ਚੋਣ ਲਾਟਰੀ : ਸਿਆਸੀ ਆਲ੍ਹਣਿਆਂ ’ਚ ਪਰਤਣ ਲੱਗੇ ਚੋਣ ਪਰਿੰਦੇ

  ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਪੰਜਾਬ ਚੋਣ ਲਾਟਰੀ ਦੇ ਨਤੀਜੇ ਦੀ ‘ਸੱਜਰੀ ਸਵੇਰ’ ਚੜ੍ਹਦੀ ਵੇਖ ਚੋਣ ਪਰਿੰਦੇ ਆਪਣੇ ਸਿਆਸੀ ਆਲ੍ਹਣਿਆਂ ’ਚ ਪੁੱਜਣ ਲੱਗੇ ਹਨ। ਸਿਆਸਤ ਦੇ ਸ਼ਾਹ ਅਸਵਾਰ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੀ ਕੱਲ੍ਹ ਆਪਣੇ ਜੱਦੀ ਪਿੰਡ ਬਾਦਲ ਵਾਪਸ ਆ ਗਏ। ਉਹ ਆਪਣੇ ਸਿਆਸੀ ਕਿਲ੍ਹੇ ਪਿੰਡ ਬਾਦਲ ਤੋਂ ਚੋਣ ਨਤੀਜਿਆਂ ’ਤੇ ਨਜ਼ਰਾਂ ਰੱਖਣਗੇ।

ਜਾਣਕਾਰਾਂ ਅਨੁਸਾਰ ਸ੍ਰੀ ਬਾਦਲ ਹਰੇਕ ਚੋਣ ਨਤੀਜੇ ਸਮੇਂ ਪਿੰਡ ਬਾਦਲ ਵਿੱਚ ਰਹਿਣ ਨੂੰ ‘ਲੱਕੀ’ ਮੰਨਦੇ ਹਨ। ਉਨ੍ਹਾਂ ਅਮਰੀਕਾ ’ਚ ਸਿਹਤ ਜਾਂਚ ਮਗਰੋਂ ਪਿੰਡ ਬਾਲਾਸਰ ਫਾਰਮ ਹਾਊਸ ’ਚ ਛੁੱਟੀਆਂ ਬਿਤਾਈਆਂ। ਮੁੱਖ ਮੰਤਰੀ ਬਾਦਲ ਦੇ ਜੀਵਨ ਦੀ ਬੇਹੱਦ ਫਸਵੀਂ 11ਵੀਂ ਸੂਬਾਈ ਚੋਣ ਦਾ ਨਤੀਜਾ 11 ਮਾਰਚ ਦੇ ਸੂਰਜ ਦੀ ਟਿੱਕੀ ਨਾਲ ਜੁੜਿਆ ਹੈ। ਜਿਉਂ-ਜਿਉਂ ਨਤੀਜੇ ਦਾ ਸਮਾਂ ਘਟ ਰਿਹਾ ਹੈ ਉਮੀਦਵਾਰਾਂ ਅਤੇ ਸਮਰਥਕਾਂ ਦੇ ਕਲੇਜੇ ਪਾਟਣ ਨੂੰ ਹੋ ਰਹੇ ਹਨ। ਲੰਬੀ ਸੀਟ ’ਤੇ ਪੰਜਾਬ ਸਮੇਤ ਸਮੁੱਚੀ ਦੁਨੀਆਂ ਦੀਆਂ ਨਜ਼ਰਾਂ ਲੱਗੀਆਂ ਹਨ। ਜੀਵਨ ਸਿਖ਼ਰ ’ਤੇ ਐਤਕੀਂ ਦਾ ਚੋਣ ਪ੍ਰਚਾਰ ਵੱਡੇ ਬਾਦਲ ਲਈ ਅਕਾਲੀ ਜਥੇਦਾਰਾਂ ਦੀਆਂ ਮਾੜੀਆਂ ਕਰਤੂਤਾਂ ਕਰਕੇ ਕਾਫ਼ੀ ਨਾਮੋਸ਼ੀ ਭਰਿਆ ਰਿਹਾ। ਉਂਝ ਵੱਡੇ ਬਾਦਲ ਨੇ ਆਪਣੇ ਜੀਵਨ ’ਚ ਕਦੇ ਵਿਧਾਨਸਭਾ ਚੋਣ ਨਹੀਂ ਹਾਰੀ। ਇਸ ਸਾਬਕਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਅਤੇ ਜਰਨੈਲ ਸਿੰਘ ਨਾਲ ਤਿਕੋਨੇ ਸਿਆਸੀ ਭੇੜ ’ਚ ਜਿੱਤ-ਹਾਰ ਦਾ ਫ਼ਰਕ ਉਂਗਲਾਂ ’ਤੇ ਗਿਣਨ ਵਾਂਗ ਬਣਿਆ ਪਿਆ ਹੈ। ਬਾਦਲ ਦੀ ਰਵਾਇਤੀ ਚੁੱਪੀ ਵਿਰੋਧੀਆਂ ਦੇ ਸੀਨੇ ਦੀ ਕੁਲਝਣ ਨੂੰ ਵਧਾ ਰਹੀ ਹੈ ਅਤੇ ਦਿੱਲੀ ਗੁਰਦੁਆਰਾ ਕਮੇਟੀ ਦੇ ਨਤੀਜੇ ਨੇ ਵਿਰੋਧੀਆਂ ਦੇ ਮੂੰਹ 11 ਮਾਰਚ ਤੱਕ ਸਿਉਂ ਜਿਹੇ ਦਿੱਤੇ ਹਨ। ਸਿਆਸੀ ਮਾਹਰ ਦਿੱਲੀ ਅਤੇ ਪੰਜਾਬ ਦੇ ਸਿਆਸੀ ਮਾਹੌਲ ’ਚ ਜ਼ਮੀਨ ਅਸਮਾਨ ਦਾ ਅੰਤਰ ਮੰਨਦੇ ਹਨ। 

ਪਿੰਡ ਬਾਦਲ ਪਰਤਣ ਮਗਰੋਂ ਪ੍ਰਕਾਸ਼ ਸਿੰਘ ਬਾਦਲ ਨੇ ਅੱਜ ਕੁਝ ਵਰਕਰਾਂ ਨਾਲ ਮੁਲਾਕਾਤ ਕੀਤੀ। ਪਿੰਡ ਬਾਦਲ ’ਚ ਇੱਕ-ਦੋ ਪਰਿਵਾਰਾਂ ਵਿੱਚ ਮੌਤਾਂ ਕਰਕੇ ਦੁੱਖ ਪ੍ਰਗਟ ਕਰਨ ਲਈ ਗਏ। ਇਸ ਦੌਰਾਨ ਦੋ-ਤਿੰਨ ਅਕਾਲੀ ਉਮੀਦਵਾਰ ਵੀ ਮੁੱਖ ਮੰਤਰੀ ਬਾਦਲ ਨਾਲ ਮੁਲਾਕਾਤ ਲਈ ਪੁੱਜੇ। 

ਲੰਬੀ ਸੀਟ ਤੋਂ ਮੁੱਖ ਮੰਤਰੀ ਨੂੰ ਉਨ੍ਹਾਂ ਦੇ ਗੜ੍ਹ ਵਿੱਚ ਵੰਗਾਰਨ ਵਾਲੇ ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਦੇ ਲੜਕੇ ਰਣਇੰਦਰ ਸਿੰਘ ਵੀ 9 ਮਾਰਚ ਨੂੰ ਸ਼ਾਮ ਪਿੰਡ ਬਾਦਲ ਪੁੱਜ ਰਹੇ ਹਨ, ਜੋ ਕਿ ਲੰਬੀ ਹਲਕੇ ’ਚ ਅਮਰਿੰਦਰ ਸਿੰਘ ਦੀ ਚੋਣ ਮੁਹਿੰਮ ਦੇ ਮੁੱਖ ਸਿਪਹਸਾਲਾਰ ਸਨ। ਜਿਨ੍ਹਾਂ ਮਹੇਸ਼ਇੰਦਰ-ਖੁੱਡੀਆਂ ਧੜੇ ਦੇ ਸਹਿਯੋਗ ਨਾਲ ਚੋਣ ਮੁਹਿੰਮ ਨੂੰ ਸਿਖ਼ਰ ’ਤੇ ਪਹੁੰਚਾਇਆ। ਕਾਂਗਰਸੀ ਸੂਤਰਾਂ ਅਨੁਸਾਰ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਰਨੈਲ ਸਿੰਘ ਵੀ ਦਿੱਲੀ ਵਿਖੇ ਪਰਿਵਾਰਕ ਰੁਝੇਂਵਿਆਂ ਅਤੇ ਸਿਆਸੀ-ਸਮਾਜਿਕ ਸਰਗਰਮੀਆਂ ਨਿਪਟਾ ਕੇ 10 ਮਾਰਚ ਨੂੰ ਲੰਬੀ ਹਲਕੇ ’ਚ ਚੋਣ ਨਤੀਜੇ ਲਈ ਪੁੱਜ ਜਾਣਗੇ। ਉਂਝ ਜਰਨੈਲ ਸਿੰਘ ਵੋਟਾਂ ਉਪਰੰਤ ਕਈ ਦਿਨ ਬਾਅਦ ਤੱਕ ਵਰਕਰਾਂ ਨਾਲ ਮੁਲਾਕਾਤ ਕਰਕੇ ਪ੍ਰਚਾਰ ’ਚ ਪਾਏ ਯੋਗਦਾਨ ਲਈ ਹੌਂਸਲਾ ਅਫਜਾਈ ਕਰਦੇ ਰਹੇ ਹਨ। ਅਕਾਲੀ ਦਲ (ਅ) ਦੇ ਅੰਮ੍ਰਿਤਸਰ ਦੇ ਉਮੀਦਵਾਰ ਬਲਜਿੰਦਰ ਸਿੰਘ ਮੋਰਜੰਡ ਵੀ ਆਪਣੇ ਜੱਦੀ ਸੂਬੇ ਰਾਜਸਥਾਨ ਦੌਰੇ ਮਗਰੋਂ ਐਤਵਾਰ ਨੂੰ ਲੰਬੀ ਹਲਕੇ ’ਚ ਪਰਤ ਆਏ ਹਨ। ਉੱਧਰ ਚੋਣ ਪ੍ਰਸ਼ਾਸਨ ਨੇ ਲੰਬੀ ਹਲਕੇ ਦੇ ਵੋਟਾਂ ਦੀ ਗਿਣਤੀ ਲਈ ਮਿਮਿਟ ਮਲੋਟ ਵਿੱੱਚ ਵੱਡੇ ਪੱਧਰ ’ਤੇ ਤਿਆਰੀਆਂ ਵਿੱਢੀਆਂ ਹੋਈਆਂ ਹਨ। ਅੱਜ ਪੰਜਾਬ ਦੇ ਮੁੱਖ ਚੋਣ ਕਮਿਸ਼ਨਰ ਵੀ.ਕੇ ਸਿੰਘ ਨੇ ਚੋਣ ਪ੍ਰਬੰਧਾਂ ਦਾ ਜਾਇਜ਼ਾ ਲਿਆ ਹੈ। 

‘ਰਾਮ ਦੀ ਸਾਰ ਲੈਣ ਪੁੱਜਿਆ ਲਛਮਣ’

ਪੁੱਤਰਾਂ ਦੇ ਸਹੇੜੇ ਦੁਫੇੜੇ ਬਾਅਦ ਵੀ ‘ਰਾਮ-ਲਛਮਣ’ ਅਖਵਾਉਂਦੇ ਪਾਸ਼ ਅਤੇ ਦਾਸ ਕਦੇਂ-ਕਦਾਈਂ ਦੁੱਖ-ਸੁੱਖ ਸਾਂਝੇ ਕਰ ਹੀ ਲੈਂਦੇ ਹਨ। ਗੁਰਦਾਸ ਸਿੰਘ ਬਾਦਲ (ਦਾਸ) ਆਪਣੇ ਵੱਡੇ ਭਰਾ ਪ੍ਰਕਾਸ਼ ਸਿੰਘ ਬਾਦਲ (ਪਾਸ਼) ਦੇ ਅਮਰੀਕਾ ਤੋਂ ਸਿਹਤ ਜਾਂਚ ਉਪਰੰਤ

ਬਾਦਲ ਪਿੰਡ ਪੁੱਜਣ ’ਤੇ ਅੱਜ ਸੁੱਖ-ਸਾਂਦ ਪੁੱਛਣ ਲਈ ਗਏ। ਸਵੇਰੇ ਸਵਾ 10 ਵਜੇ ਬਾਦਲਾਂ ਦੀ ਰਿਹਾਇਸ਼ ’ਤੇ ਦਾਸ ਨੇ ਪਾਸ਼ ਨਾਲ 10-12 ਮਿੰਟ ਸਾਂਝੇ ਕੀਤੇ। ਪਤਾ ਲੱਗਿਆ ਹੈ ਕਿ ਦੋਵੇਂ ਭਰਾ ਧੱੁਪੇ ਲਾੱਨ ’ਚ ਇਕੱਲੇ ਬੈਠੇ ਰਹੇ। ਇਸ ਮੌਕੇ ਸੁਖਬੀਰ ਸਿੰਘ ਬਾਦਲ ਵੀ ਰਿਹਾਇਸ਼ ’ਤੇ ਮੌਜੂਦ ਸਨ ਪਰ ਉਹ ਆਪਣੇ ਚਾਚੇ ਨੂੰ ਮਿਲਣ ਲਈ ਖਾਤਰ ਬਾਹਰ ਆਉਣ ਨੂੰ ਤਰਜੀਹ ਨਹੀਂ ਦਿੱਤੀ। ਸੂਤਰ ਅਨੁਸਾਰ ਉਦੋਂ ਅੰਦਰ ਕੋਠੀ ’ਚ ਸੁੱਤੇ ਹੋਏ ਹਨ। ਜ਼ਿਕਰਯੋਗ ਹੈ ਕਿ ਗੁਰਦਾਸ ਬਾਦਲ ਹਮੇਸ਼ਾਂ ਆਪਣੇ ਭਰਾ ਨਾਲ ਦੁਫੇੜ ਪੈਣ ਲਈ ਭਤੀਜੇ ਸੁਖਬੀਰ ਸਿੰਘ ਬਾਦਲ ਨੂੰ ਜੁੰਮੇਵਾਰ ਦੱਸਦੇ ਰਹੇ ਹਨ। ਗੁਰਦਾਸ ਸਿੰਘ ਬਾਦਲ ਦੇ ਨਜ਼ਦੀਕੀਆਂ ਅਨੁਸਾਰ ਦਾਸ ਜੀ ਭਰਾ ਵਜੋਂ ਬਾਦਲ ਸਾਬ੍ਹ ਦੀ ਸਿਹਤਯਾਬੀ ਪੁੱਛਣ ਲਈ ਗਏ ਸਨ।

ਬਾਦਲਾਂ ਦੀ 'ਮੁਫ਼ਤ-ਮੁਫ਼ਤ-ਮੁਫ਼ਤ' ਖੇਡ ਨੇ ਵਿਗਾੜੀਆਂ ਆਦਤਾਂ

*  ਸਰਕਾਰੀ ਪਾਣੀ ਨੂੰ ‘ਪ੍ਰਾਹੁਣਿਆਂ’ ਵਾਂਗ ਵਰਤਣ ਵਾਲੇ ‘ਮੁਫ਼ਤਖ਼ੋਰਾਂ’ ਨੇ ਜਲ ਸਪਲਾਈ ਦੀ ਲੱਸੀ ਕੱਢੀ

*  ਦੋ ਤੋਂ ਸਵਾ 3 ਰੁਪਏ ਰੋਜ਼ਾਨਾ ਬਚਾਉਣ ਵਾਲੇ ਲੋਕ ਹੁਣ ਖਰੀਦੇ ਰਹੇ 3-3 ਸੌ ਰੁਪਏ ਪਾਣੀ ਦੇ ਟੈਂਕ

*  ਵੀ.ਆਈ.ਪੀ. ਹਲਕੇ ’ਚ ਜਲ ਸਪਲਾਈ ਦੇ ਡਿਫਾਲਟਰਾਂ ਅਤੇ ਨਜਾਇਜ਼ ਕੁਨੈਕਸ਼ਨਾਂ ਦੀ 80 ਤੋਂ 90 ਫ਼ੀਸਦੀ

                                                                ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਸਰਕਾਰੀ ਪਾਣੀ ਨੂੰ ‘ਪ੍ਰਾਹੁਣਿਆਂ’ ਵਾਂਗ ਵਰਤਣ ਵਾਲੇ ‘ਮੁਫ਼ਤਖ਼ੋਰ’ ਖਪਤਕਾਰਾਂ ਨੇ ਸਮੁੱਚੇ ਪੇਂਡੂ ਜਲ ਸਪਲਾਈ ਢਾਂਚੇ ਦੀ ਲੱਸੀ ਕੱਢ ਕੇ ਰੱਖ ਦਿੱਤੀ। ਪਿੰਡਾਂ ਵਿੱਚ ਵਾਟਰ ਵਰਕਸਾਂ ਦੇ ਬਿਜਲੀ ਕੁਨੈਕਸ਼ਨ ਕੱਟੇ ਜਾਣ ਮਗਰੋਂ ਲੋਕ ਸੌ ਤੋਂ ਡੇਢ ਸੌ ਗੁਣਾ ਖਰਚ ਕੇ ਤਿੰਨ-ਤਿੰਨ ਸੌ ਰੁਪਏ ’ਚ ਪ੍ਰਤੀ ਟੈਂਕ ਪਾਣੀ ਖਰੀਦ ਰਹੇ ਹਨ ਅਤੇ ਕਈ ਰਜਵਾਹਿਆਂ ਤੋਂ ਪਾਣੀ ਲਿਆ ਰਹੇ ਹਨ। ਦੂਜੇ ਪਾਸੇ ਘਰੇ ਟੂਟੀ ਰਾਹੀਂ ਆਉਂਦੇ ਪੇਂਡੂ ਜਲ ਸਪਲਾਈ ਦਾ ਬਿੱਲ ਸਿਰਫ਼ 2 ਤੋਂ ਸਵਾ ਤਿੰਨ ਰੁਪਏ ਰੋਜ਼ਾਨਾ ਪੈਂਦਾ ਹੈ। ਬਹੁ-ਗਿਣਤੀ

ਲੋਕਾਂ ਨੇ ਅਕਾਲੀ ਸਰਕਾਰ ਦੇ ਮੁਫ਼ਤ ਬਿਜਲੀ-ਪਾਣੀ ਦੇ ਸੁਆਦ ’ਚ ਜਲ ਸਪਲਾਈ ਦੇ ਪਾਣੀ ਨੂੰ ਮੁਫ਼ਤ ਦਾ ਮਾਲ ਸਮਝ ਲਿਆ। ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦਾ ਘਰੇਲੂ ਜਲ ਸਪਲਾਈ ਦਾ ਪ੍ਰਤੀ ਮਹੀਨਾ ਬਿੱਲ 60 ਰੁਪਏ ਮਹੀਨਾ ਹੈ ਅਤੇ ਪੰਚਾਇਤਾਂ ਦੇ ਅਧੀਨ ਵਾਟਰ ਵਰਕਸਾਂ ਵਿੱਚ ਸੌ ਰੁਪਏ ਪਤੀ ਮਹੀਨਾ ਬਿੱਲ ਹੈ। ਲੰਬੀ ਹਲਕੇ ਵਿੱਚ ਕਰੀਬ ਤਿੰਨ ਦਰਜਨ ਵਾਟਰ ਵਰਕਸਾਂ ਦੇ ਬਿਜਲੀ ਕੁਨੈਕਸ਼ਨ ਕੱਟੇ ਹੋਏ ਹਨ। ਦਿਨੋਂ ਦਿਨ ਮੌਸਮ ’ਚ ਗਰਮੀ ਵਧਣ ਕਰਕੇ ਪਾਣੀਆਂ ਲੋੜਾਂ ਵਧ ਰਹੀਆਂ ਹਨ। ਅਜਿਹੇ ਵਿੱਚ ਪਾਣੀ ਦੀ ਥੁੜ ’ਚ ਘਰੇਲੂ ਜ਼ਰੂਰਤਾਂ ਵਿੱਚ ਦਿੱਕਤਾਂ ਵਧ ਰਹੀਆਂ ਹਨ। ਕਾਫ਼ੀ ਗਿਣਤੀ ਲੋਕ ਪਾਣੀ ਦੇ ਬਿੱਲ ਭਰਨ ਦੀ ਪੈਰਵੀ ਵੀ ਕਰਦੇ ਹਨ। ਜਦੋਂ ਕਿ ਆਮ ਲੋਕਾਂ ਦਾ ਪੰਚਾਇਤਾਂ ਅਤੇ ਵਿਭਾਗ ’ਤੇ ਬਿੱਲ ਉਗਰਾਹੀ ਨਾ ਕਰਨ ਦਾ ਗੁੱਸਾ ਵੀ ਨਿੱਕਲ ਰਿਹਾ ਹੈ। ਲੰਬੀ ਹਲਕੇ ’ਚ ਵੋਟਾਂ ਨੇੜੇ ਹੋਣ ਕਰਕੇ ਪੰਚਾਇਤਾਂ ਅਤੇ ਵਿਭਾਗ ਨੇ ਕਾਫ਼ੀ ਸਮੇਂ ਪਾਣੀ ਬਿੱਲ ਉਗਰਾਹੁਣ ਤੋਂ ਪਾਸਾ ਵੱਟੀ ਰੱਖਿਆ। ਮੁਫ਼ਤਖ਼ੋਰੀ ਦੇ ਸ਼ੌਂਕੀਨ ਬਣੇ ਹਲਕੇ ਦੇ ਵੀ.ਆਈ.ਪੀ. ਵੋਟਰ ਕੀਮਤੀ ਜਲ ਸਪਲਾਈ ਦੀ ਖੁੱਲੇ੍ਹਆਮ ਦੁਰਵਰਤੋਂ ਦੇ ਆਦੀ ਬਣੇ ਗਏ।

ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਲੰਬੀ ਸਬਡਿਵੀਜਨ ਦੇ 24 ਪਿੰਡਾਂ ਵਿਚੋਂ 10 ਵਾਟਰ ਵਰਕਸਾਂ ਦਾ ਚਾਰਜ਼ ਵਿਭਾਗ ਕੋਲ ਹੈ। 14 ਪਿੰਡਾਂ ਦੀ ਜਲ ਸਪਲਾਈ ਪੰਚਾਇਤਾਂ ਕੋਲ ਹਨ। ਵਿਭਾਗ ਹੇਠਲੇ ਤਿੰਨ ਵਾਟਰ ਵਰਕਸ ਲੰਬੀ, ਸ਼ੇਰਾਂਵਾਲੀ, ਧੌਲਾ-ਕਿੰਗਰਾ ਦੇ ਕੁਨੈਕਸ਼ਨ ਕੱਟੇ ਹੋਏ ਹਨ। ਵਿਭਾਗੀ ਸੂਤਰਾਂ ਦਾ ਕਹਿਣਾ ਹੈ ਕਿ ਵਿਭਾਗ ਅਧੀਨ 10 ਪਿੰਡਾਂ ’ਚ ਲਗਪਗ 28 ਸੌ ਕੁਨੈਕਸ਼ਨ ਹਨ। ਜਿਨ੍ਹਾਂ ਤੋਂ ਲਗਪਗ 77 ਲੱਖ ਰੁਪਏ ਦੇ ਬਿੱਲਾਂ ਦੀ ਉਗਰਾਹੀ ਬਾਕੀ ਹੈ। ਸੂਤਰਾਂ ਅਨੁਸਾਰ ਹਰ ਪਿੰਡ ’ਚ ਸੈਂਕੜੇ ਕੁਨੈਕਸ਼ਨ ਨਜਾਇਜ਼ ਹਨ ਅਤੇ ਵਿਭਾਗ ਜਾਂ ਪੰਚਾਇਤਾਂ ਦੀ ਉਨ੍ਹਾਂ ਵੱਲ ਤੱਕਣ ਦੀ ਜੁਰੱਅਤ ਨਹੀਂ। ਲੰਬੀ ਦੀ ਅੌਰਤ ਅਕਾਲੀ ਸਰਪੰਚ ਦੇ ਪਤੀ ਸੁਖਵੰਤ ਸਿੰਘ ਅਨੁਸਾਰ ਲੰਬੀ ’ਚ ਲਗਪਗ 3 ਸੌ ਨਜਾਇਜ਼ ਕੁਨੈਕਸ਼ਨ ਹਨ ਅਤੇ 90 ਫ਼ੀਸਦੀ ਜਾਇਜ਼ ਕੁਨੈਕਸ਼ਨ ਧਾਰਕਾਂ ਵਿੱਚ ਪਾਣੀ ਬਿੱਲਾਂ ਦੇ ਡਿਫਾਲਟਰ ਹਨ। ਇਹ ਪਤਾ ਲੱਗਿਆ ਹੈ ਕਿ ਇੱਕ-ਇੱਕ ਘਰ ਨੇ ਦੋ-ਦੋ ਤਿੰਨ ਕੁਨੇਕਸ਼ਨ ਨਜਾਇਜ਼ ਲਗਵਾਏ ਹੋਏ ਹਨ। ਅਜਿਹੇ ਹਾਲਾਤ ਲੰਬੀ ਹਲਕੇ ਦੇ ਲਗਪਗ ਹਰੇਕ ਪਿੰਡ ਵਿੱਚ ਬਣੇ ਹੋਏ ਹਨ। ਹਲਕੇ ਤੋਂ ਸਭ ਤੋਂ ਵੱਡੇ ਕਸਬੇ ਰੂਪੀ ਪਿੰਡ ਮੰਡੀ ਕਿੱਲਿਆਂਵਾਲੀ ’ਚ ਕਰੀਬ 982 ਜਾਇਜ਼ ਕੁਨੈਕਸ਼ਨ ਅਤੇ ਇੱਕ 17-18 ਸੌ ਕੁਨੈਕਸ਼ਨ ਨਜਾਇਜ਼ ਹਨ। ਕੁਨੈਕਸ਼ਨ ਧਾਰਕਾਂ ਵੱਲ ਵਿਭਾਗ ਦੇ 33 ਲੱਖ ਰੁਪਏ ਪਾਣੀ ਬਿੱਲ ਬਕਾਇਆ ਹਨ। ਜਦੋਂ ਕਿ 56 ਲੱਖ ਰੁਪਏ ਦਾ ਬਿਜਲੀ ਬਿੱਲ ਬਕਾਇਆ ਹੋਣ ਕਰਕੇ ਕੁਨੈਕਸ਼ਨ ਕੱਟ ਦਿੱਤਾ ਗਿਆ ਹੈ। ਮੰਡੀ ਕਿੱਲਿਆਂਵਾਲੀ ਵਾਟਰ ਵਰਕਸ ਦਾ ਪ੍ਰਤੀ ਮਹੀਨੇ ਬਿਜਲੀ ਬਿੱਲ ਕਰੀਬ 1.80 ਲੱਖ ਆਉਂਦਾ ਹੈ। ਪਾਣੀ ਬਿੱਲਾਂ ਦੀ ਉਗਰਾਹੀ ਸਿਰਫ਼ 30-35 ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਹੈ। ਕਸਬੇ ’ਚ

ਕੁਨੈਕਸ਼ਨ ਧਾਰਕ ਆਂਢ-ਗੁਆਂਢ ’ਚ ’ਚ ਨਜਾਇਜ਼ ਕੁਨੈਕਸ਼ਨ ਵੇਖ ਪਾਣੀ ਬਿੱਲ ਭਰਨ ਤੋਂ ਮੁਨਕਰ ਹਨ। ਵਿਭਾਗ ਅਕਾਲੀ ਦਲ ਦੇ ਆਗੂਆਂ ਦੀ ਧੱਕੜਪੁਨੇ ਮੂਹਰੇ ਦਸ ਸਾਲ ਤੱਕ ਪੂੱਛਾਂ ਦੱਬ ਕੇ ਵੇਲਾ ਲੰਘਾਉਂਦਾ ਆ ਰਿਹਾ ਹੈ। ਇਸ ਸਬਡਿਵੀਜਨ ’ਚ ਮੰਡੀ ਕਿੱਲਿਆਂਵਾਲੀ, ਭੀਟੀਵਾਲਾ, ਵੜਿੰਗਖੇੜਾ, ਫਤੂਹੀਵਾਲਾ, ਸਿੰਘੇਵਾਲਾ, ਢਾਣੀ ਸਿੰਘੇਵਾਲਾ, ਢਾਣੀ ਤੇਲਿਆਂਵਾਲੀ ਵਗੈਰਾ ਦੇ ਕੁਨੈਕਸ਼ਨ ਕੱਟੇ ਹੋਏ ਹਨ। ਬਿੱਲ ਉਗਰਾਹੀ ਪੱਖੋਂ ਜਲ ਸਪਲਾਈ ਸਿਸਟਮ ਦੇ ਫੇਲ੍ਹ ਹੋਣ ਦਾ ਕਾਰਨ ਪੰਚਾਇਤ ਉੱਪਰ ਵਿਭਾਗ ਦਾ ਡੰਡਾ ਨਾ ਹੋਣਾ ਵੀ ਮੰਨਿਆ ਜਾ ਰਿਹਾ ਹੈ। ਹੈਰਾਨੀ ਭਰਿਆ ਤੱਥ ਹੈ ਵਿਭਾਗ ਕੋਲ ਪੰਚਾਇਤਾਂ ਅਧੀਨ ਵਾਟਰ ਵਰਕਸਾਂ ਦੇ ਜਾਇਜ਼-ਨਜਾਇਜ਼ ਪਾਣੀ ਕੁਨੈਕਸ਼ਨਾਂ ਦੀ ਗਿਣਤੀ, ਡਿਫਾਲਟਰਾਂ ਵਗੈਰਾ ਦੇ ਅੰਕੜੇ ਪੱਖੋਂ ਪੂਰੀ ਤਰ੍ਹਾਂ ਖਾਲੀ ਹਨ। 21 ਪਿੰਡਾਂ ਦੀ ਜਲ ਸਪਲਾਈ ਪੰਚਾਇਤਾਂ ਅਧੀਨ ਹੈ। ਮੰਡੀ ਕਿੱਲਿਆਂਵਾਲੀ ’ਚ ਕੁਝ ਲੋਕਾਂ ਨੇ ਨਜਾਇਜ਼ ਕੁਨੈਕਸ਼ਨਾਂ ਖਿਲਾਫ਼ ਮੁਹਿੰਮ ਵਿੱਢੀ ਸੀ ਪਰ ਸੱਤਾਪੱਖੀ ਦਬਾਅ ਮੂਹਰੇ ਗੱਲ ਉਥੇ ਹੀ ਦਬ ਗਈ। ਪਿੰਡ ਲੁਹਾਰਾ ਦੀ ਅੌਰਤ ਅਮਨਦੀਪ ਕੌਰ ਨੇ ਪਾਣੀ ਦੀ ਸਹੂਲਤ ਬਰਕਰਾਰ ਰੱਖਣ ਲਈ ਬਿੱਲ ਭਰਨ ਦੀ ਵਕਾਲਤ ਕੀਤੀ ਅਤੇ 5-6 ਮਹੀਨੇ ਤੋਂ ਕੋਈ ਬਿੱਲ ਲੈਣ ਨਹੀਂ ਆਇਆ। ਸਾਨੂੰ ਸੌ ਰੁਪਏ ਪ੍ਰਤੀ ਮਹੀਨਾ ਪਾਣੀ ਬਿੱਲ ਦੇਣਾ ਸੌਖਾ ਹੈ ਇਹ ਕੋਈ ਵੱਡੀ ਰਕਮ ਨਹੀਂ। ਕਿਸਾਨ ਅਮਨਦੀਪ ਸਿੰਘ ਨੇ ਕਿਹਾ ਕਿ ਸਵਾ 3 ਰੁਪਏ ਰੋਜ਼ਾਨਾ ਨਹਿਰੀ ਪਾਣੀ ਘਰ ਬੈਠਿਆਂ ਮਿਲਣਾ ਤਾਂ ਸਵਰਗ ਜਿਹੀ ਸਹੂਲਤ ਹੈ ਪਰ ਲੋਕ ਅਣਗਹਿਲੀ ਅਤੇ ਥੋੜ੍ਹੇ ਲਾਲਚ ਕਰਕੇ ਇਸ ਸਹੂਲਤ ਦਾ ਘਾਣ ਕਰ ਰਹੇ ਹਨ। ਸੁਰਿੰਦਰ ਕੌਰ ਨਾਮਕ ਬਜ਼ੁਰਗ ਅੌਰਤ ਨੇ ਕਿਹਾ ਕਿ ਵੱਡੇ ਵੱਡੇ ਬੰਦੇ ਬਿਜਲੀ ਦੇ ਬਿੱਲ ਨਹੀਂ ਭਰਦੇ ਅਤੇ ਅਕਾਲੀ ਸਰਕਾਰ ਨੇ ਲੋਕਾਂ ਨੂੰ ਬਿਜਲੀ ਮੁਫ਼ਤ, ਪਾਣੀ ਮੁਫ਼ਤ, ਆਹ ਮੁਫ਼ਤ, ਓਹ ਮੁਫ਼ਤ ਦਾ ਸੁਭਾਅ ਪਾ ਕੇ ਸਾਰਾ ਪੰਗਾ ਪਾਇਆ ਹੈ। ਹੁਣ ਲੋਕ ਭੁਗਤਣਗੇ ਜਦੋਂ ਇਕੱਠਾ ਬਿੱਲ ਭਰਨਾ ਪਿਆ। ਸਰਕਾਰ ਲੋਕਾਂ ਵੱਲੋਂ ਪੀਤੇ ਪਾਣੀ ਦਾ ਬਿੱਲ ਕਦੋਂ ਤੱਕ ਭਰੂ।

