾਬ ਕਾਂਗਰਸ ਦੇ ਸੀਨੀਅਰ  ਗੁਰਮੀਤ ਸਿੰਘ ਖੁੱਡੀਆਂ, ਰਣਧੀਰ ਸਿੰਘ ਧੀਰਾ ਅਤੇ ਬਾਦਲ ਪਿੰਡ ਦੇ ਸਾਬਕਾ ਸਰਪੰਚ ਸੰਜਮ ਸਿੰਘ ਢਿੱਲੋ, ਸਰਬਜੀਤ ਸਿੰਘ ਬਾਦਲ ਕਰ ਰਹੇ ਸਨ। ਚੋਣ ਮੁਹਿੰਮ ਦੇ ਆਗਾਜ਼ ਮੌਕੇ ਵੱਡੀ ਗਿਣਤੀ ਵਿਚ ਕਾਂਗਰਸ ਵਰਕਰ, ਆਗੂ ਅਤੇ ਪਾਰਟੀ ਵਰਕਰਾਂ ਸਮੇਤ ਹਲਕੇ ਦੇ ਸਮੂਹ ਪਿੰਡਾਂ ਦੇ ਸਾਬਕਾ ਕਾਂਗਰਸੀ ਪੰਚ-ਸਰਪੰਚ ਪਹੁੰਚੇ ਹੋਏ ਸਨ।
     
    ਸਾਲ 2007 ਦੀਆਂ ਵਿਧਾਨਸਭਾ ਚੋਣਾਂ ਵਿਚ ਆਪਣੇ ਚਚੇਰੇ ਭਰਾ ਅਕਾਲੀ ਉਮੀਦਵਾਰ ਵਜੋਂ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨਾਲ ਸਖ਼ਤ ਮੁਕਾਬਲੇ ਵਿਚ ਉਨ੍ਹਾਂ ਦੇ ਜਿੱਤ ਦੇ ਫ਼ਰਕ ਨੂੰ ਮਹਿਜ਼ 9200 ਵੋਟਾਂ 'ਤੇ ਲਿਆ ਸਮੇਟਿਆ ਸੀ, ਪਰ ਐਤਕੀਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ 65 ਸਿਆਸੀ ਜੀਵਨ ਦੌਰਾਨ ਉਨ੍ਹਾਂ ਦੇ ਚੋਣ ਪ੍ਰਚਾਰ ਦੀ ਕਮਾਂਡ ਨੂੰ ਚਾਣਕਿਆ ਵਜੋਂ ਸੰਭਾਲਣ ਵਾਲੇ ਉਨ੍ਹਾਂ ਦੇ ਛੋਟੇ ਭਰਾ ਦਾਸ ਖੁਦ ਵੀ ਵਿਰੋਧੀ ਉਮੀਦਵਾਰ ਵਜੋਂ ਮੁੱਖ ਮੰਤਰੀ ਦੇ ਸਾਹਮਣੇ ਲੰਬੀ ਤੋਂ ਸਾਂਝੇ ਮੋਰਚੇ ਦੇ ਉਮੀਦਵਾਰ ਵਜੋਂ ਚੋਣ ਪਿੜ ਵਿਚ ਡਟੇ ਹੋਏ ਹਨ। ਸਿਆਸੀ ਮਾਹਰ ਗੁਰਦਾਸ ਸਿੰਘ ਬਾਦਲ ਦੇ ਲੰਬੀ ਹਲਕੇ ਤੋਂ ਚੋਣ ਮੈਦਾਨ ਵਿੱਚ ਆਉਣ ਨੂੰ ਬਹੁਤ ਜਿਆਦਾ ਅਹਿਮੀਅਤ ਦੇ ਰਹੇ ਹਨ, ਕਿਉਂਕਿ ਪਿਛਲੇ ਕਈ ਦਹਾਕਿਆਂ ਤੋਂ ਵੋਟਰਾਂ ਨਾਲ ਨਾ ਸਿਰਫ ਉਨ੍ਹਾਂ ਨਾਲ ਸਿੱਧਾ ਵਾਹ ਵਾਸਤਾ ਹੈ, ਬਲਕਿ ਉਹ ਆਪਣੇ ਵੱਡੇ ਭਰਾ ਵਾਂਗ ਚੋਣ ਸਿਆਸਤ ਦੀਆਂ ਬਰੀਕੀਆਂ ਦੇ ਮਾਹਰ ਹਨ। ਅਜਿਹੇ ਵਿਚ ਮਹੇਸ਼ਇੰਦਰ ਸਿੰਘ ਦੇ ਚੋਣ ਪਿੜ ਵਿਚ ਆਉਣ ਨਾਲ ਬਦਲੇ ਸਿਆਸੀ ਸਮੀਕਰਨਾਂ ਵਿਚ ਅਕਾਲੀ ਦਲ ਲਈ ਰਾਹ ਪਹਿਲਾਂ ਨਾਲੋਂ ਕਾਫ਼ੀ ਔਖੀ ਬਣ ਗਈ ਹੈ।
    
          ਪਿੰਡ ਬਾਦਲ ਵਿਚ ਚੋਣ ਪ੍ਰਚਾਰ ਦੌਰਾਨ ਸ੍ਰ: ਮਹੇਸਇੰਦਰ ਬਾਦਲ ਨੇ ਕਿਹਾ ਕਿ ਅਕਾਲੀ ਸਰਕਾਰ ਦੇ ਅੰਨ੍ਹੇਵਾਰ ਜ਼ਬਰ-ਜੁਲਮ ਕਰਕੇ ਪਿਛਲੇ ਪੰਜ ਸਾਲਾਂ ਦੇ ਕਾਰਜਕਾਲ ਦੌਰਾਨ ਉਨ੍ਹਾਂ ਦੇ ਕਿਸੇ ਵਰਕਰ ਦਾ ਟੁੱਟਣਾ ਤਾਂ ਦੂਰ ਉਲਟਾ ਅਕਾਲੀ ਦਲ ਨਾਲ ਜੁੜੇ ਉਹ ਵਰਕਰ ਵੀ ਉਨ੍ਹਾਂ ਨਾਲ ਆ ਮਿਲੇ ਹਨ, ਜੋ ਸੱਭਿਅਕ ਸਿਆਸਤ ਵਿੱਚ ਵਿਸ਼ਵਾਸ ਰੱਖਦੇ ਹਨ। ਉਨ੍ਹਾਂ ਕਿਹਾ ਕਿ ਤਿੰਨੇ ਭਰਾਵਾਂ ਵਿਚਕਾਰ ਤਿਕੋਣੇ ਮੁਕਾਬਲੇ ਦੇ ਮੱਦੇਨਜ਼ਰ ਸਾਂਝੇ ਮੋਰਚੇ ਦੇ ਉਮੀਦਵਾਰ ਸ. ਗੁਰਦਾਸ ਸਿੰੰਘ ਬਾਦਲ ਜਿੰਨੀਆਂ ਵੀ ਵੋਟਾਂ ਹਾਸਲ ਕਰਨਗੇ, ਉਸਦਾ ਵੱਡਾ ਹਿੱਸਾ ਅਕਾਲੀ ਦਲ ਦੇ ਵੋਟ ਬੈਂਕ ਨੂੰ ਖੋਰਾ ਲਾਵੇਗਾ। ਨਿਸ਼ਚੈ ਹੀ ਜਿਸਦਾ ਫਾਇਦਾ ਉਨ੍ਹਾਂ (ਮਹੇਸ਼ਇੰਦਰ ਸਿੰਘ) ਨੂੰ ਹੋਵੇਗਾ।
      
          ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਾਂਗਰਸ ਦੀ ਲਿਸਟ ਜਾਰੀ ਹੋਣ ਤੋਂ ਪਹਿਲਾਂ ਹੀ ਚੋਣ ਮੁਹਿੰਮ ਸ਼ੁਰੂ ਕਰਨ ਬਾਰੇ ਇੱਕ ਸੁਆਲ ਦੇ ਜਵਾਬ ਵਿਚ ਕਿਹਾ ਕਿ ਉਂਝ ਤਾਂ ਉਨ੍ਹਾਂ ਦੀ ਮੁਹਿੰਮ ਪਿਛਲੇ ਦਸ ਸਾਲਾਂ ਤੋਂ ਹੀ ਚੱਲ ਰਹੀ ਹੈ, ਪਰ ਕਾਂਗਸ ਹਾਈਕਮਾਂਡ ਤੋਂ ਹਰੀ ਝੰਡੀ ਮਿਲਣ ਉਪਰੰਤ ਹੀ ਉਹ ਵੋਟਰਾਂ ਨਾਲ ਸੰਪਰਕ ਸਥਾਪਤ ਕਰ ਰਹੇ ਹਨ।ਬੀਤੇ ਜ਼ਿਲ੍ਹਾ ਪ੍ਰੀਸ਼ਦ/ਬਲਾਕ ਸੰਮਤੀ ਚੋਣਾਂ ਵਾਂਗ ਇਨ੍ਹਾਂ ਚੋਣਾਂ ਦੌਰਾਨ ਸੱਤਾ ਪੱਖ ਵੱਲੋਂ ਲੰਬੀ ਹਲਕੇ ਵਿਚ ਹੋਣ ਵਾਲੀ ਸੰਭਾਵਿਤ ਗੁੰਡਾਗਰਦੀ ਬਾਰੇ ਪੁੱਛਣ 'ਤੇ ਸ੍ਰੀ ਬਾਦਲ ਨੇ ਕਿਹਾ ਕਿ ਚੋਣ ਕਮਿਸ਼ਨ ਦੀ ਮੁਸਤੈਦੀ ਦਾ ਹਵਾਲਾ ਦਿੰਦਿਆਂ ਉਨ੍ਹਾਂ ਕਿਹਾ ਕਿ ਚੋਣ ਕਮਿਸ਼ਨ ਦੀ ਸਖ਼ਤੀ ਸਦਕਾ ਅਜਿਹਾ ਹੋਣਾ ਤਾਂ ਨਹੀਂ ਚਾਹੀਦਾ, ਜੇਕਰ ਹਾਲਾਤਾਂ ਨੇ ਮੰਗ ਕੀਤੀ ਤਾਂ ਉਨ੍ਹਾਂ ਦੇ ਵਰਕਰ ਪੂਰੀ ਤਰ੍ਹਾਂ ਤਿਆਰ ਹਨ।
        
        ਅਕਾਲੀ ਦਲ ਦੇ ਉਮੀਦਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਨਸ਼ਰ ਰਿਪੋਰਟਾਂ ਬਾਰੇ ਪੁੱਛੇ ਸੁਆਲ 'ਤੇ ਉਨ੍ਹਾਂ ਕਿਹਾ ਕਿ ਅਕਾਲੀ ਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਉਣ 'ਤੇ  ਚੋਣ ਕਮਿਸ਼ਨ ਨੂੰ ਤੁਰੰਤ ਸ਼ਿਕਾਇਤ ਕੀਤੀ ਜਾਵੇਗੀ।

