31 December 2011

ਚੋਣ ਕਮਿਸ਼ਨ ਦੀ ਰੋਕ ਦੇ ਬਾਵਜੂਦ ਸਾਇਕਲਾਂ ਦਾ ਭਰਿਆ ਕੈਂਟਰ ਪੁੱਜਿਆ ਲੰਬੀ ਦੇ ਸਰਕਾਰੀ ਸਕੂਲ

ਕੈਂਟਰ ਚਾਲਕ ਦੇ ਕਥਨ :  ਅਬੁੱਲਖੁਰਾਣਾ, ਦੋਦਾ ਅਤੇ ਮੁਕਤਸਰ ਦੇ ਸਕੂਲ ਵਿਚ ਵੀ ਸਾਇਕਲ ਵੀ ਪੁੱਜੇ

                                                               -ਇਕਬਾਲ ਸਿੰਘ ਸ਼ਾਂਤ-
ਲੰਬੀ, 30 ਦਸੰਬਰ-ਚੋਣ ਕਮਿਸ਼ਨ ਵੱਲੋਂ ਪੰਜਾਬ ਵਿਧਾਨਸਭਾ ਚੋਣਾਂ ਦੀ ਚੋਣ ਪ੍ਰਕਿਰਿਆ ਦੌਰਾਨ ਸਾਇਕਲਾਂ ਦੀ ਵੰਡ 'ਤੇ ਪਾਬੰਦੀ ਲਾਉਣ ਦੇ ਬਾਵਜੂਦ ਵਿਦਿਆਰਥਣਾਂ ਨੂੰ ਵੰਡਣ ਲਈ ਸਰਕਾਰੀ ਸਕੂਲਾਂ ਵਿਚ ਸਾਇਕਲਾਂ ਦਾ ਪੁੱਜਣਾ ਲਗਾਤਾਰ ਜਾਰੀ ਹੈ।
ਅਜਿਹਾ ਇੱਕ ਮਾਮਲਾ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਰਵਾਇਤੀ ਹਲਕੇ ਦੇ ਪਿੰਡ ਲੰਬੀ ਵਿਖੇ ਸਾਹਮਣੇ ਆਇਆ ਹੈ। ਜਿੱਥੋਂ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਖੇ ਅੱਜ ਸਵੇਰੇ ਲਗਭਗ 11 ਵਜੇ ਐਟਲਸ ਕੰਪਨੀ ਦੇ ਸਾਇਕਲਾਂ ਨਾਲ ਭਰਿਆ ਇੱਕ ਕੈਂਟਰ ਨੰਬਰ ਆਰ.ਜੇ.13 ਜੀ. ਏ./2840 ਪੁੱਜਿਆ। ਜਿਸ ਵਿਚ ਸੰਤਰੀ ਰੰਗ ਦੇ 71 ਲੇਡੀਜ਼ ਸਾਇਕਲ ਲੱਦੇ ਹੋਏ ਸਨ, ਜਿਨ੍ਹਾਂ ਦਾ ਰੰਗ ਸੱਤਾ ਪੱਖ ਦੇ ਝੰਡੇ ਦੇ ਰੰਗ ਨਾਲ ਮੇਲਾ ਖਾਂਦਾ ਸੀ।
ਹਾਲਾਂਕਿ ਚੋਣ ਜ਼ਾਬਤੇ ਤੋਂ ਪਹਿਲਾਂ ਅਕਾਲੀ-ਭਾਜਪਾ ਸਰਕਾਰ ਵੱਲੋਂ ਸੂਬੇ ਦੀਆਂ ਵਿਦਿਆਰਥਣਾਂ ਨੂੰ ਵੰਡੇ ਜਾ ਰਹੇ ਸਾਇਕਲਾਂ ਵਾਂਗ ਇਨ੍ਹਾਂ ਸਾਇਕਲਾਂ 'ਤੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੀ ਫੋਟੋ ਨਹੀਂ ਲੱਗੀ ਹੋਈ ਸੀ।
ਬੱਤਰਾ ਟੈਂਪੂ ਟਰਾਂਸਪੋਰਟ ਯੂਨੀਅਨ ਲੁਧਿਆਣਾ ਦੀ ਬਿਲਟੀ ਅਤੇ ਐਟਲਸ ਸਾਇਕਲ (ਹਰਿਆਣਾ) ਲਿਮ: ਲੁਧਿਆਣਾ ਵੱਲੋਂ ਬਿੱਲ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ (ਈ.ਈ.) ਸਰਬ ਸਿੱਖਿਆ ਅਭਿਆਨ ਮੁਕਤਸਰ (ਪੰਜਾਬ) ਦੇ ਨਾਂ ਦਰਸਾਇਆ ਗਿਆ ਹੈ। ਜਿਸਦਾ ਸੇਲ ਬਿੱਲ ਨੰਬਰ  ਡੀ1/11/12/000857, ਡੀ ਕੋਡ 159836 , ਬਿੱਲ ਮਿਤੀ 29-12-2012 ਦਰਸਾਇਆ ਗਿਆ ਹੈ। ਬਿੱਲ ਵਿਚ ਪ੍ਰਤੀ ਸਾਇਕਲ ਦੀ ਕੀਮਤ 2486.25 ਰੁਪਏ ਦੱਸੀ ਗਈ ਹੈ। ਜਿਸਦੇ ਹਿਸਾਬ ਨਾਲ ਕੁੱਲ 71 ਸਾਇਕਲਾਂ ਦੀ ਕੁੱਲ ਕੀਮਤ 1,76, 523.75 ਰੁਪਏ ਹੈ। ਇਨ੍ਹਾਂ ਕਾਗਜ਼ਾਂ ਦੇ ਨਾਲ ਸਾਇਕਲ ਪ੍ਰਾਪਤੀ ਬਾਰੇ ਰਸੀਦ ਵੀ ਭੇਜੀ ਗਈ ਹੈ। ਇਨ੍ਹਾਂ ਸਾਇਕਲਾਂ ਨੂੰ ਸਕੂਲ ਵਿਚ ਇਕ ਪਾਸੇ 'ਤੇ ਸੈਮੀਨਾਰ ਹਾਲ ਵਜੋਂ ਵਰਤੇ ਜਾਂਦੇ ਕਮਰੇ ਵਿਚ ਰਖਵਾਇਆ ਜਾ ਰਿਹਾ ਸੀ।
ਲੁਧਿਆਣਾ ਤੋਂ ਸਾਇਕਲਾਂ ਨਾਲ ਭਰਿਆ ਕੈਂਟਰ ਲੈ ਕੇ ਪੁੱਜੇ ਡਰਾਈਵਰ ਸੰਦੀਪ, ਹੰਸ ਰਾਜ, ਗੁਰਪ੍ਰੀਤ ਅਤੇ ਹਰਪ੍ਰੀਤ ਨੇ ਦੱਸਿਆ ਕਿ ਉਨ੍ਹਾਂ ਦੇ ਨਾਲ ਲੁਧਿਆਣਾ ਤੋਂ ਹੋਰ ਕਈ ਕੈਂਟਰ ਵੀ ਲੰਬੀ ਹਲਕੇ ਦੇ ਪਿੰਡ ਅਬੁੱਲਖੁਰਾਣਾ, ਦੋਦਾ ਅਤੇ ਮੁਕਤਸਰ ਲਈ ਰਵਾਨਾ ਹੋਏ ਸਨ। ਉਸਨੇ ਦੱਸਿਆ ਉਨ੍ਹਾਂ ਨੂੰ ਚੋਣ ਜ਼ਾਬਤੇ ਵਗੈਰਾ ਬਾਰੇ ਨਹੀਂ ਪਤਾ, ਉਹ ਤਾਂ ਸਿਰਫ਼ ਆਪਣੀ ਡਿਊਟੀ ਅਨੁਸਾਰ ਸਕੂਲ ਵਿਚ ਸਾਇਕਲ ਵਿਚ ਛੱਡਣ ਲਈ ਆਏ ਹਨ।
ਇਸੇ ਦੌਰਾਨ ਮੌਕੇ 'ਤੇ ਪੁੱਜੇ ਇੱਕ ਪਿੰਡ ਦੇ ਵਿਅਕਤੀ ਨੇ ਪੱਤਰਕਾਰਾਂ ਨੂੰ ਫੋਟੋਆਂ ਖਿੱਚਦੇ ਪੁੱਛਿਆ ਕਿ ਇਨ੍ਹਾਂ ਸਾਇਕਲਾਂ 'ਤੇ ਕਿਹੜਾ ਬਾਦਲ ਸਾਬ੍ਹ ਦੀ ਫੋਟੋ ਲੱਗੀ ਹੈ ਜਿਹੜਾ ਤੁਸੀਂ ਫੋਟੋ ਖਿੱਚ ਰਹੋ।
              ਚੋਣ ਜ਼ਾਬਤਾ ਲੱਗਣ ਦੇ ਬਾਵਜੂਦ ਮੁੱਖ ਮੰਤਰੀ ਦੇ ਹਲਕੇ ਵਿਚ ਇੰਝ ਖੁੱਲ੍ਹੇਆਮ ਸਾਇਕਲਾਂ ਦਾ ਭਰਿਆ ਕੈਂਟਰ ਪੁੱਜਣ ਅਤੇ ਬੀਤੇ ਕੱਲ੍ਹ ਪਿੰਡ ਚਨੂੰ ਵਿਖੇ ਚੋਣ ਜ਼ਾਬਤੇ ਦੀ ਉਲੰਘਣਾ ਸਬੰਧੀ ਸ਼ਿਕਾਇਤ ਦੀ ਪੜਤਾਲ ਕਰਨ ਪੁੱਜੇ ਸਰਕਾਰੀ ਅਮਲੇ ਨਾਲ ਖਿੱਚ-ਧੂਹ ਕਰਨ ਦੀ ਘਟਨਾ ਨੇ ਇਸ ਵਕਾਰੀ ਵਿਧਾਨਸਭਾ ਹਲਕੇ ਵਿਚ 30 ਜਨਵਰੀ ਤੱਕ ਦੀ ਚੋਣ ਪ੍ਰਕਿਰਿਆ ਦੌਰਾਨ ਚੋਣ ਜ਼ਾਬਤੇ ਦੀ ਉਲੰਘਣਾ ਅਤੇ ਧੱਕੇਸ਼ਾਹੀਆਂ ਦੇ ਵਾਪਰਨ ਵਾਲੇ ਹਾਲਾਤਾਂ ਬਾਰੇ ਅਗਾਊਂ ਤੌਰ 'ਤੇ ਸੰਕੇਤ ਹਨ।
ਇੱਥੇ ਜ਼ਿਕਰਯੋਗ ਹੈ ਕਿ ਜਿਸ ਦੌਰਾਨ ਲੰਬੀ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਚ ਸਾਇਕਲ ਉਤਾਰੇ ਜਾ ਰਹੇ ਸਨ, ਉਸ ਦੌਰਾਨ ਲਗਭਗ 5 ਕਿਲੋਸਮੀਟਰ ਦੀ ਦੂਰੀ 'ਤੇ ਪੰਜਾਬ ਦੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਵੀ ਆਪਣੀ ਚੋਣ ਮੁਹਿੰਮ ਦੇ ਆਗਾਜ਼ ਕਰਕੇ ਅੱਜ ਪਿੰਡ ਬਾਦਲ ਵਿਖੇ ਮੌਜੂਦ ਸਨ ਅਤੇ ਪਿੰਡ ਬਾਦਲ ਵਿਖੇ ਆਪਣੀ ਰਿਹਾਇਸ਼ 'ਤੇ ਪਾਰਟੀ ਵਰਕਰਾਂ ਦੀ ਮੀਟਿੰਗ ਨੂੰ ਸੰਬੋਧਨ ਕਰ ਰਹੇ ਸਨ।
              ਚੋਣ ਪ੍ਰਕਿਰਿਆ ਦੌਰਾਨ ਚੋਣ ਅਮਲੇ ਵਜੋਂ ਵਿਚਰ ਰਹੇ ਸਮੁੱਚੇ ਤੰਤਰ ਦੇ ਸੱਤਾ ਧਿਰ ਦੇ ਦਬਾਅ ਜਾਂ ਪ੍ਰਭਾਵ ਹੇਠ ਹੋਣ ਦਾ ਇਸ ਗੱਲ ਤੋਂ ਸਹਿਜੇ ਅੰਦਾਜ਼ਾ ਲਾਇਆ ਜਾ ਸਕਦਾ ਹੈ ਕਿ ਪਿਛਲੇ ਕੁਝ ਦਿਨਾਂ ਤੋਂ ਚੋਣ ਕਮਿਸ਼ਨ ਦੀ ਹਦਾਇਤਾਂ 'ਤੇ ਲੰਬੀ ਹਲਕੇ ਦੇ ਕਿੱਲਿਆਂਵਾਲੀ ਕਸਬੇ ਦੇ ਬਾਹਰਲੇ ਪਾਸੇ ਅਬੋਹਰ ਤਿੰਨ ਕੋਣੀ 'ਤੇ ਨਾਕਾ ਲਾ ਕੇ ਪੰਜਾਬ ਵਿਚ ਦਾਖਲ ਹੋਣ ਵਾਲੇ ਸਾਰੇ ਵਹੀਕਲਾਂ ਦੀ ਵੀਡੀਓਗਰਾਫ਼ੀ ਰਾਹੀਂ ਜਾਂਚ-ਪੜਤਾਲ ਕੀਤੀ ਜਾਂਦੀ ਸੀ, ਜੋ ਕਿ ਕੱਲ੍ਹ ਸ਼ਾਮ ਤੱਕ ਜਾਰੀ ਸੀ। ਪਰੰਤੂ ਅੱਜ ਮੁੱਖ ਮੰਤਰੀ ਦੇ ਫੇਰੀ ਮੌਕੇ ਉਕਤ ਤਿੰਨ ਕੋਣੀ 'ਤੇ ਪੁਲਿਸ ਪਾਰਟੀ ਮੌਜੂਦ ਨਹੀਂ ਸੀ। ਇਹ ਵੀ ਸੋਚਣ ਦਾ ਵਿਸ਼ਾ ਹੈ ਕਿ ਨਿਰਪੱਖ ਅਤੇ ਸਪੱਸ਼ਟ ਚੋਣ ਪ੍ਰਕਿਰਿਆ ਨੂੰ ਲਾਗੂ ਕਰਨ ਸਬੰਧੀ ਚੋਣ ਕਮਿਸ਼ਨ ਦੀਆਂ ਕੋਸ਼ਿਸ਼ਾਂ ਨੂੰ ਢਾਹ ਲਾਉਣ ਵਿਚ ਉਸੇ ਦੇ ਸਿਪਹਸਲਾਰ ਵੱਡੀ ਭੂਮਿਕਾ ਨਿਭਾਉਂਦੇ ਨਜ਼ਰ ਆ ਰਹੇ ਹਨ। ਜਦੋਂਕਿ ਚੋਣਾਂ ਦੇ ਅਮਲ ਦੇ ਸਾਰੇ ਮੁੱਖ ਦੌਰ ਅਜੇ ਤੱਕ ਸ਼ੁਰੂ ਹੋਣੇ ਬਾਕੀ ਹਨ।
ਇਸ ਸਬੰਧ ਵਿਚ ਜਦੋਂ ਜ਼ਿਲ੍ਹਾ ਸਿੱਖਿਆ ਅਧਿਕਾਰੀ (ਈ. ਈ.) ਸਰਬ ਸਿੱਖਿਆ ਅਭਿਆਨ ਮੁਕਤਸਰ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਤਾਂ ਉਨ੍ਹਾਂ ਦਾ ਮੋਬਾਇਲ ਬੰਦ ਆ ਰਿਹਾ ਸੀ। ਸਕੂਲ ਦੇ ਪਿੰ੍ਰਸੀਪਲ ਗੁਰਿੰਦਰ ਕੌਰ ਨੇ ਸੰਪਰਕ ਕਰਨ 'ਤੇ ਦੱਸਿਆ ਕਿ ਉਹ ਸਕੂਲ ਵਿਚ ਛੁੱਟੀਆਂ ਹੋਣ ਕਰਕੇ ਲੁਧਿਆਣੇ ਦੇ ਅਪੋਲੋ ਹਸਪਤਾਲ ਵਿਚ ਦਾਖਲ ਆਪਣੀ ਬੀਮਾਰ ਸੱਸ ਦੀ ਦੇਖਭਾਲ ਵਿਚ ਜੁਟੇ ਹੋਏ ਸਨ ਅਤੇ ਸਕੂਲ ਵਿਚ ਸਾਇਕਲਾਂ ਦੇ ਆਉਣ ਬਾਰੇ ਕੁਝ ਨਹੀਂ ਪਤਾ।
             ਇਸੇ ਦੌਰਾਨ ਸੰਪਰਕ ਕਰਨ 'ਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸ੍ਰੀ ਅਰਸ਼ਦੀਪ ਸਿੰਘ ਥਿੰਦ ਨੇ ਕਿਹਾ ਕਿ ਕਿਸੇ ਵੀ ਸੂਰਤ ਵਿਚ ਚੋਣ ਜ਼ਾਬਤੇ ਦੀ ਉਲੰਘਣਾ ਨਹੀਂ ਹੋਣ ਦਿੱਤੀ ਜਾਵੇਗੀ।

27 December 2011

ਸ਼ਾਂਤ ਫਾਉਂਡੇਸ਼ਨ ਵੱਲੋਂ ਲਾਏ ਕੈਂਸਰ ਜਾਂਚ ਕੈਂਪ ਵਿਚ 114 ਮਰੀਜਾਂ ਦੀ ਜਾਂਚ ਹੋਈ

                     -ਸਮੇਂ 'ਤੇ ਜਾਂਚ ਤੇ ਸਮੇਂ ਸਿਰ ਇਲਾਜ ਨਾਲ ਕੈਂਸਰ ਨੂੰ ਰੋਕਿਆ ਜਾ ਸਕਦਾ ਹੈ : ਡਾ: ਤੇਜਿੰਦਰ ਸਿੰਘ-

ਡੱਬਵਾਲੀ, 26 ਦਸੰਬਰ : ਸ਼ਾਂਤ ਫਾਊਂਡੇਸ਼ਨ ਵੱਲੋਂ ਸਥਾਨਕ ਵਿਸ਼ਵਕਰਮਾ ਗੁਰਦੁਆਰੇ ਵਿਚ ਉੱਘੇ ਆਜਾਦੀ ਘੁਲੀਟੀਏ ਮਰਹੂਮ ਸ੍ਰੀ ਗੁਰਦੇਵ ਸਿੰਘ ਸ਼ਾਂਤ ਦੀ 16ਵੀਂ ਬਰਸੀ ਦੇ ਮੌਕੇ ਰੋਕੋ ਕੈਂਸਰ ਦੇ ਰੋਮਿੰਗ ਰਾਜਦੂਤ ਕੁਲਵੰਤ ਧਾਲੀਵਾਲ ਦੀ ਪ੍ਰੇਰਨਾ ਸਦਕਾ ਮੁਫਤ ਕੈਂਸਰ ਜਾਂਚ ਅਤੇ ਜਾਗਰੂਕਤਾ ਕੈਂਪ ਲਗਾਇਆ ਗਿਆ। ਜਿਸ ਵਿਚ ਮੈਕਸ ਹਸਪਤਾਲ ਲੁਧਿਆਣਾ ਦੇ ਕੈਂਸਰ ਦੇ ਮਾਹਰ ਡਾ. ਤਜਿੰਦਰ ਸਿੰਘ ਨੇ ਮਰੀਜਾਂ ਦੀ ਜਾਂਚ ਕੀਤੀ। ਇਸ ਮੌਕੇ 'ਤੇ ਰੋਕੋ ਕੈਂਸਰ ਸੰਸਥਾ ਵੱਲੋਂ ਜ਼ਰੂਰਤਮੰਦਾਂ ਦੀ ਮੁਫਤ ਮੈਮੋਗ੍ਰਾਫੀ ਅਤੇ ਪੈਪਸਮੀਰ ਟੈਸਟ ਵੀ ਕੀਤੇ।
              ਇਸਤੋਂ ਪਹਿਲਾਂ ਉਦਘਾਟਨ ਸਮਾਰੋਹ ਵਿਚ ਮੁੱਖ ਮਹਿਮਾਨ ਵਜੋਂ ਸੰਬੋਧੜ ਕਰਦਿਆਂ ਡਾ. ਤਜਿੰਦਰ ਸਿੰਘ ਨੇ ਕੈਂਸਰ ਦੇ ਕਾਰਨਾਂ ਦਾ ਜ਼ਿਕਰ ਕਰਦਿਆਂ ਕਿਹਾ ਕਿ ਸ਼ਰਾਬ, ਤੰਬਾਕੂ, ਫਾਸਟ-ਫੂਡ ਦੇ ਨਾਲ-ਨਾਲ ਘੱਟ ਵਜ਼ਨ, ਗੈਰ ਜ਼ਰੂਰੀ ਤਣਾਅ ਕੈਂਸਰ ਦੇ ਕਾਰਨਾਂ ਵਿਚ ਸ਼ਾਮਲ ਹਨ। ਉਨ੍ਹਾਂ ਕਿਹਾ ਕਿ ਕੈਂਸਰ ਹੁਣ ਲਾਇਲਾਜ ਬੀਮਾਰੀ ਨਹੀਂ ਰਿਹਾ । ਸਮੇਂ 'ਤੇ ਇਸਦੀ ਜਾਂਚ ਅਤੇ ਸਮੇਂ 'ਤੇ ਇਲਾਜ ਨਾਲ ਇਸਨੂੰ ਰੋਕਿਆ ਜਾ ਸਕਦਾ ਹੈ। ਉਨ੍ਹਾਂ ਦੱਸਿਆ ਕਿ ਸਕਰੀਨਿੰਗ ਨਾਲ ਛਾਤੀ ਅਤੇ ਬੱਚੇਦਾਨੀ ਦੇ ਕੈਂਸਰ ਦਾ ਪਹਿਲਾਂ ਤੋਂ ਹੀ ਪਤਾ ਲੱਗ ਜਾਂਦਾ ਹੈ ਅਤੇ ਇਸਦਾ ਸਮੇਂ ਰਹਿੰਦੇ ਇਲਾਜ ਕਰਵਾ ਕੇ ਰੋਗੀ ਤੰਦਰੁਸਤ ਜੀਵਨ ਬਿਤਾ ਸਕਦਾ ਹੈ।
ਇਸ ਮੌਕੇ 'ਤੇ ਡੱਬਵਾਲੀ ਦੇ ਸਿਵਲ ਹਸਪਤਾਲ ਦੇ ਸੀਨੀਅਰ ਡਾਕਟਰਾਂ ਐਸ.ਐਮ.ਓ.ਡਾ. ਮਹਿੰਦਰ ਸਿੰਘ ਭਾਦੂ ਨੇ ਕੈਂਸਰ ਦੇ ਬਾਰੇ ਵਿਚ ਸਵਾਸਥ ਵਿਭਾਗ ਵੱਲੋਂ ਮੁੱਖ ਜਾਣਕਾਰੀ ਦਿੰਦੇ ਹੋਏ ਕਿਹਾ ਕਿ ਸਰੀਰ ਦੇ ਕਿਸੇ ਵੀ ਭਾਗ ਦੇ ਸੈਲਾਂ ਦਾ ਬੇਲਗਾਮ ਹੋ ਕੇ ਵਧਣਾ ਕੈਂਸਰ ਦੀ ਸ਼੍ਰੇਮਣੀ ਵਿਚ ਆਉਂਦੇ ਹਨ।
         ਰੋਕੋ ਕੈਂਸਰ ਦੇ ਪੰਜਾਬ ਦੇ ਪ੍ਰਮੁੱਖ ਡਾ. ਧਰਮਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਪੰਜਾਬ ਵਿਚ ਰੋਕੋ ਕੈਂਸਰ ਵੱਲੋਂ ਡੇਢ ਕਰੋੜ ਰੁਪਏ ਦੀ ਲਾਗਤ ਨਾਲ ਪੰਚ ਬੱਸਾਂ ਕੈਂਸਰ ਦੀ ਜਾਂਚ ਵਿਚ ਮੁਫਤ ਸੇਵਾ ਵਿਚ ਲੱਗੀਆਂ ਹੋਈਆਂ ਸਨ। ਉਨ੍ਹਾਂ ਦੱਸਿਆ ਕਿ ਰੋਕੋ ਕੈਂਸਰ ਵੱਲੋਂ ਇਹ ਹਰਿਆਣਾ ਵਿਚ ਲਾਇਆ ਜਾਣ ਵਾਲਾ ਪਹਿਲਾ ਕੈਂਪ ਹੈ।
          ਇਸ ਮੌਕੇ ਜੱਸੀ ਹਸਪਤਾਲ ਦੇ ਸੰਚਾਲਕ ਡਾ. ਸੁਰਿੰਦਰ ਪਾਲ ਜੱਸੀ ਨੇ ਆਪਣੇ ਸੰਬੋਧਨ ਵਿਚ ਕਿਹਾ ਕਿ ਸ਼ਹਿਰ ਨੂੰ ਕੈਂਸਰ ਮੁਕਤ ਕਰਨ ਲਈ ਸਮੇਂ-ਸਮੇਂ 'ਤੇ ਮੁਫਤ ਜਾਂਚ ਕੈਂਪ ਲਗਾਉਣ ਲਈ ਸ਼ਾਂਤ ਫਾਊਂਡੇਸ਼ਨ ਨੂੰ ਹਰ ਤਰ੍ਹਾਂ ਦਾ ਸਹਿਯੋਗ ਦਿੰਦੇ ਰਹਿਣਗੇ।
              ਉੱਘੇ ਭਾਜਪਾ ਨੇਤਾ ਦੇਵ ਕੁਮਾਰ ਸ਼ਰਮਾ ਨੇ ਆਜਾਦੀ ਘੁਲਾਈਏ ਸਵ. ਗੁਰਦੇਵ ਸਿੰਘ ਸ਼ਾਂਤ ਨੂੰ ਯਾਦ ਕਰਦੇ ਹੋਏ ਉਨ੍ਹਾਂ ਦੀ ਸਮਾਜ ਸਵੀ ਸੋਚ ਅਤੇ ਸ਼ਹਿਰ ਦੇ ਪ੍ਰਤੀ ਸੇਵਾਵਾਂ ਨੂੰ ਸਲਾਮ ਕੀਤਾ। ਉਨ੍ਹਾਂ ਵੱਲੋਂ ਨਗਰ ਸੁਧਾਰ ਮੰਡਲ ਦੇ ਬਤੌਰ ਚੇਅਰਮੈਨ ਕਰਵਾਏ ਗਏ ਵਿਕਾਸ ਕੰਮਾਂ ਦਾ ਉਲੇਖ ਕਰਦੇ ਹੋਏ ਉਨ੍ਹਾਂ ਨੇ ਦੱਸਿਆ ਕਿ 37 ਸਾਲ ਪਹਿਲਾਂ ਇੱਕ ਛੱਪੜ ਨੂੰ ਚੰਡੀਗੜ੍ਹ ਸਟਾਇਲ ਦੀ ਮਾਰਕੀਟ ਦਾ ਰੂਪ ਦੇਣਾ ਉਨ੍ਹਾਂ ਦੀ ਵਿਕਾਸਪੂਰਨ ਸੋਚ ਦਾ ਨਤੀਜਾ ਹੈ। ਉਨ੍ਹਾਂ ਕਿਹਾ ਕਿ ਉਨ੍ਹਾਂ ਦੀ ਯਾਦ ਵਿਚ ਲਾਇਆਕੈਂਸਰ ਚੈਕਅੱਪ ਕੈਂਪ ਉਨ੍ਹਾਂ ਦੀ ਸੱਚੀ ਸ਼ਰਧਾਂਜਲੀ ਹੈ।
 
              ਸ਼ਾਂਤ ਫਾਊਂਡੇਸ਼ਨ ਦੇ ਪ੍ਰਧਾਨ ਇਕਬਾਲ ਸਿੰਘ ਸ਼ਾਂਤ ਨੇ ਫਾਊਂਡੇਸ਼ਨ ਦੇ ਉਦੇਸ਼ਾਂ ਬਾਰੇ ਵਿਚ ਜਾਣਕਾਰੀ ਦਿੰਦਿਆਂ ਭੀਂਵੱਖੀ ਯੋਜਨਾਵਾਂ  ਬਾਰੇ ਦੱਸਦਿਆਂ ਕਿਹਾ ਕਿ ਪੂਰੇ ਸ਼ਹਿਰ ਦਾ ਹੈਲਥ ਰਜਿਸਟਰੀ (ਸਿਹਤ ਸਰਵੇਖਣ) ਕਰਵਾ ਸ਼ਹਿਰ ਦੇ ਲੋਕਾਂ ਦੀ ਸਿਹਤ ਦੇ ਅੰਕੜਿਆਂ ਨੂੰ ਇੱਕਠਾ ਕਰਨ ਸੰਕਲਪ ਦੁਹਰਾਇਆ। ਉਨ੍ਹਾਂ ਰੋਕੋ ਕੈਂਸਰ ਦੇ ਰੋਮਿੰਗ ਰਾਜਦੂਤ ਕੁਲਵੰਤ ਧਾਲੀਵਾਲ ਵੱਲੋਂ ਵਿਸ਼ਵ ਪੱਧਰ 'ਤੇ ਕੈਂਸਰ ਦੀ ਬੀਮਾਰੀ ਖਿਲਾਫ਼ ਕੀਤੇ ਜਾ ਰਹੇ ਯਤਨਾਂ ਦੀ ਸ਼ਲਾਘਾ ਕੀਤੀ।
ਇਸ ਮੌਕੇ 'ਤੇ ਕੈਂਸਰ ਤੋਂ ਇਲਾਵਾ ਰੋਗਾਂ ਸਮੇਤ 114 ਮਰੀਜ਼ਾਂ ਨੇ ਜਾਂਚ ਕੀਤੀ ਗਈ। ਜਿਸ ਵਿਚੋਂ ਕੈਂਸਰ ਵੱਲੋਂ 30 ਮੈਮੋਗ੍ਰਾਫੀ ਅਤੇ 34 ਪੈਪਸਮੀਰ ਟੈਸਟ ਕੀਤੇ ਗਏ। ਜਿਸ ਵਿਚੋਂ ਕੈਂਸਰ ਦਾ ਇਕ ਰੋਗੀ ਪਾਜ਼ੀਟਿਵ ਪਾਇਆ ਗਿਆ। ਇਸ ਮੌਕੇ 'ਤੇ ਬਲੱਡ ਸ਼ੂਗਰ ਅਤੇ ਬੀ.ਪੀ.ਕੀ ਵੀ ਮੁਫਤ ਜਾਂਚ ਕੀਤੀ ਗਈ। ਇਸ ਕੈਂਪ ਨੂੰ ਐਮ. ਜੀ. ਡੀ.ਐਮ.ਨਰਸਿੰਗ ਕਾਲਜ ਬਠਿੰਡਾ ਦੇ ਨਰਸਿੰਗ ਸਟਾਫ ਨੇ ਵਿਸ਼ੇਸ਼ ਰੂਪ ਨਾਲ ਸਹਿਯੋਗ ਦਿੱਤਾ।
ਇਸ ਮੌਕੇ ਸਿਵਲ ਹਸਪਤਾਲ ਤੋਂ ਮਹਿਲਾਂ ਰੋਗਾਂ ਦੇ ਮਾਹਿਰ ਡਾਕਟਰ ਅਮਰ ਦੀਪ ਜੱਸੀ, ਡੈਂਟਲ ਸਰਜਨ ਡਾ. ਰਾਹੁਲ, ਡਾ. ਭਾਰਤ ਭੂਸ਼ਣ, ਰੋਕੋ ਕੈਂਸਰ ਟੀਮ ਦੀ ਮਹਿਲਾ ਰੋਗ ਡਾਕਟਰ ਸ਼ਬਨਮ ਨੇ ਆਪਣੀ-ਆਪਣੀ ਟੀਮ ਦੇ ਨਾਲ ਰੋਗੀਆਂ ਦੀ ਜਾਂਚ ਕੀਤੀ।

30 November 2011

...'ਤੇ ਹੁਣ ਬਣ ਜਾਵੇਗਾ 'ਪਾਸ਼' ਦਾ 'ਮੰਟਾ'

ਇਕਬਾਲ ਸਿੰਘ ਸ਼ਾਂਤ
ਲੰਬੀ : ਤਾ-ਉਮਰ ਰਲ-ਮਿਲ ਕੇ ਸੂਬੇ ਦੇ ਸਿਆਸੀ ਥੰਮਾਂ 'ਤੇ ਪਰਚੰਮ ਲਹਿਰਾਉਂਦੇ ਰਹੇ ਬਾਦਲ ਭਰਾਵਾਂ 'ਪਾਸ਼' ਅਤੇ 'ਦਾਸ' ਵਿਚਕਾਰ ਵਖਰੇਵੇਂ ਉਪਰੰਤ ਹੁਣ ਦੋਵੇਂ ਧਿਰਾਂ ਵੱਲੋਂ ਇੱਕ-ਦੂਸਰੇ ਨੂੰ ਸਿਆਸੀ ਪਿੜ ਵਿਚ ਪਛਾੜਨ ਲਈ ਹਰ ਹੀਲਾ ਵਰਤਿਆ ਜਾ ਰਿਹਾ ਹੈ। ਚੋਣਾਂ ਦੀ ਅਸਲ ਮਹਾਂਭਾਰਤ ਦੇ ਸ਼ੁਰੂ ਹੋਣ ਤੋਂ ਪਹਿਲਾਂ ਹੀ ਸਿਆਸੀ ਚੱਕਰਵਿਊ ਤਹਿਤ ਵਿਚ ਇੱਕ-ਦੂਸਰੇ ਦੇ ਸਿਆਸੀ ਕਿਲ੍ਹਿਆਂ ਅਤੇ ਸਿਪਹਸਲਾਰਾਂ 'ਚ ਸੰਨ੍ਹ ਲਾ ਕੇ ਆਪਣੇ ਲਈ ਮਜ਼ਬੂਤ ਸਿਆਸੀ ਕਿਲ੍ਹੇਬੰਦੀ ਦੀਆਂ ਲਗਾਤਾਰ ਕੋਸ਼ਿਸ਼ਾਂ ਜਾਰੀ ਹਨ।
ਹਾਸਲ ਕਣਸੋਆਂ ਅਨੁਸਾਰ ਸੰਨ 2002 ਦੀ ਅਕਾਲੀ ਸਰਕਾਰ ਤੋਂ ਲੈ ਕੇ ਮਨਪ੍ਰੀਤ ਸਿੰਘ ਬਾਦਲ ਦੀ ਅਗਵਾਈ ਵਾਲੀ ਪੀ.ਪੀ.ਪੀ. ਦੇ ਗਠਨ ਤੱਕ ਮੁੱਖ ਮੰਤਰੀ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਦੀ ਸੱਜੀ ਬਾਂਹ ਵਜੋਂ ਵਿਚਰਦੇ ਰਹੇ ਹਾਈ-ਪ੍ਰੋਫਾਈਲ ਨੌਜਵਾਨ ਆਗੂ ਸਤਿੰਦਰਜੀਤ ਸਿੰਘ 'ਮੰਟਾ ਰੋੜਾਂਵਾਲੀ' ਦੇ 3 ਦਸੰਬਰ ਨੂੰ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਦੇ ਲੰਬੀ ਹਲਕੇ ਦੇ ਦੌਰੇ ਦੌਰਾਨ ਅਕਾਲੀ ਦਲ ਵਿਚ ਸ਼ਾਮਲ ਹੋਣ ਦੇ ਆਸਾਰ ਹਨ।
ਦੱਸਣਯੋਗ ਹੈ ਕਿ ਪੀ.ਪੀ.ਪੀ. ਦੇ ਗਠਨ ਉਪਰੰਤ ਲੰਬੀ ਹਲਕੇ ਵਿਚ ਬੜੀ ਸਰਗਰਮੀ ਵਿਚ ਪੀ.ਪੀ.ਪੀ. ਦੀਆਂ ਸਰਗਰਮੀਆਂ ਵਿਚ ਹਿੱਸਾ ਲੈ ਰਹੇ ਸ੍ਰੀ ਸਤਿੰਦਰਜੀਤ ਸਿੰਘ ਮੰਟਾ ਨੂੰ ਪੰਜਾਬ ਵਿਜੀਲੈਂਸ ਬਿਊਰੋ ਵੱਲੋਂ ਭ੍ਰਿਸ਼ਟਾਚਾਰ ਦੇ ਮਾਮਲੇ 20-21 ਮਈ ਦੀ ਦਰਮਿਆਨੀ ਰਾਤ ਨੂੰ ਉਸਦੇ ਘਰੋਂ ਪਿੰਡ ਰੋੜਾਂਵਾਲੀ ਤੋਂ ਗ੍ਰਿਫ਼ਤਾਰ ਕਰ ਲਿਆ ਗਿਆ ਸੀ।
ਜਿਸਦੇ ਉਪਰੰਤ ਉਕਤ ਮਾਮਲੇ 'ਚ ਅਦਾਲਤ ਵਿਚੋਂ ਜਮਾਨਤ ਮਿਲਣ ਬਾਅਦ ਸ੍ਰੀ ਮੰਟਾ ਸਿਆਸੀ ਤੌਰ 'ਤੇ ਰੂਪੋਸ਼ ਜਿਹੇ ਵਿਚਰ ਰਹੇ ਸਨ। ਹਾਲਾਂਕਿ ਸ੍ਰੀ ਮੰਟਾ ਨੂੰ ਗੁਰਦਾਸ ਸਿੰਘ ਬਾਦਲ ਦਾ ਵਫ਼ਾਦਾਰ ਅਤੇ ਨਿਸ਼ਠਾਵਾਨ ਸ਼ਾਗਿਰਦ ਮੰਨਿਆ ਜਾਂਦਾ ਰਿਹਾ ਹੈ। ਦੱਸਣਯੋਗ ਹੈ ਕਿ ਸ੍ਰੀ ਮੰਟਾ ਦੀ ਗ੍ਰਿਫ਼ਤਾਰੀ ਉਪਰੰਤ ਸ: ਗੁਰਦਾਸ ਸਿੰਘ ਬਾਦਲ ਨੇ ਉਸਦੀ ਵਫ਼ਾਦਾਰੀ ਦੇ ਬਦਲੇ ਉਸਨੂੰ ਪੀ.ਪੀ.ਪੀ. ਵੱਲੋਂ ਲੰਬੀ ਹਲਕੇ ਤੋਂ ਲੜਾਉਣ ਲਈ ਪਾਰਟੀ ਨੂੰ ਸਿਫਾਰਸ਼ ਕਰਨ ਦਾ ਐਲਾਨ ਵੀ ਕੀਤਾ ਸੀ।
ਪਰੰਤੂ ਹੁਣ ਸਤਿੰਦਰਜੀਤ ਮੰਟਾ ਦੇ ਦੁਬਾਰਾ ਤੋਂ ਅਕਾਲੀ ਦਲ ਵਿਚ ਆਉਣ ਦੀਆਂ ਕਣਸੋਆਂ ਨੇ ਤਰ੍ਹਾਂ-ਤਰ੍ਹਾਂ ਦੀਆਂ ਚਰਚਾਵਾਂ ਨੂੰ ਬਲ ਮਿਲਿਆ ਹੈ।
             ਜੱਗਜਾਹਰ ਹੈ ਕਿ ਮੁੱਖ ਮੰਤਰੀ ਦੇ ਛੋਟੇ ਭਰਾ ਸ: ਗੁਰਦਾਸ ਸਿੰਘ ਬਾਦਲ ਨੂੰ ਪੀ.ਪੀ.ਪੀ. ਵੱਲੋਂ ਲੰਬੀ ਹਲਕੇ ਤੋਂ ਉਮੀਦਵਾਰ ਐਲਾਨਿਆ ਹੋਇਆ ਹੈ, ਉਥੇ ਪਿਛਲੇ ਵਿਧਾਨਸਭਾ ਚੋਣਾਂ ਵਿਚ ਮੁੱਖ ਮੰਤਰੀ ਸ੍ਰੀ ਬਾਦਲ ਨੂੰ ਤਕੜੀ ਟੱਕਰ ਦੇ ਚੁੱਕੇ ਸ: ਮਹੇਸ਼ਇੰਦਰ ਸਿੰਘ ਬਾਦਲ ਨੂੰ ਕਾਂਗਰਸ ਵੱਲੋਂ ਮੁੜ ਤੋਂ ਉਮੀਦਵਾਰ ਐਲਾਨੇ ਜਾਣ ਦੀ ਮਜ਼ਬੂਤ ਸੰਭਾਵਨਾ ਹੈ। ਅਜਿਹੇ ਅਕਾਲੀ  ਦਲ (ਬ) ਵੱਲੋਂ ਲੰਬੀ ਅਤੇ ਗਿੱਦੜਬਾਹਾ ਹਲਕੇ ਵਿਚ ਆਪਣੀ ਸਥਿਤੀ ਨੂੰ ਮਜ਼ਬੂਤ ਕਰਨ ਦੇ ਮੰਤਵ ਨਾਲ ਸਿਆਸੀ ਸਰੀਕਾਂ ਦੇ ਪ੍ਰਮੁੱਖ ਝੰਡਾਬਰਦਾਰਾਂ ਦੀਆਂ ਵਫ਼ਾਦਾਰੀਆਂ ਤਬਦੀਲ ਕਰਵਾਈਆਂ ਨੂੰ ਅੰਜਾਮ ਦਿੱਤਾ ਜਾ ਰਿਹਾ ਹੈ। ਇਸਤੋਂ ਪਹਿਲਾਂ ਵੀ ਸਾਬਕਾ ਵਿੱਤ ਮੰਤਰੀ ਸ: ਮਨਪ੍ਰੀਤ ਸਿੰਘ ਬਾਦਲ ਦੇ ਓ. ਐਸ. ਡੀ. ਸ: ਚਰਨਜੀਤ ਸਿੰਘ ਬਰਾੜ ਵੀ ਪੀ. ਪੀ. ਪੀ. ਨੂੰ ਅਲਵਿਦਾ ਕਹਿ ਕੇ ਅਕਾਲੀ ਦਲ ਵਿਚ ਸ਼ਾਮਲ ਹੋ ਚੁੱਕੇ ਹਨ।
            ਇਸ ਸਬੰਧ ਵਿਚ ਫੋਨ ਉਤੇ ਸੰਪਰਕ ਕਰਨ 'ਤੇ ਸ: ਸਤਿੰਦਰਜੀਤ ਸਿੰਘ ਮੰਟਾ ਨੇ ਕਿਹਾ ਕਿ ਜਦੋਂ ਵੀ ਅਜਿਹਾ ਕੁਝ ਹੋਵੇਗਾ ਤਾਂ ਤੁਹਾਨੂੰ ਮੈਂ ਖੁਦ ਫੋਨ ਕਰਕੇ ਦੱਸਾਂਗਾ। ਬਾਕੀ ਤੁਸੀਂ ਖੁਦ ਸੀ. ਐਮ. ਸਾਬ੍ਹ ਨੂੰ ਪੁੱਛ ਲਵੋ।

ਕੁਲਦੀਪ ਮਾਣਕ ਦਾ ਸੋਹਣਾ ਪਿੰਡ ਜਲਾਲ ਅੱਜ ਉਦਾਸ ਹੈ...

