ਸਮਾਜਿਕ ਲਾਜ-ਸ਼ਰਮ: ਹੱਥੀਂ ਪਾਲੇ ਹੱਥਾਂ ਦੇ ਨਿੱਘ ਤੋਂ ਵਾਂਝੇ ਕਦਮ ਬਿਰਧ ਆਸ਼ਰਮਾਂ ਦੀਆਂ ਬਰੂਹਾਂ ਵੱਲ ਨਹੀਂ ਵਧ ਰਹੇ

* ਚੌਧਰੀ ਦੇਵੀ ਲਾਲ ਟਰੱਸਟ ਦੇ ਬਿਰਧ ਆਸ਼ਰਮ ਬਾਦਲ ’ਚ ਨਹੀਂ ਵਧ ਰਹੀ ਬਜ਼ੁਰਗਾਂ ਦੀ ਗਿਣਤੀ
* ਬਾਦਲਾਂ ਵੱਲੋਂ ਓਰਬਿੱਟ ਦੀ ਕਮਾਈ ’ਚੋਂ ਬਿਰਧ ਆਸ਼ਰਮ/ਸਕੂਲ ’ਤੇ ਖਰਚੇ ਜਾਂਦੇ ਹਰ ਮਹੀਨੇ 9-10 ਲੱਖ ਰੁਪਏ

                                                              ਇਕਬਾਲ ਸਿੰਘ ਸ਼ਾਂਤ
ਲੰਬੀ: ਢਿੱਡੋਂ ਜੰਮੇ ਅਤੇ ਹੱਥੀਂ ਪਾਲੇ-ਪੋਸੇ ਹੱਥਾਂ ਦੇ ਸੁਚੱਜੇ ਨਿੱਘ ਤੋਂ ਵਾਂਝੇ ਬਜ਼ੁਰਗਾਂ ਦੇ ਕਦਮ ਹੱਥੀਂ ਉਸਾਰੀਆਂ ਨੀਂਹਾਂ ਨੂੰ ਪਾਰ ਕਰਕੇ ਬਿਰਧ ਆਸ਼ਰਮਾਂ ਦੀਆਂ ਬਰੂਹਾਂ ’ਤੇ ਨਹੀਂ ਪੁੱਜ ਰਹੇ। ਜ਼ਿੰਦਗੀ ਭਰ ਦੀ ਬਣੀ-ਬਣਾਈ ਸਮਾਜਿਕ ਲਾਜ-ਸ਼ਰਮ ਦੀ ਚਾਦਰ ਨੂੰ ਸਹੇਜੇ ਰੱਖਣ ਦੀ ਸੋਚ ਕਰਕੇ ਬੱਚਿਆਂ ਦੀ ਬੇਰੁੱਖੀ, ਘਰੇਲੂ, ਸਿਹਤ ਅਤੇ ਆਰਥਿਕ ਤੰਗਿਆਈਆਂ ਦੇ ਘਰਾਂ ਦੀ ਚਾਰਦੀਵਾਰੀ ’ਚ ਦਰਦ ਹੰਢਾ ਰਹੇ ਹਨ। ਇਹ ਹਾਲਾਤ ਪੰਜਾਬ ਦੇ ਮਾਲਵੇ ਖਿੱਤੇ ਦੇ ਅਣਗਿਣਤ ਪਰਿਵਾਰਾਂ ਦੇ ਹਨ। ਜਿਨ੍ਹਾਂ ਲਈ ਘਰੇਲੂ ਹਾਲਾਤਾਂ ਨਾਲ ਜੂਝਣਾ ਬੁਢਾਪੇ ਦੀ ਹੋਣੀ ਬਣ ਗਿਆ ਹੈ। ਸ਼ਾਇਦ ਇਸੇ ਕਰਕੇ ਚੌਧਰੀ ਦੇਵੀ ਲਾਲ ਟਰੱਸਟ ਵੱਲੋਂ ਪਿੰਡ ਬਾਦਲ ਵਿਖੇ ਸੰਚਾਲਤ ਬਹੁਕਰੋੜੀ ਅਤੇ ਬਹੁਪੱਖੀ ਸਹੂਲਤਾਂ ਨਾਲ ਲਬਰੇਜ਼ ਬਿਰਧ ਆਸ਼ਰਮ ’ਚ ਬਜ਼ੁਰਗਾਂ ਦੀ ਗਿਣਤੀ ਆਸ ਮੁਤਾਬਕ ਕਾਫ਼ੀ ਘੱਟ ਹੈ। ਬਿਰਧ ਆਸ਼ਰਮ ਦੀ ਸਥਾਪਤੀ 18 ਨਵੰਬਰ 2005 ਸਮੇਂ 27 ਬਜ਼ੁਰਗ ਸਨ, ਜਦੋਂਕਿ ਅੱਜ ਬਜ਼ੁਰਗਾਂ ਦੀ ਗਿਣਤੀ ਸਿਰਫ਼ 11 ਤੱਕ ਸਿਮਟ ਕੇ ਰਹਿ ਗਈ ਹੈ। ਲੰਬੀ ਬਿਮਾਰੀ ਕਾਰਨ ਬਿਰਧ ਆਸ਼ਰਮ ਦੇ ਸਾਲਾਂ ਤੋਂ ਬਾਸ਼ਿੰਦੇ ਕੌਰ ਸਿੰਘ ਬੀਦੋਵਾਲੀ, ਸੁਖਦੇਵ ਸਿੰਘ ਰਾਮਪੁਰੀਆ ਅਤੇ ਭੁਪਿੰਦਰ ਸਿੰਘ ਅੰਬਾਲਾ ਦੀ ਪਿਛਲੇ ਸਮੇਂ ’ਚ ਬਿਮਾਰੀ ਕਾਰਨ ਚੱਨ ਵਸੇ। ਜਿਨ੍ਹਾਂ ਦੇ ਇਲਾਜ ’ਤੇ ਚੌਧਰੀ ਦੇਵੀ ਲਾਲ ਟਰੱਸਟ ਵੱਲੋਂ ਫਰੀਦਕੋਟ ਮੈਡੀਕਲ

ਕਾਲਜ ਤੋਂ ਪੀ.ਜੀ.ਆਈ. ਚੰਡੀਗੜ੍ਹ ਤੱਕ ਲੱਖਾਂ ਰੁਪਏ ਖਰਚ ਕੀਤੇ ਗਏ। ਇਹ ਬਿਰਧ ਆਸ਼ਰਮ ਪੰਜਾਬ ਦੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਸਾਬਕਾ ਉਪ ਪ੍ਰਧਾਨ ਮੰਤਰੀ ਸਵਰਗੀ ਚੌਧਰੀ ਦੇਵੀ ਲਾਲ ਦੀ ਯਾਦ ਵਿੱਚ ਬਣਵਾਇਆ ਹੈ। ਸਮਾਜ ਵਿੱਚ ਜਿੱਥੇ ਅੱਜ ਅੱਖਾਂ ਦੀ ਸ਼ਰਮ ਮਰ-ਮੁੱਕ ਚੱਲੀ ਹੈ। ਉਸੇ ਹਾਲਾਤਾਂ ’ਚ ਅੱਜ ਸਮਾਜ ’ਚ ਖਰਚਾ ਲੈ ਕੇ ਬਜ਼ੁਰਗਾਂ ਨੂੰ ਸਾਂਭਣ ਵਾਲੇ ਅਤੇ ਬਿਲਕੁੱਲ ਮੁਫ਼ਤ ਸੇਵਾਵਾਂ ਵਾਲੇ ਦੋ ਤਰ੍ਹਾਂ ਦੋ ਬਿਰਧ ਆਸ਼ਰਮ ਪ੍ਰਚੱਲਤ ਹਨ। ਜੇਕਰ ਸੌ ਫ਼ੀਸਦੀ ਮੁਫ਼ਤ ਸੇਵਾਵਾਂ ਵਾਲੇ ਬਿਰਧ ਆਸ਼ਰਮ ਬਾਦਲ ਦੀ ਗੱਲ ਕੀਤੀ ਤਾਂ ਇੱਥੇ ਹਰੇਕ ਬਜ਼ੁਰਗ ਲਈ ਵੱਖ-ਵੱਖ ਸੁਚੱਜੇ ਕਮਰੇ ਹਨ। ਸਿਹਤ, ਖਾਣ-ਪੀਣ, ਸਾਫ਼-ਸਫ਼ਾਈ ਦੇ ਇਲਾਵਾ ਭਜਨ ਬੰਦਗੀ ਲਈ ਗੁਰਦੁਆਰਾ ਸਾਹਿਬ ਵੀ ਹੈ। ਬਿਰਧ ਆਸ਼ਰਮ ਸਮੇਤ ਮਾਤਾ ਜਸਵੰਤ ਕੌਰ ਸੀਨੀਅਰ ਸੈਕੰਡਰੀ (ਕਾਨਵੈਂਟ) ਸਕੂਲ ’ਚ 280 ਵਿਦਿਆਰਥੀਆਂ ਨੂੰ ਮੁਫ਼ਤ ਮਿਆਰੀ ਸਿੱਖਿਆ ’ਤੇ ਲੱਖਾਂ ਰੁਪਏ ਪ੍ਰਤੀ ਮਹੀਨੇ ਦਾ ਖਰਚਾ ਵੀ ਸਾਬਕਾ ਮੁੱਖ ਮੰਤਰੀ ਪਰਿਵਾਰ ਵੱਲੋਂ ਉਠਾਇਆ ਜਾਂਦਾ ਹੈ। ਇਹ ਬਿਰਧ ਆਸ਼ਰਮ ਸ਼ੁਰੂ ਤੋਂ ਨੌ ਬੇਸਹਾਰਾ ਲੜਕੇ-ਲੜਕੀਆਂ ਦਾ ਪਾਲਣ-ਪੋਸ਼ਣ ਅਤੇ ਉਨ੍ਹਾਂ ਦੀ ਉੱਚ ਪੱਧਰੀ ਵਿੱਦਿਆ ਦਾ ਖਰਚਾ ਵੀ ਝੱਲ ਰਿਹਾ ਹੈ। ਇੱਥੇ ਬਜ਼ੁਰਗਾਂ ਦੀ ਬਿਮਾਰੀ ’ਤੇ ਲੱਖਾਂ ਰੁਪਏ ਖਰਚਣ ਤੋਂ ਗੁਰੇਜ਼ ਨਹੀਂ ਕੀਤਾ ਜਾਂਦਾ। ਬਜ਼ੁਰਗਾਂ ਦਾ ਹੌਂਸਲਾ ਵਧਾਉਣ ਲਈ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਗੁਰਦਾਸ ਸਿੰਘ ਬਾਦਲ ਲਈ ਵੀ ਬਕਾਇਦਾ ਕਮਰੇ ਬਣਾਏ ਗਏ ਹਨ। ਬਿਰਧ ਆਸ਼ਰਮ ਦੇ ਹਰਿਆਵਲ ਭਰੇ ਮਾਹੌਲ ’ਚ ਬਜ਼ੁਰਗਾਂ ਲਈ ਕਿੰਨੂੂੂਆਂ ਦੇ ਕਾਫ਼ੀ ਫਲਦਾਰ ਬੂਟੇ ਅਤੇ ਪੂਰੀ ਹਰਿਆਵਲ ਦਾ ਮਾਹੌਲ ਹੈ। ਸਟਾਫ਼ ਦਾ ਕਹਿਣਾ ਸੀ ਕਿ ਬਾਦਲ ਸਾਬ੍ਹ ਕਦੇ-ਕਦਾਈ ਖੁਦ ਵੀ ਬਜ਼ੁਰਗਾਂ ਦਾ ਹਾਲ-ਚਾਲ ਪੁੱਛਣ ਆਉਂਦੇ ਹਨ। ਬਿਰਧ ਆਸ਼ਰਮ ਬਾਦਲ ’ਚ ਸਾਢੇ ਪੰਜ ਸਾਲਾਂ ਤੋਂ ਰਹਿੰਦੇ 88 ਸਾਲਾ ਇੰਦਰ ਸਿੰਘ ਨੇ ਆਖਿਆ ਕਿ ਉਨ੍ਹਾਂ ਦੀ ਇੱਥੇ ਘਰ ਨਾਲੋਂ ਕਈ ਗੁਣਾ ਜ਼ਿਆਦਾ ਸਾਂਭ-ਸੰਭਾਲ ਹੁੰਦੀ ਹੈ। ਉਨ੍ਹਾਂ ਦਾ ਬੁਢਾਪਾ ਸੰਵਰ ਗਿਆ ਹੈ। ਬਿਮਾਰ ਹੋਣ ’ਤੇ ਪੰਜ ਮਿੰਟਾਂ ’ਚ ਡਾਕਟਰ ਪੁੱਜੇ ਜਾਂਦੇ ਹਨ ਅਤੇ ਭੁੱਖ ਲੱਗਣ ’ਤੇ ਗਰਮਾ-ਗਰਮ ਰੋਟੀ ਤੁਰੰਤ ਹਾਜ਼ਰ ਹੋ ਜਾਂਦੀ ਹੈ। ਉਹ ਕੰਨਾਂ ਤੋਂ ਉੱਚਾ ਸੁਣਨ ਦੇ ਬਾਵਜੂਦ ਰੋਜ਼ਾਨਾ ਰੇਡੀਓ ’ਤੇ ਖ਼ਬਰਾਂ ਵਗੈਰਾ ਸੁਣ ਕੇ ਸਮਾਂ ਲੰਘਾਉਂਦਾ ਹੈ। ਉਂਝ ਵੱਡੇ ਸ਼ਹਿਰਾਂ ’ਚ ਸਾਧਨ ਸੰਪੰਨ ਲੋਕ ਪਰਿਵਾਰਾਂ ਨੂੰ ਤਣਾਅ ਰਹਿਤ ਰੱਖਣ ਲਈ ਆਪਣੇ ਮਾਪਿਆਂ ਨੂੰ ਬਿਰਧ ਆਸ਼ਰਮਾਂ ’ਚ ਛੱਡਣਾ ਆਮ ਰਵਾਇਤ ਬਣਨ ਲੱਗਿਆ ਹੈ। ਗਾਜਿਆਬਾਦ ਤੋਂ ਵਿਦੇਸ਼ ’ਚ ਵਸਦੇ ਬੇਹੱਦ ਚੰਗੇ-ਸੁਰਦੇ ਪੁੱਜਦੇ ਦੋ ਪੁੱਤਰਾਂ ਨੇ ਪਤਨੀਆਂ ਵੱਲੋਂ ਸਾਂਭਨ ਤੋਂ ਨਾਂਹ ਕਰਨ ’ਤੇ ਵਿਧਵਾ ਮਾਂ ਨੂੰ ਬਿਰਧ ਆਸ਼ਰਮ ਛੱਡ ਦਿੱਤਾ, ਜਦੋਂਕਿ ਵਿਧਵਾ ਅੌਰਤ ਨੇ ਦੋਵੇਂ ਪੁੱਤਰਾਂ ਨੂੰ ਪਰਵਾਨ ਚੜ੍ਹਾਉਣ ਲਈ ਤੰਗੀ-ਤੁਰਸ਼ੀਆਂ ਨਾਲ ਜੂਝਦੇ ਹੱਢ-ਭੰਨਵੀਂ ਮਿਹਨਤ ਨਾਲ ਸਾਰੀ ਜ਼ਿੰਦਗੀ ਲਗਾ ਦਿੱਤੀ ਸੀ। ਜਦੋਂਕਿ ਦੂਜੇ ਪਾਸੇ ਪੰਜਾਬ ਦੇ ਪੇਂਡੂ ਅਤੇ ਮੇਲ-ਮਿਲਾਪ ਵਾਲੇ ਸੁਭਾਅ ’ਤੇ ਸ਼ਹਿਰੀਕਰਨ ਦੀ ਹਵਾ ਕੁਝ ਮੱਠੀ ਜਾਪਦੀ ਹੈ। ਜਿਸ ਕਾਰਨ ਪੰਜਾਬ ’ਚ ਬਹੁਗਿਣਤੀ ਨੌਜਵਾਨ ਘੱਟ ਆਮਦਨ ਦੇ ਬਾਵਜੂਦ ਅੌਖੇ-ਸੌਖੇ ਮਾਪਿਆਂ ਦੀ ਸਾਂਭ-ਸੰਭਾਲ ਨੂੰ ਤਰਜੀਹ ਦਿੰਦੇ ਹਨ ਅਤੇ ਮਾਪੇ ਵੀ ਬੱਚਿਆਂ ਦੀ ਬੇਰੁੱਖੀ ਦੇ ਬਾਵਜੂਦ ਪਰਿਵਾਰ ਨੂੰ ਸਮਾਜਿਕ ਸ਼ਰਮਸਾਰੀ ਤੋਂ ਬਚਾਉਣ ਲਈ ਬਿਰਧ ਆਸ਼ਰਮਾਂ ਤੋਂ ਗੁਰੇਜ ਕਰਦੇ ਹਨ। ਵੱਡਾ ਦੁਖਾਂਤ ਹੈ ਕਿ ਪੰਜਾਬ ’ਚ ਬੁਢਾਪਾ ਪੈਨਸ਼ਨ ਸਿਰਫ਼ ਸਾਢੇ ਸੱਤ ਸੌ ਰੁਪਏ ਮਹੀਨਾ ਹੈ। ਜਿਸ ਨਾਲ ਮਹਿੰਗਾਈ ਦੇ ਦੌਰ ਵਿਚ ਬਜ਼ੁਰਗਾਂ ਦਾ ਇੱਕ ਹਫ਼ਤਾ ਲੰਘਣਾ ਵੀ ਬੜਾ ਮੁਸ਼ਕਿਲ ਹੈ। ਤਰਕਸ਼ੀਲ ਆਗੂ ਰਾਮ ਸਵਰਨ ਲੱਖੇਵਾਲੀ ਦਾ ਕਹਿਣਾ ਸੀ ਕਿ ਪੂੰਜੀਵਾਦੀ, ਨਿੱਜ ਸਵਾਰਥ ਦੀ ਦੌੜ ’ਚ ਮਨੁੱਖ ਇਕਲਾਪੇ ਨਾਲ ਪੀੜਤ ਹੈ। ਜਿਸਦਾ ਸਭ ਤੋਂ ਵੱਧ ਸ਼ਿਕਾਰ ਬੁਢਾਪਾ ਹੋ ਰਿਹਾ ਹੈ। ਇਸ ਲਈ ਨੌਜਵਾਨਾਂ ’ਚ ਤਾਲਮੇਲ ਦਾ ਮਾਹੌਲ ਸਿਰਜਣ ਲਈ ਵੱਡੇ ਉਪਰਾਲਿਆਂ ਦੀ ਜ਼ਰੂਰਤ ਹੈ।