           ਇਸੇ ਦੌਰਾਨ ਪਿੰਡ ਬਾਦਲ ਵਿਖੇ ਸ: ਦੀਪਇੰਦਰ ਸਿੰਘ ਬਾਦਲ ਦੇ ਗ੍ਰਹਿ ਵਿਖੇ ਵਰਕਰਾਂ ਦੇ ਠਾਠਾਂ ਮਾਰਦੇ ਵਿਸ਼ਾਲ ਇਕੱਠ ਨੂੰ ਸੰਬੋਧਨ ਕਰਦਿਆਂ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਵਰਕਰਾਂ ਨੂੰ ਲੰਬੀ ਹਲਕੇ ਵਿਚ ਚੋਣ ਪ੍ਰਚਾਰ ਤਨਦੇਹੀ ਨਾਲ ਚੋਣ ਪ੍ਰਚਾਰ ਵਿਚ ਜੁਟ ਜਾਣ ਦਾ ਸੱਦਾ ਦਿੱਤਾ। ਇਸ ਮੌਕੇ ਪਿੰਡ ਖੁੱਡੀਆਂ ਮਹਾਂ ਸਿੰਘ ਦੇ ਇੱਕ ਮੈਂਬਰ ਪੰਚਾਇਤ ਸਮੇਤ ਪੰਜ ਅਕਾਲੀ ਵਰਕਰਾਂ ਨੇ ਕਾਂਗਰਸ ਵਿਚ ਸ਼ਾਮਲ ਹੋਣ ਦਾ ਐਲਾਨ ਕੀਤਾ।

ਮੁੱਖ ਮੰਤਰੀ ਬਾਦਲ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਇਆ

                     -ਪਿੰਡ ਕੰਦੂਖੇੜਾ ਦੇ ਕਮਿਊਨਿਟੀ ਸੈਂਟਰ ਦੇ ਰਕਬੇ 'ਚ ਚੋਣ ਜਲਸੇ ਨੂੰ ਸੰਬੋਧਨ ਕੀਤਾ -
   -ਪ੍ਰਸ਼ਾਸਨਕ ਤੰਤਰ ਨੇ ਬਾਅਦ 'ਚ 5 ਸੌ ਰੁਪਏ ਦੀ ਕਟਵਾ ਕੇ ਭਰਿਆ ਕਾਗਜਾਂ ਦਾ ਢਿੱਡ : ਗੁਰਮੀਤ ਖੁੱਡੀਆਂ-
                                                                  ਇਕਬਾਲ ਸਿੰਘ ਸ਼ਾਂਤ
ਲੰਬੀ, 4 ਜਨਵਰੀ : ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਅੱਜ ਲੰਬੀ ਹਲਕੇ ਦੇ ਪਿੰਡਾਂ ਵਿਚ ਚੋਣ ਪ੍ਰਚਾਰ ਮਹਿੰਮ ਦੌਰਾਨ ਕਥਿਤ ਤੌਰ 'ਤੇ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਇਆ ਹੈ।

          ਲੰਬੀ ਵਿਧਾਨਸਭਾ ਹਲਕੇ ਤੋਂ ਅਕਾਲੀ-ਭਾਜਪਾ ਗੱਠਜੋੜ ਦੇ ਉਮੀਦਵਾਰ ਪੰਜਾਬ ਦੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਅੱਜ ਹਲਕੇ ਦੇ ਪਿੰਡ ਕੰਦੂਖੇੜਾ ਵਿਖੇ ਇੱਕ ਕਮਿਊਨਿਟੀ ਕੇਂਦਰ ਦੇ ਰਕਬੇ ਵਿਚ ਇੱਕ ਚੋਣ ਜਲਸੇ ਨੂੰ ਸੰਬੋਧਨ ਕੀਤਾ ਗਿਆ। ਇਸੇ ਰਕਬੇ ਵਿਚ ਸਿਹਤ ਵਿਭਾਗ ਦੀ ਡਿਸਪੈਂਸਰੀ ਵੀ ਸਥਿਤ ਹੈ।


               ਇਸ ਜਗ੍ਹਾ 'ਤੇ ਅਕਾਲੀ ਦਲ ਦੇ ਚੋਣ ਜਲਸੇ ਲਈ ਸਵੇਰੇ ਤੋਂ ਚੱਲ ਰਹੀਆਂ ਸਨ, ਜਿਸਦੇ ਤਹਿਤ ਟੈਂਟ, ਸੋਫੇ ਅਤੇ ਸੈਂਕੜੇ ਕੁਰਸੀਆਂ ਲਾ ਕੇ ਕਾਫ਼ੀ ਸ਼ਨਦਾਰ ਤਿਆਰੀਆਂ ਕੀਤੀਆਂ ਗਈਆਂ। ਇਸਦੇ ਬਾਵਜੂਦ ਮੌਜੂਦਾ ਸਮੇਂ 'ਚ ਚੋਣ ਅਮਲੇ ਵਜੋਂ ਵਿਚਰ ਪ੍ਰਸ਼ਾਸਨਕ ਤਾਣਾ-ਬਾਣਾ ਸੁੱਤਾ ਪਿਆ ਸੀ।

                ਇਸ ਸਬੰਧੀ ਚੋਣ ਕਮਿਸ਼ਨ ਦੀ ਵੀਡੀਓਗਰਾਫ਼ੀ ਲਈ ਇੱਕ ਟੀਮ ਦੇ ਮੁਖੀ ਅਮਰਜੀਤ ਸਿੱਧੂ ਨੇ ਦੱਸਿਆ ਕਿ ਪਿੰਡ ਕੰਦੂਖੇੜਾ ਵਿਖੇ ਚੋਣ ਜਲਸੇ ਦੀ ਵੀਡੀਓਗਰਾਫ਼ੀ ਕਰਵਾ ਲਈ ਗਈ ਹੈ। ਜਿਸਨੂੰ ਚੋਣ ਜ਼ਾਬਤੇ ਦੀ ਉਲੰਘਣਾ ਹੋਣ ਜਾਂ ਨਾਂ ਹੋਣ ਬਾਰੇ ਪੁਸ਼ਟੀ ਲਈ ਉੱਚ ਅਧਿਕਾਰੀਆਂ ਨੂੰ ਵਿਖਾਇਆ ਜਾਵੇਗਾ,

                ਇਸ ਸਬੰਧ ਵਿਚ ਜਦੋਂ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨਾਲ ਸੰਪਰਕ ਕੀਤਾ ਗਿਆ ਤਾਂ ਉਨ੍ਹਾਂ ਕਿਹਾ ਕਿ ਉਹ ਤਾਂ ਲੋਕਾਂ ਦੀ ਜ਼ਮੀਨ 'ਤੇ ਲੋਕਾਂ ਲਈ ਬੋਲ ਰਹੇ ਸਨ। ਹੁਣ ਤੁਸੀਂ ਦੱਸੋ ਕਿ ਮੈਂ ਲੋਕਾਂ ਨੂੰ ਹਵਾ ਵਿਚੋਂ ਸੰਬੋਧਨ ਕਰਾਂ?
ਇਸੇ ਦੌਰਾਨ ਲੰਬੀ ਦੇ ਆਰ. ਓ. ਸ੍ਰੀ ਸੰਦੀਪ ਰਿਸ਼ੀ ਨੇ ਦੱਸਿਆ ਕਿ ਅਕਾਲੀ ਦਲ ਵੱਲੋਂ ਪਿੰਡ ਕੰਦੂਖੇੜਾ ਵਿਖੇ ਚੋਣ ਜਲਸੇ ਲਈ 5 ਸੌ ਰੁਪਏ ਦੀ ਪਰਚੀ ਕਟਵਾਈ ਗਈ ਹੈ।

              ਜਦੋਂਕਿ ਦੂਜੇ ਪਾਸੇ ਪੰਜਾਬ ਕਾਂਗਰਸ ਦੇ ਸੀਨਅਰ ਆਗੂ ਗੁਰਮੀਤ ਸਿੰਘ ਖੁੱਡੀਆਂ ਨੇ ਦੋਸ਼ ਲਾਇਆ ਕਿ ਲੰਬੀ ਹਲਕੇ ਵਿਚ ਸਮੁੱਚਾ ਪ੍ਰਸ਼ਾਸਨਕ ਤੰਤਰ ਅਕਾਲੀ ਦਲ ਦੀ ਕਠਪੁਤਲੀ ਵਜੋਂ ਵਿਚਰ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਪਿੰਡ ਕੰਦੂਖੇੜਾ ਵਿਖੇ ਕਮਿਊਨਿਸਟ ਸੈਂਟਰ ਦੇ ਰਕਬੇ ਵਿਚ ਅਕਾਲੀ ਦਲ ਦੇ ਚੋਣ ਜਲਸੇ ਦੀ ਪਰਚੀ ਵੀ ਮੀਡੀਆ ਵੱਲੋਂ ਮਾਮਲਾ ਉਛਾਲਣ ਦੇ ਉਪਰੰਤ ਕਾਗਜ਼ਾਂ ਦਾ ਢਿੱਡ ਭਰਨ ਲਈ ਬਾਅਦ ਵਿਚ ਕੱਟੀ ਗਈ ਹੈ।
       
         ਉਨ੍ਹਾਂ ਮੰਗ ਕੀਤੀ ਕਿ ਅਜਿਹੇ ਮਾਮਲੇ ਵਿਚ ਚੋਣ ਕਮਿਸ਼ਨ ਵੱਲੋਂ ਸਖ਼ਤੀ ਕਰਕੇ ਸਰਕਾਰੀ/ਪੰਚਾਇਤੀ ਜ਼ਮੀਨਾਂ  ਨੂੰ ਚੋਣ ਜਲਸਿਆਂ ਲਈ ਵਰਤਣ ਦੇ ਮਾਮਲੇ ਵਿਚ ਫੀਸ ਦੀ ਪਰਚੀ ਕੱਟਣ ਸਮੇਂ ਉਸ 'ਤੇ ਸਮਾਂ ਦਰਸਾਇਆ ਜਾਣਾ ਚਾਹੀਦਾ ਹੈ ਤੇ ਉਸਦੀ ਫੈਕਸ ਵੀ ਤੁਰੰਤ ਪੰਜਾਬ ਦੇ ਮੁੱਖ ਚੋਣ ਦਫ਼ਤਰ ਨੂੰ ਭੇਜੀ ਜਾਣ ਲਾਜਮੀ ਕੀਤੀ ਜਾਵੇ ਤਾਂ ਜੋ ਚੋਣ ਜ਼ਾਬਤੇ ਦਾ ਮਜ਼ਾਕ ਨਾ ਬਣ ਸਕੇ।


ਫੋਟੋ ਫਾਈਲ : ਡੱਬਵਾਲੀ04ਜਨਵਰੀ-07.ਜੇ.ਪੀ.ਜੀ.
ਪਿੰਡ ਕੰਦੂਖੇੜਾ ਵਿਖੇ ਕਮਿਊਨਿਟੀ ਸੈਂਟਰ ਦੇ ਰਕਬੇ ਵਿਚੋਂ ਆਉਂਦੇ ਸਿਹਤ ਵਿਭਾਗ ਦੀ ਡਿਸਪੈਂਸਰੀ ਕੋਲੋਂ ਲੰਘਦਾ ਮੁੱਖ ਮੰਤਰੀ ਦੇ ਵਾਹਨਾਂ ਦਾ ਕਾਫ਼ਲਾ। ਤਸਵੀਰ : ਇਕਬਾਲ ਸਿੰਘ ਸ਼ਾਂਤ

ਬਾਦਲ ਨੂੰ ਵਿਕਾਸ ਦਾ ਅਸਲ ਸ਼ੀਸ਼ਾ ਵਿਖਾਉਣ ਦੇ ਚਾਹਵਾਨ ਗਰੀਬਾਂ ਨੂੰ ਪਾਸੇ ਧੱਕਿਆ

ਪਿੰਡ ਭੁੱਲਰਵਾਲਾ ਦੇ ਗਰੀਬਾਂ ਨੇ ਖੋਲ੍ਹੀਆਂ ਵਿਕਾਸ ਦੀ ਅਸਲ ਪਰਤਾਂ - ਕਿਹਾ : ਵਿਕਾਸ ਦੇ ਨਾਂ 'ਤੇ ਗਰੀਬਾਂ ਨਾਲ ਹੋਇਆ ਮਜ਼ਾਕ

                                                                 - ਇਕਬਾਲ ਸਿੰਘ ਸ਼ਾਂਤ -

ਲੰਬੀ : ਲੰਬੀ ਹਲਕੇ ਤੋਂ ਚੋਣ ਲੜ ਰਹੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਪਿੰਡ ਭੁੱਲਰਵਾਲਾ ਵਿਖੇ ਚੋਣ ਜਲਸੇ ਦੌਰਾਨ ਪਿੰਡ ਦੇ ਵਿਕਾਸ ਦੇ ਵੱਡੇ ਵੱਡੇ ਦਾਅਵਿਆਂ ਤੋਂ ਭਾਵੁਕ ਹੋ ਕੇ ਵੋਟਾਂ ਮੰਗਣ ਪੁੱਜੇ ਮੁੱਖ ਮੰਤਰੀ ਨੂੰ ਪਿੰਡ ਦੇ ਵਿਕਾਸ ਦਾ ਅਸਲ ਸ਼ੀਸ਼ਾ ਵਿਖਾਉਣ ਦੇ ਚਾਹਵਾਨ ਪਿੰਡ ਦੇ ਕੁਝ ਦਲਿਤ ਨੌਜਵਾਨਾਂ ਨੂੰ ਪੁਲਿਸ ਅਤੇ ਅਕਾਲੀ ਵਰਕਰਾਂ ਨੇ ਜ਼ਬਰਦਸਤੀ ਧੱਕੇਲ ਕੇ ਪਾਸੇ ਕਰ ਦਿੱਤਾ।
                ਹੋਇਆ ਇੰਝ ਕਿ ਜਦੋਂ ਮੁੱਖ ਮੰਤਰੀ ਸ੍ਰੀ ਬਾਦਲ ਪਿੰਡ ਭੁੱਲਰਵਾਲਾ ਵਿਖੇ ਚੋਣ ਜਲਸੇ ਨੂੰ ਸੰਬੋਧਨ ਕਰਨ ਉਪਰੰਤ ਅਗਲੇ ਪਿੰਡ ਚੋਣ ਪ੍ਰਚਾਰ ਲਈ ਗੱਡੀ ਵਿਚ ਬੈਠ ਕੇ ਰਵਾਨਾ ਹੋ ਰਹੇ ਸਨ ਤਾਂ ਧਰਮਸ਼ਾਲਾ ਦੇ ਬਾਹਰ ਖੜ੍ਹੇ ਕੁਝ ਦਲਿਤ ਨੌਜਵਾਨਾਂ ਨੇ ਹੱਥ ਉੱਚੇ ਕਰਕੇ ਵਿਕਾਸ ਦਾ ਅਸਲ ਸ਼ੀਸ਼ਾ ਵਿਖਾਉਣਾ ਸ਼ੁਰੂ ਕਰ ਦਿੱਤਾ ਜਿਸਤੋਂ ਉਥੇ ਖੜ੍ਹੇ ਸੁਰੱਖਿਆ ਦਸਤੇ ਦੇ ਕਰਮਚਾਰੀਆਂ ਅਤੇ ਵਰਕਰਾਂ ਨੇ ਉਨ੍ਹਾਂ ਨੂੰ ਪਾਸੇ ਧਕੇਲ ਦਿੱਤਾ।