                                                               ਚਰਨਜੀਤ ਭੁੱਲਰ
ਬਠਿੰਡਾ :  ਕੁਲਦੀਪ ਮਾਣਕ ਦਾ 'ਜਲਾਲ' ਅੱਜ ਉਦਾਸ ਹੈ। ਉਸ ਦੇ ਹਾਣੀ ਅੱਜ ਗਮ 'ਚ ਡੁੱਬ ਗਏ ਹਨ। ਪਿੰਡ ਦਾ ਹਰ ਨਿਆਣਾ ਸਿਆਣਾ ਸੋਗ ਵਿੱਚ ਹੈ। ਉਸ ਦੀ ਪੈੜ ਦੀ ਗੱਲ ਅੱਜ ਹਰ ਘਰ ਤੁਰੀ ਹੋਈ ਸੀ। 'ਕਲੀਆਂ ਦੇ ਬਾਦਸ਼ਾਹ ਕੁਲਦੀਪ ਮਾਣਕ ਨਹੀਂ ਰਹੇ', ਜਦੋਂ ਇਹ ਖ਼ਬਰ ਪਿੰਡ 'ਚ ਪੁੱਜੀ ਤਾਂ ਇੱਕ ਤਰ੍ਹਾਂ ਨਾਲ ਜ਼ਿੰਦਗੀ ਹੀ ਰੁਕ ਗਈ। ਪਿੰਡ ਜਲਾਲ ਦੀ ਜੂਹ ਨੂੰ ਅੱਜ ਸੂਰਜ ਸਮੇਂ ਤੋਂ ਪਹਿਲਾਂ ਅਸਤ ਹੁੰਦਾ ਜਾਪਿਆ। ਜਿਨ੍ਹਾਂ ਗਲੀਆਂ 'ਚ ਕੁਲਦੀਪ ਮਾਣਕ ਖੇਡਿਆ, ਉਨ੍ਹਾਂ ਗਲੀਆਂ ਦਾ ਗੱਚ ਵੀ ਭਰਿਆ ਹੋਇਆ ਸੀ। ਪਿੰਡ ਜਲਾਲ 'ਚ ਮਾਣਕ ਦਾ ਛੋਟਾ ਜਿਹਾ ਘਰ ਹੈ ਜਿਥੇ ਅੱਜ ਉਸ ਦੇ ਪੁਰਾਣੇ ਬੇਲੀ ਮੌਤ ਦੀ ਖ਼ਬਰ ਮਗਰੋਂ ਜੁੜਨ ਲੱਗ ਪਏ। ਇਕੱਲੇ ਇੱਕ ਜਲਾਲ 'ਚ ਨਹੀਂ ਬਲਕਿ 'ਅੱਠ ਜਲਾਲਾਂ' 'ਚ ਸੋਗ ਦੀ ਲਹਿਰ ਦੌੜ ਗਈ। ਉਹ ਸਰਕਾਰੀ ਸਕੂਲ ਵੀ ਗਮ ਦੇ ਦਰਿਆ 'ਚ ਡੁੱਬ ਗਿਆ ਜਿਸ ਦੀ ਮਿੱਟੀ 'ਤੇ ਬੈਠ ਕੇ ਬਚਪਨ ਉਮਰੇ ਕੁਲਦੀਪ ਮਾਣਕ ਗਾਉਂਦਾ ਹੁੰਦਾ ਸੀ। ਸਕੂਲ ਦੀ ਬਾਲ ਸਭਾ 'ਚ ਗਾਏ ਗੀਤ ਅੱਜ ਉਸ ਦੇ ਹਾਣੀ ਚੇਤੇ ਕਰਦੇ ਰਹੇ। ਕਰੀਬ ਇੱਕ ਵਰ੍ਹਾ ਪਹਿਲਾਂ ਕੁਲਦੀਪ ਮਾਣਕ ਆਪਣੇ ਭਰਾ ਦੀ ਮੌਤ 'ਤੇ ਆਇਆ। ਅੱਜ ਇੱਕ ਵਰ੍ਹੇ ਮਗਰੋਂ ਖੁਦ ਉਸ ਦੀ ਮੌਤ ਦੀ ਖ਼ਬਰ ਪਿੰਡ ਪੁੱਜ ਗਈ ਹੈ।
          ਕੁਲਦੀਪ ਮਾਣਕ ਦਾ ਪੁਰਾਣਾ ਬੇਲੀ ਮਾਸਟਰ ਨਛੱਤਰ ਸਿੰਘ ਆਖਦਾ ਹੈ ਕਿ 'ਪਿੰਡ ਜਲਾਲ ਲਈ ਅੱਜ ਦਾ ਦਿਨ ਸਭ ਤੋਂ ਮਾੜਾ ਚੜ੍ਹਿਆ ਹੈ।' ਉਹ ਆਖਦਾ ਹੈ ਕਿ ਕੁਲਦੀਪ ਮਾਣਕ ਨੇ ਪਿੰਡ ਜਲਾਲ ਨੂੰ ਵਿਸ਼ਵ 'ਚ ਚਮਕਾ ਦਿੱਤਾ ਸੀ ਅਤੇ ਖੁਦ ਅੱਜ ਉਹ 'ਮਾਣਕ' ਨਹੀਂ ਰਿਹਾ। ਉਸ ਨੇ ਦੱਸਿਆ ਕਿ ਅੱਠ ਜਲਾਲਾਂ 'ਚ ਅੱਜ ਹਰ ਘਰ ਗਮ ਦਾ ਮਾਹੌਲ ਹੈ। ਪਿੰਡ ਜਲਾਲ ਦੀ ਹਰ ਦੇਹਲੀ ਤੋਂ 18 ਸਤੰਬਰ 1993 ਨੂੰ ਉਹ ਖੁਸ਼ੀ ਸਾਂਭੀ ਨਹੀਂ ਜਾ ਰਹੀ ਸੀ ਜਦੋਂ ਰਿਕਾਰਡ ਇਕੱਠ 'ਚ ਪਿੰਡ ਜਲਾਲ ਨੇ 'ਕੁਲਦੀਪ ਮਾਣਕ' ਨੂੰ ਕਾਰ ਨਾਲ ਸਨਮਾਨਿਤ ਕੀਤਾ ਸੀ। ਅੱਤਵਾਦ ਮਗਰੋਂ ਪੰਜਾਬ ਦਾ ਇਹ ਇੱਕ ਵੱਡਾ ਇਕੱਠ ਸੀ ਜਿਸ 'ਚ ਡੀ.ਜੀ.ਪੀ ਕੇ.ਪੀ.ਐਸ.ਗਿੱਲ ਪੁੱਜੇ ਸਨ। ਉਦੋਂ ਪਿੰਡ ਜਲਾਲ ਦੇ ਘਰ ਘਰ 'ਚ ਲੰਗਰ ਚੱਲਿਆ ਸੀ। ਪਿੰਡ ਜਲਾਲ ਅੱਜ ਤੱਕ ਉਹ ਖੁਸ਼ੀ ਦੇ ਪਲ ਨਹੀਂ ਭੁੱਲਾ ਹੈ। ਪਿੰਡ ਜਲਾਲ ਦੇ ਪ੍ਰਿਥੀਪਾਲ ਸਿੰਘ ਜਲਾਲ ਆਖਦੇ ਹਨ ਕਿ ਕੁਲਦੀਪ ਮਾਣਕ ਦੀ ਮੌਤ ਵੀ ਕਦੇ ਭੁੱਲ ਨਹੀਂ ਸਕੇਗੀ। ਉਨ੍ਹਾਂ ਆਖਿਆ ਕਿ ਮਾਣਕ ਨੇ ਪਿੰਡ ਜਲਾਲ ਦੇ ਕੱਦ ਬੁੱਤ ਨੂੰ ਆਪਣੇ ਨਾਲੋਂ ਉੱਚਾ ਚੁੱਕਿਆ। ਨੰਬਰਦਾਰ ਦਰਸ਼ਨ ਸਿੰਘ ਦਾ ਕਹਿਣਾ ਸੀ ਕਿ ਪਿੰਡ ਨੂੰ ਮਾਣਕ ਦਾ ਵਿਛੋੜਾ ਕਦੇ ਨਹੀਂ ਭੁੱਲੇਗਾ। ਉਸ ਨੇ ਪਿੰਡ ਦੇ ਹਰ ਵਸਨੀਕ ਦੀ ਹਰ ਵੇਲੇ ਬਾਂਹ ਫੜੀ।
          ਕੁਲਦੀਪ ਮਾਣਕ ਆਖਰੀ ਦਫ਼ਾ ਖੁਸ਼ੀ ਦੇ ਮੌਕੇ 'ਤੇ ਪਿੰਡ ਜਲਾਲ 'ਚ 14 ਫਰਵਰੀ 2010 ਨੂੰ ਆਏ ਸਨ। ਉਹ ਆਪਣੇ ਪੁਰਾਣੇ ਦੋਸਤਾਂ ਮਿੱਤਰਾਂ ਦੇ ਖੁਸ਼ੀ ਤੇ ਗਮ 'ਚ ਸਰੀਕ ਹੋਣਾ ਨਹੀਂ ਭੁੱਲਦੇ ਸਨ। ਉਹ ਆਪਣੇ ਪਿੰਡ ਜਲਾਲ ਦੇ ਸਰਕਾਰੀ ਸਕੂਲ ਵਿੱਚ ਅੱਠਵੀਂ ਕਲਾਸ ਤੱਕ ਪੜ੍ਹਿਆ। ਉਸ ਤੋਂ ਕਾਫੀ ਸਮੇਂ ਮਗਰੋਂ ਉਹ ਲੁਧਿਆਣਾ ਚਲੇ ਗਏ ਸਨ। ਜਦੋਂ ਉਹ ਸਕੂਲ ਦੀ ਬਾਲ ਸਭਾ ਵਿੱਚ ਗਾਉਂਦਾ ਸੀ ਤਾਂ ਉਦੋਂ ਹੈੱਡਮਾਸਟਰ ਕਸ਼ਮੀਰ ਸਿੰਘ ਅਕਸਰ ਥਾਪੀ ਦਿੰਦੇ ਸਨ। ਇਸੇ ਥਾਪੀ ਨੇ ਉਸ ਨੂੰ ਅਸਮਾਨ 'ਚ ਪਹੁੰਚਾ ਦਿੱਤਾ। ਪਿੰਡ ਦੇ ਲੋਕ ਦੱਸਦੇ ਹਨ ਕਿ ਉਸ ਨੇ 40 ਕੁ ਸਾਲ ਪਹਿਲਾਂ ਪਿੰਡ ਛੱਡ ਦਿੱਤਾ ਸੀ। ਭਾਵੇਂ ਉਹ ਪਿੰਡੋਂ ਚਲੇ ਗਏ ਸਨ ਪਰ ਭਾਵੁਕ ਤੌਰ 'ਤੇ ਉਹ ਪਿੰਡ ਨਾਲ ਜੁੜੇ ਹੋਏ ਸਨ। ਪਿੰਡ ਦੇ ਲੋਕ ਦੱਸਦੇ ਹਨ ਕਿ ਮਾਣਕ ਦੇ ਮਨ ਵਿਚ ਪਿੰਡ ਦੇ ਹਰ ਜੀਅ ਦਾ ਸਤਿਕਾਰ ਸੀ। ਪਿੰਡ ਦੇ ਸਰਪੰਚ ਜਗਦੀਸ਼ ਸਿੰਘ ਪੱਪੂ ਦਾ ਕਹਿਣਾ ਸੀ ਕਿ ਪੂਰਾ ਜਲਾਲ ਗਮ ਵਿੱਚ ਡੁੱਬਿਆ ਹੋਇਆ ਹੈ। ਉਨ੍ਹਾਂ ਆਖਿਆ ਕਿ ਮਾਣਕ ਦੇ ਤੁਰ ਜਾਣ ਦਾ ਦੁੱਖ ਹਮੇਸ਼ਾ ਰਹੇਗਾ। ਉਨ੍ਹਾਂ ਦੱਸਿਆ ਕਿ ਪਿੰਡ ਜਲਾਲ 'ਚ ਅੱਜ ਉਨ੍ਹਾਂ ਦੇ ਚਲੇ ਜਾਣ ਦੀ ਖ਼ਬਰ ਕਰੀਬ ਤਿੰਨ ਕੁ ਵਜੇ ਪੁੱਜੀ। ਅੱਜ ਪਿੰਡ ਦੀ ਸੱਥ ਵਿੱਚ ਵੀ ਮਾਣਕ ਦੀਆਂ ਕਲੀਆਂ ਦੀ ਗੱਲ ਚੱਲਦੀ ਰਹੀ। ਜਿਸ ਪਿੰਡ ਨੇ ਕਲੀਆਂ ਦੇ ਬੇਤਾਜ ਬਾਦਸ਼ਾਹ ਨੂੰ ਜਨਮ ਦਿੱਤਾ ,ਅੱਜ ਉਹ ਪਿੰਡ ਖੁਦ ਖ਼ਾਮੋਸ਼ੀ ਦੀ ਬੁੱਕਲ ਵਿੱਚ ਬੈਠਾ ਸੀ। ਜਾਣਕਾਰੀ ਅਨੁਸਾਰ 2 ਦਸੰਬਰ ਨੂੰ ਪਿੰਡ ਜਲਾਲ 'ਚ ਕੁਲਦੀਪ ਮਾਣਕ ਨੂੰ ਦਫ਼ਨਾਇਆ ਜਾਵੇਗਾ।
ਕੁਲਦੀਪ ਮਾਣਕ ਨੇ ਦਰਜਨਾਂ ਗੀਤਾਂ 'ਚ ਆਪਣੇ ਪਿੰਡ ਨੂੰ ਮਾਣ ਦਿੱਤਾ ਜਿਨ੍ਹਾਂ ਚੋਂ ਇੱਕ ਦੋ ਇਸ ਤਰ੍ਹਾਂ ਹਨ।
                                          'ਸੋਹਣਾ ਪਿੰਡ ਜਲਾਲ ਮੇਰਾ , ਸਾਂਭ ਕੇ ਨਿਸ਼ਾਨੀ ਰੱਖ ਲਈ
                                                           ਲੈ ਜੀ ਨਾਲ ਰੁਮਾਲ ਮੇਰਾ।'
                                            ' ਝੰਗ ਸਿਆਲਾਂ ਨਾਲੋਂ ਸੋਹਣਾ, ਮੇਰਾ ਪਿੰਡ ਜਲਾਲ ਕੁੜੇ।'
 ਇਸੇ ਤਰ੍ਹਾਂ ਇੱਕ ਹੋਰ ਗੀਤ 'ਚ ਮਾਣਕ ਨੇ ਗਾਇਆ ...
                                          'ਸਕਿਆ ਭਾਈਆ ਦੇ ਮੁੱਲ, ਅੱਠ ਜਲਾਲਾਂ ਵਾਲਿਆ
                                              ਸਕਿਆ ਭਾਈਆ ਬਾਝੋਂ,ਕੋਈ ਨਹੀਂ ਉਤਾਰਦਾ'

                                              ਲਤੀਫ ਮੁਹੰਮਦ ਉਰਫ 'ਕੁਲਦੀਪ ਮਾਣਕ'
 ਜਾਣਕਾਰੀ ਅਨੁਸਾਰ ਕੁਲਦੀਪ ਮਾਣਕ ਦਾ ਅਸਲੀ ਨਾਮ ਲਤੀਫ਼ ਮੁਹੰਮਦ ਉਰਫ ਲੱਧਾ ਸੀ। ਸਕੂਲ 'ਚ ਉਸ ਨੂੰ ਕੁਲਦੀਪ ਮਣਕਾ ਵੀ ਆਖਦੇ ਸਨ। ਲੋਕ ਦੱਸਦੇ ਹਨ ਕਿ ਤਤਕਾਲੀ ਮੁੱਖ ਮੰਤਰੀ ਪ੍ਰਤਾਪ ਸਿੰਘ ਕੈਰੋਂ ਨੇ ਜਦੋਂ ਉਸ ਨੂੰ ਗਾਉਂਦੇ ਨੂੰ ਸੁਣਿਆ ਤਾਂ ਉਨ੍ਹਾਂ ਨੇ ਆਖਿਆ ਸੀ ਕਿ ' ਤੂੰ ਕੁਲਦੀਪ ਮਣਕਾ ਨਹੀਂ,ਤੂੰ ਤਾਂ ਕੁਲਦੀਪ ਮਾਣਕ ਹੈ।' ਉਦੋਂ ਤੋਂ ਹੀ ਉਸ ਦਾ ਨਾਮ ਕੁਲਦੀਪ ਮਾਣਕ ਪਿਆ। ਇਹ ਵੀ ਦੱਸਦੇ ਹਨ ਕਿ ਕੈਰੋਂ ਨੇ ਇਹ ਆਖਿਆ ਸੀ ਕਿ ' ਤੂੰ ਆਪਣੀ ਕੁੱਲ ਦਾ ਦੀਪ ਹੈ ਤੇ ਤੂੰ ਹੀਰਾ ਨਹੀਂ ਬਲਕਿ ਤੂੰ ਤਾਂ ਮਾਣਕ ਹੈ।' ਇਸ ਤਰ੍ਹਾਂ ਦੀ ਗੱਲ ਮਾਣਕ ਖੁਦ ਵੀ ਆਪਣੀ ਇੰਟਰਵਿਊ ਵਿੱਚ ਦੱਸਦੇ ਰਹੇ ਹਨ।

23 November 2011

ਅਡਵਾਨੀ ਨੂੰ ਸਿਰੋਪਾ ਨਾ ਦੇਣਾ ਚੰਗੀ ਸੁਰੂਆਤ

                                                                 -ਬੀ ਐਸ ਭੁੱਲਰ-
ਭਾਜਪਾ ਦੇ ਸੀਨੀਅਰ ਨੇਤਾ ਸ੍ਰੀ ਲਾਲ ਕ੍ਰਿਸਨ ਅਡਵਾਨੀ ਦੇ ਪੰਜਾਬ ਦੌਰੇ ਨਾਲ ਸਿਰੋਪੇ ਦੇ ਨਾਂ ਹੇਠ ਕੀਤੀ ਜਾ ਰਹੀ ਸਿਆਸਤ ਨੂੰ ਠੱਲ੍ਹ ਪਾਉਣ ਦੀ ਸੁਰੂਆਤ ਹੋ ਗਈ ਹੈ। ਗੁਰਦੁਆਰਿਆਂ ਦਾ ਪ੍ਰਬੰਧ ਚਲਾਉਣ ਵਾਲੀ ਸ੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਤੇ ਸੱਤ੍ਹਾਧਾਰੀ ਸ੍ਰੋਮਣੀ ਅਕਾਲੀ ਦਲ ਦਾ ਹੀ ਕਬਜਾ ਰਿਹਾ ਹੈ। ਇਸ ਲਈ ਇਸ ਦਲ ਦੇ ਵਿਰੋਧੀ ਨੇਤਾਵਾਂ ਨੂੰ ਸ੍ਰੀ ਦਰਬਾਰ ਸਾਹਿਬ ਅਮ੍ਰਿਤਸਰ 'ਚ ਸਿਰੋਪਾ ਨਾ ਦੇਣ ਲਈ ਕਦੇ ਦਾੜੀ ਕੱਟੀ ਹੋਈ, ਕਦੇ ਦਾੜੀ ਰੰਗੀ ਹੋਈ ਅਤੇ ਕਦੇ ਕਿਸੇ ਮਾਮਲੇ ਦਾ ਦੋਸੀ ਹੋਣ ਦਾ ਬਹਾਨਾ ਬਣਾ ਕੇ ਪਾਸਾ ਵੱਟਿਆ ਜਾਂਦਾ ਰਿਹਾ ਹੈ।

       ਦੂਜੇ ਪਾਸੇ ਸੱਤ੍ਹਧਾਰੀ ਸ੍ਰੋਮਣੀ ਅਕਾਲੀ ਦਲ ਨਾਲ ਸਬੰਧਤ ਵਿਅਕਤੀ ਭਾਵੇ ਮੁਕੱਦਮਿਆਂ ਦਾ ਸਾਹਮਣਾ ਕਰ ਰਿਹਾ ਹੋਵੇ ਤੇ ਭਾਵੇਂ ਬਲਾਤਕਾਰੀ ਹੋਵੇ ਉਸਨੂੰ ਸ੍ਰੋਮਣੀ ਕਮੇਟੀ ਵਿੱਚ ਅਹੁਦੇ ਮੈਂਬਰੀਆਂ ਵੀ ਮਿਲਦੀਆਂ ਰਹੀਆਂ ਹਨ ਅਤੇ ਅਜਿਹੇ ਅਨਸਰਾਂ ਨੂੰ ਸਿਰੋਪੇ ਬਖਸਿਸ ਕਰਕੇ ਮਾਣ ਸਨਮਾਣ ਵੀ ਦਿੱਤਾ ਜਾਂਦਾ ਰਿਹਾ ਹੈ।

       ਸ੍ਰੀ ਅਡਵਾਨੀ ਦਾ ਦਰਬਾਰ ਸਾਹਿਬ ਵਿਖੇ ਨਤਮਸਤਕ ਹੋਣ ਦਾ ਪ੍ਰੋਗਰਾਮ ਉਲੀਕਿਆ ਗਿਆ ਤਾਂ ਸ੍ਰੋਮਣੀ ਅਕਾਲੀ ਦਲ ਅਮ੍ਰਿਤਸਰ ਦੇ ਪ੍ਰਧਾਨ ਸ੍ਰ: ਸਿਮਰਨਜੀਤ ਸਿੰਘ ਮਾਨ ਨੇ ਐਲਾਨ ਕਰ ਦਿੱਤਾ ਕਿ ਅਡਵਾਨੀ ਦੇ ਦਰਬਾਰ ਸਾਹਿਬ ਵਿਖੇ ਮੱਥਾ ਟੇਕਣ ਵਿੱਚ ਕੋਈ ਵਿਘਨ ਨਹੀਂ ਪਾਇਆ ਜਾਵੇਗਾ ਕਿਉਕਿ ਗੁਰੂ ਸਾਹਿਬਾਨਾਂ ਨੇ ਦਰਬਾਰ ਸਾਹਿਬ ਦੇ ਚਾਰ ਦਰਵਾਜੇ ਬਣਾ ਕੇ ਹਰ ਇੱਕ ਇਨਸਾਨ ਨੂੰ ਨਤਮਸਤਕ ਹੋਣ ਦੀ ਪ੍ਰਵਾਨਗੀ ਦਿੱਤੀ ਹੋਈ ਹੈ। ਪਰੰਤੂ ਦਰਬਾਰ ਸਾਹਿਬ ਵਿਖੇ ਸਿਰੋਪਾ ਬਖਸਿਸ ਕਰਕੇ ਉਸਦਾ ਮਾਣ ਸਨਮਾਨ ਨਹੀਂ ਕਰਨ ਦਿੱਤਾ ਜਾਵੇਗਾ।

       ਸ੍ਰ: ਮਾਨ ਦਾ ਤਰਕ ਸੀ ਕਿ ਸ੍ਰੀ ਅਡਵਾਨੀ ਨੇ ਆਪਣੀ ਪੁਸਤਕ ਮਾਈ ਕੰਟਰੀ ਮਾਈ ਲਾਈਫ਼ ਵਿੱਚ ਸਪਸ਼ਟ ਕੀਤਾ ਹੈ ਕਿ ਦਰਬਾਰ ਸਾਹਿਬ ਵਿਖੇ ਕੀਤੇ ਨੀਲਾ ਤਾਰਾ ਸਾਕਾ ਲਈ ਉਸਨੇ ਹੀ ਉਸ ਸਮੇਂ ਦੀ ਪ੍ਰਧਾਨ ਮੰਤਰੀ ਸ੍ਰੀਮਤੀ ਇੰਦਰਾ ਗਾਂਧੀ ਨੂੰ ਸਲਾਹ ਦੇ ਕੇ ਦਬਾਅ ਪਾਇਆ ਸੀ। ਇੱਥੇ ਹੀ ਬੱਸ ਨਹੀਂ ਬਾਬਰੀ ਮਸਜਿਦ ਢਾਹ ਦੇਣ, ਗੁਜਰਾਤ ਵਿੱਚ ਮੁਸਲਮਾਨਾਂ ਦੇ ਕੀਤੇ ਕਤਲੇਆਮ ਅਤੇ ਦੇਸ ਦੇ ਵੱਖ ਵੱਖ ਭਾਗਾਂ ਵਿੱਚ ਈਸਾਈਆਂ ਤੇ ਨਨਜ ਉਪਰ ਹਮਲੇ ਕਰਵਾਉਣ ਦੀਆਂ ਘਟਨਾਵਾਂ 'ਚ ਅਡਵਾਨੀ ਦਾ ਨਾਂ ਬੋਲਦਾ ਰਿਹਾ ਹੈ। ਉਹਨਾਂ ਕਿਹਾ ਘੱਟ ਗਿਣਤੀਆਂ ਤੇ ਹਮਲੇ ਕਰਨ ਦੇ ਅਜਿਹੇ ਦੋਸ਼ੀ ਨੂੰ ਸਿਰੋਪਾ ਬਖਸਿਸ ਨਹੀਂ ਕਰਨ ਦੇਵਾਂਗੇ।

       ਭਾਜਪਾ ਆਗੂ ਦਰਬਾਰ ਸਾਹਿਬ ਵਿਖੇ ਪਹੁੰਚੇ ਤੇ ਉਹਨਾਂ ਮੱਥਾ ਟੇਕਿਆ, ਜਿਸਤੇ ਕੋਈ ਇਤਰਾਜ ਨਹੀਂ ਕੀਤਾ ਗਿਆ। ਜਦ ਉਸਨੂੰ ਸਿਰੋਪਾ ਬਖਸਿਸ ਕਰਨ ਲਈ ਮੈਨੇਜਰ ਤੇ ਗੰ੍ਰਥੀ ਅੱਗੇ ਵਧੇ ਤਾਂ ਅਕਾਲੀ ਦਲ ਅਮ੍ਰਿਤਸਰ ਵੱਲੋਂ ਉੱਥੇ ਤਾਇਨਾਤ ਇੱਕ ਨੌਜਵਾਨ ਸ੍ਰੋਮਣੀ ਕਮੇਟੀ ਮੈਂਬਰ ਨੇ ਪੂਰੇ ਜੋਸ ਨਾਲ ਇਹ ਕਹਿੰਦਿਆਂ ਇਤਰਾਜ ਕੀਤਾ ਕਿ ਅਡਵਾਨੀ ਘੱਟ ਗਿਣਤੀਆਂ ਦਾ ਕਾਤਲ ਹੈ ਇਸਨੂੰ ਸਿਰੋਪਾ ਨਹੀਂ ਦੇਣ ਦੇਵਾਂਗੇ। ਇਹ ਸੁਣਦਿਆਂ ਦਰਬਾਰ ਸਾਹਿਬ ਦੇ ਅੰਦਰ ਕਿਸੇ ਰੌਲੇ ਰੱਪੇ ਦੇ ਖਤਰੇ ਨੂੰ ਭਾਂਪਦਿਆਂ ਸਿਰੋਪਾ ਦੇਣ ਵਾਲੀਆਂ ਸਖ਼ਸੀਅਤਾਂ ਪਿੱਛੇ ਹਟ ਗਈਆਂ ਅਤੇ ਅਡਵਾਨੀ ਦੇ ਹੋਸ ਉੱਡ ਗਏ ਤੇ ਉਹ ਸੁੰਨ ਜਿਹੇ ਹੋ ਗਏੇ।

       ਅਮ੍ਰਿਤਸਰ ਤੋਂ ਮੈਂਬਰ ਪਾਰਲੀਮੈਂਟ ਸ੍ਰੀ ਨਵਜੋਤ ਸਿੰਘ ਸਿੱਧੂ ਨੇ ਮੌਕਾ ਸੰਭਾਲਣ ਦੀ ਕੋਸਿਸ਼ ਕੀਤੀ ਤਾਂ ਗੁੱਸੇ 'ਚ ਲਾਲ ਪੀਲੇ ਹੋਏ ਉਸ ਕਮੇਟੀ ਮੈਂਬਰ ਨੇ ਉਸਨੂੰ ਜੌਕਰ ਕਰਾਰ ਦਿੰਦਿਆਂ ਕਿਹਾ ਪਿੱਛ ਹਟ ਜਾ ਓਏ ਤਾਂ ਸ੍ਰੀ ਸਿੱਧੂ ਵੀ ਬੇਵੱਸ ਹੋ ਗਏ। ਅਖੀਰ ਸ੍ਰੀ ਅਡਵਾਨੀ ਨੂੰ ਪਾਣੀ ਧਾਣੀ ਪਿਲਾ ਕੇ ਹੌਸਲਾ ਦਿੰਦੇ ਹੋਏ ਉਸਦੇ ਸਾਥੀ ਤੇ ਸੁਰੱਖਿਆ ਕਰਮਚਾਰੀ ਉਸਨੂੰ ਬਾਹਰ ਲੈ ਗਏ।

       ਬਾਦਲ ਦਲ ਦੇ ਕੁਝ ਨੇਤਾਵਾਂ ਨੇ ਤਾਂ ਭਾਵੇਂ ਸ੍ਰੀ ਅਡਵਾਨੀ ਦੀ ਆਓ ਭਗਤ ਲਈ ਸਾਰਾ ਜੋਰ ਤਾਣ ਲਾਇਆ, ਪਰੰਤੂ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨੇ ਸਾਇਦ ਇਹ ਸਮਝਦੇ ਹੋਏ ਕਿ ਪੰਜਾਬੀਆਂ ਖਾਸਕਰ ਸਿੱਖਾਂ ਦੇ ਦਿਲਾਂ ਵਿੱਚ ਅਡਵਾਨੀ ਪ੍ਰਤੀ ਨਫ਼ਰਤ ਹੈ, ਕੁਝ ਦੂਰੀ ਹੀ ਬਣਾ ਕੇ ਰੱਖੀ। ਉਹਨਾਂ ਨਾ ਅਡਵਾਨੀ ਨਾਲ ਬਹੁਤੀਆਂ ਸਟੇਜਾਂ ਸਾਂਝੀਆਂ ਕੀਤੀਆਂ ਅਤੇ ਨਾ ਹੀ ਉਹਨਾਂ ਨਾਲ ਯਾਤਰਾ ਕੀਤੀ, ਬੱਸ ਇੱਕ ਦੋ ਥਾਵਾਂ ਤੇ ਮਿਲ ਕੇ ਬੁੱਤਾ ਸਾਰ ਦਿੱਤਾ। ਬਾਅਦ ਵਿੱਚ ਅਕਾਲੀ ਦਲ ਭਾਜਪਾ ਵਿੱਚ ਤਰੇੜ ਪੈ ਜਾਣ ਦੇ ਡਰ ਕਾਰਨ ਏਨਾ ਜਰੂਰ ਕਹਿ ਦਿੱਤਾ ਕਿ ਸ੍ਰੀ ਅਡਵਾਨੀ ਨੂੰ ਸਿਰੋਪਾ ਤਾਂ ਦੇ ਹੀ ਦੇਣਾ ਚਾਹੀਦਾ ਸੀ।

       ਗੱਲ ਅਡਵਾਨੀ ਨੂੰ ਸਿਰੋਪਾ ਦੇਣ ਜਾਂ ਨਾ ਦੇਣ ਦੀ ਨਹੀਂ, ਅਸਲ ਵਿੱਚ ਇਹ ਇੱਕ ਚੰਗੀ ਸੁਰੂਆਤ ਹੋਈ ਹੈ ਅਤੇ ਇਸਨੂੰ ਜਾਰੀ ਰਖਦਿਆਂ ਅੱਗੇ ਲਈ ਸਿਰੋਪਾ ਬਖਸਿਸ ਕਰਨ ਤੋਂ ਪਹਿਲਾਂ ਸਨਮਾਨ ਹਾਸਲ ਕਰਨ ਵਾਲੇ ਵਿਅਕਤੀ ਬਾਰੇ ਜਾਣਕਾਰੀ ਹਾਸਲ ਕੀਤੀ ਜਾਵੇ ਤਾਂ ਇਸਦੇ ਚੰਗੇ ਨਤੀਜੇ ਨਿਕਲ ਸਕਦੇ ਹਨ। ਜੋ ਵਿਅਕਤੀ ਇਸ ਪਵਿੱਤਰ ਸਥਾਨ ਤੇ ਸਨਮਾਨ ਲੈਣ ਦੇ ਹੱਕਦਾਰ ਨਹੀਂ ਉਹ ਕਿਸੇ ਵੀ ਪਾਰਟੀ ਜਾਂ ਸੰਸਥਾ ਨਾਲ ਜੁੜਿਆ ਹੋਵੇ ਤਾਂ ਉਸਤੋਂ ਕਿਨਾਰਾ ਕਰ ਲੈਣਾ ਚਾਹੀਦਾ ਹੈ।

       ਕੇਂਦਰ ਵਿੱਚ ਆਪਣੀ ਸੋਟੀ ਧਰਾ ਪਾਰਟੀ ਸਮਝਦਿਆਂ ਮੁੱਖ ਮੰਤਰੀ ਸ੍ਰ: ਪ੍ਰਕਾਸ ਸਿੰਘ ਬਾਦਲ ਨੇ ਆਪਣੀ ਪਾਰਟੀ ਦੇ ਨੇਤਾਵਾਂ ਨੂੰ ਸ੍ਰੀ ਅਡਵਾਨੀ ਦੀ ਆਓ ਭਗਤ ਲਈ ਭੇਜ ਦਿੱਤਾ ਅਤੇ ਉਹਨਾਂ ਉਸਦੇ ਸੁਆਗਤ ਵਿੱਚ ਕੋਈ ਕਸਰ ਬਾਕੀ ਨਹੀਂ ਛੱਡੀ, ਪਰੰਤੂ ਸ੍ਰ: ਬਾਦਲ ਨੇ ਪੰਜਾਬ ਵਿੱਚ ਸ੍ਰੀ ਅਡਵਾਨੀ ਨਾਲ ਨਾ ਯਾਤਰਾ ਕੀਤੀ ਅਤੇ ਨਾ ਹੀ ਬਹੁਤੀਆਂ ਸਟੇਜਾਂ ਸਾਂਝੀਆਂ ਕੀਤੀਆਂ, ਸਾਇਦ ਉਹਨਾਂ ਪੰਜਾਬ ਦੇ ਲੋਕਾਂ ਦੀ ਸ੍ਰੀ ਅਡਵਾਨੀ ਪ੍ਰਤੀ ਨਰਾਜਗੀ ਕਾਰਨ ਹੀ ਪਾਸਾ ਜਿਹਾ ਵੱਟੀ ਰੱਖਿਆ।

