ਉਲਝੇ ਰਾਜਸੀ ਮਾਹੌਲ ਵਿੱਚੋਂ ਵੱਡਾ ਸਿਆਸੀ ਖੁਰਾਫ਼ਾਤੀ ਬਣ ਕੇ ਉੱਭਰਿਆ ਵੋਟਰ 'ਮਹਾਰਾਜਾ'

ਘਰਾਂ 'ਤੇ ਲੱਗੇ 3-3 ਪਾਰਟੀਆਂ ਦੇ ਝੰਡੇ ਵਧਾ ਰਹੇ ਸਿਆਸੀ ਪੀੜਾਂ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਦਸ ਮਾਰਚ ਨੂੰ ਆਉਣ ਵਾਲੇ ਨਤੀਜਿਆਂ ਵਾਲੀ ਚੋਣ ਵਿੱਚ ਪੰਜਾਬ ਦੇ ਵਿਗੜੇ ਹੋਏ ਰਾਜਸੀ ਮਾਹੌਲ ਵਿੱਚੋਂ ਵੋਟਰ 'ਮਹਾਰਾਜਾ' ਵੱਡਾ ਸਿਆਸੀ ਖੁਰਾਫ਼ਾਤੀ ਬਣ ਕੇ ਉੱਭਰਿਆ ਹੈ। ਜਿਸਦੀ ਇਕਲੌਤੀ ਟੇਢੀ ਚਾਲ ਨੇ ਰਾਜਸੀ ਲੋਕਾਂ ਨੂੰ ਪੰਜੀ ਦਾ ਭੌਣ ਵਿਖਾ ਦਿੱਤਾ ਹੈ। 

ਸੂਬੇ 'ਚ  ਆਮ ਘਰਾਂ ਦੇ ਬੂਹੇ-ਬਨੇਰਿਆਂ 'ਤੇ ਲੱਗੇ ਕਈ-ਕਈ ਪਾਰਟੀਆਂ ਦੇ ਝੰਡਿਆਂ ਨੇ ਉਮੀਦਵਾਰਾਂ ਦੇ ਟੇਵੇਂ ਮਧੋਲ ਦਿੱਤੇ ਹਨ। ਸਿਆਸੀ ਨਹਿਲੇ 'ਤੇ ਵੋਟ ਦਹਿਲੇ ਨੂੰ ਬਦਲਾਅ ਦੀ ਨਵੀਂ 'ਪ੍ਰਾਹਣਚਾਰੀ' ਆਖਿਆ ਜਾ ਰਿਹਾ ਹੈ। ਸੂਬੇ 'ਚ ਤ੍ਰਿਸ਼ੰਕੂ ਵਿਧਾਨਸਭਾ ਸਰਕਾਰ ਬਣਨ ਦੀ ਚਰਚਾ ਹੈ। ਆਖਦੇ ਨੇ ਵੋਟਰਾਂ ਬੜਾ ਸਿਆਣਾ ਹੁੰਦਾ, ਚੁੱਪ ਰਹਿ ਕੇ ਵੀ ਬਹੁਤ ਕੁੱਝ ਆਖ ਜਾਂਦਾ। ਇਹ ਉਸਦੇ ਅਗਾਊਂ ਸੰਕੇਤ ਝੋਲੀ ਦਾਣੇ ਪਾਉਂਦੇ ਹਨ, ਇਹ ਤਾਂ 10 ਮਾਰਚ ਦੇ ਬਾਅਦ ਚੜ੍ਹਦੀ ਦੁਪਿਹਰ ਦੱਸੇਗੀ। ਚੋਣਾਂ ਦੇ ਦੋ ਹਫ਼ਤੇ ਬਾਅਦ ਵੀ ਸਿਆਸੀ ਧਿਰਾਂ ਅਤੇ ਸਿਆਸੀ ਮਾਹਰ ਨਤੀਜਿਆਂ ਬਾਰੇ ਪੱਕਾ ਔਲੀਆਪੁਣਾ ਨਹੀਂ ਵਿਖਾ ਸਕੇ।

