ਵਜੂਦੀ ਸਿਆਸਤ: ਸਵੇਰੇ ਟਿਕਟ 'ਤੇ ਦਾਅਵੇਦਾਰੀ ਠੋਕੀ, ਸ਼ਾਮ ਨੂੰ ਡਿਪਟੀ ਸੀ.ਐਮ. ਮੁਲਾਕਾਤ ਨੂੰ ਘਰ ਪੁੱਜ ਗਏ

ਲੰਬੀ 2022: ਕਾਂਗਰਸ ਦੇ ਕੇਂਦਰੀ ਆਬਜ਼ਰਵਰ ਨੇ ਕਾਡਰ ਤੋਂ ਲੰਬੀ ਦੇ ਟਿਕਟ ਚਾਹਵਾਨਾਂ ਦਾ ਜ਼ਮੀਨੀ ਵਜ਼ਨ-ਵਜੂਦ ਪਰਖਿਆ

ਇਕਬਾਲ ਸਿੰਘ ਸ਼ਾਂਤ

ਲੰਬੀ, 26 ਨਵੰਬਰ

ਲਾਲਸਾ ਰਹਿਤ ਰਾਜਨੀਤੀ ਦੇ ਧਾਰਨੀ ਸੀਨੀਅਰ ਕਾਂਗਰਸੀ ਆਗੂ ਮਹੇਸ਼ਇੰਦਰ ਸਿੰਘ ਬਾਦਲ ਦੀ ਵਜੂਦੀ ਰਾਜਨੀਤੀ ਦੇ ਆਪਣੇ ਰੰਗ ਹਨ। ਜਿਸਦਾ ਵਜ਼ਨ ਕਾਂਗਰਸ ਹਾਈਕਮਾਂਡ ਵੀ ਬਾਖੂਬੀ ਮਹਿਸੂਸ ਕਰਦੀ ਹੈ। ਸ਼ੁੱਕਰਵਾਰ ਸਵੇਰੇ ਮਹੇਸ਼ਇੰਦਰ ਸਿੰਘ ਦੇ ਇੱਕਲੌਤੇ ਸਪੁੱਤਰ ਫਤਿਹ ਸਿੰਘ ਬਾਦਲ ਨੇ ਕਾਂਗਰਸ ਦੇ ਕੌਮੀ ਸਕੱਤਰ ਅਤੇ ਕੇਂਦਰੀ ਚੋਣ ਆਬਜਰਵਰ ਹਰਸ਼ਵਰਧਨ ਕੋਲ ਲੰਬੀ ਹਲਕੇ ਤੋਂ ਕਾਂਗਰਸ ਟਿਕਟ ਲਈ ਦਾਅਵੇਦਾਰੀ ਜਤਾਈ। ਦੇਰ ਸ਼ਾਮ ਨੂੰ ਪੰਜਾਬ ਦੇ ਡਿਪਟੀ ਸੀ.ਐਮ. ਕਮ ਗ੍ਰਹਿ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਪਿੰਡ ਬਾਦਲ ਵਿਖੇ ਉਨ੍ਹਾਂ ਨਾਲ ਮੁਲਾਕਾਤ ਲਈ ਪੁੱਜ ਗਏ। ਜਾਣਕਾਰੀ ਅਨੁਸਾਰ ਰੰਧਾਵਾ ਨੇ ਮਹੇਸ਼ਇੰਦਰ ਬਾਦਲ ਅਤੇ ਫਤਿਹ ਬਾਦਲ ਨਾਲ ਲੰਮੀ ਕਮਰਾ-ਬੰਦ ਮੀਟਿੰਗ ਕੀਤੀ। ਸੂਤਰ ਦੱਸਦੇ ਹਨ ਕਿ ਚੰਨੀ ਸਰਕਾਰ ਅਤੇ ਕਾਂਗਰਸ ਹਾਈਕਮਾਂਡ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਬਾਦਲ ਧਿਰ ਨੂੰ ਲੰਬੀ ਹਲਕੇ ਵਿਚ ਘੇਰਨ ਖਾਤਿਰ ਮਹੇਸ਼ਇੰਦਰ ਸਿੰਘ ਬਾਦਲ 'ਤੇ ਨਿਰਭਰਤਾ ਵਿਖਾ ਰਹੀ ਹੈ। ਜ਼ਿਕਰਯੋਗ ਹੈ ਕਿ ਮਹੇਸ਼ਇੰਦਰ ਸਿੰਘ ਬਾਦਲ 2002 ਤੋਂ ਹੁਣ ਤੱਕ ਤਿੰਨ ਵਾਰ ਉਨ੍ਹਾਂ ਵੱਡੇ ਚਚੇਰੇ ਭਰਾ ਅਤੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਖਿਲਾਫ਼ ਚੋਣ ਲੜ ਚੁੱਕੇ ਹਨ। ਹਲਕਾ ਲੰਬੀ 'ਚ ਕਾਂਗਰਸ ਪਾਰਟੀ ਕਦੇ ਵੀ ਅਕਾਲੀ ਦਲ ਦੇ ਉਮੀਦਵਾਰ ਅਤੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਸਿਆਸੀ ਆਭਾ ਮੰਡਲ 'ਤੇ ਭਾਰੂ ਨਹੀਂ ਪੈ ਸਕੀ। 