* ਡੱਬਵਾਲੀ ’ਚ ‘ਦਿੱਲੀ ਚੱਲੋਂ ਜਨ ਜਾਗ੍ਰਤੀ ਮਹਾਂਸੰਮੇਲਨ’ ’ਚ ਤਿੰਨ ਸੂਬਿਆਂ ਤੋਂ ਪੁੱਜਿਆ ਕਿਸਾਨ ਜਲੌਅ
* ਐਲਨਾਬਾਦ ਉਪ ਚੋਣ : ਸੰਯੁਕਤ ਮੋਰਚਾ ਵੱਲੋਂ ਕਿਸੇ ਦੀ ਹਮਾਇਤ ਨਹੀਂ, ਭਾਜਪਾ ਦਾ ਹੱਦ ’ਚ ਰਹਿ ਕੇ ਵਿਰੋਧ ਹੋਵੇ
* ‘ਇਖ਼ਲਾਕੀ ਤੌਰ ’ਤੇ ਸੰਘਰਸ਼ ਜਿੱਤਿਆ ਜਾ ਚੁੱਕਾ, ਕੇਂਦਰ ਸਿਰਫ਼ ਇੱਜਤ ਬਚਾਉਣ ਦਾ ਰਾਹ ਲੱਭ ਰਹੀ’
ਇਕਬਾਲ ਸਿੰਘ ਸ਼ਾਂਤ
ਡੱਬਵਾਲੀ: ਹਰਿਆਣਾ ਦੇ ਮੁੱਖ ਮੰਤਰੀ ਮਨਹੋਰ ਲਾਲ ਨੂੰ ਖੇਤੀ ਕਾਨੂੰਨੀ ਖਿਲਾਫ਼ ਸੰਘਰਸ਼ਸ਼ੀਲ ਕਿਸਾਨਾਂ ਖਿਲਾਫ਼ ਲੱਠ ਚੁੱਕਣ ਵਾਲਾ (ਵਾਪਸ ਲਿਆ) ਬਿਆਨ ਖਾਸਾ ਮਹਿੰਗਾ ਪੈਣ ਜਾ ਰਿਹਾ ਹੈ। ਸੰਯੁਕਤ ਕਿਸਾਨ ਮੋਰਚੇ ਦੇ ਮੁਹਰੀ ਆਗੂ ਬਲਵੀਰ ਸਿੰਘ ਰਾਜੇਵਾਲ ਨੇ ਐਲਾਨ ਕੀਤਾ ਕਿ ਮੁੱਖ ਮੰਤਰੀ ਮਨੋਹਰ ਲਾਲ ਖੱਟਰ ਨੇ ਅਜਿਹਾ ਗੈਰ-ਲੋਕਤੰਤਰਿਕ ਬਿਆਨ ਦੇ ਕੇ ਸੰਵਿਧਾਨਕ ਸਹੁੰ ਦੀ ਉਲੰਘਣਾ ਕੀਤੀ ਹੈ। ਮਨੋਹਰ ਲਾਲ ਦੇ ਖਿਲਾਫ਼ ਪੰਜਾਬ ਅਤੇ ਹਰਿਆਣਾ ਹਾਈਕੋਰਟ ਵਿੱਚ ਉਸਨੂੰ ਅਹੁਦੇ ਤੋਂ ਲਾਹੁਣ ਅਤੇ ਉਸਦੇ ਖਿਲਾਫ਼ ਮੁਕੱਦਮਾ ਕਰਨ ਦੀ ਮੰਗ ਕੀਤੀ ਜਾਵੇਗੀ। ਉਹ ਅੱਜ ਪੰਜਾਬ, ਹਰਿਆਣਾ ਅਤੇ ਰਾਜਸਥਾਨ ਦੇ ਤਿ੍ਰਵੇਣੀ ਡੱਬਵਾਲੀ ਵਿਖੇ ਖੇਤੀ ਕਾਨੂੰਨਾਂ ਖਿਲਾਫ਼ ਅੱਜ ਇੱਥੇ ‘ਦਿੱਲੀ ਚੱਲੋਂ ਜਨ ਜਾਗ੍ਰਤੀ ਮਹਾਂਸੰਮੇਲਨ’ ਨੂੰ ਸੰਬੋਧਨ ਕਰ ਰਹੇ ਸਨ। ਦਾਣਾ ਮੰਡੀ ਵਿਖੇ ਕਰਵਾਏ ਮਹਾਂ ਸੰਮੇਲਨ ’ਚ ਤਿੰਨੇ ਸੂਬਿਆਂ ਤੋਂ ਹਜ਼ਾਰਾਂ ਕਿਸਾਨਾਂ ਨੇ ਸ਼ਮੂਲੀਅਤ ਕਰਕੇ ਖੇਤੀ ਕਾਨੂੰਨ ਖਿਲਾਫ਼ ਡਟਵੇਂ ਸੰਘਰਸ਼ ਵਚਨਬੱਧਤਾ ਦੁਹਰਾਈ।
ਇਹ ਵੀ ਜ਼ਰੂਰ ਪੜ੍ਹੋ: ਕਾਂਗਰਸੀ ਉਮੀਦਵਾਰਾਂ ਦੀਆਂ ਮੁਸ਼ਕਿਲਾਂ ਵਧਾ ਸਕਦੀ ਮਨਪ੍ਰੀਤ ਬਾਦਲ ਦੀ ਚੁੱਪੀ!
ਇਸ ਮੌਕੇ ਕਿਸਾਨ ਆਗੂ ਗੁਰਨਾਮ ਸਿੰਘ ਚੜੂਨੀ, ਭਾਕਿਯੂ ਏਕਤਾ ਉਗਰਾਹਾਂ ਦੇ ਸੂਬਾ ਸਕੱਤਰ ਸ਼ੰਗਾਰਾ ਸਿੰਘ ਮਾਨ, ਡਾ. ਸਭੈਮਾਨ ਸਿੰਘ (ਅਮਰੀਕਾ), ਸਵਰਨ ਸਿੰਘ ਵਿਰਕ ਅਤੇ ਰਮਨਦੀਪ ਕੌਰ ਮਰਖਾਈ ਸਮੇਤ ਹੋਰਨਾਂ ਪ੍ਰਮੁੱਖ ਕਿਸਾਨ ਆਗੂ ਪੁੱਜੇ ਹੋਏ ਸਨ। ਇਸ ਮੌਕੇ ਬਲਵੀਰ ਸਿੰਘ ਰਾਜੇਵਾਲ ਨੇ ਕਿਹਾ ਕਿ ਕਾਰਪੋਰੇਟ ਘਰਾਨਿਆਂ ਦੀ ਪਿੱਛਲੱਗੂ ਬਣੀ ਕੇਂਦਰ ਸਰਕਾਰ ਨੇ ਕੋਵਿਡ ਜਿਹੇ ਨਾਜੁਕ ਸਮੇਂ ਖੇਤੀ ਕਾਨੂੰਨਾਂ ਸਮੇਤ ਕਾਫ਼ੀ ਲੋਕਮਾਰੂ ਕਾਨੂੰਨ ਵਜੂਦ ਵਿੱਚ ਲਿਆ ਦਿੱਤੇ। ਉਨਾਂ ਕਿਹਾ ਕਿ ਸੰਵਿਧਾਨ ਮੁਤਾਬਕ ਖੇਤੀ ਮਾਰਕਟਿੰਗ ਸੂਬਿਆਂ ਦਾ ਵਿਸ਼ਾ ਹੈ, ਪਰ ਭਾਜਪਾ ਸਰਕਾਰ ਨੇ ਧੱਕੇ ਨਾਲ ਕਾਨੂੰਨ ਪਾਸ ਕਰਕੇ ਦੇਸ਼ ਦੀ ਬਰਬਾਦੀ ਦਾ ਰਾਹ ਖੋਲ ਦਿੱਤਾ। ਉਨਾਂ ਸਰਕਾਰ ਨੂੰ ਦਿਮਾਗ ਦਰੁੱਸਤ ਕਰਨ ਦੀ ਚਿਤਾਵਨੀ ਦਿੰਦੇ ਕਿਹਾ ਕਿ ਕਿਹਾ ਸਰਕਾਰ ਪੁੱਠੇ ਰਾਹ ਤੁਰ ਪਈ ਹੈ, ਇੰਝ ਦੇਸ਼ ਨਹੀ ਬਚਣਾ।