ਲੰਬੀ ਹਲਕੇ ਇੱਕ ਘਰ 'ਤੇ ਤਿੰਨ ਪਾਰਟੀਆਂ ਅਕਾਲੀ ਦਲ, ਕਾਂਗਰਸ ਅਤੇ ਆਮ ਆਦਮੀ ਪਾਰਟੀ ਦੇ ਝੰਡੇ ਲੱਗੇ ਵੇਖ ਜਿਗਿਆਸੂ ਮਨ ਨਾਲ ਉਸ ਘਰ ਦੇ ਮੈਂਬਰਾਂ ਨਾਲ ਸੰਪਰਕ ਕੀਤਾ ਗਿਆ ਤਾਂ ਬੜੇ ਰੌਚਿਕ ਤੱਥ ਉੱਭਰ ਕੇ ਸਾਹਮਣੇ ਆਏ। ਉਨ੍ਹਾਂ ਦਾ ਕਹਿਣਾ ਸੀ ਕਿ ਜਿਹੜਾ ਆਈ ਗਈ ਝੰਡਾ ਲਾਈ ਗਿਆ, ਅਸੀਂ ਨਾਂਹ ਇੰਝ ਨਹੀਂ ਕੀਤੀ ਕਿ ਆਪਾਂ ਬਟਨ ਦੱਬਣ ਵਾਲੇ ਆਪਣੀ ਮਰਜ਼ੀ ਕਰ ਦੇਵਾਂਗੇ। ਹੁਣ ਇਨਾਂ ਨੂੰ ਆਪਾਂ ਮਰਜ਼ੀ ਕਰ ਲੈਣ ਦਿਓ, ਆਖ਼ਰ ਵੱਡੇ ਲੀਡਰ ਬੰਦੇ ਨੇ ਕਦੇ ਕੰਮ ਧੰਦੇ ਆ ਜਾਂਦੇ ਨੇ। ਜਦੋਂ ਤਿੰਨਾਂ ਝੰਡਿਆਂ ਵਿੱਚੋਂ ਵੋਟ ਕਿਹਦੇ ਹਿੱਸੇ ਆਉਣ ਵਾਲੇ ਪੁੱਛਿਆ ਕਿ ਚੰਗੇ ਬੰਦੇ ਨੂੰ ਵੋਟ ਪਾਈ ਏ। ਜਦੋਂ ਪੁੱਛਿਆ ਤਾਂ ਚੰਗਾ ਕਿਹੜਾ ਏ। ਜਵਾਬ ਮਿਲਿਆ ਕਿ ਸਾਰੇ ਚੰਗੇ ਆ, ਅਸੀਂ ਕਿਸੇ ਨਾਲ ਕਿਉਂ ਵਿਗਾੜੀਏ।' ਪਰ ਵੋਟ ਚੰਗੇ ਬੰਦੇ ਨੂੰ ਐ, ਇਹ ਪੱਕਾ ਐ।

ਉਸਦੇ ਨੇੜਲੇ ਘਰ 'ਚ ਅਕਾਲੀ ਦਲ ਅਤੇ ਆਮ ਆਦਮੀ ਪਾਰਟੀ ਦੇ ਝੰਡੇ ਲੱਗਿਆ ਬਾਰੇ ਪੁੱਛਣ 'ਤੇ ਘਰ ਦੇ ਮਾਲਕ ਸਧਾਰਨ ਗਰੀਬ ਵਿਅਕਤੀ ਨੇ ਆਖਿਆ ਕਿ ਸਿੱਧੀ ਗੱਲ ਆ ਜੀ, ਝੂਠ ਤਾਂ ਬੋਲਿਆਂ ਨਹੀਂ ਜਾਂਦਾ, ਪਰ ਉਹ ਝੰਡਿਆਂ ਪੱਖੋਂ ਵੀ ਕੋਰਾ ਐ। ਉਹਦੇ ਪਰਿਵਾਰ ਨੇ ਚਾਰ ਵੋਟਾਂ ਵਿੱਚੋਂ ਦੋ ਅਕਾਲੀ ਦਲ ਅਤੇ ਦੋ ਆਪ ਨੂੰ ਪਾ ਦਿੱਤੀਆਂ। ਉਸਨੂੰ ਪੁੱਛਿਆ ਇਹ ਬਦਲਾਅ ਕਿਵੇਂ ਆਵੇਗਾ। ਉਸਦਾ ਕਹਿਣਾ ਸੀ ਕਿ ਬਾਦਲ ਸਾਬ੍ਹ ਨੇ ਸਾਡੇ ਬਹੁਤ ਕੰਮ ਕੀਤੇ ਐ, ਪਰ ਹੁਣ ਬਦਲਾਅ ਦੀ ਵਾਹਲੀ ਗੱਲ ਚੱਲੀ ਹੈ। ਇਸੇ ਕਰਕੇ ਦੋ ਤੇਰੀਆਂ, ਦੋ ਮੇਰੀਆਂ ਕਰਕੇ ਵੇਖੀਆਂ ਹਨ, ਸ਼ਾਇਦ ਕੁੱਝ ਚੰਗਾ ਹੋ ਜਾਵੇ। ਨੇੜਿਓਂ ਲੰਘਦਾ ਇੱਕ ਹੋਰ ਵਿਅਕਤੀ ਤਨਜ਼ ਕਸ ਗਿਆ, ਬਦਲਾਅ ਤਾਂ ਨਹੀਂ ਆਵੇਗਾ, ਭਾਵੇਂ ਰੱਬ ਹੇਠਾਂ ਲਾਹ ਲਿਓ, ਬਾਕੀ ਸਭ ਠੀਕ ਐ।'