2017 ਵਿੱਚ ਕਾਂਗਰਸ ਦੇ ਉਮੀਦਵਾਰ ਕੈਪਟਨ ਅਮਰਿੰਦਰ ਸਿੰਘ ਲੰਬੀ ਤੋਂ ਵੱਡੇ ਬਾਦਲ ਮੂਹਰੇ ਵੱਡੀ ਹਾਰ ਝੱਲ ਚੁੱਕੇ ਹਨ। ਇਹ ਵੀ ਹਕੀਕਤ ਹੈ ਕਿ ਬਾਦਲਾਂ ਦੇ ਗੜ੍ਹ ਹੋਣ ਅਤੇ ਕਾਂਗਰਸ ਹਾਈਕਮਾਂਡ ਵਲੋਂ ਗੈਰ ਸੁਣਵਾਈ ਦੇ ਬਾਵਜੂਦ ਦੋ ਦਹਾਕੇ ਤੋਂ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਸਿਆਸੀ ਵਜੂਦ ਅਤੇ ਜ਼ਮੀਨ ਪੱਧਰ 'ਤੇ ਡੂੰਘੀਆਂ ਜੜ੍ਹਾਂ ਕਾਰਨ ਲੰਬੀ ਹਲਕੇ ਵਿਚ ਕਾਂਗਰਸ ਦਾ ਵੋਟ ਬੈਂਕ 40 ਤੋਂ 43 ਹਜ਼ਾਰ 'ਤੇ ਟਿਕਿਆ ਆ ਰਿਹਾ ਹੈ। ਇਸ ਵਾਰ ਉਨ੍ਹਾਂ ਦੇ ਫ਼ਰਜ਼ੰਦ ਫਤਿਹ ਸਿੰਘ ਬਾਦਲ ਇਥੋਂ ਬਤੌਰ ਦਾਅਵੇਦਾਰ ਜ਼ਮੀਨੀ ਸਫ਼ਾਂ ਵਿੱਚ ਵਿਚਰ ਰਹੇ ਹਨ। ਇਸੇ ਵਿਚਕਾਰ ਆਲ ਇੰਡੀਆ ਕਾਂਗਰਸ ਦੇ ਸਕੱਤਰ ਹਰਸ਼ਵਰਧਨ ਵੀ ਅੱਜ 2022 ਦੀਆਂ ਪੰਜਾਬ ਚੋਣਾਂ ਲਈ ਜ਼ਮੀਨ ਪੱਧਰ 'ਤੇ ਟਿਕਟਾਂ ਦੇ ਚਾਹਵਾਨ ਉਮੀਦਵਾਰਾਂ ਦੇ ਅਸਰ ਰਸੂਖ਼ ਪਰਖਦੇ ਨਜ਼ਰ ਆਏ। ਉਨ੍ਹਾਂ ਲੰਬੀ ਹਲਕੇ ਦੀਆਂ ਜ਼ਮੀਨੀ ਕਾਂਗਰਸੀ ਰਮਜ਼ਾਂ ਨੂੰ ਵੀ ਵਾਚਿਆ। ਲੰਬੀ ਤੋਂ ਕਾਂਗਰਸ ਦੀ ਟਿਕਟ ਲਈ ਅਬਜ਼ਰਵਰ ਦੇ ਸਨਮੁੱਖ ਤਿੰਨ ਕਾਂਗਰਸੀ ਆਗੂਆਂ ਮਹੇਸ਼ਇੰਦਰ ਸਿੰਘ ਬਾਦਲ ਦੇ ਸਪੁੱਤਰ ਫਤਿਹ ਸਿੰਘ ਬਾਦਲ, ਜਗਪਾਲ ਸਿੰਘ ਅਬੁਲਖੁਰਾਣਾ ਅਤੇ ਸ਼ਿਵਕੰਵਰ ਸਿੰਘ ਸੰਧੂ ਨੇ ਦਾਅਵੇਦਾਰੀ ਪੇਸ਼ ਕੀਤੀ। ਆਬਜਰਵਰ ਨੇ ਅੱਜ ਮਲੋਟ ਵਿਖੇ ਲੰਬੀ ਹਲਕੇ ਦੇ ਵੱਖ-ਵੱਖ ਪਿੰਡਾਂ ਦੇ ਸਰਪੰਚਾਂ ਅਤੇ ਵਰਕਰਾਂ ਤੋਂ ਇਕੱਲਿਆਂ ਬੰਦ ਕਮਰਾ ਗੱਲਬਾਤ ਕਰਕੇ ਜੇਤੂ ਅਤੇ ਜ਼ਮੀਨੀ ਵਜੂਦ ਵਾਲੇ ਉਮੀਦਵਾਰਾਂ ਬਾਰੇ ਜਾਇਜ਼ਾ ਲਿਆ। ਲੰਬੀ ਹਲਕੇ ਦਾ ਇਤਿਹਾਸ ਗਵਾਹ ਹੈ ਕਿ ਟਿਕਟ ਭਾਵੇਂ ਕਿਸੇ ਨੂੰ ਮਿਲੇ ਪਰ ਮਹੇਸ਼ਇੰਦਰ ਸਿੰਘ ਬਾਦਲ ਦੀ ਛਤਰਛਾਇਆ ਵਗੈਰ ਚੋਣ ਪਿੜ ਵਿੱਚ ਵਜੂਦ ਦਰਸਾਉਣਾ ਸੰਭਵ ਨਹੀਂ ਹੋ ਸਕਿਆ। ਆਬਜ਼ਰਵਰ ਦੀ ਆਮਦ ਅਤੇ ਡਿਪਟੀ ਸੀ.ਐਮ. ਦੀ ਉਕਤ ਫੇਰੀ ਨਾਲ ਆਗਾਮੀ ਦਿਨਾਂ ਵਿੱਚ ਹਲਕੇ ਵਿਚ ਕਾਂਗਰਸੀ ਕਾਡਰ ਦੀਆਂ ਸਰਗਰਮੀਆਂ ਵਿਚ ਹੋਰ ਤੇਜ਼ੀ ਫੜਨ ਦੇ ਆਸਾਰ ਹਨ।