ਵਾਟਰ ਵਰਕਸ ਨੂੰ ਜਾਂਦੀ ਪਾਈਪ ਦੀ ਹੋਦੀ ਵਿਚੋਂ ਪਾਣੀ ਭਰਦੇ ਨੌਜਵਾਨਾਂ ਨੇ ਐਵੇਂ ਮੁਫ਼ਤ ਮੁਫ਼ਤ ਵਾਲਾ ਪੰਗਾ ਪਾ ਰੱਖਿਐ ਸਵੇਰ ਤੋਂ ਸਾਇਕਲ ’ਤੇ ਪਾਣੀ ਢੋਹ-ਢੋਹ ਕੇ ਕਮਲੇ ਹੋ ਗਏ। ਕਾਮਰੇਡ ਸੁਖਪਾਲ ਸਿੰਘ ਲੰਬੀ ਨੇ ਕਿਹਾ ਕਿ ਮੁਫ਼ਤਖ਼ੋਰੀ ਦਾ ਆਦਤ ਪਹਿਲਾਂ ਪਹਿਲਾਂ ਚੰਗੀ ਲੱਗਦੀ ਸੀ ਪਰ ਹੁਣ ਇਹ ਭੱਠਾ ਬਿਠਾਉਣ ਲੱਗੀ ਹੈ। ਲੋਕ ਸਰਕਾਰਾਂ ਦੀ ਮਿੱਠੀਆਂ ਗੋਲੀਆਂ ਦੇ ਅੜਿੱਕੇ ਚੜ੍ਹ ਕੇ ਬੁਨਿਆਦੀ ਸਹੁੂਲਤਾਂ ਦਾ ਘਾਣ ਕਰ ਰਹੇ ਹਨ। ਲੰਬੀ ਅਤੇ ਮੰਡੀ ਕਿੱਲਿਆਂਵਾਲੀ ਸਬਡਿਵੀਵਨ ਦੇ ਐਸ.ਡੀ.ਓ. ਸੁਰਿੰਦਰ ਕੁਮਾਰ ਨੇ ਕਿਹਾ ਕਿ ਬਿਜਲੀ ਬਿੱਲਾਂ ਦੀ ਕਿਸ਼ਤਾਂ ਵਗੈਰਾ ਭਰ ਕੇ ਜਨਤਾ ਨੂੰ ਪਾਣੀ ਸੰਕਤ ਤੋਂ ਬਚਾਉਣ ਲਈ ਵਾਟਰ ਵਰਕਸਾਂ ਦੇ ਕੁਨੈਕਸ਼ਨ ਚਾਲੂ ਕਰਵਾਏ ਜਾਣਗੇ। ਉਨ੍ਹਾਂ ਕਿਹਾ ਕਿ ਪਾਣੀ ਬਿੱਲ ਉਗਰਾਹੀ ਦੀ ਮੁਹਿੰਮ ਵਿੱਢ ਕੇ ਜਲ ਸਪਲਾਈ ਸਕੀਮ ਨੂੰ ਆਰਥਿਕ ਪੱਖੋਂ ਮੁੜ ਲੀਹ ’ਤੇ ਲਿਆਂਦਾ ਜਾਵੇਗਾ। ਜਿਸ ਵਿੱਚ ਜਨਤਾ ਦੇ ਸਹਿਯੋਗ ਦੀ ਜ਼ਰੂਰਤ ਹੋਵੇਗੀ। 

90 ਫ਼ੀਸਦੀ ਉਗਰਾਹੀ ਨਾਲ ਖਿਉਵਾਲੀ ਅੱਵਲ

ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਖਾਤੇ ਖਿਉਵਾਲੀ ਇਕਲੌਤਾ ਅੱਵਲ ਪਿੰਡ ਹੈ। ਜਿੱਥੋਂ ਦੇ 90 ਫ਼ੀਸਦੀ ਕੁਨੈਕਸ਼ਨ ਧਾਰ ਬਿੱਲ ਭਰਨ ਨੂੰ ਤਰਜੀਹ ਦਿੰਦੇ ਹਨ। ਦੂਜੇ ਹਲਕੇ ਦੇ ਹੋਰਨਾਂ ਪਿੰਡਾਂ ’ਚ 80-90 ਫ਼ੀਸਦੀ ਡਿਫ਼ਾਲਟਰ ਅਤੇ ਨਜਾਇਜ਼ ਕੁਨੇੈਕਸ਼ਨ ਹਨ।

ਡੱਬਵਾਲੀ ਦਾ ਸਰਕਾਰੀ ਕਾਲਜ ਬਣਿਆ ਰਾਸ਼ਟਰੀ ਸਵੈਸੇਵਕ ਸੰਘ ਗਤੀਵਿਧੀਆਂ ਦਾ ਕੇਂਦਰ

- ਵਿਵੇਕਾਨੰਦ ਵਿਚਾਰ ਮੰਚ ਜਰੀਏ ਵਿਦਿਆਰਥੀਆਂ ਦਾ ਹੋ ਰਿਹਾ ਭਗਵਾਕਰਨ

- ਵਿਚਾਰ ਮੰਚ ਦੇ ਮੈਂਬਰਾਂ ਨੂੰ ਸਰਕਾਰੀ ਖਰਚੇ ’ਤੇ ਜੈਪੂਰ ਟੂਰ, ਬਾਕੀਆਂ ਨੂੰ ਦੁਤਕਾਰ

- ਪਿੰ੍ਰੰਸੀਪਲ ਦੀ ਕਾਰਜਪ੍ਰਣਾਲੀ ਵਿਵਾਦਾਂ ’ਚ : ਲੈਚਕਰਾਰਾਂ/ ਵਿਦਿਆਰਥੀਆਂ ਨੇ ਲਗਾਏ ਗੰਭੀਰ ਦੋਸ਼

- ਡੱਬਵਾਲੀ ਦੀ ਐਸ.ਡੀ.ਐਮ. ਕੋਲ ਪੜਤਾਲ

ਇਕਬਾਲ ਸਿੰਘ ਸ਼ਾਂਤ

ਡੱਬਵਾਲੀ-ਡਾ. ਬੀ.ਆਰ ਅੰਬਦੇਕਰ ਸਰਕਾਰੀ ਕਾਲਜ (ਪਿੰਡ ਡੱਬਵਾਲੀ) ਦੇ ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਕਾਲਜ ਨੂੰ ਰਾਸ਼ਟਰੀ ਸਵੈਸੇਵਕ ਸੰਘ (ਆਰ.ਐਸ.ਐਸ) ਦੀਆਂ ਗਤੀਵਿਧੀਆਂ ਦਾ ਕੇਂਦਰ ਬਣਾਉਣ ਲਈ ਵਿਵਾਦਾਂ ਵਿੱਚ ਘਿਰ ਗਏ ਹਨ। ਕਾਰਜਕਾਰੀ ਪ੍ਰਿੰਸੀਪਲ ਵੱਲੋਂ ਗਠਿਤ ਵਿਵੇਕਾਨੰਦ ਵਿਚਾਰ ਮੰਚ ਸਦਕਾ ਵਿਦਿਆਰਥੀਆਂ ਨੂੰ ‘ਹਿੰਦੂ’ ਅਤੇ ‘ਗੈਰ-ਹਿੰਦੂ’ ਵਿੱਚ ਵੰਡੇ ਗਏ ਹਨ। ਵਿਵੇਕਾਨੰਦ ਵਿਚਾਰ ਮੰਚ ਦਾ ਮੈਂਬਰ ਬਣਨ ਨੂੰ ‘ਚੰਗੇ ਵਿਦਿਆਰਥੀ’ ਦਾ ਰੁਤਬਾ ਮਿਲਦਾ ਹੈ ਅਤੇ ਮੰਚ ਤੋਂ ਦੂਰੀ

ਰੱਖਣ ਵਾਲੇ ਵਿਦਿਆਰਥੀਆਂ-ਵਿਦਿਆਰਥਣਾਂ ਨੂੰ ਕਾਰਜ: ਪ੍ਰਿੰਸੀਪਲ ਦੀ ਕਥਿਤ ਨਾ-ਸਹਿਨਯੋਗ ਮੰਦੀ ਸ਼ਬਦਾਵਲੀ ਅਤੇ ਹੇਠਲੇ ਦਰਜੇ ਦੇ ਵਿਵਹਾਰ ਦਾ ਸ਼ਿਕਾਰ ਹੋਣਾ ਪੈਂਦਾ ਹੈ। ਰਾਕੇਸ਼ ਵਧਵਾ ਦੀ ਕਾਰਜਪ੍ਰਣਾਲੀ ਤੋਂ ਤੰਗ ਸੈਂਕੜੇ ਵਿਦਿਆਰਥੀ ਅੱਜ ਟਰੈਕਟਰ ਟਰਾਲੀਆਂ ’ਤੇ ਭਰ ਕੇ ਐਸ.ਡੀ.ਐਮ. ਡੱਵਬਾਲੀ ਸੰਗੀਤਾ ਤੇਤਰਵਾਲ ਕੋਲ ਪੁੱਜ ਗਏ ਅਤੇ ਲਿਖਤੀ ਸ਼ਿਕਾਇਤ ਸੌਂਪੀ। ਇਸਤੋਂ ਪਹਿਲਾਂ ਕਾਲਜ ’ਚ ਕਾਫ਼ੀ ਹੰਗਾਮਾ ਹੋਇਆ। ਹਾਲਾਂਕਿ ਕਾਲਜ ’ਚ ਵਿਚਾਰ ਮੰਚ ਦੇ ਕੁਝ ਵਿਦਿਆਰਥੀ ਰਾਕੇਸ਼ ਵਧਵਾ ਦੀ ਹਮਾਇਤ ’ਤੇ ਡਟੇ ਵਿਖਾਈ ਦਿੱਤੇ। ਕਾਲਜ ਦੇ ਪੱਕੇ ਲੈਕਚਰਾਰਾਂ ਨੇ ਪਹਿਲਾਂ ਹੀ ਕਾਰਜਕਾਰੀ ਪ੍ਰਿੰਸੀਪਲ ’ਤੇ ਗੰਭੀਰ ਦੋਸ਼ਾਂ ਵਾਲੀ ਸ਼ਿਕਾਇਤ ਸਰਕਾਰ ਨੂੰ ਭੇਜੀ ਹੋਈ ਹੈ। ਜਿਸਦੀ ਪੜਤਾਲ ਐਸ.ਡੀ.ਐਮ ਕੋਲ ਹੈ। ਬੀਤੇ ਦਿਨ੍ਹੀਂ ਲੈਕਚਰਾਰਾਂ ਨੇ ਪੜਤਾਲ ਤਹਿਤ ਆਪਣੇ ਬਿਆਨ ਦਰਜ ਕਰਵਾਏ ਸਨ। ਅੱਜ ਬਾਅਦ ਦੁਪਿਹਰ ਕਾਰਜਕਾਰੀ ਪ੍ਰਿੰਸੀਪਲ ਆਪਣਾ ਪੱਖ ਰੱਖਣ ਲਈ ਐਸ.ਡੀ.ਐਮ ਦਫਤਰ ਪਹੁੰਚੇ। ਅੱਜ ਅਹਿਤਿਆਤ ਵਜੋਂ ਕਾਲਜ ਕੈਂਪਸ ’ਚ ਪੁਲਿਸ ਤਾਇਨਾਤ ਰਹੀ। ਕਾਰਜਕਾਰੀ ਪ੍ਰਿੰਸੀਪਲ ਨੇ ਵਿਦਿਆਰਥੀਆਂ ਨੂੰ ਐਸ.ਡੀ.ਐਮ ਕੋਲ ਜਾਣੋਂ ਰੋਕਣ ਲਈ ਮੁੱਖ ਗੇਟ ਨੂੰ ਜਿੰਦਰਾ ਵੀ ਲਗਵਾ ਦਿੱਤਾ।

ਕਾਲਜ ਕੈਂਪਸ ਦੀ ਇਮਾਰਤ ਦੇ ਮੱਥੇ ਤੋਂ ਆਰ.ਐਸ.ਐਸ ਦੇ ਝਲਕਾਰੇ ਵੱਜਦੇ ਹਨ। ਜਿੱਥੇ ਆਰ.ਐਸ.ਐਸ ਦੇ ਬਾਨੀ ਮਾਧਵ ਸ਼ਿਵਰਾਓ ਗੋਵਲਕਰ ਦੀ ਤਸਵੀਰ ਅਤੇ ਧਰਮ ਲਈ ਜਿਉਣ ਅਤੇ ਸਮਾਜ ਲਈ ਜਿਉਣ.. ਪ੍ਰੇਰਦਾ ਜਿਹਾ ਭਾਵਨਾਤਮਿਕ ਸ਼ਬਦਾਂ ਵਾਲਾ ਵੱਡਾ ਹੋਰਡਿੰਗ ਲਗਾਇਆ ਹੋਇਆ ਹੈ। 

ਜ਼ਿਕਰਯੋਗ ਹੈ ਕਿ ਰਾਕੇਸ਼ ਵਧਵਾ ਦਾ ਪਰਿਵਾਰ ਮੁੱਢ ਤੋਂ ਭਾਜਪਾ ਅਤੇ ਆਰ.ਐਸ.ਐਸ ਨਾਲ ਜੁੜਿਆ ਹੋਇਆ ਹੈ। ਉਹ ਖੁਦ ਆਰ.ਐਸ.ਐਸ ਦੀ ਕਾਲਜ ਵਿਦਿਆਰਥੀ ਸ਼ਾਖਾ ਦੇ ਮੁਖੀ ਹਨ ਅਤੇ ਪਰਿਵਾਰ ਦੇ ਹੋਰ ਮੈਂਬਰ ਵੀ ਆਰ.ਐਸ.ਐਸ ਨਾਲ ਸਿੱਧੇ ਤੌਰ ’ਤੇ ਜੁੜੇ ਹੋਏ ਹਨ। ਉੁਨ੍ਹਾਂ ਦਾ ਛੋਟਾ ਭਰਾ ਵਿਜੈ ਵਧਵਾ ਜ਼ਿਲ੍ਹਾ ਸਿਰਸਾ ਭਾਜਪਾ ਦਾ ਮਹਾਂ ਮੰਤਰੀ ਹੈ।

ਵਿਦਿਆਰਥੀਆਂ ਨੇ ਸ਼ਿਕਾਇਤ ਵਿੱਚ ਦੋਸ਼ ਲਗਾਇਆ ਕਿ ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਦਾ ਰਵੱਈਆ ਵਿਦਿਆਰਥਣਾਂ ਪ੍ਰਤੀ ਬੇਹੱਦ ਮਾੜਾ, ਅਵਿਵਹਾਰਕ ਅਤੇ ਪੱਖਪਾਤੀ ਹੈ। ਪ੍ਰਿੰਸੀਪਲ ਵਿਦਿਆਰਥੀਆਂ ਵਿੱਚ ਵਿਚਾਰਧਾਰਾ ਦੇ ਆਧਾਰ ਵੰਡੀਆ ਪਾ ਦਿੱਤੀਆਂ ਹਨ। ਕਾਲਜ ’ਚ ਵਿਦਿਆਰਥੀਆਂ ਲਈ ਬੁੱਧਵਾਰ ਅਤੇ ਸ਼ਨੀਵਾਰ ਨੂੰ ਬੇਵਜ੍ਹਾ ਡਰੈੱੈਸ ਕੋਡ ਲਾਗੂ ਕੀਤਾ ਹੋਇਆ ਹੈ। ਵਿਦਿਆਰਥੀਆ ਨੇ ਡਰੱੈਸ ਨਾ ਪਾਉਣ ’ਤੇ ਉਨ੍ਹਾਂ ਨੂੰ ਪੇਪਰ ਵਿੱਚੋਂ ਉਠਾ ਦਿੱਤਾ ਜਾਂਦਾ ਹੈ। ਕਾਲਜ ਕੈਂਪਸ ਵਿੱਚ ਮੋਬਾਇਲ ਚਲਾਉਣ ’ਤੇ 5 ਸੌ ਰੁਪਏ ਜੁਰਮਾਨ ਜਾਂ ਆਰ.ਐਸ.ਐਸ. ਸ਼ਾਖਾ ’ਚ ਜਾਣ ਲਈ ਆਖਿਆ ਜਾਂਦਾ ਹੈ। ਵਿਦਿਆਰਥੀਆਂ ਨੇ ਕਿਹਾ ਕਿ ਸਰਕਾਰੀ ਖਰਚ ’ਤੇ ਜੈਪੁਰ ਟੂਰ ’ਤੇ ਲਿਜਾਏ ਗਏ 44 ਵਿਦਿਆਰਥੀਆਂ ਵਿਚੋਂ 40 ਵਿਵੇਕਾਨੰਦ ਵਿਚਾਰ ਮੰਚ ਦੇ ਮੈਂਬਰ ਹਨ। ਉਨ੍ਹਾਂ ਕਿਹਾ ਕਿ ਵਿਚਾਰ ਮੰਚ ਦੇ ਮੈਂਬਰਾਂ ਨੂੰ ਹਰ ਸਹੂਲਤ ਦਿੱਤੀ ਜਾਂਦੀ ਹੈ ਅਤੇ  ਦੂਜਿਆਂ ਨੂੰ ਦੁਤਕਾਰਿਆ ਅਤੇ ਮੰਦੀ ਭਾਸ਼ਾ ਤੱਕ ਬੋਲੀ ਜਾਂਦੀ ਹੈ। ਵਿਦਿਆਰਥੀਆਂ ਨੇ ਕਿਹਾ ਕਿ ਉਕਤ ਪ੍ਰਿੰਸੀਪਲ ਵਿਚਾਰ ਮੰਚ ਦਾ ਮੈਂਬਰ ਨਾ ਬਣਨ ਵਾਲੀਆਂ ਵਿਦਿਆਰਥਣਾਂ ਨੂੰ ਕਥਿਤ ਤੌਰ ’ਤੇ ਘੋੜੀ ਅਤੇ ਗਧੀ ਤੱਕ ਸੰਬੋਧਨ ਕਰਕੇ ਜਲੀਲ ਕਰਦੇ ਹਨ। ਸ਼ਿਕਾਇਤ ਵਿੱਚ ਆਖਿਆ ਕਿ ਰਾਕੇਸ਼ ਵਧਵਾ ਭੁਗੋਲ ਵਿਸ਼ੇ ਦੇ ਲੈਕਚਰਾਰ ਹਨ। ਉਨ੍ਹਾਂ ਕੋਲ ਪ੍ਰਿੰਸੀਪਲ ਦਾ ਅਡੀਸ਼ਨਲ ਚਾਰਜ ਹੈ। ਉਹ ਭੂਗੋਲ ਵਿਸ਼ੇ ਦੀ ਜਮਾਤ ਵਿੱਚ ਵਿਦਿਆਰਥੀਆਂ ਨੂੰ ਪੜਾਉਣ ਨਹੀਂ ਆਉਂਦੇ ਹਨ। ਜਿਸ ਕਾਰਨ ਉਨ੍ਹਾਂ ਦੀਆਂ ਕਲਾਸਾਂ ਪ੍ਰਭਾਵਿਤ ਹੋ ਰਹੀਆਂ ਹਨ। ਸਿੱਖ ਵਿਦਿਆਰਥੀਆਂ ਨੇ ਕਿਹਾ ਕਿ ਕਾਲਜ ਹਿੰਦੂ ਧਰਮ ਦਾ ਹਰ ਦਿਨ ਤਿਉਹਾਰ ਮਨਾਇਆ ਜਾਂਦਾ ਹੈ ਪਰ ਸਿੱਖ ਧਰਮ ਦੀ ਕਦੇ ਗੱਲ ਵੀ ਨਹੀਂ ਕੀਤੀ ਜਾਂਦੀ ਹੈ। 

ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਦੀਆਂ ਮਨਮਾਨੀਆਂ ਅਤੇ ਤਾਨਾਸ਼ਾਹੀ ਖਿਲਾਫ ਕਾਲਜ ਦੇ ਪੱਕੇ ਲੈਕਚਰਾਰਾਂ ਨੇ ਉੱਚ ਸਿੱਖਿਆ ਵਿਭਾਗ ਦੇ ਨਿਦੇਸ਼ਕ ਕੋਲ ਸ਼ਿਕਾਇਤ ਭੇਜੀ ਹੋਈ ਹੈ। ਜਿਸ ਪ੍ਰਿੰਸੀਪਲ ’ਤੇ ਵਿਦਿਆਰਥੀਆਂ ਦੇ ਸਾਹਮਣੇ ਲੈਕਚਰਾਰਾਂ ਨੂੰ ਜਮਾਤਾਂ ਵਿੱੱਚ ਜਲੀਲ ਕਰਨਾ, ਲੈਕਚਰਾਰਾਂ ਨੂੰ ਧਮਕਾਉਣਾ, ਟੀਚਰ ਸਟਾਫ ਨੂੰ ਆਪਣੇ ਘਰੇਲੂ ਕੰਮ ਲਈ ਇਸਤੇਮਾਲ ਕਰਨਾ, ਪੂਰੇ ਸਟਾਫ ਦੀ ਚੁਗਲੀ ਕਰਨਾ, ਕਾਲਜ ’ਚ ਲਗਾਈ ਗਈ ਸਬਜ਼ੀ ਨੂੰ ਆਪਣੇ ਘਰ ਲੈ ਜਾਣਾ ਜਿਹੇ ਗੰਭੀਰ ਦੋਸ਼ ਲਗਾਏ ਸਨ।

ਅਸੀਂ ਪ੍ਰੈਸ਼ਰ ਨਹੀਂ ਪਾਉਂਦੇ ਪ੍ਰੇਰਿਤ ਕਰਦੇ ਹਾਂ

ਦੂਜੇ ਪਾਸੇ ਕਾਲਜ ਦੇ ਕਾਰਜਕਾਰੀ ਪ੍ਰਿੰਸੀਪਲ ਰਾਕੇਸ਼ ਵਧਵਾ ਨੇ ਸਮੁੱਚੇ ਦੋਸ਼ ਬੇਬੁਨਿਆਦ ਕਰਾਰ ਦਿੰਦਿਆਂ ਉਹ ਖੁਦ ਆਰ.ਐਸ.ਐਸ ਦੀ ਕਾਲਜ ਵਿਦਿਆਰਥੀ ਸ਼ਾਖ਼ਾ ਦੇ ਪ੍ਰਮੁੱਖ ਹਨ। ਵਿਚਾਰ ਮੰਚ ਰਾਹੀਂ ਵਿਦਿਆਰਥੀਆਂ ’ਚ ਦੇਸ਼ ਭਗਤੀ ਦੀ ਭਾਵਨਾ ਪੈਦਾ ਕਰਨਾ ਚਾਹੁੰਦੇ ਹਨ। ਲੈਕਚਰਰ ਵਿਦਿਆਰਥੀਆਂ ਨੂੰ ਭੜਕਾ ਕੇ ਮਾਹੌਲ ਖ਼ਰਾਬ ਕਰ ਰਹੇ ਹਨ। ਵਧਵਾ ਨੇ ਕਿਹਾ ਕਿ ਅਸੀਂ ਆਰ.ਐਸ.ਐਸ ਨਾਲ ਜੁੜਨ ਲਈ ਵਿਦਿਆਰਥੀਆਂ ’ਤੇ ਪ੍ਰੈਸ਼ਰ ਨਹੀਂ ਪਾਉਂਦੇ ਸਿਰਫ਼ ਪ੍ਰੇਰਿਤ ਕਰਦੇ ਹਾਂ। ਉਂਝ ਤੁਸੀਂ ਕਦੇ ਸ਼ਾਖਾ ਵਿੱਚ ਆ ਕੇ ਦੇਖੋ ਕਿੰਨਾ ਵਧੀਆ ਮਾਹੌਲ ਹੁੰਦਾ ਐ ਉੱਥੇ। 

ਮਨਮਰਜ਼ੀ ਦੀ ਵਿਚਾਰਧਾਰਾ ਲਾਗੂ ਕਰਨਾ ਗਲਤ

ਡੱਬਵਾਲੀ ਦੀ ਐਸ.ਡੀ.ਐਮ. ਸੰਗੀਤਾ ਤੇਤਰਵਾਲ ਨੇ ਕਿਹਾ ਕਿ ਕਿਸੇ ਵੀ ਸਰਕਾਰੀ ਅਦਾਰੇ ਵਿੱਚ ਕਿਸੇ ਸੰਗਠਨ ਜਾਂ ਆਪਣੀ ਮਨਮਰਜ਼ੀ ਦੀ ਵਿਚਾਰਧਾਰਾ ਲਾਗੂ ਕਰਨਾ ਗਲਤ ਹੈ। ਪ੍ਰਿੰਸੀਪਲ ਦੇ ਖਿਲਾਫ ਅੱਜ ਵਿਦਿਆਰਥੀਆਂ ਨੇ ਸ਼ਿਕਾਇਤ ਦਿੱਤੀ ਹੈ। ਪ੍ਰਿੰਸੀਪਲ ਦੇ ਬਿਆਨ ਲਏ ਗਏ ਹਨ।

ਬਾਦਲਾਂ ਦਾ ਸਰਕਾਰੀ ਫੰਡ ਨਾਲ ਸੇਵਾ-ਪੁੰਨ: ਲਾਂਗਰੀ ਦੇ ਭਰਾ ਨੂੰ ਦਾਨ ਕੀਤਾ ਸੇਵਾ ਕੇਂਦਰ

* ਸੇਵਾ ਕੇਂਦਰ ਭੇਜਿਆ ਪੰਚਾਇਤ ਘਰ ’ਚ

* ਪੰਚਾਇਤ ਲਈ 15.5 ਲੱਖ ਰੁਪਏ ਨਾਲ ਨਵੇਂ ਹਾਲ ਦੀ ਉਸਾਰੀ 

* ਸਰਕਾਰੀ ਖਜ਼ਾਨੇ ਨੂੰ ਡੇਢ ਗੁਣਾ ਵੱਡੀ ਚਪੇੜ

                                                  ਇਕਬਾਲ ਸਿੰਘ ਸ਼ਾਂਤ

ਲੰਬੀ : ਪੰਜਾਬ ਦੀ ‘ਸੇਵਾ’ ’ਚ ਜੁਟਿਆ ਮੁੱਖ ਮੰਤਰੀ ਬਾਦਲ ਪਰਿਵਾਰ ਸੂਬੇ ਦੇ ਸਰਕਾਰੀ ਖਜ਼ਾਨੇ ਅਤੇ ਜਾਇਦਾਦਾਂ ਨੂੰ ਨਿੱਜੀ ਜਗੀਰ ਸਮਝਦਾ ਹੈ। ਇਸ ਰਾਜਸੀ ਪਰਿਵਾਰ ਨੇ ਆਪਣੀ ਹੈੱਡ ਲਾਂਗਰੀ ‘ਸ਼ੈਫ਼’ ਬੀਬੀ ਸੀਤੋ ਦੇ ਭਰਾ ਭਿੰਦਰ ਖ਼ਾਨ ਨੂੰ ਪਿੰਡ ਬਾਦਲ ’ਚ ਆਪਣੀ ਰਿਹਾਇਸ਼ ਨਾਲ ਸਰਕਾਰੀ ਫੰਡਾਂ ਨਾਲ ਬਣਿਆ ਨਵਾਂ ਨਕੋਰ ‘ਸੇਵਾ ਕੇਂਦਰ’ ਹੀ ਦਾਨ ਕਰ ਦਿੱਤਾ। ਬਾਦਲਾਂ