                 ਬਾਅਦ ਵਿਚ ਦਲਿਤ ਵਿਹੜੇ ਵਿਚ ਇਕੱਠੇ ਹੋਏ ਦਲਿਤਾਂ ਨੇ ਪੱਤਰਕਾਰਾਂ ਨੂੰ ਮੁੱਖ ਮੰਤਰੀ ਸ੍ਰੀ ਬਾਦਲ ਵੱਲੋਂ ਭੇਜੀਆਂ ਗਰਾਂਟਾਂ ਉਨ੍ਹਾਂ ਤੱਕ ਜਇਜ਼ ਢੰਗ ਵਿਚ ਨਾ ਪੁੱਜਣ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਕਾਗਜ਼ਾਂ ਵਿਚ ਹੋਏ ਵਿਕਾਸ ਤੋਂ ਅਸਲ ਹਕੀਕਤ ਬਿਲਕੁੱਲ ਉਲਟ ਹੈ। ਉਨ੍ਹਾਂ ਕਿਹਾ ਕਿ ਕੁਝ ਸਮਾਂ ਪਹਿਲਾਂ ਸੰਗਤ ਦਰਸ਼ਨ ਵਿਚ ਮੁੱਖ ਮੰਤਰੀ ਸ੍ਰੀ ਬਾਦਲ ਦਲਿਤਾਂ ਦੇ ਵਿਹੜੇ ਦੇ ਪਾਣੀ ਦੀ ਨਿਕਾਸੀ ਲਈ 5 ਲੱਖ ਰੁਪਏ ਦੀ ਗਰਾਂਟ ਦੇ ਕੇ ਪਾਣੀ ਨੂੰ ਪਾਈਪਾਂ ਰਾਹੀਂ ਸੇਮ ਨਾਲੇ ਵਿਚ ਪਾਣੀ ਪਾਉਣ ਦੇ ਨਿਰਦੇਸ਼ ਦੇ ਕੇ ਗਏ ਸਨ। ਅੱਜ ਤੱਕ ਨਿਕਾਸੀ ਪ੍ਰਬੰਧ ਤਾਂ ਕੀ ਉਸ ਵੱਲ ਇੱਕ ਕਦਮ ਵੀ ਨਹੀਂ ਪੁੱਟਿਆ ਗਿਆ। ਉਨ੍ਹਾਂ ਕਿਹਾ ਕਿ ਵਿਹੜੇ ਵਾਲਿਆਂ ਵੱਲੋਂ ਆਪਣੇ ਪੱਧਰ 'ਤੇ ਮਿੰਨਤ ਕਰਕੇ ਕਿਸੇ ਕਿਸਾਨ ਦੀ ਨਿੱਜੀ ਜ਼ਮੀਨ ਵਿਚ ਮਹੀਨੇ ਲਈ ਉਧਾਰੀ ਮੰਗ ਕੇ ਪਾਣੀ ਭੇਜਿਆ ਜਾ ਰਿਹਾ ਹੈ ਜਿਸਦੀ ਮੋਹਲਤ ਲੰਘੇ ਨੂੰ 10 ਦਿਨ ਹੋ ਚੁੱਕੇ ਹਨ। ਉਨ੍ਹਾਂ ਕਿਹਾ ਕਿ ਵਿਹੜੇ ਵਿਚ ਨਿਕਾਸੀ ਨਾ ਹੋਣ ਕਰਕੇ ਬਦਬੂ ਨੇ ਉਨ੍ਹਾਂ ਦੇ ਜੀਵਨ ਨੂੰ ਦੁੱਭਰਕਰ ਰੱਖਿਆ ਹੈ।
               ਪਿਛਲੇ ਸਾਢੇ ਚਾਰ ਸਾਲਾਂ ਤੋਂ ਭਰੇ ਪੀਤੇ ਲੋਕਾਂ ਨੇ ਦੱਸਿਆ ਕਿ ਪਿਛਲੇ ਇੱਕ ਮਹੀਨੇ ਤੋਂ ਵਾਟਰ ਵਰਕਸ ਵਿਚੋਂ  ਪੀਣ ਦਾ ਪਾਣੀ ਨਹੀਂ ਛੱਡਿਆ ਗਿਆ। ਜਿਸਦੇ ਕਰਕੇ ਉਹ ਜ਼ਮੀਨੀ ਨਲਕਿਆਂ ਦਾ ਮਾੜਾ ਪਾਣੀ ਪੀਣ ਨੂੰ ਮਜ਼ਬੂਰ ਹਨ।
ਪਿੰਡ ਦੇ ਨਿੱਕਾ ਸਿੰਘ ਪੁੱਤਰ ਮੋਹਣ ਸਿੰਘ ਨੇ ਦੋਸ਼ ਲਾਇਆ ਕਿ ਪਿਛਲੇ 25 ਵਰ੍ਹਿਆਂ ਤੋਂ ਮੁੱਖ ਮੰਤਰੀ ਕੋਲ ਗੱਲ ਕਰਨ ਲਈ ਮੁਹਰੇ ਹੋਣ ਨਹੀਂ ਦਿੱਤਾ ਜਾਂਦਾ।  ਉਨ੍ਹਾਂ ਦੱਸਿਆ ਕਿ ਪਿੰਡ ਵਿਚ ਘਰਾਂ ਦੀ ਉਸਾਰੀ ਲਈ ਭੇਜੇ ਪੈਸਿਆਂ ਵਿਚੋਂ ਗਰੀਬਾਂ ਤੱਕ ਮੁਰੰਮਤ ਦੀ ਰਕਮ ਹੀ ਮੁਸ਼ਕਿਲ ਨਾਲ ਪੁੱਜਦੀ ਹੈ। ਉਨ੍ਹਾਂ ਕਿਹਾ ਕਿ ਹਾਕਮਾਂ ਦੇ ਬੰਦਿਆਂ ਵੱਲੋਂ ਬਹੁਤੇ ਗਰੀਬਾਂ ਦੇ ਚੈੱਕ ਦੇਣ ਖਾਤਰ 5-5 ਸੌ ਰੁਪਏ ਜਮ੍ਹਾਂ ਕਰਵਾ ਬੈਂਕਾਂ ਵਿਚ ਖਾਤੇ ਖੁਲ੍ਹਵਾ ਦਿੱਤੇ ਗਏ ਪਰ ਅੱਜ ਤੱਕ ਚੈੱਕ ਤਾਂ ਕੀ ਕੋਰਾ ਕਾਗਜ਼ ਵੀ ਉਨ੍ਹਾਂ ਦੇ ਪੱਲੇ ਨਹੀਂ ਪਿਆ। ਦਲਿਤ ਵਿਹੜੇ ਵਿਚ ਗਲੀਆਂ ਨਾਲੀਆਂ ਦੀ ਹਾਲਤ ਵੀ ਬੇਹੱਦ ਮੰਦੀ ਹੈ।
ਇਸਤੋਂ ਇਲਾਵਾ ਮਨਪ੍ਰੀਤ ਕੌਰ ਪਤਨੀ ਕਾਕਾ ਸਿੰਘ ਨੇ ਦੱਸਿਆ ਕਿ ਬੀ.ਪੀ.ਐਲ. ਕਾਰਡ ਧਾਰਕਾਂ ਨੂੰ ਸਿਲੰਡਰ  ਦਿਵਾਉਣ ਲਈ ਖਾਤੇ ਖੁਲ੍ਹਵਾ ਦਿੱਤੇ ਗਏ ਪਰ ਸਿੰਲਡਰਾਂ ਦਾ ਸੁੱਖ ਉਨ੍ਹਾਂ ਅਜੇ ਤੱਕ ਨਸੀਬ ਨਹੀਂ ਹੋ ਸਕਿਆ। ਇਸ ਤਰ੍ਹਾਂ ਰਾਜਾ ਸਿੰਘ ਪੁੱਤਰ ਅਜੈਬ ਸਿੰਘ ਨੇ ਦੱਸਿਆ ਕਿ ਮਨਰੇਗਾ ਲਈ ਏ.ਟੀ.ਐਮ. ਕਾਰਡ ਬਣਨ ਦੇ ਬਾਵਜੂਦ ਕਿਸੇ ਨੂੰ ਮਨਰੇਗਾ ਤਹਿਤ ਰਜ਼ੁਗਾਰ ਨਹੀਂ ਦਿੱਤਾ ਗਿਆ।
             ਬਲਕਰਨ ਸਿੰਘ ਰੂਪ ਨੇ ਦੱਸਿਆ ਕਿ ਮੁੱਖ ਮੰਤਰੀ ਦੇ ਹਲਕੇ ਵਿਚ ਹਾਲਾਤ ਇਹ ਹਨ ਕਿ ਲੋਕਾਂ ਨੂੰ ਮਿਹਨਤ ਮਜ਼ਦੂਰੀ ਦੇ ਬਾਵਜੂਦ ਮਿਹਨਤਾਨਾ ਨਹੀਂ ਦਿੱਤਾ ਜਾਂਦਾ। ਉਸਨੇ ਦੋਸ਼ ਲਾਇਆ ਕਿ ਉਸਨੇ ਦੋ ਵਰ੍ਹਿਆਂ ਤੱਕ ਪਿੰਡ ਦੇ ਵਾਟਰ ਵਰਕਸ ਵਿਚ 3 ਹਜ਼ਾਰ ਰੁਪਏ ਪ੍ਰਤੀ ਮਹੀਨੇ 'ਤੇ ਨੌਕਰੀ ਕੀਤੀ ਪਰ ਉਸਨੂੰ ਸਿਰਫ਼ 12 ਹਜ਼ਾਰ ਰੁਪਏ ਦੇ ਕੇ ਬੁੱਤਾ ਸਾਰ ਦਿੱਤਾ ਗਿਆ।
ਇਸਤੋਂ ਇਲਾਵਾ ਪਿੰਡ ਦੇ ਲੋਕਾਂ ਨੇ ਹਲਕੇ ਦੇ ਪਿੰਡਾਂ ਵਿਚ ਅਕਾਲੀ ਆਗੂਆਂ ਦੇ ਆਮ ਜਨਤਾ ਪ੍ਰਤੀ ਮਾਰੂ ਰਵੱਈਏ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਐਤਕੀਂ ਉਹ ਕੋਈ ਵੱਖਰਾ ਫੈਸਲਾ ਲੈਣ ਨੂੰ ਮਜ਼ਬੂਰ ਹੋਣਗੇ।
                  ਇਸ ਮੌਕੇ ਲੋਕਾਂ ਨੇ ਸਰਕਾਰੀ ਸਹੂਲਤਾਂ ਨੂੰ ਮਜ਼ਾਕ ਕਰਾਰ ਦਿੰਦਿਆਂ ਕਿਹਾ ਕਿ ਭਾਰੀ ਮੀਂਹਾਂ ਉਪਰੰਤ ਹੜ੍ਹਾਂ ਜਿਹੇ ਹਾਲਾਤਾਂ ਦੌਰਾਨ ਪ੍ਰਸ਼ਾਸਨ ਵੱਲੋਂ ਵੰਡੇ ਗਏ ਆਟੇ ਦੀ ਥੈਲੀ ਵਿਚ ਆਟੇ ਵਿਚ ਮੌਜੂਦ ਗੰਦਗੀ ਅਤੇ ਸੁੰਡੀਆਂ ਨੂੰ ਛਾਨਣੀ  ਰਾਹੀਂ ਛਾਣ ਕੇ ਵਿਖਾਇਆ ਅਤੇ ਕਿਹਾ ਕਿ ਗਰੀਬਾਂ ਨੂੰ ਸੁੰਡੀਆਂ ਵਾਲਾ ਆਟਾ ਦੇ ਕੇ ਮਜ਼ਾਕ ਕੀਤਾ ਜਾ ਰਿਹਾ ਹੈ।
ਇਸੇ ਦੌਰਾਨ ਰੂੜਾ ਸਿੰਘ ਪੁੱਤਰ ਬਲੀ ਸਿੰਘ ਦੇ ਇੱਕ ਪਰਿਵਾਰਕ ਮੈਂਬਰ ਨੇ ਦੋ ਸਾਲਾਂ ਤੋਂ ਧੀਆਂ ਦੇ ਵਿਆਹ ਨੂੰ ਦੋ ਸਾਲ ਦੇ ਕਰੀਬ ਸਮਾਂ ਲੰਘਣ ਦੇ ਬਾਵਜੂਦ ਸ਼ਗੁਨ ਸਕੀਮ ਦੀ ਰਕਮ ਨਾ ਮਿਲਣ ਦਾ ਦੋਸ਼ ਲਾਇਆ।
              ਪਿੰਡ ਦੇ ਇੱਕ ਬਜ਼ੁਰਗ ਨੇ ਦੱਸਿਆ ਕਿ ''ਭਾਈ ਕਾਕਾ, ਤੁਸੀਂ ਕਾਹਨੂੰ ਫੋਟੋਆਂ ਖਿੱਚਦੇ ਫਿਰਦੇ ਹੋ, ਇੱਥੇ ਤਾਂ ਸਰਕਾਰ ਦੇ ਦਰਜਨ ਕੁ ਲਫਟੈਨਾਂ ਨੇ ਹਾਕਮਾਂ ਦੀਆਂ ਅੱਖਾਂ 'ਤੇ ਪਰਦਾ ਪਾ ਕੇ ਹਲਕੇ ਦਾ ਮਾਹੌਲ ਵਿਗਾੜ ਰੱਖਿਆ ਹੈ।
ਦੂਜੇ ਪਾਸੇ ਪਿੰਡ ਦੇ ਸਰਪੰਚ ਇਕਬਾਲ ਸਿੰਘ ਭੁੱਲਰਵਾਲਾ ਨੇ ਕਿਹਾ ਕਿ ਸਰਕਾਰ ਦੀਆਂ ਸਾਰੀਆਂ ਸਕੀਮਾਂ ਨੂੰ ਇੰਨ ਬਿੰਨ ਲੋਕਾਂ ਤੱਕ ਪਹੁੰਚਾਇਆ ਗਿਆ ਤੇ ਇਹ ਕੁਝ ਲੋਕਾਂ ਵੱਲੋਂ ਬੇਤੁੱਕਾ ਪ੍ਰਚਾਰ ਕੀਤਾ ਜਾ ਰਿਹਾ ਹੈ।



