'ਸਣੇ ਸਫਾਰੀ ਚੱਕਾਂਗੇ ਹੁਣ ਵੱਡੇ ਮਿਰਜੇ ਨੂੰ' ਗੀਤ ਲਿਖਣ ਵਾਲਾ 'ਸੀਰਾ ਸਿੰਘੇਵਾਲਾ' ਨਹੀਂ ਰਿਹਾ

ਸੀਰੇ ਨੂੰ ਖੁੱਲ੍ਹਮ-ਖੁੱਲ੍ਹਾ ਗਿਲਾ ਸੀ ਕਿ ਉਸਦੇ ਲਿਖੇ ਹੋਏ ਮਕਬੂਲ ਗੀਤਾਂ ਨਾਲ ਵੱਡੇ-ਵੱਡੇ ਗਾਇਕ ਕਰੋੜਾਂ ਰੁਪਏ ਕਮਾ ਗਏ। ਜਦਕਿ ਉਸਦੇ ਪੱਲੇ ਕੱਖ ਵੀ ਨਹੀਂ ਪਿਆ.......

ਇਕਬਾਲ ਸਿੰਘ ਸ਼ਾਂਤ

ਡੱਬਵਾਲੀ: ਪੰਜਾਬ ਦੇ ਕਈ ਗਾਇਕਾਂ ਦੀ ਗਾਇਕੀ ਨੂੰ ਆਪਣੇ ਸ਼ਬਦਾਂ ਨਾਲ ਨਿਖਾਰਨ ਵਾਲਾ ਨਾਮੀ ਗੀਤਕਾਰ ਸੀਰਾ ਸਿੰਘੇਵਾਲਾ ਅੱਜ ਬੇਵਕਤੀ ਜਹਾਨੋਂ ਤੁਰ ਗਿਆ। ਉਸਨੂੰ 27 ਸਤੰਬਰ ਨੂੰ ਉਸਦੇ ਘਰ ਪਿੰਡ ਸਿੰਘੇਵਾਲਾ-ਫਤੂਹੀਵਾਲਾ ਵਿਖੇ ਖੂਨ ਦੀ ਉਲਟੀ ਆਈ। ਕੁੱਝ ਸਮੇਂ ਬਾਅਦ ਹੀ ਉਸਦੀ ਮੌਤ ਹੋ ਗਈ। ਇਸ ਅਚਨਚੇਤੀ ਭਾਣੇ ਨਾਲ ਪੰਜਾਬੀ ਸੰਗੀਤ ਜਗਤ ਵਿੱਚ ਦੁੱਖ ਦੀ ਲਹਿਰ ਫੈਲ ਗਈ ਹੈ।

ਗਰੀਬ ਘਰ 'ਚ ਪੈਦਾ ਹੋਏ ਕਰੀਬ 35-36 ਸਾਲਾ ਸੀਰਾ ਸਿੰਘੇਵਾਲਾ ਨੇ ਥੋੜ੍ਹੇ ਸਮੇਂ ਵਿੱਚ ਗੀਤਕਾਰੀ 'ਚ ਲੰਮਾ ਪੈਂੜਾ ਤੈਅ ਕੀਤਾ ਸੀ। ਉਸਦਾ ਬਾਈ ਅਮਰਜੀਤ ਦੀ ਐਲਬਮ ਹੀਰੋ ਵਿੱਚ 'ਕਾਲੀ ਜਿਪਸੀ ਨੂੰ ਹੱਥ ਕਿਹੜਾ ਪਾਊ' ਪਹਿਲਾ ਗੀਤ ਰਿਕਾਰਡ ਹੋਇਆ ਸੀ। ਫਿਰ ਬਾਈ ਅਮਰਜੀਤ ਅਤੇ ਮਿਸ ਪੂਜਾ ਦੀ ਅਵਾਜ਼ ਵਿੱਚ 'ਸਣੇ ਸਫਾਰੀ ਚੱਕਾਂਗੇ ਹੁਣ ਵੱਡੇ ਮਿਰਜੇ ਨੂੰ...' ਅਤੇ 'ਟੀਚਰ ਲੱਗੀ ਏ ਸਰਕਾਰੀ ਵੇ ਤੂੰ ਐਸ਼ ਕਰੇਂਗਾ...'ਆਦਿ ਗੀਤ ਆਏ। ਸੀਰਾ ਸਿੰਘੇਵਾਲਾ ਵੱਲੋਂ ਲਿਖਿਤ ਗੀਤ 'ਓਸੇ ਖੂਹ ਤੇ ਲਾਸ਼ ਲਟਕਦੀ ਵੇਖੀ ਮੈਂ' ਨੂੰ ਗਾਇਕ ਰਾਣਾ ਸੰਧੂ ਨੇ ਗਾਇਆ।

* ਮਕਬੂਲੀਅਤ ਦੇ ਬਾਵਜੂਦ ਤਰੱਕੀ ਦੇ ਸਿਖ਼ਰ ਜੂਝਦਾ ਰਿਹਾ

ਉਸਦੇ ਸ਼ਬਦਾਂ ਵਿੱਚੋਂ ਕ੍ਰਾਂਤੀਕਾਰੀ ਝਲਕ ਅਤੇ ਮਜ਼ਦੂਰਾਂ ਵਰਗ ਦੀ ਜ਼ਿੰਦਗੀ ਤੇ ਵਿੱਥਿਆ ਝਲਕਦੀ ਰਹੀ। ਉਹ ਆਖਦਾ ਹੁੰਦਾ ਸੀ ਕਿ ਜਦੋਂ ਦੇਸ਼ ਅਤੇ ਪੰਜਾਬ 'ਚ 70 ਫ਼ੀਸਦੀ ਲੋਕ ਕਿੱਤੇ ਪੱਖੋਂ ਮਜ਼ਦੂਰ ਹੋਣ ਤਾਂ ਟਰੈਕਟਰਾਂ ਦੇ ਟੋਚਣ ਅਤੇ ਆਡੀ ਗੱਡੀਆਂ ਨਾਲੋਂ ਵੱਧ ਇਸ ਵਰਗ ਦੀ ਗੱਲ ਹੋਣੀ ਚਾਹੀਦੀ ਹੈ। ਉਹ ਸੱਥ ਅਤੇ ਹਰ ਸਟੇਜ਼ 'ਤੇ ਮਜ਼ਦੂਰਾਂ ਵਰਗ ਦੀ ਜ਼ਿੰਦਗੀ ਬਾਰੇ ਜ਼ਰੂਰ ਕਰਦਾ ਸੀ। ਉਸਦੇ ਕੋਲ ਗੀਤਾਂ ਅਤੇ ਸ਼ਬਦਾਂ ਦਾ ਖਜ਼ਾਨਾ ਭਰਪੂਰ ਰਿਹਾ। ਉਸ ਵੱਲੋਂ ਲਿਖੇ ਵੱਡੀ ਗਿਣਤੀ ਗਾਣਿਆਂ 'ਚੋ ਕਾਫ਼ੀ ਗਾਣੇ ਬੇਹੱਦ ਮਕਬੂਲ ਹੋਏ, ਪਰ ਉਹ ਤਰੱਕੀ ਦੇ ਭੌਤਿਕ ਸਿਖ਼ਰ ਲਈ ਜੀਵਨ ਦੇ ਅਖ਼ੀਰਲੇ ਪਲਾਂ ਤੱਕ ਸੰਘਰਸ਼ ਅਤੇ ਗਰੀਬੀ ਨੂੰ ਹੰਢਾਉਂਦਾ ਰਿਹਾ।

ਸੀਰੇ ਨੂੰ ਖੁੱਲ੍ਹਮ-ਖੁੱਲ੍ਹਾ ਗਿਲਾ ਸੀ ਕਿ ਉਸਦੇ ਲਿਖੇ ਹੋਏ ਮਕਬੂਲ ਗੀਤਾਂ ਨਾਲ ਵੱਡੇ-ਵੱਡੇ ਗਾਇਕ ਕਰੋੜਾਂ ਰੁਪਏ ਕਮਾ ਗਏ। ਜਦਕਿ ਉਸਦੇ ਪੱਲੇ ਕੱਖ ਵੀ ਨਹੀਂ ਪਿਆ। ਕੁੱਝ ਵਰ੍ਹੇ ਪਹਿਲਾਂ ਉਸਦੇ ਪਿਤਾ ਨੂੰ ਦਿਲ ਦੇ ਦੌਰਾ ਪੈਣ 'ਤੇ ਮਹਿੰਗੇ ਇਲਾਜ਼ ਲਈ ਉਸਨੇ ਕਈ ਗਾਇਕਾਂ ਨਾਲ ਸੰਪਰਕ ਕੀਤਾ ਪਰ ਕਿਸੇ ਨੇ ਉਸ ਵੱਲ ਮੱਦਦ ਵਾਲਾ ਨਹੀਂ ਵਧਾਇਆ।

* ਉਸਦੇ ਕ੍ਰਾਂਤੀਕਾਰੀ ਸ਼ਬਦਾਂ ਵਿੱਚੋਂ ਮਜ਼ਦੂਰ ਵਰਗ ਦੀ ਵਿੱਥਿਆ ਝਲਕਦੀ ਰਹੀ

ਉਹ 2004 ਤੋਂ ਕਈ ਵਰ੍ਹਿਆਂ ਤੱਕ ਚਿਣਾਈ ਮਿਸਤਰੀ ਵਜੋਂ ਰੋਜ਼ੀ ਰੋਟੀ ਖਾਤਰ ਦੁਬਈ ਵਿੱਚ ਰਿਹਾ। ਬਾਈ ਅਮਰਜੀਤ ਵੱਲੋਂ ਪਹਿਲਾ ਰਿਕਾਰਡ ਹੋਇਆ ਗੀਤ 'ਕਾਲੀ ਜਿਪਸੀ ਨੂੰ ਹੱਥ ਕਿਹੜਾ ਪਾਊ' ਨੂੰ ਵੀ ਉਸਨੇ ਦੁਬਈ 'ਚ ਲਿਖਿਆ ਸੀ। ਉਸਦੇ ਭਰਾ ਗੁਰਪ੍ਰੀਤ ਸਿੰਘੇਵਾਲਾ ਨੇ ਕਿਹਾ ਕਿ ਕੁੱਝ ਮਹੀਨੇ ਪਹਿਲਾੇਂ ਗੁਰਦਿਆਂ ਅਤੇ ਲੀਵਰ ਦੀ ਦਿੱਕਤ ਹੋਈ ਸੀ। ਇਲਾਜ ਤੋਂ ਬਾਅਦ ਬਾਅਦ ਤੰਦਰੁਸਤ ਸੀ। ਅੱਜ ਸਵੇਰੇ ਅਚਨਚੇਤ ਖੂਨ ਦੀ ਉਲਟੀ ਆਈ ਅਤੇ ਕੁੱਝ ਸਮੇਂ ਉਪਰੰਤ ਉਸਦੀ ਮੌਤ ਹੋ ਗਈ।

ਅੰਤਮ ਸਸਕਾਰ ਮੌਕੇ ਸਿੰਘੇਵਾਲਾ ਦੇ ਸ਼ਮਸ਼ਾਨ ਘਾਟ 'ਚ ਗਰੀਬਾਂ ਲੋਕਾਂ ਦੀ ਕਲਮੀ ਅਵਾਜ਼ ਨੂੰ ਗਮਗੀਨ ਅਤੇ ਸੇਜਲ ਅੱਖਾਂ ਨਾਲ ਅੰਤਮ ਵਿਦਾਇਗੀ ਦਿੱਤੀ ਗਈ। ਇਸ ਮੌਕੇ ਇਲਾਕੇ ਵਿੱਚੋਂ ਢਾਈ-ਤਿੰਨ ਸੌ ਲੋਕ ਮੌਜੂਦ ਸਨ। ਬੇਹੱਦ ਮੰਦਭਾਗਾ ਹੈ ਕਿ ਸੀਰੇ ਦੀ ਕਲਮ ਨਾਲ ਮਕਬੂਲ ਹੋਏ ਨਾਮਚੀਨ ਗਾਇਕਾਂ ਵਿੱਚੋਂ ਉਸਦੀ ਅੰਤਮ ਵਿਦਾਇਗੀ ਕੋਈ ਇੱਕ ਵੀ ਮੌਜੂਦ ਨਹੀਂ ਸੀ।

#ਸੀਰਾ_ਸਿੰਘੇਵਾਲਾ  #ਗਾਇਕ #ਗੀਤਕਾਰ #Seera Singhewala

ਲੋਕਪੱਖੀ ਬਦਲਾਅ! : ਵਿਸ਼ੇਸ਼ ਸੁਵਿਧਾ ਵਾਲੇ ਸਰਕਾਰੀ ਕੈਂਪਾਂ 'ਚ 'ਨਿੱਜੀ ਹੱਥਾਂ' ਵੱਲੋਂ ਲੋਕਾਂ ਦੀ ਵੱਡੀ ਲੁੱਟ

- ਲਾਭਪਾਤਰੀਆਂ ਤੋਂ ਫਾਰਮ ਅਤੇ ਫੋਟੋ ਸਟੇਟ ਲਈ ਵਸੂਲੇ ਜਾ ਰਹੇ 25 ਤੋਂ 70 ਰੁਪਏ

- 12 ਕੈਂਪਾਂ 'ਚ 36 ਸੌ ਲਾਭਪਾਤਰੀਆਂ ਨੂੰ ਮਿਲ ਚੁੱਕੀ ਔਸਤਨ 1.08 ਲੱਖ ਰੁਪਏ ਦੀ ਮਹਿੰਗੀ ਸੁਵਿਧਾ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਲੰਬੀ ਹਲਕੇ 'ਚ ਲੱਗੇ ਰਹੇ ਵਿਸ਼ੇਸ਼ ਸੁਵਿਧਾ ਕੈਂਪ ਲਾਭਪਾਤਰੀਆਂ ਤੋਂ ਫਾਰਮ ਅਤੇ ਫੋਟੋ ਸਟੇਟ ਦੀ ਭਾਰੀ ਰਕਮ ਵਸੂਲ ਜਾਣ ਕਰਕੇ ਵਿਵਾਦਾਂ 'ਚ ਘਿਰ ਗਏ ਹਨ। ਜ਼ਿਲ੍ਹਾ ਪ੍ਰਸ਼ਾਸਨ ਸ੍ਰੀ ਮੁਕਤਸਰ ਸਾਹਿਬ ਵੱਲੋਂ 'ਸਿਆਸੀ ਚਿਹਰਿਆਂ' ਦੀ ਅਗਵਾਈ ਹੇਠ ਲੱਗਦੇ ਇਨ੍ਹਾਂ ਕੈਂਪਾਂ 'ਚ ਫਾਰਮ ਅਤੇ ਫੋਟੋ ਸਟੇਟ ਲਈ ਇੱਕ-ਇੱਕ ਲਾਭਪਾਤਰੀ ਤੋਂ ਪ੍ਰਤੀ ਫਾਰਮ ਅਤੇ ਫੋਟੋ ਸਟੇਟ ਲਈ 25 ਰੁਪਏ ਤੋਂ ਲੈ ਕੇ 70 ਰੁਪਏ ਦੀ ਵਸੂਲਣ ਦੀ ਕਥਿਤ ਘਪਲੇਬਾਜ਼ੀ ਨਸ਼ਰ ਹੋਈ ਹੈ।

ਸੁਵਿਧਾ ਕੈਂਪਾਂ ਵਿੱਚ ਕਰੀਬ ਪੰਜ ਗੁਣਾ ਜ਼ਿਆਦਾ ਫੋਟੋ ਸਟੇਟ ਕੀਮਤ ਵਸੂਲੇ ਅਤੇ ਲਗਪਗ ਮੁਫ਼ਤ ਕੀਮਤ ਵਾਲੇ ਫਾਰਮਾਂ ਦੀ ਕੀਮਤ ਵਸੂਲਣ ਖਿਲਾਫ਼ ਲੋਕਾਂ 'ਚ ਭਾਰੀ ਰੋਸ ਹੈ। ਪਤਾ ਲੱਗਿਆ ਹੈ ਕਿ ਸਰਕਾਰੀ ਕੈਂਪਾਂ 'ਚ ਪ੍ਰਾਈਵੇਟ ਵਿਅਕਤੀ ਖੁੱਲ੍ਹੇਆਮ ਬੈਠ ਕੇ ਫਾਰਮਾਂ ਅਤੇ ਫੋਟੋ ਸਟੇਟ ਦੀ ਮੋਟੀ ਫੀਸ ਵਸੂਲਦੇ ਹਨ। ਵੱਡੀ ਹੈਰਾਨੀ ਹੈ ਕਿ ਬੀ.ਡੀ.ਪੀ.ਓ ਦਫ਼ਤਰ ਲੰਬੀ ਤੋਂ ਲੈ ਕੇ ਡਿਪਟੀ ਕਮਿਸ਼ਨਰ ਦਫ਼ਤਰ ਤੱਕ ਇਨ੍ਹਾਂ ਫਾਰਮ/ਫੋਟੋ ਸਟੇਟ ਵਾਲੀ ਵਿਸ਼ੇਸ਼ ਸੁਵਿਧਾ ਤੋਂ ਅਨਜਾਨਤਾ ਜਾਹਰ ਕਰ ਰਿਹਾ ਹੈ। ਫਿਰ ਸਰਕਾਰੀ ਕੈਂਪਾਂ 'ਚ ਕਿਸਦੀ ਪੁਸ਼ਤਪਨਾਹੀ ਹੇਠ ਮਹਿੰਗੀ ਸੁਵਿਧਾ ਵਾਲੀ ਨਿੱਜੀ ਦੁਕਾਨਦਾਰੀ ਚੱਲ ਰਹੀ ਹੈ। ਹਰੇਕ ਕੈਂਪ 'ਚ ਪੰਜ-ਦਸ ਗੁਣਾ ਮਹਿੰਗੀ ਸੁਵਿਧਾ ਵਾਲੀ ਟੀਮ ਲਗਾਤਾਰ ਪੁੱਜ ਰਹੀ ਹੈ। ਲੰਬੀ ਹਲਕੇ 'ਚ ਪ੍ਰਸ਼ਾਸਨ ਸੁੱਤਾ ਪਿਆ ਹੈ ਜਾਂ ਪ੍ਰਸ਼ਾਸਨ ਹੇਠਲੇ ਪੱਧਰ 'ਤੇ ਚੰਦ ਵਿਅਕਤੀਆਂ ਦੀ ਬੇਰਜ਼ੁਗਾਰੀ ਦੂਰ ਕਰਨ ਦੀ ਰਾਹ ਪਿਆ ਹੋਇਆ ਹੈ। ਇਹ ਪੜਤਾਲ ਦਾ ਵਿਸ਼ਾ ਹੈ।

ਇਨ੍ਹਾਂ ਕੈਂਪਾਂ 'ਚ ਪੈਨਸ਼ਨ, ਦਿਵਿਆਂਗ ਸਰਟੀਫਿਕੇਟ, ਪੋਸ਼ਣ ਅਭਿਆਨ ਸਬੰਧੀ, ਲੇਬਰ ਕਾਰਡ, ਸ਼ਗਨ ਸਕੀਮ, ਸਮਾਰਟ ਰਾਸ਼ਨ ਕਾਰਡ, ਮਗਨਰੇਗਾ ਸਕੀਮਾਂ ਅਤੇ ਵਨ ਸਟਾਪ ਸੈਂਟਰ (ਸਖੀ) ਆਦਿ ਲਈ ਫਾਰਮ ਵਗੈਰਾ ਆਦਿ ਭਰੇ ਜਾਂਦੇ ਹਨ।

ਸਰਕਾਰੀ ਜਾਣਕਾਰੀ ਅਨੁਸਾਰ ਲੰਬੀ ਬਲਾਕ 'ਚ ਹੁਣ ਤੱਕ 12 ਕੈਂਪ ਲੱਗ ਚੁੱਕੇ ਹਨ। ਤਿੰਨ-ਚਾਰ ਪਿੰਡਾਂ 'ਤੇ ਆਧਾਰਤ ਪ੍ਰਤੀ ਕੈਂਪ 'ਚ ਔਸਤਨ ਤਿੰਨ ਸੌ ਲਾਭਪਾਤਰੀ ਪੁੱਜਦੇ ਹਨ। ਜੇਕਰ ਇੱਕ ਵਿਅਕਤੀ ਤੋਂ ਘੱਟੋ-ਘੱਟ ਤੀਹ ਰੁਪਏ ਦੀ ਫਾਰਮ ਵਸੂਲੀ ਮੁਤਾਬਕ 12 ਕੈਂਪਾਂ ਵਿੱਚ 36 ਸੌ ਲਾਭਪਾਤਰੀਆਂ ਤੋਂ 1.08 ਲੱਖ ਰੁਪਏ ਆਮ ਲੋਕਾਂ ਤੋਂ ਫਾਰਮ ਅਤੇ ਫੋਟੋ ਸਟੇਟ ਦੀ ਸੁਵਿਧਾ ਦੀ ਆਰਥਿਕ ਵਸੂਲੀ ਹੋ ਚੁੱਕੀ ਹੈ। ਜ਼ਿਲ੍ਹਾ ਪ੍ਰਸ਼ਾਸਨ ਵੱਲੋਂ ਐਲਾਨੇ ਕੈਂਪਾਂ 'ਚ ਸਿਆਸੀ ਚਿਹਰਿਆਂ ਦੀ ਮੌਜੂਦਗੀ 'ਚ ਅਜਿਹਾ ਵਰਤਾਰਾ ਸਰਕਾਰ ਅਤੇ ਜ਼ਿਲ੍ਹਾ ਪ੍ਰਸ਼ਾਸਨ ਦੀ ਸਾਖ਼ 'ਤੇ ਵੱਡੇ ਪ੍ਰਸ਼ਨ ਚਿੰਨ੍ਹ ਲਗਾ ਰਿਹਾ ਹੈ। ਅੱਜ ਪਿੰਡ ਹਾਕੂਵਾਲਾ ਵਿਖੇ ਵਿਸ਼ੇਸ਼ ਸੁਵਿਧਾ ਕੈਂਪ 'ਚ ਬੁਢਾਪਾ ਪੈਨਸ਼ਨ ਦਾ ਫਾਰਮ ਭਰਨ ਗਏ ਦਰਸ਼ਨ ਸਿੰਘ ਉਰਫ਼ ਵਕੀਲ ਦਾ ਕਹਿਣਾ ਸੀ ਕਿ ਸਰਕਾਰੀ ਸੁਵਿਧਾ ਕੈਂਪ 'ਚ ਫੋਟੋ ਸਟੇਟ ਅਤੇ ਫਾਰਮ ਬਦਲੇ ਤੀਹ ਰੁਪਏ ਵਸੂਲੇ ਜਾਣ ਤੋਂ ਉਸਦੇ ਮਨ ਨੂੰ ਡੂੰਘੀ ਠੇਸ ਪੁੱਜੀ।

ਉਸਨੇ ਕਿਹਾ ਕਿ ਬਾਜ਼ਾਰ 'ਚ ਫੋਟੋ ਇੱਕ ਰੁਪਏ ਵਿੱਚ ਹੋ ਜਾਂਦੀ ਹੈ। ਜਦਕਿ ਕੈਂਪ 'ਚ ਪੰਜ ਗੁਣਾ ਫੀਸ ਵਸੂਲੀ ਜਾ ਰਹੀ ਸੀ। ਜਿਸਦੀ ਕੋਈ ਰਸੀਦ ਵੀ ਨਹੀਂ ਦਿੱਤੀ ਗਈ। ਪ੍ਰੀਤਮ ਸਿੰਘ ਨੰਬਰਦਾਰ ਨੇ ਇਹ ਫੀਸ ਲਗਪਗ ਹਰੇਕ ਲਾਭਪਾਤਰੀ ਤੋਂ ਲਈ ਗਈ। ਮੰਡੀ ਕਿੱਲਿਆਂਵਾਲੀ ਵਾਸੀ ਮਹਿੰਦਰ ਕੁਮਾਰ ਨੇ ਵੀ ਬੀਤੇ ਦਿਨ੍ਹੀਂ ਵਿਸ਼ੇਸ਼ ਸੁਵਿਧਾ ਕੈਂਪ 'ਚ ਫਾਰਮ ਅਤੇ ਫੋਟੋ ਸਟੇਟ ਲਈ 25 ਰੁਪਏ ਤੋਂ 70 ਰੁਪਏ ਵਸੂਲੇ ਜਾਣ ਦੀ ਗੱਲ ਆਖੀ।

ਡੀ.ਸੀ. ਵੱਲੋਂ ਤੁਰੰਤ ਪੜਤਾਲ ਅਤੇ ਐਕਸ਼ਨ

ਮਾਮਲਾ ਧਿਆਨ 'ਚ ਲਿਆਉਣ 'ਤੇ ਡਿਪਟੀ ਕਮਿਸ਼ਨਰ ਵਿਨੀਤ ਕੁਮਾਰ ਨੇ ਤੁਰੰਤ ਐਕਸ਼ਨ ਲੈਂਦੇ ਪੜਤਾਲ ਕੀਤੀ ਅਤੇ ਮੀਡੀਆ ਨੂੰ ਪੱਖ ਭੇਜ ਕੇ ਦੱਸਿਆ ਪੰਚਾਇਤ ਸਕੱਤਰ ਅਨੁਸਾਰ ਕੈਂਪ 'ਚ ਪ੍ਰਾਈਵੇਟ ਵਿਅਕਤੀ ਅਰਜੀ ਫਾਰਮ ਭਰਨ ਲਈ 10 ਤੋਂ 20 ਰੁਪਏ ਵਸੂਲ ਰਹੇ ਹਨ ਅਤੇ ਫੋਟੋ ਕਾਪੀ ਲਈ ਪ੍ਰਤੀ ਪੰਨਾ 2 ਰੁਪਏ ਵਸੂਲ ਰਹੇ ਸਨ। ਉਨ੍ਹਾਂ ਕਿਹਾ ਕਿ ਬੀ.ਡੀ.ਪੀ.ਓ ਨੂੰ ਅਗਾਮੀ ਕੈਂਪ 'ਚ ਇਸਨੂੰ ਰੋਕਣ ਅਤੇ ਸਵੈ-ਇੱਛਾ ਨਾਲ ਫਾਰਮ ਭਰਨ ਲਈ ਫੋਟੋ ਕਾਪੀ ਮਸ਼ੀਨ ਅਤੇ ਇੱਕ ਵਿਅਕਤੀ ਦਾ ਪ੍ਰਬੰਧ ਕਰਨ ਦੀ ਤਾਕੀਦ ਕੀਤੀ ਗਈ ਹੈ। ਜ਼ਿਕਰਯੋਗ ਹੈ ਕਿ ਜ਼ਿਲ੍ਹਾ ਸ੍ਰੀ ਮੁਕਸਤਰ ਸਾਹਿਬ 'ਚ ਅਜਿਹਾ ਵਰਤਾਰਾ ਹੈ ਜਦੋਂ ਕਿਸੇ ਜ਼ਿਲ੍ਹਾ ਅਧਿਕਾਰੀ ਨੇ ਤੁਰੰਤ ਐਕਸ਼ਨ ਨੂੰ ਮੀਡੀਆ ਨੂੰ ਵੱਟਸਐਪ ਸੁਨੇਹੇ ਰਾਹੀਂ ਪੱਖ ਭੇਜਿਆ ਹੋਵੇ।