ਦੀ ਰਹਿਮਤ ਸਦਕਾ ਹੁਣ ਭਿੰਦਰ ਖ਼ਾਨ ਪਰਿਵਾਰ ਸਮੇਤ ‘ਸੇਵਾ ਕੇਂਦਰ ਵਿਲਾ’ ’ਚ ਵਸ ਰਿਹਾ ਹੈ। ਭਿੰਦਰ ਖ਼ਾਨ ਬਾਦਲ ਕਾਲਜ ’ਚ ਬਤੌਰ ਮਾਲੀ ਨੌਕਰੀ ਕਰਦਾ ਹੈ। ਦੱਸਣਯੋਗ ਹੈ ਕਿ ਬਾਦਲ ਪਰਿਵਾਰ ਬੀਬੀ ਸੀਤੋ ਪਰਿਵਾਰ ’ਤੇ ਖੂਬ ਮਿਹਰਬਾਨ ਦੱਸਿਆ ਜਾਂਦਾ ਹੈ। ਦਾਨ ਕੀਤੇ ਸੇਵਾ ਕੇਂਦਰ ਦੀ ਉਸਾਰੀ ’ਤੇ ਕਰੀਬ 9.5 ਲੱਖ ਰੁਪਏ ਖਰਚ ਆਏ ਸੀ। ਸੇਵਾ ਕੇਂਦਰ ਨੂੰ ਪੰਚਾਇਤ ਘਰ ਬਾਦਲ ’ਚ ਤਬਦੀਲ ਕਰ ਦਿੱਤਾ ਗਿਆ। ਹੁਣ ਗਰਾਮ ਪੰਚਾਇਤ ਲਈ ਕਰੀਬ 15.5 ਲੱਖ ਰੁਪਏ ਦੀ ਲਾਗਤ ਨਾਲ ਪੰਚਾਇਤ ਘਰ ਦੀ ਪਹਿਲੀ ਮੰਜਲ ’ਤੇ ਹਾਲ ਦੀ ਉਸਾਰੀ ਕੀਤੀ ਜਾ ਰਹੀ ਹੈ। ਇਸ ਮਾਮਲੇ ’ਚ ਦੋ-ਦੋ ਵਾਰ ਇਮਾਰਤ ਉਸਾਰੀ ’ਚ ਸਰਕਾਰੀ ਖਜ਼ਾਨੇ ਨੂੰ ਡੇਢ ਗੁਣਾ ਵੱਧ ਚਪੇੜ ਵੱਜੀ ਹੈ। ਦੇਸ਼ ਦੇ ਅਮੀਰ-ਤਰੀਨ ਸਿਆਸੀ ਪਰਿਵਾਰ ਨਾਲ ਸਾਂਝੀ ਕੰਧ ਹੋਣ ਕਰਕੇ ‘ਸੇਵਾ ਕੇਂਦਰ’ ਵਾਲੇ ਸਰਕਾਰੀ ਪਸ਼ੂ ਹਸਪਤਾਲ ਦੀ ਮਾਲਕੀ ਵਾਲੇ ਦੋ ਮਰਲੇ ਟੁਕੜੇ ਦੀ ਕੀਮਤ ਲੱਖਾਂ ਵਿੱਚ ਹੈ। ਪ੍ਰਸ਼ਾਸਨਕ ਸੂਤਰਾਂ ਅਨੁਸਾਰ ਸੇਵਾ ਕੇਂਦਰ ਨੂੰ ਸੁਰੱਖਿਆ ਕਾਰਨਾਂ ਕਰਕੇ ਬਾਦਲਾਂ ਦੀ ਰਿਹਾਇਸ਼ ਤੋਂ ਦੂਰ ਭੇਜਿਆ ਗਿਆ। ਸੋਚਣ ਦਾ ਵਿਸ਼ਾ ਹੈ ਕਿ ਪ੍ਰਸ਼ਾਸਨ ਨੂੰ 9.5 ਲੱਖ ਖਰਚ ਕਰਨ ਮਗਰੋਂ ਬਾਦਲਾਂ ਦੀ ਸੁਰੱਖਿਆ ਚੇਤੇ ਆਈ। ਸੇਵਾ ਕੇਂਦਰ ਨੂੰ ਪੰਚਾਇਤ ਘਰ ਵਿੱਚ ਤਬਦੀਲ ਕੀਤੇ ਜਾਣ ਨਾਲ ਪੰਚਾਇਤ ਘਰ ਦੀ ਸੁੰਦਰਤਾ ਵਿਗੜ ਗਈ ਹੈ ਇਸਦੀ ਇੱਕ ਦੁਕਾਨ ’ਚ ਪਹਿਲਾਂ ਗ੍ਰਾਮ ਸੁਵਿਧਾ ਕੇਂਦਰ ਚੱਲ ਰਿਹਾ ਹੈ। ਹੁਣ ਸੇਵਾ ਕੇਂਦਰ ਨੂੰ ਲਿਆਉਣ ਕਰਕੇ ਪਿੰਡ ਵਾਸੀਆਂ ’ਚ ਡੂੰਘਾ ਰੋਸ ਹੈ। ਲੋਕਾਂ ਦਾ ਕਹਿਣਾ ਹੈ ਕਿ ਜੇਕਰ ਪ੍ਰਸ਼ਾਸਨ ਬਾਦਲਾਂ ਦੀ ਸੁਰੱਖਿਆ ਪ੍ਰਤੀ ਇੰਨਾ ਫ਼ਿਕਰਮੰਦ ਹੈ ਤਾਂ ਬਾਦਲਾਂ ਦੀ ਰਿਹਾਇਸ਼ ਮੂਹਰੋਂ ਲੰਘਦੇ ਬਠਿੰਡਾ-ਖਿਉਵਾਲੀ ਨੈਸ਼ਨਲ ਹਾਈਵੇ ਦਾ ਵੀ ਰਾਹ ਬਦਲ ਕੇ ਪਾਸਿਓਂ ਕੱਢ ਦਿਤਾ ਜਾਵੇ। ‘ਸੇਵਾ ਕੇਂਦਰ ਵਿਲਾ’ ’ਚ ਵਸਦੇ ਭਿੰਦਰ

ਖ਼ਾਨ ਦੀ ਪਤਨੀ ਕਿਰਨਾ ਨੇ ਦੱਸਿਆ ਕਿ ‘‘ਇਹ ਮਕਾਨ ਉਸਦੀ ਨਨਾਣ ਬੀਬੀ ਸੀਤੋ ਨੇ ‘ਕਾਕਾ ਜੀ’ ਨੂੰ ਆਖ ਕੇ ਦਿਵਾਇਆ ਹੈ। ਉਸਨੇ ਕਿਹਾ ਕਿ ਘਰ ਦਾ ਫਰਸ਼, ਦਰਵਾਜ਼ਾ ਅਤੇ ਬਿਜਲੀ ਫਿਟਿੰਗ ਦਾ ਕੰਮ ਉਨ੍ਹਾਂ ਖੁਦ ਕਰਵਾਇਆ ਹੈ। ਬਾਅਦ ਵਿੱਚ ਬਾਦਲ ਪਰਿਵਾਰ ਦੀ ਹੈੱਡ ਲਾਂਗਰੀ ਬੀਬੀ ਸੀਤੋ ਨੇ ਇਸ ਪੱਤਰਕਾਰ ਨਾਲ ਰਾਬਤਾ ਕਰਕੇ ਦੱਸਿਆ ਕਿ ਉਸਦੇ ਭਰਾ ਭਿੰਦਰ ਖ਼ਾਨ ਦੀ ਐਕਸੀਡੈਂਟ ’ਚ ਲੱਤ ’ਤੇ ਸੱਟ ਵੱਜੀ ਹੋਈ ਹੈ। ਉਸਨੇ ‘ਕਾਕਾ ਸੁਖਬੀਰ’ ਅਤੇ ‘ਸਾਬ੍ਹ’ (ਪ੍ਰਕਾਸ਼ ਸਿੰਘ ਬਾਦਲ) ਨੂੰ ਆਖ ਕੇ ਰਹਿਣ ਲਈ ਸੇਵਾ ਕੇਂਦਰ ਦਿਵਾਇਆ ਹੈ। ਬੀਬੀ ਸੀਤੋ ਅਨੁਸਾਰ ਉਸਨੂੰ ਇਲਾਜ ਲਈ ਕਰੀਬ 50 ਹਜ਼ਾਰ ਰੁਪਏ ਦੀ ਮੱਦਦ ਦਿਵਾਈ ਅਤੇ ਭਿੰਦਰ ਖ਼ਾਨ ਦੀਆਂ ਬੱਚੀਆਂ ਦੀ ਫੀਸ ਵੀ ਸਾਬ੍ਹ ਭਰਦੇ ਹਨ। 

ਕੋਈ ਅਜਿਹਾ ਨਹੀਂ ਕਰ ਸਕਦਾ : ਡੀ.ਸੀ.

ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸੁਮਿਤ ਜਾਰੰਗਲ ਨੇ ਕਿਹਾ ਕਿ ਸੁਵਿਧਾ ਕੇਂਦਰ ਦੀ ਇਮਾਰਤ ਨੂੰ ਦਾਨ ਦੇਣ ਜਾਂ ਰਹਿਣ ਲਈ ਦੇਣ ਬਾਰੇ ਮਾਮਲਾ ਉਨ੍ਹਾਂ ਦੀ ਜਾਣਕਾਰੀ ਵਿੱਚ ਨਹੀਂ ਹੈ ਪਰ ਫਿਰ ਵੀ ਕੋਈ ਅਜਿਹਾ ਨਹੀਂ ਕਰ ਸਕਦਾ। 

ਹਲਕਾ ਲੰਬੀ : ਦੋ ਮੁੱਖ ਮੰਤਰੀਆਂ ਦਾ ਵਕਾਰ, ਫੈਸਲਾ ਜਰਨੈਲ ਦੀਆਂ ਵੋਟਾਂ ’ਤੇ

*   ਚੋਣ ਮੁਹਾਜ਼ ਲੋਕ ਮੁੱਦਿਆਂ ਨਾਲੋਂ ਵੱਧ ਅਕਾਲੀ ਇੰਚਾਰਜ਼ ਆਗੂਆਂ ਦੀਆਂ ਆਪਹੁਦਰੀਆਂ ’ਤੇ ਕੇਂਦਰਿਤ

*   ਅਮਰਿੰਦਰ ਅਤੇ ਜਰਨੈਲ ਦੀ ਆਮਦ ਨਾਲ ਵੋਟਰਾਂ ਨੂੰ ਵਿਖਣ ਲੱਗਿਆ ਨਵਾਂ ‘ਆਪਸ਼ਨ’

*    ਕੈਪਟਨ ਦੀ ਆਮਦ ਨੇ ਕਾਂਗਰਸੀ ਆਗੂਆਂ ਵਿੱਚ ਭਰਿਆ ਨਵਾਂ ਜੋਸ਼
*    ਦਲਿਤ ਤੇ ਗ਼ਰੀਬ ਵਰਗ ਤੋਂ ‘ਆਪ’ ਨੂੰ ਮਿਲ ਰਿਹਾ ਹੈ ਭਰਵਾਂ ਹੁੰਗਾਰਾ

                                                              ਇਕਬਾਲ ਸਿੰਘ ਸ਼ਾਂਤ

      ਲੰਬੀ : ਰਵਾਇਤੀ ਵਿਰੋਧੀ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਸਾਬਕਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਆਹਮੋ-ਸਾਹਮਣੇ ਚੋਣ ਲੜਨ ਕਰਕੇ ਲੰਬੀ ਹਲਕੇ ਦੀ ਚੋਣ ਬੇਹੱਦ ਦਿਲਚਸਪ ਬਣ ਗਈ ਹੈ। ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਰਨੈਲ ਸਿੰਘ ਦੀ ਮੌਜੂਦਗੀ ਤਿਕੋਣੇ ਮੁਕਾਬਲੇ ਨੂੰ ‘ਤਿੱਖਾ ਤੜਕਾ’ ਲੱਗਾ ਰਹੀ ਹੈ। ਮਾਝਾ ਅਤੇ ਮਾਲਵਾ ਬੈਲਟ ਦੇ ਵੋਟਰਾਂ ’ਤੇ ਆਧਾਰਤ ਲੰਬੀ ਹਲਕੇ ’ਤੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦਾ ਸਿਆਸੀ ਕਬਜ਼ਾ ਪਿਛਲੀਆਂ ਚਾਰ ਵਿਧਾਨਸਭਾ ਚੋਣਾਂ ਤੋਂ

ਲਗਾਤਾਰ ਚੱਲਿਆ ਆ ਰਿਹਾ ਹੈ। ਉਹ ਹਰ ਵਾਰ ਫਸਵੇਂ ਮੁਕਾਬਲੇ ਵਿੱਚ ਆਖ਼ਰ ’ਤੇ ਹਰ ਵਾਰ ਵਧਵੇਂ ਫ਼ਰਕ ਨਾਲ ਜਿੱਤਦੇ ਆਏ ਹਨ। 2002 ਤੋਂ ਉਨ੍ਹਾਂ ਦੇ ਚਚੇਰੇ ਭਰਾ ਮਹੇਸ਼ਇੰਦਰ ਸਿੰਘ ਆਜ਼ਾਦ ਅਤੇ 2007 ਅਤੇ 2012 ’ਚ ਕਾਂਗਰਸ ਵੱਲੋਂ ਲਗਾਤਾਰ ਤਕੜੀ ਟੱਕਰ ਦਿੱਤੀ। 2012 ਵਿੱਚ ਲੰਬੀ ਹਲਕੇ ’ਚ ਤਿੰਨ ਬਾਦਲਾਂ ਪ੍ਰਕਾਸ਼ ਸਿੰਘ ਬਾਦਲ, ਉਨ੍ਹਾਂ ਦੇ ਛੋਟੇ ਭਰਾ ਗੁਰਦਾਸ ਸਿੰਘ ਬਾਦਲ (ਆਜ਼ਾਦ) ਅਤੇ ਮਹੇਸ਼ਇੰਦਰ ਸਿੰਘ ਬਾਦਲ (ਕਾਂਗਰਸ) ਨਾਲ ਗਹਿਗੱਚ ਅਤੇ ਰੌਚਿਕ ਮੁਕਾਬਲ ਹੋਇਆ ਸੀ। ਜਿਸ ਵਿੱਚ ਵੱਡੇ ਬਾਦਲ ਨੇ 24739 ਵੋਟਾਂ ਨਾਲ ਜਿੱਤ ਦਰਜ ਕੀਤੀ ਸੀ। ਮਹੇਸ਼ਇੰਦਰ ਸਿੰਘ ਬਾਦਲ ਨੂੰ 43260 ਵੋਟਾਂ ਮਿਲੀਆਂ ਅਤੇ ਗੁਰਦਾਸ ਬਾਦਲ ਸਿਰਫ਼ 5352 ਵੋਟਾਂ ਨਾਲ ਜਮਾਨਤ ਵੀ ਗੁਆ ਬੈਠੇ ਸਨ। ਪ੍ਰਕਾਸ਼ ਸਿੰਘ ਬਾਦਲ ਨੇ ਆਪਣੀ ਹਰ ਚੋਣ ਵਿੱੱਚ ਜਿੱਤ ਦਾ ਫ਼ਰਕ ਵਧਾਇਆ ਹੈ ਪਰ 2007 ’ਚ ਮਹੇਸ਼ਇੰਦਰ ਸਿੰਘ ਜਿੱਤ-ਹਾਰ ਦਾ ਫ਼ਰਕ ਘਟਾ ਕੇ 9187 ਵੋਟਾਂ ਤੱਕ ਲੈ ਗਏ ਸਨ। 71 ਪਿੰਡਾਂ ਅਤੇ 83 ਗਰਾਮ ਪੰਚਾਇਤਾਂ ’ਤੇ ਆਧਾਰਤ ਹਲਕੇ ’ਚ ਲੰਬੀ ਹਲਕੇ ਵਿੱਚ ਕੁੱਲ੍ਹ 155556 ਵੋਟਰ ਹਨ। ਜਿਨ੍ਹਾਂ ਪੁਰਸ਼  ਵੋਟਰ 81652 ਅਤੇ 73904 ਅੌਰਤ ਵੋਟਰ ਹਨ।

        ਇਸ ਵਾਰ ਲੰਬੀ ਦੀ ਸਿਆਸੀ ਜੰਗ ’ਚ ਨਵਾਂ ਮੁਕਾਬਲਾ ਅਤੇ ਨਵਾਂ ਮਾਹੌਲ ਹੋਣ ਕਰਕੇ ਹਾਲਾਤ ਕਾਫ਼ੀ ਜੁਦਾ ਬਣੇ ਹੋਏ ਹਨ। ਸਿਰਫ਼ ਮੁੱਖ ਮੰਤਰੀ ਚੁਣਨ ਲਈ ਵੋਟ ਪਾਉਣ ਦੇ ਆਦੀ ਲੰਬੀ ਦੇ ਵੀ.ਆਈ.ਪੀ. ਵੋਟਰ ਇਸ ਵਾਰ ਕੈਪਟਨ ਅਮਰਿੰਦਰ ਸਿੰਘ ਅਤੇ ਜਰਨੈਲ ਸਿੰਘ ਨੂੰ ਨਵੇਂ ਵਿਕਲਪ (ਬਦਲ) ਵਜੋਂ ਲੈ ਰਹੇ ਹਨ। ਪ੍ਰਕਾਸ਼ ਸਿੰਘ ਬਾਦਲ ਵੱਲੋਂ ਹਲਕੇ ਅੰਦਰ ਸਿਆਸੀ ਕੰਮਕਾਜ ਸੁਚੱਜਾ ਚਲਾਉਣ ਲਈ ਕਈ-ਕਈ ਪਿੰਡ ’ਤੇ ਆਧਾਰਤ ਇੰਚਾਰਜ਼ ਆਗੂ ਲਗਾਏ ਸਨ। ਹੁਣ ਇਹ ਵਿਉਂਤਬੰਦੀ ਅਕਾਲੀ ਦਲ ਦੀਆਂ ਜੜ੍ਹਾਂ ’ਚ ਬੈਠਣ ਲੱਗੀ ਹੈ। ਹਲਕੇ ਦੀ ਜਨਤਾ ਅਕਾਲੀ ਇੰਚਾਰਜ਼ਾਂ ਤੇ ਜਥੇਦਾਰਾਂ ਦੀਆਂ ਧੱਕੇਸ਼ਾਹੀਆਂ, ਗਰਾਂਟਾਂ/ਸਕੀਮਾਂ ’ਚ ਕਥਿਤ ਘਪਲੇਬਾਜ਼ੀ, ਬਾਂਦਰ-ਵੰਡ ਅਤੇ ਸਿਸਟਮ ’ਤੇ ਅਜਾਰੇਦਾਰੀ ਤੋਂ ਬਹੁਤ ਅੌਖੀ ਹੋ ਚੁੱਕੀ ਹੈ। ਅਕਾਲੀ ਇੰਚਾਰਜਾਂ ਜਰੀਏ ਪੈਦਾ ਧੜੇਬੰਦੀਆਂ ਅਤੇ ਆਪਹੁਦਰੀਆਂ ਖਿਲਾਫ਼ ਲੋਕ ਰੋਹ ਮੁੱਖ ਮੰਤਰੀ ਪ੍ਰਕਾਸ਼ ਸਿੰੰਘ ਦੇ ਚੋਣ ਜਲਸਿਆਂ ਵਿੱਚ ਵੇਖਣ ਨੂੰ ਮਿਲ ਰਿਹਾ ਹੈ। ਬਹੁਤ ਸਾਰੇ ਨਿਰਾਸ਼ ਟਕਸਾਲੀ ਅਕਾਲੀ ਘਰ ਬੈਠ ਗਏ ਜਾਂ ਦੂਜੀਆਂ ਪਾਰਟੀਆ ਦਾ ਪੱਲਾ ਫੜ ਰਹੇ ਹਨ। 

ਹਾਲਾਂਕਿ ਆਮ ਜਨਤਾ ਪ੍ਰਕਾਸ਼ ਸਿੰਘ ਬਾਦਲ ਦੇ ਖਿਲਾਫ਼ ਨਹੀਂ, ਪਰ ਅਕਾਲੀ ਇੰਚਾਰਜ਼ਾਂ ਦੀਆਂ ਮੰਦੀਆਂ ਕਾਰਗੁਜਾਰੀਆਂ ਬਾਰੇ ਉਨ੍ਹਾਂ ਦੀ ਚੁੱਪੀ ਬਾਰੇ ਅਕਾਲੀ ਵੋਟਰਾਂ ਵਿੱਚ ਵੱਡੀ ਨਾਰਾਜਗੀ ਵੇਖਣ ਨੂੰ ਮਿਲ ਰਹੀ ਹੈ। ਹਲਕੇ ਦੀ ਸਰਾਵਾਂ ਜੈਲ (ਮਾਝਾ ਬੈਲਟ) ’ਚ ਅਕਾਲੀ ਦਲ ਦੇ ਜ਼ਿਲ੍ਹਾ ਪ੍ਰਧਾਨ ਜਥੇਦਾਰ ਦਿਆਲ ਸਿੰਘ ਕੋਲਿਆਂਵਾਲੀ, ਕਾਂਗਰਸ ਅਤੇ ਆਪ ਲਈ ਵੱਡਾ ਮੁੱਦਾ ਬਣੇ ਹੋਏ ਹਨ। ਇਸ ਵਾਰ ਲੰਬੀ ਹਲਕੇ ਦੀ ਸਮੁੱਚੀ ਸਿਆਸਤ ਲੋਕ ਮੁੱਦਿਆਂ ਨਾਲੋਂ ਵੱਧ ਅਕਾਲੀ ਇੰਚਾਰਜ਼ ਆਗੂਆਂ ਦੀਆਂ ਆਪਹੁਦਰੀਆਂ ’ਤੇ ਕੇਂਦਰਿਤ ਹੈ। ਜਿਸ ਨਾਲ ਸਿਆਸਤ ਦੇ ਸ਼ਾਹ-ਅਸਵਾਰ ਪ੍ਰਕਾਸ਼ ਸਿੰਘ ਬਾਦਲ ਲਈ ਮੁਸ਼ਕਿਲਾਂ ਕਾਫ਼ੀ ਵਧ ਗਈਆਂ ਹਨ ਅਤੇ ਆਪਣੇ ਰਵਾਇਤੀ ਗੜ੍ਹ ’ਚ ਘਿਰੇ ਜਾਪਦੇ ਹਨ। 

ਹਾਲਾਂਕਿ ਲੰਬੀ ਹਲਕੇ ਨੂੰ ਸੈਂਕੜੇ ਕਰੋੜ ਰੁਪਏ ਖਰਚ ਕੇ ਸੇਮ ਮੁਕਤ ਕਰਨ ਦਾ ਉਪਰਾਲਾ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਦੇ ਸਿਰ ਜਾਂਦਾ ਹੈ। ਅਕਾਲੀ ਸਰਕਾਰ ਹਲਕੇ ਦੀ ਨੁਹਾਰ ਬਦਲਣ ਲਈ ਕਰੀਬ ਸਵਾ ਸੌ ਕਰੋੜ ਰੁਪਏ ਦੀ ਲਾਗਤ ਨਾਲ ਸੀਮਿੰਟਡ ਗਲੀਆਂ-ਨਾਲੀਆਂ ਦੇ ਇਲਾਵਾ ਸੋਲਰ ਸਟਰੀਟ ਲਾਈਟਾਂ, ਬੈਠਣ ਲਈ ਬੈਂਚ, ਲਿੰਕ ਸੜਕਾਂ ਅਤੇ ਪਖਾਨਿਆਂ ਨੂੰ ਬਹੁਪੱਖੀ ਵਿਕਾਸ ਵਜੋਂ ਪ੍ਰਚਾਰ ਰਹੀ ਹੈ। ਉਂਝ ਮਕਾਨ ਮੁਰੰਮਤ ਦੀ ਓਟ ਵਿੱਚ ਨਾਰਾਜ਼ਗੀ ਮੁਕਾਉਣ ਲਈ ਮਕਾਨ ਮੁਰੰਮਤ 15-15 ਹਜ਼ਾਰ ਰੁਪਏ ਦੇ ਚੈੱਕਾਂ ਵਜੋਂ ਵੰਡੇ 45 ਕਰੋੜ ’ਚ ਬਾਂਦਰਵੰਡ ਅਤੇ ਪਖਾਨਿਆਂ ਦੇ ਨਿਰਮਾਣ ’ਚ ਘਪਲੇਬਾਜ਼ੀ ਨੇ ਲੋਕਾਂ ਵਿੱਚ ਸੱਤਾ ਪੱਖ ਦੀ ਜਵਾਬਦੇਹੀ ਖੜ੍ਹੀ ਕਰ ਦਿੱਤੀ ਹੈ। 90 ਸਾਲਾ ਪ੍ਰਕਾਸ਼ ਸਿੰਘ ਬਾਦਲ ਨੇ ਚੋਣ ਪ੍ਰਚਾਰ ’ਚ ਲੰਬੀ ਹਲਕੇ ਦੀ ਗੈਰਤ ਅਤੇ ਅਣਖ਼ ਦੱਸ ਕੇ ‘ਆਪਣੇ’ ਅਤੇ ‘ਵਿਗਾਨੇ’ ਦਾ ਮੁੱਦਾ ਭਖਾਇਆ ਹੋਇਆ ਹੈ। 

         ਸਾਬਕਾ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਵੱਲੋਂ ਲੰਬੀ ਦੇ ਕੁਰੂਕਸ਼ੇਤਰ ਵਿੱਚ ਆਉਣ ਨਾਲ ਬਾਦਲਾਂ ਦੇ ਹਲਕੇ ਵਿੱਚ ਕਾਂਗਰਸੀ ਧੜੇਬੰਦੀ ਦੀ ਸਮੱਸਿਆ ਨੂੰ ਇੱਕ ਵਾਰ ‘ਵਿਰਾਮ’ ਲੱਗ ਗਿਆ ਹੈ। ਮਹੇਸ਼ਇੰਦਰ-ਖੁੱਡੀਆਂ, ਗੁਰਦਾਸ ਬਾਦਲ ਅਤੇ ਅਬੁੱਲਖੁਰਾਣਾ ਧੜਿਆਂ ਦਾ ਸਾਂਝਾ ਪ੍ਰਚਾਰ ਕੈਪਟਨ ਅਮਰਿੰਦਰ ਸਿੰਘ ਲਈ ‘ਰਾਮਬਾਣ’ ਸਾਬਤ ਹੋ ਸਕਦਾ ਹੈ। ਮਹਾਰਾਜੇ ਵੱਲੋਂ ਬਾਦਲ ਨੂੰ ਵੰਗਾਰਨ ਕਰਕੇ ਡੇਢ ਦਹਾਕੇ ਤੋਂ ਰਵਾਇਤੀ ਅਕਾਲੀ ਗੜ੍ਹ ’ਚ ਆਰ-ਪਾਰ ਦੀ ਸਿਆਸੀ ਲੜਾਈ ਲੜਦੇ ਆ ਰਹੇ ਕਾਂਗਰਸੀਆਂ ਅੰਦਰ ਨਵਾਂ ਜੋਸ਼ ਵਿਖਾਈ ਦੇ ਰਿਹਾ ਹੈ। ਕੈਪਟਨ ਦੀ ਆਮਦ ਕਰਕੇ ਮੱਧ ਵਰਗੀ ਜੱਟ ਸਿੱਖ ਭਾਈਚਾਰਾ ਅਤੇ ਅਣਗੌਲੇ ਟਕਸਾਲੀ ਅਕਾਲੀ ਪਰਿਵਾਰ ਅਤੇ ਦਲਿਤ ਭਾਈਚਾਰਾ ਕਾਂਗਰਸ ਨਾਲ ਜੁੜਨ ਲੱਗਿਆ ਹੈ। 

       ਪੰਜਾਬ ’ਚ ਨਵੀਂ ਉੱਭਰ ਕੇ ਆਈ ਤੀਜੀ ਧਿਰ ਆਮ ਆਦਮੀ ਪਾਰਟੀ ਦੇ ਉਮੀਦਵਾਰ ਜਰਨੈਲ ਸਿੰਘ ਨੂੰ ਹਲਕੇ ਵਿੱਚ ਦਲਿਤ ਅਤੇ ਗਰੀਬ ਵਰਗ ਵੱਲੋਂ ਭਰਵਾਂ ਹੁੰਗਾਰਾ ਮਿਲ ਰਿਹਾ ਹੈ। ਹਲਕੇ ਦਾ ਗਰੀਬ ਵਰਗ ਅਕਾਲੀ ਸਰਕਾਰ ਦੀ ਆਟਾ-ਦਾਲ ਸਕੀਮ, ਮੁਫ਼ਤ ਬਿਜਲੀ ਬਿੱਲਾਂ ਅਤੇ ਮਕਾਨ ਮੁਰੰਮਤ ਦੇ ਚੈੱਕਾਂ ਜਿਹੀਆਂ ਸਹੂਲਤਾਂ ਨੂੰ ਦਰਕਿਨਾਰ ਕਰਕੇ ਸਮਾਜਿਕ ਉਠਾਣ ਦੀ ਤਾਂਘ ਵਿੱਚ ‘ਆਪ-ਮੁਹਾਰੇ’ ਆਪ ਨਾਲ ਜੁੜਦਾ ਵਿਖਾਈ ਦੇ ਰਿਹਾ ਹੈ। ਜਰਨੈਲ ਸਿੰਘ ਅਕਾਲੀ ਦਲ ਨੂੰ 60-65 ਫ਼ੀਸਦੀ ਅਤੇ ਕਾਂਗਰਸ ਨੂੰ 15-16 ਫ਼ੀਸਦੀ ਤੱਕ ਨੁਕਸਾਨ ਪਹੁੰਚਾਉਂਦੇ ਵਿਖਾਈ ਦੇ ਰਹੇ ਹਨ। ‘ਆਪ’ ਲੰਬੀ ’ਚ ਸਾਢੇ 14 ਹਜ਼ਾਰ ਪਰਿਵਾਰਾਂ ਦੇ ਆਪਣੇ ਨਾਲ ਪੱਕੇ ਤੌਰ ’ਤੇ ਜੁੜੇ ਹੋਣ ਦਾ ਦਾਅਵਾ ਕਰਦੀ ਹੈ। ਆਪ ਨੂੰ ਵੱੱਧ ਵੋਟਾਂ ਮਿਲਣ ਦੇ ਹਾਲਾਤਾਂ ’ਚ ਕਾਂਗਰਸ ਨੂੰ ਫਾਇਦਾ ਹੋਣ ਦੇ ਆਸਾਰ ਹਨ। ਸੂਹੀਆ ਰਿਪੋਰਟਾਂ ਅਨੁਸਾਰ ਮੌਜੂਦਾ ਸਮੀਰਕਨਾਂ ’ਚ ਵੀ.ਆਈ.ਪੀ ਹਲਕੇ ’ਚ ਕਾਂਗਰਸ ਅਤੇ ਝਾੜੂ ਵਿਚਕਾਰ ਆਹਮੋ-ਸਾਹਮਣੇ ਦਾ ਮੁਕਾਬਲਾ ਵੀ ਹੋ ਸਕਦਾ ਹੈ। ਦੂਜੇ ਪਾਸੇ ਪ੍ਰਕਾਸ਼ ਸਿੰਘ ਬਾਦਲ 20 ਹਜ਼ਾਰ ਵੋਟਾਂ ਦੇ ਫ਼ਰਕ ਨਾਲ ਜਿੱਤ ਦਾ ਦਾਅਵਾ ਕਰ ਰਹੇ ਹਨ। ਸਿਆਸੀ ਜੀਵਨ ’ਚ ਹਮੇਸ਼ਾਂ ਜੇਤੂ ਰਹੇ ਪ੍ਰਕਾਸ਼ ਸਿੰਘ ਬਾਦਲ ਹੁਰਾਂ ਨੂੰ ਉਨ੍ਹਾਂ ਦੇ ਰਵਾਇਤੀ ਹਲਕੇ ਲੰਬੀ ਨੂੰ ਢਾਹੁਣਾ ਕਿਸੇ ‘ਕ੍ਰਿਸ਼ਮੇ’ ਤੋਂ ਘੱਟ ਨਹੀਂ ਹੋਵੇਗਾ। ਜੇਕਰ ਸ੍ਰੀ ਬਾਦਲ ਨੂੰ ਜੀਵਨ ਦੇ ਸਿਖ਼ਰਲੇ ਦੌਰ ’ਚ 11ਵੀਂ ਵਿਧਾਨਸਭਾ ਚੋਣ ’ਚ ਊਚ-ਨੀਚ ਝੱਲਣੀ ਪੈਂਦੀ ਹੈ ਤਾਂ ਉਸਦੇ ਲਈ ਪਿੰਡਾਂ ਦੇ ਅਕਾਲੀ ਇੰਚਾਰਜ਼ ਆਗੂਆਂ ਦੀਆਂ ਮਾੜੀਆਂ ਕਾਰਗੁਜਾਰੀਆਂ ਅਤੇ ਵੱਡੇ ਬਾਦਲ ਦੀ ਸ਼ਹਿ ਭਰੀ ਚੁੱਪੀ ਪੂਰੀ ਤਰ੍ਹਾਂ ਜੁੰਮੇਵਾਰ ਹੋਵੇਗੀ। ਪੰਜਾਬ ਦੀ ਸਿਆਸਤ ਵਿੱਚ ਦੋ ਸਿਆਸੀ ਸ਼ਾਹ ਅਸਵਾਰਾਂ ਦੇ ਸਿਆਸੀ ਭਵਿੱਖ ਦੀ ਨਵੀਂ ਇਬਾਰਤ ਲਿਖਣ ਜਾ ਰਹੇ ਲੰਬੀ ਹਲਕੇ ਦੇ ਚੋਣ ਨਤੀਜਿਆਂ ਵਿੱਚ ਆਪ ਉਮੀਦਵਾਰ ਜਰਨੈਲ ਸਿੰਘ ਦਾ ਅਹਿਮ ਰੋਲ ਹੋਵੇਗਾ। ਇਸ ਵਕਾਰੀ ਹਲਕੇ ਤੋਂ ਅਕਾਲੀ ਦਲ ਅੰਮ੍ਰਿਤਸਰ ਦੇ ਉਮੀਦਵਾਰ ਬਲਜਿੰਦਰ ਸਿੰਘ ਮੋਰਜੰਡ ਸਮੇਤ 6 ਉਮੀਦਵਾਰ ਚੋਣ ਮੈਦਾਨ ਵਿੱਚ ਹਨ। 98148-26100 / 93178-26100 

