ਨਿਹਾਲਸਿੰਘ ਵਾਲਾ ਅਤੇ ਡੇਰਾ ਬਾਬਾ ਨਾਨਕ 'ਚ 'ਸਵਰਗਵਾਸੀ' ਨਾਇਬ ਤਹਿਸੀਲਦਾਰ ਕਰਿਆ ਕਰਨਗੇ ਰਜਿਸਟਰੀਆਂ

- ਜ਼ਮੀਨੀ ਹਿਸਾਬ ਕਿਤਾਬ ਰੱਖਣ ਵਾਲੇ ਪੰਜਾਬ ਰੈਵਿਨਿਊ ਵਿਭਾਗ ਦੇ ਆਪਣੇ ਖਾਤੇ ਵਿਗੜੇ 
- ਰੈਵਿਨਿਊ ਵਿਭਾਗ ਪੰਜਾਬ ਨੇ 99 ਤਬਾਦਲਿਆਂ ਦੀ ਸੂਚੀ 'ਚ ਸ਼ਾਮਲ ਕੀਤੇ ਦੋ ਮ੍ਰਿਤਕ ਅਤੇ ਤਿੰਨ ਸੇਵਾਮੁਕਤ ਨਾਇਬ ਤਹਿਸੀਲਦਾਰ
                                           ਇਕਬਾਲ ਸਿੰਘ ਸ਼ਾਂਤ

      ਡੱਬਵਾਲੀ: ਲੋਕਾਂ ਦੇ ਜ਼ਮੀਨੀ ਹਿਸਾਬ ਕਿਤਾਬ ਰੱਖਣ ਵਾਲੇ ਪੰਜਾਬ ਰੈਵਿਨਿਊ ਵਿਭਾਗ ਦੇ ਆਪਣੇ ਖਾਤੇ ਵਿਗੜੇ ਪਏ ਹਨ। ਵਿਭਾਗ ਨੇ 99 ਨਾਇਬ ਤਹਿਸੀਲਦਾਰਾਂ ਦੇ ਤਬਾਦਲਿਆਂ ਵਿੱਚ ਦੋ ਮ੍ਰਿਤਕ ਅਤੇ ਤਿੰਨ ਸੇਵਾਮੁਕਤ ਨਾਇਬ ਤਹਿਸੀਲਦਾਰਾਂ ਨੂੰ ਹੀ ਨਵੇਂ ਸਟੇਸ਼ਨਾਂ 'ਤੇ ਤਬਦੀਲ ਕਰਕੇ ਤਾਇਨਾਤ ਕਰ ਦਿੱਤਾ। ਵਿਭਾਗੀ ਨਿਕੰਮੇਪਨ ਨੂੰ ਤਬਾਦਲਾ ਸੂਚੀ ਵਿੱਚ ਦਰਜ ਪਹਿਲਾਂ ਨਾਂਅ ਹੀ ਉਜਾਗਰ ਕਰਦਾ ਜਿਸ ਵਿੱਚ ਪਹਿਲੇ ਨੰਬਰ 'ਤੇ ਦਰਜ ਨਾਇਬ ਤਹਿਸੀਲਦਾਰ ਨਰਿੰਦਰ ਕੁਮਾਰ ਦਾ ਜਨਵਰੀ 2019 ਵਿੱਚ ਸਵਰਗਵਾਸ ਹੋ ਚੁੱਕਿਆ ਹੈ। ਜਦੋਂਕਿ ਵਿਭਾਗ ਨੇ ਉਨ•ਾਂ ਦਾ ਤਬਾਦਲਾ

ਫਿਰੋਜ਼ਪੁਰ ਤੋਂ ਮੋਗਾ ਜ਼ਿਲ•ਾ ਦੇ ਨਿਹਾਲਸਿੰਘ ਵਾਲਾ ਵਿਖੇ ਕਰ ਦਿੱਤਾ। ਇਸਦੇ ਇਲਾਵਾ ਤਬਾਦਲਾ ਸੂਚੀ ਵਿੱਚ 74 ਨੰਬਰ 'ਤੇ ਦਰਜ ਨਾਇਬ ਤਹਿਸੀਲਦਾਰ ਗੁਰਵਿੰਦਰ ਸਿੰਘ ਦੀ ਕੁਝ ਮਹੀਨੇ ਪਹਿਲਾਂ ਮੌਤ ਹੋ ਚੁੱਕੀ ਹੈ। ਉਨ•ਾਂ ਨੂੰ ਭਿੱਖੀਵਿੰਡ ਤੋਂ ਡੇਰਾ ਬਾਬਾ ਨਾਨਕ ਲਗਾਇਆ ਗਿਆ ਹੈ। 

ਇਸਦੇ ਇਲਾਵਾ ਸੂਚੀ ਵਿੱਚ ਨੌਵੇਂ ਨੰਬਰ 'ਤੇ ਦਰਜ ਅਸ਼ੋਕ ਕੁਮਾਰ ਨੂੰ ਫਾਜਿਲਕਾ ਤੋਂ ਬਾਘਾਪੁਰਾਣਾ ਲਗਾਇਆ ਗਿਆ ਹੈ। ਜਦੋਂਕਿ ਅਸ਼ੋਕ ਕੁਮਾਰ ਨਾਇਬ ਤਹਿਸੀਲਦਾਰ ਬੀਤੀ 31 ਦਸੰਬਰ 2018 ਨੂੰ ਹੀ ਫਾਜਿਲਕਾ ਤੋਂ ਸੇਵਾਮੁਕਤ ਹੋ ਚੁੱਕੇ ਹਨ। ਇੱਕ ਹੋਰ ਜਾਣਕਾਰੀ ਅਨੁਸਾਰ ਪਿਛਲੇ ਵਰ•ੇ 2018 'ਚ ਸੇਵਾਮੁਕਤ ਹੋ ਚੁੱਕੇ ਬਖ਼ਸ਼ੀਸ਼ ਸਿੰਘ ਨੂੰ ਤਬਾਦਲਾ ਸੂਚੀ 'ਚ 96 ਨੰਬਰ 'ਤੇ ਹਾਜੀਪਰ ਤੋਂ ਨੌਸ਼ਹਿਰਾ ਪੰਨੂਆ ਲਗਾਇਆ ਦਰਸਾਇਆ ਗਿਆ ਹੈ। ਇਸ ਕਾਰਗੁਜਾਰੀ ਤੋਂ ਜਾਪਦਾ ਹੈ ਕਿ  ਲਗਪਗ ਸੌ ਫੀਸਦੀ ਕੰਪਿਊਟਰਾਇਜ਼ਡ ਹੋ ਚੁੱਕਿਆ ਰੈਵਿਨਿਊ ਵਿਭਾਗ ਅਜੇ ਬਾਬਾ ਆਦਮ ਦੇ ਜ਼ਮਾਨੇ ਵਿੱਚ ਕੀੜੀ ਚਾਲ ਚੱਲ ਰਿਹਾ ਹੈ। ਜਿਸਨੂੰ ਆਪਣੇ ਫੌਤ ਅਤੇ ਸੇਵਾਮੁਕਤ ਅਧਿਕਾਰੀਆਂ ਅਧਿਕਾਰੀਆਂ ਅੰਕੜੇ ਸਹੇਜਣ ਦਾ ਜੁਗਾੜ ਨਹੀਂ ਹੈ। ਫਾਜਿਲਕਾ ਤੋਂ ਸੇਵਾਮੁਕਤ ਨਾਇਬਤਹਿਸੀਲਦਾਰ ਅਸ਼ੋਕ ਕੁਮਾਰ ਨੇ ਆਖਿਆ ਕਿ ਉਹ 31 ਦਸੰਬਰ 2018 ਨੂੰ ਸੇਵਾਮੁਕਤ ਹੋ ਗਏ ਸਨ ਅਤੇ ਉਨ•ਾਂ ਦੀ ਜਗ•ਾ ਅਜੇ ਵੀ ਖਾਲੀ ਪਈ ਹੈ। ਸੂਚੀ ਵਿੱਚ ਨੰਬਰ 35 'ਤੇ ਤਬਦੀਲ ਕੀਤੇ ਗਏ ਜੌਹਰੀ ਰਾਮ ਵੀ ਬਕਾਇਦਾ ਸੇਵਾਮੁਕਤ ਹੈ। ਤਬਾਦਲਾ ਸੂਚੀ ਵਿੱਚ ਅਜਿਹਾ ਤਕਨੀਕੀ ਖਾਮੀ ਕਰਕੇ ਹੋਇਆ ਹੈ। ਇਹ ਆਮ ਗੱਲ ਹੈ ਵਿਭਾਗ ਉਸਨੂੰ ਦਰੁੱਸਤ ਕਰ ਦੇਵੇਗਾ। ਇਸ ਬਾਰੇ ਪੰਜਾਬ ਦੇ ਰੈਵਿਨਿਊ ਮੰਤਰੀ ਸੁਖਬਿੰਦਰ ਸਿੰਘ ਸਰਕਾਰੀਆ ਦਾ ਕਹਿਣਾ ਸੀ ਕਿ ਨਹੀਂ-ਨਹੀਂ ਤੁਹਾਨੂੰ ਕੋਈ ਭੁਲੇਖਾ ਪਿਆ ਹੈ। ਤੁਹਾਨੂੰ ਕਿਸੇ ਨੇ ਗਲਤ ਦੱਸਿਆ ਹੈ। ਇਹ ਮਤਲਬ ਹੀ ਨਹੀਂ। ਡਿਪਾਰਟਮੈਂਟ ਵਿੱਚ ਇੱਦਾਂ ਥੋੜ•ੀ ਹੋ ਸਕਦਾ ਹੈ। ਕਈ ਵਾਰ ਇੱਕ ਨਾਂਅ ਵਾਲੇ ਕਈ-ਕਈ ਅਧਿਕਾਰੀ ਹੁੰਦੇ ਹਨ। ਸ੍ਰੀ ਸਰਕਾਰੀਆ ਨੇ ਆਖਿਆ ਕਿ ਫਿਰ ਵੀ ਮੈਂ ਚੈੱਕ ਕਰਦਾ ਹਾਂ। 

ਬਾਬਾ ਨਾਨਕ ਦੇ ਚਰਨ ਛੋਹ ਵਾਲੇ 41 ਪਿੰਡ ਹੋਣਗੇ 'ਨਿਹਾਲ'

                                                        ਬੁਲੰਦ ਸੋਚ ਬਿਊਰੋ

ਚੰਡੀਗੜ-ਪੰਜਾਬ ਦੇ ਮੁੱਖ ਮੰਤਰੀ ਕੈਪਟਨ ਅਮਰਿੰਦਰ ਸਿੰਘ ਨੇ ਐਲਾਨ ਕੀਤਾ ਹੈ ਕਿ ਉਹ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ 550ਵੇਂ ਪ੍ਰਕਾਸ਼ ਪੁਰਬ ਨਾਲ ਸਬੰਧਿਤ ਤਿਆਰੀਆਂ ਦੀ ਪ੍ਰਗਤੀ ਦਾ ਖੁਦ ਨਿੱਜੀ ਤੌਰ ’ਤੇ ਹਰ ਪੰਦਰਾ ਦਿਨਾਂ ਬਾਅਦ ਜਾਇਜ਼ਾ ਲਿਆ ਕਰਨਗੇ । ਇਸ ਮਹਾਨ ਸਮਾਰੋਹ ਦੇ ਪ੍ਰਬੰਧਾਂ ਦਾ ਜਾਇਜ਼ਾ ਲੈਣ ਲਈ ਕਾਰਜਕਾਰੀ ਕਮੇਟੀ ਦੀ ਮੀਟਿੰਗ ਦੀ ਪ੍ਰਧਾਨਗੀ ਕਰਦੇ ਹੋਏ ਉਨਾਂ ਨੇ ਕਿਹਾ ਕਿ ਉਹ ਇਸ ਮਕਸਦ ਲਈ ਹਰੇਕ ਮਹੀਨੇ ਦੀ ਪਹਿਲੀ ਅਤੇ 15 ਤਰੀਕ ਨੂੰ ਮੀਟਿੰਗ ਸੱਦਣਗੇ । ਮੁੱਖ ਮੰਤਰੀ ਨੇ ਸੈਰ ਸਪਾਟਾ ਤੇ ਸਭਿਆਚਾਰਕ ਮਾਮਲਿਆਂ ਦੇ ਮੰਤਰੀ ਨਵਜੋਤ ਸਿੰਘ ਸਿੱਧੂ ਅਤੇ ਸਹਿਕਾਰਤਾ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ

ਆਧਾਰਿਤ ਕੈਬਨਿਟ ਸਬ ਕਮੇਟੀ ਨੂੰ ਨਿਰਦੇਸ਼ ਦਿੱਤੇ ਹਨ ਕਿ ਉਹ ਰੋਜ਼ਮਰਾ ਦੇ ਆਧਾਰ ’ਤੇ ਪ੍ਰਗਤੀ ’ਤੇ ਨਿਗਰਾਨੀ ਰੱਖਣ ਅਤੇ ਉਨਾਂ ਨੂੰ ਲਗਾਤਾਰ ਇਸ ਬਾਰੇ ਜਾਣਕਾਰੀ ਦੇਣ। ਮੀਟਿੰਗ ਵਿੱਚ ਫੈਸਲਾ ਕੀਤਾ ਗਿਆ ਕਿ ਮੁੱਖ ਸਮਾਰੋਹ 12 ਨਵੰਬਰ, 2019 ਨੂੰ ਸੁਲਤਾਨਪੁਰ ਲੋਧੀ ਵਿੱਚ ਆਯੋਜਿਤ ਕਰਵਾਇਆ ਜਾਵੇਗਾ ਜਿਥੇ ਗੁਰੂ ਜੀ ਨੇ ਆਪਣੇ ਜੀਵਨ ਦੇ ਤਕਰੀਬਨ 18 ਸਾਲ ਗੁਜਾਰੇ ਸਨ। ਉਨਾਂ ਨੇ ਸੁਲਤਾਨਪੁਰ ਲੋਧੀ ਵਿਖੇ ਬੇਬੇ ਨਾਨਕੀ ਸਰਕਾਰੀ ਕਾਲਜ (ਲੜਕੀਆਂ) ਸ਼ੁਰੂ ਕਰਨ ਲਈ ਵੀ ਪ੍ਰਵਾਨਗੀ ਦੇ ਦਿੱਤੀ ਜੋ ਕਿ ਪਹਿਲਾਂ ਹੀ ਗੂਰੂ ਨਾਨਕ ਦੇਵ ਯੂਨੀਵਰਸਿਟੀ ਰਿਜਨਲ ਕੈਂਪਸ ਫੱਤੂ ਢੀਂਗਾ ਵਿਖੇ ਯੂਨੀਵਰਸਿਟੀ ਦੇ ਅੰਗ ਵਜੋਂ ਮੌਜੂਦ ਹੈ।
ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ ਦੇ ਵਾਈਸ ਚਾਂਸਲਰ ਨੇ ਮੁੱਖ ਮੰਤਰੀ ਨੂੰ ਬੇਨਤੀ ਕੀਤੀ ਕਿ ਇਸ ਅਤਿਆਧੁਨਿਕ ਰਿਜਨਲ ਸੈਂਟਰ ਨੂੰ ਆਪਣੇ ਹੱਥ ਵਿੱਚ ਲੈਣ ਤਾਂ ਜੋ ਮੌਜੂਦਾ ਅਕਾਦਮਿਕ ਸੈਸ਼ਨ ਤੋਂ ਕਲਾਸਾਂ ਸ਼ੁਰੂ ਹੋ ਸਕਣ। ਕੈਪਟਨ ਅਮਰਿੰਦਰ ਸਿੰਘ ਨੇ ਸ੍ਰੀ ਗੁਰੂ ਨਾਨਕ ਦੇਵ ਜੀ ਦੇ ਚਰਨ ਛੂਹ ਪ੍ਰਾਪਤ 41 ਪਿੰਡਾਂ ਦੇ ਵਿਕਾਸ ਦੀ ਯੋਜਨਾ ਹੇਠ ਪਹਿਲੇ ਪੜਾਅ ਵਿੱਚ ਹਰੇਕ ਪਿੰਡ ਲਈ ਘੱਟੋ-ਘੱਟ 20-25 ਲੱਖ ਰੁਪਏ ਦੇ ਫੰਡ ਪ੍ਰਵਾਨ ਕਰਨ ਲਈ ਦਿਹਾਤੀ ਵਿਕਾਸ ਤੇ ਪੰਚਾਇਤ ਵਿਭਾਗ ਨੂੰ ਆਖਿਆ ਹੈ। ਮੁੱਖ ਮੰਤਰੀ ਨੇ ਇਨਾਂ ਸਮਾਰੋਹਾਂ ਵਿੱਚ ਸ਼ਾਮਲ ਹੋਣ ਲਈ ਉਘੇ ਅਕਾਦਮੀਸ਼ਨਾਂ, ਉਘੀ ਸ਼ਖਸ਼ੀਅਤਾਂ, ਸਿਆਸਤਦਾਨਾਂ, ਧਾਰਮਿਕ ਸਖਸ਼ੀਅਤਾਂ ਅਤੇ ਦੂਨੀਆਂ ਭਰ ਵਿੱਚ ਵਸਦੇ ਉੱਘੇ ਪੰਜਾਬੀਆਂ ਨੂੰ ਸੱਦਾ ਭੇਜਣ ਵਾਸਤੇ ਸਭਿਆਚਾਰ ਮਾਮਲਿਆਂ ਅਤੇ ਸੈਰ ਸਪਾਟਾ ਵਿਭਾਗ ਨੂੰ ਆਖਿਆ ਹੈ। ਉਨਾਂ ਨੇ ਇਤਿਹਾਸਕ ਸੁਲਤਾਨਪੁਰ ਲੋਧੀ ਗੁਰਦੁਵਾਰਾ ਵਿੱਖੇ ਨਤਮਸਤਕ ਹੋਣ ਵਾਲੇ ਲੱਖਾਂ ਸ਼ਰਧਾਲੂਆਂ ਲਈ ਪੂਰੇ ਸੁਰੱਖਿਆ ਪ੍ਰਬੰਧ ਯਕੀਨੀ ਬਣਾਉਣ ਲਈ ਵਧੀਕ ਮੁੱਖ ਸਕੱਤਰ ਗ੍ਰਹਿ ਨੂੰ ਨਿਰਦੇਸ਼ ਦਿੱਤੇ ਹਨ। ਵਧੀਕ ਮੁੱਖ ਸਕੱਤਰ ਮਕਾਨ ਉਸਾਰੀ ਅਤੇ ਸ਼ਹਿਰੀ ਵਿਕਾਸ ਨੇ ਮੀਟਿੰਗ ਦੌਰਾਨ ਦੱਸਿਆ ਕਿ ਜਿਸ ਫਰਮ ਨੇ ਸ੍ਰੀ ਗੁਰੂ ਗੋਬਿੰਦ ਸਿੰਘ ਜੀ ਦੇ 300ਵੇਂ ਪ੍ਰਕਾਸ਼ ਪੁਰਬ ਮੌਕੇ ਪਟਨਾ ਸਾਹਿਬ ਵਿਖੇ ਟੈਂਟ ਸਿਟੀ ਤਿਆਰ ਕੀਤੀ ਸੀ ਉਸ ਦੀਆਂ ਸੇਵਾਵਾਂ ਹੀ ਸੁਲਤਾਨਪੁਰ ਲੋਧੀ ਦੇ ਆਲੇ-ਦੁਆਲੇ ਵੱਖ ਵੱਖ ਥਾਵਾਂ ’ਤੇ ਟੈਂਟਾਂ ਵਾਲੀ ਰਿਹਾਇਸ਼ ਦਾ ਪ੍ਰਬੰਧ ਕਰਨ ਲਈ ਲਈਆਂ ਗਈਆਂ ਹਨ। ਇਹ ਤਕਰੀਬਨ 25 ਹਜ਼ਾਰ ਤੋਂ 30 ਹਜ਼ਾਰ ਲੋਕਾਂ ਲਈ ਕੀਤਾ ਜਾਵੇਗਾ ਜੋ ਤਕਰੀਬਨ 40000 ਲੋਕਾਂ ਤੱਕ ਵਧਾਇਆ ਜਾ ਸਕਦਾ ਹੈ। ਮੀਟਿੰਗ ਦੌਰਾਨ ਸੁਲਤਾਲਪੁਰ ਲੋਧੀ ਵਿਖੇ ਇਤਿਹਾਸਕ ਸਮਾਰਕਾਂ ਦੀ ਸੰਭਾਲ ਬਾਰੇ ਵੀ ਵਿਚਾਰ ਵਟਾਂਦਰਾ ਕੀਤਾ ਗਿਆ ਜਿਸਦੇ ਵਾਸਤੇ ਸੱਭਿਆਚਾਰ ਮਾਮਲਿਆਂ ਦੇ ਵਿਭਾਗ ਵੱਲੋਂ ਪਹਿਲਾਂ ਹੀ ਟੈਂਡਰ ਜਾਰੀ ਕੀਤੇ ਗਏ ਹਨ ਅਤੇ ਇਹ ਕੰਮ 30 ਸਤੰਬਰ, 2019 ਤੱਕ ਮੁਕੰਮਲ ਹੋ ਜਾਵੇਗਾ। ਕੈਬਨਿਟ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ ਦੀ ਗੁਰੂ ਨਾਨਕ ਮਾਰਗ ਦੀ ਸ਼ਨਾਖਤ ਕਰਨ ਸਬੰਧੀ ਬੇਨਤੀ ਨੂੰ ਪ੍ਰਵਾਨ ਕਰਦੇ ਹੋਏ ਮੁੱਖ ਮੰਤਰੀ ਨੇ ਸੁਲਤਾਨਪੁਰ ਲੋਧੀ ਤੋਂ ਡੇਰਾ ਬਾਬਾ ਨਾਨਕ ਵਾਇਆ ਢਿਲਵਾਂ, ਰਈਆ, ਬਾਬਾ ਬਕਾਲਾ, ਚੌਂਕ ਮਹਿਤਾ ਦੇ ਰੂਟ ਨੂੰ ਵਿਕਸਿਤ ਕਰਨ ਲਈ ਪ੍ਰਵਾਨਗੀ ਦੇ ਦਿੱਤੀ ਹੈ ਜਿਸਦੇ ਉੱਤੇ ‘ਵਿਆਹ ਬਾਬੇ ਨਾਨਕ ਦਾ’ ਦੇ ਪਵਿੱਤਰ ਮੌਕੇ ਸਲਾਨਾ ਨਗਰ ਕੀਰਤਨ ਕਰਾਇਆ ਜਾਂਦਾ ਹੈ। 

ਪ੍ਰਮੁੱਖ ਸਕੱਤਰ ਟਰਾਂਸਪੋਰਟ ਨੇ ਮੀਟਿੰਗ ਦੌਰਾਨ ਦੱਸਿਆ ਕਿ ਵਿਭਾਗ ਦੇਸ਼ ਭਰ ਤੋਂ ਪੰਜਾਬ ਲਈ ਵਿਸ਼ੇਸ਼ ਰੇਲ ਗੱਡੀਆਂ ਚਲਾਉਣ ਵਾਸਤੇ ਰੇਲਵੇ ਵਿਭਾਗ ਨਾਲ ਲਗਾਤਾਰ ਸੰਪਰਕ ਵਿੱਚ ਹੈ। ਮੁੱਖ ਮੰਤਰੀ ਨੇ ਇਸ ਪਵਿੱਤਰ ਮੌਕੇ ਮੈਟਲਜ ਐਂਡ ਮਿਨਰਲਜ਼ ਟ੍ਰੇਡਿੰਗ ਕਾਰਪੋਰੇਸ਼ਨ ਆਫ ਇੰਡੀਆ ਦੇ ਰਾਹੀਂ 5 ਗ੍ਰਾਮ ਦਾ ਸੋਨੇ ਅਤੇ 50 ਗ੍ਰਾਮ ਦਾ ਚਾਂਦੀ ਦਾ ਯਾਦਗਾਰੀ ਸਿੱਕੇ ਦੇ ਵਾਸਤੇ ਪੰਜਾਬ ਰਾਜ ਉਦਯੋਗ ਅਤੇ ਬਰਾਮਦ ਕਾਰਪੋਰੇਸ਼ਨ ਨੂੰ ਪ੍ਰਵਾਨਗੀ ਦੇ ਦਿੱਤੀ ਹੈ। 

ਵਧੀਕ ਮੁੱਖ ਸਕੱਤਰ ਜੰਗਲਾਤ ਨੇ ਮੁੱਖ ਮੰਤਰੀ ਨੂੰ ਦੱਸਿਆ ਕਿ ਸੂਬੇ ਦੇ ਹਰੇਕ ਪਿੰਡ ਵਿੱਚ 550 ਪੌਦੇ ਲਾਉਣ ਦੀ ਪ੍ਰਕਿਰਿਆ 30 ਸਤੰਬਰ, 2019 ਤੱਕ ਮੁਕੰਮਲ ਹੋ ਜਾਵੇਗੀ। ਸੂਬੇ ਦੇ ਜੰਗਲਾਤ ਵਿਭਾਗ ਵੱਲੋਂ ਕੁੱਲ 75 ਲੱਖ ਪੌਦੇ ਮੁਹਈਆ ਕਰਵਾਏ ਜਾਣਗੇ ਅਤੇ ਜਿਨਾਂ ਥਾਵਾਂ ’ਤੇ ਇਹ ਪੌਦੇ ਲਾਏ ਜਾਣੇ ਹਨ ਉਹ ਦਿਹਾਤੀ ਵਿਕਾਸ ਤੇ ਪੰਚਾਇਤ ਵਿਭਾਗ ਵੱਲੋਂ ਮਨਰੇਗਾ ਸਕੀਮ ਹੇਠ ਮੁਹਈਆ ਕਰਵਾਇਆ ਜਾਵੇਗਾ। ਪ੍ਰਮੁੱਖ ਸਕੱਤਰ ਪੀ.ਡਬਲਯੂ.ਡੀ (ਬੀ ਐਂਡ ਆਰ) ਨੇ ਦੱਸਿਆ ਕਿ ਸੁਲਤਾਨਪੁਰ ਲੋਧੀ-ਫੱਤੂ ਢੀਂਗਾ ਸੜਕ ’ਤੇ ਗੁਰਦਆਰਾ ਬੇਰ ਸਾਹਿਬ ਨੇੜੇ ਕਾਲੀ ਬੇਈਂ ’ਤੇ 2 ਨਵੇਂ ਪੁਲ ਅਤੇ 2 ਨਵੇਂ ਪੈਦਲ ਲੰਘਣ ਵਾਲਿਆਂ ਲਈ ਪੁਲ ਤੋਂ ਇਲਾਵਾ ਸੜਕਾਂ ਨੂੰ ਚੌੜਾ ਕਰਨਾ ਅਤੇ ਮਜ਼ਬੂਤ ਬਣਾਉਣ ਦਾ ਕੰਮ 9.44 ਕਰੋੜ ਰੁਪਏ ਦੀ ਲਾਗਤ ਨਾਲ ਸਮੇਂ ਸਿਰ ਮੁਕੰਮਲ ਕਰ ਲਿਆ ਜਾਵੇਗਾ। 