ਭਗਵੰਤ ਮਾਨ ਬਰਸਾਤੀ ਖਰਾਬੇ ਦਾ ਜਾਇਜ਼ਾ ਲੈਣ ਅੱਜ ਲੰਬੀ ਹਲਕੇ 'ਚ ਪੁੱਜਣਗੇ, ਕਿਸਾਨਾਂ ਨੂੰ ਗਲਤ ਬਣਤਰ ਵਾਲੇ ਸੇਮ ਨਾਲਿਆਂ ਦੇ ਹੱਲ ਬਾਰੇ ਵੱਡੀਆਂ ਉਮੀਦਾਂ

- ਮਹਿਰਾਜਵਾਲਾ ਡਰੇਨ ਦੇ ਮੁੜ ਸਰਵੇ ਦੀ ਮੰਗ ਉੱਠੀ

- ਖੇਤਾਂ 'ਚ ਪਾਣੀ ਨਿਕਾਸੀ ਲਈ ਸਰਕਾਰੀ ਮੱਦਦ ਸ਼ੁਰੂ ਨਾ ਹੋਣ ਦੇ ਦੋਸ਼

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਮੁੱਖ ਮੰਤਰੀ ਭਗਵੰਤ ਸਿੰਘ ਮਾਨ ਅੱਜ 28 ਜੁਲਾਈ ਨੂੰ ਹਲਕਾ ਲੰਬੀ ਦੇ ਸਰਾਵਾਂ ਜੈਲ 'ਚ ਮੀਂਹ ਦੇ ਪਾਣੀਆਂ 'ਚ ਡੁੱਬੇ ਹਜ਼ਾਰਾਂ ਏਕੜ ਫ਼ਸਲੀ ਰਕਬੇ ਦਾ ਦੁਖਾਂਤ ਅੱਖੀਂ ਵਾਚਣ ਲਈ ਪੁੱਜਣਗੇ। ਮੁੱਖ ਮੰਤਰੀ ਮੀਂਹ ਦੇ ਪਾਣੀ ਦੀ ਸੁਚੱਜੀ ਨਿਕਾਸੀ ਨਾ ਹੋਣ ਕਾਰਨ ਸਭ ਤੋਂ ਵੱਧ ਨੁਕਸਾਨੇ ਗਏ ਪਿੰਡ ਪੰਨੀਵਾਲਾ ਅਤੇ ਮਿੱਡਾ ਦਾ ਬਾਅਦ ਦੁਪਿਹਰ 2:30 ਵਜੇ ਦੌਰਾ ਕਰਨਗੇ। ਇਸਦੇ ਉਪਰੰਤ ਮੁੱਖ ਮੰਤਰੀ ਫਾਜ਼ਿਲਕਾ ਜਿਲ੍ਹੇ ਦੇ ਪਿੰਡ ਮੂਲਿਆਂਵਾਲੀ ਵੀ ਖਰਾਬੇ ਦਾ ਜਾਇਜ਼ਾ ਲੈਣ ਜਾਣਗੇ। 

ਮੁੱਖ ਮੰਤਰੀ ਬਣਨ ਮਗਰੋਂ ਭਗਵੰਤ ਮਾਨ ਦੀ ਬਾਦਲਾਂ ਦੇ ਗੜ੍ਹ ਰਹੇ ਹਲਕੇ ਲੰਬੀ 'ਚ ਪਹਿਲੀ ਫੇਰੀ ਤੋਂ ਇਲਾਕੇ ਦੇ ਹਜ਼ਾਰਾਂ ਕਿਸਾਨਾਂ ਨੂੰ ਵੱਡੀਆਂ ਉਮੀਦਾਂ ਹਨ। ਇਸ ਖੇਤਰ ਵਿੱਚ ਸੇਮ ਨਾਲਿਆਂ ਦੀ ਗਲਤ ਬਣਤਰ ਕਾਰਨ ਵੱਡੀ ਗਿਣਤੀ ਪਿੰਡਾਂ 'ਚ ਲਗਪਗ ਭਰਵੀਂ ਬਰਸਾਤ ਮੌਕੇ ਹੜ੍ਹਾਂ ਜਿਹੇ ਹਾਲਾਤ ਪੈਦਾ ਹੋ ਜਾਂਦੇ ਹਨ। ਜਿਸਦੇ ਮੂਹਰੇ ਪ੍ਰਸ਼ਾਸਨ ਦੇ ਕਾਗਜ਼ੀ ਉਪਰਾਲੇ ਵੀ ਨਾਕਾਫ਼ੀ ਸਾਬਤ ਹੁੰਦੇ ਹਨ। ਇਸ ਵਾਰ ਵੀ ਮੌਨਸੂਨ ਦੀ ਪਹਿਲੀ ਬਰਸਾਤ ਨੇ ਸਮੁੱਚਾ ਇਲਾਕਾ ਜਲਥਲ ਕਰ ਦਿੱਤਾ। ਮਿੱਡਾ ਦਾ ਰਕਬਾ ਨਿਵਾਣ 'ਚ ਇੱਥੋਂ ਦਾ ਸੌ ਫ਼ੀਸਦੀ ਰਕਬਾ ਪਾਣੀ 'ਚ ਡੁੱਬ ਗਿਆ। 

ਖੇਤਰ ਵਾਸੀਆਂ ਮੁਤਾਬਕ ਤਾਜ਼ਾ ਮੀਂਹਾਂ ਉਪਰੰਤ ਪ੍ਰਸ਼ਾਸਨੀ ਉਪਰਾਲੇ ਯਤਨਾਂ ਦੇ ਮੁਤਾਬਕ ਕਾਰਗਰ ਸਾਬਤ ਨਹੀਂ ਹੋਏ। ਬੀਤੇ ਦਿਨ੍ਹੀਂ ਰਾਜਸਭਾ ਮੈਂਬਰ ਸੰਤ ਬਲਬੀਰ ਸਿੰਘ ਸੀਚੇਵਾਲ ਨੇ ਪਿੰਡ ਦੀ ਮਾੜੀ ਸਥਿਤੀ ਕਾਰਨ ਦੌਰਾ ਕੀਤਾ ਸੀ। ਉਨ੍ਹਾਂ ਦੀ ਕਾਰਕੁੱਨ ਟੀਮ ਲਗਾਤਾਰ ਰਾਹਤ ਕਾਰਜਾਂ 'ਤੇ ਜੁਟੀ ਹੋਈ ਹੈ।

ਮਹਿਰਾਜਵਾਲਾ ਡਰੇਨ (ਸੇਮ ਨਾਲਾ) ਦੇ ਗਲਤ ਡੀਜਾਇਨ ਕਾਰਨ ਪਿੰਡ ਮਿੱਡਾ ਨਾਲ ਸਾਲ-ਦੋ ਸਾਲ ਮਗਰੋਂ ਜੱਗੋਂ ਤੇਰਵੀਂ ਹੋ ਜਾਂਦੀ ਹੈ। ਪਿੰਡ ਮਿੱਡਾ ਦੇ ਕਿਸਾਨ ਗੁਰਪ੍ਰੀਤ ਸਿੰਘ ਦਾ ਕਹਿਣਾ ਸੀ ਕਿ 1997 ਵਿੱਚ ਅਕਾਲੀ-ਭਾਜਪਾ ਸਰਕਾਰ ਸਮੇਂ ਸਿਆਸੀ ਦਬਾਅ ਕਾਰਨ ਤਰਖਾਣਵਾਲਾ ਤੋਂ ਉੜਾਂਗ ਨੂੰ ਬਣਨ ਵਾਲੀ ਡਰੇਨ ਨੂੰ ਵਾਇਆ ਮਿੱਡਾ ਕਰ ਦਿੱਤਾ। ਗਿਆ। ਜੇਕਰ ਸਹੀ ਸਰਵੇ ਕਰਵਾ ਡਰੇਨ ਅਰਨੀਵਾਲਾ ਡਰੇਨ 'ਚ ਪਾਈ ਜਾਣੀ ਸੀ। ਜਿਸ ਨਾਲ ਮੀਂਹਾਂ ਸਮੇਂ ਇਹ ਖੇਤਰ ਬਰਸਾਤੀ ਖ਼ਰਾਬਿਆਂ ਤੋਂ ਬਚ ਜਾਣਾ ਸੀ। ਉਨ੍ਹਾਂ ਕਿਹਾ ਕਿ ਸੇਮ ਨਾਲਿਆਂ ਦਾ ਮੁੜ ਸਰਵੇ ਕਰਵਾ ਮੁੜ ਤੋਂ ਸਹੀ ਲੇਬਲ ਨਾਲ ਬਣਾਉਣ ਮੰਗ ਕੀਤੀ। 

ਬਲਾਕ ਸੰਮਤੀ ਮੈਂਬਰ ਭਗਵੰਤ ਸਿੰਘ ਮਿੱਡਾ ਨੇ ਕਿਹਾ ਕਿ ਉਨ੍ਹਾਂ ਦੇ ਪਿੰਡ 'ਚ ਹੁਣ ਇੰਨੇ ਦਿਨਾਂ ਮਗਰੋਂ ਸੇਮ ਨਾਲੇ 'ਚ ਇੱਕ ਫੁੱਟ ਪਾਣੀ ਘਟਿਆ ਹੈ। ਜਦਕਿ ਖੇਤਾਂ 'ਚ ਸਥਿਤੀ ਪਹਿਲਾਂ ਵਾਂਗ ਹੀ ਹੈ। ਖੇਤਾਂ ਵਿੱਚ ਖੜ੍ਹੇ ਪਾਣੀ ਦੀ ਨਿਕਾਸੀ ਲਈ ਪ੍ਰਸ਼ਾਸਨ ਮੱਦਦ ਸ਼ੁਰੂ ਨਹੀਂ ਹੋ ਸਕੀ। ਕਿਸਾਨ ਆਪਣੇ ਪੱਧਰ 'ਤੇ ਮੋਟਰ ਵਗੈਰਾ ਲਗਾ ਕੇ ਪਾਣੀ ਨਿਕਾਸੀ ਕਰ ਰਹੇ ਹਨ। ਮੀਂਹਾਂ ਦੇ ਮਾਰੂ ਹਾਲਾਤਾਂ 'ਚ ਜਵਾਬਦੇਹੀ ਵਾਲੀ ਸਥਿਤੀ ਕਾਰਨ ਮੁੱਖ ਮੰਤਰੀ ਦੀ ਫੇਰੀ ਪ੍ਰਬੰਧਾਂ ਨੂੰ ਪੁਖਤਾ ਬਣਾਉਣ 'ਚ ਪ੍ਰਸ਼ਾਸਨ ਹੱਦੋਂ ਵੱਧ ਚੌਕਸੀ ਵਿਖਾ ਰਿਹਾ ਹੈ।

ਜ਼ਿਕਰਯੋਗ ਹੈ ਕਿ ਮੀਂਹਾਂ ਦੌਰਾਨ ਪ੍ਰਭਾਵਿਤ ਪਿੰਡਾਂ 'ਚ ਰਾਹਤ ਕਾਰਜਾਂ ਸਿਆਸੀ ਦਖ਼ਲਅੰਦਾਜ਼ੀ ਖਿਲਾਫ਼ ਪੀੜਤ ਲੋਕਾਂ ਨੂੰ ਬਚਾਅ ਖਾਤਰ ਸੜਕਾਂ 'ਤੇ ਉੱਤਰ ਕੇ ਰੋਹ ਜਤਾਉਣਾ ਪਿਆ। ਸੂਤਰਾਂ ਮੁਤਾਬਰਕ ਉਹ ਸਮੁੱਚੀਆਂ ਰਿਪੋਰਟਾਂ ਮੁੱਖ ਮੰਤਰੀ ਦਫ਼ਤਰ ਤੱਕ ਪੁੱਜਦੀਆਂ ਰਹੀਆਂ ਹਨ। 

ਮਾਰੂ ਮੀਂਹ: ਪ੍ਰਸ਼ਾਸਨ ਦੇ ਫਿੱਕੇ ਕਦਮਾਂ ‘ਤੇ ਭਾਰੀ ਪੈ ਰਹੇ ਸੰਤ ਸੀਚੇਵਾਲ ਦੇ ਮੱਦਦੀ ਹੱਥ

-ਪਾਣੀਆਂ ‘’ਚ ਘਿਰੇ ਖੇਤਾਂ ‘ਚ ਮੁੜ ਹਰਿਆਲੀ ਲਈ ਵੰਡੇ ਜਾ ਰਹੇ ਬਾਸਮਤੀ ਬੀਜ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਰਾਜ ਸਭਾ ਮੈਂਬਰ ਅਤੇ ਵਾਤਾਵਰਣ ਪ੍ਰੇਮੀ ਸੰਤ ਬਲਬੀਰ ਸਿੰਘ ਸੀਚੇਵਾਲ ਦੇ ਮੱਦਦੀ ਹੱਥ ਲੰਬੀ ਹਲਕੇ ਸਮੇਤ ਮਾਲਵੇ ਭਰ ’ਚ ਮਾਰੂ ਮੀਂਹਾਂ ਮਗਰੋਂ ਪੀੜਤਾਂ ਦੀ ਬਾਂਹ ਫੜਨ ਲਈ ਲੋਕਾਂ ਤੱਕ ਪੁੱਜਣ ਲੱਗੇ ਹਨ। ਉਨ੍ਹਾਂ ਦੀ ਸੇਵਾਦਾਰਾਂ ਟੀਮ ਨੇ ਪਾਣੀ ਨਾਲ ਭਰੇ ਖੇਤਾਂ ਨੂੰ ਮੁੜ ਸੁਰਜੀਤੀ ਦੇ ਰਾਹ ਪਾਉਣ ਲਈ ਕਿਸਾਨਾਂ ਦੀ ਮੰਗ ’ਤੇ ਸੈਂਕੜੇ ਏਕੜ ਰਕਬੇ ਲਈ ਬਾਸਮਤੀ ਦੇ ਬੀਜ ਉਨ੍ਹਾਂ ਤੱਕ ਪਹੁੰਚਾ ਦਿੱਤੇ ਹਨ। ਨਾਲ ਹੀ ਉਨ੍ਹਾਂ ਦੀ ਟੀਮ ਵੱਲੋਂ ਪੀੜਤ ਪਿੰਡਾਂ ਵਿੱਚ ਪਸ਼ੂਆਂ ਲਈ ਲਗਾਤਾਰ ਹਰੇ-ਚਾਰੇ ਦੀ ਸੇਵਾ ਦੀ ਲਗਾਤਾਰ ਜਾਰੀ ਹੈ। ਸੰਤ ਸੀਚੇਵਾਲ ਦੀ ਨਿਸ਼ਕਾਮ ਸੇਵਾ ਭਾਵਨਾ ਜੱਗਜਾਹਰ ਹੈ। ਇਨ੍ਹਾਂ ਉਪਰਾਲਿਆਂ ਮੁਹਰੇ ਸਰਕਾਰੀ-ਕਮ-ਪ੍ਰਸ਼ਾਸਨੀ ਉਪਰਾਲੇ ਫਿੱਕੇ ਨਜ਼ਰਾ ਰਹੇ ਹਨ।

ਜੇਕਰ ਰਾਜਸਭਾ ਮੈਂਬਰ ਸੀਚੇਵਾਲ ਦੀ ਕਾਰਕੁਨ ਟੀਮ ਵੱਲੋਂ ਜਾਰੀ ਪ੍ਰੇੱਸ ਬਿਆਨ ਦੇ ਸ਼ਬਦਾਂ ‘ਤੇ ਨਜ਼ਰ ਮਾਰੀਏ ਤਾਂ ਉਨ੍ਹਾਂ ਵਿਚੋਂ ਮੀਂਹਾਂ ਦੇ ਕਾਫੀ ਦਿਨਾਂ ਬਾਅਦ ਵੀ ਲੋਕਾਂ ਦੀ ਵਿਥਿਆ ਝਲਕਦੀ ਹੈ ਕਿ ਲੋਕ ਬੇਵੱਸ ਅਤੇ ਲਾਚਾਰ ਨਜ਼ਰ ਆ ਰਹੇ ਹਨ। ‘ਮੁਕਤਸਰ, ਗਿੱਦੜਬਾਹਾ, ਬੁੱਢਲਾਡਾ ਤੇ ਮਲੋਟ ਖੇਤਰਾਂ ਸਮੇਤ ਮਾਲਵੇ ਦੇ ਵੱਡੇ ਹਿੱਸੇ ਵਿੱਚ ਪਾਣੀ ਦੀ ਨਿਕਾਸੀ ਨਾ ਹੋਣ ਕਾਰਨ ਸਥਿਤੀ ਬੜੀ ਗੰਭੀਰ ਬਣੀ ਹੋਈ ਹੈ।’

ਜਿਸਤੋਂ ਜਾਪਦਾ ਹੈ ਸਰਕਾਰ ਉਪਰਾਲੇ ਮਾਲਵੇ ਭਰ ਵਿਚ ਲੋਕਾਂ ਦੀ ਮੱਦਦ ਕਰਨ ‘ਚ ਕਮਜੋਰ ਸਾਬਤ ਹੋਏ ਹਨ। ਜਿਕਰਯੋਗ ਹੈ ਕਿ ਸੰਤ ਸੀਚੇਵਾਲ ਹੁਰਾਂ ਦੇ ਕਾਰਕੁਨ ਮੀਂਹ ਪ੍ਰਭਾਵਤ ਖੇਤਰਾਂ ਵਿੱਚ ਜਮੀਨ ਲੇਬਲ ’ਤੇ ਸੇਵਾ ਨਿਭਾ ਰਹੇ ਹਨ। ਉਹ ਖੁਦ ਵੀ ਬੀਤੇ ਦਿਨੀਂ ਲੰਬੀ ਹਲਕੇ ਵਿਚ ਜਮੀਨੀ ਹਕੀਕਤ ਵਾਚ ਕੇ ਗਏ ਹਨ।

ਸੀਚੇਵਾਲ ਟੀਮ ਦੇ ਮੈਂਬਰ ਸੰਤ ਸੁਖਜੀਤ ਸਿੰਘ ਤੇ ਸੁਰਜੀਤ ਸਿੰਘ ਸ਼ੰਟੀ ਦੱਸਿਆ ਕਿ ਸ਼ੁਰੁਆਤੀ ਤੌਰ ’ਤੇ ਮੀਂਹ ਤੋਂ ਸੌ ਫੀਸਦੀ ਪ੍ਰਭਾਵਿਤ ਪਿੰਡ ਮਿੱਡਾ ਵਿਖੇ 1509 ਤੇ 1692 ਕਿਸਮ ਦੀ ਬਾਸਮਤੀ ਦੇ ਸਾਢੇ 6 ਕੁਇੰਟਲ ਬੀਜ ਵੰਡਿਆ ਗਿਆ। ਇਸ ਬੀਜ ਨਾਲ 150 ਏਕੜ ‘ਚ ਬਾਸਮਤੀ ਬੀਜਾਂਦ ਹੋ ਸਕੇਗੀ। ਸੁਰਜੀਤ ਸਿੰਘ ਸ਼ੰਟੀ ਨੇ ਦੱਸਿਆ ਕਿ ਬਾਸਮਤੀ ਦਾ ਹੋਰ ਬੀਜ ਵੀ ਭੇਜਿਆ ਜਾ ਰਿਹਾ ਹੈ। ਪਿਛਲੇ ਤਿੰਨ ਦਿਨਾਂ ਤੋਂ ਲਗਾਤਾਰ ਹਰੇ ਚਾਰੇ ਦੀ ਢੋਆ ਢੋਆਈ ਵਾਸਤੇ ਟੱਰਕ ਅਤੇ ਟ੍ਰੈਕਟਰ ਟਰਾਲੀਆਂ ਵਰਤੀਆਂ ਜਾ ਰਹੀਆਂ ਹਨ।

ਉਨ੍ਹਾਂ ਦੱਸਿਆ ਕਿ ਸੰਤ ਸੀਚੇਵਾਲ ਨੇ ਇਸ ਇਲਾਕੇ ਪਿੰਡਾਂ ਵਿੱਚ ਮਿੱਡਾ, ਬਾਮ ਡਰੇਨ, ਤਰਖਾਣਵਾਲਾ, ਲਖਮੀਰੇਆਣਾ, ਲੱਕੜਵਾਲਾ ਤੇ ਮਹਾਂਬੱਧਰ ਤੇ ਹੋਰ ਪਿੰਡਾਂ ਦਾ ਦੌਰਾ ਕੀਤਾ ਸੀ। ਇੱਥੇ ਹਜ਼ਾਰਾਂ ਏਕੜ ਲੋਕਾਂ ਦੀ ਫਸਲ ਪਾਣੀ ਵਿੱਚ ਡੁੱਬ ਗਈ ਹੈ। ਸੁਖਜੀਤ ਸਿੰਘ ਸੀਚੇਵਾਲ ਨੇ ਦੱਸਿਆ ਕਿ ਮਾਲਵੇ ਦੇ ਵੱਡੇ ਹਿੱਸੇ ਵਿੱਚ ਪਾਣੀ ਦੀ ਨਿਕਾਸੀ ਨਾ ਹੋਣ ਕਾਰਨ ਸਥਿਤੀ ਬੜੀ ਗੰਭੀਰ ਬਣੀ ਹੋਈ ਹੈ। ਉਨ੍ਹਾਂ ਦੱਸਿਆ ਕਿ ਸੰਤ ਬਲਬੀਰ ਸਿੰਘ ਸੀਚੇਵਾਲ ਦੀਆਂ ਹਦਾਇਤਾਂ `ਤੇ ਉਹ ਇਲਾਕੇ ਦਾ ਸਰਵੇ ਕਰਕੇ ਪਾਣੀ ਕੱਢਣ ਦਾ ਪੱਕਾ ਪ੍ਰਬੰਧ ਕਰਨ ਦਾ ਯਤਨ ਕਰਨਗੇ। ਇਲਾਕੇ ਦੇ ਲੋਕ ਵੀ ਇਸ ਕੰਮ ਵਿੱਚ ਉਨ੍ਹਾਂ ਦਾ ਸਾਥ ਦੇ ਰਹੇ ਹਨ।

ਦੂਜੇ ਪਾਸੇ ਜਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਵਿਨੀਤ ਕੁਮਾਰ ਦਾ ਕਹਿਣਾ ਸੀ ਕਿ ਪੀੜਤ ਲੋਕਾਂ ਦੀ ਮੰਗ ਮੁਤਾਬਿਕ ਹਰਾ-ਚਾਰਾ ਅਤੇ ਤਿਰਪਾਲਾਂ ਆਦਿ ਪਹੁੰਚਾਈਆਂ ਜਾ ਰਹੀਆਂ ਹਨ, ਪ੍ਰਸ਼ਾਸਨ ਦਾ ਅਮਲਾ ਪਿੰਡ ਤਾਇਨਾਤ ਹੈ। ਖੇਤਾਂ ਵਿਚੋਂ ਪਾਣੀ ਨਿਕਾਸੀ ਦਾ ਕਾਰਜ ਜਾਰੀ ਹੈ।

 

ਸੁਲਤਾਨਪੁਰ ਲੋਧੀ ਤੋਂ ਚੱਲ ਰਹੀ ਪਸ਼ੂਆਂ ਲਈ ਹਰਾ-ਚਾਰੇ ਦੀ ਸੇਵਾ 

ਹੜ੍ਹ ਰੋਕੂ ਕਮੇਟੀ ਦੇ ਪ੍ਰਧਾਨ ਕੁਲਵਿੰਦਰ ਸਿੰਘ ਨੇ ਦੱਸਿਆ ਕਿ ਲੋਹੀਆਂ ਤੇ ਸੁਲਤਾਨਪੁਰ ਲੋਧੀ ਇਲਾਕੇ ਦੇ ਕਿਸਾਨ ਮਾਲਵੇ ਦੇ ਪੀੜਤ ਕਿਸਾਨਾਂ ਤੇ ਮਜ਼ਦੂਰਾਂ ਨਾਲ ਖੜੇ ਹਨ। ਉਨ੍ਹਾਂ ਕਿਹਾ ਕਿ ਹਰੇ ਚਾਰੇ ਦੀ ਦੀ ਕੋਈ ਕਮੀ ਨਹੀਂ ਆਉਣ ਦਿੱਤੀ ਜਾਵੇਗੀ। ਪਸ਼ੂਆਂ ਲਈ ਹਰੇ ਚਾਰੇ ਦਾ ਅਚਾਰ ਵੀ ਭੇਜਿਆ ਗਿਆ ਹੈ। ਇਹ ਅਚਾਰ ਸਵਰਨ ਸਿੰਘ ਕੌੜਾ ਅਤੇ ਸੁਖਵਿੰਦਰ ਸਿੰਘ ਗੱਟੀ ਨੇ ਸ਼ਾਂਝੇ ਤੌਰ ’ਤੇ 200 ਗੱਠਾਂ ਭੇਜੀਆਂ ਹਨ। ਸਰਪੰਚ ਜੋਗਾ ਸਿੰਘ ਨੇ ਦੱਸਿਆ ਕਿ ਬਾਸਮਤੀ ਦੀਆਂ ਦੋਵੇਂ ਕਿਸਮਾਂ ਦੇ ਬੀਜ ਦੋਆਬੇ ਵਿੱਚ ਵੀ ਪਨੀਰੀ ਬੀਜੀ ਜਾ ਰਹੀ ਹੈ। ਗਿੱਦੜਪਿੰਡੀ ਦੇ ਲੋਕਾਂ ਵੱਲੋਂ ਵੀ ਇੱਕ ਟਰੱਕ ਹਰੇ ਚਾਰੇ ਦਾ ਭੇਜਿਆ ਗਿਆ।