ਰਾਜੇਵਾਲ ਨੇ ਕਿਹਾ ਕਿ ਸਰਕਾਰ ਦੀ ਨੀਂਦ ਹਰਾਮ ਕਰਾਂਗੇ। ਜਿਸ ਲਈ ਲੋਕਾਂ ਨੂੰ ਸਖ਼ਤ ਫੈਸਲੇ ਲੈਣੇ ਪੈਣਗੇ। ਉਨਾਂ ਕਿਹਾ ਕਿ 18 ਅਕਤੂਬਰ ਨੂੰ ਲਖੀਮਪੁਰ ਖੀਰੀ ਹਿੰਸਾ ਕੇਸ ਕੇਂਦਰ ਗ੍ਰਹਿ ਰਾਜ ਮੰਤਰੀ ਅਜੈ ਮਿਸ਼ਰਾ ਦੀ ਮੰਤਰੀ ਅਹੁਦੇ ਤੋਂ ਬਰਖਾਸਤਗੀ ਅਤੇ ਉਸਦੇ ਧਾਰਾ 120-ਬੀ ਦੇ ਮੁਕੱਦਮੇ ਦੀ ਮੰਗ ਤਹਿਤ ਦੇਸ਼ ਭਰ ’ਚ ਰੋਲੇ ਰੋਕੋ ਅੰਦੋਲਨ ਕੀਤਾ ਰਿਹਾ ਹੈ।
ਰਾਜੇਵਾਲ ਨੇ ਐਲਾਨ ਕੀਤਾ ਕਿ ਖੇਤੀ ਕਾਨੂੰਨਾਂ ਖਿਲਾਫ਼ ਸੰਘਰਸ਼ ਨੂੰ ਕਿਸਾਨ ਇਖ਼ਲਾਕੀ ਤੌਰ ’ਤੇ ਜਿੱਤ ਚੁੱਕੇ ਹਨ। ਕੇਂਦਰ ਸਰਕਾਰ ਹੁਣ ਖੇਤੀ ਕਾਨੂੰਨੀ ਬਾਰੇ ਸਿਰਫ਼ ਆਪਣੀ ਇੱਜਤ ਬਚਾਉਣ ਦਾ ਰਾਹ ਲੱਭ ਰਹੀ ਹੈ। ਕਿਸਾਨਾਂ ਦੇ ਇਤਰਾਜ਼ਾਂ ਸਰਕਾਰ ਕੋਲ ਕੋਈ ਦਲੀਲ ਨਹੀਂ ਹੈ, ਉਹ ਤਾਂ ਸਿਰਫ਼ ਝੂਠ ਬੋਲ ਕੇ ਸਮਾਂ ਲੰਘਾ ਰਹੀ ਹੈ। ਸ੍ਰੀ ਰਾਜੇਵਾਲ ਨੇ ਲੋਕਾਂ ਨੂੰ ਸ਼ਾਂਤੀ ਦੀ ਅਪੀਲ ਕਰਦੇ ਕਿਹਾ ਕਿ ਸੰਘਰਸ਼ ਬਗਾਵਤ ਨਾਲ ਹੀ ਬਲਕਿ ਸੰਯਮ ਨਾਲ ਜਿੱਤੇ ਜਾਂਦੇ ਹਨ।
ਇਹ ਵੀ ਜ਼ਰੂਰ ਪੜ੍ਹੋ: ਨਵੀਂ ਘਰੇੜ: ਮੀਟਿੰਗ ਸੀ.ਐਮ ਜਾਂ ਅਫ਼ਸਰਾਂ ਨਾਲ ਬਾਰੇ ਉਗਰਾਹਾਂ ਯੂਨੀਅਨ ਵੱਲੋਂ ਵਿਚਾਰ ਕਰਨ ਦਾ ਐਲਾਨ
