'ਬਦਲਾਅ' ਲਹਿਰ! ਪਿੰਡ ਬਾਦਲ 'ਚ ਵੱਟੇ ਜਾ ਰਹੇ ਛੇ ਕੁਇੰਟਲ ਲੱਡੂ

- ਬਾਦਲ ਧਿਰ ਵੱਲੋਂ 25 ਹਜ਼ਾਰ ਅਤੇ ਖੁੱਡੀਆਂ ਵੱਲੋਂ ਸਾਢੇ ਅੱਠ ਹਜ਼ਾਰ ਦੇ ਫ਼ਰਕ ਦੀ ਜਿੱਤ ਦਾ ਦਾਅਵਾ

- 13 ਰਾਊਂਡਾਂ 'ਚ ਹੋਵੇਗੀ 177 ਬੂਥਾਂ ਦੀ ਵੋਟ ਗਿਣਤੀ

ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਐਤਕੀਂ ਬਦਲਾਅ ਦੀ ਲੋਕ-ਘਰੇੜ ਨੇ ਲੰਬੀ ਹਲਕੇ 'ਚ ਸਿਆਸੀ ਭੰਬਲਭੂਸਾ ਪਾ ਰੱਖਿਆ ਹੈ। ਦੂਜੇ ਪਾਸੇ ਪਿੰਡ ਬਾਦਲ 'ਚ ਦੋ ਪ੍ਰਮੁੱਖ ਹਲਵਾਈਆਂ ਵੱਲੋਂ  ਕਿਸੇ ਸਿਆਸੀ ਧਿਰ ਦੇ ਆਰਡਰ ਤੋਂ ਛੇ ਕੁਇੰਟਲ ਲੱਡੂ ਵੱਟੇ ਜਾ ਰਹੇ ਹਨ। ਕੱਲ੍ਹ 10 ਮਾਰਚ ਨੂੰ ਪੰਜਾਬ ਚੋਣਾਂ ਦੇ ਨਤੀਜੇ ਆਉਣੇ ਹਨ।

ਚੋਣ ਨਤੀਜਿਆਂ ਦੇ ਅਖੀਰਲੇ ਘੰਟਿਆਂ 'ਚ ਜੇਤੂ ਦਾਅਵਿਆਂ ਅਤੇ ਵੋਟਾਂ ਦੀ ਗਿਣਤੀਆਂ-ਮਿਣੀਆਂ ਦਾ ਦੌਰ ਜਾਰੀ ਹੈ। ਅਕਾਲੀ ਦਲ ਵੱਲੋਂ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਦੇ ਛੇਵੀਂ ਵਾਰ 20 ਤੋਂ 25 ਹਜ਼ਾਰ ਵੋਟਾਂ ਨਾਲ ਸ਼ਾਨਦਾਰ ਰਵਾਇਤੀ ਜਿੱਤ ਦੇ ਦਾਅਵੇ ਹੋ ਰਹੇ ਹਨ। ਦੂਜੇ ਪਾਸੇ ਆਪ ਦੇ ਉਮੀਦਵਾਰ 

ਗੁਰਮੀਤ ਸਿੰਘ ਖੁੱਡੀਆਂ ਨੇ ਸਾਢੇ ਅੱਠ ਹਜ਼ਾਰ ਨਾਲ ਲੰਬੀ ਫਤਿਹ ਕਰਨ ਦਾ ਦਾਅਵਾ ਕੀਤਾ ਹੈ। ਉਨ੍ਹਾਂ ਕਿਹਾ ਕਿ ਜਿਹੜੇ ਉਤਸਾਹ ਨਾਲ ਨਤੀਜੇ ਤੋਂ ਇੱਕ ਦਿਨ ਪਹਿਲਾਂ ਅਗਾਊਂ ਵਧਾਈਆਂ ਦਾ ਵੱਡਾ ਸਿਲਸਿਲਾ ਚੱਲ ਰਿਹਾ ਹੈ, ਉਸ ਮੁਤਾਬਕ ਨਤੀਜੇ ਇਤਿਹਾਸ ਪਲਟਾਊ ਹੋਣਗੇ। 