ਮੈਤਰੇਈ ਕਾਲਜ ਦਿੱਲੀ ਦੇ ਸਹਾਇਕ ਪੋ੍ਰਫੈਸਰ ਡਾ. ਮਨੀਸ਼ਾ ਬੱਤਰਾ ਦਾ ਕਹਿਣਾ ਸੀ ਕਿ ਵੱਡੇ ਸ਼ਹਿਰਾਂ ’ਚ ਨੌਕਰੀਪੇਸ਼ਾ ਪੁੱਤਾਂ-ਧੀਆਂ ਲਈ ਰੋਜ਼ੀ-ਰੋਟੀ ਅਤੇ ਕੈਰੀਅਰ ਬਣਾਉਣ ਲਈ ਦੂਰ-ਦੁਰਾਡੇ ਦੇ ਰਜ਼ੁਗਾਰ ਅਤੇ ਮਾਪਿਆਂ ਦੀ ਬੱਚਿਆਂ ਨਾਲ ਰਹਿਣ ਦੀ ਲਲਕ ਕਾਫ਼ੀ ਵੱਡੀ ਸਮੱਸਿਆ ਹੈ। ਕਈ ਜਗ੍ਹਾ ਵਿਚਾਰਾਂ ਦਾ ਆਪਸੀ ਮੱਤਭੇਦ ਅਤੇ ਆਰਥਿਕ ਹਾਲਾਤਾਂ ਕਾਰਨ ਮਾਪਿਆਂ ਨੂੰ ਬਿਰਧ ਆਸ਼ਰਮਾਂ ਦਾ ਰੁੱਖ ਕਰਨਾ ਪੈਂਦਾ ਹੈ। ਇਸ ਸਮੱਸਿਆ ਦਾ ਫੈਲਾਅ ਦਿਨੋਂ-ਦਿਨ ਵਧ ਰਿਹਾ ਹੈ। ਜਿਸਦੇ ਹੱਲ ਲਈ ਦੋਵੇਂ ਪਾਸਿਓਂ ਵਿਚਾਰਧਾਰਕ ਸਾਂਝਾਂ ਅਤੇ ਆਪਸੀ ਸੂਝਬੂਝ ਹੀ ਬਿਹਤਰ ਹੱਲ ਹੈ। ਡਾ. ਜਸਦੇਵ ਕੌਰ ਬਰਾੜ ਨੇ ਕਿਹਾ ਕਿ ਬਹੁਤੇ ਘਰਾਂ ’ਚ ਬਜ਼ੁਰਗਾਂ ਦੀ ਹਾਲਤ ਬੇਹੱਦ ਮਾੜੀ ਹੈ ਪਰ ਸਮਾਜਿਕ ਤੰਦਾਂ ਨੇ ਉਨ੍ਹਾਂ ਦੇ ਪੈਰ ਬੰਨ੍ਹ ਹੋਏ ਹਨ। ਇੱਕ ਬਜ਼ੁਰਗ ਜੋਗਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਜੇਕਰ ਮਨੁੱਖ ਜਵਾਨੀ ’ਚ ਮਨੁੱਖ ਆਰਥਿਕ ਪੱਖੋਂ ਪੈਰਾਂ ਸਿਰ ਹੋਵੇ ਤਾਂ ਬੁਢਾਪੇ ’ਚ ਮੁਸ਼ਕਿਲਾਂ ਤੋਂ ਬਚ ਸਕਦਾ ਹੈ। ਸਰਕਾਰਾਂ ਨੂੰ ਬਜ਼ੁਰਗਾਂ ਦੀ ਮਾਨਸਿਕ ਅਤੇ ਸਰੀਰਕ ਹਾਲਤ ਪ੍ਰਤੀ ਲਗਾਤਾਰ ਸੰਪਰਕ ਬਣਾ ਕੇ ਬੁਢਾਪੇ ਦੀ ਸੰਤਾਪ ਦੀ ਬਜਾਇ ਖੁਸ਼ਗਵਾਰ ਬਣਾਉਣਾ ਚਾਹੀਦਾ ਹੈ। 