ਸਿਹਤ ਸੰਭਾਲੀ ਮਗਰੋਂ ਵੱਡੇ ਬਾਦਲ ਮੁੜ ਜਨਤਕ ਹੋਏ, ਪੇਂਡੂ ਜਰਨੈਲਾਂ ਲਈ 'ਤੰਗ' ਹੋਏ 'ਵੱਡੇ' ਘਰ ਦੇ ਬੂਹੇ

ਲੰਬੀ: ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਆਪਣੀ ਸਿਹਤ ਸੰਭਾਲੀ ਦੇ ਬਾਅਦ ਅੱਜ ਲੋਕਾਂ ਦੇ ਦੁੱਖ-ਸੁੱਖ ਵਿੱਚ ਸ਼ਰੀਕ ਹੋਏ। ਸ੍ਰੀ ਬਾਦਲ ਬੁੱਧਵਾਰ ਨੂੰ ਪਿੰਡ ਮਾਨਾ 'ਚ ਉਨ੍ਹਾਂ ਦੇ ਬਾਗਾਂ ਦੇ ਮੁਨੀਮ ਕ੍ਰਿਸ਼ਨ ਸ਼ਰਮਾ ਦੇ ਦਿਹਾਂਤ 'ਤੇ ਦੁੱਖ ਸਾਂਝਾ ਕਰਨ ਲਈ ਪਿੰਡ ਮਾਨ ਪੁੱਜੇ। 

ਜਾਣਕਾਰੀ ਮੁਤਾਬਕ ਪਰਸੋਂ 60 ਸਾਲਾ ਕ੍ਰਿਸ਼ਨ ਸ਼ਰਮਾ ਨੂੰ ਬਾਦਲ ਪਰਿਵਾਰ ਦੇ ਬਾਗ 'ਚ ਡਿਊਟੀ ਦੌਰਾਨ ਦਿਲ ਦਾ ਦੌਰਾ ਪਿਆ ਸੀ। ਬਠਿੰਡਾ ਦੇ ਨਿੱਜੀ ਹਸਪਤਾਲ 'ਚ ਦੋ ਸਟੰਟ ਪਾਉਣ ਦੇ ਬਾਵਜੂਦ ਉਹ ਬਚ ਨਹੀਂ ਸਕਿਆ। ਸ੍ਰੀ ਬਾਦਲ ਨੇ ਮ੍ਰਿਤਕ ਦੇ ਲੜਕੇ ਚਰਨਜੀਤ ਸ਼ਰਮਾ ਨਾਲ ਦੁੱਖ ਸਾਂਝਾ ਕੀਤਾ ਅਤੇ ਸ਼ਰਮਾ ਨੂੰ ਵਫ਼ਾਦਾਰ ਸਾਥੀ ਦੱਸਿਆ।

ਜ਼ਿਕਰਯੋਗ ਹੈ ਕਿ ਪਿੱਛੇ ਜਿਹੇ ਸਿਹਤ ਨਾਸਾਜ਼ ਹੋਣ ਕਾਰਨ ਵੱਡੇ ਬਾਦਲ ਚੰਡੀਗੜ੍ਹ 'ਚ ਜ਼ੇਰੇ ਇਲਾਜ ਰਹੇ ਸਨ। ਉਸਦੇ ਬਾਅਦ ਡਾਕਟਰਾਂ ਦੀ ਹਦਾਇਤਾਂ ਮੁਤਾਬਤ ਚੰਡੀਗੜ੍ਹ ਰਿਹਾਇਸ਼ 'ਤੇ ਸਮਾਂ ਲੰਘਾਉਣ ਉਪਰੰਤ ਬੀਤੀ 11 ਜੁਲਾਈ ਨੂੰ ਪਿੰਡ ਬਾਦਲ ਪਰਤੇ ਸਨ। ਉਸਦੇ ਬਾਅਦ ਉਹ ਪਹਿਲੀ ਵਾਰ ਜਨਤਕ ਹੋਏ। ਜਦਕਿ ਚੰਡੀਗੜ੍ਹੋਂ ਵਾਪਸੀ ਉਪਰੰਤ ਸਾਬਕਾ ਮੁੱਖ ਮੰਤਰੀ ਨੇ ਇੱਕ ਫੇਰੀ ਲਗਾ ਕੇ ਆਪਣੇ ਖੇਤਾਂ ਦੀ ਰੌਣਕ ਪਰਖੀ ਸੀ। 

ਜਾਣਕਾਰੀ ਮੁਤਾਬਕ ਸ੍ਰੀ ਬਾਦਲ ਜਨਤਕ ਮੁਲਾਕਾਤਾਂ ਤੋਂ ਗੁਰੇਜ਼ ਕਰ ਰਹੇ ਹਨ। ਸੂਤਰਾਂ ਮੁਤਾਬਕ ਵਿਧਾਨਸਭਾ ਚੋਣਾਂ 'ਚ ਕਰਾਰੀ ਹਾਰ ਉਪਰੰਤ ਅਕਾਲੀ ਦਲ ਦੇ ਸਥਾਨਕ ਪੇਂਡੂ ਜਰਨੈਲਾਂ ਲਈ ਵੱਡੇ ਘਰ ਦੇ ਬੂਹੇ ਤੰਗ ਹੋਏ ਹਨ। ਜਨਤਕ ਸਫ਼ਾਂ 94 ਸਾਲ ਦੀ ਉਮਰ 'ਚ ਮਿਲੀ ਸ਼ਿਕਸਤ ਨੂੰ ਹਾਈਕਮਾਂਡ ਨੂੰ ਘੇਰਾਬੰਦੀ 'ਚ ਰੱਖਣ ਵਾਲੇ ਹਲਕੇ ਭਰ ਦੇ ਆਗੂਆਂ ਨੂੰ ਜੁੰਮੇਵਾਰ ਮੰਨ ਰਹੀਆਂ ਹਨ। 

ਬੀਤੇ ਦਿਨ੍ਹੀਂ ਹਰਸਿਮਰਤ ਕੌਰ ਬਾਦਲ ਵੀ ਹਲਕੇ 'ਚ ਕਈ ਪਰਿਵਾਰਾਂ 'ਚ ਮੌਤਾਂ 'ਤੇ ਦੁੱਖ ਸਾਂਝਾਂ ਕਰਨ ਪੁੱਜੇ ਸਨ। ਦੱਸਿਆ ਜਾ ਰਿਹਾ ਹੈ ਕਿ ਕਰਾਰੀ ਹਾਰ ਉਪਰੰਤ ਨਿਰਵਿਵਾਦ ਅਤੇ ਲੋਕ ਜੁੜਾਅ ਵਾਲੇ ਨਵੇਂ ਹਾਲਾਤਾਂ ਨੂੰ ਜ਼ਮੀਨ ' ਸੁਰਜੀਤ ਕਰਨ ਲਈ ਨਜ਼ਰਸ਼ਾਨੀ ਕਰ ਰਿਹਾ ਹੈ। ਜਿਸਦੇ ਨਤੀਜ਼ੇ ਅਗਾਮੀ ਨੇੜਲੇ ਸਮੇਂ ਕਈ ਬਦਲਵੇਂ ਚਿਹਰਿਆਂ ਰਾਹੀਂ ਸਾਹਮਣੇ ਆ ਸਕਦੇ ਹਨ ।

ਮੁੱਢਲੇ ਦਸਤਾਵੇਜ਼ੀ ਅੰਦਾਜ਼ੇ: ਲੰਬੀ ਹਲਕੇ 'ਚ ਮੀਂਹ ਨੇ 41 ਹਜ਼ਾਰ ਏਕੜ ਫ਼ਸਲਾਂ ਦੀ ਪੋਚੀ ਫੱਟੀ

- ਵੇਰਵਿਆਂ ਮੁਤਾਬਕ ਸਰਾਵਾਂ ਜੈਲ 'ਚ ਕਰੀਬ 34 ਹਜ਼ਾਰ ਏਕੜ ਰਕਬੇ ਦੀ ਫ਼ਸਲ ਪਾਣੀਆਂ ਦੇ ਹੇਠਾਂ ਲੁਕੀ

- ਪੰਨੀ ਫੱਤਾ ਤੇ ਮਿੱਡਾ ਦਾ ਸੌ ਫ਼ੀਸਦੀ ਖੇਤੀ ਰਕਬਾ ਖਰਾਬੇ ਦੀ ਮਾਰ ਹੇਠਾਂ

- ਡੀ.ਸੀ. ਮੁਕਤਸਰ ਵੱਲੋਂ ਮੀਂਹ ਪ੍ਰਭਾਵਿਤ ਕਈ ਪਿੰਡਾਂ ਦਾ ਦੌਰਾ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਵਰ੍ਹਿਆਂ ਤੋਂ ਸੇਮ ਦੇ ਝੰਬੇ ਹੋਏ ਲੰਬੀ ਹਲਕੇ ਦੀ ਕਿਰਸਾਨੀ ਦੀ ਮੌਨਸੂਨ ਦੀ ਪਹਿਲੀ ਬਰਸਾਤ ਨੇ ਤ੍ਰਾਹ ਕੱਢ ਦਿੱਤੇ ਹਨ। ਮੀਂਹ ਕਾਰਨ ਪ੍ਰਸ਼ਾਸਨ ਦੇ ਫੋਕੇ ਉਪਰਾਲਿਆਂ ਵਿਚਕਾਰ ਦਰਜਨਾਂ ਪਿੰਡ ਹੜ੍ਹਾਂ ਦੀ ਸਥਿਤੀ 'ਚ ਘਿਰੇ ਹੋਏ ਹਨ। ਹਲਕੇ 'ਚ ਮੀਂਹ ਨਾਲ ਘਿਰੀਆਂ ਜ਼ਮੀਨੀ ਬਾਰੇ ਮੁੱਢਲੇ ਮਾਲ ਅਤੇ ਖੇਤੀ ਸੂਤਰਾਂ ਦੇ ਅੰਕੜਿਆਂ ਮੁਤਾਬਕ ਹਲਕੇ ਦਾ ਕਰੀਬ 41 ਹਜ਼ਾਰ ਏਕੜ ਰਕਬੇ 'ਚ ਖੜ੍ਹੀ ਮੀਂਹਾਂ ਦੇ ਪਾਣੀ ਹੇਠਾਂ ਲੁਕੀ ਹੋਈ ਹੈ।

ਮਲੋਟ ਮਾਲ ਖੇਤਰ ਅਧੀਨ 145851 ਰਕਬੇ 'ਚੋਂ ਮੁੱਢਲੇ ਸਰਕਾਰੀ ਸਰਵੇ ਮੁਤਾਬਕ 66070 ਏਕੜ ਰਕਬਾ ਖ਼ਰਾਬੇ ਦੇ ਅਧੀਨ ਹੈ। ਸਭ ਤੋਂ ਬੁਰੀ ਤਰ੍ਹਾਂ ਪ੍ਰਭਾਵਿਤ ਹਲਕੇ ਦੀ ਸਰਾਵਾਂ ਜੈਲ ਦੇ ਪਿੰਡਾਂ ਵਿੱਚ ਕਰੀਬ 34 ਹਜ਼ਾਰ ਏਕੜ ਰਕਬਾ 80 ਤੋਂ 100 ਫ਼ੀਸਦੀ ਨੁਕਸਾਨ ਵਿੱਚ ਹੈ। ਖੇਤੀਬਾੜੀ ਸੂਤਰਾਂ ਮੁਤਾਬਕ ਲੰਬੀ ਬਲਾਕ ਦੀ ਖੇਤੀ ਬੈਲਟ 'ਚ ਤੱਪਾਖੇੜਾ, ਆਧਨੀਆਂ, ਦਿਉਣਖੇੜਾ, ਫਤਿਹਪੁਰ ਮਨੀਆਂਵਾਲਾ, ਥਰਾਜਵਾਲਾ ਆਦਿ ਦਾ ਸੱਤ ਹਜ਼ਾਰ ਏਕੜ ਰਕਬਾ ਮੀਂਹਾਂ ਨੇ ਲਗਪਗ ਬਰਬਾਦ ਕਰ ਦਿੱਤਾ ਹੈ। ਜਿਸਦੇ ਟਾਂਵੇਂ-ਟਾਂਵੇਂ ਬਚਣ ਦੇ ਆਸਾਰ ਆਗਾਮੀ ਮੌਸਮ 'ਤੇ ਨਿਰਭਰ ਹਨ।

ਮਾਲ ਵਿਭਾਗ ਲੰਬੀ ਵੱਲੋਂ ਸਰਕਾਰ ਨੂੰ ਭੇਰੇ ਨੁਕਸਾਨ ਦੇ ਮੁੱਢਲੇ ਅੰਦਾਜ਼ਿਆਂ ਮੁਤਾਬਕ ਬਲਾਕ ਦੇ ਸਿਰਫ਼ ਦੋ ਪਿੰਡ ਤੱਪਾਖੇੜਾ 'ਚ 1880 ਏਕੜ ਤੇ ਦਿਉਣਖੇੜਾ 'ਚ 1240 ਏਕੜ ਰਕਬਾ ਪ੍ਰਭਾਵਿਤ ਹੋਇਆ ਹੈ।

ਸ਼ੁਰੂਆਤੀ ਤੌਰ 'ਤੇ ਪ੍ਰਭਾਵਤ ਮਕਾਨਾਂ ਦੀ ਗਿਣਤੀ 335 ਹੈ। ਹਲਕੇ ਵਿੱਚ ਸੇਮ ਨਾਲਿਆਂ ਦੀ ਗਲਤ ਬਣਤਰ ਨੇ ਸਰਾਵਾਂ ਜੈਲ ਦੀ ਕਿਰਸਾਨੀ ਨੂੰ ਡੁਬੋ ਕੇ ਰੱਖਿਆ ਹੋਇਆ ਹੈ।

ਪਿੰਡ ਪੰਨੀਵਾਲਾ ਫੱਤਾ ਦਾ ਸੌ ਫ਼ੀਸਦੀ ਰਕਬਾ 22 ਸੌ ਏਕੜ ਅਤੇ 3250 ਏਕੜ ਰਕਬੇ ਵਾਲੇ ਪਿੰਡ ਮਿੱਡਾ ਦਾ ਸੌ ਫ਼ੀਸਦੀ ਰਕਬਾ ਖਰਾਬੇ ਦੀ ਮਾਰ ਹੇਠ ਹੈ। ਪਿੰਡ ਮੋਹਲਾਂ,ਰਾਣੀਵਾਲਾ ਅਤੇ ਰੱਤਾਟਿੱਬਾ ਦੇ ਕੁੱਲ ਰਕਬੇ ਵਿੱਚ ਕਰੀਬ 80 ਤੋਂ 90 ਫ਼ੀਸਦੀ ਰਕਬੇ 'ਚ ਕਈ-ਕਈ ਫੁੱਟ ਪਾਣੀ ਖੜ੍ਹਾ ਹੈ।

ਪਿੰਡ ਆਲਮ ਵਾਲਾ 'ਚ 1700 ਏਕੜ, ਰੱਤਾਖੇੜਾ 'ਚ 12 ਸੌ ਏਕੜ, ਬੋਦੀਵਾਲਾ ਖੜਕ ਸਿੰਘ 'ਚ 17 ਸੌ, ਅਸਪਾਲ ਅਤੇ ਸਰਾਵਾਂ ਬੋਦਲਾ 15-15 ਸੌ ਏਕੜ, ਮਿੱਡਾ 'ਚ 3250 ਏਕੜ, ਪੱਕੀ ਟਿੱਬੀ 'ਚ 13 ਸੌ, ਮੋਹਲਾਂ 'ਚ 27 ਸੌ ਏਕੜ, ਰੱਤਾ ਟਿੱਬਾ 'ਚ 2180, ਰਾਣੀਵਾਲਾ 'ਚ 2873 ਏਕੜ, ਕਰਮ ਪੱਟੀ 'ਚ 14 ਸੌ ਏਕੜ, ਕੋਲਿਆਂਵਾਲੀ 'ਚ ਇੱਕ ਹਜ਼ਾਰ ਏਕੜ, ਛਾਪਿਆਂਵਾਲੀ 'ਚ ਪੰਜ ਸੋ ਏਕੜ, ਬੁਰਜ ਸਿੰਧਵਾਂ' ਚ 25 ਸੌ ਏਕੜ, ਡੱਬਵਾਲੀ ਢਾਬ 'ਚ ਇੱਕ ਹਜ਼ਾਰ ਅਤੇ ਸ਼ਾਮਖੇੜਾ 'ਚ 15 ਸੌ ਏਕੜ ਅਤੇ ਮਾਹਣੀਖੇੜਾ 'ਚ ਅੱਠ ਸੌ ਏਕੜ 'ਚ ਫ਼ਸਲ ਖ਼ਰਾਬ ਹੋ ਚੁੱਕੀ ਹੈ।

ਪੱਕੀ ਟਿੱਬੀ 'ਚ ਸੇਮਨਾਲੇ ਦੀ ਪਟੜੀ ਤੋਂ ਖੁਰਚੀ ਹੋਈ ਮਿੱਟੀ ਕਰਕੇ ਕਮਜ਼ੋਰ ਸਥਿਤੀ ਵਿਗੜੀ ਹੋਈ ਹੈ ਅਤੇ ਆਗਾਮੀ ਮੀਂਹਾਂ 'ਚ ਹੋਰ ਖ਼ਤਰਾ ਵਧਣ ਦੇ ਆਸਾਰ ਹਨ। ਅੱਜ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਵਿਨੀਤ ਕੁਮਾਰ ਨੇ ਤੱਪਾਖੇੜਾ ਸਮੇਤ ਹਲਕੇ ਦੇ ਕਈ ਮੀਂਹ ਪ੍ਰਭਾਵਿਤ ਪਿੰਡਾਂ ਦਾ ਦੌਰਾ ਕਰਕੇ ਸਥਿਤੀ ਦਾ ਜਾਇਜ਼ਾ ਲਿਆ।

ਤੱਪਾਖੇੜਾ ਦੇ ਨੀਟੂ ਨੇ ਦੋਸ਼ ਲਗਾਇਆ ਕਿ ਸੁੱਚਜੀ ਨਿਕਾਸੀ ਨਾ ਹੋਣ ਕਰਕੇ ਪਿੰਡ 'ਚ ਬਾਹਰੀ ਪਾਣੀ ਦਾ ਦਬਾਅ ਵਧ ਰਿਹਾ ਹੈ। ਪ੍ਰਸ਼ਾਸਨੀ ਅਮਲਾ ਸਿਰਫ਼ ਛੱਪੜ 'ਤੇ ਗੇੜਾ ਮਾਰ ਕੇ ਚਲਾ ਗਿਆ। ਜਦਕਿ ਮਾਹੂਆਣਾ ਵਾਲੇ ਪਾਸਿਓਂ ਆਉਂਦੇ ਪਾਣੀਆਂ ਕਾਰਨ ਸਭ ਤੋਂ ਖ਼ਤਰੇ ਨਾਲ ਜੂਝ ਰਹੇ ਬਾਹਰੀ ਮਕਾਨਾਂ ਦੀ ਸਾਰ ਲੈਣ ਕੋਈ ਨਹੀਂ ਪੁੱਜਿਆ।

ਡਿਪਟੀ ਕਮਿਸ਼ਨਰ ਵਿਨੀਤ ਕੁਮਾਰ ਦਾ ਪੱਖ ਲੈਣ ਖਾਤਰ ਕੋਈ ਫੋਨ ਕੀਤੇ ਗਏ ਪਰ ਉਨ੍ਹਾਂ ਕਾਲ ਰਸੀਵ ਨਹੀਂ ਕੀਤੀ। ਲੰਬੀ ਦੇ ਨਾਇਬ ਤਹਿਸੀਲਦਾਰ ਭੋਲਾ ਰਾਮ ਨੇ ਕਿਹਾ ਕਿ ਤੱਪਾਖੇੜਾ 'ਚ ਰਾਹਤ ਕਾਰਜ ਜਾਰੀ ਹਨ। -93178-26100

ਮੀਡੀਆ ਸਟਿੰਗ: ਮੁਕਤਸਰ ਪੁਲਿਸ ਲਾਈਨ 'ਚ ਸਿਖਲਾਈ ਸਰਟੀਫਿਕੇਟ ਲਈ ਬਿਨਾਂ ਰਸੀਦ ਵਸੂਲੇ ਜਾ ਰਹੇ ਹਜ਼ਾਰਾਂ ਰੁਪਏ

ਇਕਬਾਲ ਸਿੰਘ ਸ਼ਾਂਤ

 ਸ੍ਰੀ ਮੁਕਤਸਰ ਸਾਹਿਬ/ਲੰਬੀ: ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੀ ਪੁਲਿਸ ਲਾਈਨ 'ਚ ਸੂਬੇ ਵਿਚਲਾ ਅਸਲੀ 'ਬਦਲਾਅ' ਖੁੱਲ੍ਹੇਆਮ ਰੰਗ ਵਿਖਾ ਰਿਹਾ ਹੈ। ਪੁਲਿਸ ਲਾਈਨ 'ਚ ਅਸਲਾ ਨਵੀਨੀਕਰਨ (ਰਿਨਿਊਲ) ਲਈ ਰਾਈਫ਼ਲ ਵੈਲਫੇਅਰ ਟ੍ਰੇਨਿੰਗ ਸੈਂਟਰ ਦੇ ਸਰਟੀਫਿਕੇਟ ਲਈ ਹਜ਼ਾਰਾਂ ਰੁਪਏ ਵਸੂਲੇ ਜਾ ਰਹੇ ਹਨ। ਮਹਿੰਗੀ ਸਰਟੀਫਿਕੇਟ ਫੀਸ ਅਤੇ ਉੱਪਰੋਂ ਰਸੀਦ ਵੀ ਨਾ ਦੇਣ 'ਤੇ ਅਸਲਾ ਧਾਰਕਾਂ 'ਚ ਭਾਰੀ ਰੋਸ ਹੈ। ਇਸ ਨਾਲ ਜਨਤਾ 'ਚ ਭਗਵੰਤ ਮਾਨ ਸਰਕਾਰ ਦੀ ਬਦਲਾਅ ਨੀਤੀ ਦੇ ਉਲਟ 'ਸਾਖ਼' ਸਾਹਮਣੇ ਆ ਰਹੀ ਹੈ।

ਰਿਵਾਲਵਰ/ਪਿਸਟਲ ਲਾਇਸੰਸ ਦੇ ਨਵੀਨੀਕਰਨ ਲਈ ਦੋ ਹਜ਼ਾਰ ਰੁਪਏ ਤੇ ਬੰਦੂਕ ਲਈ ਅਸਲਾ ਧਾਰਕਾਂ ਤੋਂ ਇੱਕ ਹਜ਼ਾਰ ਲਏ ਜਾ ਰਹੇ ਹਨ। ਜਦਕਿ ਸਾਂਝ ਕੇਂਦਰਾਂ 'ਤੇ ਅਸਲਾ ਨਵੀਨੀਕਰਨ ਦੀ ਸਰਕਾਰੀ ਫੀਸ ਕਰੀਬ 4 ਹਜ਼ਾਰ ਰੁਪਏ ਇਸਤੋਂ ਵੱਖਰੀ ਹੈ। ਜ਼ਿਲ੍ਹੇ 'ਚ ਥਾਣਾ ਲੰਬੀ ਤਹਿਤ 'ਚ ਕਰੀਬ ਪੰਜ ਹਜ਼ਾਰ ਅਸਲਾ ਲਾਇਸੰਸ ਹਨ। ਖੇਤਰ ਵਿੱਚੋਂ ਬਿਨ੍ਹਾਂ ਰਸੀਦ ਰਕਮ ਵਸੂਲੀ ਬਾਰੇ ਜਨਤਕ ਸੂਚਨਾਵਾਂ 'ਤੇ ਇਸ ਪ੍ਰਤੀਨਿਧ ਨੇ ਪੁਲਿਸ ਲਾਈਨ ਪੁੱਜ ਕੇ ਬਿਨ੍ਹਾਂ ਰਸੀਦ ਤੋਂ ਹਜ਼ਾਰਾਂ ਰੁਪਏ ਦੀ ਵਸੂਲੀ ਨੂੰ ਅੱਖੀਂ ਵਾਚਿਆ ਅਤੇ ਮੌਕੇ ਦੇ ਵੀਡੀਓ ਤੱਥ ਜੁਟਾਏ। ਰੇਂਜ ਆਰਮੋਰ ਬਰਾਂਚ ਵਿਖੇ ਤਿੰਨ ਦਿਨਾਂ ਵਾਲੀ ਅਸਲਾ ਸਿਖਲਾਈ ਕਰੀਬ ਸਵਾ ਤਿੰਨ ਮਿੰਟਾਂ 'ਚ ਨਿਪਟਾਈ ਜਾ ਰਹੀ ਹੈ।