30 October 2011

ਕੈਂਸਰ ਰਾਹਤ ਫੰਡ ਸਿਰਫ਼ ਸਰਕਾਰੀ ਤਕਰੀਰਾਂ 'ਚ ਸਿਆਸੀ ਫਿਜ਼ਾ ਦਾ ਸ਼ਿੰਗਾਰ


                  -ਬਹੁਗਿਣਤੀ ਕੈਂਸਰ ਪੀੜਤ ਮਰੀਜ ਮਾਲੀ ਮੱਦਦ ਤੋਂ ਵਾਂਝੇ-
                                                       ਇਕਬਾਲ ਸਿੰਘ ਸ਼ਾਂਤ
           ਲੰਬੀ-ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਦੇ ਮਰੀਜਾਂ ਲਈ 20 ਕਰੋੜ ਰੁਪਏ ਨਾਲ ਕਾਇਮ ਕੀਤਾ ਗਿਆ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਸਿਰਫ਼ ਸਰਕਾਰੀ ਸਟੇਜਾਂ ਤੋਂ ਤਕਰੀਰਾਂ ਰਾਹੀਂ ਸੂਬੇ ਦੀ ਸਿਆਸੀ ਫਿਜ਼ਾ ਦਾ ਸ਼ਿੰਗਾਰ ਬਣ ਰਿਹਾ ਹੈ, ਪਰ ਸੂਬੇ ਦੇ ਬਹੁਗਿਣਤੀ ਕੈਂਸਰ ਪੀੜਤ ਮਰੀਜ ਅੱਜ ਵੀ ਮਾਲੀ ਮੱਦਦ ਤੋਂ ਵਾਂਝੇ ਹਨ।
           ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਬੜੀ ਸੁਹਿਰਦਤਾ ਨਾਲ ਆਰੰਭੀ ਗਈ ਇਹ ਸਕੀਮ ਦਾ ਕੌੜਾ ਸੱਚ ਹੈ ਕਿ ਕੈਂਸਰ ਦੀ ਬੀਮਾਰੀ ਕਰਕੇ ਤਿੱਲ-ਤਿੱਲ ਮੌਤ ਵੱਲ ਵਧ ਰਹੇ ਮਰੀਜ ਪੰਜਾਬ ਸਰਕਾਰ ਅਤੇ ਕੈਂਸਰ ਦੇ ਹਸਪਤਾਲਾਂ ਦੀ ਲਾਲਫੀਤਾਸ਼ਾਹੀ ਦਾ ਸ਼ਿਕਾਰ ਹੋ ਰਹੇ ਹਨ। ਕਿਉਂਕਿ ਜਿੱਥੇ ਕੈਂਸਰ ਦੇ ਬੀਕਾਨੇਰ ਜਿਹੇ ਨਾਮੀ ਹਸਪਤਾਲਾਂ ਦੇ ਡਾਕਟਰ ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਮਰੀਜਾਂ ਲਈ ਜਾਰੀ ਫਾਰਮ ਨੂੰ ਮਨਜੂਰ ਨਹੀਂ ਕਰਦੇ, ਦੂਜੇ ਪਾਸੇ ਪੰਜਾਬ ਸਰਕਾਰ ਦਾ ਸੁਸਤ ਅਤੇ ਨਲਾਇਕ ਢਾਂਚਾ ਉਨ੍ਹਾਂ ਡਾਕਟਰਾਂ ਵੱਲੋਂ ਆਪਣੇ ਫਾਰਮਾਂ 'ਤੇ ਬਣਾਏ ਇਲਾਜ ਅੰਦਾਜ਼ਾ ਰਾਸ਼ੀ (ਐਸਟੀਮੇਟ) ਨੂੰ ਮੰਨਣ  ਨੂੰ ਤਿਆਰ ਨਹੀਂ।
              ਜਿਸਦਾ ਪ੍ਰਤੱਖ ਨਜ਼ਾਰਾ ਅੱਜ ਮੁੱਖ ਮੰਤਰੀ ਦੇ ਜੱਦੀ ਪਿੰਡ ਬਾਦਲ ਵਿਖੇ ਕੈਂਸਰ ਦੀ ਬੀਮਾਰੀ ਨੂੰ ਮੁੱਢਲੇ ਪੜਾਅ 'ਤੇ ਪਹਿਚਾਣਨ ਦੇ ਉਦੇਸ਼ ਨਾਲ 28 ਅਕਤੂਬਰ ਨੂੰ ਲਾਏ ਕੈਂਪ ਵਿਚ ਵੇਖਣ ਨੂੰ ਮਿਲਿਆ। ਜਿੱਥੇ ਸੂਬੇ ਦੇ ਵੱਖ-ਵੱਖ ਹਿੱਸਿਆਂ ਤੋਂ ਕੈਂਸਰ ਦੇ ਮਰੀਜ ਇਲਾਜ ਨਾਲੋਂ ਜ਼ਿਆਦਾ ਸਰਕਾਰੀ ਮਾਲੀ ਮੱਦਦ ਦੇ ਫਾਰਮ ਜਮ੍ਹਾ ਕਰਵਾਉਣ ਲਈ ਇਸ ਉਮੀਦ ਨਾਲ ਪੁੱਜੇ ਹੋਏ ਸਨ ਕਿ ਸ਼ਾਇਦ ਪਿੰਡ ਬਾਦਲ ਦੀ ਜੂਹ ਵਿਚ ਉਨ੍ਹਾਂ ਦੀ ਸੁਣਵਾਈ ਹੋ ਜਾਵੇ।
            ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਵਿਖੇ ਕੱਲ੍ਹ ਐਤਵਾਰ ਨੂੰ ਕੈਂਸਰ ਕੈਂਪ ਲੱਗਣ ਬਾਰੇ ਵੱਡੇ-ਵੱਡੇ ਅਖ਼ਬਾਰੀ ਇਸ਼ਤਿਹਾਰ ਪੜ੍ਹ ਕੇ ਪਹੁੰਚੇ ਕੈਂਸਰ ਦੇ ਮਾਰੇ ਲੋਕਾਂ ਦੀ ਅੱਖਾਂ ਵਿਚ ਜਿੱਥੇ ਸਰਕਾਰ ਪ੍ਰਤੀ ਰੋਸਾ ਸਪੱਸ਼ਟ ਝਲਕ ਰਿਹਾ ਸੀ, ਉਥੇ ਖੁੱਲ੍ਹੇ ਸ਼ਬਦਾਂ ਵਿਚ ਇਸ ਕੈਂਸਰ ਚੈੱਕਅਪ ਕੈਂਪ ਅਤੇ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਨੂੰ ਮਹਿਜ਼ ਸਿਆਸੀ ਛਲਾਵਾ ਕਰਾਰ ਦਿੱਤਾ।
ਗਿੱਦੜਬਾਹਾ ਸਰਵਾਇਕਲ ਕੈਂਸਰ ਨਾਲ ਪੀੜਤ ਪਤਨੀ ਕਾਂਤਾ ਰਾਣੀ ਨੂੰ ਵਿਖਾਉਣ ਲਈ ਕੈਂਪ ਵਿਚ ਪਵਨ ਕੁਮਾਰ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਪਤਨੀ ਨੂੰ ਕੈਂਸਰ ਹੋਣ 13 ਅਪਰੈਲ ਨੂੰ ਖੁਲਾਸਾ ਹੋਇਆ ਸੀ। ਮੌਜੂਦਾ ਸਮੇਂ 'ਚ ਪੀ.ਜੀ.ਆਈ. ਚੰਡੀਗੜ੍ਹ ਤੋਂ ਉਸ ਦੀ ਪਤਨੀ ਦਾ ਇਲਾਜ ਚੱਲ ਰਿਹਾ ਹੈ, ਜੋ ਕਿ ਬਹੁਤ ਮਹਿੰਗਾ ਹੈ। ਉਨ੍ਹਾਂ ਕਿਹਾ ਕਿ ਲਗਪਗ ਚਾਰ ਮਹੀਨੇ ਉਨ੍ਹਾਂ ਨੇ ਮੁੱਖ ਮੰਤਰੀ ਸ੍ਰੀ ਬਾਦਲ ਦੇ ਗਿੱਦੜਬਾਹਾ ਵਿਖੇ ਸੰਗਤ ਦਰਸ਼ਨ ਦੌਰਾਨ ਮੁੱਖ ਮੰਤਰੀ ਬਾਦਲ ਦੇ ਸਨਮੁੱਖ ਪੇਸ਼ ਹੋਣ ਉਪਰੰਤ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਪੀ.ਜੀ.ਆਈ. ਤੋਂ ਐਸਟੀਮੇਟ ਬਣਵਾ ਕੇ ਲਿਆਉਣ ਲਈ ਕਿਹਾ ਪਰ ਉਥੋਂ ਦੇ ਡਾਕਟਰ ਐਸਟੀਮੇਟ ਬਣਾਉਣ ਤੋਂ ਇਨਕਾਰੀ ਹਨ। ਉਨ੍ਹਾਂ ਦੱਸਿਆ ਕਿ ਉਹ ਹੁਣ ਤੱਕ ਇਲਾਜ 'ਤੇ 4-5 ਲੱਖ ਰੁਪਏ ਖਰਚ ਕਰ ਚੁੱਕਾ ਹੈ ਪਰ ਬਹੁਕਰੋੜੀ ਕੈਂਸਰ ਫੰਡ ਵਿਚੋਂ ਮੱਦਦ ਦੇ ਨਾਂਅ 'ਤੇ ਦਫ਼ਤਰਾਂ ਦੇ ਧੱਕਿਆਂ ਅਤੇ ਸਮੇਂ ਦੀ ਬਰਬਾਦੀ ਤੋਂ ਇਲਾਵਾ ਕੁਝ ਪੱਲੇ ਨਹੀਂ ਪਿਆ।
           ਕੁਝ ਅਜਿਹਾ ਹੀ ਹਾਲ ਗਿੱਦੜਬਾਹਾ ਵਿਖੇ ਸੁਨਿਆਰੇ ਦੇ ਕੰਮ ਨਾਲ ਜੁੜੇ ਬਲਵਿੰਦਰ ਸਿੰਘ ਦੀ ਪਤਨੀ ਹਰਪ੍ਰੀਤ ਕੌਰ ਵੀ ਬੱਚੇਦਾਨੀ ਦੇ ਕੈਂਸਰ ਨਾਲ ਪੀੜਤ ਹਨ। ਉਸਨੇ ਦੱਸਿਆ ਕਿ ਪੀ.ਜੀ.ਆਈ. ਚੰਡੀਗੜ੍ਹ ਦੇ ਡਾਕਟਰਾਂ ਵੱਲੋਂ ਐਸਟੀਮੇਟ ਨਾ ਲਿਖ ਕੇ ਦੇਣ ਕਰਕੇ ਉਸਨੇ ਸਰਕਾਰੀ ਮੱਦਦ ਤੋਂ ਪਹਿਲਿਆਂ ਹੀ ਤੌਬਾ ਕਰ ਲਈ ਅਤੇ ਹੁਣ ਆਪਣੇ ਪੱਲਿਓਂ ਜਾਂ ਰਿਸ਼ਤੇਦਾਰਾਂ ਦੀ ਮੱਦਦ ਨਾਲ 20-20 ਹਜ਼ਾਰ ਰੁਪਏ ਦੇ ਕੀਮੋ ਦੇ ਟੀਕੇ ਲਗਵਾ ਕੇ ਪਤਨੀ ਦਾ ਇਲਾਜ ਕਰ ਵਾ ਰਿਹਾ। ਇਸੇ ਤਰ੍ਹਾਂ ਮਾਨਸਾ ਜ਼ਿਲ੍ਹੇ ਦੇ ਪਿੰਡ ਧਰਮਪੁਰਾ ਦਾ ਖੇਤ ਮਜ਼ਦੂਰ ਬੁੱਧ ਰਾਮ, ਜੋ ਕਿ ਗਲੇ ਦੇ ਕੈਂਸਰ ਤੋਂ ਪੀੜਤ ਹਨ। ਉਸਦੀ ਪਤਨੀ ਨੇ ਜਗਮੇਘ ਕੌਰ ਨੇ ਦੱਸਿਆ ਕਿ ਉਸਦੇ ਘਰਵਾਲੇ ਦਾ ਬੀਕਾਨੇਰ ਤੋਂ ਇਲਾਜ ਚੱਲ ਰਿਹਾ ਹੈ। ਪਰ ਡਾਕਟਰ ਵੱਲੋਂ 70 ਹਜ਼ਾਰ ਰੁਪਏ ਦੇ ਐਸਟੀਮੇਟ ਦੇਣ ਦੇ ਬਾਵਜੂਦ ਥਾਂ-ਥਾਂ ਧੱਕੇ ਖਾਣ ਉਪਰੰਤ ਵੀ ਉਨ੍ਹਾਂ ਨੂੰ ਕੈਂਸਰ ਮਰੀਜਾਂ ਵਾਲੀ ਮੱਦਦ ਨਹੀਂ ਮਿਲ ਸਕੀ। ਉਸਨੇ ਦੱਸਿਆ ਗੁਜਾਰਾ ਤਾਂ ਪਹਿਲਾਂ ਹੀ ਔਖਾ ਸੀ ਤੇ ਹੁਣ ਬੀਮਾਰੀ ਨੇ ਜਿਉਂਦੀ ਜੀਅ ਮਾਰ ਘੱਤਿਆ ਹੈ।
              ਇਸੇ ਤਰ੍ਹਾਂ ਕੈਂਪ ਵਿਚ ਪਹੁੰਚੇ ਲੰਬੀ ਹਲਕੇ ਦੇ ਪਿੰਡ ਮਾਨ ਦੇ ਕਿਸਾਨ ਹਰਕੇਸ਼ ਸਿੰਘ ਨੇ ਦੱਸਿਆ ਕਿ ਉਸਦੀ ਪਤਨੀ ਨੂੰ ਪੰਜ ਸਾਲ ਪਹਿਲਾਂ ਛਾਤੀ ਦਾ ਕੈਂਸਰ ਹੋਇਆ ਸੀ ਤੇ ਛਾਤੀ ਕਟਵਾ ਦਿੱਤੀ ਪਰ ਹੁਣ ਕੈਂਸਰ ਨੇ ਮੁੜ ਪੈਰ ਪਸਾਰ ਕੇ ਉਸਦੀ ਪਤਨੀ ਦੇ ਫੇਫੜਿਆਂ ਅਤੇ ਲੀਡਰ 'ਤੇ ਹਮਲਾ ਬੋਲ ਦਿੱਤਾ ਹੈ। ਜ਼ਿੰਦਗੀ ਦੀਆਂ ਡੂੰਘੀਆਂ ਉਦਾਸੀਆਂ ਵਿਚੋਂ ਲੰਘ ਰਹੇ ਹਰਕੇਸ਼ ਸਿੰਘ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਫਾਈਲ ਭਰਨ ਦੇ ਬਾਵਜੂਦ ਕੋਈ ਕੈਂਸਰ ਰਾਹਤ ਮੱਦਦ ਹਾਸਲ ਹੋ ਸਕੀ।
             ਇੱਕ ਮਰੀਜ ਨਾਲ ਪੁੱਜੇ ਮਹਿੰਦਰ ਸਿੰਘ ਨਾਂ ਦੇ ਵਿਅਕਤੀ ਨੇ ਦੱਸਿਆ ਕਿ ਕੈਂਸਰ ਰਾਹਤ ਫੰਡ ਤਾਂ ਵਿਧਾਨਸਭਾ ਚੋਣਾਂ ਵਿਚ ਸਰਕਾਰ ਵੱਲੋਂ ਆਪਣੀ ਕੁਰਸੀ ਨੂੰ ਦੁਹਰਾਉਣ ਲਈ ਪ੍ਰਚਾਰਿਆ ਜਾ ਰਿਹਾ ਜਦਕਿ ਅਸਲ ਵਿਚ ਇਹ ਵੀ ਫੋਕਾ ਸਿਆਸੀ ਨਾਅਰਾ ਬਣ ਕੇ ਰਹਿ ਗਿਆ ਹੈ। ਜਦੋਂ ਕਿ ਕੁਝ ਮਹੀਨੇ ਪਹਿਲਾਂ ਇਹ ਕੈਂਸਰ ਮਰੀਜਾਂ ਲਈ ਜ਼ਿੰਦਗੀ ਦੀ ਚਮਕ ਬਣ ਕੇ ਬਹੁੜਿਆ ਸੀ। ਇਸੇ ਤਰ੍ਹਾਂ ਬੱਚੇਦਾਨੀ ਦੇ ਕੈਂਸਰ ਨਾਲ ਪੀੜਤ ਬਰਨਾਲਾ ਜ਼ਿਲ੍ਹੇ ਦੇ ਪਿੰਡ ਕੱਟੂ ਦੀ ਜਸਪਾਲ ਕੌਰ ਦੇ ਧੀ ਪਰਮਜੀਤ ਕੌਰ ਨੇ ਦੱਸਿਆ ਕਿ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ ਦੀ ਮੱਦਦ ਵੀ ਉਨ੍ਹਾਂ ਦੀ ਮਾਂ ਲਈ ਬੇਮਾਇਨੇ ਸਾਬਤ ਹੋ ਰਹੀ ਹੈ। ਬੀਕਾਨੇਰ 'ਚ ਡਾਕਟਰ ਐਸਟੀਮੇਟ ਲਿਖ ਕੇ ਨਹੀਂ ਦਿੰਦੇ ਤੇ ਇਥੋਂ ਦੇ ਹਾਕਮਾਂ ਕੋਲ ਗਰੀਬਾਂ ਦੀ ਸੁਣਨ ਲਈ ਸ਼ਾਇਦ ਸਮਾਂ ਨਹੀਂ।
           ਪੱਤਰਕਾਰਾਂ ਵੱਲੋਂ ਮੁੱਖ ਮੰਤਰੀ ਕੋਲ ਮਾਮਲਾ ਉਠਾਇਆ ਗਿਆ ਅਤੇ ਉਨ੍ਹਾਂ ਰਵਾਇਤੀ ਸੁਭਾਅ ਵਿਚ ਅਧਿਕਾਰੀਆਂ ਨੂੰ ਤੁਰੰਤ ਕਾਰਵਾਈ ਦੇ ਨਿਰਦੇਸ਼ ਦਿੱਤੇ ਪਰ ਵਿਧਾਨਸਭਾ ਚੋਣਾਂ ਕਰਕੇ ਹੋਰ ਵਿਉਂਤਬੰਦੀਆਂ ਕੈਂਸਰ ਪੀੜਤਾਂ ਦਾ ਦੁੱਖ ਦਰਦ ਅਜੇ ਘਟਦਾ ਨਜ਼ਰ ਨਹੀਂ ਆ ਰਿਹਾ। ਮੁਕਸਤਰ ਦੇ ਸਿਵਲ ਸਰਜਨ ਡ: ਗੁਰਦੀਪ ਸਿੰਘ ਭੁੱਲਰ ਨੇ ਦੱਸਿਆ ਕਿ ਅੱਜ 75 ਕੈਂਸਰ ਮਰੀਜਾਂ ਦੇ ਫਾਰਮ ਭਰਵਾਏ ਗਏ ਹਨ। ਜਿਨ੍ਹਾਂ 'ਤੇ ਕਾਰਵਾਈ ਕਰਕੇ ਅਗਾਮੀ ਕਾਰਵਾਈ ਲਈ ਮੁੱਖ ਮੰਤਰੀ ਦਫ਼ਤਰ ਭੇਜਿਆ ਜਾਵੇਗਾ।

              
                 ਕੈਂਸਰ ਚੈੱਕਅਪ ਕੈਂਪ 'ਚ ਮਰੀਜ ਇੱਧਰ-ਉੱਟਕਦੇ ਰਹੇ
-ਡੇਢ ਵਜੇ ਪੰਡਾਲ ਖਾਲੀ ਕਰਕੇ ਚੱਲਦੇ ਬਣੇ ਬਹੁਤੇ ਡਾਕਟਰ
-ਮਰੀਜਾਂ ਨੂੰ ਅਲਟਰਾਸਾਉਂਡ ਲਈ ਮਲੋਟ-ਬਠਿੰਡਾ ਜਾਣਾ ਪਿਆ
ਲੰਬੀ-ਮੁੱਖ ਮੰਤਰੀ ਦੇ ਪਿੰਡ ਬਾਦਲ 'ਚ 28 ਅਕਤੂਬਰ ਨੂੰ  ਲੱਗੇ ਕੈਂਸਰ ਚੈੱਕਅਪ ਕੈਂਪ ਵਿਚ ਮਰੀਜ ਪ੍ਰਸ਼ਾਸਨਿਕ ਪ੍ਰਬੰਧਾਂ ਦੀ ਘਾਟ ਕਰਕੇ ਇੱਧਰ-ਉੱਧਰ ਭਟਕਦੇ ਰਹੇ। ਜਦੋਂ ਕਿ ਦੁਪਿਹਰ 3 ਵਜੇ ਤੱਕ ਚੱਲਣ ਵਾਲੇ ਕੈਂਪ 'ਚ ਕੈਂਸਰ ਮਰੀਜਾਂ ਵਾਲੇ ਪੰਡਾਲ ਵਿਚੋਂ ਵਧੇਰੇ ਡਾਕਟਰ  ਡੇਢ ਵਜੇ ਹੀ ਆਪਣਾ ਬੋਰੀਆ ਬਿਸਤਰਾ ਚੁੱਕ ਕੇ ਲੈ ਗਏ।
ਸਰਕਾਰ ਵੱਲੋਂ ਖੂਬ ਪ੍ਰਚਾਰੇ ਗਏ ਇਸ ਕੈਂਪ ਵਿਚ ਜਿੱਥੇ 939 ਮਰੀਜ ਪੁੱਜੇ ਪਰ ਕੈਂਸਰ ਦੇ ਮਰੀਜਾਂ ਦਾ ਦੋਸ਼ ਸੀ ਕਿ ਮੁੱਖ ਮੰਤਰੀ ਦੇ ਪਿੰਡ ਵੀ ਲਇਆ ਇਹ ਕੈਂਪ ਇੱਕ ਸਧਾਰਨ ਕੈਂਪ ਸਾਬਤ ਹੋਇਆ, ਜਿੱਥੇ ਸਰਕਾਰ ਵੱਲੋਂ ਅਲਟਰਾਸਾਊਂਡ ਦੀ ਸਹੂਲਤ ਵੀ ਮੁਹੱਈਆ ਨਹੀਂ ਕਰਵਾਈ ਗਈ ਤੇ ਕੈਂਸਰ ਦੇ ਕਾਫ਼ੀ ਮਰੀਜ ਡਾਕਟਰਾਂ ਦੇ ਕਹਿਣ ਅਨੁਸਾਰ ਅਲਟਰਾ ਸਾਊਂਡ ਲਈ ਮਲੋਟ ਜਾਂ ਬਠਿੰਡਾ ਜਾਂਦੇ ਵੇਖੇ ਗਏ।
ਸੁਖਜੀਤ ਕੌਰ ਵਾਸੀ ਮਲੋਟ ਨੇ ਦੱਸਿਆ ਕਿ ਬੱਚੇਦਾਨੀ ਵਿਚ ਕੈਂਸਰ ਹੈ। ਉਸਨੇ ਦੱਸਿਆ ਕਿ ਬੱਚੇਦਾਨੀ ਤਾਂ ਕਢਵਾ ਦਿੱਤੀ ਪਰ ਹੁਣ ਲੱਤਾਂ-ਬਾਹਾਂ ਵਿਚ ਬਹੁਤ ਦਰਦ ਹੁੰਦਾ ਹੈ ਅਤੇ ਢੂਈ ਦੁਖਦੀ ਹੈ। ਉਨ੍ਹਾਂ ਕੈਂਪ ਵਿਚ ਬੜੀ ਆਸ ਨਾਲ ਆਏ ਸਨ ਅਤੇ ਪਰ ਇੱਥੋਂ ਡਾਕਟਰਾਂ ਨੇ ਅਲਟਰਾ ਸਾਊਂਡ ਬਾਰੇ ਕਹਿ ਕੇ ਮੁਸ਼ਕਿਲਾਂ ਨੂੰ ਹੋਰ ਵਧਾ ਦਿੱਤਾ। ਉਨ੍ਹਾਂ ਕਿਹਾ ਕਿ ਜਦੋਂ ਬਾਦਲ ਦੇ ਸਿਵਲ ਹਸਪਤਾਲ ਅਲਟਰਾਸਾਊਂਡ ਕਰਵਾਉਣ ਗਏ ਤਾਂ ਉਥੋਂ ਅਲਟਰਾਸਾਊਂਡ 'ਤੇ ਕੋਈ ਕਰਮਚਾਰੀ ਗਾਇਬ ਸੀ। ਇਸੇ ਤਰ੍ਹਾਂ ਬਾਅਦ ਦੁਪਿਹਰ ਲਗਭਗ ਡੇਢ ਵਜੇ ਮੁੜ ਤੋਂ ਕੈਂਪ ਪੁੱਜੇ ਪੱਤਰਕਾਰਾਂ ਨੇ ਵੇਖਿਆ ਤਾਂ ਕੈਂਸਰ ਮਰੀਜਾਂ ਵਾਲੇ ਪੰਡਾਲ ਨੰਬਰ 8 ਵਿਚੋਂ ਡਾਕਟਰ ਗਾਇਬ ਸਨ। ਜਦੋਂ ਕਿ ਮਰੀਜ ਖਾਲੀ ਪੰਡਾਲ ਵੇਖ-ਵੇਖ ਕੇ ਵਾਪਸ ਮੁੜ ਰਹੇ ਸਨ। ਪੱਰਤਾਕਾਰਾਂ ਨੂੰ ਫੋਟੋਆਂ ਖਿੱਚਦੇ ਵੇਖ ਸਿਹਤ ਵਿਭਾਗ ਦੇ ਅਧਿਕਾਰੀਆਂ ਨੇ ਇੱਕ ਹੋਰ ਡਾਕਟਰ ਨੂੰ ਪੰਡਾਲ 'ਚ ਬਿਠਾਇਆ।
ਮੁਕਤਸਰ ਤੋਂ ਆਏ ਕੈਂਸਰ ਦੇ ਮਰੀਜ ਦੇ ਰਿਸ਼ਤੇਦਾਰਾਂ ਨੇ ਦੱਸਿਆ ਕਿ ਉਹ ਇੱਥੇ ਚੰਗੇ ਇਲਾਜ ਲਈ ਆਏ ਸਨ ਪਰ ਡਾਕਟਰਾਂ ਨੇ ਪਰਚੀ 'ਤੇ ਲਿਖ ਕੇ ਮੁਕਤਸਰ ਆ ਕੇ ਵਿਖਾਉਣ ਦਾ ਫੁਰਮਾਨ ਸੁਣਾ ਦਿੱਤਾ।
ਇਸੇ ਤਰ੍ਹਾਂ ਪਿੰਡ ਕੱਖਾਂਵਾਲੀ ਦੀਆਂ ਤਿੰਨ ਔਰਤਾਂ ਜਗਦੀਪ ਕੌਰ, ਹਰਬੰਸ ਕੌਰ ਅਤੇ ਅਮਨਦੀਪ ਕੌਰ ਨੇ ਕੈਂਪ ਵਿਖ ਖੱਜਲ ਖੁਆਰੀ ਦੇ ਦੋਸ਼ ਲਾਏ। ਇਸ ਕੈਂਪ ਵਿਚ ਭਾਵੇਂ 939 ਮਰੀਜਾਂ ਦੀ ਜਾਂਚ ਦਾ ਅੰਕੜਾ ਵਿਖਾਇਆ ਗਿਆ ਹੈ  ਪਰ ਮਰੀਜਾਂ ਨਾਲੋਂ ਜ਼ਿਆਦਾ ਨਰਸਾਂ ਅਤੇ ਫਾਰਮਾਸਿਸਟਾਂ ਦੀ ਭੀੜ ਵੱਧ ਵਿਖਾਈ ਗਈ ਸੀ।
ਇਸ ਪੂਰੇ ਕੈਂਪ ਦੌਰਾਨ ਰੋਕੋ ਕੈਂਸਰ ਦੀ ਟੀਮ ਡਾ: ਧਰਮਿੰਦਰ ਸਿੰਘ ਢਿੱਲੋਂ ਦੀ ਅਗਵਾਈ ਹੇਠ ਬੜੀ ਤਨਦੇਹੀ ਨਾਲ ਮਰੀਜਾਂ ਦੀ ਜਾਂਚ ਵਿਚ ਲੱਗੀ ਰਹੀ। ਜਿਨ੍ਹਾਂ ਵੱਲੋਂ 31 ਮਰੀਜਾਂ ਦੀ ਮੈਮੋਗ੍ਰਾਫ਼ੀ ਕੀਤੀ ਗਈ। ਜਦੋਂਕਿ ਕੈਂਸਰ ਦੇ 12 ਮਰੀਜਾਂ ਦੀ ਸ਼ਨਾਖਤ ਕੀਤੀ ਗਈ ਜਿਨ੍ਹਾਂ ਵਿਚੋਂ 6 ਨੂੰ ਤੁਰੰਤ ਇਲਾਜ ਦੀ ਜ਼ਰੂਰਤ ਹੈ।
ਇਸ ਬਾਰੇ ਸੰਪਰਕ ਕਰਨ 'ਤੇ ਮੁਕਤਸਰ ਦੇ ਸਿਵਲ ਡਾ: ਗੁਰਦੀਪ ਸਿੰੰਘ ਭੁੱਲਰ ਅਨੁਸਾਰ ਕੈਂਪ ਦੇ ਸਮੇਂਂ ਤਿੰਨ ਵਜੇ ਤੱਕ ਡਾਕਟਰ ਡਿਉਟੀ 'ਤੇ ਤਾਇਨਾਤ ਰਹੇ । ਉਨ੍ਹਾਂ ਦੱਸਿਆ ਕਿ ਵੱਖ-ਵੱਖ ਬੀਮਾਰੀਆਂ ਦੇ 939 ਮਰੀਜਾਂ ਨੇ ਜਾਂਚ ਕਰਵਾਈ। ਉਨ੍ਹਾਂ ਦਾਅਵਾ ਕੀਤਾ ਕਿ ਕੈਂਪ ਬੇਹੱਦ ਸਫ਼ਲ ਰਿਹਾ ਅਤੇ 31 ਮਰੀਜਾਂ ਦੀ ਮੈਮੋਗ੍ਰਾਫ਼ੀ ਅਤੇ ਕੈਂਪ 57 ਮਰੀਜਾਂ ਦੀ ਪੈਪ ਸਮੀਅਰ ਕੀਤੀ ਗਈ।



ਅਵਾਮ ਨੂੰ ਬੀਮਾਰੀ ਤੋਂ ਬਚਾਉਣ ਲਈ ਹਰ ਮਨੁੱਖ ਦੀ ਲਾਮਜੀ ਸਿਹਤ ਜਾਂਚ ਤੇ ਸਿਹਤ ਬੀਮਾ ਸਮੇ ਦੀ ਜ਼ਰੂਰਤ : ਬਾਦਲ
ਲੰਬੀ-ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਅਜੋਕੇ ਮਾਹੌਲ ਵਿਚ ਬੀਮਾਰੀਆਂ ਦੇ ਵਧਦੇ ਜਾਲ ਬਾਰੇ ਪੰਜਾਬ ਦੇ ਅਵਾਮ ਨੂੰ ਸਿਹਤ ਪੱਖੋਂ ਸੁਚੇਤ ਕਰਨ ਅਤੇ ਬਚਾਉਣ ਲਈ ਹਰ ਮਨੁੱਖ ਦੀ ਸਮੇਂ-ਸਮੇਂ 'ਤੇ ਲਾਜਮੀ ਡਾਕਟਰੀ ਜਾਂਚ ਅਤੇ ਸਿਹਤ ਬੀਮਾ ਸਮੇਂ ਦੀ ਜ਼ਰੂਰਤ ਹੈ। ਜਿਸ ਲਈ ਪੰਜਾਬ ਸਰਕਾਰ ਵੱਲੋਂ ਇਸ ਬਾਰੇ ਪੂਰੀ ਘੋਖ ਉਪਰੰਤ ਕਿਸੇ ਠੋਸ ਨੀਤੀ ਨੂੰ ਅਮਲੀਜਾਮਾ ਪਹਿਨਾਉਣ ਦੀ ਤਜਵੀਜ਼ ਹੈ।
        ਉਹ ਆਪਣੇ ਜੱਦੀ ਪਿੰਡ ਬਾਦਲ ਵਿਖੇ ਕੈਂਸਰ ਦੀ ਮੁੱਢਲੀ ਜਾਂਚ ਅਤੇ ਜਾਗਰੂਕਤਾ ਸਬੰਧੀ ਰਾਜ ਪੱਧਰੀ ਮੁਹਿੰਮ ਤਹਿਤ ਲੱਗੇ ਕੈਂਪ ਦਾ ਉਦਘਾਟਨ ਕਰਨ ਉਪਰੰਤ ਇੱਕ ਸਮਾਗਮ ਨੂੰ ਸੰਬੋਧਨ ਕਰ ਰਹੇ ਸਨ।
          ਉਨ੍ਹਾਂ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਵਿਸ਼ਵ ਵਿਆਪੀ ਹੈ ਅਤੇ ਇਸਦੇ ਫੈਲਣ ਦੇ ਅਸਲ ਕਾਰਨਾਂ ਸਬੰਧੀ ਹਾਲੇ ਵੀ ਖੋਜ ਜਾਰੀ ਹੈ। ਪਰ ਪੰਜਾਬ ਸਰਕਾਰ ਦੇਸ਼ ਦੀ ਪਹਿਲੀ ਰਾਜ ਸਰਕਾਰ ਹੈ ਜਿਸ ਨੇ ਕੈਂਸਰ ਦੀ ਨਾਮੁਰਾਦ ਬੀਮਾਰੀ ਦੇ ਸ਼ਿਕਾਰ ਮਰੀਜਾਂ ਦੀ ਮਾਲੀ ਮਦਦ ਲਈ ਲਈ ਰਾਜ ਵਿਚ 20 ਕਰੋੜ ਰੁਪਏ ਦਾ ਮੁੱਖ ਮੰਤਰੀ ਕੈਂਸਰ ਰਾਹਤ ਫੰਡ  ਸਥਾਪਿਤ ਕੀਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਅਗਲੇ ਵਰ੍ਹੇ ਇਸ ਰਾਹਤ ਫੰਡ ਨੂੰ ਵਧਾ ਕੇ 100 ਕਰੋੜ ਰੁਪਏ ਕੀਤਾ ਜਾਵੇਗਾ। ਉਨ੍ਹਾਂ ਲੋਕਾਂ ਨੂੰ ਵੀ ਅਪੀਲ ਕੀਤੀ ਕਿ ਉਹ ਆਪਣੀ ਸਿਹਤ ਪ੍ਰਤੀ ਜਾਗਰੁਕ ਹੋਣ ਅਤੇ ਸਾਲ ਵਿਚ ਘੱਟੋ ਘੱਟ ਇਕ ਵਾਰ ਆਪਣਾ ਮੈਡੀਕਲ ਚੈਕਅੱਪ ਕਰਵਾਉਣ ਦੀ ਕੋਸ਼ਿਸ ਕਰਿਆ ਕਰਨ। ਉਨ੍ਹਾਂ ਮੌਜੂਦ ਸਿਹਤ ਵਿਭਾਗ ਦੇ ਉੱਚ ਅਧਿਕਾਰੀਆਂ ਨੂੰ ਸਿਹਤ ਬੀਮਾ ਅਤੇ ਸਿਹਤ ਦੀ ਲਾਜਮੀ ਜਾਂਚ ਬਾਰੇ ਠੋਸ ਨੀਤੀ ਬਾਰੇ ਘੋਖ ਕਰਨ ਦੇ ਨਿਰਦੇਸ਼ ਵੀ ਦਿੱਤੇ।
          ਕੈਂਸਰ ਦੀ ਬੀਮਾਰੀ ਹੱਥੋਂ ਆਪਣੇ ਪਿਤਾ ਸ: ਰਘੁਰਾਜ ਸਿੰਘ ਬਾਦਲ, ਪਤਨੀ ਬੀਬੀ ਸੁਰਿੰਦਰ ਕੌਰ ਬਾਦਲ ਅਤੇ ਚਾਚਾ ਸ: ਗੁਰਰਾਜ ਸਿੰਘ ਨੂੰ ਗੁਆ ਚੁੱਕੇ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਬੜੀ ਸੁਹਿਰਦਤਾ ਨਾਲ ਕਿਹਾ ਕਿ ਇਹ ਨਾਮੁਰਾਦ ਬੀਮਾਰੀ ਦੇ ਕਹਿਰ ਤੋਂ ਮੇਰਾ ਪਰਿਵਾਰ ਵਾਂਝਾ ਨਹੀਂ ਰਿਹਾ ਹੈ ਅਤੇ ਭਾਵੇਂ ਅਜੇ ਤੱਕ ਕੈਂਸਰ ਦੀ ਬੀਮਾਰੀ ਦੇ ਅਸਲ ਕਾਰਨ ਦੀ ਸੂਹ ਨਹੀਂ ਲਾਈ ਜਾ ਸਕੀ ਹੈ, ਪਰ ਪੰਜਾਬ ਸਰਕਾਰ ਸੂਬੇ ਦੇ ਅਵਾਮ ਨੂੰ ਕੈਂਸਰ ਦੀ ਭਿਅੰਕਰ ਬੀਮਾਰੀ ਤੋਂ ਬਚਾਉਣ ਲਈ ਵਚਨਬੱਧ ਹੈ। ਜਿਸਦੇ ਤਹਿਤ ਸੂਬੇ ਵਿਚ ਅਗਲੇ ਤਿੰਨ ਮਹੀਨਿਆਂ ਵਿਚ ਪੰਜਾਬ ਭਰ ਵਿਚ ਅਜਿਹੇ 300 ਕੈਂਪ ਲਗਾਏ ਜਾਣਗੇ। ਜ਼ਿਨ੍ਹਾਂ ਵਿਚ ਪੰਜਾਬ ਸਰਕਾਰ ਵੱਲੋਂ ਕੈਂਸਰ ਦੀ ਰੋਕਥਾਮ ਲਈ ਚੁੱਕੇ ਗਏ ਕਦਮਾਂ ਸੰਬੰਧੀ ਲੋਕਾਂ ਵਿਚ ਜਾਗਰੁਕਤਾ ਪੈਦਾ ਕਰਨ ਅਤੇ ਮੌਕੇ 'ਤੇ ਹੀ ਕੈਂਸਰ ਦੀ ਮੁੱਢਲੀ ਜਾਂਚ ਦੇ ਟੈਸਟ ਮੁਫ਼ਤ ਕੀਤੇ ਜਾਣਗੇ। ਜ਼ਿਨ੍ਹਾਂ ਵਿਚ ਮੈਮੋਗ੍ਰਾਫੀ ਅਤੇ ਪੈਪ ਸਮੀਅਰ ਟੈਸਟ ਦੀ ਸੁਵਿਧਾ ਸ਼ਾਮਿਲ ਹੈ। ਮੁੱਖ ਮੰਤਰੀ ਨੇ ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ ਰੋਕੋ ਕੈਂਸਰ ਵੱਲੋਂ ਕੈਂਸਰ ਵਿਰੁੱਧ ਵਿੱਢੀ ਮੁਹਿੰਮ ਦੀ ਖੁੱਲ੍ਹਦਿਲੀ ਨਾਲ ਸ਼ਲਾਘਾ ਕੀਤੀ।
             ਸ੍ਰੀ ਬਾਦਲ ਨੇ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਦੇ ਇਲਾਜ ਲਈ ਪੰਜਾਬ ਵਿਚ ਮੁਹਾਲੀ ਅਤੇ ਬਠਿੰਡਾ ਵਿਚ ਦੋ ਨਵੇਂ ਮਲਟੀ ਸਪੈਸਲਟੀ ਹਸਪਤਾਲ ਸਥਾਪਿਤ ਕੀਤੇ ਗਏ ਹਨ। ਇਸਤੋਂ ਬਿਨ੍ਹਾਂ ਤਿੰਨਾਂ ਮੈਡੀਕਲ ਕਾਲਜਾਂ ਫਰੀਦਕੋਟ, ਸ੍ਰੀ ਅਮ੍ਰਿਤਸਰ ਸਾਹਿਬ ਅਤੇ ਪਟਿਆਲਾ ਵਿਚ ਵੀ ਇਸ ਦੇ ਇਲਾਜ ਲਈ ਸੁਵਿਧਾ ਦਿੱਤੀ ਗਈ ਹੈ। ਉਨ੍ਹਾਂ ਕਿਹਾ ਕਿ ਕੈਂਸਰ ਦੀ ਬਿਮਾਰੀ ਦਾ ਪਹਿਲੀ ਸਟੇਜ 'ਤੇ ਹੀ ਪਤਾ ਲੱਗ ਜਾਵੇ ਤਾਂ ਇਲਾਜ ਸੰਭਵ ਹੈ ਇਸ ਲਈ ਸਰਕਾਰ ਨੇ ਮੁੱਢਲੀ ਸਟੇਜ 'ਤੇ ਹੀ ਕੈਂਸਰ ਦੀ ਬਿਮਾਰੀ ਦਾ ਪਤਾ ਲਗਾਉਣ ਅਤੇ ਕੈਂਸਰ ਦੇ ਮਰੀਜਾਂ ਦੀ ਪੰਜਾਬ ਵਿਚ ਅਸਲ ਗਿਣਤੀ ਦਾ ਪਤਾ ਲਗਾਉਣ ਲਈ ਇਹ ਮੁਹਿੰਮ ਸ਼ੁਰੂ ਕੀਤੀ ਹੈ।
ਇਸ ਤੋਂ ਬਾਅਦ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਸ: ਬਾਦਲ ਨੇ ਕਿਹਾ ਕਿ ਕਾਂਗਰਸ ਦੀਆਂ ਗਲਤ ਨੀਤੀਆਂ ਕਾਰਨ ਸਾਡੇ ਮੁਲਕ ਵਿਚ ਕੇਂਦਰ ਸਰਕਾਰ ਕੋਲ ਹੀ ਸਾਰੀਆਂ ਵਿੱਤੀ ਸ਼ਕਤੀਆਂ ਹਨ ਅਤੇ ਰਾਜ ਸਰਕਾਰਾਂ ਕੋਲ ਆਮਦਨ ਦੇ ਬਹੁਤ ਘੱਟ ਵਸੀਲੇ ਹਨ। ਜਿਸ ਕਾਰਨ ਰਾਜ ਸਰਕਾਰਾਂ ਚਾਹ ਕੇ ਵੀ ਸਿਹਤ ਆਦਿ ਵਰਗੀਆਂ ਜਰੂਰੀ ਸੇਵਾਵਾਂ  ਉਪਲਬੱਧ ਕਰਵਾਉਣ ਲਈ ਸੀਮਤ ਸਾਧਨ ਹੀ ਖਰਚ ਕਰ ਸਕਦੀਆਂ ਹਨ। ਪਰ ਫਿਰ ਵੀ ਪੰਜਾਬ ਸਰਕਾਰ ਬੇਹਤਰ ਸਿਹਤ ਸਹੁਲਤਾਂ ਲੋਕਾਂ ਨੂੰ ਉਪਲਬੱਧ ਕਰਵਾਉਣ ਲਈ ਵਚਨਬੱਧ ਹੈ। ਉਨ੍ਹਾਂ ਕਿਹਾ ਕਿ ਪੰਜਾਬ ਸਰਕਾਰ ਵੱਲੋਂ ਭੇਜੇ ਜਾਂਦੇ ਪ੍ਰੋਜੈਕਟਾਂ ਪ੍ਰਤੀ ਵੀ ਕੇਂਦਰ ਸਰਕਾਰ  ਦਾ ਰਵਈਆਂ ਨਾਂਹ ਪੱਖੀ ਹੀ ਹੁੰਦਾ ਹੈ।
          ਇਸ ਮੌਕੇ ਡਾ. ਐਸ. ਐਸ. ਗਿੱਲ ਉਪ ਕੁਲਪਤੀ ਬਾਬਾ ਫਰੀਦ ਯੂਨੀਵਰਸਿਟੀ ਆਫ ਹੈਲਥ ਸਾਇੰਸਜ਼ ਫਰੀਦਕੋਟ ਨੇ ਆਪਣੇ ਵਿਚਾਰ ਪ੍ਰਗਟ ਕਰਦਿਆਂ ਕਿਹਾ ਕਿ ਫਰੀਦਕੋਟ ਯੂਨੀਵਰਸਿਟੀ ਵਿਖੇ ਕੈਂਸਰ ਦੇ ਮਰੀਜਾਂ ਦੇ ਇਲਾਜ ਲਈ ਵਿਸੇਸ਼ ਸੈਲ ਸਥਾਪਿਤ ਕੀਤਾ ਗਿਆ ਹੈ ਜਿੱਥੇ ਮਰੀਜਾਂ ਨੂੰ ਮੁਫ਼ਤ ਟੈਸਟ ਅਤੇ ਮੁਫ਼ਤ ਇਲਾਜ ਮੁਹਈਆ ਕਰਵਾਇਆ ਜਾ ਰਿਹਾ ਹੈ।
ਇਸ ਮੌਕੇ ਡਾ: ਜੇ.ਪੀ. ਸਿੰਘ ਡਾਇਰੈਕਟਰ ਸਿਹਤ ਸੇਵਾਵਾਂ ਪੰਜਾਬ ਨੇ ਕਿਹਾ ਕਿ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਵਿਚ ਵੀ ਕੈਂਸਰ ਰਾਹਤ ਫੰਡ ਵਿਚੋਂ ਸਹਾਇਤਾ ਲੈਣ ਲਈ ਮਰੀਜ਼ ਅਰਜੀ ਸਿਵਲ ਸਰਜਨ ਦਫ਼ਤਰ ਵਿਚ ਦੇ ਸਕਦੇ ਹਨ। ਉਨ੍ਹਾਂ ਦੱਸਿਆ ਕਿ ਅੱਜ ਦੇ ਇਸ ਮੁੱਢਲੀ ਜਾਂਚ ਕੈਂਪ  ਵਿਚ 1 ਹਜ਼ਾਰ ਤੋਂ ਵਧੇਰੇ ਮਰੀਜਾਂ ਦੀ ਰਜਿਸਟਰੇਸ਼ਨ ਹੋਈ ਹੈ।
              ਇਸ ਮੌਕੇ ਰੋਕੋ ਕੈਂਸਰ ਦੇ ਪੰਜਾਬ ਇੰਚਾਰਜ਼ ਧਰਮਿੰਦਰ ਸਿੰਘ ਢਿੱਲੋਂ ਨੇ ਦੱਸਿਆ ਕਿ ਮੁੱਢਲੀ ਜਾਂਚ ਲਈ ਬਣਾਈ ਮੋਬਾਇਲ ਕੈਂਸਰ ਰੋਕੋ ਵੈਨ ਵੱਲੋਂ 365 ਮਰੀਜਾਂ ਦੇ ਛਾਤੀ ਦੇ ਕੈਂਸਰ ਦੀ ਜਾਂਚ ਕੀਤੀ ਗਈ। ਜਿਨ੍ਹਾਂ ਵਿਚੋਂ 31 ਦੀ ਮੈਮੇਗਰਾਫ਼ੀ ਕੀਤੀ ਗਈ। ਉਨ੍ਹਾਂ ਦੱਸਿਆ ਕਿ 12 ਮਰੀਜ ਸ਼ੱਕੀ ਪਾਏ ਗਏ।
            ਹੋਰਨਾਂ ਤੋਂ ਇਲਾਵਾ ਡਿਪਟੀ ਕਮਿਸ਼ਨਰ ਅਰਸ਼ਦੀਪ ਸਿੰਘ ਥਿੰਦ, ਮਾਰਕਫੱੈਡ ਦੇ ਨਿਰਦੇਸ਼ਕ ਚੇਅਰਮੈਨ ਤੇਜਿੰਦਰ ਸਿੰਘ ਮਿੱਡੂਖੇੜਾ, ਜ਼ਿਲਾ ਵਿਕਾਸ ਬੋਰਡ ਦੇ ਚੇਅਰਮੈਨ ਹਰਮੀਤ ਸਿੰਘ ਭੀਟੀਵਾਲਾ, ਬਲਕਰਨ ਸਿੰਘ ਬੱਲਾ ਨਿੱਜੀ ਸਕੱਤਰ ਮੁੱਖ ਮੰਤਰੀ, ਰੋਕੋ ਕੈਂਸਰ ਦੇ ਪੰਜਾਬ ਇੰਚਾਰਜ਼ ਧਰਮਿੰਦਰ ਸਿੰਘ ਦਿਓਲ, ਗੁਰਦੀਪ ਸਿੰਘ ਭੁੱਲਰ ਸਿਵਲ ਸਰਜਨ, ਬਲਬੀਰ ਸਿੰਘ ਐਸ. ਡੀ. ਐਮ. ਮਲੋਟ ਅਤੇ ਰਾਕੇਸ਼ ਢੀਂਗੜਾ, ਡਾ: ਰੀਟਾ ਗੁਪਤਾ ਵੀ ਮੌਜੂਦ ਸਨ।