75 ਸਾਲਾ ਮਹਿੰਦਰ ਸਿੰਘ ਨੇ ਕਿਹਾ ਕਿ ਬਿਰਧ ਆਸ਼ਰਮਾਂ ਅਤੇ ਕਾਨੂੰਨੀ ਹੱਕਾਂ ਦੇ ਘੱਟ ਜਾਣਕਾਰੀ ਕਾਰਨ ਬਹੁਤੇ ਬਜ਼ੁਰਗ ਘਰਾਂ ਅੰਦਰ ਦਿੱਕਤਾਂ ਨੂੰ ਝੱਲ ਰਹੇ ਹਨ। ਉਨ੍ਹਾਂ ਕਿਹਾ ਕਿ ਸਰਕਾਰ ਨੂੰ ਬਜ਼ੁਰਗਾਂ ਦੀ ਸਥਿਤੀ ਵਾਚਣ ਬਾਰੇ ਵਾਰਡ ਅਤੇ ਪਿੰਡ ਪੱਧਰ ’ਤੇ ਕੈਂਪ ਲਗਾਉਣੇ ਚਾਹੀਦੇ ਹਨ।
ਬਿਰਧ ਆਸ਼ਰਮ ਦੇ ਸਲਾਹਕਾਰ ਅਤੇ ਪ੍ਰਿੰਸੀਪਲ ਕਰਨਲ ਆਨੰਦ ਸਵਰੁਪ ਪਾਲ ਦਾ ਕਹਿਣਾ ਸੀ ਕਿ ਅਜੋਕੇ ਮਾਹੌਲ ਵਿੱਚ ਬੇਸਹਾਰਾ ਬਜ਼ੁਰਗ ਸ਼ਹਿਰਾਂ ਨੇੜਲੇ ਬਿਰਧ ਆਸ਼ਰਮਾਂ ਨੂੰ ਤਰਜੀਹ ਦਿੰਦੇ ਹਨ। ਇਸ ਆਸ਼ਰਮ ਦੇ ਬੂਹੇ 65 ਸਾਲ ਉਮਰ ਦੇ ਕਿਸੇ ਵੀ ਬਜ਼ੁਰਗ ਲਈ ਹਮੇਸ਼ਾਂ ਖੁੱਲ੍ਹੇ ਹਨ। ਉਨ੍ਹਾਂ ਕਿਹਾ ਕਿ ਸਿਰਫ਼ ਫਾਰਮ ਭਰਨ ਅਤੇ ਪਛਾਣ ਪੱਤਰ ਵਗੈਰਾ ਦੀ ਪ੍ਰਕਿਰਿਆ ਕੀਤੀ ਜਾਂਦੀ ਹੈ।


ਪੰਜਾਬੀ ਬੱਚੇ ਮਾਪਿਆਂ ਦੇ ਬਿਰਧ ਘਰਾਂ ’ਚ ਜਾਣ ਨੂੰ ਬੁਰਾ ਮੰਨਦੇ ਹਨ : ਬਾਦਲ
ਚੌਧਰੀ ਦੇਵੀ ਲਾਲ ਟਰੱਸਟ ਦੇ ਮੁਖੀ ਅਤੇ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਕਹਿਣਾ ਸੀ ਕਿ ਉਨ੍ਹਾਂ ਦੇ ਮਨ ਵਿੱਚ ਹਮੇਸ਼ਾਂ ਤੋਂ ਸਮਾਜ ਸੇਵਾ ਦੀ ਵੱਡੀ ਤਾਂਘ ਰਹੀ ਹੈ। ਟਰੱਸਟ ਵੱਲੋਂ ਪਿੰਡ ਬਾਦਲ ਵਿਖੇ ਨਿਰੋਲ ਲੋਕਸੇਵਾ ਦੇ ਮੰਤਵ ਨਾਲ ਬਿਰਧ ਆਸ਼ਰਮ ਅਤੇ ਮਾਤਾ ਜਸਵੰਤ ਕੌਰ ਮੈਮੋਰੀਅਲ ਸਕੂਲ ਸਥਾਪਿਤ ਕੀਤੇ ਗਏ ਹਨ। ਜਿਨ੍ਹਾਂ ’ਤੇ ਆਉਂਦੇ ਪ੍ਰਤੀ ਮਹੀਨਾ ਨੌ-ਦਸ ਲੱਖ ਰੁਪਏ ਦੇ ਖਰਚੇ ਨੂੰ ਉਨ੍ਹਾਂ ਦੀਆਂ ਪਰਿਵਾਰਕ ਕੰਪਨੀ ਓਰਬਿੱਟ ਵੱਲੋਂ ਵਹਿਨ ਕੀਤਾ ਜਾਂਦਾ ਹੈ। ਜਿਨ੍ਹਾਂ ਦੀ ਅਦਾਇਗੀ ਬਕਾਇਦਾ ਚੈੱਕਾਂ ਰਾਹੀਂ ਹੁੰਦੀ ਹੈ। ਉਨ੍ਹਾਂ ਬਿਰਧ ਆਸ਼ਰਮ ’ਚ ਬਜ਼ੁਰਗਾਂ ਦੀ ਘੱਟ ਗਿਣਤੀ ਬਾਰੇ ਕਿਹਾ ਕਿ ਹੁਣ ਪੰਜਾਬੀ ਬੱਚੇ ਮਾਪਿਆਂ ਦੇ ਬਿਰਧ ਘਰਾਂ ’ਚ ਜਾਣ ਦੀ ਪ੍ਰਵਿਰਤੀ ਨੂੰ ਬੁਰਾ ਮੰਨਦੇ ਹਨ। ਜੇਕਰ ਕੋਈ ਆ ਜਾਵੇ ਤਾਂ ਉਸਨੂੰ ਘਰ ਲਿਜਾਣ ਨੂੰ ਤਰਜੀਹ ਦਿੰਦੇ ਹਨ। ਸ੍ਰੀ ਬਾਦਲ ਨੇ ਕਿਹਾ ਕਿ ਬਜ਼ੁਰਗਾਂ ਦਾ ਮਾਣ-ਸਤਿਕਾਰ ਵਧਾਉਣ ਲਈ ਉਨ੍ਹਾਂ ਬਿਰਧ ਆਸ਼ਰਮ ’ਚ ਆਪਣੇ ਲਈ ਕਮਰਾ ਬਣਾਇਆ ਹੈ। ਜਿੱਥੇ ਉਹ ਕਈ ਵਾਰ ਜਾ ਕੇ ਠਹਿਰਦੇ ਰਹੇ ਹਨ, ਉਮਰ ਕਾਰਨ ਮੂਵਮੈਂਟ ਘੱਟ ਹੋਣ ਕਰਕੇ ਸੰਭਵ ਨਹੀਂ ਹੁੰਦਾ। ਉਨ੍ਹਾਂ ਕਿਹਾ ਕਿ ਜੇਕਰ ਲੋੜਵੰਦ ਬਜ਼ੁਰਗ ਕਿਸੇ ਦੀ ਨਿਗਾਹ ’ਚ ਹੋਵੇ ਤਾਂ ਉਹ ਬਿਰਧ ਆਸ਼ਰਮ ’ਚ ਰਹਿ ਸਕਦਾ ਹੈ। ਉਨ੍ਹਾਂ ਕਿਹਾ ਕਿ ਟਰੱਸਟ ਦੇ ਸਕੂਲ ’ਚ ਬਿਨ੍ਹਾਂ ਕਿਸੇ ਵਿਤਕਰੇ ਦੇ ਲੋੜਵੰਦ ਪਰਿਵਾਰਾਂ ਦੇ ਬੱਚਿਆਂ ਨੂੰ ਦਾਖ਼ਲਾ ਦਿੱਤਾ ਜਾਂਦਾ ਹੈ। ਜਿੱਥੇ ਅਤਿ ਆਧੁਨਿਕ ਅਤੇ ਬਿਹਤਰੀਨ ਸਿੱਖਿਆ ਤਹਿਤ ਵਰਦੀ, ਕਿਤਾਬਾਂ, ਦੁਪਿਹਰ ਦਾ ਖਾਣਾ, ਬੱਸ ਸਹੂਲਤ ਅਤੇ ਦਾਖਲਾ ਫੀਸਾਂ ਤੱਕ ਸਭ ਮੁਫ਼ਤ ਹੈ।