ਆਪਣੀ ਦਿਸ਼ਾ ਦੀ ਉਡੀਕ 'ਚ ਸੂਬੇ ਦੀ ਸਿਆਸਤ ਦਾ 'ਦਿਸ਼ਾਕਾਰ' ਲੰਬੀ ਹਲਕਾ

        'ਵਿਕਾਸ ਫੈਕਟਰ' ਨਾਲੋਂ ਜ਼ਿਆਦਾ ਅਸਰਦਾਰ ਵਿਖਾਈ ਦੇ ਰਿਹੈ 'ਦਾਸ' ਅਤੇ 'ਡੇਰਾ' ਫੈਕਟਰਾਂ ਦਾ ਪ੍ਰਭਾਵ
                                                              -ਇਕਬਾਲ ਸਿੰਘ ਸ਼ਾਂਤ-

ਲੰਬੀ  : ਪਿਛਲੇ ਕਈ ਦਹਾਕਿਆਂ ਤੋਂ ਸੂਬੇ ਦੀਆਂ ਸਿਆਸੀ ਸਫ਼ਾਂ ਨੂੰ ਦਿਸ਼ਾ ਦੇਣ ਵਾਲੀ ਲੰਬੀ ਦੀ ਸਿਆਸਤ ਅੱਜ ਖੁਦ ਆਪਣੀ ਦਿਸ਼ਾ ਲਈ 30 ਜਨਵਰੀ ਦੀ ਉਡੀਕ ਕਰ ਰਹੀ ਹੈ। ਇੱਥੋਂ ਦੇ ਚੋਣ ਦੰਗਲ ਵਿਚ ਮੌਜੂਦਾ ਸਮੇਂ ਵਿਚ ਉੱਤਰ ਭਾਰਤ ਦੇ ਸਭ ਤੋਂ ਬਜ਼ੁਰਗ ਸਿਆਸਤਦਾਨ ਸ. ਪ੍ਰਕਾਸ਼ ਸਿੰਘ ਬਾਦਲ ਨੂੰ ਆਪਣੇ ਸਕੇ ਭਰਾ ਸ. ਗੁਰਦਾਸ ਸਿੰਘ ਸਿੰਘ (ਪੀ.ਪੀ.ਪੀ.) ਅਤੇ ਚਚੇਰੇ ਭਰਾ ਸ. ਮਹੇਸ਼ਇੰਦਰ ਸਿੰਘ ਬਾਦਲ (ਕਾਂਗਰਸ) ਦੀ ਸਖ਼ਤ ਟੱਕਰ ਦਾ ਸਾਹਮਣਾ ਕਰਨਾ ਪੈ ਰਿਹਾ ਹੈ।

               1,37,797 ਵੋਟਰਾਂ ਵਾਲੇ ਹਲਕੇ ਲੰਬੀ ਦੇ ਚੋਣ ਪਿੜ ਦਾ ਨਜ਼ਾਰਾ ਹਾਕਮ ਧਿਰ ਦੇ 'ਵਿਕਾਸ ਫੈਕਟਰ' ਨਾਲੋਂ ਜ਼ਿਆਦਾ 'ਦਾਸ ਫੈਕਟਰ' ਅਤੇ 'ਡੇਰਾ ਫੈਕਟਰ' ਦੇ ਪ੍ਰਭਾਵ ਹੇਠ ਜ਼ਿਆਦਾ ਵਿਖਾਈ ਰਿਹਾ ਹੈ, ਜਿਸਨੇ ਪੰਜਾਬ ਦੀ ਸਿਆਸਤ ਦੇ ਸ਼ਾਹ-ਅਸਵਾਰ ਵਜੋਂ ਪ੍ਰਵਾਨਤ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀਆਂ ਸਿਆਸੀ ਮੁਸ਼ਕਿਲਾਂ ਵਧਾ ਰੱਖੀਆਂ ਹਨ।

ਹਰਿਆਣਾ ਅਤੇ ਰਾਜਸਥਾਨ ਦੇ ਨਾਲ ਖਹਿੰਦੇ 73 ਪਿੰਡਾਂ 'ਤੇ ਆਧਾਰਤ ਹਲਕੇ ਲੰਬੀ ਵਿਚ ਆਜ਼ਾਦੀ ਦੇ ਬਾਅਦ ਭਾਵੇ ਹੁਣ ਤੱਕ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਇਸ ਚੋਣ ਹਲਕੇ ਤੋਂ ਤਿੰਨ ਵਾਰ ਵਿਧਾਇਕ ਰਹੇ ਹਨ ਪਰ ਸ. ਤੇਜਾ ਸਿੰਘ ਬਾਦਲ ਹੁਰਾਂ ਦੀ ਰਹਿਨੁਮਾਈ ਸਦਕਾ ਨਾਇਬ ਤਹਿਸੀਲਦਾਰ ਦੇ ਸੁਫ਼ਨਿਆਂ ਤੋਂ ਚਾਰ ਵਾਰ ਸੂਬੇ ਦੇ ਹੁਕਮਰਾਨ ਦਾ ਸੁੱਖ ਮਾਣਨ ਵਾਲੇ 'ਪਾਸ਼' ਦਾ ਸਿਆਸੀ ਵੱਕਾਰ ਹੀ ਭਾਰੂ ਰਿਹਾ ਹੈ। ਜਿਸਨੂੰ ਸ. ਤੇਜਾ ਸਿੰਘ ਦੇ ਸਾਊ ਸਿਆਸਤਦਾਨ ਵਜੋਂ ਜਾਣੇ ਜਾਂਦੇ ਸਪੁੱਤਰ ਸ. ਮਹੇਸ਼ਇੰਦਰ ਸਿੰਘ ਪਿਛਲੀਆਂ ਦੋ ਵਿਧਾਨ ਸਭਾ ਚੋਣਾਂ 2002 ਅਤੇ 2007 ਤੋਂ ਲਗਾਤਾਰ ਸ. ਪ੍ਰਕਾਸ਼ ਸਿੰਘ ਬਾਦਲ ਨੂੰ ਸਖ਼ਤ ਮੁਕਾਬਲਾ ਦਿੰਦੇ ਆ ਰਹੇ ਹਨ। ਉਨ੍ਹਾਂ 'ਤੇ ਕਾਂਗਰਸ ਨੇ ਲਗਾਤਾਰ ਦੂਜੀ ਵਾਰ ਦਾਅ ਲਾ ਕੇ ਇੱਕ ਵਾਰ ਫ਼ੇਰ ਪਰਕਾਸ਼ ਸਿੰਘ ਬਾਦਲ ਨੂੰ ਘੇਰਨ ਦਾ ਕੰਮ ਕੀਤਾ ਹੈ।
ਐਤਕੀਂ ਤ੍ਰਿਕੋਣੇ ਮੁਕਾਬਲੇ ਵਿਚ ਉਲਝੇ ਪ੍ਰਕਾਸ਼ ਸਿੰਘ ਬਾਦਲ ਨੂੰ 2007 ਦੀਆਂ ਵਿਧਾਨ ਸਭਾ ਚੋਣਾਂ ਸਮੇਂ ਉਨ੍ਹਾਂ ਦੇ ਸਿਆਸੀ ਗੁਰੂ ਸ. ਤੇਜਾ ਸਿੰਘ ਬਾਦਲ ਦੇ ਸਪੁੱਤਰ ਸ. ਮਹੇਸ਼ਇੰਦਰ ਸਿੰਘ ਬਾਦਲ (ਕਾਂਗਰਸ) ਪਾਸੋਂ ਬੇਹੱਦ ਸਖ਼ਤ ਟੱਕਰ ਮਿਲੀ ਸੀ। ਉਸ ਮੌਕੇ ਕੁੱਲ ਪਈਆਂ ਵੋਟਾਂ 1,09, 595 ਵਿਚੋਂ ਸ. ਪ੍ਰਕਾਸ਼ ਸਿੰਘ ਬਾਦਲ ਨੂੰ 56,282 ਅਤੇ ਮਹੇਸ਼ਇੰਦਰ ਸਿੰਘ ਬਾਦਲ ਨੂੰ 47,095 ਵੋਟਾਂ ਮਿਲੀਆਂ ਸਨ। ਇਸੇ ਸਖ਼ਤ ਟੱਕਰ ਸਦਕਾ ਪ੍ਰਕਾਸ਼ ਸਿੰਘ ਬਾਦਲ ਦੀ ਸੰਨ 2002 ਦੀ 23929 ਵੋਟਾਂ ਦੇ ਅੰਤਰ ਨਾਲ ਹੋਈ ਜਿੱਤ, ਸੰਨ 2007 ਵਿਚ ਮਹਿਜ਼ 9187 ਵੋਟਾਂ ਤੱਕ ਸਿਮਟ ਕੇ ਰਹਿ ਗਈ ਸੀ।

ਪਿਛਲੇ 65 ਵਰ੍ਹਿਆਂ ਤੋਂ ਪਰਕਾਸ਼ ਸਿੰਘ ਬਾਦਲ ਦੀ ਚੋਣ ਮੁਹਿੰਮਾਂ ਨੂੰ 'ਜਰਨੈਲ' ਵਜੋਂ ਚਲਾਉਂਦੇ ਰਹੇ ਉਨ੍ਹਾਂ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਵੀ ਪੀ. ਪੀ. ਪੀ. ਦੇ ਗਠਨ ਉਪਰੰਤ ਬਦਲੇ ਸਿਆਸੀ ਹਾਲਾਤਾਂ ਵਿਚ ਉਨ੍ਹਾਂ ਦੇ ਵਿਰੁੱਧ ਮੈਦਾਨ ਵਿਚ ਡਟੇ ਹਨ। ਉਨ੍ਹਾਂ (ਦਾਸ) ਦਾ ਲੰਬੀ ਹਲਕੇ ਵਿਚ ਆਪਣਾ ਵਿਸ਼ੇਸ਼ ਆਧਾਰ ਹੈ ਅਤੇ ਪਿਛਲੇ ਵਰ੍ਹੇ ਤੱਕ ਮੁਕਤਸਰ ਜ਼ਿਲ੍ਹੇ ਵਿਚ ਅਕਾਲੀ ਦਲ ਦੀ ਹਰੇਕ ਵਿਉਂਤਬੰਦੀ ਦੇ ਸਿਰਜਣਹਾਰ ਰਹੇ 'ਦਾਸ' ਨੂੰ ਅਜਿਹਾ ਮਾਣ ਪ੍ਰਾਪਤ ਹੈ ਕਿ ਮੁਕਤਸਰ, ਬਠਿੰਡਾ ਅਤੇ ਫਿਰੋਜ਼ਪੁਰ ਜ਼ਿਲ੍ਹੇ ਦੇ ਬਹੁਗਿਣਤੀ ਸਥਾਪਿਤ ਅਕਾਲੀ ਆਗੂ ਉਨ੍ਹਾਂ ਦੀ ਸਿਆਸੀ ਬਰਗਦ ਰੂਪੀ ਸ਼ਖਸੀਅਤ ਹੇਠ ਵਧੇ ਫੁੱਲੇ ਹਨ। ਇਸਦੇ ਇਲਾਵਾ ਲੰਬੀ ਹਲਕੇ ਦੇ ਹਰੇਕ ਰਾਹ ਅਤੇ ਪਹੀ ਤੋਂ ਇਲਾਵਾ ਇੱਕ-ਇੱਕ ਵਰਕਰ ਦਾ ਨਾਂ ਲੰਬੀ ਹਲਕੇ ਵਿਚ ਮੁੱਖ ਮੰਤਰੀ ਦੇ ਪਰਛਾਵੇਂ ਵਜੋਂ ਵਿਚਰਦੇ ਰਹੇ 82 ਸਾਲਾ 'ਦਾਸ' ਦੀਆਂ ਉਂਗਲਾਂ 'ਤੇ ਦਰਜ ਹੈ। ਇਹੋ ਦਰਜ ਅੰਕੜੇ ਅੱਜ ਅਕਾਲੀ ਦਲ ਲਈ ਕਾਂਗਰਸ ਨਾਲੋਂ ਜ਼ਿਆਦਾ ਖ਼ਤਰਨਾਕ ਸਾਬਤ ਹੋ ਰਹੇ ਹਨ। ਕਿਉਂਕਿ ਕਾਂਗਰਸ ਦਾ ਪੱਕਾ ਵੋਟ ਬੈਂਕ ਬਿਲਕੁੱਲ ਸਾਮਹਣੇ ਵਿਰੋਧ ਵਿਚ ਖੜ੍ਹਾ ਹੈ ਜਦੋਂਕਿ ਪੀ.ਪੀ.ਪੀ. ਦੇ ਉਮੀਦਵਾਰ ਸ. ਗੁਰਦਾਸ ਸਿੰਘ ਬਾਦਲ ਵੱਲੋਂ ਵਿੰਨ੍ਹ-ਵਿੰਨ੍ਹ ਮਾਰੇ ਜਾ ਰਹੇ ਅੰਦਰੂਨੀ ਤੀਰ ਅਕਾਲੀ ਦਲ ਨੂੰ ਵੱਡਾ ਖੋਰਾ ਲਾਉਣ ਵਿਚ ਅਹਿਮ ਰੋਲ ਨਿਭਾ ਸਕਦੇ ਹਨ। ਇਸਦੇ ਇਲਾਵਾ ਅਕਾਲੀ ਦਲ ਦੇ ਵਿਦਿਆਰਥੀ ਵਿੰਗ ਦੇ ਕੌਮੀ ਜਨਰਲ ਸਕੱਤਰ ਜਸਵਿੰਦਰ ਸਿੰਘ ਧੌਲਾ ਦੇ ਆਜ਼ਾਦ ਉਮੀਦਵਾਰ ਵਜੋਂ ਉਤਰਨਾ ਵੀ ਅਕਾਲੀ ਦਲ ਲਈ ਦੂਸਰੀ ਖ਼ਤਰੇ ਦੀ ਘੰਟੀ ਬਣਿਆ ਹੋਇਆ ਹੈ।

ਲਗਭਗ 62 ਹਜ਼ਾਰ ਦੀ ਜੱਟ ਸਿੱਖ ਆਬਾਦੀ ਅਤੇ 40 ਹਜ਼ਾਰ ਦੇ ਕਰੀਬ ਦਲਿਤ ਵੋਟਰਾਂ ਵਾਲੇ ਹਲਕੇ ਵਿਚ ਡੇਰਾ ਸੱਚਾ ਸੌਦਾ ਦੇ ਪ੍ਰੇਮੀਆਂ ਦੀ ਗਿਣਤੀ 14-15 ਹਜ਼ਾਰ ਦੇ ਕਰੀਬ ਮੰਨੀ ਜਾਂਦੀ ਹੈ। ਸੂਤਰਾਂ ਅਨੁਸਾਰ ਇਨ੍ਹਾਂ ਵਿਚੋਂ 65 ਫ਼ੀਸਦ ਡੇਰਾ ਸ਼ਰਧਾਲੂਆਂ ਵੱਲੋਂ ਵੋਟਾਂ ਸਮੇਂ ਡੇਰੇ ਦੇ ਹੁਕਮਾਂ ਨੂੰ ਨਿਰੋਲ ਰੂਪ ਵਿਚ ਸਿਰ ਮੱਥੇ ਮੰਨਿਆ ਜਾਂਦਾ ਹੈ।

ਹਲਕੇ ਵਿਚ ਸੇਮ ਦੀ ਸਮੱਸਿਆ, ਨਸ਼ਾਖੋਰੀ, ਬੇਰੁਜ਼ਗਾਰੀ ਅਤੇ ਬੇਵਿਉਂਤਾ ਵਿਕਾਸ ਚੋਣ ਪਿੜ ਦਾ ਭਖਵਾਂ ਮੁੱਦਾ ਬਣੇ ਹੋਏ ਹਨ। ਇਸਦੇ ਇਲਾਵਾ ਹਲਕੇ ਵਿਚ ਹਾਕਮ ਦੇ ਕਥਿਤ ਝੰਡਾਬਰਦਾਰਾਂ 'ਵਿਚੋਲਿਆਂ' ਵੱਲੋਂ ਸਰਕਾਰੀ ਫੰਡਾਂ ਵਿਚ ਦੁਰਵਰਤੋਂ ਅਤੇ ਊਣਤਾਈਆਂ ਖਿਲਾਫ਼ ਲੋਕਾਂ ਵਿਚ ਭਰਵਾਂ ਰੋਸ ਵੀ ਇੱਕ ਅਹਿਮ ਮੁੱਦਾ ਹੈ। ਜਿਸ 'ਤੇ ਠੱਲ੍ਹ ਪਾਉਣ ਅਕਾਲੀ ਦਲ ਦੀ ਸਟਾਰ ਪ੍ਰਚਾਰਕ ਬੀਬੀ ਹਰਸਿਮਰਤ ਕੌਰ ਬਾਦਲ ਵੱਲੋਂ ਚੋਣ ਜਲਸਿਆਂ ਵਿਚ 'ਵਿਚੋਲਿਆਂ' 'ਤੇ ਖੂਬ ਰਗੜੇ ਲਾ ਕੇ ਲੋਕਾਂ ਦੇ ਗੁੱਸੇ 'ਤੇ ਠੰਢਾ ਪਾਉਣ ਦੀ ਕੋਸ਼ਿਸ਼ ਵੀ ਕੀਤੀ ਜਾ ਰਹੀ ਹੈ।

72230 ਪੁਰਸ਼ ਅਤੇ 65567 ਔਰਤ ਵੋਟਰਾਂ 'ਤੇ ਆਧਾਰਤ ਲੰਬੀ ਦੇ ਚੋਣ ਪਿੜ ਵਿਚ ਜਿੱਥੇ ਅਕਾਲੀ-ਭਾਜਪਾ ਗੱਠਜੋੜ ਦੇ ਉਮੀਵਾਰ ਸ. ਪ੍ਰਕਾਸ਼ ਸਿੰਘ ਬਾਦਲ ਹਲਕੇ ਵਿਚ ਦਿੱਤੀਆਂ ਗਰਾਂਟਾਂ ਦੇ ਆਧਾਰ 'ਤੇ ਹੋਏ ਵਿਕਾਸ ਦੇ ਨਾਂਅ 'ਤੇ ਵੋਟਾਂ ਮੰਗ ਰਹੇ ਹਨ, ਉਥੇ ਕਾਂਗਰਸ ਦੇ ਉਮੀਦਵਾਰ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਆਪਣੀ ਚੋਣ ਮੁਹਿੰਮ ਵਿਚ ਹਲਕੇ ਦੇ 47 ਪਿੰਡਾਂ ਵਿਚ ਡੇਢ ਦਹਾਕੇ ਤੋਂ ਸੇਮ ਦੀ ਸਮੱਸਿਆ ਤੇ ਬੇਵਿਉਂਤੇ ਵਿਕਾਸ ਲਈ ਅਕਾਲੀ ਸਰਕਾਰ ਦੀ ਸਮੁੱਚੀ ਕਾਰਗੁਜ਼ਾਰੀ ਨੂੰ ਫੇਲ੍ਹ ਕਰਾਰ ਦਿੰਦਿਆਂ ਹਲਕੇ ਦੇ ਬਹੁਪੱਖੀ ਵਿਕਾਸ ਲਈ ਉਨ੍ਹਾਂ (ਮਹੇਸ਼ਇੰਦਰ) ਨੂੰ ਇੱਕ ਮੌਕਾ ਦਿੱਤੇ ਜਾਣ ਦੀ ਅਪੀਲ ਕਰ ਰਹੇ ਹਨ।

ਇਸ ਤੋਂ ਇਲਾਵਾ ਅਕਾਲੀ ਦਲ ਨੂੰ 80 ਫ਼ੀਸਦੀ ਅਤੇ ਕਾਂਗਰਸ ਲਈ 20 ਫ਼ੀਸਦੀ ਨੁਕਸਾਨ ਦਾ ਸੂਚਕ ਬਣ ਰਹੇ ਪੀ.ਪੀ.ਪੀ. ਦੇ ਉਮੀਦਵਾਰ ਸ. ਗੁਰਦਾਸ ਸਿੰਘ ਬਾਦਲ ਵੱਲੋਂ ਅਕਾਲੀ ਵਿਚ ਫੈਲੇ ਭ੍ਰਿਸ਼ਟਚਾਰ ਅਤੇ ਨਿਜ਼ਾਮ ਬਦਲਣ ਲਈ ਲੋਕਾਂ ਤੋਂ ਹਮਾਇਤ ਦੀ ਅਪੀਲ ਕਰ ਰਹੇ ਹਨ।

ਇਸ ਚੋਣ ਹਲਕੇ ਤੋਂ ਬਹੁਜਨ ਸਮਾਜ ਪਾਰਟੀ ਵੱਲੋਂ ਪ੍ਰਵੀਨ ਕੁਮਾਰੀ, ਲੋਕ ਜਨ ਸ਼ਕਤੀ ਪਾਰਟੀ ਵੱਲੋਂ ਕਿਰਨਜੀਤ ਸਿੰਘ ਗਹਿਰੀ, ਸ਼੍ਰੋਮਣੀ ਅਕਾਲੀ ਦਲ ਅੰਮ੍ਰਿਤਸਰ ਵੱਲੋਂ ਇਕਬਾਲ ਸਿੰਘ, ਪੰਜਾਬ ਲੇਬਰ ਪਾਰਟੀ ਵੱਲੋਂ ਗੁਰਮੀਤ ਸਿੰਘ ਰੰਘਰੇਟਾ ਤੋਂ ਇਲਾਵਾ ਆਜ਼ਾਦ ਉਮੀਦਵਾਰ ਵਜੋਂ ਈਸ਼ਵਰ ਦਾਸ਼ ਸਿੰਘ ਸਿੱਧੂ, ਪੂਰਨ ਸਿੰਘ ਅਤੇ ਨੱਛਤਰ ਸਿੰਘ ਵੀ ਕਿਸਮਤ ਅਜ਼ਮਾ ਰਹੇ ਹਨ।

ਲੰਬੀ ਦੇ ਤ੍ਰਿਕੋਣੇ ਮੁਕਾਬਲੇ ਵਿਚ 'ਦਾਸ' ਦੇ ਸਿਆਸੀ ਵਜ਼ਨ ਦੀ ਪੜਚੋਲ ਦੇ ਇਲਾਵਾ ਡੇਰਾ ਸ਼ਰਧਾਲੂਆਂ ਦੇ ਰੁੱਖ 'ਤੇ ਵੀ ਅਕਾਲੀ ਦਲ ਅਤੇ ਕਾਂਗਰਸ ਦੀ ਪੂਰੀ ਟੇਕ ਲੱਗੀ ਹੋਈ ਹੈ। ਨਤੀਜਾ ਭਾਵੇਂ ਜੋ ਵੀ ਰਹੇ, ਪਰ ਹੈਵੀਵੇਟ ਬਾਦਲਾਂ ਦੇ ਹਲਕੇ ਵਿਚ ਇਹ ਯਕੀਨੀ ਤੌਰ 'ਤੇ ਤੈਅ ਹੈ ਕਿ ਅਸਲ ਮੁਕਾਬਲਾ ਵੀ ਤਿੰਨ ਬਾਦਲਾਂ ਵਿਚਕਾਰ ਹੀ ਹੋਵੇਗਾ, ਜਿਸ ਵਿਚ ਜਿੱਤੇਗਾ ਵੀ ਬਾਦਲ ਅਤੇ ਹਾਰੇਗਾ ਵੀ ਬਾਦਲ।

