ਇਟਲੀ ’ਚ ਰਹਿੰਦੇ ਪੰਜਾਬੀ ਨੇ ਕਿਸਾਨ ਸੰਘਰਸ਼ ਲਈ ਭੇਜਿਆ ਸਾਊਂਡ ਸਿਸਟਮ

ਲੰਬੀ, 1 ਫਰਵਰੀ (ਇਕਬਾਲ ਸਿੰਘ ਸ਼ਾਂਤ)-ਕਿਸਾਨ ਸੰਘਰਸ਼ ਦੀ ਅਵਾਜ਼ ਬੁਲੰਦ ਰੱਖਣ ਲਈ ਵਿਦੇਸ਼ਾਂ ’ਚ ਵਸਦੇ ਪਰਵਾਸੀ ਪੰਜਾਬੀ ਆਪਣੇ ਵੱਲੋਂ ਕੋਈ ਕਸਰ ਨਹੀਂ ਛੱਡ ਰਹੇ। ਇਟਲੀ ’ਚ ਰਹਿੰਦੇ ਜਸਪ੍ਰੀਤ ਸਿੰਘ ਵਾਸੀ ਗੱਗੜ (ਹਲਕਾ ਲੰਬੀ) ਨੇ ਭਾਕਿਯੂ ਏਕਤਾ ਉਗਰਾਹਾਂ ਦੀ ਬਲਾਕ ਲੰਬੀ ਸ਼ਾਖਾ ਨੂੰ ਸਾਊਂਡ ਸਿਸਟਮ ਲਈ ਮਾਲੀ ਮੱਦਦ ਭੇਜੀ ਹੈ। ਉਸਦੇ ਪਿਤਾ ਗੁਰਜੰਟ ਸਿੰਘ ਗੱਗੜ ਨੇ ਕਿਸਾਨੀ ਦੀ ਆਵਾਜ਼ ਨੂੰ ਹੋਰ ਸੁਚੱਜਿਆਂ ਸਰਕਾਰ ਤੱਕ ਪਹੁੰਚਾਉਣ ਲਈ ਇੱਕ ਉਮਦਾ ਕੰਪਨੀ ਦਾ ਸਾਊਂਡ ਸਿਸਟਮ ਭਾਕਿਯੂ ਦੇ ਬਲਾਕ ਪ੍ਰਧਾਨ ਗੁਰਪਾਸ਼ ਸਿੰਘੇਵਾਲਾ ਅਤੇ ਉੱਘੇ ਆਗੂ ਜਗਸੀਰ ਸਿੰਘ ਗੱਗੜ ਅਤੇ ਤਰਸੇਮ ਮਿਠੜੀ ਨੂੰ ਸੌਂਪਿਆ। ਕਿਸਾਨ ਜਗਸੀਰ ਗੱਗੜ ਨੇ ਜਸਪ੍ਰੀਤ ਸਿੰਘ ਅਤੇ ਪਰਿਵਾਰ ਨੂੰ ਤਹਿਦਿਲੋਂ ਧੰਨਵਾਦ ਕੀਤਾ। ਇਸ ਮੌਕੇ ਬਲਵਿੰਦਰ ਸਿੰਘ ਗੱਗੜ, ਸੁਖਦੇਵ ਸਿੰਘ ਗੱਗੜ ਅਤੇ ਮਲਕੀਤ ਸਿੰਘ ਗੱਗੜ ਅਤੇ ਜਸਪਾਲ ਕੌਰ ਵੀ ਮੌਜੂਦ ਸਨ।