ਹਕੀਕਤ ਵਿੱਚ ਅਸਲਾ ਨਵੀਨੀਕਰਨ ਦੇ ਨਾਂਅ 'ਤੇ ਪੁਲਿਸ ਲਾਈਨ 'ਚ ਅਸਲੇ ਜਿਹੇ ਗੰਭੀਰ ਮਸਲੇ 'ਤੇ ਸਿਖਲਾਈ ਦੇ ਨਾਂਅ 'ਤੇ ਸਿੱਧਾ ਖਿਲਵਾੜ ਹੋ ਰਿਹਾ ਹੈ। ਅਸਲਾ ਨਵੀਨੀਕਰਨ 'ਚ ਬੇਹੱਦ ਮਹਿੰਗੀ ਅਤੇ 'ਫੋਕੀ' ਸਿਖਲਾਈ ਭਗਵੰਤ ਮਾਨ ਸਰਕਾਰ ਲਈ ਬਦਨਾਮੀ ਦਾ ਦਾਗ ਬਣ ਰਹੇ ਹਨ। ਸੰਗੀਨਾਂ ਦੇ ਸ਼ੌਕੀਨ ਅਸਲਾ ਧਾਰਕ ਕਿਸੇ ਨਵੇਂ ਪੰਗੇ 'ਚ ਪੈਣ ਦੀ ਜਗ੍ਹਾ ਦੁੱਖੀ ਮਨ ਨਾਲ ਹਜ਼ਾਰਾਂ ਰੁਪਏ ਦੀ ਕਥਿਤ ਚੱਟੀ ਭੁਗਤ ਰਹੇ ਹਨ। ਆਰਥਿਕਤਾ ਨਾਲ ਜੁੜਿਆ ਅਸਲਾ ਨਵੀਨੀਕਰਨ ਲਈ ਇਹ ਫੰਡਾ ਪਿੱਛੇ ਜਿਹੇ ਸ਼ੁਰੂ ਹੋਇਆ ਹੈ। ਸੂਤਰਾਂ ਮੁਤਾਬਕ ਹੁਣ ਪੁਲਿਸ ਲਾਈਨ ਤੋਂ ਨੇੜਲੀ ਨਵੀਨੀਕਰਨ ਤਰੀਕ ਵਾਲੇ ਅਸਲਾ ਧਾਰਕਾਂ ਨੂੰ ਸਿੱਧਾ ਸੱਦਿਆ ਜਾ ਰਿਹਾ ਹੈ, ਤਾਂ ਜੋ ਕਥਿਤ 'ਬਿਨ੍ਹਾਂ ਰਸੀਦ' ਵਾਲੇ ਸਰਟੀਫਿਕੇਟ ਵੱਧ ਤੋਂ ਵੱਧ ਜਾਰੀ ਹੋ ਸਕਣ।

ਲਾਇਸੰਸ ਨਵੀਨੀਕਰਨ ਲਈ ਸਿਖਲਾਈ ਸਰਟੀਫਿਕੇਟ ਲੈਣ ਪੁੱਜੇ ਕਿੱਲਿਆਂਵਾਲੀ ਵਾਸੀ ਲਖਵਿੰਦਰ ਸਿੰਘ ਨੇ ਕਿਹਾ ਕਿ ਉਸਤੋਂ ਪੁਲੀਸ ਲਾਈਨ 'ਚ ਰਾਇਫ਼ਲ ਤੇ ਰਿਵਾਲਵਰ ਲਾਇਸੰਸ ਖਾਤਰ ਸਿਖਲਾਈ ਸਰਟੀਫਿਕੇਟ ਲਈ ਮੌਜੂਦ ਅਮਲੇ ਨੇ ਤਿੰਨ ਹਜ਼ਾਰ ਰੁਪਏ ਲਏ, ਪਰ ਮੰਗਣ 'ਤੇ ਵੀ ਰਸੀਦ ਨਹੀਂ ਦਿੱਤੀ। ਉਸਨੂੰ ਕਿਹਾ ਕਿ ਰਸੀਦ ਤੁਹਾਡੇ ਥਾਣੇ ਪਹੁੰਚਾ ਦੇਵਾਂਗੇ।

ਨਛੱਤਰ ਸਿੰਘ ਹਾਲ ਵਾਸੀ ਸ੍ਰੀ ਮੁਕਤਸਰ ਸਾਹਿਬ ਨੇ ਵੀ ਸਿਖਲਾਈ ਸਰਟੀਫਿਕੇਟ ਲਈ ਬਿਨ੍ਹਾਂ ਰਸੀਦ ਦੋ ਹਜ਼ਾਰ ਤੇ ਗੁਰਮੀਤ ਸਿੰਘ ਵਾਸੀ ਔਲਖ ਨੇ ਦੋ ਅਸਲਿਆਂ ਲਈ ਬਿਨ੍ਹਾਂ ਰਸੀਦ ਦੇ 3 ਹਜ਼ਾਰ ਰੁਪਏ ਵਸੂਲੇ ਜਾਣ ਦੀ ਗੱਲ ਆਖੀ।

ਮੀਡੀਆ ਨੇ ਪੁਖਤਗੀ ਲਈ ਬਰਾਂਚ ਸੀਟ 'ਤੇ ਮੌਜੂਦ ਹੌਲਦਾਰ ਨੂੰ ਬਿਨ੍ਹਾਂ ਤਿੰਨ ਦਿਨਾਂ ਦੀ ਸਿਖਲਾਈ ਦੇ ਸਰਟੀਫਿਕੇਟ ਅਤੇ ਤਿੰਨ ਹਜ਼ਾਰ ਰੁਪਏ ਵਗੈਰ ਰਸੀਦ ਬਾਰੇ ਪੁੱਛਿਆ ਤਾਂ ਉਨ੍ਹਾਂ ਖਿਝ ਕੇ ਕਿਹਾ ਕਿ 'ਜਾਓ, ਫਿਰ ਉਥੇ ਜਾ ਕੇ ਅਮਰੀਕ ਸਿੰਘ ਤੋਂ ਤਿੰਨ ਦਿਨਾਂ ਦੀ ਸਿਖਲਾਈ ਲੈ ਲਵੋ। ਸਾਨੂੰ ਨਹੀਂ ਕੁੱਝ ਪਤਾ, ਅਫ਼ਸਰਾਂ ਨਾਲ ਗੱਲ ਕਰੋ।' ਕਿਹਾ ਜਾ ਰਿਹਾ ਕਿ ਨਵੀਨੀਕਰਨ ਸਮੇਂ ਵੀ ਅਸਲਾ ਧਾਰਕ ਨੂੰ ਤਿੰਨਾਂ ਦਿਨਾਂ ਦੀ ਸਿਖਲਾਈ ਦੇਣੀ ਹੁੰਦੀ ਹੈ।

ਪੁਲਿਸ ਦਾ ਪੱਖ ਲੈਣ ਸਮੇਂ ਅਫ਼ਸਰਸ਼ਾਹੀ ਦੀ ਗੱਲਬਾਤ ਵਿੱਚੋਂ ਭਗਵੰਤ ਮਾਨ ਦੀ ਨੀਤੀਆਂ ਵਾਲੀ ਸਪੱਸ਼ਟਤਾ/ਪਾਰਦਰਸ਼ਿਤਾ ਕਿਧਰੇ ਨਜ਼ਰ ਨਹੀਂ ਆਈ। ਪੁਲਿਸ ਲਾਈਨ 'ਚ ਸਿਖਲਾਈ ਦੇਣ ਵਾਲੀ ਰੇਂਜ ਆਰਮੋਰ ਬਰਾਂਚ ਦੇ ਮੁਖੀ ਏ.ਐਸ.ਆਈ ਅਮਰੀਕ ਸਿੰਘ ਦਾ ਕਹਿਣਾ ਸੀ ਕਿ ਕੀ ਕਰੀਏ ਲੋਕ ਕਾਹਲੀ ਕਰਦੇ ਹਨ। ਪੱਤਰ ਤਾਂ ਤਿੰਨਾਂ ਦਿਨਾਂ ਸਿਖਲਾਈ ਦਾ ਆਇਆ ਹੋਇਆ ਹੈ।

ਬਰਾਂਚ ਮੁਖੀ ਕਰਮਜੀਤ ਨੇ ਕਿਹਾ ਕਿ ਐਚ.ਡੀ.ਐਫ਼.ਸੀ ਬੈਂਕ 'ਚ ਖਾਤਾ ਖੁਲ੍ਹਵਾਇਆ ਹੈ ਤੇ ਰਸੀਦ ਵੀ ਦਿੰਦੇ ਹਾਂ। ਐਸ.ਪੀ (ਐਚ) ਜਗਦੀਸ਼ ਬਿਸ਼ਨੋਈ ਨੂੰ ਪੱਖ ਲਈ ਕਾਲ ਕੀਤੀ ਤਾਂ ਉਹ ਅੱਧਵਿਚਕਾਰ ਫੋਨ ਕਾਲ ਕੱਟ ਗਏ ਅਤੇ ਮੁੜ ਕਾਲ ਰਸੀਵ ਨਹੀਂ ਕੀਤੀ। ਪੁਲਿਸ ਸੀ.ਪੀ.ਆਰ.ਸੀ. ਬਰਾਂਚ ਦੇ ਮੁਖੀ ਇੰਸਪੈਕਟਰ ਦਿਨੇਸ਼ ਕੁਮਾਰ ਦਾ ਕਹਿਣਾ ਸੀ ਕਿ ਉਹ ਛੁੱਟੀ 'ਤੇ ਹਨ। ਉਨ੍ਹਾਂ ਇੱਕ ਹੋਰ ਮੁਲਾਜਮ ਅੰਮ੍ਰਿਤ ਨਾਲ ਰਾਬਤਾ ਕਰਨ ਨੂੰ ਆਖਿਆ। ਅੰਮ੍ਰਿਤ ਨੇ ਮੁੜ ਸਰਟੀਫਿਕੇਟ ਬਰਾਂਚ ਦਾ ਰਾਹ ਵਿਖਾ ਦਿੱਤਾ।

ਜ਼ਿਲ੍ਹਾ ਪੁਲਿਸ ਮੁਖੀ ਧਰੁਮਨ ਨਿੰਬਲੇ ਨੇ ਫੋਨ ਕਾਲ 'ਤੇ ਗੱਲ ਕਰਨ ਦੀ ਬਜਾਇ ਵੱਟਸਐਪ ਚੈਟ 'ਤੇ ਦਿੱਤੇ ਪੱਖ 'ਚ ਕਿਹਾ ਕਿ ਮਾਮਲੇ ਦੀ ਪੜਤਾਲ ਕੀਤੀ ਜਾਵੇਗੀ। ਤੁਸੀਂ ਸਬੂਤ ਭੇਜ ਦਿਓ। ਜ਼ਿਕਰਯੋਗ ਹੈ ਕਿ ਜ਼ਿਲ੍ਹਾ ਪੁਲੀਸ ਮੁਖੀ ਦਾ ਦਫ਼ਤਰ ਅਤੇ ਅਸਲਾ ਸਿਖਲਾਈ ਅਤੇ ਸਰਟੀਫਿਕੇਟ ਬਰਾਂਚ ਇਹ ਸਾਰੇ ਹੀ ਪੁਲਿਸ ਲਾਈਨ ਅੰਦਰ ਸਥਿਤ ਹਨ। 

 

ਸਿਮਰਨਜੀਤ ਸਿੰਘ ਮਾਨ ਨੇ ਆਪ ਦਾ ਕਿਲ੍ਹਾ ਜਿੱਤ ਕੇ ਤਿੰਨ ਮਹੀਨੇ 'ਚ ਲਿਆਂਦਾ 'ਨਵਾਂ ਬਦਲਾਅ'

ਇਕਬਾਲ ਸਿੰਘ ਸ਼ਾਂਤ 

ਸੰਗਰੂਰ: ਪੰਜਾਬ ਦੀ ਸਿਆਸਤ 'ਚ 'ਵਨ ਮੈਨ ਆਰਮੀ' ਵਜੋਂ ਵੇਖੇ ਜਾਂਦੇ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਨੇ ਸੰਗਰੂਰ ਦੀ ਸਰਜਮੀਂ 'ਤੇ ਆਪ ਸਮੇਤ ਸਾਰੀਆਂ ਵਿਰੋਧੀ ਧਿਰਾਂ ਧਰਾਸ਼ਾਈ ਕਰ ਦਿੱਤੀਆਂ ਹਨ। ਉਨ੍ਹਾਂ ਬੇਹੱਦ ਫਸਵੇਂ ਮੁਕਾਬਲੇ 'ਚ ਸੰਗਰੂਰ ਲੋਕਸਭਾ ਦੀ ਜ਼ਿਮਨੀ ਚੋਣ ਕਰੀਬ 5822 ਵੋਟਾਂ ਦੇ ਫ਼ਰਕ ਨਾਲ ਜਿੱਤ ਲਈ ਹੈ। ਉਹ ਆਪ ਦੇ ਉਮੀਦਵਾਰ ਗੁਰਮੇਲ ਸਿੰਘ ਨੂੰ ਹਰਾ ਕੇ ਕਰੀਬ 23 ਸਾਲਾਂ ਬਾਅਦ ਦੇਸ਼ ਦੀ ਲੋਕਸਭਾ ਦੀ ਪੌੜੀ ਚੜ੍ਹੇ ਹਨ।

ਇਨ੍ਹਾਂ ਚੋਣ ਨਤੀਜਿਆਂ ਨਾਲ ਤਿੰਨ ਮਹੀਨੇ ਪਹਿਲਾਂ ਬੰਪਰ ਬਹੁਮਤ ਨਾਲ ਸੱਤਾ 'ਚ ਆਈ ਆਮ ਆਦਮੀ ਪਾਰਟੀ ਉਸਦੇ ਮੁੱਖ ਮੰਤਰੀ ਭਗਵੰਤ ਮਾਨ ਦੇ ਗੜ੍ਹ 'ਚ ਪਹਿਲੇ ਸਿਆਸਤ ਇਮਤਿਹਾਨ 'ਚ ਫੇਲ੍ਹ ਹੋ ਗਈ। ਚੋਣ ਨਤੀਜਿਆਂ ਮੁਤਾਬਕ ਕਾਂਗਰਸ, ਭਾਜਪਾ ਅਤੇ ਸ਼੍ਰੋਮਣੀ ਅਕਾਲੀ ਦਲ ਸਮੇਤ ਬਾਕੀ ਸਾਰੇ ਉਮੀਦਵਾਰਾਂ ਦੀ ਜ਼ਮਾਨਤ ਜ਼ਬਤ ਹੋ ਗਈ ਹੈ।

ਸੰਗਰੂਰ ਸੀਟ ਭਗਵੰਤ ਮਾਨ ਵੱਲੋਂ ਮੁੱਖ ਮੰਤਰੀ ਦੀ ਸਹੁੰ ਚੁੱਕਣ ਤੋਂ ਪਹਿਲਾਂ ਅਸਤੀਫ਼ਾ ਦੇਣ ਕਰਕੇ ਖਾਲੀ ਹੋਈ ਸੀ। ਬੀਤੇ ਵਿਧਾਨਸਭਾ ਚੋਣਾਂ 'ਚ ਆਮ ਆਦਮੀ ਪਾਰਟੀ ਨੇ ਸੰਗਰੂਰ ਲੋਕਸਭਾ ਹਲਕੇ ਦੀਆਂ 9 ਵਿਧਾਨਸਭਾ ਸੀਟਾਂ 'ਤੇ ਗੱਜਵੀਂ ਜਿੱਤ ਦਰਜ ਕੀਤੀ ਸੀ। ਸੰਗਰੂਰ ਜ਼ਿਮਨੀ ਚੋਣ 'ਚ ਆਮ ਆਦਮੀ ਪਾਰਟੀ ਦੇ ਕੌਮੀ ਕਨਵੀਨਰ ਅਰਵਿੰਦ ਕੇਜਰੀਵਾਲ ਅਤੇ ਮੁੱਖ ਮੰਤਰੀ ਭਗਵੰਤ ਮਾਨ ਦਾ ਧੂੰਆਂਧਾਰ ਪ੍ਰਚਾਰ ਵੀ ਰੰਗ ਨਾ ਵਿਖਾ ਸਕਿਆ।

ਇਨ੍ਹਾਂ ਚੋਣ ਨਤੀਜਿਆਂ ਨੇ ਆਮ ਆਦਮੀ ਪਾਰਟੀ ਵੱਲੋਂ ਵਿਧਾਨਸਭਾ ਚੋਣਾਂ 'ਚ ਵੋਟਰਾਂ ਨੂੰ ਦਿੱਤੀਆਂ ਵਾਅਦੇ ਭਰੀਆਂ ਗਾਰੰਟੀਆਂ 'ਤੇ ਘਟਦੇ ਵਿਸ਼ਵਾਸ ਨੂੰ ਜਾਹਰ ਕੀਤਾ ਹੈ। ਇਹ ਨਾਮੋਸ਼ੀਜਨਕ ਹਾਰ ਨੇ 92 ਵਿਧਾਇਕਾਂ ਦੇ ਬਹੁਮਤ ਵਾਲੀ 'ਆਪ' ਸਰਕਾਰ ਅਤੇ ਲੀਡਰਸ਼ਿਪ ਲਈ ਕੰਮਕਾਜ 'ਚ ਵੱਡੇ ਸੁਧਾਰ ਲਿਆਉਣ ਲਈ ਮੰਥਨ ਦੇ ਹਾਲਾਤ ਪੈਦਾ ਕਰ ਦਿੱਤੇ ਹਨ। ਚੋਣ ਨਤੀਜਿਆਂ 'ਤੇ ਸੁਰੱਖਿਆ ਘਟਾਏ ਜਾਣ ਮਗਰੋਂ ਪੰਜਾਬੀ ਗਾਇਕ ਸਿੱਧੂ ਮੂਸੇਵਾਲ ਦੀ ਹੱਤਿਆ ਕਾਰਨ ਪੈਦਾ ਹੋਇਆ ਲੋਕ-ਰੋਹ ਦਾ ਵੀ ਵੱਡਾ ਅਸਰ ਰਿਹਾ ਹੈ।

ਸਿਮਰਨਜੀਤ ਸਿੰਘ ਨੇ ਇੱਕ-ਦੋ ਰਾਊਂਡਾਂ ਨੂੰ ਛੱਡ ਕੇ ਲਗਾਤਾਰ ਸਾਰੇ ਰਾਊਂਡਾਂ 'ਚ ਬੜ੍ਹਤ ਬਣਾਏ ਰੱਖੀ। ਕਾਂਗਰਸ, ਭਾਜਪਾ ਅਤੇ ਅਕਾਲੀ ਦਲ (ਬਾਦਲ) ਦੇ ਉਮੀਦਵਾਰ ਗਿਣਤੀ ਦੇ ਸ਼ੁਰੂਆਤੀ ਦੌਰ 'ਚ ਹੀ ਪਛੜ ਗਏ ਸਨ, ਜੋ ਕਿ ਵੋਟਾਂ ਦੀ ਪੂਰੀ ਗਿਣਤੀ ਦੌਰਾਨ ਮੁਕਾਬਲੇ 'ਚ ਆ ਹੀ ਨਹੀਂ ਸਕੇ। ਵਾਰ-ਵਾਰ ਬਹੁਤ ਛੋਟੀ-ਛੋਟੀ ਘਟਤ-ਬੜ੍ਹਤ ਨੇ ਸ੍ਰੀ ਮਾਨ ਅਤੇ ਗੁਰਮੇਲ ਸਿੰਘ ਦੇ ਸਮਰਥਕਾਂ ਨੂੰ ਲਗਾਤਾਰ ਧੜਕੂ ਲਗਾਈ ਰੱਖਿਆ। ਗਿਣਤੀ ਦੇ ਅੱਧ ਤੋਂ ਬਾਅਦ ਨਤੀਜੇ ਸਿਮਰਨਜੀਤ ਸਿੰਘ ਦੇ ਪੱਖ ਵਿਚ ਨਜ਼ਰ ਆਉਂਣ ਲੱਗੇ। 

24 ਜੂਨ ਨੂੰ ਜ਼ਿਮਨੀ ਚੋਣ 'ਚ ਲਗਪਗ 37 ਫ਼ੀਸਦੀ ਵੋਟਾਂ ਪੋਲਿੰਗ ਹੋਈ ਸੀ। ਜਿੱਤ ਦਾ ਪਰਚੰਮ ਲਹਿਰਾਉਣ ਵਾਲੇ ਸਿਮਰਨਜੀਤ ਸਿੰਘ ਮਾਨ ਨੂੰ ਕਰੀਬ 38.1 ਵੋਟਾ ਨਾਲ ਦੇ ਜੇਤੂ ਰਹੇ। ਜਦਕਿ ਆਪ ਦੇ ਗੁਰਮੇਲ ਸਿੰਘ ਨੂੰ 34.1 ਫ਼ੀਸਦੀ ਹਾਸਲ ਕਰ ਸਕੇ। ਕਾਂਗਰਸ ਦੇ ਦਲਬੀਰ ਸਿੰਘ ਗੋਲਡੀ ਵੋਟਾਂ 11.21 ਫ਼ੀਸਦੀ ਵੋਟਾਂ ਨਾਲ ਤੀਸਰੇ ਨੰਬਰ 'ਤੇ ਰਹੇ। ਭਾਜਪਾ ਦੇ ਉਮੀਦਵਾਰ ਕੇਵਲ ਸਿੰਘ ਢਿੱਲੋਂ ਨੇ ਵੋਟਾਂ 9.33 ਵੋਟਾਂ ਨਾਲ ਚੌਥਾ ਨੰਬਰ ਲਿਆ। ਬੰਦੀ ਸਿੰਘਾਂ ਦਾ ਮੁੱਦਾ ਉਭਾਰ ਕੇ ਚੋਣ ਲੜਨ ਵਾਲੇ ਸ਼੍ਰੋਮਣੀ ਅਕਾਲੀ ਦਲ (ਬਾਦਲ) ਨੂੰ ਮੂੰਹ ਦੀ ਖਾਣੀ ਪਈ ਹੈ। ਦਲ ਦੀ ਉਮੀਦਵਾਰ ਬੀਬੀ ਕਮਲਦੀਪ ਕੌਰ ਰਾਜੋਆਣਾ ਸਿਰਫ਼ 6.25 ਵੋਟਾਂ ਨਾਲ ਪੰਜਵੇਂ ਨੰਬਰ 'ਤੇ ਰਹੇ ਹਨ।

ਇਹ ਚੋਣ ਨਤੀਜਾ ਸੁਖਬੀਰ ਸਿੰਘ ਬਾਦਲ ਦੀ ਅਗਵਾਈ ਵਾਲੇ ਅਕਾਲੀ ਦਲ ਦੇ ਕਾਲੇ ਭਵਿੱਖ ਨੂੰ ਦਰਸਾਉਣ ਵਾਲਾ ਗਿਆ ਹੈ। ਸਿਮਰਨਜੀਤ ਸਿੰਘ ਮਾਨ ਦੀ ਰਿਹਾਇਸ਼ 'ਤੇ ਕਿਲ੍ਹਾ ਸਰਦਾਰ ਹਰਨਾਮ ਸਿੰਘ ਵਿਖੇ ਉਨ੍ਹਾਂ ਦੇ ਸਮਰਥਕਾਂ ਵੱਲੋਂ ਖੁਸ਼ੀਆਂ ਅਤੇ ਭੰਗੜੇ ਦੇ ਜਸ਼ਨਾਂ ਦਾ ਦੌਰ ਹਾਂ-ਪੱਖੀ ਰੁਝਾਨਾਂ ਮਗਰੋਂ ਤੋਂ ਜਾਰੀ ਹੈ। ਆਮ ਆਦਮੀ ਪਾਰਟੀ ਨੇ ਆਪਣੀ ਹਾਰ ਕਬੂਲਦੇ ਹੋਏ ਜੇਤੂ ਉਮੀਦਵਾਰ ਸਿਮਰਨਜੀਤ ਸਿੰਘ ਮਾਨ ਨੂੰ ਵਧਾਈ ਦਿੱਤੀ ਹੈ।

23 ਸਾਲਾਂ ਬਾਅਦ ਲੋਕਸਭਾ 'ਚ ਗੂੰਜੇਗੀ ਪੰਜਾਬ ਦੀ ਬੇਬਾਕ ਆਵਾਜ਼: ਸਵਾ ਦੋ ਦਹਾਕਿਆਂ ਬਾਅਦ ਪੰਜਾਬ, ਪੰਜਾਬੀ ਅਤੇ ਸਿੱਖ ਮਸਲਿਆਂ ਦੀ ਬੁਲੰਦ ਅਤੇ ਬੇਬਾਕ ਆਵਾਜ਼ ਸ੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸਿਮਰਨਜੀਤ ਸਿੰਘ ਮਾਨ ਦੇ ਰੂਪ ਵਿੱਚ ਦੇਸ਼ ਦੀ ਸਭ ਤੋਂ ਵੱਡੀ ਪੰਚਾਇਤ ਲੋਕਸਭਾ 'ਚ ਗੂੰਜੇਗੀ। ਖਾਲਿਸਤਾਨ ਦੀ ਮੰਗ ਦੇ ਮੁੱਦਈ ਸਿਮਰਨਜੀਤ ਸਿੰਘ ਮਾਨ 1989 ਅਤੇ 1999 'ਚ ਲੋਕਸਭਾ ਦੇ ਮੈਂਬਰ ਰਹਿ ਚੁੱਕੇ ਹਨ। ਉਹ ਸਿਰਫ 22 ਵਰ੍ਹਿਆਂ ਦੀ ਉਮਰ 'ਚ 1967 ਦੇ ਭਾਰਤੀ ਪੁਲਿਸ ਸਰਵਿਸਜ਼ (ਆਈ.ਪੀ.ਐਸ.) ਬੈਚ ਵਿੱਚ ਚੁਣੇ ਗਏ ਸਨ। ਉਹ ਪੰਜਾਬ ਵਿੱਚ ਵੱਖ-ਵੱਖ ਜ਼ਿਲ੍ਹਿਆਂ 'ਚ ਐਸ.ਪੀ, ਵਿਜੀਲੈਂਸ ਵਿਭਾਗ ਅਤੇ ਫਿਰ ਐਸ.ਐਸ.ਪੀ. ਵਜੋਂ ਤਾਇਨਾਤ ਰਹੇ। ਆਈ.ਪੀ.ਐਸ. ਦੀ ਨੌਕਰੀ ਦੌਰਾਨ ਉਨ੍ਹਾਂ ਨੂੰ ਸਰਕਾਰ ਨੇ ਸਿਮਰਨਜੀਤ ਸਿੰਘ ਮਾਨ ਨੂੰ ਪੰਜਾਬ ਤੋਂ ਦੂਰ ਮਹਾਰਾਸ਼ਟਰ ਵਿੱਚ ਬਤੌਰ ਡੀ.ਆਈ.ਜੀ. ਤਾਇਨਾਤ ਕਰਕੇ ਭੇਜ ਦਿੱਤਾ ਸਪ। ਉਸੇ ਦੌਰਾਨ ਸਰਕਾਰ ਵੱਲੋਂ ਅੰਮ੍ਰਿਤਸਰ ਸਾਹਿਬ ਵਿਖੇ ਦਰਬਾਰ ਸਾਹਿਬ 'ਤੇ ਫੌਜੀ ਹਮਲਾ ਕਰ ਦਿੱਤਾ। ਜਿਸਦੀ ਸ੍ਰੀ ਮਾਨ ਦੇ ਮਨ ਬੜੀ ਠੇਸ ਪੁੱਜੀ ਅਤੇ ਉਨ੍ਹਾਂ 17 ਜੂਨ 1984 ਨੂੰ ਆਈ.ਪੀ.ਐਸ. ਦੀ ਨੌਕਰੀ ਤੋਂ ਅਸਤੀਫਾ ਦੇ ਦਿੱਤਾ। -93178-26100