ਅਤੀਤ ਬਨਾਮ ਵਰਤਮਾਨ-ਭਾਈਚਾਰਕ ਸਾਂਝ ’ਤੇ ਭਾਰੂ ਹੋਇਆ ਸਿਆਸੀ ਵਰਤਾਰਾ

              -ਇਕਬਾਲ ਸਿੰਘ ਸ਼ਾਂਤ-

ਪੰਜਾਬ ਵਿਧਾਨ ਸਭਾ ਚੋਣਾਂ ਲਈ ਲੜਿਆ ਜਾ ਰਿਹਾ ਯੁੱਧ ਆਖ਼ਰੀ ਪੜਾਅ ’ਤੇ ਪੁੱਜ ਗਿਆ ਹੈ। ਲੱਖਾਂ ਪੰਜਾਬੀਆਂ ਵੱਲੋਂ ਆਪਣੇ ਵੋਟ ਦੇ ਹੱਕ ਦਾ ਇਸਤੇਮਾਲ ਕਰਕੇ ਜਮਹੂਰੀ ਢੰਗ ਨਾਲ ਸੱਤਾ ਸੌਂਪਣ ਲਈ 30 ਜਨਵਰੀ ਨੂੰ ਫਤਵਾ ਦਿੱਤਾ ਜਾ ਰਿਹਾ ਹੈ। ਕੋਈ ਜ਼ਮਾਨਾ ਸੀ ਜਦੋਂ ਵੱਖ-ਵੱਖ ਰਾਜਸੀ ਪਾਰਟੀਆਂ ਦੇ ਨੇਤਾ ਬੜੀ ਸਾਦਗੀ ਨਾਲ ਆਪਣੀ ਚੋਣ ਮੁਹਿੰਮ ਚਲਾਉਂਦੇ ਸਨ। ਉਨ੍ਹਾਂ ਵੇਲਿਆਂ ਵਿੱਚ ਰਾਜਸੀ ਪਾਰਟੀਆਂ ਦੇ ਨੇਤਾਵਾਂ ਨੇ ਰਾਜਨੀਤੀ ਨੂੰ ਆਪਣੇ ਪੁੱਤਾਂ ਜਾਂ ਧੀਆਂ ਦੇ ਹੱਥ ਸੌਂਪਣ ਦੀ ਸੋਚ ਨਹੀਂ ਅਪਣਾਈ ਸੀ। ਕਾਰਾਂ ਦੇ ਕਾਫ਼ਲੇ ਪਿੰਡਾਂ ਵਿੱਚ ਧੂੜ ਨਹੀਂ ਉਡਾਉਂਦੇ ਸਨ, ਸਗੋਂ ਸੀਮਤ ਸਾਧਨਾਂ ਨਾਲ ਚੋਣ ਮੁਹਿੰਮ ਚਲਾਈ ਜਾਂਦੀ ਸੀ। ਦੁਪਹਿਰ ਦਾ ਖਾਣਾ ਹੋਟਲਾਂ ਜਾਂ ਕੋਠੀਆਂ ਵਿੱਚ ਬੈਠ ਕੇ ਖਾਣ ਦੀ ਥਾਂ ਖੂਹਾਂ ’ਤੇ ਬੈਠ ਕੇ ਵੀ ਛਕ ਲਿਆ ਜਾਂਦਾ ਸੀ। ਦੇਰ ਰਾਤ ਤਕ ਵੋਟਾਂ ਦੇ ਨਾਂ ’ਤੇ ਮਹਿਫ਼ਲਾਂ ਵੀ ਨਹੀਂ ਸਜਦੀਆਂ ਸਨ। ਆਜ਼ਾਦੀ ਬਾਅਦ ਪਹਿਲੇ ਦਹਾਕਿਆਂ ਵਿੱਚ ਰਾਜਨੀਤੀ ਵਪਾਰ ਨਹੀਂ ਬਣੀ ਸੀ। ਵੋਟਾਂ ਪਾਉਣ ਲਈ ਪੈਸੇ ਨਹੀਂ ਮੰਗੇ ਜਾਂਦੇ ਸਨ ਅਤੇ ਪਿੰਡਾਂ ਦੀਆਂ ਸੱਥਾਂ ਵਿੱਚ ਪਰਿਵਾਰਾਂ ਦੇ ਮੋਢੀ ਬੈਠ ਕੇ ਕਿਸੇ ਉਮੀਦਵਾਰ ਨੂੰ ਵੋਟਾਂ ਭੁਗਤਾਉਣ ਦਾ ਫ਼ੈਸਲਾ ਕਰ ਲੈਂਦੇ ਸਨ। ਸਮਾਂ ਬਦਲਿਆਂ ਤਾਂ ਵੋਟਾਂ ਦੀ ਸਿਆਸਤ ਰੰਗ ਬਦਲ ਗਈ। ਚੋਣ ਰੈਲੀਆਂ ਵਿੱਚ ਪੁੱਜਣ ਲਈ ਸ਼ਰਾਬ ਦੀਆਂ ਪੇਟੀਆਂ ਵੰਡੀਆਂ ਜਾਂਦੀਆਂ ਹਨ। ਰਾਜਸੀ ਪਾਰਟੀਆਂ ਆਪੋ-ਆਪਣੇ ਹਮਾਇਤੀਆਂ ਨੂੰ ਘਰ-ਘਰ ਸ਼ਰਾਬ ਵੰਡਦੀਆਂ ਹਨ। ਸ਼ਾਮ ਵੇਲੇ ਪਿੰਡਾਂ ਦੀਆਂ ਫਿਰਨੀਆਂ ’ਤੇ  ਅਕਸਰ ਹੀ ਲੜਖੜਾਉਂਦੇ ਕਦਮਾਂ ਵਾਲੇ  ਨੌਜਵਾਨ ਮਿਲਦੇ ਹਨ। ਵੋਟਾਂ ਦੀ ਬੋਲੀ ਲੱਗਦੀ ਹੈ। ਹੁਣ ਰਾਜਸੀ ਨੇਤਾ ਰਿਕਸ਼ੇ ’ਤੇ ਪ੍ਰਚਾਰ ਕਰਨ ਦੀ ਥਾਂ ਬਿਜਲਈ ਤੇ ਪ੍ਰਿੰਟ ਮੀਡੀਆ ’ਚ ਇੱਕ ਦੂਜੇ ’ਤੇ ਦੋਸ਼ ਲਾਉਣ ਅਤੇ ਨੀਵਾਂ ਵਿਖਾਉਣ ਲਈ ਜਮ ਕੇ ਲੜਦੇ ਹਨ। ਪੰਜਾਬ ਦੀ ਰਾਜਨੀਤੀ ਨੇ ਤੂੜੀ ਦੀ ਪੰਡ ਵਾਂਗ ਪਰਿਵਾਰਾਂ ਨੂੰ ਚੌਰਾਹਿਆਂ ਵਿੱਚ ਖਿੰਡਾ ਦਿੱਤਾ ਹੈ। ਭਾਵੇਂ ਚੋਣ ਕਮਿਸ਼ਨ ਨੇ ਵੋਟਰਾਂ ਨੂੰ ਪ੍ਰਭਾਵਿਤ ਕਰਨ ਵਾਲੇ ਗ਼ਲਤ ਹੱਥਕੰਡਿਆਂ ਨੂੰ ਰੋਕਣ ਲਈ ਤਕੜਾ ਸ਼ਿਕੰਜਾ ਕਸਿਆ ਹੈ ਪਰ ਇਸ ਦੇ ਬਾਵਜੂਦ ਚੋਣਾਂ ਆਪਣਾ ਰੰਗ ਵਿਖਾ ਰਹੀਆਂ ਹਨ।

               ਕਦੇ ਜ਼ਮਾਨਾ ਸੀ ਜਦੋਂ ਚੋਣਾਂ ਦਾ ਕੰਮ ਬਿਨਾਂ ਕਿਸੇ ਦਬਾਅ, ਡਰ-ਡੁੱਕਰ ਜਾਂ ਖਰੀਦੋ-ਫਰੋਖ਼ਤ ਤੋਂ ਰਹਿਤ ਹੋ ਕੇ ਬੜੇ ਸਾਦੇ ਜਿਹੇ ਢੰਗ ਨਾਲ ਚੋਣ ਅਮਲ ਨੇਪਰੇ ਚੜ੍ਹਦਾ ਹੁੰਦਾ ਸੀ। ਸਿਆਸੀ ਲੜਾਈ ਦੇ ਬਾਵਜੂਦ ਚੋਣਾਂ ’ਚ ਕਾਫ਼ੀ ਹੱਦ ਤਕ ਭਾਈਚਾਰਕ ਸਾਂਝ ਭਾਰੂ ਹੁੰਦੀ ਸੀ ਪਰ ਅੱਜ ਸਮੇਂ ਨੇ ਚੋਣਾਂ ਦੀ ਸਾਰੀ ਰੰਗਤ ਬਦਲ ਕੇ ਰੱਖ ਦਿੱਤੀ ਹੈ।

ਅੱਜ ਦੇ ਤਕਨੀਕ ਭਾਰੂ ਯੁਗ ਦੀਆਂ ਚੋਣਾਂ ’ਚ ਸਮਾਜਿਕ ਤੰਦਾਂ ’ਤੇ ਸਿਆਸੀ ਵਰਤਾਰਾ ਅਤੇ ਰੁਪਇਆ-ਪੈਸਾ ਭਾਰੂ ਹੋ ਚੁੱਕਿਆ ਹੈ। ਅਜੋਕੇ ਦੌਰ ਵਿੱਚ ਚੋਣਾਂ ਲੋਭ-ਲਾਲਚ, ਡਰ-ਭੈਅ ਅਤੇ ਦੂਸ਼ਣਬਾਜ਼ੀ ਤੋਂ ਸ਼ੁਰੂ ਹੋ ਕੇ ਹਿੰਦੀ ਐਕਸ਼ਨ ਫ਼ਿਲਮਾਂ ਵਾਂਗ ਕਲਾਈਮੈਕਸ ’ਚ ਖ਼ੂਨ ਖਰਾਬੇ ਤਕ ਜਾ ਪੁੱਜਦੀਆਂ ਹਨ।

 ਆਜ਼ਾਦੀ ਦੇ ਬਾਅਦ 50ਵੇਂ ਅਤੇ 60ਵੇਂ ਦੇ ਦਹਾਕੇ ਤਕ ਪਹਿਲਾਂ ਉਮੀਦਵਾਰਾਂ ਅਤੇ ਉਨ੍ਹਾਂ ਦੇ ਸਮਰਥਕਾਂ ਵੱਲੋਂ ਪਿੰਡਾਂ ਸ਼ਹਿਰਾਂ ਵਿੱਚ ਚੋਣ ਪ੍ਰਚਾਰ ਲਈ ਜੀਪਾਂ, ਫਿਰ ਅੰਬੈਸਡਰ ਅਤੇ ਫੀਅਟ ਕਾਰਾਂ ਵਰਤੀਆਂ ਜਾਂਦੀਆਂ ਰਹੀਆਂ ਸਨ ਪਰ 80-90ਵਿਆਂ ਦੇ ਦਹਾਕੇ ਦਰਮਿਆਨ ਚੋਣ ਪ੍ਰਚਾਰ ’ਤੇ ਮਾਰੂਤੀ ਅਤੇ ਮਹਿੰਦਰਾ ਜੀਪਾਂ ਦਾ ਦਬਦਬਾ ਵਧ ਗਿਆ।

ਇਸ ਤੋਂ ਬਾਅਦ ਹੁਣ ਤਾਂ ਜਿੱਥੇ ਚੋਣ ਪ੍ਰਚਾਰ ’ਚ ਐਨਡੈਵਰ, ਮੈਨਟੈਰੋ ਅਤੇ ਫੋਰਚੂਨਰ ਜਿਹੀਆਂ ਮਹਿੰਗੀਆਂ ਗੱਡੀਆਂ ਦੀ ਵਰਤੋਂ ਸ਼ਾਨੋ-ਸ਼ੌਕਤ ਦਾ ਜਰੀਆ ਮੰਨੀਆਂ ਜਾਂਦੀਆਂ ਹਨ। ਪਿਛਲੇ ਸਮਿਆਂ ਨੂੰ ਅੱਖੀਂ ਹੰਢਾਉਣ ਵਾਲੇ ਪੁਰਾਣੇ ਬਜ਼ੁਰਗਾਂ ਦਾ ਪੁਰਾਣੇ ਸਮਿਆਂ ਅਤੇ ਅਜੋਕੇ ਚੋਣ ਵਰਤਾਰੇ ਬਾਰੇ ਕਹਿਣਾ ਹੈ ਕਿ 70 ਦੇ ਦਹਾਕੇ ਤਕ ਚੋਣਾਂ ਵਿਚਲਾ ਮਾਹੌਲ ਕਾਫ਼ੀ ਹੱਦ ਤਕ ਲੋਕਤੰਤਰੀ ਕਦਰਾਂ ਕੀਮਤਾਂ ’ਤੇ ਖ਼ਰਾ ਉਤਰਦਾ ਸੀ। ਉਸ ਤੋਂ ਬਾਅਦ ਦਿਨੋਂ ਦਿਨ ਨਿਘਰਦਾ ਗਿਆ। ਪਿੰਡ ਮਿੱਡੂਖੇੜਾ ਦੇ 65 ਸਾਲਾਂ ਕਿਸਾਨ ਜਗਜੀਤ ਸਿੰਘ ਦਾ ਕਹਿਣਾ ਹੈ ਕਿ ਵੋਟਾਂ ਦੀ ਖਰੀਦੋ-ਫਰੋਖ਼ਤ ਉਸ ਵੇਲੇ ਵੀ ਹੁੰਦੀ ਸੀ। ਉਨ੍ਹਾਂ ਕਿਹਾ ਕਿ ਕਈ ਦਹਾਕੇ ਪਹਿਲਾਂ ਤਕ ਬੂਥਾਂ ਵਿੱਚ ਵੋਟ ਵਾਲੀ ਪਰਚੀ ’ਤੇ ਉਮੀਦਵਾਰ ਦੇ ਨਾਂ ਜਾਂ ਨਿਸ਼ਾਨ ਦੀ ਜਗ੍ਹਾ ਸਿਰਫ਼ ਸਬੰਧਤ ਚੋਣ ਲੋਕ ਸਭਾ ਜਾਂ ਵਿਧਾਨ ਸਭਾ ਲਿਆ ਹੁੰਦਾ ਸੀ। ਉਸ ਸਮੇਂ ਇੱਕ ਚੋਣ ਬਕਸੇ ਦੇ ਬਜਾਏ ਹਰੇਕ ਉਮੀਦਵਾਰ ਲਈ ਵੱਖਰਾ ਚੋਣ ਬਕਸਾ ਹੁੰਦਾ ਸੀ। ਉਨ੍ਹਾਂ ਕਿਹਾ ਕਿ ਜਿਹੜੇ ਉਮੀਦਵਾਰ ਦੇ ਬਕਸੇ ਵਿੱਚ ਵੋਟ ਵਾਲੀ ਪਰਚੀ ਸੁੱਟ ਜਾਂਦੀ ਸੀ, ਉਸੇ ਦੇ ਖਾਤੇ ਉਹ ਵੋਟ ਮੰਨੀ ਜਾਂਦੀ ਸੀ।

ਸ੍ਰੀ ਜਗਜੀਤ ਸਿੰਘ ਨੇ ਦੱਸਿਆ ਕਿ ਲੰਬੀ ਹਲਕੇ ਵਿੱਚ 77 ਦੇ ਦਹਾਕੇ ਵਿੱਚ ਪਹਿਲੀ ਵਾਰ 5 ਰੁਪਏ ਵਿੱਚ ਵੋਟ ਵਿਕਦੀ ਸੁਣੀ ਸੀ। ਉਸ ਵੇਲੇ ਮਜ਼ਦੂਰ ਦੀ ਦਿਹਾੜੀ ਦੋ ਰੁਪਏ ਹੰੁਦੀ ਸੀ। ਉਨ੍ਹਾਂ ਦੇ ਨਾਲ ਬੈਠੇ ਇੱਕ ਬਜ਼ੁਰਗ ਮੱਘਰ ਸਿੰਘ ਨੇ ਦੱਸਿਆ ਕਿ  ਉਦੋਂ ਲੋਕ ਸਭਾ ਦੀ ਪਰਚੀ ਗੁਲਾਬੀ ਅਤੇ ਵਿਧਾਨ ਸਭਾ ਦੀ ਪਰਚੀ ਸਫ਼ੈਦ ਹੁੰਦੀ ਸੀ। ਉਨ੍ਹਾਂ ਵੋਟ ਵਿਕਣ ਬਾਰੇ ਖੁਲਾਸਾ ਕੀਤਾ ਕਿ ਵੋਟ ਵੇਚਣ ਦੇ ਚਾਹਵਾਨ ਵੋਟਰ ਆਪਣੀ ਪਰਚੀ ਲੁਕੋ ਕੇ ਬਾਹਰ ਲੈ ਆਉਂਦੇ ਸਨ ਅਤੇ ਬਾਹਰ ਵੇਚ ਦਿੰਦੇ ਸਨ। ਉਨ੍ਹਾਂ ਕਿਹਾ, ‘‘ਭਾਈ ਹੁਣ ਤਾਂ ਸਾਰੀਆਂ ਤਕਨੀਕਾਂ ਬਦਲ ਗਈਆਂ। ਹੁਣ ਪੈਸਿਆਂ ਦੀ ਥਾਂ ਚੈੱਕਾਂ ਨੇ ਲੈ ਲਈ ਤੇ ਪੈਸੇ ਰਿਊੜੀਆਂ ਵਾਂਗ ਵੰਡੇ ਜਾਂਦੇ ਨੇ।
ਆਪਣੀ ਜ਼ਿੰਦਗੀ ਦੇ ਅੱਠ ਦਹਾਕੇ ਹੰਢਾ ਚੁੱਕੇ ਮੁਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਨੇ ਪੁਰਾਣੇ ਵੇਲੇ ਨੂੰ ਚੇਤੇ ਕਰਦਿਆਂ ਕਿਹਾ ਕਿ ਪਾਸ਼ ਹੁਰਾਂ ਨੇ ਜਦੋਂ ਗਿੱਦੜਬਾਹਾ ਦੇ ਧੀਰ ਸਾਬ੍ਹ ਦੇ ਖ਼ਿਲਾਫ਼ ਚੋਣ ਲੜੀ ਸੀ, ਉਦੋਂ ਉਨ੍ਹਾਂ ਨੇ ਪਹਿਲੀ ਵਾਰ ਪੰਜ ਪਿੰਡਾਂ ਦੀ ਕਮਾਂਡ ਸੰਭਾਲੀ ਸੀ। ਉਨ੍ਹਾਂ ਕਿਹਾ ਕਿ ਜੀਪਾਂ ’ਤੇ ਪ੍ਰਚਾਰ ਹੁੰਦਾ ਸੀ। ਝੰਡਿਆਂ ਦਾ ਰਿਵਾਜ਼ ਵੀ ਐਨਾ ਨਹੀਂ ਸੀ। ਲੋਕ ਮੁੱਦਿਆਂ ਬਾਰੇ ਪੁੱਛੇ ਜਾਣ ’ਤੇ ਦਾਸ ਨੇ ਕਿਹਾ ਕਿ ਉਦੋਂ ਦੇ ਮਾਹੌਲ ਵਾਂਗ ਲੋਕ ਵੀ ਸਿੱਧ-ਪੱਧਰੇ ਹੁੰਦੇ ਸਨ, ਉਨ੍ਹਾਂ ਦੀਆਂ ਹੁਣ ਵਾਂਗ ਢਾਣੀ ਤਕ ਸੜਕ ਬਣਵਾਉਣ ਜਾਂ ਹੋਰ ਵੱਡੀਆਂ ਫਰਮਾਇਸ਼ਾਂ ਨਹੀਂ ਹੁੰਦੀਆਂ ਸਨ। ਉਨ੍ਹਾਂ ਕਿਹਾ ਕਿ ਉਦੋਂ ਸਿਰਫ਼ ਵੋਟਰਾਂ ਦੀ ਮੰਗ ਬੰਦੂਕ ਦਾ ਲਾਇਸੈਂਸ ਬਣਾਉਣ ਤਕ ਸੀਮਤ ਹੁੰਦੀ ਸੀ।

ਇਸ ਤੋਂ ਇਲਾਵਾ ਬੋਗਾ ਸਿੰਘ ਨਾਂ ਦੇ ਇੱਕ ਬਜ਼ੁਰਗ ਨੇ ਦੱਸਿਆ ਕਿ ਹਰ ਚੀਜ਼ ਦਾ ਸਿਆਸੀਕਰਨ ਹੋ ਗਿਆ ਹੈ। ਰੈਲੀਆਂ ਵਿੱਚ ਜਾਣ ਵਾਲਿਆਂ ਨੂੰ ਹੀ ਟਿਊਬਵੈੱਲ ਕੁਨੈਕਸ਼ਨ ਤੇ ਰਾਹਤ ਚੈੱਕ ਦਿੱਤੇ ਹਨ। ਪਹਿਲਾਂ ਲੀਡਰ ਇੱਕ ਅਹਿਸਾਨ ਕਰਦਾ ਤਾਂ ਲੋਕ ਸਾਰੀ ਉਮਰ ਚੇਤੇ ਰੱਖਦੇ, ਹੁਣ ਸਮੇਂ ਨਾਲ ਜਿਵੇਂ ਲੀਡਰਾਂ ਦੇ ਰੰਗ ਬਦਲੇ ਅਤੇ ਸਿਆਸਤ ਸ਼ਾਹੂਕਾਰਾਂ  ਤੇ ਸਰਮਾਏਦਾਰਾਂ ਦੇ ਹੱਥ ਆ ਗਈ ਐ।  ਅਜਿਹੇ ਵਿੱਚ ਲੋਕ ਵੀ ਮੌਕਾਪ੍ਰਸਤੀ ਦੇ ਰੌਂਅ ਵਿੱਚ ਆ ਗਏ ਨੇ। ਅੱਜ ਦੀਆਂ ਮਹਿੰਗੀਆਂ ਚੋਣਾਂ ਨੇ ਅਸਲ ਲੋਕਪੱਖੀ ਲੀਡਰਾਂ ਨੂੰ ਰਾਜਨੀਤੀ ਤੋਂ ਕਾਫ਼ੀ ਪਿਛਾਂਹ ਸੁਟ ਮਾਰਿਆ ਹੈ। ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਦੇ 70 ਸਾਲਾ ਬਜ਼ੁਰਗ ਕਰਤਾਰ ਨੇ ਚਸ਼ਮੇ ਵਿੱਚੋਂ ਗਹੁ ਨਾਲ ਪੁਰਾਣੇ ਵੇਲੇ ਨੂੰ ਚੇਤੇ ਕਰਦਿਆਂ ਕਿਹਾ ,‘‘ਪਹਿਲਾਂ ਦਾ ਸਮਾਂ ਚੰਗਾ ਸੀ, ਪ੍ਰੇਮ ਭਾਵ ਨਾਲ ਜਿੱਥੇ ਮਰਜ਼ੀ ਵੋਟਾਂ ਪਾ ਦਿਓ। ਲਾਲਚ ਤਾਂ ਡੱਕਾ ਨਹੀਂ ਹੁੰਦਾ ਸੀ ਪਰ ਹੁਣ ਸਮੇਂ ਨੇ ਬੁੱਧੀ ਬਦਲਤੀ। ਹੁਣ ਚਹੁੰ ਪਾਸੇ ਦਬਾਅ, ਲਾਲਚ ਅਤੇ ਰੁਪਏ-ਪੈਸੇ ਦਾ ਬੋਲਬਾਲਾ ਹੈ। ਉਨ੍ਹਾਂ ਕਿਹਾ ਧੰਨ ਸੀ ਪੰਡਤ ਨਹਿਰੂ ਜਿਸ ਨੇ ਸਾਨੂੰ ਵੋਟ ਦਾ ਅਧਿਕਾਰ ਦਿਵਾਇਆ।’’

ਜੰਗੀਰ ਸਿੰਘ ਨਾਂ ਦੇ ਇੱਕ ਬਜ਼ੁਰਗ ਨੇ ਕਿਹਾ ਕਿ 80ਵੇਂ ਦਹਾਕੇ ਤੋਂ ਚੋਣਾਂ ਵਿੱਚ ਪੁਲੀਸ ਦਾ ਸਿਆਸੀਕਰਨ ਹੁੰਦਾ ਗਿਆ। ਅੱਜ ਚੋਣਾਂ ਲੜਾਉਣ ਵਿੱਚ ਖ਼ਾਕੀ ਦਾ ਵੱਡਾ ਹੱਥ ਹੁੰਦਾ ਹੈ ਅਤੇ ਸੂਹੀਆ ਤੰਤਰ ਸਰਕਾਰਾਂ ਨੂੰ ਰੋਜ਼ਾਨਾ ਦੀਆਂ ਸਰਵੇਖਣ ਰਿਪੋਰਟਾਂ ਦੇ ਕੇ ਰਾਹ ਦਸੇਰੇ ਦੀ ਭੂਮਿਕਾ ਨਿਭਾਉਂਦਾ ਹੈ।
ਹਾਲਾਂਕਿ ਗੁਰਤੇਜ ਸਿੰਘ ਨਾਂ ਦੇ ਬਜ਼ੁਰਗ ਨੇ ਕਿਹਾ ਕਿ ਚੋਣ ਬੂਥਾਂ ਦੇ ਬਾਹਰ ਉਮੀਦਵਾਰਾਂ ਦੇ ਟੈਂਟਾਂ ਵਿੱਚ ਭੀੜ ਜੁਟਾਉਣ ਲਈ ਅੱਡੀ ਚੋਟੀ ਦਾ ਜ਼ੋਰ ਲਾਇਆ ਜਾਂਦਾ ਸੀ ਅਤੇ ਲੋਕਾਂ ਵਿੱਚ ਟੈਂਟਾਂ ਦਾ ਕਾਫ਼ੀ ਮਾਨਸਿਕ ਦਬਾਅ ਵੇਖਿਆ ਜਾਂਦਾ ਸੀ। ਭੀੜ ਦੇ ਆਧਾਰ ’ਤੇ ਉਮੀਦਵਾਰਾਂ ਤੋਂ ਸਥਾਨਕ ਲੀਡਰ ਵੋਟਾਂ ਦੀ ਵੱਧ ਖਰੀਦੋ-ਫਰੋਖ਼ਤ ਦਰਸਾ ਕੇ ਮੋਟੇ ਰੁਪਏ ਬਟੋਰਦੇ ਸਨ। ਉਨ੍ਹਾਂ ਕਿਹਾ ਕਿ ਹੁਣ ਚੋਣ ਕਮਿਸ਼ਨ ਨੇ ਬੂਥ ਦੇ ਬਾਹਰ ਟੈਂਟ ਲਾਉਣ ’ਤੇ ਰੋਕ ਲਾ ਕੇ ਨਿਰਪੱਖ ਵੋਟਰ ਦੀ ਵੱਡੀ ਮੁਸ਼ਕਲ ਹੱਲ ਕਰ ਦਿੱਤੀ।

ਇਸੇ ਤਰ੍ਹਾਂ ਜਸਪਾਲ ਕੌਰ ਨਾਂ ਦੀ ਬਜ਼ੁਰਗ ਔਰਤ ਨੇ ਕਿਹਾ ਕਿ ਕਈ ਸਾਲ ਪਹਿਲਾਂ ਜੁਆਕ ਵੀ ਉਮੀਦਵਾਰਾਂ ਦੇ ਲੋਹੇ ਅਤੇ ਪਲਾਸਟਿਕ ਦੇ ਬਿੱਲੇ ਅਤੇ ਝੰਡੇ ਲੈਣ ਖਾਤਰ ਦਫ਼ਤਰਾਂ ਦੇ ਗੇੜੇ ਮਾਰਦੇ ਹੁੰਦੇ ਸੀ ਪਰ ਕੰਪਿਊਟਰ ਦੇ ਨਵੇਂ ਯੁੱਗ ਵਿੱਚ ਇਹ ਰੁਝਾਨ ਘਟਿਆ ਹੈ।