ਅਹੁਦੇਦਾਰ ਹੋਣ ਕਰਕੇ ਪਾਰਟੀ ਅਹੁਦੇਦਾਰਾਂ ਨੂੰ ਮਿਲ ਰਿਹਾਂ: ਹਰਸ਼ਵਰਧਨ

ਆਲ ਇੰਡੀਆ ਕਾਂਗਰਸ ਪਾਰਟੀ ਦੀ ਕੌਮੀ ਸਕੱਤਰ ਅਤੇ ਚੋਣ ਆਬਜ਼ਰਵਰ ਹਰਸ਼ਵਰਧਨ ਨੇ ਆਖਿਆ ਕਿ ਉਹ ਰੁਟੀਨ ਵਿਚ ਪਾਰਟੀ ਨੂੰ ਮਜ਼ਬੂਤ ਕਰਨ ਹਿੱਤ ਸੰਗਠਨ ਦੇ ਕਾਡਰ ਨਾਲ ਮਿਲ ਰਹੇ ਹਨ। ਉਨ੍ਹਾਂ ਨੂੰ ਜਦੋਂ ਉਕਤ ਮਿਲਣੀਆਂ ਨੂੰ ਟਿਕਟ ਸਰਵੇ ਦਾ ਹਿੱਸਾ ਹੋਣ ਬਾਰੇ ਪੁੱਛਿਆ ਤਾਂ ਉਨ੍ਹਾਂ ਕਿਹਾ ਕਿ ਹਰ ਕਿਸੇ ਦਾ ਆਪਣਾ ਤਰੀਕਾ ਹੁੰਦਾ ਹੈ। ਉਹ ਵੀ ਪਾਰਟੀ ਅਹੁਦੇਦਾਰ ਹਨ ਅਤੇ ਪਾਰਟੀ ਦੇ ਜ਼ਮੀਨ ਪੱਧਰ ਦੇ ਅਹੁਦੇਦਾਰਾਂ ਨੂੰ ਮਿਲ ਰਹੇ ਹਨ।