27 October 2011

'ਮੋਇਆਂ' ਦੀ ਦੀਵਾਲੀ

                                                          -ਇਕਬਾਲ ਸਿੰਘ ਸ਼ਾਂਤ-
    ਕੀ ਇਹ ਉਹ ਦੀਵਾਲੀ ਹੈ ? ਸ਼ਾਇਦ ਨਹੀਂ! ਕਿਉਂਕਿ ਜਿਹੜੀ ਦੀਵਾਲੀ ਦੀ ਚਾਹਤ ਇੱਕ ਜਿਉਂਦੀ ਜਾਗਦੀ ਜਮੀਰ ਵਾਲਾ ਸਮਾਜ ਕਰ ਸਕਦਾ ਹੈ ਇਹ ਉਹ ਤਾਂ ਕਿਸੇ ਕੀਮਤ 'ਤੇ ਨਹੀਂ। ਕਿਉਂਕਿ ਕੰਧਾਂ, ਕਾਉਲਿਆਂ 'ਤੇ ਦੀਵੇ ਬਾਲ ਕੇ ਪਟਾਖੇ-ਆਤਿਸ਼ਬਾਜ਼ੀ ਕਰਕੇ ਪੁਰਾਣੇ ਰੀਤੀ-ਰਿਵਾਜ਼ਾਂ ਅਨੁਸਾਰ ਉੱਪਰੀ ਤੌਰ 'ਤੇ ਖੁਸ਼ੀਆਂ-ਖੇੜਿਆਂ ਤੇ ਰੋਸ਼ਨੀਆਂ ਦਾ ਤਿਉਹਾਰ ਤਾਂ ਮਨਾਇਆ ਜਾ ਸਕਦਾ ਹੈ ਪਰ ਇਖਲਾਕੀ ਤੌਰ 'ਤੇ ਸਾਡਾ ਅਜੋਕਾ ਭ੍ਰਿਸ਼ਟ, ਮਿਲਾਵਟਖੋਰ, ਕੁਨਬਾਪ੍ਰਸਤ ਤੇ ਗੈਰ ਜੁੰਮੇਵਾਰਾਨਾ ਸਮਾਜਕ ਵਰਤਾਰਾ ਦੀਵਾਲੀ ਤਾਂ ਕੀ ਇੱਕ ਦੀਵਾ ਬਾਲਣ ਦਾ ਹੱਕਦਾਰ ਵੀ ਨਹੀਂ। ਬੁਰਾ ਨਾ ਮੰਨਣਾ ਪਰ ਸਾਡੀ ਨਿਗਾਹ ਵਿਚ ਹਰ ਸਾਲ ਸੈਂਕੜੇ ਕਰੋੜ ਰੁਪਏ ਦੇ ਪਟਾਖੇ ਫੂਕ ਕੇ ਮਨਾਈ ਜਾਣ ਵਾਲੀ ਦੀਵਾਲੀ ਅਸਲ ਵਿਚ ਜ਼ਮੀਰ ਪੱਖੋਂ 'ਮੋਇਆਂ' ਦੀ ਦੀਵਾਲੀ ਹੈ ਜਿਨ੍ਹਾਂ ਨੂੰ ਦੇਸ਼ ਨਾਲੋਂ 'ਧਰਮ' ਅਤੇ 'ਕਰਮ' ਨਾਲੋਂ 'ਭਰਮ' ਜ਼ਿਆਦਾ ਪਿਆਰਾ ਹੈ। ਅੱਜ ਲੋਕਾਂ ਨੂੰ ਚਾਨਣ ਨਾਲ ਪਿਆਰ ਤਾਂ ਹੈ ਪਰ ਹਮੇਸ਼ਾਂ ਸੋਚ ਪੱਖੋਂ 'ਚਿੱਟੇ ਦਿਨ' ਵੀ ਹਨ੍ਹੇਰੇ ਵਿਚ ਰਹਿੰਦੇ ਹਨ। ਜਿਹੜੇ ਦੀਵਾਲੀ ਮੌਕੇ ਘਰ ਦੀਆਂ ਕੰਧਾਂ ਤਾਂ ਰੁਸ਼ਨਾ ਲੈਂਦੇ ਹਨ ਪਰ ਮਨ ਵਿਚ ਹੋਰ ਗੰਦਲਾਪਨ ਵਧਾ ਲੈਂਦੇ ਹਨ। ਜਿਨ੍ਹਾਂ ਨੂੰ ਪਿਆਰ ਹੈ ਅਮੀਰੀ ਨਾਲ ਪਰ ਜੂਏ ਵਿਚ ਹਾਰ ਕੇ ਗਰੀਬੀ ਨੂੰ ਪੱਲੇ ਪਾ ਬੈਠਦੇ ਹਨ।
ਫੋਕੇ ਚਾਨਣ ਵਾਲੀ ਦੀਵਾਲੀ ਮਨਾਉਣ ਵਾਲੇ ਇਹ 'ਮੋਏ' ਕਦੇ ਇਹ ਨਹੀਂ ਸੋਚਦੇ ਕਿ ਗੁੜ ਨਾ ਖਾਣ ਦੀ ਨਸੀਹਤ ਦੇਣ ਤੋਂ ਪਹਿਲਾਂ ਖੁਦ ਗੁੜ ਖਾਣਾ ਕਰਨਾ ਬੰਦ ਕਰਨਾ ਪੈਂਦਾ ਹੈ। ਸ਼ਾਇਦ ਇਸੇ ਕਰਕੇ ਬਹੁਤੇ ਮੌਕਾਪ੍ਰਸਤ ਲੋਕ ਮੋਮਬੱਤੀਆਂ ਤਾਂ ਅੰਨਾ ਹਜ਼ਾਰੇ ਦੇ ਨਾਂਅ 'ਤੇ ਬਾਲਦੇ ਰਹੇ, ਪਰ 'ਅਲਖ਼' ਭ੍ਰਿਸ਼ਟਾਚਾਰ ਦੀ ਜਗਾਉਂਦੇ ਹਨ।
               125 ਕਰੋੜ ਦੇ ਨੇੜੇ ਪੁੱਜੇ ਇਹ ਭਲੇ ਮਾਣਸ ਸ਼ਾਇਦ ਇਹ ਨਹੀਂ ਜਾਣਦੇ ਇਹ ਤੁਹਾਡੀ ਕਾਹਦੀ ਦੀਵਾਲੀ ਹੈ। ਕਿਉਂਕਿ ਤੁਹਾਡੀ ਦੀ ਸਿਫ਼ਤ ਹੈ ਕਿ ਬਹੁਤ ਸਾਰੇ ਆਪਣੀ ਇੱਕ ਦੀਵਾਲੀ ਨੂੰ ਮੁਫ਼ਤ 'ਚ ਮਨਾਉਣ ਖਾਤਰ ਆਪਣੀਆਂ ਹੱਕ-ਹਲਾਲ ਤੇ ਜਮੀਰ ਨਾਲ ਭਰਪੂਰ ਚਾਰ ਦੀਵਾਲੀਆਂ ਜਾਇਆ ਕਰ ਦਿੰਦੇ ਹਨ। ਭਾਵ ਵੋਟਾਂ ਸਮੇਂ ਇੱਕ-ਦੋ ਦਿਨ ਚੰਗੇ ਲੰਘਾਉਣ ਲਈ ਆਪਣੀ ਵੋਟ 1000-1100 ਸੌ ਰੁਪਏ 'ਚ ਵੇਚ ਕੇ ਅਗਲੇ ਚਾਰ ਵਰ੍ਹਿਆਂ ਦੇ 1824 ਦਿਨਾਂ ਨੂੰ ਬੇਗੈਰਤਪੁਣੇ ਦੀ ਭੇਟ ਚਾੜ੍ਹ ਜਾਂਦੇ ਹਨ। ਨਸ਼ਿਆਂ ਦਾ ਜਲੌਅ ਇਨ੍ਹਾਂ 'ਮੋਇਆਂ' ਦੀ ਦੀਵਾਲੀ 'ਤੇ ਐਨਾ ਕੁ ਭਾਰੂ ਹੈ ਕਿ ਨਿੱਤ ਇੱਕ-ਅੱਧਾ ਨੌਜਵਾਨ ਆਪਣਾ ਦੀਵਾ ਬੁਝਾ ਬੈਠਦਾ ਹੈ। ਬਾਕੀ ਦੇ ਵਿਚਾਰੇ ਸੜਕਾਂ 'ਤੇ ਰੁਜ਼ਗਾਰ ਲਈ ਸੰਘਰਸ਼ ਕਰਦੇ ਜਵਾਨੀ ਰੋਲ ਰਹੇ ਹਨ। ਰੁੱਖਾਂ ਅਤੇ ਕੁੱਖਾਂ ਦੀ ਰਾਖੀ ਦੀ ਹਮਾਇਤ ਹਰ ਕੋਈ ਕਰਦਾ ਹੈ ਪਰ ਇਸਨੂੰ ਦੂਸਰਿਆਂ 'ਤੇ ਲਾਗੂ ਕਰਨ ਦੀ ਚਾਹਤ ਰੱਖਦਾ ਹੈ।
             ਅਸਲ ਵਿਚ ਦੀਵਾਲੀ ਤਾਂ ਉਨ੍ਹਾਂ ਸਫੈਦਪੋਸ਼ਾਂ/ਰਿਸ਼ਵਤਖੋਰਾਂ ਦੀ ਹੈ ਜਿਹੜੇ 'ਕ੍ਰਿਮਨਲ' ਤੋਂ ਥੋੜ੍ਹੇ ਹੀ ਸਮੇਂ 'ਚ ਸਮਾਜ ਦੀ 'ਕ੍ਰੀਮ' ਬਣ ਜਾਂਦੇ ਹਨ ਜਾਂ ਫਿਰ ਉਨ੍ਹਾਂ ਦੀ, ਜਿਹੜੇ 6 ਤੋਂ 160 ਬੱਸਾਂ ਦੇ ਮਾਲਕ ਬਣ ਗਏ ਜਾਂ ਜਿਹੜੇ 2-ਜੀ ਸਪੈਕਟ੍ਰਮ ਘੁਟਾਲਿਆਂ ਰਾਹੀਂ ਦੇਸ਼ ਦੀ ਜਨਤਾ ਦੇ ਸੈਂਕੜੇ ਹਜ਼ਾਰ ਕਰੋੜ ਰੁਪਏ ਡਕਾਰ ਗਏ।
            ਇਹੋ ਜਿਉਂਦੇ-ਜਾਗਦੇ ਮੋਇਆ ਦੀ 'ਜਾਗਰੁਕਤਾ' ਦਾ ਨਤੀਜਾ ਹੈ ਕਿ ਪੰਜਾਬ ਦੀ ਜਨਤਾ ਨੂੰ ਸਿਆਸਤਦਾਨਾਂ ਵੱਲੋਂ ਲਗਾਤਾਰ  ਅਣਗੌਲਿਆ ਬਣਾਇਆ ਜਾ ਰਿਹਾ ਹੈ। ਧੀਆਂ ਨੂੰ ਸਾਇਕਲ ਦੇਣਾ ਤਾਂ ਚੰਗੀ ਗੱਲ ਹੈ ਪਰ ਇਹ ਸਭ ਵੋਟਾਂ ਦੇ ਨਾਂਅ 'ਤੇ ਚੇਤੇ ਆਉਂਦਾ ਹੈ। ਕਦੇ ਤਾਏ-ਭਤੀਜੇ ਦੇ ਕਲੇਸ਼ ਅਤੇ ਕਦੇ ਕੈਪਟਨ-ਕਾਕੇ ਦੀਆਂ ਝੱਫ਼ੀਆਂ ਨੇ ਲੋਕਾਂ ਦੇ 'ਦਿਮਾਗ ਚੱਕਰ' ਨੂੰ ਖ਼ਰਾਬ ਕਰ ਰੱਖਿਆ ਹੈ। ਹਾਲਾਤ ਇਹ ਹੈ ਕਿ ਹਰ ਪੰਜ ਸਾਲਾਂ ਬਾਅਦ 'ਰਾਵਣ' ਬਦਲ ਜਾਂਦਾ ਹੈ ਪਰ ਸੀਤਾ (ਜਨਤਾ) ਉਹੀ ਰਹਿੰਦੀ ਹੈ।
ਇਸ ਸਭ ਦੇ ਵਿਚਕਾਰ ਜਨਤਾ ਅੱਜ ਵੀ ਕੱਖੋਂ ਹੌਲੀ ਹੈ ਕਿਉਂਕਿ ਉਸੇ ਦੇ ਵੋਟ ਦੀ ਤਾਕਤ ਅਤੇ ਜਨਤਕ ਪੈਸੇ ਜਰੀਏ ਰੁਜ਼ਗਾਰ ਦੇਣ ਦੀ ਥਾਂ ਚੰਦ ਕੁ ਸਸਤੀਆਂ ਸਰਕਾਰੀ ਸਕੀਮਾਂ ਅਤੇ ਮੁਫ਼ਤ ਆਟਾ-ਦਾਲ ਜਿਹੇ ਸੁਆਦ ਪਾ ਕੇ ਖੁਦ ਪੂਰੇ ਪੰਜ ਸਾਲ ਆਪਣੇ ਟੱਬਰਾਂ ਨਾਲ ਹਵਾਈ ਜਹਾਜ਼ਾਂ ਦੇ ਝੂਟੇ ਲੈਂਦੇ ਹਨ ਜਾਂ ਫਿਰ ਅਸਲੀ ਦੀਵਾਲੀ ਹੁੰਦੀ ਹੈ ਉਨ੍ਹਾਂ ਪੰਚਾਂ-ਸਰਪੰਚਾਂ ਦੀ, ਜਿਨ੍ਹਾਂ ਨੂੰ ਸੰਗਤ ਦਰਸ਼ਨਾਂ ਵਿਚ ਲੱਖਾਂ-ਕਰੋੜਾਂ ਦੀਆਂ ਗਰਾਟਾਂ ਦੇ ਖੁੱਲ੍ਹੇ ਗੱਫੇ ਮਿਲ ਜਾਂਦੇ ਹਨ। ਕੇਂਦਰ ਵਾਲਿਆਂ ਦੇ ਨਾਕਸ ਰਵੱਈਏ ਕਰਕੇ ਮਹਿੰਗਾਈ ਦੇ ਮਹਿੰਗੇ ਗੇੜਿਆਂ ਦੀ ਮਾਰੀ ਜਨਤਾ ਦੀ ਹਾਲਤ ਦੀਵਾਲੀ ਦੇ ਪਟਾਖਿਆਂ ਦੀ ਉਸ ਰਾਖ ਵਾਂਗ ਹੈ, ਜਿਹੜੀ ਭਾਂੜੇ ਮਾਂਜਣ ਦੇ ਕੰਮ ਵੀ ਨਹੀਂ ਆਉਂਦੀ, ਕਿਉਂਕਿ ਮੁਫ਼ਤ ਦੇ ਆਟੇ-ਦਾਲ, ਪੈਨਸ਼ਨਾਂ ਅਤੇ ਹੋਰ ਲੋਕ ਲੁਭਾਊ ਫੋਕੀਆਂ ਸਕੀਮਾਂ ਨੇ ਅਜਿਹਾ ਕੋਹੜ-ਕੀੜਾ ਚਲਾਇਆ ਹੈ ਕਿ ਬੁਢਾਪਾ ਤਾਂ ਕੀ ਜਵਾਨੀ ਵੀ ਦਿਹਾੜੀ-ਮਜ਼ਦੂਰੀ ਕਰਨ ਦੀ ਥਾਂ ਰਾਸ਼ਨ ਦੇ ਡੀਪੂਆਂ ਦੀ ਮੁਥਾਜ ਹੋ ਕੇ ਰਹਿ ਗਈ ਹੈ। ਇਨ੍ਹਾਂ ਸਕੀਮਾਂ ਦੇ 'ਅਖੌਤੀ ਲੋਕਪੱਖੀ' ਪਰਛਾਵੇਂ ਕਰਕੇ ਸੂਬੇ ਦਾ ਨੌਜਵਾਨ ਰੁਜ਼ਗਾਰ ਪੱਖੋਂ ਹੌਲਾ ਨਹੀਂ, ਬਲਕਿ ਨੌਜਵਾਨਾਂ ਦੇ ਨਿਠੱਲੇ ਹੋਣ ਕਰਕੇ ਰੁਜ਼ਗਾਰ ਵੀ ਮਿਹਨਤੀ ਹੱਥਾਂ ਤੋਂ ਵਾਂਝਾ ਹੋ ਗਿਆ ਹੈ।
               ਅੱਜ ਸੂਬਾ ਸਰਮਾਏਦਾਰੀ ਦੀ ਸੋਚ ਹੇਠ ਵਧ ਫੁੱਲ ਰਿਹਾ ਹੈ। ਜਿਸਦੇ ਚੱਲਦੇ 99ਵਿਆਂ ਦੀ ਜ਼ੇਬ ਵਿਚ ਲੱਖ ਰੁਪਇਆਂ ਨਹੀਂ ਪਰ ਫਿਰ ਵੀ ਕਈ-ਕਈ ਕਰੋੜ ਦੀਆਂ ਸਕੀਮਾਂ ਘੜ੍ਹਦੇ ਹਨ। ਅੱਜ ਤਿਥ-ਤਿਉਹਾਰ ਤੋਂ ਲੈ ਕੇ ਸੁਮੱਚਾ ਮਾਹੌਲ ਜੁਗਾੜੂ ਸੋਚ 'ਤੇ ਟਿਕਿਆ ਹੋਇਆ ਹੈ। ਸਾਡੀ ਖੁਸ਼ੀ ਵੀ ਜੁਗਾੜੂ ਹੋ ਗਈ ਹੈ। ਅਸੀਂ ਉੱਪਰੀ, ਸਸਤੀ ਤੇ ਵਿਖਾਵੇ ਦੀ ਖੁਸ਼ੀ ਮਾਣ ਕੇ ਚੰਗਾ ਮਹਿਸੂਸ ਕਰਦੇ ਹਾਂ ਤਦੇ ਸ਼ਾਇਦ ਅੱਜ ਮਹਿੰਗਾਈ ਵਧਦੀ ਤੇ ਸਮਾਜ ਹਰ ਪਾਸਿਓਂ ਨਿਘਰਦਾ ਜਾ ਰਿਹਾ ਹੈ ਜਿਸਤੋਂ ਕਲਮ ਦੇ 'ਸਿਪਾਹੀ' ਵੀ ਵਾਂਝੇ ਨਹੀਂ ਰਹੇ ਅਤੇ ਕੁਝ ਮਾੜੇ 'ਸਿਓ' ਸਾਰੀ ਪੇਟੀ ਨੂੰ 'ਘੁਣ' ਲਾ ਰਹੇ ਹਨ। ਦੇਸ਼ 'ਚ ਕਿਤੇ ਘੱਟ ਗਿਣਤੀਆਂ ਨਾਲ ਵਿਤਕਰਾ ਅਤੇ ਕਿਧਰੇ ਬਹੁ ਗਿਣਤੀ ਦੀ ਦਬੰਗ ਸਿਆਸਤ। ਕੋਈ ਅਮੀਰ ਹੁੰਦਾ ਜਾ ਰਿਹਾ ਹੈ ਕਿ ਕਿਸੇ ਕੋਲ ਖਾਣ ਲਈ ਰੋਟੀ ਦੀ ਬੁਰਕੀ ਤੇ ਪੀਣ ਨੂੰ ਪਾਣੀ ਦੀ ਬੂੰਦ ਨਹੀਂ।
            ਮੰਨਦੇ ਹਾਂ ਖੁਸ਼ੀਆਂ ਇਨਸਾਨੀ ਜ਼ਿੰਦਗੀ ਨੂੰ ਖੁਸ਼ਹਾਲ ਅਤੇ ਤਰੱਕੀ ਵੱਲ ਲਿਜਾਣ ਵਿਚ ਸਹਾਈ ਹੁੰਦੀਆਂ ਹਨ ਪਰ ਅਜਿਹੀ ਫੋਕੀਆਂ ਖੁਸ਼ੀਆਂ ਤੋਂ ਗਮ ਦੇ ਸਾਗਰ ਸੌ ਗੁਣਾ ਚੰਗੇ ਹਨ ਜਿਨ੍ਹਾਂ ਦੇ ਮੰਥਨ ਵਿਚੋਂ ਦੇਸ਼, ਕੌਮ ਅਤੇ ਸਮਾਜ ਲਈ ਇੱਕ ਨਵੀਂ ਸਵੇਰ ਦਾ ਚਾਨਣ ਭਰਿਆ ਸਵੇਰਾ ਤਾਂ ਹੁੰਦਾ ਹੈ। ਜਿਉਂਦੇ ਜ਼ਮੀਰ ਨਾਲ ਜਗਾਇਆ ਦੀਵਾ 'ਮੋਇਆਂ ਦੀ ਸੌ ਦੀਵਾਲੀਆਂ' 'ਤੇ ਭਾਰੂ ਪੈਂਦਾ ਹੈ। ਕਿਉਂਕਿ ਉਸਦੀ ਲੋਅ ਵਿਚੋਂ ਦੇਸ਼, ਕੌਮ ਦੀ ਚੜ੍ਹਦੀ ਕਲਾ,  ਇਨਸਾਫ਼ ਪਸੰਦ ਤੇ ਬਰਾਬਰੀ ਦੇ ਸਮਾਜ ਦੀ ਚਮਕ ਦਿਸਦੀ ਹੈ। ਇਸ ਲਈ ਆਓ, ਭ੍ਰਿਸ਼ਟ ਅਤੇ ਤਾਨਾਸ਼ਾਹ ਹੁੰਦੇ ਢਾਂਚੇ ਖਿਲਾਫ਼ ਕਦਮ ਪੁੱਟ ਕੇ ਜਿਉਂਦੇ ਜੀਆਂ ਵਾਲੀ ਦੀਵਾਲੀ ਮਨਾਉਣ ਦੇ ਰਾਹ ਤੁਰੀਏ।
       ਅਜੋਕੇ ਮਾਹੌਲ ਵਿਚ ਸ਼ਾਇਦ 96 ਫ਼ੀਸਦੀ ਲੋਕਾਂ ਵੱਲੋਂ ਮੋਇਆਂ ਵਾਲੀ  ਦੀਵਾਲੀ ਮਨਾਉਣ ਦਾ ਰੁਝਾਨ ਹੈ। ਸਾਨੂੰ ਗਿਆਨ ਹੈ ਕਿ ਇਨ੍ਹਾਂ ਸਤਰਾਂ 'ਤੇ ਸ਼ਾਇਦ 96 ਫ਼ੀਸਦੀ ਲੋਕਾਂ ਨੂੰ ਇਤਰਾਜ਼ ਹੋਵੇ ਪਰ ਸਾਡੇ ਮਹਿਜ਼ 4 ਫ਼ੀਸਦੀ ਲੋਕਾਂ ਦੀ ਇਹ ਅਵਾਜ਼ ਜਮੀਰ ਤੇ ਇਖਲਾਕ ਦੇ ਹੱਕ 'ਚ 1857 ਦੀ ਪਹਿਲੀ ਕ੍ਰਾਂਤੀ ਵਾਂਗ ਜਨਤਾ ਇੱਕ 'ਵਿਚਾਰ' ਬਣਨ ਤੱਕ ਬੜੀ ਸ਼ਿੱਦਤ ਨਾਲ ਗੂੰਜਦੀ ਰਹੇਗੀ।   

22 October 2011

'ਪਾਸ਼' ਦੇ ਬਿਆਨ ਤੋਂ ਖਫ਼ਾ 'ਦਾਸ' ਵੀ ਖੁੱਲ੍ਹ ਕੇ ਆਏ ਮੈਦਾਨ ਵਿਚ

                                        ''ਮਨਪ੍ਰੀਤ ਨੇ ਅਕਾਲੀ ਦਲ ਨੂੰ ਕੋਈ ਧੱਬਾ ਨਹੀਂ ਲਾਇਆ''
                             -ਸਾਂਝੇ ਮੋਰਚੇ ਦੇ ਉਮੀਦਵਾਰ ਵਜੋਂ ਲੰਬੀ ਤੋਂ ਚੋਣ ਲੜਣ ਦਾ ਐਲਾਨ ਕੀਤਾ
-
                                                         -ਇਕਬਾਲ ਸਿੰਘ ਸ਼ਾਂਤ-
ਲੰਬੀ - ਸੁਖਬੀਰ-ਮਨਪ੍ਰੀਤ ਦੇ ਸਿਆਸੀ ਕਲੇਸ਼ ਨੇ ਸਾਰੀ ਉਮਰ ਜਿੰਦ ਜਾਨ ਵਜੋਂ ਵਿਚਰੇ ਸਕੇ ਭਰਾਵਾਂ 'ਪਾਸ਼' ਅਤੇ 'ਦਾਸ' ਨੂੰ ਵੀ ਆਹਮੋ-ਸਾਹਮਣੇ ਲਿਆ ਖੜ੍ਹਾ ਕੀਤਾ ਹੈ। 21 ਅਕਤੂਬਰ ਨੂੰ ਕੱਲ੍ਹ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਲੰਬੀ ਹਲਕੇ ਵਿਚ ਮਨਪ੍ਰੀਤ 'ਤੇ ਅਕਾਲੀ ਦਲ ਨੂੰ ਕਲੰਕਤ ਕਰਨ ਜਿਹੇ ਦੋਸ਼ਾਂ ਦੇ ਖਿਲਾਫ਼ ਮੁੱਖ ਮੰਤਰੀ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਵੀ ਅੱਜ ਖੁੱਲ੍ਹ ਕੇ ਆਪਣੇ ਪੁੱਤਰ ਮਨਪ੍ਰੀਤ ਸਿੰਘ ਬਾਦਲ ਦੀ ਹਮਾਇਤ ਵਿਚ ਖੁੱਲ੍ਹ ਕੇ ਮੈਦਾਨ 'ਚ ਆ ਗਏ ਅਤੇ ਉਨ੍ਹਾਂ ਆਪਣੇ ਵੱਡੇ ਭਰਾ 'ਪਾਸ਼' ਦੇ ਬਿਆਨ 'ਤੇ ਤਿੱਖਾ ਪ੍ਰਤੀਕਰਮ ਪ੍ਰਗਟਾਇਆ।
         
            ਉਨ੍ਹਾਂ ਅੱਜ ਆਪਣੇ ਨਾਨਕੇ ਪਿੰਡ ਅਬੁੱਲਖੁਰਾਣਾ ਵਿਖੇ ਇੱਕ ਗੱਲਬਾਤ ਦੌਰਾਨ ਸਾਂਝੇ ਮੋਰਚੇ ਦੇ ਉਮੀਦਵਾਰ ਵਜੋਂ ਲੰਬੀ ਤੋਂ ਖੁਦ ਚੋਣ ਲੜਣ ਦਾ ਐਲਾਨ ਕਰਦਿਆਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਵੱਲੋਂ ਪੰਜਾਬ ਦੇ ਲੋਕਾਂ ਨੂੰ ਭਰਮਾਉਣ ਦੇ ਉਦੇਸ਼ ਨਾਲ ਮਨਪ੍ਰੀਤ ਸਿੰਘ ਬਾਦਲ 'ਤੇ ਅਕਾਲੀ ਦਲ ਬਾਦਲ ਨੂੰ ਧੋਖਾ ਦਿੱਤੇ ਜਾਣ ਦਾ ਕੂੜ ਪ੍ਰਚਾਰ ਕੀਤਾ ਜਾ ਰਿਹਾ ਹੈ। ਜਦੋਂ ਅਕਾਲੀ ਦਲ (ਬ) ਵੱਲੋਂ ਇੱਕ ਯੋਜਨਾਬੱਧ ਰਣਨੀਤੀ ਤਹਿਤ ਵਗੈਰ ਕਿਸੇ ਕਸੂਰ ਦੇ ਮਨਪ੍ਰੀਤ ਸਿੰਘ ਬਾਦਲ ਨੂੰ ਵਿੱਤ ਮੰਤਰੀ ਦੇ ਅਹੁਦੇ ਤੋਂ ਲਾਂਭੇ ਕਰਨ ਉਪਰੰਤ ਪਾਰਟੀ ਵਿਚੋਂ ਖਾਰਜ਼ ਕਰ ਦਿੱਤਾ ਗਿਆ। ਸਾਬਕਾ ਸਾਂਸਦ ਨੇ ਅਕਾਲੀ ਦਲ ਤੋਂ ਕਰੜੇ ਸ਼ਬਦਾਂ ਵਿਚ ਸੁਆਲ ਕੀਤਾ ਕੀ ਮਨਪ੍ਰੀਤ ਸਿੰਘ ਬਾਦਲ ਨੇ ਸ਼੍ਰੋਮਣੀ ਅਕਾਲੀ ਦਲ ਪ੍ਰਤੀ ਅਜਿਹਾ ਕੀ ਕੀਤਾ ਸੀ ਜਿਸ ਕਰਕੇ ਅਕਾਲੀ ਦਲ ਨੂੰ ਧੱਬਾ ਲੱਗਿਆ ਹੋਵੇ।

             ਗੁਰਦਾਸ ਸਿੰਘ ਬਾਦਲ ਨੇ ਬੜੀ ਸ਼ਿੱਦਤ ਨਾਲ ਉਨ੍ਹਾਂ ਆਪਣੇ ਪੁੱਤਰ (ਮਨਪ੍ਰੀਤ ਬਾਦਲ) ਨੂੰ ਬੇਦਾਗ ਅਤੇ ਲੋਕਪੱਖੀ ਆਗੂ ਕਰਾਰ ਦਿੰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਫਰਜੰਦ ਮਨਪ੍ਰੀਤ ਸਿੰਘ ਬਾਦਲ ਨੇ ਸੂਬੇ ਦਾ ਖਜ਼ਾਨਾ ਮੰਤਰੀ ਹੁੰਦਿਆਂ ਕਦੇ ਕੋਈ ਰਿਸ਼ਵਤ ਨਹੀਂ ਲਈ ਤੇ ਨਾ ਹੀ ਉਹ ਕਦੇ ਕਿਸੇ ਭ੍ਰਿਸ਼ਟ ਕਾਰਗੁਜਾਰੀ ਦਾ ਹਿੱਸਾ ਬਣਿਆ। ਬਲਕਿ ਉਹ ਤਾਂ ਹਮੇਸ਼ਾਂ ਪੱਲਿਓਂ ਤੇਲ ਪਾ ਕੇ ਆਪਣੀ ਗੱਡੀ ਖੁਦ ਚਲਾਉਂਦਾ ਹੋਇਆ ਸੂਬੇ ਦੀ ਆਰਥਿਕਤਾ ਨੂੰ ਸੁਚੱਜੇ ਥਾਂ 'ਤੇ ਲਿਆਉਣ ਲਈ ਫਿਕਰਮੰਦ ਰਿਹਾ ਪਰ ਉਸਦਾ ਸਿਲਾ ਅਕਾਲੀ ਦਲ ਵਿਚੋਂ ਬਾਹਰ ਕੱਢ ਕੇ ਦਿੱਤਾ ਗਿਆ।

             ਉਨ੍ਹਾਂ ਆਪਣੇ ਵੱਡੇ ਭਰਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਅਕਾਲੀ ਦਲ ਦੇ ਮੁੜ ਤੋਂ ਸੂਬੇ ਦੀ ਸੱਤਾ 'ਤੇ ਕਾਬਜ਼ ਹੋਣ ਦੇ ਦਾਅਵਿਆਂ ਨੂੰ ਖਾਰਜ਼ ਕਰਦਿਆਂ ਕਿਹਾ ਕਿ ਅਗਾਮੀ ਵਿਧਾਨਸਭਾ ਚੋਣਾਂ ਵਿਚ ਮਨਪ੍ਰੀਤ ਸਿੰਘ ਬਾਦਲ ਦੀ ਪਾਰਟੀ ਪੀ.ਪੀ.ਪੀ. ਦੀ ਅਗਵਾਈ ਵਾਲਾ ਸਾਂਝਾ ਮੋਰਚਾ ਪੂਰਨ ਬਹੁਮਤ ਨਾਲ ਸੱਤਾ ਵਿਚ ਆਵੇਗਾ। ਇਸ ਮੌਕੇ ਉਨ੍ਹਾਂ ਨਾਲ ਕਈ ਆਗੂ ਅਤੇ ਵਰਕਰ ਵੀ ਮੌਜੂਦ ਸਨ।
                              
                       
                   ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਬਿਆਨ

ਮਨਪ੍ਰੀਤ ਨੇ ਸਿਆਸੀ ਸੁਆਰਥਾਂ ਲਈ ਬਾਦਲ ਪਰਿਵਾਰ ਦੇ ਰੁਤਬੇ 'ਤੇ ਕਲੰਕਤ ਕੀਤਾ : ਬਾਦਲ
 ਲੰਬੀ, 20 ਅਕਤੂਬਰ-ਵਿਧਾਨਸਭਾ ਚੋਣਾਂ ਨੇੜੇ ਦੇ ਆਉਣ ਦੇ ਨਾਲ-ਨਾਲ ਬਾਦਲ ਪਰਿਵਾਰ ਵਿਚਲੀ ਸੱਤਾ ਦੀ ਜੰਗ ਸਟੇਜਾਂ ਦਾ ਸ਼ਿੰਗਾਰ ਬਣਨ ਲੱਗੀ ਹੈ। ਲੰਬੀ ਹਲਕੇ ਵਿਚ ਸੰਗਤ ਦਰਸ਼ਨ ਸਮਾਗਮਾਂ ਦੇ ਦੂਸਰੇ ਦਿਨ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਦੇ ਆਪਣੇ ਲਾਡਲੇ ਭਤੀਜੇ ਰਹੇ ਪੀ.ਪੀ.ਪੀ. ਦੇ ਪ੍ਰਧਾਨ ਮਨਪ੍ਰੀਤ ਸਿੰਘ ਬਾਦਲ ਨੂੰ ਪੁੱਠੇ ਹੱਥੀਂ ਲੈਂਦਿਆਂ ਕਿਹਾ ਕਿ ਮਨਪ੍ਰੀਤ ਸਿੰਘ ਬਾਦਲ ਨੇ ਆਪਣੇ ਸਿਆਸੀ ਸੁਆਰਥਾਂ ਲਈ 'ਮਾਂ ਪਾਰਟੀ' ਸ਼੍ਰੋਮਣੀ ਅਕਾਲੀ ਦਲ ਨਾਲ ਗੱਦਾਰੀ ਕਰਕੇ ਬਾਦਲ ਪਰਿਵਾਰ ਦੇ ਰੁਤਬੇ ਨੂੰ ਕਲੰਕਤ ਕੀਤਾ ਹੈ।
 
ਖੇਤਰ ਦੇ ਵੱਖ-ਵੱਖ ਪਿੰਡਾਂ ਸੰਗਤ ਦਰਸ਼ਨਾਂ ਮੌਕੇ ਮੁੱਖ ਮੰਤਰੀ ਦੀਆਂ ਤਕਰੀਰਾਂ ਵਿਚ ਮਨਪ੍ਰੀਤ ਸਿੰਘ ਬਾਦਲ ਉਨ੍ਹਾਂ ਦੇ ਸਿੱਧੇ ਨਿਸ਼ਾਨੇ 'ਤੇ ਰਹੇ। ਸ੍ਰੀ ਬਾਦਲ ਨੇ ਕਿਹਾ ਕਿ ਕਿਸੇ ਵਿਧਾਇਕ ਨੂੰ ਪਹਿਲੀ ਵਾਰ ਹੀ ਖਜਾਨੇ ਜਿਹੇ ਅਹਿਮ ਵਿਭਾਗ ਦੀ ਜੁੰਮੇਵਾਰੀ (ਕੁਰਸੀ) ਦੇਣੀ ਸੰਭਵ ਨਹੀਂ ਹੁੰਦੀ ਪਰ ਅਕਾਲੀ ਦਲ ਨੇ ਫਿਰ ਵੀ ਉਸਦੀ ਇੱਛਾ ਮੁਤਾਬਿਕ ਖਜਾਨਾ ਮੰਤਰੀ ਬਣਾਇਆ ਪਰ ਉਸ ਨੇ ਇੰਨ੍ਹਾਂ ਕੁਝ ਹਾਸਲ ਕਰ ਲੈਣ ਦੇ ਬਾਵਜੂਦ ਪਾਰਟੀ ਦੀ ਪਿੱਠ ਵਿਚ ਛੁਰਾ ਮਾਰਿਆ।

ਭਾਵੇਂ ਕਿ ਮਨਪ੍ਰੀਤ ਸਿੰਘ ਬਾਦਲ ਦੇ ਅਕਾਲੀ ਦਲ ਨਾਲੋਂ ਵਖਰੇਵੇਂ ਨੂੰ ਇੱਕ ਸਾਲ ਤੋਂ ਉੱਪਰ ਸਮਾਂ ਹੋ ਗਿਆ ਪਰ ਮੁੱਖ ਮੰਤਰੀ ਸ੍ਰੀ ਬਾਦਲ ਦੇ ਸ਼ਬਦਾਂ ਵਿਚੋਂ ਅਜੇ ਤੱਕ ਉਹ ਜਖ਼ਮ ਅੱਲੇ ਜਾਪ ਰਹੇ ਸਨ। ਉਨ੍ਹਾਂ ਮਨਪ੍ਰੀਤ ਸਿੰਘ ਬਾਦਲ ਵੱਲੋਂ ਸਾਂਝੇ ਮੋਰਚੇ ਦਾ ਗਠਨ ਕਰਕੇ ਸੂਬੇ ਦੀ ਸਿਆਸਤ ਵਿਚ ਇੱਕ ਤੀਜਾ ਧਿਰ ਸਥਾਪਿਤ ਕਰਨ ਬਾਰੇ ਕਿਹਾ  ''ਮਨਪ੍ਰੀਤ ਇਸ ਭੁਲੇਖੇ ਦਾ ਸਿਕਾਰ ਹੈ ਕਿ ਉਹ ਅਗਾਮੀ ਵਿਧਾਨ ਸਭਾ ਚੋਣਾਂ ਵਿਚ ਸ਼੍ਰੋਮਣੀ ਅਕਾਲੀ ਦਲ ਨੂੰ ਢਾਹ ਲਾ ਸਕਦਾ ਹੈ ਪਰ ਇਹ ਉਸਦੀ ਬਹੁਤ ਵੱਡੀ ਭੁੱਲ ਹੈ, ਕਿਉਂਕਿ ਉਸ ਨੂੰ ਪੰਜਾਬ ਦੇ ਸੂਝਵਾਨ ਲੋਕ ਹੀ ਸਬਕ ਸਿਖਾਉਣ ਲਈ ਕਾਫੀ ਹਨ।'' ਸ੍ਰੀ ਬਾਦਲ ਨੇ ਮੁੜ ਦੁਹਰਾਇਆ ਕਿ ਕੋਈ ਵੀ ਵਿਅਕਤੀ ਪਾਰਟੀ ਤੋਂ ਉੱਪਰ ਨਹੀਂ ਹੋ ਸਕਦਾ ਅਤੇ ਨਾ ਹੀ ਕਿਸੇ ਪਾਰਟੀ ਨੂੰ ਢਾਹ ਲਾਉਣ ਦੇ ਸਮਰੱਥ ਬਣ ਸਕਦਾ ਹੈ। ਉਨ੍ਹਾਂ ਕਿਹਾ, ''ਜੇ ਮੈਂ ਪਾਰਟੀ ਨੂੰ ਨੁਕਸਾਨ ਪਹੁੰਚਾਉਣ ਦੀ ਕੋਈ ਕੋਸ਼ਿਸ ਵੀ ਕਰਾਂ ਤਾਂ ਉਸ ਲਈ ਮੈਨੂੰ ਰੱਬ ਹੀ ਬਚਾਵੇ ਕਿਉਂਕਿ ਮੇਰੇ ਲਈ ਅਜਿਹਾ ਕਰਨਾ ਸੰਭਵ ਹੀ ਨਹੀਂ।'' 

19 October 2011

ਲੰਬੀ ਤੇ ਗਿੱਦੜਬਾਹਾ ਤੋਂ ਦੋਹਰਾ 'ਮਹਾਭਾਰਤ' ਲੜਣਗੇ ਐਤਕੀਂ ਵੱਡੇ ਬਾਦਲ !