1.39 ਅਰਬ ਦੇ ਵਾਰਸ ਕੋਲ ਸਿਰਫ਼ 37 ਹਜ਼ਾਰ ਦੀ ਜਾਇਦਾਦ

- ਪਿਊ ਨਾਲੋਂ ਸਾਢੇ ਛੇ ਗੁਣਾ ਤੇ ਪਤਨੀ ਹਰਸਿਮਰਤ ਤੋਂ ਸਾਢੇ ਤਿੰਨ ਗੁਣਾ ਅਮੀਰ ਸੁਖਬੀਰ

- ਪੋਤੇ ਅਨੰਤਵੀਰ ਨਾਲੋਂ ਦਾਦਾ ਬਾਦਲ ਅਮੀਰ, ਜੇਬ ’ਚ ਸਾਢੇ 52 ਹਜ਼ਾਰ ਰੁਪਏ

- ਨੰਨ੍ਹੀ ਛਾਂ ਦੀ ਧੀ ਗੁਰਲੀਨ ਕੌਰ ਕੋਲ ਨਹੀਂ ਚੱਲ-ਅਚੱਲ ਜਾਇਦਾਦ  

                                               ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਪੰਜਾਬ ਦੇ ਰਾਜਭਾਗ ’ਤੇ 10 ਸਾਲਾਂ ਤੋਂ ਕਾਬਜ਼ ਮੁੱਖ ਮੰਤਰੀ ਬਾਦਲ ਪਰਿਵਾਰ ਵਿੱਚ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਸਭ ਤੋਂ ਅਮੀਰ ਹਨ। ਉਨ੍ਹਾਂ ਕੋਲ ਆਪਣੇ ਪਿਤਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨਾਲੋਂ ਸਾਢੇ ਛੇ ਗੁਣਾ ਅਤੇ ਪਤਨੀ ਕੇਂਦਰ ਮੰਤਰੀ ਹਰਸਿਮਰਤ ਕੌਰ ਬਾਦਲ ਨਾਲੋਂ ਸਵਾ ਤਿੰਨ ਗੁਣਾ ਵੱਧ ਚੱਲ-ਅਚੱਲ ਜਾਇਦਾਦ ਹੈ। ਹੈਰਾਨੀ ਭਰਿਆ ਤੱਥ ਹੈ ਕਿ

ਲਗਪਗ 1 ਅਰਬ 39 ਕਰੋੜ ਰੁਪਏ ਦੀ ਜਾਇਦਾਦ ਵਾਲੇ ਦੇਸ਼ ਦੇ ਅਮੀਰ ਰਾਜਸੀ ਪਰਿਵਾਰਾਂ ’ਚ ਸ਼ੁਮਾਰ ਬਾਦਲ ਪਰਿਵਾਰ ਦਾ ਨੌਨਿਹਾਲ ਅਨੰਤਵੀਰ ਸਿੰਘ ਸਿਰਫ਼ 37 ਹਜ਼ਾਰ 372 ਰੁਪਏ ਦੀ ਚੱਲ ਜਾਇਦਾਦ ਦਾ ਮਾਲਕ ਹੈ। ਜਦੋਂਕਿ ਧੀਆਂ ਦੇ ਹੱਕਾਂ ਦੀ ਮੁਦਈ ‘ਨੰਨ੍ਹੀ ਛਾਂ’ ਹਰਸਿਮਰਤ ਕੌਰ ਦੀ ਸਪੁੱਤਰੀ ਗੁਰਲੀਨ ਕੌਰ ਦੇ ਕੋਲ ਚੱਲ-ਅਚੱਲ ਜਾਇਦਾਦ ਵਜੋਂ ਕੁਝ ਨਹੀਂ ਹੈ। 

           ਇਹ ਖੁਲਾਸੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਅਤੇ ਉਨ੍ਹਾਂ ਦੀ ਨੂੰਹ ਹਰਸਿਮਰਤ ਕੌਰ ਬਾਦਲ ਵੱਲੋਂ ਲੰਬੀ ਹਲਕੇ ਤੋਂ ਦਾਖਲ ਕੀਤੇ ਨਾਮਜ਼ਦਗੀ ਕਾਗਜ਼ਾਂ ’ਚ ਜਾਇਦਾਦ ਦੇ ਵੇਰਵਿਆਂ ਤੋਂ ਹੋਏ ਹਨ। ਜਿਨ੍ਹਾਂ ਮੁਤਾਬਕ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ 14 ਕਰੋੜ 67 ਲੱਖ 19 ਹਜ਼ਾਰ 536 ਰੁਪਏ ਦੀ ਚੱਲ-ਅਚਲ ਜਇਦਾਦ ਦੇ ਮਾਲਕ ਹਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਕੋਲ 95 ਕਰੋੜ 84 ਲੱਖ 49 ਹਜ਼ਾਰ 113 ਰੁਪਏ ਦੀ ਚੱਲ-ਅਚੱਲ ਦੀ ਜਾਇਦਾਦ ਹੈ। ਜਿਸ ਵਿਚੋਂ ਉਨ੍ਹਾਂ ਦੀ ਚੱਲ ਜਾਇਦਾਦ 19 ਕਰੋੜ 25 ਲੱਖ 98 ਹਜ਼ਾਰ 875 ਰੁਪਏ ਹੈ। ਜਦੋਂ ਕਿ ਉਨ੍ਹਾਂ ਦੀ ਪਤਨੀ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਦੀ ਚੱਲ-ਅਚੱਲ ਜਾਇਦਾਦ 29 ਕਰੋੜ 68 ਲੱਖ 9 ਹਜ਼ਾਰ 457 ਰੁਪਏ ਦੀ ਹੈ।

       ਹਜ਼ਾਰਾਂ ਕਰੋੜ ਰੁਪਏ ਦੇ ਕਰਜ਼ਾਈ ਸੂਬੇ ਦੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਦੇ ਬਾਦਲ ਸਿਰ ਕੋਈ ਕਰਜ਼ਾ ਨਹੀਂ ਹੈ। ਸਗੋਂ ਉਨ੍ਹਾਂ 3.42 ਲੱਖ ਰੁਪਏ ਕਰਜ਼ਾ ਅਗਾਂਹ ਦਿੱਤਾ ਹੋਇਆ ਹੈ। ਜਦੋਂ ਕਿ ਉਨ੍ਹਾਂ ਦੇ ਐਮ.ਬੀ.ਏ. ਸਪੁੱਤਰ ਸੁਖਬੀਰ ਸਿੰਘ ਬਾਦਲ ਦੇ ਸਿਰ ਲਗਭਗ 39.70 ਕਰੋੜ ਰੁਪਏ ਦਾ ਕਰਜ਼ਾ ਹੈ ਅਤੇ ਹਰਸਿਮਰਤ ਦੇ ਸਿਰ 5 ਲੱਖ ਰੁਪਏ ਦੀ ਬੈਂਕਾਂ ਵਗੈਰਾ ਦੀ ਦੇਣਦਾਰੀ ਹੈ। ਇਸਦੇ ਸੁਖਬੀਰ ਸਿੰਘ ਬਾਦਲ ਦੇ ਸਿਰ 11,35,479 ਦੀ ਸਰਕਾਰੀ ਦੇਣਦਾਰੀਆਂ ਵੀ ਹਨ। 

         ਉਮਰ ਦੇ ਲਿਹਾਜ਼ ਨਾਲ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਆਪਣੇ ਕੋਲ ਨਗਦ ਰਕਮ ਘੱਟ ਰੱਖਣ ਲੱਗੇ ਹਨ। ਮੌਜੂਦਾ ਸਮੇਂ ’ਚ ਸਾਢੇ 52 ਹਜ਼ਾਰ ਰੁਪਏ ਹਨ ਜਦੋਂ ਕਿ ਪੰਜ ਸਾਲ ਪਹਿਲਾਂ ਉਨ੍ਹਾਂ ਕੋਲ ਸਾਢੇ 4 ਲੱਖ ਰੁਪਏ ਨਗਦ ਸਨ। ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਦੇ ਕੋਲ 25 ਹਜ਼ਾਰ ਰੁਪਏ ਅਤੇ ਬਾਦਲ ਪਰਿਵਾਰ ਦੀ ਨੂੰਹ ਹਰਸਿਮਰਤ ਕੌਰ ਦੇ ਬਟੂਏ ’ਚ ਸਿਰਫ਼ 5 ਹਜ਼ਾਰ ਰੁਪਏ ਨਗਦ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਉਹ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੇ ਸੱਦੇ ’ਤੇ ਕੈਸ਼ਲੈਸ ਜੀਵਨ ਨੂੰ ਤਰਜੀਹ ਦੇ ਰਹੇ ਹਨ। ਜਦੋਂ ਕਿ ਬੈਂਕਾਂ ’ਚ ਜਮ੍ਹਾ ਰਕਮ ਪੱਖੋਂ ਉਪ ਮੁੱਖ ਮੰਤਰੀ ਸੁਖਬੀਰ ਸਿੰਘ ਬਾਦਲ ਆਪਣੇ ਪਿਤਾ ਅਤੇ ਪਤਨੀ ਤੋਂ ਕਈ ਗੁਣਾ ਅਮੀਰ ਹਨ। ਸੁਖਬੀਰ ਦੇ ਬੈਂਕ ’ਚ ਲਗਪਗ 65.27 ਲੱਖ ਰੁਪਏ ਜਮ੍ਹਾ ਹਨ। ਪਿਛਲੇ ਵਿਧਾਨਸਭਾ ਚੋਣਾਂ ਸਮੇਂ ਦੇ ਮੁਕਾਬਲੇ ਵੱਡੇ ਬਾਦਲ ਦੇ ਬੈਂਕ ਖਾਤਿਆਂ ਦਾ ਵਜ਼ਨ ਵਧ ਕੇ 34 ਲੱਖ ਰੁਪਏ ਹੋ ਗਿਆ ਹੈ ਜੋ ਪਹਿਲਾਂ ਸਿਰਫ਼ 7.17 ਲੱਖ ਰੁਪਏ ਸੀ। ਹਰਸਿਮਰਤ ਕੌਰ ਦੇ 12.66 ਲੱਖ ਰੁਪਏ ਬੈਂਕ ਖਾਤਿਆਂ ’ਚ ਜਮ੍ਹਾ ਹਨ।

         ਪਿਛਲੇ 10 ਸਾਲਾਂ ’ਚ ਪੰਜਾਬ ਸਰਕਾਰ ਦੇ ਖਾਤਿਓਂ ਹਵਾਈ ਅਤੇ ਸੜਕੀ ਆਵਾਜਾਈ ’ਤੇ ਸੈਂਕੜੇ ਕਰੋੜ ਰੁਪਏ ਦੇ ਝੂਟੇ ਲੈ ਚੁੱਕੇ ਬਾਦਲ ਸਿਰਫ਼ ਖੇਤੀਬਾੜੀ ਦੇ ਕੰਮਕਾਜ਼ ਲਈ ਟੈਫ਼ੇ ਟਰੈਕਟਰ ਅਤੇ ਸੁਖਬੀਰ ਬਾਦਲ ਕੋਲ ਸਾਢੇ 5ਲੱਖ ਰੁਪਏ ਦੀ ਕੀਮਤ ਨਿਊ ਹਾਲੈਂਡ ਅਤੇ ਮੈਸੀ ਟਰੈਕਟਰ ਹੈ। ਜਦੋਂ ਕਿ ਹਰਸਿਮਰਤ ਕੌਰ ਬਾਦਲ ਕੋਲ ਵਹੀਕਲ ਦੇ ਨਾਂਅ ’ਤੇ ਸਵਾਰੀ ਨਹੀਂ ਹੈ।  ਪਾਰਲੀਮੈਂਟ ’ਚ ਅਮੀਰ ਅੌਰਤ ਸੰਸਦ ਮੈਂਬਰ ਵਿੱਚ ਸ਼ੁਮਾਰ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਕੋਲ 6 ਕਰੋੜ 2 ਲੱਖ 40 ਹਜ਼ਾਰ 8 ਸੌ ਰੁਪਏ ਦੇ ਸੋਨੇ-ਚਾਂਦੀ ਅਤੇ ਹੀਰੇ ਜਵਾਹਰਤ ਦੇ ਗਹਿਣੇ ਹਨ। ਜਦੋਂ ਕਿ ਉਨ੍ਹਾਂ ਦੇ ਪਤੀ ਸੁਖਬੀਰ ਸਿੰਘ ਬਾਦਲ ਕੋਲ 9 ਲੱਖ ਰੁਪਏ ਦਾ ਸੋਨਾ-ਚਾਂਦੀ ਹੈ। ਦੂਜੇ ਪਾਸੇ ਹੱਥ ਵਿੱਚ ਨਗ ਵਾਲੀ ਚਾਂਦੀ ਅੰਗੂਠੀ ਪਹਿਨੇ ਰੱਖਣ ਵਾਲੇ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਵੀ ਸੋਨੇ-ਚਾਂਦੀ ਪ੍ਰਤੀ ਮੋਹ ਰੱਖਦੇ ਹਨ ਉਨ੍ਹਾਂ ਕੋਲ 3.42 ਲੱਖ ਰੁਪਏ ਦਾ ਸੋਨਾ ਚਾਂਦੀ ਹੈ।

            ਸੁਖਬੀਰ ਅਤੇ ਹਰਸਿਮਰਤ ਕੋਲ ਕ੍ਰਮਵਾਰ ਲਗਪਗ 14.29 ਲੱਖ ਅਤੇ 12.87 ਲੱਖ ਰੁਪਏ ਸ਼ੇਅਰ ਬਾਂਡਸ ਅਤੇ ਮੂਚੂਅਲ ਫੰਡ ਹਨ। ਜਦੋਂ ਕਿ ਮੁੱਖ ਮੰਤਰੀ ਸ਼ੇਅਰਾਂ ਤੋਂ ਮੂਚੂਅਲ ਫੰਡਾਂ ਦੀ ਖੇਡ ਦੀ ਦੂਰ ਹੀ ਹਨ। ਜਾਇਦਾਦ ਅਸਾਸਿਆਂ ਦੀ ਸੂਚੀ ਅਨੁਸਾਰ ਪੰਜ ਵਾਰ ਮੁੱਖ ਮੰਤਰੀ ਦਾ ਸੁੱਖ ਭੋਗ ਕੇ ਮਿਸਾਲ ਕਾਇਮ ਕਰ ਚੁੱਕੇ ਪ੍ਰਕਾਸ਼ ਸਿੰਘ ਬਾਦਲ ਦੇ ਕੋਲ ਪਿੰਡ ਬਾਦਲ ’ਚ 2 ਕਰੋੜ ਰੁਪਏ ਦੀ 240 ਕਨਾਲ ਵਾਹੀਯੋਗ ਜ਼ਮੀਨ, ਚੱਕ-14 (ਸਾਦੁਲਸ਼ਹਿਰ) 1.891 ਹੈਕਟੇਅਰ ਜ਼ਮੀਨ, ਹਰਿਆਣਾ ਦੇ ਬਾਲਾਸਰ ’ਚ 266 ਕਨਾਲ 16 ਮਰਲੇ ਤੋਂ ਇਲਾਵਾ ਰਾਣੀਆਂ (ਸਿਰਸਾ) ਵਿਖੇ 26 ਕਨਾਲ 17 ਮਰਲੇ ਜ਼ਮੀਨ ਹੈ। ਵਾਹੀਯਸੋਗ ਸਮੁੱਚੀ ਜ਼ਮੀਨ ਦੀ ਕੀਮਤ ਸਾਢੇ 8 ਕਰੋੜ ਰੁਪਏ ਬਣਦੀ ਹੈ। ਇਸਦੇ ਗੈਰਵਾਹੀਯੋਗ ਜਾਇਦਾਦ ਪੱਖੋਂ ਮੁੱਖ ਮੰਤਰੀ ਬਾਦਲ ਕੋਲ ਮੰਡੀ ਕਿੱਲਿਆਂਵਾਲੀ ਵਿਖੇ 32 ਸੌ ਵਰਗ ਫੁੱਟ ਦਾ ਬਿਲਡਿੰਗ ਹੈ ਜਿਸਦੀ ਕੀਮਤ 27.82 ਹਜ਼ਾਰ ਰੁਪਏ ਹੈ। ਇਸਦੇ ਇਲਾਵਾ ਹਰਸਿਮਰਤ ਕੌਰ ਬਾਦਲ ਕੋਲ ਪਿੰਡ ਬਾਲਾਸਰ ’ਚ 5.59 ਲੱਖ ਰੁਪਏ ਦੀ 255 ਕਨਾਲ 12 ਮਰਲਾ

ਵਾਹੀਯੋਗ ਹੈ। ਜਦੋਂ ਉਨ੍ਹਾਂ ਦੇ ਪਤੀ ਸੁਖਬੀਰ ਸਿੰਘ ਬਾਦਲ ਪਿੰਡ ਬਾਦਲ ’ਚ 63 ਕਨਾਲ 5 ਮਰਲੇ ਜ਼ਮੀਨ ਹੈ। ਇਸੇ ਤਰ੍ਹਾਂ ਚੱਕ-14 (ਸਾਦੁਲਸ਼ਹਿਰ) ’ਚ 9.845 ਹੈਕਟੇਅਰ ਜ਼ਮੀਨ ਹੈ। ਜਦੋਂਕਿ ਰਾਣੀਆ ਸਿਰਸਾ ’ਚ 29 ਕਨਾਲ 11 ਮਰਲਾ ਜ਼ਮੀਨ, ਪਿੰਡ ਬਾਦਲ ’ਚ 63 ਕਨਾਲ 9 ਮਰਲੇ ਵਾਹੀਯੋਗ ਜ਼ਮੀਨ ਹੈ। ਜਦੋਂਕਿ ਗੈਰ ਵਾਹੀਯੋਗ ਰਕਬੇ ਜ਼ਿਲ੍ਹਾ ਮੁਕਤਸਰ ਦੇ ਪਿੰਡ ਰੁਪਾਣਾ ’ਚ ਲਗਪਗ20 ਲੱਖ ਰੁਪਏ ਦੀ 9 ਕਨਾਲ 10 ਜ਼ਮੀਨ ਹੈ। ਕਮਰਸ਼ੀਅਲ ਬਿਲਡਿੰਗ ਵਜੋਂ ਪਿੰਡ ਬਾਦਲ ’ਚ 24 ਵਰਗ ਫੁੱਟ ਦੀ ਪੰਜਾਬ ਐਂਡ ਸਿੰੰਧ ਬੈਂਕ ਨੂੰ ਕਿਰਾਏ ਦਿੱਤੀ ਹੋਈ ਇਮਾਰਤ ਹੈ। ਜਿਸਦੇ ਉੱਪਰ ਅਕਾਲੀ ਦਲ ਦਾ ਹਲਕਾ ਦਫ਼ਤਰ ਵੀ ਸਥਿਤ ਹੈ। ਪਿੰਡ ਬਾਦਲ ’ਚ ਇੱਕ ਪਟਰੋਲ ਪੰਪ, ਚੰਡੀਗੜ੍ਹ ਸੈਕਟਰ 9 ’ਚ ਐਸ.ਸੀ.ਓ. 54-55 ’ਚ 20 ਫ਼ੀਸਦੀ ਹਿੱਸਾ ਹੈ। ਲੁਧਿਆਣਾ ’ਚ ਮਿਨਰਵਾ ਕੰਪਲੈਕਸ ’ਚ 300 ਵਰਗ ਫੁੱਟ ਦੀ ਦੁਕਾਨ ਹੈ। ਇਸਦੇ ਇਲਾਵਾ ਕਰੀਬ 2.63 ਕੀਮਤ ਵਾਲਾ ਜਲੰਧਰ ਦੇ 135-185 ਰਣਜੀਤ ਨਗਰ ’ਚ 30 ਮਰਲੇ ਦਾ ਕਰਮਸ਼ੀਅਲ ਪਲਾਟ ਵਗੈਰਾ ਹੈ। ਲੁਧਿਆਣੇ ਦੇ ਸ਼ੇਰਪੁਰ ਕਲਾਂ ’ਚ 422.84 ਸਕੂਐਰ ਵਰਗ ਯਾਰਡ ਹੈ। ਜਿਨ੍ਹਾਂ ਦਾ ਕੁੱਲ ਕੀਮਤ 9.37 ਕਰੋੜ ਰੁਪਏ ਬਣਦੀ ਹੈ। ਰਿਹਾਇਸ਼ੀ ਜਾਇਦਾਦ ਵਜੋਂ ਚੰਡੀਗੜ੍ਹ ਸੈਕਟਰ 9-ਸੀ ’ਚ ਕੋਠੀ ਨੰਬਰ 256 460 ਕਰੋੜ ਰੁਪਏ ਦੀ ਮਾਲਕੀ ਵੀ ਸੁਖਬੀਰ ਕੋਲ ਹੈ।

                                    ਕਾਗਜ਼ਾਂ ’ਚ ਹਰਕੀਰਤ ਦਾ ਜ਼ਿਕਰ ਨਹੀਂ

ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਵੱਲੋਂ ਦਾਖਲ ਨਾਮਜ਼ਦਗੀ ਕਾਗਜ਼ਾਂ ’ਚ ਆਪਣੀ ਧੀ ਹਰਕੀਰਤ ਕੌਰ ਬਾਦਲ ਦਾ ਕਿਧਰੇ ਵੀ ਜ਼ਿਕਰ ਨਹੀਂ ਕੀਤਾ ਗਿਆ। ਜਦੋਂ ਕਿ ਸਪੁੱਤਰ ਅਨੰਤਬੀਰ ਅਤੇ ਧੀ ਗੁਰਲੀਨ ਕੌਰ ਦਾ ਬਕਾਇਦਾ ਜ਼ਿਕਰ ਹੈ। ਇਹ ਗੱਲ ਦਿਨ ਭਰ ਚਰਚਾ ਦਾ ਵਿਸ਼ਾ ਰਹੀ। ਇਸ ਬਾਰੇ ਬੀਬੀ ਬਾਦਲ ਦੇ ਪੀ.ਏ. ਅਨਮੋਲ ਪ੍ਰੀਤ ਸਿੰਘ ਤੋਂ ਜਾਣਨ ਦੀ ਕੋਸ਼ਿਸ਼ ਕੀਤੀ ਪਰ ਉਨ੍ਹਾਂ ਵੀ ਅਗਿਆਨਤਾ ਜਾਹਰ ਕੀਤੀ। ਇੱਕ ਅਕਾਲੀ ਆਗੂ ਨੇ ਆਖਿਆ ਕਿ ਸ਼ਾਇਦ ਵੱਡੀ ਬੇਟੀ ਦਾ ਨਾਂਅ ਬਾਲਗ ਹੋਣ ਕਰਕੇ ਨਾਂਅ ਸ਼ਾਮਲ ਨਹੀਂ ਕੀਤਾ ਹੋਣਾ।  98148-26100 / 93178-26100

ਰਾਜਸਥਾਨ ਨੇ ਪੰਜਾਬੀਆਂ ਦੀਆਂ ਜੜ੍ਹਾਂ ਸੁਕਾਈਆਂ

ਰਾਜਸਥਾਨ ’ਚ ਸਿੱਖ ਆਬਾਦੀ 10 ਲੱਖ; ਸਰਕਾਰੀ ਕਾਲਜਾਂ ’ਚ ਪੰਜਾਬੀ ਲੈਕਚਰਰ ਦੀ ਆਸਾਮੀ ਇੱਕ ਵੀ ਨਹੀਂ

- ਸਰਕਾਰੀ ਸਕੂਲਾਂ ’ਚ ਵੀ ਅਧਿਆਪਕਾਂ ਦੀ ਥੁੜ; ਪੰਜਾਬੀ ਵਿਸ਼ੇ ਦੇ ਵਿਦਿਆਰਥੀ ਸੰਸਕ੍ਰਿਤ ਪੜ੍ਹਨ ਨੂੰ ਮਜ਼ਬੂਰ

- ਪੰਜਾਬੀ ਅਧਿਆਪਕਾਂ ਲਈ ਟੈਸਟ ਨਾ ਹੋਣ ਕਰਕੇ ਪ੍ਰੀਖਿਆਰਥੀਆਂ ਵੱਲੋਂ 26 ਨੂੰ ਹੜਤਾਲ ਦੀ ਚਿਤਾਵਨੀ 

                                                                ਇਕਬਾਲ ਸਿੰਘ ਸ਼ਾਂਤ

ਡੱਬਵਾਲੀ: ਪੰਜਾਬ ਦੇ ਪਾਣੀਆਂ ਸਹਾਰੇ ਆਪਣੀਆਂ ਜੜ੍ਹਾਂ ਨੂੰ ਹਰਾ ਕਰਨ ਵਾਲੇ ਗੁਆਂਢੀ ਸੂਬੇ ਰਾਜਸਥਾਨ ਨੇ ਪੰਜਾਬੀ ਭਾਸ਼ਾ ਦੀਆਂ ਜੜ੍ਹਾਂ ਸੁਕਾ ਰੱਖੀਆਂ ਹਨ। ਰਾਜਸਥਾਨ ਦੇ ਕਿਸੇ ਸਰਕਾਰੀ ਕਾਲਜ ਵਿੱਚ ਪੰਜਾਬੀ ਵਿਸ਼ੇ ਦਾ ਕੋਈ ਲੈਕਚਰਾਰ ਨਹੀਂ ਹੈ। ਹੁਣ ਸਿਰਫ਼ ਇੱਕ ਕਾਲਜ ਵਿੱਚ ਪੰਜਾਬੀ ਲੈਕਚਰਾਰ ਦਾ ਅਸਾਮੀ ਮਨਜੂਰ ਹੋਈ ਹੈ। ਜਦੋਂ ਕਿ ਲਗਪਗ ਸਾਢੇ 6 ਕਰੋੜ ਆਬਾਦੀ