ਖੂਨ ਸਫੈਦ : ਕਹੀ ਨਾਲ ਮਾਰ ਕੇ ਸਕਾ ਭਰਾ ਖੇਤ ’ਚ ਦੱਬਿਆ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਇੱਕ ਵਿਗਾਨੀ ਔਰਤ ਨਾਲ ਨਜਾਇਜ਼ ਸੰਬੰਧਾਂ ’ਚ ਗ੍ਰਸੇ ਇੱਕ ਕਿਸਾਨ ਨੇ ਪਿੰਡ ਧੋਲਾ ਵਿਖੇ ਉਸਦੇ ਛੋਟੇ ਭਰਾ-ਕਮ-ਸਾਂਢੂ ਨੂੰ ਕਹੀ ਮਾਰ ਕੇ ਕਤਲ ਦਿੱਤਾ ਅਤੇ ਲਾਸ਼ ਨੂੰ ਪੱਲੀ ’ਚ ਬੰਨ ਕੇ ਖੇਤ ਦੀ ਜ਼ਮੀਨ ’ਚ ਦੱਬ ਦਿੱਤਾ। ਛੋਟੇ ਭਰਾ ਗੁਰਮੀਤ ਸਿੰਘ ਉਰਫ਼ ਪੀਤ ਦਾ ਕਸੂਰ ਇਤਨਾ ਸੀ ਕਿ ਉਹ ਵੱਡੇ ਭਰਾ ਗੁਰਜੀਤ ਸਿੰਘ ਨੂੰ ਨਜਾਇਜ਼ ਸਬੰਧਾਂ ਤੋਂ ਵਰਜਦਾ ਸੀ। ਗੁਰਜੀਤ ਸਿੰਘ ਦੇ ਪਿੰਡ ਦੀ ਇੱਕ ਔਰਤ ਨਾਲ ਨਜਾਇਜ਼ ਸੰਬੰਧ ਸਨ। ਜਿਸਨੂੰ ਲੈ ਕੇ ਘਰ ’ਚ ਤਕਰਾਰ ਰਹਿੰਦੀ ਸੀ। ਜਾਣਕਾਰੀ ਅਨੁਸਾਰ ਦੋਵੇਂ ਭਰਾ ਆਪਸ ’ਚ ਸਾਂਢੂ ਵੀ ਸਨ ਅਤੇ ਖਿਉਵਾਲੀ ’ਚ ਵਿਆਹੇ ਹੋਏ ਹਨ। ਉਨਾਂ ਕੋਲ ਵੀਹ ਏਕੜ ਜ਼ਮੀਨ ਹੈ ਅਤੇ ਸਾਰਾ ਕਾਰ-ਵਿਹਾਰ ਸਾਂਝੇ ਖਾਤੇ ਹੀ ਚੱਲਦਾ ਹੈ। ਮਿ੍ਰਤਕ ਦੇ ਵਿਆਹ ਨੂੰ ਚਾਰ ਸਾਲ ਹੋਏ ਹਨ। ਅਤੇ ਉਸਦੀ ਢਾਈ ਸਾਲ ਦੀ ਬੱਚੀ ਹੈ। ਘਟਨਾ ਮੁਤਾਬਕ ਬੀਤੀ 2 ਨਵੰਬਰ ਨੂੰ ਗੁਰਜੀਤ ਸਿੰਘ ਅਤੇ ਉਸਦਾ ਛੋਟਾ ਗੁਰਮੀਤ ਸਿੰਘ ਉਰਫ਼ ਪੀਤ ਉਨਾਂ ਦੇ ਖੇਤ ਕਣਕ ਬੀਜਣ ਗਏ ਸਨ। ਦੇਰ ਸ਼ਾਮ ਤੱਕ ਗੁਰਮੀਤ ਸਿੰਘ ਵਾਪਸ ਨਹੀਂ ਪਰਤਿਆ।  ਗੁਰਮੀਤ ਸਿੰਘ ਦੀ ਪਤਨੀ ਸੁਖਪਾਲ ਕੌਰ ਨੇ ਫ਼ਿਕਰ ਹੋਇਆ। ਪਤੀ ਦਾ ਫੋਨ ਵੀ ਬੰਦ ਆ ਰਿਹਾ ਸੀ। ਗੁਰਜੀਤ ਸਿੰਘ ਉਰਫ਼ ਜੀਤ ਨੇ ਫੋਨ ’ਤੇ ਦੱਸਿਆ ਕਿ ਪੀਤ ਪਤਾ ਨਹੀਂ ਕਿੱਥੇ ਚਲਾ ਗਿਆ। ਮੇਰਾ ਟਰੈਕਟਰ ਖ਼ਰਾਬ ਹੋ ਗਿਆ ਹੈ। ਸੁਖਪਾਲ ਕੌਰ ਨੂੰ ਗੁਰਜੀਤ ਦੀਆਂ ਗੱਲਾਂ ਤੋਂ ਪਤੀ ਗੁਰਮੀਤ ਸਿੰਘ ਨਾਲ ਕਿਸੇ ਅਨਹੋਣੀ ਦਾ ਖਦਸ਼ਾ ਜਾਗ ਉੱਠਿਆ। ਸੁਖਪਾਲ ਕੌਰ ਨੇ ਲੰਬੀ ਪੁਲਿਸ ਕੋਲ ਪਤੀ ਦੀ ਗੁੰਮਸ਼ੁਦਗੀ ’ਚ ਜੇਠ ਦੀ ਸ਼ਮੂਲੀਅਤ ਦਾ ਸ਼ੱਕ ਜਤਾਇਆ। 

ਥਾਣਾ ਮੁਖੀ ਅਮਨਦੀਪ ਸਿੰਘ ਨੇ ਦੱਸਿਆ ਗੁਰਮੀਤ ਦੀ ਪਤਨੀ ਸੁਖਪਾਲ ਕੌਰ ਦੀ ਸ਼ਿਕਾਇਤ ’ਤੇ ਗੁਰਜੀਤ ਸਿੰਘ ਉਰਫ਼ ਜੀਤ ਤੋਂ ਪੁੱਛਗਿੱਛ ਕੀਤੀ ਗਈ। ਮੁਲਜਮ ਗੁਰਜੀਤ ਸਿੰਘ ਨੇ ਪੁੱਛਗਿੱਛ ’ਚ ਕਬੂਲ ਕੀਤਾ ਕਿ ਗੁਰਮੀਤ ਉਸਨੂੰ ਨਜਾਇਜ਼ ਸਬੰਧਾਂ ਤੋਂ ਰੋਕਦਾ ਸੀ, ਇਸੇ ਰੰਜਿਸ਼ ਨੇ ਉਸਨੇ ਛੋਟੇ ਭਰਾ ਗੁਰਮੀਤ ਦੀ ਕਹੀਂ ਨਾਲ ਵੱਢ ਕੇ ਹੱਤਿਆ ਕਰ ਦਿੱਤੀ। ਹੱਤਿਆ ਮਗਰੋਂ ਲਾਸ਼ ਨੂੰ ਇੱਕ ਪੱਲੀ ’ਚ ਬੰਨ ਕੇ ਖੇਤ ’ਚ ਪਾਈਪ ਲੀਕ ਹੋਣ ਕਰਕੇ ਬਣੇ ਟੋਏ ’ਚ ਨੱਪ ਦਿੱਤਾ। ਦੋਵੇਂ ਵੱਖੋ-ਵੱਖਰੇ ਟਰੈਕਟਰ ’ਤੇ ਖੇਤ ਗਏ ਸਨ। ਮੁਲਜਮ ਨੇ ਉਸਦਾ ਟਰੈਕਟਰ ਦੀ ਬੈਲਟ ਟੁੱਟਣ ਦਾ ਬਹਾਨਾ ਘੜਿਆ ਅਤੇ ਗੁਰਮੀਤ ਨੂੰ ਟਰੈਕਟਰ ਟੋਚਨ ਕਰਨ ਲਈ ਆਖਿਆ। ਜਦੋਂ ਉਹ ਟੋਚਨ ਕਰਨ ਲੱਗਿਆ ਤਾਂ ਗੁਰਜੀਤ ਨੇ ਕਹੀ ਨਾਲ ਵਾਰ ਕਰ ਦਿੱਤਾ। ਜਿਸ ਨਾਲ ਗੁਰਮੀਤ ਸਿੰਘ ਮੌਕੇ ’ਤੇ ਮੌਤ ਹੋ ਗਈ। ਮੁਲਜਮ ਨੇ ਘਟਨਾ ਨੂੰ ਸ਼ਾਮ ਕਰੀਬ ਸੱਤ ਵਜੇ ਅੰਜਾਮ ਦਿੱਤਾ।