                 -ਲੰਬੀ ਅਤੇ ਗਿੱਦੜਬਾਹਾ 'ਚ ਸੰਗਤ ਦਰਸ਼ਨਾਂ ਦੀ ਝੜੀ-
 
                                                               ਇਕਬਾਲ ਸਿੰਘ ਸ਼ਾਂਤ
           ਪੰਜਾਬ ਵਿਧਾਨਸਭਾ ਚੋਣਾਂ ਲਈ ਚੋਣ ਜ਼ਾਬਤੇ ਦੇ ਦਿਨ ਨੇੜੇ ਆਉਂਦੇ ਵੇਖ ਪੰਜਾਬ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਲੰਬੀ ਅਤੇ ਗਿੱਦੜਬਾਹਾ ਹਲਕਿਆਂ ਵਿਚ ਗੇੜੇ 'ਤੇ ਗੇੜਾ ਬੰਨ ਰੱਖਿਆ ਹੈ। ਅਜੇ ਕੱਲ੍ਹ 17 ਅਕਤੂਬਰ ਨੂੰ ਮੁੱਖ ਮੰਤਰੀ ਗਿੱਦੜਬਾਹਾ ਦੇ ਪਿੰਡਾਂ ਵਿਚ ਸੰਗਤ ਦਰਸ਼ਨ ਕਰਕੇ ਗਏ ਸਨ ਅਤੇ ਹੁਣ ਉਹ ਮੁੜ ਤੋਂ 19 ਅਤੇ 20 ਅਕਤੂਬਰ ਨੂੰ ਲੰਬੀ ਹਲਕੇ ਦੇ ਦੋ ਦਿਨਾਂ ਦੌਰੇ 'ਤੇ ਹਨ। ਲੰਬੀ ਅਤੇ ਗਿੱਦੜਬਾਹਾ ਹਲਕਿਆਂ ਵਿਚ ਬਰਾਬਰੀ ਵਾਲੇ ਰੁਝੇਵੇਂ ਵੱਡੇ ਬਾਦਲ ਦੀ ਅਗਾਮੀ ਸਿਆਸੀ ਰਣਨੀਤੀ ਦੀ ਅਗਾਊਂ ਹਿੱਸਾ ਜਾਪਦੇ ਹਨ।
             ਭਾਵੇਂ ਸਿਆਸੀ ਮਾਹਰਾਂ ਅਨੁਸਾਰ ਮੁੱਖ ਮੰਤਰੀ ਸ: ਬਾਦਲ ਦਾ ਐਤਕੀਂ ਲੰਬੀ ਦੀ ਸਿਆਸੀ ਰਣਭੂਮਿ 'ਤੇ ਕਾਂਗਰਸ ਪਾਰਟੀ ਦੇ ਥੰਮ ਆਗੂ ਸ: ਮਹਸ਼ੇਇੰਦਰ ਸਿੰਘ ਬਾਦਲ ਤੋਂ ਇਲਾਵਾ ਛੋਟੇ ਸਕੇ ਭਰਾ ਸ: ਗੁਰਦਾਸ ਸਿੰਘ ਬਾਦਲ ਵੱਲੋਂ ਪੀ.ਪੀ.ਪੀ. ਵੱਲੋਂ ਉਮੀਦਵਾਰ ਥਾਪੇ ਜਾਣ ਉਪਰੰਤ ਸਰੀਕਾਂ 'ਚ ਤਿਹਰੀ ਸਿਆਸੀ ਮਹਾਂਭਾਰਤ ਹੋਣ ਦੇ ਮੱਦੇਨਜ਼ਰ ਦੋ ਵਿਧਾਨਸਭਾ ਹਲਕਿਆਂ ਤੋਂ ਚੋਣ ਲੜਣਾ ਯਕੀਨੀ ਹੈ। ਕਿਉਂਕਿ ਪਿਛਲੇ ਵਿਧਾਨਸਭਾ ਚੋਣਾਂ ਵਿਚ ਲੰਬੀ ਵਿਚ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਆਪਣੇ ਚਚੇਰੇ ਭਰਾ ਅਤੇ ਕਾਂਗਰਸ ਪਾਰਟੀ ਦੇ ਉਮੀਦਵਾਰ ਮਹੇਸ਼ਇੰਦਰ ਸਿੰਘ ਬਾਦਲ ਤੋਂ ਇੰਨੀ ਸਖ਼ਤ ਟੱਕਰ ਮਿਲੀ ਸੀ ਕਿ ਜਿੱਤ ਹਾਰ ਦਾ ਫ਼ਰਕ ਸਿਰਫ਼ 9 ਹਜ਼ਾਰ ਦੇ ਕਰੀਬ ਤੱਕ ਸਿਮਟ ਗਿਆ ਸੀ। ਅਜਿਹੇ ਵਿਚ ਸਾਰੀ ਉਮਰ ਮੋਢੇ ਨਾਲ ਮੋਢਾ ਲਾ ਚੋਣ ਪਿੜਾਂ ਵਿਚ ਸਾਰਥੀ ਬਣ ਕੇ ਵਿਚਰਦੇ ਰਹੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ ਵੱਲੋਂ ਇਹ ਵਾਰ ਵਿਰੋਧੀ ਵਜੋਂ ਸਾਹਮਣੇ ਮੈਦਾਨ 'ਚ ਆ ਡਟਣ ਨਾਲ ਸਿਆਸੀ ਸਮੀਕਰਨ ਹੋਰ ਵੀ ਗੁੰਝਲਦਾਰ ਬਣ ਗਏ ਹਨ। ਜਿਸ ਕਰਕੇ ਅਜੋਕੇ ਹਾਲਾਤਾਂ ਵਿਚ ਲੰਬੀ ਤੋਂ ਵੱਡੇ ਬਾਦਲ ਦੀ ਜਿੱਤ ਬਾਰੇ ਸਿਆਸੀ ਸਫ਼ਾਂ 'ਚ ਕੋਈ ਹਾਂ-ਪੱਖੀ ਹੁੰਗਾਰਾ ਸੁਣਨ ਨਹੀਂ ਮਿਲ ਰਿਹਾ ਹੈ ਪਰ ਫਿਰ ਵੀ ਲੰਬੀ ਦੇ ਚੋਣ ਦੰਗਲ ਵਿਚ ਨਿੱਤਰਨਾ ਅਕਾਲੀ ਦਲ ਦੀ ਇਖਲਾਕੀ ਮਜ਼ਬੂਰੀ ਹੈ ਕਿਉਂਕਿ ਮੰਨਿਆ ਜਾ ਰਿਹਾ ਹੈ ਕਿ ਬਾਦਲ ਵੱਲੋਂ ਲੰਬੀ ਹਲਕੇ ਨੂੰ ਛੱਡ ਕੇ ਕਿਸੇ ਹੋਰ ਹਲਕੇ ਤੋਂ ਲੜਣ ਨੂੰ ਅਕਾਲੀ ਦਲ (ਬ) ਦੀ ਕਮਜ਼ੋਰੀ ਵੀ ਮੰਨਿਆ ਜਾ ਸਕਦਾ ਹੈ।
                ਇਨ੍ਹਾਂ ਸਭ ਹਾਲਾਤਾਂ ਵਿਚ ਦੋ ਪਹਿਲੂਆਂ ਨੂੰ ਮੁੱਖ ਰੱਖ ਕੇ ਦੇਸ਼ ਦੀ ਗੈਰ ਕਾਂਗਰਸੀ ਸਿਆਸਤ ਵਿਚ ਬਾਬਾ ਬੋਹੜ ਦਾ ਰੁਤਬਾ ਰੱਖਦੇ ਪ੍ਰਕਾਸ਼ ਸਿੰਘ ਬਾਦਲ ਇੱਕ ਪੂਰੀ ਤਰ੍ਹਾਂ ਵਿਉਂਤਬੰਦ ਰਣਨੀਤੀ ਦੇ ਤਹਿਤ ਲੰਬੀ ਤੋਂ ਤਾਂ ਵਿਧਾਨਸਭਾ ਚੋਣ ਲੜਣਗੇ ਤੇ ਨਾਲ ਹੀ ਗਿੱਦੜਬਾਹਾ ਹਲਕੇ ਵਿਚ ਆਪਣੇ ਭਤੀਜੇ ਦੇ ਸਾਹਮਣੇ ਹਿੱਕ ਚੁਣੌਤੀ ਵਜੋਂ ਡਟਣਗੇ। ਜਿਸਦਾ ਇੱਕ ਪਹਿਲੂ ਇਹ ਹੈ ਕਿ ਇਹ ਦੋਵੇਂ ਹਲਕੇ ਆਪਸ ਵਿਚ ਜੁੜਦੇ ਹਨ ਤੇ ਦੋਵੇਂ ਹਲਕਿਆਂ ਦੀ ਸਿਆਸੀ ਗਲੀਆਂ ਦੇ ਚੱਪੇ-ਚੱਪੇ ਤੋਂ ਸ੍ਰੀ ਬਾਦਲ ਭਲੀ-ਭਾਂਤ ਜਾਣੂ ਹਨ ਦੇ ਦੂਸਰਾ ਇਸ ਮੁੱਖ ਮੰਤਰੀ ਦੇ ਇਨ੍ਹਾਂ ਹਲਕਿਆਂ ਤੋਂ ਖੜ੍ਹਣ ਦਾ ਅਸਰ ਮਨਪ੍ਰੀਤ ਸਿੰਘ ਬਾਦਲ ਅਤੇ ਉਸਦੇ ਸਮਰਥਕਾਂ ਵੱਲੋਂ ਮਾਲਵੇ ਵਿਚ ਲਾਏ ਜਾਣ ਵਾਲੇ ਖੋਰੇ ਨੂੰ ਵੀ ਮੱਠਾ ਪਾਵੇਗਾ। ਇਸਦੇ ਇਲਾਵਾ ਇਨ੍ਹਾਂ ਦੋਵੇਂ ਹਲਕਿਆਂ ਵਿਚ ਸ੍ਰੀ ਵੱਡੇ ਬਾਦਲ ਦੇ ਖੁਦ ਖੜੇ ਅਤੇ ਵੋਟਰਾਂ ਤੱਕ ਨਿੱਜੀ ਤੌਰ ਪਹੁੰਚਣ ਨਾਲ 50 ਸਾਲ ਪੁਰਾਣੇ ਸਬੰਧਾਂ ਦੀ ਸ਼ਰਮ ਨਾਲ ਵੀ ਵੋਟ ਪੈਣ ਦਾ ਇੱਕ ਚੰਗਾ ਫੈਕਟਰ ਮੰਨਿਆ ਜਾ ਰਿਹਾ ਹੈ।
                 ਮੁੱਖ ਮੰਤਰੀ ਬਾਦਅ ਵੱਲੋਂ ਕਿਸੇ ਸਮੇਂ ਆਪਣੇ ਹੱਥੀਂ ਗਿੱਦੜਬਾਹਾ 'ਚ ਲਾਏ ਬੂਟੇ ਭਤੀਜੇ ਮਨਪ੍ਰੀਤ ਸਿੰਘ ਬਾਦਲ ਦੇ ਡੇਢ ਦਹਾਕੇ ਪੁਰਾਣੇ ਕਿਲ੍ਹੇ ਨੂੰ ਮੌਜੂਦਾ ਸਹਿਜੇ ਲਹਿਜੇ ਅਨੁਸਾਰ ਨੇਸਤਾਬੂਤ ਕਰਨਾ ਪਹਿਲ ਬਣੀ ਹੋਈ ਹੈ। ਉਥੇ ਜੱਦੀ ਹਲਕੇ ਲੰਬੀ ਵਿਚ ਦੋ-ਦੋ ਸਰੀਕ ਭਰਾਵਾਂ ਨਾਲ ਹੋਣ ਵਾਲੀ ਚੋਣ ਜੰਗ ਵਿਚ ਗਿੱਦੜਬਾਹੇ ਤੋਂ ਚੋਣ ਲੜਣ ਦਾ ਹਮਲਾਵਰ ਸਿਆਸਤ ਦਾ ਦੋਹਰਾ ਪੈਂਤੜਾ ਖੇਡ ਕੇ ਸੂਬੇ ਦੇ ਵੋਟਰਾਂ ਦੇ ਸਾਹਮਣੇ ਸੱਤਾ ਵਾਪਸੀ ਲਈ ਇੱਕ ਮਜ਼ਬੂਤ ਮਾਹੌਲ ਦੀ ਰਣਨੀਤੀ ਹਿੱਸਾ ਦੱਸਿਆ ਜਾ ਰਿਹਾ ਹੈ। ਜਾਣਕਾਰੀ ਅਨੁਸਾਰ ਅਕਾਲੀ ਦਲ (ਬ) ਵੱਲੋਂ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਲੰਬੀ ਤੋਂ ਚੋਣ ਲੜਣ ਦੀ ਕਣਸੋਆਂ ਹਨ ਪਰ ਅਜੇ ਤੱਕ ਉਨ੍ਹਾਂ ਦੇ ਜਲਾਲਾਬਾਦ ਜਾਂ ਕਿਸੇ ਹੋਰ ਹਲਕੇ ਤੋਂ ਚੋਣ ਲੜਣ ਦੀ ਸੰਭਾਵਨਾਵਾਂ ਜ਼ਿਆਦਾ ਜਾਪਦੀਆਂ ਹਨ।
                 ਇਸੇ ਮਨਸ਼ਾ ਦੇ ਤਹਿਤ ਮੁੱਖ ਮੰਤਰੀ ਦੇ ਦੌਰਿਆਂ ਵਿਚ ਪ੍ਰਮੁੱਖਤਾ ਨਾਲ ਸ਼ਰੀਕ ਹੁੰਦੀ ਲੰਬੀ ਤੋਂ ਇਲਾਵਾ ਹੁਣ ਗਿੱਦੜਬਾਹਾ ਵੀ 'ਹਾਈ ਪਾਵਰ ਜ਼ੋਨ' ਬਣਿਆ ਹੋਇਆ ਹੈ। ਤਦੇ ਲੜੀਵਾਰ ਸੰਗਤ ਦਰਸ਼ਨ ਸਮਾਗਮਾਂ ਰਾਹੀਂ ਗਿੱਦੜਬਾਹਾ ਅਤੇ ਲੰਬੀ ਦੇ ਪਿੰਡਾਂ ਗਰਾਂਟਾਂ ਦਾ ਮੀਂਹ ਵਰ੍ਹਾ ਕੇ ਚੋਣ ਪਿੜ ਨੂੰ ਆਪਣੇ ਹੱਕ ਕਰਨ ਦਾ ਹਰਵਾ ਕੀਤਾ ਜਾ ਰਿਹਾ ਹੈ।

13 October 2011

ਦੁਨੀਆਂ ਭਰ 'ਚ ਏਡਜ ਨਾਲੋਂ ਵੀ ਚਾਰ ਗੁਣਾ ਵੱਧ ਫੈਲਿਆ ਕੈਂਸਰ

-ਤਾਜੇ ਅੰਕੜਿਆਂ ਅਨੁਸਾਰ ਦੁਨੀਆਂ ਭਰ 'ਚ ਕੈਂਸਰ ਦੀ ਬੀਮਾਰੀ 'ਚ 
20 ਫ਼ੀਸਦੀ ਦਾ ਔਸਤਨ ਵਾਧਾ-
                                          
                                                     ਇਕਬਾਲ ਸਿੰਘ ਸ਼ਾਂਤ
                  ਵਿਸ਼ਵ ਪੱਧਰੀ ਸਮਾਜ ਸੇਵੀ ਸੰਸਥਾ 'ਰੋਕੋ ਕੈਂਸਰ' ਦੇ ਗਲੋਬਲ ਰਾਜਦੂਤ ਸ੍ਰੀ ਕੁਲਵੰਤ ਧਾਲੀਵਾਲ ਨੇ ਕਿਹਾ ਕਿ ਅਜੋਕੇ ਤਣਾਅਪੂਰਨ ਮਾਹੌਲ ਨੇ ਮਨੁੱਖਤਾ ਨੂੰ ਸਾਦੇ ਜੀਵਨ ਤੋਂ ਕੋਹਾਂ ਦੂਰ ਲਿਜਾ ਕੇ ਕੈਂਸਰ ਜਿਹੀ ਨਾਮੁਰਾਦ ਬੀਮਾਰੀ ਦੇ ਚੰਗੁਲ ਵਿਚ ਅਜਿਹਾ ਉਲਝਾ ਦਿੱਤਾ ਹੈ ਕਿ ਕੈਂਸਰ ਦੁਨੀਆਂ 'ਚ ਸਭ ਤੋਂ ਭਿਆਨਕ ਤੇ ਨਾਮੁਰਾਦ ਬੀਮਾਰੀ ਮੰਨੇ ਜਾਂਦੀ ਏਡਜ਼ ਨਾਲੋਂ ਵੀ ਚਾਰ ਗੁਣਾ ਜ਼ਿਆਦਾ ਫੈਲ ਚੁੱਕਿਆ ਹੈ।
                ਉਨ੍ਹਾਂ ਅੱਜ ਇਸ ਪ੍ਰਤਿਨਿਧ ਨਾਲ ਫੋਨ 'ਤੇ ਗੱਲਬਾਤ ਕਰਦਿਆਂ ਆਖਿਆ ਕਿ ਤਾਜ਼ਾ ਅੰਕੜਿਆਂ ਅਨੁਸਾਰ ਦੁਨੀਆਂ ਭਰ ਵਿਚ ਕੈਂਸਰ ਦੀ ਬੀਮਾਰੀ ਵਿਚ 20 ਫ਼ੀਸਦੀ ਦਾ ਔਸਤਨ ਵਾਧਾ ਹੋਇਆ ਹੈ, ਜੋ ਕਿ ਮਨੁੱਖਤਾ ਲਈ ਬੇਹੱਦ ਭਿਆਨਕ ਸੰਕੇਤ ਹੈ। ਇਸ ਖ਼ਤਰੇ ਦੀ ਘੰਟੀ ਨੂੰ ਮਹਿਸੂਸ ਕਰਦਿਆਂ ਯੂਰਪੀਅਨ ਮੁਲਕਾਂ ਦੀਆਂ ਸਰਕਾਰਾਂ ਬੇਹੱਦ ਗੰਭੀਰ ਹਨ। ਜਿਸਦੇ ਮੱਦੇਨਜ਼ਰ ਰੋਕੋ ਕੈਂਸਰ ਦੇ ਯਤਨਾਂ ਸਦਕਾ ਕੈਂਸਰ ਦੀ ਰੋਕਥਾਮ ਲਈ ਵਿਸ਼ਵ ਪੱਧਰ 'ਤੇ ਹੱਲ ਕੱਢਣ ਲਈ ਕੱਲ੍ਹ 12 ਅਕਤੂਬਰ ਨੂੰ ਇੰਗਲੈਂਡ ਦੀ ਪਾਰਲੀਮੈਂਟ ਵਿਖੇ 17 ਮੁਲਕਾਂ ਦੀ ਇੱਕ ਮੀਟਿੰਗ ਸੱਦੀ ਗਈ ਹੈ। ਜਿਸ ਵਿਚ 17 ਮੁਲਕਾਂ ਦੇ ਸੰਸਦ ਮੈਂਬਰ ਹਿੱਸਾ ਲੈਣਗੇ।
ਰੋਕੋ ਕੈਂਸਰ ਦੇ ਗਲੋਬਲ ਰਾਜਦੂਤ ਨੇ ਕਿਹਾ ਕਿ ਮੌਜੂਦਾ ਸਮੇਂ ਵਿਚ ਸਮਾਜ ਦੇ ਬਹੁਪੱਖੀ ਵਿਕਾਸ ਦੇ ਨਾਲ-ਨਾਲ ਵਧ ਰਹੇ ਤਣਾਅ ਅਤੇ ਰਸਾਇਣਿਕ ਖਾਦਾਂ ਕਰਕੇ ਹੋਏ ਦੂਸ਼ਿਤ ਹੁੰਦੇ ਪਾਣੀਆਂ ਸਮੇਤ ਵੱਖ-ਵੱਖ ਵਿਸ਼ੇ-ਵਿਕਾਰਾਂ ਕਰਕੇ ਅਜੋਕੇ ਤਰੱਕੀ ਦੇ ਵਸੀਲੇ ਮਨੁੱਖੀ ਸਿਹਤ ਲਈ ਬੇਹੱਦ ਘਾਤਕ ਵੀ ਸਿੱਧ ਹੋ ਰਹੇ ਸਨ।
              ਸ੍ਰੀ ਧਾਲੀਵਾਲ ਨੇ ਕਿਹਾ ਕਿ ਜੇਕਰ ਸਮਾਂ ਰਹਿੰਦਿਆਂ ਅਸੀਂ ਤੜਕ-ਭੜਕ ਅਤੇ ਤਣਾਅ ਭਰੇ ਜੀਵਨ ਤੋਂ ਪਾਸਾ ਵੱਟ ਕੇ ਇਕਜੁਟਤਾ ਨਾਲ ਸਾਦੇ ਜੀਵਨ ਵੱਲ ਮੂੰਹ ਨਾ ਮੋੜਿਆ ਤਾਂ ਅਗਲੇ ਇੱਕ-ਡੇਢ ਦਹਾਕੇ ਵਿਚ ਦੁਨੀਆਂ ਦੇ ਤਕਰੀਬਨ ਹਰੇਕ ਦੂਸਰੇ ਪਰਿਵਾਰ ਨੂੰ ਕੈਂਸਰ ਦਾ ਮਾੜਾ ਪਰਛਾਵਾਂ ਭੋਗਣਾ ਪਵੇਗਾ।
                ਉਨ੍ਹਾਂ ਕਿਹਾ ਕਿ ਜਿੱਥੇ ਪੰਜਾਬ ਦਾ ਮਾਲਵਾ ਖੇਤਰ ਕੈਂਸਰ ਨਾਲ ਜੂਝ ਰਿਹਾ ਹੈ, ਉਥੇ ਦੁਨੀਆਂ ਦੇ ਹੋਰਨਾਂ ਮੁਲਕ ਵੀ ਇਸਦੀ ਮਾਰ ਹੇਠ ਹਨ। ਉਨ੍ਹਾਂ ਕੈਂਸਰ ਦੀ ਬੀਮਾਰੀ ਖਿਲਾਫ਼ ਰੋਕੋ ਕੈਂਸਰ ਦੀਆਂ ਕਾਰਗੁਜਾਰੀਆਂ ਅਤੇ ਨਤੀਜਿਆਂ ਤੋਂ ਪ੍ਰਭਾਵਿਤ ਹੋ ਕੇ ਪੰਜਾਬ ਸਰਕਾਰ ਵੱਲੋਂ ਰੋਕੋ ਕੈਂਸਰ ਦੇ ਸਹਿਯੋਗ ਨਾਲ 28 ਅਕਤੂਬਰ ਤੋਂ ਸੂਬੇ ਵਿਚ ਕੈਂਸਰ ਨੂੰ ਮੁੱਢਲੇ ਪਛਾਣਨ ਦੇ ਉਦੇਸ਼ ਨਾਲ ਆਰੰਭੀ ਮੁਹਿੰਮ ਨੂੰ ਇੱਕ ਚੰਗੀ ਸ਼ੁਰੂਆਤ ਕਰਾਰ ਦਿੰਦਿਆਂ ਕਿਹਾ ਕਿ ਹੁਣ ਜੇਕਰ ਲੋਕ ਗੰਭੀਰਤਾ ਨਾਲ ਇਸ ਮੁਹਿੰਮ ਨੂੰ ਸਾਥ ਦੇਣ ਤਾਂ ਸੂਬੇ ਦੇ ਹਰ ਕੈਂਸਰ ਬਾਰੇ ਸ਼ੱਕੀ ਵਿਅਕਤੀ ਦਾ ਮੁੱਢਲੇ ਪੜਾਅ 'ਤੇ ਚੈਕਅੱਪ ਕਰਵਾ ਕੇ ਪੰਜਾਬ 'ਚ ਵੀ ਵਿਦੇਸ਼ਾਂ ਵਾਂਗ ਕੈਂਸਰ ਨਾਲ ਹੋਣ ਵਾਲੀਆਂ 'ਤੇ ਮੌਤਾਂ ਦੀ ਦਰਾਂ ਵਿਚ ਕਮੀ ਲਿਆਂਦੀ ਜਾ ਸਕਦੀ ਹੈ।
                   ਕੈਂਸਰ ਦੀ ਬੀਮਾਰੀ ਖਿਲਾਫ਼ ਆਪਣੇ ਜੀਵਨ ਸਮਰਪਿਤ ਕਰਨ ਵਾਲੇ ਸ੍ਰੀ ਧਾਲੀਵਾਲ ਨੇ ਦੱਸਿਆ ਕਿ ਰੋਕੋ ਕੈਂਸਰ ਵੱਲੋਂ ਪੰਜਾਬ ਵਿਚ ਕੈਂਸਰ ਚੈੱਕਅਪ ਲਈ ਪਹਿਲਾਂ 5 ਬੱਸਾਂ ਚੱਲ ਰਹੀਆਂ ਸਨ, ਪਰ ਹੁਣ ਗੰਭੀਰ ਹਾਲਾਤਾਂ ਦੇ ਮੱਦੇਨਜ਼ਰ ਇੱਕ ਨਵੀਂ ਬੱਸ ਰੋਕੋ ਕੈਂਸਰ ਦੇ ਭਾਰਤ ਵਿਚ ਨੁਮਾਇੰਦੇ ਸ: ਅਰਵਿੰਦਰ ਸਿੰਘ ਚਾਵਲਾ ਨੂੰ ਸੌਂਪੀ ਗਈ ਹੈ। ਇਥੇ ਜ਼ਿਕਰਯੋਗ ਹੈ ਕਿ 24 ਅਕਤੂਬਰ ਨੂੰ ਪਿੰਗਲਵਾੜਾ (ਅੰਮ੍ਰਿਤਸਰ) ਵਿਖੇ ਇੱਕ ਕੈਂਸਰ ਚੈੱਕਅੱਪ ਕੈਂਪ ਲਾਇਆ ਜਾ ਰਿਹਾ ਹੈ।

02 October 2011

ਪਿੰਡ ਲੰਬੀ ਦਾ ਨੌਜਵਾਨ ਭਾਰਤੀ ਫੌਜ ਦੀ ਜੱਜ-ਐਡਵੋਕੇਟ ਜਨਰਲ ਬਰਾਂਚ 'ਚ ਲੈਫਟੀਨੈਂਟ ਚੁਣਿਆ ਗਿਆ

                                        ਇਕਬਾਲ ਸਿੰਘ ਸ਼ਾਂਤ
ਲੰਬੀ-ਬਾਬੂ ਰਜ਼ਬ ਅਲੀ ਦੀ ਸ਼ਾਇਰੀ ਵਿਚ ਸ਼ਿਕਾਇਤੀਆਂ ਦੇ ਪਿੰਡ ਲੂਲੂਵਜੋਂ ਜਾਣੀ ਜਾਂਦੀ 'ਲੰਬੀ' ਦਾ ਇੱਕ ਨੌਜਵਾਨ ਪਵਨਦੀਪ ਸਿੰਘ ਧਾਲੀਵਾਲ ਹੁਣ ਭਾਰਤੀ ਫੌਜ ਦੀ ਜੱਜ-ਐਡਵੋਕੇਟ ਜਰਨਲ ਬਰਾਂਚ (ਜੇ.ਏ.ਜੀ.) ਵਿਚ ਫੌਜੀਆਂ ਨਾਲ ਸਬੰਧਤ ਮਾਮਲਿਆਂ 'ਤੇ ਬਤੌਰ ਜੱਜ-ਐਡਵੋਕੇਟ ਸ਼ਿਕਾਇਤਾਂ ਸੁਣਦਾ ਅਤੇ ਪੈਰਵੀ ਕਰਦਾ ਨਜ਼ਰ ਆਵੇਗਾ। ਆਰਮੀ ਇੰਸਟੀਟਿਉਟ ਆਫ਼ ਲਾਅ ਤੋਂ ਗ੍ਰੇਜੂਏਟ ਪਵਨਦੀਪ ਸਿੰਘ ਭਾਰਤੀ ਫੌਜ ਦੇ ਟੈਸਟ ਵਿਚੋਂ ਜੱਜ-ਐਡਵੋਕੇਟ ਦੇ ਅਹੁਦੇ ਲਈ ਦੇਸ਼ ਭਰ ਵਿਚੋਂ ਪਹਿਲੇ ਸਥਾਨ 'ਤੇ ਰਿਹਾ।
            ਪਵਨਦੀਪ ਸਿੰਘ ਦੀ ਇਸ ਵਕਾਰੀ ਪ੍ਰਾਪਤੀ 'ਤੇ ਉਸਦੇ ਪਰਿਵਾਰ ਵਿਚ ਬਹੁਤ ਖੁਸ਼ੀ ਦਾ ਮਾਹੌਲ ਹੈ। ਪਿੰਡ ਲੰਬੀ ਦੇ ਸਧਾਰਨ ਕਿਸਾਨ ਪਰਿਵਾਰ ਬਹਾਲ ਸਿੰਘ ਦੇ ਹੋਣਹਾਰ ਪੋਤਰੇ ਪਵਨਦੀਪ ਸਿੰਘ ਦੇ ਸਿਰੋਂ ਬਚਪਨ 'ਚ ਆਪਣੇ ਪਿਤਾ ਛਿੰਦਰਪਾਲ ਪਾਲ ਸਿੰਘ ਦਾ ਸਾਇਆ ਸਿਰ ਤੋਂ ਉੱਠਣ ਦੇ ਬਾਵਜੂਦ ਉਸਦੇ ਦਾਦਾ ਬਹਾਲ ਸਿੰਘ, ਮਾਤਾ ਸੁਖਪ੍ਰੀਤ ਕੌਰ ਅਤੇ ਚਾਚਾ ਗੁਰਵਿੰਦਰ ਸਿੰਘ ਹੁਰਾਂ ਦੀ ਛਤਰਛਾਇਆ ਹੇਠ ਵਧ ਫੁੱਲ ਕੇ ਭਾਰਤੀ ਫੌਜ ਜਰੀਏ ਦੇਸ਼ ਸੇਵਾ ਲਈ ਜਜ਼ਬਾ ਪਰਵਾਨ ਚੜਿ•ਆ।
             ਪਵਨਦੀਪ ਸਿੰਘ ਨੇ ਦੱਸਿਆ ਕਿ 6 ਅਕਤੂਬਰ ਨੂੰ 11 ਮਹੀਨਿਆਂ ਦੀ ਟਰੇਨਿੰਗ ਲਈ ਚੇਨੰਈ ਵਿਖੇ ਆਫਿਸਰਜ਼ ਟਰੇਨਿੰਗ ਅਕੈਡਮੀ ਵਿਖੇ ਜਾ ਰਿਹਾ ਹੈ। ਪਵਨਦੀਪ ਨੇ ਦੱਸਿਆ ਕਿ ਭਾਰਤੀ ਫੌਜ ਦੇ ਨਿਯਮਾਂ ਅਨੁਸਾਰ ਟਰੇਨਿੰਗ ਉਪਰੰਤ ਉਸਦਾ ਸ਼ੁਰੂਆਤੀ ਰੈਂਕ ਲੈਫਟੀਨੈਂਟ ਹੋਵੇਗਾ, ਪਰ ਤਾਇਨਾਤੀ ਜੱਜ-ਐਡਵੋਕੇਟ ਜਰਨਲ ਬਰਾਂਚ ਵਿਚ ਜੱਜ-ਐਡਵੋਕੇਟ ਦੇ ਅਹੁਦੇ 'ਤੇ ਹੋਵੇਗੀ।
ਉਸਨੇ ਦੱਸਿਆ ਕਿ ਇੱਕ ਕਿਸਾਨ ਪਰਿਵਾਰ ਦਾ ਜੰਮਪਲ ਹੋਣ ਕਰਕੇ 'ਜੈ ਜਵਾਨ-ਜੈ ਕਿਸਾਨ' ਦੇ ਨਾਹਰੇ ਅਨੁਸਾਰ ਉਸਦੀ ਬਚਪਨ ਤੋਂ ਭਾਰਤੀ ਫੌਜ ਵਿਚ ਸੇਵਾ ਕਰਨ ਦੀ ਤਾਂਘ ਸੀ ਜਿਸਨੂੰ ਪਰਮਾਤਮਾ ਨੇ ਹੁਣ ਪੂਰਾ ਕਰ ਦਿੱਤਾ ਹੈ। ਉਸਨੇ ਦੱਸਿਆ ਕਿ ਆਪਣੀ ਜੁੰਮੇਵਾਰੀ ਨੂੰ ਪੂਰੀ ਤਨਦੇਹੀ ਨਾਲ ਨਿਭਾ ਕੇ ਆਪਣੇ ਖਾਨਦਾਨ , ਪਿੰਡ ਲੰਬੀ ਅਤੇ ਪੰਜਾਬ ਦਾ ਸਿਰ ਫਖ਼ਰ ਨਾਲ ਉੱਚ ਕਰਨ ਲਈ ਹਮੇਸ਼ਾਂ ਤਤੱਪਰ ਰਹੇਗਾ।

19 September 2011

ਜਦੋਂ ਪਿੰਡ ਬਾਦਲ 'ਚ ਘੋਨੇ-ਮੋਨੇ ਸਿਰਾਂ 'ਤੇ ਪੀਲੇ ਪਰਨੇ ਬੰਨ੍ਹ ਕੇ ਸਿੱਖ ਸੱਜਦੇ ਰਹੇ...