ਸੁਲਤਾਨਪੁਰ ਲੋਧੀ ਦੇ ਕੋਲੋਂ ਲੰਘਦੀ ਕਾਲੀ ਬੇਈਂ ਦੇ ਇੱਕ ਹਿੱਸੇ ’ਤੇ ਪੱਥਰ ਲਾਉਣ ਦੇ ਸਬੰਧ ਵਿੱਚ ਜਲ ਸ੍ਰੋਤ ਵਿਭਾਗ ਦੇ ਪ੍ਰਮੁੱਖ ਸਕੱਤਰ ਨੇ ਦੱਸਿਆ ਕਿ ਕਾਰ ਸੇਵਾ ਦੇ ਰਾਹੀਂ ਇਸ ਪ੍ਰਾਜੈਕਟ ਉਪਰ ਕੰਮ ਛੇਤੀ ਹੀ ਸ਼ੁਰੂ ਕੀਤਾ ਜਾਵੇਗਾ। ਇਹ ਕੰਮ ਉੱਘੇ ਵਾਤਾਵਰਣ ਪ੍ਰੇਮੀ ਬਾਬਾ ਬਲਬੀਰ ਸਿੰਘ ਸੀਚੇਵਾਲ ਵੱਲੋਂ ਸ਼ੁਰੂ ਕੀਤਾ ਜਾਵੇਗਾ। ਇਸ ਦੇ ਵਾਸਤੇ 3.86 ਕਰੋੜ ਰੁਪਏ ਦੀ ਸਮੱਗਰੀ ਵਿਭਾਗ ਵੱਲੋਂ ਸਪਲਾਈ ਕੀਤੀ ਜਾਵੇਗੀ। ਮੀਟਿੰਗ ਦੌਰਾਨ ਇਹ ਵੀ ਦੱਸਿਆ ਕਿ ਸੁਰਜੀਤ ਪਾਤਰ ਦੀ ਅਗਵਾਈ ਵਿੱਚ ਗਠਿਤ ਕੀਤੀ ਇਕ ਸਬ-ਕਮੇਟੀ ਨੇ ਪਹਿਲਾਂ ਹੀ ਪੰਜਾਬੀ, ਹਿੰਦੀ ਅਤੇ ਅੰਗਰੇਜੀ ਵਿੱਚ ਕਾਫੀ ਟੇਬਲ ਬੁੱਕ ਪ੍ਰਕਾਸ਼ਿਤ ਕਰਨ ਲਈ ਕੰਮ ਸ਼ੁਰੂ ਕਰ ਦਿੱਤਾ ਹੈ ਜਿਸ ਨੂੰ ਛੇਤੀ ਹੀ ਅੰਤਿਮ ਰੂਪ ਦੇ ਦਿੱਤਾ ਜਾਵੇਗਾ। ਇਸੇ ਤਰਾਂ ਹੀ ਗੁਰੂ ਨਾਨਕ ਦੇਵ ਜੀ ਬਾਰੇ ਦੋ ਕਿਤਾਬਾਂ ਗੁਰੂ ਨਾਨਕ ਦੇਵ ਯੂਨੀਵਰਸਿਟੀ, ਅੰਮਿ੍ਰਤਸਰ ਅਤੇ ਇੱਕ ਹੋਰ ਕਿਤਾਬ ਗੁਰੂ ਨਾਨਕ ਦੇਵ ਜੀ ਦੀ ਬਾਣੀ ਪੰਜਾਬੀ ਯੂਨੀਵਰਸਿਟੀ ਵੱਲੋਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ। ਇਹ ਪੁਸਤਕਾਂ 20 ਜੂਨ, 2019 ਤੱਕ ਤਿਆਰ ਹੋ ਜਾਣਗੀਆਂ। 

ਇਸ ਮੌਕੇ ਹਾਜ਼ਰ ਹੋਰਨਾਂ ਵਿੱਚ ਸਿਹਤ ਮੰਤਰੀ ਬ੍ਰਹਮ ਮਹਿੰਦਰਾ, ਸੈਰ ਸਪਾਟਾ ਅਤੇ ਸਭਿਆਚਾਰਕ ਮਾਮਲਿਆਂ ਬਾਰੇ ਮੰਤਰੀ ਨਵਜੋਤ ਸਿੰਘ ਸਿੱਧੂ, ਵਿੱਤ ਮੰਤਰੀ ਮਨਪ੍ਰੀਤ ਸਿੰਘ ਬਾਦਲ, ਦਿਹਾਤੀ ਵਿਕਾਸ ਅਤੇ ਪੰਚਾਇਤ ਮੰਤਰੀ ਸ੍ਰੀ ਤਿ੍ਰਪਤ ਰਜਿੰਦਰ ਸਿੰਘ ਬਾਜਵਾ, ਉੱਚ ਸਿੱਖਿਆ ਮੰਤਰੀ ਰਜੀਆ ਸੁਲਤਾਨਾ, ਸਹਿਕਾਰਤਾ ਮੰਤਰੀ ਸੁਖਜਿੰਦਰ ਸਿੰਘ ਰੰਧਾਵਾ, ਟਰਾਂਸਪੋਰਟ ਮੰਤਰੀ ਅਰੁਣਾ ਚੌਧਰੀ, ਲੋਕ ਨਿਰਮਾਣ ਮੰਤਰੀ ਵਿਜੈ ਇੰਦਰ ਸਿੰਗਲਾ, ਐਮ ਪੀ ਗੁਰਦਾਸਪੁਰ ਸੁਨੀਲ ਜਾਖੜ, ਮੁੱਖ ਮੰਤਰੀ ਦੇ ਮੀਡੀਆ ਸਲਾਹਕਾਰ  ਰਵੀਨ ਠੁਕਰਾਲ, ਵਿਧਾਇਕ ਸੁਲਤਾਨਪੁਰ ਲੋਧੀ, ਨਵਤੇਜ ਸਿੰਘ ਚੀਮਾ, ਮੁੱਖ ਸਕੱਤਰ ਕਰਨ ਅਵਤਾਰ ਸਿੰਘ, ਮੁੱਖ ਮੰਤਰੀ ਦੇ ਪ੍ਰਮੁੱਖ ਸਕੱਤਰ ਤੇਜਵੀਰ ਸਿੰਘ, ਡੀ.ਜੀ.ਪੀ. ਦਿਨਕਰ ਗੁਪਤਾ, ਏਸੀਐਸ ਗ੍ਰਹਿ ਨਿਰਮਲ ਸਿੰਘ ਕਲਸੀ, ਏਸੀਐਸ ਹਾਊਸਿੰਗ ਐਂਡ ਅਰਬਨ ਡਿਵੈਲਪਮੈਂਟ ਵਿਨੀ ਮਹਾਜਨ, ਏਸੀਐਸ ਜੰਗਲਾਤ ਰੋਸ਼ਨ ਸੁੰਕਾਰੀਆ, ਪ੍ਰਮੁੱਖ ਸਕੱਤਰ ਵਿੱਤ ਅਨਿਰੁੱਧ ਤਿਵਾੜੀ, ਪ੍ਰਮੁੱਖ ਸਕੱਤਰ ਸਥਾਨਕ ਸਰਕਾਰਾਂ ਏ.ਵੇਨੂ ਪ੍ਰਸਾਦ, ਪ੍ਰਮੁੱਖ ਸਕੱਤਰ ਪੇਂਡੂ ਵਿਕਾਸ ਅਤੇ ਪੰਚਾਇਤਾਂ ਅਨੁਰਾਗ ਵਰਮਾ ਅਤੇ ਡਿਪਟੀ ਕਮਿਸਨਰ ਕਪੂਰਥਲਾ ਡੀ.ਪੀ.ਐਸ ਖਬਰਬੰਦਾ ਹਾਜ਼ਰ ਸਨ। 

ਪੰਜਾਬ ਵਿੱਚ 2140 ਧੋਖੇਬਾਜ਼ ਟਰੈਵਲ ਏਜੰਟ ਕਾਨੂੰਨੀ ਸਿਕੰਜੇ ’ਚ ਫਸੇ

                                                ਬੁਲੰਦ ਸੋਚ ਬਿਊਰੋ

ਚੰਡੀਗੜ: ਪੰਜਾਬ ਸਰਕਾਰ ਨੇ ਮਾਰਚ, 2017 ਵਿੱਚ ਸੱਤਾ ’ਚ ਆਉਣ ਤੋਂ ਬਾਅਦ ਧੋਖਾਧੜੀ ਕਰਨ ਵਾਲੇ ਟਰੈਵਲ ਏਜੰਟਾਂ ਖਿਲਾਫ ਵੱਡੀ ਕਾਰਵਾਈ ਕਰਦਿਆਂ ਵੱਖ-ਵੱਖ ਐਕਟਾਂ ਅਧੀਨ 2140 ਕੇਸ ਦਰਜ ਕੀਤੇ ਹਨ।  ਇਹ ਖੁਲਾਸਾ ਅੱਜ ਇੱਥੇ ਸੰਸਦੀ ਮਾਮਲਿਆਂ ਬਾਰੇ ਮੰਤਰੀ ਬ੍ਰਹਮ ਮਹਿੰਦਰਾ ਨੇ ਮੁੱਖ ਮੰਤਰੀ ਦੀ ਤਰਫੋਂ ਵਿਧਾਇਕ ਕੰਵਰ ਸੰਧੂ ਵੱਲੋਂ ਲਿਆਂਦੇ ਧਿਆਨ ਦਿਵਾੳੂ ਮਤੇ ਦੇ ਜਵਾਬ ਵਿੱਚ ਕੀਤਾ। ਇਨਾਂ 2140 ਮਾਮਲਿਆਂ ਵਿੱਚੋਂ ਆਈ.ਪੀ.ਸੀ. ਦੀ ਧਾਰਾ 420 ਤਹਿਤ 1107 ਕੇਸ, ਦਾ ਪੰਜਾਬ ਟਰੈਵਲ ਪ੍ਰੋਫੈਸ਼ਨਲਜ਼ ਰੈਗੂਲੇਸ਼ਨ ਐਕਟ-2014 ਤਹਿਤ 528 ਅਤੇ ਇਮੀਗ੍ਰੇਸ਼ਨ ਐਕਟ-1983 ਤਹਿਤ 505 ਕੇਸ ਦਰਜ ਕੀਤੇ ਗਏ

ਹਨ। ਸ੍ਰੀ ਬ੍ਰਹਮ ਮਹਿੰਦਰਾ ਨੇ ਸਦਨ ਨੂੰ ਦੱਸਿਆ ਕਿ ਹਾਲ ਹੀ ਵਿੱਚ ਕਪੂਰਥਲਾ ਜ਼ਿਲੇ ਦੇ ਚਾਰ ਨੌਜਵਾਨਾਂ ਜਿਨਾਂ ਨੂੰ ਧੋਖਾਧੜੀ ਨਾਲ ਟਰੈਵਲ ਏਜੰਟਾਂ ਦੇ ਇਕ ਗਰੁੱਪ ਨੇ ਆਰਮੀਨੀਆ ਭੇਜ ਦਿੱਤਾ ਸੀ, ਦੇ ਮਾਮਲੇ ਵਿੱਚ ਕਾਰਵਾਈ ਕਰਦਿਆਂ ਪੰਜਾਬ ਮਨੁੱਖੀ ਤਸਕਰੀ ਰੋਕਥਾਮ ਐਕਟ-2012 ਦੇ ਤਹਿਤ ਤਿੰਨ ਟਰੈਵਲ ਏਜੰਟਾਂ ਨੂੰ ਗਿ੍ਰਫਤਾਰ ਕੀਤਾ ਜਾ ਚੁੱਕਾ ਹੈ ਅਤੇ ਬਾਕੀਆਂ ਨੂੰ ਛੇਤੀ ਹੀ ਫੜ ਲਿਆ ਜਾਵੇਗਾ। ਉਨਾਂ ਦੱਸਿਆ ਕਿ ਇਨਾਂ ਏਜੰਟਾਂ ਨੂੰ ਗਿ੍ਰਫਤਾਰ ਕਰਨ ਲਈ ਛਾਪੇਮਾਰੀ ਕੀਤੀ ਜਾ ਰਹੀ ਹੈ ਅਤੇ ਲੁਕ ਆੳੂਟ ਨੋਟਿਸ ਵੀ ਜਾਰੀ ਕੀਤਾ ਗਿਆ ਹੈ। ਇਹ ਸਾਰੇ ਪੀੜਤ ਨੌਜਵਾਨ ਅਰਮੀਨੀਆ ਤੋਂ 9 ਫਰਵਰੀ ਨੂੰ ਸੁਰੱਖਿਅਤ ਆਪਣੇ ਘਰ ਪਹੁੰਚ ਗਏ ਹਨ। ਗੈਰ-ਕਾਨੂੰਨੀ ਏਜੰਟਾਂ ਦੇ ਹੱਥੋਂ ਸੂਬੇ ਦੇ ਨੌਜਵਾਨਾਂ ਦੇ ਹੁੰਦੇ ਸ਼ੋਸ਼ਣ ਨੂੰ ਰੋਕਣ ਲਈ ਕੈਪਟਨ ਅਮਰਿੰਦਰ ਸਿੰਘ ਦੀ ਨਿੱਜੀ ਵਚਨਬੱਧਤਾ ਪ੍ਰਗਟਾਉਂਦਿਆਂ ਕੈਬਿਨਟ ਮੰਤਰੀ ਨੇ ਦੱਸਿਆ ਕਿ ਸੂਬਾ ਸਰਕਾਰ ਵੱਲੋਂ ਵਿਦੇਸ਼ਾਂ ਵਿੱਚ ਨੌਕਰੀਆਂ ਦੀ ਲੋੜ ਮੁਤਾਬਕ ਨੌਜਵਾਨਾਂ ਨੂੰ ਹੁਨਰ ਸਿਖਲਾਈ ਮੁਹੱਈਆ ਕਰਵਾਉਣ ਲਈ ਇਕ ਨਿਗਮ ਦਾ ਗਠਨ ਛੇਤੀ ਹੀ ਕੀਤਾ ਜਾਵੇਗਾ ਜਿਸ ਦੀਆਂ ਸੇਵਾ ਸ਼ਰਤਾਂ ਨੂੰ ਅੰਤਿਮ ਰੂਪ ਦਿੱਤਾ ਜਾ ਰਿਹਾ ਹੈ।  ਉਨਾਂ ਅੱਗੇ ਦੱਸਿਆ ਕਿ ਪੰਜਾਬ ਮਨੁੱਖੀ ਤਸਕਰੀ ਰੋਕਥਾਮ ਐਕਟ-2012 ਅਤੇ ਦਾ ਪੰਜਾਬ ਟਰੈਵਲ ਪ੍ਰੋਫੈਸ਼ਨਲ ਰੈਗੂਲੇਸ਼ਨ ਐਕਟ-2014 ਸਰਕਾਰ ਵੱਲੋਂ ਲਿਆਂਦੇ ਗਏ ਹਨ ਜਿਸ ਦੇ ਨਿਯਮ ਸਰਕਾਰ ਵੱਲੋਂ ਤਿਆਰ ਕੀਤੇ ਜਾ ਚੁੱਕੇ ਹਨ।  ਮੁੱਖ ਮੰਤਰੀ ਦੇ ਹਦਾਇਤਾਂ ’ਤੇ ਕਾਰਵਾਈ ਕਰਦਿਆਂ ਸੂਬਾ ਸਰਕਾਰ ਨੇ ਸਾਰੇ ਸੀਨੀਅਰ ਅਤੇ ਸਿਵਲ ਪੁਲਿਸ ਅਧਿਕਾਰੀਆਂ ਨੂੰ ਹਦਾਇਤਾਂ ਜਾਰੀ ਕਰਕੇ ਅਜਿਹੇ ਟਰੈਵਲ ਏਜੰਟਾਂ ਖਿਲਾਫ ਸਖਤ ਕਾਰਵਾਈ ਕਰਨ ਲਈ ਆਖਿਆ ਗਿਆ ਹੈ ਤਾਂ ਕਿ ਟਰੈਵਲ ਏਜੰਟਾਂ ਸਬੰਧੀ ਲਾਇਸੈਂਸ ਅਤੇ ਕਾਰਜ ਕਰਨ ਬਾਰੇ ਕਾਨੂੰਨੀ ਵਿਧੀ ਵਿਧਾਨ ਦੀ ਸਖਤੀ ਨਾਲ ਪਾਲਣਾ ਨੂੰ ਯਕੀਨੀ ਬਣਾਇਆ ਜਾ ਸਕੇ। ਇਨਾਂ ਕਦਮਾਂ ਵਿੱਚ ਪੰਜਾਬ ਪੁਲਿਸ ਵੱਲੋਂ ਵਿਦਿਅਕ ਸੈਮੀਨਾਰ ਰਾਹੀਂ ਪ੍ਰਚਾਰ ਮੁਹਿੰਮ ਚਲਾਈ ਗਈ ਹੈ ਜਿੱਥੇ ਆਮ ਲੋਕਾਂ ਖਾਸ ਤੌਰ ’ਤੇ ਨੌਜਵਾਨਾਂ ਨੂੰ ਗੈਰ ਕਾਨੂੰਨੀ ਟਰੈਵਲ ਏਜੰਟਾਂ ਦੀ ਗਤਿਵਿਧੀਆਂ ਬਾਰੇ ਜਾਣੂੰ ਕਰਵਾਇਆ ਜਾਂਦਾ ਹੈ। ਸ੍ਰੀ ਬ੍ਰਹਮ ਮਹਿੰਦਰਾ ਨੇ ਦੱਸਿਆ ਕਿ ਗੈਰ-ਕਾਨੂੰਨੀ ਤੱਤਾਂ ਤੋਂ ਗੁੰਮਰਾਹ ਹੋਏ ਲੋੜਵੰਦ ਨੌਜਵਾਨਾਂ ਦੀ ਸਹਾਇਤਾ ਲਈ ਕਾਇਮ ਕੀਤੀ 181 ਹੈਲਪਲਾਈਨ ਦੀ ਵੀ 24 ਘੰਟੇ ਨਿਗਰਾਨੀ ਰੱਖੀ ਜਾਂਦੀ ਹੈ। ਇਸ ਤੋਂ ਇਲਾਵਾ ਸੁਰੱਖਿਅਤ ਅਤੇ ਕਾਨੂੰਨੀ ਪਰਵਾਸ ਲਈ ਜਨਤਕ ਮੀਟਿੰਗਾਂ ਰਾਹੀਂ ਵੱਡੀ ਪੱਧਰ ਪ੍ਰਚਾਰ ਕਰਨ ਵਾਸਤੇ ਪੰਜਾਬ ਪੁਲਿਸ ਦੇ ‘ਸਾਂਝ’ ਪ੍ਰਾਜੈਕਟ ਤਹਿਤ ਵੱਖ-ਵੱਖ ਵਿਦਿਅਕ ਸੈਮੀਨਾਰ ਕਰਵਾਏ ਜਾ ਰਹੇ ਹਨ। ਕੈਬਨਿਟ ਮੰਤਰੀ ਨੇ ਦੱਸਿਆ ਕਿ ਕੇਂਦਰੀ ਵਿਦੇਸ਼ ਮੰਤਰਾਲੇ ਦੇ ਸਹਿਯੋਗ ਨਾਲ ਵਿਦੇਸ਼ ਜਾਣ ਵਾਲੇ ਨੌਜਵਾਨਾਂ ਨੂੰ ਉੱਥੇ ਜਾਣ ਤੋਂ ਪਹਿਲਾਂ ਲੋੜੀਂਦੀ ਸਿਖਲਾਈ ਲਈ ਜਾਣਕਾਰੀ ਭਰਪੂਰ ਪ੍ਰੋਗਰਾਮ ਵੀ ਕਰਵਾਏ ਜਾ ਰਹੇ ਹਨ।

ਗੁੰਡਾ ਪਰਚੀ ਵਸੂਲ ਰਹੇ ਮਹਾਰਾਜੇ ਦੇ ਝੰਡੇਬਰਦਾਰ

* ਖੁੱਲ੍ਹੇਆਮ ਨਾਕੇ ਲਗਾ ਕੇ ਬਾਹਰੀ ਵਹੀਕਲਾਂ ਨੂੰ ਬਣਾਇਆ ਜਾ ਰਿਹਾ ਲੁੱਟ ਦਾ ਸ਼ਿਕਾਰ 

* ਲੰਬੀ ਹਲਕੇ ’ਤੇ ਟਰਾਂਸਪੋਰਟ ਯੂਨੀਅਨਾਂ ’ਤੇ ਕਾਬਜ਼ ਸੱਤਾਪੱਖੀਆਂ ਦਾ ਸੰਗਠਿਤ ਰੈਕਟ

                                              ਇਕਬਾਲ ਸਿੰਘ ਸ਼ਾਂਤ

ਲੰਬੀ/ਡੱਬਵਾਲੀ: ਅਮਰਿੰਦਰ ਸਰਕਾਰ ਦੀ ਟਰਾਂਸਪੋਰਟ ਯੂਨੀਅਨਾਂ ’ਤੇ ਪਾਬੰਦੀ ਕਾਂਗਰਸੀਆਂ ਨੇ ਫੇਲ੍ਹ ਕਰ ਛੱਡੀ ਹੈ। ਸੂਬੇ ਵਿੱਚ ਪਾਬੰਦੀ ਦੇ ਬਾਵਜੂਦ ਲੰਬੀ ਹਲਕੇ ’ਚ ਚੱਲਦੀਆਂ ਟਰਾਂਸਪੋਰਟ ਯੂਨੀਅਨਾਂ ਵੱਲੋਂ ਖੁੱਲ੍ਹੇਆਮ ਬਾਹਰੀ ਵਹੀਕਲਾਂ ਗੁੰਡਾ ਪਰਚੀ ਵਸੂਲੀ ਜਾ ਰਹੀ ਹੈ। ਯੂਨੀਅਨਾਂ ਵੱਲੋਂ ਖੁੱਲ੍ਹੇਆਮ ਨਾਕੇ ਲਗਾ ਕੇ ਪ੍ਰਤੀ ਵਹੀਕਲ ਅਤੇ ਪ੍ਰਤੀ ਪਸ਼ੂ ਦੋਹਰੇ-ਦੋਹਰੇ ਸੈਂਕੜੇ ਰੁਪਏ ਜ਼ਬਰੀ ਵਸੂਲੇ ਜਾ ਰਹੇ ਹਨ। ਦੋਹਰੀ ਲੁੱਟ ਦਾ ਨੰਗਾ ਨਾਚ ਸਾਬਕਾ ਵੀ.ਆਈ.ਪੀ. ਹਲਕੇ ਲੰਬੀ ’ਚ ਮੰਡੀ ਕਿੱਲਿਆਂਵਾਲੀ ਵਿਖੇ ਐਤਵਾਰੀ ਪਸ਼ੂ ਮੰਡੀ ਦੌਰਾਨ ਚੱਲ ਰਿਹਾ ਹੈ। ਸੱਤਾ ਪੱਖ ਕਾਂਗਰਸੀਆਂ ਦੀ ਸਿੱਧੀ ਸ਼ਮੂਲੀਅਤ ਨਾਲ ਚੱਲ ਰਹੇ ਖੁੱਲ੍ਹੇਆਮ