ਅਜਿਹੇ ਹਾਲਾਤ ਨਤੀਜਿਆਂ ਵਿੱਚ ਬਹੁਤਿਆਂ ਦੇ ਮੂੰਹਾਂ 'ਤੇ ਵੋਟਰਾਂ ਦੀ ਮੋੜਵੀ ਭਾਜੀ 'ਲੂਣ ਵਾਲੀਆਂ ਮੱਠੀਆਂ' ਮਾਰ ਸਕਦੀ ਹੈ। ਸੂਬੇ ਭਰ 'ਚ ਵੋਟਾਂ ਦੀ ਖਰੀਦੋ-ਫਰੋਖ਼ਤ ਦੀ ਪਰਤਾਂ ਹੌਲੀ-ਹੌਲੀ ਉੱਧੜਨ ਲੱਗੀ ਹੈ। ਜਿਸਦੇ ਲੜਾਈ ਝਗੜੇ ਉੱਭਰ ਕੇ ਸਾਹਮਣੇ ਆ ਰਹੇ ਹਨ। ਕਈ ਥਾਈਂ 'ਚ ਕਈ ਵੋਟਰਾਂ ਵੱਲੋਂ ਇੱਕੋ ਪਾਰਟੀ ਤੋਂ ਦੋ-ਦੋ ਵਾਰ ਪੈਸੇ ਲੈਣ ਦੇ ਖੁਲਾਸੇ ਹੋਏ ਹਨ। ਲੋਕਤੰਤਰ ਦੇ ਵੇਚੇ ਅਧਿਕਾਰ ਦਾ ਹਿਸਾਬ-ਕਿਤਾਬ ਕਰਨ 'ਤੇ ਦੋਹਰੀ ਮਾਰ 'ਚਾਂਦਮਾਰੀ' ਨਸ਼ਰ ਹੋਈ। ਦੱਸਿਆ ਜਾਂਦਾ ਹੈ ਕਿ ਬੂਥ ਵਾਈਜ਼ ਖਰੀਦੇ ਵੋਟਾਂ ਦਾ ਬਹੀ-ਖਾਤਾ ਹੋਣ 'ਤੇ ਇੱਕ ਵੋਟ ਦੋ-ਦੋ ਵਾਰੀ ਵਿਕਿਆ ਮਿਲਿਆ। ਇਹ ਵੋਟ ਇੱਕ ਔਰਤ ਨੇ ਵੇਚੀ ਸੀ। ਅਜਿਹੇ ਅਣਗਿਣਤ ਮਾਮਲੇ ਹਨ। ਇਸ ਵਾਰ ਵੋਟਾਂ ਖਰੀਦਣ ਵਾਲਿਆਂ ਨੂੰ ਮੋਬਾਇਲ ਕੈਮਰੇ ਵਿਖਾ ਕੇ ਉਨ੍ਹਾਂ ਦੇ ਲਿਹਾਜੀ 'ਮਨੁੱਖੀ ਬੰਬ' ਨਾਲ ਵਿਚਰਦੇ ਰਹੇ। ਇੱਕ ਆਗੂ ਨੇ ਦੱਸਿਆ ਕਿ ਹੁਣ ਵੋਟ ਖਰੀਦਣਾ ਵੀ ਧਾਰਾ 307 ਨਾਲੋਂ ਭੈੜਾ ਹੋ ਗਿਆ ਹੈ। ਫਲਾਣਾ ਪਤੰਦਰ, ਨਾਲੇ ਵੋਟਾਂ ਦੇ ਪੈਸੇ ਲੈ ਗਿਆ, ਫਿਰ ਵਾਰ ਮੋਬਾਇਲ ਵਿਖਾ ਕੇ ਡਰਾਵੇ ਦਿੰਦਾ ਰਿਹਾ। ਸੋਸ਼ਲ ਮੀਡੀਆ 'ਤੇ ਵੀਡੀਓ ਪਾਊਂ, ਤੁਸੀਂ ਪੈਸੇ ਵੰਡੀ ਜਾਂਦੇ ਓੇ।'