ਜ਼ਿਕਰਯੋਗ ਹੈ ਕਿ 2017 'ਚ ਅਕਾਲੀ ਦਲ ਨੂੰ ਹਲਕੇ 'ਚ 87 ਫ਼ੀਸਦੀ ਬੂਥਾਂ 'ਤੇ ਬੜ੍ਹਤ ਮਿਲੀ ਸੀ। ਜਦਕਿ ਕਾਂਗਰਸ ਤੇ ਆਪ ਦੀ ਬੜ੍ਹਤ ਸਿਰਫ਼ 22 ਬੂਥਾਂ 'ਤੇ ਸਿਮਟ ਗਈ ਸੀ। ਇਸ ਵਾਰ ਲੰਬੀ 'ਚ ਅਕਾਲੀ ਦਲ, ਆਪ, ਕਾਂਗਰਸ ਅਤੇ ਭਾਜਪਾ ਦੀ ਮੌਜੂਦਗੀ ਵਾਲੀ ਚੋਣ ਸਥਿਤੀ ਕਈ ਧਿਰਾਂ ਦੇ ਸਿਆਸੀ ਭਵਿੱਖ ਦੀ ਇਬਾਰਤ ਘੜੇਗੀ। 

ਖੁੱਡੀਆਂ ਦਾ ਕਹਿਣਾ ਸੀ ਕਿ ਸਰਾਵਾਂ ਜੈਲ 'ਚੋਂ ਉਨ੍ਹਾਂ ਨੂੰ ਚਾਰ-ਪੰਜ ਹਜ਼ਾਰ ਵੋਟਾਂ ਦੀ ਬੜ੍ਹਤ ਮਿਲੇਗੀ। ਮੰਡੀ ਕਿੱਲਿਆਂਵਾਲੀ ਵਿੱਚੋਂ ਪਹਿਲਾਂ ਨਾਲੋਂ ਘੱਟ ਰਹਿਣ ਵਾਲੀ ਅਕਾਲੀ ਦਲ ਦੀ ਬੜ੍ਹਤ ਨੂੰ ਉਨ੍ਹਾਂ ਦੇ ਜੱਦੀ ਪਿੰਡ ਖੁੱਡੀਆਂ ਗੁਲਾਬ ਸਿੰਘ ਅਤੇ ਖੁੱਡੀਆਂ ਮਹਾਂ ਸਿੰਘ ਹੀ ਬਰਾਬਰ ਕਰ ਦੇਣਗੇ। ਖੁੱਡੀਆਂ ਮੁਤਾਬਕ ਕੱਖਾਂਵਾਲੀ ਵਿੱਚ ਆਪ ਨੂੰ 7-8 ਸੌ ਅਤੇ ਸਿੱਖਵਾਲਾ 'ਚ ਚਾਰ ਸੌ ਵੋਟਾਂ ਦੀ ਬੜ੍ਹਤ ਮਿਲੇਗੀ। 

ਅਕਾਲੀ ਦਲ ਦੇ ਹਲਕਾ ਸੰਯੋਜਕ ਅਵਤਾਰ ਸਿੰਘ ਬਨਵਾਲਾ ਨੇ ਦਾਅਵਾ ਵੱਡੇ ਬਾਦਲ ਦੀ 25 ਹਜ਼ਾਰ ਵੋਟਾਂ ਨਾਲ ਜਿੱਤ ਦਾ ਦਾਅਵਾ ਕੀਤਾ। ਉਨ੍ਹਾਂ ਕਿਹਾ ਕਿ ਗਿਣਤੀ ਏਜੰਟ  ਭਾਈ ਜਗਤਾ ਜੀ ਗੁਰਦੁਆਰਾ ਮਲੋਟ 'ਚ ਹਮੇਸ਼ਾਂ ਵਾਂਗ ਅਰਦਾਸ ਕਰਕੇ ਗਿਣਤੀ 'ਤੇ ਡਿਊਟੀਆਂ ਨਿਭਾਉਣ ਜਾਣਗੇ।