ਲੁੱਟ-ਖੋਹ ਦੇ ਧੰਦੇ ਕਰਕੇ ਅਮਰਿੰਦਰ ਸਰਕਾਰ ਦੀ ਜ਼ਮੀਨੀ ਪੱਧਰ ’ਤੇ ਵੱਡੀ ਬਦਨਾਮੀ ਹੋ ਰਹੀ ਹੈ। ਜਿੱਥੇ ਭਗਤ ਸਿੰਘ ਪਿਕਅੱਪ ਯੂਨੀਅਨ ਮੰਡੀ ਕਿੱਲਿਆਂਵਾਲੀ ਵੱਲੋੋਂ ਪਸ਼ੂ ਖਰੀਦ ਕੇ ਲਿਜਾਣ ਵਾਲੇ ਬਾਹਰੀ ਵਹੀਕਲਾਂ ਤੋਂ ਇੱਕ ਹਜ਼ਾਰ ਰੁਪਏ ਤੱਕ ਆਰਥਿਕ ਨੁਕਸਾਨ ਦੇ ਨਾਂਅ ’ਤੇ ਲਏ ਜਾਂਦੇ ਹਨ। ਥੋੜ੍ਹੀ ਅਗਾਂਹ ਲਗਾਏ ਨਾਕੇ ’ਤੇ ਦੋ ਸੌ ਰੁਪਏ ਪ੍ਰਤੀ ਪਸ਼ੂ ਵੱਖਰੇ ਜ਼ਬਰੀ ਵਸੂਲੇ ਜਾਂਦੇ ਹਨ। ਪਿਕਅੱਪ ਯੂਨੀਅਨ ਦੀ ਕਮਾਂਡ ਬਲਾਕ ਕਾਂਗਰਸ ਕਮੇਟੀ ਲੰਬੀ ਦੇ ਪ੍ਰਧਾਨ ਦੇ ਹੱਥ ਦੱਸੀ ਜਾਂਦੀ ਹੈ। ਪਤਾ ਲੱਗਿਆ ਹੈ ਕਿ ਯੂਨੀਅਨ ਦੇ ਨਾਕਿਆਂ ’ਤੇ ਪਿੰਡ ਬਨਵਾਲਾ ਅਨੂੰ ਦੇ ਬੰਦੇ ਤਾਇਨਾਤ ਹੁੰਦੇ ਹਨ। ਸੂਤਰਾਂ ਦਾ ਕਹਿਣਾ ਹੈ ਕਿ ਹਰ ਐਤਵਾਰ ਨੂੰ  ਪਸ਼ੂ ਮੰਡੀ ’ਚੋਂ ਪਸ਼ੂ ਬਾਹਰ ਲਿਜਾਣ ਵਾਲੇ ਵਹੀਕਲਾਂ ਤੋਂ ਕਰੀਬ ਇੱਕ ਲੱਖ ਰੁਪਏ ਦੀ ਗੁੰਡਾ ਪਰਚੀ ਵਸੂਲੀ ਹੁੰਦੀ ਹੈ। ਇੱਥੇ ਸੱਤਾਪੱਖੀਆਂ ਦਾ ਇੱਕ ਵਿਉਂਤਬੱਧ ਰੈਕਟ ਹੈ ਜਿਸਨੂੰ ਇੱਕ ਅਖੌਤੀ ਸਿਆਸੀ ਸਲਾਹਕਾਰ ਦੀ ਪੁਸ਼ਤਪਨਾਹੀ ਹੈ। ਕਾਂਗਰਸੀਆਂ ਵੱਲੋਂ ਗੁੰਡਾ ਪਰਚੀ ਕਰਕੇ 72 ਕਰੋੜ ਰੁਪਏ ਦੇ ਸਲਾਨਾ ਠੇਕੇ ਵਾਲੀ ਪਸ਼ੂ ਮੰਡੀ ਫੇਲ੍ਹ ਹੋਣ ਕਿਨਾਰੇ ਹੈ। ਹੁਣ ਇਸ ਲੁੱਟ ਕਾਰਨ ਵਪਾਰੀ ਪਸ਼ੂ ਮੰਡੀ ਫੱਗੂ (ਹਰਿਆਣਾ) ਵੱਲ ਰੁੱਖ ਕਰਨ ਲੱਗੇ ਹਨ।

          ਪਿਕਅੱਪ ਯੂਨੀਅਨ ਵੱਲੋਂ ਹੁੰਦੀ ਲੁੱਟ ਦੀ ਖੁਲਾਸਾ ਕਰਦਿਆਂ ਹਰਿਆਣਾ ਦੇ ਭੱਟੂ ਵਾਸੀ ਡੇਅਰ ਸੰਚਾਲਕ ਰਵਿੰਦਰ ਕੁਮਾਰ ਵਾਸੀ ਭੱਟੂ ਨੇ ਦੱਸਿਆ ਕਿ ਉਹ ਪਸ਼ੂ ਮੰਡੀ, ਕਿੱਲਿਆਂਵਾਲੀ ਤੋਂ ਦੋ ਪਸ਼ੂ ਖਰੀਦ ਕੇ ਆਪਣੇ ਵਹੀਕਲ ਨੰਬਰ ਐਚ.ਆਰ 38ਜੇ/7492 ਲਿਜਾ ਰਿਹਾ ਸੀ। ਉਸਨੇ ਪਿਕਅੱਪ ਯੂਨੀਅਨ ਮੰਡੀ ਕਿੱਲਿਆਂਵਾਲੀ ’ਤੇ ਜ਼ਬਰੀ ਗੁੰਡਾ ਪਰਚੀ ਵਸੂਲਣ ਦੇ ਦੋਸ਼ ਲਗਾਉਂਦੇ ਕਿਹਾ ਕਿ ਬਾਹਰੀ ਨਿੱਜੀ ਵਹੀਕਲ ’ਤੇ ਪਸ਼ੂ ਲਿਜਾਣ ਦੇ ਬਦਲੇ ਪਿਕਅੱਪ ਯੂਨੀਅਨ ’ਚ ਨੌ ਸੌ ਰੁਪਏ ਵਸੂਲੇ ਗਏ। ਯੂਨੀਅਨ ’ਚ ਇੱਕ ਵਿਅਕਤੀ ਨੇ ਰੁਪਏ ਲੈ ਕੇ ਪਸ਼ੂ ਖਰੀਦ ਪਰਚੀ ਪਿੱਛੇ ਨੇ ਆਪਣਾ ਨਾਂਅ ਸੇਮਾ ਅਤੇ ਮੋਬਾਇਲ 93155-09003 ਲਿਖ ਕੇ ਦਿੱਤਾ। ਰਵਿੰਦਰ ਅਨੁਸਾਰ ਉਸਨੇ ਇਤਰਾਜ਼ ਜਤਾਇਆ ਤਾਂ ਉਕਤ ਵਿਅਕਤੀ ਨੇ ਆਖਿਆ ਕਿ ਨੌ ਸੌ ਰੁਪਏ ਦਿਓਗੇ ਤਾਂ ਹੀ ਤੈਨੂੰ ਪਸ਼ੂ ਲੱਦਣ ਦੇਵਾਂਗੇ। ਰਵਿੰਦਰ ਕੁਮਾਰ ਨੇ ਆਖਿਆ ਕਿ ਉਸਨੂੰ ਮਜ਼ਬੂਰੀ ਵਜੋਂ ਨੌ ਸੌ ਰੁਪਏ ਦੇਣੇ ਪਏ। ਹੁਣ ਅਗਾਂਹ ਨਾਕਾ ਲਗਾ ਕੇ ਖੜ੍ਹਾ ਇਹ ਵਿਅਕਤੀ ਚਾਰ ਸੌ ਰੁਪਏ ਮੰਗ ਰਿਹਾ ਹੈ। ਰਵਿੰਦਰ ਕੁਮਾਰ ਨੇ ਜ਼ਬਰੀ ਵਸੂਲੀ ਬਾਰੇ ਸ੍ਰੀ ਮੁਕਤਸਰ ਸਾਹਿਬ ਦੇ ਪੁਲਿਸ ਮੁਖੀ ਮਨਜੀਤ ਸਿੰਘ ਢੇਸੀ ਨੂੰ ਫੋਨ ’ਤੇ ਜਾਣੂ ਕਰਵਾਇਆ। ਰਵਿੰਦਰ ਕੁਮਾਰ ਨੇ ਕਿਹਾ ਕਿ ਲੋਕਾਂ ਦੀ ਖੁੱਲ੍ਹੇਆਮ ਲੁੱਟ ਪੂਰੀ ਤਰ੍ਹਾਂ ਗੈਰਕਾਨੂੰਨੀ ਹੈ, ਜਦੋਂ ਕਿ ਪੰਜਾਬ ਵਿੱਚ ਟਰਾਂਸਪੋਰਟ ਯੂਨੀਅਨਾਂ ’ਤੇ ਪਾਬੰਦੀ ਹੈ। ਮੌਕੇ ’ਤੇ ਪੁੱਜੇ ਪੱਤਰਕਾਰ ਨੇ ਵੇਖਿਆ ਕਿ ਪਸ਼ੂ ਡਿਸਪੈਂਸਰੀ ਦੇ ਨੇੜੇ ਇੱਕ ਸਿੱਖ ਵਿਅਕਤੀ ਸੜਕ ਕੰਢੇ ਕੁਰਸੀ ’ਤੇ ਬੈਠਾ ਸੀ। ਜਿਸਦੀ ਸ਼ਨਾਖ਼ਤ ਤਰਸੇਮ ਸਿੰਘ ਵਜੋਂ ਹੋਈ। ਸ਼ਰਾਬੀ ਹਾਲਤ ਉਕਤ ਵਿਅਕਤੀ ਪਸ਼ੂ ਲਿਜਾ ਰਹੇ ਛੋਟੇ ਹਾਥੀ ਜਾਂ ਹੋਰਨਾਂ ਗੱਡੀਆਂ ਨੂੰ ਰੋਕ-ਰੋਕ ਕੇ ਜਵਾਬਤਲਬੀ ਕਰ ਰਿਹਾ ਸੀ। ਉਹ ਰਵਿਦਰ ਕੁਮਾਰ ਨੂੰ ਮੀਡੀਆ ਮੂਹਰੇ ਬੋਲਣ ਤੋਂ ਰੋਕ ਕੇ ਆਖ ਰਿਹਾ ਸੀ ਕਿ ਇਹ ਤਾਂ ਪੱਤਰਕਾਰ ਹੈ ਇਸਦਾ ਕੀ ਹੈੈ? ਤੁਸੀਂ ਜਾਓ। ਸਾਡੀ ਸਰਕਾਰ ਐ।’ ਤਰਸੇਮ ਨੇ ਕਬੂਲਿਆ ਕਿ ਉਹ ਪਿਕਅੱਪ ਯੂਨੀਅਨ ਵੱਲੋਂ ਖੜ੍ਹਾ ਹੈ। 

        ਲੋਕਾਂ ਦਾ ਕਹਿਣਾ ਹੈ ਕਿ ਹਰ ਐਤਵਾਰ ਪਸ਼ੂ ਮੰਡੀ ਕਿੱਲਿਆਂਵਾਲੀ ਨੇੜਲੇ ਰਾਹਾਂ ਗੁੰਡਾ ਪਰਚੀ ਵਸੂਲੀ ਲਈ ਕਰੀਬ ਤਿੰਨ ਚਾਰ ਨਾਕੇ ਲੱਗਦੇ ਹਨ। ਜਿੱਥੇ ਵੱਡੇ ਪੱਧਰ ’ਤੇ ਜ਼ਬਰੀ ਵਸੂਲੀ ਹੁੰਦੀ ਹੈ। ਦੱਸਣਯੋਗ ਹੈ ਕਿ ਬੀਤੀ 21 ਅਕਤੂਬਰ 2018 ਨੂੰ ਪਿਕਅੱਪ ਯੂਨੀਅਨ ਦੇ ਬੰਦਿਆਂ ਨੇ ਧੂਰੀ ਖੇਤਰ ਦੇ ਡੇਅਰੀ ਸੰਚਾਲਕ ਮੋਹਿਤ ਸ਼ਰਮਾ ਨੂੰ ਮਾਰ-ਕੁੱਟ ਕੇ ਜਖ਼ਮੀ ਕਰਕੇ ਸਰੇ ਬਾਜ਼ਾਰ 15 ਸੌ ਰੁਪਏ ਖੋਹੇ ਸਨ। ਯੂਨੀਅਨਾਂ ਦੇ ਦਬਾਅ ਸਦਕਾ ਮਹਿਤ ਸ਼ਰਮਾ ਮੌਕੇ ’ਤੇ ਰਾਜੀਨਾਮਾ ਲਿਖ ਦੇ ਗਿਆ ਸੀ। 

        ਪਿਕਅੱਪ ਯੂਨੀਅਨ ਦੇ ਦਫ਼ਤਰ ਵਿੱਚ ਮੁਨਸ਼ੀ ਸੇਮਾ ਨੇ ਆਖਿਆ ਕਿ ਯੂਨੀਅਨ ਦਾ ਪ੍ਰਧਾਨ ਗੁਰਬਾਜ ਸਿੰਘ ਬਨਵਾਲਾ ਹੈ। ਉਸਨੇ ਬਕਾਇਦਾ ਕਬੂਲਿਆ ਕਿ ਪਿਕਅੱਪ ਯੂਨੀਅਨ ਵੱਲੋਂ ਬਾਹਰੀ ਵਹੀਕਲਾਂ ਤੋਂ ਪੈਸੇ ਲਏ ਜਾਂਦੇ ਹਨ ਅਤੇ ਨਾਕੇ ਵੀ ਲਗਾਏ ਜਾਂਦੇ ਹਨ। ਉਸਨੇ ਕਿਹਾ ਕਿ ਸਾਨੂੰ ਦਫ਼ਤਰ ਦਾ ਕਿਰਾਇਆ ਪੈਂਦਾ ਹੈ। ਦਫ਼ਤਰ ਪਿਕਅੱਪ ਸੰਚਾਲਕਾਂ ਨੇ ਕਿਹਾ ਕਿ ਉਹ ਘਾਟੇ ਵਿੱਚ ਹਨ ਉਨ੍ਹਾਂ ਤੋਂ ਕਿਸ਼ਤਾਂ ਨਹੀਂ ਭਰੀਆਂ ਜਾਂਦੀਆਂ। ਉਨ੍ਹਾਂ ਨੂੰ ਦੋਵੇਂ ਸੂਬਿਆਂ ਦੇ ਸਰਕਾਰੀ ਨਿਰਦੇਸ਼ਾਂ ’ਤੇ ਗੱਡੀਆਂ ਵੀ ਵਗਾਰ ’ਚ ਦੇਣੀਆਂ ਪੈਂਦੀਆਂ ਹਨ। 

ਬਲਾਕ ਕਾਂਗਰਸ ਕਮੇਟੀ ਦੇ ਪ੍ਰਧਾਨ ਗੁਰਬਾਜ ਬਨਵਾਲਾ ਨੇ ਆਖਿਆ ਕਿ ਉਸਦਾ ਪਿਕਅੱਪ ਯੂਨੀਅਨ ਨਾਲ ਕੋਈ ਲੈਣਾ-ਦੇਣਾ ਨਹੀਂ। ਉਸਦਾ ਨਾਂਅ ਗਲਤ ਵਰਤਿਆ ਜਾ ਰਿਹਾ ਹੈ। ਜੇਕਰ ਕੋਈ ਗੁੰਡਾ ਪਰਚੀ ਲੈਂਦੇ ਹਨ ਤਾਂ ਪ੍ਰਸ਼ਾਸਨ ਤੁਰੰਤ ਬੰਦ ਕਰਵਾਏ। 

ਜ਼ਿਲ੍ਹਾ ਸ੍ਰੀ ਮੁਕਤਸਰ ਸਾਹਿਬ ਦੇ ਪੁਲਿਸ ਮੁਖੀ ਮਨਜੀਤ ਸਿੰਘ ਢੇਸੀ ਨੇ ਕਿਹਾ ਕਿਸੇ ਨੂੰ ਕਾਨੂੰਨੀ ਨਿਯਮਾਂ ਨੂੰ ਛਿੱਕੇ ਟੰਗਣ ਦੀ ਇਜਾਜ਼ਤ ਨਹੀਂ ਦਿੱਤੀ ਜਾਵੇਗੀ। ਜਨਤਾ ਦੀ ਲੁੱਟ ਬੰਦ ਕਰਵਾ ਕੇ ਦੋਸ਼ੀਆਂ ਖਿਲਾਫ਼ ਕਾਰਵਾਈ ਹੋਵੇਗੀ। 

ਮੋਤੀਆਂ ਵਾਲੀ ਸਰਕਾਰ ਦੇ ਬੇਪਰਵਾਹ ਰਾਜ ’ਚ ਖੁੱਲ੍ਹੇਆਮ ਲੁੱਟ ਦਾ ਹੈਰਾਨੀਜਨਕ ਖੁਲਾਸਾ

*  ਪੰਜਾਬ ’ਚ ਦੋ ਹਜ਼ਾਰ ਰੁਪਏ ਦਾਖਲਾ ਫੀਸ ਦੇ ਕੇ ਸੜਕ ’ਤੇ ਚੱਲਿਆ ਜਾਂਦਾ ਨਿਰਵਿਘਨ 

*  ਪਟਰੋਲ ਪੰਪਾਂ ਬਣੇ ਟਰਾਂਸਪੋਰਟ ਵਿਭਾਗ ਦੀ ਨਜਾਇਜ਼ ਉਗਰਾਹੀ ਦੇ ਕੇਂਦਰ 

*  ਦੋ ਹਜ਼ਾਰ ਦੀ ਮਾਸਿਕ ਫੀਸ ਕਰ ਦਿੰਦੀ ਓਵਰਲੋਡ ਜਿਹੇ ਦੋਸ਼ਾਂ ਤੋਂ ਮੁਕਤ

                                                          ਇਕਬਾਲ ਸਿੰਘ ਸ਼ਾਂਤ

ਡੱਬਵਾਲੀ: ਉਨੀਂਦਰੇ ਸੁਭਾਅ ਰਾਜਭਾਗ ਚਲਾਉਣ ਵਾਲੇ ਮੁੱਖ ਮੰਤਰੀ ਅਮਰਿੰਦਰ ਸਿੰੰਘ ਦੇ ਰਾਜ ’ਚ ਟਰੱਕਾਂ ਵਾਲਿਆਂ ਨੂੰ ਸੜਕਾਂ ’ਤੇ ਚੱਲ ਕੇ ਬਿਨ੍ਹਾਂ ਸਰਕਾਰੀ ਖੱਜਲ-ਖੁਆਰੀ ਦੇ ਮੰਜ਼ਿਲ ’ਤੇ ਪੁੱਜਣ ਲਈ ਦੋ ਹਜ਼ਾਰ ਰੁਪਏ ਪ੍ਰਤੀ ਮਹੀਨਾ ਇੰਟਰੀ ਫੀਸ ਲਾਜ਼ਮੀ ਬਣੀ ਹੋਈ ਹੈ। ਇਸ ਫੀਸ ਲਈ ਪਟਰੋਲ ਪੰਪ ਟਰਾਂਸਪੋਰਟ ਵਿਭਾਗ ਦੀ ਕਥਿਤ ਗੈਰਕਾਨੂੰਨੀ ਉਗਰਾਹੀ ਦੇ ਜਰੀਆ

ਬਣ ਰਹੇ ਹਨ। ਇਹ ਗੈਰ-ਕਾਨੂੰਨੀ ਵਰਤਾਰਾ ਸਰਕਾਰੀ ਅਮਲਾਂ ਦੀ ਓਟ ਹੇਠ ਕਿਸੇ ਇੱਕ ਜਗ੍ਹਾ ਨਹੀਂ ਬਲਕਿ ਸਮੁੱਚੇ ਪੰਜਾਬ ’ਚ ਚਿੱਟੇ ਦਿਨ ਚੱਲ ਰਿਹਾ ਹੈ। ਮੋਤੀਆਂ ਵਾਲੀ ਸਰਕਾਰ ਦੇ ਬੇਪਰਵਾਹ ਰਾਜ ’ਚ ਸੜਕਾਂ ’ਤੇ ਖੁੱਲ੍ਹੇਆਮ ਲੁੱਟ ਦਾ ਇਹ ਹੈਰਾਨੀਜਨਕ ਖੁਲਾਸਾ ਰਾਜਸਥਾਨ ਦੇ ਟਰੱਕ ਡਰਾਈਵਰਾਂ ਨੇ ਕੀਤਾ ਹੈ।

ਪਟਰੋਲ ਪੰਪਾਂ ’ਤੇ ਇੰਟਰੀ ਫੀਸ ਨਾ ਦੇਣ ਦੀ ਸੂਰਤ ’ਚ ਟਰੱਕਾਂ ਵਾਲਿਆਂ ਨੂੰ ਨਾ ਸਿਰਫ਼ ਹਜ਼ਾਰਾਂ ਰੁਪਏ ਦਾ ਚਲਾਣ ਭੁਗਤਣਾ ਪੈਂਦਾ ਹੈ। ਸਗੋਂ ਟਰਾਂਸਪੋਰਟ ਵਿਭਾਗ ਦੇ ਅਣ-ਐਲਾਨੇ ਨਾਕਿਆਂ ’ਤੇ ਘੰਟਿਆਂ-ਬੱਧੀ ਖੱਜਲ-ਖੁਆਰ ਦਾ ਸ਼ਿਕਾਰ ਹੋ ਕੇ ਸਮੇਂ ਦੀ ਬਰਬਾਦੀ ਕਰਨੀ ਹੋਵੇਗੀ। ਇੰਟਰੀ ਫੀਸ ਦੇਣ ਮਗਰੋਂ ਹਰ ਮਹੀਨੇ ਕੋਈ ਖਾਸ ਕੋਡ ਵਰਡ ਜਾਂ ਵਿਸ਼ੇਸ਼ ਕਾਰਡ ਸੁਖਾਵੀਂ ਰਾਹਦਾਰੀ ਦਾ ਜਰੀਆ ਬਣਦਾ ਹੈ। ਸੂਤਰਾਂ ਅਨੁਸਾਰ ਦੋ-ਦੋ, ਚਾਰ-ਚਾਰ ਹਜ਼ਾਰ ਰੁਪਏ ਦੀ ਉਗਰਾਹੀਂ ਰਾਹੀਂ ਇਹ ਕਥਿਤ ਰਿਸ਼ਵਤਖੋਰੀ ਸਲਾਨਾ ਸੈਂਕੜੇ ਕਰੋੜ ਰੁਪਏ ਨੂੰ ਪੁੱਜ ਜਾਂਦੀ ਹੈ। ਸੂਤਰਾਂ ਦਾ ਕਹਿਣਾ ਹੈ ਕਿ ਡੀ.ਟੀ.ਓ/ਆਰ.ਟੀ.ਏ ਦਫ਼ਤਰ ਤਾਂ ਦੂਰ ਜੇਕਰ ਸਿਰਫ਼ ਪਿਛਲੇ ਦਹਾਕੇ ’ਚ ਇਨ੍ਹਾਂ ਨਾਲ ਲੱਗੇ ਰਹੇ ਗੰਨਮੈਨਾਂ ਸਮੇਤ ਸਮੁੱਚੇ ਅਮਲੇ ਦੀਆਂ ਜਾਇਦਾਦਾਂ ਬਾਰੇ ਡੂੰਘਾਈ ਨਾਲ ਨਿਰਪੱਖ ਘੋਖ ਹੋਵੇ ਤਾਂ ਅਰਬਾਂ-ਖਰਬਾਂ ਰੁਪਏ ਦੀ ਨਾਮੀ/ਬੇਨਾਮੀ ਜਾਇਦਾਦਾਂ ਨਸ਼ਰ ਹੋ ਸਕਦੀਆਂ ਹਨ। ਟਰਾਂਸਪੋਰਟ ਕਾਰੋਬਾਰ ਨਾਲ ਜੁੜੇ ਲੋਕਾਂ ਦਾ ਕਹਿਣਾ ਹੈ ਕਿ ਕਥਿਤ ਲੁੱਟ-ਖੋਹ ’ਚ ਡੀ.ਟੀ.ਓਜ਼/ਆਰ.ਟੀ.ਏਜ਼ ਦੇ ਗੰਨਮੈਨ ਅਤੇ ਸੁਰੱਖਿਆ ਅਮਲਾ ਕਥਿਤ ਤੌਰ ’ਤੇ ਅਹਿਮ ਭੂਮਿਕਾ ਨਿਭਾਉਂਦੇ ਹਨ। ਇਨ੍ਹਾਂ ਹਾਲਾਤਾਂ ’ਚ ਸੜਕਾਂ ਦੇ ਰਾਜੇ ਟਰੱਕ ਆਪ੍ਰੇਟਰ ਪੂਰੀ ਟਰਾਂਸਪੋਰਟ ਵਿਭਾਗ ਦੇ ਗੁਲਾਮ ਬਣ ਕੇ ਰਹਿ ਗਏ ਹਨ। 