ਵਾਲੇ ਸਮੁੱਚੇ ਰਾਜਸਥਾਨ ’ਚ 10 ਲੱਖ ਸਿੱਖ ਵਸੋਂ ਹੈ। ਜਦੋਂ ਕਿ ਪੰਜਾਬੀਆਂ ਦੀ ਗਿਣਤੀ ਢਾਈ-ਤਿੰਨ ਗੁਣਾ ਹੈ। ਇਹ ਹੈਰਾਨੀਜਨਕ ਖੁਲਾਸਾ ਸੂਚਨਾ ਅਧਿਕਾਰ ਜਾਣਕਾਰੀ ਰਾਹੀਂ ਹੋਇਆ ਹੈ। ਪੰਜਾਬੀ ਭਾਸ਼ਾ ਪ੍ਰਚਾਰ ਸਭਾ ਦੇ ਕਨਵੀਨਰ ਬਲਜਿੰਦਰ ਸਿੰਘ ਮੋਰਜੰਡ ਵੱਲੋਂ ਮੰਗੀ ਸੂਚਨਾ ਦੇ ਜਵਾਬ ਵਿੱਚ ਕਾਲਜ ਸਿੱਖਿਆ ਰਾਜਸਥਾਨ ਦੇ ਸੰਯੁਕਤ ਨਿਦੇਸ਼ਕ (ਐਚ.ਆਰ.ਡੀ) ਨੇ ਦੱਸਿਆ ਕਿ ਮੌਜੂਦਾ ਸਮੇਂ ਵਿੱਚ ਵਿਭਾਗ ਦੇ ਅਧੀਨ ਕਿਸੇ ਕਾਲਜ ਵਿੱਚ ਪੰਜਾਬੀ ਵਿਸ਼ੇ ਦੀ ਅਸਾਮੀ ਮਨਜੂਰ ਨਹੀਂ ਪਰ ਹੁਣ ਇੱਕ ਕਾਲਜ ’ਚ ਅਸਾਮੀ ਮਨਜੂਰ ਹੋਈ ਹੈ। ਜਿਸ ਦੀ ਚੋਣ ਸਬੰਧੀ ਵੀ ਰਾਜਸਥਾਨ ਲੋਕ ਸੇਵਾ ਕਮਿਸ਼ਨ ਨੂੰ ਪੱਤਰ ਭੇਜਿਆ ਜਾਣਾ ਹੈ। ਇੱਕ ਹੋਰ ਸੂਚਨਾ ਤਹਿਤ ਸਿਰਫ਼ ਗੰਗਾਨਗਰ ਜ਼ਿਲ੍ਹੇ ਦੇ ਸਰਕਾਰੀ ਕਾਲਜਾਂ ਵਿੱਚ ਪੰਜਾਬੀ ਵਿਸ਼ੇ ਦੇ 432 ਵਿਦਿਆਰਥੀ ਹਨ। ਕਾਲਜ ਸਿੱਖਿਆ ਦੇ ਸੰਯੁਕਤ ਨਿਦੇਸ਼ਕ (ਪੀ.ਐਂਡ ਸੀ) ਵੱਲੋਂ ਜਾਰੀ ਅੰਕੜੇ ਅਨੁਸਾਰ ਵਿੱਦਿਅਕ ਸ਼ੈਸ਼ਨ 2016-17 ’ਚ ਡਾ. ਭੀਮ ਰਾਓ ਅੰਬੇਦਕਰ ਸਰਕਾਰੀ ਕਾਲਜ ਸ੍ਰੀ ਗੰਗਾਨਗਰ ’ਚ ਪੰਜਾਬੀ ਵਿਸ਼ੇ ਦੇ 257 ਵਿਦਿਆਰਥੀ ਹਨ। ਸਰਕਾਰੀ ਕਾਲਜ ਕਰਣਪੁਰ ’ਚ 95 ਅਤੇ ਸਰਕਾਰੀ ਗਰਲਜ ਕਾਲਜ ਸਾਦੁਲਸ਼ਹਿਰ ’ਚ 80 ਵਿਦਿਆਰਥਣਾਂ ਹਨ। ਜ਼ਮੀਨੀ ਹਕੀਕਤ ਹੈ ਕਿ ਪੰਜਾਬੀ ਵਿਸ਼ੇ ਦਾ ਲੈਕਚਰਾਰ ਨਾ ਹੋਣ ਕਰਕੇ ਪੰਜਾਬੀ ਵਿਸ਼ੇ ਦੇ ਵਿਦਿਆਰਥੀਆਂ ਦੀ ਪੜ੍ਹਾਈ ਰੱਬ ਆਸਰੇ ਹੈ। ਅੰਕੜੇ ਦੱਸਦੇ ਹਨ ਕਿ ਸੂਬੇ ’ਚ ਪੰਜਾਬੀ ਵਿਸ਼ੇ ਲਈ ਕੋਈ ਪ੍ਰੋਫੈਸਰ ਭਰਤੀ ਨਹੀਂ ਕੀਤਾ। ਉਨ੍ਹਾਂ ਕਿਹਾ ਕਿ ਸਮੁੱਚੇ ਰਾਜਸਥਾਨ ਵਿੱਚ ਲਗਭਗ 30 ਕਾਲਜ ਅਜਿਹੇ ਹਨ ਜਿੰਨਾ ਵਿੱਚ ਪੰਜਾਬੀ ਵਿਸ਼ੇ ’ਚ ਬੀ.ਏ ਅਤੇ ਐਮ.ਏ ਦੀ ਪੜ੍ਹਾਈ ਕਰ ਰਹੇ ਰਹੇ ਹਨ। ਰਾਜਸਥਾਨ ਸਰਕਾਰ ਦੇ ਪੰਜਾਬੀ ਪ੍ਰਤੀ ਮਾਰੂ ਰਵੱਈਏ ਖਿਲਾਫ਼ ਰਾਜਸਥਾਨੀ ਸਿੱਖਾਂ ਵਿੱਚ ਭਾਰੀ ਰੋਸ ਪਾਇਆ ਜਾ ਰਿਹਾ ਹੈ। 

ਦੁਖਾਂਤ ਹੈ ਕਿ ਰਾਜਸਥਾਨ ਦੇ ਬੇਆਬਾਦ ਟਿੱਬਿਆਂ ਨੂੰ ਆਪਣੇ ਖੂਨ ਪਸੀਨੇ ਨਾਲ ਖੁਸ਼ਹਾਲ ਬਣਾਉਣ ਵਾਲੇ ਸਿੱਖਾਂ ਦੀ ਭਾਸ਼ਾਈ ਹੋਂਦ ਨੂੰ ਬਰਕਰਾਰ ਰੱਖਣ ਲਈ ਰਾਜਸਥਾਨ ਸਰਕਾਰ ਨੇ ਕਦੇ ਕੋਈ ਉਪਰਾਲਾ ਨਹੀਂ ਕੀਤਾ। ਸੂਬੇ ਦੇ ਲਗਪਗ ਡੇਢ ਦਰਜਨ ਜ਼ਿਲ੍ਹਿਆਂ ਜੈਪੁਰ, ਬੀਕਾਨੇਰ, ਕੋਟਾ, ਭਰਤਪੁਰ, ਚੁਰੂ ਅਤੇ ਬੂੰਦੀ ਸਮੇਤ ਹੋਰਨਾਂ ਜ਼ਿਲ੍ਹਿਆਂ ਵਿੱਚ 40-40, 50-50 ਹਜ਼ਾਰ ਦੇ ਕਰੀਬ ਸਿੱਖ ਵਸਦੇ ਹਨ। ਇਸਦੇ ਇਲਾਵਾ ਪੰਜਾਬ ਦੇ ਨਾਲ ਖਹਿੰਦੇ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਜ਼ਿਲ੍ਹਿਆਂ ਵਿੱਚ ਸਭ ਤੋਂ ਵੱਧ ਸਿੱਖ ਵਸਦੇ ਹੈ। ਰਾਜਸਥਾਨ ’ਚ ਉੱਚ ਸਿੱਖਿਆ ਦੇ ਨਾਲ-ਨਾਲ ਸਕੂਲੀ ਸਿੱਖਿਆ ਵਿੱਚ ਵੀ ਪੰਜਾਬੀ ਭਾਸ਼ਾ ਦੀ ਹਾਲਤ ਕੁਝ ਜ਼ਿਆਦਾ ਵਧੀਆ ਨਹੀਂ ਹੈ। ਰਾਜਸਥਾਨ ’ਚ ਸਿੱਖ ਵਸੋਂ ’ਚ ਮੋਹਰੀ ਮੰਨੇ ਜਾਂਦੇ ਜ਼ਿਲ੍ਹਾ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਦੇ ਕ੍ਰਮਵਾਰ 147 ਅਤੇ 87 ਸਰਕਾਰੀ ਸਕੂਲਾਂ ’ਚ ਪੰਜਾਬੀ ਵਿਸ਼ੇ ਦੇ ਅਧਿਆਪਕਾਂ ਦੀ ਜ਼ਰੂਰਤ ਹੈ। 

               ਨਿਯਮਾਂ ਮੁਤਾਬਕ 20 ਵਿਦਿਆਰਥੀ ਹੋਣ ’ਤੇ ਸਬੰਧਤ ਵਿਸ਼ੇ ਦਾ ਅਧਿਆਪਕ ਹੋਣਾ ਲਾਜਮੀ ਹੈ ਪਰ ਪੰਜਾਬੀ ਵਿਦਿਆਰਥੀਆਂ ਦੀ ਲੋੜੀਂਦੀ ਸਮੱਰਥਾ ਦੇ ਬਾਅਦ ਵੀ ਸੰਸਕ੍ਰਿਤ ਵਿਸ਼ੇ ਦੇ ਅਧਿਆਪਕ ਪੰਜਾਬੀ ਵਿਦਿਆਰਥੀਆਂ ’ਤੇ ਥੋਪੇ ਜਾ ਰਹੇ ਹਨ ਅਤੇ ਸਰਕਾਰ ਵੱਲੋਂ ਸਕੂਲਾਂ ’ਚ ਵਿਦਿਆਰਥੀਆਂ ਦੀ ਗਿਣਤੀ ਮੁਤਾਬਕ ਪੰਜਾਬੀ ਵਿਸ਼ੇ ਦੀਆਂ ਕਿਤਾਬਾਂ ਦੀ ਸਪਲਾਈ ਵੀ ਸਿਰਫ਼ 3-4 ਫ਼ੀਸਦੀ ਹੀ ਭੇਜੀ ਜਾ ਰਹੀ ਹੈ। ਪੰਜਾਬੀ ਭਾਸ਼ਾ ਦੀ ਬਦਕਿਸਮਤੀ ਹੈ ਕਿ ਜੋਧਪੁਰ ਹਾਈਕੋਰਟ ਵੱਲੋਂ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਜ਼ਿਲ੍ਹਿਆਂ ’ਚ ਸਰਕਾਰੀ ਸਕੂਲਾਂ ਵਿੱਚ ਪੰਜਾਬੀ ਅਧਿਆਪਕਾਂ ਦੀ ਨਿਯੁਕਤੀ ਸਬੰਧੀ ਟੈਸਟ ਨਵੇਂ ਸਿਰਿਓਂ ਕਰਵਾਉਣ ਦੇ ਹੁਕਮਾਂ ਦੇ 8-9 ਮਹੀਨੇ ਬਾਅਦ ਅੱਜ ਟੈਸਟ ਨਹੀਂ ਹੋ ਸਕਿਆ। ਪੰਜਾਬੀ ਭਾਸ਼ਾ ਪ੍ਰਚਾਰ ਸਭਾ ਦੇ ਕਨਵੀਨਰ ਪ੍ਰੋ. ਬਲਜਿੰਦਰ ਸਿੰਘ ਮੋਰਜੰਡ ਦਾ ਕਹਿਣਾ ਹੈ ਕਿ ਅਦਾਲਤੀ ਫੈਸਲੇ ਨੂੰ ਜ਼ਿਲ੍ਹਾ ਪ੍ਰੀਸ਼ਦ ਵੱਲੋਂ ਲਾਗੂ ਨਾ ਕਰਨ ਖਿਲਾਫ਼ ਟੈਸਟ ਦੇ ਪ੍ਰੀਖਿਆਰਥੀਆਂ ਨੇ 26 ਦਸੰਬਰ ਤੋਂ ਹੜਤਾਲ ਕਰਨ ਦੀ ਚਿਤਾਵਨੀ ਦਿੱਤੀ ਹੈ। 

              ਦੁਨੀਆਂ ਭਰ ਦੇ ਸਿੱਖਾਂ ਅਤੇ ਪੰਜਾਬੀ ਭਾਸ਼ਾ ਦੇ ਮੁਦਈ ਅਖਵਾਉਂਦੀ ਪੰਜਾਬ ਦੀ ਅਕਾਲੀ-ਭਾਜਪਾ ਸਰਕਾਰ ਵੀ ਪੰਜਾਬੀ ਭਾਸ਼ਾ ਦੀ  ਤਰਜਮਾਨੀ ਲਈ ਦੋਹਰਾ ਵਤੀਰਾ ਰੱਖਦੀ ਹੈ। ਦਿੱਲੀ ’ਚ ਪੰਜਾਬੀ ਭਾਸ਼ਾ ਦੇ ਵਿਕਾਸ ਲਈ ਅਕਾਲੀ ਦਲ ਨੇ ਖੂਬ ਰੌਲਾ ਪਾਇਆ ਪਰ ਰਾਜਸਥਾਨ ’ਚ ਭਾਈਵਾਲ ਭਾਜਪਾ ਦੀ ਸਰਕਾਰ ਹੋਣ ਕਰਕੇ ਪੰਜਾਬੀ ਭਾਸ਼ਾ ਦੀ ਗੁਆਚੀ ਹੋਂਦ ਨੂੰ ਜਾਣ-ਬੁੱਝ ਕੇ ਅੱਖੋਂ-ਪਰੋਖੇ ਕੀਤਾ ਜਾ ਰਿਹਾ ਹੈ। ਪੰਜਾਬੀ ਭਾਸ਼ਾ ਪ੍ਰਚਾਰ ਸਭਾ ਦੇ ਕਨਵੀਨਰ ਪ੍ਰੋ. ਬਲਜਿੰਦਰ ਸਿੰਘ ਮੋਰਜੰਡ ਦਾ ਕਹਿਣਾ ਸੀ ਕਿ ਰਾਜਸਥਾਨ ਵਿੱਚ ਸਕੂਲਾਂ-ਕਾਲਜਾਂ ਵਿੱਚ ਜ਼ਮੀਨੀ ਪੱੱਧਰ ’ਤੇ ਪੰਜਾਬੀ ਭਾਸ਼ਾ ਨੂੰ ਨੇਸਤੋ-ਨਾਬੂਦ ਕਰਨ ਜਿਹੇ ਹਾਲਾਤ  ਭਾਜਪਾ ਸਰਕਾਰ ਦੀ ਸੰਘਵਾਦੀ ਨੀਤੀ ਦਾ ਹਿੱਸਾ ਹਨ।

   
ਰਾਜਸਥਾਨ ਘੱਟ ਗਿਣਤੀ ਕਮਿਸ਼ਨ ਦੇ ਚੇਅਰਮੈਨ ਜਸਬੀਰ ਸਿੰਘ ਨੇ ਕਿਹਾ ਕਿ ਅਦਾਲਤੀ ਫੈਸਲੇ ਮਗਰੋਂ ਗੰਗਾਨਗਰ ਅਤੇ ਹਨੂੰਮਾਨਗੜ੍ਹ ਜ਼ਿਲ੍ਹਿਆਂ ਦੇ ਸਰਕਾਰੀ ਸਕੂਲਾਂ ’ਚ ਪੰਜਾਬੀ ਵਿਸ਼ੇ ਦੇ ਅਧਿਆਪਕਾਂ ਦੀ ਨਿਯੁਕਤੀ ਸਬੰਧੀ ਟੈਸਟ ਛੇਤੀ ਕਰਵਾਉਣ ਲਈ ਚਾਰਾਜੋਈ ਕੀਤੀ ਜਾ ਰਹੀ ਹੈ। ਰਾਜਸਥਾਨ ਦੇ ਸਰਕਾਰੀ ਕਾਲਜਾਂ ’ਚ ਇੱਕ ਵੀ ਪੰਜਾਬੀ ਲੈਕਚਰਰ ਦੀ ਅਸਾਮੀ ਨਾ ਹੋਣ ਬਾਰੇ ਅਗਿਆਨਤਾ ਜਾਹਰ ਕਰਦਿਆਂ ਉਨ੍ਹਾਂ ਕਿਹਾ ਕਿ ਬੜਾ ਗੰਭੀਰ ਮਸਲਾ ਹੈ ਅਤੇ ਇਸਨੂੰ ਸਰਕਾਰ ਦੇ ਧਿਆਨ ’ਚ ਲਿਆ ਕੇ ਅਸਾਮੀਆਂ ਸਥਾਪਿਤ ਕਰਵਾਈਆਂ ਜਾਣਗੀਆਂ। 
 

      ਸ਼ੋ੍ਰਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਅੰਮ੍ਰਿਤਸਰ ਦੇ ਪ੍ਰਧਾਨ ਪ੍ਰੋ. ਕ੍ਰਿਪਾਲ ਸਿੰਘ ਬਡੰੂਗਰ ਨੇ ਕਿਹਾ ਕਿ ਮੈਨੂੰ ਰਾਜਸਥਾਨ ਦੇ ਕਾਲਜਾਂ ’ਚ ਪੰਜਾਬੀ ਵਿਸ਼ੇ ਦੀ ਅਣਹੋਂਦ ਬਾਰੇ ਜਾਣਕਾਰੀ ਨਹੀਂ ਸੀ ਅਤੇ ਉਹ ਕੱਲ੍ਹ ਹੀ ਰਾਜਸਥਾਨ ਦੇ ਮੁੱਖ ਮੰਤਰੀ ਨੂੰ ਪੱਤਰ ਲਿਖ ਕੇ ਕਾਲਜਾਂ ’ਚ ਪੰਜਾਬੀ ਵਿਸ਼ੇ ਦੀਆਂ ਅਸਾਮੀਆਂ ਸਥਾਪਿਤ ਕਰਨ ਦੀ ਮੰਗ ਕਰਨਗੇ। ਪੰਜਾਬੀ ਭਾਸ਼ਾ ਨਾਲ ਵਿਤਕਰੇ ਸਬੰਧੀ ਰਾਜਸਥਾਨ ਦੇ ਉੱਚ ਸਿੱਖਿਆ ਮੰਤਰੀ ਕਿਰਨ ਮਹੇਸ਼ਵਰੀ ਅਤੇ ਸਿੱਖਿਆ ਮੰਤਰੀ ਵਾਸੂਦੇਵ ਦੇਵਨਾਨੀ ਨਾਲ ਸੰਪਰਕ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ। ਕਈ ਵਾਰ ਫੋਨ ਕਰਨ ’ਤੇ ਦੋਵੇਂ ਮੰਤਰੀਆਂ ਨਾਲ ਸੰਪਰਕ ਨਹੀਂ ਬਣ ਸਕਿਆ। ਪੰਜਾਬੀ ਭਾਸ਼ਾ ਦੀ ਗੱਲ ਸੁਣਨ ’ਤੇ ਵਾਸੂਦੇਵ ਦੇਵਨਾਨੀ ਦੇ ਪੀ.ਏ. ਤਾਂ ਮੰਤਰੀ ਬਹੁਤ ਬਿਜ਼ੀ ਹਨ ਆਖ ਕੇ ਫੋਨ ਕੱਟ ਗਏ। 98148-26100 / 93178-26100

ਮੁੱਖ ਮੰਤਰੀ ਬਾਦਲ ਨੇ 77352 ਵੋਟਾਂ ਪੱਕੀਆਂ ਕਰਨ ਨੂੰ ਖੇਡੀ 42 ਕਰੋੜੀ ਖੇਡ

- ਮੁੱਖ ਮੰਤਰੀ ਬਾਦਲ ਨੇ ਆਪਣਾ  ਮਹਿਲ’ ਪੁਖ਼ਤਾ ਰੱਖਣ ਲਈ ਗਰੀਬਾਂ ਦੇ ‘ਕੱਚੇ ਮਕਾਨਾਂ’ ਦਾ ਸਹਾਰਾ ਲਿਆ 

- ਸੇਮ ਦੀ ਓਟ ’ਚ ਅਖ਼ਤਿਆਰੀ ਕੋਟੇ ’ਚੋਂ 25784 ਪਰਿਵਾਰਾਂ ਨੂੰ ਮਕਾਨ ਮੁਰੰਮਤ ਲਈ 15-15 ਹਜ਼ਾਰ ਰੁਪਏ 

- 498 ਪਰਿਵਾਰਾਂ ਨੂੰ ਨਵੇਂ ਮਕਾਨ ਬਣਾਉਣ ਲਈ 60-60 ਹਜ਼ਾਰ ਦੀ ਸੌਗਾਤ

                                                               ਇਕਬਾਲ ਸਿੰਘ ਸ਼ਾਂਤ

ਲੰਬੀ-ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਆਪਣੇ ਜੱਦੀ ਹਲਕੇ ਲੰਬੀ ਵਿੱਚ ਹੋਣ ਵਾਲੇ ਤਿਕੋਣੇ ਮੁਕਾਬਲੇ ’ਚ ਆਪਣਾ ਸਿਆਸੀ ਮਹਿਲ ਪੁਖ਼ਤਾ ਰੱਖਣ ਲਈ ਗਰੀਬਾਂ ਦੇ ਕੱਚੇ ਮਕਾਨਾਂ ਦਾ ਸਹਾਰਾ ਲੈ ਰਹੇ ਹਨ। ਮੁੱਖ ਮੰਤਰੀ ਦੇ ਅਖ਼ਤਿਆਰੀ ਕੋਟੇ ਦੀਆਂ ਛੋਟੀਆਂ ਬੱਚਤਾਂ ਵਾਲੇ ਫੰਡ ਵਿਚੋਂ ਸੇਮ ਪ੍ਰਭਾਵਿਤ ਖੇਤਰ ਦੀ ਓਟ ਵਿੱਚ ਕੱਚੇ ਮਕਾਨਾਂ ਦੀ ਮੁਰੰਮਤ ਅਤੇ ਨਵੇਂ ਮਕਾਨਾਂ ਲਈ

ਲਗਪਗ 42 ਕਰੋੜ ਰੁਪਏ ਦੀ ਰਕਮ ਵੰਡੀ ਗਈ ਹੈ। ਜਿਸ ਵਿੱਚ 25784 ਪਰਿਵਾਰਾਂ ਨੂੰ ਪ੍ਰਤੀ ਮਕਾਨ ਮੁਰੰਮਤ ਲਈ 15 ਹਜ਼ਾਰ ਰੁਪਏ ਦੀ ਰਕਮ ਦਿੱਤੀ ਗਈ ਹੈ। ਜਦੋਂ ਕਿ ਲਗਪਗ 498 ਪਰਿਵਾਰਾਂ ਨੂੰ ਨਵੇਂ ਮਕਾਨ ਬਣਾਉਣ ਖਾਤਰ 60 ਹਜ਼ਾਰ ਰੁਪਏ ਦੇ ਚੈੱਕ ਜਾਰੀ ਕੀਤੇ ਗਏ। ਅੰਨ੍ਹੇ ਦੀਆਂ ਰਿਊੜੀਆਂ ਵਾਂਗ ਬੇਜ਼ਮੀਨੇ ਅਤੇ ਬੇਘਰੇ ਲੋਕਾਂ ਨੂੰ ਵਿੱਤੀ ਮੱਦਦ ਦੇ ਨਾਂਅ ਉੱਪਰ ਸਰਕਾਰੀ ਫੰਡ ਵੰਡਣ ਦਾ ਸਿਲਸਿਲਾ ਵੱਡੇ ਪੱਧਰ ’ਤੇ ਜਾਰੀ ਹੈ। ਜਿਸਦੇ ਚੋਣ ਜ਼ਾਬਤਾ ਲੱਗਣ ਤੱਕ ਜਾਰੀ ਰਹਿਣ ਤੱਕ ਉਮੀਦ ਹੈ। ਸਰਕਾਰੀ ਅਮਲਾ ਦਿਨ-ਰਾਤ ਗਰਾਂਟ ਦੇ ਚੈੱਕ ਬਣਾਉਣ ਤੇ ਸੂਚੀਆਂ ਦੇ ਵਿਸਥਾਰ ਵਿੱਚ ਰੁੱਝਿਆ ਹੋਇਆ ਹੈ।

          ਮੁੱਖ ਮੰਤਰੀ ਦੇ ਸਿਆਸੀ ਵਿਰੋਧੀ ਮਕਾਨਾਂ ਦੀ ਮੁਰੰਮਤ ਵਜੋਂ ਖਰਚੇ 42 ਕਰੋੜ ਰੁਪਏ ਨੂੰ ਸਰਕਾਰੀ ਫੰਡਾਂ ਨਾਲ ਵੋਟਾਂ ਦੀ ਕਥਿਤ ਅਗਾਊਂ ਖਰੀਦ ਦੱਸ ਰਹੇ ਹਨ। ਜਦੋਂ ਕਿ ਸੱਤਾ ਪੱਖ ਅਕਾਲੀ ਦਲ ਇਸਨੂੰ ਮਾੜੀ ਹਾਲਤ ਮਕਾਨ ’ਚ ਵੇਲਾ ਲੰਘਾ ਰਹੇ ਲੋਕਾਂ ਦੀ ਇਖ਼ਲਾਕੀ ਮੱਦਦ ਦੱਸ ਰਿਹਾ ਹੈ। ਜੇਕਰ ਵਿਰੋਧੀਆਂ ਦੀ ਮੰਨੀਏ ਤਾਂ ਅਕਾਲੀ ਦਲ ਨੇ ਹਲਕੇ ’ਚ ਲੋਕਮਨਾਂ ਦੇ ਵਿਰੋਧ ਨੂੰ ਮੱਠਾ ਪਾਉਣ ਲਈ ਸੱਤਾ ਪੱਖ ਘਰ-ਘਰ ਇਸ ਸਕੀਮ ਰਾਹੀਂ ਅਕਾਲੀ ਦਲ ਨੇ ਕਰੀਬ 77352 ਵੋਟਾਂ ਨੂੰ ਸਰਕਾਰੀ ਫੰਡ ਨਾਲ ਆਪਣੇ ਕਬਜ਼ੇ ਵਿੱਚ ਕਰਨ ਦੀ ਕੋਸ਼ਿਸ਼ ਕੀਤੀ ਹੈ। 

           ਇਸ ਸਕੀਮ ਨੂੰ ਮੁਰੰਮਤ ਅਤੇ ਨਵੇਂ ਮਕਾਨਾਂ ਦੇ ਲਾਭਪਾਤਰੀਆਂ ਦੀ ਸੂਚੀ ਨੋਡਲ ਅਫਸਰਾਂ ਤੋਂ ਪੜਤਾਲ ਉਪਰੰਤ ਬਣਾਉਣ ਦਾ ਦਾਅਵਾ ਕੀਤਾ ਗਿਆ ਹੈ। ਇਸਦੇ ਬਾਵਜੂਦ ਇੱਕ ਮਕਾਨ ਵਿੱਚ ਰਹਿੰਦੇ ਤਿੰਨ-ਤਿੰਨ ਪਰਿਵਾਰਾਂ ਨੂੰ ਵੀ ਮਕਾਨ ਮੁਰੰਮਤ ਲਈ 15-15 ਹਜ਼ਾਰ ਰੁਪਏ ਦੇ 3-3 ਚੈੱਕ ਵੰਡ ਦਿੱਤੇ ਗਏ। ਕਣਸੋਆਂ ਹਨ ਕਿ ਬੇਘਰਿਆਂ ਲਈ ਸਕੀਮ ’ਚ ਕਈ ਵੱਡੇ ਘਰ ਵਾਲੇ ਵੀ ਹੱਥ ਧੋ ਗਏ ਹਨ। ਬਹੁਤ ਸਾਰੇ ਹਕੀਕੀ ਲੋੜਵੰਦ ਇਸ ਮੱਦਦ ਤੋਂ ਵਾਂਝੇ ਫ਼ਿਰਦੇ ਹਨ। ਜਿਸ ਕਾਰਨ ਬਹੁਤੇ ਲੋਕਾਂ ਵਿੱਚ ਰੋਸ ਵੀ ਪਨਪ ਰਿਹਾ ਹੈ। ਪਤਾ ਲੱਗਿਆ ਹੈ ਕਿ ਵੋਟਾਂ ਤੱਕ ਦੀ ਸਾਂਝ ਸਬੰਧੀ ਪੱਕੀ ਗੱਲਬਾਤ ਹੋਣ ਮਗਰੋਂ ਹੀ ਸੂਚੀ ਵਿੱਚ ਨਾਂਅ ਪਾਏ ਜਾਂਦੇ ਹਨ। 

            ਮਕਾਨ ਮੁਰੰਮਤ ਦੀ ਸੂਚੀ ਵਿੱਚ ਸਭ ਤੋਂ ਵੱਧ 850 ਲਾਭਪਾਤਰੀ ਪਿੰਡ ਮਹਿਣਾ, ਮੰਡੀ ਕਿੱਲਿਆਂਵਾਲੀ ’ਚ 785, ਪਿੰਡ ਕਿੱਲਿਆਂਵਾਲੀ ’ਚ 722, ਭੀਟੀਵਾਲਾ ’ਚ 617, ਵੜਿੰਗਖੇੜਾ ’ਚ 527, ਸਿੱਖਵਾਲਾ 430, ਮਿੱਡੂਖੇੜਾ ’ਚ 448, ਪਿੰਡ ਲੰਬੀ ’ਚ 536, ਤਰਮਾਲਾ ’ਚ 431, ਚੰਨੂ ’ਚ 338, ਡੱਬਵਾਲੀ ਮਲਕੋ ਕੀ ’ਚ 454, ਵਣਵਾਲਾ ਅੰਨੂ ’ਚ 498, ਪਿੰਡ ਬਾਦਲ ’ਚ 113 ਅਤੇ ਸੰਸਦ ਆਦਰਸ਼ ਗਰਾਮ ਮਾਨ ’ਚ 300, ਭੁੱਲਰਵਾਲਾ ’ਚ 568, ਕੱਖਾਂਵਾਲੀ ’ਚ 203, ਢਾਣੀ ਤੇਲਿਆਂਵਾਲੀ ’ਚ 109, ਮਿਠੜੀ ਬੁੱਧਗਿਰ ’ਚ 202, ਮਾਹੂਆਣਾ ’ਚ 294,  ਸਿੰਘੇਵਾਲਾ ’ਚ 554, ਫਤੂਹੀਵਾਲਾ ’ਚ 398, ਫੁੱਲੂਖੇੜਾ ’ਚ 339, ਫੱਤਾਕੇਰਾ ’ਚ 232, ਖੁੱਡੀਆਂ ਗੁਲਾਬ ਸਿੰਘ ’ਚ 368, ਖੁੱਡੀਆਂ ਮਹਾਂ ਸਿੰਘ ’ਚ 279, ਪੰਜਾਵਾ ’ਚ 357, ਰਸੂਲਪੁਰ ਕੇਰਾ ’ਚ 375 ਅਤੇ ਆਧਨੀਆਂ ’ਚ 279, ਮਾਹਣੀਖੇੜਾ ’ਚ 150, ਰੋੜਾਂਵਾਲੀ ’ਚ 275, ਕੰਦੂਖੇੜਾ ’ਚ 247, ਭਾਈ ਕਾ ਕੇਰਾ ’ਚ 670, ਅਰਨੀਵਾਲਾ ਵਜੀਰਾ ’ਚ 131, ਘੁਮਿਆਰਾ ’ਚ 75, ਢਾਣੀ ਸਿੰਘੇਵਾਲਾ ’ਚ 39, ਧੌਲਾ ’ਚ 50 ਪਰਿਵਾਰ ਸ਼ਾਮਲ ਹਨ। ਸੂਚੀ ਅਨੁਸਾਰ ਸੇਮ ਪ੍ਰਭਾਵਿਤ ਪਿੰਡ ਫਤਿਹਪੁਰ ਮਨੀਆਂ ’ਚ ਕਿਸੇ ਵੀ ਗਰੀਬ ਦੇ ਮਕਾਨ ਨੂੰ ਮੁਰੰਮਤ ਦੀ ਲੋੜ ਨਹੀਂ ਅਤੇ ਨਾ ਹੀ ਕਿਸੇ ਦਾ ਮਕਾਨ ਬਣਾਉਣ ਵਾਲਾ ਹੈ। ਇਸੇ ਤਰ੍ਹਾਂ ਨਵੇਂ ਮਕਾਨਾਂ ਦੀ ਸੂਚੀ ’ਚ ਚੰਨੂ ਪੂਰਬੀ ’ਚ 145 ਨਵੇਂ ਮਕਾਨ ਬਣਾਉਣ ਲਈ 60-60 ਹਜ਼ਾਰ ਰੁਪਏ ਦੀ ਗਰਾਂਟ ਜਾਰੀ ਕੀਤੀ ਗਈ ਹੈ। ਉਥੇ ਮੁੱਖ ਮੰਤਰੀ ਦੇ ਪਿੰਡ ਬਾਦਲ ’ਚ 8 ਨਵੇਂ ਮਕਾਨ, ਖਿਉਵਾਲੀ ’ਚ 19,  ਲੰਬੀ ’ਚ 28, ਭੀਟੀਵਾਲਾ ’ਚ 20 ਪਰਿਵਾਰਾਂ ਨੂੰ ਨਵੇਂ ਮਕਾਨਾਂ ਦੀ ਸੌਗਾਤ ਦਿੱਤੀ ਗਈ ਹੈ। ਹਾਲਾਂਕਿ ਭੁੱਲਰਵਾਲਾ, ਰੋੜਾਂਵਾਲੀ, ਸਹਿਣਾਖੇੜਾ, ਵੜਿੰਗਖੇੜਾ, ਘੁਮਿਆਰਾ, ਮਿੱਡੂਖੇੜਾ, ਕੰਦੂਖੇੜਾ, ਪਿੰਡ ਕਿੱਲਿਆਂਵਾਲੀ, ਮਹਿਣਾ, ਚੰਨੂ, ਮਾਹੂਆਣਾ, ਦਿਉਣਖੇੜਾ, ਚੰਨੂ, ਢਾਣੀ ਤੇਲਿਆਂਵਾਲੀ, ਖੇਮਾਖੇੜਾ, ਦੋਵੇਂ ਖੁੱਡੀਆਂ ਸਮੇਤ ਹਾਕੂਵਾਲਾ, ਫੱਤਾਕੇਰਾ, ਭਾਈਕੇਰਾ, ਪੰਜਾਵਾ, ਰਸੂਲਪੁਰ ਕੇਰਾ ’ਚ ਕਿਸੇ ਪਰਿਵਾਰ ਨੂੰ ਨਵਾਂ ਮਕਾਨ ਬਣਾਉਣ ਦੀ ਜ਼ਰੂਰਤ ਨਹੀਂ ਹੈ। 

ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਡਿਪਟੀ ਕਮਿਸ਼ਨਰ ਸੁਮਿਤ ਜਾਰੰਗਲ ਨੇ ਕਿਹਾ ਕਿ ਪ੍ਰਸ਼ਾਸਨ ਨੇ ਬਕਾਇਦਾ ਨਿਰਪੱਖ ਸਰਵੇ ਰਾਹੀਂ ਪੂਰੀ ਪਾਰਦਰਸ਼ਿਤਾ ਨਾਲ ਲੋੜਵੰਦ ਪਰਿਵਾਰਾਂ ਦੀ ਹਾਲਤ ਦੇ ਮੱਦੇਨਜ਼ਰ ਮਕਾਨਾਂ ਦੀ ਮੁਰੰਮਤ ਅਤੇ ਨਵੇਂ ਮਕਾਨ ਦੀ ਸੂਚੀ ਤਿਆਰ ਕੀਤੀ ਹੈ। ਜਿਸ ਵਿੱਚ ਊਣਤਾਈ ਦੀ ਕੋਈ ਗੁੰਜਾਇਸ਼ ਨਹੀਂ। 

ਸੱਤਾ ਪੱਖ ਅਕਾਲੀ ਦਲ ਦੇ ਕੌਮੀ ਜਥੇਬੰਦਕ ਸਕੱਤਰ ਤੇਜਿੰਦਰ ਸਿੰਘ ਮਿੱਡੂਖੇੜਾ ਦਾ ਕਹਿਣਾ ਸੀ ਕਿ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਨੇ ਮਾੜੀ ਹਾਲਤ ਮਕਾਨਾਂ ’ਚ ਵਸਦੇ ਲੋੜਵੰਦ ਪਰਿਵਾਰਾਂ ਨੂੰ ਮਜ਼ਬੂਤ ਛੱਤ ਦੇਣ ਦੇ ਇਰਾਦੇ ਨਾਲ ਮੁਰੰਮਤ ਅਤੇ ਨਵੇਂ ਮਕਾਨ ਲਈ ਫੰਡ ਦੇ ਕੇ ਇਖ਼ਲਾਕੀ ਫਰਜ਼ ਨਿਭਾਇਆ ਹੈ। 

  ਦੂਜੇ ਪਾਸੇ ਜ਼ਿਲ੍ਹਾ ਕਾਂਗਰਸ ਦੇ ਪ੍ਰਧਾਨ ਅਤੇ ਲੰਬੀ ਤੋਂ ਕਾਂਗਰਸ ਦੇ ਸੰਭਾਵੀ ਉਮੀਦਵਾਰ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਚੋਣਾਂ ਤੋਂ ਐਨ ਪਹਿਲਾਂ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਲੋੜਵੰਦ ਪਰਿਵਾਰਾਂ ਦੀ ਮੱਦਦ ਦੇ ਨਾਂਅ ’ਤੇ ਆਪਣੇ ਅਖ਼ਤਿਆਰੀ ਕੋਟੇ ਦੀ ਦੁਰਵਰਤੋਂ ਕਰ ਰਹੇ ਹਨ। ਖੁੱਡੀਆਂ ਨੇ ਕਿਹਾ ਕਿ ਲੰਬੀ ਹਲਕੇ ’ਚ ਸਰਕਾਰ ਦੇ 40-42 ਕਰੋੜ ਖਰਚ ਕੇ ਅਕਾਲੀ ਦਲ ਵੋਟਾਂ ਦੀ ਅਗਾਊਂ ਖਰੀਦ ਕਰ ਰਿਹਾ ਹੈ।   98148-26100 / 93178-26100

   
 

‘ਕਸਾਈਪੁਣੇ’ ਵਾਲੀ ਕਰਤੂਤ ਦਾ ਮਾਲਕ ਸਰਕਾਰੀ ਕਮਿਊਨਿਟੀ ਸਿਹਤ ਕੇਂਦਰ ਲੰਬੀ

* ਪੁਲਸੀਆ ਡਾਂਗਾਂ ਦੇ ਭੁੱਜੇ ਜਖ਼ਮੀ 4 ਸੁਵਿਧਾ ਕਾਮਿਆਂ ਦੇ ਬਿਨ੍ਹਾਂ ਫੀਸ ਐਕਸਰੇ ਅਤੇ ਟੈਸਟਾਂ ਤੋਂ ਕੋਰੀ ਨਾਂਹ

* ਜਖ਼ਮੀਆਂ ਦੇ ਸਿਰਾਂ ਤੇ ਛਾਤੀ ’ਤੇ ਹਨ ਸੱਟਾਂ 

* ਸੁਵਿਧਾ ਕਰਮਚਾਰੀਆਂ ਨੂੰ ਨਹੀਂ ਦਿੱਤੀ ਢੁੱਕਵੀਂ ਸਿਹਤ ਸੇਵਾ

                                                   ਇਕਬਾਲ ਸਿੰਘ ਸ਼ਾਂਤ

      ਲੰਬੀ: ਡਾਕਟਰੀ ਪੇਸ਼ੇ ਦੀਆਂ ਕਦਰਾਂ-ਕੀਮਤਾਂ ਨੂੰ ਦਰਕਿਨਾਰ ਕਰਕੇ  ਲੰਬੀ ਦਾ ਸਰਕਾਰੀ ਕਮਿਊਨਿਟੀ ਸਿਹਤ ਕੇਂਦਰ ‘ਕਸਾਈਪੁਣੇ’ ’ਤੇ ਉੱਤਰ ਆਇਆ ਹੈ। ਕੱਲ੍ਹ ਪੁਲਸੀਆ ਡਾਂਗਾਂ ਦਾ ਭੋਜਣ ਬਣੇ ਸੁਵਿਧਾ ਕਰਮਚਾਰੀਆਂ ਦੇ ਭੁੱਜੇ ਪਿੰਡੇ ’ਤੇ ਮੱਲ੍ਹਮ ਲਾਉਣ ਦੀ ਜਗ੍ਹਾ ਸਿਹਤ ਕੇਂਦਰ ਦੇ ਅਮਲੇ ਨੇ ਬਿਨ੍ਹਾਂ ਸਰਕਾਰੀ ਫੀਸ ਦੇ ਐਕਸਰੇ ਅਤੇ ਟੈਸਟ ਕਰਨ ਤੋਂ ਕੋਰੀ ਨਾਂਹ ਕਰ ਦਿੱਤੀ। ਕੱਲ੍ਹ ਰਾਤ ਤੋਂ ਜ਼ੇਰੇ ਇਲਾਜ 4 ਗੰਭੀਰ ਜਖ਼ਮੀ ਸੁਵਿਧਾ ਕਰਮਚਾਰੀਆਂ ਨੂੰ ਕੋਈ ਢੁੱਕਵੀਂ ਸਿਹਤ ਸੇਵਾ ਨਹੀਂ ਦਿੱਤੀ ਗਈ। ਸੁਵਿਧਾ ਕਾਮਿਆਂ ਦੇ ਬਟੂਏ ਬਾਦਲ ਪਿੰਡ ’ਚ ਲਾਠੀਚਾਰਜ਼ ਦੌਰਾਨ ਭੱਜ-ਦੌੜ ’ਚ ਡਿੱਗ ਪਏ ਸਨ। ਬਲਵਿੰਦਰ ਸਿੰਘ ਮੋਗਾ ਦੇ ਸਿਰ ਅਤੇ ਲੱਤਾਂ ’ਤੇ ਗੰਭੀਰ ਜਖ਼ਮ ਹਨ। ਇਸੇ ਤਰ੍ਹਾਂ ਜਸਪ੍ਰੀਤ ਸਿੰਘ ਮੋਗਾ ਦੀ ਛਾਤੀ, ਬਾਂਹ ਅਤੇ ਪਿੱਠ ’ਤੇ ਕਾਫ਼ੀ ਸੱਟਾਂ ਹਨ। ਸੁਖਮੰਦਰ ਮੋਗਾ ਅਤੇ ਰਾਕੇਸ਼ ਮੁਕਤਸਰ ਦੇ ਵੀ ਸਰੀਰਾਂ ’ਤੇ ਕਾਫ਼ੀ ਸੱਟਾਂ ਲੱਗੀਆਂ ਹੋਈਆਂ ਹਨ। ਜਿਨ੍ਹਾਂ ਦੇ ਇਲਾਜ ਲਈ ਐਕਸਰੇ ਦੀ ਜ਼ਰੂਰਤ ਹੈ। 

ਜਸਪ੍ਰੀਤ ਸਿੰਘ ਮੋਗਾ ਨੇ ਦੱਸਿਆ ਕਿ ਕੱਲ੍ਹ ਲਾਠੀਚਾਰਜ਼ ਮਗਰੋਂ ਉਹ 108 ਐੈਂਬੂਲੈਂਯ ਨੂੰ ਖੁਦ ਬੁਲਾ ਕੇ ਸਿਹਤ ਕੇਂਦਰ ਲੰਬੀ ’ਚ ਇਲਾਜ ਖਾਤਰ ਪੁੱਜੇ ਸਨ। ਰਾਤ ਸਮੇਂ ਜਖ਼ਮੀਆਂ ਨੂੰ ਤਕਲੀਫ਼ ਹੋਣ ’ਤੇ ਡਾਕਟਰਾਂ ਨੇ ਆਖਿਆ ਕਿ ਤੁਸੀਂ ਹਸਪਤਾਲ ’ਚ ਦਾਖਲ ਨਹੀਂ ਹੋ ਇਸ ਲਈ ਉਹ ਕੁਝ ਨਹੀਂ ਕਰ ਸਕਦੇ। ਜਸਪ੍ਰੀਤ ਸਿੰਘ, ਬਲਵਿੰਦਰ ਸਿੰਘ, ਸੁਖਮੰਦਰ ਸਿੰਘ ਮੋਗਾ ਨੇ ਕਿਹਾ ਕਿ ਡਾਕਟਰਾਂ ਨੇ ਕੱਲ੍ਹ ਸਿਰਫ਼ ਇੱਕ-ਇੱਕ ਦਰਦਨਿਵਾਰਕ ਟੀਕਾ ਲਾਉਣ ਉਪਰੰਤ ਉਨ੍ਹਾਂ ਦੇ ਜਖ਼ਮਾਂ ’ਤੇ ਪੱਟੀਆਂ ਵੀ ਨਹੀਂ ਕੀਤੀਆਂ। ਜਸਪ੍ਰੀਤ ਸਿੰਘ ਮੋਗਾ ਨੇ ਕਿਹਾ ਕਿ ਜਦੋਂ ਸਿਰ ’ਤੇ ਵੱਜੀਆਂ ਡਾਂਗਾਂ ਬਾਰੇ ਐਕਸਰੇ ਕਰਨ ਲਈ ਆਖਿਆ ਤਾਂ ਹਸਪਤਾਲ ਦਾ ਅਮਲਾ ਉਨ੍ਹਾਂ ਤੋਂ ਐਕਸਰੇ ਦੀ ਫੀਸ ਮੰਗਣ ਲੱਗ ਪਿਆ। ਉਸਨੇ ਕਿਹਾ ਕਿ ਲਾਠੀਚਾਰਜ਼ ਵਿੱਚ ਉਨ੍ਹਾਂ ਦੇ ਬਟੂਏ ਡਿੱਗ ਪਏ ਸਨ ਅਤੇ ਹੁਣ ਉਨ੍ਹਾਂ ਦੀ ਜੇਬ ’ਚ ਕੋਈ ਪੈਸਾ ਨਹੀਂ। ਉਨ੍ਹਾਂ ਕਿਹਾ ਕਿ ਡਾਕਟਰਾਂ ਨੇ ਉਨ੍ਹਾਂ ਤੋਂ ਖਾਲੀ ਕਾਗਜ਼ਾਂ ’ਤੇ ਦਸਤਖ਼ਤ ਕਰਵਾਉਣ ਦੀ ਕੋਸ਼ਿਸ਼ ਵੀ ਕੀਤੀ। ਉਨ੍ਹਾਂ ਕਿਹਾ ਬਾਦਲਾਂ ਦੇ ਜੱਦੀ ਹਲਕੇ ਦੇ ਡਾਕਟਰਾਂ ਵਿੱਚ ਵੀ ਕੋਈ ਇਨਸਾਨੀਅਤ ਨਾਂਅ ਦੀ ਕੋਈ ਚੀਜ਼ ਨਹੀਂ। ਜ਼ਖ਼ਮੀਆਂ ਦੇ ਸਿਰ, ਛਾਤੀ ’ਤੇ ਡਾਂਗਾਂ ਦੇ ਜਖ਼ਮਾਂ ਕਰਕੇ ਤੇਜ਼ ਦਰਦ ਹੈ ਪਰ ਹਸਪਤਾਲ ਦੇ ਅਮਲੇ ਨੇ ਬਿਨ੍ਹਾਂ ਫੀਸ ਤੋਂ ਐਕਸਰੇ ਕਰਨੋਂ ਨਾਂਹ ਕਰ ਦਿੱਤੀ ਅਤੇ ਅੱਜ ਸਾਢੇ 10 ਵਜੇ ਦੋ-ਦੋ ਗੋਲੀਆਂ ਦੇ ਕੇ ਬੁੱਤਾ ਸਾਰ ਦਿੱਤਾ ਗਿਆ।

ਜਸਪ੍ਰੀਤ ਨੇ ਕਿਹਾ ਕਿ ਸਿਹਤ ਕੇਂਦਰ ਲੰਬੀ ’ਚ ਇਲਾਜ ਨਾ ਹੋਣ ਕਜਕੇ ਕੁਝ ਸੁਵਿਧਾ ਕਰਮਚਾਰੀ ਤਾਂ ਆਪਣੇ ਇਲਾਜ ਲਈ ਨਿੱਜੀ ਹਸਪਤਾਲ ਦਾ ਰੁੱਖ ਕਰ ਗਏ। ਯੂਨੀਅਨ ਦੀ ਲੀਡਰਸ਼ਿਪ ਨੇ ਕਿਹਾ ਕਿ ਸਿਹਤ ਕੇਂਦਰ ਲੰਬੀ ’ਚ ਦਾਖਲ 4 ਸੁਵਿਧਾ ਕਰਮਚਾਰੀਆਂ ਦੀ ਡਾਕਟਰਾਂ ਵੱਲੋਂ ਕੋਈ ਵੀ ਦੇਖ-ਰੇਖ ਨਹੀਂ ਕੀਤੀ ਜਾ ਰਹੀ। ਉਹ ਮੁਲਾਜ਼ਮ ਦਰਦ ਨਾਲ ਕੁਰਲਾ ਰਹੇ ਹਨ ਪਰ ਉਨ੍ਹਾਂ ਦੀਆਂ ਡਾਕਟਰ ਵੀ ਆਪਣਾ ਫਰਜ਼ ਭੁੱਲ ਕੇ ਪੰਜਾਬ ਸਰਕਾਰ ਦੀ ਤਾਨਾਸ਼ਾਹੀ ਰਾਜ ਦੇ ਸ਼ਿਕਾਰ ਹੋ ਗਏ ਹਨ। ਯੂਨੀਅਨ ਆਗੂਆਂ ਅਨੁਸਾਰ ਲਾਠੀਚਾਰਜ਼ ਉਪਰੰਤ ਪ੍ਰਵੀਨ ਕੁਮਾਰ ਅਤੇ ਅਭਿਸ਼ੇਕ ਅਰੋੜਾ ਵਗੈਰਾ ਲਾਪਤਾ ਹਨ। ਉਨ੍ਹਾਂ ਦੋਸ਼ ਲਗਾਇਆ ਕਿ ਪੁਲਿਸ ਪ੍ਰਸ਼ਾਸ਼ਨ ਸੁਵਿਧਾ ਮੁਲਾਜ਼ਮਾਂ ’ਤੇ ਦਬਾਅ ਬਣਾਉਣ ਲਈ ਉਨ੍ਹਾਂ ਨੂੰ ਧੱਕੇ ਨਾਲ ਚੁੱਕ ਕੇ ਅਣਪਛਾਤੀ ਜਗਾ ’ਤੇ ਲੈ ਕੇ ਜਾ ਰਹੀ ਹੈ। ਜਨਰਲ ਸਕੱਤਰ ਸੱਤਪਾਲ ਸਿੰਘ ਨੇ ਕਿਹਾ ਕਿ ਸੁਵਿਧਾ ਕਰਮੀਆਂ ਵਿੱਚ ਪੰਜਾਬ ਸਰਕਾਰ ਇਸ ਵਤੀਰੇ ਕਾਰਣ ਸੁਵਿਧਾ ਮੁਲਾਜ਼ਮਾਂ ਵਿੱਚ ਰੋਸ਼ ਵਧਦਾ ਜਾ ਰਿਹਾ ਹੈ। ਸੁਵਿਧਾ ਮੁਲਾਜ਼ਮ ਇਨ੍ਹਾਂ ਡਾਗਾਂ ਸੋਟਿਆਂ ਦੀ ਕੋਈ ਪ੍ਰਵਾਹ ਨਹੀਂ ਕਰਨਗੇ ਅਤੇ ਆਪਣੀਆਂ ਹੱਕੀ ਅਤੇ ਜਾਇਜ਼ ਮੰਗਾਂ ਦੇ ਸਬੰਧ ਵਿੱਚ ਸੰਘਰਸ਼ ਜਾਰੀ ਰਖੱਣਗੇ। ਇਹ ਧਰਨਾ ਹੁਣ ਲੰਬੀ ਹਲਕੇ ਦੇ ਅਧੀਨ ਪੈਂਦੇ ਪਿੰਡ ਰਾਏ ਕਲਾ ਵਿਖੇ ਜਾਰੀ ਰੱਖਿਆ ਜਾਵੇਗਾ।

ਜ਼ਿਕਰਯੋਗ ਹੈ ਕਿ ਸੂਤਰਾਂ ਅਨੁਸਾਰ ਪੁਲੀਸ ਨੇ ਕੱਲ੍ਹ 95 ਅੌਰਤ ਸੁਵਿਧਾਂ ਕਰਮਚਾਰੀਆਂ ਨੂੰ ਛੱਡ ਦਿੱਤਾ ਸੀ। ਕੱਲ੍ਹ ਲਾਠੀਚਾਰਜ਼ ਉਪਰੰਤ ਪੁਰਸ਼ ਅਤੇ ਅੌਰਤ ਸੁਵਿਧਾ ਕਰਮਚਾਰੀਆਂ ਦੀ ਭਾਲ ’ਚ ਵੱਡੀ ਗਿਣਤੀ ਪਰੇਸ਼ਾਨ ਮਾਪੇ ਇੱਧਰ-ਉੱਧਰ ਭਟਕਦੇ ਰਹੇ।

ਪੜਤਾਲ ਕਰਵਾ ਕੇ ਕਾਰਵਾਈ ਕਰਾਂਗੇ : ਜਿਆਣੀ

ਸਿਹਤ ਕੇਂਦਰ ਲੰਬੀ ’ਚ ਜਖ਼ਮੀ ਸੁਵਿਧਾ ਕਾਮਿਆਂ ਦੇ ਇਲਾਜ ਵਿੱਚ ਊਣਤਾਈ ਬਾਰੇ ਸਿਹਤ ਮੰਤਰੀ ਸੁਰਜੀਤ ਜਿਆਣੀ ਨੇ ਕਿਹਾ ਕਿ ਸੁਵਿਧਾ ਕਰਮਚਾਰੀ ਝੂਠ ਬੋਲਦੇ ਹਨ, ਪੰਜਾਬ ਦੇ ਸਰਕਾਰੀ ਹਸਪਤਾਲਾਂ ਦੀ ਸੇਵਾਵਾਂ ਸਭ ਤੋਂ ਵਧੀਆ ਹਨ। ਫਿਰ ਵੀ ਉਹ ਸ਼ਿਕਾਇਤ ਆਉਣ ’ਤੇ ਪੜਤਾਲ ਕਰਵਾ ਕੇ ਕਾਰਵਾਈ ਕਰਾਂਗੇ। ਇਸੇ ਦੌਰਾਨ ਐਸ.ਐਮ.ਓ. ਡਾ. ਰੀਟਾ ਗੁਪਤਾ ਨੇ ਕਿਹਾ ਕਿ ਸਿਰਫ਼ ਐਕਸੀਡੈਂਟ ਕੇਸ ’ਚ ਐਕਸਰੇ ਦੀ ਫੀਸ ਨਹੀਂ ਲਈ ਜਾਂਦੀ ਪਰ ਐਮ.ਐਲ.ਸੀ. ਮਾਮਲਿਆਂ ’ਚ ਐਕਸਰੇ ਫੀਸ ਲਈ ਜਾਂਦੀ ਹੈ। ਉਨ੍ਹਾਂ ਇਲਾਜ ’ਚ ਅਣਗਹਿਲੀ ਦੇ ਦੋਸ਼ਾਂ ਨੂੰ ਖਾਰਜ ਕੀਤਾ। 98148-26100 / 93178-26100

ਦਰਵੇਸ਼ ਸਿਆਸਤਦਾਨ ਜਥੇਦਾਰ ਖੁੱਡੀਆਂ ਦੇ ਜੇਠੇ ਪੋਤੇ ਸੁਮੀਤ ਖੁੱਡੀਆਂ ਨੇ ਸਰਗਰਮ ਸਿਆਸਤ ਚ ਪਾਏ ਪੈਰ

- ਲੰਬੀ ਹਲਕੇ ’ਚ ਪਿਤਾ ਗੁਰਮੀਤ ਖੁੱਡੀਆਂ ਦੀ ਹਮਾਇਤ ’ਚ ਵਿੱਢੀ ਡੋਰ-ਟੂ-ਡੋਰ ਮੁਹਿੰਮ

- ਦੇਸ਼ ਖਾਤਰ ਬਿਹਤਰ ਕਰਨ ਦੇ ਜਜ਼ਬਾ ਤਹਿਤ ਵਿਦੇਸ਼ੀ ਧਰਤੀ ਨੂੰ ਆਖਿਆ ‘ਅਲਵਿਦਾ’

                                                         ਇਕਬਾਲ ਸਿੰਘ ਸ਼ਾਂਤ

        ਲੰਬੀ : ਦਰਵੇਸ਼ ਸਿਆਸਤਦਾਨ ਸਵਰਗੀ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ ਦੇ ਜੇਠੇ ਪੋਤੇ ਸੁਮੀਤ ਖੁੱਡੀਆਂ ਨੇ ਵੀ ਸਰਗਰਮ ਸਿਆਸਤ ਵਿੱਚ ਪੈਰ ਪਾ ਦਿੱਤੇ। 27 ਸਾਲਾ ਸੁਮੀਤ ਆਪਣੇ ਪਿਤਾ ਅਤੇ ਲੰਬੀ ਹਲਕੇ ਤੋਂ ਸੰਭਾਵੀ ਕਾਂਗਰਸ ਉਮੀਦਵਾਰ ਜਥੇਦਾਰ ਗੁਰਮੀਤ ਸਿੰਘ ਖੁੱਡੀਆਂ ਦੀ ਹਮਾਇਤ ਵਿੱਚ ਡੋਰ-ਟੂ-ਡੋਰ ਮੁਹਿੰਮ ਦੀ ਅਗਵਾਈ ਕਰ ਰਿਹਾ ਹੈ। ਉਹ ਪਿਛਲੇ ਵਰ੍ਹੇ ਕੈਨੇਡਾ ਦੀ ਯੂਨੀਵਰਸਿਟੀ ਆਫ਼ ਕੈਲਗਰੀ ਤੋਂ ਹਿਸਟਰੀ ’ਚ ਡਿਗਰੀ ਲੈ ਕੇ ਪਰਤਿਆ ਹੈ। ਆਪਣੇ ਸੰਸਦ ਮੈਂਬਰ ਸਵਰਗੀ ਦਾਦਾ ਅਤੇ ਪਿਤਾ ਵਾਂਗ ਨਿੱਘੇ ਸੁਭਾਅ ਅਤੇ ਹਲੀਮੀਅਤ ਦਾ ਧਨੀ ਸੁਮੀਤ ਵੀ ਲੋਕ ਪੱਖੀ, ਪਾਰਦਰਸ਼ੀ ਅਤੇ ਇਮਾਨਦਾਰ ਰਾਜਨੀਤੀ ਦਾ ਮੁਦਈ ਹੈ। ਲੰਬੀ ਦੇ ਹਲਕੇ ਸਰਾਵਾਂ ਜੈਲ ’ਚ ਖੁਦ ਆਪਣੀ ਟੀਮ ਸਮੇਤ ਵੋਟਰਾਂ ਨਾਲ ਨਿੱਜੀ ਤੌਰ ’ਤੇ ਰਾਬਤਾ ਬਣਾ ਰਿਹਾ ਹੈ। ਲੰਬੀ ਹਲਕੇ ’ਚ ਖੁੱਡੀਆਂ ਪਰਿਵਾਰ ਦੇ ਸਮਰਥਕ ਨੌਜਵਾਨਾਂ ਦੀਆਂ ਤਿੰਨ ਟੀਮਾਂ ਘਰ-ਘਰ ਜਾ ਕੇ ਵੋਟਰਾਂ ਨੂੰ ਕਾਂਗਰਸ ਸਰਕਾਰ ਬਣਾਉਣ ਲਈ ਪ੍ਰਤੀ ਪ੍ਰੇਰਿਤ ਕਰ ਰਹੀਆਂ ਹਨ। 

          ਜ਼ਿਕਰਯੋਗ ਹੈ ਕਿ ਪੰਜਾਬ ਪਬਲਿੱਕ ਸਕੂਲ ਨਾਭਾ ਦੇ ਹੈੱਡ ਬੁਆਏ ਦੇ ਇਲਾਵਾ ਬੈਸਟ ਡਿਵੇਟਰ ਅਤੇ ਬੈਸਟ ਐਨ.ਸੀ.ਸੀ. ਕੈਡਿਟ ਹੋਣ ਦਾ ਮਾਣ ਰੱਖਦਾ ਯੂ.ਪੀ.ਐਸ.ਸੀ ਦੀ ਪ੍ਰੀਖਿਆ ਰਾਹੀਂ ਪ੍ਰਸ਼ਾਸਨਿਕ ਸੇਵਾ ਕਰਨ ਦਾ ਚਾਹਵਾਨ ਹੈ। ਉਸਨੇ ਰਾਜਨੀਤੀ ਵਿੱਚ ਪ੍ਰਵੇਸ਼ ਬਾਰੇ ਆਖਿਆ ਕਿ ਮੌਜੂਦਾ ਹਾਲਾਤਾਂ ਵਿੱਚ ਜਥੇਦਾਰ ਜਥੇਦਾਰ ਜਗਦੇਵ ਸਿੰਘ ਖੁੱਡੀਆਂ ਵਾਲੀ ਲੋਕਪੱਖੀ ਰਾਜਨੀਤੀ ਦੀ ਲੋੜ ਹੈ। ਸੁਮੀਤ ਦਾ ਛੋਟਾ ਭਰਾ ਅਮੀਤ ਖੁੱਡੀਆਂ ਪਹਿਲਾਂ ਹੀ ਐਨ.ਐਸ.ਯੂ.ਆਈ. ਦਿੱਲੀ ਸਟੇਟ ਦਾ ਜਨਰਲ ਸਕੱਤਰ ਹੈ ਅਤੇ ਕਾਂਗਰਸ ਦੇ ਕੌਮੀ ਲੀਡਰਾਂ ਨਾਲ ਚੰਗਾ ਰਾਬਤਾ ਰੱਖਦਾ ਹੈ। 

         ਸੁਮੀਤ ਵੋਟਰਾਂ ਨੂੰ ਵੋਟਰਾਂ ਨੂੰ ਆਪਣਾ ਪਰਿਚੈ ਦਿੰਦਿਆਂ ਖੁੱਡੀਆਂ ਪਰਿਵਾਰ ਦੀ ਚਿੱਟੀ ਚਾਦਰ ਵਾਲੀ ਬੇਦਾਗ ਰਾਜਨੀਤੀ ਨੂੰ ਮੌਕਾ ਦੇ ਕੇ ਜਰੀਏ ਕਦਰਾਂ-ਕੀਮਤਾਂ ਵਾਲਾ ਮਾਹੌਲ ਸਿਰਜਣ ਲਈ ਪ੍ਰੇਰਦਾ ਹੈ। ਉਹ ਲੋਕਾਂ ਨੂੰ ਆਖਦਾ ਕਿ ਸਰਕਾਰਾਂ ਦੀਆਂ ਸਹੂਲਤਾਂ ਅਤੇ ਸਕੀਮਾਂ ਕਦੇ ਮਾੜੀਆਂ ਨਹੀਂ ਹੁੰਦੀਆਂ ਹਨ ਪਰ ਉਹ ਸਿਆਸਤਦਾਨਾਂ ਦੇ ਭ੍ਰਿਸ਼ਟ ਰਵੱਈਏ ਕਰਕੇ ਜਨਤਾ ਤੱਕ ਅੱਧੀਆਂ ਵੀ ਨਹੀਂ ਪਹੁੰਚਦੀਆਂ। ਸੁਮੀਤ ਪੁਰਾਣੀ ਪੀੜ੍ਹੀ ਦੇ ਲੋਕਾਂ ਨੂੰ ਫਰੀਦਕੋਟ ਤੋਂ ਸੰਸਦ ਮੈਂਬਰ ਰਹੇ ਜਥੇਦਾਰ ਜਗਦੇਵ ਸਿੰੰਘ ਖੁੱਡੀਆਂ ਦੀ ਪਾਰਦਰਸ਼ੀ ਰਾਜਨੀਤੀ ਨੂੰ ਚੇਤੇ ਕਰਵਾਉਂਦਾ ਅਤੇ ਆਪਣੇ ਹਮਉਮਰਾਂ ਨੂੰ ਆਪਣੇ ਦਾਦੇ ਦੀਆਂ ਸਾਫ਼ਗੋਈ ਅਤੇ ਸਿਆਸੀ ਚਿੱਟਤਾ ਦੀ ਪੜ੍ਹਤ ਗਿਣਾਉਂਦਾ ਹੈ। ਉਹ ਆਖਦਾ ਕਿ ਖੁੱਡੀਆਂ ਪਰਿਵਾਰ ਦੀ ਚਿੱਟੀ ਚਾਦਰ ਦਹਾਕਿਆਂ ਬਾਅਦ ਵੀ ਪਾਕ-ਸਾਫ਼ ਹੈ ਜਿਸਦੀ ਹਿੰਦੁਸਤਾਨ ਸਮੇਤ ਅਮਰੀਕਾ ਅਤੇ ਕੈਨੇਡਾ ਜਿਹੇ ਮੁਲਕਾਂ ਵੱਖਰੀ ਪਛਾਣ ਹੈ। ਉਹ ਲੋਕਾਂ ਨੂੰ ਅਕਾਲੀ ਸਰਕਾਰ ਦੇ ਸਾਢੇ 9 ਸਾਲ ਰਾਜ ’ਚ ਫੈਲੀ ਗੁੰਡਾਗਰਦੀ ਅਤੇ ਨਸ਼ੇ ਦੀ ਬੀਮਾਰੀ ਪ੍ਰਤੀ ਚੇਤੰਨ ਕਰਦਾ ਹੈ ਅਤੇ

