07 January 2015

ਵਿਸ਼ਵ ਇਤਿਹਾਸ ਦੇ ਮਹਾਨ ਜੇਤੂ ਨਾਲ ਪਾਕਿਸਤਾਨ ਨੇ ਕੀਤਾ ਛਲ

-ਰੰਗ-ਰੋਗਣ ਦੇ ਨਾਂਅ ’ਤੇ ਬਦਲ ਦਿੱਤਾ ਹਰੀ ਸਿੰਘ ਨਲਵਾ ਦੀ ਸਮਾਧ ਦਾ ਇਤਿਹਾਸ
-ਨਲਵਾ ਦੀਆਂ ਅੰਤਿਮ ਯਾਦਗਾਰਾਂ ’ਤੇ ਪਾਕਿਸਤਾਨੀ ਸੇਨਾ ਅਤੇ ਪੁਲਿਸ ਦਾ ਕਬਜ਼ਾ ਕਾਇਮ

                                                              ਇਕਬਾਲ  ਸਿੰਘ ਸ਼ਾਂਤ
ਡੱਬਵਾਲੀ : ਇਕ ਪਾਸੇ ਆਸਟ੍ਰੇਲੀਆ ਦੀ ਪ੍ਰਸਿਧ ਮੈਗਜ਼ੀਨ ਬਿਲੀਆਨਾਇਰ ਨੇ 14 ਜੁਲਾਈ 1014 ਦੇ ਅੰਕ ਵਿਚ ਵਿਸ਼ਵ ਇਤਿਹਾਸ ਦੇ ਅਜੇ ਤੱਕ ਦੇ ਪ੍ਰਮੁੱਖ 10 ਜੇਤੂਆਂ, ਸ੍ਰ. ਹਰੀ ਸਿੰਘ ਨਲਵਾ, ਚੰਗੇਜ਼ ਖ਼ਾਂ, ਸਿਕੰਦਰ ਮਹਾਨ, ਆਟੀਲਾ ਹੂਣ, ਜੂਲੀਅਸ ਸੀਜ਼ਰ, ਸਾਈਰਸ, ਫਰਾਂਸਿਸਕੋ ਪਿਜ਼ੈਰੋ, ਨੈਪੋਲੀਅਨ ਬੋਨਾਪਾਰਟ, ਹਾਨੀਬਲ ਬਰਕਾ ਅਤੇ ਤੈਮੂਰ ਲੰਗ ਵਿਚੋਂ ਸ੍ਰ. ਨਲਵਾ ਨੂੰ ਪਹਿਲੇ ਸਥਾਨ ’ਤੇ ਰੱਖ ਕੇ ਉਨ੍ਹਾਂ ਦੇ ਪ੍ਰਤੀ ਵਿਸ਼ੇਸ਼ ਸਨਮਾਨ ਪ੍ਰਕਟ ਕੀਤਾ ਹੈ, ਉਥੇ ਹੀ ਪਾਕਿਸਤਾਨ ਨੇ ਨਾ ਸਿਰਫ਼ ਅਜੇ ਤੱਕ ਸ੍ਰ. ਨਲਵਾ ਦੀਆਂ ਅੰਤਿਮ ਯਾਦਗਾਰਾਂ ਨੂੰ ਪੁਲਿਸ ਅਤੇ ਸੇਨਾਂ ਤੋਂ ਕਬਜ਼ਾ-ਮੁਕਤ ਹੀ ਕਰਵਾਇਆ ਹੈ, ਸਗੋਂ ਹੁਣ ਰੰਗ-ਰੋਗਣ ਦੇ ਨਾਂਅ ’ਤੇ ਸ੍ਰ. ਨਲਵਾ ਦੀ ਜਮਰੋਦ ਸਥਿਤ ਸਮਾਧ ਦੇ ਇਤਿਹਾਸ ਨਾਲ ਵੀ ਛੱਲ ਕੀਤੇ ਜਾਣ ਦੀ ਨਿੰਦਣਯੋਗ ਕਾਰਵਾਈ ਕੀਤੀ ਗਈ ਹੈ।  ਇਹ ਅਹਿਮ ਖੁਲਾਸਾ ਕਰਦਿਆਂ ਇਤਿਹਾਸਕਾਰ ਤੇ ਖੋਜਕਰਤਾ ਸ਼੍ਰੀ ਸੁਰਿੰਦਰ ਕੋਛੜ ਨੇ ਦੱਸਿਆ ਕਿ ਵਿਸ਼ਵ ਦੇ ਮਹਾਨ ਜਰਨੈਲ ਘੋਸ਼ਿਤ ਕੀਤੇ ਜਾ ਚੁਕੇ ਸ੍ਰ. ਨਲਵਾ ਦੀਆਂ ਅੰਤਿਮ ਯਾਦਗਾਰਾਂ ਵਿਚ ਸ਼ਾਮਲ ਉਨ੍ਹਾਂ ਦੀ ਪਾਕਿਸਤਾਨ ਦੇ ਸੂਬਾ ਖ਼ੈਬਰ ਪਖਤੂਣਖਵ੍ਹਾ ਦੇ ਜਮਰੋਦ ਕਿਲ੍ਹੇ ਵਿਚ ਸਥਿਤ ਸਮਾਧ ’ਤੇ ਲੰਬੇ ਸਮੇਂ ਤੋਂ ਪਾਕਿਸਤਾਨੀ ਸੇਨਾ ਦਾ ਕਬਜ਼ਾ ਕਾਇਮ ਹੈ ਅਤੇ ਦੂਸਰੀ ਗੁਜ਼ਰਾਂਵਾਲਾ ਸਥਿਤ ਅੰਤਿਮ ਯਾਦਗਾਰ ਪੁਲਿਸ ਦੇ ਕਬਜ਼ੇ ਵਿਚ ਹੈ। ਸੀ੍ਰ ਕੋਛੜ ਨੇ ਦੱਸਿਆ ਕਿ ਜਮਰੋਦ ਕਿਲ੍ਹੇ ਵਿਚ ਸ੍ਰ. ਨਲਵਾ ਦੇ 30 ਅਪ੍ਰੈਲ 1837 ਨੂੰ ਸ਼ਹੀਦ ਹੋਣ ਦੇ ਬਾਅਦ ਉਨ੍ਹਾਂ ਦਾ ਅੰਤਿਮ ਸਸਕਾਰ ਉਨ੍ਹਾਂ ਦੇ ਪਾਲਿਤ ਪੁੱਤਰ ਮਹਾਂ ਸਿੰਘ ਮੀਰਪੁਰੀਆ ਦੁਆਰਾ ਕੀਤਾ ਗਿਆ ਸੀ।ਉਨ੍ਹਾਂ ਦੀ ਦੇਹ ਦੀ ਭਸਮ ਕਿਲ੍ਹੇ ਵਿਚ ਹੀ ਇਕ ਅੰਗੀਠਾ ਤਿਆਰ ਕਰਕੇ ਉਸ ਵਿਚ ਪਾ ਦਿੱਤੀ ਗਈ।ਬਾਅਦ ਵਿਚ ਉਸੇ ਅੰਗੀਠੇ ਦੇ ਉੱਪਰ ਸਤੰਬਰ 1902 ਵਿਚ ਪਿਸ਼ਾਵਰ ਦੇ ਠੇਕੇਦਾਰ ਬਾਬੂ ਗੱਜੂ ਮੱਲ
ਦੁਆਰਾ ਸ੍ਰ. ਨਲਵਾ ਦੀ ਖੂਸਸੂਰਤ ਸਮਾਧ ਉਸਾਰੀ ਗਈ। ਸ੍ਰੀ ਕੋਛੜ ਦੇ ਅਨੁਸਾਰ ਇਸ ਸਮਾਧ ’ਤੇ ਲੱਗੀ ਪੱਥਰ ਦੀ ਸਿਲ੍ਹ ’ਤੇ ਸ਼ਾਹਮੁਖੀ, ਗੁਰਮੁਖੀ ਅਤੇ ਅੰਗਰੇਜ਼ੀ ਵਿਚ ਸਮਾਧ ਦੇ ਨਿਰਮਾਣ ਸੰਬੰਧੀ ਸਹੀ ਜਾਣਕਾਰੀ ਕੁਝ ਸਮੇਂ ਪਹਿਲਾਂ ਤੱਕ ਸਹੀ ਢੰਗ ਨਾਲ ਦਰਜ਼ ਸੀ, ਪਰ ਬਾਅਦ ਵਿਚ ਅਚਾਨਕ ਇਥੇ ਕੀਤੀ ਰੰਗ-ਰੰਗਾਈ ਦੇ ਦੌਰਾਨ ਸਮਾਧ ਦੇ ਨਿਰਮਾਣ ਦਾ ਵਰ੍ਹਾ ਸਤੰਬਰ 1902 ਤੋਂ ਬਦਲ ਕੇ ਸਤੰਬਰ 1892 ਕਰ ਦਿੱਤਾ ਗਿਆ।ਜਿਸ ਨਾਲ ਇਸ ਸਮਾਰਕ ਦੇ ਇਤਿਹਾਸ ਦੀ ਸਚਾਈ ’ਤੇ ਕਦੇ ਵੀ ਪ੍ਰਸ਼ਨ-ਚਿੰਨ੍ਹ ਲੱਗ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਕਿਲ੍ਹਾ ਜਮਰੋਦ ਮੌਜੂਦਾ ਸਮੇਂ ਪਿਸ਼ਾਵਰ ਤੋਂ 18-19 ਕਿਲੋਮੀਟਰ ਦੀ ਦੂਰੀ ’ਤੇ ਖ਼ੈਬਰ ਪਾਸ ਗੇਟ (ਬਾਬ-ਏ-ਖ਼ੈਬਰ) ਦੇ ਬਿਲਕੁਲ ਨਾਲ ਮੌਜੂਦ ਹੈ। 
ਸ੍ਰੀ ਕੋਛੜ ਦੇ ਅਨੁਸਾਰ ਸ੍ਰ. ਨਲਵਾ ਦੇ ਸਸਕਾਰ ਦੇ ਕੁਝ ਦਿਨ ਬਾਅਦ ਉਨ੍ਹਾਂ ਦੇ ਵੱਡੇ ਸਪੁੱਤਰ ਸ੍ਰ. ਜਵਾਹਰ ਸਿੰਘ ਨਲਵਾ ਨੇ ਜਮਰੋਦ ਤੋਂ ਆਪਣੇ ਪਿਤਾ ਦੀ ਦੇਹ ਦੀ ਭਸਮ ਗੁਜ਼ਰਾਂਵਾਲਾ ਲਿਆ ਕੇ ਉਨ੍ਹਾਂ ਦੀ ਸਮਾਧ ਸ੍ਰ. ਨਲਵਾ ਦੇ ਬਾਗ਼ ਵਿਚਲੀ ਬਾਰਾਂਦਰੀ ਦੇ ਸਾਹਮਣੇ ਬਣਵਾ ਦਿੱਤੀ। ਉਨ੍ਹਾਂ ਦੱਸਿਆ ਕਿ ਗੁਜ਼ਰਾਂਵਾਲਾ ਦੀ ਜੀ.ਟੀ. ਰੋਡ ’ਤੇ ਸ਼ੇਰਾਂਵਾਲਾ ਬਾਗ਼ ਤੋਂ ਇਕ-ਢੇਡ ਕਿਲੋਮੀਟਰ ਦੀ ਦੂਰੀ ’ਤੇ ਮੁੱਖ ਸੜਕ ’ਤੇ ਸ੍ਰ. ਨਲਵਾ ਦੀ ਸਮਾਧ ਅੱਜ ਵੀ ਚੰਗੀ ਅਤੇ ਤਸਲੀਬਖ਼ਸ਼ ਹਾਲਤ ਵਿਚ ਮੌਜੂਦ ਹੈ, ਪਰੰਤੂ ਪਿਛਲੇ ਕਈ ਵਰ੍ਹਿਆਂ ਤੋਂ ਇਸ ਨੂੰ ਪੁਲਿਸ ਥਾਣਾ ਨਵੀਂ ਸਬਜ਼ੀ ਤੇ ਫ਼ਰੂਟ ਮੰਡੀ ਦੇ ਤੌਰ ’ਤੇ ਇਸਤੇਮਾਲ ਕੀਤਾ ਜਾ ਰਿਹਾ ਹੈ। ਇਹ ਪੁਲਿਸ ਥਾਣਾ ਖ਼ਿਆਲੀ ਸਰਕਲ ਦੇ ਅਧੀਨ ਆਉਂਦਾ ਹੈ। ਸ੍ਰੀ ਕੋਛੜ ਨੇ ਕਿਹਾ ਕਿ ਪਾਕਿਸਤਾਨ ਸਰਕਾਰ ਅਤੇ ਮਹਿਕਮਾ ਅੌਕਾਫ਼ ਨੂੰ ਸ੍ਰ. ਨਲਵਾ ਦੀਆਂ ਅੰਤਿਮ ਯਾਦਗਾਰਾਂ ਨੂੰ ਕਬਜ਼ਾ ਮੁਕਤ ਕਰਵਾ ਕੇ ਜਮਰੋਦ ਸਥਿਤ ਸਮਾਧ ’ਤੇ ਇਤਿਹਾਸ ਵਿਚ ਕੀਤੀ ਗਈ ਫੇਰ-ਬਦਲ ਨੂੰ ਤੁਰੰਤ ਦੁਰਸਤ ਕਰਵਾਉਣਾ ਚਾਹੀਦਾ ਹੈ। ਉਨ੍ਹਾਂ ਕਿਹਾ ਕਿ ਇਸ ਮਾਮਲੇ ਵਿਚ ਦੇਸ਼ ਦੀਆਂ ਪ੍ਰ੍ਰਮੁੱਖ ਸਿੱਖ ਸੰਸਥਾਵਾਂ ਅਤੇ ਪੰਜਾਬ ਸਰਕਾਰ ਨੂੰ ਵੀ ਪਾਕਿਸਤਾਨ ਨਾਲ ਗਲਬਾਤ ਕਰਨੀ ਚਾਹੀਦੀ ਹੈ।





06 January 2015

ਕੌਮਾਂਤਰੀ ਹੱਦਾਂ ’ਤੇ ਜ਼ਿੰਦਰੇ ਲਾ ਕੇ ਵੀ ਬੰਦ ਹੁੰਦਾ ਨੀਂ ਦਿਸਦਾ ਹਰੀਪੁਰੇ ਤੋਂ ਖੁੱਲ੍ਹਦਾ ਨਸ਼ਿਆਂ ਦਾ ‘ਬੂਹਾ’

* ਅਮਲ ਦੀ ਓਟ ’ਚ ਅੰਗਹੀਣ, ਨੇਤਰਹੀਣ ਤੇ ਗਰਭਵਤੀ ਅੌਰਤਾਂ ਵੀ ਭੁੱਕੀ-ਪੋਸਤ ਦੇ ਕਾਰੋਬਾਰ ’ਚ ਖੁੱਭੇ- 
* ਹੁਣ ਅਮਲੀਆਂ ਨਾਲੋਂ ਵੱਧ ਭੁਕੀ ਸਪਲਾਈ ਕਰਨ ਵਾਲੇ ਪੁੱਜਦੇ ਹਨ ਹਰੀਪੁਰੇ-
* ਅਕਾਲੀ ਆਗੂ ਦੀਆਂ ਬੱਸਾਂ ’ਤੇ ਬੇਝਿਜਕ ਅਮਲੀ ਪੰਜਾਬ ’ਚ ਖੁੱਲ੍ਹੇਆਮ ਲਿਆਉਂਦੇ ਪੋਸਤ- 
* ਬੱਸਾਂ ’ਚ ਪੋਸਤ ਦੀ 50 ਰੁਪਏ ਪ੍ਰਤੀ ਕਿਲੋ ਫੀਸ ਲੈਂਦੇ ਹਨ ਕੰਡਕਟਰ-