ਕੜਾਕੇ ਦੀ ਸਰਦੀ ’ਚ ਇੱਥੇ ਪੰਜਾਬ-ਹਰਿਆਣਾ ਸਰਹੱਦ ਨੇੜਲੇ ਪਿੰਡ ਡੂਮਵਾਲੀ ਦੇ ਰਕਬੇ ਵਿੱਚ ਪੂਰੀ ਰਾਤ ਖੱਜਲ-ਖੁਆਰ ਹੋਣ ਵਾਲੇ ਬੀਕਾਨੇਰ ਜਿਲ੍ਹੇ  ਦੇ ਟਰੱਕ ਚਾਲਕ ਸੁਨੀਲ ਕੁਮਾਰ ਸਮੇਤ ਹੋਰਨਾਂ ਨੇ ਗੰਭੀਰ ਦੋਸ਼ ਲਗਾਏ ਹਨ। ਉਸਨੇ ਕਿਹਾ ਕਿ ਉਸਦੇ ਟਰੱਕ ਵਿੱਚ ਵਜ਼ਨ ਤਾਂ ਸੜਕੀ ਨਿਯਮਾਂ ਦੇ ਮੁਤਾਬਕ ਹੈ ਪਰ ਉਸ ਵਿੱਚ ਲੱਦੇ ਮਾਲ ਦੀ ਉੱਚਾਈ ਜ਼ਿਆਦਾ ਹੋਣ ਕਰਕੇ ਉਸਦਾ 14 ਹਜਾਰ ਰੁਪਏ ਦਾ ਚਲਾਨ ਪੰਜਾਬ ’ਚ ਕੱਟਿਆ ਗਿਆ, ਜੋ ਕਿ ਬਹੁਤ ਜ਼ਿਆਦਾ ਹੈ। ਸੁਨੀਲ ਕੁਮਾਰ ਨੇ ਕਿਹਾ ਕਿ ਉਸਨੂੰ ਇੱਕ ਪਟਰੋਪ ਪੰਪ ਦੇ ਸੰਚਾਲਕ ਨੇ ਦੱਸਿਆ ਕਿ ਜੇਕਰ ਦੋ ਹਜ਼ਾਰ ਰੁਪਏ ਦੀ ਮਾਸਿਕ ਇੰਟਰੀ ਫੀਸ ਪਹਿਲਾਂ ਤੋਂ ਜਮ੍ਹਾਂ ਕਰਵਾਈ ਹੁੰਦੀ ਤਾਂ ਉਹ ਚਲਾਣ ਤੋਂ ਬਚ ਜਾਂਦਾ। ਸੁਨੀਲ ਮੁਤਾਬਕ ਜਿਹੜੀਆਂ ਗੱਡੀਆਂ ਨਿੱਤ ਚੱਲਦੀਆਂ ਹਨ, ਉਹ ਬਿਨਾਂ ਰੋਕ-ਟੋਕ ਗੱਡੀ ਚਲਾਉਣ ਦੇ ਸਾਰੇ ਅੰਦਰੂਨੀ ਨੁਕਤਿਆਂ ਤੋਂ ਜਾਣੂ ਹਨ ਪਰ ਕਦੇ-ਕਦਾਈਂ ਪੰਜਾਬ ’ਚ ਆਉਣ ਵਾਲੇ ਉਸਦੇ ਵਰਗੇ ਟਰੱਕ ਡਰਾਈਵਰਾਂ ਨੂੰ ਭਾਰੀ ਜੁਰਮਾਨਾ ਭੁਗਤਣਾ ਪੈਂਦਾ ਹੈ। ਇਸਦੇ ਇਲਾਵਾ ਹੋਰਨਾਂ ਟਰੱਕ ਡਰਾਈਵਰਾਂ ਨੇ ਦੋਸ਼ ਲਗਾਇਆ ਹੈ ਕਿ ਟਰਾਂਸਪੋਰਟ ਵਿਭਾਗ ਦੀ ਮਿਲੀਭੁਗਤ ਨਾਲ ਪੰਜਾਬ ਭਰ ’ਚ ਤੂੜੀ ਦੇ ਅੰਨੇ੍ਹਵਾਦ ਲੱਦੇ ਟਰੈਕਟਰ-ਟਰਾਲੀਆਂ ਪੂਰੀ ਸੜਕ ਘੇਰ ਕੇ ਚੱਲਦੇ ਹਨ। ਜਿਨ੍ਹਾਂ ਨੂੰ ਰੋਕਣ ਸਮੇਂ ਟਰਾਂਸਪੋਰਟ ਵਿਭਾਗ ਦੀਆਂ ਅੱਖਾਂ ’ਤੇ ਪਰਦਾ ਪੈ ਜਾਂਦਾ ਹੈ। ਇੱਕ ਹੋਰ ਟਰੱਕ ਚਾਲਕ ਭੋਲਾ ਸਿੰਘ ਵਾਸੀ ਹਨੁਮਾਨਗੜ੍ਹ (ਰਾਜਸਥਾਨ) ਨੇ ਦੱਸਿਆ ਕਿ ਨਿਯਮਾਂ ਤਹਿਤ ਮੁਤਾਬਕ ਟਰੱਕ ’ਚ 39 ਵਜ਼ਨ ਤੋਂ ਘੱਟ ਭਾਰ ਟਰੱਕ ’ਚ ਹੋਣਾ ਚਾਹੀਦਾ ਹੈ। ਉਸਦੇ ਟਰੱਕ ਵਿੱਚ ਕਰੀਬ 36 ਟਨ ਮਾਲ ਹੈ ਪਰ ਫਿਰ ਵੀ ਉਸਦੇ ਟਰੱਕ ਦਾ 12 ਹਜ਼ਾਰ ਰੁਪਏ ਦਾ ਚਲਾਨ ਕੱਟ ਦਿੱਤਾ ਗਿਆ। ਇਸ ਕਰਕੇ ਉਹ ਵੀ ਠੰਡ ਵਿੱਚ ਸੜਕ ’ਤੇ ਰਾਤਾਂ ਕੱਟਣ ਨੂੰ ਮਜਬੂਰ ਹੈ। ਕੇਵਲ ਕੁਮਾਰ ਨੇ ਦੱਸਿਆ ਕਿ ਟਰੱਕ ਚਾਲਕਾਂ ਨੂੰ ਬਹੁਤ ਵਾਰ ਟਰਾਂਸਪੋਰਟ ਵਿਭਾਗ ਦੀ ਮਨਮਾਨੀ ਝੱਲਣੀ ਪੈਂਦੀ ਹੈ। ਡੱਬਵਾਲੀ-ਬਠਿੰਡਾ ਸੜਕ ’ਤੇ ਖੜ੍ਹੇ ਕਈ ਹੋਰ ਟਰੱਕ ਡਰਾਈਵਰਾਂ ਨੇ ਵੀ ਆਪਣੀ ਮੁਸ਼ਕਿਲ ਬਿਆਨਦੇ ਰੋਸ ਜਤਾਇਆ। ਉਨ੍ਹਾਂ ਕਿਹਾ ਕਿ ਕੈਪਟਨ ਨੇ ਯੂਨੀਅਨ ਤਾਂ ਬੰਦ ਕਰਵਾ ਦਿੱਤੀਆਂ ਪਰ ਟਰਾਂਸਪੋਰਟ ਵਿਭਾਗ ਦੀ ਲੁੱਟ ਬੰਦ ਕਰਵਾਉਣ ’ਚ ਖੁਦ ਮੁੱਖ ਮੰਤਰੀ ਵੀ ਬੇਵੱਸ ਜਾਪਦਾ ਹੈ। ਠੰਡ ਭਰੇ ਹਾਲਾਤਾਂ ’ਚ ਟਰੱਕ ਡਰਾਈਵਰਾਂ ਨੂੰ ਇੰਝ ਸੜਕਾਂ ’ਤੇ ਖੱਜਲ-ਖੁਆਰ ਨਹੀਂ ਹੋਣ ਦੇਣ ਲਈ  ਮਜ਼ਬੂਰ ਨਹੀਂ ਕੀਤਾ ਜਾਣਾ ਚਾਹੀਦਾ ਹੈ।   

                                ਮੁਫ਼ਤ ਦੀ ਕਮਾਈ ਨੇ ਅਫਸਰਾਂ ਦੇ ਦਿਮਾਗ ਅਸਮਾਨ ਚੜ੍ਹਾਏ

ਟਰੱਕ ਆਪ੍ਰੇਟਰਾਂ ਮੁਤਾਬਕ ਕਾਨੂੰਨੀ ਨਿਯਮਾਂ ਦੀ ਓਟ ’ਚ ਹੁੰਦੀ ਮੁਫ਼ਤ ਦੀ ਕਮਾਈ ਨੇ ਵਿਭਾਗੀ ਅਫਸਰਾਂ ਦੇ ਦਿਮਾਗ ਉਤਾਂਹ ਚੁੱਕੇ ਹਨ ਕਿ ਉਹ ਜਨਤਾ ਦੀਆਂ ਮੋਬਾਇਲ ਸੁਣਨ ਨੂੰ ਤਿਆਰ ਨਹੀਂ ਹਨ। ਜਨਤਾ ਦੀਆਂ ਮੋਬਾਇਲ ’ਤੇ ਕਾਲ ਨਾ ਰਸੀਵ ਨਾ ਕਰਨ ਲਈ ਆਰ.ਟੀ.ਏ. ਫਰੀਦਕੋਟ ਦਫ਼ਤਰ ਕਾਫ਼ੀ ਮਸ਼ਹੂਰ ਹੈ। ਇੱਥੇ ਐਸ.ਐਮ.ਐਸ. ਕਲਚਰ ਚੱਲਦਾ ਹੈ। ਅਜਿਹੇ ’ਚ ਲੋਕ ਲੰਬੀ, ਮਲੋਟ ਤੋਂ ਨਿੱਕੀ ਜਿਹੀ ਜਾਣਕਾਰੀ ਲਈ 100 ਕਿਲੋਮੀਟਰ ਦੂਰ ਫਰੀਦਕੋਟ ਜਾਣ ਲਈ ਮਜ਼ਬੂਰ ਹੁੰਦੇ ਹਨ।

ਮੰਤਰੀ ਅਤੇ ਪ੍ਰਿੰਸੀਪਲ ਸਕੱਤਰ ਕੋਲ ਫੋਨ ਚੁੱਕਣ ਦਾ ਸਮਾਂ ਨਹੀਂ 

ਪੰਜਾਬ ਦੇ ਟਰਾਂਸਪੋਰਟ ਮੰਤਰੀ ਅਰੁਣਾ ਚੌਧਰੀ ਦਾ ਪੱਖ ਜਾਣਨ ਲਈ ਉਨ੍ਹਾਂ ਦੇ ਮੋਬਾਇਲ ਫੋਨ 99148-00007 ’ਤੇ ਪੰਜ ਵਾਰ ਅਤੇ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਕਾਕੂਮਨੂੰ ਸ਼ਿਵਾ ਪ੍ਰਸਾਦ ਦੇ ਮੋਬਾਇਲ ’ਤੇ ਕਈ ਕਾਲ ਕੀਤੀ ਪਰ ਉਨ੍ਹਾਂ ਕਾਲ ਰਸੀਵ ਨਹੀਂ ਕੀਤੀ। 

      ਇੰਟਰੀ ਫੀਸ ਜਿਹੇ ਦੋਸ਼ ਸਰਾਸਰ ਬੇਬੁਨਿਆਦ

ਟਰੱਕਾਂ ਡਰਾਈਵਰਾਂ ਦੇ ਦੋਸ਼ਾਂ ਬਾਰੇ ਆਰ.ਟੀ.ਏ ਬਠਿੰਡਾ ਉਦੈਦੀਪ ਸਿੱਧੂ ਦਾ ਕਹਿਣਾ ਸੀ ਕਿ ਇੰਟਰੀ ਫੀਸ ਜਿਹੀਆਂ ਗੱਲਾਂ ਸਰਾਸਰ ਗਲਤ ਹਨ। ਅਜਿਹੀ ਕੋਈ ਫੀਸ ਕਿਸੇ ਟਰੱਕ ਡਰਾਈਵਰ ਤੋਂ ਨਹੀਂ ਲਈ ਜਾਂਦੀ। ਜੇਕਰ ਕਿਸੇ ਪਟਰੋਲ ਪੰਪ ’ਤੇ ਅਜਿਹਾ ਹੁੰਦਾ ਹੈ ਤਾਂ ਟਰੱਕ ਆਪ੍ਰੇਟਰ ਵਿਭਾਗ ਨੂੰ ਦੱਸਣ, ਕਾਰਵਾਈ ਕੀਤੀ ਜਾਵੇਗੀ। ਟਰੱਕ ਡਰਾਈਵਰਾਂ ਵੱਲੋਂ ਸੜਕੀ ਨਿਯਮਾਂ ਦੀ ਉਲੰਘਣਾ ਅਤੇ ਵਿਭਾਗੀ ਟਾਰਗੇਟ ਕਾਰਨ ਕਈ ਵਾਰ ਵੱਧ ਜੁਰਮਾਨਾ ਵੀ ਲਗਾਇਆ ਜਾਂਦਾ ਹੈ। 

ਅਜੈ ਚੌਟਾਲਾ ਵੱਲੋਂ ਇਨੈਲੋ ਨੂੰ ਧੋਬੀ ਪਟਕਾ, ਸੱਟ ਅਕਾਲੀ ਦਲ ਨੂੰ ਵੱਜੀ

                                                           ਇਕਬਾਲ ਸਿੰਘ ਸ਼ਾਂਤ

      ਕਾਲਾਂਵਾਲੀ-ਚੌਟਾਲਿਆਂ ਦੇ ਜੇਠੇ ਪੁੱਤਰ ਅਜੈ ਸਿੰਘ ਚੌਟਾਲਾ ਦੀ ਜਨਨਾਇਕ ਜਨਤਾ ਪਾਰਟੀ (ਜੇ.ਜੇ.ਪੀ.) ਨੇ ਅੱਜ ਆਪਣੀ ਮਾਂ ਪਾਰਟੀ ਇਨੈਲੋ ਦੇ ਨਾਲ-ਨਾਲ ਸ਼੍ਰੋਮਣੀ ਅਕਾਲੀ ਦਲ (ਬ) ਨੂੰ ਵੀ ਸਿਆਸੀ ਠਿੱਬੀ ਲਗਾ ਦਿੱਤੀ। ਹਰਿਆਣਾ ਵਿੱਚ ਹਲਕਾ ਕਾਲਾਂਵਾਲੀ (ਸੁਰੱਖਿਅਤ) ਤੋਂ ਅਕਾਲੀ ਦਲ ਦੇ ਇਕਲੌਤੇ ਵਿਧਾਇਕ ਬਲਕੌਰ ਸਿੰਘ ਜੇ.ਜੇ.ਪੀ 'ਚ ਸ਼ਾਮਲ ਹੋ ਗਏ। ਬਲਕੌਰ ਸਿੰਘ

ਨੇ ਇਹ ਐਲਾਨ ਅੱਜ ਅਜੈ ਸਿੰਘ ਚੌਟਾਲਾ ਦੀ ਮੌਜੂਦਗੀ ਵਿੱਚ ਕੀਤਾ। ਇਸਦੇ ਤੁਰੰਤ ਬਾਅਦ ਕਾਲਾਂਵਾਲੀ 'ਚ ਉਨ੍ਹਾਂ ਦੀ ਰਿਹਾਇਸ਼ 'ਤੇ ਜੇ.ਜੇ.ਪੀ ਦਾ ਝੰਡਾ ਲਹਿਰਾ ਦਿੱਤਾ ਗਿਆ। 

ਹਰਿਆਣੇ ਅੰਦਰ ਮਜ਼ਬੂਤ ਸਿਆਸੀ ਸਫ਼ਬੰਦੀ 'ਚ ਜੁਟੇ ਅਕਾਲੀ ਦਲ ਲਈ ਬਲਕੌਰ ਸਿੰਘ ਦੀ ਸਿਆਸੀ ਹੇਰ-ਫੇਰ ਵੱਡਾ ਝਟਕਾ ਹੈ ਅਤੇ ਇਹ ਮੌਜੂਦਾ ਹਰਿਆਣਾ ਵਿਧਾਨ ਸਭਾ 'ਚ ਕਿਸੇ ਵਿਧਾਇਕ ਵੱਲੋਂ ਪਹਿਲੀ ਦਲ ਬਦਲੀ ਹੈ, ਜਿਸਦਾ ਸਿੱਧਾ ਅਸਰ ਗੁਆਂਢੀ ਸੂਬੇ ਪੰਜਾਬ ਦੀ ਸ਼੍ਰੋਮਣੀ ਅਕਾਲੀ ਦਲ ਦੇ ਸਿਆਸੀ ਵੱਕਾਰ 'ਤੇ ਪਿਆ ਹੈ। 

         ਜਨਨਾਇਕ ਜਨਤਾ ਪਾਰਟੀ ਨੇ ਅਜੈ ਸਿੰਘ ਚੌਟਾਲਾ ਦੇ ਪੈਰੋਲ 'ਤੇ ਜੇਲ੍ਹ ਵਿਚੋਂ ਬਾਹਰ ਆਉਂਦੇ ਹੀ ਵਿਧਾਇਕ ਬਲਕੌਰ ਸਿੰਘ ਜ਼ਰੀਏ ਇਨੈਲੋ ਨੂੰ ਆਪਣੀ ਜ਼ਮੀਨੀ ਮਜ਼ਬੂਤੀ ਦਾ ਅਹਿਸਾਸ ਕਰਵਾਇਆ ਹੈ, ਪਰ ਇਸਦੀ ਧਮਕ ਹਰਿਆਣੇ ਨਾਲੋਂ ਜ਼ਿਆਦਾ ਗੁਆਂਢੀ ਸੂਬੇ ਪੰਜਾਬ ਦੇ ਸਿਆਸੀ ਹਾਲਾਤਾਂ 'ਤੇ ਵੱਧ ਪਵੇਗੀ। ਸੁਭਾਅ ਤੋਂ ਸਾਊ ਅਤੇ ਮਿਲਣਸਾਰ ਗਿਣੇ ਜਾਂਦੇ ਵਿਧਾਇਕ ਬਲਕੌਰ ਸਿੰਘ ਦੇ ਅਚਨਚੇਤੀ ਫੈਸਲੇ ਤੋਂ ਅਕਾਲੀ ਦਲ ਵੀ ਹੈਰਾਨੀ ਦੇ ਰੌਂਅ ਵਿੱਚ ਹੈ। ਸੂਤਰਾਂ ਅਨੁਸਾਰ ਬਲਕੌਰ ਸਿੰਘ ਦੀ ਬਾਦਲ ਪਰਿਵਾਰ ਨਾਲ ਕਾਫ਼ੀ ਨੇੜਤਾ ਹੈ ਅਤੇ ਬਾਦਲਾਂ 'ਚ ਉਨ੍ਹਾਂ ਦਾ ਕਾਫ਼ੀ ਮਾਣ-ਸਤਿਕਾਰ ਰਿਹਾ ਹੈ। 

      ਅਕਾਲੀ ਦਲ ਨੇ ਪਿੱਛੇ ਜਿਹੇ ਹਰਿਆਣੇ 'ਚ ਰੈਲੀਆਂ ਕਰਕੇ ਸਿੱਖਾਂ ਅਤੇ ਪੰਜਾਬੀ ਦੇ ਹੱਕਾਂ ਲਈ ਸੂਬੇ ਦੀਆਂ 90 ਸੀਟਾਂ 'ਤੇ ਚੋਣ ਲੜਨ ਦਾ ਐਲਾਨ ਕੀਤਾ ਸੀ। ਹੁਣ ਇਕਲੌਤੇ ਵਿਧਾਇਕ ਨੇ ਆਪਣੇ ਫੈਸਲੇ ਨਾਲ ਹਰਿਆਣਾ ਸੂਬਾਈ ਚੋਣਾਂ ਲਈ ਪਾਰਟੀ ਦੇ ਸਿਆਸੀ ਇਰਾਦਿਆਂ ਨੂੰ ਮੱਠਾ ਪਾਉਣ ਦਾ ਮਾਹੌਲ ਬਣਾ ਦਿੱਤਾ ਹੈ। 

ਚੌਟਾਲਿਆਂ ਨਾਲ ਸਾਬਕਾ ਮੁੱਖ ਮੰਤਰੀ ਪ੍ਰਕਾਸ਼ ਸਿੰਘ ਬਾਦਲ ਪਰਿਵਾਰ ਦੀ ਜੱਗਜਾਹਰ ਗੂੜ੍ਹੀ ਸਾਂਝ ਹੈ। ਪਿਛਲੇ ਦਿਨ੍ਹੀ ਇਨੈਲੋ ਦੇ ਅਜੈ-ਅਭੈ ਚੌਟਾਲਾ ਵਿਚਕਾਰਲੇ ਕਲੇਸ਼ ਦੇ ਹੱਲ ਲਈ ਪ੍ਰਕਾਸ਼ ਸਿੰਘ ਬਾਦਲ ਦੇ ਪੱਧਰ 'ਤੇ ਕਾਫ਼ੀ ਕੋਸ਼ਿਸ਼ਾਂ ਕੀਤੀਆਂ ਸਨ। ਇਨੈਲੋ ਵਿਚਲੀਆਂ ਤਰੇੜਾਂ ਜ਼ਿਆਦਾ ਡੂੰਘੀਆਂ ਹੋਣ ਕਰਕੇ ਬਾਦਲ ਇਸ ਕੋਸ਼ਿਸ਼ 'ਚ ਸਫ਼ਲ ਨਹੀਂ ਹੋ ਸਕੇ ਸਨ।       ਪਿਛਲੇ ਦਿਨ੍ਹੀਂ ਡੱਬਵਾਲੀ ਹਲਕੇ 'ਚ ਅਜੈ ਸਿੰਘ ਚੌਟਾਲਾ ਨੇ ਪ੍ਰਕਾਸ਼ ਸਿੰਘ ਬਾਦਲ ਨੂੰ ਚੌਟਾਲਾ ਪਰਿਵਾਰ ਦਾ ਸਰਵਪ੍ਰਵਾਨਤ ਅਤੇ ਸਰਵਉੱਚ ਬਜ਼ੁਰੁਗ ਦੱਸਿਆ ਸੀ। ਹੈਰਾਨੀ ਦੀ ਗੱਲ ਹੈ ਕਿ ਜੇ.ਜੇ.ਪੀ ਗਠਨ ਉਪਰੰਤ ਅਜੈ ਸਿੰਘ ਚੌਟਾਲਾ ਹੱਥੋਂ ਵੱਡੀ ਸਿਆਸੀ ਢਾਅ ਵੀ ਪ੍ਰਕਾਸ਼ ਸਿੰਘ ਬਾਦਲ ਦੇ ਸਿਆਸੀ ਸਰਪ੍ਰਸਤੀ ਵਾਲੇ ਅਕਾਲੀ ਦਲ ਨੂੰ ਲੱਗੀ ਹੈ। ਅਭੈ ਸਿੰਘ ਅਤੇ ਅਜੈ ਸਿੰਘ ਦੀ ਵੱਖੋ-ਵੱਖਰੀ ਸਫ਼ਬੰਦੀ 'ਚ ਅਕਾਲੀ ਦਲ ਦੋਵਾਂ ਧਿਰਾਂ ਨਾਲ ਪਰਿਵਾਰਕ ਸਾਂਝ ਕਰਕੇ ਚੁੱਪ ਵੱਟੇ ਹੋਏ ਹੈ। ਇਸਦੇ ਬਾਵਜੂਦ ਜੇ.ਜੇ.ਪੀ. ਹੱਥੋਂ ਵੱਡੀ ਸੱਟ ਸਿਆਸੀ ਮਾਅਨਿਆਂ 'ਚ ਅਕਾਲੀ ਦਲ ਨੂੰ ਸਹਿਣ ਹੋਣੀ ਔਖੀ ਜਾਪਦੀ ਹੈ।  ਅੱਜ ਵਿਧਾਇਕ ਬਲਕੌਰ ਸਿੰਘ ਦੀ ਜੇ.ਜੇ.ਪੀ ਵਿੱਚ ਸ਼ਮੂਲੀਅਤ ਸਮੇਂ ਅਜੈ ਸਿੰਘ ਚੌਟਾਲਾ ਨੇ ਕਿਹਾ ਕਿ ਬਲਕੌਰ ਸਿੰਘ ਦੇ ਸ਼ਾਮਲ ਹੋਣ ਨਾਲ ਜੇ.ਜੇ.ਪੀ ਕੋਲ ਚਾਰ ਵਿਧਾਇਕ ਹੋ ਗਏ ਹਨ। ਨਵੇਂ ਸਾਲ 'ਚ ਇਹ

ਸਿਲਸਿਲਾ ਲਗਾਤਾਰ ਜਾਰੀ ਰਹੇਗਾ। ਇਸ ਮੌਕੇ ਵਿਧਾਇਕ ਬਲਕੌਰ ਸਿੰਘ ਨੇ ਆਖਿਆ ਕਿ ਜੇਜੇਪੀ ਚੌਧਰੀ ਦੇਵੀ ਲਾਲ ਦੀਆਂ ਨੀਤੀਆਂ 'ਤੇ ਚੱਲ ਰਹੀ ਹੈ। ਮੈਨੂੰ ਇਹ ਨੀਤੀਆਂ ਚੰਗੀਆਂ ਲੱਗੀਆਂ। ਮੈਂ ਪਹਿਲਾਂ ਇਨੈਲੋ ਅਤੇ ਅਕਾਲੀ ਦਲ ਦੀ ਟਿਕਟ 'ਤੇ ਚੋਣ ਲੜਿਆ ਸੀ। ਹੁਣ ਅਕਾਲੀ ਦਲ ਚੋਣ ਲੜੇ ਜਾਂ ਨਾ ਲੜੇ। ਮੈਂ ਜਨਨਾਇਕ ਜਨਤਾ ਪਾਰਟੀ ਨਾਲ ਖੜ੍ਹਾ ਹਾਂ।  

  ਜ਼ਿਕਰਯੋਗ ਹੈ ਕਿ ਪਹਿਲਾਂ ਸ਼੍ਰੋਮਣੀ ਗੁਰਦੁਆਰਾ ਪ੍ਰਬੰਧਕ ਕਮੇਟੀ ਦੇ ਮੈਂਬਰ ਰਹੇ ਬਲਕੌਰ ਸਿੰਘ ਕਾਲਾਂਵਾਲੀ ਹਲਕੇ ਤੋਂ ਅਕਾਲੀ ਦਲ ਦੀ ਟਿਕਟ 'ਤੇ 2014 ਵਿੱਚ ਵਿਧਾਇਕ ਚੁਣੇ ਗਏ ਸਨ। 2014 ਵਿੱਚ ਚੌਧਰੀ ਓਮ ਪ੍ਰਕਾਸ਼ ਚੌਟਾਲਾ ਨੇ ਬੁੱਧ ਸਿੰਘ ਨਾਮਕ ਇਨੈਲੋ ਵਰਕਰ ਨੂੰ ਕਾਲਾਂਵਾਲੀ ਤੋਂ ਉਮੀਦਵਾਰ ਬਣਾਇਆ ਸੀ। ਬਾਅਦ 'ਚ ਅਕਾਲੀ ਦਲ ਨਾਲ ਗੱਠਜੋੜ ਉਪਰੰਤ ਬੁੱਧ ਸਿੰਘ ਦੀ ਜਗ੍ਹਾ ਬਲਕੌਰ ਸਿੰਘ ਨੂੰ ਕਾਲਾਂਵਾਲੀ ਉਮੀਦਵਾਰ ਬਣਾਇਆ ਗਿਆ ਸੀ। 

ਜਦੋਂ ਮਿਕਸ ਹੋ ਗਿਆ ਚਿੱਟਾ ਅਤੇ ਨੀਲਾ ਸਿਆਸੀ ਬਾਣਾ...