ਚੰਗੇ ਭਵਿੱਖ ਲਈ ਕਾਂਗਰਸ ਨੂੰ ਲਿਆਉਣ ਦੀ ਅਪੀਲ ਕਰਦਾ ਹੈ। ਜਵਾਨੀ ’ਚ ਵਿਦੇਸ਼ੀ ਧਰਤੀ ਨੂੰ ਅਲਵਿਦਾ ਕਹਿ ਕੇ ਦੇਸ਼ ਲਈ ਕੁਝ ਬਿਹਤਰ ਜਜ਼ਬਾ ਰੱਖਦਾ ਸੁਮੀਤ ਆਪਣੇ ਪਿਤਾ ਜ਼ਿਲ੍ਹਾ ਕਾਂਗਰਸ ਸ੍ਰੀ ਮੁਕਤਸਰ ਸਾਹਿਬ ਦੇ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਨੂੰ ਕਾਂਗਰਸ ਉਮੀਦਵਾਰ ਵਜੋਂ ਪੇਸ਼ ਕਰਦਿਆਂ ਲੋਕਾਂ ਨੂੰ ਦੱਸਦਾ ਕਿ ਉਨ੍ਹਾਂ ਨੂੰ ਜਿਤਾਉਣ ਨਾਲ ਲੰਬੀ ਹਲਕੇ ਵਿੱਚ ਆਮ ਲੋਕਾਂ ਦੀ ਸੁਣਵਾਈ ਵਧੇਗੀ ਅਤੇ ਪਿੰਡਾਂ ’ਤੇ ਕਬਜ਼ਿਆਂ ਦੇ ਮਾਹੌਲ ਤੋਂ ਜਨਤਾ ਨੂੰ ਛੁਟਕਾਰਾ ਮਿਲੇਗਾ। ਸੁਮੀਤ ਖੁੱਡੀਆਂ ਨੇ ਕਿਹਾ ਕਿ ਨੌਜਵਾਨ ਕਾਰਕੁੰਨਾਂ ਦੀ ਤਿੰਨ ਟੀਮਾਂ ਲੰਬੀ ਹਲਕੇ ਤੇ ਘਰ-ਘਰ ਜਾਣਗੀਆਂ ਅਤੇ ਵੋਟਰਾਂ ਨੂੰ ਪ੍ਰਚਾਰ ਸਮੱਗਰੀ ਰਾਹੀਂ ਕਾਂਗਰਸ ਦੀਆਂ ਨੀਤੀਆਂ ਅਤੇ ਲੋਕ ਮੁੱਦਿਆਂ ਦੇ ਡਟਵੇਂ ਸੰੰਘਰਸ਼ ਖੁੱੱਡੀਆਂ ਪਰਿਵਾਰ ਨੂੰ ਹਮਾਇਤ ਦੀ ਅਪੀਲ ਕੀਤੀ ਜਾਂਦੀ ਹੈ। ਉਸਦਾ ਕਹਿਣਾ ਹੈ ਕਿ ਐਤਕੀਂ ਲੋਕਾਂ ’ਚ ਗੁੱਸਾ ਅਤੇ ਰੋਸ ਲੰਬੀ ’ਚ ਅਕਾਲੀ ਦਲ ਦੇ ਗੜ੍ਹ ਨੂੰ ਢਹਿ-ਢੇਰੀ ਕਰ ਦੇਵੇਗਾ। -98148-26100 / 93178-26100 

ਸਿਆਸੀ ਸ਼ਾਹ-ਅਸਵਾਰਾਂ ਦੇ ਹਲਕੇ ਦੇ 92 ਸਾਲਾ ਕਿਸਾਨ ਦਾ ਦੁਖਾਂਤ

- ਜ਼ਮੀਨ ਦੇ 3-3  ’ਤੇ ਹੋਣ ਬਾਅਦ 35 ਵਰ੍ਹਿਆਂ ਤੋਂ ਖੇਤਾਂ ’ਚ ਦਾਖਲਾ ਬਣਿਆ ਪਾਕਿਸਤਾਨ ਦੀ ਸਰਹੱਦ

- ਜ਼ਮੀਨੀ ਘਪਲਾ: ਸਰਮਾਏਦਾਰ ਕਿਸਾਨਾਂ ਨੇ ਢਾਈ ਕਿਲੋਮੀਟਰ ਲੰਬੀ ਪਹੀ ਖੇਤਾਂ ’ਚ ਰਲਾਈ

- ਇੱਕ ਸਰਮਾਏਦਾਰ ਤਾਂ ਪਹੀ ’ਤੇ ਕਬਜ਼ਾ ਕਰਕੇ ਵਿਖਾਉਂਦਾ ਬੰਦੂਕ 

- ਮਾਈਨਰ ’ਤੇ ਪੁੱਲ ਬਾਰੇ ਪਿਛਲੇ ਸੰਗਤ ਦਰਸ਼ਨ ਦੀ ਦੋ ਲੱਖ ਰੁਪਏ ਦੀ ਗਰਾਂਟ ਦੀ ਉੱਗ-ਸੁੱਘ ਨਹੀਂ

                                                          ਇਕਬਾਲ ਸਿੰਘ ਸ਼ਾਂਤ

   ਲੰਬੀ: ਸਿਆਸੀ ਸ਼ਾਹ-ਅਸਵਾਰਾਂ ਦੇ ਹਲਕੇ ਲੰਬੀ ’ਚ 92 ਸਾਲਾ ਕਿਸਾਨ ਮੱਲ ਸਿੰਘ ਦੇ ਪਰਿਵਾਰ ਦਾ ਦੁਖਾਂਤ ਹੈ ਕਿ ਤਿੰਨ-ਤਿੰਨ ਖੇਤਾਂ ਅੰਦਰ ਤੱਕ ਪੱੁਜਣਾ ਪਾਕਿਸਤਾਨ ਦੀ ਸਰਹੱਦ ਪਾਰ ਕਰਨ ਤੁੱਲ ਹੋਇਆ ਪਿਆ ਹੈ। 35 ਵਰ੍ਹਿਆਂ ਤੋਂ ਸਰਮਾਏਦਾਰ ਕਿਸਾਨਾਂ ਦੇ ਉਸਦੇ ਖੇਤਾਂ ਨੂੰ ਲੱਗਦੀਆਂ ਪਹੀਆਂ (ਰਸਤੇ) ’ਤੇ ਕਬਜ਼ੇ ਕਰਕੇ ਇਹ ਪਰਿਵਾਰ ਆਪਣੀ ਜ਼ਮੀਨ ’ਚੋਰਾਂ ਵਾਂਗ ਵੜਦਾ ਹੈ ਜਾਂ ਬਾਜੀਗਰਾਂ ਵਾਂਗ ਮਾਈਨਰ ਤੋਂ ਰੱਖੇ ਬਿਜਲਈ ਖੰਭੇ ਵਾਂਗ ਲੰਘਣ ਨੂੰ ਮਜ਼ਬੂਰ ਹੈ। ਇਹ ਮਾਮਲਾ ਅੱਜ ਭੁੱਲਰਵਾਲਾ ਵਿਖੇ

ਸੰਗਤ ਦਰਸ਼ਨ ਵਿੱਚ ਬਜ਼ੁਰਗ ਕਿਸਾਨ ਮੱਲ ਸਿੰਘ ਨੇ ਸੰਗਤ ਦਰਸ਼ਨ ’ਚ ਬੜੀ ਗਰੀਬੀ ਦਾਅਵੇ ਨਾਲ ਉਠਾਇਆ ਤਾਂ ਮੁੱਖ ਮੰਤਰੀ ਬਾਦਲ ਵੀ ਉਸਦੀ ਦਾਸਤਾਂ ਸੁਣ ਦੇ ਹੈਰਾਨ ਰਹਿ ਗਏ। ਮੱਲ ਸਿੰਘ ਨੇ ਖੁਲਾਸਾ ਕੀਤਾ ਕਿ ਕੱਖਾਂਵਾਲੀ ਮਾਈਨਰ ਨੇੜੇ ਕੰਦੂਖੇੜਾ ਨੂੰ ਜਾਂਦੀ ਕਰੀਬ ਢਾਈ ਕਿਲੋਮੀਟਰ ਲੰਮੀ ਕੱਚੀ ਪਹੀ ਦਾ ਸਰਮਾਏਦਾਰ ਕਿਸਾਨਾਂ ਨੇ ਵਜੂਦ ਖ਼ਤਮ ਉਸਨੂੰ ਜ਼ਮੀਨ ਵਿੱਚ ਵਾਹ ਲਿਆ ਹੈ। ਜਿਸ ਕਰਕੇ ਉਹ ਕੱਖਾਂਵਾਲੀ ਮਾਈਨਰ ਲਾਗਲੇ ਰਸਤੇ ਤੋਂ ਸਿਰਫ਼ 4 ਏਕੜ ਦੂਰ ਆਪਣੇ ਖੇਤ ’ਚ ਦੂਜੇ ਕਿਸਾਨਾਂ ਦੀ ਮਿੰਨਤਾਂ ਕਰਕੇ ਵੜਣਾ ਪੈਂਦਾ ਹੈ। ਇਸੇ ਰਕਬੇ ਕੋਲ ਮਾਈਨਰ ’ਤੇ ਪੁੱਲ ਨਾ ਹੋਣ ਕਰਕੇ ਦੂਜੇ ਕੰਢੇ ਆਪਣੇ ਖੇਤ ਵਿੱਚ ਜਾਣ ਲਈ ਕਰੀਬ ਦੋ ਕਿਲੋਮੀਟਰ ਲੰਬਾ ਪੈਂੜਾ ਤੈਅ ਕਰਨਾ ਪੈਂਦਾ ਹੈ। ਮਾਈਨਰ ’ਤੇ ਰੱਖੇ ਇੱਕ ਬਿਜਲਈ ਖੰਭੇ ਨੂੰ ਇਸ ਪਰਿਵਾਰ ਨੇ ਆਵਾਜਾਈ ਦਾ ਜਰੀਆ ਬਣਾਇਆ ਹੋਇਆ ਹੈ ਜਿਸ ਤੋਂ ਲੰਘਦੇ ਸਮੇਂ ਬਜ਼ੁਰਗ ਮੱਲ ਸਿੰਘ ਦਾ ਪਰਿਵਾਰ ਵਾਰ ਸੱਟਾਂ ਖਾ ਚੁੱਕਿਆ ਹੈ। ਸੰਗਤ ਦਰਸ਼ਨੀ ਗਰਾਂਟਾਂ ਦਾ ਕੋਰਾ ਸੱਚ ਹੈ ਕਿ ਪਿਛਲੇ ਸੰਗਤ ਦਰਸ਼ਨ ਵਿੱਚ ਮੁੱਖ ਮੰਤਰੀ ਨੇ ਮੱਲ ਸਿੰਘ ਦੀ ਮੰਗ ’ਤੇ ਕੱਖਾਂਵਾਲੀ ਮਾਈਨਰ ’ਤੇ ਪੁੱਲ ਲਈ 2 ਲੱਖ ਰੁਪਏ ਜਾਰੀ ਕੀਤੇ ਸਨ। ਜਿਨ੍ਹਾਂ ਦੀ ਹੋਂਦ ਜਾਂ ਅਣਹੋਂਦ ਦਾ ਅਜੇ ਤੱਕ ਧਹੁ ਠਿਕਾਣਾ ਨਹੀਂ। 

         ਮੱਲ ਸਿੰਘ ਅਨੁਸਾਰ ਇਸੇ ਤਰ੍ਹਾਂ ਹਾਕੂਵਾਲਾ ਸੜਕ ’ਤੇ ਪੈਂਦੇ ਉਸਦੇ ਖੇਤ ਦੀ ਪਹੀ ’ਤੇ ਵੀ ਇੱਕ ਸਰਮਾਏਦਾਰ ਦਾ ਕਬਜ਼ਾ ਹੈ। ਜਿਸਤੋਂ ਲੰਘਣ ਸਮੇਂ ਉਹ ਬੰਦੂਕ ਵਿਖਾ ਕੇ ਡਰਾਉਂਦਾ ਹੈ। ਹੋਰ ਤਾਂ ਹੋਰ ਇੱਕ ਭੁੱਲਰਵਾਲਾ ਦੇ ਇੱਕ ਅਕਾਲੀ ਚੌਧਰੀ ਦੇ ਇਸ਼ਾਰੇ ’ਤੇ ਪਹੀ ’ਤੇ ਟਿਊਬਵੈੱਲ ਲਗਾਉਣ ਦੀ ਕੋਸ਼ਿਸ਼ ਕੀਤੀ ਸੀ। ਮੱਲ ਸਿੰਘ ਨੇ ਬਹਾਵਵਾਲਾ ਡਰੇਨ ’ਤੇ ਕੰਢੇ ਪਹੀ ਕੱਚੀ ਹੋਣ ਕਰਕੇ ਮੀਂਹਾਂ ਮਿੱਟੀ ਡਰੇਨ ਵਿੱਚ ਰੁੜ ਜਾਂਦੀ ਹੈ ਅਤੇ ਉਨ੍ਹਾਂ ਨੂੰ ਆਪਣੇ ਖੇਤ ਤੱਕ ਪਹੁੰਚਣ ਲਈ ਨਾਲ ਮਜ਼ਬੂਰੀ ’ਚ ਪਹੀ ਲਾਗਲੇ ਖੇਤਾਂ ਦੀ ਵਿਚੋਂ ਲੰਘਣਾ ਪੈਂਦਾ ਹੈ। ਜਿਸ ਕਰਕੇ ਸਬੰਧਤ ਖੇਤਾਂ ਵਾਲੇ ਕਿਸਾਨ ਉਨ੍ਹਾਂ ’ਤੇ ਗੁੱਸਾ ਜਾਹਰ ਕਰਦੇ ਹਨ। ਮੱਲ ਸਿੰਘ ਨੇ ਮੁੱਖ ਮੰਤਰੀ ਦੇ ਨਾਲ ਬੈਠੇ ਪਿੰਡ ਦੇ ਇੱਕ ਅਕਾਲੀ ਆਗੂ ਨੂੰ ਉਸਦੀ ਹੋਣੀ ’ਚ ਹਿੱਸੇਦਾਰ ਕਰਾਰ ਦਿੱਤਾ ਤਾਂ ਮੁੱਖ ਮੰਤਰੀ ਸ੍ਰੀ ਬਾਦਲ ਨੇ ਤੁਰੰਤ ਸਿੰਚਾਈ ਵਿਭਾਗ ਅਤੇ ਡਰੇਨ ਵਿਭਾਗ ਦੇ ਅਧਿਕਾਰੀਆਂ ਨੂੰ ਨਿਰਦੇਸ਼ ਦਿੱਤੇ ਕਿ ਉਹ ਬਿਨ੍ਹਾ ਕਿਸੇ ਦਬਾਅ ਦੇ ਬਜ਼ੁਰਗ ਦੀ ਸਮੱਸਿਆ ਦੇ ਮੌਕੇ ਦਾ ਜਾਇਜ਼ਾ ਲੈਣ। ਬਾਅਦ ਵਿੱਚ ਸਿੰਚਾਈ ਵਿਭਾਗ ਦੇ ਅਧਿਕਾਰੀਆਂ ਅਤੇ ਪੱਤਰਕਾਰ ਨੂੰ ਮੱਲ ਸਿੰਘ ਨੇ ਮੌਕੇ ਦੀ ਸਥਿਤੀ ਵਿਖਾਉਂਦਿਆਂ ਕਿਹਾ ਕਿ ਸੱਤਾ ਪੱਖ ਦੇ ਆਗੂ ਦੀ ਸ਼ਹਿ ’ਤੇ ਉਨ੍ਹਾਂ ਦੀ ਸੁਣਵਾਈ ਨਹੀਂ ਹੋ ਰਹੀ। ਉਹ ਲਾਂਘੇ ਲਈ ਬੇਹੱਦ ਅੌਖੇ ਹਨ। ਮੱਲ ਸਿੰਘ ਨੇ ਵਿਖਾਇਆ ਕਿ ਅਬੋਹਰ ਰੋਡ ਦੇ ਦੂਜੇ ਬੰਨ੍ਹੇ ਕੱਸੀ ਦੇ ਨਾਲ 4 ਕਰਮਾਂ ਦੀ ਪਹੀ ਕੱਖਾਂਵਾਲੀ ਤੱਕ ਜਾਂਦੀ ਹੈ ਪਰ ਉਹ ਸੜਕ ਦੇ ਦੂਜੇ ਪਾਸੇ ਕੰਦੂਖੇੜਾ ਤੱਕ ਪਹੀ ਦਾ ਵਜੂਦ ਖ਼ਤਮ ਕਰ ਦਿੱਤਾ ਗਿਆ। ਅਧਿਕਾਰੀਆਂ ਨੇ ਵੀ ਉਸਦੀ ਸਮੱਸਿਆ ਨੂੰ ਜਾਇਜ਼ ਦੱਸਦਿਆਂ ਮਾਲ ਵਿਭਾਗ ਤੋਂ ਰਿਕਾਰਡ ਕਢਵਾਉਣ ਦੀ ਸਲਾਹ ਦਿੱਤੀ। ਭੁੱਲਰਵਾਲਾ ’ਚ ਸੰਗਤ ਦਰਸ਼ਨ ਮੌਕੇ ਕਈ ਹੋਰਨਾਂ ਕਿਸਾਨ ਟੇਲਾਂ ਅਤੇ ਮੋਘਿਆਂ ਬਾਰੇ ਪਿੰਡ ਦੇ ਅਕਾਲੀ ਚੌਧਰੀ ਖਿਲਾਫ਼ ਮੁੱਖ ਮੰਤਰੀ ਸਾਹਮਣੇ ਭੜਾਸ ਕੱਢਦੇ ਵਿਖਾਈ ਦਿੱਤੇ। ਨਹਿਰੀ ਵਿਭਾਗ ਦੇ ਐਸ.ਡੀ.ਓ. ਪਵਨ ਬਿਸ਼ਨੋਈ ਨੇ ਕਿਹਾ ਕਿ ਪਿਛਲੇ ਸੰਗਤ ਦਰਸ਼ਨ ’ਚ ਮੱਲ ਸਿੰਘ ਦੇ ਖੇਤਾਂ ਕੋਲ ਕੱਖਾਂਵਾਲੀ ਮਾਈਨਰ ’ਤੇ ਪੁੱਲ ਬਾਰੇ ਗਰਾਂਟ ਉਨ੍ਹਾਂ ਦੇ ਵਿਭਾਗ ਕੋਲ ਲਈ ਪੁੱਜੀ ਸ਼ਾਇਦ ਇਹ ਗਰਾਂਟ ਪੰਚਾਇਤ ਨੂੰ ਭੇਜੀ ਗਈ ਹੋਵੇ।  iqbal.shant@gmail.com, 98148-26100 / 93178-26100

ਆਜ਼ਾਦੀ ਦਾ ਅਹਿਸਾਸ

                                                      ਇਕਬਾਲ ਸਿੰਘ ਸ਼ਾਂਤ

ਆਜ਼ਾਦੀ ਇੱਕ ਦਿਹਾੜਾ ਹੀ ਨਹੀਂ ਇੱਕ ਭਾਵਨਾ ਅਤੇ ਅਹਿਸਾਸ ਵੀ ਹੈ। ਜਿਸਨੂੰ ਸਧਾਰਨ ਬੰਦੇ ਲਈ ਮੁਕਾ ਦਿੱਤਾ ਗਿਆ ਹੈ। ਅੱਜ ‘ਆਜ਼ਾਦੀ’ ਇੱਕ ਅਜਿਹੇ ਸ਼ਰਾਬੀ ਪਤੀ ਜਿਹੀ ਬਣ ਕੇ ਰਹਿ ਗਈ ਜਿਹੜਾ ਰਾਤ ਨੂੰ ਆਪਣੀ ਸਰੀਰਕ ਭੁੱਖ ਲਈ ਪਤਨੀ ਨੂੰ ਅਪੱਣਤ ਵਿਖਾਉਂਦਾ ਹੈ ਪਰ ਦਿਨ ਸਮੇਂ ਉਸਦੇ ਤੇਵਰ ਇਸਦੇ ਬਿਲਕੁੱਲ ਉਲਟ ਹੁੰਦੇ ਹਨ। ਉੱਚੀਆਂ ਸਫ਼ੀਲਾਂ ’ਤੇ ਬੈਠੇ ‘ਸਿਆਸਤਦਾਨਾਂ’ ਨੇ ਸਾਜਿਸ਼ਨ ਆਜ਼ਾਦੀ ਦੇ ਅਹਿਸਾਸ ਮਾਰ ਦਿੱਤੇ ਹਨ ਅਤੇ ਭਾਵਨਾਵਾਂ ਧਾਰਮਿਕ ਕਰ ਦਿੱਤੀਆਂ ਹਨ। ਇਖਲਾਕ ਨੂੰ ਕਿੱਤਾਮੁਖੀ ਕਰ ਦਿੱਤਾ ਅਤੇ ਜਮੀਰ ਅਤੇ ਗੈਰਤਾਂ ਮੁਫ਼ਤਖੋਰੀ ਦੇ ਵੱਸ ਪਾ ਦਿੱਤੀਆਂ। ਸਧਾਰਨ ਬੰਦੇ ਦੇ ਵਿਕਾਸ ਦੇ ਨਾਂਅ ’ਤੇ ਸਧਾਰਨ ਬੰਦੇ ਦਾ ਹੀ ਸਭ ਕੁਝ ‘ਖੋਹਿਆ’ ਜਾ ਰਿਹਾ ਹੈ। 

ਹਕੀਕਤ ’ਚ ‘ਆਜ਼ਾਦੀ’ ਲਫ਼ਜ਼ ਦੇ ਬੜੇ ਡੂੰਘੇ ਮਾਇਨੇ ਹਨ। ਆਜ਼ਾਦੀ ਦੇ ਨਾਲ ਹਰ ਬਾਸ਼ਿੰਦੇ, ਪੰਛੀ ਅਤੇ ਪਰਿੰਦੇ ਅਤੇ ਮਾਤ-ਭੂਮੀ ਦੇ ਕਣ-ਕਣ ਦੀ ਆਸ ਵੀ ਜੁੜੀ ਹੋਈ ਹੈ। ਹਰ ਕੋਈ ਚਾਹੁੰਦਾ ਹੈ ਕਿ ‘‘ਉਹ ਆਜ਼ਾਦ ਫਿਜ਼ਾ ਅੰਦਰੀਂ ਪਰਵਾਜ਼ ਭਰੇ। ਉਸ ਕੋਲ ਰਹਿਣ ਲਈ ਰੈਣ-ਬਸੇਰਾ ਹੋਵੇ, ਕਰਨ ਲਈ ਕਿੱਤਾ ਅਤੇ ਸਿਰ ਉਠਾ ਕੇ ਜਿਉਣ ਲਈ ਮਾਹੌਲ ਹੋਵੇ।’’ ਅੱਜ ਉਹ ਆਪਣੇ ਇਸ ਸੁਪਨੇ ਦੀ ਪੂਰਤੀ ਲਈ ਹਰ ਪਲ ਸੋਚਦਾ ਹੈ, ਸੁਪਨੇ ਬੁਣਦਾ ਹੈ ਅਤੇ ਪੂਰੇ ਯਤਨ ਵੀ ਜੁਟਾਉਂਦਾ ਹੈ। ਇਹ ਕੋਈ ਨਵੀਂ ਗੱਲ ਨਹੀਂ ਹਰ ਮੁਲਕ, ਹਰ ਜਾਤ-ਧਰਮ ਅਤੇ ਫਿਰਕੇ ਦਾ ਮਨੁੱਖ ਇਸੇ ‘ਅਹਿਸਾਸ’ ਨਾਲ ਸਾਹਾਂ ਦੀ ਉਮੀਦ ਨੂੰ ਅਗਾਂਹ ਵਧਾਉਂਦਾ ਹੈ ਕਿ ਉਸਦੀ ਮਿਹਨਤ ਸਦਕਾ ਤਰੱਕੀ ਅਤੇ ਖੁਸ਼ਹਾਲੀ ਦੇ ਦਿਨ ਆਉਣਗੇ। ਅੱਜ ਆਜ਼ਾਦ ਭਾਰਤ ’ਚ ਸਧਾਰਨ ਬੰਦੇ ਦੇ ਹੱਥ-ਪੱਲੇ ਕੁਝ ਨਜ਼ਰ ਪੈਂਦਾ ਆਉਂਦਾ। ਵੱਡੀਆਂ ਸੜਕਾਂ, ਚੌੜੇ ਪੁੱਲਾਂ ਅਤੇ ਉੱਚੀਆਂ ਇਮਾਰਤਾਂ ਨੂੰ ਮੁਲਕ ਦਾ ‘ਵਿਕਾਸ’ ਅਤੇ ਖੁਸ਼ਹਾਲੀ ਦਰਸਾਇਆ ਜਾ ਰਿਹਾ ਹੈ। ਅਜੋਕੇ ਦੌਰ ਦਾ ਸੜਕੀ ਵਿਕਾਸ ਅੰਗਰੇਜ਼ਾਂ ਵਾਂਗ ਭਾਰਤੀ ਸਿਆਸਤਦਾਨਾਂ ਦੇ ‘ਠਰਕ’ ਦਾ ਜਰੀਆ ਹੈ। ਜਿਨ੍ਹਾਂ ’ਤੇ ਚੱਲਣ ਖਾਤਰ ਵੀ ਸਧਾਰਨ ਬੰਦੇ ਨੂੰ ਕੀਮਤ ਅਦਾ ਕਰਨੀ ਪੈ ਰਹੀ ਹੈ। ਸਧਾਰਨ ਬੰਦੇ ਲਈ ਆਜ਼ਾਦੀ ਦੇ ਹਾਲਾਤ ਅੰਗਰੇਜ਼ ਰਾਜ ਤੋਂ ਵੀ ਮਾੜੇ ਹੋਏ ਪਏ ਹਨ। ਸਧਾਰਨ ਬੰਦਾ ਲਗਾਤਾਰ ਬਦਹਾਲੀ ਵੱਲ ਧੱਕਣ ਵਾਲੀਆਂ ਸਰਕਾਰੀ ਨੀਤੀਆਂ ’ਚ ਉਲਝ ਕੇ ਰਹਿ ਗਿਆ ਹੈ। ਮਹਿੰਗਾਈ ਨੇ ਆਮ ਬੰਦੇ ਦੀ ‘ਮੱਤ’ ਮਾਰ ਕੇ ਰੱਖ ਦਿੱਤੀ ਹੈ ਅਤੇ ਕਮਾਈ ਦੇ ਬਹੁਗਿਣਤੀ ਵਸੀਲੇ ਸਿਆਸਤਦਾਨਾਂ ਨੇ ਆਪਣੇ ਕਬਜ਼ੇ ਵਿੱਚ ਲੈ ਲਏ ਹਨ। ਸਿੱਖਿਆ ਦੀ ਪਰਪੱਕ ਡੂੰਘਾਈ ਤੋਂ ਖੁਣੇ ਪੜ੍ਹੇ-ਲਿਖੇ ਲੋਕ ਸਿਰਫ਼ (ਸੂਟਡ-ਬੂਟਡ ਮਜ਼ਦੂਰ) 10-12 ਹਜ਼ਾਰ ਵਾਲੀ ਨਿਗੁਣੀਆਂ ਤਨਖ਼ਾਹਾਂ ’ਤੇ ਸੀਮਤ ਹੋ ਕੇ ਰਹਿ ਗਏ ਹਨ। ਉਸ ਕੋਲੋਂ ਮਾਰੂ ਸਰਕਾਰੀ ਨੀਤੀਆਂ ਅਤੇ ਚੰਗੇ-ਬੁਰੇ ਨੂੰ ਪਰਖਣ ਦੀ ਸ਼ਕਤੀ ‘ਨਿਪੁੰਸਕ’ ਕਰ ਦਿੱਤੀ ਗਈ ਹੈ। ਜਨਤਾ ਲਈ ਫੋਕੀਆਂ ਨੀਤੀਆਂ ਉਸਾਰ ਕੇ ਰਾਜ ਨੇਤਾ ਅਤੇ ਅਫਸਰਾਂ ਦੇ ਘਰ ‘ਵੱਡੇ’ ਹੋ ਰਹੇ ਹਨ। ਪੰਜਾਬ ਵਿੱਚ ਸੰਗਤ ਦਰਸ਼ਨ ਸਮਾਗਮ ਦਾ ਵਰਤਾਰਾ ਵੀ ਇਸੇ ਅਮਲ ਦੀ ਤਰਜ਼ਮਾਨੀ ਕਰਦਾ ਹੈ। ਪੰਜਾਬ ਦਾ ਰਾਜ-ਭਾਗ ਅੱਜ ਵਪਾਰੀ ਸੋੋਚ ਦੇ ਕਬਜ਼ੇ ਹੇਠਾਂ ਹੈ। ਪੰਜਾਬ ਨਸ਼ਿਆਂ ਦੀ ਮਾਰ ਹੇਠਾਂ ਹੈ ਪਰ ਨਸ਼ਿਆਂ ਦੇ ਕਥਿਤ ਤਸਕਰ ਭੋਲਾ ਜਿਹੇ ਲੋਕ ਅਦਾਲਤਾਂ ਵਿਚੋਂ ਬਰੀ ਹੋ ਰਹੇ ਹਨ। ਨਸ਼ਿਆਂ ਦੇ ਦੋਸ਼ਾਂ ’ਚ ਘਿਰੇ ਲੋਕ ਮੁੱਛਾਂ ਨੂੰ ਵੱਟ ਦੇ ਕੇ ਆਜ਼ਾਦੀ ਦਾ ਅਹਿਸਾਸ ਮਾਣ ਰਹੇ ਹਨ। ਆਮ ਬੰਦਾ ਮਹਿਸੂਸ ਕਰਦਾ ਹੈ ਕਿ ਥਾਣੇ-ਕਚਿਹਰੀਆਂ ਵਿਚੋਂ ਇਨਸਾਫ਼ ਮਿਲਣਾ ਅੰਗਰੇਜ਼ਾਂ ਨਾਲੋਂ ਵੀ ਮਾੜਾ ਹੋ ਗਿਆ ਹੈ। ਥਾਣੇ-ਦਫ਼ਤਰਾਂ ਵਿੱਚ ਦੁਕਾਨ ਵਾਂਗ ਇਨਸਾਫ਼ ‘ਮੁੱਲ’ ਵਿਕਦਾ ਹੈ। 