ਇਕਬਾਲ ਸਿੰਘ ਸ਼ਾਂਤ
         ਲੰਬੀ : ਹਰੀਪੁਰੇ ਤੋਂ ਲੰਬੀ ਹਲਕੇ ’ਚ ਖੁੱਲ੍ਹਦਾ ਨਸ਼ਿਆਂ ਦਾ ‘ਬੂਹਾ’ ਪਾਕਿ ਦੀ ਹੱਦ ’ਤੇ ‘ਜ਼ਿੰਦਰਾ’ ਲਾ ਕੇ ਵੀ ਬੰਦ ਹੁੰਦਾ ਨਹੀਂ ਦਿਸਦਾ। ਸੂਬੇ ਵਿਚ ‘ਕਿਲੋ-ਕਿਲੋ ਪੋੋਸਤ’ ਲਿਆਉਣ ਦੀ ਸਿਆਸੀ ਖੁੱਲ੍ਹ ਨੇ ਪੰਜਾਬੀਅਤ ਦਾ ਅਜਿਹਾ ਭੱਠਾ ਬਿਠਾਇਆ ਕਿ ਪੰਜਾਬ ਵਿਚ ਅੰਗਹੀਣ,  ਨੇਤਰਹੀਣ, ਬਜ਼ੁਰਗ, ਅੌਰਤਾਂ ਅਤੇ ਨੌਜਵਾਨਾਂ, ਡਰਾਈਵਰਾਂ-ਕੰਡਕਟਰਾਂ ਤੋਂ ਇਲਾਵਾ ਗਰਭਵਤੀ ਅੌਰਤਾਂ ਵੀ ਭੁੱਕੀ-ਪੋਸਤ ਦੇ ਨਸ਼ੇ ਦੀ ਮਾਰ ਹੇਠ ਹਨ। ਇਹ ਲੋਕ ਖੁਦ ਤਾਂ ਨਸ਼ੇ ਕਰਦੇ ਹੀ ਹਨ, ਹੋਰਾਂ ਨੂੰ ਵੇਚ ਨੂੰ ਆਪਣੇ ਟੱਬਰ ਪਾਲਦੇ ਹਨ। ਰਾਜਸਥਾਨ ਤੋਂ ਵਗੈਰ ਪਰਮਿਟ ਵਾਲੀ ਭੁੱਕੀ-ਪੋਸਤ ਦੀ ਤਸਕਰੀ ਦਾ ਇਹ ‘ਰੁਜ਼ਗਾਰ’ ਅਨਪੜ੍ਹ ਅਤੇ ਵਿਹਲੜ ਕਿਸਮ ਦੇ ਲੋਕਾਂ ਲਈ ਰੋਟੀ ਦਾ ਜੁਗਾੜ ਬਣਿਆ ਹੋਇਆ ਹੈ। ਪੰਜਾਬੀਆਂ ਦੇ ਹੱਡਾਂ ’ਚ ਵਸੇ ਨਸ਼ਿਆਂ ਦੀਆਂ ਮਾਨਸਿਕ, ਸਰੀਰਕ ਅਤੇ ਆਰਥਿਕ ਤੌਰ ’ਤੇ ਜੜ੍ਹਾਂ ਇੰਨੀਆਂ ਡੂੰਘੀਆਂ ਹੋ ਚੁੱਕੀਆਂ ਹਨ ਕਿ ਜਿਨ੍ਹਾਂ ’ਤੇ ਕਾਬੂ ਪਾਉਣਾ ਖਾਲਾ ਜੀ ਦਾ ਵਾੜਾ ਨਹੀਂ ਜਾਪਦਾ।
ਕੌਮਾਂਤਰੀ ਹੱਦਾਂ ਵੱਲ ਰੁੱਖ ਕਰਕੇ ਬਾਹਰੀ ਨਸ਼ਿਆਂ ਉਤੇ ਨੱਥ ਪੁਆਉਣ ਲੲਹੀ ਧਰਨੇ ਲਾਉਣ ਵਾਲੀ ਅਕਾਲੀ ਸਰਕਾਰ ਉਹ ਹੁਣ ਤੱਕ ਸੂਬੇ ਨੂੰ ਪੋਸਤ ਜਿਹੇ ਜ਼ਮੀਨੀ ਨਸ਼ੇ ਦੇ ਕਲਾਵੇ ਵਿਚੋਂ ਕੱਢਣ ’ਤੋਂ ਅਸਮਰਥ ਰਹੀ ਹੈ। ਅੱਜ ਵੀ ਜਿੱਥੇ ਨਸ਼ਿਆਂ ਖਿਲਾਫ਼ ਸਮੁੱਚੀ ਅਕਾਲੀ ਸਰਕਾਰ ਕੌਮਾਂਤਰੀ ਹੱਦਾਂ ’ਤੇ ਬੀ.ਐਸ.ਐਫ਼ ਨੂੰ ਜਾਗਰੂਕ ਕਰਨ ਲਈ ਧਰਨੇ ਲਾਈ ਬੈਠੀ ਸੀ। ਉਥੇ ਦੂਜੇ ਪਾਸੇ ਗੁਆਂਢੀ ਸੂਬੇ ਰਾਜਸਥਾਨ ਵਿਚਲੇ ਹਰੀਪੁਰੇ ਦੇ ਪੋਸਤ ਠੇਕੇ ਤੋਂ ਅਮਲੀ ਰੂਪੀ ਨਸ਼ੇ ਦੇ ਸੌਦਾਗਰ ਭੁੱਕੀ-ਪੋਸਤ ਦੀਆਂ ਕਿਲੋ-ਕਿਲੋ ਦੀਆਂ ਨਿੱਕੀਆਂ ਖੇਪਾਂ ਸਮੇਤ ਨਿੱਜੀ ਬੱਸਾਂ ਉਤੇ ਬਿਨ੍ਹਾਂ ਕਿਸੇ ਡਰ-ਡੁੱਕਰ ਦੇ ਲੰਬੀ ਅਤੇ ਮਲੋਟ ਪੁੱਜ ਰਹੇ ਸਨ। ਜਿਨ੍ਹਾਂ ਵਿਚੋਂ ਕੁਝ ਬੱਸਾਂ ਪੰਜਾਬ ਖੇਤਰ ਦੇ ਇੱਕ ਅਕਾਲੀ ਆਗੂ ਦੀਆਂ ਵੀ ਹਨ, ਜਿਹੜਾ ਨਿੱਤ ‘ਸਰਕਾਰ’ ਦੇ ਨਾਲ ਬੈਠਾ ਵੇਖਿਆ ਜਾਂਦਾ ਹੈ। ਪੋਸਤ ਦੀ ਖੁੱਲ੍ਹੇਆਮ ਆਮਦ ਨਿੱਤ ਦਾ ਵਰਤਾਰਾ ਹੈ। ਇਹ ਬੱਸਾਂ ਰੋਜ਼ਾਨਾ ਹਰੀਪੁਰੇ ਤੋਂ ਬਿਨ੍ਹਾਂ ਪਰਮਿਟ ਪੋਸਤ ਲਿਆਉਂਦੇ ਅਮਲੀਆਂ ਨਾਲ ਲੱਦੀਆਂ ਆਉਂਦੀਆਂ ਹਨ। ਇਨ੍ਹਾਂ ਬੱਸਾਂ ਵਿਚ ਅਮਲੀਆਂ ਨੂੰ ਬੈਠਣ ਦੀ ਇਹ ਸੌਖ ਹੈ ਕਿ ਇਨ੍ਹਾਂ ਬੱਸਾਂ ਦੀ ਪੰਜਾਬ ਅੰਦਰ ਕਦੇ ਵੀ ਪੁਲੀਸ ਵੱਲੋਂ ਚੈਕਿੰਗ ਨਹੀਂ ਕੀਤੀ ਜਾਂਦੀ। ਸੂਤਰ ਤਾਂ ਇੱਥੋਂ ਤੱਕ ਆਖਦੇ ਹਨ ਕਿ ਬੱਸਾਂ ’ਚ ਟਿਕਟ ਦੇ ਇਲਾਵਾ ਪੋਸਤ ਲਿਆਉਣ ਵਾਲਿਆਂ ਤੋਂ ਕੰਡਕਟਰ ਵੱਲੋਂ ਖਾਕੀ ਤੰਤਰ ਲਈ ਕਥਿਤ ਤੌਰ ’ਤੇ 50 ਰੁਪਏ ਪ੍ਰਤੀ ਕਿੱਲੋ ਪੋਸਤ ਦੇ ਉਗਰਾਹੇ ਜਾਂਦੇ ਹਨ। ਇਨ੍ਹਾਂ ਬੱਸਾਂ ’ਚ ਇੱਕ ਕਿਲੋ ਤੋਂ ਲੈ ਕੇ ਦਸ ਕਿੱਲੋ ਤੱਕ ਪੋਸਤ ਲਿਆਉਣ ਦੀ ਬੇਝਿਜਕ ਸਹੂਲਤ ਹੈ। ਸੂਤਰ ਆਖਦੇ ਹਨ ਕਿ ਜੇਕਰ ਕੋਈ ਭੁੱਲਿਆ-ਭਟਕਿਆ ਪੁਲੀਸ ਵਾਲਾ ਕਦੇ-ਕਤਾਈਂ ਪੁੱਛਣ ਦੀ ਹਿਮਾਕਤ ਕਰ ਵੀ ਲਵੇ ਤਾਂ ਅਮਲੀਆਂ ’ਚ ਕਾਫ਼ੀ ਪ੍ਰਸਿੱਧ ਬੱਸ ਕੰਡਕਟਰ ਮੌਕੇ ’ਤੇ ਅਕਾਲੀ ਆਗੂ ਨਾਲ ਫੋਨ ਉੱਪਰ ਗੱਲ ਕਰਵਾ ਕੇ ਦਬਕਾ ਮਰਵਾ ਦਿੰਦਾ ਹੈ। ਇਹ ਵੀ ਪਤਾ ਲੱਗਿਆ ਹੈ ਕਿ ਕੰਦੂਖੇੜਾ ਪੁਲੀਸ ਚੈੱਕ ਪੋਸਟ ਮੂਹਰੋਂ ਲੰਘਦੀਆਂ ਬੱਸਾਂ ਜਰੀਏ ਪੋਸਤ ਸਪਲਾਈ ਵਿਚ ਕਥਿਤ ਤੌਰ ’ਤੇ ਡਰਾਈਵਰ-ਕੰਡਕਟਰ ਵੀ ਖੂਬ ਹੱਥ ਰੰਗਦੇ ਹਨ। ਪੋਸਤ ਦੇ ਅਮਲ ਇਨ੍ਹਾਂ ਗਰਮੀ ਹੈ ਕਿ ਕੜਾਕੇ ਦੀ ਸਰਦੀ ਵਿਚ ਅਮਲੀ ਬੱਸਾਂ ਦੇ ਉੱਪਰ ਤੱਕ ਬੈਠ ਕੇ ਲੰਬੀ ਪੁੱਜਦੇ ਹਨ। ਇਸੇ ਬਾਰੇ ਪਿੰਡ ਰੋੜਾਂਵਾਲੀ ’ਚ ਖਿੱਚੀ ਇੱਕ ਫੋਟੋ ਕਾਫ਼ੀ ਦਿਨ ਸੋਸ਼ਲ ਮੀਡੀਆ ’ਚ ਕਾਫ਼ੀ ਚਰਚਾ ਵਿਚ ਰਹੀ ਹੈ।