                     ਬਾਦਲ ਪਿੰਡ 'ਚ ਛਿੱਕੇ 'ਤੇ ਟੰਗੇ ਰਹੇ ਚੋਣ ਨਿਯਮ
                                    - ਲੰਬੀ ਖੇਤਰ ਦੇ ਪਿੰਡਾਂ ਵਿਚ ਬੂਥਾਂ 'ਤੇ ਕਬਜ਼ੇ-

                                            -ਇਕਬਾਲ ਸਿੰਘ ਸ਼ਾਂਤ-
ਬਾਦਲ : 18 ਸਤੰਬਰ ਨੂੰ ਸ਼੍ਰੋਮਣੀ ਕਮੇਟੀਆਂ ਚੋਣਾਂ ਵਿਚ ਸਹਿਜਧਾਰੀਆਂ ਨੂੰ ਵੋਟਾਂ ਦੇ ਹੱਕ ਦੀ ਤਿੱਖੀ ਵਿਰੋਧਤਾ ਕਰਨ ਵਾਲੇ ਸੂਬੇ ਦੇ ਮੌਜੂਦਾ ਹਾਕਮ ਬਾਦਲਾਂ ਪਿਉ-ਪੁੱਤ ਦੇ ਜੱਦੀ ਪਿੰਡ ਬਾਦਲ ਵਿਚ ਵਿਚ ਘੋਨੇ-ਮੋਨੇ ਲੋਕਾਂ ਨੇ ਰੱਜ ਕੇ ਵੋਟਾਂ ਪਾਈਆਂ। ਇਸ ਬਾਰੇ ਪੱਤਰਕਾਰਾਂ ਦੇ ਸਨਮੁੱਖ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਆਪਣੇ ਰਵਾਇਤੀ ਲਹਿਜੇ ਇਸ ਬਾਰੇ ਕੋਈ ਜਾਣਕਾਰੀ ਨਾ ਹੋਣ ਬਾਰੇ ਕਹਿ ਕੇ ਖਹਿੜਾ ਛੁਡਵਾ ਗਏ, ਜਦੋਂਕਿ ਦੂਜੇ ਪਾਸੇ ਉਪ ਮੁੱਖ ਸ: ਸੁਖਬੀਰ ਸਿੰਘ ਬਾਦਲ ਵੀ ਘੋਨੇ-ਮੋਨਿਆਂ ਦੇ ਵੋਟਾਂ ਨਾ ਪਾਉਣ ਦੇ ਨਿਯਮ ਦੀ ਸਮੁੱਚੀ ਜੁੰਮੇਵਾਰੀ ਚੋਣ ਅਮਲੇ 'ਤੇ ਸੁੱਟਦਿਆਂ ਆਪਣੇ ਸਮਰਥਕਾਂ ਦੀ ਕਾਰਗੁਜਾਰੀ 'ਤੇ ਬੜੀ ਕਾਮਯਾਬੀ ਨਾਲ ਪਰਦਾ ਪਾ ਗਏ। 


     ਇਸਦੇ ਇਲਾਵਾ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਗਿੱਦੜਬਾਹਾ ਹਲਕੇ ਦੇ ਤਹਿਤ ਪੈਂਦੇ ਲੰਬੀ ਖੇਤਰ ਦੇ ਹੋਰਨਾਂ ਪਿੰਡਾਂ ਵਿਚ ਵੀ ਸਹਿਜਧਾਰੀ ਸਿੱਖਾਂ ਅਤੇ ਗੈਰ ਸਿੱਖ ਲੋਕਾਂ ਨੇ ਵੋਟਾਂ ਪਾਈਆਂ, ਉਥੇ ਲੰਬੀ ਖੇਤਰ ਦੇ ਹੋਰਨਾਂ ਪਿੰਡਾਂ ਭੀਟੀਵਾਲਾ, ਚਨੂੰ, ਲਾਲਬਾਈ, ਪੰਜਾਵਾ, ਮਹਿਣਾ, ਮਿਠੜੀ ਬੁਧਗਿਰ ਅਤੇ ਗੱਗੜ ਮਹਿਣਾ ਸਮੇਤ ਹੋਰਨਾਂ ਪਿੰਡਾਂ ਵਿਚ ਵੀ ਵੱਡੇ ਪੱਧਰ 'ਤੇ ਅਕਾਲੀ ਉਮੀਦਵਾਰ ਦੇ ਸਮਰਥਕਾਂ ਵੱਲੋਂ ਕਥਿਤ ਧੱਕੇਸ਼ਾਹੀ ਅਤੇ ਖਾਕੀ ਦੇ ਬਲਬੂਤੇ 'ਤੇ ਡਰ ਤੇ ਖੌਫ਼ ਨੀਤੀ ਤਹਿਤ ਵਿਰੋਧੀ ਉਮੀਦਵਾਰਾਂ ਦੇ ਏਜੰਟਾਂ ਨੂੰ ਬੂਥਾਂ ਤੋਂ ਡਰਾ ਧਮਕਾ ਕੇ ਭਜਾਉਣ ਦੀਆਂ ਰਿਪੋਰਟਾਂ ਹਨ, ਉਥੇ ਲੰਬੀ ਖੇਤਰ ਦੇ ਬਹੁਤੇ ਪਿੰਡਾਂ ਵਿਚ ਵਿਰੋਧੀ ਉਮੀਦਵਾਰਾਂ ਦੇ ਟੈਂਟ ਵੀ ਨਹੀਂ ਲੱਗੇ, ਜਦੋਂਕਿ ਪਿੰਡ ਮਹਿਣਾ ਵਿਚ ਅਕਾਲੀ ਦਲ ਵਰਕਰਾਂ ਵੱਲੋਂ ਆਪਸੀ ਧੜੇਬੰਦੀ ਕਰਕੇ ਅਕਾਲੀ ਉਮੀਦਵਾਰਾਂ ਦੀ ਹਮਾਇਤ ਵਿਚ ਆਹਮੋ-ਸਾਹਮਣੇ ਦੋ ਵੱਖੋ-ਵੱਖਰੇ ਟੈਂਟ ਲਾ ਕੇ ਆਪੋ-ਆਪਣਾ ਸ਼ਕਤੀ ਪ੍ਰਦਰਸ਼ਨ ਕੀਤਾ ਗਿਆ। ਭਾਵੇਂ ਕਿ ਖੇਤਰ ਭਰ ਵਿਚ ਸਵੇਰੇ ਸਮੇਂ ਵੋਟਾਂ ਪਾਉਣ ਦੀ ਚਾਲ ਮੱਠੀ ਰਹੀ ਤੇ 11 ਵਜੇ ਦੇ ਬਾਅਦ ਬੂਥ 'ਤੇ ਵੋਟਰਾਂ ਦੀ ਲਾਈਨਾਂ ਲੰਮੀਆਂ ਹੋਣ ਲੱਗੀਆਂ।
                 ਮੁੱਖ ਮੰਤਰੀ ਦੇ ਪਿੰਡ ਬਾਦਲ ਦੇ ਸਰਕਾਰੀ ਸੀਨੀਅਰ ਸੈਕੰਡਰੀ ਸਕੂਲ ਵਿਖੇ ਬੂਥ ਨੰਬਰ 42 ਅਤੇ 43 ਵਿਚ ਵੋਟਾਂ ਪੈਣ ਦਾ ਕੰਮ ਸ਼ੁਰੂ ਹੋਣ ਦੇ ਨਾਲ ਹੀ ਸੱਤਾ ਪੱਖ ਦੇ ਸਮਰਥਕਾਂ ਵੱਲੋਂ ਵੱਡੇ ਪੱਧਰ 'ਤੇ ਪਿੰਡ ਵਿਚ ਬਣੇ ਗੈਰ ਸਿੱਖ ਅਤੇ ਸਹਿਜਧਾਰੀ ਸਿੱਖਾਂ ਦੇ ਵੋਟਾਂ ਨੂੰ ਭੁਗਤਾਉਣ ਦੀ ਕਾਰਗੁਜਾਰੀ ਸ਼ੁਰੂ ਹੋ ਗਈ। ਜਿਸਦੇ ਤਹਿਤ ਇਨ੍ਹਾਂ ਪੰਥਕ ਵੋਟਾਂ ਵਿਚ ਹਾਈਕੋਰਟ ਅਤੇ ਗੁਰਦੁਆਰਾ ਚੋਣ ਕਮਿਸ਼ਨ ਦੀਆਂ ਸਖ਼ਤ ਹਦਾਇਤਾਂ ਦੇ ਬਾਵਜੂਦ ਬੂਥਾਂ ਦੇ ਬਾਹਰ ਸਹਿਜਧਾਰੀ ਸਿੱਖ ਅਤੇ ਮੋਨੇ ਵਿਅਕਤੀ ਵੱਡੀ ਤਾਦਾਦ ਵਿਚ ਸਿਰਾਂ 'ਤੇ ਨਵੇਂ-ਨਕੋਰ ਪੀਲੇ ਪਰਨੇ ਬੰਨ੍ਹ ਕੇ ਕਤਾਰਾਂ ਵਿਚ ਲੱਗੇ ਹੋਏ ਸਨ। ਜਿਨ੍ਹਾਂ ਨੂੰ ਖੇਤਰ ਦੇ ਇੱਕ ਸਰਕਾਰੀ ਨਰਸਿੰਗ ਅਦਾਰੇ ਵਿਚ ਤਾਇਨਾਤ ਇੱਕ ਡਾਕਟਰ ਅਤੇ ਉਥੋਂ ਦੇ ਕੁਝ ਸਹਿਜਧਾਰੀ ਕਰਮਚਾਰੀ ਸੱਤਾ ਪੱਖ ਦੇ ਆਗੂਆਂ ਵਜੋਂ ਵਿਚਰਦੇ ਹੋਏ ਸਕੂਲ ਦੇ ਇੱਕ ਹਿੱਸੇ ਵਿਚੋਂ ਮੋਨੇ ਲੋਕਾਂ ਦੇ ਸਿਰਾਂ 'ਤੇ ਨਵੇਂ-ਨਵੇਂ ਪੀਲੇ ਪਰਨੇ ਬੰਨਵਾ ਕੇ ਵੋਟ ਪੁਆਉਣ ਲਈ ਪੂਰੀ ਤਰ੍ਹਾਂ ਸਰਗਰਮ ਰਹੇ। ਜਦੋਂਕਿ ਗੁਰਦੁਆਰਾ ਚੋਣ ਕਮਿਸ਼ਨ ਵੱਲੋਂ ਸਹਿਜਧਾਰੀ ਵੋਟਰਾਂ 'ਤੇ ਵੋਟ ਪਾਉਣ 'ਤੇ ਪਾਬੰਦੀ ਦੇ ਬਾਵਜੂਦ ਬੂਥਾਂ ਵਿਚ ਲੱਗੀਆਂ ਕਤਾਰਾਂ ਬਾਰੇ ਬੂਥਾਂ 'ਤੇ ਤਾਇਨਾਤ ਅਮਲੇ ਨੂੰ ਮੋਨੇ ਵਿਅਕਤੀਆਂ ਦੇ ਵੋਟ ਪਾਉਣ 'ਤੇ ਉਨ੍ਹਾਂ ਦਾ ਰਵੱਈਆ ਵੀ ਪੂਰੀ ਤਰ੍ਹਾਂ ਸੱਤਾ ਪੱਖ ਵੱਲ ਝੁਕਦਾ ਨਜ਼ਰ ਆਇਆ, ''ਜਦੋਂ ਉਨ੍ਹਾਂ ਕਿਹਾ ਕਿ ਵੋਟਰ ਲਿਸਟ ਵਿਚ ਨਾਮ ਹੋਣ ਕਰਕੇ ਅਸੀਂ ਉਨ੍ਹਾਂ ਨੂੰ ਵੋਟ ਪਾਉਣੋਂ ਤਾਂ ਨਹੀਂ ਰੋਕ ਸਕਦੇ। ਇਸ ਦੌਰਾਨ ਬੂਥ ਵਿਚ ਚੋਣ ਅਮਲੇ ਦੇ ਕਈ ਭੂਤਰੇ ਕਰਮਚਾਰੀ ਪੱਤਰਕਾਰਾਂ ਨੂੰ ਟੇਢੀਆਂ ਅੱਖਾਂ ਨਾਲ ਘੂਰਦੇ ਵੀ ਵੇਖੇ ਗਏ।
                 ਇਸੇ ਦੌਰਾਨ ਬੂਥ ਦੇ ਬਾਹਰ ਸਿਰ 'ਤੇ ਪੀਲਾ ਪਰਨਾ ਬੰਨ੍ਹਣ 'ਚ ਜੁਟੇ ਜੈਲਾ ਸਿੰਘ ਨਾਂ ਦੇ ਇੱਕ ਬਜ਼ੁਰਗ ਨੂੰ ਪੁੱਛਣ 'ਤੇ ਬਾਬਾ ਜੀ, ਤੁਸੀਂ ਅਵਤਾਰ ਸਿੰਘ ਮੱਕੜ ਨੂੰ ਪ੍ਰਧਾਨ ਬਣਾਉਣ ਲਈ ਵੋਟਾਂ ਪਾਉਣ ਆਏ ਹੋ ਜਾਂ ਬਾਦਲ ਸਾਬ੍ਹ ਨੂੰ। ਜਿਸ 'ਤੇ ਬਾਬੇ ਨੇ ਜਵਾਬ ਦਿੱਤਾ ਕਿ ਮੈਂ ਕਿਸੇ ਮੱਕੜ ਨੂੰ ਨਹੀਂ ਜਾਣਦਾ, ਮੈਂ ਤਾਂ ਬਾਦਲ ਸਾਬ੍ਹ ਨੂੰ ਵੋਟਾਂ ਪਾਉਣ ਆਇਆ ਹਾਂ।
ਇਸੇ ਦੌਰਾਨ ਬੂਥ ਨੰਬਰ 42 ਵਿਚ ਕਿਸੇ ਸਰਕਾਰੀ ਅਦਾਰੇ ਵਿਚ ਤਾਇਨਾਤ ਰਾਜਵੰਤ ਸਿੰਘ ਨਾਂ ਦੇ ਇੱਕ ਮੋਨੇ ਵੋਟਰ ਨੇ ਬਿਨ੍ਹਾ ਕਿਸੇ ਪੀਲੇ ਪਰਨੇ ਦੇ ਖੁੱਲ੍ਹੇਆਮ ਵੋਟ ਪਾਈ। ਇਸ ਬਾਰੇ ਪੁੱਛਣ 'ਤੇ ਉਸਦਾ ਪੱਖ ਪੂਰਦਿਆਂ ਬੂਥ ਅਮਲੇ ਨੇ ਕਿਹਾ ਕਿ ਇਹਨੇ ਤਾਂ ਇਕੱਲੀ ਦਾੜੀ ਕਟਾਈ ਹੋਈ ਹੈ। ਜਦੋਂ ਕਿ ਉਹ ਸਿਰੋਂ ਵੀ ਸੌ ਫੀਸਦੀ ਮੋਨਾ ਸੀ।
                 ਇਸੇ ਦੌਰਾਨ ਪੱਤਰਕਾਰਾਂ ਅਤੇ ਸਿਰਾਂ 'ਤੇ ਪੀਲੇ ਪਰਨੇ ਬੰਨ੍ਹ ਕੇ ਵੋਟਾਂ ਪਾਉਣ ਵਾਲਿਆਂ ਵਿਚ ਕਾਫ਼ੀ ਦੇਰ ਤੱਕ ਲੁੱਕਣ ਮਿੱਚੀ ਦਾ ਖੇਡ ਵੀ ਚੱਲਦਾ ਰਿਹਾ। ਪੱਤਰਕਾਰਾਂ ਵੱਲੋਂ ਕਤਾਰਾਂ ਵਿਚ ਲੱਗੇ ਮੋਨੇ ਵਿਅਕਤੀਆਂ ਦੀਆਂ ਫੋਟੋਆਂ ਖਿੱਚਣ ਦੀ ਕੋਸ਼ਿਸ਼ ਕਰਨ 'ਤੇ ਸੱਤਾ ਪੱਖ ਦੇ ਸਮਰਥਕ ਉਨ੍ਹਾਂ ਨੂੰ ਉਥੋਂ ਥੋੜ੍ਹੀ ਦੇਰ ਬਾਅਦ ਆਉਣ ਬਾਰੇ ਕਹਿ ਕੇ ਖਿਸਕਾ ਦਿੰਦੇ ਸਨ। ਇਸ ਮੌਕੇ ਕਈ ਅਜਿਹੇ ਵੀ ਵਿਅਕਤੀ ਵੇਖੇ ਗਏ ਜਿਹੜੇ ਸਿਰਾਂ ਤੋਂ ਮੋਨੇ ਸਨ ਅਤੇ ਉਨ੍ਹਾਂ ਦੀਆਂ ਜੇਬਾਂ ਵਿਚੋਂ ਜਰਦਾ ਅਤੇ ਤੰਬਾਕੂ ਜਿਹੇ ਨਸ਼ੇ ਵੇਖੇ ਗਏ।
               ਇਸੇ ਤਰ੍ਹਾਂ ਪੌਨੇ ਇੱਕ ਵਜੇ ਦੇ ਇੱਕ ਵੱਡੇ ਘਰ ਦੇ ਅੱਧੀ ਦਰਜਨ ਦੇ ਕਰੀਬ ਮੋਨੇ ਲਾਂਗਰੀ ਵੀ ਨਵੇਂ ਨਕੋਰ ਪਰਨੇ ਸਿਰਾਂ 'ਤੇ ਬੰਨ੍ਹ ਕੇ ਬੂਥ ਨੰਬਰ 42 'ਤੇ ਪੁੱਜਣ 'ਤੇ ਪੱਤਰਕਾਰਾਂ ਵੱਲੋਂ ਫੋਟੋਆਂ ਖਿੱਚਣ 'ਤੇ ਬੂਥ ਵਿਚੋਂ ਇਸ਼ਾਰਾ ਮਿਲਣ 'ਤੇ ਬਿਨ੍ਹਾਂ ਵੋਟ ਪਾਏ ਦੌੜ ਗਏਤ।
               ਪਿੰਡ ਬਾਦਲ ਦੇ ਵਸਨੀਕ ਮੁੱਖਜੀਤ ਸਿੰਘ ਨੇ ਕਿਹਾ ਕਿ ਪੰਥਕ ਚੋਣਾਂ ਵਿਚ ਮੋਨੇ ਵਿਅਤਕੀਆਂ ਦੀ ਸ਼ਮੂਲੀਅਤ 'ਤੇ ਸੁਆਲ ਖੜ੍ਹਾ ਕਰਦਿਆਂ ਕਿਹਾ ਕਿ ਪਿੰਡ ਬਾਦਲ ਵਿਚੋ ਪੂਰਨ ਗੁਰ ਮਰਿਆਦਾ ਵਾਲੇ ਸਿੱਖਾਂ ਦੀ ਭਾਲ ਕਰਨ 'ਤੇ ਅੰਕੜਾ 50 ਤੋਂ ਹੇਠਾਂ ਰਹਿ ਸਕਦਾ ਹੈ, ਪਰ ਇੱਥੇ ਪਰਨੇ ਬੰਨ੍ਹ ਕੇ ਹਰੇਕ ਸਿੱਖ ਬਣਿਆ ਫਿਰਦਾ ਹੈ।
                 ਇਸੇ ਤਰ੍ਹਾਂ ਮਹਿੰਦਰ ਸਿੰਘ ਨਾਂ ਦੇ ਇੱਕ ਵੋਟਰ ਨੇ ਕਿਹਾ ਕਿ ਸਰਕਾਰ ਨੂੰ ਚਾਹੀਦਾ ਹੈ ਕਿ ਸਿੱਖਾਂ ਅਤੇ ਗੈਰ ਸਿੱਖਾਂ ਦੇ ਮਾਮਲੇ ਵਿਚ ਮੁੜ ਤੋਂ ਵਿਚਾਰ ਕਰਕੇ ਕਾਨੂੰਨ ਬਣਾਇਆ ਜਾਵੇ, ਤਾਂ ਜੋ ਪੰਥਕ ਹਿੱਤਾਂ ਦਾ ਘਾਣ ਨਾ ਹੋ ਸਕੇ।
ਸ਼੍ਰੋਮਣੀ ਅਕਾਲੀ ਦਲ (ਅੰਮ੍ਰਿਤਸਰ) ਦੇ ਉਮੀਦਵਾਰ ਹਰਦੀਪ ਸਿੰਘ ਦੇ ਪੁੱਤਰ ਮਨਿੰਦਰ ਸਿੰਘ ਨੇ ਦੋਸ਼ ਲਾਇਆ ਕਿ ਲੰਬੀ ਹਲਕੇ ਦੇ ਪਿੰਡਾਂ ਚਨੂੰ, ਲਾਲਬਾਈ, ਪੰਜਾਵਾ, ਮਹਿਣਾ, ਮਿਠੜੀ ਬੁਧਗਿਰ ਅਤੇ ਗੱਗੜ ਵਿਖੇ ਵੀ ਅਕਾਲੀ ਦਲ ਉਮੀਦਵਾਰ ਦੇ ਵੱਡੀ ਗਿਣਤੀ ਸਮਰਥਕਾਂ ਨੇ ਬੂਥਾਂ 'ਚ ਪਹੁੰਚ ਕੇ ਅਕਾਲੀ ਦਲ (ਅ) ਅਤੇ ਪੰਥਕ ਮੋਰਚੇ ਦੇ ਪੋਲਿੰਗ ਏਜੰਟਾਂ ਨੂੰ ਬੂਥਾਂ ਵਿਚੋਂ ਜ਼ਬਰਦਸਤੀ ਬਾਹਰ ਕੱਢ ਕੇ ਕਬਜ਼ਾ ਕਰ ਲਿਆ ਗਿਆ। ਉਨ੍ਹਾਂ ਦੱਸਿਆ ਕਿ ਪਿੰਡ ਚਨੂੰ ਵਿਖੇ ਤਿੰਨ ਬੂਥ ਦੀਆਂ ਲਗਪਗ 22 ਸੌ ਵੋਟਾਂ ਵਿਚੋਂ ਇੱਕ ਹਜ਼ਾਰ ਵੋਟਾਂ ਪਈਆਂ ਸਨ। ਜਿਸਦੇ ਬਾਅਦ ਬੂਥ 'ਤੇ ਕਬਜ਼ਾ ਹੋ ਗਿਆ।
                 ਇਸੇ ਤਰ੍ਹਾਂ ਪਿੰਡ ਭੀਟੀਵਾਲਾ ਵਿਖੇ ਬੂਥ ਨੰਬਰ 11 ਅਤੇ 12 ਵਿਖੇ ਧੱਕੇਸ਼ਾਹੀ ਅਤੇ ਬੂਥ 'ਤੇ ਕਬਜ਼ਾ ਕਰਨ ਦੀਆਂ ਰਿਪੋਰਟਾਂ ਹਨ। ਪੰਥਕ ਮੋਰਚੇ ਦੇ ਉਮੀਦਵਾਰ ਮਹੈਣ ਸਿੰਘ ਪੋਲਿੰਗ ਏਜੰਟ ਜਗਵਿੰਦਰ ਸਿੰਘ ਨੇ ਦੋਸ਼ ਲਾਇਆ ਕਿ ਸਵੇਰੇ ਲਗਪਗ ਸਾਢੇ 11 ਵਜੇ  ਕੁਝ ਅਕਾਲੀ ਆਗੂਆਂ ਨੇ ਬੂਥ ਨੰਬਰ 11 ਵਿਚ ਪਹੁੰਚੇ ਅਤੇ ਉਸਨੂੰ ਧੱਕੇ ਮਾਰ ਕੇ ਬੂਥ ਕੱਢ ਦਿੱਤਾ ਗਿਆ ਅਤੇ ਨਾਲ ਹੀ ਬੂਥ 11 'ਤੇ ਤਾਇਨਾਤ ਇੱਕ ਪੁਰਸ਼ ਅਤੇ ਤਿੰਨ ਔਰਤ ਮੁਲਾਜਮਾਂ ਨੂੰ ਵੀ ਕਥਿਤ ਤੌਰ 'ਤੇ ਬਾਹਰ ਭੇਜ ਕੇ ਕੁੰਡਾ ਜੜ੍ਹ ਲਿਆ। ਜਗਵਿੰਦਰ ਸਿੰਘ ਨੇ ਦੱਸਿਆ ਕਿ ਇਸੇ ਤਰ੍ਹਾਂ ਉਸਦੇ ਬਾਅਦ ਬੂਥ ਨੰਬਰ 12 ਵਿਚ ਅਜਿਹੀ ਹੀ ਕਾਰਵਾਈ ਹੋਈ।
ਇਸੇ ਤਰ੍ਹਾਂ ਪਿੰਡ ਮਹਿਣਾ ਵਿਖੇ ਵੀ ਪੰਥਕ ਮੋਰਚਾ ਅਤੇ ਅਕਾਲੀ ਦਲ (ਅ) ਦੇ ਉਮੀਦਵਾਰ ਦੇ ਸਮਰਥਕਾਂ ਮਲਕੀਤ ਸਿੰਘ, ਨੈਬ ਸਿੰਘ, ਛਿੰਦਰਪਾਲ ਸਿੰਘ ਅਤੇ ਨੈਬ ਸਿੰਘ ਬੈਣੀਵਾਲ ਨੂੰ ਸੱਤਾ ਪੱਖ ਵੱਲੋਂ ਇੱਕ ਦਬਾਊ ਨੀਤੀ ਦੇ ਤਹਿਤ ਸਰਕਾਰੀ ਐਲੀਮੈਂਟਰੀ ਸਕੂਲ ਵਿਖੇ ਸਥਿਤ ਚੋਣ ਬੂਥਾਂ ਦੇ ਨੇੜੇ ਵੀ ਫੜਕਣ ਨਹੀਂ ਦਿੱਤਾ ਗਿਆ। ਮਲਕੀਤ ਸਿੰਘ ਨੇ ਦੋਸ਼ ਲਾਇਆ ਕਿ ਪਿੰਡ ਮਹਿਣਾ ਵਿਖੇ ਸੱਤਾ ਪੱਖ ਦੇ ਵਰਕਰਾਂ ਵੱਲੋਂ ਦਿਨ ਭਰ ਪਿੰਡ ਦੇ ਬੂਥਾਂ ਵਿਚ ਖੁੱਲ੍ਹੀਆਂ ਖੇਡਾਂ ਖੇਡਦਿਆਂ ਲੋਕਤੰਤਰ ਦੀਆਂ ਧੱਜੀਆਂ ਉਡਾਈਆਂ ਗਈਆਂ।
                ਦੂਜੇ ਪਾਸੇ ਸੰਪਰਕ ਕਰਨ 'ਤੇ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪੁਲਿਸ ਮੁਖੀ ਇੰਦਰਮੋਹਣ ਸਿੰਘ ਨੇ ਦੱਸਿਆ ਕਿ ਦੱਸਿਆ ਕਿ ਗਿੱਦੜਬਾਹਾ ਹਲਕੇ ਦੇ ਲੰਬੀ ਖੇਤਰ ਵਿਚ ਚੋਣ ਪੂਰੀ ਤਰ੍ਹਾਂ ਸੁਖਾਂਵੇ ਮਾਹੌਲ ਵਿਚ ਹੋਈ ਹੈ ਤੇ ਕਿਸੇ ਵੀ ਪਿੰਡ ਵਿਚੋਂ ਬੂਥਾਂ 'ਤੇ ਕਬਜ਼ੇ ਜਾਂ ਕਿਸੇ ਤਰ੍ਹਾਂ ਦੇ ਤਣਾਅ ਦੀ ਸ਼ਿਕਾਇਤ ਪੁਲਿਸ ਕੋਲ ਨਹੀਂ ਪੁੱਜੀ।


ਮੁੱਖ ਮੰਤਰੀ, ਉੱਪ ਮੁੱਖ ਮੰਤਰੀ ਅਤੇ ਹਰਸਿਮਰਤ ਬਾਦਲ ਨੇ ਪਿੰਡ ਬਾਦਲ 'ਚ ਵੋਟ ਪਾਈ
ਪੰਜਾਬ ਸ: ਪ੍ਰਕਾਸ਼ ਸਿੰਘ ਬਾਦਲ, ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਅਤੇ ਬੀਬੀ ਹਰਸਿਮਰਤ ਕੌਰ ਨੇ ਅੱਜ ਪਿੰਡ ਬਾਦਲ ਪਿੰਡ ਵਿਖੇ ਆਪਣੇ ਵੋਟ ਪਾਉਣ ਦੀ ਅਧਿਕਾਰ ਦੀ ਵਰਤੋਂ ਕੀਤੀ। ਜਦੋਂਕਿ ਪੀ.ਪੀ.ਪੀ. ਦੇ ਆਗੂ ਸ: ਮਨਪ੍ਰੀਤ ਸਿੰਘ ਬਾਦਲ ਅਤੇ ਉਨ੍ਹਾਂ ਦੇ ਪਿਤਾ ਸ: ਗੁਰਦਾਸ ਸਿੰਘ ਬਾਦਲ ਨੇ ਆਪਣੇ ਵੋਟ ਨਹੀਂ ਪਾਏ।
ਇਸ ਮੌਕੇ ਵੋਟ ਪਾਉਣ ਉਪਰੰਤ ਜਿੱਥੇ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਮੁੱਖ ਮੰਤਰੀ ਸ: ਪ੍ਰਕਾਸ਼ ਸਿੰਘ ਬਾਦਲ ਨੇ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਦੀਆਂ ਧਾਰਮਿਕ ਚੋਣਾਂ ਵਿਚ ਕਾਂਗਰਸ ਵੱਲੋਂ ਖੁੱਲ੍ਹਾ ਦਖਲ ਦੇਣ ਕਰਕੇ ਭਾਈਚਾਰੇ  ਵਿਚ ਭਾਰੀ ਰੋਸ ਹੈ ਅਤੇ ਜਾਗਰੂਕ ਹੋਏ ਲੋਕ ਕਾਂਗਰਸ ਦੀ ਕਾਰਗੁਜਾਰੀ ਨੂੰ ਚੰਗੀ ਤਰ੍ਹਾਂ ਸਮਝਦੇ ਹੋਏ ਸ਼੍ਰੋਮਣੀ ਕਮੇਟੀ ਚੋਣਾਂ ਵਿਚ ਅਕਾਲੀ ਦਲ (ਬ) ਨੂੰ ਹੂੰਝਾਫੇਰ ਜਿੱਤ ਦਰਜ ਕਰਵਾਉਣਗੇ। ਮੁੱਖ ਮੰਤਰੀ ਨੇ ਬਾਦਲ ਪਿੰਡ ਵਿਚ ਗੈਰ ਸਿੱਖ ਅਤੇ ਸਹਿਜਧਾਰੀ ਲੋਕਾਂ ਦੀਆਂ ਵੋਟਾਂ ਦੇ ਬਾਰੇ ਪੁੱਛੇ ਸੁਆਲ 'ਤੇ ਬੋਲਦਿਆਂ ਮੁੱਖ ਮੰਤਰੀ ਨੇ ਬੜੇ ਸਾਊ ਜਿਹੇ ਢੰਗ ਵਿਚ ਕਿਹਾ ਕਿ ''ਨਾ ਤਾਂ ਮੈਨੂੰ ਵੋਟਾਂ ਬਣਨ ਦਾ ਪਤੈ ਅਤੇ ਨਾ ਹੀ ਵੋਟਾਂ ਪਾਉਣਾ।''
ਜਦੋਂਕਿ ਦੂਜੇ ਪਾਸੇ ਉਪ ਮੁੱਖ ਮੰਤਰੀ ਸ: ਸੁਖਬੀਰ ਸਿੰਘ ਬਾਦਲ ਨੇ ਵੋਟ ਪਾਉਣ ਉਪਰੰਤ ਪੱਤਰਕਾਰਾਂ ਦੇ ਮੁਖਾਤਿਬ ਹੁੰਦਿਆਂ ਪਿੰਡ ਬਾਦਲ 'ਚ ਸਹਿਜਧਾਰੀ ਅਤੇ ਗੈਰ ਸਿੱਖਾਂ ਵੱਲੋਂ ਵੋਟਾਂ ਪਾਉਣ ਬਾਰੇ ਇੱਕ ਸੁਆਲ ਦੇ ਜਵਾਬ ਵਿਚ ਕਿਹਾ ਕਿ ਸ਼੍ਰੋਮਣੀ ਕਮੇਟੀ ਚੋਣਾਂ ਦੇ ਨਿਯਮਾਂ ਅਨੁਸਾਰ ਕੋਈ ਵੀ ਸਹਿਜਧਾਰੀ ਜਾਂ ਗੈਰ ਸਿੱਖ ਵੋਟਾਂ ਪਾਉਣ ਦਾ ਅਧਿਕਾਰ ਨਹੀਂ ਰੱਖਦਾ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਨਿਰਦੇਸ਼ਾਂ ਨੂੰ ਲਾਗੂ ਕਰਨ ਦੀ ਜੁੰਮੇਵਾਰੀ ਬੂਥਾਂ 'ਚ ਤਾਇਨਾਤ ਅਮਲੇ ਦੀ ਹੈ। ਉਨ੍ਹਾਂ ਸ਼੍ਰੋਮਣੀ ਕਮੇਟੀ ਚੋਣਾਂ ਨੂੰ ਪੰਜਾਬ ਵਿਧਾਨਸਭਾ ਚੋਣਾਂ ਦਾ ਸੈਂਪਲ ਕਰਾਰ ਦਿੰਦਿਆਂ ਕਿਹਾ ਕਿ ਅਸੀਂ ਸੈਂਪਲ ਜਿੱਤ ਕੇ ਵਿਧਾਨਸਭਾ ਚੋਣਾਂ ਵਿਚ ਸ਼ਾਨਦਾਰ ਢੰਗ ਨਾਲ ਜਿੱਤਾਂਗੇ।
ਵੋਟ ਪਾਉਣ ਵੱਖੋ-ਵੱਖਰੇ ਤੌਰ 'ਤੇ ਪੁੱਜੇ ਬਾਦਲ ਪਿਉ-ਪੁੱਤਾਂ ਨੇ ਪਿੰਡ ਦੇ ਸਰਕਾਰੀ ਸਕੂਲ ਵਿਖੇ ਬਣੇ ਬੂਥ ਨੰਬਰ 42 ਵਿਚ ਵੋਟ ਪਾਇਆ। ਮੁੱਖ ਮੰਤਰੀ ਸ੍ਰੀ ਪ੍ਰਕਾਸ਼ ਸਿੰਘ ਬਾਦਲ ਲਗਭਗ ਸਾਢੇ 9 ਵਜੇ ਵੋਟ ਪਾਉਣ ਪੁੱਜੇ। ਵੋਟ ਪਾਉਣ ਉਪਰੰਤ ਸ੍ਰੀ ਬਾਦਲ ਤੁਰੰਤ ਹੈਲੀਕਾਪਟਰ ਰਾਹੀਂ ਚੰਡੀਗੜ੍ਹ ਰਵਾਨਾ ਹੋ ਗਏ ਅਤੇ ਉਹ ਆਪਣੇ ਰੁਝੇਂਵਿਆਂ ਕਰਕੇ ਬਿਲਕੁੱਲ ਸਾਹਮਣੇ ਸਥਿਤ ਆਪਣੀ ਰਿਹਾਇਸ਼ਗਾਹ 'ਤੇ ਜਾਣ ਦਾ ਵਕਤ ਵੀ ਨਹੀਂ ਕੱਢ ਸਕੇ।
ਜਦੋਂਕਿ ਉਨ੍ਹਾਂ ਦੇ ਪੁੱਤਰ ਅਤੇ ਸ਼੍ਰੋਮਣੀ ਅਕਾਲੀ ਦਲ ਦੇ ਪ੍ਰਧਾਨ ਸ: ਸੁਖਬੀਰ ਸਿੰਘ ਬਾਦਲ ਆਪਣੀ ਸੰਸਦ ਮੈਂਬਰ ਪਤਨੀ ਬੀਬੀ ਹਰਸਿਮਕਤ ਕੌਰ ਬਾਦਲ ਨਾਲ ਦਿੱਲੀ ਤੋਂ ਲਗਪਗ ਪੌਨੇ 1 ਵਜੇ ਦੇ ਹੈਲੀਕਾਪਟਰ 'ਤੇ ਵੋਟ ਪਾਉਣ ਲਈ ਪਿੰਡ ਬਾਦਲ ਪੁੱਜੇ।
ਮੁੱਖ ਮੰਤਰੀ ਪਰਿਵਾਰ ਦੇ ਤਿੰਨ ਪ੍ਰਮੁੱਖ ਮੈਂਬਰਾਂ ਨੇ ਬੂਥ ਨੰਬਰ 42 ਵਿਚ ਵੋਟ ਨੰਬਰ 852, 854 ਅਤੇ 855 ਦੇ ਤਹਿਤ ਵੋਟਾਂ ਪਾਈਆਂ।

            ਇਸਦੇ ਇਲਾਵਾ ਬਾਦਲ ਖਾਨਦਾਨ ਦੀਆਂ ਹੋਰਨਾਂ ਪ੍ਰੁਮੱਖ ਸ਼ਖਸੀਅਤਾਂ ਵਿਚ ਸੀਨੀਅਰ ਕਾਂਗਰਸ ਆਗੂ ਸ: ਮਹੇਸ਼ਇੰਦਰ ਸਿੰਘ ਬਾਦਲ, ਮੁੱਖ ਮੰਤਰੀ ਦੇ ਰਾਜਸੀ ਸਕੱਤਰ (ਰਾਜ ਮੰਤਰੀ) ਮੇਜਰ ਭੁਪਿੰਦਰ ਸਿੰਘ ਬਾਦਲ ਅਤੇ ਪਰਮਜੀਤ ਸਿੰਘ ਲਾਲੀ ਨੇ ਆਪਣੇ ਵੋਟ ਦੇ ਅਧਿਕਾਰ ਦੀ ਵਰਤੋਂ ਕੀਤੀ। ਜਦੋਂਕਿ ਬਾਦਲ ਖਾਨਦਾਨ ਦੇ ਸੀਨੀਅਰ ਮੈਂਬਰ ਅਤੇ ਸਾਬਕਾ ਟਰਾਂਸਪੋਰਟ ਮੰਤਰੀ ਸ: ਹਰਦੀਪਇੰਦਰ ਸਿੰਘ ਬਾਦਲ ਆਪਣੀ ਵੋਟ ਨਾ ਬਣੀ ਹੋਣ ਕਰਕੇ ਵੋਟ ਪਾਉਣ ਦੇ ਅਧਿਕਾਰ ਤੋਂ ਵਾਂਝੇ ਰਹੇ। 

16 September 2011

ਰਾਜਸਥਾਨ ਦੀ 'ਲਾਈਫ ਲਾਈਨ' ਬਣ ਚੱਲੀ ਸੀ ਪੰਜਾਬੀਆਂ ਅਤੇ ਹਰਿਆਣਵੀਆਂ ਲਈ ਡੈੱਡ ਲਾਈਨ

    -ਭਾਰੀ ਮੀਂਹ ਕਰਕੇ ਰਾਜਸਥਾਨ ਕੈਨਾਲ ਨਹਿਰ ਦੀ ਪਟੜੀ 'ਚ 15 ਫੁੱਟ ਚੌੜਾ ਤੇ 22 ਫੁੱਟ ਡੂੰਘਾ ਪਿਆ ਘਾਰਾ-