 ਸਬ ਇੰਸਪੈਕਟਰ ਸੁਖਦੇਵ ਸਿੰਘ ਢਿੱਲੋਂ ਮੁਤਾਬਕ ਮੁਲਜਮ ਗੁਰਜੀਤ ਸਿੰਘ ਵੀ ਦੂਸਰੇ ਦਿਨ ਭਰਾ ਗੁੰਮਸ਼ੁਦਗੀ ਦੀ ਸ਼ਿਕਾਇਤ ਕਰਨ ਵਾਲਿਆਂ ’ਚ ਸ਼ਾਮਲ ਸੀ। ਬਾਅਦ ਦਿਨ ਪੁਲਿਸ ਦੀ ਮੁੱਢਲੀ ਪੁੱਛਗਿੱਛ ਮੂਹਰੇ ਪਲ ਭਰ ਨਾ ਟਿਕ ਸਕਿਆ। ਪੁਲਿਸ ਨੇ ਸੁਖਪਾਲ ਕੌਰ ਦੇ ਬਿਆਨਾਂ ’ਤੇ ਹੱਤਿਆ ਦਾ ਮੁਕੱਦਮਾ ਕਰ ਲਿਆ। ਮੁਲਜਮ ਦੀ ਨਿਸ਼ਾਨਦੇਹੀ ’ਤੇ ਡੀ.ਐਸ.ਪੀ. ਜਸਪਾਲ ਸਿੰਘ ਅਤੇ ਨਾਇਬ ਤਹਿਸੀਲਦਾਰ ਅੰਜੂ ਰਾਣੀ ਦੀ ਮੌਜੂਦਗੀ ’ਚ ਮਿ੍ਰਤਕ ਗੁਰਮੀਤ ਸਿੰਘ ਦੀ ਲਾਸ਼ ਨੂੰ ਖੇਤ ਵਿੱਚੋਂ ਬਰਾਮਦ ਕਰ ਲਿਆ। ਪੁਲੀਸ ਨੇ ਅੱਜ ਮੁਲਜਮ ਨੂੰ ਮਲੋਟ ’ਚ ਜੱਜ ਕੰਵਲਜੀਤ ਸਿੰਘ ਦੀ ਅਦਾਲਤ ’ਚ ਪੇਸ਼ ਕੀਤਾ। ਅਦਾਲਤ ਨੇ ਉਸਨੂੰ ਤਿੰਨ ਦਿਨਾ ਪੁਲਿੀਸ ਰਿਮਾਂਡ ’ਤੇ ਭੇਜ ਦਿੱਤਾ। 

ਡਿਊਟੀ ਮਜਿਸਟਰੇਟ ਨਾ ਮਿਲਣ ਕਰਕੇ ਲਾਸ਼ ਬਰਾਮਦਗੀ ’ਚ ਦੇਰੀ! 