ਲੰਬੀ ਹਲਕੇ ਦੇ ਪਿੰਡ ਕੰਦੂਖੇੜਾ ਦੇ ਨੇੜੇ ਰਾਜਸਥਾਨ ਦੇ ਸਰਹੱਦੀ ਪਿੰਡ ਹਰੀਪੁਰਾ ਦੀ ਜੂਹ ’ਚ ਸਥਿਤ ਪੋਸਤ ਦੇ ਠੇਕੇ ’ਤੇ  ਪੱੁਜੇ ਪੱਤਰਕਾਰਾਂ ਦੀ ਹੈਰਾਨੀ ਦਾ ਠਿਕਾਣਾ ਨਾ ਰਿਹਾ ਜਦੋਂ ਅਮਲੀਆਂ ’ਚ ਪੰਜਾਬ ਦੇ ਵੱਖ-ਵੱਖ ਪਿੰਡਾਂ ਦੇ  ਅੰਗਹੀਣ,  ਨੇਤਰਹੀਣ, ਬਜ਼ੁਰਗਾਂ, ਅੌਰਤਾਂ ਦੇ ਇਲਾਵਾ ਗਰਭਵਤੀ ਅੌਰਤ ਅਤੇ ਨੌਜਵਾਨ ਲੜਕੀ ਵੀ ਭੁੱਕੀ ਲੈਣ ਲਈ ਉਥੇ ਪੁੱਜੀਆਂ ਹੋਈਆਂ ਸਨ। ਪੋਸਤ ਠੇਕੇ ਦੇ ਨੇੜੇ 4 ਅੌਰਤਾਂ ਦੀਆਂ ਟੋਲੀ ’ਚ ਬੈਠੀ ਕਰੀਬ 6 ਮਹੀਨੇ ਦੀ ਗਰਭਵਤੀ ਅੌਰਤ ਅਤੇ ਨੌਜਵਾਨ ਲੜਕੀ ਸੀ। ਜਿਨ੍ਹਾਂ ਨੇ ਪਹਿਲਾਂ ਤਾਂ ਆਪਣੇ ਅਮਲੀ ਭਰਾਵਾਂ ਲਈ ਪੋਸਤ ਲਿਜਾਣ ਦੀ ਗੱਲ ਆਖੀ ਪਰ ਫਿਰ ਕੁਝ ਦੇਰ ਫੁੱਟ ਪਈਆਂ ਕਿ ‘‘ਕੀ ਦੱਸੀਏ, ਪਾਪੀ ਪੇਟ ਇਹ ਕੰਮ ਕਰਵਾਉਂਦਾ ਹੈ,’’ ਪੋਸਤ ਠੇਕੇ ਵੱਲ ਹੱਥ ਕਰਕੇ ਗਰਭਵਤੀ ਅੌਰਤ ਨੇ ਭੈੜੀ ਜਿਹੀ ਕੱਢ ਕੇ ਬੋਲੀ, ਇਹ ਕੰਜਰ ਤਾਂ ਉਨ੍ਹਾਂ ਲੜਕੀਆਂ ਅਤੇ ਅੌਰਤਾਂ ਨੂੰ ਪੋਸਤ ਦਿੰਦੇ ਜਿਹੜੀ ‘ਖ਼ਰਾਬ’ ਹੋਣ ਲਈ ਰਾਜੀ ਹੋ ਜਾਵੇ।’’
ਸੌ ਕੁ ਫੁੱਟ ਦੂਰ ਸੜਕ ਕਿਨਾਰੇ ਅੱਗ ਸੇਕਦੇ ਪਿੰਡ ਪਿਉਰੀ ਦੇ ਅੰਗਹੀਣ ਵਿਅਕਤੀ ਸੀਰੇ ਨੇ ਆਖਿਆ ਕਿ ,ਉਹ ਬਹੁਤ ਸਾਲਾਂ ਤੋਂ ਖੁਦ ਪੋਸਤ ਖਾਣ ਦਾ ਆਦੀ ਹੈ ਅਤੇ ਹਰੀਪੁਰੇ ਠੇਕੇ ’ਤੇ ਪੋਸਤ ਪੰਜਾਬ ’ਚ ਲਿਜਾ ਕੇ ਆਪਣੇ ਵੇਚਦਾ ਹੈ। ਜਿਸ ਨਾਲ ਉਸਦਾ ਪਰਿਵਾਰ ਪਲਦਾ ਹੈ। ਉਸਨੇ ਆਖਿਆ ਕਿ ਹੁਣ ਅਮਲਪੁਣਾ ਉਸਦੇ ਲਈ ਰੁਜ਼ਗਾਰ ਬਣ ਗਿਆ ਹੈ। ਉਹ ਹਫ਼ਤੇ ’ਚ 5-6 ਗੇੜੇ ਲਾਉਂਦਾ ਹੈ। ਉਸਨੇ ਕਿਹਾ ਕਿ ਸਰਕਾਰ ਦੋ ਰੁਪਏ ਰੋਜ਼ਾਨਾ ਕਮਾਈ ਦਾ ਜੁਗਾੜ ਕਰ ਦੇਵੇ ਤਾਂ ਉਹ ਨਸ਼ਾ ਸਪਲਾਈ ਦਾ ਧੰਦਾ ਛੱਡ ਦੇਵੇਗਾ। ਇਸਦੇ ਨਾਲ ਬੈਠੇ ਅੱਗ ਸੇਕਦੇ ਜ਼ਿਲ੍ਹਾ ਮੁਕਤਸਰ ਦੇ ਇੱਕ ਨੇਤਰਹੀਣ ਵਿਅਕਤੀ ਨੇ ਆਖਿਆ ਕਿ 12 ਸਾਲ ਪਹਿਲਾਂ ਪੋਸਤ ਕਰਕੇ ਉਸਦੀ ਅੱਖਾਂ ਦੀ ਰੌਸ਼ਨੀ ਚਲੀ ਗਈ ਸੀ। ਨੀਮ-ਹਕੀਮਾਂ ਦੇ ਕਹਿਣ ’ਤੇ ਮੁੜ ਪੋਸਤ ਖਾਣ ਲੱਗਿਆ। ਹੁਣ ਉਹ ਆਪਣਾ ਅਮਲ ਪੂਰਾ ਕਰਨ ਦੇ ਇਲਾਵਾ ਹਰੀਪੁਰੇ ਠੇਕੇ ਤੋਂ ਰੋਜ਼ਾਨਾ ਕਿਲੋ-ਦੋ ਕਿੱਲੋ ਪੋਸਤ ਕੇ ਮੁਨਾਫ਼ੇ ਨਾਲ ਵੇਚ ਦਿੰਦਾ ਹੈ। ਇਸੇ ਤਰ੍ਹਾਂ ਲੰਬੀ ਹਲਕੇ ਦੇ ਪਿੰਡ ਫਤੂਹੀਖੇੜਾ ਦੇ ਇੱਕ ਅੰਗਹੀਣ ਨੌਜਵਾਨ ਨੇ ਵੀ ਹਰੀਪੁਰੇ ਤੋਂ ਪੋਸਤ ਲਿਜਾ ਕੇ ਵੇਚਣ ਦੀ ਗੱਲ ਕਬੂਲੀ। ਉਨ੍ਹਾਂ ਬੱਸਾਂ ਵਾਲਿਆਂ ’ਤੇ ਗੁੱਸਾ ਕੱਢਦਿਆਂ ਕਿਹਾ ਕਿ ਪੰਜਾਬ ਸਰਕਾਰ ਨੇ ਬੱਸਾਂ ’ਚ ਅੰਗਹੀਣਾਂ ਨੂੰ ਅੱਧੀ ਟਿਕਟ ਮਾਫ਼ ਕੀਤੀ ਹੋਈ ਹੈ ਪਰ ਲੰਬੀ-ਮਲੋਟ ਲਿਜਾਣ ਵਾਲੀ ਬੱਸਾਂ ਦੇ ਡਰਾਈਵਰ-ਕੰਡਕਟਰ ਦੋ ਨੰਬਰ ਦਾ ਕੰਮ ਹੋਣ ਧੱਕੇ ਨਾਲ ਪੂਰੀ ਟਿਕਟ ਕੱਟਦੇ ਹਨ। ਲਗਪਗ 50 ਸਾਲਾ ਬਜ਼ੁਰਗ ਨੇ ਆਖਿਆ ਕਿ ਇਸ ਠੇਕੇ ਤੋਂ ਬਿਨ੍ਹਾਂ ਪਰਮਿਟ ਤੋਂ ਪੋਸਤ 2 ਹਜ਼ਾਰ ਤੋਂ 25 ਸੌ ਰੁਪਏ ਕਿਲੋ ਮਿਲਦੀ ਹੈ ਉਹਦੇ ਲਈ ਵੀ ਠੇਕੇ ਵਾਲੇ ਮਿੰਨਤਾਂ-ਤਰਲੇ ਕੱਢਵਾਉਂਦੇ ਹਨ। ਇਸੇ ਤਰ੍ਹਾਂ ਦਰਜਨ ਭਰ ਅੌਰਤਾਂ ਅਤੇ 50-60 ਮਰਦ ਵੱਖ-ਵੱਖ ਟੋਲੀਆਂ ਬਣਾ ਕੇ ਪੋਸਤ ਲੈਣ ਲਈ ਖੜ੍ਹੇ ਸਨ। 
ਹਰੀਪੁਰਾ ਪੋਸਤ ਠੇਕੇ ਅੰਦਰ ਲੋਹੇ ਦੇ ਵੱਡੇ ਟੱਬ ਅਤੇ ਖੁਰਲੀਆਂ ਵਿਚ ਪੋਸਤ ਦੀਆਂ ਸੈਂਕੜੇ ਥੈਲੀਆਂ ਪਈਆਂ ਸਨ। ਪੋਸਤ ਠੇਕੇ ਦੇ ਕਾਰਿੰਦਿਆਂ ਨੇ ਦੱਸਿਆ ਕਿ ਪਰਮਿਟ ’ਤੇ 500 ਰੁਪਏ ਪ੍ਰਤੀ ਕਿਲੋ ਪੋਸਤ ਵੇਚੀ ਜਾਂਦੀ ਹੈ। ਉਨ੍ਹਾਂ ਕਿਹਾ ਕਿ ਰਾਜਸਥਾਨ ਖੇਤਰ ਦੇ ਦਰਜਨ ਭਰ ਪਿੰਡਾਂ ਦੇ ਸੈਂਕੜੇ ਪਰਮਿਟ ਇਸ ਠੇਕੇ ਨਾਲ ਜੁੜੇ ਹੋਏ ਹਨ। ਜਿਨ੍ਹਾਂ ਨੂੰ ਇੱਕ ਵਾਰ ’ਚ ਸਿਰਫ਼ ਇੱਕ ਕਿਲੋ ਪੋਸਤ ਹੀ ਦਿੱਤੀ ਜਾਂਦੀ ਹੈ। ਜਦੋਂ ਉਨ੍ਹਾਂ ਤੋਂ ਪੰਜਾਬ ਦੇ ਅਮਲੀਆਂ ਨੂੰ ਬਿਨ੍ਹਾਂ ਪਰਮਿਟ ਤੋਂ ਪੋਸਤ ਦੇਣ ਬਾਰੇ ਪੁੱਛਿਆ ਤਾਂ ਉਹ ਪਾਸਾ ਵੱਟ ਗਏ। ਸੂਤਰਾਂ ਦਾ ਕਹਿਣਾ ਹੈ ਕਿ ਘੱਟ ਵਿਕਰੀ ਵਾਲਿਆਂ ਠੇਕਿਆਂ ਤੋਂ ਸਰਕਾਰੀ ਕੋਟੇ ਦੀ ਪੋਸਤ ਹਰੀਪੁਰਾ ਠੇਕੇ ਜਰੀਏ ਪੰਜਾਬ ਨੂੰ ਬਰਬਾਦ ਕਰਨ ਲਈ ਬਿਨ੍ਹਾਂ ਪਰਮਿਟ ਦੇ ਵੇਚੀ ਜਾਂਦੀ ਹੈ। 
ਪੋਸਤ ਦੀ ਇਹ ਅਲਾਮਤ ਹੁਣ ਨਸ਼ੇ ਦੀ ਭੱਲ ਤੋਂ ਅਗਾਂਹ ਵਧ ਕੇ ਹੁਣ ਰੁਜ਼ਗਾਰ ਦਾ ਸੋਮਾ ਬਣ ਚੁੱਕੀ ਹੈ ਅਜਿਹੇ ਵਿਚ ਸਰਕਾਰ ਭਾਵੇਂ ਕੌਮਾਂਤਰੀ ਸਰਹੱਦਾਂ ’ਤੇ ਲੱਖ ਧਰਨੇ ਲਾ ਲਵੇ ਪਰ ਚਿੱਟੇ ਕੱਪੜਿਆਂ ’ਚ ਇਸ ਸਮਾਜ ਵਿਰੋਧੀ ਕਾਰੋਬਾਰ ਨੂੰ ਉਤਸਾਹਤ ਕਰਨ ਵਾਲਿਆਂ ’ਤੇ ਨਕੇਲ ਕਸੇ ਵਗੈਰ ਇਸਦਾ ਹੱਲ ਸੰਭਵ ਨਹੀਂ। 
 ਪੜਤਾਲ ਕਰਵਾ ਕੇ ਸਖ਼ਤ ਕਾਰਵਾਈ ਕਰਾਂਗੇ
ਹਰੀਪੁਰੇ ਤੋਂ ਨਿੱਜੀ ਬੱਸਾਂ ਰਾਹੀਂ ਖੁੱਲ੍ਹੇਆਮ ਪੰਜਾਬ ਅੰਦਰ ਆਉਂਦੇ ਭੁੱਕੀ ਪੋਸਤ ਬਾਰੇ ਬਠਿੰਡਾ ਦੇ ਡੀ.ਆਈ.ਜੀ. ਰੇਂਜ ਸ੍ਰੀ ਅਮਰ ਸਿੰਘ ਚਾਹਲ ਨੇ ਆਖਿਆ ਕਿ ਹੁਣ ਤੱਕ ਇਹ ਮਾਮਲਾ ਉਨ੍ਹਾਂ ਦੇ ਧਿਆਨ ਵਿਚ ਨਹੀਂ ਸੀ, ਉਹ ਪੜਤਾਲ ਕਰਵਾ ਕੇ ਸਖ਼ਤ ਕਾਰਵਾਈ ਕਰਨਗੇ।