                         ਬਾਦਲ ਨੇ ਖੁਦ ਨੂੰ ਦੱਸਿਆ 'ਚੰਗਾ' ਅਤੇ ਵਿਰੋਧੀਆਂ ਨੂੰ 'ਮੰਦਾ'
                                                   -ਲੰਬੀ ਦੇ ਦਰਜਨ ਭਰ ਪਿੰਡਾਂ ਵਿਚ ਚੋਣ ਪ੍ਰਚਾਰ-  
                                                                    -ਇਕਬਾਲ ਸਿੰਘ ਸ਼ਾਂਤ-
ਲੰਬੀ : ਪੰਜਾਬ ਦੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੇ ਆਪਣੇ ਰਵਾਇਤੀ ਹਲਕੇ ਲੰਬੀ 'ਚ ਚੋਣ ਪ੍ਰਚਾਰ ਦੇ ਦਿਨ ਪਹਿਲੇ ਦਿਨ ਪਿੰਡਾਂ ਵਿਚ ਜਿੱਥੇ ਅਕਾਲੀ ਭਾਜਪਾ ਵੱਲੋਂ ਹਲਕੇ ਦੇ ਪਿੰਡਾਂ ਵਿਚ ਪੁੱਜੀਆਂ ਗਰਾਟਾਂ ਦੇ ਵੇਰਵੇ ਦੇ ਕੇ ਵੋਟਰਾਂ ਨੂੰ ਮੁੜ ਤੋਂ ਉਨ੍ਹਾਂ ਦੇ ਹੱਕ ਵਿਚ ਭੁਗਤਣ ਦੀ ਅਪੀਲ ਕੀਤੀ, ਉਥੇ ਉਨ੍ਹਾਂ ਆਪਣਾਂ ਭਾਸ਼ਨਾਂ ਵਿਚ ਕਾਂਗਰਸ 'ਤੇ ਖੂਬ ਸ਼ਬਦੀ ਰਗੜੇ ਲਾਉਣ ਦੇ ਨਾਲ-ਨਾਲ ਨਵੇਂ ਉੱਠੇ ਪੀ.ਪੀ.ਪੀ. ਵਾਲੇ ਸਿਆਸੀ ਸਰੀਕਾਂ ਨੂੰ ਨਵਾਂ ਸ਼ੋਸ਼ਾ ਕਰਾਰ ਦਿੰਦਿਆਂ ਡਿਫੈਕਟਰਾਂ ਦੀ
ਪਾਰਟੀ ਕਰਾਰ ਦਿੱਤਾ।
ਮੁੱਖ ਮੰਤਰੀ ਨੇ ਅੱਜ ਲੰਬੀ ਹਲਕੇ ਦੇ ਦਰਜਨ ਤੋਂ ਵੱਧ ਪਿੰਡਾਂ ਦੇ ਤੂਫਾਨੀ ਦੌਰੇ ਮੌਕੇ ਪਿੰਡ ਭੁੱਲਰਵਾਲਾ ਦੀ ਧਰਮਸ਼ਾਲਾ ਵਿਖੇ ਲੋਕਾਂ ਦੇ ਮੁਖਾਤਬ ਹੁੰਦਿਆਂ ਕਿਹਾ ਕਿ ਦੇਸ਼ ਵਿਚ ਮਹਿੰਗਾਈ, ਬੇਰੁਜ਼ਗਾਰ ਅਤੇ ਭ੍ਰਿਸ਼ਟਾਚਾਰ ਲਈ ਕਾਂਗਰਸ ਨੂੰ ਜੁੰਮੇਵਰ ਕਰਾਰ ਦਿੱਤਾ। ਉਨ੍ਹਾਂ ਕਿਹਾ ਕਿ ਕਾਂਗਰਸ ਪਾਰਟੀ ਦੇਸ਼ ਦੀ ਸੁਰੱਖਿਆ ਕਰਨ ਵਚ ਵੀ ਫੇਲ੍ਹ ਸਾਬਤ ਹੋਈ ਹੈ ਅਤੇ ਮੌਜੂਦਾ ਹਾਲਾਤਾਂ ਵਿਚ ਦੇਸ਼ ਵਿਚ ਸਰਕਾਰ ਨਾਂ ਦੀ ਕੋਈ ਚੀਜ ਨਹੀਂ।
ਸ੍ਰੀ ਬਾਦਲ ਨੇ ਅਕਾਲੀ-ਭਾਜਪਾ ਸਰਕਾਰ ਦੀ ਵਡਿਆਈ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ ਦੌਰਾਨ ਸੂਬੇ ਵਿਚ ਅਮਨ-ਚੈਨ ਅਤੇ ਭਾਈਚਾਰਕ ਮਾਹੌਲ ਬਣਿਆ ਰਿਹਾ ਅਤੇ ਸੂਬੇ ਦਾ ਬਹੁਪੱਖੀ ਵਿਕਾਸ ਕੀਤਾ ਗਿਆ। ਸ੍ਰੀ ਬਾਦਲ ਨੇ ਕਿਸਾਨੀ ਦੀ ਮੰਦੀ ਹਾਲਤ ਲਈ ਵੀ ਕਾਂਗਰਸ ਨੂੰ ਜੁੰਮੇਵਾਰ ਠਹਿਰਾਇਆ।
ਮੁੱਖ ਮੰਤਰੀ ਨੇ ਲੰਬੀ ਹਲਕੇ ਦਾ ਬਹੁਪੱਖੀ ਵਿਕਾਸ ਕਰਨ ਦਾ ਦਾਅਵਾ ਕਰਦਿਆਂ ਕਿਹਾ ਮੁੱਖ ਮੰਤਰੀ ਦੀ ਤਾਕਤ ਹੋਣ ਕਰਕੇ ਹਲਕੇ ਦੇ ਹਰੇਕ ਪਿੰਡ ਵਿਚ ਗਰਾਂਟਾਂ ਦੇ ਕੇ ਵਿਕਾਸ ਨੂੰ ਨਵੀਂ ਦਿਸ਼ਾ ਦਿੱਤੀ ਗਈ। ਸ੍ਰੀ ਬਾਦਲ ਨੇ ਦੱਸਿਆ ਕਿ ਪਿਛਲੇ ਸਾਢੇ ਚਾਰ ਸਾਲਾਂ ਦੌਰਾਨ ਅਕਾਲੀ ਸਰਕਾਰ ਵੱਲੋਂ ਪਿੰਡ ਭੁੱਲਰਵਾਲਾ ਵਿਖੇ 1.88 ਲੱਖ ਰੁਪਏ ਵਿਕਾਸ ਕਾਰਜਾਂ ਲਈ ਦਿੱਤੇ ਗਏ ਹਨ। ਜਿਨ੍ਹਾਂ ਰਾਹੀਂ ਪਿੰਡ ਦਾ ਬਹੁਪੱਖੀ ਵਿਕਾਸ ਕਰਵਾਇਆ ਗਿਆ।
ਪੰਜਾਬ ਦੀ ਸਿਆਸਤ ਦੇ ਬਾਬਾ ਬੋਹੜ ਨੇ ਆਪਣੇ ਭਤੀਜੇ ਮਨਪ੍ਰੀਤ ਸਿੰਘ ਬਾਦਲ ਵੱਲੋਂ ਗਠਿਤ ਪਾਰਟੀ ਪੀ.ਪੀ.ਪੀ. ਨੂੰ ਨਵਾਂ ਸ਼ੋਸ਼ਾ ਕਰਾਰ ਦਿੰਦਿਆਂ ਕਿਹਾ ਕਿ ਇਸ ਪਾਰਟੀ ਵਿਚ ਸਾਰੇ ਡਿਫੈਕਟਰ ਸ਼ਾਮਲ ਹਨ। ਜਿਨ੍ਹਾਂ ਵਿਚੋਂ ਕਾਫ਼ੀ ਜਣੇ ਖਹਿੜਾ ਛੁਡਵਾ ਕੇ ਵਾਪਸੀ ਨੂੰ ਵਹੀਰਾਂ ਘੱਤ ਗਏ ਹਨ। ਸ੍ਰੀ ਬਾਦਲ ਨੇ ਉਨ੍ਹਾਂ ਅਕਾਲੀ ਦਲ ਵਿਚ ਮਾਣ ਸਤਿਕਾਰ ਮਿਲਣ ਦੇ ਬਾਵਜੂਦ ਪੀ. ਪੀ. ਪੀ. ਦੇ ਗਠਨ ਨੂੰ ਬਿਨ੍ਹਾਂ ਸਰੀਕਾਂ ਦਾ ਨਾਂਅ ਲਏ 'ਗੱਦਾਰਪੁਣੇ' ਦੀ ਕਾਰਗੁਜਾਰੀ ਕਰਾਰ ਦਿੰਦਿਆਂ ਲੰਬੀ ਹਲਕੇ ਦੇ ਵੋਟਰਾਂ ਨੂੰ ਪੀ.ਪੀ.ਪੀ. ਨੂੰ ਉਤਸ਼ਾਹਤ ਕਰਨ ਤੋਂ ਗੁਰੇਜ਼ ਕਰਨ ਦਾ ਸੱਦਾ ਦਿੱਤਾ।
ਉਨ੍ਹਾਂ ਆਪਣੇ ਭਾਸ਼ਨ ਆਪਣੇ ਸਿਆਸੀ ਸਰੀਕਾਂ ਦਾ ਨਾਂ ਲੈਣ ਤੋਂ ਗੁਰੇਜ਼ ਕਰਨ ਵਾਲੇ ਸ੍ਰੀ ਬਾਦਲ ਵੱਲੋਂ ਕੈਪਟਨ ਅਮਰਿੰਦਰ ਸਿੰਘ ਦੇ ਖੂੰਡੇ ਨੂੰ ਵੀ ਨਿਸ਼ਾਨਾ ਬਣਾਇਆ ਜਾਂਦਾ ਹੈ ਤੇ ਉਸਨੂੰ ਆਮ ਜਨਤਾ ਦੀ ਪਹੁੰਚ ਤੋਂ ਦੂਰ ਦਾ ਆਗੂ ਕਰਾਰ ਦੇ ਕੇ ਖੁਦ ਨੂੰ ਲੋਕਾਂ ਲਈ 24 ਘੰਟੇ ਹਾਜ਼ਰ ਰਹਿਣ ਵਾਲਾ ਆਗੂ ਕਰਾਰ ਦਿੰਦੇ ਹਨ।
ਮੁੱਖ ਮੰਤਰੀ ਵੱਲੋਂ ਆਪਣੇ ਚੋਣ ਜਲਸਿਆਂ ਦੌਰਾਨ ਲੋਕਾਂ ਨੂੰ ਪੁਰਾਣੇ ਟੋਟਕਿਆਂ ਰਾਹੀਂ ਵੋਟਰਾਂ ਨੂੰ ਕਾਫ਼ੀ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਹੈ। ਆਪਣੇ ਸਿਆਸੀ ਸਰੀਕਾਂ ਨਾਲ ਲੰਬੀ ਦੇ ਚੋਣ ਦੰਗਲ ਵਿਚ ਉਲਝੇ ਮੁੱਖ ਮੰਤਰੀ ਸ੍ਰੀ ਬਾਦਲ ਚੋਣ ਜਲਸਿਆਂ ਦੌਰਾਨ ਭਾਸ਼ਨ ਉਪਰੰਤ ਲੋਕਾਂ ਨੂੰ ਆਪਣੇ ਕੋਲ ਆਉਣ ਦਾ ਸੱਦਾ ਦਿੰਦੇ ਹਨ, ਪਰ ਸੁਰੱਖਿਆ ਦਸਤਿਆਂ ਦੀ ਮਨੁੱਖੀ ਲੜੀ ਨੂੰ ਪਾਰ ਕਰਕੇ ਕੋਈ ਹੌਂਸਲੇ ਵਾਲਾ ਟਾਵਾਂ ਵਿਅਕਤੀ ਹੀ ਉਨ੍ਹਾਂ ਤੱਕ ਪਹੁੰਚਦਾ ਹੈ। ਜਦੋਂਕਿ ਬਹੁਤੇ ਲੋਕ ਪਿਛਲੇ ਸਾਢੇ ਚਾਰ ਸਾਲਾਂ ਦੌਰਾਨ ਸੰਗਤ ਦਰਸ਼ਨ ਮੌਕੇ ਮੁੱਖ ਮੰਤਰੀ ਅਤੇ ਆਮ ਜਨਤਾ ਵਿਚਕਾਰ ਲਾਈਆਂ ਜਾਂਦੀਆਂ ਰਾਹੀਆਂ ਰੱਸਿਆਂ ਦੀਆਂ ਰੋਕਾਂ ਨੂੰ ਚੇਤੇ ਕਰਕੇ ਜਲਸੇ ਵਿਚ ਕੁਰਸੀਆਂ 'ਤੇ ਬੈਠੇ ਰਹਿਣ ਨੂੰ ਤਰਜੀਹ ਦਿੰਦੇ ਹਨ।
ਇਸੇ ਦੌਰਾਨ ਉਨ੍ਹਾਂ ਖੁਦ ਕੋਲ ਸੂਬੇ ਦੇ ਚੋਣ ਪ੍ਰਚਾਰ ਦੀ ਜੁੰਮੇਵਾਰ ਦੱਸਦਿਆਂ ਕਿਹਾ ਕਿ ਹਲਕੇ ਦਾ ਚੋਣ ਪ੍ਰਚਾਰ ਵੋਟਰਾਂ ਅਤੇ ਵਰਕਰਾਂ ਨੇ ਰਲਮਿਲ ਕੇ ਚਲਾਉਣਾ ਹੈ।