ਵਿਧਾਇਕ ਪੁੱਤਰ ਅਤੇ ਟਰੱਕ ਅਪਰੇਟਰਾਂ 'ਚ ਤੂੰ-ਤੜਾਕ: 'ਤੁਸੀਂ ਸਾਡੇ ਘਰ ਖੁੱਡੀਆਂ ਕੀ ਦਾਣੇ ਲੈਣ ਗਏ ਸੀ'

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਆਪ ਦੇ ਨਵੇਂ ਕਾਡਰ ਦੀ ਮੁੱਛ ਦਾ ਸੁਆਲ ਬਣੇ ਟਰੱਕ ਯੂਨੀਅਨ ਕਿੱਲਿਆਂਵਾਲੀ ਮਾਮਲੇ 'ਚ ਸ਼ਨੀਚਰਵਾਰ ਨੂੰ ਅੱਜ ਹਲਕਾ ਵਿਧਾਇਕ ਦਾ ਪੁੱਤਰ ਅਮੀਤ ਖੁੱਡੀਆਂ ਖੁੱਲ੍ਹੇਆਮ ਮੈਦਾਨ 'ਚ ਉੁੱਤਰ ਆਇਆ। ਉਸਦੀ ਆਪ੍ਰੇਟਰਾਂ ਨਾਲ ਮੀਟਿੰਗ ਮੌਕੇ ਮਸਲਾ ਹੋਰ ਤਿੱਖਾ ਰੂਪ ਧਾਰ ਗਿਆ। ਟਰੱਕ ਆਪ੍ਰੇਟਰਾਂ ਨੇ ਬਾਹਰੀ ਵਿਅਕਤੀ ਨੂੰ ਜਬਰੀ ਪ੍ਰਧਾਨ ਮੰਨਣ ਦੀ ਸਿਆਸੀ ਧੱਕੇਸ਼ਾਹੀ ਖਿਲਾਫ਼ ਮੰਡੀਆਂ 'ਚੋਂ ਕਣਕ ਲਿਫ਼ਟਿੰਗ ਤੋਂ ਨਾਂਹ ਕਰ ਦਿੱਤੀ ਹੈ।

ਖੇਤਰ 'ਚ ਖਰੀਦ ਕੇਂਦਰਾਂ 'ਤੇ ਹਜ਼ਾਰਾਂ ਗੱਟੇ ਕਣਕ ਲਿਫ਼ਟਿੰਗ ਲਈ ਪਈ ਹੈ। ਅਜਿਹੇ 'ਚ ਵਿਵਾਦ ਮੁੱਖ ਮੰਤਰੀ ਭਗਵੰਤ ਮਾਨ ਤੱਕ ਪੁੱਜਣ ਦੇ ਹਾਲਾਤ ਬਣ ਗਏ ਹਨ। ਸੂਤਰਾਂ ਮੁਤਾਬਕ ਬੀਤੇ ਪਰਸੋਂ ਦਰਜਨਾਂ ਖਾਕੀ ਮੁਲਾਜਮਾਂ ਨੂੰ ਯੂਨੀਅਨ ਕੰਪਲੈਕਸ 'ਚ ਡੇਰਾ ਲਗਵਾਈ ਰੱਖਣ ਵਾਲਾ ਪੁਲਿਸ ਪ੍ਰਸ਼ਾਸਨ ਮਲੋਟ ਵਿਵਾਦ ਤੋਂ ਹੱਥ ਖੜ੍ਹੇ ਕਰ ਗਿਆ ਹੈ। ਮਾਮਲਾ 'ਆਪ' ਦੇ ਨਵੇਂ ਤੇ ਪੁਰਾਣੇ ਕਾਡਰ 'ਚ ਵਜੂਦ ਦਾ ਮਸਲਾ ਬਣ ਗਿਆ ਹੈ।

ਵਿਧਾਇਕ ਪੁੱਤਰ ਅਮੀਤ ਖੁੱਡੀਆਂ ਨੇ ਮੋਰਚਾ ਸੰਭਾਲਦੇ ਅੱਜ ਕਿੱਲਿਆਂਵਾਲੀ 'ਚ ਇੱਕ ਹਰਿਆਣਵੀ ਕਾਂਗਰਸ ਆਗੂ ਦੇ ਟੈਂਟ ਹਾਊਸ 'ਤੇ ਟਰੱਕ ਆਪ੍ਰੇਟਰਾਂ ਨਾਲ ਮੀਟਿੰਗ ਕੀਤੀ। ਮੀਟਿੰਗ ਬਾਅਦ ਟਰੱਕ ਆਪ੍ਰੇਟਰ ਆਗੂ ਰਾਜਪਾਲ ਸੱਚੇਦਵਾ, ਕਿਸ਼ੋਰ ਚੰਦ ਤੇ ਜਰਨੈਲ ਸਿੰਘ ਡੱਫ਼ੂ ਨੇ ਦੱਸਿਆ ਕਿ ਡੀ.ਐਸ.ਪੀ. ਮਲੋਟ ਨੇ ਉਨ੍ਹਾਂ ਨੂੰ ਮਸਲੇ ਦੇ ਹੱਲ ਲਈ ਵਿਧਾਇਕ ਦੇ ਲੜਕੇ ਅਮੀਤ ਖੁੱਡੀਆਂ ਨਾਲ ਗੱਲ ਕਰਨ ਲਈ ਸੁਨੇਹਾ ਲਗਾਇਆ ਸੀ।

 ਉਨ੍ਹਾਂ ਕਿਹਾ ਕਿ ਅਮੀਤ ਖੁੱਡੀਆਂ ਤੇ ਟੋਜੀ ਲੰਬੀ ਨੇ ਉਨ੍ਹਾਂ ਨੂੰ ਟੈਂਟ ਹਾਊਸ 'ਤੇ ਇੱਕਤਰਫ਼ਾ ਫੈਸਲੇ ਤਹਿਤ ਦਰਸ਼ਨ ਸਿੰਘ ਵੜਿੰਗਖੇੜਾ ਦੇ ਪ੍ਰਧਾਨ ਬਣੇ ਰਹਿਣ ਦਾ ਫੁਰਮਾਨ ਸੁਣਾਇਆ। ਜਰਨੈਲ ਸਿੰਘ ਅਨੁਸਾਰ ਜਦੋਂ ਉਨ੍ਹਾਂ ਬਾਹਰੀ ਵਿਅਕਤੀ ਨੂੰ ਮੰਨਣ ਤੋਂ ਕੋਰੀ ਨਾਂਹ ਕਰ ਦਿੱਤੀ। ਜਿਸ 'ਤੇ ਅਮੀਤ ਖੁੱਡੀਆਂ ਨੇ ਕਿਹਾ ਤਾਂ 'ਤੂੰ ਸਾਡੇ ਘਰ ਸਹਿਮਤੀ ਦੇ ਕੇ ਆਇਆ ਸੀ।' 

ਜਰਨੈਲ ਸਿੰਘ ਨੇ ਕਿਹਾ ਕਿ ਉਸਨੇ ਕੋਈ ਸਹਿਮਤੀ ਨਹੀਂ ਦਿੱਤੀ ਸੀ। ਫ਼ਿਰ ਅਮੀਤ ਖੁੱਡੀਆਂ ਕਹਿਣ ਲੱਗਿਆ ਕਿ 'ਤੁਸੀਂ ਸਾਡੇ ਘਰ ਖੁੱਡੀਆਂ ਕੀ ਦਾਣੇ ਲੈਣ ਗਏ ਸੀ।' ਤਲਜ਼ ਜਵਾਬ 'ਚ ਜਰਨੈਲ ਡੱਫ਼ੂ ਨੇ ਕਿਹਾ ਕਿ 'ਵੋਟਾਂ ਤੋਂ ਪਹਿਲਾਂ ਤੁਸੀਂ ਕੀ ਸਾਡੇ ਘਰ ਦਾਣੇ ਲੈਣ ਗਏ ਸੀ?' ਜਰਨੈਲ ਨੇ ਦੱਸਿਆ ਕਿ ਮੀਟਿੰਗ 'ਚ ਟੋਜੀ ਲੰਬੀ ਦਾ ਕਹਿਣਾ ਸੀ ਕਿ 'ਤੁਹਾਨੂੰ ਸਾਡਾ ਬੰਦਾ ਤਾਂ ਯੂਨੀਅਨ 'ਚ ਪਾਉਣਾ ਹੀ ਪੈਣਾ ਹੈ। ਅਸੀਂ ਜਿਹੜੀ ਗੱਲ ਕਹਿ ਦਿੱਤੀ ਉਹੀ ਤੁਹਾਨੂੰ ਮੰਨਣੀ ਪੈਣੀ ਹੈ।'

ਟਰੱਕ ਆਪ੍ਰੇਟਰ ਰਾਜਪਾਲ, ਜਰਨੈਲ ਸਿੰਘ ਅਤੇ ਹੋਰਨਾਂ ਟਰੱਕ ਆਪ੍ਰੇਟਰਾਂ ਨੇ ਅਮੀਤ ਖੁੱਡੀਆਂ ਅਤੇ ਟੋਜੀ ਲੰਬੀ 'ਤੇ ਕਥਿਤ ਦਬਿਸ਼ ਦੇ ਦੋਸ਼ ਲਗਾਏ। ਆਪ੍ਰੇਟਰਾਂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਤੇ ਅਰਵਿੰਦ ਕੇਜਰੀਵਾਲ ਤੱਕ ਪਹੁੰਚ ਦੀ ਗੱਲ ਆਖੀ ਅਤੇ ਦਬਾਅ ਖਿਲਾਫ਼ ਕਣਕ ਲਿਫ਼ਟਿੰਗ ਨਾ ਕਰਨ ਦਾ ਐਲਾਨ ਕੀਤਾ। ਇਸ ਮੌਕੇ ਟਕਸਾਲੀ ਆਪ ਆਗੂ ਜਸਬੀਰ ਹਾਕੂਵਾਲਾ, ਗੁਰਮਹਿੰਦਰ ਸਿੰਘ, ਗੁਰਲਾਭ ਸਿੰਘ, ਉਜਾਗਰ ਸਿੰਘ ਤੇ ਫਿਲੌਰ ਸਿੰਘ ਮੌਜੂਦ ਸਨ।

ਦੂਜੇ ਪਾਸੇ ਵਿਧਾਇਕ ਪੁੱਤਰ ਅਮੀਤ ਖੁੱਡੀਆਂ ਨੇ ਦਬਾਅ ਦੇ ਦੋਸ਼ਾਂ ਨੂੰ ਖਾਰਜ ਕਰਦੇ ਕਿਹਾ ਕਿ ਟਰੱਕ ਯੂਨੀਅਨ ਮਾਮਲੇ ਕਰਕੇ ਮੰਡੀਆਂ 'ਚ ਕਿਸਾਨਾਂ ਦੀ ਫ਼ਸਲ ਲਿਫ਼ਟਿੰਗ ਪ੍ਰਭਾਵਤ ਨਾ ਹੋਣ ਦੇਣ ਲਈ ਵਿਵਾਦ ਦੇ ਬਦਲਵੇਂ ਹੱਲ ਖਾਤਰ ਆਪ੍ਰੇਟਰਾਂ ਨਾਲ ਗੱਲਬਾਤ ਨੂੰ ਪੁੱਜੇ ਸਨ। ਆਪ੍ਰੇਟਰਾਂ ਨੇ ਮਾਮਲੇ ਦੇ ਹੱਲ ਲਈ ਸਮਾਂ ਮੰਗਿਆ ਹੈ।

ਵੇਖ ਲਓ ਬਦਲਾਅ: ਟਰੱਕ ਯੂਨੀਅਨ ਕਿੱਲਿਆਂਵਾਲੀ 'ਤੇ ਸਾਊ ਸਿਆਸਤ ਦੀ ਕਬਜ਼ੇਕਾਰੀ ਖੁੱਲ੍ਹੇਆਮ ਜੱਗਜਾਹਰ

- ਆਪ੍ਰੇਟਰਾਂ ਦੀ ਕਮੇਟੀ ਗਠਨ ਬਾਅਦ ਦਰਜਨਾਂ ਪੁਲਿਸ ਮੁਲਾਜਮਾਂ ਵੱਲੋਂ ਯੂਨੀਅਨ 'ਤੇ ਜਮਾਇਆ ਡੇਰਾ

- ਆਪ੍ਰੇਟਰਾਂ ਵੱਲੋਂ ਪੁਲਿਸ 'ਤੇ ਦਬਾਅ ਤਹਿਤ ਯੂਨੀਅਨ ਬਾਹਰੀ ਬੰਦਿਆਂ ਦਾ ਕਬਜ਼ਾ ਕਰਵਾਉਣ ਦੀ ਕੋਸ਼ਿਸ਼ ਦੇ ਦੋਸ਼

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਬਦਲਾਅ ਵਾਲੇ ਸੂਬੇ 'ਚ ਟਰੱਕ ਯੂਨੀਅਨ ਕਿੱਲਿਆਂਵਾਲੀ 'ਤੇ ਸਾਊ ਸਿਆਸਤ ਦੇ ਸਿਆਸੀ ਨੌਨਿਹਾਲਾਂ ਦੀ ਸਿਆਸੀ ਕਬਜ਼ੇਕਾਰੀ ਅੱਜ ਖੁੱਲ੍ਹੇਆਮ ਜੱਗਜਾਹਰ ਹੋ ਗਈ। ਕੱਲ੍ਹ ਪੁਲਿਸ ਮੌਜੂਦਗੀ 'ਚ ਐਲਾਨੀ ਨਿਰੋਲ ਟਰਾਂਸਪੋਰਟਰਾਂ 'ਤੇ ਆਧਾਰਤ ਕਮੇਟੀ ਖੇਤਰ ਦੀ 'ਸਾਊ' ਸਿਆਸਤ ਦੇ ਗਲੇ ਨਾ ਉੱਤਰਨ 'ਤੇ ਵੀਰਵਾਰ ਸਵੇਰੇ ਦਰਜਨਾਂ ਪੁਲਿਸ ਮੁਲਾਜਮਾਂ ਨੇ ਟਰੱਕ ਯੂਨੀਅਨ ਨੂੰ ਅੰਦਰੋਂ-ਬਾਹਰੋਂ ਘੇਰਾ ਪਾ ਲਿਆ ਅਤੇ ਉਥੇ ਡੇਰਾ ਲਗਾ ਕੇ ਡਟ ਗਏ। ਜਦਕਿ ਬੀਤੇ ਕੱਲ੍ਹ ਥਾਣਾ ਮੁਖੀ ਦੇ ਸਾਹਮਣੇ ਕਮੇਟੀ ਬਣੀ ਸੀ ਅਤੇ ਐਸ.ਡੀ.ਐਮ. ਤੋਂ ਕਮੇਟੀ ਸੂਚੀ 'ਤੇ ਮੁਹਰ ਲੱਗ ਗਈ। ਪਿਛਲੇ ਕਰੀਬ ਡੇਢ ਹਫ਼ਤੇ 'ਚ ਤਿੰਨ ਵਾਰ ਕਮੇਟੀ ਬਣ ਚੁੱਕੀਆਂ ਹਨ। ਇਸ ਰੇਹੜਕੇ ਨਾਲ ਖੇਤਰ ਦਾ ਮਾਹੌਲ ਵਿਗੜ ਰਿਹਾ ਅਤੇ ਸੱਤਾਪੱਖੀ ਮਾਨਸਿਕਤਾ ਨੰਗੀ ਚਿੱਟੀ ਹੁੰਦੀ ਵਿਖਾਈ ਦੇ ਰਹੀ ਹੈ।

ਬੜੀ ਹੈਰਾਨੀ ਦੀ ਗੱਲ ਹੈ ਕਿ 'ਆਪ' ਵਿਧਾਇਕ ਗੁਰਮੀਤ ਖੁੱਡੀਆਂ ਆਖ ਰਹੇ ਹਨ ਕਿ ਉਨ੍ਹਾਂ ਦਾ ਯੂਨੀਅਨ ਨਾਲ ਕੋਈ ਸਬੰਧ ਨਹੀਂ ਹੈ। ਫਿਰ ਅਜਿਹੇ ਕਿਹੜੇ ਤਾਕਤਵਰ ਲੋਕ ਹਨ, ਜਿਨ੍ਹਾਂ ਦੇ ਇਸ਼ਾਰੇ 'ਤੇ ਦੋ ਬੱਸਾਂ 'ਤੇ ਦਰਜਨਾਂ ਪਲਿਸ ਮੁਲਾਜਮ ਅਤੇ ਦਰਜਨ ਭਰ ਏ.ਐਸ.ਆਈ ਟਰੱਕ ਯੂਨੀਅਨ 'ਤੇ ਡੇਰਾ ਲਗਾ ਕੇ ਬੈਠ ਗਏ। ਜਦੋਂਕਿ ਆਮ ਲੋਕਾਂ ਦੀ ਦਰਖਾਸਤ 'ਤੇ ਪੁਲਿਸ ਕਈ-ਕਈ ਦਿਨ ਨਹੀਂ ਪੁੱਜਦੀ। ਅੱਜ ਸ਼ਾਮ ਯੂਨੀਅਨ ਮਸਲੇ 'ਤੇ ਦੋਵੇਂ ਗਰੁੱਪਾਂ ਨੂੰ ਲੰਬੀ ਥਾਣੇ ਸੱਦਿਆ ਹੋਇਆ ਸੀ। ਇਸ ਮੌਕੇ ਟਕਸਾਲੀ 'ਆਪ' ਆਗੂ ਜਸਵੀਰ ਹਾਕੂਵਾਲਾ, ਗੁਰਵੀਰ ਸਿੰਘ ਮਿੱਡੂਖੇੜਾ ਅਤੇ ਹੈਪੀ ਬੀਦੋਵਾਲੀ ਮੌਜੂਦ ਸਨ।

ਸੱਤ ਮੈਂਬਰੀ ਕਮੇਟੀ ਦੇ ਰਾਜਪਾਲ ਸਿੰਘ, ਹਰਦਿਆਲ ਪਥਰਾਲਾ ਇਲਾਵਾ ਜਰਨੈਲ ਸਿੰਘ ਡੱਫੂ, ਲਖਵਿੰਦਰ ਸਿੰਘ, ਅੰਗਰੇਜ਼ ਸਿੰਘ ਸਮੇਤ ਹੋਰਨਾਂ ਦਾ ਕਹਿਣਾ ਸੀ ਕਿ ਉਨ੍ਹਾਂ 'ਤੇ ਕਮੇਟੀ 'ਚ ਟਰੱਕ ਯੂਨੀਅਨ ਤੋਂ ਬਾਹਰਲੇ ਵਿਅਕਤੀਆਂ ਨੂੰ ਜ਼ਬਰੀ ਅਹੁਦੇਦਾਰ ਬਣਾਉਣ ਲਈ ਦਬਾਅ ਪਾਇਆ ਜਾ ਰਿਹਾ ਹੈ। ਸਵੇਰੇ ਡੀ.ਐਸ.ਪੀ. ਮਲੋਟ ਨੇ ਉਨ੍ਹਾਂ ਨੂੰ ਕਿੱਲਿਆਂਵਾਲੀ 'ਚ ਸੱਦਿਆ ਸੀ। ਡੀ.ਐਸ.ਪੀ. ਮਲੋਟ ਵੱਲੋਂ ਹੁਣ ਸ਼ਾਮ ਨੂੰ ਮੁੜ ਲੰਬੀ ਥਾਣੇ 'ਚ ਸੱਦ ਦੇ ਬਾਹਰੀ ਵਿਅਕਤੀਆਂ ਨੂੰ ਯੂਨੀਅਨ 'ਚ ਸ਼ਾਮਲ ਕਰਨ ਲਈ ਦਬਾਅ ਪਾਇਆ ਜਾ ਰਿਹਾ ਹੈ। 

ਰਾਜਪਾਲ ਅਤੇ ਜਰਨੈਲ ਸਿੰਘ ਨੇ ਦੋਸ਼ ਲਗਾਇਆ ਕਿਹਾ ਕਿ ਗੱਲ ਨਾ ਮੰਨਣ 'ਤੇ ਮਾਹੌਲ ਖ਼ਰਾਬ ਕਰਨ ਲਈ 107/151 'ਚ ਕਲੰਦਰੇ ਭਰਨ ਦਾ ਖੌਫ਼ ਵਿਖਾਇਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਜਦੋਂ ਕੱਲ੍ਹ ਪੁਲਿਸ ਦੇ ਸਾਹਮਣੇ ਕਮੇਟੀ ਬਣ ਗਈ ਅਤੇ ਪੁਲਿਸ ਦੇ ਕਹਿਣੇ 'ਤੇ ਐਸ.ਡੀ.ਐਮ. ਦੀ ਮੁਹਰ ਲੱਗ ਗਈ। ਅੱਜ ਡਰਾਵੇ ਵਾਲਾ ਨਵਾਂ ਡਰਾਮਾ ਕਿਸ ਆਧਾਰ 'ਤੇ ਕੀਤਾ ਜਾ ਰਿਹਾ ਹੈ। ਇਸ ਮੌਕੇ ਟਰੱਕ ਆਪ੍ਰੇਟਰਾਂ ਨੇ ਖੁੱਲ੍ਹਾ ਐਲਾਨ ਕੀਤਾ ਕਿ ਆਪ੍ਰ੍ਰੇਟਰਾਂ 'ਤੇ ਆਧਾਰਤ ਸੰਚਾਲਨ ਕਮੇਟੀ 'ਚ ਮੈਂਬਰ ਵੱਧ ਜਾਂ ਘੱਟ ਕੀਤੇ ਜਾ ਸਕਦੇ ਹਨ, ਪਰ ਬਾਹਰੀ ਵਿਅਕਤੀ ਮੰਜੂਰ ਨਹੀਂ।

ਦੂਜੇ ਪਾਸੇ ਐਤਵਾਰ ਨੂੰ ਪੰਜ ਮੈਂਬਰੀ ਕਮੇਟੀ ਸਮੇਤ ਐਲਾਨ ਹੋਏ ਟਰੱਕ ਯੂਨੀਅਨ ਪ੍ਰਧਾਨ ਦਰਸ਼ਨ ਵੜਿੰੰਗਖੇੜਾ ਦਾ ਕਹਿਣਾ ਸੀ ਕਿ ਉਨ੍ਹਾਂ ਨੂੰ ਯੂਨੀਅਨ ਦੇ ਸੀਨੀਅਰ ਮੈਂਬਰਾਂ ਨੇ ਪ੍ਰਧਾਨ ਚੁਣਿਆ ਹੈ। ਯੂਨੀਅਨ 'ਤੇ ਕਾਬਜ਼ ਰਹੇ ਮਾਫ਼ੀਆ ਦੇ ਲੋਕ ਸਾਜਿਸ਼ਾਂ ਤਹਿਤ ਵਿਧਾਇਕ ਗੁਰਮੀਤ ਸਿੰੰਘ ਖੁੱਡੀਆਂ ਅਤੇ ਉਨ੍ਹਾਂ ਦੇ ਧੜੇ ਨੂੰ ਬਦਨਾਮ ਕਰਨ ਸਾਜਿਸ਼ਾਂ ਰਚ ਰਹੇ ਹਨ।

ਟਰੱਕ ਯੂਨੀਅਨ 'ਚ ਪੁੱਜੇ ਪੱਤਰਕਾਰ ਨੇ ਵੇਖਿਆ ਕਿ ਟਰੱਕ ਆਪ੍ਰੇਟਰ ਤਾਸ਼ ਖੇਡ ਰਹੇ ਸਨ ਅਤੇ ਪੁਲਿਸ ਮੁਲਾਜਮ ਵਿਹਲੇ ਗੱਲਾਂ ਮਾਰ ਰਹੇ ਸਨ। ਉਥੇ ਮੌਜੂਦ ਚੌਕੀ ਕਿੱਲਿਆਂਵਾਲੀ ਦੇ ਮੁਖੀ ਭਗਵਾਨ ਸਿੰਘ ਨੂੰ ਯੂਨੀਅਨ 'ਚ ਖ਼ਰਾਬ ਹਾਲਾਤਾਂ ਬਾਰੇ ਪੁੱਛਿਆ ਤਾਂ ਉਨ੍ਹਾਂ ਦਾ ਕਹਿਣਾ ਸੀ ਕਿ ਇੱਥੇ ਸਵੇਰੇ ਤੋਂ ਖ਼ਰਾਬ ਹਾਲਾਤਾਂ ਵਾਲੀ ਕੋਈ ਗੱਲ ਵਿਖਾਈ ਨਹੀਂ ਦਿੱਤੀ।

ਟਰੱਕ ਯੂਨੀਅਨ ਮੰਡੀ ਕਿੱਲਿਆਂਵਾਲੀ 'ਚ ਭਾਰੀ ਪੁਲਿਸ ਬਲ ਤਾਇਨਾਤ ਕਰਨ ਬਾਰੇ ਪੁੱਛਣ 'ਤੇ ਡੀ.ਐਸ.ਪੀ ਜਸਪਾਲ ਸਿੰਘ ਨੇ ਕਿਹਾ ਕਿ ਅਮਨ-ਸ਼ਾਂਤੀ ਬਣਾਏ ਰੱਖਣ ਲਈ ਅਮਲਾ ਤਾਇਨਾਤ ਕੀਤਾ ਹੈ। ਦੋਵੇਂ ਧਿਰਾਂ ਨੂੰ ਸ਼ਾਂਤੀ ਨਾਲ ਮਸਲਾ ਨਿਬੇੜਨ ਲਈ ਆਖਿਆ ਗਿਆ ਹੈ। ਨਹੀਂ ਮੰਨੇ ਤਾਂ ਦੋਵੇਂ ਧਿਰਾਂ 'ਤੇ 107-51 ਦੀ ਕਾਰਵਾਈ ਕਰਾਂਗੇ। ਖ਼ਬਰ ਲਿਖੇ ਜਾਣ ਤੱਕ ਹਾਲ ਦੀ ਘੜੀ ਦੋਵੇਂ ਧਿਰਾਂ ਨੂੰ ਘਰੋਂ ਘਰੀ ਭੇਜ ਦਿੱਤਾ ਗਿਆ ਸੀ।