ਵੱਡੇ ਲੀਡਰ ਪਾਰਟੀਆ ਛੱਡਕੇ ਪਤਨੀਆ ਮਗਰ ਲੱਗੇ

                                                                          -ਦੀਪਤੀ ਧਰਮਾਨੀ- 

   ਪੰਜਾਬ ਦੀਆ ਵਿਧਾਨ ਸਭਾ ਚੋਣਾਂ ਵਿਚ ਸਾਰੀਆਂ ਪਾਰਟੀਆਂ ਦੀ ਇਜੱਤ ਦਾਅ ਉਤੇ ਲਗੀ ਹੋਈ ਹੈ। ਪਾਰਟੀਆਂ ਦੇ ਸੀਨੀਅਰ ਆਗੂਆਂ ਲਈ ਚੋਣ ਜਿਤਣਾ ਪਰਿਵਾਰ ਦੀ ਸ਼ਾਨ ਕਾਈਮ ਰੱਖਣ ਬਰਾਬਰ ਮੰਨਿਆ ਗਿਆ ਹੈ। ਸਾਰੀਆ ਸਿਆਸੀ ਪਾਰਟੀਆ ਵਿਚ ਟਿਕਟ ਦੇ ਵਟਾਂਦਰੇ ਲਈ ਭਾਈ ਭਤੀਜਾਵਾਦ ਭਾਰੂ ਰਿਹਾ, ਇਸੇ ਕਾਰਨ ਜਿਆਦਾਤਰ ਟਿਕਟਾਂ ਇਹਨਾਂ ਸਿਆਸੀ ਨੇਤਾਵਾਂ ਦੇ ਪਰਿਵਾਰਾਂ ਦੀ ਝੋਲੀ ਵਿਚ ਹੀ ਪਈਆ , ਜਿਸ ਵਿਚ ਮੁੱਖ ਤੌਰ ਤੇ ਬਾਜ਼ੀ ਲੋਕ ਸਭਾ ਮੈਂਬਰਾ ਦੇ ਪਤੀ ਤੇ ਪਤਨੀਆ ਨੇ ਮਾਰੀ। ਇਸ ਤੋਨ ਪਤਾ ਲਗਦਾ ਹੈ ਕਿ ਪੰਜਾਬ ਦੇ ਸਿਆਸੀ ਆਗੂ ਰਾਜ ਸੱਤਾ ਲਈ ਕਿੰਨੇ ਭੁੱਖੇ ਹਨ।

               ਇਸ ਵਾਰ ਨਵੀਂ ਚੀਜ਼ ਵੇਖਣ ਨੂੰ ਇਹ ਮਿਲ ਰਹੀ ਹੈ ਕਿ ਪੁੱਤ ਤੇ ਧੀਆਂ ਤੋਂ ਬਿਨਾਂ ਪਤਨੀਆਂ ਲਈ ਵੀ ਟਿਕਟਾਂ ਹਾਸਿਲ ਕੀਤੀਆ ਤੇ ਇਸ ਵਾਰ ਪਤਨੀਆ ਨੂੰ ਜਿਤਾਉਣ ਲਈ ਲੱਗੇ ਹੋਏ ਹਨ। ਇਸ ਵਿਚ ਸਭ ਤੋਂ ਪਹਿਲਾਂ ਨਾਂ ਅਮ੍ਰਿੰਤਰਸਰ ਤੋਨ ਲੋਕ ਸਭਾ ਮੈਂਬਰ ਨਵਜੋਤ ਕੌਰ ਸਿੰਧੂ ਦਾ ਆਉਂਦਾ ਹੈ, ਜਿਹੜੇ ਪਹਿਲਾ ਕ੍ਰਿਕਟਰ ਹੋਣ ਕਰਕੇ ਵੀ ਕਾਫੀ ਮਸ਼ਹੂਰ ਹਨ ਤੇ ਇਸ ਦਾ ਫਾਇਦਾ ਉਹ ਆਪਣੀ ਡਾਕਟਰ ਪਤਨੀ ਨਵਜੋਤ ਕੌਰ ਸਿੰਧੂ ਨੂੰ ਅਮ੍ਰਿੰਤਸਰ (ਦੱਖਣ) ਤੋਂ ਚੋਣ ਲੜਾਕੇ ਲੈ ਰਹੇ ਹਨ।

                 ਅਕਾਲੀ ਦਲ ਵੱਲੋਂ ਬੱਸੀ ਪਠਾਨਾ ਤੋਂ ਨਾਮਜ਼ਦ ਕੀਤੇ ਗਏ ਰਿਟਾਇਰ ਜੱਜ ਨਿਰਮਲ ਸਿੰਘ, ਲੋਕ ਸਭਾ ਮੈਂਬਰ ਪਰਮਜੀਤ ਕੌਰ ਗੁਲਸ਼ਨ ਦੇ ਪਤੀ ਹਨ। ਉਹਨਾਂ ਦੀ ਪਤਨੀ ਫਰੀਦਕੋਟ ਤੋਂ ਲੋਕ ਸਭਾ ਮੈਨਬਰ ਹਨ ਤੇ ਜੱਜ ਨਿਰਮਲ ਸਿੰਘ ਬਾਹਰੀ ਵਿਅਕਤੀ ਹੁੰਦੇ ਹੋਏ ਵੀ ਬੱਸੀ ਪਠਾਣਾ ਤੋਂ ਆਪਣੀ ਕਿਸਮਤ ਅਜਮਾਉਣਾ ਚਾਹੁੰਦੇ ਹਨ।ਕਾਂਗਰਸ ਦੇ ਐਮ.ਪੀ ਪ੍ਰਤਾਪ ਸਿੰਘ ਬਾਜਵਾ ਆਪਣੀ ਪਤਨੀ ਚਰਨਜੀਤ ਕੌਰ ਨੂੰ ਕਾਂਦੀਆ ਤੋਨ ਚੋਣ ਲੜਾ ਰਹੇ ਹਨ । ਪ੍ਰਤਾਪ ਸਿੰਘ ਬਾਜਵਾ ਗੁਰਦਾਸਪੁਰ ਤੋਂ ਚੋਣ ਜਿਤੇ ਸਨ ਤੇ ਹੁਣ ਕਾਂਦੀਆ ਤੋਂ ਉਹਨਾਂ ਦੀ ਪਤਨੀ ਪਰਿਵਾਰ ਦੀ ਇਜ਼ਤ ਬਚਾਉਣ ਲਈ ਚੋਣ ਮੈਦਾਨ ਵਿਚ ਉਤਰੀ ਹੈ।

ਇਸ ਤੋਂ ਬਾਅਦ ਹੁਸ਼ਿਆਰਪੁਰ ਤੋਂ ਵੀ ਕਾਂਗਰਸ ਦੀ ਲੋਕ ਸਭਾ ਮੈਂਬਰ ਸੰਤੋਸ਼ ਚੌਧਰੀ ਦੇ ਪਤੀ ਰਾਮ ਲਬਾਈਆ ਸ਼ਾਮ ਚੌਰਾਸੀ ਤੋਂ ਚੋਣ ਲੜ ਰਹੇ ਹਨ ਉਹਨਾਂ ਦੀ ਆਪਣੀ ਪਾਰਟੀ ਵਿਚ ਕੋਈ ਪਹਿਚਾਨ ਨਹੀਂ, ਪਰ ਉਹਨਾਂ ਦੇ ਪਿਤਾ ਵੀ ਰਾਜ ਸਭਾ ਦੇ ਮੈਂਬਰ ਸਨ।

            ਸਾਬਕਾ ਪੰਜਾਬ ਪ੍ਰਦੇਸ਼ ਕਾਂਗਰਸ ਪ੍ਰਧਾਨ ਮੋਹਿੰਦਰ ਸਿੰਘ ਵੀ ਆਪਣੀ ਪਤਨੀ ਲਈ ਜਲੰਧਰ (ਪੱਛਮ) ਤੋਂ ਟਿਕਟ ਲੈਣ ਵਿਚ ਸਫਲ ਰਹੇ ਤੇ ਹੁਣ ਘਰ-ਘਰ ਜਾ ਕੇ ਪਤਨੀ ਲਈ ਚੋਣ ਪ੍ਰਚਾਰ ਕਰ ਰਹੇ ਹਨ। ਟਿਕਟਾਂ ਦੀ ਵੰਡ ਵਿਚ ਧੀਆਂ ਤੇ ਪੁੱਤਾਂ ਦੀ ਲਿਸਟ ਸਭ ਪਾਰਟੀਆਂ ਵਿਚ ਕਾਫੀ ਲੰਬੀ ਹੈ।

            

           ਪੀਪਲਜ਼ ਪਾਰਟੀ ਆਫ ਪੰਜਾਬ ਦੇ ਪ੍ਰਧਾਨ ਮਨਪ੍ਰੀਤ ਬਾਦਲ ਦੇ ਪਿਤਾ ਲੰਬੀ ਤੋਂ ਆਪਣੇ ਭਰਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਵਿਰੁਧ ਚੋਣ ਲੜ ਰਹੇ ਹਨ, ਮਨਪ੍ਰੀਤ ਆਪ ਗਿਦੜਬਾਹਾ ਤੇ ਮੌੜ ਹਲਕੇ ਤੋਂ ਚੋਣ ਮੈਦਾਨ ਵਿਚ ਆਏ ਹਨ। ਪ੍ਰਕਾਸ਼ ਸਿੰਘ ਬਾਦਲ ਦੇ ਪੁੱਤਰ ਸੁਖਬੀਰ ਸਿੰਘ ਬਾਦਲ ਜਲਾਲਾਬਾਦ ਤੋਂ ਅਕਾਲੀ ਉਮੀਦਵਾਰ ਹਨ,ਜਿਹੜੇ ਬਠਿੰਡਾ ਤੋਂ ਲੋਕ ਸਭਾ ਮੈਂਬਰ ਹਰਸਿਮਰਤ ਕੌਰ ਦੇ ਪਤੀ ਹਨ। ਪ੍ਰਕਾਸ਼ ਸਿੰਘ ਬਾਦਲ ਦੇ ਜਵਾਈ ਆਦੇਸ਼ ਪ੍ਰਤਾਪ ਸਿੰਘ ਕੈਂਰੋ ਜਿਹੜੇ ਸਰਕਾਰ ਵਿਚ ਮੰਤਰੀ ਦੇ ਅਹੁਦੇ ਤੇ ਵੀ ਸਨ,ਉਹ ਪਟੀ ਤੋਂ ਚੋਣ ਲੜ ਰਹੇ ਹਨ। ਅਮਰਪਾਲ ਸਿੰਘ ਬੌਨੀ ਜਿਹੜੇ ਅਜਨਾਲਾ ਤੋਂ ਅਕਾਲੀ ਉਮੀਦਵਾਰ ਹਨ ਉਹ ਵੀ ਖੱਡੂਰ ਸਾਹਿਬ ਤੋਂ ਲੋਕ ਸਭਾ ਮੈੰਬਰ ਰਤਨ ਸਿੰਘ ਅਜਨਾਲਾ ਦੇ ਪੁੱਤਰ ਹਨ। ਪਰਮਿੰਦਰ ਸਿੰਘ ਸੰਗਰੂਰ ਤੋਂ ਚੋਣ ਲੜ ਰਹੇ ਉਮੀਦਵਾਰ, ਰਾਜ ਸਭਾ ਮੈਂਬਰ ਸੁਖਦੇਵ ਸਿੰਘ ਢੀਂਡਸਾ ਦੇ ਪੁੱਤਰ ਹਨ।

              

             ਅਕਾਲੀ ਦਲ ਉਮੀਦਵਾਰ ਰਣਜੀਤ ਸਿੰਘ ਤਲਵੰਡੀ ਖੰਨਾ ਤੋਂ ਚੋਣ ਲੜ ਰਹੇ ਹਨ ਤੇ ਲੋਕ ਸਭਾ ਮੈਂਬਰ ਜੱਗਦੇਵ ਸਿੰਘ ਤਲਵੰਡੀ ਦੇ ਪੁੱਤਰ ਹਨ, ਸੁਖਵਿੰਦਰ ਸਿੰਘ ਰੰਧਾਵਾ ਪੰਜਾਬ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸਵ: ਸੰਤੋਖ ਸਿੰਘ ਰੰਧਾਵਾ ਦਾ ਪੁੱਤਰ ਹੈ, ਅਕਾਲੀ ਦਲ ਦੇ ਲੋਕ ਸਭਾ ਮੈਂਬਰ ਬਲਵਿੰਦਰ ਸਿੰਘ ਭੂੰਦੜ ਦੇ ਪੁੱਤਰ  ਦਿਲਰਾਜ ਸਿੰਘ ਭੂੰਦੜ ਸਰਦੂਲਗੜ੍ਹ ਤੋਂ ਚੋਣ ਲੜ ਰਹੇ ਹਨ। ਸ਼੍ਰੋਮਣੀ ਅਕਾਲੀ ਦਲ ਦੇ ਸਾਬਕਾ ਪ੍ਰਧਾਨ ਸਵ: ਗੁਰਚਰਨ ਸਿੰਘ ਟੌਹੜਾ ਜੋ ਰਾਜ ਸਭਾ ਦੇ ਮੈਂਬਰ ਵੀ ਰਿਹ ਚੁੱਕੇ ਹਨ, ਉਹਨਾਂ ਦੀ ਪੁਤਰੀ ਕੁਲਦੀਪ ਕੌਰ ਪਟਿਆਲਾ ਤੋਂ ਅਕਾਲੀ ਦਲ ਦੀ ਉਮੀਦਵਾਰ ਹੈ।

ਹੁਣ ਲੰਬੀ 'ਚ ਅਕਾਲੀਆਂ ਨੂੰ ਆਪਣੇ ਝੰਡਾਬਰਦਾਰ ਹੀ 'ਵਿਚੋਲੇ' ਤੇ 'ਗੱਦਾਰ' ਨਜ਼ਰ ਆਉਣੇ ਲੱਗੇ

                     ਹਰਸਿਮਰਤ ਬਾਦਲ ਨੇ ਲੰਬੀ ਹਲਕੇ ਵਿਚ ਚੋਣ ਜਲਸਿਆਂ ਦੌਰਾਨ ਫੰਡਾਂ ਦੀ ਦੁਰਵਰਤੋਂ ਨੂੰ ਕਬੂਲਿਆ
                                                                       ਇਕਬਾਲ ਸਿੰਘ ਸ਼ਾਂਤ
ਲੰਬੀ, 21 ਜਨਵਰੀ : ਲੰਬੀ ਦੇ ਚੋਣ ਦੰਗਲ ਵਿਚ ਦੋ-ਦੋ ਸਿਆਸੀ ਸਰੀਕਾਂ ਦਾ ਸਾਹਮਣਾ ਕਰ ਰਹੇ ਮੁੱਖ ਮੰਤਰੀ ਬਾਦਲ ਪਰਿਵਾਰ ਨੂੰ ਹੁਣ ਆਪਣੇ ਝੰਡਾਬਰਦਾਰ ਹੀ 'ਵਿਚੋਲੇ' ਅਤੇ 'ਗੱਦਾਰ' ਨਜ਼ਰ ਆਉਣੇ ਲੱਗੇ ਹਨ। ਗੱਲ ਇੱਥੇ ਹੀ ਨਹੀਂ ਮੁੱਕਦੀ, ਬਲਕਿ ਅਕਾਲੀ ਹਾਈਕਮਾਂਡ ਵੱਲੋਂ ਹਲਕੇ ਵਿਚ ਸਰਕਾਰੀ ਗਰਾਂਟਾਂ ਦੀ ਦੁਰਵਰਤੋਂ ਵਿਚ ਵੀ ਵਿਚੋਲਿਆਂ ਦੀ ਕਾਰਗੁਜਾਰੀ ਦੋਸ਼ੀ ਮੰਨਿਆ ਜਾ ਰਿਹਾ ਹੈ।
              
      ਇਹ ਹੈਰਾਨੀਜਨਕ ਖੁਲਾਸਾ ਅੱਜ ਬਠਿੰਡਾ ਲੋਕਸਭਾ ਹਲਕੇ ਤੋਂ ਸੰਸਦ ਮੈਂਬਰ ਬੀਬੀ ਹਰਸਿਮਰਤ ਕੌਰ ਬਾਦਲ ਨੇ ਅੱਜ ਆਪਣੇ ਸਹੁਰੇ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਹੱਕ ਵਿਚ ਹਲਕੇ ਦੇ ਪਿੰਡ ਅਰਨੀਵਾਲਾ, ਤੱਪਾਖੇੜਾ, ਦਿਉਣਖੇੜਾ, ਕੰਗਣਖੇੜਾ ਅਤੇ ਥਰਾਜਵਾਲਾ ਵਿਖੇ ਚੋਣ ਜਲਸਿਆਂ ਨੂੰ ਸੰਬੋਧਨ ਕਰਦਿਆਂ ਕੀਤਾ।
              
               ਬੀਬੀ ਹਰਸਿਮਰਤ ਕੌਰ ਨੇ ਕਿਹਾ ਕਿ ਹੁਣ ਸਾਡੇ ਤੋਂ ਗੁੱਝਿਆ ਕੁਝ ਨਹੀਂ ਰਿਹਾ ਤੇ ਸਭ ਕੁਝ ਸ਼ੀਸ਼ੇ ਵਾਂਗ ਸਾਫ਼ ਹੋ ਗਿਆ ਹੈ। ਉਨ੍ਹਾਂ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਲੰਬੀ ਹਲਕੇ ਵਿਚ ਲੋਕਹਿੱਤਾਂ ਲਈ ਦਿੱਤੀਆਂ ਗਰਾਂਟਾਂ ਦੀ ਦੁਰਵਰਤੋਂ ਦੀ ਗੱਲ ਕਬੂਲਦਿਆਂ ਕਿਹਾ ਕਿ ਸਰਕਾਰੀ ਗਰਾਂਟਾਂ ਨੂੰ 'ਵਿਚੋਲਿਆਂ' ਨੇ ਮਨਚਾਹੇ ਢੰਗ ਨਾਲ ਵਰਤਿਆ। ਜਿਸ  ਕਰਕੇ ਉਹ ਅਸਲ ਹੱਕਦਾਰਾਂ ਤੱਕ ਨਹੀਂ ਪੁੱਜ ਸਕੀਆਂ ਅਤੇ 'ਵਿਚੋਲੇ' ਆਪਣੇ ਚਹੇਤਿਆਂ ਦੇ ਢਿੱਡ ਭਰਨ 'ਚ ਹੀ ਲੱਗੇ ਰਹੇ।
ਹਰਸਿਮਰਤ ਬਾਦਲ ਨੇ ਅਜਿਹੀਆਂ ਕਾਰਗੁਜਾਰੀ ਵਿਚ ਸ਼ਾਮਲ ਰਹੇ ਵਿਅਕਤੀਆਂ 'ਤੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲ 'ਗੱਦਾਰੀ' ਕਰਨ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਬੀਬੀ ਸੁਰਿੰਦਰ ਕੌਰ ਬਾਦਲ ਹੁਰਾਂ ਦੀ ਬੀਮਾਰੀ ਮੌਕੇ ਉਨ੍ਹਾਂ ਦਾ ਸਮੁੱਚਾ ਪਰਿਵਾਰਾਂ 'ਬੀਬੀ ਜੀ' ਦੇ ਇਲਾਜ ਵਿਚ ਉਲਝ ਗਿਆ।
           
                  ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਹਾਲਾਤਾਂ ਵਿਚ ਵੱਡੇ ਬਾਦਲ ਸਾਬ੍ਹ ਨੂੰ ਸਾਰਾ ਪੰਜਾਬ ਵੇਖਣਾ ਪੈਂਦਾ ਸੀ। ਅਜਿਹੇ ਮਜ਼ਬੂਰੀ ਭਰੇ ਹਾਲਾਤਾਂ ਵਿਚ ਉਨ੍ਹਾਂ ਦੇ ਪਰਿਵਾਰ ਨੂੰ 'ਵਿਚੋਲਿਆਂ' ਦੇ ਵੱਸ ਪੈਣਾ ਪਿਆ। ਅਜਿਹੇ ਹਾਲਾਤਾਂ ਵਿਚ ਜਿਹੜੀਆਂ ਗਰਾਟਾਂ ਲੋਕ ਹਿੱਤਾਂ ਲਈ ਭੇਜੀਆਂ ਗਈਆਂ ਸਨ ਉਨ੍ਹਾਂ ਨੂੰ ਖੁੱਲ੍ਹੇ ਗੱਫ਼ੇ ਵਜੋਂ ਵਿਚੋਲੇ ਹੀ ਛਕ ਗਏ।
              
                ਤੇਜ਼ ਤਰਾਰ ਸੰਸਦ ਮੈਂਬਰ ਵਜੋਂ ਪ੍ਰਸਿੱਧ ਹਰਸਿਮਰਤ ਕੌਰ ਬਾਦਲ ਨੇ ਆਪਣੀ ਸਿਆਸੀ ਪਰਪੱਕਤਾ ਨਾਲ ਲਬਰੇਜ਼ ਤਕਰੀਰ ਦੌਰਾਨ ਲੋਕਾਂ ਤੋਂ ਸਰਕਾਰੀ ਗਰਾਂਟਾਂ ਵਿਚ ਹੋਈ ਦੁਰਵਰਤੋਂ ਬਾਰੇ ਵਿਚੋਲਿਆਂ ਵੱਲੋਂ ਕੀਤੀਆਂ ਕਾਰਗੁਜਾਰੀਆਂ ਦੀ ਗਲਤੀ ਵੀ ਮੰਗਦਿਆਂ ਕਿਹਾ ਕਿ ਇਹ ਵਿਚੋਲਿਆਂ ਦੀ ਚੋਣ ਨਹੀਂ ਪ੍ਰਕਾਸ਼ ਸਿੰਘ ਬਾਦਲ ਦੀ ਚੋਣ ਹੈ। ਇਸ ਲਈ ਤੁਸੀਂ ਉਨ੍ਹਾਂ ਨੂੰ ਭਾਰੀ ਗਿਣਤੀ ਵਿਚ ਵੋਟਾਂ ਪਾ ਕੇ ਜਿਤਾਓ।
              
                ਹਰਸਿਮਰਤ ਕੌਰ ਬਾਦਲ ਨੇ ਵਿਧਾਨਸਭਾ ਚੋਣਾਂ ਤੋਂ ਬਾਅਦ ਵਿਚੋਲਿਆਂ ਨੂੰ ਵੇਖ ਲੈਣ ਦਾ ਭਰੋਸਾ ਦਿੰਦਿਆਂ ਕਿਹਾ ਕਿ ਤੁਸੀਂ ਫ਼ਿਕਰ ਨਾ ਕਰੋ। ਵੋਟਾਂ ਮਗਰੋਂ ਉਹ ਖੁਦ ਅਤੇ ਸੁਖਬੀਰ ਸਿੰਘ ਬਾਦਲ ਪਿੰਡ ਬਾਦਲ ਬੈਠਿਆ ਕਰਨਗੇ। ਸ੍ਰੀਮਤੀ ਬਾਦਲ ਨੇ ਲੋਕਾਂ ਨੂੰ ਅਪੀਲ ਕੀਤੀ ਕਿ ਉਨ੍ਹਾਂ ਨੂੰ ਪਿੰਡਾਂ ਦੇ ਪੰਚਾਂ-ਸਰਪੰਚਾਂ ਜਾਂ ਵਿਚੋਲਿਆਂ ਨੂੰ ਨਾਲ ਲਿਆਉਣ ਦੀ ਲੋੜ ਨਹੀਂ ਪਵੇਗੀ ਅਤੇ ਬਾਦਲ ਪਿੰਡ ਵਿਖੇ ਰਿਹਾਇਸ਼ 'ਤੇ ਉਨ੍ਹਾਂ (ਲੋਕਾਂ ਨੂੰ) ਨੂੰ ਕੋਈ ਸਿਕਿਊਰਿਟੀ ਵਾਲਾ ਵੀ ਨਹੀਂ ਰੋਕੇਗਾ।
                ਆਪਣੀ ਹੀ ਪਾਰਟੀ ਦੇ ਭ੍ਰਿਸ਼ਟ ਵਿਚੋਲਿਆਂ 'ਤੇ ਤਿੱਖੇ ਸ਼ਬਦੀ ਹਮਲੇ ਕਰਨ ਵਾਲੀ ਅਕਾਲੀ ਸੰਸਦ ਮੈਬਰ ਨੇ ਲੋਕਾਂ ਨੂੰ ਕਾਂਗਰਸ ਦੀਆਂ ਭ੍ਰਿਸ਼ਟ ਨੀਤੀਆਂ ਤੋਂ ਸੁਚੇਤ ਕਰਦਿਆਂ ਹਲਕੇ ਦੇ ਬਹੁਪੱਖੀ ਵਿਕਾਸ ਲਈ ਮੁੜ ਤੋਂ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਜਿਤਾਉਣ ਦੀ ਅਪੀਲ ਕੀਤੀ।
               ਇਸ ਮੌਕੇ ਉਨ੍ਹਾਂ ਨਾਲ ਅਕਾਲੀ ਦਲ ਦੇ ਵੱਖ-ਵੱਖ ਸੀਨੀਅਰ ਅਤੇ ਸਰਕਾਰੀ ਅਤੇ ਸੰਗਠਨ ਤੰਤਰ ਵਿਚ ਕਾਫ਼ੀ ਪਕੜ ਰੱਖਦੇ ਸਥਾਪਿਤ ਆਗੂ ਵੀ ਮੌਜੂਦ ਸਨ।
          ਇਸ ਦੌਰਾਨ ਮੌਜੂਦ ਲੋਕ ਸਵਾਲ ਭਰੀਆਂ ਨਾਲ ਨਜ਼ਰਾਂ ਨਾਲ ਇੱਕ-ਦੂਸਰੇ ਦੇ ਮੂੰਹਾਂ ਵੱਲ ਵੇਖ ਕੇ ਸੋਚਦੇ ਜਾਪੇ ਕਿ ਪਿਛਲੇ ਕੁਝ ਪਲਾਂ ਤੱਕ ਸਰਕਾਰ ਦੇ ਅੱਖਾਂ ਦੇ ਤਾਰੇ ਵਜੋਂ ਨਜ਼ਰ ਆਉਂਦੇ 'ਵਿਚੋਲੇ' ਹੁਣ ਪਲਾਂ ਵਿਚ ਅੱਖਾਂ ਵਿਚ ਰੜਕਣ ਕਿਵੇ ਲੱਗ ਪਏ। ਕੁਝ ਲੋਕਾਂ ਦੇ ਚਿਹਰਿਆਂ 'ਤੇ ਵੱਖਰਾ ਹਾਸਾ ਵੀ ਵੇਖਣ ਨੂੰ ਮਿਲਿਆ।