04 January 2015

ਸੁਹਿਰਦ ਲੋਕ ਆਗੂ ਦਰਵੇਸ਼ ਸਿਆਸਤਦਾਨ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ

 ਸਿਆਸੀ ਤਾਣੇ-ਬਾਣੇ ਵਿਚ ਮੂੰਹ ਦੇ ਮਿੱਠੇ ਰਾਜਨੇਤਾ ਤਾਂ ਵੇਖਣ ਨੂੰ ਬਹੁਤ ਮਿਲਦੇ ਹਨ ਪਰ ਦਿਲ ਦਾ ਮਿੱਠਾ, ਕਹਿਣੀ ਦਾ ਸੱਚਾ,
ਕਰਨੀ ਦਾ ਪੱਕਾ ਅਤੇ ਸਾਦਗੀ ਨਾਲ ਭਰਿਆ ‘ਲੋਕ ਨੇਤਾ’ ਅਖਵਾਉਣ ਦਾ ਮਾਣ ਸਿਰਫ਼ ਫਰੀਦਕੋਟ ਲੋਕਸਭਾ ਹਲਕੇ ਤੋਂ ਮੈਂਬਰ ਪਾਰਲੀਮੈਂਟ ਰਹੇ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ ਦੇ ਹਿੱਸੇ ਹੀ ਆਉਂਦਾ ਹੈ। 
ਸੰਨ 1937 ਵਿਚ ਪਿੰਡ ਖੁੱਡੀਆਂ, (ਲੰਬੀ) ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਵਿਖੇ ਇੱਕ ਸਧਾਰਨ ਕਿਸਾਨ ਘਰਾਣੇ ਵਿਚ ਸ. ਫੁੰਮਣ ਸਿੰਘ ਦੇ ਘਰ ਜਨਮੇ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ ਦਾ ਜੀਵਨ ਬਹੁਤ ਹੀ ਸਾਦਗੀ, ਸੁਭਾਅ ਵਿਚ ਤੇਜ਼ੀ ਦੇ ਨਾਲ-ਨਾਲ ਮਿਠਾਸ ਅਤੇ ਮਜ਼ਾਕੀਆਪਨ ਅਤੇ ਸੰਜੀਦਗੀ ਨਾਲ ਭਰਿਆ ਹੋਇਆ ਸੀ। ਮਿਲਵਰਤਣ ਅਤੇ ਆਮ ਲੋਕਾਂ ਨਾਲ ਘੁਲ-ਮਿਲ ਕੇ ਰਹਿਣਾ ਉਨ੍ਹਾਂ ਦੀ ਆਦਤ ਵਿਚ ਸ਼ਾਮਿਲ ਸੀ। ਵੱਡੀ ਤੋਂ ਵੱਡੀ ਸ਼ਖਸੀਅਤ ਦੇ ਮੂੰਹ ’ਤੇ ਵੀ ਸੱਚੀ ਗੱਲ ਮੂੰਹ ’ਤੇ ਆਖਣ ਦਾ ਠਰ੍ਹੰਮਾ ਰੱਖਦੇ ਇਸ ਆਗੂ ਨੇ ਆਪਣੀ ਮੁੱਢਲੀ ਵਿਦਿਆ ਪਿੰਡ ਖੁੱਡੀਆਂ ਤੋਂ ਪ੍ਰਾਪਤ ਕਰਕੇ ਮੈਟ੍ਰਿਕ ਹਾਈ ਸਕੂਲ ਲੰਬੀ ਤੋਂ ਪਾਸ ਕੀਤੀ। ਖਾਲਸਾ ਕਾਲਜ ਅੰਮ੍ਰਿਤਸਰ ਵਿਖੇ ਦਾਖਲਾ ਲੈ ਲਿਆ। ਉਥੇ ਨੌਜਵਾਨੀ ਦੀ ਉਮਰ ਵਿਚ ਆਪ ਨੂੰ ਲੋਕ ਸੇਵਾ ਦੀ ਚੇਟਕ ਲੱਗ ਗਈ ਅਤੇ ਆਪ ਅਕਾਲੀ ਸਿਆਸਤ ਵਿਚ ਸਰਗਰਮੀ ਨਾਲ ਹਿੱਸਾ ਲੈਣ ਲੱਗੇ। ਬੀ.ਏ.ਪਾਸ ਕਰਨ ਉਪਰੰਤ ਆਪ ਪਿੰਡ ਆ ਗਏ ਅਤੇ ਕਾਲਜ ਸਮੇਂ ਵਿਚ ਆਪ ਨੂੰ ਅਖਬਾਰ, ਕਿਤਾਬਾਂ, ਰਸਾਲੇ ਪੜ੍ਹਨ ਦਾ ਬਹੁਤ ਸ਼ੌਂਕ ਹੋ ਗਿਆ। ਆਪ ਇਕ ਅਣਥੱਕ ਤੇ ਮਿਹਨਤੀ ਆਗੂ ਸਨ ਤੇ ਸਫਰ ਕਰਦੇ ਥੱਕਦੇ ਨਹੀਂ ਸਨ, ਜਿਥੇ ਵੀ ਰਾਤ ਪੈ ਜਾਵੇ ਉਥੇ ਹੀ ਉਨ੍ਹਾਂ ਦੇ ਦੋਸਤ, ਸਾਥੀ ਮੌਜੂਦ ਹੁੰਦੇ ਤੇ ਉਹ ਉਥੇ ਹੀ ਰਾਤ ਕੱਟ ਲੈਂਦੇ। ਹੇਠਲੀ ਰਾਜਨੀਤੀ ਤੋਂ ਆਪਣਾ ਰਾਜਸੀ ਜੀਵਨ ਸ਼ੁਰੂ ਕੀਤਾ ਅਤੇ ਸਰਕਲ ਅਕਾਲੀ ਜਥਾ ਤੇ ਜ਼ਿਲ੍ਹਾ ਅਕਾਲੀ ਜਥਾ ਦੇ ਜਨਰਲ ਸਕੱਤਰ, ਪਿੰਡ ਦੇ ਸਰਪੰਚ ਤੇ ਬਲਾਕ ਸੰਮਤੀ ਲੰਬੀ ਦੇ ਮੈਂਬਰ ਦੇ ਇਲਾਵਾ ਜਿਲ੍ਹਾ ਅਕਾਲੀ ਜਥਾ ਦੇ ਪ੍ਰਧਾਨ ਰਹੇ।ਅਕਾਲੀ ਦਲ ਦੇ ਜਿੰਨੇ ਵੀ ਪ੍ਰਧਾਨ ਹੋਏ ਸ. ਮੋਹਨ ਸਿੰਘ ਤੁੜ, ਜਥੇਦਾਰ ਜਗਦੇਵ ਸਿੰਘ ਤਲਵੰਡੀ, ਸੰਤ ਹਰਚੰਦ ਸਿੰਘ ਲੌਂਗੋਵਾਲ ਨਾਲ ਆਪ ਦਾ ਕਾਫੀ ਸਹਿਚਾਰ ਰਿਹਾ। ਸੰਨ 1977 ਵਿੱਚ ਆਪ ਨੂੰ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀ ਸਰਕਾਰ ਦੌਰਾਨ ਪੰਜਾਬ ਮੰਡੀ ਬੋਰਡ ਦਾ ਚੇਅਰਮੈਨ ਥਾਪਿਆ ਗਿਆ। ਇਸ ਮਹੱਤਵ ਪੂਰਨ ਅਹੁਦੇ ’ਤੇ ਰਹਿੰਦੇ ਸਮੇਂ ਤੁਸੀਂ ਆਪਣੀ ਇਮਾਨਦਾਰੀ ਦੀਆਂ ਰਾਹ ’ਤੇ ਚਲਤਿਦਆਂ ਲੱਖਾਂ ਕਰੋੜਾਂ ਰੁਪਏ ਨੂੰ ਠੋਕਰ ਮਾਰਦਿਆਂ ਹੋਰਨਾਂ ਲਈ ਭ੍ਰਿਸ਼ਟਚਾਰ ਦੇ ਇਸ ਯੁੱਗ ਵਿੱਚ ਅਜੋਕੇ ਸਿਆਤਸਦਾਨਾਂ ਲਈ ਸਬਕ ਕਾਇਮ ਕੀਤਾ। ਆਪਨੇ ਹੋਰ ਸਾਥੀਆਂ ਸਮੇਤ ਅਨੇਕਾਂ ਮੋਰਚਿਆਂ ਵਿੱਚ ਹਿੱਸਾ ਲਿਆ ਜ਼ੇਲ੍ਹਾਂ ਵੀ ਕੱÎਟੀਆਂ। ਸੰਨ 1984 ਦੇ ਆਪ੍ਰੇਸ਼ਨ ਬਲਿਊ ਸਟਾਰ ਦੌਰਾਨ ਫ਼ੌਜ਼ ਵੱਲੋਂ ਹਰਮੰਦਿਰ ਸਾਹਿਬ ’ਤੇ ਹਮਲੇ ਅਤੇ ਸ੍ਰੀ ਅਕਾਲ ਤਖ਼ਤ ਸਾਹਿਬ ਨੂੰ ਢਹਿ-ਢੇਰੀ ਕਰਨ ਨਾਲ ਇਨ੍ਹਾਂ ਦੇ ਮਾਨਸਿਕ ਤੌਰ ’ਤੇ ਝੰਜੋੜ ਦਿੱਤਾ ਤੇ ਸ਼੍ਰੋਮਣੀ
ਅਕਾਲੀ ਦਲ (ਮਾਨ) ਵਿੱਚ ਸ਼ਾਮ ਹੋ ਗਏ। ਸੰਨ 1989 ਦੇ ਲੋਕਸਭਾ ਚੋਣਾਂ ’ਚ ਆਪ ਨੇ ਫ਼ਰੀਦਕੋਟ ਹਲਕੇ ਤੋਂ ਚੋਣ ਲੜੀ ਅਤੇ ਡੇਢ ਲੱਖ ਵੋਟ ਨਾਲ ਇਤਿਹਾਸਕ ਜਿੱਤ ਪ੍ਰਾਪਤ ਕੀਤੀ। ਆਪ ਦੀ ਈਮਾਨਦਾਰੀ ਅਤੇ ਵਿਕਾਸਪੱਖੀ ਸੋਚ ਦੇ ਚਰਚੇ ਦੂਰ ਦੂਰ ਤੱਕ ਹੋਣ ਲੱਗੇ। ਮੈਂਬਰ ਪਾਰਲੀਮੈਂਟ ਚੁਣੇ ਜਾਣ ਤੋਂ ਸਿਰਫ਼ ਸਵਾ ਮਹੀਨਾ ਬਾਅਦ 28 ਦਸੰਬਰ, 1989 ਨੂੰ ਆਪ ਆਪਣੇ ਘਰ ਸੁੱਤੇ ਪਏ ਸਨ ਤਾਂ ਸਵੇਰੇ ਗਾਇਬ ਪਾਏ ਗਏ। ਬਾਅਦ ’ਚ ਆਪ ਦੀ ਪਗੜੀ, ਲੋਈ ਤੇ ਜੁੱਤੀ ਪਿੰਡ ਦੇ ਲਾਗੇ ਰਾਜਸਥਾਨ ਨਹਿਰ ਦੀ ਪਟੜੀ ਦੇ ਕਿਨਾਰੇ ਤੋਂ ਮਿਲੇ ਅਤੇ ਲਗਾਤਾਰ ਛੇ ਦਿਨ ਭਾਲ ਪਿਛੋਂ 4 ਜਨਵਰੀ 1990 ਨੂੰ ਆਪ ਦੀ ਲਾਸ਼ ਨਹਿਰ ਵਿਚੋਂ ਮਿਲੀ। ਨਹਿਰ ਵਿਚੋਂ ਲਾਸ਼ ਮਿਲਣ ਦੇ ਬਾਵਜੂਦ ਜਥੇਦਾਰ ਜੀ ਦੇ ਹੱਥ ’ਤੇ ਬੰਨ੍ਹੀ ਹੱਥਘੜੀ ਦੇ ਚਾਲੂ ਹਾਲਤ ਅਤੇ ਜੇਬ ਵਿਚੋਂ ਮਿਲੀ ਡਾਇਰੀ ਅਣਭਿੱਜੀ ਹਾਲਤ ’ਚ ਮਿਲਣ ਕਰਕੇ ਜਥੇਦਾਰ ਜੀ ਦੀ ਮੌਤ ਦੁਨੀਆਂ ਭਰ ਲਈ ਅਬੂਝ ਪਹੇਲੀ ਬਣੀ ਹੋਈ ਹੈ। ਹੁਣ ਉਨ੍ਹਾਂ ਦੇ ਸਪੁੱਤਰ ਗੁਰਮੀਤ ਸਿੰਘ ਖੁੱਡੀਆਂ ਬਤੌਰ ਪ੍ਰਧਾਨ ਜ਼ਿਲ੍ਹਾ ਕਾਂਗਰਸ ਕਮੇਟੀ ਸ੍ਰੀ ਮੁਕਤਸਰ ਸਾਹਿਬ ਅਤੇ ਹਰਮੀਤ ਸਿੰਘ ਖੁੱਡੀਆਂ (ਕੈਨੇਡਾ) ਜਥੇਦਾਰ ਖੁੱਡੀਆਂ ਦੇ ਪਾਏ ਪੂਰਨਿਆਂ ’ਤੇ ਚੱਲਦੇ ਸਮਾਜਿਕ ’ਚ ਆਪਣਾ ਵਡਮੁੱਲਾ ਯੋਗਦਾਨ ਪਾ ਰਹੇ ਹਨ। 25 ਸਾਲ ਦਾ ਲੰਬਾ ਸਮਾਂ ਬੀਤ ਗਿਆ ਹੈ ਪਰ ਇਲਾਕੇ ਦੇ ਲੋਕਾਂ  ਅਤੇ ਸਾਰੇ ਵਰਕਰਾਂ ਦੇ ਦਿਲਾਂ ਵਿਚ ਆਪ ਦੀ ਯਾਦ ਤਾਜ਼ਾ ਹੈ ਅਤੇ ਇਹ ਸਾਰੇ ਭਾਰੀ ਗਿਣਤੀ ਵਿੱਚ ਜਥੇਦਾਰ ਜੀ ਦੀ ਯਾਦ ਤਾਜ਼ਾ ਕਰਨ ਲਈ 4 ਜਨਵਰੀ ਨੂੰ ਪਿੰਡ ਖੁੱਡੀਆਂ ਗੁਲਾਬ ਸਿੰਘ (ਲੰਬੀ) ਵਿਖੇ ਪੁੱਜਦੇ ਹਨ। -ਇਕਬਾਲ ਸਿੰਘ ਸ਼ਾਂਤ   