ਦੀਵਾਲੀ ਦੇ ਤਿਉਹਾਰ ਕਰਕੇ ਡਿਊਟੀ ਮਜਿਸਟਰੇਟ ਮੁਹੱਈਆ ਨਾ ਹੋਣ ਕਰਕੇ ਮਿ੍ਰਤਕ ਦੀ ਲਾਸ਼ ਕਾਗਜ਼ੀ ਪੱਤਰੀਂ ਇੱਕ ਦਿਨ ਦੇਰੀ ਨਾਲ ਬਰਾਮਦ ਕੀਤੇ ਜਾਣ ਦੇ ਚਰਚੇ ਹਨ। ਸੂਤਰਾਂ ਮੁਤਾਬਕ ਵਾਕੇ ਦਾ ਖੁਲਾਸਾ ਤਿੰਨ ਨਵੰਬਰ ਨੂੰ ਹੋ ਗਿਆ ਸੀ। ਖਾਕੀ ਤੰਤਰ ਨੂੰ ਡਿਊਟੀ ਮਜਿਸਟਰੇਟ ਸਮੇਂ ਸਿਰ ਮੁਹੱਈਆ ਨਹੀਂ ਹੋਇਆ। ਜਿਸ ਕਰਕੇ ਲਾਸ਼ ਕੱਲ ਚਾਰ ਨਵੰਬਰ ਨੂੰ ਕਢਵਾਈ ਗਈ। ਵਾਕੇ ਵਾਲੀ ਜਗਾ ਇੱਕ ਦਿਨ ਤੋਂ ਵੱਧ ਸਮਾਂ ਪੁਲਿਸ ਪਹਿਰੇ ਹੇਠ ਰਹੀ। ਪਿੰਡ ਧੌਲਾ, ਹਲਕੇ ਪੱਖੋਂ ਲੰਬੀ ਅਧੀਨ ਹੈ। ਰੈਵਿਨਿਊ ਤੇ ਪ੍ਰਸ਼ਾਸਨਿਕ ਖਾਤਿਆਂ ’ਚ ਉਸਦੀ ਤਕਦੀਰ ਗਿੱਦੜਬਾਹ ਨਾਲ ਜੁੜੀ ਹੈ। ਦੂਜੇ ਪਾਸੇ ਡੀ.ਐਸ.ਪੀ. ਜਸਪਾਲ ਸਿੰਘ ਨੇ ਕਿਹਾ ਕਿ ਕੋਈ ਦੇਰੀ ਨਹੀਂ ਹੋਈ। ਖੁਲਾਸਾ ਹੋਣ ਦੇ ਤੁਰੰਤ ਬਾਅਦ ਸਮੁੱਚੀ ਕਾਰਵਾਈ ਸਮਾਂਬੱਧ ਹੋਈ। 

ਚੰਨੀ ਦੇ ਕਾਹਲੇ ਖਾਕੀ ‘ਚੰਨਾਂ’ ਨੇ ਕਾਰੋਬਾਰੀਆਂ ਨੂੰ ਵਿਖਾਏ ਦਿਨੇ 'ਤਾਰੇ'

* ਦੁਕਾਨਦਾਰਾਂ ਨੂੰ ਖੱਡ ਵਾਲੇ ਰੇਟ ’ਤੇ 9 ਰੁਪਏ ਵਰਗ ਫੁੱਟ ਰੇਤਾ ਵੇਚਣ ਦੇ ਸੁਣਾਏ ਹੁਕਮ

* ਛਪੇ ਸੂਚਨਾ ਪੱਤਰ ਦੁਕਾਨਾਂ 'ਤੇ ਲਾਉਣ ਦੀ ਤਾਕੀਦ ਨਾ ਮੰਨਣ ’ਤੇ ਆਖੀ ਕਾਰਵਾਈ ਦੀ ਗੱਲ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਰੇਤਾ ਵਿਕਰੀ ਬਾਰੇ ਚੰਨੀ ਸਰਕਾਰ ਦੇ ਹੁਕਮਾਂ ਬਾਰੇ ਅਧੂਰੀ ਜਾਣਕਾਰੀ ਵਾਲੇ ਕਾਹਲੇ ਖਾਕੀ ‘ਚੰਨਾਂ’ ਨੇ ਰੇਤਾ ਕਾਰੋਬਾਰੀਆਂ ਨੂੰ ਦਿਨੇ ‘ਤਾਰੇ’ ਵਿਖਾ ਦਿੱਤੇ ਹਨ। ਪੰਜਾਬ ਸਰਕਾਰ ਵੱਲੋਂ ਖੱਡਾਂ ਤੋਂ 9 ਪ੍ਰਤੀ ਵਰਗ ਫੁੱਟ ਰੇਤਾ ਵੇਚੇ ਜਾਣ ਦਾ ਐਲਾਨ ਹੈ। ਸਰਕਾਰੀ ਹੁਕਮਾਂ ਨੂੰ ਇੰਨ ਬਿੰਨ ਲਾਗੂ ਕਰਵਾਉਣ ਲਈ ਉਤਾਵਲੀ ਲੰਬੀ ਹਲਕੇ ਦੀ ਕਿੱਲਿਆਂਵਾਲੀ ਪੁਲਿਸ ਨੇ ਅੱਜ ਦੁਕਾਨਦਾਰਾਂ ਨੂੰ ਬੁਲਾ ਕੇ ਦੁਕਾਨਾਂ ’ਤੇ 9 ਰੁਪਏ ਪ੍ਰਤੀ ਵਰਗ ਫੁੱਟ ਰੇਤਾ ਵੇਚਣ ਦਾ ਫੁਰਮਾਨ ਸੁਣਾਇਆ ਅਤੇ ਛਪੇ ਸੂਚਨਾ ਪੱਤਰ ਦੇ ਕੇ ਉਨ੍ਹਾਂ ਨੂੰ ਦੁਕਾਨਾਂ 'ਤੇ ਲਗਾਉਣ ਲਈ ਆਖਿਆ। ਦੁਕਾਨਦਾਰਾਂ ਮੁਤਾਬਿਕ ਰੇਤਾ ਵੱਧ ਕੀਮਤ ’ਤੇ ਵੇਚਣ 'ਤੇ ਕਾਨੂੰਨੀ ਕਾਰਵਾਈ ਦੀ ਗੱਲ ਆਖੀ ਗਈ ਹੈ।  