ਟਕਸਾਲੀ 'ਆਪ' ਕਾਡਰ ਦੇ ਇਖਲਾਕੀ ਸੰਘਰਸ਼ ਮੂਹਰੇ ਨਵੇਂ ਕਾਡਰ ਨੂੰ ਪਈ ਮੂੰਹ ਦੀ ਖਾਣੀ

-ਜੱਦੋਜਹਿਦ ਭਰੀ ਤਲਖਕਲਾਮੀ ਮਗਰੋਂ ਟਰੱਕ ਯੂਨੀਅਨ ਕਿੱਲਿਆਂਵਾਲੀ 'ਚ ਟਰੱਕ ਆਪਰੇਟਰਾਂ ਦੀ ਸੱਤ ਮੈਂਬਰੀ ਕਮੇਟੀ ਗਠਿਤ

- ਲੰਬੀ ਪੁਲਿਸ ਦੀ ਮੌਜੂਦਗੀ 'ਚ ਹੋਈ ਸਮੁੱਚੀ ਕਾਰਵਾਈ

ਇਕਬਾਲ ਸਿੰਘ ਸ਼ਾਂਤ

ਲੰਬੀ, 13 ਅਪ੍ਰੈਲ: ਟਰੱਕ ਯੂਨੀਅਨ ਕਿੱਲਿਆਂਵਾਲੀ 'ਤੇ ਕਬਜ਼ੇਕਾਰੀ ਮਾਮਲੇ 'ਚ ਟਕਸਾਲੀ 'ਆਪ' ਕਾਡਰ ਦੇ ਭਖਵੇਂ ਇਖਲਾਕੀ ਸੰਘਰਸ਼  ਮੂਹਰੇ ਵਿਧਾਇਕ ਦੇ ਖਾਸਮਖਾਸ ਫਰੈਸ਼ 'ਆਪ' ਕਾਡਰ ਨੂੰ ਮੂੰਹ ਦੀ ਖਾਣੀ ਪਈ। 

ਅੱਜ ਦਿਨ ਚੜ੍ਹਦੇ ਸਾਰ ਯੂਨੀਅਨ ਵਿੱਚ ਪੁਲਿਸ ਦੀ ਮੌਜੂਦਗੀ 'ਚ ਵੋਟ ਵਜ਼ਨ ਜਾਂਚਣ ਅਤੇ ਲੰਮੀ ਸ਼ਬਦੀ ਤਲਖਕਲਾਮੀ ਉਪਰੰਤ ਨਿਰੋਲ ਆਪਰੇਟਰਾਂ ਦੀ ਸੱਤ ਮੈਂਬਰੀ ਕਮੇਟੀ ਐਲਾਨ ਦਿੱਤੀ ਗਈ। ਬੀਤੇ ਕੱਲ੍ਹ ਟਕਸਾਲੀ ਆਪ ਕਾਡਰ ਵੱਲੋਂ ਵਿਧਾਇਕ ਖੁੱਡੀਆਂ ਦੇ ਬੂਹੇ 'ਤੇ ਧਰਨੇ ਦੇ ਯੂਨੀਅਨ 'ਤੇ ਜ਼ਬਰੀ ਕਬਜ਼ੇ ਅਤੇ ਕਥਿਤ ਗੁੰਡਾਪਰਚੀ ਖਿਲਾਫ ਤਿੱਖਾ ਰੋਹ ਜਤਾਇਆ ਸੀ। 

ਕੱਲ੍ਹ ਧਰਨਾਕਾਰੀ ਨੂੰ ਮਨਾਉਂਦੇ ਵਿਧਾਇਕ ਖੁੱਡੀਆਂ ਨੇ ਯੂਨੀਅਨ ਨਾਲ ਕੋਈ ਸੰਬੰਧ ਨਾ ਹੋਣ ਅਤੇ ਆਪਰੇਟਰਾਂ ਵੱਲੋਂ ਮਰਜੀ ਨਾਲ ਕਿਸੇ ਨੂੰ ਆਪਣਾ ਪ੍ਰਧਾਨ ਚੁਣ ਲੈਣ ਦੀ ਗੱਲ ਆਖੀ ਸੀ। ਜ਼ਿਕਰਯੋਗ ਹੈ ਕਿ ਬੀਤੇ ਐਤਵਾਰ ਵਿਧਾਇਕ ਦੇ ਖਾਸਮਖਾਸ ਆਗੂਆਂ ਦੀ ਮੌਜੂਦਗੀ 'ਚ ਯੂਨੀਅਨ 'ਤੇ ਆਪ ਆਗੂ ਦਰਸ਼ਨ ਵੜਿੰਗਖੇੜਾ ਦੀ ਚੌਧਰ ਕਾਇਮ ਕੀਤੀ ਗਈ ਸੀ। 

ਯੂਨੀਅਨ ਕੰਪਲੈਕਸ ਵਿੱਚ ਲੰਬੀ ਥਾਣਾ ਦੇ ਮੁਖੀ ਅਮਨਦੀਪ ਸਿੰਘ ਅਤੇ ਚੋਕੀ ਮੁਖੀ ਭਗਵਾਨ ਸਿੰਘ ਦੀ ਅਗਵਾਈ ਹੇਠ ਪੁਲਿਸ ਪੁੱਜੀ। ਇਸ ਮੌਕੇ ਟਕਸਾਲੀ ਆਪ ਕਾਡਰ ਦੇ ਆਗੂ ਜਸਵੀਰ ਹਾਕੂਵਾਲਾ, ਗੁਰਵੀਰ ਸਿੰਘ ਅਤੇ ਗੁਰਮਹਿੰਦਰ ਸਿੰਘ ਵੀ ਮੌਜੂਦ ਸਨ। ਇਸ ਮੌਕੇ ਵਿਧਾਇਕ ਸਮਰਥਕ ਨਵਾਂ ਆਪ ਕਾਡਰ ਯੂਨੀਅਨ 'ਤੇ ਚੌਧਰ ਕਾਇਮ ਰੱਖਣ ਦੇ ਜਦੋਜਹਿਦ ਕਰਦਾ ਵਿਖਾਈ ਦਿੱਤਾ। ਜਿਸ ਤਹਿਤ ਉਨ੍ਹਾਂ ਦੀ ਟਰੱਕ ਆਪਰੇਟਰਾਂ ਆਗੂਆਂ ਨਾਲ ਤਲਖਕਲਾਮੀ ਵੀ ਹੋਈ। 

ਇਸੇ ਦੌਰਾਨ ਕਈ ਟਰੱਕ ਆਪਰੇਟਰ ਆਪਸ ਵਿਚਕਾਰ ਵੀ ਪੁਰਾਣੇ ਮਸਲੇ ਉਠਾਉਂਦੇ ਵਿਖਾਈ ਦਿੱਤੇ। ਜਰਨੈਲ ਸਿੰਘ ਡੱਫੂ ਅਤੇ ਜਗਤਾਰ ਪਥਰਾਲਾ ਆਹਮੋ ਸਾਹਮਣੇ ਡਟ ਗਏ। ਜਿਸ 'ਤੇ ਥਾਣਾ ਮੁਖੀ ਅਮਨਦੀਪ ਸਿੰਘ ਨੇ ਸਖ਼ਤ ਲਹਿਜੇ 'ਚ ਮਾਹੌਲ ਸ਼ਾਂਤਮਈ ਬਣਾਏ ਰੱਖਣ ਜਾਂ ਪੁਲਿਸ ਕਾਰਵਾਈ ਲਈ ਤਿਆਰ ਰਹਿਣ ਚਿਤਾਵਨੀ ਦੇ ਦਿੱਤੀ। ਜਿਸ ਮਗਰੋਂ ਵੋਟ ਗਿਣਤੀ ਵਜ਼ਨ ਮਾਪਣ ਸਮੇਂ  ਯੂਨੀਅਨ ਆਪਰੇਟਰ ਪੌਣੇ ਚਾਰ ਗੁਣਾ ਇੱਕ ਪਾਸੇ ਖੜ੍ਹੇ ਵਿਖਾਈ ਦਿੱਤੇ। 

ਇਸ ਮੌਕੇ ਯੂਨੀਅਨ ਦੇ ਕਾਫੀ ਆਪਰੇਟਰਾਂ ਨੇ ਪ੍ਰਧਾਨ ਦਰਸ਼ਨ ਸਿੰਘ ਨੂੰ ਚੰਗਾ ਇਨਸਾਨ ਦੱਸਦੇ ਕਿਹਾ ਕਿ ਕਾਂਗਰਸ ਸਰਕਾਰ ਸਮੇਂ ਦੀ ਪੰਜ ਸਾਲਾ ਪ੍ਰਧਾਨਗੀ ਨੇ ਯੂਨੀਅਨ ਲੁੱਟ ਕੇ ਖਾ ਲਈ, ਉਹ ਡਰ ਹੀ ਬਾਹਰੀ ਵਿਅਕਤੀ 'ਤੇ ਭਰੋਸਾ ਬਣਨ ਨਹੀਂ ਦੇ ਰਿਹਾ। ਇਸ ਮੌਕੇ ਸੱਤ ਮੈਂਬਰੀ ਕਮੇਟੀ ਵਿਚ ਹਰਦਿਆਲ ਸਿੰਘ, ਕਿਸ਼ੋਰ ਕੁਮਾਰ, ਸੱਤਪਾਲ ਸਿੰਘ ਪੰਜਾਵਾ, ਗੁਰਪ੍ਰੀਤ ਸਿੰਘ ਗੋਪੀ, ਰਾਜਪਾਲ ਸਚਦੇਵਾ, ਰਾਜਪਾਲ ਸਿੰਘ ਰਾਜਾ ਅਤੇ ਸ਼ਿਵਰਾਜ ਨੂੰ ਮੈਂਬਰ ਐਲਾਨਿਆ ਗਿਆ। ਬਾਅਦ ਵਿਚ ਐਸਡੀਐਮ ਮਲੋਟ ਤੋਂ ਨਵੀਂ ਸੱਤ ਕਮੇਟੀ ਕਮੇਟੀ 'ਤੇ ਮੁਹਰ ਲਗਵਾ ਕੇ ਲਿਆਂਦੀ ਗਈ।

ਆਪ ਦੀ 'ਸਾਊ ਸਿਆਸਤ' ਦੇ 'ਸਿਆਸੀ ਨੌਨਿਹਾਲਾਂ' ਦਾ ਟਰੱਕ ਯੂਨੀਅਨ ਮੰਡੀ ਕਿੱਲਿਆਂਵਾਲੀ 'ਤੇ 'ਕਬਜ਼ਾ'

-ਆਪ ਆਗੂ ਦਰਸ਼ਨ ਸਿੰਘ ਵੜਿੰਗਖੇੜਾ ਨੂੰ ਪ੍ਰਧਾਨ ਥਾਪਿਆ, 11 ਮੈਂਬਰੀ ਕਮੇਟੀ ਢਾਹ ਕੇ 5 ਮੈਂਬਰੀ ਬਣਾਈ

- ਟਰਾਂਸਪੋਰਟਰਾਂ ਨੇ ਮੁੱਖ ਮੰਤਰੀ ਭਗਵੰਤ ਮਾਨ ਤੱਕ ਕੀਤੀ ਸੀ ਅਗਾਊਂ ਪਹੁੰਚ

- ਕਥਿਤ ਕਬਜ਼ੇਕਾਰੀ ਤੋਂ ਆਪ ਟਕਸਾਲੀ ਵਰਕਰ ਔਖੇ, ਵਿਰੋਧ ਜਤਾਇਆ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਬੀਤੀ 23 ਮਾਰਚ ਨੂੰ ਨਵੀਂ ਗਠਿਤ 11 ਮੈਂਬਰੀ ਕਮੇਟੀ ਨੂੰ ਦਰਕਿਨਾਰ ਕਰਕੇ ਅੱਜ ਆਖ਼ਰ ਟਰੱਕ ਯੂਨੀਅਨ ਮੰਡੀ ਕਿੱਲਿਆਂਵਾਲੀ 'ਤੇ ਆਪਮ ਆਦਮੀ ਪਾਰਟੀ ਦੀ 'ਸਾਊ ਸਿਆਸਤ' ਦੇ 'ਸਿਆਸੀ ਨੌਨਿਹਾਲਾਂ' ਦਾ 'ਕਥਿਤ' ਕਬਜ਼ਾ ਹੋ ਗਿਆ। 'ਆਪ' ਆਗੂ ਤੇ ਸਰਪੰਚ ਪ੍ਰਤੀਨਿਧੀ ਦਰਸ਼ਨ ਵੜਿੰਗਖੇੜਾ ਨੂੰ ਟਰੱਕ ਯੂਨੀਅਨ (ਦ ਟਰੱਕ ਆਪ੍ਰੇਟਰ ਵੈਲਫੇਅਰ ਸੁਸਾਇਟੀ) ਦਾ ਪ੍ਰਧਾਨ ਥਾਪ ਦਿੱਤਾ ਗਿਆ ਹੈ। ਉਸਦੀ ਤਾਜਪੋਸ਼ੀ ਲਈ ਅੱਜ ਵਿਧਾਇਕ ਗੁਰਮੀਤ ਸਿੰਘ ਖੁੱਡੀਆਂ ਦੇ ਖਾਸਮ-ਖਾਸ ਯੂਥ ਆਗੂ ਟੋਜੀ ਲੰਬੀ ਅਤੇ ਚੇਅਰਮੈਨ ਹਰਪ੍ਰੀਤ ਕਰਮਗੜ੍ਹ ਦੀ ਅਗਵਾਈ ਹੇਠ ਕਈ ਪਿੰਡਾਂ ਦੇ ਪੰਚ ਸਰਪੰਚ, ਸਰਪੰਚ ਪ੍ਰਤੀਨਿਧੀ ਅਤੇ ਆਗੂ ਟਰੱਕ ਯੂਨੀਅਨ ਵਿਖੇ ਪੁੱਜੇ। ਨਵੇਂ ਪ੍ਰਧਾਨ ਇਲਾਵਾ ਪੰਜ ਕਮੇਟੀ ਗਠਿਤ ਕੀਤੀ ਹੈ। ਪਹਿਲਾਂ ਵਾਲੀ 11 ਮੈਂਬਰੀ ਕਮੇਟੀ ਵਿੱਚੋਂ ਸਿਰਫ਼ ਦੋ ਮੈਂਬਰ ਲਏ ਹਨ।

ਯੂਨੀਅਨ ਦੀ 11 ਮੈਂਬਰੀ ਕਮੇਟੀ ਦੇ ਟਰਾਂਸਪੋਰਟਰ ਮੈਂਬਰਾਂ ਨੇ ਇਸਨੂੰ ਖੁੱਲ੍ਹੇਆਮ ਸਿਆਸੀ ਧੱਕੇਸ਼ਾਹੀ ਦੱਸਦੇ ਹੋਏ ਟਰੱਕ ਵੇਚ ਕੇ ਘਰ ਬੈਠਣ ਦੀ ਚਿਤਾਵਨੀ ਦਿੱਤੀ ਹੈ। ਬੀਤੇ ਕੱਲ੍ਹ ਟਰਾਂਸਪੋਰਟਰ ਜਰਨੈਲ ਸਿੰਘ ਡੱਫ਼ੂ ਅਤੇ ਹੋਰਨਾਂ ਨੇ ਕਬਜ਼ੇਕਾਰੀ ਖਿਲਾਫ਼ ਅਗਾਊਂ ਤੌਰ 'ਤੇ ਚੰਡੀਗੜ੍ਹ ਜਾ ਕੇ ਮੁੱਖ ਮੰਤਰੀ ਭਗਵੰਤ ਮਾਨ ਨਾਲ ਮੁਲਾਕਾਤ ਦੀ ਕੋਸ਼ਿਸ਼ ਕੀਤੀ ਸੀ। ਮੁਲਾਕਾਤ ਨਾ ਹੋਣ 'ਤੇ ਕਬਜ਼ੇ ਦੇ ਖਦਸ਼ੇ ਆਦਿ ਦਾ ਮੰਗ ਪੱਤਰ ਸੌਂਪ ਆਏ।

'ਆਪ' ਦੇ ਟਕਸਾਲੀ ਵਰਕਰਾਂ ਨੇ ਯੂਨੀਅਨ 'ਤੇ ਕਬੇਜ਼ਕਾਰੀ ਨੂੰ ਪਾਰਟੀ ਅਸੂਲਾਂ ਦੇ ਉਲਟ ਦੱਸਿਆ ਹੈ। ਉਨ੍ਹਾਂ ਵੱਟਸਐਪ 'ਤੇ ਆਪ ਟਕਸਾਲੀ ਕਮੇਟੀ ਲੰਬੀ ਦਾ ਗਰੁੱਪ ਕਾਇਮ ਕਰ ਦਿੱਤਾ ਹੈ।

ਜ਼ਿਕਰਯੋਗ ਹੈ ਕਿ ਸਿਆਸੀ ਬਦਲਾਅ ਦੇ ਉਪਰੰਤ ਦੋ ਹਫ਼ਤੇ ਪਹਿਲਾਂ ਹਲਕਾ ਵਿਧਾਇਕ ਦੀ ਸਹਿਮਤੀ ਦੇ ਆਧਾਰ 'ਤੇ ਟਰਾਂਸਪੋਰਟਰਾਂ ਨੇ ਕਮੇਟੀ ਬਣਾਈ ਸੀ। ਜਿਸ ਮਗਰੋਂ ਸੱਤਾ ਪੱਖੀ ਵਲਵਲਿਆਂ 'ਚ ਕਬਜ਼ੇਕਾਰੀ ਲਈ ਲਗਾਤਾਰ ਵੱਟ ਉੱਠਦੇ ਨਜ਼ਰ ਆ ਰਹੇ ਸਨ। ਜਿਨ੍ਹਾਂ ਨੂੰ ਅੱਜ ਸਿਆਸੀ ਵਜੂਦ ਵਾਲੀ ਢਾਅ-ਭੰਨ ਤਹਿਤ ਅੰਜਾਮ ਦੇ ਦਿੱਤਾ ਗਿਆ। ਬੀਤੇ ਪੰਜ ਸਾਲਾਂ ਦੌਰਾਨ ਟਰੱਕ ਯੂਨੀਅਨ ਕਿੱਲਿਆਂਵਾਲੀ ਐਤਵਾਰੀ ਪਸ਼ੂ ਮੰਡੀ 'ਚ ਲੋਡਿੰਗ 'ਤੇ ਚਾਰ-ਪੰਜ ਹਜ਼ਾਰ ਰੁਪਏ ਦੀ ਗੁੰਡਾ ਪਰਚੀ ਲਈ ਖੂਬ ਬਦਨਾਮ ਰਹੀ ਹੈ। ਲੰਮੇ ਸਮੇਂ ਤੋਂ ਯੂਨੀਅਨ ਦਾ ਬਿਜਲੀ ਕੁਨੈਕਸ਼ਨ ਕੱਟਿਆ ਹੋਇਆ ਹੈ।

ਟਰਾਂਸਪੋਰਟਰ ਜਰਨੈਲ ਸਿੰਘ ਡੱਫ਼ੂ ਨੇ ਕਿਹਾ ਕਿ 23 ਮਾਰਚ ਨੂੰ ਵਿਧਾਇਕ ਗੁਰਮੀਤ ਸਿੰਘ ਖੁੱਡੀਆਂ ਦੀ ਸਹਿਮਤੀ ਨਾਲ ਟਰਾਂਸਪੋਰਟਰਾਂ ਦੀ 11 ਮੈਂਬਰੀ ਕਮੇਟੀ ਬਣਾਈ ਸੀ। ਜਿਸਨੂੰ ਅੱਜ ਆਪ ਆਗੂਆਂ ਨੇ ਹੀ ਪਿੰਡਾਂ ਦੇ ਸਰਪੰਚ ਲਿਆ ਕੇ ਦੋ-ਤਿੰਨ ਕਮੇਟੀ ਮੈਂਬਰਾਂ ਦੀ ਹਮਾਇਤ ਵਿਖਾ ਕੇ ਯੂਨੀਅਨ 'ਤੇ ਜ਼ਬਰੀ ਕਬਜ਼ਾ ਕੀਤਾ ਹੈ। ਜਰਨੈਲ ਸਿੰਘ ਅਨੁਸਾਰ ਨਵੇਂ ਥਾਪੇ ਪ੍ਰਧਾਨ ਦਾ ਟਰਾਂਸਪੋਰਟ ਕਿੱਤੇ ਨਾਲ ਕੋਈ ਸੰਬੰਧ ਨਹੀਂ ਹੈ। ਉਹ ਲੋਕ ਮਜ਼ਬੂਰਨ ਟਰੱਕ ਵੇਚ ਕੇ ਘਰ ਬੈਠ ਜਾਣਗੇ। ਹੁਣ ਸਰਕਾਰ ਬਦਲਣ ਮਗਰੋਂ ਵੀ ਉਹੀ ਧੱਕੇਸ਼ਾਹੀ ਤੇ ਗੁੰਡਾ ਪਰਚੀ ਵਾਲਾ ਮਾਹੌਲ ਸਹਿਨਯੋਗ ਨਹੀਂ ਹੈ।

ਨਵੇਂ ਪ੍ਰਧਾਨ ਦਰਜਨ ਸਿੰਘ ਵੜਿੰਗਖੇੜਾ ਨੇ ਕਿਹਾ ਕਿ ਉਨ੍ਹਾਂ ਨੂੰ ਆਪ੍ਰੇਟਰਾਂ ਨੇ ਪ੍ਰਧਾਨ ਚੁਣਿਆ ਹੈ। ਧੱਕੇ ਦੇ ਦੋਸ਼ ਝੂਠੇ ਹਨ। ਉਹ ਆਪ੍ਰੇਟਰਾਂ ਦੇ ਹਿੱਤ 'ਚ ਕੰਮ ਕਰਨਗੇ ਅਤੇ ਗੁੰਡਾ ਪਰਚੀ ਨਹੀਂ ਚੱਲਣ ਦਿੱਤੀ ਜਾਵੇਗੀ। ਨਵੀਂ ਸੰਚਾਲਨ ਕਮੇਟੀ 'ਚ ਜਗਤਾਰ ਪਥਰਾਲਾ, ਸੁਰੇਸ਼ ਜਿੰਦਲ, ਜੀਵਨ ਬਾਂਸਲ, ਜਗਜੀਵਨ ਜਿੰਦਲ ਅਤੇ ਕੁਲਦੀਪ ਸਾਂਵਤਖੇੜਾ ਸ਼ਾਮਲ ਹਨ।

ਆਪ ਟਕਸਾਲੀ ਕਮੇਟੀ ਲੰਬੀ ਦੇ ਸੀਨੀਅਰ ਆਗੂ ਜਸਵੀਰ ਹਾਕੂਵਾਲਾ, ਗੁਰਵੀਰ ਸਿੰਘ ਮਿੱਡੂਖੇੜਾ ਅਤੇ ਹੈਪੀ ਬੀਦੋਵਾਲੀ ਨੇ ਰੋਸ ਜਤਾਉਂਦੇ ਕਿਹਾ ਕਿ ਟਰੱਕ ਯੂਨੀਅਨ 'ਚ ਇਹ ਕਾਰਗੁਜਾਰੀ 'ਆਪ' ਦੇ ਅਸੂਲਾਂ ਦੇ ਖਿਲਾਫ਼ ਹੈ। ਰਵਾਇਤੀ ਪਾਰਟੀਆਂ ਪਾਰਟੀਆਂ ਦੀ ਰੀਤ 'ਤੇ ਕੀਤੀ ਇਸ ਕਬਜ਼ੇਕਾਰੀ ਦਾ ਉਹ ਵਿਰੋਧ ਕਰਦੇ ਹਨ। ਹਾਈਕਮਾਂਡ ਕੋਲ ਪਹੁੰਚ ਕਰਨਗੇ।

ਦੂਜੇ ਪਾਸੇ ਹਲਕਾ ਲੰਬੀ ਦੇ ਵਿਧਾਇਕ ਗੁਰਮੀਤ ਸਿੰਘ ਖੁੱਡੀਆਂ ਨੇ ਕਿਹਾ ਕਿ ਟਰੱਕਾਂ ਵਾਲਿਆਂ ਨੇ ਆਪਣੀ ਕਮੇਟੀ ਖੁਦ ਬਣਾਈ ਹੈ। ਉਨ੍ਹਾਂ ਦਾ ਨਾ ਆਉਣ ਹੈ ਅਤੇ ਨਾ ਜਾਣ ਹੈ। ਚੁਣੇ ਅਹੁਦੇਦਾਰ ਆਪਣੀ ਜੁੰਮੇਵਾਰੀਆਂ ਆਪ ਨਿਭਾਉਣਗੇ।