*  ਅਕਾਲੀ ਦਲ ਦੀ ਸ਼ਤਰੰਜੀ ਬਿਸਾਤ ’ਚ ਉਲਝ ਕਾਂਗਰਸੀ ਦੇ ਸਾਹਮਣੇ ਡਟੇ ਕਾਂਗਰਸੀ 

* ਕਾਂਗਰਸੀ ਸਰਪੰਚ ਬਣਨ ਲਈ ਉਤਾਵਲੇ, ਅਕਾਲੀ ਦਲ ਦੀ ਨਜ਼ਰ ਪੰਚਾਂ ’ਤੇ 

* ਅਖੌਤੀ ਸਿਆਸੀ ਸਲਾਹਕਾਰ ਅਤੇ ਚਹੇਤਾ ਪੱਤਰੇ ਵਾਚ ਗਏ

                                                    

                                                          ਇਕਬਾਲ ਸਿੰਘ ਸ਼ਾਂਤ 

ਲੰਬੀ: ਬਾਦਲਾਂ ਦੇ ਹਲਕੇ ਲੰਬੀ ਵਿੱਚ ਸਰਪੰਚੀ ਦੀ ਚਾਹਤ ਨੇ ਅਕਾਲੀ ਅਤੇ ਕਾਂਗਰਸੀ ਸਿਆਸਤ ਰਲਗਡ ਕਰ ਦਿੱਤੀ ਹੈ। ਸਰਪੰਚੀਆਂ ਦੇ ਗੇੜ ’ਚ ਸਿਆਸੀ ਵਫ਼ਾਦਾਰੀਆਂ ਦਾ ਅੰਦਾਜ਼  ਬਦਲ ਗਿਆ ਹੈ। ਭਾਈਚਾਰੇ, ਜਾਤਾਂ, ਗੋਤਾਂ ਅਤੇ ਪੱਤੀਆਂ ਦੇ ਆਧਾਰ ਮੂਹਰੇ ‘ਨੀਲੇ’ ਅਤੇ ‘ਚਿੱਟੇ’ ਦਾ ਫ਼ਰਕ ਫ਼ਿੱਕਾ ਪੈ ਗਿਆ ਹੈ। ਸਰਪੰਚੀ ਦੀ ਦੌੜ ’ਚ ਬੇਲਗਾਮ ਹੋਏ ਕਾਂਗਰਸੀਆਂ ਨੇ ਅਕਾਲੀਆਂ ਦੀ ਮੱਦਦ ਨਾਲ ਕਾਂਗਰਸੀਆਂ ਖਿਲਾਫ਼ ਹੀ ਝੰਡੇ ਗੱਡ ਦਿੱਤੇ ਹਨ। ਹਲਕੇ ਦੇ ਬਹੁਤੇ ਪਿੰਡਾਂ ’ਚ ਅਕਾਲੀ ਪਿੱਛੇ ਰਹਿ ਕੇ ਕਾਂਗਰਸੀਆਂ ਜਰੀਏ ਆਪਣੀ ਸਿਆਸੀ ਗੇਮ ਘੁੰਮਾ ਰਹੇ ਹਨ। ਕਾਂਗਰਸੀ ਦਾ ਜ਼ਿਆਦਾ ਧਿਆਨ ਸਿਰਫ਼ ਸਰਪੰਚੀਆਂ

ਵੱਲ ਹੈ। ਜਿਸ ਤਹਿਤ ਕਾਂਗਰਸ ਪੰਚਾਇਤੀ ਚੋਣਾਂ ਤੋਂ ਪਹਿਲਾਂ ਹੀ ਪਿੰਡਾਂ ’ਚ ਦੋ ਧੜਿਆਂ ’ਚ ਵੰਡੀ ਗਈ। ਦੂਜੇ ਪਾਸੇ ਅਕਾਲੀ ਦਲ ਪੰਚਾਇਤੀ ਕੰਮਕਾਜ਼ ’ਤੇ ਕਮਾਂਡ ਬਣਾਉਣ ਲਈ ਸਰਪੰਚਾਂ ਨਾਲੋਂ ਬਹੁਗਿਣਤੀ ਪੰਚ ਉਮੀਦਵਾਰ ਨੂੰ ਜਿਤਾਉਣ ’ਤੇ ਜ਼ੋਰ ਲਗਾ ਰਿਹਾ ਹੈ। ਜ਼ਿਕਰਯੋਗ ਹੈ ਕਿ ਲੰਬੀ ਹਲਕੇ ’ਚ ਵਿਰੋਧੀਆਂ ਪਾਰਟੀ ਦੇ ਸਰਪੰਚ ’ਤੇ ਦਾਅ ਖੇਡਣ ਦੀ ਪਿਰਤ ਪੰਜ ਸਾਲ ਪਹਿਲਾਂ ਕਾਂਗਰਸੀਆਂ ਨੇ ਸ਼ੁਰੂ ਕੀਤੀ ਸੀ, ਜਿਸਨੂੰ ਐਤਕੀਂ ਅਕਾਲੀਆਂ ਨੇ ਅਪਣਾ ਲਿਆ । ਲੰਬੀ ਹਲਕੇ ’ਚ ਵੜਿੰਗਖੇੜਾ, ਭੀਟੀਵਾਲਾ, ਬਲੋਚਕੇਰਾ, ਆਧਨੀਆਂ, ਭਾਗੂ, ਡੱਬਵਾਲੀ ਰਹੁੜਿਆਂਵਾਲੀ, ਸਹਿਣਾਖੇੜਾ, ਖੁੱਡੀਆਂ ਗੁਲਾਬ ਸਿੰਘ, ਖੁੱਡੀਆਂ ਮਹਾਂ ਸਿੰਘ, ਭਗਵਾਨਪੁਰਾ, ਤੱਪਾਖੇੜਾ ਅਤੇ ਖੇਮਾਖੇੜਾ ਆਦਿ ’ਚ ਸਰਪੰਚੀ ਚੋਣ ਵਿੱਚ ਕਾਂਗਰਸੀਆਂ ਹੀ ਕਾਂਗਰਸੀਆਂ ਖਿਲਾਫ਼ ਖੜ੍ਹੇ ਹੋਏ ਹਨ। ਕਾਂਗਰਸ ਲੀਡਰਸ਼ਿਪ ਪਿੰਡਾਂ ’ਚ ਕਾਂਗਰਸੀਆਂ ਦੇ ਟਾਕਰੇ ਰੋਕਣ ’ਚ ਬੇਵੱਸ ਸਾਬਤ ਹੋਈ। ਇਸ ਨਾਲ ਬਾਦਲਾਂ ਦੇ ਸਿਆਸੀ ਗੜ੍ਹ ’ਚ ਕਾਂਗਰਸ ਸਫ਼ਾਂ ਦੀ ਗੈਰ ਵਿਉਂਤਬੱਧ ਨੀਤੀ ਉਜਾਗਰ ਹੋਈ ਹੈ। ਜਦੋਂਕਿ ਅਕਾਲੀ ਦਲ ਨੇ ਇੱਕ-ਇੱਕ ਪੰਚ ’ਤੇ ਵੀ ਬਾਜ਼ ਅੱਖਾਂ ਨਾਲ ਨੀਤੀ ਤੈਅ ਕੀਤੀ। ਪੰਚਾਇਤੀ ਚੋਣਾਂ ਦੇ ਮੌਜੂਦਾ ਹਾਲਾਤਾਂ ਤਹਿਤ ਅਗਾਮੀ ਲੋਕਸਭਾ ਚੋਣਾਂ ’ਚ ਲੰਬੀ ’ਚ ਕਾਂਗਰਸ ਜੜ੍ਹਾਂ ਨੂੰ ਵੱਡਾ ਖੋਰਾ ਲੱਗਣ ਦੇ ਆਸਾਰ ਹਨ। ਪਿੰਡ ਬਲੋਚਕੇਰਾ ’ਚ ਕਾਂਗਰਸ ਆਗੂ ਸੁਖਬੀਰ ਸਿੰਘ ਬਲੋਚਕੇਰਾ ਅਤੇ ਕਾਂਗਰਸ ਆਗੂ ਸੰਤੋਖ ਸਿੰਘ ਭੁੱਲਰ ਵਕੀਲ ਦੀਆਂ ਪਤਨੀਆਂ ਚੋਣ ਆਹਮੋ-ਸਾਹਮਣੇ ਹਨ। ਅਰਨੀਵਾਲਾ ਵਜੀਰਾਂ ਵਿੱਚ ਤਾਂ ਤਿੰਨ ਕਾਂਗਰਸੀ ਸਰਪੰਚ ਉਮੀਦਵਾਰ ਖੜ੍ਹੇ ਹੋਏ ਹਨ। ਇੱਕ ਪਿੰਡ ’ਚ ਤਾਂ ਅਕਾਲੀਆਂ ਨੇ ਸੀਨੀਅਰ ਕਾਂਗਰਸੀ ਆਗੂ ਦੇ ਸੀਰੀ ਨੂੰ ਹੀ ਸਰਪੰਚ ਖੜ੍ਹਾ ਕਰ ਦਿੱਤਾ ਸੀ। 

ਮੰਡੀ ਕਿੱਲਿਆਂਵਾਲੀ ’ਚ ਕਾਂਗਰਸ ਪਾਰਟੀ ਨੂੰ ਸਰਪੰਚੀ ਉਮੀਦਵਾਰ ਦੀ ਭਾਲ ’ਚ ਵੱਡੀ ਮਸ਼ੱਕਤ ਕਰਨੀ ਪਈ। ਕਸਬੇ ਦੀਆਂ ਸਮੁੱਚੀਆਂ ਯੂਨੀਅਨਾਂ ’ਤੇ ਕਾਬਜ਼ ਪੇਂਡੂ ਕਾਂਗਰਸੀਆਂ ਦੀਆਂ ਕਾਰਗੁਜਾਰੀ ਤੇ ਲੀਡਰਸ਼ਿਪ ਦੀ ਅਣਦੇਖੀ ਕਾਰਨ ਨਾਰਾਜ਼ ਟਕਸਾਲੀ ਕਾਂਗਰਸੀ ਆਗੂ ਅਤੇ ਅਹੁਦੇਦਾਰ ਸਰਪੰਚੀ ਲੜਨ ਤੋਂ ਪਾਸਾ ਵੱਟ ਗਏ। ਇੱਕ ਅਖੌਤੀ ਸਿਆਸੀ ਸਲਾਹਕਾਰ ਆਪਣੇ ਇੱਕ ਚਹੇਤੇ ਨੂੰ ਸਾਲ ਭਰ ਤੋਂ ਸਰਪੰਚ ਬਣਾਉਣ ਦੇ ਦਮਗੱਜੇ ਭਰਦਾ ਰਿਹਾ ਪਰ ਹੁਣ ਸਲਾਹਕਾਰ ਅਤੇ ਚਹੇਤਾ ਦੋਵੇਂ ਪੱਤਰੇ ਵਾਚ ਗਏ। ਕਈ ਪਿੰਡਾਂ ’ਚ ਅਕਾਲੀ ਦਲ ਅਤੇ ਕਾਂਗਰਸ ਦੇ ਉਮੀਦਵਾਰ ਵੀ ਆਹਮੋ-ਸਾਹਮਣੇ ਹਨ ਪਰ ਉਨ੍ਹਾਂ ’ਚ ਕਾਂਗਰਸੀ ਸਫ਼ਾ ਆਪਣੇ ਵਿਰੋਧੀ ਕਾਂਗਰਸੀ ਨੂੰ ਠਿੱਬੀ ਲਗਾਉਣ ਲਈ ਅਕਾਲੀਆਂ ਨਾਲ ਮੂੰਹ ਜੋੜੀ ਬੈਠੀਆਂ ਹਨ। ਵੜਿੰਗਖੇੜਾ ’ਚ ਸਾਬਕਾ ਕਾਂਗਰਸ ਸਰਪੰਚ ਦਰਸ਼ਨ ਸਿੰਘ ਦੀ ਪਤਨੀ ਅਤੇ ਕਾਂਗਰਸ ਆਗੂ ਧਰਮ ਸਿੰਘ ਦੀ ਨੂੰਹ ਆਹਮੋ-ਸਾਹਮਣੇ ਹਨ। ਹਾਕੂਵਾਲਾ ਵਿਖੇ ਕਾਂਗਰਸ ਆਗੂ ਜਥੇਦਾਰ ਬਚਿੱਤਰ ਸਿੰਘ ਅਤੇ ਕਾਂਗਰਸ ਆਗੂ ਗੁਰਦੀਪ ਸਿੰਘ ਦੀਆਂ ਪਤਨੀਆਂ ਆਹਮੋ-ਸਾਹਮਣੇ ਹਨ। ਇੱਕ ਸੀਨੀਅਰ ਅਕਾਲੀ ਲੀਡਰ ਨੇ ਅਕਾਲੀ ਸਰਪੰਚੀ ਉਮੀਦਵਾਰੀਆਂ ਬਾਰੇ ਪੁੱਛੇ ਜਾਣ ’ਤੇ ਦੋ-ਤਿੰਨ ਪਿੰਡਾਂ ਦੇ ਕਾਂਗਰਸੀ ਉਮੀਦਵਾਰਾਂ ਨੂੰ ਅਕਾਲੀ ਉਮੀਦਵਾਰਾਂ ਵਜੋਂ ਗਿਣਵਾਇਆ। ਦੂਜੇ ਪਾਸੇ ਕਾਂਗਰਸੀਆਂ ਦੇ ਆਹਮੋ-ਸਾਹਮਣੇ ਡਟਣ ਬਾਰੇ ਜ਼ਿਲ੍ਹਾ ਕਾਂਗਰਸ ਕਮੇਟੀ ਮੁਕਤਸਰ ਸਾਹਿਬ ਦੇ ਪ੍ਰਧਾਨ ਗੁਰਮੀਤ ਸਿੰਘ ਖੁੱਡੀਆਂ ਦਾ ਕਹਿਣਾ ਸੀ ਕਿ ਕਾਂਗਰਸੀ ਵਰਕਰਾਂ ਵਿੱਚ ਉਤਸ਼ਾਹ ਹੀ ਇਤਨਾ ਹੈ ਕਿ ਉਹ ਹੁੰਮ-ਹੁੰਮਾ ਚੋਣਾਂ ਵਿੱਚ ਡਟ ਗਏ ਗਏ ਹਨ। 

                                  ਰਲੇਵੇਂ ਵਾਲੀ ਸਰਬਸੰਮਤੀ ਫੇਲ੍ਹ

ਲੰਬੀ ਹਲਕੇ ਦੇ ਅਤਿ ਸੰਵੇਦਨਸ਼ੀਲ ਪਿੰਡ ਭੀਟੀਵਾਲੀ ਦੀ ਸਰਪੰਚੀ ਵਿੱਚ ਸਰਬਸੰਮਤੀ ਕਾਂਗਰਸੀਆਂ ਦੇ ਆਪਸੀ ਦਵੇਸ਼ ਕਾਰਨ ਸਿਆਸੀ ਟਾਕਰੇ ਵਿੱਚ ਬਦਲ ਗਈ। ਲੰਬੀ ਹਲਕੇ ’ਚ ਅਤਿ ਸੰਵੇਦਲਨਸ਼ੀਲ ਪਿੰਡ ਭੀਟੀਵਾਲਾ ’ਚ ਅਕਾਲੀ ਦਲ ਵੱਲੋਂ ਬਲਾਕ ਸੰਮਤੀ ਮੈਂਬਰ ਜਗਤਾਰ ਸਿੰਘ ਅਤੇ ਕਾਂਗਰਸ ਦੇ ਕੁਲਵੰਤ ਸਿੰਘ ਅਤੇ ਪਵਨਦੀਪ ਸਿੰਘ ਮੈਦਾਨ ਵਿੱਚ ਉੱਤਰੇ ਸਨ। ਨਾਮਜ਼ਗੀ ਕੇਂਦਰ ਖਿਉਵਾਲੀ ’ਚ ਕਾਂਗਰਸ ਆਗੂ ਪਵਨਦੀਪ ਸਿੰਘ ਨੂੰ ਪਹਿਲਾਂ ਸਰਪੰਚ ਬਣਾ ਕੇ ਬਾਅਦ ’ਚ ਅਕਾਲੀ ਆਗੂ ਜਗਤਾਰ ਸਿੰਘ ਨਾਲ ਢਾਈ-ਢਾਈ ਸਾਲ ਦੀ ਸਰਬਸੰਮਤੀ ਬਣ ਗਈ ਸੀ। ਉਸੇ ਦੌਰਾਨ ਸਰਬਸੰਮਤੀ ਦੀ ਗੇਮ ’ਚੋਂ ਲਾਂਭੇ ਕੀਤੇ ਤੀਜੇ ਉਮੀਦਵਾਰ ਕੁਲਵੰਤ ਸਿੰਘ ਨੇ ਉਕਤ ਸਰਬਸੰਮਤੀ ਨੂੰ ਦੋਵੇਂ ਉਮੀਦਵਾਰਾਂ ਦੀ ਪਹਿਲਾਂ ਤੋਂ ਮਿਲੀਭੁਗਤ ਦੱਸਦਿਆਂ ਚੋਣ ਮੈਦਾਨ ’ਚ ਡਟੇ ਰਹਿਣ ਦਾ ਐਲਾਨ ਕਰ ਦਿੱਤਾ। ਪਵਨਦੀਪ ਨੂੰ ਜਗਤਾਰ ਧੜੇ ਦੀ ਹਮਾਇਤ ਦੱਸੀ ਜਾਂਦੀ ਹੈ। ਜਗਤਾਰ ਸਿੰਘ ਨੇ ਪਵਨਦੀਪ ਸਿੰਘ ਦੀ ਹਮਾਇਤ ’ਚ ਕਾਗਜ਼ ਵਾਪਸ ਲੈ ਲਏ। ਪਤਾ ਲੱਗਿਆ ਹੈ ਕਿ ਪਿੰਡ ਵਾਸੀਆਂ ਨੂੰ ਉਕਤ ਸਰਬਸੰਮਤੀ ਦਾ ਪਹਿਲਾਂ ਤੋਂ ਖਦਸ਼ਾ ਸੀ। ਇਸੇ ਕਰਕੇ ਕੁਲਵੰਤ ਸਿੰਘ ਮੈਦਾਨ ’ਚ ਉਤਰਿਆ ਸੀ। ਸਹਾਇਕ ਰਿਟਰਨਿੰਗ ਅਫਸਰ ਜੱਸਾ ਸਿੰਘ ਨੇ ਕਿਹਾ ਕਿ ਭੀਟੀਵਾਲਾ ’ਚ ਪਵਨਦੀਪ ਸਿੰਘ ਅਤੇ ਕੁਲਵੰਤ ਸਿੰਘ ਚੋਣ ਮੈਦਾਨ ਵਿੱਚ ਹਨ। 

ਟਾਕੀਆਂ ਸਿਉਣ ਲਈ ਕਿੰਨੂਆਂ ’ਚੋਂ ਕੱਢੇ ਰਹੇ ‘ਰਸ’

                                                    ਇਕਬਾਲ ਸਿੰਘ ਸ਼ਾਂਤ

ਡੱਬਵਾਲੀ/ਲੰਬੀ: ਪੰਜਾਬ ਦੀ ਆਰਥਿਕ ਤੌਰ ’ਤੇ ਬਦਹਾਲ ਪੰਜਾਬ ਸਰਕਾਰ ਕਿਸਾਨੀ ਦੇ ਸਹਿ-ਧੰਦਿਆਂ ਦੀਆਂ ਘੁੰਡੀਆਂ ਭਾਲ ਕੇ ਖਜ਼ਾਨੇ ਦੀਆਂ ਟਾਕੀਆਂ ਸਿਉਣ ’ਚ ਜੁਟ ਗਈ ਹੈ। ਪੰਜਾਬ ਮੰਡੀ ਬੋਰਡ ਨੇ ਖੇਤੀਬਾੜੀ ਦੇ ਸਫ਼ਲ ਸਹਿ-ਧੰਦੇ ਕਿੰਨੂਆਂ ਦੇ ਸੈਂਕੜੇ ਕਰੋੜ ਦੇ ਦਰਾਮਦੀ ਕਾਰੋਬਾਰ ’ਤੇ ਸ਼ਿਕੰਜਾ ਕਸ ਦਿੱਤਾ ਹੈ। ਪੰਜਾਬ ’ਚੋਂ ਦਿੱਲੀ ਵਗੈਰਾ ਨੂੰ ਜਾਂਦੇ ਕਿੰਨੂਆਂ ਤੋਂ ਮਾਲੀਆ ਵਸੂਲਣ ਲਈ ਘੇਰਾ ਪਾ ਲਿਆ ਗਿਆ ਹੈ। ਜ਼ਿਲ੍ਹਾ ਮੰਡੀ ਅਫਸਰ ਮਨਿੰਦਰਜੀਤ ਸਿੰਘ ਬੇਦੀ ਅਤੇ ਮਾਰਕੀਟ

ਕਮੇਟੀ ਮਲੋਟ ਦੇ ਸਕੱਤਰ ਗੁਰਪ੍ਰੀਤ ਸਿੰਘ ਸਿੱਧੂ ਵੱਲੋਂ ਨਾਕੇ ਲਗਾ ਕੇ ਕਿੰਨੂਆਂ ਦੇ ਲੱਦੇ ਵਹੀਕਲਾਂ ਤੋਂ ਚਾਰ ਫ਼ੀਸਦੀ ਟੈਕਸ ਲਿਆ ਜਾ ਰਿਹਾ ਹੈ। ਬੋਰਡ ਵੱਲੋਂ ਮਾਰਕੀਟ ਕਮੇਟੀਆਂ ਨੂੰ ਬਾਗਾਂ ’ਚ ਜਿਣਸ ਦੀ ਰੋਜ਼ਾਨਾ ਅਚਨਚੇਤ ਪੜਤਾਲ ਕਰਕੇ ਅਣਅਧਿਕਾਰਤ ਵਿਕਰੀ ’ਤੇ ਰੋਕ ਲਗਾਉਣ ਦੀ ਤਾਕੀਦ ਕੀਤੀ ਹੈ। ਚਾਰ ਫ਼ੀਸਦੀ ਟੈਕਸ ਵਿੱਚ ਦੋ ਫ਼ੀਸਦ ਮਾਰਕੀਟ ਫੀਸ ਅਤੇ ਦੋ ਫ਼ੀਸਦ ਪੇਂਡੂ ਵਿਕਾਸ ਫੰਡ ਸ਼ਾਮਲ ਹੈ। ਪੰਜਾਬ ਮੰਡੀ ਬੋਰਡ ਵੱਲੋਂ ਨਾਕੇਬੰਦੀ ਤਹਿਤ ਟੈਕਸ ਵਸੂਲਣ ਨਾਲ ਬਾਗਵਾਨ ਕਿਸਾਨਾਂ ਵਿੱਚ ਰੋਸ ਫੈਲ ਰਿਹਾ ਹੈ। ਉਹ ਇਹ ਫੈਸਲੇ ਨੂੰ ਕੈਪਟਨ ਸਰਕਾਰ ਦਾ ਕਿਸਾਨ ਵਿਰੋਧੀ ਰਵੱਈਆ ਗਰਦਾਨ ਕੇ ਉਨ੍ਹਾਂ ਦੀਆਂ ਜੇਬਾਂ ’ਚ ਹੱਥ ਪਾਉਣ ਤੁੱਲ ਦੱਸ ਰਹੇ ਹਨ। ਖੇਤੀਬਾੜੀ/ਬਾਗਵਾਨੀ ਵਿਭਾਗ ਖੁਦ ਮੁੱਖ ਮੰਤਰੀ ਅਮਰਿੰਦਰ ਹੁਰਾਂ ਦੇ ਕੋਲ ਹੈ। 

ਦੂਜੇ ਪਾਸ ਮੰਡੀ ਬੋਰਡ ਦਾ ਕਹਿਣਾ ਹੈ ਕਿ ਠੇਕੇਦਾਰਾਂ ਵੱਲੋਂ ਸਿੱਧੇ ਤੌਰ ’ਤੇ ਕਿੰਨੂਆਂ ਦੇ ਬਾਗ ਠੇਕੇ ’ਤੇ ਲੈਣ ਉਪਰੰਤ ਪੰਜਾਬ ਦੀ ਸਰਕਾਰੀ ਮੰਡੀ ਨੂੰ ਬਾਈਪਾਸ ਕਰਕੇ ਪੰਜਾਬ ਤੋਂ ਬਾਹਰ ਭੇਜ ਦਿੱਤਾ ਜਾਂਦਾ ਹੈ। ਜਿਸ ਨਾਲ ਪੰਜਾਬ ਸਰਕਾਰ ਨੂੰ ਕਰੋੜਾਂ ਰੁਪਏ ਦੀ ਮਾਰਕੀਟ ਫੀਸ ਦਾ ਖੋਰਾ ਲੱਗਦਾ ਹੈ। ਬੋਰਡ ਅਨੁਸਾਰ ਬਹੁਗਿਣਤੀ ਬਾਗ ਠੇਕੇਦਾਰ ਨੂੰ ਠੇਕੇ ’ਤੇ ਦਿੱਤੇ ਹੋਏ ਹਨ। 

ਪੰਜਾਬ ਮੰਡੀ ਬੋਰਡ ਨੇ ਕਿੰਨੂਆਂ ਦੀ ਫ਼ਸਲ ਦੇ ਬਾਗਾਂ ਵਿੱਚ ਹੋ ਰਹੇ ਸੌਦਿਆਂ ਲਈ ਸਰਹੱਦੀ ਖੇਤਰਾਂ ਦੀਆਂ ਪੰਜ ਮਾਰਕੀਟ ਕਮੇਟੀਆਂ ਹੁਸ਼ਿਆਰਪੁਰ, ਅਬੋਹਰ, ਮਲੋਟ, ਬਠਿੰਡਾ ਅਤੇ ਪਠਾਨਕੋਟ ਦੀ ਸ਼ਨਾਖ਼ਤ ਕੀਤੀ ਹੈ। ਬਾਗਵਾਨੀ ਵਿਭਾਗ ਦੇ ਅੰਕੜਿਆਂ ਮੁਤਾਬਕ ਪੰਜਾਬ ’ਚ ਕਿੰਨੂਆਂ ਦਾ ਸਲਾਨਾ ਕਾਰੋਬਾਰ ਅਰਬਾਂ ਰੁਪਏ ਦਾ ਹੈ। ਬਾਗਾਂ ਦੇ ਗੜ੍ਹ ਅਖਵਾਉਂਦੇ ਅਬੋਹਰ ਖੇਤਰ ਵਿੱੱਚ 30588 ਹੈਕਟੇਅਰ ਰਕਬਾ ਕਿੰਨੂਆਂ ਦੀ ਬਾਗਵਾਨੀ ਅਧੀਨ ਹੈ। ਜਿਸ ਵਿੱਚੋਂ ਬੀਤੇ ਵਿੱਤ ਵਰ੍ਹੇ ’ਚ 715453 ਮੀਟ੍ਰਿਕ ਟਨ ਕਿੰਨੂਆਂ ਦੀ ਪੈਦਾਵਾਰ ਹੋਈ। ਜਦੋਂਕਿ ਲੰਬੀ ਖੇਤਰ ਵਿੱਚ 3163 ਹੈਕਟੇਅਰ ਕਰਬੇ ’ਚੋਂ ਕਿੰਨੂਆਂ ਦੀ ਪੈਦਾਵਾਰ 77 ਹਜ਼ਾਰ ਮੀਟ੍ਰਿਕ ਟਨ ਰਹੀ। ਨਾਕੇਬੰਦੀ ਦੌਰਾਨ ਕਿੰਨੂਆਂ ਦੀ ਵੱਖ-ਵੱਖ ਗਰੇਡਿੰਗ ਨੂੰ ਆਧਾਰ ਬਣਾ ਕੇ ਅੌਸਤਨ ਛੇ-ਸੱਤ ਰੁਪਏ ਪ੍ਰਤੀ ਕਿੱਲੋ ਕੀਮਤ ’ਤੇ ਚਾਰ ਫ਼ੀਸਦੀ ਟੈਕਸ ਵਸੂਲਿਆ ਜਾ ਰਿਹਾ ਹੈ।