ਦੀਵਾਲੀ ਮੌਕੇ ਨਿਯਮਾਂ ਨੂੰ ਵਗੈਰ ਘੋਖੇ-ਸਮਝੇ ਦਿੱਤੇ ਇਸ ‘ਤੋਹਫ਼ੇ’ ਨੇ ਰੇਤਾ ਦੁਕਾਨਦਾਰਾਂ ਦੇ ਮਨਾਂ ਦੇ ਦੀਵੇ ਬੁਝਾ ਦਿੱਤੇ ਹਨ। ਸਰਹੱਦੀ ਕਸਬੇ ਵਿਚ ਮੰਡੀ ਕਿੱਲਿਆਂਵਾਲੀ ’ਚ ਰੋਜ਼ਾਨਾ ਕਰੀਬ ਇੱਕ ਹਜ਼ਾਰ ਕੁਇੰਟਲ ਰੇਤੇ ਦੀ ਵਿਕਰੀ ਹੁੰਦੀ ਹੈ। ਜਾਣਕਾਰੀ ਮੁਤਾਬਿਕ ਚੋਕੀ ਮੁੱਖੀ ਵੱਲੋਂ ਦੁਕਾਨਦਾਰਾਂ ਦੀ ਚੌਕੀ ਮੀਟਿੰਗ ਸੱਦ ਕੇ 9 ਰੁਪਏ ਫੁੱਟ ਵੇਚਣ ਲਈ ਆਖਿਆ ਗਿਆ। 

ਪਹਿਲੀ ਗੱਲ ਪੰਜਾਬ-ਹਰਿਆਣਾ ਦੀ ਸਰਹੱਦੀ ਵਪਾਰਕ ਮੰਡੀ ਕਿੱਲਿਆਂਵਾਲੀ ’ਚ ਕਾਫ਼ੀ ਸਮੇਂ ਤੋਂ ਪੰਜਾਬ ਦਾ ਰੇਤਾ ਨਹੀਂ ਆਉਂਦਾ, ਇੱਥੇ ਸਿਰਫ਼ ਹਰਿਆਣਾ ਦਾ ਕਰਨਾਲ ਦਾ ਰੇਤਾ ਆਉਂਦਾ ਹੈ। ਜਿਹੜਾ ਟਰੱਕ ਭਾੜਾ, ਅਨਲੋਡਿੰਗ-ਲੋਡਿੰਗ ਅਤੇ ਸੋਖੇ ਸਮੇਤ ਸਾਰੇ ਖਰਚੇ ਵਗੈਰਾ ਜੋੜ ਕੇ 30 ਰੁਪਏ ਪ੍ਰਤੀ ਵਰਗ ਫੁੱਟ ( ਕਰੀਬ 83 ਰੁਪਏ ਕੁਇੰਟਲ) ਦੁਕਾਨ ’ਤੇ ਪਹੁੰਚ ਪੈਂਦਾ ਹੈ। 

ਤੀਜਾ ਇਹ ਘੋਖ ਦਾ ਵਿਸ਼ਾ ਹੈ ਕਿ ਪੁਲਿਸ ਚੌਕੀ ਤੱਕ ਕਿਹੜੇ ਉੱਚ ਪੱਧਰੀ ਰੁਤਬੇ ਵੱਲੋਂ ਇਹ ਨਿਰਦੇਸ਼ ਭੇਜੇ ਗਏ। ਜਿਨਾਂ ਨੇ ਪੰਜਾਬ ਸਰਕਾਰ ਦੀ ਮਾਈਨਿੰਗ ਨੀਤੀ ਨੂੰ ਵਗੈਰ ਘੋਖੇ ਜ਼ਮੀਨ ਪੱੱਧਰ ’ਤੇ ਆਦੇਸ਼ ਜਨਤਕ ਕਰਵਾ ਦਿੱਤੇ। 

ਪੰਜਾਬ ਮਾਈਨਿੰਗ ਨੀਤੀ ’ਚ ਖੱਡਾਂ ’ਤੇ ਰੇਤਾਂ ਰੇਟਾਂ ਦੇ ਇਲਾਵਾ ਰੇਤਾ, ਬਜਰੀ, ਸੁਆਹ, ਕੰਕਰੀਟ ਤੇ ਹੋਰਨਾਂ ਵਸਤੂਆਂ ਲਈ ਢੋਆ-ਢੁਆਈ ਲਈ ਟਰਾਂਸਪੋਰਟ ਭਾੜਾ ਵੀ 5 ਕਿਲੋਮੀਟਰ ਤੋਂ ਤਿੰਨ ਸੌ ਕਿਲੋਮੀਟਰ ਤੱਕ ਵੱਖ-ਵੱਖ ਸਲੈਬ ਦਰ ਨਾਲ ਪੂਰੀ ਸਪੱਸ਼ਟਤਾ ਤੈਅ ਕੀਤਾ ਹੋਇਆ ਹੈ। ਉੱਚ ਪੱਧਰੀ ਸੂਤਰਾਂ ਮੁਤਾਬਕ ਜ਼ਮੀਨ ਪੱਧਰ 'ਤੇ ਕੀਮਤਾਂ ਦੇ ਭੰਬਲਭੂਸੇ ਬਾਰੇ ਮਾਮਲਾ ਮੁੱਖ ਮੰਤਰੀ ਦੇ ਧਿਆਨ ਵਿਚ ਹੈ। 