20 ਫਰਵਰੀ ਨੂੰ ਲੰਬੀ ਹਲਕੇ 'ਚ 177 ਬੂਥਾਂ 'ਤੇ ਕੁੱਲ੍ਹ 134439 (81.35 ਫ਼ੀਸਦ) ਵੋਟਾਂ ਪਈਆਂ, ਜੋ ਕਿ ਪਹਿਲਾਂ ਨਾਲੋਂ 4.42 ਫ਼ੀਸਦੀ ਘੱਟ ਸੀ। ਚੋਣ ਤੰਤਰ ਨੇ ਮਿਮਿਟ, ਮਲੋਟ 'ਚ ਲੰਬੀ ਦੀ ਚੋਣ ਗਿਣਤੀ ਲਈ ਤਿਆਰੀਆਂ ਮੁਕੰਮਲ ਕਰ ਲਈਆਂ ਹਨ। ਏ.ਡੀ.ਸੀ-ਕਮ-ਰਿਟਰਨਿੰਗ ਅਫਸਰ ਰਾਜਦੀਪ ਕੌਰ ਨੇ ਦੱਸਿਆ ਕਿ ਗਿਣਤੀ ਸਬੰਧੀ ਦੋ ਹਾਲ ਕਮਰਿਆਂ 'ਚ 14 ਟੇਬਲ ਲਗਾਏ ਹਨ। ਗਿਣਤੀ ਦੇ ਕੁੱਲ੍ਹ 13 ਰਾਊਂਡ ਹੋਣਗੇ।

ਇਸੇ ਵਿਚਕਾਰ ਐਗਜ਼ਿਟ ਪੋਲਾਂ ਦੇ ਵੱਡੇ ਦਾਅਵਿਆਂ ਦੇ ਬਾਵਜੂਦ ਬਾਦਲ ਪਿੰਡ ਦੇ ਹਲਵਾਈਆਂ ਨੂੰ ਜਿੱਤ ਦਾ ਗੁਣਾ ਸਿਆਸੀ ਪਿੰਡ ਦੇ ਖਾਤੇ ਪੈਂਦਾ ਜਾਪਦਾ ਹੈ। ਉਹ ਬਿਨ੍ਹਾਂ ਆਰਡਰ ਤੋਂ ਹੀ ਲੱਡੂਆਂ ਦੇ ਢੇਰ ਵੱਟਣ 'ਚ ਜੁੱਟ ਹੋਏ ਹਨ। ਡੋਗਰਾ ਸਵੀਟ ਹਾਊਸ ਦੇ ਮਾਲਕ ਵੇਦ ਪ੍ਰਕਾਸ਼ ਡੋਗਰਾ ਨੇ ਕਿਹਾ ਕਿ ਉਨ੍ਹਾਂ ਚਾਰ ਕੁਇੰਟਲ ਲੱਡੂ ਬਣਾਏ ਜਾ ਰਹੇ ਹਨ। ਹਾਲਾਂਕਿ ਆਰਡਰ ਕਿਸੇ ਧਿਰ ਵੱਲੋਂ ਆਇਆ, ਪਹਿਲਾਂ ਵੀ ਇੰਨੇ ਲੱਡੂ ਤਾਂ ਲੱਗ ਹੀ ਜਾਂਦੇ ਹਨ। ਮਾਨ ਸਵੀਟ ਹਾਊਸ ਦੇ ਮਾਲਕ ਲਖਵਿੰਦਰ ਸਿੰਘ ਨੇ ਕਿਹਾ ਕਿ ਉਨ੍ਹਾਂ ਨੇ ਦੋ ਕੁਇੰਟਲ ਲੱਡੂ ਵੱਟੇ ਹਨ। ਭਾਵੇਂ ਜਿੱਤੇ ਕੋਈ, ਪਰ ਖੇਤਰ 'ਚ ਪਿੰਡਾਂ ਦੇ ਵਰਕਰਾਂ 'ਚ ਉਤਸਾਹ ਮੂਹਰੇ ਇਹ ਲੱਡੂਆਂ ਘੱਟ ਪੈ ਜਾਂਦੇ ਹਨ।