         ਵਪਾਕਰ ਜਾਣਕਾਰਾਂ ਮੁਤਾਬਕ ਕਿੰਨੂਆਂ ਦੀ 50 ਫ਼ੀਸਦੀ ਫ਼ਸਲ ਪੰਜਾਬ ਦੀਆਂ ਮੰਡੀਆਂ ਵਿਕਦੀ ਹੈ। ਜਿੱਥੋਂ ਮੰਡੀ ਬੋਰਡ ਨੂੰ ਸੁੱਤੇ ਸਾਹ ਚਾਰ ਫ਼ੀਸਦੀ ਟੈਕਸ ਮਿਲ ਜਾਂਦਾ ਹੈ। ਜਦੋਂਕਿ ਬਾਕੀ ਦੀ ਪੰਜਾਹ ਫ਼ੀਸਦੀ ਬਾਹਰੀ ਸੂਬਿਆਂ ਨੂੰ ਜਾਂਦੀ ਹੈ। ਮੀਟ੍ਰਿਕ ਟਨਾਂ ਵਾਲੇ ਬਾਗਵਾਨੀ ਅੰਕੜਿਆਂ ਨੂੰ ਰੁਪਇਆਂ ’ਚ ਤਬਦੀਲ ਕਰਕੇ ਸਿਰਫ਼ ਸੱਤ ਰੁਪਏ ਪ੍ਰਤੀ ਕਿੱਲੋ ਨਾਲ ਗੁਣਾ ਕੀਤਾ ਜਾਵੇ ਤਾਂ ਸਿਰਫ਼ ਅਬੋਹਰ ਅਤੇ ਅਬੋਹਰ ’ਚ ਕਿੰਨੂ ਦੀਆਂ ਫ਼ਸਲ 6 ਸਾਢੇ ਅਰਬ ਰੁਪਏ ਨੂੰ ਪੁੱਜ ਜਾਂਦੀ ਹੈ। ਮੰਡੀ ਬੋਰਡ ਬਾਹਰੀ ਸੂਬਿਆਂ ਨੂੰ ਜਾਂਦੀ 50 ਫ਼ੀਸਦੀ ਫ਼ਸਲ ’ਤੇ ਚਾਰ ਫ਼ੀਸਦੀ ਟੈਕਸ ਮੁਤਾਬਕ ਕਰੀਬ 12 ਕਰੋੜ ਟੈਕਸ ਉਗਰਾਹੁਣਾ ਚਾਹੁੰਦਾ ਹੈ। ਉੱਚ ਪੱਧਰੀ ਸੂਤਰਾਂ ਦਾ ਕਹਿਣਾ ਹੈ ਕਿ ਕਿੰਨੂਆਂ ਦੇ ਕਾਰੋਬਾਰ ਨਾਲ ਜੁੜੇ ਮਹਿਕਮਾ ਮਾਲੀਆ ’ਚ ਬੈਠੇ ਕੁਝ ਖਾਸ ਵਿਅਕਤੀਆਂ ਨੇ ਬਾਹਰ ਜਾ ਰਹੇ ਕਿੰਨੂਆਂ ਵਿੱਚੋਂ ਟੈਕਸ ਵਾਲਾ ਜੂਸ ਕੱਢਣ ਦੀ ਜੁਗਤ ਕੱਢੀ ਹੈ। ਪੰਜਾਬ ਮੰਡੀ ਬੋਰਡ ਨੇ ਦਾਣਾ ਮੰਡੀਆਂ ’ਚ ਫ਼ਸਲ ਖਰੀਦ ਮੁਕੰਮਲ ਹੋਣ ਮਗਰੋਂ ਅਮਲੇ ਨੂੰ ਕਿੰਨੂਆਂ ’ਚੋਂ ਟੈਕਸ ਵਾਲਾ ਜੂਸ ਕੱਢਣ ’ਤੇ ਲਾ ਦਿੱਤਾ ਹੈ। 

         ਬਾਗਵਾਨ ਕਿਸਾਨ ਗੁਰਪ੍ਰੀਤ ਸਿੰਘ ਸਿੱਧੂ ਨੇ ਆਖਿਆ ਕਿ ਸੂਬੇ ’ਚ ਕਿੰਨੂ ਕਾਸ਼ਤ ਨੂੰ ਫੈਲਾਅ ਲਈ ਕੋਈ ਵਿਸ਼ੇਸ਼ ਮੰਡੀ/ਬਾਜ਼ਾਰ ਨਹੀਂ ਅਤੇ ਫ਼ਸਲ ਵਿਕਵਾਉਣ ਲਈ ਠੋਸ ਨੀਤੀ ਹੈ। ਬਾਹਰੀ ਸੂਬਿਆਂ ’ਚ ਖੁਦ ਵੇਚਣ ਜਾਂਦੇ ਕਿਸਾਨਾਂ ਤੋਂ ਵੀ ਜ਼ਬਰਦਸਤੀ ਟੈਕਸ ਉਗਰਾਹਿਆ ਜਾ ਰਿਹਾ ਹੈ। ਆਪਣੇ ਪੱਧਰ ’ਤੇ ਕਿੰਨੇ ਵੇਚਣ ਜਾ ਰਹੇ ਕਿਸਾਨ ਨੂੰ ਪਹਿਲਾਂ 30 ਕਿਲੋਮੀਟਰ ਦੂਰ ਮਾਰਕੀਟ ਕਮੇਟੀ ਨੂੰ ਦੱਸਣਾ ਪਵੇਗਾ, ਫਿਰ ਮੁਲਾਜਮ ਮੌਕੇ ’ਤੇ ਪੁੱਜ ਪੜਤਾਲ ਕਰਨਗੇ, ਉਸ ਮਗਰੋਂ ਫ਼ਸਲ ਟੈਕਸ ਮੁਕਤ ਹੋ ਸਕੇਗੀ। ਉਨ੍ਹਾਂ ਪ੍ਰਕਿਰਿਆ ਖੱਜਲ ਖੁਆਰੀ ਭਰੀ ਹੈ। 

ਬਾਗਵਾਨ ਕਿਸਾਨ ਗੁਰਦਾਸ ਸਿੰਘ ਨੇ ਆਖਿਆ ਕਿ ਸਰਕਾਰੀ ਨਿਯਮ ਹੈ ਕਿ ਕਿਸਾਨ ਆਪਣੀ ਫ਼ਸਲ ਦੇਸ਼ ’ਚ ਕਿਧਰੇ ਵੀ ਵੇਚ ਸਕਦਾ ਹੈ ਤਾਂ ਕਿੰਨੂਆਂ ਕਾਸ਼ਤਕਾਰਾਂ ’ਤੇ ‘ਜਜੀਆ’ ਟੈਕਸ ਲਗਾ ਕੇ ਸਰਕਾਰ ਸਰਾਸਰ ਧੱਕਾ ਕਰ ਰਹੀ ਹੈ। ਬਾਗਵਾਨ ਮਹਿੰਦਰ ਸਿੰਘ ਦਾ ਕਹਿਣਾ ਸੀ ਕਿ ਬਾਗ ਠੇਕੇਦਾਰਾਂ ਤੋਂ ਵਸੂਲਿਆ ਟੈਕਸ ਵਿੱਚ ਆਖ਼ਰ ’ਤੇ ਬਾਗਵਾਨ ਕਿਸਾਨ ਦੇ ਸਿਰ ਹੀ ਪੈਣਾ ਹੈ। 

ਦੂਜੇ ਪਾਸੇ ਜ਼ਿਲ੍ਹਾ ਮੰਡੀ ਅਫਸਰ ਮੁਕਤਸਰ ਸਾਹਿਬ ਮਨਿੰਦਰਜੀਤ ਸਿੰਘ ਬੇਦੀ ਆਖਿਆ ਨੇ ਸਰਕਾਰ ਨਿਰਦੇਸ਼ਾਂ ’ਤੇ ਨਾਕੇ ਲਗਾ ਕੇ ਬਾਹਰ ਜਾ ਰਹੀ ਕਿੰਨੂ ਅਤੇ ਹੋਰ ਸਬਜ਼ੀਆਂ ’ਤੇ ਟੈਕਸ ਲਿਆ ਜਾ ਰਿਹਾ ਹੈ। ਉਨ੍ਹਾਂ ਕਿਹਾ ਕਿ ਖੁਦ ਬਾਗਵਾਨਾਂ ਨੂੰ ਕਿੰਨੂ ਵੇਚਣ ਲਈ ਵੀ ਸਰਕਾਰ ਵੱਲੋਂ ਤੈਅ ਦਸਤਾਵੇਜ਼ੀ ਪ੍ਰਕਿਰਿਆ ਵਿਚੋਂ ਲੰਘਣਾ ਪਵੇਗਾ। 

ਹਰਿਆਣੇ ’ਚ ਬੰਦ ਐ ਫਲਾਂ-ਸਬਜ਼ੀਆਂ ’ਤੇ ਟੈਕਸ

ਕਿੰਨੂਆਂ ਦੇ ਠੇਕੇਦਾਰ ਸਤੀਸ਼ ਕੁਮਾਰ ਨੇ ਆਖਿਆ ਕਿ ਹਰਿਆਣੇ ਵਿੱਚ ਫਲਾਂ ਅਤੇ ਸਬਜ਼ੀਆਂ ’ਤੇ ਮਾਰਕੀਟ ਕਈ ਸਾਲਾਂ ਤੋਂ ਬੰਦ ਕੀਤੀ ਹੋਈ ਹੈ। ਪੰਜਾਬ ਸਰਕਾਰ ਨੂੰ ਉਸੇ ਤਰਜ਼ ’ਤੇ ਟੈਕਸ ਮਾਫ਼ ਕਰਕੇ ਫਲਾਂ ਅਤੇ ਸਬਜ਼ੀ ਦੀ ਖੇਤੀ ਨੂੰ ਉਤਸਾਹਤ ਕਰਨਾ ਚਾਹੀਦਾ ਹੈ। 

ਸਰਕਾਰੀ ਤੰਤਰ ਦੇ ਹੱਡਾਂ ’ਚ ਰਚਿਆ ਹਕੂਮਤ ਦਾ ਚੜ੍ਹੇ ਦਿਨ ਜਾਗਣ ਵਾਲਾ ਸੁਭਾਅ

* ਬਾਇਓ ਮੀਟ੍ਰਿਕ ਹਾਜ਼ਰੀ ਪ੍ਰਤੀ ਪੰਜਾਬ ਸਰਕਾਰ ਦੇ ਹੱਥ ਖਾਲੀ

* ਦਫ਼ਤਰਾਂ ’ਚ ਅਮਲੇ ਦੀ ਅੌਸਤ ਹਾਜ਼ਰੀ ਸਿਰਫ਼ 55-56 ਫ਼ੀਸਦੀ 

* ਜਨਤਾ ਕੰਮ ਧੰਦਿਆਂ ਲਈ ਗੇੜੇ ਮਾਰ ਕੇ ਹੰਦੀ ਖੱਜਲ ਖੁਆਰ 

ਇਕਬਾਲ ਸਿੰਘ ਸ਼ਾਂਤ

      ਲੰਬੀ: ਹੁਕਮਰਾਨਾਂ ਦਾ ਦਿਨ ਚੜ੍ਹਨ ਮਗਰੋਂ ਜਾਗਣ ਦਾ ਸੁਭਾਅ ਸਰਕਾਰ ਤੰਤਰ ਦੀ ਹੱਡਾਂ ’ਚ ਰਚਣ ਲੱਗਿਆ ਹੈ। ਰੋਜ਼ਾਨਾ ਸਵੇਰੇ 10-11 ਵਜੇ ਦਫ਼ਤਰਾਂ ’ਚ ਪੁੱਜਣਾ ਸਰਕਾਰੀ ਅਮਲੇ ਦੀ ਆਦਤ ਬਣ ਗਈ ਹੈ। ਛੋਟੇ ਕਸਬਿਆਂ ਅਤੇ ਪੇੇਂਡੂ ਖੇਤਰਾਂ ’ਚ ਸਥਿਤ ਦਫ਼ਤਰਾਂ ’ਚ ਸਰਕਾਰੀ ਅਮਲੇ ਦੀ ਅੌਸਤ ਹਾਜ਼ਰੀ ਸਿਰਫ਼ 55-56 ਫ਼ੀਸਦੀ ਤੱਕ ਵੇਖਣ ਨੂੰ ਮਿਲ ਰਹੀ ਹੈ। ਜ਼ਿਲ੍ਹਾ ਪੱਧਰੀ ਅਤੇ ਸਬ ਡਿਵੀਜਨ ਪੱਧਰੀ ਅਧਿਕਾਰੀਆਂ ਵੱਲੋਂ ਲਗਾਤਾਰ ਨਿਗਰਾਨੀ ਦੀ ਥੁੜ ਹੈ। ਪੇਂਡੂ ਅਤੇ

ਕਸਬਾਈ ਦਫ਼ਤਰ ਵੀ ਹਾਜ਼ਰੀ ਪੱਖੋਂ ‘ਲਾਲੇ ਦੀ ਹੱਟੀ’ ਵਾਂਗ ਚੱਲਦੇ ਹਨ। ਉਂਝ ਸਬ ਡਿਵੀਜਨ ਅਤੇ ਜ਼ਿਲ੍ਹਾ ਪੱਧਰ ’ਤੇ ਵੀ ਹਾਲਾਤ ਬਹੁਤੇ ਜੁਦਾ ਨਹੀਂ ਹਨ।

      ਸੂਬੇ ’ਚ ਆਮ ਰਾਜ ਪ੍ਰਬੰਧਾਂ ਨੂੰ ਸੁਚਾਰੂ ਢੰਗ ਨਾਲ ਚਲਾਉਣ ਲਈ ਗੱਜ-ਬੱਜ ਕੇ ਸੱਤਾ ’ਤੇ ਕਾਬਜ਼ ਹੋਈ ਕਾਂਗਰਸ ਸਰਕਾਰ ਵੀ ਬਹੁਤੀ ਗੰਭੀਰ ਨਹੀਂ ਹੈ। ਡੇਢ ਸਾਲ ਦੇ ਰਾਜਭਾਗ ’ਚ ਸਰਕਾਰ ਦਫ਼ਤਰੀ ਕੰਮਕਾਜ਼ ’ਚ ਤੇਜ਼ੀ ਲਿਆਉਣ ਲਈ ਕੋਈ ਕਦਮ ਨਹੀਂ ਪੁੱਟ ਸਕੀ। ਪੰਜਾਬ ਸਰਕਾਰ ਦੇ ਕਰੀਬ ਪੰਜਾਹ ਵਿਭਾਗ ਹਨ। ਜਿਨ੍ਹਾਂ ਵਿਚੋਂ ਦੋ ਫ਼ੀਸਦੀ ਵਿਭਾਗ ਵੀ ਪੂਰੀ ਤਰ੍ਹਾਂ ਬਾਇਓ ਮੀਟ੍ਰਿਕ ਹਾਜ਼ਰੀ ਨਾਲ ਨਹੀਂ ਜੁੜੇ ਹਨ। ਹਾਲੇ ਤਾਂ ਚੰਡੀਗੜ੍ਹ ਵਿਖੇ ਪੰਜਾਬ ਸਕੱਤਰੇਤ ’ਚ ਬਾਇਓ ਮੀਟ੍ਰਿਕ ਹਾਜ਼ਰੀ ਮਸ਼ੀਨਾਂ ਲਗਾਉਣ ਲਈ ਵੀ ਪ੍ਰਾਜੈਕਟ ਆਮ ਰਾਜ ਪ੍ਰਬੰਧ ਵਿਭਾਗ ਦੀ ਫਾਈਲਾਂ ’ਚ ਦੱਬਿਆ ਪਿਆ ਹੈ ।  

     ਸੂਤਰਾਂ ਅਨੁਸਾਰ ਕਰੀਬ ਸਾਲ ਭਰ ਪਹਿਲਾਂ ਕਈ ਵਿਭਾਗਾਂ ਨੇ ਬਾਇਓ ਮੀਟ੍ਰਿਕ ਹਾਜ਼ਰੀ ਲਈ ਅਮਲੇ ਦੇ ਅੰਗੂਠਿਆਂ ਦੇ ਨਿਸ਼ਾਨ ਲਏ ਸਨ। ਫੰਡਾਂ ਅਤੇ ਇੱਛਾ ਸ਼ਕਤੀ ਦੀ ਘਾਟ ਕਾਰਨ ਉਹ ਨਿਸ਼ਾਨ ਫਾਈਲਾਂ ’ਚ ਪਏ-ਪਏ ਫਿੱਕੇ ਪੈਣ ਲੱਗੇ ਹਨ। ਸੂਤਰਾਂ ਅਨੁਸਾਰ ਸੀਨੀਅਰ ਅਫਸਰਸ਼ਾਹੀ ਵੀ ਸਰਕਾਰੀ ਤੰਤਰ ’ਤੇ ਬਾਇਓ ਮੀਟ੍ਰਿਕ ਹਾਜ਼ਰੀ ਦਾ ਸ਼ਿਕੰਜਾ ਕਸਣ ਦੇ ਡਰੋਂ ਮਾਮਲੇ ਨੂੰ ਜਾਣ-ਬੁੱਝ ਕੇ ਲਮਕਾ ਰਹੀ ਹੈ। ਹੁਣ ਤੱਕ ਪੰਜਾਬ ਮੰਡੀ ਬੋਰਡ ਦੇ ਹੀ ਬਹੁਗਿਣਤੀ ਦਫ਼ਤਰ ਬਾਇਓ ਮੀਟ੍ਰਿਕ ਹਾਜ਼ਰੀ ਅਧੀਨ ਦੱਸੇ ਜਾਂਦੇ ਹਨ। ਸੂਬੇ ’ਚ 19 ਹਜ਼ਾਰ ਸਰਕਾਰੀ ਸਕੂਲ ਹਨ। ਸਿਰਫ਼ ਇੱਕ ਹਜ਼ਾਰ ਸਕੂਲਾਂ ’ਚ ਬਾਇਓ ਮੀਟ੍ਰਿਕ ਮਸ਼ੀਨਾਂ ਲੱਗੀਆਂ ਹਨ। ਜ਼ਿਲ੍ਹਾ ਸਿੱਖਿਆ ਦਫ਼ਤਰਾਂ ਨੂੰ ਵੀ ਪਿੱਛੇ ਜਿਹੇ ਬਾਇਓ ਮੀਟ੍ਰਿਕ ਸਹੂਲਤ ਨਾਲ ਜੁੜੇ ਹਨ। 

      ਹਾਜ਼ਰੀ ਪੱਖੋਂ ਹਾਲਾਤ ਇੰਨੇ ਮਾੜੇ ਹਨ ਕਿ ਸਰਕਾਰੀ ਦਫ਼ਤਰਾਂ ਦਾ ਸਵੇਰੇ 9 ਵਜੇ ਤੋਂ ਸ਼ਾਮ 5 ਵਜੇ ਤੱਕ ਖੁੱਲ੍ਹਣ ਦਾ ਸਮਾਂ ਹੈ। ਸਰਕਾਰੀ ਪੱਧਰ ’ਤੇ ਪੁੱਛ-ਪ੍ਰਤੀਤ ਨਾ ਹੋਣ ਅਤੇ ਸਿਆਸੀ ਹਾਜ਼ਰੀਆਂ ਵਜਾਉਣ ਦੇ ਸੁਭਾਅ ਕਰਕੇ ਕਾਫ਼ੀ ਗਿਣਤੀ ਅਧਿਕਾਰੀ ਅਤੇ ਕਰਮਚਾਰੀ ਤਾਂ ਮਹਿਜ਼ ਘੰਟਾ-ਦੋ ਘੰਟੇ ਖਾਣਾਪੂਰਤੀ ਲਈ ਦਫ਼ਤਰਾਂ ’ਚ ਗੇੜਾ ਮਾਰਦੇ ਹਨ। ਕਈ ਦਫ਼ਤਰਾਂ ’ਚ ਦੁਪਿਹਰ ਬਾਅਦ ਅਮਲੇ ਜਾਂ ਅਧਿਕਾਰੀ ਪੁੱਜਦੇ ਹਨ ਅਤੇ ਕਈ ਅਧਿਕਾਰੀ ਅਤੇ ਕਰਮਚਾਰੀ ਦੁਪਿਹਰ ਬਾਅਦ ਹੀ ਘਰਾਂ ਨੂੰ ਚਾਲੇ ਪਾ ਜਾਂਦੇ ਹਨ। ਆਮ ਜਨਤਾ ਕੰਮ ਧੰਦਿਆਂ ਲਈ ਦਫ਼ਤਰਾਂ ’ਚ ਗੇੜੇ ਮਾਰਦੀ ਹੈ ਪਰ ਉਥੇ ਕੋਈ ਮਿਲਦਾ ਨਹੀਂ। ਆਮ ਰਾਜ ਪ੍ਰਬੰਧ ਵਿਭਾਗ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਕੋਲ ਹੈ। ਸਮੱੁਚਾ ਪੰਜਾਬ ਜਾਣੂ ਹੈ ਕਿ ਮੌਜੂਦਾ ਮੁੱਖ ਮੰਤਰੀ ਦੇ ਕੋਲ ਸਮੇਂ ਦੀ ਘਾਟ ਰਹਿੰਦੀ ਹੈ। ਹਾਲ ਦੀ ਘੜੀ ਜਨਤਾ ਦੀ ਦਫ਼ਤਰਾਂ ’ਚ ਖੱਜਲ ਖੁਆਰੀ ਮੁਕਾਉਣ ਪ੍ਰਤੀ ਮੋਤੀਆਂ ਵਾਲੀ ਸਰਕਾਰ ਦੇ ਹੱਥ ਹਨ। ਸੂਬਾਈ ਹਕੂਮਤ ਦੇ ਆਲਸੀ ਸੁਭਾਅ ਦਾ ਸਰਕਾਰੀ ਤੰਤਰ ‘ਲਾਟ ਸਾਬ੍ਹ’ ਬਣ ਕੇ ਆਨੰਦ ਮਾਣ ਰਿਹਾ ਹੈ। 

        ਬੀਤੇ ਦਿਨ੍ਹੀਂ ਪੰਜਾਬ ਜਲ ਅਤੇ ਸੈਨੀਟੇਸ਼ਨ ਵਿਭਾਗ ਦੇ ਸਬ ਡਿਵੀਜਨ ਮੰਡੀ ਕਿੱਲਿਆਂਵਾਲੀ ’ਚ ਲੋਕ ਪਾਣੀ ਦੇ ਬਿੱਲ ਭਰਨ ਨੂੰ ਸਵੇਰੇ 9 ਵਜੇ ਪੁੱਜ ਗਏ, ਪਰ ਅਮਲਾ 11 ਵਜੇ ਤੋਂ ਬਾਅਦ ਪੁੱਜਿਆ। ਪੜਤਾਲ ਕਰਨ ’ਤੇ ਪਤਾ ਲੱਗਿਆ ਕਿ ਰੋਜ਼ਾਨਾ ਅਮਲਾ ਇਸੇ ਸਮੇਂ ਦਫ਼ਤਰ ’ਚ ਚਰਨ ਪਾਉਂਦੇ ਹਨ। ਪਿੱਛੇ ਜਿਹੇ ਸੂਬਾ ਸਰਕਾਰ ਨੇ ਇੱਕ ਪੱਤਰ ਰਾਹੀਂ ਜਨਤਾ ਦੀ ਸਹੂਲਤ ਲਈ ਕਈ ਵਿਭਾਗਾਂ ਦੇ ਅਧਿਕਾਰੀਆਂ ਨੂੰ ਰੋਜ਼ਾਨਾ ਕੁਝ ਤੈਅ ਘੰਟੇ ਦਫ਼ਤਰ ਬੈਠਣ ਦੇ ਨਿਰਦੇਸ਼ ਜਾਰੀ ਕੀਤੇ ਸਨ। ਪਰ ਅਫਸਰਸ਼ਾਹੀ ਦੀ ਕਾਰਜਪ੍ਰਣਾਲੀ ’ਤੇ ਕੋਈ ਅਸਰ ਨਹੀਂ ਵਿਖਿਆ। 

       ਆਮ ਜਨਤਾ ਦਾ ਕਹਿਣਾ ਹੈ ਕਿ ਸਮੁੱਚੇ ਦਫ਼ਤਰਾਂ ਨੂੰ ਬਾਇਓ ਮੀਟ੍ਰਿਕ ਹਾਜ਼ਰੀ ਨਾਲ ਲੈਸ ਕਰਕੇ ਹਾਜ਼ਰੀ ਦਾ ਲਾਈਵ ਵੇਰਵਾ ਸਰਕਾਰੀ ਵੈਬਸਾਈਟ ਨਾਲ ਜੋੜਿਆ ਜਾਵੇ, ਤਾਂ ਜੋ ਸਰਕਾਰੀ ਕੰਮਕਾਜ ’ਚ ਸੌ ਫ਼ੀਸਦੀ ਪਾਰਦਰਸ਼ਿਤਾ ਆ ਸਕੇ ਅਤੇ ਅਮਲੇ ਨੂੰ ਫਰਜ਼ ਨਾਲ ਨੌਕਰੀ ਨਾ ਨਿਭਾਉਣ ’ਤੇ ਕਾਰਵਾਈ ਦਾ ਖੌਫ਼ ਪੈਦਾ ਹੋ ਸਕੇ। 