ਇਸਦੇ ਇਲਾਵਾ ਵੋਟਾਂ ਸਮੇਂ ਦੀ ਇੱਕ ਵੀਡੀਓ ਫਾਇਰਲ ਹੁੰਦੀ ਫਿਰਦੀ ਹੈ ਜਿਸ ਵਿੱਚ ਇੱਕ ਵਿਅਕਤੀ ਉਸਦੀ ਆਪਣੀ ਪਾਰਟੀ 'ਤੇ ਘਰ ਵਿੱਚ ਸ਼ਰਾਬ 'ਤੇ ਪੇਟੀ ਭੇਜਣ 'ਤੇ ਰੋਸਾ ਜਾਹਰ ਕਰ ਰਿਹਾ ਹੈ। ਇੱਕ ਸਰਕਾਰੀ ਮੁਲਾਜ਼ਮ ਨੇ ਆਖਿਆ ਕਿ ਹਲਕੇ ਵਿਚ ਵੋਟਾਂ ਦੀ ਕੀਮਤ ਘੱਟ ਪੈਣ ਬਾਰੇ ਹੁਣ ਵੋਟਰਾਂ ਦਾ ਗੁੱਸਾ ਸਾਹਮਣੇ ਆ ਰਿਹਾ ਹੈ। ਕੰਮ ਧੰਦੇ ਲਈ ਦਫਤਰਾਂ 'ਚ ਆਉਣ ਵਾਲੇ ਲੋਕ ਦੱਸ ਰਹੇ ਹਨ ਕਿ ਵੋਟਾਂ ਦੀ ਕੀਮਤ ਮੌਕੇ ਅਤੇ ਮਨ ਮੁਤਾਬਕ ਨਹੀਂ ਮਿਲੀ। ਇਸੇ ਲਈ ਉਨ੍ਹਾਂ ਵੋਟ ਫਲਾਂਅ ਉਮੀਦਵਾਰ ਨੂੰ ਪਾਈ। ਵਿਕਣ ਦੇ ਚਾਹਵਾਨ ਵੋਟਰਾਂ  ਨੂੰ ਪ੍ਰਤੀ ਵੋਟ ਪੰਜ ਹਜ਼ਾਰ ਮੁੱਲ ਪੈਣ ਦੀ ਉਮੀਦ ਸੀ। 

ਨਵੇਂ ਸੂਟ ਸਿਲਾਉਣੋਂ ਝਿਜਕ ਰਹੇ ਉਮੀਦਵਾਰ

ਇਸ ਵਾਰ ਸਿਆਸਤਦਾਨਾਂ ਦੇ ਦਰਜੀਆਂ ਦਾ ਕੰਮ ਵੀ ਮੱਠਾ  ਦੱਸਿਆ ਜਾਂਦਾ ਹੈ। ਐਤਕੀਂ ਅੰਦਾਜ਼ੇ ਯਕੀਨੀ ਜਿੱਤ ਤੋਂ ਕੋਹਾਂ ਪਿਛਾਂਹ ਹੋਣ ਕਰਕੇ ਸੰਭਾਵੀ ਜਿੱਤ ਮਨ 'ਚ ਪਾਲੀ ਬੈਠਣ ਵਾਲੇ ਰਵਾਇਤੀ ਉਮੀਦਵਾਰਾਂ ਦੇ ਮਨ 'ਚ ਚਾਅ ਨਾਲੋਂ ਵੱਧ ਡਰ ਵੇਖਣ ਨੂੰ ਮਿਲ ਰਿਹਾ ਹੈ। ਅਜਿਹੇ 'ਚ ਸਹੁੰ ਚੁੱਕਣ ਲਈ ਨਵੇਂ ਸੂਟ ਸਿਲਾਉਣੋਂ ਝਿਜਕ ਰਹੇ ਹਨ, ਤਾਂ ਹਾਰਨ 'ਤੇ ਨਵਾਂ ਸੂਟ ਕੌੜੀ ਯਾਦ ਬਣ ਕੇ ਅਲਮਾਰੀ 'ਚ ਨਿੱਤ ਸਾਹਮਣੇ ਨਾ ਆਇਆ ਕਰੇ। ਇੱਕ ਨਾਮੀ ਦਰਜੀ ਨੇ ਕਿਹਾ ਕਿ ਇਸ ਉਮੀਦਵਾਰਾਂ 'ਚ ਨਤੀਜਿਆਂ ਪ੍ਰਤੀ ਪਹਿਲਾਂ ਵਾਲਾ ਚਾਅ ਨਹੀਂ ਵਿਖਾ ਰਿਹਾ, ਜਿਸਦਾ ਉਨ੍ਹਾਂ ਦੇ ਕਾਰੋਬਾਰ 'ਤੇ ਅਸਰ ਪੈ ਰਿਹਾ ਹੈ।