ਦੁੱਖਦਾਇਕ ਸੂਚਨਾ: ਪੰਜਾਬ ਦੇ ਸਾਬਕਾ ਮੰਤਰੀ ਹਰਦੀਪਇੰਦਰ ਸਿੰਘ ਬਾਦਲ ਨਹੀਂ ਰਹੇ

- ਅੰਤਮ ਸਸਕਾਰ ਕੱਲ੍ਹ ਪਿੰਡ ਬਾਦਲ 'ਚ ਹੋਵੇਗਾ 

- ਬਰਨਾਲਾ ਸਰਕਾਰ 'ਚ ਟਰਾਂਸਪੋਰਟ ਮੰਤਰੀ ਰਹੇ ਸਨ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਪੰਜਾਬ ਦੇ ਸਾਬਕਾ ਟਰਾਂਸਪੋਰਟ ਮੰਤਰੀ ਅਤੇ ਬਾਦਲ ਖਾਨਦਾਨ ਦੇ ਸੀਨੀਅਰ ਮੈਂਬਰ 79 ਸਾਲਾਂ ਦੇ ਹਰਦੀਪਇੰਦਰ ਸਿੰਘ ਬਾਦਲ 'ਦੀਪ ਜੀ' ਦਾ ਅੱਜ ਸਵਰਗਵਾਸ ਹੋ ਗਿਆ। ਉਹ 1980 ਅਤੇ 1985 'ਚ ਹਲਕਾ ਲੰਬੀ ਤੋਂ ਦੋ ਵਾਰ ਵਿਧਾਇਕ ਚੁਣੇ ਗਏ ਸਨ। ਸ੍ਰੀ ਬਾਦਲ, ਸੁਰਜੀਤ ਸਿੰਘ ਬਰਨਾਲਾ ਸਰਕਾਰ ਵਿੱਚ ਟਰਾਂਸਪੋਰਟ ਮੰਤਰੀ ਰਹੇ ਸਨ। ਕਰੀਬ ਦੋ ਦਹਾਕੇ ਪਹਿਲਾਂ ਉਹ ਕਾਂਗਰਸ 'ਚ ਸ਼ਾਮਲ ਹੋਏ ਸਨ ਅਤੇ ਕੁੱਝ ਸਮੇਂ ਤੋਂ ਸਰਗਰਮ ਸਿਆਸਤ ਤੋਂ ਦੂਰੀ ਬਣਾਏ ਹੋਏ ਸਨ।

ਪਰਿਵਾਰਕ ਸੂਤਰਾਂ ਮੁਤਾਬਕ ਕੁੱਝ ਮਹੀਨੇ ਪਹਿਲਾਂ ਉਨ੍ਹਾਂ ਦੇ ਦਿਲ ਦਾ ਵਾਲਵ ਦਾ ਆਪ੍ਰੇਸ਼ਨ ਹੋਇਆ ਸੀ। ਕਰੀਬ ਹਫ਼ਤੇ ਭਰ ਤੋਂ ਉਨ੍ਹਾਂ ਦੇ ਪਿੱਠ ਦਰਦ ਉੱਠਿਆ ਸੀ। ਜਿਸ ਮਗਰੋਂ ਉਨ੍ਹਾਂ ਨੂੰ ਮੁਹਾਲੀ ਦੇ ਨਿੱਜੀ ਹਸਪਤਾਲ 'ਚ ਦਾਖ਼ਲ ਕਰਵਾਇਆ ਗਿਆ ਸੀ। ਅੱਜ ਬਾਅਦ ਦੁਪਿਹਰ ਉਨ੍ਹਾਂ ਅੰਤਮ ਸਾਹ ਲਿਆ। 

ਉਨ੍ਹਾਂ ਦੇ ਚਚੇਰੇ ਭਰਾ ਮਹੇਸ਼ਇੰਦਰ ਸਿੰਘ ਬਾਦਲ ਨੇ ਦੱਸਿਆ ਕਿ ਦੀਪ ਜੀ ਦਾ ਚਲਿਆ ਜਾਣਾ ਬੇਹੱਦ ਦੁੱਖਦਾਈ ਅਤੇ ਨਾ ਸਹਿਨਯੋਗ ਹੈ। ਉਨ੍ਹਾਂ ਦੀ ਮ੍ਰਿਤਕ ਦੇਹ ਸਵੇਰੇ ਪਿੰਡ ਲਿਆਂਦੀ ਜਾਵੇਗੀ ਅਤੇ ਉਨ੍ਹਾਂ ਦਾ ਅੰਤਮ ਸਸਕਾਰ ਕੱਲ੍ਹ 5 ਅਪ੍ਰੈਲ ਨੂੰ ਪਿੰਡ ਬਾਦਲ ਵਿਖੇ ਕੀਤਾ ਜਾਵੇਗਾ। ਉਨ੍ਹਾਂ ਦੇ ਦਿਹਾਂਤ ਦੀ ਸੂਚਨਾ ਨਾਲ ਇਲਾਕੇ ਭਰ 'ਚ ਦੁੱਖ ਦੀ ਲਹਿਰ ਹੈ। 

ਸੂਬੇ ਦੀ ਵੱਡੀ ਸਰਮਾਏਦਾਰੀ ਵਿਚੋਂ ਹੋਣ ਅਤੇ ਜੀਵਨ 'ਚ ਵੱਡੇ ਅਹੁਦਿਆਂ 'ਤੇ ਰਹਿਣ ਦੇ ਬਾਵਜੂਦ ਦੀਪ ਜੀ ਬੇਹੱਦ ਸਾਦਾ ਜ਼ਿੰਦਗੀ ਦੇ ਮੁੱਦਈ ਸਨ ਅਤੇ ਉਨ੍ਹਾਂ ਦੀ ਸਿਆਸੀ ਅਤੇ ਸਮਾਜਿਕ ਮੁੱਦਿਆਂ ਵੱਡੀ ਪਕੜ ਸੀ। ਉਹ ਕਿਤਾਬਾਂ ਪੜ੍ਹਨ ਦੇ ਬੜੇ ਸ਼ੌਕੀਨ ਸਨ। ਬਿਮਾਰ ਹੋਣ ਤੋਂ ਪਹਿਲਾਂ ਤੱਕ ਉਹ ਜੱਦੀ-ਪੁਸ਼ਤੀ ਖੇਤੀਬਾੜੀ ਦੀ ਦੇਖ-ਰੇਖ ਖੁਦ ਕਰਿਆ ਸੀ। ਕਰੀਬ ਸਾਲ-ਸਵਾ ਸਾਲ ਤੱਕ ਉਹ ਪਿੰਡ ਬਾਦਲ 'ਚ ਆਵਾਜਾਈ ਲਈ ਸਾਇਕਲ ਦੀ ਸਵਾਰੀ ਨੂੰ ਤਰਜੀਹ ਦਿਆ ਕਰਦੇ ਸਨ। ਉਹ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਚਚੇਰੇ ਭਰਾ ਸਨ।

ਸੁਖਬੀਰ ਬਾਦਲ ਨੂੰ ਅਵਾਮ ਵੱਲੋਂ ਨਕਾਰਨ ਦੇ ਦਸਵੇਂ ਦਿਨ ਹੀ ਸਿਆਸੀ ਮੈਦਾਨ 'ਚ ਉੱਤਰੇ 'ਬਾਬਾ' ਬਾਦਲ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਸੂਬਾਈ ਚੋਣਾਂ ਵਿਚ ਸੁਖਬੀਰ ਬਾਦਲ ਦੀ ਕਾਕਾ ਕਲਚਰ ਵਾਲੀ ਹਾਈ-ਪ੍ਰੋਫਾਈਲ ਅਗਵਾਈ ਅਵਾਮ ਵੱਲੋਂ ਮੁੱਢੋਂ ਨਕਾਰੇ ਜਾਣ ਬਾਅਦ ਅਕਾਲੀ ਦਲ ਦੀ ਅਣ-ਐਲਾਨੀ ਰਹਿਨੁਮਾਈ ਪ੍ਰਕਾਸ਼ ਸਿੰਘ ਵੱਡੇ ਬਾਦਲ ਦੀ ਸਿਆਸੀ ਮਜ਼ਬੂਰੀ ਬਣ ਗਈ ਹੈ। ਸਿਆਸੀ ਸਫ਼ਾਂ ਵਿੱਚ ਜ਼ਿੰਦਗੀ ਦੀ ਸਭ ਤੋਂ ਵੱਡੀ ਹਾਰ ਝੱਲਣ ਦੇ ਡੇਢ ਹਫਤੇ ਬਾਅਦ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਜਨਤਕ ਸਫ਼ਾਂ ਵਿੱਚ ਪਰਤ ਆਏ। ਅੱਜ ਉਨ੍ਹਾਂ ਲੰਬੀ ਹਲਕੇ ਦੇ ਪਿੰਡਾਂ ਵਿੱਚ ਧੰਨਵਾਦੀ ਦੌਰਾ ਸ਼ੁਰੂ ਕਰ ਦਿੱਤਾ।

ਸ੍ਰੀ ਬਾਦਲ ਰਵਾਇਤੀ ਹਲਕੇ ਲੰਬੀ ਵਿੱਚ ਬਦਲਾਅ ਦੇ ਲਹਿਰ ਵਿਚ 11361 ਵੋਟਾਂ ਦੇ ਫਰਕ ਨਾਲ ਸਿਆਸੀ ਪਟਕਣੀ ਖਾ ਗਏ ਸਨ। ਸੂਬੇ ਵਿਚ ਬੇਹੱਦ ਮਜ਼ਬੂਤ ਅਤੇ ਵੱਡਾ ਕਾਡਰ ਹੋਣ ਦੇ ਬਾਵਜੂਦ ਢਾਈ-ਤਿੰਨ ਸੀਟਾਂ ਤੱਕ ਸਮੇਟੇ ਜਾਣ ਨਾਲ ਅਕਾਲੀ ਦਲ ਦਾ 2017 ਤੋਂ ਕੰਧ 'ਤੇ ਲਿਖਿਆ ਭਵਿੱਖ 2022 ਵਿੱਚ ਹਕੀਕਤ ਬਣ ਗਿਆ। ਜ਼ਮੀਨੀ ਤੱਥ ਹਨ ਕਿ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਦਾ ਤਾਣਾ-ਬਾਣਾ ਪਿੰਡ ਬਾਦਲ ਵਿਖੇ ਹਲਕਾਵਾਰ ਲੀਡਰਸ਼ਿਪ ਨਾਲ ਵੱਡੀਆਂ ਮੀਟਿੰਗ ਅਤੇ ਸੁਖਬੀਰ ਦੇ ਆਲੇ-ਦੁਆਲੇ ਦੇ ਅੱਧੀ ਦਰਜਨ "ਨਿੱਕ ਨੇਮ" ਜੁੰਡਲੀ ਤੱਕ ਸੀਮਤ ਰਹਿ ਗਿਆ।

ਸੁਖਬੀਰ ਬਾਦਲ, ਜੁੰਡਲੀ ਦੇ ਵਿਖਾਏ ਜਲੌਅ ਵਿੱਚ ਸੁਫਨਿਆਂ ਵਿੱਚ ਅਗਾਮੀ ਮੁੱਖ ਮੰਤਰੀ ਸ਼ਿਪ ਦੇ ਖਵਾਬ ਮਾਣਦੇ ਰਹੇ, ਜਦਕਿ ਹਕੀਕਤ ਵਿਚ ਆਪ ਨੇ ਸੂਬੇ ਵਿਚ ਝਾੜੂ ਫੇਰ ਦਿੱਤਾ। ਅਕਾਲੀ ਦਲ ਵੱਡੀਆਂ ਰੈਲੀਆਂ ਅਤੇ ਧਰਨੇ ਮੁਜਾਹਰਿਆਂ ਦੇ ਬਾਵਜੂਦ ਲੋਕ ਮਨਾਂ ਨੂੰ ਛੂਹਣ ਵਿੱਚ ਅਸਫਲ ਰਿਹਾ। ਸੂਬੇ ਦੇ ਅਵਾਮ ਨੇ ਸੁਖਬੀਰ ਸਿੰਘ ਬਾਦਲ ਨੂੰ ਬਤੌਰ ਮੁੱਖ ਮੰਤਰੀ ਉਮੀਦਵਾਰ ਕਬੂਲ ਨਹੀਂ ਕੀਤਾ।

ਲੋਕ ਅਕਾਲੀ ਦਲ ਦੇ ਦਸ ਸਾਲਾ ਰਾਜਭਾਗ ਦੀਆਂ ਊਣਤਾਈਆਂ ਨੂੰ ਭੁਲਾ ਨਹੀਂ ਸਕੇ ਹਨ, ਇਹ ਚੋਣ ਨਤੀਜਿਆਂ ਨੇ ਸਾਬਿਤ ਕਰ ਦਿੱਤਾ। ਲੰਬੀ ਵਿਚ ਵੀ ਅਕਾਲੀ ਦਲ ਦੇ ਇੰਚਾਰਜ ਅਤੇ ਪੇਂਡੂ ਮਾਲਕੀ ਕਲਚਰ ਨੇ ਆਮ ਵੋਟਰਾ ਤਪਾ ਰੱਖੇ ਹਨ।ਬਾਦਲਾਂ ਨੂੰ ਮੁੱਢ ਕਦੀਮ ਤੋਂ 50 ਫੀਸਦੀ ਤੋਂ ਵੱਧ ਵੋਟਾਂ ਦੇ ਗੱਫੇ ਦੇਣ ਵਾਲੇ ਲੋਕਾਂ ਹੱਥੋਂ ਬਾਦਲ ਪਰਿਵਾਰ ਨੂੰ ਪੇਂਡੂ ਇੰਚਾਰਜਾਂ ਅਤੇ ਮੌਕਾਪ੍ਰਸਤਾਂ ਦੀ ਜੁੰਡਲੀ ਵਿੱਚ ਘਿਰੇ ਹੋਣ ਦਾ ਵੱਡਾ ਖਮਿਆਜ਼ਾ ਜੱਦੀ ਗੜ੍ਹ ਲੰਬੀ ਵਿੱਚ ਭੁਗਤਣਾ ਪਿਆ।

ਅਕਾਲੀ ਦਲ ਦੀ ਗੈਰਨੀਤੀਗਤ ਕਾਰਗੁਜਾਰੀ ਦੀ ਵਿਰੋਧਤਾ ਇਸ ਵਾਰ ਆਮ ਲੋਕਾਂ ਦੇ ਮੂੰਹਾਂ ਅਤੇ ਬੋਲ-ਬਾਣੀ ਤੋਂ ਝਲਕਣ ਲੱਗੀ ਸੀ। ਜਿਸਦੇ ਨਤੀਜੇ ਵਜੋਂ ਹਲਕੇ ਵਿਚ ਫੈਲੇ ਲੋਕ ਰੋਹ ਦਾ ਉਬਾਲਾ ਵੱਡੇ ਬਾਦਲ ਦੀ ਨਾਮੋਸ਼ੀਜਨਕ ਹਾਰ ਵਜੋਂ ਸਾਹਮਣੇ ਆਇਆ। ਉਪਰੋਂ ਦਿੱਲੀ ਸਿੱਖ ਗੁਰਦੁਆਰਾ ਪ੍ਰਬੰਧਕ ਕਮੇਟੀ 'ਤੇ ਕਾਬਜ਼ ਪਾਰਟੀ ਲੀਡਰਸ਼ਿਪ ਵੀ ਹੱਥ ਵਿਖਾ ਗਈ। ਬਠਿੰਡਾ ਵਿਚ ਅਕਾਲੀ ਆਗੂ ਅਤੇ ਉਮੀਦਵਾਰ ਸਰੂਪ ਚੰਦ ਸਿੰਗਲਾ ਨੇ ਬਾਦਲ ਪਰਿਵਾਰ 'ਤੇ ਗੰਭੀਰ ਦੋਸ਼ ਲਗਾਉਂਦੇ ਹੋਏ ਪਾਰਟੀ ਨੂੰ ਅਲਵਿਦਾ ਆਖ ਦਿੱਤਾ।

ਇਨ੍ਹਾਂ ਸਭ ਹਾਲਾਤਾਂ ਨੂੰ ਝੱਲਣ ਅਤੇ ਵਾਚਣ ਦੇ ਬਾਵਜੂਦ 95 ਸਾਲਾ ਸਿਆਸਤਦਾਨ ਨਾਮੋਸ਼ੀਜਨਕ ਹਾਰ ਨੂੰ ਆਗਾਮੀ ਭਵਿੱਖ ਵਿੱਚ ਪੜਚੋਲਵੀਂ ਤਾਕਤ ਵਿੱਚ ਬਦਲਣ ਲਈ ਮੈਦਾਨ ਵਿੱਚ ਨਿਤਰ ਪਏ ਹਨ। ਵੱਡੇ ਬਾਦਲ ਸੂਬੇ ਵਿੱਚ ਇਤਿਹਾਸਕ ਬਹੁਮਤ ਵਾਲੀ ਭਗਵੰਤ ਮਾਨ ਸਰਕਾਰ ਦੇ ਵਜੂਦ ਵਿੱਚ ਆਉਣ ਦੇ ਨਾਲ ਹੀ ਵਿਧਾਨਸਭਾ ਦੇ ਬਾਹਰੋਂ ਹੀ ਸਿਆਸੀ ਟਾਕਰੇ ਲਈ ਡਟ ਗਏ ਹਨ।

ਅੱਜ ਧੰਨਵਾਦੀ ਦੌਰੇ ਦੇ ਮੌਕੇ ਅੱਧੀ ਦਰਜਨ ਪਿੰਡਾਂ ਵਿਚ ਲੋਕਾਂ ਦੇ ਮੁਖਾਤਿਬ ਹੁੰਦਿਆਂ ਸਾਬਕਾ ਮੁੱਖ ਮੰਤਰੀ ਨੇ ਆਖਿਆ ਕਿ ਹਾਰ-ਜਿੱਤ ਜ਼ਿੰਦਗੀ ਦਾ ਹਿੱਸਾ ਹੈ। ਐਮਰਜੈਂਸੀ ਬਾਅਦ ਦੇਸ਼ ਦੀ ਤਤਕਾਲੀ ਪ੍ਰਧਾਨ ਮੰਤਰੀ ਇੰਦਰਾ ਗਾਂਧੀ ਵੀ ਚੋਣ ਹਾਰ ਗਈ ਸੀ। ਲੋਕਾਂ ਨੇ ਬਦਲਾਅ ਦੀ ਚਾਹਤ ਨਾਲ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੂੰ ਚੁਣਿਆ ਹੈ। ਕੈਪਟਨ ਅਮਰਿੰਦਰ ਸਿੰਘ ਦੇ ਝੂਠੇ ਵਾਅਦਿਆਂ ਵਾਲੀ ਕਾਂਗਰਸ ਸਰਕਾਰ ਵਾਂਗ ਆਪ ਸਰਕਾਰ ਵੀ ਜ਼ਿਆਦਾ ਵੱਡੇ ਵਾਅਦਿਆਂ ਨਾਲ ਵਜ਼ੂਦ ਵਿੱਚ ਆਈ ਹੈ। ਇਹ ਸਮਾਂ ਦੱਸੇਗਾ ਕਿ ਸਰਕਾਰ ਆਪਣੇ ਵਾਅਦਿਆਂ 'ਤੇ ਖਰੀ ਉੱਤਰਦੀ ਹੈ ਜਾਂ ਅਮਰਿੰਦਰ ਸਰਕਾਰ ਵਾਂਗ ਝੂਠ ਦਾ ਪੁਲੰਦਾ ਸਾਬਿਤ ਹੁੰਦੀ ਹੈ।

ਸਾਬਕਾ ਮੁੱਖ ਮੰਤਰੀ ਨੇ ਵਰਕਰਾਂ ਨੂੰ ਹੌਂਸਲਾ ਅਤੇ ਹਿੰਮਤ ਦਿੰਦੇ ਆਖਿਆ ਕਿ ਉਹ ਜ਼ਮੀਨ ਪੱਧਰ 'ਤੇ ਲੋਕ ਹਿੱਤਾਂ ਪ੍ਰਤੀ ਡਟੇ ਰਹਿਣ। ਉਹ ਖੁਦ ਪਿੰਡ ਬਾਦਲ ਵਿਖੇ ਬੈਠੇ ਹਨ ਅਤੇ ਪਹਿਲਾਂ ਵਾਂਗ ਵਰਕਰਾਂ ਦੀਆਂ ਸਮੱਸਿਆਵਾਂ ਸੁਣ ਕੇ ਉਨ੍ਹਾਂ ਦੇ ਹੱਲ ਕਰਿਆ ਕਰਨਗੇ। ਸ੍ਰੀ ਬਾਦਲ ਨੇ ਧੰਨਵਾਦੀ ਦੌਰਾ ਜੱਦੀ ਪਿੰਡ ਬਾਦਲ ਤੋਂ ਸ਼ੁਰੂ ਕੀਤਾ। ਉਹ ਅੱਜ ਗੱਗੜ, ਮਿੱਠੜੀ ਬੁੱਧਗਿਰ ਅਤੇ ਫਤੂਹੀਵਾਲਾ ਵਿਖੇ ਲੋਕਾਂ ਦਾ ਧੰਨਵਾਦ ਕਰਨ ਪੁੱਜੇ। ਇਸ ਮੌਕੇ ਸ੍ਰੀ ਬਾਦਲ ਦੇ ਕਈ ਚਚੇਰੇ ਭਾਈ-ਭਤੀਜੇ ਅਤੇ ਪਾਰਟੀ ਦੇ ਪੇਂਡੂ ਇੰਚਾਰਜ ਅਤੇ ਆਗੂ ਮੌਜੂਦ ਸਨ। 93178-26100

ਪੰਜਾਬ ਵਿਧਾਨਸਭਾ 'ਬਾਦਲ' ਸਰਨੇਮ ਤੋਂ ਵਿਹਲੀ ਹੋਈ

ਲੋਕ-ਫਤਵੇ ਨੇ ਤਿੰਨ ਸਿਆਸੀ ਧੁਰੰਧਰਾਂ ਦੀ ਪਿੱਠ ਲੁਆਈ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਪੰਜਾਬ ਦੇ ਵੋਟਰਾਂ ਨੇ ਸੂਬੇ ਦੀ ਵਿਧਾਨਸਭਾ ਵਿੱਚੋਂ ਪਿੰਡ ਬਾਦਲ ਦੀ ਚੌਧਰ ਮੁਕਾ ਦਿੱਤੀ। ਇੱਥੋਂ ਦੇ ਤਿੰਨੇ ਸਿਆਸੀ ਸ਼ਾਹ ਅਸਵਾਰ ਪ੍ਰਕਾਸ਼ ਸਿੰਘ ਬਾਦਲ ਦੇ ਲੰਬੀ, ਸੁਖਬੀਰ ਸਿੰਘ ਬਾਦਲ ਦੇ ਜਲਾਲਾਬਾਦ ਅਤੇ ਮਨਪ੍ਰੀਤ ਸਿੰਘ ਦੇ ਬਠਿੰਡਾ ਤੋਂ ਭਾਰੀ ਸ਼ਿਕਸ਼ਤ ਮਿਲੀ ਹੈ। ਹਾਲਾਂਕਿ ਸੁਖਬੀਰ ਬਾਦਲ ਫਿਰੋਜ਼ਪੁਰ ਤੋਂ ਮੈਂਬਰ ਪਾਰਲੀਮੈਂਟ ਹਨ। ਕਰੀਬ ਪੰਜਾਹ ਸਾਲਾਂ ਤੋਂ 'ਬਾਦਲ' ਸਰਨੇਮ ਦੀ ਸੂਬੇ ਦੀ ਵਿਧਾਨਸਭਾ 'ਚ ਲਗਪਗ ਤੂਤੀ ਬੋਲਦੀ ਰਹੀ ਹੈ।

 

ਪੰਜਾਬ ਵਿੱਚ ਸਰਕਾਰ ਕਿਸੇ ਪਾਰਟੀ ਦੀ ਹੋਵੇ, ਪਰ ਬਾਦਲਾਂ ਦਾ ਜਲਵਾ ਹਮੇਸ਼ਾਂ ਬਰਕਰਾਰ ਰਿਹਾ ਅਤੇ ਪਿੰਡ ਬਾਦਲ ਦਾ ਸਿਆਸੀ ਮਘਾਅ 'ਤੇ ਰਿਹਾ। ਇਸ ਵਾਰ ਆਪ ਦੀ ਹਨ੍ਹੇਰੀ 'ਚ ਚੋਣ ਨਤੀਜਿਆਂ 'ਚ ਸੂਬੇ 'ਚ ਝਾੜੂ ਫਿਰਨ ਦੇ ਨਾਲ ਪਿੰਡ ਬਾਦਲ 'ਚ ਸਿਆਸੀ ਸੁੰਨ ਪਸਰ ਗਈ। ਬੀਤੇ ਕੱਲ੍ਹ ਜਿੱਤ ਦੀ ਉਮੀਦ 'ਚ ਪਿੰਡ ਦੇ ਹਲਵਾਈਆਂ ਨੇ ਬਿਨਾ ਆਰਡਰ ਦੇ ਛੇ ਕੁਇੰਟਲ ਲੱਡੂ ਵੱਟੇ ਸਨ।

 

2017 ਵਾਲੀ ਵਿਧਾਨਸਭਾ 'ਚ ਪ੍ਰਕਾਸ਼ ਸਿੰਘ ਬਾਦਲ ਲੰਬੀ ਤੋਂ ਵਿਧਾਇਕ ਸਨ। ਜਦਕਿ ਉਨ੍ਹਾਂ ਦੇ ਭਤੀਜੇ ਮਨਪ੍ਰੀਤ ਸਿੰਘ ਬਾਦਲ ਬਠਿੰਡਾ ਤੋਂ ਵਿਧਇਕ ਵਜੋਂ ਵਿੱਤ ਮੰਤਰੀ ਦੇ ਅਹੁਦੇ 'ਤੇ ਸਨ। ਉਦੋਂ ਸੁਖਬੀਰ ਸਿੰਘ ਬਾਦਲ ਜਲਾਲਾਬਾਦ ਤੋਂ ਵਿਧਾਇਕ ਚੁਣੇ ਗਏ ਸਨ। ਬਾਅਦ ਵਿੱਚ ਫਿਰੋਜ਼ਪੁਰ ਤੋਂ ਲੋਕਸਭਾ ਦੇ ਮੈਂਬਰ ਚੁਣੇ ਜਾਣ 'ਤੇ ਉਨ੍ਹਾਂ ਵਿਧਾਇਕੀ ਤੋਂ ਅਸਤੀਫ਼ਾ ਦੇ ਦਿੱਤਾ ਸੀ।

 

ਜਾਣਕਾਰੀ ਮੁਤਾਬਕ ਬਾਦਲ ਪਿੰਡ 'ਚ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਰਿਹਾਇਸ਼ 'ਤੇ ਸਵੇਰੇ ਤੋਂ ਕੋਈ ਬਾਦਲ ਨਾ ਜਨਤਕ ਹੋਇਆ ਅਤੇ ਨਾ ਹੀ ਰਿਹਾਇਸ਼ ਤੋਂ ਬਾਹਰ ਗਿਆ।

 