                                     ''ਅੱਖਾਂ ਚੋਣਾਂ ਵੇਲੇ ਹੀ ਕਿਉਂ ਖੁੱਲੀਆਂ''
                                                                      ਇਕਬਾਲ ਸਿੰਘ ਸ਼ਾਂਤ
ਲੰਬੀ : ਅਕਾਲੀ ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਵੱਲੋਂ ਸਿਆਸੀ ਸਟੇਜ਼ਾਂ 'ਤੇ ਖੁੱਲ੍ਹੇਆਮ ਅਕਾਲੀ ਦਲ (ਬ) ਨਾਲ ਜੁੜੇ ਵਿਅਕਤੀਆਂ ਨੂੰ ਹੀ ਵਿਚੋਲੇ ਕਰਾਰ ਦੇਣ ਦਿੱਤੇ ਜਾਣ ਨਾਲ ਅਕਾਲੀ ਸਰਕਾਰ ਦੀ ਸਮੁੱਚੀ ਕਾਰਗੁਜਾਰੀ ਸਵਾਲਾਂ ਦੇ ਘੇਰੇ ਵਿਚ ਆ ਗਈ ਹੈ। ਇਨ੍ਹਾਂ ਤਕਰੀਰਾਂ ਨੂੰ ਕੰਨੀਂ ਸੁਣਨ ਵਾਲੇ ਇੱਕ ਵਿਅਕਤੀ ਦਾ ਕਹਿਣਾ ਹੈ ਕਿ ''ਕਹਾਵਤ ਹੈ ਕਿ ਸਰਕਾਰ ਦੀਆਂ ਚਾਰ ਅੱਖਾਂ ਹੁੰਦੀਆਂ ਹਨ, ਪਰ ਲੰਬੀ 'ਚ ਇਹ ਅੱਖਾਂ ਚੋਣਾਂ ਵੇਲੇ ਹੀ ਕਿਉਂ ਖੁੱਲੀਆਂ। ਜਦੋਂਕਿ ਨਿੱਤ ਸੰਗਤ ਦਰਸ਼ਨਾਂ ਵਿਚ ਸਰਕਾਰ ਦੇ  ਵਿਚੋਲਿਆਂ ਦੀਆਂ ਕਾਰਗੁਜਾਰੀਆਂ ਬਾਰੇ ਲੋਕਾਂ ਵੱਲੋਂ ਰੌਲਾ ਪਾਉਣ ਦੀ ਕੋਸ਼ਿਸ਼ ਕੀਤੀ ਜਾਂਦੀ ਸੀ ਤਾਂ ਵੱਡੀ ਕੁਰਸੀ 'ਤੇ ਬੈਠੇ ਹਾਕਮਾਂ ਵੱਲੋਂ ਇਹ ਕਹਿ ਕੇ ਚੁੱਪ ਕਰਾ ਦਿੱਤਾ ਜਾਂਦਾ ਸੀ ਕਿ ਭਾਈ ਤੁਸੀਂ ਰੌਲਾ ਬਹੁਤ ਪਾਉਂਦੇ ਹੋ। ਇੱਥੇ ਅਸੀਂ ਤੁਹਾਡੇ ਲਈ ਤਾਂ ਗਰਾਂਟਾਂ ਦੇਣ ਪੁੱਜੇ ਹਾਂ। ਆਮ ਲੋਕਾਂ ਦਾ ਕਹਿਣੈ ਕਿ ਹੁਣ 'ਵਿਚੋਲਿਆਂ' 'ਤੇ ਦੋਸ਼ੀ ਕਰਾਰ ਦਿੱਤੇ ਬਾਰੇ ਭਾਵੁਕਤਾ ਭਰੇ ਤੀਰ ਸਿਆਸੀ ਤੀਰਅੰਦਾਜ਼ੀ ਦਾ ਇੱਕ ਸੋਚਿਆ ਸਮਝਿਆ (ਸਿਆਸੀ ਸਟੰਟ) ਹਿੱਸਾ ਹਨ।

ਪਿੰਡ ਬਾਦਲ 'ਚ ਗਲਤ ਅਤੇ ਦੁਹਰੀਆਂ ਵੋਟਾਂ ਬਣੇ ਹੋਣ ਬਾਰੇ ਸ਼ਿਕਾਇਤ ਚੋਣ ਕਮਿਸ਼ਨ ਕੋਲ ਪੁੱਜੀ

                                                                        ਇਕਬਾਲ ਸਿੰਘ ਸ਼ਾਂਤ
           ਲੰਬੀ : ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਜੱਦੀ ਪਿੰਡ ਬਾਦਲ ਵਿਖੇ ਗਲਤ ਜਾਂ ਦੁਹਰੀਆਂ ਵੋਟਾਂ ਬਣੀਆਂ ਹੋਣ ਅਤੇ ਇੱਕ ਸਰਕਾਰੀ ਡਾਕਟਰ ਸਮੇਤ ਤਿੰਨ ਸਰਕਾਰੀ ਕਰਮਚਾਰੀਆਂ ਵੱਲੋਂ ਅਕਾਲੀ ਦਲ ਦੇ ਵਰਕਰ ਵਜੋਂ ਵਿਚਰਨ ਦੇ ਦੋਸ਼ਾਂ ਬਾਰੇ ਦੋ ਵੱਖ-ਵੱਖ ਸ਼ਿਕਾਇਤਾਂ ਚੋਣ ਕਮਿਸ਼ਨ ਕੋਲ ਪੁੱਜੀਆਂ ਹਨ। ਜਿਨ੍ਹਾਂ ਬਾਰੇ ਚੋਣ ਕਮਿਸ਼ਨ ਦੀਆਂ ਹਦਾਇਤਾਂ 'ਤੇ ਪੜਤਾਲ ਸ਼ੁਰੂ ਹੋ ਗਈ ਹੈ।
           ਜਿਨ੍ਹਾਂ ਵਿਚ ਪਿੰਡ ਬਾਦਲ ਦੇ ਵੱਖ-ਵੱਖ ਵਿੱਦਿਅਕ ਅਦਾਰਿਆਂ, ਨਰਸਿੰਗ ਕਾਲਜ ਅਤੇ ਬਿਰਧ ਆਸ਼ਰਮ ਵਿਖੇ ਰਹਿੰਦੇ ਕ੍ਰਮਵਾਰ ਵਿੱਦਿਅਕ ਸਟਾਫ਼/ਦਰਜਾ ਚਾਰ ਸਟਾਫ਼, ਵਿਦਿਆਰਥੀਆਂ ਅਤੇ ਬਜ਼ੁਰਗਾਂ ਦੀਆਂ ਉਨ੍ਹਾਂ ਦੀ ਜੱਦੀ ਸ਼ਹਿਰਾਂ/ਪਿੰਡਾਂ ਦੇ ਨਾਲ-ਨਾਲ ਬਾਦਲ ਪਿੰਡ ਵਿਚ ਵੋਟਾਂ ਬੋਣ ਦੇ ਦੋਸ਼ ਲਾਏ ਗਏ ਹਨ।
           ਇਹ ਸ਼ਿਕਾਇਤਾਂ ਕਾਂਗਰਸੀ ਆਗੂ ਰਣਧੀਰ ਸਿੰਘ ਧੀਰਾ ਖੁੱਡੀਆਂ ਅਤੇ ਪਿੰਡ ਬਾਦਲ ਦੇ ਵਸਨੀਕ ਰਣਧੀਰ ਸਿੰਘ ਪੁੱਤਰ ਬਲਵੰਤ ਸਿੰਘ ਵੱਲੋਂ ਕੀਤੀ ਗਈ।
           ਕਾਂਗਰਸੀ ਆਗੂ ਰਣਧੀਰ ਸਿੰਘ ਧੀਰਾ ਖੁੱਡੀਆਂ ਵੱਲੋਂ ਭੇਜੀ ਸ਼ਿਕਾਇਤ ਵਿਚ ਸਰਕਾਰੀ ਪੈਰਾ ਮੈਡੀਕਲ ਨਰਸਿੰਗ ਇੰਸਟੀਚਿਊਟ (ਬਾਦਲ) ਵਿਖੇ ਕੁਝ ਮਹੀਨੇ ਪਹਿਲਾਂ ਹੀ ਸਰਕਾਰੀ ਨੌਕਰੀ ਵਿਚ ਨਵੇਂ ਨਿਯੁਕਤ ਹੋਏ ਡਾ: ਫਤਿਹਜੀਤ ਸਿੰਘ ਮਾਨ (ਫਿਜਿਓਥੈਰੇਪੀ ਡੈਮੋਂਸਟੇਟਰ), ਗੁਰਪਾਲ ਸਿੰਘ ਲੈਬ ਅਟੈਡੈਂਟ ਅਤੇ ਡਾਕਖਾਨੇ ਦੇ ਡਿਊਟੀ ਨਾਲ ਕਥਿਤ ਤੌਰ 'ਤੇ ਜੁੜੇ ਦੱਸੇ ਜਾਂਦੇ ਰਾਜਿੰਦਰ ਸਿੰਘ ਖਿਲਾਫ਼ ਸਰਕਾਰੀ ਅਹੁਦਿਆਂ 'ਤੇ ਹੋਣ ਦੇ ਬਾਵਜੂਦ ਅਕਾਲੀ ਦਲ ਦੇ ਉਮੀਦਵਾਰ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀ ਕਥਿਤ ਤੌਰ 'ਤੇ ਸਰਗਰਮੀ ਨਾਲ ਹਮਾਇਤ ਕਰਨ ਜਿਹੇ ਗੰਭੀਰ ਦੋਸ਼ ਲਾਏ ਗਏ ਹਨ।
               ਇਸ ਸ਼ਿਕਾਇਤ ਵਿਚ ਡਾ: ਫਤਿਹਜੀਤ ਸਿੰਘ ਮਾਨ ਦਾ ਉਚੇਚੇ ਤੌਰ 'ਤੇ ਜ਼ਿਕਰ ਕਰਦਿਆਂ ਉਨ੍ਹਾਂ ਦੀ ਇੱਕ ਤੋਂ ਵੱਧ ਜਗ੍ਹਾ ਵੋਟ ਬਣੇ ਹੋਣ ਜਿਹੇ ਗੰਭੀਰ ਦੋਸ਼ ਵੀ ਲਾਏ ਗਏ ਹਨ। ਸ੍ਰੀ ਧੀਰਾ ਵੱਲੋਂ ਲਾਏ ਦੋਸ਼ਾਂ ਅਨੁਸਾਰ ਡਾ: ਫਤਿਹਜੀਤ ਸਿੰਘ ਮਾਨ ਦੀਆਂ ਮਲੋਟ ਹਲਕੇ ਦੇ ਬੂਥ ਨੰਬਰ 88 ਵਿਚ ਵੋਟ ਨੰਬਰ 451, ਲੰਬੀ ਹਲਕੇ ਦੇ ਪਿੰਡ ਅਸਪਾਲਾਂ ਦੇ ਬੂਥ ਨੰਬਰ 13 ਵਿਚ ਵੋਟ ਨੰਬਰ 223 ਤੋਂ ਇਲਾਵਾ ਪਿੰਡ ਬਾਦਲ ਦੇ ਬੂਥ ਨੰਬਰ 105 'ਚ ਵੋਟ ਨੱਬਰ 748 ਬਣੀ ਹੋਈ ਹੈ।   ਜਾਣਕਾਰੀ ਅਨੁਸਾਰ ਡਾ: ਫਤਿਹਜੀਤ ਸਿੰਘ ਮਾਨ ਬਾਦਲ ਪਰਿਵਾਰ ਦੇ ਕਾਫ਼ੀ ਨਜ਼ਦੀਕ ਮੰਨੇ ਜਾਂਦੇ ਹਨ ਅਤੇ ਉਹ ਕੁਝ ਸਮਾਂ ਬਤੌਰ ਫਿਜਿਓਥੈਰੇਪਿਸਟ ਮੁੱਖ ਮੰਤਰੀ ਸ੍ਰੀ ਬਾਦਲ ਨਾਲ ਵੀ ਤਾਇਨਾਤ ਰਹੇ ਹਨ। ਮੌਜੂਦਾ ਅਕਾਲੀ ਸਰਕਾਰ ਦੌਰਾਨ ਉਨ੍ਹਾਂ ਦੀ ਪ੍ਰਸ਼ਾਸਨਕ ਸਫ਼ਾ ਵਿਚ ਕਾਫ਼ੀ ਪੁੱਛ-ਪ੍ਰਤੀਤ ਰਹੀ ਹੈ।
              ਇਸਦੇ ਇਲਾਵਾ ਪਿੰਡ ਬਾਦਲ ਦੇ ਵਸਨੀਕ ਰਣਧੀਰ ਸਿੰਘ ਪੁੱਤਰ ਬਲਵੰਤ ਸਿੰਘ ਵੱਲੋਂ ਕੀਤੀ ਸ਼ਿਕਾਇਤ ਵਿਚ
ਬੂਥ ਨੰਬਰ 104, 105 ਅਤੇ 106 ਵਿਚ ਪੈਂਦੇ ਸਰਕਾਰੀ ਪੈਰਾ ਮੈਡੀਕਲ ਨਰਸਿੰਗ ਇੰਸਟੀਚਿਊਟ (ਬਾਦਲ) ਵਿਚ ਵੱਖ-ਵੱਖ ਪਿੰਡਾਂ ਸ਼ਹਿਰਾਂ ਦੀਆਂ ਕੋਰਸ ਕਰ ਰਹੀਆਂ ਲੜਕੀਆਂ, ਦਰਜਾ ਚਾਰ ਕਰਮਚਾਰੀ ਦੀਆਂ ਗਲਤ ਵੋਟਾਂ ਬਣੇ ਹੋਣ ਦਾ ਦੋਸ਼ ਲਾਇਆ ਗਿਆ।
              ਉਨ੍ਹਾਂ ਦੋਸ਼ ਲਾਇਆ ਕਿ ਇਨ੍ਹਾਂ ਲੜਕੀਆਂ ਵੱਲੋਂ ਵੋਟਾਂ ਬਣਵਾਉਣ ਲਈ ਫਾਰਮ 6 ਭਰਿਆ ਗਿਆ ਹੈ, ਉਹ ਉਨ੍ਹਾਂ ਦੀ ਰਿਹਾਇਸ਼ 'ਤੇ ਭੇਜਿਆ ਜਾਣਾ ਸੀ, ਪਰ ਤਤਕਾਲੀ ਸਹਾਇਕ ਰਿਟਰਨਿੰਗ ਅਫਸਰ (ਨਾਇਬ ਤਹਿਸੀਲਦਾਰ) ਵੱਲੋਂ ਕਥਿਤ ਤੌਰ 'ਤੇ ਅਹੁਦੇ ਦੀ ਦੁਰਵਰਤੋਂ ਕਰਕੇ ਵੋਟਾਂ ਬਣਾ ਦਿੱਤੀਆਂ ਗਈਆਂ।
ਉਨ੍ਹਾਂ ਚੋਣ ਕਮਿਸ਼ਨ ਤੋਂ ਨਰਸਿੰਗ ਕਾਲਜ ਦੀਆਂ ਲੜਕੀਆਂ ਦੀ ਮੁਕੰਮਲ ਰਿਹਾਇਸ਼ੀ ਪਤੇ ਲਾ ਕੇ ਜਾਂਚ ਕਰਨ ਦੀ ਮੰਗ ਕੀਤੀ। ਇਸਦੇ ਇਲਾਵਾ ਦਸਮੇਸ਼ ਵਿੱਦਿਅਕ ਅਦਾਰਾ ਦੀਆਂ ਤਿੰਨੇ ਸੰਸਥਾਵਾਂ ਤੋਂ ਇਲਾਵਾ ਬਿਰਧ ਆਸ਼ਰਮ ਬਾਦਲ ਵਿਖੇ ਦੁਹਰੀਆਂ ਵੋਟਾਂ ਬਣਨ ਦੇ ਦੋਸ਼ ਲਾਏ ਗਏ ਹਨ।
                ਉਕਤ ਸ਼ਿਕਾਇਤਾਂ ਦੇ ਆਧਾਰ 'ਤੇ ਚੋਣ ਕਮਿਸ਼ਨ ਦੀ ਹਦਾਇਤ ਉੱਪਰ ਭੁਪਿੰਦਰ ਸਿੰਘ ਸ਼ਿਕਾਇਤ ਅਫਸਰ ਅਤੇ ਗੁਰਚਰਨ ਸਿੰਘ ਸੁਪਰਵਾਈਜ਼ਰ 'ਤੇ ਆਧਾਰਤ ਦੋ ਮੈਂਬਰ ਟੀਮ ਪਿੰਡ ਬਾਦਲ ਦੇ ਨਰਸਿੰਗ ਕਾਲਜ, ਦਸਮੇਸ਼ ਗਰਲਜ਼ ਕਾਲਜ, ਦਸਮੇਸ਼ ਬੀ. ਐੱਡ ਕਾਲਜ ਅਤੇ ਬਿਰਧ ਆਸ਼ਰਮ ਪੁੱਜੀ ਅਤੇ ਉਥੋਂ ਦੇ ਪ੍ਰਬੰਧਕਾਂ ਕੋਲੋਂ ਉਨ੍ਹਾਂ ਦੇ ਅਦਾਰਿਆਂ ਵਿਚ ਸਟਾਫ਼ ਅਤੇ ਵਿਦਿਆਰਥੀਆਂ ਦੀਆਂ ਬਣੀਆਂ ਵੋਟਾਂ ਦੇ ਮੁਕੰਮਲ ਰਿਹਾਇਸ਼ੀ ਪਤਿਆਂ ਦੀ ਸੂਚੀ ਮੰਗੀ ਗਈ। ਜਿਸ 'ਤੇ ਸੰਸਥਾਵਾਂ ਦੇ ਪ੍ਰਬੰਧਕਾਂ ਵੱਲੋਂ ਅਗਲੇ 24 ਘੰਟਿਆਂ ਵਿਚ ਸੂਚੀਆਂ ਸੌਂਪਣ ਬਾਰੇ ਪਲਿਖਤੀ ਭਰੋਸਾ ਦਿਵਾਇਆ।
ਸ਼ਿਕਾਇਤ ਅਫਸਰ ਸ੍ਰੀ ਭੁਪਿੰਦਰ ਸਿੰਘ ਨੇ ਦੱਸਿਆ ਕਿ ਪਿੰਡ ਬਾਦਲ ਦੇ ਨਰਸਿੰਗ ਕਾਲਜ ਵਿਚ ਸਟਾਫ਼ ਅਤੇ ਨਰਸਿੰਗ ਵਿਦਿਆਰਥਣਾਂ ਦੀ 74, ਬੀ.ਐਡ ਕਾਲਜ ਵਿਖੇ ਸਟਾਫ਼ ਦੀਆਂ 14, ਡਿਗਰੀ ਕਾਲਜ ਵਿਖੇ 33 ਅਤੇ ਬਿਰਥ ਆਸ਼ਰਮ ਵਿਖੇ 35 ਵੋਟਾਂ ਬਣੀਆਂ ਹੋਈਆਂ ਹਨ।  
                  ਉਨ੍ਹਾਂ ਦੱਸਿਆ ਕਿ ਸ਼ਿਕਾਇਤ ਦੇ ਆਧਾਰ 'ਤੇ ਡਾ: ਫਤਿਹਜੀਤ ਸਿੰਘ ਮਾਨ ਬਾਰੇ ਨਰਸਿੰਗ ਕਾਲਜ ਵਿਚੋਂ ਜਵਾਬ ਮਿਲਿਆ ਕਿ ਉਹ ਪਰਿਵਾਰ ਭਲਾਈ ਵਿਭਾਗ ਵਿਚ ਡੇਪੂਟੇਸ਼ਨ 'ਤੇ ਹਨ।ਜ਼ਿਕਰਯੋਗ ਹੈ ਕਿ ਸ਼੍ਰੋਮਣੀ ਕਮੇਟੀ ਚੋਣਾਂ ਸਮੇਂ ਵੀ ਪਿੰਡ ਬਾਦਲ ਵਿਚ ਮੁਸਲਮਾਨ ਭਾਈਚਾਰੇ ਦੇ ਲੋਕਾਂ ਦੀਆਂ ਵੋਟਾਂ ਬਣੇ ਹੋਣ ਦਾ ਮਾਮਲਾ ਸੁਰਖੀਆਂ ਵਿਚ ਰਿਹਾ ਸੀ। ਚੋਣ ਕਮਿਸ਼ਨ ਨੂੰ ਭੇਜੀ ਸ਼ਿਕਾਇਤ ਦੇ ਸਬੰਧ ਵਿਚ ਪੱਖ ਜਾਨਣ ਲਈ ਡਾ: ਫਤਿਹਜੀਤ ਸਿੰਘ ਮਾਨ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਦੇ ਬਾਵਜੂਦ ਰਾਬਤਾ ਨਹੀਂ ਬਣ ਸਕਿਆ।


    

ਲੰਬੀ 'ਚ ਅਕਾਲੀ ਦਲ (ਬ) ਦੇ 31 ਹਜ਼ਾਰ ਝੰਡਿਆਂ ਨਾਲ ਭਰੀ ਗੱਡੀ ਚੋਣ ਕਮਿਸ਼ਨ ਦੀ ਟੀਮ ਅੜਿੱਕੇ ਚੜ੍ਹੀ

-ਝੰਡਿਆਂ 'ਤੇ ਤੱਕੜੀ ਦੇ ਨਿਸ਼ਾਨ ਤੋਂ ਇਲਾਵਾ ਵੱਡੇ ਬਾਦਲ, ਸੁਖਬੀਰ  ਤੇ ਹਰਸਿਮਰਤ ਕੌਰ ਦੀਆਂ ਛਪੀਆਂ ਸਨ ਤਸਵੀਰਾਂ-
                                                        ਇਕਬਾਲ ਸਿੰਘ ਸ਼ਾਂਤ
               ਲੰਬੀ : ਐਤਕੀਂ ਚੋਣ ਜ਼ਾਬਤੇ ਦੀ ਸਖ਼ਤੀ ਖੂਬ ਰੰਗ ਵਿਖਾ ਰਹੀ ਹੈ ਤੇ ਚੋਣ ਕਮਿਸ਼ਨ ਦੇ ਲੰਮੇ ਹੱਥਾਂ ਤੋਂ ਪੰਜਾਬ ਦਾ ਵੀ.ਆਈ.ਪੀ. ਹਲਕਾ ਲੰਬੀ ਵੀ ਵਾਂਝਾ ਨਹੀਂ ਰਿਹਾ।
              ਅੱਜ ਚੋਣ ਕਮਿਸ਼ਨ ਦੀ ਇੱਕ ਵੀਡੀਓਗਰਾਫ਼ੀ ਟੀਮ ਨੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਹਲਕੇ ਲੰਬੀ ਵਿਖੇ ਅਕਾਲੀ ਦਲ (ਬ) ਵਾਲੇ ਝੰਡਿਆਂ ਨਾਲ ਭਰਿਆ ਇੱਕ ਪਿਕਅਪ ਡਾਲਾ ਕਾਬੂ ਕੀਤਾ। ਬਰਾਮਦ ਕੀਤੇ ਝੰਡਿਆ ਦੀ ਗਿਣਤੀ ਲਗਭਗ 31 ਹਜ਼ਾਰ ਦੱਸੀ ਜਾਂਦੀ ਹੈ। ਜਿਨ੍ਹਾਂ 'ਤੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ, ਸ. ਸੁਖਬੀਰ ਸਿੰਘ ਬਾਦਲ ਅਤੇ ਬੀਬੀ ਹਰਸਿਮਰਤ ਕੌਰ ਬਾਦਲ ਦੀਆਂ ਤਸਵੀਰਾਂ ਤੋਂ ਇਲਾਵਾ ਸ਼੍ਰੋਮਣੀ ਅਕਾਲੀ ਦਲ (ਬ) ਦਾ ਚੋਣ ਨਿਸ਼ਾਨ 'ਤੱਕੜੀ' ਵੀ ਛਪਿਆ ਹੋਇਆ ਸੀ। ਜਿਨ੍ਹਾਂ ਦੀ ਕੀਮਤ ਲੱਖਾਂ ਰੁਪਏ ਮੰਨੀ ਜਾ ਰਹੀ ਹੈ।
          ਇਹ ਝੰਡਿਆਂ ਨਾਲ ਭਰਿਆ ਡਾਲਾ ਚੋਣ ਕਮਿਸ਼ਨ ਦੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਅਗਵਾਈ ਵਾਲੀ ਇੱਕ ਵੀਡੀਓਗਰਾਫ਼ੀ ਟੀਮ ਦੇ ਉਸ ਵੇਲੇ ਅੜਿੱਕੇ ਚੜ੍ਹ ਗਿਆ, ਜਦੋਂ ਉਸਦਾ ਡਰਾਈਵਰ ਅਤੇ ਝੰਡਿਆ ਦਾ ਸਪਲਾਇਰ ਉਕਤ ਖੇਪ ਨੂੰ ਕਿਧਰੇ ਲਾਹੁਣ ਦੀ ਤਿਆਰੀ ਵਿਚ ਸਨ। ਇਸੇ ਦੌਰਾਨ ਫਲਾਇੰਕ ਸਕੂਐਡ ਟੀਮ ਦੇ ਮੁਖੀ ਗੁਰਮੀਤ ਸਿੰਘ ਨਾਇਬ ਤਹਿਸੀਲਦਾਰ ਅਤੇ ਲੰਬੀ ਥਾਣੇ ਦੇ ਸਬ ਇੰਸਪੈਕਟਰ ਬੰਤਾ ਸਿੰਘ ਨੇ ਪੁਲਿਸ ਸਮੇਤ ਪੁੱਜੇ ਪਿਕਅਪ ਡਾਲਾ ਨੰਬਰ ਪੀ.ਬੀ.11 ਏ.ਆਰ/9502 ਨੂੰ ਕਬਜ਼ੇ ਲੈ ਕੇ ਲੰਬੀ ਥਾਣੇ ਵਿਚ ਲੈ ਗਏ।
         