      ਬਾਇਓ ਮੀਟ੍ਰਿਕ ਹਾਜ਼ਰੀ ਬਾਰੇ ਪੰਜਾਬ ਦੇ ਉੱਚ ਅਧਿਕਾਰੀ ਬੋਲਣ ਨੂੰ ਤਿਆਰ ਨਹੀਂ ਜਾਂ ਫੋਨ ’ਤੇ ਨਹੀਂ ਆਉਣ ਨੂੰ ਤਿਆਰ ਨਹੀਂ। ਮੁੱਖ ਮੰਤਰੀ ਦੇ ਵਿਸ਼ੇਸ਼ ਪ੍ਰਿੰਸੀਪਲ ਸਕੱਤਰ ਗੁਰਕਿਰਤ ੍ਰਿਕਪਾਲ ਸਿੰਘ ਦਾ ਕਹਿਣਾ ਸੀ ਕਿ ਆਮ ਰਾਜ ਪ੍ਰਬੰਧ ਵਿਭਾਗ ਨਾਲ ਸੰਪਰਕ ਕਰੋ। ਆਮ ਰਾਜ ਪ੍ਰਬੰਧ ਵਿਭਾਗ ਦੇ ਪ੍ਰਿੰਸੀਪਲ ਸਕੱਤਰ ਜਸਪਾਲ ਸਿੰਘ ਸਾਰਾ ਦਿਨ ਮੀਟਿੰਗ ’ਚ ਰੁੱਝੇ ਰਹੇ। ਅੰਡਰ ਸਕੱਤਰ ਸੰਗਰਾਮ ਸਿੰਘ ਨੇ ਕਿਹਾ ਕਿ ਅਸੀਂ ਤਾਂ ਸਿਰਫ਼ ਚੰਡੀਗੜ੍ਹ ਦੇ ਸਕਤਰੇਤ, ਮਿੰਨੀ ਸਕੱਤਰ ਵਗੈਰਾ ’ਚ ਬਾਇਓ ਮੀਟ੍ਰਿਕ ਹਾਜ਼ਰੀ ਦਾ ਪ੍ਰਾਜੈਕਟ ਤਿਆਰ ਕੀਤਾ ਹੈ।  ਮੁੱਖ ਪ੍ਰਮੱਖ ਸਕੱਤਰ ਸੁਰੇਸ਼ ਨਾਲ ਸੰਪਰਕ ਕਰਨ ’ਤੇ ਉਨ੍ਹਾਂ ਦਾ ਮੋਬਾਇਲ ਨੋ ਰਿਪਲਾਈ ਰਿਹਾ। ਨਿੱਜੀ ਸਕੱਤਰ ਕੁਲਦੀਪ ਸਿੰਘ ਦਾ ਕਹਿਣਾ ਸੀ ਕਿ ਸਾਬ੍ਹ, ਸੀ.ਐਮ. ਸਾਬ੍ਹ ਨਾਲ ਮੀਟਿੰਗ ਲਈ ਦੋ ਘੰਟੇ ਤੋਂ ਗਏ ਹਨ। 

ਖੇਲੋ ਇੰਡੀਆ ਪ੍ਰਤਿਭਾ: ਦਸਮੇਸ਼ ਕਾਲਜ ਬਾਦਲ ਦੇਸ਼ ਦੀਆਂ ਸੱਤ ਨਿਸ਼ਾਨੇਬਾਜ਼ੀ ਅਕੈਡਮੀਆਂ 'ਚ ਸ਼ੁਮਾਰ

* ਨਿਸ਼ਾਨੇਬਾਜ਼ਾਂ ਸ਼ਵੇਤਾ ਅਤੇ ਪ੍ਰਦੀਪ ਸਿੱਧੂ ਦੇਸ਼ ਦੇ ਪਹਿਲੇ ਦਸ ਨਿਸ਼ਾਨੇਬਾਜ਼ਾਂ ਦੀ ਸੂਚੀ 'ਚ ਸ਼ਾਮਲ

                                                     

ਡੱਬਵਾਲੀ, (ਇਕਬਾਲ ਸਿੰਘ ਸ਼ਾਂਤ) : ਵਿਸ਼ਵ ਪੱਧਰ 'ਤੇ ਨਿਸ਼ਾਨੇਬਾਜ਼ੀ 'ਚ ਪ੍ਰਸਿੱਧ ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਦੇ ਉੱਚ ਮਿਆਰ 'ਤੇ ਕੇਂਦਰੀ ਖੇਡ ਮੰਤਰਾਲੇ ਨੇ ਮੁਹਰ ਵੀ ਲਗਾ ਦਿੱਤੀ ਹੈ। ਭਾਰਤ ਸਰਕਾਰ ਦੀ 'ਖੇਲੋ ਇੰਡੀਆ ਪ੍ਰਤਿਭਾ' ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਨੂੰ ਉੱਤਰ ਭਾਰਤ ਦੀ ਸਰਵੋਤਮ ਇੱਕਲੌਤੀ ਰਿਹਾਇਸ਼ੀ (ਗਰਲਜ਼) ਅਕੈਡਮੀ ਵਜੋਂ ਚੁਣਿਆ ਗਿਆ ਹੈ। 'ਖੇਲੋ ਇੰਡੀਆ ਪ੍ਰਤਿਭਾ' ਦੇਸ਼ ਭਰ 'ਚ ਸੱਤ ਸ਼ੂਟਿੰਗ ਅਕੈਡਮੀਆਂ ਚੁਣੀਆਂ ਗਈਆਂ ਹਨ। ਜਿਨ•ਾਂ 'ਚ ਡਾ. ਕਰਨੀ ਸਿੰਘ ਸ਼ੂਟਿੰਗ ਰੇਂਜ ਨਵੀਂ ਦਿੱਲੀ, ਗੰਨ ਫਾਰ ਗਲੋਰੀ ਸ਼ੂਟਿੰਗ ਅਕੈਡਮੀ ਪੂਨੇ, ਗੰਨ ਫਾਰ ਗਲੋਰੀ ਸ਼ੂਟਿੰਗ ਅਕੈਡਮੀ ਜਬਲਪੁਰ, ਲਕਸ਼ੈ ਸ਼ੂਟਿੰਗ ਕਲੱਬ ਪਨਵੇਲ (ਮੁੰਬਈ) ਗੈਰ-ਰਿਹਾਇਸ਼ੀ ਅਤੇ ਦਸਮੇਸ਼ ਗਰਲਜ਼ ਕਾਲਜ ਬਾਦਲ, ਐਮ.ਪੀ ਸ਼ੂਟਿੰਗ ਅਕੈਡਮੀ ਭੋਪਾਲ ਅਤੇ ਸੈਂਟਰ ਫਾਰ ਸਪੋਰਟਸ ਸਾਇੰਸ ਚੇਨੰਈ ਰਿਹਾਇਸ਼ੀ ਸਹੂਲਤਾਂ ਵਾਲੀਆਂ ਨਾਲ ਲੈਸ ਹਨ। 'ਖੋਲੇ ਇੰਡੀਆ ਪ੍ਰਤਿਭਾ' ਤਹਿਤ ਹੋਰਨਾਂ ਖੇਡਾਂ ਵਾਂਗ ਹਰ ਸਾਲ ਏਅਰ ਪਿਸਟਲ ਅਤੇ ਏਅਰ ਰਾਇਫ਼ਲ ਦੇ ਪਹਿਲੇ ਦਸ ਨਿਸ਼ਾਨੇਬਾਜ਼ਾਂ ਨੂੰ ਹੋਰ ਪ੍ਰਤਿਭਾ ਨਿਖਾਰਨ ਲਈ ਚੁਣਿਆ ਜਾਂਦਾ ਹੈ। ਕੇਂਦਰ ਸਰਕਾਰ ਵੱਲੋਂ ਹਰੇਕ ਚੁਣੇ ਖਿਡਾਰੀ ਦੀ ਸਿਖਲਾਈ, ਖੇਡ ਸਾਜੋ-ਸਾਮਾਨ, ਰਹਿਣ-ਸਹਿਣ ਅਤੇ ਖੁਰਾਕ ਅਤੇ ਪੜ•ਾਈ ਦੇ ਸਮੁੱਚੇ ਖਰਚੇ ਲਈ ਲਗਪਗ 5 ਲੱਖ ਰੁਪਏ ਖਰਚੇ ਦਾ ਬਜਟ ਮਿੱਥਿਆ ਜਾਂਦਾ ਹੈ। ਇੱਕ ਖਿਡਾਰੀ ਵੱਧ ਤੋਂ ਵੱਧ ਅੱਠ ਸਾਲ ਤੱਕ ਖੇਲੋ ਇੰਡੀਆ ਪ੍ਰਤਿਭਾ ਤਹਿਤ ਚੁਣਿਆ ਜਾ ਸਕਦਾ ਹੈ। ਇਸ ਲੜੀ 'ਚ ਲਗਾਤਾਰ ਬਣੇ ਰਹਿਣ ਲਈ ਵਰ•ੇ ਕੌਮੀ ਪੱਧਰ 'ਤੇ ਹਰ ਸਾਲ ਪਹਿਲੇ ਦਸ ਖਿਡਾਰੀਆਂ 'ਚ ਸ਼ੁਮਾਰ ਹੋਣਾ ਲਾਜ਼ਮੀ ਹੈ। ਕੇਂਦਰ ਸਰਕਾਰ ਨੇ ਖੇਲੇ ਇੰਡੀਆ ਪ੍ਰਤਿਭਾ 'ਚ ਨਿਸ਼ਾਨੇਬਾਜ਼ੀ, ਤੀਰਅੰਦਾਜ਼ੀ, ਅਥਲੈਟਿਕਸ, ਬੈਡਮਿੰਟਨ, ਬਾਕਸਿੰਗ,

ਵਾਲਕਟਬਾਲ, ਫੁਟਬਾਲ, ਜਿਮਨਾਸਟਿਕ, ਹਾਕੀ, ਜੂਡੋ, ਕਬੱਡੀ, ਖੋ-ਖੋ, ਤੈਰਾਕੀ, ਵਾਲੀਬਾਲ, ਵੇਟਲਿਫ਼ਟਿੰਗ ਅਤੇ ਕੁਸ਼ਤੀ ਖੇਡਾਂ ਸ਼ਾਮਲ ਹਨ।  ਪੇਂਡੂ ਖੇਤਰ ਦੇ ਵਿੱਦਿਅਕ ਅਦਾਰੇ ਦਸਮੇਸ਼ ਗਰਲਜ਼ ਕਾਲਜ ਬਾਦਲ ਲਈ ਦੋਹਰੀ ਮਾਣ ਵਾਲੀ ਗੱਲ ਹੈ ਕਿ ਇਸ ਅਦਾਰੇ ਦੀਆਂ ਦੋ ਨਿਸ਼ਾਨੇਬਾਜ (ਏਅਰ ਪਿਸਟਲ) ਸ਼ਵੇਤਾ ਦੇਵੀ ਅਤੇ ਪ੍ਰਦੀਪ ਕੌਰ ਸਿੱਧੂ ਨੇ ਖੇਲੋ ਇੰਡੀਆ ਯੂਥ ਗੇਮਜ਼ 2019 ਲਈ ਪਹਿਲੇ ਦਸ ਖਿਡਾਰੀਆਂ 'ਚ ਚੁਣਿਆ ਗਿਆ ਹੈ। ਪ੍ਰਦੀਪ ਕੌਰ ਸਿੱਧੂ ਤਾਂ 'ਖੇਲੋ ਇੰਡੀਆ 2017-18' ਤਹਿਤ ਚੁਣੀ ਜਾ ਚੁੱਕੀ ਸੀ। ਦੱਸਣਯੋਗ ਹੈ ਕਿ ਦਸਮੇਸ਼ ਵਿੱਦਿਅਕ ਅਦਾਰੇ 'ਚ ਕੌਮਾਂਤਰੀ ਪੱਧਰ ਦੀਆਂ ਸਹੂਲਤਾਂ ਵਾਲੀਆਂ 10 ਮੀਟਰ, 25 ਅਤੇ 50 ਮੀਟਰ ਦੀ ਨਿਸ਼ਾਨੇਬਾਜ਼ੀ ਰੇਂਜਾਂ ਹਨ। ਕਾਲਜ ਪ੍ਰਿੰਸੀਪਲ ਡਾ. ਐਸ.ਐਸ ਸੰਘਾ ਨੇ ਦੱਸਿਆ ਕਿ ਮਿਸ ਸ਼ਵੇਤਾ ਨੇ 62ਵੀਂ ਖੇਲੋ ਇੰਡੀਆ ਪ੍ਰਤਿਭਾ ਨੈਸ਼ਨਲ ਸ਼ੂਟਿੰਗ ਚੈਂਪੀਅਨਸ਼ਿਪ 2018 ਮੁਕਾਬਲੇ 'ਚ 10 ਮੀਟਰ ਏਅਰ

ਪਿਸਟਲ (ਜੂਨੀਅਰ ਵੁਮੈਨ) ਵਿੱਚ ਵਿਅਕਤੀਗਤ ਅਤੇ ਪ੍ਰਦੀਪ ਕੌਰ 10 ਮੀਟਰ ਏਅਰ ਪਿਸਟਲ (ਟੀਮ) ਵਿੱਚੋਂ ਜਿੱਤਣ ਕਰਕੇ ਚੁਣੀਆਂ ਗਈਆਂ ਹਨ। ਡਾ. ਸੰਘਾ ਅਨੁਸਾਰ ਦੋਵੇਂ ਦੀਆਂ ਪਹਿਲਾਂ ਵੀ ਨਿਸ਼ਾਨੇਬਾਜੀ ਖੇਤਰ 'ਚ ਅਹਿਮ ਪ੍ਰਾਪਤੀਆਂ ਹਨ। ਸ਼ਵੇਤਾ ਪਿਛਲੇ 2 ਸਾਲਾਂ ਤੋਂ ਨੈਸ਼ਨਲ ਸਕੁਐਡ ਵੀ ਰਹੀ ਹੈ ਅਤੇ ਅੰਤਰ ਰਾਸ਼ਟਰੀ ਪੱਧਰ 'ਤੇ ਜੂਨੀਅਰ ਵਰਲਡ ਕੱਪ (ਜਰਮਨੀ) ਵੀ ਖੇਡ ਚੁੱੱਕੀ ਹੈ। ਪ੍ਰਦੀਪ ਕੌਰ ਸਿੱਧੂ ਨੇ ਤਾਂ ਪਿਛਲੀਆਂ 'ਖੇਲੋ ਇੰਡੀਆ 2017-18' ਵਿੱਚ ਵੀ ਆਲ ਇੰਡੀਆ ਨਿਸ਼ਾਨੇਬਾਜ਼ੀ ਮੁਕਾਬਲਿਆਂ 'ਚ 9ਵਾਂ ਸਥਾਨ ਹਾਸਿਲ ਕੀਤਾ ਸੀ। ਕਾਲਜ ਪਰਤਣ 'ਤੇ ਕਾਲਜ ਪ੍ਰਿੰਸੀਪਲ, ਕੋਚ ਵੀਰਪਾਲ ਕੌਰ, ਕੋਚ ਰਾਮ ਲਾਲ, ਕੋਚ ਲਖਬੀਰ ਕੌਰ ਅਤੇ ਸਮੂਹ ਸਟਾਫ ਵੱਲੋਂ ਦੋਵੇਂ ਨਿਸ਼ਾਨੇਬਾਜ਼ਾਂ ਦਾ ਭਰਵਾਂ ਸਵਾਗਤ ਕੀਤਾ ਗਿਆ। 

ਯੁਵਰਾਜ ਰਣਇੰਦਰ ਸਿੰਘ ਇੰਟਰਨੈਸ਼ਨਲ ਸ਼ੂਟਿੰਗ ਸਪੋਰਟਸ ਫ਼ੈਡਰੇਸ਼ਨ ਦੇ ਮੀਤ-ਪ੍ਰਧਾਨ ਚੁਣੇ ਗਏ

* ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਵੱਲੋਂ ਆਪਣੇ ਸਪੁੱਤਰ ਨੂੰ ਵਧਾਈ 

* ਵਕਾਰੀ ਅਹੁਦੇ ’ਤੇ ਪੁੱਜਣ ਵਾਲੇ ਪਹਿਲੇ ਭਾਰਤੀ

* ਐਨ.ਆਰ.ਏ.ਆਈ ਦੇ ਪ੍ਰਧਾਨ ਵਜੋਂ ਭਾਰਤੀ ਨਿਸ਼ਾਨੇਬਾਜ਼ੀ ਨੂੰ ਦੇ ਚੁੱਕੇ ਵਿਲੱਖਣ ਮੁਕਾਮ

                                          ਇਕਬਾਲ ਸਿੰਘ ਸ਼ਾਂਤ/ਬੁਲੰਦ ਸੋਚ ਬਿਊਰੋ 

 ਨਵੀਂ ਦਿੱਲੀ/ਚੰਡੀਗੜ੍ਹ, 1 ਦਸੰਬਰ : ਨੈਸ਼ਨਲ ਰਾਈਫ਼ਲ ਐਸੋਸੀਏਸ਼ਨ ਆਫ਼ ਇੰਡੀਆ (ਐਨ.ਆਰ.ਏ.ਆਈ) ਦੇ ਪ੍ਰਧਾਨ ਅਤੇ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਦੇ ਸਪੁੱਤਰ ਰਣਇੰਦਰ ਸਿੰਘ ਅੱਜ ਇੰਟਰਨੈਸ਼ਨਲ ਸ਼ੂਟਿੰਗ ਸਪੋਰਟਸ ਫ਼ੈਡਰੇਸ਼ਨ (ਆਈ.ਐਸ.ਐਸ.ਐਫ਼.) ਦੇ ਮੀਤ ਪ੍ਰਧਾਨ ਚੁਣੇ ਗਏ ਹਨ। ਉਹ ਪਹਿਲੇ ਭਾਰਤੀ ਹਨ ਜਿਹੜੇ ਇਸ ਸ਼ਾਨਾਮੱਤੇ ਅਹੁਦੇ ’ਤੇ ਪੁੱਜੇ ਹਨ। ਉਹ ਆਈ.ਐਸ.ਐਸ.ਐਫ਼. ਦੇ ਚਾਰ ਉਪ ਪ੍ਰਧਾਨਾਂ ਵਿੱਚ ਸ਼ਾਮਲ ਹਨ। ਰਣਇੰਦਰ ਸਿੰਘ ਦੀ ਇਸ ਪ੍ਰਾਪਤੀ ’ਤੇ ਉਨ੍ਹਾਂ ਦੇ ਪਿਤਾ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਵਧਾਈ ਦਿੱਤੀ ਹੈ। 

  ਇਹ ਚੋਣ ਮੁਨਿਚਮ ਵਿਖੇ ਆਈ.ਐਸ.ਐਸ.ਐਫ਼ ਦੀ ਜਨਰਲ ਅਸੈਂਬਲੀ ਦੌਰਾਨ ਹੋਈ। ਰਣਇੰਦਰ ਸਿੰਘ ਨੇ 161 ਵੋਟਾਂ ਹਾਸਲ ਕੀਤੀਆਂ। ਤਿੰਨ ਹੋਰ ਬਣੇ ਉੱਪ ਪ੍ਰਧਾਨਾਂ ਵਿੱਚ ਆਇਰਲੈਂਡ ਦੇ ਕੈਵਿਨ ਕਿਲਟੀ (162 ਵੋਟਾਂ), ਅਮਰੀਕਾ ਦੇ ਰੋਬਰਟ ਮਿਚੇਲ (153 ਵੋਟਾਂ), ਅਤੇ ਚੀਨ ਗਣਰਾਜ ਦੇ ਵਾਂਗ ਯੀਸੂ ਜੋ 146 ਵੋਟਾਂ ਹਾਸਲ ਕਰਕੇ ਮੁੜ ਚੁਣੇ ਗਏ ਹਨ। ਸ਼ੁੱਕਰਵਾਰ ਨੂੰ ਜਨਰਲ ਅਸੈਂਬਲੀ ਵਿੱਚ ਰਣਇੰਦਰ ਸਿੰਘ ਨੂੰ ਆਈ.ਐਸ.ਐਸ.ਐਫ਼. ਦਾ ਡਿਪਲੋਮਾ ਗੋਲਡ ਮੈਡਲ ਪ੍ਰਦਾਨ ਕੀਤਾ ਗਿਆ। ਉਨ੍ਹਾਂ ਨੂੰ ਇਹ ਡਿਪਲੋਮਾ ਅਤੇ ਮੈਡਲ ਸਭ ਤੋਂ ਲੰਮਾ ਸਮਾਂ ਆਈ.ਐਸ.ਐਸ.ਐਫ਼. ਦੇ ਰਹੇ ਪ੍ਰਧਾਨ ਓਲੈਗਰਿਓ ਵਾਜ਼ਕਿਜ਼ ਰਾਣਾ ਨੇ ਦਿੱਤਾ ਜੋ ਇਸ ਅਹੁਦੇ ਤੋਂ ਸੇਵਾ ਮੁਕਤ ਹੋ ਰਹੇ ਹਨ। ਜ਼ਿਕਰਯੋਗ ਕਿ ਰਣਇੰਦਰ ਸਿੰਘ ਸਾਲ 2014 ’ਚ 25 ਵਿੱਚੋਂ 22 ਵੋਟਾਂ ਹਾਸਲ ਕਰਕੇ ਆਈ.ਐਸ.ਐਸ.ਐਫ਼. ਦਾ ਮੈਂਬਰ ਬਣੇ ਸਨ। ਯੁਵਰਾਜ ਰਣਇੰਦਰ ਸਿੰਘ ਪਿਛਲੇ ਸਾਲ ਮੁਹਾਲੀ ਵਿਖੇ ਚਾਰ ਸਾਲ ਵਾਸਤੇ ਐਨ.ਆਰ.ਏ.ਆਈ. ਦਾ ਮੁਖੀ ਵੀ ਚੁਣਿਆ ਗਿਆ ਸੀ। ਰਣਇੰਦਰ ਸਿੰਘ ਦੇ ਕਾਰਜਕਾਲ

ਦੌਰਾਨ ਭਾਰਤੀ ਨਿਸ਼ਾਨੇਬਾਜ਼ੀ ਨੇ ਦੁਨੀਆਂ ਪੱਧਰ ’ਤੇ ਉਤਸਾਹਜਨਕ ਨਾਮਣਾ ਖੱਟਿਆ ਹੈ। ਉਨ੍ਹਾਂ ਦੀ ਕਾਬਲੀਅਤ ਅਤੇ ਦ੍ਰਿੜ ਇਰਾਦੇ ਵਾਲੇ ਉਪਰਾਲਿਆਂ ਸਦਕਾ ਭਾਰਤ ’ਚ ਜ਼ਮੀਨੀ ਪੱੱਧਰ ’ਤੇ ਨਿਸ਼ਾਨੇਬਾਜ਼ੀ ਦੀਆਂ ਜੜ੍ਹਾਂ ਫੈਲ ਰਹੀਆਂ ਹਨ। ਜਿਸ ਸਦਕਾ ਆਮ ਸਾਧਾਰਨ ਪਰਿਵਾਰਾਂ ਦੇ ਨੌਜਵਾਨ ਲੜਕੇ-ਲੜਕੀਆਂ ਨੇ ਵੀ ਨਿਸ਼ਾਨੇਬਾਜ਼ੀ ਨਾਲ ਜੁੜ ਕੇ ਦੇਸ਼ ਅਤੇ ਕੌਮਾਂਤਰੀ ਪੱਧਰ ’ਤੇ ਆਪਣੀ ਪ੍ਰਤਿਭਾ ਦਾ ਲੋਹਾ ਮਨਵਾਇਆ ਹੈ ਅਤੇ ਇਹ ਲੜੀ ਲਗਾਤਾਰ ਜਾਰੀ ਹੈ। ਉਨ੍ਹਾਂ ਦੇ ਪਿਤਾ ਕੈਪਟਨ ਅਮਰਿੰਦਰ ਸਿੰਘ ਨੇ ਕਿਹਾ ਕਿ ਰਣਇੰਦਰ ਸਿੰਘ ਨੇ ਇਸ ਅਹੁਦੇ ’ਤੇ ਪਹੁੰਚ ਕੇ ਭਾਰਤ ਦਾ ਨਾਂਅ ਰੌਸ਼ਨ ਕੀਤਾ ਹੈ ।ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਨੇ ਆਪਣੇ ਭਰਾ ਰਣਧੀਰ ਸਿੰਘ ਦੀ ਚੋਣ ’ਤੇ ਵੀ ਵਧਾਈ ਦਿੱਤੀ ਹੈ ਜੋ ਲਗਾਤਾਰ ਪੰਜਵੀਂ ਵਾਰ ਚਾਰ ਸਾਲ ਵਾਸਤੇ ਐਸੋਸਿਏਸ਼ਨ ਆਫ਼ ਨੈਸ਼ਨਲ ਓਲਿੰਪਿਕ ਕਮੇਟੀ ਦੇ ਕਾਰਜਕਾਰੀ ਬੋਰਡ ਦੇ ਮੈਂਬਰ ਚੁਣੇ ਗਏ ਹਨ। ਰਣਧੀਰ ਸਿੰਘ ਸਾਲ 2001 ਤੋਂ 2014 ਤੱਕ ਇੰਡੀਅਨ ਓਲਿੰਪਿਕ ਕਮੇਟੀ ਦੇ ਮੈਂਬਰ ਵੀ ਰਹੇ ਹਨ। ਜ਼ਿਕਰਯੋਗ ਹੈ ਕਿ ਰਣਇੰਦਰ ਸਿੰਘ ਦੀ ਇਸ ਪ੍ਰਾਪਤੀ ’ਤੇ ਪੰਜਾਬ ਖਾਸਕਰ ਨਿਸ਼ਾਨੇਬਾਜ਼ ਭਾਈਚਾਰੇ ਨੂੰ ਵੱਡਾ ਮਾਣ ਹਾਸਲ ਹੋਇਆ ਹੈ। - 98148-26100 / 93178-26100