03 January 2015

ਬਾਦਲਾਂ ਦੀ ਤੀਜੀ ਪੀੜ੍ਹੀ ਨੂੰ ਲੱਗਣ ਲੱਗਿਆ ‘ਸਿਆਸੀ ਜਾਗ’

 ਸੁਖਬੀਰ ਸਿੰਘ ਬਾਦਲ ਦੇ 13 ਸਾਲਾ ਪੁੱਤਰ ਅਨੰਤਬੀਰ ਸਿੰਘ ਬਾਦਲ ਵੱਲੋਂ ਆਪਣੇ ਦਾਦੇ ਨਾਲ ਸੰਗਤ ਦਰਸ਼ਨਾਂ ’ਚ ਸ਼ਮੂਲੀਅਤ

                                                    ਇਕਬਾਲ ਸਿੰਘ ਸ਼ਾਂਤ
ਲੰਬੀ : ਸਾਬਕਾ ਉਪ ਪ੍ਰਧਾਨ ਮੰਤਰੀ ਚੌਧਰੀ ਦੇਵੀ ਲਾਲ ਦੀ ਚੌਥੀ ਪੀੜ੍ਹੀ ਵਾਂਗ ਹੁਣ ਉਨ੍ਹਾਂ ਦੇ ਗੂੜ੍ਹੇ ਮਿੱਤਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਤੀਜੀ ਪੀੜ੍ਹੀ ਨੂੰ ਵੀ ‘ਸਿਆਸੀ ਜਾਗ’ ਲੱਗਣਾ ਸ਼ੁਰੂ ਹੋ ਗਿਆ ਹੈ। ਅੱਜ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ 13 ਸਾਲਾ ਪੋਤਰੇ ਅਨੰਤਬੀਰ ਬਾਦਲ ਨੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਦੇ ਨਾਲ ਲੰਬੀ ਹਲਕੇ ਦੇ ਪਿੰਡਾਂ ’ਚ ਸੰਗਤ ਦਰਸ਼ਨ ਸਮਾਗਮਾਂ ਵਿਚ ਸ਼ਮੂਲੀਅਤ ਕੀਤੀ। ਅਨੰਤਬੀਰ ਸਿੰਘ, ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਅਤੇ ਕੇੇਂਦਰੀ ਮੰਤਰੀ ਬੀਬੀ ਹਰਸਿਮਰਤ ਕੌਰ ਬਾਦਲ ਦਾ ਸਪੁੱਤਰ ਹੈ। ਉਸਦੀਆਂ ਦੋ ਭੈਣਾਂ ਹਰਕੀਰਤ ਕੌਰ ਅਤੇ ਗੁਰਲੀਨ ਕੌਰ ਹਨ। 
ਸੰਗਤ ਦਰਸ਼ਨ ਸਮਾਗਮਾਂ ਵਿਚ ਆਮ ਲੋਕਾਂ ਲਈ ਬੜੀ ਖਿੱਚ ਦਾ ਕੇਂਦਰ ਬਣਿਆ ਚਿਹਰੇ-ਮੋਹਰੇ ਤੋਂ ਬੜੇ ਨਿੱਘੇ ਸੁਭਾਅ ਵਾਲਾ ਅਨੰਤਬੀਰ ਬੜੀ ਮਾਸੂਮੀਅਤ ਨਾਲ ਆਪਣੇ ਮੁੱਖ ਮੰਤਰੀ ਦਾਦੇ ਨਾਲ ਸੋਫੇ ’ਤੇ ਬੈਠਾ ਉਨ੍ਹਾਂ ਦੇ ਫੈਸਲਿਆਂ ਅਤੇ ਲੋਕਾਂ ਵੱਲੋਂ ਸਮੱਸਿਆਵਾਂ ਨੂੰ ਵੇਖਦਾ-ਸੁਣਦਾ ਰਿਹਾ। ਦਿੱਲੀ ਦੇ ਇੱਕ ਸਕੂਲ ਦਾ ਵਿਦਿਆਰਥੀ ਨੀਲੀ ਦਸਤਾਰਧਾਰੀ ਅਨੰਤਬੀਰ ਸਿੰਘ ਪਿੰਡ ਚਨੂੰ ’ਚ ਸੰਗਤ ਦਰਸ਼ਨ ਦੌਰਾਨ ਆਪਣੇ ਦਾਦੇ ਨਾਲ ਰਲਿਆ। ਜਿੱਥੇ ਮੁੱਖ ਮੰਤਰੀ ਹੁਰਾਂ ਨੇ ਬਕਾਇਦਾ ਅਨੰਤਬੀਰ ਨੂੰ ਆਮ ਜਨਤਾ ਨਾਲ ਜਾਣੂ ਵੀ ਕਰਵਾਇਆ। ਅੰਨਤਬੀਰ ਦੀ ਸੰਗਤ ਦਰਸ਼ਨ ’ਚ ਹਾਜ਼ਰੀ ਬਾਦਲ ਪਰਿਵਾਰ ਵੱਲੋਂ ਹੁਣੇ ਤੋਂ ਆਪਣੀ ਪਨੀਰੀ ਨੂੰ ਸਿਆਸੀ ਜੜ੍ਹਾਂ ਨਾਲ ਜੋੜਨ ਦਾ ਉਪਰਾਲਾ ਮੰਨੀ ਜਾ ਰਹੀ ਹੈ। 
ਬਾਦਲ ਪਰਿਵਾਰ ਦੇ ਪੱਗਵੱਟ ਚੌਟਾਲਾ ਖਾਨਦਾਨ ਦੀ ਚੌਥੀ ਪੀੜ੍ਹੀ ਸਿਆਸਤ ਆਪਣੇ ਦਾਦਾ-ਪੜਦਾਦਾ ਵਾਂਗ  ਸਿਆਸੀ ਪਰਤੋਲਣ ਲੱਗੀ ਹੈ। ਜਿਨ੍ਹਾਂ ਵਿਚ ਚੌਧਰੀ ਓਮ ਪ੍ਰਕਾਸ਼ ਚੌਟਾਲਾ ਦੇ ਪੋਤਰੇ ਦੁਸ਼ਯੰਤ ਚੌਟਾਲਾ (ਸੰਸਦ ਮੈਂਬਰ ਹਿਸਾਰ), ਇਨਸੋ ਦੇ ਕੌਮੀ ਪ੍ਰਧਾਨ ਦਿਗਵਿਜੈ ਚੌਟਾਲਾ, ਕਰਨ ਅਤੇ ਅਰਜੁਨ ਚੌਟਾਲਾ ਸ਼ਾਮਲ ਹਨ। ਇਸਦੇ ਇਲਾਵਾ ਮੁੱਖ ਮੰਤਰੀ ਭਰਾ ਗੁਰਦਾਸ ਸਿੰਘ ਬਾਦਲ ਦਾ ਪੋਤਰਾ ਅਰਜਨ ਬਾਦਲ ਵੀ ਛੋਟੀ ਉਮਰੇ ਸਿਆਸੀ ਸਟੇਜਾਂ ’ਤੇ ਖਾਸੀਆਂ ਚੰਗੀਆਂ ਤਕਰੀਰਾਂ ਕਰਦਾ ਹੈ। ਅਜਿਹੇ ਵਿਚ ਆਪਣੇ ਸਿਰਫ਼ 13 ਸਾਲਾ ਪੋਤਰੇ ਅਨੰਤਬੀਰ ਨੂੰ ਲੰਬੀ ਹਲਕੇ ਦੇ ਸੰਗਤ ਦਰਸ਼ਨ ਸਮਾਗਮਾਂ ਜਰੀਏ ਆਮ ਜਨਤਾ ਸਾਹਮਣੇ ਲਿਆ ਕੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਵੀ ਬਾਦਲ ਪਰਿਵਾਰ ਦੇ ਭਵਿੱਖ ਚਿਹਰੇ ਨੂੰ ਜਨਤਾ ਨਾਲ ਜੋੜਨ ਦੀ ਕੋਸ਼ਿਸ਼ ਕੀਤੀ ਹੈ।
ਹਾਲਾਂਕਿ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਪੱਤਰਕਾਰਾਂ ਵੱਲੋਂ ਅਨੰਤਬੀਰ ਸਿੰਘ ਨੂੰ ‘ਸਿਆਸੀ ਸਿਖਲਾਈ’ ਦੇਣ ਬਾਰੇ ਪੁੱਛੇ ਜਾਣ ’ਤੇ ਉਨ੍ਹਾਂ ਕਿਹਾ ਕਿ ‘‘ਨਹੀਂ ਜੀ, ਅਜਿਹਾ ਕੁਝ ਨਹੀਂ, ਉਹ ਤਾਂ ਨਵੇਂ ਸਾਲ ’ਤੇ ਦਿੱਲਿਓਂ ਅੰਮ੍ਰਿਤਸਰ ਮੱਥਾ ਟੇਕਣ ਗਿਆ ਸੀ, ਹੁਣ ਬਾਦਲ ਆਇਆ ਹੈ।’’ ਅੱਜ ਮੇਰਾ ਨਾਲ ਆ ਗਿਆ।’’ ਬਹੁਤ ਲੰਮੀ ਜ਼ਿੰਦਗੀ ਐ, ਕਿੱਧਰ ਨੂੰ ਨੂੰ ਰਾਹਾਂ ਜਾਣੀਆਂ ਨੇ।’’ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਦਾ ਇਸ ਬਾਬਤ ਬਿਆਨ ਕੁਝ ਵੀ ਹੋਵੇ ਪਰ ਇੰਨਾ ਤੈਅ ਹੈ ਕਿ ‘‘ਬਾਪ ਦਾ ਬੇਟਾ ਅਤੇ ਸੈਨਿਕ ਦਾ ਘੋੜਾ, ਜ਼ਿਆਦਾ ਨਹੀਂ ਤਾਂ ਥੋੜ੍ਹਾ-ਥੋੜ੍ਹਾ।’’ ਵਾਲੀ ਕਹਾਵਤ ਵਾਂਗ ਅਨੰਤਬੀਰ ਵੀ ਸਿਆਸਤਦਾਨ ਦਾਦੇ, ਪਿਤਾ ਅਤੇ ਮਾਂ ਦੀਆਂ ਸਿਆਸੀ ਰਾਹਾਂ ’ਤੇ ਪਾਂਧੀ ਜ਼ਰੂਰ ਬਣੇਗਾ। -098148-26100/093178-26100