              ਜਿੱਥੇ ਪੁੱਛ-ਗਿੱਛ ਦੌਰਾਨ ਝੰਡਿਆਂ ਨੂੰ ਕਾਬੂ ਕੀਤੇ ਵਿਅਕਤੀਆਂ ਦੀ ਸ਼ਨਾਖ਼ਤ ਯਸ਼ਪਾਲ ਵਾਸੀ ਪਟਿਆਲਾ, ਸੋਨੂੰ ਕੁਮਾਰ ਵਾਸੀ ਸ਼ੇਖਪੁਰਾ ਵਜੋਂ ਹੋਈ। ਇਸੇ ਦੌਰਾਨ ਵਿਧਾਨਸਭਾ ਹਲਕਾ ਲੰਬੀ ਦੇ ਰਿਟਰਨਿੰਗ ਅਫਸਰ ਸ੍ਰੀ  ਸੰਦੀਪ ਰਿਸ਼ੀ ਵੀ ਮੌਕੇ 'ਤੇ ਪਹੁੰਚ ਗਏ। ਜਿਨ੍ਹਾਂ ਨੇ ਉਕਤ ਮਾਮਲੇ ਬਾਰੇ ਲੰਬੀ ਦੇ ਥਾਣਾ ਮੁਖੀ, ਫਲਾਇੰਗ ਸਕੂਐਡ ਦੇ ਮੁਖੀ ਗੁਰਮੀਤ ਸਿੰਘ ਵੀਡੀਓਗਰਾਫ਼ੀ ਟੀਮ ਦੇ ਮੁਖੀ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਤੋਂ ਸਮੁੱਚੇ ਮਾਮਲੇ ਦੀ ਜਾਣਕਾਰੀ ਲਈ।
               
                  ਲੰਬੀ ਥਾਣੇ ਵਿਚ ਝੰਡਿਆਂ ਦੇ ਸਪਲਾਇਰ ਸ੍ਰੀ ਯਸ਼ਪਾਲ ਨੇ ਦੱਸਿਆ ਕਿ ਉਹ ਕੁਝ ਸਮਾਂ ਪਹਿਲਾਂ ਤੱਕ ਪੋਲੀਥੀਨ ਦੇ ਲਿਫਾਫਿਆਂ ਦਾ ਕਾਰੋਬਾਰ ਕਰਦਾ ਸੀ। ਪਰ ਸਰਕਾਰ ਵੱਲੋਂ ਪੋਲੀਥੀਨ ਦੇ ਕਾਰੋਬਾਰ 'ਤੇ ਨੱਥ ਪਾਉਣ ਉਪਰੰਤ ਉਹ ਰੋਜੀ-ਰੋਟੀ ਚਲਾਉਣ ਲਈ ਚੋਣ ਸਮੱਗਰੀ ਦੇ ਕਿੱਤੇ ਨਾਲ ਜੁੜਿਆ ਸੀ ਪਰ ਅੱਜ ਪੁਲਿਸ ਵੱਲੋਂ ਚੋਣ ਸਮੱਗਰੀ ਦੇ ਨਾਲ ਫੜਣ ਨਾਲ ਜਿੱਥੇ ਉਸਦੇ ਰੁਜ਼ਗਾਰ 'ਤੇ ਪ੍ਰਸ਼ਨ ਚਿੰਨ੍ਹ ਲੱਗ ਗਿਆ ਹੈ, ਉਥੇ ਪੁਲਿਸ ਵੱਲੋਂ ਜ਼ਬਤ ਕੀਤੇ ਇਨ੍ਹਾਂ ਝੰਡਿਆਂ 'ਤੇ ਆਈ ਲਾਗਤ ਅਤੇ ਕਾਰੀਗਰਾਂ ਦੀ ਮਜ਼ਦੂਰੀ ਦੀ ਉਸਦੇ ਸਿਰ ਪਵੇਗੀ। ਉਸ ਅਨੁਸਾਰ ਪਿਕਅਪ ਡਾਲੇ ਵਿਚ ਵੱਖ-ਵੱਖ ਸਾਇਜ਼ਾਂ ਅਨੁਸਾਰ 40 ਤੋਂ 50 ਹਜ਼ਾਰ ਝੰਡੇ ਦੇ ਕਰੀਬ ਲੱਦੇ ਹੋਏ ਹਨ।
           ਜਦੋਂ ਉਸਨੂੰ ਪੁੱਛਿਆ ਗਿਆ ਕਿ ਹਜ਼ਾਰਾਂ ਦੀ ਗਿਣਤੀ ਵਿਚ ਲੰਬੀ ਵਿਖੇ ਕਿਸਨੂੰ ਸਪਲਾਈ ਕਰਨ ਜਾ ਰਿਹਾ ਸੀ ਤਾਂ ਯਸ਼ਪਾਲ ਕੋਈ ਪੁਖ਼ਤਾ ਜਵਾਬ ਨਾ ਦੇ ਸਕਿਆ ਅਤੇ ਉਸਨੇ ਸਿਰਫ਼ ਇੰਨਾ ਕਿਹਾ ਹੀ ਕਿਹਾ ਕਿ ਉਹਦੇ ਕੋਲ ਕਿਸੇ ਦਾ ਆਰਡਰ ਨਹੀਂ ਸੀ। ਉਹ ਤਾਂ ਖੁੱਲ੍ਹੇ ਤੌਰ 'ਤੇ ਝੰਡੇ ਵੇਚਣ ਲਈ ਆਇਆ ਸੀ।

          ਲੰਬੀ ਥਾਣੇ ਵਿਖੇ ਰਿਟਰਨਿੰਗ ਅਫਸਰ ਸ੍ਰੀ ਸੰਦੀਪ ਰਿਸ਼ੀ ਨੇ ਦੱਸਿਆ ਕਿ ਇਨ੍ਹਾਂ ਝੰਡਿਆਂ ਨੂੰ ਜ਼ਬਤ ਕਰਕੇ ਲੰਬੀ ਪੁਲਿਸ ਨੂੰ ਲੋੜੀਂਦੀ ਕਾਰਵਾਈ ਕਰਨ ਦੇ ਨਿਰਦੇਸ਼ ਦਿੱਤੇ ਗਏ ਹਨ।

               ਇਸੇ ਦੌਰਾਨ ਲੰਬੀ ਥਾਣਾ ਦੇ ਮੁਖੀ ਗੁਰਪ੍ਰੀਤ ਸਿੰਘ ਬੈਂਸ ਨੇ ਦੱਸਿਆ ਕਿ ਗੁਰਮੀਤ ਸਿੰਘ (ਜ਼ਿਲ੍ਹਾ ਭਲਾਈ ਅਫਸਰ) ਦੀ ਸ਼ਿਕਾਇਤ 'ਤੇ ਝੰਡੇ ਅਤੇ ਗੱਡੀ ਨੂੰ ਕਬਜ਼ੇ ਵਿਚ ਲੈ ਕੇ ਯਸ਼ਪਾਲ ਪੁੱਤਰ ਮਦਨ ਗੋਪਾਲ ਵਾਸੀ ਅਰਬਨ ਸਟੇਟ, ਪਟਿਆਲਾ, ਸੋਨੂੰ ਕੁਮਾਰ ਪੁੱਤਰ ਰਾਜਿੰਦਰ ਸਿੰੰਘ ਵਾਸੀ ਸ਼ੇਖਪੁਰਾ (ਪਟਿਆਲਾ) ਖਿਲਾਫ਼ ਧਾਰਾ 127-ਏ ਰਿਪਰੈਜੈਂਟੇਸ਼ਨ ਆਫ਼ ਪੀਪਲ ਐਕਟ 1951 ਦੇ ਤਹਿਤ ਮਾਮਲਾ ਦਰਜ ਕੀਤਾ ਗਿਆ ਹੈ।
ਸਬ ਇੰਸਪੈਕਟਰ ਬੰਤਾ ਸਿੰਘ ਦੇ ਅਨੁਸਾਰ ਪਿਕਅਪ ਡਾਲੇ ਵਿਚ ਗਿਣਤੀ ਦੌਰਾਨ 62 ਗੱਟੇ ਬਰਾਮਦ ਕੀਤੇ ਗਏ, ਜਿਨ੍ਹਾਂ ਵਿਚ ਪ੍ਰਤੀ ਗੱਟੇ ਵਿਚ 500 ਦੇ ਹਿਸਾਬ ਨਾਲ 31 ਹਜ਼ਾਰ ਝੰਡੇ ਸਨ।
         
             ਲੰਬੀ ਹਲਕੇ ਵਿਚ ਸ਼੍ਰ੍ਰੋਮਣੀ ਅਕਾਲੀ (ਬ) ਦੇ ਝੰਡਿਆਂ ਨਾਲ ਭਰੀ ਗੱਡੀ ਫੜੇ ਜਾਣ ਦੀ ਖੂਬ ਚਰਚਾ ਹੈ। ਜਿੱਥੇ ਆਮ ਜਨਤਾ ਇਸ ਕਾਰਵਾਈ ਨੂੰ ਚੋਣ ਕਮਿਸ਼ਨ ਦੀ ਸਖ਼ਤੀ ਦਾ ਸਿੱਟਾ ਦੱਸ ਰਹੀ ਹੈ, ਉਥੇ ਅਕਾਲੀ ਦਲ ਨੇ ਇਸ ਮਾਮਲੇ 'ਤੇ ਚੁੱਪੀ ਧਾਰੀ ਹੋਈ ਹੈ।

ਸਾਰੰਗੀ ਸ਼੍ਰੋਮਣੀ ਕਮੇਟੀ ਦੀ, ਰਾਗ ਅਕਾਲੀਆਂ ਦਾ

                                                                  ਚਰਨਜੀਤ ਭੁੱਲਰ
          ਬਠਿੰਡਾ : ਸ਼੍ਰੋਮਣੀ ਅਕਾਲੀ ਦਲ ਦੇ ਚੋਣ ਪ੍ਰਚਾਰ ਦੀ ਸੇਵਾ ਸ਼੍ਰੋਮਣੀ ਕਮੇਟੀ ਦੇ ਢਾਡੀ ਕਰ ਰਹੇ ਹਨ। ਚੋਣ ਜ਼ਾਬਤਾ ਇਸ ਦੀ ਇਜਾਜ਼ਤ ਨਹੀਂ ਦਿੰਦਾ। ਸ਼੍ਰੋਮਣੀ ਕਮੇਟੀ ਦੇ ਢਾਡੀਆਂ ਦੀ ਅਸਲੀ ਡਿਊਟੀ ਧਰਮ ਪ੍ਰਚਾਰ ਦੀ ਹੈ ਪਰ ਉਹ ਅੱਜ ਕੱਲ੍ਹ ਹਲਕਾ ਮੌੜ ਤੋਂ ਅਕਾਲੀ ਉਮੀਦਵਾਰ ਜਨਮੇਜਾ ਸਿੰਘ ਸੇਖੋਂ ਦੀਆਂ ਸਿਆਸੀ ਸਟੇਜਾਂ 'ਤੇ ਰੰਗ ਬੰਨ੍ਹ ਰਹੇ ਹਨ।
              ਚੋਣ ਕਮਿਸ਼ਨ ਪੰਜਾਬ ਦੀ ਸਪੱਸ਼ਟ ਹਦਾਇਤ ਹੈ ਕਿ ਸ਼੍ਰੋਮਣੀ ਕਮੇਟੀ ਦੇ ਮੁਲਾਜ਼ਮ ਚੋਣ ਪ੍ਰਚਾਰ ਵਿੱਚ ਸ਼ਮੂਲੀਅਤ ਨਹੀਂ ਕਰ ਸਕਦੇ ਹਨ। ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਅੱਜ ਹਲਕਾ ਮੌੜ ਦੇ ਪਿੰਡਾਂ ਵਿੱਚ ਜਦੋਂ ਚੋਣ ਦੌਰਾ ਕੀਤਾ ਤਾਂ ਸ਼੍ਰੋਮਣੀ ਕਮੇਟੀ ਦੇ ਢਾਡੀਆਂ ਨੇ ਲੋਕਾਂ ਨੂੰ ਬਿਠਾਉਣ ਲਈ ਵਾਰਾਂ ਗਾਈਆਂ।
           ਅੱਜ ਸ਼੍ਰੋਮਣੀ ਕਮੇਟੀ ਦਾ ਢਾਡੀ ਜਥਾ ਪਿੰਡ ਕਰਾੜਵਾਲਾ, ਚਾਉਕੇ, ਮੰਡੀ ਕਲਾਂ, ਬਾਲਿਆਂ ਵਾਲੀ ਅਤੇ ਪਿੰਡ ਘੁੰਮਣ ਕਲਾਂ ਵਿੱਚ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਸਮਾਗਮਾਂ ਵਿੱਚ ਗਿਆ। ਸ੍ਰੋਮਣੀ ਕਮੇਟੀ ਦੇ ਜੁਗਰਾਜ ਸਿੰਘ ਮੌਜੀ ਦਾ ਢਾਡੀ ਜਥਾ ਧਰਮ ਪ੍ਰਚਾਰ ਕਰਨ ਦੀ ਥਾਂ ਅਕਾਲੀ ਉਮੀਦਵਾਰ ਲਈ ਵੋਟਾਂ ਮੰਗ ਰਿਹਾ ਹੈ। ਇਨ੍ਹਾਂ ਵਲੋਂ ਪਹਿਲਾਂ ਸਟੇਜਾਂ ਤੋਂ ਵਾਰਾਂ ਗਾਈਆਂ ਜਾਂਦੀਆਂ ਹਨ ਅਤੇ ਉਸ ਮਗਰੋਂ ਕਾਂਗਰਸ ਨੂੰ ਭਜਾਉਣ ਅਤੇ ਅਕਾਲੀ ਦਲ ਨੂੰ ਲਿਆਉਣ ਦੀ ਗੱਲ ਕੀਤੀ ਜਾਂਦੀ ਹੈ। ਪਿਛਲੇ 15 ਦਿਨ੍ਹਾਂ ਤੋਂ ਇਹ ਜਥਾ ਅਕਾਲੀ ਉਮੀਦਵਾਰ ਦੀ ਸੇਵਾ ਵਿੱਚ ਲੱਗਾ ਹੋਇਆ ਹੈ। ਏਦਾ ਹੀ ਹੋਰਨਾਂ ਥਾਵਾਂ ਤੇ ਵੀ ਸ੍ਰੋਮਣੀ ਕਮੇਟੀ ਦੇ ਢਾਡੀ ਅਕਾਲੀ ਦਲ ਦੀ ਸੇਵਾ ਵਿੱਚ ਜੁੱਟੇ ਹੋਏ ਹਨ। ਪਿਛਲੀਆਂ ਚੋਣਾਂ ਵਿੱਚ ਤਾਂ ਸ੍ਰੋਮਣੀ ਕਮੇਟੀ ਅਕਾਲੀ ਦਲ ਦੀ ਚੋਣ ਮੁਹਿੰਮ ਦੌਰਾਨ ਲੰਗਰ ਦਾ ਪ੍ਰਬੰਧ ਵੀ ਕਰਦੀ ਰਹੀ ਹੈ। ਹੁਣ ਢਾਡੀ ਆਪਣੀ ਡਿਊਟੀ ਛੱਡ ਕੇ ਅਕਾਲੀ ਉਮੀਦਵਾਰ ਦੇ ਗੁਣ ਗਾ ਰਹੇ ਹਨ।
      
               ਸ਼੍ਰੋਮਣੀ ਕਮੇਟੀ ਦੀ ਧਰਮ ਪ੍ਰਚਾਰ ਕਮੇਟੀ ਦੇ ਤਲਵੰਡੀ ਸਾਬੋ ਦਫ਼ਤਰ ਦੇ ਮੈਨੇਜਰ ਭਰਪੂਰ ਸਿੰਘ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੇ ਸਾਰੇ ਮੁਲਾਜ਼ਮਾਂ ਨੂੰ ਚੋਣ ਜ਼ਾਬਤਾ ਲੱਗਣ ਸਮੇਂ ਇਹ ਨੋਟ ਕਰਵਾ ਦਿੱਤਾ ਸੀ ਕਿ ਕਿਸੇ ਵੱਲੋਂ ਵੀ ਸਿਆਸੀ ਸਮਾਗਮਾਂ ਵਿੱਚ ਸ਼ਮੂਲੀਅਤ ਨਾ ਕੀਤੀ ਜਾਵੇ। ਉਨ੍ਹਾਂ ਆਖਿਆ ਕਿ ਮੌਜੀ ਦਾ ਜਥਾ ਸ਼੍ਰੋਮਣੀ ਕਮੇਟੀ ਦਾ ਹੈ ਅਤੇ ਇਨ੍ਹਾਂ ਵੱਲੋਂ ਕੋਈ ਛੁੱਟੀ ਵਗੈਰਾ ਵੀ ਨਹੀਂ ਲਈ ਗਈ। ਉਨ੍ਹਾਂ ਆਖਿਆ, ''ਮੈਨੂੰ ਇਹ ਜਾਣਕਾਰੀ ਨਹੀਂ ਹੈ ਕਿ ਇਹ ਢਾਡੀ ਜਥਾ ਅਕਾਲੀ ਦਲ ਦੇ ਪ੍ਰਚਾਰ ਵਿੱਚ ਲੱਗਿਆ ਹੋਇਆ ਹੈ।''
             ਪੀਪਲਜ਼ ਪਾਰਟੀ ਆਫ ਪੰਜਾਬ ਦੇ ਹਲਕਾ ਮੌੜ ਦੇ ਸੀਨੀਅਰ ਆਗੂ ਸੁਖਪਾਲ ਸਿੰਘ ਭੁੱਲਰ ਨੇ ਅੱਜ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਕੀਤੀ ਹੈ ਕਿ ਸ਼੍ਰੋਮਣੀ ਕਮੇਟੀ ਦਾ ਢਾਡੀ ਜਥਾ ਅਕਾਲੀ ਉਮੀਦਵਾਰ ਦੀ ਹਮਾਇਤ ਵਿੱਚ ਚੋਣ ਪ੍ਰਚਾਰ ਕਰ ਰਿਹਾ ਹੈ। ਪਤਾ ਲੱਗਿਆ ਹੈ ਕਿ ਢਾਡੀ ਜਥੇ ਵੱਲੋਂ ਪ੍ਰਚਾਰ ਕਰਨ ਦੇ ਸਬੂਤ ਵੀ ਭੇਜੇ ਗਏ ਹਨ। ਕਾਂਗਰਸ ਨੇ ਵੀ ਇਸ ਦੀ ਸ਼ਿਕਾਇਤ ਕੀਤੀ ਹੈ।
             ਜ਼ਿਲ੍ਹਾ ਚੋਣ ਅਫਸਰ ਸ੍ਰੀ ਕੇ.ਕੇ.ਯਾਦਵ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਇਸ ਤਰ੍ਹਾਂ ਦੀ ਕੋਈ ਜਾਣਕਾਰੀ ਨਹੀਂ ਹੈ ਅਤੇ ਉਹ ਇਸ ਦੀ ਪੜਤਾਲ ਕਰਾਉਣਗੇ। ਸ਼੍ਰੋਮਣੀ ਕਮੇਟੀ ਦੇ ਇਸ ਢਾਡੀ ਜਥੇ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਪਰ ਸੰਪਰਕ ਨਾ ਹੋ ਸਕਿਆ।

ਲੰਬੀ ਹਲਕੇ ਦੇ ਪਿੰਡ ਕੱਖਾਂਵਾਲੀ 'ਚ ਡਰੇਨੇਜ਼ ਵਿਭਾਗ ਵੱਲੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਇਆ

         ਡਰੇਨੇਜ਼ ਵਿਭਾਗ ਦਾ ਕਾਰਾ : ਖੇਤਾਂ ਦੇ ਪਾਣੀ ਦੀ ਨਿਕਾਸੀ ਲਈ ਸ਼ੁਰੂ ਕਰਵਾਇਆ ਕਮਰੇ ਦਾ ਉਸਾਰੀ ਕਾਰਜ
ਨਿਰਮਾਣ ਕਾਰਜ਼ ਨੂੰ ਗਿੱਦੜਬਾਹਾ ਦੇ ਜਨਰਲ ਆਬਜਰਵਰ ਨਾਲ ਤਾਇਨਾਤ 'ਸੰਪਰਕ ਅਫਸਰ' ਦੀ ਛਤਰਤਾਇਆ ਹਾਸਲ
                                                             ਇਕਬਾਲ ਸਿੰਘ ਸ਼ਾਂਤ
ਲੰਬੀ, 14 ਜਨਵਰੀ : ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਹਲਕੇ ਲੰਬੀ ਦੇ ਪਿੰਡ ਕੱਖਾਂਵਾਲੀ ਵਿਖੇ ਡਰੇਨੇਜ਼ ਵਿਭਾਗ ਦੇ ਅਧਿਕਾਰੀਆਂ ਵੱਲੋਂ ਸੱਤਾ ਪੱਖ ਦੇ ਪ੍ਰਭਾਵ ਹੇਠ ਕਥਿਤ ਤੌਰ 'ਤੇ ਖੁੱਲ•ੇਆਮ ਚੋਣ ਜ਼ਾਬਤੇ ਦੀਆਂ ਧੱਜੀਆਂ ਉਡਾਉਣ ਦਾ ਮਾਮਲਾ ਨਸ਼ਰ ਹੋਇਆ ਹੈ।
             
           ਇਹ ਸਮੁੱਚੀ ਕਾਰਗੁਜਾਰੀ ਕਥਿਤ ਤੌਰ 'ਤੇ ਡਰੇਨੇਜ਼ ਵਿਭਾਗ ਦੇ ਇੱਕ ਅਜਿਹੇ ਉੱਚ ਅਧਿਕਾਰੀ  ਦੀ ਛਤਰ-ਛਾਇਆ ਹੇਠ ਹੋਣ ਦੀ ਸੂਚਨਾ ਹੈ, ਜਿਸਨੂੰ ਚੋਣ ਕਮਿਸ਼ਨ ਵੱਲੋਂ ਨਾਲ ਖਹਿੰਦੇ ਗਿੱਦੜਬਾਹਾ ਹਲਕੇ ਵਿਚ ਨਿਰਪੱਖ ਚੋਣ ਕਰਵਾਉਣ ਲਈ ਭੇਜੇ ਜਨਰਲ ਆਬਜਰਵਰ ਦੇ ਨਾਲ 'ਸੰਪਰਕ ਅਫਸਰ' ਵਜੋਂ ਤਾਇਨਾਤ ਕੀਤਾ ਗਿਆ ਹੈ।
           
            ਡਰੇਨੇਜ਼ ਵਿਭਾਗ ਦੇ ਫਰੀਦਕੋਟ ਐਟ ਗਿੱਦੜਬਾਹਾ ਡਿਵੀਜਨ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਅਤੇ ਐਸ.ਡੀ.ਓ. ਵਰਿਆਮ ਸਿੰਘ ਦੇ ਅਧੀਨ ਪੈਂਦੇ ਸਬ ਡਿਵੀਜਨ ਦੇ ਅਧੀਨ ਪੈਂਦੇ ਸੈਂਕੜੇ ਏਕੜ ਸੇਮ ਪ੍ਰਭਾਵਿਤ ਜ਼ਮੀਨ ਵਾਲੇ ਪਿੰਡ ਕੱਖਾਂਵਾਲੀ ਦੇ ਖੇਤਾਂ ਵਿਚ ਕਾਫ਼ੀ ਪਾਣੀ ਖੜ੍ਹਾ  ਹੈ। ਅੱਜ ਪੰਜਾਵਾ-ਰੋੜਾਂਵਾਲੀ ਲਿੰਕ ਡਰੇਨ ਦੀ ਬੁਰਜੀ ਨੰਬਰ 37700 ਦੇ ਨਜ਼ਦੀਕ ਪੈਂਦੇ ਇਸੇ ਵਾਹੀਯੋਗ ਰਕਬੇ ਵਿਚ ਖੜ੍ਹੇ ਪਾਣੀ ਨੂੰ ਡਰੇਨ ਵਿਚ ਸੁੱਟਣ ਵਾਸਦੇ ਬਿਜਲੀ ਮੋਟਰ ਲਾਉਣ ਇੱਕ ਖੇਤ ਵਿਚ ਕੁਝ ਮਜ਼ਦੂਰ ਵੱਲੋਂ ਕਮਰਾ ਬਣਾਉਣ ਲਈ ਨੀਂਹਾਂ ਦੀ ਪੁਟਾਈ ਸ਼ੁਰੂ ਕੀਤੀ ਜਾ ਰਹੀ ਸੀ। ਜਿਸਦੇ ਨਜ਼ਦੀਕ ਬਰੇਤੀ ਨਾਲ ਲੱਦਿਆ ਇੱਕ ਟਰੈਕਟਰ-ਟਰਾਲੀ ਵੀ ਖੜ੍ਹਾ ਸੀ ਅਤੇ ਦੋ-ਤਿੰਨ ਢੇਰ ਬਜਰੀ ਵੀ ਪਈ ਸੀ। ਜਿਸਨੂੰ ਕੁਝ ਸਮਾਂ ਪਹਿਲਾਂ ਇੱਕ ਟਰੈਕਟਰ ਲਾਹ ਕੇ ਗਿਆ ਸੀ।
          
            ਡਰੇਨੇਜ਼ ਵਿਭਾਗ ਵੱਲੋਂ ਚੋਣ ਜ਼ਾਬਤੇ ਦੀਆਂ ਦਿਨ-ਦਹਾੜੇ ਧੱਜੀਆਂ ਉਡਾਉਣ ਦੀਆਂ ਸੂਚਨਾ ਮਿਲਣ 'ਤੇ ਪੱਤਰਕਾਰਾਂ ਨੇ ਵੇਖਿਆ ਕਿ ਉਥੇ ਬੜੀ ਤੇਜ਼ੀ ਨਾਲ ਤਿੰਨ ਮਜ਼ਦੂਰ ਖੇਤ ਵਿਚ ਖੜ੍ਹੇ ਪਾਣੀ ਨੂੰ ਵੱਟਾਂ ਨਾਲ ਰੋਕ ਕੇ ਇੱਕ ਕਮਰਾ ਉਸਾਰਨ ਲਈ ਉਸਦੀ ਨੀਂਹਾਂ ਲਈ ਖੁਦਾਈ ਕਰ ਰਹੇ ਸਨ, ਉਥੇ ਮੌਕੇ 'ਤੇ ਮੌਜੂਦ ਮੁਨੀਸ਼ ਨਾਂ ਦੇ ਇੱਕ ਵਿਅਕਤੀ ਨੇ ਖੁਦ ਨੂੰ ਬਠਿੰਡਾ ਦੀ ਕਿਸੇ ਕੰਸਟਰਸ਼ਨ ਕੰਪਨੀ ਦਾ ਮੁਨਸ਼ੀ ਦੱਸਦਿਆਂ ਕਿਹਾ ਕਿ ਖੇਤ ਵਿਚ ਖਲੋਤੇ ਇਸ ਪਾਣੀ ਦੀ ਨਿਕਾਸੀ ਲਈ 100 ਫੁੱਟ ਦੇ ਕਰੀਬ ਪਲਾਸਟਿਕ ਪਾਈਪ ਪਾ ਕੇ ਮੋਟਰ ਰਾਹੀਂ ਪਾਣੀ ਨੂੰ ਡਰੇਨ ਵਿਚ ਸੁੱਟਿਆ ਜਾਵੇਗਾ।

            ਜਦੋਂ ਮੁਨੀਸ਼ ਕੁਮਾਰ ਤੋਂ ਉਕਤ ਕੰਮ ਬਾਰੇ ਟੈਂਡਰ ਹੋਣ ਬਾਰੇ ਪੁੱਛਿਆ ਗਿਆ ਤਾਂ ਉਸਨੇ ਪਹਿਲਾਂ ਟਾਲਣ ਦੀ ਕੋਸ਼ਿਸ਼ ਕੀਤੀ ਪਰ ਬਾਅਦ ਵਿਚ ਖਹਿੜਾ ਛੁਡਵਾਉਣ ਦੇ ਰੌਂਅ ਵਿਚ ਕਿਹਾ ਕਿ ਕਾਗਜ਼ ਤਾਂ ਬਠਿੰਡੇ ਪਏ ਹਨ। ਨਾਲ ਹੀ ਬੈਠੇ ਮਿਸਤਰੀ ਜਾਪਦੇ ਇੱਕ ਹੋਰ ਵਿਅਕਤੀ ਨੇ ਉੱਪਰੋਂ ਪੋਚਾ ਮਾਰਨ ਦੇ ਰੌਂਅ ਵਿਚ ਕਿਹਾ ਕਿ ਵੋਟਾਂ ਕਰਕੇ ਹੁਣ ਅਸੀਂ ਨਵਾਂ ਕੰਮ ਨਹੀਂ ਸ਼ੁਰੂ ਕਰ ਸਕਦੇ। ਜਦੋਂ ਉਸਨੂੰ ਪੁੱਛਿਆ ਗਿਆ ਕਿ ਇੱਥੇ ਤਾਂ ਤੁਸੀਂ ਨਵਾਂ ਕੰਮ ਸ਼ੁਰੂ ਕਰ ਰਹੇ ਹਾਂ। ਉਸੇ ਦੌਰਾਨ ਦੋਵੇਂ ਜਣਿਆਂ ਨੇ ਨਹੀਂ ਜੀ, ਤੁਹਾਨੂੰ ਐਵੇਂ ਭੁਲੇਖਾ ਸਾਡਾ ਤਾਂ ਪੁਰਾਣਾ ਕੰਮ ਚੱਲ ਰਿਹਾ ਹੈ।
             
             ਪਿੰਡ ਦੇ ਕਿਸਾਨ ਦਰਸ਼ਨ ਰਾਮ ਨੇ ਦੱਸਿਆ ਕਿ ਉਨ੍ਹਾਂ ਦੇ ਪਿੰਡ ਦਾ ਲਗਭਗ 300 ਏਕੜ ਰਕਬਾ ਕਈ ਵਰਿ•ਆਂ ਤੋਂ ਸੇਮ ਦੀ ਮਾਰ ਹੇਠ ਹੈ। ਅੱਜ ਤੱਕ ਸਰਕਾਰ ਵੱਲੋਂ ਸੇਮ ਕੱਢਣ ਲਈ ਲਿੰਕ ਡਰੇਨ ਬਣਾਉਣ ਦੇ ਬਾਅਦ ਗੰਭੀਰਤਾ ਨਾਲ ਅਜਿਹਾ ਕੋਈ ਉਪਰਾਲਾ ਨਹੀਂ ਕੀਤਾ ਗਿਆ ਲੂਤਾਂ ਜੋ ਪਿੰਡ ਦਾ ਸੇਮ ਪ੍ਰਭਾਵਿਤ ਰਕਬਾ ਪੁਨਰ ਸੁਰਜੀਤ ਹੋ ਸਕੇ।
ਇੱਥੇ ਜ਼ਿਕਰਯੋਗ ਹੈ ਕਿ ਡਰੇਨੇਜ਼ ਵਿਭਾਗ ਦੇ ਫਰੀਦਕੋਟ ਐਟ ਗਿੱਦੜਬਾਹਾ ਡਿਵੀਜਨ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਨੂੰ ਚੋਣ ਕਮਿਸ਼ਨ ਵੱਲੋਂ ਹਲਕਾ ਗਿੱਦੜਬਾਹਾ ਲਈ ਜਨਰਲ ਅਬਜਰਵਰ ਵਜੋਂ ਤਾਇਨਾਤ ਕੀਤੇ ਸ੍ਰੀ ਅਰੁਣ ਪਾਂਡਾ (ਆਈ.ਏ.ਐਸ.) ਦੇ ਨਾਲ ਸੰਪਰਕ ਅਫ਼ਸਰ ਵਜੋਂ ਤੈਨਾਤ ਕੀਤਾ ਗਿਆ ਹੈ।
       
               ਜਦੋਂ ਦਰਸ਼ਨ ਰਾਮ ਨੂੰ ਪਿੰਡ ਕੱਖਾਂਵਾਲੀ ਵਿਖੇ ਉਕਤ ਨਿਰਮਾਣ ਕਾਰਜ਼ ਸ਼ੁਰੂ ਹੋਣ ਬਾਰੇ ਪੁੱਛਿਆ ਗਿਆਂ ਤਾਂ ਉਸਨੇ ਉਲਾਂਭੇ ਰੇ ਲਹਿਜ਼ੇ ਵਿਚ ਕਿਹਾ ਕਿ ਵੋਟਾਂ ਕਰਕੇ ਅੱਜ ਪਾਣੀ ਦੀ ਨਿਕਾਸੀ ਲਈ ਪਾਈਪਾਂ-ਪੂਈਪਾਂ ਪਾਉਣ ਲਈ ਆਏ ਹਨ। ਪਹਿਲਾਂ ਤਾਂ ਕਦੇ ਇਨ੍ਹਾਂ ਨੂੰ ਵੇਖਿਆ ਨਹੀਂ ਕਦੇ।
           
             ਇਸੇ ਦੌਰਾਨ ਸਬੰਧਤ ਐਸ.ਡੀ.ਓ. ਵਰਿਆਮ ਸਿੰਘ ਨਾਲ ਸਪੰਰਕ ਕੀਤਾ ਗਿਆ ਤਾਂ ਉਨ੍ਹਾਂ ਨੂੰ ਮੌਕੇ 'ਤੇ ਫੋਟੋਆਂ ਖਿੱਚਣ ਬਾਰੇ ਜਾਣਕਾਰੀ ਮਿਲਣ ਦੀ ਗੱਲ ਕਰਦਿਆਂ ਪਿੰਡ ਕੱਖਾਂਵਾਲੀ ਦੇ ਇੱਕ ਠੇਕੇਦਾਰ 'ਤੇ ਦੋਸ਼ ਮੜ੍ਹਦੇ ਹੋਏ ਕਿਹਾ ਕਿ ਉਸਨੇ ਖੁਦ ਤਾਂ ਟੈਂਡਰ ਲਿਆ ਨਹੀਂ ਅਤੇ ਹੁਣ ਸਾਨੂੰ ਐਵੇਂ ਖ਼ਰਾਬ ਕਰੀ ਜਾਂਦਾ ਹੈ।
             
             ਜਿਸਦੇ ਬਾਅਦ ਡਰੇਨੇਜ਼ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਨੇ ਸੰਪਰਕ ਕਰਨ 'ਤੇ ਸਬੰਧਤ ਐਸ.ਡੀ.ਓ. ਨੂੰ ਕਹਿ ਕੇ ਉਕਤ ਕਾਰਜ ਨੂੰ ਬੰਦ ਕਰਵਾਉਣ ਦੀ ਗੱਲ ਕਰਦਿਆਂ ਇਸ ਖ਼ਬਰ ਨੂੰ ਪ੍ਰਕਾਸ਼ਿਤ ਨਾ ਕਰਨ ਬਾਰੇ ਕਿਹਾ।
            

              ਇਸੇ ਦੌਰਾਨ ਸੀਨੀਅਰ ਕਾਂਗਰਸ ਆਗੂ ਗੁਰਮੀਤ ਸਿੰਘ ਖੁੱਡੀਆਂ ਦੋਸ਼ ਲਾਇਆ ਕਿ ਲੰਬੀ ਹਲਕੇ ਵਿਚ ਸਰਕਾਰੀ ਤੰਤਰ ਅਕਾਲੀ ਦਲ ਦੇ ਪੱਖ ਵਿਚ ਜੁਟਿਆ ਨਜ਼ਰ ਆ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਅਬਜਰਵਰ ਦੇ ਨਾਲ ਸੰਪਰਕ ਅਫਸਰ ਵਜੋਂ ਤਾਇਨਾਤ ਅਧਿਕਾਰੀਆਂ ਦੀ ਨੱਕ ਹੇਠ ਚੋਣ ਜ਼ਾਬਤੇ ਦੀ ਉਲੰਘਣਾ ਦਾ ਮਾਮਲਾ ਸਾਹਮਣੇ ਆਉਣਾ ਆਪਣੇ ਆਪ ਵਿਚ ਇੱਕ ਗੰਭੀਰ ਮਾਮਲਾ ਹੈ। ਉਨ੍ਹਾਂ ਚੋਣ ਕਮਿਸ਼ਨ ਤੋਂ ਇਸ ਮਾਮਲੇ ਦੀ ਦੋਸ਼ੀ ਅਧਿਕਾਰੀਆਂ ਖਿਲਾਫ਼ ਸਖ਼ਤ ਕਾਰਵਾਈ ਦੀ ਮੰਗ ਕੀਤੀ।
ਸੰਪਰਕ ਕਰਨ 'ਤੇ ਲੰਬੀ ਹਲਕੇ ਦੇ ਰਿਟਰਨਿੰਗ ਅਫਸਰ ਸ੍ਰੀ ਸੰਦੀਪ ਰਿਸ਼ੀ ਨੇ ਕਿਹਾ ਕਿ ਇਸ ਮਾਮਲੇ ਦੀ ਜਾਂਚ ਉਪਰੰਤ ਬਣਦੀ ਕਾਰਵਾਈ ਕਾਰਵਾਈ ਕੀਤੀ ਜਾਵੇਗੀ।

ਪਾਸ਼ ਅਤੇ ਦਾਸ ਨਾਲੋਂ ਘੱਟ ਚੱਲ ਅਤੇ ਅਚੱਲ ਜਾਇਦਾਦ ਦੇ ਮਾਲਕ ਹਨ ਮਹੇਸ਼ਇੰਦਰ

                                                              ਇਕਬਾਲ ਸਿੰਘ ਸ਼ਾਂਤ
                 ਲੰਬੀ : ਲੰਬੀ ਹਲਕੇ ਤੋਂ ਪਾਸ਼ ਨੂੰ ਦੋ ਵਿਧਾਨਸਭਾ ਚੋਣਾਂ ਤੋਂ ਕਰਾਰੀ ਟੱਕਰ ਦਿੰਦੇ ਆ ਰਹੇ ਕਾਂਗਰਸ ਉਮੀਦਵਾਰ ਮਹੇਸ਼ਇੰਦਰ ਸਿੰਘ ਬਾਦਲ ਆਪਣੇ ਦੋਵੇਂ ਚਚੇਰੇ ਭਰਾਵਾਂ ਪਾਸ਼ ਅਤੇ ਦਾਸ ਨਾਲੋਂ ਘੱਟ ਚੱਲ ਅਤੇ ਅਚੱਲ ਜਾਇਦਾਦ ਦੇ ਮਾਲਕ ਹਨ। ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਕੋਲ 6 ਕਰੋੜ 45 ਲੱਖ 30 ਹਜ਼ਾਰ ਦੀ ਚੱਲ ਅਤੇ ਅਚੱਲ ਸੰਪਤੀ ਹੈ। ਜਿਸ ਵਿਚ 6 ਕਰੋੜ 20 ਲੱਖ 50 ਹਜ਼ਾਰ ਦੀ ਅੱਚਲ ਅਤੇ 24 ਲੱਖ 80 ਹਜ਼ਾਰ 185 ਰੁਪਏ ਦੀ ਚੱਲ ਸੰਪਤੀ ਹੈ।
           ਇਸਦੇ ਉਲਟ ਅਕਾਲੀ-ਭਾਜਪਾ ਗੱਠਜੋੜ  ਦੇ ਉਮੀਦਵਾਰ ਪ੍ਰਕਾਸ਼ ਸਿੰਘ ਬਾਦਲ ਦੀ ਕੁੱਲ ਚੱਲ ਅਤੇ ਅਚੱਲ ਸੰਪਤੀ 6 ਕਰੋੜ 75 ਲੱਖ 27, 914 ਰੁਪਏ ਹੈ। ਇਸਦੇ ਲਾਵਾ ਪੀ.ਪੀ.ਪੀ. ਦੀ ਟਿਕਟ 'ਤੇ ਆਪਣੇ  ਭਰਾਵਾਂ ਦੇ ਵਿਰੋਧ ਖੜ੍ਹੇ ਹੋਏ ਗੁਰਦਾਸ ਸਿੰਘ ਬਾਦਲ 19 ਕਰੋੜ 71 ਲੱਖ 45 ਹਜ਼ਾਰ 625 ਰੁਪਏ ਦੀ ਚੱਲ ਅਤੇ ਅਚਲ ਸੰਪਤੀ ਹੈ।

         ਮਹੇਸ਼ਇੰਦਰ ਸਿੰਘ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਬਤੌਰ ਕਾਂਗਰਸ ਉਮੀਦਵਾਰ ਨਾਮਜ਼ਦਗੀ ਕਾਗਜ਼ਾਂ ਨਾਲ ਪੇਸ਼  ਸੰਪਤੀ ਦੇ ਅਸਾਸਿਆਂ ਦੀ ਸੂਚੀ ਅਨੁਸਾਰ ਉਨ੍ਹਾਂ ਦੇ ਕੋਲ ਪਾਸ਼ ਅਤੇ ਦਾਸ ਦੇ ਮੁਕਾਬਲੇ ਨਗਦ ਰਕਮ ਵਜੋਂ ਸਿਰਫ਼ 50 ਹਜ਼ਾਰ ਰੁਪਏ ਹਨ। ਜਦੋਂਕਿ ਪਾਸ਼ ਦੇ ਕੋਲ ਸਾਢੇ 4 ਲੱਖ ਰੁਪਏ ਨਗਦ ਹਨ ਅਤੇ ਦਾਸ ਦੇ ਕੋਲ ਨਿੱਜੀ ਤੌਰ 'ਤੇ ਨਗਦੀ ਵਜੋਂ 3 ਲੱਖ ਰੁਪਏ ਹਨ।
ਪਾਸ਼ ਦੇ ਸਿਆਸੀ ਗੁਰੂ ਸ. ਤੇਜਾ ਸਿੰਘ ਦੇ ਸਪੁੱਤਰ ਮਹੇਸ਼ਇੰਦਰ ਬਾਦਲ ਦੇ ਕੋਲ 8 ਲੱਖ 10 ਹਜ਼ਾਰ ਰੁਪਏ ਦਾ ਸੋਨਾ ਹੈ। ਇਸਦੇ ਉਲਟ ਪਾਸ਼ ਕੋਲ 3 ਲੱਖ 42 ਹਜ਼ਾਰ ਰੁਪਏ ਅਤੇ ਦਾਸ ਦੇ ਕੋਲ 2 ਲੱਖ 85 ਹਜ਼ਾਰ ਰੁਪਏ ਦਾ ਸੋਨਾ ਹੈ।
         
             ਸਾਊ ਸਖਸੀਅਤ ਦੇ ਮਾਲਕ ਵਜੋਂ ਜਾਣੇ ਜਾਂਦੇ ਮਹੇਸ਼ਇੰਦਰ ਬਾਦਲ ਦੇ ਵਹੀਕਲ ਵਜੋਂ ਮਹਿੰਦਰਾ ਦੀ ਇੰਵੇਡਰ ਜੀਪ (2008 ਮਾਡਲ) ਵਿਚ 50 ਫ਼ੀਸਦੀ ਹਿੱਸਾ ਹੈ। ਇਸਦੇ ਇਲਾਵਾ ਉਨ੍ਹਾਂ ਦੇ ਕੋਲ ਮਹਾਰਾਜਾ ਇੰਜੀਨੀਅਰਿੰਗ ਕੰਪਨੀ ਲਿਮ: 8 ਲੱਖ 93 ਹਜ਼ਾਰ 40 ਰੁਪਏ ਦੇ ਸ਼ੇਅਰ ਹਨ।

            ਕਿਸਾਨੀ ਦੇ ਕਿੱਤੇ ਨਾਲ ਜੁੜੇ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਕੋਲ ਆਪਣੇ ਜੱਦੀ ਪਿੰਡ ਬਾਦਲ ਵਿਖੇ 41 ਏਕੜ, ਉਤਰਾਖੰਡ ਸੂਬੇ ਦੇ ਨੈਣੀਤਾਲ ਦੇ ਪਿੰਡ ਖਾਮਰੀਆ ਵਿਖੇ 11.215 ਏਕੜ ਤੋਂ ਇਲਾਵਾ ਰਾਜਸਾਨ ਦੇ ਚੱਕ 5 ਬੀਐਨ.ਡਬਿਨਿਊ (ਜ਼ਿਲ੍ਹਾ ਸ੍ਰੀ ਗੰਗਾਨਗਰ)  ਵਿਖੇ 18 ਏਕੜ ਵਾਹੀਯੋਗ ਜ਼ਮੀਨ ਹੈ। ਇਸਤੋਂ ਇਲਾਵਾ ਉਨ੍ਹਾਂ ਕੋਲ  ਪਟਿਆਲਾ ਦੇ ਬਡੂੰਗਰ ਖੇਤਰ ਵਿਚ 7123.5 ਵਰਗ ਫੁੱਟ ਦੇ ਪਲਾਟ ਵਿਚ 50 ਫ਼ੀਸਦੀ ਹਿੱਸਾ ਹੈ। ਜਿਸਦੀ ਮੌਜੂਦਾ ਕੀਮਤ 11 ਲੱਖ ਰੁਪਏ ਹੈ। ਕਮਰਸ਼ੀਅਲ ਜਾਇਦਾਦ ਵਜੋਂ ਉਨ੍ਹਾਂ ਦੇ ਕੋਲ ਗਿੱਦੜਾਹਾ ਵਿਖੇ ਇੱਕ ਦੁਕਾਨ ਹੈ। ਜਦੋਂਕਿ ਪਿੰਡ ਹੁਸਨਰ ਵਿਖੇ 24 ਕਨਾਲ 18 ਮਰਲੇ ਰਕਬੇ ਵਿਚ ਅਨਾਜ ਸਟੋਰੇਜ਼ ਲਈ ਓਪਨ ਪਲਿੰਥ ਹਨ।
              ਰਿਹਾਇਸ਼ੀ ਜਾਇਦਾਦ ਵਜੋਂ ਉਨ੍ਹਾਂ ਦੇ ਕੋਲ ਪਿੰਡ ਬਾਦਲ ਵਿਖੇ ਲਾਲ ਲਕੀਰ ਦੇ ਅੰਦਰ ਇੱਕ ਮਕਾਨ ਜਿਸਦੀ ਕੀਮਤ 28 ਲੰਖ ਰੁਪਏ ਹੈ ਅਤੇ ਚੰਡੀਗੜ੍ਹ ਦੇ ਸੈਕਟਰ 18 ਵਿਖੇ 2700 ਵਰਗ ਫੁੱਟ ਦੇ 1 ਕਰੋੜ 67 ਲੱਖ ਰੁਪਏ ਦੀ ਕੀਮਤ ਵਾਲੇ ਇੱਕ ਮਕਾਨ ਵਿਚ 2/3 ਹਿੱਸਾ ਹੈ। ਉਨ੍ਹਾਂ ਦੇ ਸਿਰ ਦੋ ਲੱਖ 1413 ਰੁਪਏ ਦੀਆਂ ਸਰਕਾਰੀ ਦੇਣਦਾਰੀਆਂ ਹਨ।
          
               ਜਦੋਂਕਿ ਮਹੇਸ਼ਇੰਦਰ ਬਾਦਲ ਦੀ ਧਰਮ ਪਤਨੀ ਸ੍ਰੀਮਤੀ ਹਰਗੀਤ ਕੌਰ ਦੇ ਕੋਲ ਲਗਭਗ 68 ਲੱਖ 86 ਹਜ਼ਾਰ ਦੀ ਚੱਲ ਅਤੇ ਅਚੱਲ ਸੰਪਤੀ ਹੈ। ਜਦੋਂਕਿ ਉਨ੍ਹਾਂ ਦੇ 13 ਲੱਖ 50 ਹਜ਼ਾਰ ਰੁਪਏ ਦਾ ਸੋਨਾ ਹੈ ਅਤੇ 70 ਹਜ਼ਾਰ ਨਗਦ ਹਨ


       ਮਹੇਸਇੰਦਰ ਬਾਦਲ ਵੱੱਲੋਂ ਲੰਬੀ ਹਲਕੇ ਤੋਂ ਨਾਮਜ਼ਦਗੀ ਕਾਗਜ਼ ਦਾਖਲ
                                         -ਕਵਰਿੰਗ ਉਮੀਦਵਾਰ ਬਣੇ ਗੁਰਮੀਤ ਸਿੰਘ ਖੁੱਡੀਆਂ-