                                                               ਇਕਬਾਲ ਸਿੰਘ ਸ਼ਾਂਤ
ਲੰਬੀ ਖੇਤਰ ਵਿਚ ਮੋਹਲੇਧਾਰ ਬਰਸਾਤ ਕਰਕੇ 16 ਸਤੰਬਰ ਦੇਰ ਸ਼ਾਮ ਨੂੰ ਉਸ ਵੇਲੇ ਪੰਜਾਬ, ਹਰਿਆਣਾ ਅਤੇ ਰਾਜਸਥਾਨ ਦੇ ਇਸ ਸਰਹੱਦੀ ਇਲਾਕੇ ਦੀ ਸਮੁੱਚੀ ਹੋਂਦ ਨੂੰ ਖ਼ਤਰਾ ਪੈਦਾ ਹੋ ਗਿਆ ਜਦੋਂ ਲੰਬੀ ਹਲਕੇ ਦੇ ਪਿੰਡ ਮਿੱਡੂਖੇੜਾ ਦੇ ਨਜ਼ਦੀਕ ਰਾਜਸਥਾਨ ਕੈਨਾਲ ਨਹਿਰ ਦੀ ਪਟੜੀ ਤੋਂ ਮਿੱਟੀ ਖਿਸਕਣ ਕਰਕੇ ਤਕਰੀਬਨ 15 ਫੁੱਟ ਚੌੜਾ ਅਤੇ 20-20 ਫੁੱਟ ਡੂੰਘਾ ਘਾਰਾ ਪੈ ਗਿਆ।
ਇਸ ਬਾਰੇ ਸੂਚਨਾ ਮਿਲਣ 'ਤੇ ਨਹਿਰ ਦੀ ਜੜ੍ਹ ਵਿਚ ਮੌਜੂਦ ਪਿੰਡ ਮਿੱਡੂਖੇੜਾ ਵਿਚ ਭਾਜੜ ਪੈ ਗਈ ਅਤੇ ਵੱਡੀ ਤਾਦਾਦ ਪਿੰਡ ਵਾਸੀ ਮੌਕੇ 'ਤੇ ਪੁੱਜੇ ਅਤੇ ਸਥਿਤੀ ਦੀ ਗੰਭੀਰਤਾ ਦੇ ਮੱਦੇਨਜ਼ਰ ਜ਼ਿਲ੍ਹਾ ਪ੍ਰਸ਼ਾਸਨ ਨੂੰ ਸੂਚਿਤ ਕਰਨ ਦੇ ਨਾਲ-ਨਾਲ ਪਿੰਡ ਵਾਸੀਆਂ ਨੇ ਹੌਂਸਲਾ ਅਫਜਾਈ ਭਰਿਆ ਕਦਮ ਚੁੱਕਦਿਆਂ ਆਪਣੇ ਪੱਧਰ 'ਤੇ ਰਾਹਤ ਕਾਰਜ ਆਰੰਭ ਕਰ ਦਿੱਤੇ।
             ਮਾਰਕਫੈੱਡ ਦੇ ਨਿਦੇਸ਼ਕ ਅਤੇ ਸਹਿਕਾਰੀ ਬੈਂਕ ਮੁਸਕਤਰ ਦੇ ਚੇਅਰਮੈਨ ਸ: ਤੇਜਿੰਦਰ ਸਿੰਘ ਮਿੱਡੂਖੇੜਾ ਅਤੇ ਪਿੰਡ ਦੇ ਸਰਪੰਚ ਗੁਰਬਖਸ਼ੀਸ਼ ਸਿੰਘ ਵਿੱਕੀ ਨੇ ਦੱਸਿਆ ਕਿ ਅੱਜ ਦੇਰ ਸ਼ਾਮ ਤਕਰੀਬਨ ਸਾਢੇ 6 ਵਜੇ ਪਿੰਡ ਦੇ ਨਜ਼ਦੀਕ ਮਿੱਡੂਖੇੜਾ ਤੋਂ ਫੱਤਾਕੇਰਾ ਅਤੇ ਹਾਕੂਵਾਲਾ ਵਾਲੇ ਪੁੱਲ ਤੋਂ ਲਗਭਗ 2 ਸੌ ਮੀਟਰ ਅਗਾਂਹ ਰਾਜਸਥਾਨ ਕੈਨਾਲ ਨਹਿਰ ਦੀ ਪਟੜੀ 'ਤੇ ਮਿੱਡੂਖੇੜਾ ਵਾਲੇ ਵਾਲੇ ਪਾਸੇ ਨੂੰ ਮਿੱਟੀ ਖਿਸਕਣ ਬਾਰੇ ਪਤਾ ਲੱਗਣ 'ਤੇ ਪੰਚਾਇਤ ਅਤੇ ਪਿੰਡ ਦੇ ਲੋਕਾਂ ਵੱਲੋਂ ਅੱਧੀ ਦਰਜਨ ਤੋਂ ਵੱਧ ਟਰੈਕਟਰ ਲਾ ਕੇ ਬੜੇ ਹੈਰਾਨੀਜਨਕ ਢੰਗ ਨਾਲ ਪਏ ਘਾਰੇ ਨੂੰ ਪੂਰਨ ਦਾ ਕੰਮ ਆਰੰਭ ਕਰ ਦਿੱਤਾ ਗਿਆ ਹੈ। ਉਨ੍ਹਾਂ ਕਿਹਾ ਕਿ ਹਾਲਾਂਕਿ ਇਸ ਥਾਂ 'ਤੇ ਪਿੰਡ ਵਾਸੀਆਂ ਦੀ ਆਵਾਜਾਈ ਨਾ ਬਰਾਬਰ ਹੁਦੀ ਹੈ ਪਰ ਖੁਸ਼ਕਿਸਮਤੀ ਨਾਲ ਸਮਾਂ ਰਹਿੰਦੇ ਮਿੱਟੀ ਖਿਸਕਣ ਦਾ ਪਤਾ ਲੱਗ ਗਿਆ।
             ਸ੍ਰੀ ਤੇਜਿੰਦਰ ਸਿੰਘ ਮਿੱਡੂਖੇੜਾ ਨੇ ਦੱਸਿਆ ਕਿ ਜੇਕਰ ਖੁਦਾ ਨਾ ਖਾਸਤਾ ਜ਼ਮੀਨ ਉੱਪਰ ਬਨਾਹੀ 'ਤੇ ਬਣੀ ਨਹਿਰ ਵਿਚ ਕੋਈ ਪਾੜ ਵਗੈਰਾ ਪੈ ਜਾਂਦਾ ਤਾਂ ਤਿੰਨਾਂ ਸੂਬਿਆਂ ਦੇ ਸਰਹੱਦੀ ਇਲਾਕਿਆਂ ਕਈ-ਕਈ ਕਿਲੋਮੀਟਰ ਤੱਕ ਜਾਨ-ਮਾਨ ਦਾ ਵੱਡਾ ਨੁਕਸਾਨ ਹੋਣ ਦਾ ਖਦਸ਼ਾ ਸੀ। ਇਸੇ ਦੌਰਾਨ ਹੋਰਨਾਂ ਪਿੰਡ ਵਾਸੀਆਂ ਨੇ ਦੱਸਿਆ ਕਿ  ਇਸ 'ਬੰਦੇ ਖਾਣੀ' ਨਹਿਰ 'ਤੇ ਤਾਇਨਾਤ ਨਹਿਰੀ ਵਿਭਾਗ ਦੇ ਕਰਮਚਾਰੀਆਂ ਦੀ ਲਾਪਰਵਾਹੀ ਕਰਕੇ ਅਜਿਹਾ ਹਾਦਸਾ ਵਾਪਰਿਆ ਹੈ। ਉਨ੍ਹਾਂ ਦੋਸ਼ ਲਾਇਆ ਕਿ ਵਿਭਾਗ ਦੇ ਕਰਮਚਾਰੀਆਂ ਦਾ ਨਹਿਰ ਦੀ ਰਾਖੀ ਵੱਲ ਘੱਟ ਧਿਆਨ ਅਤੇ ਨਹਿਰ ਕੰਢੇ ਲੱਗੇ ਰੁੱਖਾਂ ਦੀ ਲੱਕੜ ਨੂੰ ਚੁੱਕਣ ਵੱਲ ਧਿਆਨ ਹੁੰਦਾ ਹੈ।
           ਜ਼ਿਕਰਯੋਗ ਹੈ ਕਿ ਰਾਜਸਥਾਨ ਕੈਨਾਲ ਨਹਿਰ ਦਾ ਪਾਣੀ ਰਾਜਸਥਾਨ ਨੂੰ ਜਾਂਦਾ ਹੈ ਅਤੇ ਇਹ ਨਹਿਰ ਰਾਜਸਥਾਨ ਦੇ ਲੋਕਾਂ ਲਈ ਲਾਈਨ ਲਾਈਫ' ਵਜੋਂ ਜਾਂਦੀ ਹੈ। ਲੋਕਾਂ ਨੇ ਮੰਗ ਕੀਤੀ ਕਿ ਪਿੰਡ ਮਿੱਡੂਖੇੜਾ ਵਾਲੇ ਪਾਸੇ ਵੱਲ ਇਸ ਨਹਿਰ ਪੜਟੀ ਨੂੰ ਚੌੜਾ ਅਤੇ ਮਜ਼ਬੂਤ ਕਰਕੇ ਇਸ ਉੱਪਰ ਪੱਕੀ ਸੜਕ ਬਣਾਈ ਤਾਂ ਭਵਿੱਖ ਅਜਿਹੀ ਘਟਨਾ ਨਾ ਵਾਪਰ ਸਕੇ।
          ਇਸੇ ਦੌਰਾਨ ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸ੍ਰੀ ਅਰਸ਼ਦੀਪ ਸਿੰਘ ਥਿੰਦ ਨੇ ਦੱਸਿਆ ਕਿ ਨਹਿਰ ਦੀ ਪਟੜੀ ਤੋਂ ਮਿੱਟੀ ਖਿਸਕਣ ਬਾਰੇ ਸੂਚਨਾ ਮਿਲਣ 'ਤੇ ਸਬੰਧਤ ਵਿਭਾਗ ਦੇ ਅਧਿਕਾਰੀਆਂ ਦਾ ਅਮਲਾ ਅਤੇ ਰਾਹਤ ਕਾਰਜਾਂ ਲਈ ਜੇ.ਸੀ.ਬੀ. ਮਸ਼ੀਨਾਂ ਰਵਾਨਾ ਕਰ ਦਿੱਤੀਆਂ ਗਈਆਂ ਹਨ। ਉਨ੍ਹਾਂ ਕਿਹਾ ਕਿ ਸਥਿਤੀ ਪੂਰੀ ਤਰ੍ਹਾਂ ਕਾਬੂ ਵਿਚ ਹੈ।

11 September 2011

ਮੀਂਹਾਂ ਕਰਕੇ ਜੀਰੋ ਲੇਵਲ 'ਤੇ ਪੁੱਜੀ ਲੰਬੀ ਦੇ ਦਰਜਨ ਪਿੰਡਾਂ ਦੀ ਕਿਰਸਾਨੀ


-ਫਸਲਾਂ 'ਚ ਖੜ੍ਹੇ ਪਾਣੀ 'ਚੋਂ ਆਪਣਾ ਹਨ੍ਹੇਰੇ ਭਰਿਆ ਭਵਿੱਖ ਵੇਖ ਰਹੇ ਨੇ ਕਿਸਾਨ-
                                                          -ਇਕਬਾਲ ਸਿੰਘ ਸ਼ਾਂਤ-
ਮੀਂਹ ਕਰਕੇ ਹੋਈ ਬਰਬਾਦੀ ਨਾਲ ਲੰਬੀ ਹਲਕੇ ਦੇ ਦਰਜਨ ਭਰ ਪਿੰਡਾਂ ਦੀ ਕਿਰਸਾਨੀ ਇੱਕ ਵਾਰ ਮੁੜ ਤੋਂ ਜੀਰੋ ਲੇਵਲ 'ਤੇ ਆ ਗਈ ਹੈ। ਪਿਛਲੇ ਪੰਜ ਸਾਲਾਂ ਤੋਂ ਸੇਮਗ੍ਰਸਤ ਇਲਾਕੇ ਵਿਚ ਰੱਜਵੇਂ ਮੀਂਹ ਨਾ ਪੈਣ ਕਰਕੇ ਖੁਦ ਨੂੰ ਕੁਝ ਮਹਿਫੂਜ ਮੰਨਣ ਲੱਗੇ ਕਿਸਾਨਾਂ ਨੂੰ ਹੁਣ ਫਿਰ ਫਸਲਾਂ ਵਿਚ ਕਈ-ਕਈ ਫੁੱਟ ਤੱਕ ਖੜ੍ਹੇ ਪਾਣੀ ਵਿਚੋਂ ਆਪਣਾ ਹਨ੍ਹੇਰੇ ਭਰਿਆ ਭਵਿੱਖ ਸਾਫ਼ ਵਿਖਾਈ ਦੇਣ ਲੱਗਿਆ ਹੈ।
ਮੁੱਖ ਮੰਤਰੀ ਦੇ ਹਲਕੇ ਵਿਚ ਭਾਰੀ ਮੀਂਹ ਕਰਕੇ ਲਗਪਗ 5-6 ਹਜ਼ਾਰ ਏਕੜ ਨਰਮਾ ਅਤੇ ਝੋਨੇ ਦੀਆਂ ਫ਼ਸਲਾਂ ਪੂਰੀ ਤਰ੍ਹਾਂ ਬਰਬਾਦ ਹੋ ਗਈਆਂ ਹਨ, ਉਥੋਂ ਪਿੰਡਾਂ ਵਿਚ ਵਸੋਂ ਵਾਲੇ ਇਲਾਕਿਆਂ ਵਿਚ ਮੀਂਹ ਕਰਕੇ ਘਰਾਂ ਦੇ ਡਿੱਗਣ ਜਾਂ ਨੁਕਸਾਨਗ੍ਰਸਤ ਹੋਣ ਸੈਂਕੜੇ ਪਰਿਵਾਰ ਆਰਥਿਕ ਅਤੇ ਮਾਨਸਿਕ ਤੌਰ 'ਤੇ ਪਰੇਸ਼ਾਨੀ ਦੇ ਮਾਹੌਲ ਵਿਚੋਂ ਲੰਘ ਰਹੇ ਹਨ। ਮੋਜੂਦਾ ਮਾਹੌਲ ਵਿਚ ਖੇਤਰ ਦੇ ਹਜ਼ਾਰਾਂ ਲੋਕਾਂ ਦੀ ਜ਼ਿੰਦਗੀ ਰੁਕ ਜਿਹੀ ਗਈ ਤੇ ਉਹ ਮੁੜ ਤੋਂ ਪੈਰਾਂ 'ਤੇ ਖੜ੍ਹੇ ਹੋਣ ਲਈ ਉਸ ਸਰਕਾਰੀ ਢਾਂਚੇ ਵੱਲ ਤੱਕਣ ਨੂੰ ਮਜ਼ਬੂਰ ਹੈ ਜਿਸਦੇ ਬੇਵਿਉਂਤੇ ਵਿਕਾਸ ਕਾਰਜਾਂ ਕਰਕੇ ਅੱਜ ਉਸ ਵੇਲੇ ਹੜ੍ਹਾ ਜਿਹੀ ਸਥਿਤੀ ਦਾ ਸਾਹਮਣਾ ਕਰਨ ਲਈ ਮਜ਼ਬੂਰ ਹਨ ਜਦੋਂ ਸੂਬੇ ਦੇ ਸਾਰੇ ਵੱਡੇ-ਵੱਡੇ ਡੈਮ ਪਿਛਲੇ ਵਰ੍ਹਿਆਂ ਤੋਂ ਘੱਟ ਪੱਧਰ 'ਤੇ ਵਗ ਰਹੇ ਹਨ।
ਖੇਤਰ ਦੇ ਹੜ੍ਹ ਪ੍ਰਭਾਵਿਤ ਲੋਕਾਂ ਦਾ ਕਹਿਣਾ ਹੈ ਕਿ ਅਕਾਲੀ ਸਰਕਾਰ ਵੱਲੋਂ ਕਰੋੜਾਂ ਰੁਪਏ ਖਰਚ ਕੇ ਆਪਣੇ ਪਿਛਲੇ ਰਾਜ ਦੌਰਾਨ ਲੰਬੀ ਵਿਧਾਨਸਭਾ ਹਲਕੇ ਵਿਚ ਕੱਢੇ ਸੇਮ ਨਾਲੇ ਪੂਰੀ ਤਰ੍ਹਾਂ ਸਿਆਸੀ ਹਿੱਤਾਂ ਅਤੇ ਬਿਨ੍ਹਾਂ ਕਿਸੇ ਵਿਉਂਤਬੰਦੀ ਦੇ ਕੱਢੇ ਗਏ ਹਨ। ਪਿੰਡ ਰੋੜਾਂਵਾਲੀ ਦੇ ਕਿਸਾਨਾਂ ਰਣਦੀਪ ਸਿੰਘ ਭੋਲਾ, ਕੱਖਾਂਵਾਲੀ ਦੇ ਨਿਰਮਲ ਸਿੰਘ ਹੁਰਾਂ ਨੇ ਕਿਹਾ ਕਿ ਕੱਖਾਂਵਾਲੀ-ਪੰਜਾਵਾ-ਤਰਮਾਲਾ-ਰੋੜਾਂਵਾਲੀ ਲਿੰਕ ਡਰੇਨ ਦੀ ਚੌੜਾਈ ਘੱਟ ਹੋਣ ਅਤੇ ਲੇਵਲ ਦਰੁੱਸਤ ਨਾ ਹੋਣ ਕਾਰਨ ਖੇਤਰ ਵਿਚ ਹੜ੍ਹਾਂ ਜਿਹੀ ਸਥਿਤੀ ਪੈਦਾ ਹੋਈ ਹੈ। ਉਨ੍ਹਾਂ ਕਿਹਾ ਕਿ ਵਿਭਾਗ ਵੱਲੋਂ ਪਿੰਡ ਕੱਖਾਂਵਾਲੀ ਦੇ ਨਾਲ ਦੀ ਲੰਘਦੀ ਡਰੇਨ ਦੀ ਸਫਾਈ ਵੀ ਨਹੀਂ ਕਰਵਾਈ ਗਈ।
ਭਾਵੇਂ ਮੌਨਸੂਨ ਤੋਂ ਪਹਿਲਾਂ ਸੁੱਤਾ ਰਿਹਾ ਸਰਕਾਰੀ ਅਮਲਾ ਹੁਣ ਮੀਂਹਾਂ ਦੀ ਮਾਰ ਹੇਠ ਆਏ ਖੇਤਰ ਦੇ ਡੂੰਘੇ ਅਤੇ ਨੀਂਵੇ ਪਿੰਡਾਂ ਤੱਪਾਖੇੜਾ, ਕੁੱਤਿਆਂਵਾਲੀ, ਪੱਕੀ ਟਿੱਬੀ ਅਤੇ ਸਰਾਵਾਂ ਬੋਦਲਾ, ਕੱਟਿਆਂਵਾਲੀ ਅਤੇ ਦਿਉਣਖੇੜਾ ਵਿਚ ਪਾਣੀ ਦੀ ਨਿਕਾਸੀ ਲਈ ਹੰਭਲੇ ਨਜ਼ਰ ਆ ਰਿਹਾ ਹੈ ਪਰ ਮੀਂਹਾਂ ਕਰਕੇ ਜਮੀਨ ਮੁੜ ਤੋਂ ਸੇਮ ਜਾਗਣ ਨਾਲ ਸਥਿਤੀ ਭਿਅੰਕਰ ਹੋ ਗਈ। ਜਿਸ ਨਾਲ ਮੌਜੂਦਾ ਹਾਲਾਤਾਂ ਮੁੱਖ ਮੰਤਰੀ ਵੱਲੋਂ ਪਿਛਲੇ ਸਾਢੇ ਚਾਰ ਸਾਲਾਂ ਤੋਂ ਕੀਤੇ ਜਾ ਰਹੇ ਦਾਅਵਿਆਂ ਦੀ ਫੂਕ ਕੱਢ ਕੇ ਰੱਖ ਦਿੱਤੀ ਹੈ।
ਮੀਂਹਾਂ ਉਪਰੰਤ ਭਾਵੇਂ ਪਿੰਡਾਂ ਵਿਚ ਪਾਣੀ ਦੀ ਨਿਕਾਸੀ ਲਈ ਵੱਡੇ ਪੱਧਰ 'ਤੇ ਟਿਊਬਵੈੱਲ ਅਤੇ ਪੱਖੇ ਪਾਣੀ ਨਿਕਾਸੀ ਲਈ ਲਾ ਦਿੱਤੇ ਗਏ ਹਨ ਪਰ ਇਨ੍ਹਾਂ ਸਭ ਕੁਝ ਹੋਣ ਦੇ ਬਾਵਜੂਦ ਵੀ ਸਰਕਾਰੀ ਢਾਂਚੇ ਵੱਲੋਂ ਲੱਖਾਂ-ਹਜ਼ਾਰਾਂ ਰੁਪਏ ਖਰਚਣ ਦੇ ਬਾਅਦ ਵੀ ਪਿੰਡਾਂ ਵਿਚ ਪਾਣੀ ਨਿਕਾਸੀ ਦੇ ਪ੍ਰਬੰਧਾਂ ਨੂੰ ਪੂਰੀ ਤਰ੍ਹਾਂ ਪੁਖਤਾ ਨਹੀਂ ਸਾਬਤ ਹੋ ਰਹੇ। ਪਿੰਡ ਤੱਪਾਖੇੜਾ ਵਿਖੇ ਆਬਾਦੀ 'ਚ ਖੜ੍ਹੇ ਪਾਣੀ ਦਾ ਨਿਕਾਸੀ ਕਰਨ ਲਈ ਦੋ-ਤਿੰਨ ਟਿਊਬਵੈੱਲਾਂ ਰਾਹੀਂ ਪਾਣੀ ਨੂੰ ਉਸ ਤੋਂ ਉੱਪਰ ਦੇ ਪੱਧਰ ਵਾਲੇ ਸੇਮ ਨਾਲੇ ਵਿਚ ਸੁੱਟਿਆ ਜਾ ਰਿਹਾ ਹੈ ਓਵਰਫਲੋ ਹੋਣ ਕਰਕੇ ਸੇਮ ਨਾਲੇ ਵਿਚੋਂ ਥੋੜ੍ਹੀ ਦੂਰ ਜਾ ਕੇ ਤੋਂ ਉਹੀ ਪਾਣੀ ਮੁੜ ਵਾਪਸ ਜਾ ਰਿਹਾ ਹੈ।
ਇਨ੍ਹਾਂ ਪਿੰਡਾਂ ਵਿਚ ਇਹ ਸਥਿਤੀ ਹੈ ਕਿ ਬਹੁਤ ਲੋਕਾਂ ਦੇ ਘਰ ਢਹਿ-ਢੇਰੀ ਹੋਣ ਨਾਲ ਉਹ ਆਂਗਣਵਾੜੀ ਕੇਂਦਰ, ਸਕੂਲਾਂ ਅਤੇ ਹੋਰ ਸਰਕਾਰੀ ਇਮਾਰਤਾਂ ਵਿਚ ਸ਼ਰਨ ਲਏ ਹੋਏ ਹਨ। ਖੇਤਰ ਦੇ ਬਹੁਤੇ ਪਿੰਡ ਦਾ ਸੜਕਾਂ 'ਤੇ ਕਈ-ਕਈ ਫੁੱਟ ਹੋਣ ਨਾਲ ਆਪਸੀ ਸੰਪਰਕ ਟੁੱਟ ਗਿਆ ਹੈ। ਜਿਆਦਾਤਰ ਸਕੂਲ ਬੰਦ ਹਨ ਤੇ ਸਿਹਤ ਸਹੂਲਤਾਂ ਤੋਂ ਲੋਕ ਅਜੇ ਵੀ ਵਾਂਝੇ ਹਨ।
ਇਸਤੋਂ ਇਲਾਵਾ ਬਹੁਤੇ ਗਰੀਬ ਪਰਿਵਾਰ ਜਿਨ੍ਹਾਂ ਦੇ ਮਕਾਨ ਮੀਂਹ ਨੇ ਖਾ ਲਏ ਤੇ ਕਿਸਾਨੀ 'ਤੇ ਮੀਂਹਾਂ ਦੀ ਮਾਰ ਪੈਣ ਕਰਕੇ ਦੋ ਜੂਨ ਦੀ ਰੋਟੀ ਦਾ ਜੁਗਾੜ ਵੀ ਔਖਾ ਜਾਪ ਰਿਹਾ ਹੈ। ਭਾਵੇਂ ਜਿਲ੍ਹਾ ਪ੍ਰਸ਼ਾਸਨ ਨੇ ਪਿੰਡ ਤੱਪਾਖੇੜਾ ਵਗੈਰਾ ਵਿਖੇ ਲੋਕਾਂ ਲਈ ਲੰਗਰ ਚਲਾਇਆ ਹੋਇਆ ਹੈ ਪਰ ਇਸਤੋਂ ਇਲਾਵਾ ਰੋਜ਼ਾਨਾ ਜ਼ਿੰਦਗੀ ਦੀਆਂ ਦਰਜਨਾਂ ਜ਼ਰੂਰਤਾਂ ਨਹੀਂ ਪੂਰੀਆਂ ਹੋ ਸਕਦੀਆਂ।
ਉਂਝ ਸਰਕਾਰੀ ਅੰਕੜਿਆਂ ਅਨੁਸਾਰ ਪਿੰਡ ਤੱਪਾਖੇੜਾ ਵਿਖੇ ਮੀਂਹ ਕਰਕੇ 18 ਮਕਾਨ ਡਿੱਗ ਪਏ ਹਨ ਜਦੋਂਕਿ 17 ਘਰਾਂ 'ਚ ਤਰੇੜਾਂ, 10 ਘਰ ਹੇਠਾਂ ਬੈਠ ਗਏ, 7 ਦੀਆਂ ਛੱਤਾਂ ਲੀਕ, 6 ਕੰਧਾਂ ਡਿੱਗੀਆਂ ਅਤੇ ਇੱਕ ਮੱਝ ਮਰੀ। ਜਿਸਦੇ ਕਰਕੇ 80 ਪਰਿਵਾਰਾਂ ਦੇ 393 ਜੀਆਂ ਨੇ ਮੀਂਹਾਂ ਬਾਅਦ ਆਂਗਣਵਾੜੀ ਕੇਂਦਰ, ਪ੍ਰਾਇਮਰੀ ਸਕੂਲ ਸਮੇਤ ਵੱਢ-ਵੱਖ ਸਾਂਝੀਆ ਥਾਵਾਂ 'ਤੇ ਸ਼ਰਨ ਲਈ ਹੋਈ ਹੈ। ਮਾਲ ਮਾਲ ਵਿਭਾਗ ਦੇ ਅਧਿਕਾਰੀਆਂ ਵੱਲੋਂ ਪ੍ਰਾਪਤ ਵੇਰਵਿਆਂ ਅਨੁਸਾਰ ਸੈਂਕੜੇ ਵਿਅਕਤੀਆਂ ਲਈ ਲੰਗਰ ਦਾ ਪ੍ਰਬੰਧ ਕੀਤਾ ਗਿਆ ਹੈ। ਜਦੋਂਕਿ ਹੁਣ ਪਸ਼ੂਆਂ ਲਈ 37 ਬੋਰੀਆਂ ਫੀਡ ਅਤੇ 100 ਤਿਰਪਾਲਾਂ ਵੀ ਦਿੱਤੀਆਂ ਗਈਆਂ ਹਨ।
ਇਸੇ ਦੌਰਾਨ ਡਰੇਨੇਜ ਵਿਭਾਗ ਦੇ ਕਾਰਜਕਾਰੀ ਇੰਜੀਨੀਅਰ ਸ੍ਰੀ ਗੁਲਸ਼ਨ ਨਾਗਪਾਲ ਨੇ ਦੱਸਿਆ ਕਿ ਵਿਭਾਗ ਵੱਲੋਂ ਲੰਬੀ ਹਲਕੇ ਵਿਚ ਪੈਂਦੀਆਂ ਸਾਰੀਆਂ ਡਰੇਨਾਂ ਦੀ ਸਫਾਈ ਪੂਰੀ ਵਿਉਂਤਬੰਦੀ ਨਾਲ ਕਰਵਾਈ ਗਈ ਸੀ ਪਰ ਇਸ ਵਾਰ ਮੀਂਹ ਹੱਦੋਂ ਵੱਧ ਪੈਣ ਕਰਕੇ ਹੇਠਲੇ ਪਿੰਡਾਂ ਵਿਚ ਪਾਣੀ ਭਰ ਗਿਆ। ਉਨ੍ਹਾਂ ਕਿਹਾ ਕਿ ਅਗਾਊਂ ਸਫ਼ਾਈ ਹੋਣ ਕਰਕੇ ਬਹੁਤ ਸਾਰੇ ਪਿੰਡਾਂ ਮੀਂਹਾਂ ਦੇ ਪਾਣੀ ਦੀ ਮਾਰ ਤੋਂ ਬਚ ਗਏ।
ਪੰਜਾਬ ਪ੍ਰਦੇਸ਼ ਕਾਂਗਰਸ ਦੇ ਪੇਂਡੂ ਵਿਕਾਸ ਸੈੱਲ ਦੇ ਸੂਬਾ ਕਾਰਜਕਾਰਨੀ ਮੈਂਬਰ ਸ: ਰਣਧੀਰ ਸਿੰਘ 'ਧੀਰਾ ਖੁੱਡੀਆਂ' ਨੇ ਕਿਹਾ ਕਿ ਅਕਾਲੀ ਸਰਕਾਰ ਦੇ ਲਾਪਰਵਾਹ ਰਵੱਈਏ ਅਤੇ ਅਖੌਤੀ ਨੀਤੀਆਂ ਕਾਰਨ ਮੀਂਹਾਂ ਦੇ ਪਾਣੀ ਨੇ ਪਿੰਡਾਂ ਨੂੰ ਆਪਣੇ ਕਲਾਵੇ ਵਿਚ ਲਿਆ। ਜਿਸ ਕਾਰਨ ਹਜ਼ਾਰਾਂ ਪਰਿਵਾਰਾਂ ਬਰਬਾਦੀ ਦੇ ਕੰਢੇ 'ਤੇ ਆ ਖੜ੍ਹੇ ਹੋਏ ਹਨ। ਉਨ੍ਹਾਂ ਮੰਗ ਕੀਤੀ ਕਿ ਸੇਮ ਨਾਲਿਆਂ ਦੇ ਨਿਰਮਾਣ ਵਿਚ ਅਣਗਹਿਲੀ ਅਤੇ ਕਥਿਤ ਘਪਲੇਬਾਜ਼ੀ ਦੀ ਸੀ.ਬੀ.ਆਈ. ਜਾਂਚ ਕਰਵਾਈ ਜਾਵੇ ਅਤੇ ਮੀਂਹ ਪ੍ਰਭਾਵਿਤ ਕਿਸਾਨਾਂ ਨੂੰ ਸਰਕਾਰ ਵੱਲੋਂ 30 ਹਜ਼ਾਰ ਰੁਪਏ ਪ੍ਰਤੀ ਏਕੜ ਮੁਆਵਜਾ ਦੇਣ ਦੇ ਨਾਲ-ਨਾਲ ਪ੍ਰਭਾਵਿਤ ਪਰਿਵਾਰਾਂ ਦੇ ਮੁੜ ਵਸੇਬੇ ਦਾ ਪ੍ਰਬੰਧ ਕੀਤਾ ਜਾਵੇ।

04 September 2011

ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੀਆਂ ਵਿਦਿਆਰਥੀ ਚੋਣਾਂ 'ਚ ਡੱਬਵਾਲੀ ਅਤੇ ਲੰਬੀ ਹਲਕੇ ਦਾ ਹੋਇਆ ਦਬਦਬਾ ਕਾਇਮ


                                                           -ਇਕਬਾਲ ਸਿੰਘ ਸ਼ਾਂਤ-
ਪੰਜਾਬ ਅਤੇ ਹਰਿਆਣੇ ਦੀ ਰਵਾਇਤੀ ਸਿਆਸਤ 'ਤੇ ਗਹਿਰਾ ਪ੍ਰਭਾਵ ਰੱਖਦੇ ਲੰਬੀ ਹਲਕੇ ਅਤੇ ਡੱਬਵਾਲੀ ਖੇਤਰ ਦਾ ਦਬਦਬਾ ਪੰਜਾਬ ਯੂਨੀਵਰਸਿਟੀ ਚੰਡੀਗੜ੍ਹ ਦੀਆਂ ਬੀਤੇ ਦਿਨ੍ਹੀਂ ਹੋਈਆਂ ਵਿਦਿਆਰਥੀ ਕੌਂਸਲ ਚੋਣਾਂ 'ਚ ਕਾਇਮ ਰਿਹਾ।
ਪੰਜਾਬ ਯੂਨੀਵਰਸਿਟੀ ਦੀਆਂ ਵਿਦਿਆਰਥੀ ਯੂਨੀਅਨ ਦੀਆਂ ਚੋਣਾਂ 'ਚ ਲੰਬੀ ਹਲਕੇ ਦੇ ਨੌਜਵਾਨ ਆਗੂ ਵਿੱਕੀ ਮਿੱਡੂਖੇੜਾ ਦੀ ਅਗਵਾਈ ਵਾਲੀ ਜਥੇਬੰਦੀ 'ਸੋਪੂ' ਨੇ ਹੂੰਝਾਫੇਰ ਜਿੱਤ ਹਾਸਲ ਕਰਕੇ ਸੂਬੇ ਦੀ ਵਿਦਿਆਰਥੀ ਰਾਜਨੀਤੀ ਵਿਚ ਨਵਾਂ ਇਤਿਹਾਸ ਸਿਰਜਿਆ ਹੈ।
         ਸੋਪੂ ਅਤੇ ਸੋਈ ਗੱਠਜੋੜ ਦੀ ਟਿਕਟ 'ਤੇ ਰਿਕਾਰਡ 1001 ਵੋਟਾਂ ਨਾਲ ਯੂਨੀਵਰਸਿਟੀ ਵਿਦਿਆਰਥੀ ਕੌਂਸਲ ਦੇ ਪ੍ਰਧਾਨ ਚੁਣੇ ਪੁਸ਼ਪਿੰਦਰ ਸ਼ਰਮਾ ਵੀ ਡੱਬਵਾਲੀ ਸ਼ਹਿਰ ਦੇ ਵਸਨੀਕ ਹਨ।  ਜਿਨ੍ਹਾਂ ਦੇ ਪਿਤਾ ਉੱਘੇ ਸਮਾਜ ਸੇਵੀ ਸਵਰਗੀ ਸੁਭਾਸ਼ ਸ਼ਰਮਾ ਨੇ ਸੰਨ 82 ਦੇ ਦੌਰ ਵਿਚ ਖੁਸ਼ਦਿਲ ਕਲਚਰਲ ਸੁਸਾਇਟੀ ਦਾ ਸਥਾਪਨਾ ਕਰਕੇ ਇਲਾਕੇ ਵਿਚ ਸੱਭਿਆਚਾਰਕ ਸਫ਼ਾ ਨੂੰ ਨਵੀਂ ਦਿਸ਼ਾ ਪ੍ਰਦਾਨ ਕੀਤੀ ਸੀ।
            ਖੇਤਰ ਦੇ ਪਿੰਡ ਮਿੱਡੂਖੇੜਾ ਦੇ ਸਾਬਕਾ ਸਰਪੰਚ ਅਤੇ ਧੱਕੜ ਆਗੂ ਵਜੋਂ ਜਾਣੇ ਜਾਂਦੇ ਸ: ਗੁਰਦਿਆਲ ਸਿੰਘ ਮਿੱਡੂਖੇੜਾ ਦੇ ਨੌਜਵਾਨ ਪੁੱਤਰ ਬਿਕਰਮਜੀਤ ਸਿੰਘ ਉਰਫ਼ 'ਵਿੱਕੀ ਮਿੱਡੂਖੇੜਾ' ਜੋ ਕਿ ਵਿਦਿਆਰਥੀ ਜਥੇਬੰਦੀ ਸਟੂਡੈਂਟ ਆਰਗੇਨਾਈਜੇਸ਼ਨ ਆਫ਼ ਪੰਜਾਬ ਯੂਨੀਵਰਸਿਟੀ 'ਸੋਪੂ' ਦੇ ਪ੍ਰਧਾਨ ਹਨ ਅਤੇ ਉਨ੍ਹਾਂ ਦਾ ਅਜੋਕੇ ਦੌਰ ਵਿਚ ਪੰਜਾਬ ਦੀ ਵਿਦਿਆਰਥੀ ਰਾਜਨੀਤੀ 'ਤੇ ਗਹਿਰਾ ਪ੍ਰਭਾਵ ਹੈ।
          ਵਿੱਕੀ ਮਿੱਡੂਖੇੜਾ ਨੇ ਅੱਜ ਫੋਨ 'ਤੇ ਗੱਲਬਾਤ ਕਰਦਿਆਂ ਦੱਸਿਆ ਕਿ ਇਸ ਵਾਰ ਸੋਪੂ ਅਤੇ ਸੋਈ ਨੇ ਇੱਕ ਸਾਂਝੇ ਗੱਠਜੋੜ ਦੇ ਤਹਿਤ ਇਨਸੋ, ਏ.ਬੀ.ਵੀ.ਪੀ ਅਤੇ ਪੁਸੂ ਦੇ ਤੀਹਰੇ ਗੱਠਜੋੜ ਨੂੰ ਧੂਲ ਚਟਾਉਂਦਿਆਂ ਚੰਡੀਗੜ੍ਹ ਦੇ 7 ਦੇ ਕਰੀਬ ਕਾਲਜਾਂ ਵਿਚੋਂ  ਹੂੰਝਾਫੇਰ ਜਿੱਤ ਹਾਸਲ ਕੀਤੀ ਹੈ। ਸ੍ਰੀ ਮਿੱਡੂਖੇੜਾ ਨੇ ਦੱਸਿਆ ਕਿ ਉਨ੍ਹਾਂ 'ਤੇ ਅਦਾਲਤ  ਵਿਚ ਵੱਖ-ਵੱਖ ਮਾਮਲੇ ਵਿਚਾਰਧੀਨ ਹੋਣ ਕਰਕੇ ਤਕਨੀਕੀ ਪੱਖੋਂ ਉਹ ਚੋਣ ਲੜ੍ਹਣ ਦੇ ਅਯੋਗ ਸਨ। ਜਿਸ ਕਰਕੇ ਉਨ੍ਹਾਂ ਨੇ ਜਥੇਬੰਦੀ ਦੇ ਨੌਜਵਾਨ ਆਗੂ ਪੁਸ਼ਪਿੰਦਰ ਸ਼ਰਮਾ ਉਰਫ਼ ਮਨੂੰ (ਡੱਬਵਾਲੀ) ਨੂੰ ਆਪਣਾ ਉਮੀਦਵਾਰ ਥਾਪਿਆ। ਉਨ੍ਹਾਂ ਕਿਹਾ ਕਿ ਸੋਪੂ+ਸੋਈ ਗੱਠਜੋੜ ਦੇ ਉਮੀਦਵਾਰ ਪੁਸ਼ਪਿੰਦਰ ਸ਼ਰਮਾ ਨੇ 3730 ਵੋਟਾਂ ਹਾਸਲ ਕਰਕੇ ਆਪਣੇ ਵਿਰੋਧੀ ਉਮੀਦਵਾਰ ਸੁਮਿਤ ਮਿਗਲਾਨੀ ਨੂੰ 1001 ਵੋਟਾਂ ਦੇ ਫ਼ਰਕ ਨਾਲ ਹਰਾਇਆ।      
            ਦਿਲਚਸਪ ਗੱਲ ਇਹ ਵੀ ਹੈ ਕਿ ਸੁਮਿਤ ਮਿਗਲਾਨੀ ਵੀ ਨੇੜਲੇ ਸ਼ਹਿਰ ਮਲੋਟ ਦੇ ਵਸਨੀਕ ਹਨ ਜਿਨ੍ਹਾਂ ਨੂੰ 2729 ਵੋਟਾਂ ਮਿਲੀਆਂ।ਡੱਬਵਾਲੀ ਸ਼ਹਿਰ ਤੇ ਲੰਬੀ ਹਲਕੇ ਦੇ ਸੋਪੂ ਅਤੇ ਸੋਈ ਦੇ ਕਾਰਕੁੰਨਾਂ ਵਿਚ ਭਾਰੀ ਉਤਸ਼ਾਹ ਪਾਇਆ ਜਾ ਰਿਹਾ ਹੈ। ਉਨ੍ਹਾਂ ਦਾ ਕਹਿਣਾ ਹੈ ਕਿ ਸੋਪੂ ਦੇ ਪ੍ਰਧਾਨ ਵਿੱਕੀ ਮਿੱਡੂਖੇੜਾ ਅਤੇ ਵਿਦਿਆਰਥੀ ਕੌਂਸਲ ਦੇ ਨਵੇਂ ਚੁਣੇ ਪ੍ਰਧਾਨ ਪੁਸ਼ਪਿੰਦਰ ਸ਼ਰਮਾ ਦਾ ਖੇਤਰ ਵਿਚ ਆਉਣ 'ਤੇ ਭਰਵਾਂ ਸਵਾਗਤ ਕੀਤਾ ਜਾਵੇਗਾ।
M. No. 98148-26100/93178-26100
Fax : 011-4582-3232
Email : iqbal.shant@gmail.com


31 August 2011

ਚਹੇਤਿਆਂ ਲਈ ਸਰਕਾਰ ਦਾ ਇੱਕ ਘਪਲਾ ਹੋਰ-ਤਿੰਨ ਦਿਨ ਪਹਿਲਾਂ ਖਰੀਦੀ ਜਮੀਨ ਚੋਗੁਣੇ ਰੇਟ ਤੇ ਇਕੁਆਇਰ ਕੀਤੀ