ਉਨਾਂ ਲੋਕਾਂ ਨੂੰ ਸੁਚੇਤ ਕਰਦੇ ਕਿਹਾ ਕਿ ਪਿੰਡਾਂ ’ਚ ਪੁੱਜ ਕੇ ਕੁੱਝ ਲੋਕ ਬਗਾਵਤ ਦਾ ਸਮਾਂ ਦੱਸ ਕੇ ਹਥਿਆਰ ਚੁੱਕਣ ਲਈ ਭਰਮਾ ਰਹੇ ਹਨ। ਉਨਾਂ ਕਿਹਾ ਕਿ ਦੇਸ਼ ਸਾਡਾ ਹੈ ਅਤੇ ਸਰਕਾਰ ਕੋਲ ਅਸੀਮ ਸ਼ਕਤੀਆਂ ਹਨ। ਇਸ ਲਈ ਮੌਕੇ ਦੀ ਸਰਕਾਰ ਨੂੰ ਸ਼ਾਂਤ ਮਈ ਸੰਘਰਸ਼ ਨਾਲ ਸਿੱਧੇ ਰਾਹ ’ਤੇ ਲਿਆਉਣਾ ਪੈਣਾ ਹੈ। ਇਸ ਮੌਕੇ ਡਾ. ਸਵੈਮਾਨ ਸਿੰਘ ਨੇ ਦੇਸ਼ ਦੀ ਨੌਜਵਾਨੀ ਨੂੰ ਸਿੱਖਿਆ, ਸਿਹਤ, ਰੁਜ਼ਗਾਰ, ਨਸ਼ਾਖੋਰੀ ਤੋਂ ਮੁਕਤ ਭਾਰਤ ਸਿਰਜਣ ਦਾ ਸੱਦਾ ਦਿੱਤਾ। ਬੀਬੀ ਰਮਨਦੀਪ ਕੌਰ ਮਰਖਾਈ ਨੇ ਵੀ ਬੜੇ ਸਿੱਝਵੇਂ ਸ਼ਬਦਾਂ ’ਚ ਕਿਸਾਨਾਂ ਨੂੰ ਜੀਵਨ ਦਾ ਧੁਰਾ ਦੱਸਦੇ ਖੇਤੀ ਕਾਨੂੰਨੀ ਦੇ ਹੱਕ ’ਚ ਡਟਣ ਦਾ ਸੱਦਾ ਦਿੱਤਾ। ਐਲਨਬਾਦ ਉਪ ਚੋਣ ਬਾਰੇ ਮਹਾਂਸੰਮੇਲਨ ਦੀ ਸਟੇਜ ਤੋਂ ਐਲਾਨ ਕੀਤਾ ਗਿਆ ਕਿ ਕਿਸਾਨਾਂ ਦਾ ਕਿਸੇ ਉਮੀਦਵਾਰ ਨੂੰ ਸਮਰਥਨ ਨਹੀਂ ਹੈ। ਭਾਜਪਾ-ਜਜਪਾ ਦਾ ਵਿਰੋਧ ਜ਼ਰੂਰ ਕਰਨਾ ਹੈ, ਪਰ ਉਹ ਵਿਰੋਧ ਧੱਕੇਸ਼ਾਹੀ ਜਾਂ ਸੰਵਿਧਾਨਕ ਹੱਦਾਂ ਨੂੰ ਪਾਰ ਕਰਕੇ ਹੋਣਾ ਚਾਹੀਦਾ ਹੈ।