ਚੋਣ ਕਮਿਸ਼ਨ ਦੀ ਰੋਕ ਦੇ ਬਾਵਜੂਦ ਸਾਇਕਲਾਂ ਦਾ ਭਰਿਆ ਕੈਂਟਰ ਪੁੱਜਿਆ ਲੰਬੀ ਦੇ ਸਰਕਾਰੀ ਸਕੂਲ

ਕੈਂਟਰ ਚਾਲਕ ਦੇ ਕਥਨ :  ਅਬੁੱਲਖੁਰਾਣਾ, ਦੋਦਾ ਅਤੇ ਮੁਕਤਸਰ ਦੇ ਸਕੂਲ ਵਿਚ ਵੀ ਸਾਇਕਲ ਵੀ ਪੁੱਜੇ

                                                               -ਇਕਬਾਲ ਸਿੰਘ ਸ਼ਾਂਤ-
ਲੰਬੀ, 30 ਦਸੰਬਰ-ਚੋਣ ਕਮਿਸ਼ਨ ਵੱਲੋਂ ਪੰਜਾਬ ਵਿਧਾਨਸਭਾ ਚੋਣਾਂ ਦੀ ਚੋਣ ਪ੍ਰਕਿਰਿਆ ਦੌਰਾਨ ਸਾਇਕਲਾਂ ਦੀ ਵੰਡ 'ਤੇ ਪਾਬੰਦੀ ਲਾਉਣ ਦੇ ਬਾਵਜੂਦ ਵਿਦਿਆਰਥਣਾਂ ਨੂੰ ਵੰਡਣ ਲਈ ਸਰਕਾਰੀ ਸਕੂਲਾਂ ਵਿਚ ਸਾਇਕਲਾਂ ਦਾ ਪੁੱਜਣਾ ਲਗਾਤਾਰ ਜਾਰੀ ਹੈ।

ਅਜਿਹਾ ਇੱਕ ਮਾਮਲਾ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਰਵਾਇਤੀ ਹਲਕੇ ਦੇ ਪਿੰਡ ਲੰਬੀ ਵਿਖੇ ਸਾਹਮਣੇ ਆਇਆ ਹੈ। ਜਿੱਥੋਂ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਖੇ ਅੱਜ ਸਵੇਰੇ ਲਗਭਗ 11 ਵਜੇ ਐਟਲਸ ਕੰਪਨੀ ਦੇ ਸਾਇਕਲਾਂ ਨਾਲ ਭਰਿਆ ਇੱਕ ਕੈਂਟਰ ਨੰਬਰ ਆਰ.ਜੇ.13 ਜੀ. ਏ./2840 ਪੁੱਜਿਆ। ਜਿਸ ਵਿਚ ਸੰਤਰੀ ਰੰਗ ਦੇ 71 ਲੇਡੀਜ਼ ਸਾਇਕਲ ਲੱਦੇ ਹੋਏ ਸਨ, ਜਿਨ੍ਹਾਂ ਦਾ ਰੰਗ ਸੱਤਾ ਪੱਖ ਦੇ ਝੰਡੇ ਦੇ ਰੰਗ ਨਾਲ ਮੇਲਾ ਖਾਂਦਾ ਸੀ।
ਹਾਲਾਂਕਿ ਚੋਣ ਜ਼ਾਬਤੇ ਤੋਂ ਪਹਿਲਾਂ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਸੂਬੇ ਦੀਆਂ ਵਿਦਿਆਰਥਣਾਂ ਨੂੰ ਵੰਡੇ ਜਾ ਰਹੇ ਸਾਇਕਲਾਂ ਵਾਂਗ ਇਨ੍ਹਾਂ ਸਾਇਕਲਾਂ 'ਤੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਫੋਟੋ ਨਹੀਂ ਲੱਗੀ ਹੋਈ ਸੀ।
ਬੱਤਰਾ ਟੈਂਪੂ ਟਰਾਂਸਪੋਰਟ ਯੂਨੀਅਨ ਲੁਧਿਆਣਾ ਦੀ ਬਿਲਟੀ ਅਤੇ ਐਟਲਸ ਸਾਇਕਲ (ਹਰਿਆਣਾ) ਲਿਮ: ਲੁਧਿਆਣਾ ਵੱਲੋਂ ਬਿੱਲ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ (ਈ.ਈ.) ਸਰਬ ਸਿੱਖਿਆ ਅਭਿਆਨ ਮੁਕਤਸਰ (ਪੰਜਾਬ) ਦੇ ਨਾਂ ਦਰਸਾਇਆ ਗਿਆ ਹੈ। ਜਿਸਦਾ ਸੇਲ ਬਿੱਲ ਨੰਬਰ  ਡੀ1/11/12/000857, ਡੀ ਕੋਡ 159836 , ਬਿੱਲ ਮਿਤੀ 29-12-2012 ਦਰਸਾਇਆ ਗਿਆ ਹੈ। ਬਿੱਲ ਵਿਚ ਪ੍ਰਤੀ ਸਾਇਕਲ ਦੀ ਕੀਮਤ 2486.25 ਰੁਪਏ ਦੱਸੀ ਗਈ ਹੈ। ਜਿਸਦੇ ਹਿਸਾਬ ਨਾਲ ਕੁੱਲ 71 ਸਾਇਕਲਾਂ ਦੀ ਕੁੱਲ ਕੀਮਤ 1,76, 523.75 ਰੁਪਏ ਹੈ। ਇਨ੍ਹਾਂ ਕਾਗਜ਼ਾਂ ਦੇ ਨਾਲ ਸਾਇਕਲ ਪ੍ਰਾਪਤੀ ਬਾਰੇ ਰਸੀਦ ਵੀ ਭੇਜੀ ਗਈ ਹੈ। ਇਨ੍ਹਾਂ ਸਾਇਕਲਾਂ ਨੂੰ ਸਕੂਲ ਵਿਚ ਇਕ ਪਾਸੇ 'ਤੇ ਸੈਮੀਨਾਰ ਹਾਲ ਵਜੋਂ ਵਰਤੇ ਜਾਂਦੇ ਕਮਰੇ ਵਿਚ ਰਖਵਾਇਆ ਜਾ ਰਿਹਾ ਸੀ।
ਲੁਧਿਆਣਾ ਤੋਂ ਸਾਇਕਲਾਂ ਨਾਲ ਭਰਿਆ ਕੈਂਟਰ ਲੈ ਕੇ ਪੁੱਜੇ ਡਰਾਈਵਰ ਸੰਦੀਪ, ਹੰਸ ਰਾਜ, ਗੁਰਪ੍ਰੀਤ ਅਤੇ ਹਰਪ੍ਰੀਤ ਨੇ ਦੱਸਿਆ ਕਿ ਉਨ੍ਹਾਂ ਦੇ ਨਾਲ ਲੁਧਿਆਣਾ ਤੋਂ ਹੋਰ ਕਈ ਕੈਂਟਰ ਵੀ ਲੰਬੀ ਹਲਕੇ ਦੇ ਪਿੰਡ ਅਬੁੱਲਖੁਰਾਣਾ, ਦੋਦਾ ਅਤੇ ਮੁਕਤਸਰ ਲਈ ਰਵਾਨਾ ਹੋਏ ਸਨ। ਉਸਨੇ ਦੱਸਿਆ ਉਨ੍ਹਾਂ ਨੂੰ ਚੋਣ ਜ਼ਾਬਤੇ ਵਗੈਰਾ ਬਾਰੇ ਨਹੀਂ ਪਤਾ, ਉਹ ਤਾਂ ਸਿਰਫ਼ ਆਪਣੀ ਡਿਊਟੀ ਅਨੁਸਾਰ ਸਕੂਲ ਵਿਚ ਸਾਇਕਲ ਵਿਚ ਛੱਡਣ ਲਈ ਆਏ ਹਨ।
ਇਸੇ ਦੌਰਾਨ ਮੌਕੇ 'ਤੇ ਪੁੱਜੇ ਇੱਕ ਪਿੰਡ ਦੇ ਵਿਅਕਤੀ ਨੇ ਪੱਤਰਕਾਰਾਂ ਨੂੰ ਫੋਟੋਆਂ ਖਿੱਚਦੇ ਪੁੱਛਿਆ ਕਿ ਇਨ੍ਹਾਂ ਸਾਇਕਲਾਂ 'ਤੇ ਕਿਹੜਾ ਬਾਦਲ ਸਾਬ੍ਹ ਦੀ ਫੋਟੋ ਲੱਗੀ ਹੈ ਜਿਹੜਾ ਤੁਸੀਂ ਫੋਟੋ ਖਿੱਚ ਰਹੋ।