ਜੋ ਕਦੇ ਪਿੰਡ 'ਚ ਵਸੇ ਨਹੀਂ ਉਹਨਾਂ ਨੂੰ ਉਜਾੜਾ ਭੱਤਾ ਵੀ ਦਿੱਤਾ
                                                                 -ਬੀ ਐਸ ਭੁੱਲਰ-
ਬਠਿੰਡਾ-ਆਪਣੇ ਚਹੇਤਿਆਂ ਨੂੰ ਕਰੋੜਾਂ ਰੁਪਏ ਦਾ ਮੁਨਾਫ਼ਾ ਦੇਣ ਦੇ ਇਰਾਦੇ ਨਾਲ ਉਹਨਾਂ ਵੱਲੋਂ ਤਿੰਨ ਦਿਨ ਪਹਿਲਾਂ ਖਰੀਦੀ ਜਮੀਨ ਸਰਕਾਰ ਵੱਲੋਂ ਚੌਗੁਣੇ ਰੇਟ ਤੇ ਇਕੁਆਇਰ ਕਰਨ ਦੇ ਮਾਮਲੇ ਦੀ ਉੱਚ ਪੱਧਰੀ ਜਾਂਚ ਕਰਵਾਉਣ ਦੀ ਮੰਗ ਕਰਦਿਆਂ ਬੀ ਕੇ ਯੂ ਉਗਰਾਹਾਂ ਨੇ ਪਿੰਡ ਮੰਡੀ ਖੁਰਦ ਦੇ ਵਸਨੀਕਾਂ ਵੱਲੋਂ ਵਿੱਢੇ ਸੰਘਰਸ ਦੀ ਹਿਮਾਇਤ ਦਾ ਐਲਾਨ ਕੀਤਾ ਹੈ।
       ਇੱਥੇ ਇਹ ਜਿਕਰਯੋਗ ਹੈ ਕਿ ਅਕਾਲੀ ਪਾਰਟੀ ਦੇ ਪ੍ਰਮੁੱਖ ਨੇਤਾਵਾਂ ਨਾਲ ਨੇੜਤਾ ਰੱਖਣ ਵਾਲੇ ਕੁਝ ਵਿਅਕਤੀਆਂ ਨੇ ਪਿੰਡ ਮੰਡੀ ਖੁਰਦ ਵਿਖੇ 6 ਲੱਖ 45 ਹਜਾਰ ਰੁਪਏ ਪ੍ਰਤੀ ਏਕੜ ਦੇ ਹਿਸਾਬ ਨਾਲ ਖਰੀਦ ਕੀਤੀ ਸੀ। ਤਿੰਨ ਦਿਨਾਂ ਬਾਅਦ ਹੀ ਇਸ ਵਿੱਚੋਂ ਲੱਗ ਭੱਗ 37 ਏਕੜ ਜਮੀਨ ਰਾਜ ਸਰਕਾਰ ਨੇ ਕੂੜਾ ਡੰਪ ਵਾਸਤੇ ਚਾਰ ਗੁਣਾਂ ਵੱਧ ਮੁੱਲ ਤੇ ਇਕੁਆਇਰ ਕਰਨ ਦਾ ਨੋਟੀਫਿਕੇਸਨ ਜਾਰੀ ਕਰ ਦਿੱਤਾ।
       ਬੀ ਕੇ ਯੂ ਉਗਰਾਹਾਂ ਦੇ ਜਿਲ•ਾ ਪ੍ਰਧਾਨ ਸ੍ਰੀ ਸਿੰਗਾਰਾ ਸਿੰਘ ਮਾਨ ਤੇ ਜਨਰਲ ਸਕੱਤਰ ਜਗਜੀਤ ਸਿੰਘ ਭੂੰਦੜ ਨੇ ਇੱਥੇ ਇੱਕ ਪ੍ਰੈਸ ਕਾਨਫਰੰਸ ਨੂੰ ਸੰਬੋਧਨ ਕਰਦਿਆਂ ਦੋਸ਼ ਲਾਇਆ ਕਿ ਸਰਕਾਰ ਨੇ ਆਪਣੇ ਇਸ ਫੈਸਲੇ ਨਾਲ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਰਿਸਤੇਦਾਰ ਬਿਕਰਮਜੀਤ ਸਿੰਘ ਮਜੀਠੀਆ ਜੋ ਯੂਥ ਅਕਾਲੀ ਦਲ ਦੇ ਪ੍ਰਧਾਨ ਵੀ ਹਨ, ਦੇ ਨਜਦੀਕੀ ਮਿੱਤਰਾਂ ਨੂੰ 5 ਕਰੋੜ 63 ਲੱਖ ਰੁਪਏ ਦਾ ਮੁਨਾਫ਼ਾ ਹੀ ਨਹੀਂ ਬਖਸਿਆ ਬਲਕਿ ਉਹਨਾਂ ਵਿਅਕਤੀਆਂ ਨੂੰ ਉਜਾੜ ਭੱਤੇ ਵਜੋਂ ਇੱਕ ਕਰੋੜ 77 ਲੱਖ ਰੁਪਏ ਹੋਰ ਅਦਾ ਕਰ ਦਿੱਤੇ, ਜਿਹਨਾਂ ਦਾ ਉਜੜਣਾ ਤਾਂ ਦੂਰ ਉਹ ਮੰਡੀ ਖੁਰਦ ਵਿਖੇ ਕਦੇ ਵਸੇ ਵੀ ਨਹੀਂ, ਕਿਉਕਿ ਲਾਭਪਾਤਰੀ ਬਠਿੰਡਾ ਦੀ ਬਜਾਏ ਦੂਰ ਦੁਰੇਡੇ ਸਥਿਤ ਜਿਲਿ•ਆਂ ਦੇ ਵਸਨੀਕ ਹਨ।
       ਕਿਸਾਨ ਆਗੂਆਂ ਦੇ ਦੋਸ ਅਨੁਸਾਰ ਇਹ ਆਪਣਿਆਂ ਨੂੰ ਗਿਣੀ ਮਿਥੀ ਯੋਜਨਾ ਰਾਹੀਂ ਲਾਭ ਪਹੁੰਚਾਉਣ ਦਾ ਹੀ ਸਿੱਟਾ ਹੈ ਕਿਉਕਿ ਵੱਖ ਵੱਖ ਸਰਵੇਖਣਾਂ ਰਾਹੀਂ ਚੁਣੀ ਬੰਜਰ ਜਮੀਨ ਦੇ ਉਲਟ ਮੰਡੀ ਖੁਰਦ ਪਿੰਡ ਦੇ ਉਪਜਾਊ ਰਕਬੇ ਵਿੱਚ ਸਰਕਾਰ ਨੇ ਕਚਰਾ ਪਲਾਂਟ ਲਾਉਣ ਦਾ ਫੈਸਲਾ ਲੈ ਲਿਆ। ਪਹਿਲਾਂ ਹੀ ਕੈਂਸਰ ਦੀ ਬੀਮਾਰੀ ਨਾਲ 15 ਮੌਤਾਂ ਦਾ ਸ਼ਿਕਾਰ ਬਣ ਚੁੱਕੇ ਇਸ ਪਿੰਡ ਦੇ ਲੋਕਾਂ ਨੂੰ ਕਚਰਾ ਪਲਾਂਟ ਦੇ ਪ੍ਰਦੂਸਣ ਨਾਲ ਮਾਰੂ ਬੀਮਾਰੀਆਂ ਦਾ ਹੋਰ ਸੰਤਾਪ ਭੋਗਣਾ ਪਵੇਗਾ। ਇਹ ਸਮਝ ਹੈ ਕਿਸਾਨ ਆਗੂਆਂ ਦੀ।
       ਇਸ ਘਪਲੇ ਦੀ ਉੱਚ ਪੱਧਰੀ ਪੜਤਾਲ ਤੇ ਜੋਰ ਦਿੰਦਿਆਂ ਕਿਸਾਨ ਆਗੂਆਂ ਨੇ ਨਾ ਸਿਰਫ ਮੰਡੀ ਖੁਰਦ ਦੇ ਵਸਨੀਕਾਂ ਵੱਲੋਂ ਵਿੱਢੇ ਸੰਘਰਸ ਦੀ ਡਟਵੀਂ ਹਿਮਾਇਤ ਕੀਤੀ, ਬਲਕਿ ਕਚਰਾ ਪਲਾਂਟ ਨੂੰ ਕਿਸੇ ਬੀਆਬਾਨ ਇਲਾਕੇ ਵਿੱਚ ਤਬਦੀਲ ਕਰਨ ਦੀ ਮੰਗ ਕੀਤੀ। ਇਸ ਮੌਕੇ ਮਨਜੀਤ ਸਿੰਘ ਭੁੱਚੋ, ਹਰਜਿੰਦਰ ਸਿੰਘ ਮੌੜ ਚੜ•ਤ ਸਿੰਘ, ਜਸਵੀਰ ਸਿੰਘ ਸੇਮਾ, ਸਿਮਰਜੀਤ ਸਿੰਘ ਅਤੇ ਸੈਂਬਰ ਸਿੰਘ ਮੰਡੀ ਖੁਰਦ ਵੀ ਮੌਜੂਦ ਸਨ।

31 July 2011

ਮਨਪ੍ਰੀਤ ਬਾਦਲ ਨੂੰ ਵੱਡਾ ਝਟਕਾ - ਚਰਨਜੀਤ ਬਰਾੜ ਨੇ ਸਾਥ ਛੱਡਿਆ

ਚੰਡੀਗੜ੍ਹ-ਪੀਪਲਜ਼ ਪਾਰਟੀ ਆਫ਼ ਪੰਜਾਬ ਦੇ ਮੁਖੀ ਮਨਪ੍ਰੀਤ ਸਿੰਘ ਬਾਦਲ ਨੂੰ ਜਬਰਦਸਤ ਝਟਕਾ ਦਿੰਦਿਆਂ ਪਾਰਟੀ ਦੇ ਸੀਨੀਅਰ  ਆਗੂ ਤੇ ਸਕੱਤਰ ਚਰਨਜੀਤ ਸਿੰਘ ਬਰਾੜ ਨੇ ਪਾਰਟੀ ਨੂੰ ਅਲਵਿਦਾ ਕਹਿ ਦਿੱਤਾ ਹੈ। 

         ਇੱਥੇ ਪ੍ਰੈਸ ਕਾਨਫਰੰਸ ਦੌਰਾਨ ਸ੍ਰੀ ਬਰਾੜ ਨੇ ਪੀ.ਪੀ.ਪੀ. ਦੇ ਪ੍ਰਧਾਨ ‘ਤੇ ਪਾਰਟੀ ਅੰਦਰ ਪਰਿਵਾਰਵਾਦ ਨੂੰ ਪ੍ਰਫੁੱਲਤ ਕਰਨ ਅਤੇ ਚਾਪਲੂਸਾਂ ਦੀ ਜੁੰਡਲੀ ਵਿੱਚ ਘਿਰਨ ਦੇ ਦੋਸ਼ ਲਾਏ।

          ਉਨ੍ਹਾਂ ਕਿਹਾ ਕਿ ਸ਼੍ਰੋਮਣੀ ਅਕਾਲੀ ਦਲ ਤੋਂ ਅਲਹਿਦਾ ਹੋਣ ਤੋਂ ਬਾਅਦ ਮਨਪ੍ਰੀਤ ਸਿੰਘ ਬਾਦਲ ਨੇ ਲੋਕਾਂ ਦੇ ਸਾਹਮਣੇ ਜੋ ਏਜੰਡਾ ਰੱਖਿਆ ਤੇ ਦਰਬਾਰ ਸਾਹਿਬ ਅੰਮ੍ਰਿਤਸਰ ਪਹੁੰਚ ਕੇ ਜੋ ਐਲਾਨ ਕੀਤੇ ਉਨ੍ਹਾਂ ਤੋਂ ਹੁਣ ਪੂਰੀ ਤਰ੍ਹਾਂ ਮੂੰਹ ਫੇਰ ਲਿਆ ਹੈ। ਹਰ ਸੋਮਵਾਰ ਨੂੰ ਹੋਣ ਵਾਲੀ ਕੋਰ ਕਮੇਟੀ ਦੀ ਮੀਟਿੰਗ ਵਿੱਚ ਸਿਰਫ ਤਿੰਨ ਜਣਿਆਂ ਨੂੰ ਛੱਡ ਕੇ ਬਾਕੀ ਸਾਰੇ ਰਿਸ਼ਤੇਦਾਰ ਹੀ ਹਨ। ਸ੍ਰੀ ਬਰਾੜ ਨੇ ਕਿਹਾ ਕਿ ਕੀ ਹੋਰ ਕੋਈ ਵੀ ਕਾਬਲ ਲੀਡਰ ਕੋਰ ਕਮੇਟੀ ਦੇ ਯੋਗ ਨਹੀਂ ਸੀ। ਕੋਰ ਕਮੇਟੀ ਵਿਚ ਰਿਸ਼ਤੇਦਾਰਾਂ ਦੀ ਜੁੰਡਲੀ ਕਾਰਨ ਕੱਦਾਵਾਰ ਨੇਤਾ ਜਿਵੇਂ ਸੰਤ ਅਜੀਤ ਸਿੰਘ,ਚਰਨਜੀਤ ਸਿੰਘ ਚੰਨੀ,ਮਨਜਿੰਦਰ ਸਿੰਘ ਕੰਗ ਤਿੰਨੋਂ ਵਿਧਾਇਕ ਤੇ ਸਾਬਕਾ ਡਿਪਟੀ ਸਪੀਕਰ ਬੀਰਦਵਿੰਦਰ ਸਿੰਘ ਸਾਥ ਛੱਡ ਕੇ ਚਲੇ ਗਏ ਹਨ। ਉਨ੍ਹਾਂ ਕਿਹਾ ਕਿ ਇਨ੍ਹਾਂ ਆਗੂਆਂ ਨੂੰ ਵਾਪਸ ਲਿਆਉਣ ਜਾਂ ਗੱਲਬਾਤ ਕਰਨ ਦਾ ਕੋਈ ਉਪਰਾਲਾ ਨਹੀਂ ਕੀਤਾ ਗਿਆ।
              ਸ੍ਰੀ ਬਰਾੜ ਨੇ ਕਿਹਾ ਕਿ ਮੌਜੂਦਾ ਸਰਕਾਰ ਨੇ ਮੇਰੇ ‘ਤੇ ਝੂਠਾ ਪਰਚਾ ਦਰਜ ਕੀਤਾ। ਫਿਰ ਮੇਰੇ ਪਿਤਾ ਤੇ ਭਰਾ ਸਮੇਤ ਮੇਰੇ ‘ਤੇ ਪਰਚਾ ਦਰਜ ਕਰ ਕੇ ਮੇਰੇ ਪਿਤਾ ਨੂੰ ਗ੍ਰਿਫਤਾਰ ਕੀਤਾ ਗਿਆ। ਪੰਜਾਬ ਵਿੱਚ ਹੋਰ ਵੀ ਬਹੁਤ ਸਾਰੇ ਵਰਕਰਾਂ ਨਾਲ ਅਜਿਹਾ ਹੋਇਆ ਪਰ ਪਾਰਟੀ ਵੱਲੋਂ ਕੋਈ ਵੀ ਧਰਨਾ ਮੁਜ਼ਾਹਰਾ ਨਹੀਂ ਕੀਤਾ।

           ਜਿਕਰਯੋਗ ਹੈ ਕਿ ਸ੍ਰੀ ਬਰਾੜ ਸਾਬਕਾ ਵਿੱਤ ਮੰਤਰੀ ਦੇ ਅਤਿ ਕਰੀਬੀ ਵਿਅਕਤੀਆਂ ਵਿੱਚੋਂ ਇੱਕ ਸਨ। ਉਹ ਮਨਪ੍ਰੀਤ ਬਾਦਲ ਦੇ ਵਿੱਤ ਮੰਤਰੀ ਹੁੰਦਿਆਂ ਓ.ਐਸ.ਡੀ. ਦੇ ਅਹੁਦੇ ‘ਤੇ ਤਾਇਨਾਤ ਰਹੇ। 





29 July 2011

ਮੁੱਖ ਮੰਤਰੀ ਬਾਦਲ ਦੇ ਹਲਕੇ ਵਿਚ ਚੋਣ ਜ਼ਾਬਤੇ ਦੀ ਉਲੰਘਣਾ

           ਮਾਰਕਫੈੱਡ ਦੇ ਨਵ ਨਿਯੁਕਤ ਨਿਦੇਸ਼ਕ ਨੇ ਚੈੱਕ ਵੰਡੇ ਅਤੇ ਸਕੂਲ ਦੀ ਇਮਾਰਤ ਦਾ ਉਦਘਾਟਨ ਕੀਤਾ  
 
                                                                 -ਇਕਬਾਲ ਸਿੰਘ ਸ਼ਾਂਤ-
ਲੰਬੀ-ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਚੋਣਾਂ ਦਾ ਜ਼ਾਬਤਾ ਲਾਗੂ ਹੋਣ ਦੇ ਬਾਵਜੂਦ ਮਾਰਕਫੈੱਡ ਦੇ ਨਵਨਿਯੁਕਤ ਨਿਦੇਸ਼ਕ ਅਤੇ ਜ਼ਿਲ੍ਹਾ ਸਹਿਕਾਰੀ ਬੈਂਕ ਮੁਕਤਸਰ ਦੇ ਚੇਅਰਮੈਨ ਵੱਲੋਂ ਜ਼ਾਬਤੇ ਦੀ ਉਲੰਘਣਾ ਕਰਨ ਦਾ ਮਾਮਲਾ ਸਾਹਮਣੇ ਆਇਆ ਹੈ।
                  ਮਾਰਕਫੈੱਡ ਦੇ ਨਵਨਿਯੁਕਤ ਨਿਦੇਸ਼ਕ ਅਤੇ ਜ਼ਿਲ੍ਹਾ ਸਹਿਕਾਰੀ ਬੈਂਕ ਮੁਕਤਸਰ ਦੇ ਚੇਅਰਮੈਨ ਸ. ਤੇਜਿੰਦਰ ਸਿੰਘ ਮਿੱਡੂਖੇੜਾ (ਸੀਨੀਅਰ ਅਕਾਲੀ ਆਗੂ) ਨੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਦੀ ਵਿਧਾਇਕੀ ਵਾਲੇ ਹਲਕੇ ਲੰਬੀ ਦੇ ਪਿੰਡ ਮਾਹੂਆਣਾ ਵਿਖੇ ਜਿੱਥੇ ਅੱਜ ਕਈ ਗਰੀਬ ਪਰਿਵਾਰਾਂ ਨੂੰ ਮਕਾਨ ਬਨਾਉਣ ਲਈ ਤੇ ਮਕਾਨਾਂ ਦੀ ਮੁਰੰਮਤ ਲਈ ਚੈਕ ਵੰਡੇ, ਉਥੇ ਪਿੰਡ ਦੇ ਸਰਕਾਰੀ ਪ੍ਰਾਇਮਰੀ ਸਕੂਲ ਵਿਚ ਇਮਾਰਤ ਦੇ ਨਵੇਂ ਉਸਾਰੇ ਇੱਕ ਬਲਾਕ ਦਾ ਉਦਘਾਟਨ ਵੀ ਕੀਤਾ। ਅੱਜ ਸਕੂਲ ਵਿਚ ਉਦਘਾਟਨ ਦੇ ਸਬੰਧ ਵਿਚ ਸ੍ਰੀ ਅਖੰਡ ਪਾਠ ਦੇ ਭੋਗ ਪਾਏ ਅਤੇ ਲੰਗਰ ਵੀ ਵਰਤਾਇਆ ਗਿਆ।
                ਹਾਲਾਂਕਿ ਸ. ਤੇਜਿੰਦਰ ਸਿੰਘ ਮਿੱਡੂਖੇੜਾ ਨੇ ਸੰਪਰਕ ਕਰਨ 'ਤੇ ਲੋਕਾਂ ਨੂੰ ਚੈੱਕ ਵੰਡਣ ਦੀ ਗੱਲ ਨੂੰ ਸਿਰੇ ਤੋਂ ਨਕਰਾਦਿਆਂ ਕਿਹਾ ਕਿ ਮੇਰੇ ਵੱਲੋਂ ਸਕੂਲ ਦੀ ਇਮਾਰਤ ਦਾ ਉਦਘਾਟਨ ਕਰਨ ਦਾ ਪ੍ਰੋਗਰਾਮ ਪਹਿਲਾਂ ਤੋਂ ਨਿਰਧਾਰਤ ਸੀ ਪਰ ਅੱਜ ਚੋਣ ਜ਼ਾਬਤਾ ਲੱਗਣ ਕਰਕੇ ਉਦਘਾਟਨ ਨਹੀਂ ਕੀਤਾ ਗਿਆ। ਜੇਕਰ ਸਕੂਲ ਪ੍ਰਬੰਧਕਾਂ ਨੇ ਨੀਂਹ-ਪੱਥਰ ਕੱਲ੍ਹ ਲਗਾ ਦਿੱਤਾ ਤਾਂ ਉਸ ਵਿਚ ਮੇਰਾ ਕੋਈ ਕਸੂਰ ਨਹੀਂ।



               ਦੂਜੇ ਪਾਸੇ ਜ਼ਿਲ੍ਹਾ ਯੂਥ ਕਾਂਗਰਸ ਮੁਕਤਸਰ ਦੇ ਸਾਬਕਾ ਪ੍ਰਧਾਨ ਸ. ਰਣਧੀਰ ਸਿੰਘ ਖੁੱਡੀਆਂ ਨੇ ਚੇਅਰਮੈਨ ਤੇਜਿੰਦਰ ਸਿੰਘ ਮਿੱਡੂਖੇੜਾ ਵੱਲੋਭ ਸ਼੍ਰੋਮਣੀ ਕਮੇਟੀ ਚੋਣਾਂ ਲਈ ਜ਼ਾਬਤਾ ਲਾਗੂ ਹੋਣ ਲੱਗਣ ਦੇ ਬਾਵਜੂਦ ਲੋਕਾਂ ਨੂੰ ਚੈੱਕ ਵੰਡਣ ਨੂੰ ਸਿੱਧੇ ਤੌਰ 'ਤੇ ਉਲੰਘਣਾ ਦਾ ਗੰਭੀਰ ਮਾਮਲਾ ਕਰਾਰ ਦਿੰਦਿਆਂ ਕਿਹਾ ਕਿ ਹਾਕਮ ਧਿਰ ਵੱਲੋਂ ਇਹ ਤਾਂ ਅਜੇ ਸ਼ੁਰਆਤ ਹੈ। ਹਲਕੇ ਵਿਚ ਅਜੇ ਤਾਂ ਪਿੰਡ-ਪਿੰਡ ਵਿਚ ਪਹਿਲਾਂ ਸ਼੍ਰੋਮਣੀ ਕਮੇਟੀ ਅਤੇ ਫਿਰ ਵਿਧਾਨਸਭਾ ਚੋਣਾਂ ਤੱਕ ਅਜਿਹੇ ਵਰਤਾਰੇ ਆਮ ਵੇਖਣ-ਸੁਨਣ ਨੂੰ ਮਿਲਣੇ ਹਨ। ਉਨ੍ਹਾਂ ਚੋਣ ਕਮਿਸ਼ਨ ਤੋਂ ਚੋਣ ਜ਼ਾਬਤੇ ਦੀ ਉਲੰਘਣਾ ਨੂੰ ਗੰਭੀਰਤਾ ਨਾਲ ਲੈਂਦਿਆਂ ਸਖ਼ਤ ਕਾਰਵਾਈ ਕਰਨ ਦੀ ਮੰਗ ਕੀਤੀ ਹੈ।
 -Ph. 098148-26100/09317826100
iqbal.shant@gmail.com

24 July 2011

ਲੋਕਾਂ ਦੇ ਦੁੱਖ ਤਕਲੀਫ਼ਾਂ 'ਤੇ ਭਾਰੂ ਲੀਡਰਾਂ ਦੀ ਸੁਰੱਖਿਆ

        -ਮਰਹੂਮ ਵਫ਼ਾਦਾਰ ਅਕਾਲੀ ਵਰਕਰ ਦੇ ਦੁਖੀ ਪਰਿਵਾਰ ਨੂੰ ਖਾਕੀ ਨੇ ਹਰਸਿਮਰਤ ਤੋਂ ਦੂਰ ਰੱਖਿਆ-
ਲੰਬੀ - ਇਹ ਦੇਸ਼ ਦੀ ਜਨਤਾ ਦੇ ਮੰਦੇ ਭਾਗ ਹੀ ਹਨ ਕਿ ਅੱਜ ਲੋਕਾਂ ਦੇ ਦੁੱਖ ਤਕਲੀਫ਼ਾਂ ਨਾਲੋਂ ਲੀਡਰਾਂ ਦੀ ਸੁਰੱਖਿਆ ਜ਼ਿਆਦਾ ਅਹਿਮ ਹੋ ਗਈ ਹੈ। ਪਿੰਡ ਵਣਵਾਲਾ 'ਚ ਹਰਸਿਮਰਤ ਕੌਰ ਬਾਦਲ ਦੇ ਜਲਸੇ ਵਿਚ ਆਪਣੇ ਮ੍ਰਿਤਕ ਭਰਾ ਬਿੱਕਰ ਸਿੰਘ, ਜਿਸਦੀ ਪਿਛਲੇ ਮਹੀਨੇ ਖੇਤ ਵਿਚ ਕੰਮ ਕਰਦੇ ਸਮੇਂ ਕਰੰਟ ਲੱਗਣ ਕਰਕੇ ਮੌਤ ਹੋ ਗਈ ਸੀ, ਦੇ ਬੇਸਹਾਰਾ ਪਰਿਵਾਰ ਲਈ ਸਹਾਰੇ ਤਾਂਘ ਵਿਚ ਪੁੱਜੀ ਅਕਾਲੀ ਮਰਹੂਮ ਅਕਾਲੀ ਵਫ਼ਾਦਾਰ ਵਰਕਰ ਪ੍ਰੀਤਮ ਸਿੰਘ ਦੀ ਪੋਲੀਓਗ੍ਰਸਤ ਧੀ ਸੁਰਜੀਤ ਕੌਰ ਅਤੇਉਸਦੀ ਭਾਬੀ ਅਤੇ ਤਿੰਨ ਨਾਬਾਲਗ ਭਤੀਜੀਆਂ ਪਰਮਿੰਦਰ ਕੌਰ, ਮਨਿੰਦਰ ਕੌਰ ਅਤੇ ਬੇਅੰਕ ਕੌਰ ਨੂੰ ਨਾਲ ਲੈ ਕੇ ਹਰਮਿਸਰਤ ਕੌਰ ਦੇ ਆਉਣ ਤੋਂ ਪਹਿਲਾਂ ਹੀ ਪੁਲਿਸ ਨੇ ਪੰਡਾਲ ਵਿਚ ਸੁਰੱਖਿਆ ਦੀ ਆੜ ਵਿਚ ਇੱਕ ਪਾਸੇ ਔਰਤਾਂ ਦੀ ਕਤਾਰ ਵਿਚ ਬਿਠਾ ਦਿੱਤਾ। ਆਪਣੇ ਪਿਤਾ ਪੁਰਖੀ ਪਾਰਟੀ ਦੇ ਮੁਖੀ ਦੀ ਨੂੰਹ ਕੋਲ ਆਪਣੇ ਭਰਾ ਦੇ ਪਰਿਵਾਰ ਦਾ ਦੁੱਖ ਫਰੋਲਣ ਗਈ ਪਰ ਉਥੇ ਵੀ ਨੀਲੇ ਬਾਣੇ 'ਤੇ ਖਾਕੀ ਭਾਰੂ ਹੋ ਨਿਬੜਿਆ। ਉਸਨੇ ਜਲਸੇ ਬਾਅਦ ਹਰਸਿਮਰਤ ਕੌਰ ਦੇ ਆਉਣ ਤੋਂ ਲੈ ਕੇ ਉਨ੍ਹਾਂ ਦੇ ਜਾਣ ਤੱਕ ਕਈ ਵਾਰ ਉੱਠਣ ਦੀ ਕੋਸ਼ਿਸ਼ ਕੀਤੀ, ਪਰ ਵਾਰ  ਮਹਿਲਾ ਪੁਲਿਸ ਦੀਆਂ ਤਿੱਖੀਆਂ ਨਜ਼ਰਾਂ ਨੇ ਉਸ ਅਪਾਹਜ ਨੂੰ ਕੁਰਸੀ ਤੋਂ ਉੱਠਣ ਦਾ ਹੌਂਸਲਾ ਨਾ ਪੈਣ ਦਿੱਤਾ।
              ਜਲਸੇ ਮਗਰੋਂ ਸੁਰਜੀਤ ਕੌਰ ਨੇ ਦੁਖੀ ਮਨ ਨਾਲ ਕਿਹਾ ਕਿ ਮੇਰਾ ਭਰਾ ਬਿੱਕਰ ਸਿੰਘ ਕਰੰਟ ਲੱਗਣ ਕਰਕੇ ਰੱਬ ਨੂੰ ਪਿਆਰਾ ਹੋ ਗਿਆ। ਸਿਰਫ਼ ਇੱਕ ਏਕੜ ਜ਼ਮੀਨ ਵਾਲੇ ਪਰਿਵਾਰ ਕੋਲ ਰੁਜ਼ਗਾਰ ਦਾ ਕੋਈ ਜਰੀਆ ਨਹੀਂ। ਅਸੀਂ ਅੱਜ ਬੜੀ ਆਸ ਲੈ ਕੇ ਆਏ ਸੀ ਕਿ ਹਰਮਿਸਰਤ ਕੋਲੋਂ ਕੁਝ ਸਹਾਰਾ ਮਿਲੇਗਾ। ਪਰ ਪੁਲੀਸ ਵਾਲੀਆਂ ਨੇ ਸਾਨੂੰ ਤਾਂ ਨੇੜਿਓਂ ਤੱਕਣ ਈ ਨਹੀਂ ਦਿੱਤਾ। ਪਰ ਹੁਣ ਸਰਪੰਚ ਨੂੰ ਦਰਖਾਸਤ ਫੜਾਈ ਐ ਵੇਖੋ ਕੀ ਬਣਦੈ।
             ਜਦੋਂਕਿ ਗੱਡੀ ਵਿਚ ਬੈਠਣ ਤੋਂ ਪਹਿਲਾਂ ਭਾਰੀ ਸੁਰੱਖਿਆ ਪ੍ਰਬੰਧਾਂ ਵਿਚ ਸੰਸਦ ਮੈਂਬਰ ਤੇ ਵਾਤਾਵਰਨ ਪ੍ਰੇਮੀ ਹਰਸਿਮਰਤ ਕੌਰ ਬਾਦਲ ਨੂੰ ਜਲਸੇ ਦੇ ਬਾਹਰ ਇੱਕ ਮੇਜ 'ਤੇ ਘੱਟ ਰੱਖੇ (ਡਿਸਪਲੇ ਕੀਤੇ) ਬੂਟਾ ਪ੍ਰਸਾਦ ਲਈ ਅਫਸਰਾਂ ਨੂੰ ਝਾੜ ਪਾਉਣਾ ਤਾਂ ਚੇਤੇ ਰਿਹਾ, ਪਰ ਸ਼ਾਇਦ ਸੁਰਜੀਤ ਕੌਰ ਜਿਹੇ ਗਰੀਬਾਂ ਲਈ ਉਨ੍ਹਾਂ ਕੋਲ ਸਮਾਂ ਨਹੀਂ ਸੀ ਤਾਂ ਸੁਰੱਖਿਆ ਪ੍ਰਬੰਧਾਂ ਦਾ ਕਵਚ ਲੋਕ ਹਿੱਤਾਂ 'ਤੇ ਜ਼ਿਆਦਾ ਭਾਰੂ ਸੀ।
            ਇਸੇ ਦੌਰਾਨ ਉਪ ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਅਵਤਾਰ ਸਿੰਘ ਵਣਵਾਲਾ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਬਿੱਕਰ ਸਿੰਘ ਦੇ ਪਰਿਵਾਰ ਦੀ ਦਰਖਾਸਤ ਮਿਲ ਗਈ ਤੇ ਪਰਿਵਾਰ ਦੀ ਮੱਦਦ ਲਈ ਉਨ੍ਹਾਂ ਨੇ ਬਿੱਕਰ ਸਿੰਘ ਦੀ ਮੌਤ ਦੇ ਮੁਆਵਜੇ ਲਈ ਮੰਡੀ ਬੋਰਡ ਅਤੇ ਬੱਚੀਆਂ ਦੀ ਮੱਦਦ ਲਈ ਕੇਸ ਬਣਾ ਕੇ ­ਪ੍ਰਸ਼ਾਸਨ ਨੂੰ ਭੇਜਿਆ ਜਾ ਰਿਹਾ ਹੈ।



        ਹਰਸਿਮਰਤ ਨੇ ਗਾਏ ਬਾਦਲ ਦੇ ਸ਼ੋਹਲੇ, ਤਰਮਾਲਾ ਨੇ ਲਾਏ 
                        ਮਨਪ੍ਰੀਤ ਤੇ ਮੰਟੇ ਨੂੰ ਸ਼ਬਦੀ ਰਗੜੇ 
ਲੰਬੀ-ਬਠਿੰਡਾ ਲੋਕਸਭਾ ਹਲਕੇ ਤੋਂ ਸੰਸਦ ਮੈਂਬਰ ਹਰਸਿਮਰਤ ਕੌਰ ਬਾਦਲ ਨੇ ਕੱਲ੍ਹ ਦੇਰ ਸ਼ਾਮ ਪਿੰਡ ਵਣਵਾਲਾ ਵਿਖੇ ਇੱਕ ਜਲਸੇ ਨੂੰ ਸੰਬੋਧਨ ਕਰਦਆਂ ਜਿੱਥੇ ਆਪਣੇ ਸਹੁਰੇ ਮੁੱਖ ਮੰਤਰੀ ਸ. ਪ੍ਰਕਾਸ਼ ਸਿੰਘ ਬਾਦਲ ਨੂੰ ਦੇਸ਼ ਦਾ ਇੱਕ ਨੰਬਰ ਦਾ ਲੋਕ ਸੇਵਾਦਾਰ ਕਰਾਰ ਦੇਣੋਂ ਨਾ ਧੱਕੇ, ਉਥੇ ਅਕਾਲੀ ਦਲ ਹਲਕਾ ਲੰਬੀ ਦੇ ਪ੍ਰਧਾਨ ਇਕਬਾਲ ਸਿੰਘ ਤਰਮਾਲਾ ਨੇ ਆਪਣੀ ਤਕਰੀਰ ਵਿਚ ਆਪਣੇ ਸਿਆਸੀ ਆਕਾਵਾਂ ਦੇ ਨਵੇਂ ਵਿਰੋਧੀ ਹੋਏ ਸ. ਮਨਪ੍ਰੀਤ ਸਿੰਘ ਬਾਦਲ ਅਤੇ ਸਾਬਕਾ ਅਕਾਲੀ ਲਫਟੈਨ ਸਤਿੰਦਰਜੀਤ ਸਿੰਘ ਮੰਟਾ 'ਤੇ ਬੜੀ ਸ਼ਿੱਦਤ ਨਾਲ ਸ਼ਬਦੀ ਰਗੜੇ ਲਾਏ। ਸ੍ਰੀ ਤਰਮਾਲਾ ਨੇ ਮਨਪ੍ਰੀਤ ਸਿੰਘ ਬਾਦਲ 'ਤੇ ਮੁੱਖ ਮੰਤਰੀ ਸ੍ਰੀ ਬਾਦਲ ਨਾਲ ਧਰੋਹ ਕਮਾਉਣ ਦੇ ਦੋਸ਼ ਲਾਉਂਦਿਆਂ ਕਿਹਾ ਕਿ 'ਬਾਦਲ ਸਾਬ੍ਹ ਮਨਪ੍ਰੀਤ ਨੂੰ ਬਹੁਤ ਪਿਆਰ ਕਰਦੇ ਸਨ ਤੇ ਜੇਕਰ ਉਨ੍ਹਾਂ ਨੇ ਇੱਕ ਵਾਰ ਆਪਣੀ ਮੁੱਖ ਮੰਤਰੀ ਬਣਨ ਦੀ ਇੱਛਾ ਇਜ਼ਹਾਰ ਕੀਤਾ ਹੁੰਦਾ ਵੱਡੇ ਬਾਦਲ ਸਾਬ੍ਹ ਨੇ ਉਸਨੂੰ ਹੱਸ ਕੇ ਮੰਨ ਲੈਣਾ ਸੀ।''
            ਇਸ ਮੌਕੇ ਸੰਸਦ ਮੈਂਬਰ ਬੀਬੀ ਬਾਦਲ ਨੇ ਕਿਹਾ ਕਿ ਪੰਜਾਬ ਵਿਚ ਅਕਾਲੀ ਸਰਕਾਰ ਬਿਨ੍ਹਾਂ ਦਾ ਬਹੁਪੱਖੀ ਵਿਕਾਸ ਸੰਭਵ ਨਹੀਂ। ਉਨ੍ਹਾਂ ਅੰਕੜੇ ਗਿਣਾਉਂਦੇ ਹੋਏ ਕਿਹਾ ਕਿ ੂਸਬੇ ਵਿਚ 16 ਲੱਖ ਪਰਿਵਾਰਾਂ ਨੂੰ ਆਟਾ-ਦਾਲ, 19 ਲੱਖ ਲੋਕਾਂ ਨੂੰ ਬੁਢਾਪਾ ਪੈਨਸ਼ਨਾਂ ਅਤੇ ਵੱਡੀ ਤਾਦਾਦ ਵਿਚ ਸ਼ਗੁਨ ਸਕੀਮਾਂ ਦਿੱਤੀਆਂ ਜਾ ਰਹੀਆਂ ਹਨ। ਜਦਕਿ ਪਖਾਨੇ ਅਤੇ ਗਰੀਬਾਂ ਨੂੰ ਪੱਕੇ ਮਕਾਨ ਤੇ ਮੁਰੰਮਤ ਲਈ ਗਰਾਂਟਾਂ ਦੇ ਗੱਫੇ ਵੀ ਅਕਾਲੀ ਸਰਕਾਰ ਦੀ ਦੇਣ ਹਨ। ਉਨ੍ਹਾਂ ਬਠਿੰਡਾ ਤੋਲ ਸ਼ੋਧਕ ਕਾਰਖਾਨੇ ਨੂੰ ਇੱਕ ਰੁਜ਼ਗਾਰ ਦਾ ਵੱਡਾ ਸੋਮਾ ਦੱਸਦਿਆਂ ਪਿੰਡ ਘੁੱਦਾ ਵਿਚ ਕੇਂਦਰੀ ਯੂਨੀਵਰਸਿਟੀ ਦੀ ਸਥਾਪਤੀ ਲਈ ਵੀ ਮੌਜਦਾ ਸਰਕਾਰ ਨੂੰ ਸਿਹਰਾ ਦਿੱਤਾ।     
ਇਸ ਮੌਕੇ ਸੰਸਦ ਮੈਂਬਰ ਨੇ ਪਿੰਡ ਵਣਵਾਲਾ ਦੇ 4 ਅੰਗਹੀਣਾਂ ਨੂੰ ਟਰਾਈ ਸਾਇਕਲ ਦਿੱਤੇ ਅਤੇ ਕਈ ਬੂਟਾ ਪ੍ਰਸਾਦ ਵੀ ਦਿੱਤਾ।
                ਇਸ ਮੌਕੇ ਉਪ ਮੁੱਖ ਮੰਤਰੀ ਦੇ ਨਿੱਜੀ ਸਕੱਤਰ ਅਵਤਾਰ ਸਿੰਘ ਵਣਵਾਲਾ, ਜ਼ਿਲ੍ਹਾ ਪੁਲੀਸ ੁਮਖੀ ਇੰਦਰਮੋਹਨ ਸਿੰਘ, ਡੀ.ਡੀ.ਪੀ.ਓ. ਐਚ. ਐਸ. ਸਰਾਂ, ਜ਼ਿਲ੍ਹਾ ਭਲਾਈ ਅਫ਼ਸਰ ਗੁਰਮੀਤ ਸਿੰਘ, ਗੁਰਬਖਸ਼ੀਸ਼ ਸਿੰਘ ਵਿੱਕੀ ਮਿੱਡੂਖੇੜਾ ਅਤੇ ਜ਼ਿਲ੍ਹਾ ਮਹਿਲਾ ਅਕਾਲੀ ਦਲ ਦੇ ਪ੍ਰਧਾਨ ਆਸ਼ਾ ਬਜਾਜ, ਅਕਾਲੀ ਦਲ ਮਹਿਲਾ ਵਿੰਗ ਹਲਕਾ ਲੰਬੀ ਦੀ ਪ੍ਰਧਾਨ ਸੁਖਦੀਪ ਕੌਰ ਖਿਉਵਾਲੀ, ਨੌਜਵਾਨ ਆਗੂ ਜਿੰਮੀ ਮਹਿਣਾ, ਗੁਰਸੇਵਕ ਸਿੰਘ ਸਰਪੰਚ, ਕੁਲਵਿੰਦਰ ਸਿੰਘ ਪੰਚ, ਸੁਰਜੀਤ ਕੌਰ ਪੰਚ, ਮਨੋਹਰ ਸਿੰਘ ਪੰਚ, ਬਲਕਾਰ ਸਿੰਘ ਸੰਧੂ ਪੰਚ, ਹਰਜਿੰਦਰ ਸਿੰਘ, ਹਰਦੀਪ ਸਿੰਘ (ਨੰਬਰਦਾਰ) ਤੇ ਵਕੀਲ ਸਿੰਘ ਸਮੇਤ ਅਹੁਦੇਦਾਰ ਵੀ ਮੌਜੂਦ ਸਨ।