                                                                 ਇਕਬਾਲ ਸਿੰਘ ਸ਼ਾਂਤ

          ਲੰਬੀ  : ਪਿਛਲੇ ਵਿਧਾਨਸਭਾ ਚੋਣਾਂ ਵਿਚ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਤਕੜੀ ਟੱਕਰ ਦੇਣ ਵਾਲੇ ਲੰਬੀ ਹਲਕੇ ਤੋਂ ਕਾਂਗਰਸ ਦੇ ਉਮੀਦਵਾਰ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਆਪਣੇ ਨਾਮਜ਼ਦਗੀ ਕਾਗਜ਼ ਲੰਬੀ ਹਲਕੇ ਦੇ ਰਿਟਰਨਿੰਗ ਅਫਸਰ ਸੰਦੀਪ ਰਿਸ਼ੀ ਦੇ ਕੋਲ ਦਾਖਲ ਕੀਤੇ। ਪੰਜਾਬ ਕਾਂਗਰਸ ਦੇ ਸੀਨੀਅਰ ਆਗੂ ਸ. ਗੁਰਮੀਤ ਸਿੰਘ ਖੁੱਡੀਆਂ ਨੇ ਉਨ੍ਹਾਂ ਦੇ ਕਵਰਿੰਗ ਉਮੀਦਵਾਰ ਵਜੋਂ ਕਾਗਜ਼ ਦਾਖਲ ਕੀਤੇ।
   
          ਕਾਗਜ਼ ਦਾਖਲ ਕਰਨ ਉਪਰੰਤ ਪੱਤਰਕਾਰਾਂ ਦੇ ਸਵਾਲ ਦੇ ਜਵਾਬ ਵਿੱਚ ਸ੍ਰ. ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਿਹਾ ਕਿ ਕਾਂਗਰਸ ਪਾਰਟੀ ਦੀ ਸਰਕਾਰ ਬਣਨ ਦੀ ਸੂਰਤ ਵਿੱਚ ਜਿੱਥੇ ਉਨ੍ਹਾਂ ਦੀ ਮੁੱਢਲੀ ਪਹਿਲ ਲੰਬੀ ਹਲਕੇ ਦੇ 47 ਪਿੰਡਾਂ ਨੂੰ ਸੇਮ ਦੇ ਸੰਤਾਪ ਤੋਂ ਨਿਜਾਤ ਦਿਵਾਉਣਾ ਹੋਵੇਗਾ। ਇਸਦੇ ਇਲਾਵਾ ਸੂਬੇ ਵਿੱਚ ਕਾਨੂੰਨ ਦਾ ਰਾਜ ਬਹਾਲ ਕਰਵਾਉਣਾ ਵੀ ਮੁੱਖ ਏਜੰਡਾ ਹੋਵੇਗਾ। ਸ੍ਰੀ ਬਾਦਲ ਨੇ ਰਾਜ ਦੀ ਨਿੱਘਰ ਚੁੱਕੀ ਕਾਨੂੰਨ ਵਿਵਸਥਾ 'ਤੇ ਵਧੇਰੇ ਚਿੰਤਾ ਪ੍ਰਗਟ ਕਰਦਿਆਂ ਕਿਹਾ ਕਿ ਇਸ ਵੇਲੇ ਸੂਬੇ ਵਿਚ ਹਰ ਪਾਸੇ ਗੁੰਡਾਰਾਜ ਅਤੇ ਆਮ ਜਨਤਾ ਖੁਦ ਨੂੰ ਮਹਿਫੂਜ਼ ਮਹਿਸੂਸ ਨਹੀਂ ਕਰਦੀ।

            ਲੰਬੀ ਹਲਕੇ ਦੇ ਚੋਣ ਨਤੀਜਿਆਂ ਬਾਰੇ ਪੁੱਛਣ 'ਤੇ ਉਨ੍ਹਾਂ ਉਤਸ਼ਾਹ ਭਰੇ ਲਫ਼ਜ਼ਾਂ ਵਿਚ ਉਨ੍ਹਾਂ ਦਾ ਖੇਤਰ ਆਪਣੇ ਲੋਕਾਂ ਨਾਲ ਦਿਲੀ ਪਿਆਰ ਹੈ ਅਤੇ ਲੋਕਾਂ ਦੇ ਪਿਆਰ ਤੇ ਸਤਿਕਾਰ ਵਿਚ ਤਾਕਤ ਹੁੰਦੀ ਹੈ। ਅਜਿਹੇ ਵਿਚ ਉਹ ਆਪਣੀ ਜਿੱਤ ਪ੍ਰਤੀ ਬਹੁਤ ਆਸਵੰਦ ਹਨ।
          ਉਨ੍ਹਾਂ ਅਕਾਲੀ ਦਲ ਵੱਲੋਂ ਲੰਬੀ ਹਲਕੇ ਵਿਚ ਵੋਟਰਾਂ ਨੂੰ ਭਰਮਾਉਣ ਲਈ ਕੀਤੀਆਂ ਜਾ ਰਹੀਆਂ ਕਾਰਗੁਜ਼ਾਰੀ ਨੂੰ ਲੋਕਤੰਤਰ ਰਵਾਇਤਾਂ ਲਈ ਮੰਦਭਾਗਾ ਕਰਾਰ ਦਿੰਦਿਆਂ ਇਸ ਚੋਣ ਕਮਿਸ਼ਨ ਨੂੰ ਸ਼ਿਕਾਇਤ ਕਰਨ ਦੀ ਗੱਲ ਕਹੀ। ਉਨ੍ਹਾਂ ਕਿਹਾ ਕਿ ਧੱਕੇਸ਼ਾਹੀ ਅਤੇ ਗੁੰਡਾਗਰਦੀ ਨੂੰ ਕਿਸੇ ਵੀ ਕੀਮਤ 'ਤੇ ਸਹਿਨ ਨਹੀਂ ਕੀਤਾ ਜਾਵੇਗਾ।

               ਇਸ ਮੌਕੇ ਸਾਊ ਸਿਆਸਤਦਾਨ ਅਤੇ ਦਰਵੇਸ਼ ਸਿਆਸਤਦਾਨ ਵਜੋਂ ਜਾਣੇ ਜਾਂਦੇ ਸ੍ਰੀ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਹੋਰਨਾਂ ਉਮੀਦਵਾਰ ਕਵਰਿੰਗ ਉਮੀਦਵਾਰ ਆਪਣੇ ਖੂਨ ਜਾਂ ਪਰਿਵਾਰ ਵਿਚੋਂ ਬਣਾਉਣ ਦੀ ਬਜਾਏ ਦਰਵੇਸ ਸਿਆਸਤਦਾਨ ਮਰਹੂਮ ਮੈਂਬਰ ਪਾਰਲੀਮੈਂਟ ਸ੍ਰ: ਜਗਦੇਵ ਸਿੰਘ ਖੁੱਡੀਆਂ ਦੇ ਸਪੁੱਤਰ ਗੁਰਮੀਤ ਸਿੰਘ ਖੁੱਡੀਆਂ ਨੂੰ ਆਪਣੇ ਕਵਰਿੰਗ ਉਮੀਦਵਾਰ ਵਜੋਂ ਰੱਖ ਕੇ ਇੱਕ ਵਿਲੱਖਣ ਮਿਸਾਲ ਪੇਸ਼ ਕੀਤੀ।
               
              ਇਸ ਮੌਕੇ ਸਾਬਕਾ ਮੰਤਰੀ ਸ੍ਰ: ਹਰਦੀਪ ਇੰਦਰ ਸਿੰਘ ਬਾਦਲ, ਬਾਦਲ ਪਿੰਡ ਦੇ ਸਾਬਕਾ ਸਰਪੰਚ ਸੰਜਮ ਸਿੰਘ ਢਿੱਲੋਂ, ਸੀਨੀਅਰ ਕਾਂਗਰ ਆਗੂ ਰਣਧੀਰ ਸਿੰਘ ਧੀਰਾ ਖੁੱਡੀਆਂ ਅਤੇ ਸਾਬਕਾ ਵਿਧਾਇਕ ਰਘਵੀਰ ਸਿੰਘ, ਮਲਕੀਤ ਸਿੰਘ ਵਕੀਲ, ਬਲਾਕ ਕਾਂਗਰਸ ਦੇ ਜਗਵਿੰਦਰ ਸਿੰਘ ਕਾਲਾ, ਨਵਤੇਜ ਸਿੰਘ, ਟੋਜੀ ਲੰਬੀ, ਜਸਵਿੰਦਰ ਸਿੰਘ ਭਾਗੂ, ਹਰਮੀਤ ਸਿੰਘ ਮਾਨਾ ਅਤੇ ਵੱਖ-ਵੱਖ ਆਗੂ ਮੌਜੂਦ ਸਨ।


                          ਮਹੇਸਇੰਦਰ ਵੱਲੋਂ ਸਰਕਾਰੀ ਸੁਰੱਖਿਆ ਲੈਣ ਤੋਂ ਇਨਕਾਰ
     ਲੰਬੀ ਹਲਕੇ ਤੋਂ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਸ੍ਰ: ਮਹੇਸਇੰਦਰ ਸਿੰਘ ਬਾਦਲ ਨੇ ਅੱਜ ਸਰਕਾਰੀ ਸੁਰੱਖਿਆ ਲੈਣ ਤੋਂ ਇਨਕਾਰ ਕਰ ਦਿੱਤਾ। ਅੱਜ  ਵਿਧਾਨ ਸਭਾ ਹਲਕਾ ਲੰਬੀ ਲਈ ਕਾਂਗਰਸ ਦੇ ਉਮੀਦਵਾਰ ਵਜੋਂ ਆਪਣੇ ਨਾਮਜਦਗੀ ਕਾਗਜ਼ ਆਗ਼.ਓ. ਲੰਬੀ ਕੋਲ ਦਾਖਲ ਕਰਨ ਦੇ ਤੁਰੰਤ ਬਾਅਦ ਜਿਵੇਂ ਹੀ ਸ੍ਰ: ਬਾਦਲ ਰਿਟਰਨਿੰਗ ਅਫਸਰ ਦੇ ਦਫ਼ਤਰ ਵਿਚੋਂ ਬਾਹਰ ਆਏ ਤਾਂ ਇੱਕ ਥਾਣੇਦਾਰ ਨੇ ਉਨ੍ਹਾਂ ਨੂੰ ਸੁਰੱਖਿਆ ਕਰਮਚਾਰੀ ਲੈਣ ਦੀ ਪੇਸ਼ਕਸ਼ ਕੀਤੀ। ਜਿਸ 'ਤੇ ਮਹੇਸ਼ਦਇੰਦਰ ਸਿੰਘ ਬਾਦਲ ਨੇ ਬੜੀ ਨਿਮਰਤਾ ਨਾਲ ਸੁਰੱਖਿਆ ਲੈਣ ਤੋਂ ਇਨਕਾਰ ਕਰਦਿਆਂ ਕਿਹਾ ਕਿ ਉਹ ਆਪਣੀ ਹੋਣੀ ਨੂੰ ਆਪਣੇ ਸਮਰਥਕਾਂ ਤੇ ਵੋਟਰਾਂ ਨਾਲੋਂ ਵੱਖ ਨਹੀਂ ਕਰ ਸਕਦੇ।

ਹਜ਼ਾਰਾਂ ਕਰੋੜ ਰੁਪਏ ਦੇ ਕਰਜ਼ੇ ਹੇਠਾਂ ਦੱਬੇ ਸੂਬੇ ਦੇ ਮੁੱਖ ਮੰਤਰੀ ਸਿਰ ਇੱਕ ਰੁਪਇਆ ਵੀ ਕਰਜ਼ਾ ਨਹੀਂ

                                                   -ਪ੍ਰਕਾਸ਼ ਸਿੰਘ ਬਾਦਲ ਦੀ ਸੰਪਤੀ ਦੇ ਵੇਰਵੇ-
                                                               -ਇਕਬਾਲ ਸਿੰਘ ਸ਼ਾਂਤ-
           ਇਹ ਕੋਈ ਝੂਠ ਨਹੀਂ ਕਿ ਹਜ਼ਾਰਾਂ ਕਰੋੜ ਰੁਪਏ ਦੇ ਕਰਜ਼ੇ ਦੇ ਬੋਝ ਹੇਠਾਂ ਦੱਬੇ ਸੂਬੇ ਦੇ ਮੁੱਖ ਮੰਤਰੀ ਦੇ ਸਿਰ ਨਿੱਜੀ ਤੌਰ 'ਤੇ ਇੱਕ ਰੁਪਇਆ ਵੀ ਕਰਜ਼ਾ ਨਹੀਂ, ਬਲਕਿ ਉਹ ਆਰਥਿਕ ਤੌਰ 'ਤੇ ਇੰਨਾ ਮਜ਼ਬੂਤ ਹੈ ਕਿ ਉਸਨੇ ਲਗਭਗ 76 ਲੱਖ ਰੁਪਏ ਆਪਣੇ ਉੱਪ ਮੁੱਖ ਮੰਤਰੀ ਪੁੱਤਰ ਨੂੰ ਕਰਜ਼ੇ ਵਜੋਂ ਦਿੱਤੇ ਹੋਏ ਹਨ।
           
        ਹੋਰ ਤਾਂ ਹੋਰ ਨਿੱਤ ਹੈਲੀਕਾਪਟਰਾਂ ਦੇ ਹਲੂਣੇ ਅਤੇ ਮਹਿੰਗੀਆਂ ਕਾਰਾਂ ਦੇ ਝੂਟੇ ਲੈਣ ਵਾਲੇ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਕੋਲ ਸਫ਼ਰ ਕਰਨ ਲਈ ਆਪਣੇ ਪੁੱਤਰ ਸੁਖਬੀਰ ਵਾਂਗ ਇੱਕ ਨਿੱਜੀ ਕਾਰ ਵੀ ਨਹੀਂ।
          ਉਕਤ ਖੁਲਾਸਾ ਕਿਸੇ ਵਿਰੋਧੀ ਪਾਰਟੀ ਦੇ ਆਗੂ ਵੱਲੋਂ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ 'ਤੇ ਲਾਏ ਦੋਸ਼ਾਂ ਦਾ ਹਿੱਸਾ ਨਹੀਂ ਬਲਕਿ ਖੁਦ ਸ੍ਰੀ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਬਤੌਰ ਅਕਾਲੀ ਦਲ ਦੇ ਉਮੀਦਵਾਰ ਦਾਖਲ ਕੀਤੇ ਨਾਮਜ਼ਦਗੀ ਕਾਗਜ਼ ਦੇ ਨਾਲ ਪੇਸ਼ ਆਮਦਨੀ ਅਤੇ ਚੱਲ-ਅਚੱਲ ਜਾਇਦਾਦ ਦੇ ਅਸਾਸਿਆਂ ਦੀ ਸੂਚੀ ਦਾ ਹਿੱਸਾ ਹਨ।
    
          65 ਸਾਲਾਂ ਦੇ ਸਿਆਸੀ ਜੀਵਨ ਵਿਚ ਕਿਸਾਨਾਂ ਆਗੂ ਵਜੋਂ ਪ੍ਰਵਾਨਤ ਹੋਏ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਕੁੱਲ ਚੱਲ ਅਤੇ ਅਚੱਲ ਸੰਪਤੀ 6 ਕਰੋੜ 75 ਲੱਖ 27, 914 ਰੁਪਏ ਹੈ। ਉਨ੍ਹਾਂ ਨੇ ਆਪਣੇ ਪੁੱਤਰ ਸੁਖਬੀਰ ਸਿੰਘ ਬਾਦਲ ਨੂੰ 76 ਲੱਖ 2 ਹਜ਼ਾਰ 72 ਰੁਪਏ ਦੇ ਕਰਜ਼ਾ ਦਿੱਤਾ ਹੈ। ਹਾਲਾਂਕਿ ਉਨ੍ਹਾਂ ਦਾ ਉਪ ਮੁੱਖ ਮੰਤਰੀ ਪੁੱਤਰ ਆਪਣੇ ਪਿਤਾ ਤੋਂ ਦਸ ਗੁਣਾ ਤੋਂ ਵੀ ਵੱਧ ਅਮੀਰ ਹੈ। ਜਿਸ ਵੱਲੋਂ ਜਲਾਲਾਬਾਦ ਵਿਚ ਆਪਣੀ ਚੱਲ ਤੇ ਅਚੱਲ ਜਾਇਦਾਦ 76 ਕਰੋੜ ਰੁਪਏ ਹੋਣ ਬਾਰੇ ਖੁਲਾਸਾ ਕੀਤਾ ਗਿਆ ਹੈ।
ਉਨ੍ਹਾਂ ਦੇ ਕੋਲ 1 ਕਰੋੜ 21 ਲੱਖ 39 ਹਜ਼ਾਰ 974 ਰੁਪਏ ਦੀ ਚੱਲ ਸੰਪਤੀ ਹੈ। ਜਿਸਦੇ ਤਹਿਤ ਉਨ੍ਹਾਂ ਕੋਲ 3.25 ਲੱਖ ਰੁਪਏ ਦੀ ਕੀਮਤ ਵਾਲਾ ਖੇਤੀਬਾੜੀ ਦੇ ਕਿੱਤੇ ਨਾਲ ਸਬੰਧਤ ਮੁੱਖ ਸਾਧਨ ਮੈਸੀ ਫਰਗੂਸਨ ਟਰੈਕਟਰ ਹੈ ਅਤੇ 25 ਲੱਖ 56 ਹਜ਼ਾਰ 82 ਰਪਏ ਦੀ ਕੀਮਤ ਵਾਲੇ ਖੇਤੀਬਾੜੀ ਔਜਾਰ ਵੀ ਹਨ।
             
           82 ਸਾਲਾ ਪ੍ਰਕਾਸ਼ ਸਿੰਘ ਬਾਦਲ ਕੋਲ 4.50 ਲੱਖ ਰੁਪਏ ਦੀ ਨਗਦੀ ਤੋਂ ਇਲਾਵਾ ਵੱਖ-ਵੱਖ 9 ਬੈਂਕਾਂ ਵਿਚ 7 ਲੱਖ 7 ਹਜ਼ਾਰ 819 ਰੁਪਏ ਜਮ੍ਹਾਂ ਹਨ। ਫਾਲਕਨ ਕੰਪਨੀ ਦੇ 1.47 ਲੱਖ ਰੁਪਏ ਦੇ ਸ਼ੇਅਰ ਸ੍ਰੀ ਬਾਦਲ ਦੇ ਕੋਲ ਹਨ। ਆਮ ਤੌਰ 'ਤੇ ਸਾਦਾ ਜੀਵਨ ਵਤੀਤ ਕਰਨ ਦੇ ਹਾਮੀ ਸ੍ਰੀ ਬਾਦਲ ਵੀ ਸੋਨੇ ਦੇ ਪਿਆਰ ਤੋਂ ਗੁੱਝੇ ਨਹੀਂ ਰਹੇ, ਉਨ੍ਹਾਂ ਕੋਲ 3.42 ਲੱਖ ਰੁਪਏ ਦਾ ਸੋਨਾ ਵੀ ਹੈ।
     
             ਅਸਾਸਿਆਂ ਦੀ ਸੂਚੀ ਵਿਚ ਦਰਜ ਅੰਕੜਿਆਂ ਅਨੁਸਾਰ ਸੂਬੇ ਦੇ ਚਾਰ ਵਾਰ ਮੁੱਖ ਮੰਤਰੀ ਬਣ ਕੇ ਇੱਕ ਮਿਸਾਲ ਕਾਇਮ ਕਰ ਚੁੱਕੇ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਕੋਲ 5 ਕਰੋੜ 53 ਲੱਖ 88 ਹਜ਼ਾਰ ਰੁਪਏ ਦੀ ਅਚੱਲ ਸੰਪਤੀ ਹੈ। ਜਿਸਦੇ ਵਿਚੋਂ 4 ਕਰੋੜ 80 ਲੱਖ 63 ਹਜ਼ਾਰ ਰੁਪਏ ਦੀ ਵਾਹੀਯੋਗ ਜ਼ਮੀਨ ਹੈ। ਜਿਸਦੇ ਤਹਿਤ ਪਿੰਡ ਬਾਦਲ ਵਿਖੇ 241 ਕਨਾਲ ਵਾਹੀਯੋਗ ਜ਼ਮੀਨ, ਚੱਕ-14 (ਰਾਜਸਥਾਨ) 1.891 ਹੈਕਟੇਅਰ ਜ਼ਮੀਨ, ਹਰਿਆਣਾ ਦੇ ਬਾਲਾਸਰ ਵਿਖੇ 266 ਕਨਾਲ 16 ਮਰਲੇ ਤੋਂ ਇਲਾਵਾ ਰਾਣੀਆਂ (ਸਿਰਸਾ) ਵਿਖੇ 26 ਕਨਾਲ 17 ਮਰਲੇ ਜ਼ਮੀਨ ਹੈ।

           ਇਸਦੇ ਇਲਾਵਾ ਉਨ੍ਹਾਂ ਕੋਲ ਪਿੰਡ ਬਾਦਲ ਵਿਖੇ 50 ਲੱਖ ਰੁਪਏ ਦੀ ਕੀਮਤ ਵਾਲਾ ਇੱਕ ਰਿਹਾਇਸ਼ੀ ਮਕਾਨ ਹੈ। ਜਦੋਂਕਿ ਮੰਡੀ ਕਿੱਲਿਆਂਵਾਲੀ ਵਿਖੇ 3200 ਸਕੂਐਰ ਫੁੱਟ ਰਕਬੇ ਵਾਲੀ ਇੱਕ ਕਮਰਸ਼ੀਅਲ ਇਮਾਰਤ ਹੈ। ਜਿਸਦੀ ਕੀਮਤ 23 ਲੱਖ 25 ਹਜ਼ਾਰ ਰੁਪਏ ਦਰਸ਼ਾਈ ਗਈ ਹੈ।

ਮੁੱਖ ਮੰਤਰੀ ਬਾਦਲ ਦੇ ਚੋਣ ਜਲਸੇ ਬਰਾਬਰ ਰੋਸ ਜਲਸਾ

ਹੁਣ ਪ੍ਰਕਾਸ਼ ਸਿੰਘ ਬਾਦਲ ਸਾਹਮਣੇ ਆ ਰਹੀਆਂ ਨੇ ਅਕਾਲੀ ਝੰਡਾਬਰਦਾਰਾਂ ਦੀਆਂ ਬੇਨਿਯਮੀਆਂ ਤੇ ਵਿਤਕਰੇਬਾਜ਼ੀਆਂ

                                                               - ਇਕਬਾਲ ਸਿੰਘ ਸ਼ਾਂਤ -
            ਲੰਬੀ : ਪਿਛਲੇ 5 ਸਾਲਾਂ ਵਿਚ ਅਕਾਲੀ-ਭਾਜਪਾ ਗੱਠਜੋੜ ਸਰਕਾਰ ਦੌਰਾਨ ਹਲਕੇ ਲੰਬੀ ਵਿਚ ਅਕਾਲੀ ਦਲ ਦੇ ਝੰਡਾਬਰਦਾਰਾਂ ਵੱਲੋਂ ਕੀਤੀਆਂ ਬੇਨਿਯਮੀਆਂ ਤੇ ਵਿਤਕਰੇਬਾਜ਼ੀ ਭਰੀਆਂ ਕਾਰਗੁਜਾਰੀ ਹੁਣ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਸਾਹਮਣੇ ਆ ਰਹੀਆਂ ਹਨ।
         
              ਅੱਜ ਹਲਕੇ ਦੇ ਪਿੰਡ ਮਿਠੜੀ ਬੁੱਧਗਿਰ ਵਿਖੇ ਮੁਆਵਜੇ ਦੀ ਬਾਂਦਰਵੰਡ ਅਤੇ ਹੋਰ ਸਮੱਸਿਆਵਾਂ ਵਿਚ ਪਿੰਡ ਦੇ ਬਹੁਗਿਣਤੀ ਆਬਾਦੀ ਦੀ ਅਣਦੇਖੀ ਦੇ ਖਿਲਾਫ਼ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੇ ਚੋਣ ਜਲਸੇ ਸਮੇਂ ਪਿੰਡ ਦੇ  ਦੂਸਰੇ ਹਿੱਸੇ ਵਿਚ ਸੈਂਕੜੇ ਕਿਸਾਨਾਂ ਅਤੇ ਮਜ਼ਦੂਰਾਂ ਮਰਦ-ਔਰਤਾਂ ਵੱਲੋਂ ਵਿਸ਼ਾਲ ਮੁਜਾਹਰਾ ਕਰਕੇ ਆਪਣਾ ਰੋਸ ਪ੍ਰਗਟਾਇਆ ਗਿਆ।

             ਪਿੰਡ ਵਿਚ ਮੁੱਖ ਮੰਤਰੀ ਦੇ ਚੋਣ ਜਲਸੇ ਦੇ ਬਰਾਬਰ ਵਿਤਕਰੇਬਾਜ਼ੀ ਅਤੇ ਅਣਦੇਖੀ ਤੋਂ ਰੋਹ ਵਿਚ ਆਏ ਲੋਕਾਂ ਵੱਲੋਂ ਜਲਸਾ ਕਰਨ ਦੀਸੂਚਨਾ ਮਿਲਣ 'ਤੇ ਵੱਡੀ ਗਿਣਤੀ ਵਿਚ ਪੁਲਿਸ ਅਮਲਾ ਮੌਕੇ 'ਤੇ ਪਹੁੰਚ ਗਿਆ ਅਤੇ ਉਨ੍ਹਾਂ ਦੀ  ਘੇਰੇਬੰਦੀ ਕਰ ਲਈ।