              ਚੋਣ ਜ਼ਾਬਤਾ ਲੱਗਣ ਦੇ ਬਾਵਜੂਦ ਮੁੱਖ ਮੰਤਰੀ ਦੇ ਹਲਕੇ ਵਿਚ ਇੰਝ ਖੁੱਲ੍ਹੇਆਮ ਸਾਇਕਲਾਂ ਦਾ ਭਰਿਆ ਕੈਂਟਰ ਪੁੱਜਣ ਅਤੇ ਬੀਤੇ ਕੱਲ੍ਹ ਪਿੰਡ ਚਨੂੰ ਵਿਖੇ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਸ਼ਿਕਾਇਤ ਦੀ ਪੜਤਾਲ ਕਰਨ ਪੁੱਜੇ ਸਰਕਾਰੀ ਅਮਲੇ ਨਾਲ ਖਿੱਚ-ਧੂਹ ਕਰਨ ਦੀ ਘਟਨਾ ਨੇ ਇਸ ਵਕਾਰੀ ਵਿਧਾਨਸਭਾ ਹਲਕੇ ਵਿਚ 30 ਜਨਵਰੀ ਤੱਕ ਦੀ ਚੋਣ ਪ੍ਰਕਿਰਿਆ ਦੌਰਾਨ ਚੋਣ ਜ਼ਾਬਤੇ ਦੀ ਉਲੰਘਣਾ ਅਤੇ ਧੱਕੇਸ਼ਾਹੀਆਂ ਦੇ ਵਾਪਰਨ ਵਾਲੇ ਹਾਲਾਤਾਂ ਬਾਰੇ ਅਗਾਊਂ ਤੌਰ 'ਤੇ ਸੰਕੇਤ ਹਨ।
ਇੱਥੇ ਜ਼ਿਕਰਯੋਗ ਹੈ ਕਿ ਜਿਸ ਦੌਰਾਨ ਲੰਬੀ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਚ ਸਾਇਕਲ ਉਤਾਰੇ ਜਾ ਰਹੇ ਸਨ, ਉਸ ਦੌਰਾਨ ਲਗਭਗ 5 ਕਿਲੋਸਮੀਟਰ ਦੀ ਦੂਰੀ 'ਤੇ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਵੀ ਆਪਣੀ ਚੋਣ ਮੁਹਿੰਮ ਦੇ ਆਗਾਜ਼ ਕਰਕੇ ਅੱਜ ਪਿੰਡ ਬਾਦਲ ਵਿਖੇ ਮੌਜੂਦ ਸਨ ਅਤੇ ਪਿੰਡ ਬਾਦਲ ਵਿਖੇ ਆਪਣੀ ਰਿਹਾਇਸ਼ 'ਤੇ ਪਾਰਟੀ ਵਰਕਰਾਂ ਦੀ ਮੀਟਿੰਗ ਨੂੰ ਸੰਬੋਧਨ ਕਰ ਰਹੇ ਸਨ।
              ਚੋਣ ਪ੍ਰਕਿਰਿਆ ਦੌਰਾਨ ਚੋਣ ਅਮਲੇ ਵਜੋਂ ਵਿਚਰ ਰਹੇ ਸਮੁੱਚੇ ਤੰਤਰ ਦੇ ਸੱਤਾ ਧਿਰ ਦੇ ਦਬਾਅ ਜਾਂ ਪ੍ਰਭਾਵ ਹੇਠ ਹੋਣ ਦਾ ਇਸ ਗੱਲ ਤੋਂ ਸਹਿਜੇ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਪਿਛਲੇ ਕੁਝ ਦਿਨਾਂ ਤੋਂ ਚੋਣ ਕਮਿਸ਼ਨ ਦੀ ਹਦਾਇਤਾਂ 'ਤੇ ਲੰਬੀ ਹਲਕੇ ਦੇ ਕਿੱਲਿਆਂਵਾਲੀ ਕਸਬੇ ਦੇ ਬਾਹਰਲੇ ਪਾਸੇ ਅਬੋਹਰ ਤਿੰਨ ਕੋਣੀ 'ਤੇ ਨਾਕਾ ਲਾ ਕੇ ਪੰਜਾਬ ਵਿਚ ਦਾਖਲ ਹੋਣ ਵਾਲੇ ਸਾਰੇ ਵਹੀਕਲਾਂ ਦੀ ਵੀਡੀਓਗਰਾਫ਼ੀ ਰਾਹੀਂ ਜਾਂਚ-ਪੜਤਾਲ ਕੀਤੀ ਜਾਂਦੀ ਸੀ, ਜੋ ਕਿ ਕੱਲ੍ਹ ਸ਼ਾਮ ਤੱਕ ਜਾਰੀ ਸੀ। ਪਰੰਤੂ ਅੱਜ ਮੁੱਖ ਮੰਤਰੀ ਦੇ ਫੇਰੀ ਮੌਕੇ ਉਕਤ ਤਿੰਨ ਕੋਣੀ 'ਤੇ ਪੁਲਿਸ ਪਾਰਟੀ ਮੌਜੂਦ ਨਹੀਂ ਸੀ। ਇਹ ਵੀ ਸੋਚਣ ਦਾ ਵਿਸ਼ਾ ਹੈ ਕਿ ਨਿਰਪੱਖ ਅਤੇ ਸਪੱਸ਼ਟ ਚੋਣ ਪ੍ਰਕਿਰਿਆ ਨੂੰ ਲਾਗੂ ਕਰਨ ਸਬੰਧੀ ਚੋਣ ਕਮਿਸ਼ਨ ਦੀਆਂ ਕੋਸ਼ਿਸ਼ਾਂ ਨੂੰ ਢਾਹ ਲਾਉਣ ਵਿਚ ਉਸੇ ਦੇ ਸਿਪਹਸਲਾਰ ਵੱਡੀ ਭੂਮਿਕਾ ਨਿਭਾਉਂਦੇ ਨਜ਼ਰ ਆ ਰਹੇ ਹਨ। ਜਦੋਂਕਿ ਚੋਣਾਂ ਦੇ ਅਮਲ ਦੇ ਸਾਰੇ ਮੁੱਖ ਦੌਰ ਅਜੇ ਤੱਕ ਸ਼ੁਰੂ ਹੋਣੇ ਬਾਕੀ ਹਨ।
ਇਸ ਸਬੰਧ ਵਿਚ ਜਦੋਂ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ (ਈ. ਈ.) ਸਰਬ ਸਿੱਖਿਆ ਅਭਿਆਨ ਮੁਕਤਸਰ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਦਾ ਮੋਬਾਇਲ ਬੰਦ ਆ ਰਿਹਾ ਸੀ। ਸਕੂਲ ਦੇ ਪਿੰ੍ਰਸੀਪਲ ਗੁਰਿੰਦਰ ਕੌਰ ਨੇ ਸੰਪਰਕ ਕਰਨ 'ਤੇ ਦੱਸਿਆ ਕਿ ਉਹ ਸਕੂਲ ਵਿਚ ਛੁੱਟੀਆਂ ਹੋਣ ਕਰਕੇ ਲੁਧਿਆਣੇ ਦੇ ਅਪੋਲੋ ਹਸਪਤਾਲ ਵਿਚ ਦਾਖਲ ਆਪਣੀ ਬੀਮਾਰ ਸੱਸ ਦੀ ਦੇਖਭਾਲ ਵਿਚ ਜੁਟੇ ਹੋਏ ਸਨ ਅਤੇ ਸਕੂਲ ਵਿਚ ਸਾਇਕਲਾਂ ਦੇ ਆਉਣ ਬਾਰੇ ਕੁਝ ਨਹੀਂ ਪਤਾ।
             ਇਸੇ ਦੌਰਾਨ ਸੰਪਰਕ ਕਰਨ 'ਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸ੍ਰੀ ਅਰਸ਼ਦੀਪ ਸਿੰਘ ਥਿੰਦ ਨੇ ਕਿਹਾ ਕਿ ਕਿਸੇ ਵੀ ਸੂਰਤ ਵਿਚ ਚੋਣ ਜ਼ਾਬਤੇ ਦੀ ਉਲੰਘਣਾ ਨਹੀਂ ਹੋਣ ਦਿੱਤੀ ਜਾਵੇਗੀ।