ਇਸੇ ਤਰ੍ਹਾਂ ਮਨਪ੍ਰੀਤ ਸਿੰਘ ਬਾਦਲ ਵੀ ਕਰੀਬ ਦੋ-ਤਿੰਨ ਘੰਟੇ ਘਰੋਂ ਬਾਹਰ ਗਏ ਸਨ। ਹਾਰ ਦਾ ਵਜ਼ਨ ਵਧਣ ਮਗਰੋਂ ਘਰੇ ਪਰਤ ਆਏ ਸਨ। ਬਦਲਾਅ ਦੇ ਬੰਪਰ ਡਰਾਅ ਨੇ ਪੰਜਾਬ ਦੀ ਸਿਆਸਤ ਦੀ ਧੁਰੀ ਬਦਲ ਦਿੱਤੀ ਹੈ। ਹੁਣ ਨਵੇਂ ਚਿਹਰਿਆਂ ਨਾਲ ਰਾਜਨੀਤੀ ਅਤੇ ਸਮਾਜਿਕ ਮਾਹੌਲ ਨਵੇਂ ਰਾਹ ਨਿੱਕਲਣ ਦਾ ਮੁੱਢ ਬੱਝ ਗਿਆ ਹੈ।

 

ਨਤੀਜੇ ਵਾਚਣ ਉਪਰੰਤ ਅਕਾਲੀ ਦਲ ਦੇ ਪ੍ਰਧਾਨ ਸੁਖਬੀਰ ਸਿੰਘ ਬਾਦਲ ਨੇ ਟਵਿੱਟਰ ਸੁਨੇਹੇ 'ਚ ਆਖਿਆ ਕਿ ਅਸੀਂ ਪੂਰੇ ਦਿਲ ਨਾਲ ਅਤੇ ਪੂਰੀ ਨਿਮਰਤਾ ਨਾਲ ਪੰਜਾਬੀਆਂ ਵੱਲੋਂ ਦਿੱਤੇ ਫਤਵੇ ਨੂੰ ਸਵੀਕਾਰ ਕਰਦੇ ਹਨ। ਉਹ ਲੱਖਾਂ ਪੰਜਾਬੀਆਂ ਦੇ ਸੁਕਰਗੁਜਾਰ ਹਨ, ਜਿਨ੍ਹਾਂ ਸਾਡੇ 'ਤੇ ਭਰੋਸਾ ਕੀਤਾ ਅਤੇ ਅਕਾਲੀ-ਬਸਪਾ ਵਰਕਰਾਂ ਦਾ ਨਿਰਸਵਾਰਥ ਮਿਹਨਤ ਧੰਨਵਾਦ ਕੀਤਾ। ਉਨ੍ਹਾਂ ਨੇ ਜਿਹੜੀ ਭੂਮਿਕਾ ਸਾਨੂੰ ਸੌਂਪੀ ਹੈ, ਅਸੀਂ ਉਸਦੀ ਨਿਮਰਤਾ ਨਾਲ ਸੇਵਾ ਕਰਦੇ ਰਹਾਂਗੇ। ਸੁਖਬੀਰ ਬਾਦਲ ਨੇ ਇੱਕ ਹੋਰ ਟਵੀਟ ਵਿੱਚ ਆਮ ਆਦਮੀ ਪਾਰਟੀ ਦੀ ਲੀਡਰਸ਼ਿਪ ਨੂੰ ਜਿੱਤ ਲਈ ਵਧਾਈ ਦਿੱਤੀ।

ਮਨਪ੍ਰੀਤ ਸਿੰਘ ਬਾਦਲ ਨੇ ਵੀ ਟਵਿੱਟਰ 'ਤੇ ਆਮ ਆਦਮੀ ਪਾਰਟੀ ਨੂੰ ਲੋਕ ਫਤਵਾ ਜਿੱਤਣ ਲਈ ਵਧਾਈ ਦਿੱਤੀ। ਉਹ ਪੰਜਾਬ ਦੇ ਫੈਸਲੇ ਨੂੰ ਪੂਰੀ ਨਿਮਰਤਾ ਨਾਲ ਸਵੀਕਾਰ ਕਰਦੇ ਹਾਂ। ਚੋਣ ਦੌਰਾਨ ਮੱਦਦ ਕਰਨ ਵਾਲੇ ਸਮੂਹ ਕਾਂਗਰਸੀ ਵਰਕਰਾਂ ਅਤੇ ਸਮਰਥਕਾਂ ਦਾ ਧੰਨਵਾਦ ਕੀਤਾ ਹੈ।

ਵੱਡੇ ਬਾਦਲ 'ਤੇ ਦਾਅ ਖੇਡਣ 'ਤੇ ਅਕਾਲੀ ਦਲ ਪ੍ਰਤੀ ਲੋਕਾਂ 'ਚ ਨਰਾਜਗੀ

ਉਮਰ ਦੇ ਸ਼ਿਖ਼ਰਲੇ ਪੜਾਅ 'ਤੇ ਸਾਬਕਾ ਮੁੱਖ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਚੋਣ ਲੜਾਉਣ 'ਤੇ ਆਮ ਜਨਤਾ 'ਚ ਨਰਾਜਗੀ ਵੇਖਣ ਨੂੰ ਮਿਲ ਰਹੀ ਹੈ। ਖੁੱਡੀਆਂ ਨੂੰ ਵੋਟ ਪਾਉਣ ਵਾਲੇ ਵੋਟਰਾਂ ਨੇ ਵੱਡੇ ਬਾਦਲ ਨਾਲ ਹਮਦਰਦੀ ਜਾਹਰ ਕਰਦੇ ਆਖਿਆ ਕਿ ਅਕਾਲੀ ਦਲ ਨੇ ਉਨ੍ਹਾਂ 'ਤੇ ਇਸ ਉਮਰ 'ਚ ਮਾਰੂ ਦਾਅ ਖੇਡ ਕੇ ਉਨ੍ਹਾਂ ਦਾ ਬੁਢਾਪਾ ਅਤੇ ਸਾਰੀ ਉਮਰ ਦੀ ਜੇਤੂ ਸਾਖ਼ ਨੂੰ ਵੱਟਾ ਲਗਾ ਦਿੱਤਾ ਹੈ। ਜ਼ਿਕਰਯੋਗ ਹੈ ਕਿ ਚੋਣ ਜਲਸਿਆਂ ਮੌਕੇ 95 ਸਾਲਾ ਸ੍ਰੀ ਬਾਦਲ ਪਾਰਟੀ ਹੁਕਮ 'ਤੇ ਚੋਣ ਲੜਨ ਦੀ ਗੱਲ ਆਖਦੇ ਰਹੇ ਸਨ।

ਪੰਜ ਵਾਰ ਦੇ ਮੁੱਖ ਮੰਤਰੀ ਨੂੰ ਹਰਾ ਕੇ ਗੁਰਮੀਤ ਖੁੱਡੀਆਂ ਦੀ ਪੂਰੀ ਹੋਈ ਪੁਰਾਣੀ ਦਿਲੀ-ਖੁਹਾਇਸ਼

ਸ਼ਰਾਬ ਅਤੇ ਪੈਸੇ ਨਾਲ 70 ਹਜ਼ਾਰ ਵੋਟਾਂ ਮੁੱਲ ਲੈੈ ਕੇ 54917 ਰਹਿਣ 'ਤੇ ਕਸਿਆ ਦੋਸ਼ਾਂ ਭਰਿਆ ਤਨਜ਼

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਲੰਬੀ ਤੋਂ ਜੇਤੂ ਰਹੇ ਗੁਰਮੀਤ ਸਿੰਘ ਖੁੱਡੀਆਂ ਦੀ ਪੰਜ ਵਾਰ ਦੇ ਮੁੱਖ ਮੰਤਰੀ ਅਤੇ ਦਸ ਵਾਰ ਦੇ ਵਿਧਾਇਕ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਹਰਾਉਣ ਨਾਲ ਪੁਰਾਣੀ ਦਿਲੀ-ਖੁਹਾਇਸ਼ ਪੂਰੀ ਹੋਈ ਹੈ।

ਜਿੱਤ ਦੇ ਐਲਾਨ ਉਪਰੰਤ ਇਸ ਪ੍ਰਤੀਨਿਧੀ ਨਾਲ ਗੱਲਬਾਤ 'ਚ ਲੋਕ-ਫਤਵੇ ਨੂੰ ਸਿਜਦਾ ਕਰਦੇ ਗੁਰਮੀਤ ਸਿੰਘ ਖੁੱਡੀਆਂ ਨੇ ਆਖਿਆ ਕਿ ਉਹ ਆਪ ਦੇ ਸਮੂਹ ਵੋਟਰਾਂ ਸਮੇਤ ਉਨ੍ਹਾਂ ਅਕਾਲੀ ਅਤੇ ਹੋਰਨਾਂ ਪਾਰਟੀਆਂ ਦੇ ਪਰਿਵਾਰਾਂ ਦੇ ਵੀ ਰਿਣੀ ਹਨ, ਜਿਨ੍ਹਾਂ ਨੇ ਉਨ੍ਹਾਂ ਦੇ ਮਰਹੂਮ ਪਿਤਾ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ ਦੇ ਸਤਿਕਾਰ ਵਜੋਂ ਉਨ੍ਹਾਂ ਨੂੰ ਵੋਟਾਂ ਪਾਈਆਂ।

ਆਪ ਦੇ ਨਵੇਂ ਚੁਣੇ ਵਿਧਾਇਕ ਨੇ ਅਕਾਲੀ ਦਲ (ਬ) 'ਤੇ ਵੱਡਾ ਹਮਲਾ ਕਰਦੇ ਕਿਹਾ ਕਿ ਬੇਹੱਦ ਨਾਮੋਸ਼ੀਜਨਕ ਹੈ ਕਿ ਸ੍ਰੀ ਅਕਾਲ ਤਖ਼ਤ ਸਾਹਿਬ ਤੋਂ ਫਖ਼ਰੇ ਕੌਮ ਐਵਾਰਡ ਹਾਸਲ ਅਤੇ ਪ੍ਰਕਾਸ਼ ਸਿੰਘ ਬਾਦਲ ਜਿਹੇ ਬਹੁਤ ਵੱਡੇ ਆਗੂ ਨੂੰ ਜਿੱਤਣ ਲਈ ਸ਼ਰਾਬ ਵੰਡਣੀ ਪਵੇ ਅਤੇ ਪੈਸੇ ਦੇ ਕੇ 70 ਹਜ਼ਾਰ ਵੋਟਾਂ ਲੈਣੀਆਂ ਪੈਣ ਅਤੇ ਉਨ੍ਹਾਂ ਵਿੱਚ ਪੈਣ ਸਿਰਫ਼ 54917 ਵੋਟਾਂ। ਇਸਤੋਂ ਸਾਬਤ ਹੁੰਦਾ ਕਿ ਲੰਬੀ ਦੇ ਸੂਝਵਾਨ ਵੋਟਰਾਂ ਨੇ ਠੱਗਣ ਅਤੇ ਲੁੱਟਣ ਦੀ ਰਾਜਨੀਤੀ ਨੂੰ ਲਾਂਭੇ ਕਰਕੇ ਸੱਚ ਦੀ ਸਿਆਸਤ ਨੂੰ ਮੂਹਰੇ ਲਿਆਂਦਾ ਹੈ। ਖੁੱਡੀਆਂ ਨੇ ਦਾਅਵਾ ਕੀਤਾ ਕਿ ਉਹ ਤਨਦੇਹੀ ਅਤੇ ਇਮਾਨਦਾਰੀ ਨਾਲ ਲੋਕ-ਉਮੀਦਾਂ 'ਤੇ ਖ਼ਰਾ ਉਤਰਨਗੇ।

ਬਾਦਲ ਜਿਹੇ ਵੱਡੇ ਸਿਆਸੀ ਚਿਹਰੇ ਨੂੰ ਹਰਾਉਣ ਉਪਰੰਤ ਆਗਾਮੀ ਕੈਬਨਿਟ 'ਚ ਹਿੱਸਾ ਬਣਨ ਬਾਰੇ ਪੁੱਛੇ ਸੁਆਲ 'ਤੇ ਖੁੱਡੀਆਂ ਨੇ ਕਿਹਾ ਕਿ ਪ੍ਰਕਾਸ਼ ਸਿੰਘ ਬਾਦਲ ਦੇ ਮੂਹਰੇ ਬਹੁਤ ਲੰਮੇ ਤੋਂ ਚੋਣ ਲੜਨਾ ਚਾਹੁੰਦੇ ਸਨ, ਹੁਣ ਸ੍ਰੀ ਬਾਦਲ ਦੀ ਉਮਰ ਵੱਡੀ ਹੁੰਦੀ ਜਾ ਰਹੀ ਸੀ, ਜਿਸ ਕਰਕੇ ਉਨ੍ਹਾਂ ਨੂੰ ਫ਼ਿਕਰ ਸੀ ਕਿ ਇਹ ਖੁਹਾਇਸ਼ ਅਧੂਰੀ ਨਾ ਰਹਿ ਜਾਵੇ। ਪਰ ਉਸਨੂੰ ਆਪ ਦੇ ਕਨਵੀਨਰ ਅਰਵਿੰਦ ਕੇਜਰੀਵਾਲ ਕਰਕੇ ਪੂਰਾ ਹੋਣ ਦਾ ਮੌਕਾ ਮਿਲ ਸਕਿਆ। ਲੰਬੀ ਦੇ ਮਾਣਮੱਤੇ ਲੋਕਾਂ ਵੱਲੋਂ ਪੰਜ ਵਾਰ ਦੇ ਮੁੱਖ ਮੰਤਰੀ ਨੂੰ ਹਰਾਉਣ ਦਾ ਮੌਕਾ ਦੇਣਾ ਮੰਤਰੀ ਬਣਨ ਨਾਲੋਂ ਕਈ ਗੁਣਾ ਵੱਡੀ ਪ੍ਰਾਪਤੀ ਹੈ।

ਲੰਬੀ ਹਲਕੇ ਪ੍ਰਤੀ ਪਹਿਲੀ ਪ੍ਰਾਥਮਿਕਤਾ ਪੁੱਛੇ ਜਾਣ 'ਤੇ ਸ੍ਰੀ ਖੁੱਡੀਆਂ ਨੇ ਕਿਹਾ ਕਿ ਹਲਕੇ ਵਿੱਚ ਨਸ਼ਿਆਂ ਦਾ ਖਾਤਮਾ, ਸਿੱਖਿਆ ਅਤੇ ਸਿਹਤ ਵੱਡੇ ਉਪਰਾਲੇ ਹੋਣਗੇ।

 ਜ਼ਿਕਰਯੋਗ ਹੈ ਕਿ 2017 'ਚ ਗੁਰਮੀਤ ਖੁੱਡੀਆਂ ਲੰਬੀ 'ਚ ਅਮਰਿੰਦਰ ਸਿੰਘ ਦੇ ਕਵਰਿੰਗ ਉਮੀਦਵਾਰ ਸਨ। ਉਦੋਂ ਉਹ ਅਮਰਿੰਦਰ ਸਿੰਘ ਦੇ ਚੋਣ ਲੜਨ ਕਰਕੇ ਟਿਕਟ ਤੋਂ ਖੁੰਝ ਗਏ ਸਨ। ਉਨ੍ਹਾਂ 1991 'ਚ ਅਕਾਲੀ ਦਲ (ਅੰਮ੍ਰਿਤਸਰ) ਦੀ ਟਿਕਟ 'ਤੇ ਫਰੀਦਕੋਟ ਪਾਰਲੀਮਾਨੀ ਹਲਕੇ ਤੋਂ ਚੋਣ ਲੜੀ ਸੀ, ਪਰ ਉਦੋਂ ਚੋਣਾਂ ਰੱਦ ਹੋ ਗਈਆਂ ਸਨ।

'ਆਮ ਬੰਦੇ' ਗੁਰਮੀਤ ਖੁੱਡੀਆਂ ਨੇ 'ਸਿਆਸੀ ਬੋਹੜ' ਨੂੰ ਹਰਾ ਕੇ ਸਿਰਜਿਆ ਇਤਿਹਾਸ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਸੂਬੇ ਵਿੱਚ ਬਦਲਾਅ ਵਾਲੇ ਲੋਕ-ਫਤਵੇ ਨੇ ਪੰਜ ਵਾਰ ਦੇ ਮੁੱਖ ਮੰਤਰੀ ਅਤੇ ਉਮਰ-ਦਰਾਜ ਸਿਆਸਤਦਾਨ ਪ੍ਰਕਾਸ਼ ਸਿੰਘ ਬਾਦਲ ਜਿਹੇ ਵੱਡੇ ਸਿਆਸੀ ਬੋਹੜ ਦਾ ਵਕਾਰ ਜੜੋਂ ਪੁੱਟ ਦਿੱਤਾ।

ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਗੁਰਮੀਤ ਸਿੰਘ ਖੁੱਡੀਆਂ ਨੇ ਵੱਡੇ ਬਾਦਲ ਨੂੰ ਉਨ੍ਹਾਂ ਦੀ ਸਿਆਸੀ ਰਾਜਧਾਨੀ ਲੰਬੀ ਵਿੱਚ 11396 ਵੋਟਾਂ ਦੇ ਫ਼ਰਕ ਹਰਾ ਕੇ ਨਵਾਂ ਇਤਿਹਾਸ ਸਿਰਜ ਦਿੱਤਾ।

ਪ੍ਰਕਾਸ਼ ਸਿੰਘ ਬਾਦਲ 1997 ਤੋਂ ਲੰਬੀ ਤੋਂ ਲਗਾਤਾਰ ਵਿਧਾਇਕ ਸਨ। ਕੁੱਲ੍ਹ ਵੋਟਾਂ 135697 ਵਿੱਚੋਂ ਆਪ ਦੇ ਗੁਰਮੀਤ ਸਿੰਘ ਖੁੱਡੀਆਂ ਨੂੰ 66313 ਵੋਟਾਂ ਮਿਲੀਆਂ। ਜਦਕਿ ਅਕਾਲੀ-ਬਸਪਾ ਗੱਠਜੋੜ ਦੇ ਪ੍ਰਕਾਸ਼ ਸਿੰਘ ਬਾਦਲ ਨੂੰ 54917 ਵੋਟਾਂ ਹਾਸਲ ਹੋਈਆਂ।

ਕਾਂਗਰਸ ਉਮੀਦਵਾਰ ਜਗਪਾਲ ਸਿੰਘ ਅਬੁੱਲਖੁਰਾਣਾ ਸਿਰਫ਼ 10136 ਵੋਟਾਂ 'ਤੇ ਸਿਮਟ  ਕੇ ਰਹਿ ਗਏ।

ਭਾਜਪਾ ਉਮੀਦਵਾਰ ਰਾਕੇਸ਼ ਧੀਂਗੜਾ ਨੇ 1116, ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਜਸਵਿੰਦਰ ਸਿੰਘ ਖਿਉਵਾਲੀ ਨੂੰ 1318, ਆਜ਼ਾਦ ਉਮੀਦਵਾਰ ਗੁਰਤੇਜ ਸਿੰਘ ਨੂੰ 393 ਅਤੇ ਚਰਨਜੀਤ ਸਿੰਘ ਨੂੰ 278 ਵੋਟਾਂ ਮਿਲੀਆਂ।

ਨੋਟਾ ਬਟਨ 'ਤੇ 1226 ਵੋਟਰਾਂ ਨੇ ਵਿਸ਼ਵਾਸ ਜਤਾਇਆ। 1260 ਪੇਪਰ ਬੈਲਟ ਵੋਟ ਪਏ। ਲੰਬੀ 'ਚ ਪਹਿਲੀ ਵਾਰ ਅਕਾਲੀ ਦਲ 40.47 ਫ਼ੀਸਦੀ 'ਤੇ ਸਿਮਟਿਆ।

ਦਰਵੇਸ਼ ਸਿਆਸਤਦਾਨ ਮਰਹੂਮ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ (ਸੰਸਦ ਮੈਂਬਰ) ਦੇ ਸਪੁੱਤਰ ਗੁਰਮੀਤ ਸਿੰਘ ਖੁੱਡੀਆਂ ਦੀ ਜਿੱਤ 'ਚ ਸਿਆਸੀ ਧੁਰੰਧਰ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਆਪ-ਮੁਹਾਰੇ ਲਹਿਜੇ ਵਾਲੇ ਹਜ਼ਾਰਾਂ ਸਮਰਥਕਾਂ ਦਾ ਵੀ ਵੱਡਾ ਰੋਲ ਰਿਹਾ।ਜਿਹੜਾ ਕ੍ਰਿਸ਼ਮਾ 2017 'ਚ ਵੱਡੇ ਬਾਦਲ ਮੂਹਰੇ ਸਿਆਸੀ ਧੁਰੰਧਰ ਕੈਪਟਨ ਅਮਰਿੰਦਰ ਸਿੰਘ ਨਾ ਵਿਖਾ ਸਕੇ, ਉਹ 15 ਏਕੜ ਵਾਲੇ ਛੋਟੇ ਕਿਸਾਨ ਗੁਰਮੀਤ ਸਿੰਘ ਖੁੱਡੀਆਂ ਨੇ ਕਰ ਵਿਖਾਇਆ।

ਪ੍ਰਕਾਸ਼ ਸਿੰਘ ਬਾਦਲ ਦੀ ਹਾਰ ਵਿੱਚ ਅਕਾਲੀ ਇੰਚਾਰਜ਼ਾਂ ਦਾ ਹਲਕੇ 'ਚ ਸਿਖ਼ਰਲੀ ਜ਼ਮੀਨੀ ਵਿਰੋਧ, ਆਪ ਕਾਡਰ ਦੇ ਇਲਾਵਾ ਮਹੇਸ਼ਇੰਦਰ ਬਾਦਲ ਕਾਡਰ ਦੀ ਖੁੱਡੀਆਂ ਨਾਲ ਵੀਹ ਸਾਲਾਂ ਦੀ ਸਾਂਝ ਅਤੇ ਲੋਕਾਂ 'ਚ ਬਦਲਾਅ ਦੀ ਤੀਬਰਤਾ ਸੁਨਾਮੀ ਬਣ ਕੇ ਸਿਆਸੀ ਗੜ੍ਹ ਦੀਆਂ ਨੀਂਹਾਂ ਹਿਲਾ ਗਈ।

13 ਗੇੜ ਦੀ ਗਿਣਤੀ 'ਚ ਅਕਾਲੀ ਦਲ ਪੰਜਵੇਂ ਅਤੇ ਨੌਵੇਂ ਰਾਊਂਡ 'ਚ ਕ੍ਰਮਵਾਰ 375 ਅਤੇ 159 ਵੋਟਾਂ ਦੀ ਮਾਮੂਲੀ ਬੜ੍ਹਤ ਬਣਾ ਸਕਿਆ। ਸਰਾਵਾਂ ਜੈਲ ਦੇ ਕਰੀਬ 22 ਪਿੰਡਾਂ 'ਚ ਗੁਰਮੀਤ ਖੁੱਡੀਆਂ ਦੇ ਭਤੀਜੇ ਧੀਰਾ ਖੁੱਡੀਆਂ ਨੇ ਰਵਾਇਤੀ ਅਕਾਲੀ ਵੋਟ ਬੈਂਕ 'ਚ ਸੰਨ੍ਹ ਲਗਾਉਣ 'ਚ ਅਹਿਮ ਰੋਲ ਨਿਭਾਇਆ। ਇਸੇ ਤਰ੍ਹਾਂ ਉਨ੍ਹਾਂ ਦੇ ਛੋਟੇ ਭਰਾ ਹਰਮੀਤ ਸਿੰਘ ਖੁੱਡੀਆਂ ਕੈਨੇਡਾ ਦੇ ਨਾਲ ਵਕੀਲ ਰਮਨਦੀਪ ਸਿੰਘ ਪੰਧੇਰ ਅਤੇ ਉਨ੍ਹਾਂ ਦੀ ਟੀਮ ਨੇ ਵੀ ਦਿਨ ਰਾਤ ਇੱਕ ਕਰਕੇ ਹਲਕੇ ਭਰ ਵਿੱਚ ਚੋਣ ਪ੍ਰਚਾਰ ਨੂੰ ਭਖਾਇਆ।

ਖੁੱਡੀਆਂ ਪਰਿਵਾਰ ਦੇ ਛੇ ਮੈਂਬਰਾਂ ਨੇ ਚੋਣ ਕਮਾਂਡ ਚਲਾਈ। ਇਲਾਕੇ 'ਚ ਨਸ਼ਿਆਂ ਦੀ ਬਹੁਤਾਤ ਅਤੇ ਛੋਟੇ ਕਿਰਸਾਨੀ ਦੀ ਗੈਰ-ਸੁਣਵਾਈ ਨੇ ਵਕਾਰੀ ਹਲਕੇ ਦੀ ਬਾਗਡੋਰ ਸਾਧਾਰਨ ਕਿਸਾਨ ਗੁਰਮੀਤ ਖੁੱਡੀਆਂ ਦੇ ਹੱਥ ਸੌਂਪ ਦਿੱਤੀ। ਜਿੱਤ ਦਾ ਐਲਾਨ ਹੋਣ 'ਤੇ ਖੁੱਡੀਆਂ ਸਮਰਥਕਾਂ ਨੇ ਗਿਣਤੀ ਕੇਂਦਰ ਦੇ ਨੇੜੇ ਢੋਡ ਡੱਗੇ 'ਤੇ ਰੱਜ ਕੇ ਭੰਗੜੇ ਪਾਏ।

ਵਰਕਰ ਖੁੱਡੀਆਂ ਦੇ ਦੋਵੇਂ ਪੁੱਤਰਾਂ ਅਮੀਤ, ਸੁਮੀਤ ਅਤੇ ਭਤੀਜੇ ਧੀਰਾ ਖੁੱਡੀਆਂ ਨੂੰ ਮੋਢਿਆਂ 'ਤੇ ਚੁੁੱਕ ਕੇ ਜਿੱਤ ਦੀ ਖੁਸ਼ੀ ਜਾਹਰ ਕਰਦੇ ਰਹੇ। ਵਰਕਰਾਂ 'ਚ ਖੁੱਡੀਆਂ ਦੀ ਜਿੱਤ ਨਾਲੋਂ ਵੱਡੇ ਬਾਦਲ ਦੀ ਹਾਰ ਦੀ ਖੁਸ਼ੀ ਵੱਧ ਵਿਖਾਈ ਦਿੱਤੀ।