                ਇਸੇ ਦੌਰਾਨ ਪਿੰਡ ਦੇ ਕਿਸਾਨ ਦਲਜੀਤ ਸਿੰਘ, ਬਲਤੇਜ ਸਿੰਘ, ਤਰਸੇਮ ਸਿੰਘ, ਬੁੱਧ ਸਿੰਘ ਉਰਫ਼ ਨੀਲਾ ਰੰਗੜ ਅਤੇ ਜਗਜੀਤ ਸਿੰਘ ਨੇ ਜਲਸੇ ਨੂੰ ਸੰਬੋਧਨ ਕਰਦਿਆਂ ਕਿਹਾ ਕਿ ਅਕਾਲੀ ਸਰਕਾਰ ਦੌਰਾਨ ਹਾਕਮਾਂ ਵੱਲੋਂ ਪਿੰਡ ਦੇ ਅਜਿਹੇ ਇੱਕਾ-ਦੁੱਕਾ ਸਰਮਾਏਦਾਰਾਂ ਨੂੰ ਚੌਧਰ ਸਾਂਭ ਦਿੱਤੀ ਜਾਂਦੀ ਹੈ। ਜਿਨ੍ਹਾਂ ਵੱਲੋਂ ਆਪਣੇ ਜਗੀਰਦਾਰਾਨਾ ਰਵੱਈਏ ਨਾਲ ਪਿੰਡ ਦੀ ਆਮ ਜਨਤਾ ਨੂੰ ਜਾਨਵਰਾਂ ਤੋਂ ਬਦਤਰ ਸਮਝਿਆ ਜਾਂਦਾ ਹੈ। ਉਨ੍ਹਾਂ ਸੂਬਾ ਸਰਕਰ ਵੱਲੋਂ ਭੇਜੀਆਂ ਕਰੋੜਾਂ ਦੀਆਂ ਗਰਾਟਾਂ ਵਿਚ ਕਥਿਤ ਤੌਰ 'ਤੇ ਵੱਡੀ ਘਪਲੇਬਾਜ਼ੀ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ ਪਿੰਡ ਦੀ ਜਨਤਾ ਵਿਚ ਸਰਕਾਰੀ ਗਰਾਂਟਾਂ ਦੇ ਸੁਚੱਜੇ ਢੰਗ ਨਾਲ ਨਹੀਂ ਲੱਗਣ ਕਰਕੇ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ।
       
            ਬੁਲਾਰਿਆਂ ਨੇ ਕਿਹਾ ਕਿ ਅਕਾਲੀ ਸਰਕਾਰ ਨੇ ਮੌਕਾਪ੍ਰਸਤ ਲੋਕਾਂ ਨੂੰ ਪਿੰਡਾਂ ਦੇ ਇੰਚਾਰਜ਼ ਥਾਪ ਕੇ ਆਮ ਜਨਤਾ ਦੇ ਗਲੇ ਘੁੱਟਣ ਜਿਹੀ ਕਾਰਗੁਜਾਰੀਆਂ ਨੂੰ ਅੰਜਾਮ ਦਿੱਤਾ ਗਿਆ। ਉਨ੍ਹਾਂ ਪਿਛਲੇ ਪੰਜ ਵਰ੍ਹਿਆਂ ਦੌਰਾਨ ਆਮ ਜਨਤਾ ਦੀ ਜਾਇਜ਼ ਸਮੱਸਿਆਵਾਂ ਅਤੇ ਮੰਗਾਂ ਅੱਖੋਂ ਪਰੋਖੇ ਕੀਤਾ ਗਿਆ, ਜਦੋਂਕਿ ਅਖੌਤੀ ਇੰਚਾਰਜ਼ਾਂ ਦੇ ਹਰੇਕ ਗੈਰਵਾਜਬ ਹੁਕਮ ਅਤੇ ਧੱਕੇਸ਼ਾਹੀਆਂ ਨੂੰ ਲੋਕਹਿੱਤਾਂ 'ਤੇ ਭਾਰੂ ਰਹੇ।

              ਇਸ ਮੌਕੇ ਮੀਂਹਾਂ ਦੇ ਪ੍ਰਭਾਵਿਤਾਂ ਨਾਲ ਹੋਈ ਵਿਤਕਰੇਬਾਜ਼ੀ 'ਤੇ ਬੋਲਦਿਆਂ ਬੁਲਾਰਿਆਂ ਨੇ ਕਿਹਾ ਕਿ ਪਿੰਡ ਦੇ ਸਰਮਾਏਦਾਰਾਂ ਵੱਲੋਂ ਪਟਵਾਰੀ ਦੀ ਕਥਿਤ ਮਿਲੀਭੁਗਤ ਨਾਲ ਚਹੇਤਿਆਂ ਅਤੇ ਕੁਨਬੇ ਦਾ ਢਿੱਡ ਭਰਨ ਲਈ ਗੈਰ ਪ੍ਰਭਾਵਿਤਾਂ ਨੂੰ ਮੁਆਵਜ਼ਾ ਸੂਚੀ ਵਿਚ ਸ਼ਾਮਲ ਕਰ ਦਿੱਤਾ ਗਿਆ। ਜਦੋਂਕਿ ਸੈਂਕੜੇ ਪ੍ਰਭਾਵਿਤ ਕਿਸਾਨ-ਮਜ਼ਦੂਰ ਵੱਡੀ ਮਾਰ  ਹੇਠ ਆਉਣ ਦੇ ਬਾਵਜੂਦ ਅਣਗੌਲਿਏ ਕੀਤੇ ਗਏ। ਦਲਜੀਤ ਸਿੰਘ, ਬਲਤੇਜ ਸਿੰਘ ਅਤੇ ਤਰਸਮੇ ਸਿੰਘ ਨੇ ਦੋਸ਼ ਲਾਇਆ ਕਿ ਪਿੰਡ ਵਿਚ ਵਾਰ-ਵਾਰ ਮੰਗ ਕਰਨ ਦੇ ਬਾਵਜੂਦ ਵਾਟਰ ਵਰਕਸ ਦੀ ਪਾਈਪ ਪਾਈਪ ਨਹੀਂ ਪਾਈ ਗਈ, ਖਾਲਿਆਂ ਦੀ ਪੁਲੀਆਂ ਅਤੇ ਨੱਕਿਆਂ ਨਾ ਬਣਾਉਣ ਤੋਂ ਇਲਾਵਾ ਲੋੜਵੰਦਾਂ ਨੂੰ ਪਖਾਨਿਆਂ ਅਤੇ ਬੀ.ਪੀ.ਐਲ. ਕਾਰਡਾਂ ਤੋਂ ਵਾਂਝਾ ਰੱਖਿਆ ਗਿਆ।
     

         ਪਿੰਡ ਮਿਠੜੀ ਵਿਖੇ ਅਕਾਲੀ ਦਲ ਦੇ ਚੋਣ ਜਲਸੇ ਤੋਂ ਵੱਡਾ ਇਕੱਠ ਰੋਹ ਭਰਪੂਰ ਜਲਸੇ ਵਿਚ ਹੋਣ ਦੀ ਸੂਚਨਾ ਮਿਲਣ 'ਤੇ ਜ਼ਿਲ੍ਹਾ ਵਿਕਾਸ ਕਮੇਟੀ ਦੇ ਚੇਅਰਮੈਨ ਹਰਮੀਤ ਸਿੰਘ ਭੀਟੀਵਾਲਾ ਜਲਸੇ ਵਿਚ ਪੁੱਜਿਆ ਅਤੇ ਲੋਕਾਂ ਦੇ ਰੋਹ ਭਰੇ ਵਿਚਾਰ ਸੁਣੇ।
ਇਸਦੇ ਉਪਰੰਤ ਪਿੰਡ ਦੇ ਅਕਾਲੀ ਆਗੂ ਦੀਆਂ ਊਣਤਾਈਆਂ ਭਰੀਆਂ ਕਾਰਗੁਜਾਰੀਆਂ ਤੋਂ ਤਪੇ ਲੋਕਾਂ ਨੂੰ ਠਾਰ੍ਹਣ ਲਈ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਖੁਦ ਜਲਸੇ ਵਿਚ ਪੁੱਜੇ ਅਤੇ ਲੋਕਾਂ ਦੀਆਂ ਰੋਹ ਭਾਵਨਾਵਾਂ ਅਤੇ ਸਮੁੱਚੀਆਂ ਦੁੱਖ ਤਕਲੀਫ਼ਾਂ ਨੂੰ ਸੁਣਿਆ। ਮੁੱਖ ਮੰਤਰੀ ਨੇ ਪ੍ਰਭਾਵਿਤਾਂ ਨੂੰ ਪੁਰਾਣੇ ਗਿਲੇ ਸ਼ਿਕਵੇ ਅਤੇ ਹੱਡ ਬੀਤੀਆਂ ਨੂੰ ਭੁਲਾ ਕੇ ਉਨ੍ਹਾਂ ਨੂੰ ਵੱੱਡੇ ਫ਼ਰਕ ਨਾਲ ਜਿਤਾਉਣ ਦੀ ਅਪੀਲ ਕੀਤੀ।
       
             ਇੱਥੇ ਜ਼ਿਕਰਯੋਗ ਹੈ ਕਿ ਲੰਬੀ ਹਲਕੇ ਦੇ ਦਰਜਨਾਂ ਪਿੰਡਾਂ ਵਿਚ ਮੀਂਹਾਂ ਤੋਂ ਪ੍ਰਭਾਵਿਤ ਸੈਂਕੜੇ ਪਰਿਵਾਰਾਂ ਦੇ ਨਾਂਅ ਮੁਆਵਜਾ ਸੂਚੀਆਂ ਵਿਚ ਨਾ ਹੋਣ ਕਰਕੇ ਪ੍ਰਭਾਵਿਤ ਕਿਸਾਨਾਂ ਅਤੇ ਮਜ਼ਦੂਰਾਂ ਵਿਚ ਕਾਫ਼ੀ ਰੋਸ ਪਾਇਆ ਜਾ ਰਿਹਾ ਹੈ।

ਸੰਘਣੇ ਕੋਹਰੇ 'ਤੇ ਭਾਰੂ ਪੈ ਰਿਹੈ ਤਿੰਨੇ ਬਾਦਲ ਭਰਾਵਾਂ ਦਾ ਚੋਣ ਪ੍ਰਚਾਰ

                                 -ਲੋਂਗ ਕੋਟ ਅਤੇ ਦਸਤਾਨੇ ਠੰਡ ਤੋਂ ਬਚਾਅ ਲਈ ਪਾਸ਼ ਦਾ ਵੱਡਾ ਸਹਾਰਾ-
                          -ਦਾਸ ਨੂੰ ਹੁਣ ਬਾਹਵਾ ਕੰਮ ਆ ਰਿਹੈ 'ਪਾਸ਼' ਵੱਲੋਂ ਲਿਆ ਕੇ ਦਿੱਤਾ ਵਿਲਾਇਤੀ ਲੋਂਗ ਕੋਟ-
              - ਠੰਡ ਤੋਂ ਬਚਾਅ ਲਈ ਸਵੈਟਰ ਅਤੇ ਲੋਈ ਦੀ ਬੁੱਕਲ ਨੂੰ ਬਿਹਤਰ ਮੰਨਦੇ ਨੇ ਮਹੇਸ਼ਇੰਦਰ ਬਾਦਲ-
                                                                        -ਇਕਬਾਲ ਸਿੰਘ ਸ਼ਾਂਤ-
ਲੰਬੀ : ਪੰਜਾਬ ਵਿਧਾਨਸਭਾ ਚੋਣਾਂ-2012 ਦੌਰਾਨ ਸਭ ਤੋਂ ਵਕਾਰੀ ਚੋਣ ਦੰਗਲ ਦਾ ਰੁਤਬਾ ਰੱਖਦੇ ਲੰਬੀ ਵਿਧਾਨਸਭਾ ਹਲਕੇ ਵਿਚ ਤਿੰਨ ਬਾਦਲ ਭਰਾਵਾਂ ਵਿਚਕਾਰ ਭਖੇ ਚੋਣ ਦੰਗਲ ਦੀ ਗਰਮਾਹਟ ਅਤਿ ਦੀ ਠੰਡ ਅਤੇ ਸੰਘਣੇ ਕੋਹਰੇ 'ਤੇ ਭਾਰੂ ਪੈ ਰਹੀ ਹੈ। ਜਿੱਥੇ ਅਜਿਹੇ ਕੋਹਰੇ ਭਰੇ ਦਿਨ ਵਿਚ ਆਮ ਤੌਰ 'ਤੇ ਘਰਾਂ ਵਿਚੋਂ ਬਾਹਰ ਨਿਕਲਣ ਤੋਂ ਗੁਰੇਜ਼ ਕੀਤਾ ਜਾਂਦਾ ਹੈ, ਉਥੇ ਆਪਣੀ ਸਿਆਸੀ ਜ਼ਿੰਦਗੀ ਦਾਅ 'ਤੇ ਲੱਗੇ ਹੋਣ ਕਰਕੇ ਤਿੰਨੇਂ ਭਰਾਵਾਂ ਵੱਲੋਂ ਇੱਕ ਦੂਸਰੇ ਨੂੰ ਢਹਿ-ਢੇਰੀ ਕਰਨ ਲਈ ਠੰਡ ਅਤੇ ਸੰਘਣੇ ਕੋਹਰੇ ਦੀ ਪਰਵਾਹ ਨਹੀਂ ਕੀਤੀ ਜਾ ਰਹੀ।
            ਸੰਘਣੇ ਕੋਹਰੇ ਦੇ ਬਾਵਜੂਦ ਅਕਾਲੀ ਦਲ ਦੇ 86 ਸਾਲਾ ਉਮੀਦਵਾਰ ਸ: ਪ੍ਰਕਾਸ਼ ਸਿੰਘ ਬਾਦਲ, ਕਾਂਗਰਸ ਦੇ ਉਮੀਦਵਾਰ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਅਤੇ ਪੀ.ਪੀ.ਪੀ. ਦੇ ਦੇ ਉਮੀਦਵਾਰ ਸ: ਗੁਰਦਾਸ ਸਿੰਘ ਬਾਦਲ ਨੇ ਲੰਬੀ ਹਲਕੇ ਦੇ ਦੂਰ-ਦਰਾਜ ਦੇ ਪਿੰਡਾਂ ਵਿਚ ਵੱਡੇ ਪੱਧਰ 'ਤੇ ਚੋਣ ਮੁਹਿੰਮ ਵਿੱਢੀ ਹੋਈ ਹੈ ਤੇ ਪਿੰਡਾਂ ਵਿਚ ਲਗਾਤਾਰ ਚੋਣ ਜਲਸੇ ਕੀਤੇ ਜਾ ਰਹੇ ਹਨ। ਉਂਝ ਕੋਹਰੇ ਕਰਕੇ ਚੋਣ ਪ੍ਰਚਾਰ ਵਿਚ ਰੁੱਝੇ ਉਮੀਦਵਾਰਾਂ ਦੇ ਕਾਫ਼ਲਿਆਂ ਨੂੰ ਆਵਾਜਾਈ ਵਿਚ ਕਾਫ਼ੀ ਦਿੱਕਤਾਂ ਵੀ ਦਰਪੇਸ਼ ਆ ਰਹੀਆਂ ਹਨ।
               ਭਾਵੇਂ ਤਿੰਨੇ ਉਮੀਦਵਾਰਾਂ ਨਾਲ ਚੱਲ ਰਹੇ ਵਰਕਰਾਂ 'ਚ ਚੋਣ ਪ੍ਰਚਾਰ ਪ੍ਰਤੀ ਕਾਫ਼ੀ ਉਤਸ਼ਾਹ ਪਾਇਆ ਜਾ ਰਿਹਾ ਹੈ ਪਰ ਫਿਰ ਉਨ੍ਹਾਂ ਦੇ ਚਿਹਰਿਆਂ 'ਤੇ ਤਿੱਖੀ ਠੰਡ ਦਾ ਅਸਰ ਕਿਤੇ ਨਾ ਕਿਤੇ ਵਿਖਾਈ ਦਿੰਦਾ ਹੈ। ਇਸਦੇ ਬਾਵਜੂਦ 85 ਸਾਲਾ ਅਕਾਲੀ ਸਿਆਸਤ ਦੇ ਬਾਬਾ ਬੋਹੜ ਪ੍ਰਕਾਸ਼ ਸਿੰਘ ਬਾਦਲ ਆਪਣੇ ਭਰਾਵਾਂ ਦੇ ਚੱਕਰਵਿਊ ਤੋਂ ਬਚਣ ਖਾਤਰ ਠੰਡ ਨੂੰ ਦਰਕਿਨਾਰਰ ਕਰਕੇ ਸਵੇਰੇ ਤੋਂ ਰਾਤ ਤੱਕ ਕਾਂਗਰਸ ਅਤੇ ਪੀ.ਪੀ.ਪੀ. ਨੂੰ ਕੋਸਦੇ ਹੋਏ ਸਿਆਸੀ ਸ਼ਰੀਕਾਂ 'ਤੇ ਅਸਿੱਧੇ ਵਾਰ ਕਰਕੇ ਖੁਦ ਨੂੰ ਗਰਮੀ ਦੇ ਰਹੇ ਹਨ। ਉਹ ਕੁੜਤੇ-ਪਜਾਮੇ ਦੀ ਰਵਾਇਤੀ ਪੌਸ਼ਾਕ ਦੇ ਨਾਲ ਬਿਨ੍ਹਾਂ ਬਾਹਾਂ ਵਾਲੀ ਜਾਕੇਟ ਦੇ ਉੱਪਰੋਂ ਲੋਂਗ ਕੋਟ ਅਤੇ ਹੱਥਾਂ ਵਿਚ ਦਸਤਾਨੇ ਅਤੇ ਪੈਰਾਂ 'ਚ ਗਰਮ ਜ਼ੁਰਾਬਾਂ ਪਹਿਨਣ ਨੂੰ ਤਰਜੀਹ ਦਿੰਦੇ ਹਨ, ਉਥੇ ਮੁੱਖ ਮੰਤਰੀ ਦੇ ਛੋਟੇ ਭਰਾ ਅਤੇ ਪੀ.ਪੀ.ਪੀ. (ਸਾਂਝਾ ਮੋਰਚਾ) ਦੇ ਉਮੀਦਵਾਰ ਸ. ਗੁਰਦਾਸ ਸਿੰਘ ਬਾਦਲ ਵੀ ਸਫ਼ੈਦ ਕੁੜਤੇ -ਪਜਾਮੇ ਅਤੇ ਲੋਂਗ ਕੋਟ ਨੂੰ ਠੰਡ ਤੋਂ ਬਚਾਅ ਲਈ ਵਰਤਦੇ ਹਨ, ਪਰ ਉਹ ਭਾਰੀ ਠੰਡ ਦੇ ਬਾਵਜੂਦ ਦਸਤਾਨੇ ਵਗੈਰਾ ਪਹਿਨਣ ਤੋਂ ਗੁਰੇਜ਼ ਕਰਦੇ ਹਨ। ਉਨ੍ਹਾਂ ਦੇ ਰਵਾਇਤੀ ਅੰਦਾਜ਼ ਦਿੱਤੇ ਭਾਸ਼ਨਾਂ ਵਿਚ ਅਕਾਲੀ ਦਲ 'ਤੇ ਤਿੱਖੇ ਹਮਲੇ ਅਤੇ ਅਕਾਲੀ ਲਫਟੈਨਾਂ ਦੀ ਮੰਦੀਆਂ ਕਾਰਗੁਜਾਰੀਆਂ ਦਾ ਖਾਸਾ ਜ਼ਿਕਰ ਹੁਦਾ ਹੈ ਜਿਹੜਾ ਆਰਥਿਕ ਮੰਦਹਾਲੀ 'ਚ ਖੁੱਭੇ ਲੋਕਾਂ ਨੂੰ ਕਾਫ਼ੀ ਸੁਖਾਵਾਂਪਨ ਅਤੇ  ਗਰਮਾਹਟ ਦੇਣ ਵਾਲਾ ਹੁੰਦਾ ਹੈ।
                 ਇਸ ਸਬੰਧ ਵਿਚ ਜਦੋਂ 82 ਸਾਲਾ ਦਾਸ ਹੁਰਾਂ ਤੋਂ ਚੋਣ ਪ੍ਰਚਾਰ 'ਤੇ ਠੰਡ ਅਤੇ ਕੋਹਰੇ ਦੇ ਅਸਰ ਬਾਰੇ ਪੁੱਛੇ ਜਾਣ 'ਤੇ ਉਨ੍ਹਾਂ ਕਿਹਾ ਕਿ ''ਚੋਣ ਪ੍ਰਚਾਰ ਠੰਡ ਤੋਂ ਬਚਾਅ ਲਈ ਵਿਲਾਇਤੀ ਕੋਟ (ਚੈਸਟਰ) ਨੂੰ ਪਾਉਂਦੇ ਹਨ। ਜਿਹੜਾ ਉਨ੍ਹਾਂ ਨੂੰ ਬਾਦਲ ਸਾਬ੍ਹ (ਪਾਸ਼) ਨੇ ਬਾਹਰੋਂ ਲਿਆ ਕੇ ਦਿੱਤਾ ਸੀ। ਦਾਸ ਹੁਰਾਂ ਨੇ ਹੱਸਦਿਆਂ ਕਿਹਾ ਕਿ ਹੁਣ ਇਹੋ ਵਿਲਾਇਤੀ ਕੋਟ ਵੱਡੇ ਬਾਦਲ ਸਾਬ੍ਹ ਲਈ ਹੀ ਬਾਹਵਾ ਕੰਮ ਆ ਰਿਹੈ।
               ਜਦੋਂਕਿ ਪਾਸ਼ ਅਤੇ ਦਾਸ ਦੇ ਉਲਟ ਕੜਾਕੇ ਦੀ ਠੰਡ ਦੇ ਬਾਵਜੂਦ 52 ਸਾਲਾ ਕਾਂਗਰਸੀ ਉਮੀਦਵਾਰ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਚੋਣ ਪ੍ਰਚਾਰ ਦੌਰਾਨ ਇੱਕ ਸਧਾਰਨ ਕਿਸਾਨ ਵਾਂਗ ਆਪਣੇ ਰੋਜ਼ਾਨਾ ਦੇ ਪਹਿਰਾਵੇ ਕੁੜਤੇ ਪਜਾਮੇ ਅਤੇ ਵਗੈਰ ਜੁਰਾਬਾਂ ਤੋਂ ਦੇਸੀ ਜੁੱਤੀ ਪਹਿਨਦੇ ਹਨ। ਜਦੋਂਕਿ ਉਨ੍ਹਾਂ ਵੱਲੋਂ ਤਿੱਖੀ ਠੰਡ ਤੋਂ ਬਚਾਅ ਲਈ ਸਿਰਫ਼ ਇੱਕ ਸਵੈਟਰ ਅਤੇ ਇੱਕ ਲੋਈ ਦੀ ਬੁੱਕਲ ਨੂੰ ਗਰਮ ਡਰੈੱਸ ਵਜੋਂ ਵਰਤਿਆ ਜਾਂਦਾ ਹੈ। ਜਿਨ੍ਹਾਂ ਦੀ ਸਾਊ ਅਤੇ ਨਿਮਰਤਾ ਭਰੀ ਤਕਰੀਰ ਵਿਚ ਕੈਪਟਨ ਸਰਕਾਰ ਦੇ ਵੱਲੋਂ ਪਾਣੀਆਂ ਨੂੰ ਬਚਾਉਣ ਲਈ ਪਾਸ ਕੀਤੇ ਮਤੇ ਅਤੇ ਸੇਮ ਦੀ ਸਮੱਸਿਆ ਦੇ ਜ਼ਿਕਰ ਤੋਂ ਇਲਾਵਾ ਅਕਾਲੀ ਸਰਕਾਰ ਦੌਰਾਨ ਹੋਈਆਂ ਧੱਕੇਸ਼ਾਹੀਆਂ ਅਤੇ ਸ਼ਗੁਨ ਸਕੀਮ, ਪੈਨਸ਼ਨ ਅਤੇ ਸਰਕਾਰੀ ਫੰਡਾਂ ਵਿਚ ਦਰਵਰਤੋਂ ਜਿਹੇ ਨੁਕਤੇ  ਮੁੱਖ ਵਿਸ਼ਾ ਹੁੰਦੇ ਹਨ।
                 ਕਾਂਗਰਸ ਉਮੀਦਵਾਰ ਵਜੋਂ ਪਿੰਡਾਂ 'ਚ ਚੋਣ ਪ੍ਰਚਾਰ ਦੇ ਪਹਿਲੇ ਹੀ ਦਿਨ ਕੜਾਕੇ ਦੀ ਠੰਡ ਪੈਣ ਬਾਰੇ ਪੁੱਛੇ ਜਾਣ 'ਤੇ ਸ. ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਕਿਹਾ ਕਿ ਤਿੱਖੀ ਠੰਡ ਅਤੇ ਸੰਘਣੇ ਕੋਹਰੇ ਨੇ ਚੋਣਾਂ ਦੀ ਗਰਮੀ ਨੂੰ ਕਾਫ਼ੀ ਰੌਚਿਕ ਜਿਹਾ ਮਾਹੌਲ ਪ੍ਰਦਾਨ ਕਰ ਦਿੱਤਾ ਹੈ।
                 ਇਸ ਵਕਾਰੀ ਹਲਕੇ ਵਿਚ ਬਾਦਲ ਖਾਨਦਾਨ ਦੇ ਤਿੰਨ ਭਰਾਵਾਂ ਵਿਚਕਾਰ ਮੁਕਾਬਲੇ ਕਰਕੇ ਆਮ ਜਨਤਾ ਨੂੰ ਐਤਕੀਂ ਠੰਡ ਦੇ ਮੌਸਮ ਵਿਚ ਤਿੰਨੇ ਭਰਾਵਾਂ ਵੱਲੋਂ ਸਿੱਧੀਆਂ-ਅਸਿੱਧੀਆਂ ਸਿਆਸੀ ਨੁਕਤਾਚੀਨੀਆਂ ਰਾਹੀਂ ਗਰਮਾਹਟ ਭਰਿਆ ਮਾਹੌਲ ਮਿਲ ਰਿਹਾ ਹੈ।