ਭਾਕਿਯੂ ਏਕਤਾ ਉਗਰਾਹਾਂ ਦੇ ਸੂਬਾ ਸਕੱਤਰ ਸੰਿਗਾਰਾ ਸਿੰਘ ਮਾਨ ਨੇ ਅਸ਼ੀਸ਼ ਮਿਸਰਾ ਦੀ ਗਿਰਫਤਾਰੀ ਨੂੰ ਕਿਸਾਨ ਰੋਹ ਦਾ ਸਿੱਟਾ ਦੱਸਦੇ ਕਿਹਾ ਕਿ ਮੌਜੂਦਾ ਕਿਸਾਨ ਅੰਦੋਲਨ ਨੇ ਮੋਦੀ ਹਕੂਮਤ ਦੇ ਫਿਰਕੂ , ਜਾਤਪਾਤੀ, ਇਲਾਕਾਈ ਤੇ ਅੰਨੇ ਰਾਸਟਰਵਾਦ ਰਾਹੀਂ ਲੋਕਾਂ ਚ ਵੰਡੀਆਂ ਪਾਉਣ ਦੀਆਂ ਚਾਲਾਂ ਨੂੰ ਮਾਤ ਦੇ ਕੇ ਨਵੇਂ ਕੀਰਤੀਮਾਨ ਸਥਾਪਿਤ ਕੀਤੇ ਹਨ। ਉਨਾਂ ਭਾਜਪਾ ਦੁਆਰਾ ਹਰਿਆਣਾ ਦੇ ਕਿਸਾਨਾਂ ਨੂੰ ਐਸ ਵਾਈ ਐਲ ਨਹਿਰ ਦੇ ਮੁੱਦੇ ਅਤੇ ਪੰਜਾਬੀ ਕਿਸਾਨੀ ਭੜਕਾਕੇ ਘੋਲ ਨੂੰ ਲੀਹੋਂ ਲਾਹੁਣ ਦੇ ਯਤਨਾਂ ਨੂੰ ਹਰਿਆਣਾ ਦੇ ਕਿਸਾਨਾਂ ਵੱਲੋਂ ਮਾਤ ਦੇ ਕੇ ਕਿਸਾਨ ਘੋਲ ਨੂੰ ਤਕੜਾਈ ਦੇਣ ਲਈ ਦਿਖਾਈ ਸੂਝ ਤੇ ਦਲੇਰੀ ਨੂੰ ਮਿਸਾਲੀ ਕਰਾਰ ਦਿੱਤਾ।
ਇਹ ਵੀ ਜ਼ਰੂਰ ਪੜ੍ਹੋ: ਸ਼ਾਹੀ ਨੌਕਰੀ: ਤਰਨ ਤਾਰਨ ’ਚ ਬੈਠਿਆਂ ਭੀਟੀਵਾਲਾ ਸਿਹਤ ਸੈਂਟਰ ’ਚ ਲੱਗਦੀ ਰਹੀ ‘ਹਾਜ਼ਰੀ’
ਇਸ ਮੌਕੇ ਹਰਿਆਣਾ ਕਿਸਾਨ ਏਕਤਾ ਦੇ ਆਗੂ ਗੁਰਪ੍ਰੇਮ ਸਿੰਘ ਦੇਸੂਜੋਧਾ, ਕੁੱਲ ਹਿੰਦ ਕਿਸਾਨ ਸਭਾ ਦੇ ਅੰਗਰੇਜ਼ ਸਿੰਘ ਬਨਵਾਲਾ, ਚਰਨਜੀਤ ਸਿੰਘ ਬਨਵਾਲਾ, ਡਾ. ਪਾਲਾ ਸਿੰਘ ਕਿੱਲਿਆਂਵਾਲੀ, ਡਾ. ਮਨਜਿੰਦਰ ਸਰਾਂ, ਸੰਜੈ ਮਿੱਡਾ, ਸੁਖਵਿੰਦਰ ਸਿੰਘ ਚੰਦੀ ਅਤੇ ਜਸਬੀਰ ਸਿੰਘ ਭਾਟੀ ਵੀ ਮੌਜੂਦ ਸਨ।
ਐਲਨਾਬਾਦ ਉਪ ਚੋਣ ’ਚ ਭਾਜਪਾ-ਜਜਪਾ ਦਾ ਸੂਪੜਾ ਸਾਫ਼ ਤੈਅ: ਚੜੂਨੀ
