ਅਰਵਿੰਦ ਕੇਜਰੀਵਾਲ ਦਾ ਪੰਜਾਬ ਰਾਜਨੀਤੀ ਬਾਰੇ 'ਕੱਚਾ' ਗਿਆਨ!

ਇਕਬਾਲ ਸਿੰਘ ਸ਼ਾਂਤ

ਲੰਬੀ : ਪੰਜਾਬ ਦੀ ਰਾਜਨੀਤੀ ਬਦਲਣ ਦੀ ਸੋਚ ਰੱਖਦੇ ਆਮ ਆਦਮੀ ਪਾਰਟੀ ਦੇ ਅਰਵਿੰਦ ਕੇਜਰੀਵਾਲ ਦੇ ਪੰਜਾਬ ਦੀ ਰਾਜਨੀਤੀ ਬਾਰੇ ਅੰਕੜੇ ਅੱੱਧੇ-ਅਧੂਰੇ ਹਨ। ਕੇਜਰੀਵਾਲ ਕੱਲ੍ਹ ਲੰਬੀ ਹਲਕੇ ਵਿਖੇ ਪਿੰਡ ਖੁੱਡੀਆਂ ਵਿਖੇ ਰੈਲੀ ’ਚ ਪੰਜਾਬ ਦੇ ਕਾਂਗਰਸ ਦੇ 25 ਸਾਲਾ ਰਾਜ ਅਤੇ ਅਕਾਲੀ ਦਲ ਦੇ 19 ਸਾਲਾ ਰਾਜ ਦੇ ਮੁਕਾਬਲੇ ‘ਆਪ’ ਨੂੰ ਸਿਰਫ਼ ਪੰਜ ਸਾਲ ਦਾ ਰਾਜਭਾਗ ਦੇਣ ਦੇ ਦਾਅਵੇ ਕਰਦੇ ਰਹੇ। ਤਕਰੀਰ ਮੌਕੇ ਦਿੱਲੀ ਦੇ ਮੁੱਖ ਮੰਤਰੀ ਨੇ ਪੰਜਾਬ ਰਾਜਨੀਤੀ ਬਾਰੇ ਇਹ ਗੱਲ ਦੋ ਵਾਰ ਦੁਹਰਾਈ। ਜਦੋਂਕਿ ਹਕੀਕਤ ਵਿੱਚ 1947 ਤੋਂ ਲੈ ਕੇ ਹੁਣ ਪੰਜਾਬ ’ਚ ਕਾਂਗਰਸ ਪਾਰਟੀ ਦਾ ਕਰੀਬ ਸਾਢੇ 45 ਸਾਲ (16583 ਦਿਨ) ਰਾਜ ਰਿਹਾ ਹੈ। ਇਸੇ ਤਰਾਂ ਅਕਾਲੀ ਦਲ ਦਾ ਰਾਜ ਪੰਜਾਬ ਵਿੱਚ ਕਰੀਬ ਪੌਨੇ 22 ਸਾਲ (7977 ਦਿਨ) ਰਿਹਾ ਹੈ। ਜਿਸਦੇ ਅੰਕੜੇ ਵੈੱਬਸਾਇਟ ’ਤੇ ਬਕਾਇਦਾ ਨਸ਼ਰ ਹਨ। ਜਿਕਰਯੋਗ ਹੈ ਕਿ ਦਿੱਲੀ ਦੇ ਮੁੱਖ ਮੰਤਰੀ ਅਰਵਿੰਦ ਕੇਜਰੀਵਾਲ ਬਹੁਤ ਸੂਝਵਾਨ ਆਗੂ ਹਨ, ਜਿਨ੍ਹਾਂ ਨੇ ਦੇਸ਼ ਦੀ ਰਾਜਨੀਤੀ ਦਾ ਮੁਹਾਂਦਰਾ ਬਦਲਿਆ ਹੈ। ਉਨ੍ਹਾਂ ਦੀ ਹਰੇਕ ਪੰਜਾਬ ਫੇਰੀ ਸੂਬੇ ਦੀਆਂ  ਸਿਆਸੀ ਪਾਰਟੀਆਂ ਵਿਚ ਖੌਫ਼ ਦਾ ਨਵਾਂ ਮਾਹੋਲ ਸਿਰਜ ਜਾਂਦੀ ਹੈ। ਅਜਿਹੇ ਪ੍ਰਪੱਕ ਆਗੂ ਦੇ ਮੂੰਹੋਂ ਅੰਕੜੇ ਅੱੱਧੇ-ਅਧੂਰੇ ਪੰਜਾਬ ਸਿਆਸਤ ਦੇ ਜਾਣਕਾਰਾਂ ਦੇ ਗਲਿਓਂ ਨਹੀਂ ਉੱਤਰ ਰਹੇ।