ਰੇਤਾ-ਸੀਮਿੰਟ ਯੂਨੀਅਨ ਦੇ ਪ੍ਰਧਾਨ ਵਿਪਨ ਕੁਮਾਰ ਦਾ ਕਹਿਣਾ ਸੀ ਕਿ ਜਿਹੜੀ ਚੀਜ਼ ਉਨਾਂ ਨੂੰ 30 ਰੁਪਏ ਵਰਗ ਫੁੱਟ ਪੈ ਰਹੀ ਹੈ, ਉਹ 9 ਰੁਪਏ ਵਰਗ ਫੁੱਟ ਕਿਵੇਂ ਵੇਚ ਸਕਦੇ ਹਨ। ਅਜਿਹੇ ’ਚ ਉਹ ਰੇਤੇ ਦਾ ਉਹ ਕੰਮ ਬੰਦ ਕਰ ਦੇਣਗੇ। ਉਨਾਂ ਕਿਹਾ ਕਿ ਪੁਲੀਸ ਵੱਲੋਂ ਜਾਰੀ ਹੁਕਮਾਂ ਮੁਤਾਬਕ ਰੇਤਾ ਭਾਵੇਂ ਹਰਿਆਣਾ ਦਾ ਹੋਵੇ, ਉਹ 9 ਰੁਪਏ ਵਰਗ ਫੁੱਟ ਤੋਂ ਵੱਧ ਨਹੀਂ ਵੇਚ ਸਕਣਗੇ। ਵਿਪਨ ਕੁਮਾਰ ਮੁਤਾਬਕ ਦੁਕਾਨਾਂ ’ਤੇ ਪਏ ਰੇਤੇ ਦੇ ਮੌਜੂਦਾ ਢੇਰ ਵੇਚਣ ਦੀ ਛੋਟ ਮਿਲੀ ਹੈ। 

ਚੌਕੀ ਕਿੱਲਿਆਂਵਾਲੀ ਦੇ ਮੁਖੀ ਪਿ੍ਰਤਪਾਲ ਸਿੰਘ ਨੇ ਉਨਾਂ ਨੂੰ ਥਾਣਾ ਮੁਖੀ ਵੱਲੋਂ ਜਿਹੜੇ ਨਿਰਦੇਸ਼ ਆਏ ਸਨ। ਉਨਾਂ ਦੁਕਾਨਦਾਰਾਂ ਨੂੰ ਦੱਸ ਦਿੱਤੇ। ਤੁਸੀਂ ਥਾਣਾ ਮੁਖੀ ਨੂੰ ਪੁੱਛ ਲਵੋ। 

ਲੰਬੀ ਦੇ ਥਾਣਾ ਅਮਨਦੀਪ ਸਿੰਘ ਦਾ ਕਹਿਣਾ ਸੀ ਕਿ ਸਾਨੂੰ ਉੱਪਰੋਂ ਹਦਾਇਤਾਂ ਲੂਆਈਆਂ ਸਨ ਉਨਾਂ ਬਾਰੇ ਦੁਕਾਨਦਾਰਾਂ ਨੂੰ ਦੱਸ ਦਿੱਤਾ ਗਿਆ ਹੈ। ਮਲੋਟ ਦੇ ਡੀ.ਐਸ.ਪੀ. ਜਸਪਾਲ ਸਿੰਘ ਨੇ ਕਿਹਾ ਕਿ ਹੁਣ ਮਸਲੇ ਨੂੰ ਪੜਤਾਲਦੇ ਹਨ। 

ਦੂਜੇ ਪਾਸੇ ਮਾਈਨਿੰਗ ਵਿਭਾਗ ਦੇ ਚੀਫ਼ ਇੰਜੀਨੀਅਰ ਬੀ.ਪੀ. ਸਿੰਘ ਦਾ ਕਹਿਣਾ ਸੀ ਕਿ ਰੇਤੇ ਕੱਢੇ ਜਾਣ ਵਾਲੀ ਜਗਾ ਤੋਂ 9 ਰੁਪਏ ਵਰਗ ਫੁੱਟ ਦੇ ਸਰਕਾਰੀ ਨਿਰਦੇਸ਼ ਹਨ। ਜਿਸ ’ਤੇ ਪ੍ਰਤੀ ਕਿਲੋਮੀਟਰ ਮੁਤਾਬਕ ਟਰਾਂਸਪੋਰਟ ਭਾੜਾ ਵੱਖਰਾ ਤੈਅ ਕੀਤਾ ਹੋਇਆ ਹੈ। ਉਨਾਂ ਜ਼ਮੀਨ ਪੱਧਰ ’ਤੇ ਕੁੱਝ ਭੰਬਲਭੂਸਾ ਸੁਣਨ ਵਿੱਚ ਆ ਰਿਹਾ ਹੈ। ਵਿਭਾਗੀ ਵੈਬਸਾਈਟ ’ਚ ਸਭ  ਸਪੱਸ਼ਟ ਦਰਜ ਹੈ। ਜੇਕਰ ਕੋਈ ਟਰਾਂਸੋਪੋਰਟ ਤੈਅ ਪ੍ਰਤੀ ਕਿਲੋਮੀਟਰ ਤੋਂ ਵੱਧ ਰੇਟ ਵਸੂਲ ਰਿਹਾ ਤਾਂ ਉਹ ਵੀ ਕਾਰਵਾਈ ਅਧੀਨ ਆਉਂਦਾ ਹੈ।