ਮਹਾਂਸੰਮੇਲਨ ’ਚ ਸ਼ਾਮਲ ਹੋਣ ਪੁੱਜੇ ਹਰਿਆਣਾ ਦੇ ਕਿਸਾਨ ਆਗੂ ਗੁਰਨਾਮ ਸਿੰਘ ਚੜੂਨੀ ਨੇ ਪੱਤਰਕਾਰਾਂ ਦੇ ਸੁਆਲਾਂ ਦੇ ਜਵਾਬ ’ਚ ਕਿਹਾ ਕਿ ਅਭੈ ਸਿੰਘ ਚੌਟਾਲਾ ਨੂੰ ਐਲਨਾਬਾਦ ਸੀਟ ਤੋਂ ਅਸਤੀਫ਼ਾ ਨਹੀਂ ਦੇਣਾ ਚਾਹੀਦਾ ਸੀ। ਉਹ ਵਿਧਾਨਸਭਾ ਅੰਦਰ ਬੈਠ ਕੇ ਵਧੀਆ ਢੰਗ ਨਾਲ ਆਵਾਜ਼ ਉਠਾ ਸਕਦੇ ਸਨ। ਚੜੂਨੀ ਨੇ ਕਿਹਾ ਕਿ ਐਲਨਾਬਾਦ ਉਪ ਚੋਣ ’ਚ ਭਾਜਪਾ-ਜਜਪਾ ਦਾ ਸੂਪੜਾ ਸਾਫ਼ ਹੋਣਾ ਤੈਅ ਹੈ। ਉਨਾਂ ਕਿਹਾ ਕਿ ਐਲਨਾਬਾਦ ਉਪ ਚੋਣ ’ਚ ਭਾਜਪਾ ਉਮੀਦਵਾਰ ਨੂੰ ਵੋਟ ਨਾ ਦੇਣ ਵਾਜਬ ਹੈ। ਦਫ਼ਤਰ ਨਾ ਖੁੱਲਣ ਨਾ ਦੇਣਾ ਜਾਂ ਧੱਕਾ-ਮੁੱਕੀ ਕਰਨ ਕਿਸੇ ਪੱਖੋਂ ਵਾਜਬ ਨਹੀਂ ਹੈ। ਇਸ ਕਿਸਾਨਾਂ ਨੂੰ ਵਿਰੋਧ ਦਾ ਜਾਇਜ਼ ਢੰਗ ਵਰਤਣਾ ਚਾਹੀਦਾ ਹੈ। ਉਨਾਂ ਇੰਝ ਧੱਕਾ-ਮੁੱਕੀ ਨਾਲ ਕਿਸਾਨ ਸੰਘਰਸ਼ ਦੀ ਬਦਨਾਮੀ ਹੋ ਜਾਵੇਗੀ। ਉਨਾਂ ਮੰਡੀਆਂ ’ਚ ਕਿਸਾਨਾਂ ਨੂੰ ਖਰੀਦ ਪ੍ਰਬੰਧਾਂ ’ਚ ਪਰੇਸ਼ਾਨ ਕਰਨ ਦੇ ਦੋਸ਼ ਲਗਾਏ ਹਨ। ਟੀਕਰੀ ਅਤੇ ਸਿੰਘੂ ਬਾਰਡਰ ਨੂੰ ਖਾਲੀ ਕਰਵਾਉਣ ਸਬੰਧੀ ਮੁੱਖ ਮੰਤਰੀ ਦੇ ਬਿਆਨ ਇੱਕ ਸੁਆਲ ’ਤੇ ਚੜੂਨੀ ਨੇ ਆਖਿਆ ਕਿ ਖਾਲੀ ਕਰਵਾਉਣਾ ਕਿਸੇ ਦੀ ਬਾਪ ਦਾ ਤਾਕਤ ਹੈ। ਰਸਤਾ ਕਿਸਾਨਾਂ ਨੇ ਨਹੀਂ, ਬਲਕਿ ਸਰਕਾਰ ਨੇ ਰੋਕਿਆ ਹੋਇਆ ਹੈ।
No comments:
Post a Comment