ਅੱਜ ਹਿੰਦੁਸਤਾਨ ਦੀ ਆਜ਼ਾਦੀ, ਸਿੱਖ ਧਰਮ ’ਤੇ ਜੱਟ ਸਿੱਖਾਂ ਦੇ ਕਬਜ਼ੇ ਵਾਂਗ ਸਫ਼ੈਦਪੋਸ਼ ਸਿਆਸਤ ਅਤੇ ਵੱਡੇ ਸਨਅਤਕਾਰਾਂ ਦੀ ਜਗੀਰ ਬਣ ਚੁੱਕੀ ਹੈ। ਜਿਹੜੇ ਆਪਣੇ ਫਾਇਦੇ ਅਤੇ ਮੁਫ਼ਾਦਾਂ ਲਈ ਜਨਤਾ ਦੇ ਰਹਿਣ-ਸਹਿਣ ਅਤੇ ਸੋਚ-ਵਿਚਾਰ ਤੱਕ ਨੂੰ ਮਨ-ਮੁਤਾਬਕ ਢਾਲ ਰਹੇ ਹਨ। ਕੁਝ ਵਰਗਾਂ ਨੂੰ ਲੋਕ-ਸਹੂਲਤਾਂ ਦੀ ਓਟ ’ਚ ‘ਮੁਫ਼ਤ’ ਦਾ ਸਵਾਦ ਪਾ ਕੇ ਮਿਹਨਤ ਦੀ ਆਦਤ ਖ਼ਤਮ ਕੀਤੀ ਜਾ ਰਹੀ ਹੈ। ਟੀ.ਵੀ ਸੀਰੀਅਲਾਂ ਰਾਹੀਂ ਪਰਿਵਾਰਕ ਰਿਸ਼ਤਿਆਂ ਦੀਆਂ ਤੰਦਾਂ ਨੂੰ ਕੁਰਾਹੇ ਪਾਇਆ ਜਾ ਰਿਹਾ ਹੈ। ਜਿਨ੍ਹਾਂ ’ਤੇ ਸਰਕਾਰਾਂ ਕੋਲ ਕੋਈ ਸੈਂਸਰ ਨਹੀਂ। 

   

ਚੋਣ-2017 ਦੇ ਬਰੂਹਾਂ ’ਤੇ ਖੜ੍ਹੀ ਪੰਜਾਬ ਦੀ ਸਿਆਸਤ ਨੂੰ ਲੋਕ ਮੁੱਦਿਆਂ ਨਾਲ ਵਾਹ-ਵਾਸਤਾ ਨਹੀਂ ਜਾਪ ਰਿਹਾ। ਰਾਜਸੀ ਆਗੂ ਅਸਲ ਮੁੱਦਿਆਂ ਅਤੇ ਜਨਤਾ ਦੀਆਂ ਹਕੀਕੀ ਸਮੱਸਿਆਵਾਂ ਨੂੰ ਪਛਾਨਣ ਦੀ ਬਜਾਏ ਇੱਕ-ਦੂਜੇ ’ਤੇ ਤੋਹਮਤਾਂ ਅਤੇ ਦਬਕੇ ਮਾਰਨ ਤੱਕ ਸੀਮਤ ਰਹਿ ਗਏ ਹਨ। ਸੂਬਾ ਨਸ਼ੇ ਅਤੇ ਆਰਥਿਕ ਨੀਤੀਆਂ ਦੀ ਮਾਰ ਹੇਠਾਂ ਹੈ, ਕਿਸੇ ਨੂੰ ਫ਼ਿਕਰ ਨਹੀਂ ਕਿ ਕਿਸਾਨ ਖੁਦਕੁਸ਼ੀਆਂ ਕਰ ਰਹੇ ਹਨ, ਕੁੜੀਆਂ ਦੀਆਂ ਇੱਜਤਾਂ ਰੁਲ ਰਹੀਆਂ ਹਨ। ਰਾਜ ਨੇਤਾਵਾਂ ਦੇ ਫਰਜੰਦਾਂ ਦਾ ਰਹਿਣ-ਸਹਿਣ ਰਜਵਾੜਿਆਂ ਨਾਲੋਂ ਅਗਾਂਹ ਟੱਪ ਗਿਆ ਹੈ। ਜਦੋਂਕਿ ਵੱੜੀ ਗਿਣਤੀ ਜਨਤਾ ਅੱਜ ਬੇਸਹਾਰਾ ਰੁਲਦੀ ਫਿਰਦੀ। ਮਨ ਰੋਂਦਾ ਹੇ ਸੜਕਾਂ ’ਤੇ ਰੇਲਵੇ ਫਾਟਕਾਂ ਦੇ ਕੰਢੇ ਭੱਜ-ਭੱਜ ਕੇ ਰਾਹਗੀਰਾਂ ਦੇ ਤਰਲੇ ਕਰਦੇ ਵੇਖ ਕੇ, ਜਿਹੜੇ ਨਿੱਕੀ ਉਮਰੇ ਗੁਰਬਤ ਦੇ ਪਸੀਨੇ ਦੀਆਂ ਪਰਤਾਂ ਚੜ੍ਹੇ ਚਿਹਰਿਆਂ ਨਾਲ ਛੱਲੀਆਂ ਅਤੇ ਮੱਕੀ ਵਾਲੇ ਫੁੱਲੇ (ਪੌਪਕਾਰਨ) ਖਰੀਦਣ ਦੀਆਂ ਅਰਜੋਈਆਂ ਕਰਦੇ ਹਨ। ਅਜਿਹੇ ’ਚ ਲਾਜਮੀ ਸਿੱਖਿਆ ਅਧਿਕਾਰਾਂ ਅਤੇ ਬਾਲ ਮਜ਼ਦੂਰੀ ਕਾਨੂੰਨ ਬਣਾਉਣ ’ਤੇ ਲਾਹਣਤਾਂ ਪਾਉਣ ਨੂੰ ਜੀਅ ਕਰਦਾ ਹੈ ਕਿ ਆਜ਼ਾਦੀ ਦੀ ਭਾਵਨਾ ਅਜਿਹੀ ਨਹੀਂ ਸੀ ਅਤੇ ਨਾ ਉਸਦੇ ਅਹਿਸਾਸ। ਜਿਨ੍ਹਾਂ ਦੀ ਜ਼ਿੰਦਗੀ ਦੀ ਸਵੇਰ ਢਿੱਡ ਦੀ ਅੱਗ ਬੁਝਾਉਣ ਅਤੇ ਸਿਰ ਦੀ ਛੱਤ ਟੋਲਣ ’ਚ ਰੁਲ ਗਈ ਹੈ।

ਮੇਰੇ ਸੁਤੰਤਰਤਾ ਸੇਨਾਨੀ ਪਿਤਾ ਸਰਦਾਰ ਗੁਰਦੇਵ ਸਿੰਘ ਸ਼ਾਂਤ ਆਖਿਆ ਕਰਦੇ ਸਨ ਕਿ ‘‘ਗਰੀਬ ਦਾ ਢਿੱਡ 10-20 ਹਜ਼ਾਰ ਨਾਲ ਰੱਜ ਸਕਦਾ ਹੈ ਪਰ ਲੀਡਰਾਂ ਦਾ ਢਿੱਡ ਸਾਰੇ ਜਹਾਨ ਨੂੰ ਖਾ ਕੇ ਵੀ ਨਹੀਂ ਭਰ ਸਕਦਾ।’’ ਅੱਖੀਂ ਵੇਖਿਆ ਵਰਤਾਰਾ ਹੈ ਕਿ ਮੁਲਕ ’ਚ ਪੰਜ ਸਾਲਾਂ ਦੀ ਸਿਆਸੀ ‘ਚੌਧਰ’ ਸੈਂਕੜੇ ਕਰੋੜ ਦੀ ਰਿਆਸਤ ਉਸਰ ਦਿੰਦੀ ਹੈ। ਜੇਕਰ ਦਸ ਸਾਲਾਂ ਦਾ ਰਾਜਭਾਗ ਟੱਕਰ ਜਾਵੇ ਤਾਂ ਸੂਬੇ ਦੇ ਸਾਹਾਂ ’ਤੇ ਕਬਜ਼ਾ ਹੋ ਜਾਂਦਾ ਹੈ। 25-30 ਸਾਲਾਂ ਵਾਲੇ ਦੀ ਕਮਾਈ ਬਾਰੇ ਤਾਂ ਰੱਬ ਹੀ ਜਾਣਦਾ ਹੈ ਜਾਂ ਮੰ...ੀ ਬੋਰਡ ਦੇ ਉੱਚੀਆਂ ਮੁੱਛਾਂ ਵਾਲੇ ਬਰਾ... ਸਾਹਿਬ, ਪੰਚਾਇਤੀ ਰਾਜ ਜਾਂ ਡਰੇਨੇਜ ਵਾਲੇ ਫਲਾਣੇ ਸਾਬ੍ਹ। ਕੌੜਾ ਸੱਚ ਹੈ ਕਿ ਸਧਾਰਨ ਵਿਅਕਤੀ ਆਪਣੀ ਜ਼ਿੰਦਗੀ ਭਰ ਦੀ ਕਮਾਈ ਨਾਲ ਇੱਕ ਚੰਗਾ ਘਰ ਵੀ ਨਹੀਂ ਉਸਰ ਸਕਦਾ ਤਾਂ ਫਿਰ ਇਹ ਕਾਹਦੀ ਆਜ਼ਾਦੀ ਅਤੇ ਕਿਹੋ-ਜਿਹਾ ਅਹਿਸਾਸ। ਅੱਜ ਅਸੀਂ ਬਰਾਂਡਿਡ ਕੱਪੜਿਆਂ, ਫਾਸਟ ਫੂਡ ਅਤੇ ਮਹਿੰਗੇ ਮੋਬਾਇਲਾਂ ਨੂੰ ਆਜ਼ਾਦੀ ਦਾ ਨਾਂਅ ਦੇ ਰਹੇ ਹਾਂ ਪਰ ਇਹ ਤਾਂ ਵੱਡਿਆਂ ਦਾ ਫੈਲਾਇਆ ਜਾਲ ਹੈ ਤੁਹਾਡੀ ਹੱਕ-ਸੱਚ ਦੀ ਕਮਾਈ ਨੂੰ ਪਲਾਂ ’ਚ ਖੋਰਨ ਦਾ। ਸਰਕਾਰੀ ਨੀਤੀਆਂ ਅਤੇ ਆਜ਼ਾਦੀ ’ਤੇ ਵੱਡਿਆਂ ਦੇ ਕਬਜ਼ੇ ਕਰਕੇ ਗੁਆਚੇ ਅਹਿਸਾਸਾਂ ’ਚ ਸਧਾਰਨ ਵਿਅਕਤੀ ਅੱਜ ਆਜ਼ਾਦੀ ਦਿਹਾੜੇ ਦੇ ਸਮਾਗਮਾਂ ਤੋਂ ਦੂਰ ਹੋ ਗਿਆ ਹੈ। 

ਆਮ ਸਧਾਰਨ ਵਿਅਕਤੀ ਨੂੰ ਆਜ਼ਾਦੀ ਦਾ ਅਹਿਸਾਸ ਹਾਸਲ ਕਰਨ ਲਈ ਕੁਦਰਤੀ ਕਰਿਸ਼ਮੇ ਨੂੰ ਉਡੀਕਣ ਨਾਲੋਂ ਖੁਦ ਨੂੰ ਸਿੱਖਿਆ, ਸਿਹਤ, ਪਰਿਵਾਰ ਅਤੇ ਸਮਾਜ ਪੱਖੋਂ ਪਰਿਪੂਰਨ ਲਈ ਅੱਜ ਸਾਨੂੰ ਖੁਦ ਨੂੰ ਉਸ ਸੁਪਨੇ ਨਾਲ ਜੋੜਨ ਦੀ ਲੋੜ ਹੈ ਜਿਸ ਨਾਲ ਸਾਡੇ ਨਾਇਕਾਂ-ਸੂਰਮਿਆਂ ਨੇ ਚੜ੍ਹਦੀ ਉਮਰੇ ਉਚੇਰੇ ਆਦਰਸ਼ਾਂ ਲਈ ਫਾਂਸੀ ਦੇ ਰੱਸੇ ਚੁੰਮੇ। 

                                                                                                                   098148-26100/93178-26100

ਹਰਸਿਮਰਤ ਬਾਦਲ ਦੇ ‘ਸਾਂਸਦ ਆਦਰਸ਼ ਗਰਾਮ’ ਮਾਨ ਦੀ ਹਾਲਤ ਨੇ ਕੀਤਾ ‘ਆਦਰਸ਼’ ਸ਼ਬਦ ‘ਬੇਮਾਇਨੇ’

- ਆਦਰਸ਼ ਪਿੰਡ ਦੇ ਬਰਸਾਤੀ ਪਾਣੀ ਲਈ ਨਿਕਾਸੀ ਪ੍ਰਬੰਧ ਵੀ ਫਾਈਲਾਂ ਹੇਠਾਂ ਦੱਬੇ 

- ਰੂੜ੍ਹੀਆਂ, ਗਲੀਆਂ ’ਚ ਗਾਰਾ ਅਤੇ ਕਾਈ ਦਾ ਭਰਿਆ ਛੱਪੜ ਹਕੀਕਤ ਨੂੰ ਕਰਦੇ ਬਿਆਂ

ਇਕਬਾਲ ਸਿੰਘ ਸ਼ਾਂਤ

         ਲੰਬੀ : ਬਾਦਲ ਪਰਿਵਾਰ ਦੀ ਨੂੰਹ ਅਤੇ ਕੇਂਦਰੀ ਵਜਾਰਤ ’ਚ ਅਹਿਮ ਵਜੀਰ ਬੀਬੀ ਹਰਸਿਮਰਤ ਕੌਰ ਬਾਦਲ ਵੱਲੋਂ ਚੁਣਿਆ ‘ਸਾਂਸਦ ਆਦਰਸ਼ ਗਰਾਮ ਮਾਨਾ ਡੇਢ ਸਾਲ ਮਗਰੋਂ ਵੀ ‘ਆਦਰਸ਼’ ਨਹੀਂ ਹੋ ਸਕਿਆ। ਆਦਰਸ਼ ਪਿੰਡ ਵਿੱਚ ਵਿਕਾਸ ਅਤੇ ਸੁਧਾਰ ਪੱਖੋਂ ਲੰਬੀ ਹਲਕੇ ਦੇ ਆਮ ਪਿੰਡਾਂ ਤੋਂ ਕਿਸੇ ਪੱਖੋਂ ਬਿਹਤਰੀ ਨਹੀਂ ਵਿਖਾਈ ਦਿੰਦੀ। 

          ਪਿੰਡ ਦੇ ਬਾਹਰਲੇ ਪਾਸੇ ਬੰਬੀਹਾ ਰੋਡ ’ਤੇ ਛੱਪੜ ਭਰ ਕੇ ਬਣਾਏ ਜਿੰਮ ਖਾਨਾ, ਪੰਚਾਇਤ ਘਰ, ਵਾਲੀਵਾਲ ਗਰਾਊਂਡ ਅਤੇ 62 ਲੱਖ ਰੁਪਏ ਦੀ ਲਾਗਤ ਵਾਲੇ ਛੈੱਡ ’ਤੇ ਆਧਾਰਤ ਕਮਿਊਨਿਸਟ ਸੈਂਟਰ ਨੂੰ ‘ਆਦਰਸ਼ ਵਿਕਾਸ’ ਗਰਦਾਨਿਆ ਜਾ ਰਿਹਾ ਹੈ। ਬਿਨ੍ਹਾਂ ਚਾਰਦੀਵਾਰੀ ਵਾਲਾ ਕਮਿਊਨਿਟੀ ਸੈਂਟਰ ਮੀਂਹ-ਝੱਖੜ ਜਾਂ ਧੁੱਪ ਤੋਂ ਬਚਾਅ ਲਈ ਰੱਤੀ ਭਰ ਵੀ ਸਮਰਥ ਨਹੀਂ। ਪਿੰਡ ਦੇ ਬਾਹਰਲੇ ਪਾਸੇ ਕੀਤੇ ਇਸ ਵਿਕਾਸ ਦਾ ਬੁਨਿਆਦੀ ਲੋੜਾਂ ਲਈ ਜੂਝਦੇ ਲੋਕਾਂ ਨੂੰ ਬੁਨਿਆਦੀ ਪੱਖੋਂ ਕੋਈ ਸਿੱਧਾ ਲਾਹਾ ਨਹੀਂ। 

         ਆਦਰਸ਼ ਹੋਣ ਲਈ ਗਰਾਮ ਪੰਚਾਇਤ ਨੇ ਮਤਾ ਪਾ ਕੇ ਪਿੰਡ ਵਿਚੋਂ ਸ਼ਰਾਬ ਦਾ ਠੇਕਾ ਚੁਕਵਾਇਆ ਸੀ ਪਰ ਹੁਣ ਘਰ-ਘਰ ਸ਼ਰਾਬ ਦੇ ਨਜਾਇਜ਼ ਠੇਕੇ ਖੁੱੱਲ੍ਹ ਗਏ ਹਨ। ਨਜਾਇਜ਼ ਸ਼ਰਾਬ ਪਿੰਡ ਵਾਸੀਆਂ ਲਈ ਵੱਡੀ ਸਮੱਸਿਆ ਬਣ ਚੁੱਕੀ ਹੈ। 

ਆਦਰਸ਼ ਪਿੰਡ ਦੇ ਬਾਸ਼ਿੰਦੇ ਅੱਜ ਵੀ ਮਨੁੱਖੀ ਅਤੇ ਪਸ਼ੂ ਸਿਹਤ ਸੇਵਾਵਾਂ ਲਈ ਗੁਆਂਢੀ ਪਿੰਡ ਬਾਦਲ ’ਤੇ ਮੁਨਹੱਸਰ ਹਨ। ਕਿਰਸਾਨੀ ਕਿੱਤੇ ਦਾ ਅਹਿਮ ਅਦਾਰਾ ਸਹਿਕਾਰੀ ਸੁਸਾਇਟੀ ਵੀ ਤੁਰਦੀ ਫਿਰਦੀ ‘ਫੇਰੀ ਵਾਲੀ’ ਹਾਲਤ ਵਿੱਚ ਹੈ। ਜਿਸਨੂੰ ਆਪਣੇ ਸੰਦ ਅਤੇ ਸਾਜੋ-ਸਮਾਨ ਸਾਂਭਣ ਲਈ ਗੋਦਾਮ ਤਾਂ ਦੂਰ ਲੋੜੀਂਦਾ ਦਫ਼ਤਰ ਤੱਕ ਨਸੀਬ ਨਹੀਂ ਹੋ ਸਕਿਆ। ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦੀ ਵਕਾਰੀ ਸਕੀਮ ‘ਸਵੱਛਤਾ ਮੁਹਿੰਮ’ ਦਾ ਪਿੰਡ ਮਾਨਾ ਅੰਦਰ ਕਿਧਰੇ ਨਾਮੋ-ਨਿਸ਼ਾਨ ਵਿਖਾਈ ਨਹੀਂ ਦਿੰਦਾ। ਪਿੰਡ ਦੀਆਂ ਬਹੁਗਿਣਤੀ ਗਲੀਆਂ ਅਤੇ ਚੌਰਾਹਿਆਂ ’ਤੇ ਰੂੜ੍ਹੀਆਂ ਦੇ ਢੇਰ ਅਤੇ ਛੱਪੜ ਦਾ ਹਰਾ ਕਾਈ ਵਾਲਾ ਪਾਣੀ ਪਿੰਡ ਦੇ ਹਕੀਕੀ ਹਾਲਾਤਾਂ ਨੂੰ ਖੁਦ-ਬ-ਖੁਦ ਬਿਆਨ ਕਰਦੇ ਹਨ। ਪਿੰਡ ਨੂੰ ਹਰਿਆ-ਭਰਿਆ ਕਰਨ ਕੇਂਦਰੀ ਮੰਤਰੀ ਦੀ

ਪ੍ਰੇਰਨਾ ਸਕਦਾ ਲਗਾਏ ਸੈਂਕੜੇ ਪੌਦਿਆਂ ਵਿਚੋਂ ਬਹੁਗਿਣਤੀ ਸਰਕਾਰੀ ਅਣਦੇਖੀ ਅਤੇ ਪਿੰਡਾਂ ਵਾਸੀਆਂ ਵੱਲੋਂ ਸਾਂਭ ਦੀ ਥੁੜ ਕਰਕੇ ਪਰਵਾਨ ਚੜ੍ਹਨ ਤੋਂ ਪਹਿਲਾਂ ਆਪਣੀ ਹੋਣੀ ਹੰਢਾ ਗਏ। ਪਿੰਡ ਦੇ ਛੱਪੜ ਵਿੱਚੋਂ ਕੱਢੀ ਗਾਰ ਦੇ ਢੇਰ ਸਮੱਸਿਆਵਾਂ ਨੂੰ ਵਧਾ ਰਹੇ ਹਨ। ਚਿੱਕੜ ਅਤੇ ਗਾਰੇ ਨਾਲ ਭਰੀ ਫਿਰਨੀ ਆਪਣੀ ਦਿੱਖ ਸੁਧਰਨ ਲਈ ਕੇਂਦਰੀ ਮੰਤਰੀ ਹਰਸਿਮਰਤ ਕੌਰ ਬਾਦਲ ਦੇ ਕਦਮਾਂ ਦੀ ਆਹਟ ਲੋਚਦੀ ਹੈ। ਹਾਲਾਂਕਿ ਪਿੰਡ ਮਾਨ ਵਿੱਚ ਲੰਬੀ ਹਲਕੇ ਦੇ ਹੋਰਨਾਂ ਪਿੰਡਾਂ ਵਾਂਗ 8 ਕਰੋੜ ਰੁਪਏ ਦੀ ਲਾਗਤ ਨਾਲ ਗਲੀਆਂ ਨਾਲੀਆਂ ਨੂੰ ਪੱਕਾ ਕੀਤਾ ਜਾਣਾ ਹੈੈ। ਜਿਸ ਤਹਿਤ ਸਿਰਫ਼ 10-11 ਗਲੀਆਂ ਹੀ ਸੀਮੇਂਟਿਡ ਹੋ ਸਕੀਆਂ ਹਨ ਜਿਨ੍ਹਾਂ ਵਿਚੋਂ ਬਹੁਤੀਆਂ ਅਜੇ ਅਧੂਰੀਆਂ ਹਨ। 

          ਪਿੰਡ ਦੀ ਹਾਲਤ ਬਿਆਨਦੀ ਹੈ ਕਿ ਆਦਰਸ਼ ਪਿੰਡ ਪ੍ਰਤੀ ਜ਼ਿਲ੍ਹਾ ਪ੍ਰਸ਼ਾਸਨ ਦੇ ਉਪਰਾਲੇ ਵੀ ਕੇਂਦਰੀ ਮੰਤਰੀ ਬੀਬੀ ਹਰਸਿਮਰਤ ਕੌਰ ਦੇ ਦੌਰਿਆਂ ਤੱਕ ਹੀ ਮਹਿਜ਼ ਦਸਤਾਵੇਜੀ ਹੀ ਹਨ। ਪਿੰਡ ਵਾਸੀਆਂ ਨੇ ਕਿਹਾ ਕਿ ਅਧਿਕਾਰੀ ਸਿਰਫ਼ ਖਾਣਾਪੂਰਤੀ ਲਈ ਉਨ੍ਹਾਂ ਨਾਲ ਮੀਟਿੰਗ ਕਰਕੇ ਕੇਂਦਰੀ ਮੰਤਰੀ ਮੂਹਰੇ ਨੰਬਰ ਬਣਾਉਣ ਨੂੰ ਤਰਜੀਹ ਦਿੰਦੇ ਹਨ। 

          ਪਿੰਡ ਵਾਸੀਆਂ ਦਾ ਕਹਿਣਾ ਹੈ ਕਿ ਆਦਰਸ਼ ਪਿੰਡ ’ਚ ਵਿਕਾਸ ਕਿਧਰੇ ਵਿਖਾਈ ਨਹੀਂ ਦੇ ਰਿਹਾ। ਰਾਤਾਂ ਨੂੰ ਹਨ੍ਹੇਰੇ ਦੂਰ ਕਰਨ ਲਈ ਆਈਆਂ ਸੋਲਰ ਲਾਈਟਾਂ ਵੀ ਵੱਡਿਆਂ ਦੇ ਘਰਾਂ ਦੇ ਬੂਹੇ ਰੁਸ਼ਨਾਉਣ ਤੱਕ ਸੀਮਤ ਹਨ ਅਤੇ ਗਰੀਬਾਂ ਦੇ ਗਲੀ-ਦਰਵਾਜੇ ਅਜੇ ਵੀ ਹਨ੍ਹੇਰਿਆਂ ਦੇ ਵੱਸ ਪਏ ਹੋਏ ਹਨ। ਗੁਰਦੁਆਰਾ ਖੇਤਰ ਵਿੱਚ ਭਰਦੇ ਬਰਸਾਤੀ ਪਾਣੀ ਦੀ ਛੱਪੜ ਵਿੱਚੋਂ ਟਿਊਬਵੈੱਲਾਂ ਰਾਹੀਂ ਨਿਕਾਸੀ ਦੀ ਮੰਗ ਵੀ ਜ਼ਿਲ੍ਹਾ ਪ੍ਰਸ਼ਾਸਨ ਦੀਆਂ ਫਾਈਲਾਂ ਵਿੱਚ ਗੁਆਚ ਗਈ। ਪ੍ਰਸ਼ਾਸਨ ਤਾਂ ਆਦਰਸ਼ ਪਿੰਡ ਪ੍ਰਤੀ ਇੰਨਾ ਜਾਗਰੂਕ ਹੈ ਕਿ ਡੇਢ ਹਫ਼ਤੇ ਪਹਿਲਾਂ ਪਾਣੀ ਸਪਲਾਈ ਪਾਈਪਾਂ ਦੀ ਦਰੁੱਸਤੀ ਲਈ ਗਊਸ਼ਾਲਾ ਮੂਹਰੇ ਚੌਰਸਤੇ ’ਤੇ ਪੁੱਟੇ ਡੂੁੰਘੇ ਟੋਏ ਅੱਜ ਜਿਉਂ ਦੀ ਤਿਉਂ ਹਨ। 

ਮਾਨਾ ਦੇ ਆਦਰਸ਼ ਪਿੰਡ ਚੁਣੇ ਜਾਣ ਮਗਰੋਂ ਬਠਿੰਡਾ ਲੋਕਸਭਾ ਹਲਕੇ ਤੋਂ ਸੰਸਦ ਮੈਂਬਰ ਬੀਬੀ ਹਰਸਿਮਰਤ ਕੌਰ ਬਾਦਲ ਹੁਣ ਤੱਕ ਲਗਪਗ 5 ਫੇਰੇ ਲਗਾ ਕੇ ਪਿੰਡ ਦੇ ਨੈਣ ਨਕਸ਼ ਬਦਲਣ ਲਈ ਉਪਰਾਲੇ ਕਰ ਚੁੱਕੇ ਹਨ। ਉਂਝ ਅੌਰਤਾਂ ਦੇ ਜੀਵਨ ਪੱਧਰ ਨੂੰ ਸੁਧਾਰਨ ਲਈ ‘ਨੰਨ੍ਹੀ ਛਾਂ’ ਪ੍ਰਾਜੈਕਟ ਤਹਿਤ ਲਗਪਗ 3 ਦਰਜਨ ਅੌਰਤਾਂ ਸਿਲਾਈ-ਕਢਾਈ ਸਿੱਖ ਚੁੱਕੀਆਂ ਹਨ ਅਤੇ ਸਵੈ-ਸਹਾਇਤਾ ਗਰੁੱਪਾਂ ਤਹਿਤ ਕਈ ਅੌਰਤਾਂ ਨੂੰ ਰੁਜ਼ਗਾਰ ਹਾਸਲ ਹੋਇਆ ਹੈ। 28 ਮਈ 2015 ਨੂੰ  ਆਦਰਸ਼ ਪਿੰਡ ਮਾਨ ’ਚ ਇੱਕ ਰੋਜ਼ਾ ਫੂਡ ਪ੍ਰੋਸੈਸਿੰਗ ਸਬੰਧੀ ਸਿਖਲਾਈ ਵਰਕਸ਼ਾਪ ਲਗਾ ਕੇ ਪਿੰਡ ਵਾਸੀਆਂ ਨੂੰ ਜਾਗਰੂਕ ਕੀਤਾ ਗਿਆ ਹੈ। ਪ੍ਰਸ਼ਾਸਨ ਅਤੇ ਕੇਂਦਰੀ ਮੰਤਰੀ ਕਾਫ਼ੀ ਕੋਸ਼ਿਸ਼ਾਂ ਬਾਅਦ ਵੀ ਆਦਰਸ਼ ਪਿੰਡ ਦੇ ਲੋਕਾਂ ਨੂੰ ਸੋਚ ਅਤੇ ਸਾਫ਼-ਸਫ਼ਾਈ ਪੱਖੋਂ ਆਦਰਸ਼ ਬਣਾਉਣ ਵਿੱਚ ਸਫ਼ਲਤਾ ਤੋਂ ਬੇਹੱਦ ਪਿੱਛੇ ਰਹੇ ਹਨ।  

             ਪਿੰਡ ਦੇ ਅਕਾਲੀ ਸਰਪੰਚ ਤੇਜਾ ਸਿੰਘ ਕਹਿਣਾ ਸੀ ਕਿ ਆਦਰਸ਼ ਮਾਨਾ ਵਿੱਚ ਸਰਕਾਰ ਨੇ ਕਮਿਊਨਿਟੀ ਸੈਂਟਰ, ਪੰਚਾਇਤ ਘਰ ਅਤੇ ਜਿੰਮ ਖਾਨਾ ਬਣਾਇਆ ਹੈ। ਗਲੀਆਂ-ਨਾਲੀਆਂ ਬਣਾਉਣ ਦਾ ਕਾਰਜ ਵੱਡੇ ਪੱਧਰ ’ਤੇ ਜਾਰੀ ਹੈ ਅਤੇ ਸਾਰੀਆਂ ਗਲੀਆਂ ਬਣਨਗੀਆਂ। ਉਨ੍ਹਾਂ ਫਿਰਨੀ ਦੀ ਮਾੜੀ ਹਾਲਤ ਬਾਰੇ ਕਿਹਾ ਕਿ ਨਜਾਇਜ਼ ਕਬਜ਼ੇ ਹੋਣ ਕਰਕੇ ਸੜਕ ਨਵੀਂ ਨਹੀਂ ਬਣ ਰਹੀ।