ਸ਼ਾਂਤ ਫਾਉਂਡੇਸ਼ਨ ਵੱਲੋਂ ਲਾਏ ਕੈਂਸਰ ਜਾਂਚ ਕੈਂਪ ਵਿਚ 114 ਮਰੀਜਾਂ ਦੀ ਜਾਂਚ ਹੋਈ

                     -ਸਮੇਂ 'ਤੇ ਜਾਂਚ ਤੇ ਸਮੇਂ ਸਿਰ ਇਲਾਜ ਨਾਲ ਕੈਂਸਰ ਨੂੰ ਰੋਕਿਆ ਜਾ ਸਕਦਾ ਹੈ : ਡਾ: ਤੇਜਿੰਦਰ ਸਿੰਘ-

ਡੱਬਵਾਲੀ, 26 ਦਸੰਬਰ : ਸ਼ਾਂਤ ਫਾਊਂਡੇਸ਼ਨ ਵੱਲੋਂ ਸਥਾਨਕ ਵਿਸ਼ਵਕਰਮਾ ਗੁਰਦੁਆਰੇ ਵਿਚ ਉੱਘੇ ਆਜਾਦੀ ਘੁਲੀਟੀਏ ਮਰਹੂਮ ਸ੍ਰੀ ਗੁਰਦੇਵ ਸਿੰਘ ਸ਼ਾਂਤ ਦੀ 16ਵੀਂ ਬਰਸੀ ਦੇ ਮੌਕੇ ਰੋਕੋ ਕੈਂਸਰ ਦੇ ਰੋਮਿੰਗ ਰਾਜਦੂਤ ਕੁਲਵੰਤ ਧਾਲੀਵਾਲ ਦੀ ਪ੍ਰੇਰਨਾ ਸਦਕਾ ਮੁਫਤ ਕੈਂਸਰ ਜਾਂਚ ਅਤੇ ਜਾਗਰੂਕਤਾ ਕੈਂਪ ਲਗਾਇਆ ਗਿਆ। ਜਿਸ ਵਿਚ ਮੈਕਸ ਹਸਪਤਾਲ ਲੁਧਿਆਣਾ ਦੇ ਕੈਂਸਰ ਦੇ ਮਾਹਰ ਡਾ. ਤਜਿੰਦਰ ਸਿੰਘ ਨੇ ਮਰੀਜਾਂ ਦੀ ਜਾਂਚ ਕੀਤੀ। ਇਸ ਮੌਕੇ 'ਤੇ ਰੋਕੋ ਕੈਂਸਰ ਸੰਸਥਾ ਵੱਲੋਂ ਜ਼ਰੂਰਤਮੰਦਾਂ ਦੀ ਮੁਫਤ ਮੈਮੋਗ੍ਰਾਫੀ ਅਤੇ ਪੈਪਸਮੀਰ ਟੈਸਟ ਵੀ ਕੀਤੇ।
              ਇਸਤੋਂ ਪਹਿਲਾਂ ਉਦਘਾਟਨ ਸਮਾਰੋਹ ਵਿਚ ਮੁੱਖ ਮਹਿਮਾਨ ਵਜੋਂ ਸੰਬੋਧੜ ਕਰਦਿਆਂ ਡਾ. ਤਜਿੰਦਰ ਸਿੰਘ ਨੇ ਕੈਂਸਰ ਦੇ ਕਾਰਨਾਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਸ਼ਰਾਬ, ਤੰਬਾਕੂ, ਫਾਸਟ-ਫੂਡ ਦੇ ਨਾਲ-ਨਾਲ ਘੱਟ ਵਜ਼ਨ, ਗੈਰ ਜ਼ਰੂਰੀ ਤਣਾਅ ਕੈਂਸਰ ਦੇ ਕਾਰਨਾਂ ਵਿਚ ਸ਼ਾਮਲ ਹਨ। ਉਨ੍ਹਾਂ ਕਿਹਾ ਕਿ ਕੈਂਸਰ ਹੁਣ ਲਾਇਲਾਜ ਬੀਮਾਰੀ ਨਹੀਂ ਰਿਹਾ । ਸਮੇਂ 'ਤੇ ਇਸਦੀ ਜਾਂਚ ਅਤੇ ਸਮੇਂ 'ਤੇ ਇਲਾਜ ਨਾਲ ਇਸਨੂੰ ਰੋਕਿਆ ਜਾ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਸਕਰੀਨਿੰਗ ਨਾਲ ਛਾਤੀ ਅਤੇ ਬੱਚੇਦਾਨੀ ਦੇ ਕੈਂਸਰ ਦਾ ਪਹਿਲਾਂ ਤੋਂ ਹੀ ਪਤਾ ਲੱਗ ਜਾਂਦਾ ਹੈ ਅਤੇ ਇਸਦਾ ਸਮੇਂ ਰਹਿੰਦੇ ਇਲਾਜ ਕਰਵਾ ਕੇ ਰੋਗੀ ਤੰਦਰੁਸਤ ਜੀਵਨ ਬਿਤਾ ਸਕਦਾ ਹੈ।
ਇਸ ਮੌਕੇ 'ਤੇ ਡੱਬਵਾਲੀ ਦੇ ਸਿਵਲ ਹਸਪਤਾਲ ਦੇ ਸੀਨੀਅਰ ਡਾਕਟਰਾਂ ਐਸ.ਐਮ.ਓ.ਡਾ. ਮਹਿੰਦਰ ਸਿੰਘ ਭਾਦੂ ਨੇ ਕੈਂਸਰ ਦੇ ਬਾਰੇ ਵਿਚ ਸਵਾਸਥ ਵਿਭਾਗ ਵੱਲੋਂ ਮੁੱਖ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਸਰੀਰ ਦੇ ਕਿਸੇ ਵੀ ਭਾਗ ਦੇ ਸੈਲਾਂ ਦਾ ਬੇਲਗਾਮ ਹੋ ਕੇ ਵਧਣਾ ਕੈਂਸਰ ਦੀ ਸ਼੍ਰੇਮਣੀ ਵਿਚ ਆਉਂਦੇ ਹਨ।
         ਰੋਕੋ ਕੈਂਸਰ ਦੇ ਪੰਜਾਬ ਦੇ ਪ੍ਰਮੁੱਖ ਡਾ. ਧਰਮਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਪੰਜਾਬ ਵਿਚ ਰੋਕੋ ਕੈਂਸਰ ਵੱਲੋਂ ਡੇਢ ਕਰੋੜ ਰੁਪਏ ਦੀ ਲਾਗਤ ਨਾਲ ਪੰਚ ਬੱਸਾਂ ਕੈਂਸਰ ਦੀ ਜਾਂਚ ਵਿਚ ਮੁਫਤ ਸੇਵਾ ਵਿਚ ਲੱਗੀਆਂ ਹੋਈਆਂ ਸਨ। ਉਨ੍ਹਾਂ ਦੱਸਿਆ ਕਿ ਰੋਕੋ ਕੈਂਸਰ ਵੱਲੋਂ ਇਹ ਹਰਿਆਣਾ ਵਿਚ ਲਾਇਆ ਜਾਣ ਵਾਲਾ ਪਹਿਲਾ ਕੈਂਪ ਹੈ।

          ਇਸ ਮੌਕੇ ਜੱਸੀ ਹਸਪਤਾਲ ਦੇ ਸੰਚਾਲਕ ਡਾ. ਸੁਰਿੰਦਰ ਪਾਲ ਜੱਸੀ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਸ਼ਹਿਰ ਨੂੰ ਕੈਂਸਰ ਮੁਕਤ ਕਰਨ ਲਈ ਸਮੇਂ-ਸਮੇਂ 'ਤੇ ਮੁਫਤ ਜਾਂਚ ਕੈਂਪ ਲਗਾਉਣ ਲਈ ਸ਼ਾਂਤ ਫਾਊਂਡੇਸ਼ਨ ਨੂੰ ਹਰ ਤਰ੍ਹਾਂ ਦਾ ਸਹਿਯੋਗ ਦਿੰਦੇ ਰਹਿਣਗੇ।
              ਉੱਘੇ ਭਾਜਪਾ ਨੇਤਾ ਦੇਵ ਕੁਮਾਰ ਸ਼ਰਮਾ ਨੇ ਆਜਾਦੀ ਘੁਲਾਈਏ ਸਵ. ਗੁਰਦੇਵ ਸਿੰਘ ਸ਼ਾਂਤ ਨੂੰ ਯਾਦ ਕਰਦੇ ਹੋਏ ਉਨ੍ਹਾਂ ਦੀ ਸਮਾਜ ਸਵੀ ਸੋਚ ਅਤੇ ਸ਼ਹਿਰ ਦੇ ਪ੍ਰਤੀ ਸੇਵਾਵਾਂ ਨੂੰ ਸਲਾਮ ਕੀਤਾ। ਉਨ੍ਹਾਂ ਵੱਲੋਂ ਨਗਰ ਸੁਧਾਰ ਮੰਡਲ ਦੇ ਬਤੌਰ ਚੇਅਰਮੈਨ ਕਰਵਾਏ ਗਏ ਵਿਕਾਸ ਕੰਮਾਂ ਦਾ ਉਲੇਖ ਕਰਦੇ ਹੋਏ ਉਨ੍ਹਾਂ ਨੇ ਦੱਸਿਆ ਕਿ 37 ਸਾਲ ਪਹਿਲਾਂ ਇੱਕ ਛੱਪੜ ਨੂੰ ਚੰਡੀਗੜ੍ਹ ਸਟਾਇਲ ਦੀ ਮਾਰਕੀਟ ਦਾ ਰੂਪ ਦੇਣਾ ਉਨ੍ਹਾਂ ਦੀ ਵਿਕਾਸਪੂਰਨ ਸੋਚ ਦਾ ਨਤੀਜਾ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਯਾਦ ਵਿਚ ਲਾਇਆਕੈਂਸਰ ਚੈਕਅੱਪ ਕੈਂਪ ਉਨ੍ਹਾਂ ਦੀ ਸੱਚੀ ਸ਼ਰਧਾਂਜਲੀ ਹੈ।
 
              ਸ਼ਾਂਤ ਫਾਊਂਡੇਸ਼ਨ ਦੇ ਪ੍ਰਧਾਨ ਇਕਬਾਲ ਸਿੰਘ ਸ਼ਾਂਤ ਨੇ ਫਾਊਂਡੇਸ਼ਨ ਦੇ ਉਦੇਸ਼ਾਂ ਬਾਰੇ ਵਿਚ ਜਾਣਕਾਰੀ ਦਿੰਦਿਆਂ ਭੀਂਵੱਖੀ ਯੋਜਨਾਵਾਂ  ਬਾਰੇ ਦੱਸਦਿਆਂ ਕਿਹਾ ਕਿ ਪੂਰੇ ਸ਼ਹਿਰ ਦਾ ਹੈਲਥ ਰਜਿਸਟਰੀ (ਸਿਹਤ ਸਰਵੇਖਣ) ਕਰਵਾ ਸ਼ਹਿਰ ਦੇ ਲੋਕਾਂ ਦੀ ਸਿਹਤ ਦੇ ਅੰਕੜਿਆਂ ਨੂੰ ਇੱਕਠਾ ਕਰਨ ਸੰਕਲਪ ਦੁਹਰਾਇਆ। ਉਨ੍ਹਾਂ ਰੋਕੋ ਕੈਂਸਰ ਦੇ ਰੋਮਿੰਗ ਰਾਜਦੂਤ ਕੁਲਵੰਤ ਧਾਲੀਵਾਲ ਵੱਲੋਂ ਵਿਸ਼ਵ ਪੱਧਰ 'ਤੇ ਕੈਂਸਰ ਦੀ ਬੀਮਾਰੀ ਖਿਲਾਫ਼ ਕੀਤੇ ਜਾ ਰਹੇ ਯਤਨਾਂ ਦੀ ਸ਼ਲਾਘਾ ਕੀਤੀ।
ਇਸ ਮੌਕੇ 'ਤੇ ਕੈਂਸਰ ਤੋਂ ਇਲਾਵਾ ਰੋਗਾਂ ਸਮੇਤ 114 ਮਰੀਜ਼ਾਂ ਨੇ ਜਾਂਚ ਕੀਤੀ ਗਈ। ਜਿਸ ਵਿਚੋਂ ਕੈਂਸਰ ਵੱਲੋਂ 30 ਮੈਮੋਗ੍ਰਾਫੀ ਅਤੇ 34 ਪੈਪਸਮੀਰ ਟੈਸਟ ਕੀਤੇ ਗਏ। ਜਿਸ ਵਿਚੋਂ ਕੈਂਸਰ ਦਾ ਇਕ ਰੋਗੀ ਪਾਜ਼ੀਟਿਵ ਪਾਇਆ ਗਿਆ। ਇਸ ਮੌਕੇ 'ਤੇ ਬਲੱਡ ਸ਼ੂਗਰ ਅਤੇ ਬੀ.ਪੀ.ਕੀ ਵੀ ਮੁਫਤ ਜਾਂਚ ਕੀਤੀ ਗਈ। ਇਸ ਕੈਂਪ ਨੂੰ ਐਮ. ਜੀ. ਡੀ.ਐਮ.ਨਰਸਿੰਗ ਕਾਲਜ ਬਠਿੰਡਾ ਦੇ ਨਰਸਿੰਗ ਸਟਾਫ ਨੇ ਵਿਸ਼ੇਸ਼ ਰੂਪ ਨਾਲ ਸਹਿਯੋਗ ਦਿੱਤਾ।
ਇਸ ਮੌਕੇ ਸਿਵਲ ਹਸਪਤਾਲ ਤੋਂ ਮਹਿਲਾਂ ਰੋਗਾਂ ਦੇ ਮਾਹਿਰ ਡਾਕਟਰ ਅਮਰ ਦੀਪ ਜੱਸੀ, ਡੈਂਟਲ ਸਰਜਨ ਡਾ. ਰਾਹੁਲ, ਡਾ. ਭਾਰਤ ਭੂਸ਼ਣ, ਰੋਕੋ ਕੈਂਸਰ ਟੀਮ ਦੀ ਮਹਿਲਾ ਰੋਗ ਡਾਕਟਰ ਸ਼ਬਨਮ ਨੇ ਆਪਣੀ-ਆਪਣੀ ਟੀਮ ਦੇ ਨਾਲ ਰੋਗੀਆਂ ਦੀ ਜਾਂਚ ਕੀਤੀ।