ਉਮਰ ਲੰਘ ਗਈ ਭਟਕਦੇ-ਭਟਕਦੇ

                                                     ਇਕਬਾਲ ਸਿੰਘ ਸ਼ਾਂਤ

ਲੰਬੀ: ਪਿਛਲੇ ਸਾਢੇ ਗਿਆਰਾਂ ਸਾਲਾਂ ’ਚ ਸਰਕਾਰੀ ਨੌਕਰੀ ਨੂੰ ਉਡੀਕਦੇ-ਉਡੀਕਦੇ ਲਗਪਗ 38 ਹਜ਼ਾਰ ਤੋਂ ਵੱਧ ਪੰਜਾਬੀ ਨੌਜਵਾਨ ਉਮਰ ਦਰਾਜ ਹੋ ਗਏ। ਸਰਕਾਰੀ ਨੌਕਰੀ ਲਈ ਭਟਕਦੇ-ਭਟਕਦੇ ਪੜ੍ਹੇ ਲਿਖੇ ਨੌਜਵਾਨਾਂ ਦਾ ਜਵਾਨੀ ਵਾਲਾ ਜੁੱਸਾ ਬੁਢਾਪੇ ਵਾਲੇ ਰਾਹ ਪੈ ਗਿਆ। ਸਿਫ਼ਾਰਸ਼ਾਂ ਅਤੇ ਟੈਸਟਾਂ ’ਚ ਕਿਸਮਤ ਹੱਥੋਂ ਹਾਰਨ ਵਾਲੇ ਹੱਥਾਂ ਦੀਆਂ ਲਕੀਰਾਂ ਕੱਚੇ-ਪੱਕੇ ਰਜ਼ੁਗਾਰਾਂ ’ਤੇ ਨਿਰਭਰ ਹੋ ਗਈਆਂ। ਪੰਜਾਬ ’ਚ ਸਰਕਾਰੀ ਨੌਕਰੀ ਦੀ ਹੱਦ 37 ਸਾਲ ਹੈ। ਜਦਕਿ ਗੁਆਂਢੀ ਸੂਬੇ ਹਰਿਆਣੇ

’ਚ ਸਰਕਾਰੀ ਨੌਕਰੀ ਲਈ ਉਮਰ ਹੱਦ 42 ਸਾਲ ਤੱਕ ਹੈ। ਪਿਛਲੇ ਸਾਢੇ 11 ਸਾਲਾਂ ’ਚ ਜ਼ਿਲ੍ਹਾ ਜਲੰਧਰ ’ਚ ਸਭ ਤੋਂ ਵੱਧ 5200 ਸੌ ਅਤੇ ਸ਼ਹੀਦ ਭਗਤ ਸਿੰਘ ਨਗਰ (ਨਵਾਂ ਸ਼ਹਿਰ) ’ਚ ਸਭ ਤੋਂ ਘੱਟ 167 ਬੇਰੁਜ਼ਗਾਰ ਨੌਜਵਾਨ ਸਰਕਾਰੀ ਨੌਕਰੀ ਉਡੀਕਦੇ ਹੋਏ 37 ਸਾਲਾਂ ਦੀ ਉਮਰ ਹੱਦ ਪਾਰ ਕਰ ਗਏ। ਸੂਬੇ ’ਚ ਨੌਕਰੀ ਦਾ ਮੁੱਖ ਆਧਾਰ ਅਖਵਾਉਂਦੇ ਰੁਜ਼ਗਾਰ ਜਨਰੇਸ਼ਨ ਵਿਭਾਗ ਕੋਲ ਪਿਛਲੇ ਦਹਾਕੇ ਦੌਰਾਨ ਕਰੀਬ 2.56 ਲੱਖ ਨੌਜਵਾਨ ਮੁੰਡੇ-ਕੁੜੀਆਂ ਹੀ ਰਜਿਸਟਰਡ ਹੋਏ ਹਨ।

ਉਮਰ ਦਰਾਜ ਹੋਏ ਬੇਰੁਜ਼ਗਾਰਾਂ ਦੀਆਂ ਉਮੀਦਾਂ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਵੱਲੋਂ 2016 ਵਿੱਚ ਤਲਵੰਡੀ ਸਾਬੋ ਵਿਖੇ ਵਿਸਾਖੀ ਕਾਨਫਰੰਸ ਮੌਕੇ ਕੀਤੇ ਉਸ ਵਾਅਦੇ ’ਤੇ ਟਿਕੀਆਂ ਹਨ, ਜਿਸ ’ਚ ਉਨ੍ਹਾਂ ਕਾਂਗਰਸ ਸਰਕਾਰ ਬਣਨ ’ਤੇ ਸਰਕਾਰੀ ਨੌਕਰੀ ਦੀ ਉਮਰ ਹੱਦ ਹਰਿਆਣਾ ਪੈਟਰਨ ’ਤੇ ਕਰਨ ਦਾ ਐਲਾਨ ਕੀਤਾ ਸੀ। ਉਮਰ ਦਰਾਜ ਬੇਰੁਜ਼ਗਾਰਾਂ ਸੰਬੰਧੀ ਅੰਕੜੇ ਪੰਜਾਬ ਰੁਜ਼ਗਾਰ ਜਨਰੇਸ਼ਨ ਅਤੇ ਟਰੇਨਿੰਗ ਵਿਭਾਗ ਦੀ ਸੂਚਨਾ ’ਤੇ ਆਧਾਰਤ ਹਨ। ਹਾਲਾਂਕਿ ਕਈ ਜ਼ਿਲ੍ਹੇ ਅੰਕੜਿਆਂ ਪੱਖੋਂ ਪੂਰੇ ਨਾ ਹੋਣ ਕਰਕੇ ਸੂਚੀ ਕਾਫ਼ੀ ਵੱਧ ਹੋਣ ਦੀ ਉਮੀਦ ਹੈ। 

ਪਿਛਲੇ ਦਹਾਕੇ ’ਚ ਅਕਾਲੀ ਸਰਕਾਰ ਸਮੇਂ ਪੰਜਾਬ ’ਚ ਹਜ਼ਾਰਾਂ ਗਿਣਤੀ ਪੜ੍ਹੇ-ਲਿਖੇ ਅਧਿਆਪਕ, ਫੂਡ ਸਪਲਾਈ, ਨਹਿਰੀ ਪਟਵਾਰੀ, ਪੁਲਿਸ ਸਮੇਤ ਹੋਰਨਾਂ ਵਿਭਾਗਾਂ ’ਚ ਕੱਚੀਆਂ-ਪੱਕੀਆਂ ਸਰਕਾਰੀ ਨੌਕਰੀਆਂ ’ਤੇ ਲੱਗਣ ਦੀਆਂ ਰਿਪੋਰਟਾਂ ਹਨ। ਘਰ-ਘਰ ਨੌਕਰੀ ਦੇਣ ਦੇ ਵਾਅਵੇ ਤਹਿਤ ਸੱਤਾ ’ਚ ਕਾਬਜ਼ ਹੋਈ ਕਾਂਗਰਸ ਸਰਕਾਰ ਨੇ ਪਿਛਲੇ 18 ਮਹੀਨਿਆਂ ਦੌਰਾਨ 3,93,320 ਨੌਜਵਾਨਾਂ ਨੂੰ ਨੌਕਰੀਆਂ/ਸਵੈ-ਰੋਜ਼ਗਾਰ ਦੇਣ ਦਾ ਦਾਅਵਾ ਕੀਤਾ ਹੈ। ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਅਨੁਸਾਰ ਪੰਜਾਬ ਵਿੱਚ ਰੋਜ਼ਾਨਾ ਅੱਠ ਸੌ ਨੌਕਰੀਆਂ/ਸਵੈ-ਰੁਜ਼ਗਾਰ ਦਿੱਤਾ ਜਾ ਰਿਹਾ ਹੈ। ਸੂਬੇ ’ਚ ਜ਼ਿਲ੍ਹਾ ਵਾਰ ਅੰਕੜਿਆਂ ’ਚ ਉਮਰ ਦਰਾਜ ਹੋਏ ਬੇਰੁਜ਼ਗਾਰਾਂ ਦੇ ਅੰਕੜਿਆਂ ਮੁਤਾਬਕ ਜ਼ਿਲ੍ਹਾ ਪਠਾਨਕੋਟ ’ਚ 4063, ਜ਼ਿਲ੍ਹਾ ਮੁਹਾਲੀ ’ਚ 4049, ਰੂਪ ਨਗਰ ’ਚ 3679, ਜ਼ਿਲ੍ਹਾ ਲੁਧਿਆਣਾ ’ਚ 3535, ਫਿਰੋਜ਼ਪੁਰ ’ਚ 3195, ਅੰਮ੍ਰਿਤਸਰ ’ਚ ਕਰੀਬ 3000, ਫਰੀਦਕੋਟ ’ਚ 1851, ਹੁਸ਼ਿਆਰਪੁਰ 1822, ਫਤਿਹਗੜ੍ਹ ਸਾਹਿਬ ’ਚ 1560, ਤਰਨਤਾਰਨ ’ਚ ਲਗਪਗ 1543,  ਕਪੂਰਥਲਾ ’ਚ ਕਰੀਬ 1200, ਬਰਨਾਲਾ 1081, ਬਠਿੰਡਾ ’ਚ 1018, ਮਾਨਸਾ ’ਚ 542, ਜ਼ਿਲ੍ਹਾ ਮੋਗਾ ’ਚ 340 ਅਤੇ ਸਾਬਕਾ ਵੀ.ਆਈ.ਪੀ. ਜ਼ਿਲ੍ਹੇ ਸ੍ਰੀ ਮੁਕਤਸਰ ਸਾਹਿਬ ’ਚ 200 ਨੌਜਵਾਨ ਸ਼ਾਮਲ ਹਨ।  

ਪੰਜਾਬ ਦਾ ਦੁਖਾਂਤ ਹੈ ਕਿ ਸਰਕਾਰੀ ਨੌਕਰੀ ਅਤੇ ਰੁਜ਼ਗਾਰ ਦੇ ਸੁਚੱਜੇ ਵਸੀਲੇ ਨਾ ਹੋਣ ਕਾਰਨ ਪੰਜਾਬ ਦਾ ਕਿਰਤੀ ਅਤੇ ਪੜ੍ਹਿਆ-ਲਿਖਿਆ ਜੁੱਸਾ ਲੱਖਾਂ ਨੌਜਵਾਨ ਦੀ ਸ਼ਕਲ ’ਚ ਵਿਦੇਸ਼ਾਂ ਨੂੰ ਉਡਾਰੀ ਮਾਰ ਚੁੱਕਿਆ ਹੈ। ਇਹ ਰੁਝਾਨ ਲਗਾਤਾਰ ਜਾਰੀ ਹੈ। ਸਰਕਾਰੀ ਨੌਕਰੀ ਦੀ ਤਾਂਘ ਵਿੱਚ ਵਰ੍ਹਿਆਂ ਤੱਕ ਧੱਕੇ ਖਾਣ ਵਾਲਾ ਬੀ.ਏ., ਬੀ.ਐੱਡ ਅਤੇ ਐਮ.ਏ ਪਾਸ ਗੁਰਮੇਲ ਸਿੰਘ ਵਾਸੀ ਗੋਬਿੰਦਪੁਰਾ ਨੇ ਪਟਵਾਰੀ ਦੇ ਪੀ.ਏ. ਵਜੋਂ ਕੰਮ ਕਰਕੇ ਵੇਲਾ ਲੰਘਾ ਰਿਹਾ ਹੈ। ਜਦੋਂਕਿ ਸਰਕਾਰੀ ਨੌਕਰੀ ਨਾ ਮਿਲਣ ਕਰਕੇ ਬੀ.ਏ, ਬੀ.ਐੱਡ ਅਤੇ ਡਬਲ ਐਮ.ਏ ਪਾਸ ਕਰਮਜੀਤ ਕੌਰ ਵਾਸੀ ਕੋਠਾ ਗੁਰੂਕਾ ਵੀ ਬਤੌਰ ਨਿੱਜੀ ਅਧਿਆਪਕ ਨਿਗੁਣੀ ਤਨਖ਼ਾਹ ’ਤੇ ਨੌਕਰੀ ਕਰ ਰਹੀ ਹੈ। ਜਮ੍ਹਾ ਦੋ ਪਾਸ ਮਨਪ੍ਰੀਤ ਸਿੰਘ ਪਿੰਡ ਮਲੋਟ ਵੀ ਉਮਰ ਹੱਦ ਲੰਘਣ ਬਾਅਦ ਪ੍ਰਾਈਵੇਟ ਰੁਜ਼ਗਾਰ ਰਾਹੀਂ ਆਪਣਾ ਵੇਲਾ ਲੰਘਾ ਰਿਹਾ ਹੈ। ਪੰਜਾਬ ਵਿੱਚ ਉਮਰ ਦਰਾਜ ਹੋਏ ਬੇਰੁਜ਼ਗਾਰਾਂ ਦਾ ਕਹਿਣਾ ਹੈ ਕਿ ਜੇਕਰ ਮੁੱਖ ਮੰਤਰੀ ਅਮਰਿੰਦਰ ਸਿੰਘ ਸਰਕਾਰ ਹਰਿਆਣਾ ਪੈਟਰਨ ’ਤੇ ਉਮਰ ਹੱਦ ਵਧਾਉਣ ਦਾ ਫੈਸਲਾ ਕਰਦੀ ਹੈ ਤਾਂ ਹਜ਼ਾਰਾਂ ਨੌਜਵਾਨਾਂ ਦੀ ਜ਼ਿੰਦਗੀ ’ਚ ਰੋਜ਼ੀ-ਰੋਟੀ ਵਾਲੀ ਬਹਾਰ ਆ ਸਕਦੀ ਹੈ ਅਤੇ ਉਨ੍ਹਾਂ ਦੇ ਘਰਾਂ ’ਚ ‘ਆਰਥਿਕ ਸੁੱਖ’ ਵਾਲੇ ਚੁੱਲ੍ਹੇ ਵਲ ਸਕਦੇ ਹਨ। 

ਕਾਂਗਰਸ ਰੈਲੀ ’ਚ ਬੜ੍ਹਕ ’ਤੇ ਨਿਰਭਰ ਹੋਵੇਗਾ ਕਾਂਗਰਸੀ ਆਗੂਆਂ ਦੀ ਸਿਆਸੀ ਮੜ੍ਹਕ ਦਾ ਫੈਸਲਾ

-  ਰੈਲੀ ਲਈ ਭੀੜ ਜੁਟਾਉਣ ਕਾਂਗਰਸੀਆਂ ਵਾਲਿਆਂ ’ਤੇ ਘੁੰਮ ਰਹੀ ਕੈਪਟਨ ਦੀ ਬਾਜ਼ ਅੱਖ

- ਸੂਹੀਆ ਅਤੇ ਸਾਦਾ ਵਰਦੀ ਖਾਕੀ ਕਰਮਚਾਰੀ ਕਰ ਰਹੇ ਗੁਪਤ ਰਿਪੋਰਟਾਂ ਤਿਆਰ

                                                         ਇਕਬਾਲ ਸਿੰਘ ਸ਼ਾਂਤ

ਲੰਬੀ : ਹੁਣ ਪੰਜਾਬ ਵਿੱਚ ਸੱਤਾ ਧਿਰ ਕਾਂਗਰਸ ਦੇ ਆਗੂਆਂ ਦੀ ਸਿਆਸੀ ਮੜ੍ਹਕ ਦਾ ਫੈਸਲਾ ਕਾਂਗਰਸ ਰੈਲੀ ’ਚ ਉਨ੍ਹਾਂ ਦੀ ਭੀੜ ਜੁਟਾਊ ਬੜ੍ਹਕ ’ਤੇ ਨਿਰਭਰ ਹੋਵੇਗਾ। ਅਮਰਿੰਦਰ ਸਰਕਾਰ ਨੇ ਬਾਦਲਾਂ ਨਾਲ ਰੈਲੀ ਜੰਗ ’ਚ ਵੱਧ ਯੋਧੇ ਲਿਆਉਣ ਵਾਲੇ ਕਾਂਗਰਸ ਆਗੂਆਂ ਦੀ ਪਛਾਣ ਲਈ ਵੱਡਾ ਜਾਲ ਵਿਛਾਇਆ ਹੋਇਆ ਹੈ। ਅਮਰਿੰਦਰ ਸਰਕਾਰ ਦੀਆਂ ਬਾਜ਼ ਅੱਖਾਂ ਪਿੰਡ-ਪਿੰਡ ਅਤੇ ਸ਼ਹਿਰ-ਕਸਬਿਆਂ ’ਚ ਘੁੰਮ ਰਹੀਆਂ ਹਨ। ਹਲਕਾ ਵਾਈਜ਼, ਸ਼ਹਿਰ, ਕਸਬਾ, ਪਿੰਡ ਅਤੇ ਵਾਰਡ

ਪੱੱਧਰ ’ਤੇ ਰੈਲੀ ਦੀਆਂ ਤਿਆਰੀਆਂ ’ਚ ਜੁਟੇ ਵਿਧਾਇਕਾਂ, ਸਾਬਕਾ ਵਿਧਾਇਕ, ਹਾਰੇ ਉਮੀਦਵਾਰਾਂ ਅਤੇ ਚੌਧਰ ਦੇ ਚਾਹਵਾਨ ਆਗੂਆਂ ਦੀ ਕਾਰਗੁਜਾਰੀ ਦੇ ਪੂਰੇ ਵੇਰਵੇ ਤਿਆਰ ਹੋ ਰਹੇ ਹਨ। ਸੂਤਰਾਂ ਤੋਂ ਪਤਾ ਲੱਗਿਆ ਹੈ ਕਿ ਸੂਬਾ ਸਰਕਾਰ ਨੇ ਸੂਹੀਆ ਅਤੇ ਖਾਕੀ ਤੰਤਰ ਦੇ ਸਾਦਾ ਵਰਦੀ ਕਰਮਚਾਰੀ ਤਾਇਨਾਤ ਕੀਤੇ ਹਨ। ਪਤਾ ਲੱਗਿਆ ਹੈ ਕਿ ਇਹ ਨਜ਼ਰਸ਼ਾਨੀ ਪਿਛਲੇ ਹਫ਼ਤੇ ਤੋਂ ਗੁਪਤ ਢੰਗ ਨਾਲ ਚੱਲ ਰਹੀ ਹੈ। ਜਿਸ ਲਈ ਇੱਕ ਜ਼ਿਲ੍ਹੇ ਦੇ ਮੁਲਾਜਮਾਂ ਨੂੰ ਦੂਜੇ ਜ਼ਿਲ੍ਹਿਆਂ ’ਚ ਲਗਾਇਆ ਗਿਆ ਹੈ। ਤਾਂ ਜੋ ਮੁਲਾਮਜਾਂ ਦੀ ਕਾਂਗਰਸ ਆਗੂਆਂ ਨਾਲ ਨੇੜਤਾ ਗੁਪਤ ਰਿਪੋਰਟ ਨੂੰ ਪ੍ਰਭਾਵਤ ਨਾ ਕਰ ਜਾਵੇ।

          ਉੱਚ ਪੱਧਰੀ ਸੂਤਰਾਂ ਦਾ ਕਹਿਣਾ ਹੈ ਕਿ ਕਾਂਗਰਸ ਦੇ ਵੱਡੀ ਗਿਣਤੀ ਆਗੂ ਸੂਬਾ ਅਤੇ ਕੇਂਦਰੀ ਪੱਧਰ ’ਤੇ ਚੈਅਰਮੈਨੀਆਂ ਅਤੇ ਸਰਕਾਰੀ ਚੌਧਰਾਂ ਲਈ ਵੱਡੇ-ਵੱਡੇ ਹੱਥ-ਪੈਰ ਮਾਰ ਰਹੇ ਹਨ। ਦਹਾਕੇ ਬਾਅਦ ਸੱਤਾ ’ਚ ਪਰਤੀ ਅਮਰਿੰਦਰ ਸਰਕਾਰ ਲਈ ਬਹੁਗਿਣਤੀ ਵਰਕਰਾਂ ਨੂੰ ਸੱਤਾ ਤੰਤਰ ਐਡਜਸਟ ਕਰਨਾ ਵੱਡੀ ਸਮੱਸਿਆ ਬਣਿਆ ਹੋਇਆ ਹੈ।

         ਅਜਿਹੇ ਵਿੱਚ ਮਹਾਰਾਜਾ ਅਮਰਿੰਦਰ ਸਿੰਘ ਦੀ ਅੰਦਰੂਨੀ ਸੁਪਰ ਸਕੇਲ ਟੀਮ ਨੇ ਚੌਧਰ ਦੇ ਚਾਹਵਾਨਾਂ ਵਿੱਚੋਂ ਫੋਕੀਆਂ ਟਾਹਰਾਂ ਵਾਲਿਆਂ ਦੀ ਛਾਂਟੀ ਕਰਨ ਲਈ ਇਹ ਜੁਗਤ ਭਿੜਾਈ ਹੈ। ਹਾਈਕਮਾਂਡ ਨੂੰ ਮਹਿਸੂਸ ਹੋ ਰਿਹਾ ਹੈ ਕਿ ਡਰਾਇੰਗ ਰੂਮ ਰਾਜਨੀਤੀ ਵਾਲੇ ਕਈ ਆਗੂ ਦਰਬਾਰੀ ਹਾਜ਼ਰੀਆਂ ਸਦਕਾ ਹੀ ਲੀਡਰਸ਼ਿਪ ਨੂੰ ਗੁੰਮਰਾਹ ਕਰਕੇ ਚੌਧਰਾਂ ਖੱਟ ਜਾਂਦੇ ਹਨ। ਜਿਸ ਨਾਲ ਪਾਰਟੀ ਕਾਡਰ ਅਤੇ ਜ਼ਮੀਨੀ ਆਗੂਆਂ ਦੇ ਮਨੋਬਲ ਨੂੰ ਠੇਸ ਪੁੱਜਦੀ ਹੈ।

     

  ਪਤਾ ਲੱਗਿਆ ਹੈ ਕਿ ਅਗਾਮੀ ਲੋਕਸਭਾ ਚੋਣਾਂ ’ਚ 13 ਸੀਟਾਂ ਜਿੱਤਣ ਲਈ ਅਮਰਿੰਦਰ ਸਰਕਾਰ ਅਗਲੇ ਕੁਝ ਮਹੀਨਿਆਂ ਵਿੱਚ ਨਵੀਂ ਤਕਨੀਕ ਅਤੇ ਬਿਹਤਰ ਕਾਰਗੁਜਾਰੀ ਨਾਲ ਸਾਹਮਣੇ ਆ ਸਕਦੀ ਹੈ। ਜੇਕਰ ਸੂਤਰਾਂ ਦੀ ਮੰਨੀਏ ਤਾਂ ਮੋਤੀਆਂ ਵਾਲੀ ਸਰਕਾਰ ਦੇ ਸਿਆਸੀ ਵਿਹੜੇ ਕਿੱਲਿਆਂਵਾਲੀ ਰੈਲੀ ’ਚ ਵੱਧ ਭੀੜ ਜੁਟਾਉਣ ਵਾਲੇ ਕਾਂਗਰਸ ਆਗੂਆਂ ਦਾ ਸਿਆਸੀ ਭਵਿੱਖ ਹੀ ਚੜ੍ਹਦੀ ਸਵੇਰ ਵੱਲ ਵਧੇਗਾ।

       ਕੈਪਟਨ ਸਰਕਾਰ ਦੇ ਨਾਲ ਕਾਂਗਰਸ ਤੰਤਰ ਵੱਲੋਂ ਕਾਰਪੋਰੇਟ ਸਟਾਈਲ ਵਿੱਚ ਰੈਲੀ ਸਬੰਧੀ ਅੰਕੜੇ ਜੁਟਾ ਰਿਹਾ ਹੈ। ਜਿਸ ਤਹਿਤ ਰੈਲੀ ’ਚ ਆਉਣ ਵਾਲੀ ਇੱਕ-ਇੱਕ ਬੱਸ ਅਤੇ ਹਰੇਕ ਵਹੀਕਲ ਦੇ ਡਰਾਈਵਰ ਜਾਂ ਉਸ ’ਚ ਆਉਣ ਵਾਲੇ ਕਾਂਗਰਸ ਵਰਕਰਾਂ ਦੇ ਮੋਬਾਇਲ ਨੰਬਰਾਂ ਦੀਆਂ ਸੂਚੀਆਂ ਤਿਆਰ ਕੀਤੀਆਂ ਜਾ ਰਹੀਆਂ ਹਨ। ਜਿਸ ਨਾਲ ਜ਼ਰੂਰਤ ਪੈਣ ਉਸ ਵਹੀਕਲਾਂ ਦੀ ਲੋਕੇਸ਼ਨ ਅਤੇ ਵਹੀਕਲ ’ਚ ਸਵਾਰ ਵਿਅਕਤੀਆਂ ਦੀ ਗਿਣਤੀ ਬਾਰੇ ਪਤਾ ਕੀਤਾ ਜਾ ਸਕੇ। ਕਾਂਗਰਸ ਹਾਈਕਮਾਂਡ ਰੈਲੀ ’ਚ ਪੁੱਜਣ ਵਾਲੇ ਹਰ ਵਿਅਕਤੀ ਦੇ ਪੰਡਾਲ ’ਚ ਪਹੁੰਚਣ ਨੂੰ ਯਕੀਨੀ ਬਣਾਉਣ ’ਚ ਜੁਟੀ ਹੋਈ ਹੈ। ਅਜਿਹੇ ਵਿੱਚ ਹੁਣ ਤੱਕ ਕਰੀਜਦਾਰ ਕੁਰਤੇ ਪਜਾਮੇ ਵਾਲੀ ਸਿਆਸਤ ਦੇ ਧਾਰਨੀ ਆਗੂਆਂ ਲਈ ਸਿਆਸੀ ਰੁਤਬਿਆਂ ਦੇ ਘਰ ਦੂਰ ਹੋ ਸਕਦੇ ਹਨ।